Владыко Вседержителю, Святый Царю! Призри с небес и виждь, како враждуют народы и замышляют друг на друга суетное и злобное, како содрагаются все от воспоминания о бывших ужасах военных и трепещут от ожидания уготовляемых новых, еще более страшных.
О Многомилостиве! Умилосердись о созданиях Твоих. Прости грехи и беззакония наши, их же ради многия скорби, беды и устрашения приидоша на нас. Благодатию Пресвятого Духа ороси изсохшия любовию сердца людския, терниями самолюбия, ненависти и зависти, злобы, вражды и лукавства и иных беззаконий поросшия, да возрастят они горящую к тебе и к братиям любовь, и ею да будут истреблены все распри, раздоры, разделения, междоусобия и войны, да все народы не устами едиными глаголют о мире, но всем сердцем возлюбивше его непритворно раскуют мечи свои и копья на орудия мирнаго делания и к мирному токмо делу обратятся.
Человеколюбивый и Милостивый! Усердно молим Тя: мир миру Твоему даруй, Церквам Твоим, людям православным и всем творениям Твоим. Ты бо еси Царь мира и мира Твоего несть предела, и Тебе слава и благодарение и поклонение от всех да возсылается, и ныне и присно и до скончания века веков. Аминь.
Письма разных лиц к святителю Афанасию (Сахарову). Книга 2. О-Ю
Молитва о мире была написана святителем Афанасием (Сахаровым) во время Великой Отечественной войны.