Текст акафиста одобрен для употребления за богослужением и в домашней молитве на заседании Священного Синода 27 декабря 2024 года (журнал № 150).
Кондак 1
Избра́нному на служе́ние царю́ и оте́честву страстоте́рпцу но́вому Евге́нию, да́же до конца́ ве́рность соблю́дшему и по за́поведи Христо́вой за дру́ги своя́ ду́шу свою́ положи́вшему, похва́льное воспева́ем пе́ние: я́ко предстоя́й со дерзнове́нием Царю́ ца́рствующих, твои́ми моли́твами от вся́ких бед и боле́зней свобожда́й нас, да благода́рственно зове́м ти: ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Икос 1
А́нгельстии чи́ни возра́довашася, ви́дяще све́тлую ду́шу твою́ восходя́щу от земли́ на не́бо и ку́пно с ца́рственными страстоте́рпцы за прия́тие страда́ний венце́м нетле́нным увенча́нну. Мы же, дивя́щеся твоему́ по́двигу, воспева́ем ти си́це:
Ра́дуйся, к му́ченическому во́инству сопричте́нный;
ра́дуйся, насле́дниче жи́зни и воскресе́ния.
Ра́дуйся, я́ко от Бо́га побе́дныя по́чести прия́л еси́;
ра́дуйся, я́ко сы́ном све́та соде́лался еси́.
Ра́дуйся, бу́рное мо́ре жития́ сего́ безбе́дно преплы́вый;
ра́дуйся, в приста́нище Небе́снаго Ца́рствия дости́гнувый.
Ра́дуйся, я́ко врата́ ра́йская тебе́ отверзо́шася;
ра́дуйся, я́ко во све́тлостех святы́х ны́не водворя́ешися.
Ра́дуйся, я́ко вене́ц благода́ти восприя́л еси́;
ра́дуйся, я́ко в ве́чныя кро́вы всели́лся еси́.
Ра́дуйся, я́ко с ца́рственными страстоте́рпцы в ве́чней сла́ве соца́рствуеши;
ра́дуйся, я́ко кровьми́ твои́ми, я́коже багряни́цею, Це́рковь украша́ется.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 2
Ви́дяще твое́ от ю́ности доброде́тельное житие́, блаже́нне Евге́ние, о́браз в тебе́ име́ем кро́тости, братолю́бия, терпе́ния и послуша́ния, ты бо попече́ние о еди́ном име́л еси́, ка́ко послужи́ти Бо́гу и бли́жним, и о чистоте́ души́ твоея́ прилежа́л еси́, непреста́нно взыва́я ко Го́споду: Аллилу́иа.
Икос 2
Ра́зум к науче́нию иску́сству врачева́ния дарова́ тебе́ Созда́тель, и ты я́ко благи́й ра́б вве́ренный ти тала́нт трудолю́бно умно́жил еси́, те́мже в ра́дость Го́спода своего́ вше́л еси́ и от чту́щих тя прославля́ешися си́це:
Ра́дуйся, до́браго ко́рене честно́е прозябе́ние;
ра́дуйся, во благоче́стии и правове́рии воспита́нный.
Ра́дуйся, души́ благоро́дство от Бо́га прия́вый;
ра́дуйся, враче́бнаго иску́сства отца́ твоего́ насле́дниче.
Ра́дуйся, измла́да на служе́ние бли́жним себе́ предугото́вивый;
ра́дуйся, душе́вную чистоту́ от ю́ности сохрани́вый.
Ра́дуйся, вся́, ели́ка че́стна и пра́ведна, помышля́вый;
ра́дуйся, стра́сти и похоте́ния плотска́я презре́вый.
Ра́дуйся, благоче́стие и целому́дрие возлюби́вый;
ра́дуйся, су́етная развлече́ния от себе́ отри́нувый.
Ра́дуйся, непоро́чно в ми́ре сем ева́нгельски пожи́вый;
ра́дуйся, мно́гими доброде́тельми пресве́тло укра́шенный.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 3
Си́лою свы́ше укрепля́емь, устреми́лся еси́ на служе́ние больны́м и стра́ждущим и по оби́лию любве́ твоея́ тех посеща́л еси́, отра́ду и исцеле́ние свои́м попече́нием подая́, они́ же благода́рным се́рдцем возноша́ху к Бо́гу песнь: Аллилу́иа.
