55. 1427 г. июня 22. Послание митрополита Фотия в Псков, о стригольниках

Из рукописи Румянцевского музея № 204, л. 412–416, с указанием разночтений синодального списка в сборнике № 562, л. 324–327. Издано было в I-м томе Актов Исторических под № 33.

Благословение Фотия, митрополита киевского и всея Руси, в Псков, собору Святой Троицы и собору Святой Софии и собору Святого Николы, и посаднику, и старым посадникам, и архимандритам и игуменам и священническому чину, и всему христоименитому исполнению святого людства. Слышание мое, сынове, еже в преизначальных жительств ваших православных, еже между вас, богоизбранного Христова стада, сущих ныне некоторых нововозмущенных от пропинаемых диавольских сетей, и того яда отрыгновением, слышу, тех некоторых, яко отступлены от Бога, о своем крестьянстве небрегуще, но и чин великого Божьего священства и иночества яко ни во чтоже полагающе, но и умаляюще; и тех, по слышанию ²³⁶⁹ слышу, иже яко Садукеем онем проклятым подражающе суть, еже яко и воскресенью не надеюще быть мняху. И тое убо не от тех бысть таковое неразумье, но пришедшее тем бысть помрачение духовных очей, отемненное падение, еже от древнего начальства на род человеческий, от общего врага диавола. И весте убо и онех Израильских людей, како от всех языков превозлюбленны суще Богу, и того же занятием врага дьявола колико зело помрачишася и всяческих благодарованных нашего Творца и своего Зиждителя забыша, и истуканным пожроша ²³⁷⁰ , и убить на нь поустишася. ²³⁷¹ И того же врага запятием на род человеческий, потоп и огнь от Бога на землю низпослася. И того же врага злоухищрение весте, како и законопреступных царей и мучителей безбожное шатание бысть и на предания Божьего закона и на божественных Апостолов; такожде весте, еже о том предании благочестивого нашего ²³⁷² истинного православного всеисполнения ²³⁷³ христианской веры колико добропобедные мученики своих кровей о том прольяша. И весте же, от того же вышереченного ²³⁷⁴ врага диавола того сетей пропинаемых, коликих царей на законопреступление; и на иконоборство святых икон воздвиже, и того же злоухищрением коликих тех от Бога отпастись сотвори. И весте убо и онех еросоначальных и зломудрственных, от Бога проклятых и до конца омерзостных, злочестивого Apия оного, и Македония, и Hecтория, и Севгира прочих тех от Бога отчужденных ов убо от тех на Сына Божьего единородного хулу, яко яда, изблеваше, и ов же на животворящий Святой Дух, еже от Отца исходящий, хулу глаголаше, и ин же ²³⁷⁵ зломудрствуй глаголаше на пречистую Богородицу. И первее же благоуразумеся о сем равному в Апостолах, первому царю Константину и иным благочестивым царям; и тe благочестивые великие цари, с божественными и святыми Отцами, со всеми семью вселенскими соборами, иных злочестивых царей и царские же таковые злочестивые боренья и злонеистовства и шатание на святые иконы и на православие низложиша, и закон же и священничество и предание христианской веры утвердивше, с божественными и священными правилами, и предаша церкви Божьей: и от тех святых всех вселенских соборов не исправляющих православие истинное, по вере с делами, но инак ²³⁷⁶ мудрствующих, и тe божественные святые Отцы таковых от Божьей церкви мечами духовными отсекоша, и от христианства отлучиша и проклятью вечному осудиша. И тe убо, аще таковые в вас обретаются, словесами глаголюще себя христиане, делесы же яко не суще, о преданном великом православном и христианском предании яко нерадяще, по вышереченному, яко и чин великого Божьего священства умаляюще, и по великого Апостола Павла слову, и «иных смущающе, хотяще превратить благовестие Христово», по того великого проповедника Павла слову: «аще, рече, мы или ангел с небес благовестит вам, паче еже благовестихом вам, анафема да будет; и якоже предрекохом, и паки о сем реку: аще кто вам благовестит паче, еже приясте, анафема да будет». И оттуда же убо таковыми божественных Апостолов от Христа данными основаниями и властью христианская веpa благоутвердится; и та же ²³⁷⁷ великая власть, по Христовой заповеди, и святительскому чину и священническому дастся: еже единого Бога дело бысть, то великому Божьему священству дело вручено бысть, еже ²³⁷⁸ грехи человеческие прощать. И великий убо Деонисий Ареопагитсий пишет о чине святительском и о великом Божьем священстве и о иночестве, яко подобны ангельским чином небесным устраяя тех быть. И аще же, чрез то, суть в вас таковые обретающиеся ересоводцы, покрадены от врага диавола, и тех божественных Апостолов и богоносных Отцов укрепление и основание рушаще, и чин великого того Божьего священства и своего христианства яко уничижающе, по выше о тех реченному, конечне яко не надеющеся и воскресению быть: и о сих же падении Богу ведущу, колико ми есть рыдание. И благословляю же вас, своих детей, великое ваше богоразумие, учить таковых и восставлять в богоразумие. А аще ли же таковые до конца дьявольским возмущением и запятием в ров погибели ниспадут, и будут в таком падении, и никако радящи к возникновению: и таковые яко Христу не работающе, но ²³⁷⁹ своей погибели; и вы убо, священники, никако приношения тех приимайте к церквам Божьим, и отлучайте таковых ²³⁸⁰ и отметайте, яко согнилые уды, от здравого телa церкви Христовой; а мирские же все никако с теми соприобщайте ²³⁸¹ себя в ястьи и питии, и да никако оскверните себя с таковыми, дóндеже с покаянием и со слезами обратятся таковые в благоразумие истинного христианства. Смотрите же о сих всех прилежне, православные все о Господе и Господни священники, да никако сообщение ваше с теми падшими будет, до их обращения и покаяния к Богу о сем и благопокорения к своим духовным отцам: ино по великого Апостола Павла слову, к Коринфянам пишуща: «предайте, рече, такового, во измождение ²³⁸² плоти, яко да дух спасется», рекше по всему отлучайте их от себя, аще не покаются, и яко да те в познание придут своего православия. А аще дьявольским ²³⁸³ помрачением в том и пребудут, и зде аще и ²³⁸⁴ временно по долготерпению Божьему не воздастся сим суд и месть наскоре, но приимут таковые в он великий страшный день осуждение великого Христова евангельского слова: «не приемляй, рече, глагол моих завещания, и аз не сужу ему, но слово еже глаголах, и то судит ему в последний день». И о сем же всем, православии все о Господе, молю вы смотрение иметь; прилежное о отпадших тех, ко возникновению и к исправлению на богоразумие о сдеянных от них неподобных деяний, яко да обратятся к Богу с покаянием и теплыми слезами. И о семъ же и преже пространно писах о тех заблужденных и о отпадших от Бога, зовомых стригольниках, и ныне сиe пишу, ради их познания и обращения. А не обратятся в богоразумие и в чин по всему православного христианства, и благословляю вас своих детей, от великого и до мала, никако с ними ни в чем же сообщайте себя, и отпишите ко мне: и аз по божественным и священным правилам сотворю на таковых суд и осуждение. А милость Божья, и молитва моя и благословенье да есть о всем с великим вашим православием, с живущими с вами по божественным и священным правилам, и с держащими истинную православную христианскую веру. А дана грамота на Москве, месяца июня в 22 день, в лето 6935, индикта 5.