53. 1426 г. февраля 2. Послание митрополита Фотия в Псков, по случаю моровой язвы

Из рукописи Румянц. Музея № 204, л. 433–438; сверено со списками, находящимися в синодальном сборнике № 562, л. 393–398 и в июньской книге Макарьевских Миней-Четьих (синод. сп. л. 654; успен. сп. л. 630 об.). Издано было в I-м томе Актов Исторических под № 30.

Благословение Фотия, митрополита киевского и всея Руси, в Псков, собору Святой Троицы, и игуменам и попам, и всему священническому и иноческому чину, и старым посадникам и боярам, и властелям всем и владаемым, и всему купно исполнению святого людства. О чада о Господе возлюбленные нашего смирения! Многие и различные пути дал есть Творец наш Христос Владыка, своего образа в человеченью промышляя, еже како пещися и дела показовать о спасении нашем, и сими всеми в небесного райского бытия устраяя ны, свое достояние; ибо ²³⁴⁹ яко древле нас воскресив и отпадших ²³⁵⁰ от небытия в бытиe приведе, и в сынопорождение святым крещением породи, глаголющим великим начальным словом: «даст область чадам Божьим быть», православно верующим в он и ходящим путями его. И о сем же убo и всем, любимые о Господе, по долгу духовного ми настоятельства, преже убо многократ от самого истинного Евангелия, и от Апостолов же и от Пророков, и от божественных Отцов предания, и от всего божественного писания, преже и пространно словесами духовными и учительными писах к вам о вашей пользе духовной, предлагая вашей любви трапезу не брашна гибнущего, но пребывающего в животе вечном, услаждающего и просвещающего душу. И о всем же убо и по прирождению ²³⁵¹ ми духовному к вашей любви, аще и отдалением места от вас удален есмь, но от изначальства вашего породу, великой ради веры к Богу и теплоты духовной, и вашего о всем благочиния и попечения и благостояния истинного православной вашей державы, и о всем есть всегда сего ради духом яко не разлучно наше смирение с благоверием вашим; и якоже слышах того всегда о благопреспеянии всяком православного вашего пребывания, и духовно о сем радуяся бех. И посем же слышах, любимые, како грех ради наших, находящего на вы Божьего прещения, и о том, Бог весть, како по всем дням и часам неусыпающего к Богу ума и повседневного моего рыдания и слез о Христа моего пастве. ²³⁵²