Икос 3
Име́яй благо́е произволе́ние, су́етных благ ми́ра сего́ не иска́л еси́, но себе́ отверги́йся, в труде́х день и нощь пребыва́л еси́ и вся от души́ твори́л еси́, я́коже Го́споду, а не челове́ком. Сего́ ра́ди похваля́ем тя́ си́це:
Ра́дуйся, больны́я, я́коже Сама́го Христа́, посеща́вый;
ра́дуйся, любо́вию ко бли́жнему пламене́вый.
Ра́дуйся, врачу́ прему́дрый и многоиску́сный;
ра́дуйся, благи́х дел и ми́лостынь испо́лненный.
Ра́дуйся, я́ко всем в ско́рбех сострада́л еси́;
ра́дуйся, я́ко Бо́жий о́браз в бли́жнем зрел еси́.
Ра́дуйся, о бе́дных и убо́гих попече́ние име́вый;
ра́дуйся, милосе́рдному самаряни́ну уподо́бивыйся.
Ра́дуйся, я́ко Бо́га ра́ди тружда́лся еси́;
ра́дуйся, я́ко дрема́ние от о́чию твое́ю отложи́л еси́.
Ра́дуйся, я́ко ны́не от греха́ ду́ши на́ша врачу́еши;
ра́дуйся, я́ко душетле́нных неду́гов тьму отгоня́еши.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 4
Бу́рю мно́гих скорбе́й и лю́тых бра́ней возвиго́ша врази́ в преде́лех земли́ дальневосто́чныя Росси́йския. Ты́ же, святе Евге́ние, ви́дя сие́, я́ко ве́рный сын оте́чества своего́ не заме́длил еси́ ста́ти на по́двиг ра́тный ку́пно со христолюби́вым во́инством на́шим, сама́го себе́ и бли́жних свои́х Бо́гу всесоверше́нне предава́я и воспева́я Ему́: Аллилу́иа.
Икос 4
Слы́шавше о вели́ком милосе́рдии твое́м к стра́ждущим от ран на по́ли бра́ни, я́ко, и сме́рти не страша́ся, ру́ку по́мощи тем простира́ше, прославля́ем Бо́га и тебе́ велича́ем, зову́ще:
Ра́дуйся, я́ко ура́неным день и нощь служи́л еси́;
ра́дуйся, я́ко вели́кия ско́рби и труды́ подъя́л еси́.
Ра́дуйся, я́ко во́инов я́звы иску́сно врачева́л еси́;
ра́дуйся, я́ко непоколеби́м в по́двизех пребы́л еси́.
Ра́дуйся, неустраши́мый и добропобе́дный во́ине Христо́в;
ра́дуйся, царю́ и оте́честву ве́рно послужи́вый.
Ра́дуйся, я́ко малоду́шныя ободря́л еси́;
ра́дуйся, я́ко еле́ем ми́лости бли́жних цели́л еси́.
Ра́дуйся, на вся́кое де́ло благо́е угото́ванный;
ра́дуйся, му́жество с кро́тостию ди́вно сочета́вый.
Ра́дуйся, я́ко во вся ору́жия Бо́жия обле́клся еси́;
ра́дуйся, я́ко вся́ стре́лы лука́ваго разжже́нныя угаси́л еси́.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 5
Боготе́чную звезду́, во мра́це неве́дения сия́ющу, узре́вше тя́, досточу́дне Евге́ние, науча́емся го́рняя му́дрствовати, а не земна́я, и наипа́че о исполне́нии Ева́нгелия Христо́ва тща́ние име́ти. Сего́ ра́ди воспева́ем Го́спода, да́вшаго на́м такова́го свети́льника, и в ра́дости вопие́м: Аллилу́иа.
Икос 5
Взира́я на высоту́ Небе́сную, зре́л еси́ Творца́ вся́ческих, И́же повелева́ет нам люби́ти друг дру́га и вражду́ющих к примире́нию призыва́ет. Мы же, дивя́щеся прему́дрости твое́й и ра́зуму духо́вному, ублажа́ем тя си́це:
Ра́дуйся, любому́дрие ева́нгельское показа́вый;
ра́дуйся, ра́спри ми́ра сего́ возненави́девый.
Ра́дуйся, я́ко о́ко ума́ твоего́ горе́ возводи́л еси́;
ра́дуйся, я́ко Го́спода пред собо́ю при́сно зрел еси́.
Ра́дуйся, страх сме́рти си́лою ве́ры препобеди́вый;
ра́дуйся, за́поведь о любви́ ко враго́м испо́лнивый.