И по сем же, чада мои, слышах от сына моего духовного, вашего посадника Федора и иных ваших послов, еже на вы Божье наказание и прещение от человеколюбия его ²³⁵³ , на милование и на милосердие его древнее к вам обращаемо; и о сем убо слышав духовно срадуюся зело. И понеже убо, яко от изначала, Творец наш Христос Владыка многоразличными тако наказаниями и болезнями всяко ²³⁵⁴ наказует ны, свое достояние, к исправлению, требуя обращения нашего, а не пагубы; и сего ради всяко множицей претит нам, корень щадя, яко да плоды сохранит. И се же любимые, и на нас бысть таковое Божье наказание, на Москву и на иные окрестные грады, и на Тверь и поиных стран. ²³⁵⁵ И о сем же убо токмо благодарим Божьих судеб глубину и его повеление, благодаря человеколюбия его неизреченную пучину, како не напрасно, ни горько взимает своего создания, по даруемой ²³⁵⁶ всей исполненной и уготовляемой христианской кончиной, с чистым покаянием и исповеданием, и с освящением масла, и причащением честного и животворящего Христова тела и божественной и животворящей его крови, и многократ и многие иже в подобии великого ангельского одеяния к Богу отходящих: и надеяние имею на человеколюбие Божье о отходящих тако к вечному животу. Молим же ся человеколюбцу Богу и надеяние паче имею ²³⁵⁷ , ожидая и того праведного его наказания на древнее милосердие на ны, на свое достояние ²³⁵⁸ , обратить. И [в] всех же сих належащих на ны праведных Владычних наказаниях должны есми купно все православные, трепеща и ужасаяся, прилежне о всем в познание прийти и обыскать себя, что ради яко тако стражем, или како откуду склонихомся с пути правого, и с обращением о всем и с слезами да потщимся паки взойти на пути правые, прибегающе к Богу, чисте о всем исповедающеся ему, с отступлением всех нечистот и страстей, и по Пророку Иоилю, о сих глаголющу, «освящать пост и проповедать богоугожение», рекше, от всех злых обращением и покаянием, всегда зовуще к нему сердцем сокрушенным: «горе, горе, яко близ день Господень отмщения!». Паки яко Пророком же рече: «обратитесь ко мне от всего сердца вашего, пощением и плачем и рыданием, и расторгните сердца ваши, а не ризы ваши, и обратитесь, рече, к Господу Богу вашему, яко милостив есть и щедр и долготерпелив, каяся о злобах человеческих». И к сему же Господь паки Пророком рече: «аще обратитесь ко мне, и аз обращюсь к вам». И сего ради в настоящих сих на ны Божьих наказаниях, потщимся лица свои слезами омывать и души свои очистить от грехов пощением и прилежными к Богу о всем молитвами, и обнажим к нему все язвы душ наших; а аще убо мы умолчим о неисправлениях наших всяческих, не уцеломудримся сими наказаниями, и тъй, тайное всех сèрдца ведый, и огнем имат искусить все дела наши, внегда будет время неизмолимого суда, а не очищению, ниже исповеданию, ни покаянию часа. Вам же священничествующим и иночествующим, по первых больших достойных наказаниях, и ныне вмале от сего пишу, яко Владыка наш Христос, поручая духовное настоятельство, и глаголет к нам: «аще убо вы стоите и не преложитесь, светила суще душам и телом, и се же и всего мира тело просвещенно будет; аще ли же вы, соль суще, и восмердитесь, и свет суще, и помрачитесь, тьма колика паче будет». И великий же Богословец Григорий, учитель всех о Бозе ²³⁵⁹ , сице глаголет освященным Богу: «вам убо паче глаголю, иже есте око церковное, и достояние тому не тьмой исполнену быть, ниже предстателем злым вам являться; аще же убо свет тьма, и по семь тьма паче колика будет». И сего же ради, Господни священники и инокии, молю вас ходить вам о всем по чину звания вашего, и подвизающе и возводяще о всем на исправления духовные Господня люди, и яко да и дела последуют словесем тем ²³⁶⁰ , по Христову слову: «яко да видят человеки добрые ваши дела и прославят Отца вашего, иже есть на небесах». Вам же посадникам и властелем всем, вмале же воспоминая, учительно глаголю: от Господа како дана есть на вы ²³⁶¹ власть и сила от Вышнего; и сего ради должники есте работать Господеви, а не человеком, а ниже лихвам и прибыткам неправедным жалеюще, милование же и заступление и правду всяку показующе к Господним людям, со всяким смирением и любовью, и суд же всяк Божьи правды имеюще, и помняще, егда будет ²³⁶² нелицемерного и немздоимного суда воздаяние; и сего ради никако превращая суда убогого, ниже стыдения имуще лица сильного, понеже бо рече: «суд жесток владалцем бывает»; и якоже убо и животворящий Дух завещает заповедь сию, глаголя: «накажитесь, рече, все судящие земли; работайте Господеви со страхом и радуйтесь ему с трепетом». Вы же, нарочитые града, молю вас, довольны бывайте своими уроками, наставляюще и других на правое и доброе течение, и благочестие благолепия, в куплях и в мерилах праведных Божью правду соблюдающе: понеже бо купля неправедна и мерила лукавые мерзки суть Богу, а купля же и мерила правые благословенны суть и приятны от Бога. И с сим же всем, любимые, молю вас, потщите себе и смерения друг другу и любви иметь, и совокупление всяко духовное, великого Христова превышьшего евангельского слова о любви помняще: «о сем, рече, разумеют все, яко мои ученики есте, аще любовь имате меж собой»; и купно же все к духовным началам и властям послушание и благоповиновение показующе, якоже глаголет о сих божественный Апостол: «ти бо бдят о душах ваших, яко слово хотяще воздать в день великого суда». И о сем же священники и иноки и все православные вкупе, молю вас, все православия достойное творить, веру и дела показующе, будучи друг ко другу блази, благоутробны и благопокорны, и милостыней плода благого, и щедротами иже о нищих, и с сими всеми содевающе Божью правду и чистоту; и о всем всегда вся язвы душ пред Сотворшим нас обнажающе, не поношающему, ни зазирающему, но всех тайное сердца ведущему нашему Владыке, но паче милующему нас и исцеляющему всякие наши язвы и болезни. И с сими всеми, любимые, купно все от душ наших и сердец предварим приходящее на нас праведные его наказания с исповеданием ²³⁶³ , и яко да человеколюбне и милостивне призрит на нас, на свое достояние, и всякого гнева да избавит нас, и да сподобит нас всякого пребогатного своего благовоздаяния. И молюсь, да благопреумножит о всем временном ²³⁶⁴ великого вашего православия, и паче о всем благостоянием и попечением и крепостью православной вашей державе, и по сем тьмочисленного, пребогатого благовоздаяния да сподобит вас в небесном своем бесконечном царствии, наследия онех будущих бесконечных благ, ихже благодатью и человеколюбием Господа и Бога и Спаса нашего Иисус Христа, молюсь получить вам. А благодать Божья о всем и милость, и молитва моя и благословение да есть о всем с благоверием вашим и со всем исполнением ²³⁶⁵ святого людства православной вашей державы. А дана грамота в Владимире, месяца февраля во 2 день, индикта 4.