Ра́дуйся, ду́хом смире́нным моли́твы возноси́вый;
ра́дуйся, хра́мы Госпо́дни приле́жно посеща́вый.
Ра́дуйся, я́ко се́рдцем и усты́ Бо́га прославля́л еси́;
ра́дуйся, я́ко све́том Христо́вым бли́жния просвеща́л еси́.
Ра́дуйся, я́ко житие́м твои́м всех нас назида́еши;
ра́дуйся, я́ко от вражды́ ду́ши на́ша исцеля́еши.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 6
Пропове́дника ве́ры, братолю́бия и милосе́рдия уве́девши тя́, благочести́вая цари́ца восхоте́ поста́вити тя я́коже свети́льник на све́щнице и высо́кое служе́ние ти вве́рити, ты же с до́брою со́вестию да́же до сме́рти то́е проходи́л еси́, упова́я на Бо́га Жи́ва и поя́ при́сно: Аллилу́иа.
Икос 6
Возсия́л еси́ све́том доброде́телей твои́х посреде́ пала́т ца́рских, не то́кмо бо врач иску́сный показа́лся еси́, но и челове́к Бо́жий, благи́й и пра́ведный, те́мже с любо́вию взыва́ем ти:
Ра́дуйся, благоро́дству тезоимени́тый;
ра́дуйся, до́брых дел ревни́телю.
Ра́дуйся, смиренному́дрия и незло́бия сокро́вище;
ра́дуйся, в кро́тости вели́кую си́лу ду́ха яви́вый.
Ра́дуйся, тяготы́ бли́жняго носи́вый;
ра́дуйся, зако́н Христо́в испо́лнивый.
Ра́дуйся, клевету́ и злоре́чие возненави́девый;
ра́дуйся, ро́ду стропти́ву и развраще́нну не примеси́выйся.
Ра́дуйся, я́ко пла́мене сластолю́бия отбе́гл еси́;
ра́дуйся, я́ко к бла́гам ми́ра сего́ се́рдце не прилага́л еси́.
Ра́дуйся, я́ко непови́нен рука́ма и чи́ст се́рдцем был еси́;
ра́дуйся, я́ко того́ ра́ди благослове́ние от Го́спода прия́л еси́.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 7
Хотя́й благоче́стно послужи́ти царю́ с цари́цею и ча́ды, обре́лся еси́ тем дру́г при́сный и вра́ч благоиску́сный, в боле́знех ско́ро подава́яй утеше́ние и врачева́ние, наипа́че же стра́ждущаго царе́вича Алекси́я неусы́пный и ве́рный служи́тель. Сего́ ра́ди прославля́ем умудри́вшаго тя Бо́га и воспева́ем Ему́: Аллилу́иа.
Икос 7
Но́ваго наста́вника тя почита́ем, блаже́нне Евге́ние, ты бо о́бразом жития́ твоего́ и христоподража́тельным милосе́рдием науча́еши нас любви́ и сострада́нию к бли́жним, те́мже хва́лим тя́, глаго́люще си́це:
Ра́дуйся, стра́ждущих ве́лие утеше́ние;
ра́дуйся, больны́х ско́рое посеще́ние.
Ра́дуйся, ца́рственных страстоте́рпцев дру́же и́скренний;
ра́дуйся, му́дрый и до́брый чад воспита́телю.
Ра́дуйся, я́ко Пода́теля исцеле́ний в моли́твах призыва́л еси́;
ра́дуйся, я́ко струи́ врачева́ний оби́льно источа́л еси́.
Ра́дуйся, я́ко тя́жесть неду́га сы́на царе́ва облегча́л еси́;
ра́дуйся, я́ко цельба́ми твои́ми с одра́ боле́зни того́ возвига́л еси́.
Ра́дуйся, я́ко се́мя ева́нгельское се́рдцем до́брым и благи́м восприя́л еси́;
ра́дуйся, я́ко пло́д в терпе́нии сотвори́л еси́.
Ра́дуйся, еле́ем милосе́рдия свети́льник сво́й напо́лнивый;
ра́дуйся, с му́дрыми де́вами в черто́г Небе́сный вше́дый.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 8
Стра́нническое житие́ избра́л еси́ в годи́ну искуше́ния и после́довал еси́ ца́рственным страстоте́рпцем, па́че изво́лив страда́ти с людьми́ Бо́жиими, не́жели име́ти привре́менную жите́йскую сла́дость, взира́л бо еси́ на мздовоздая́ние и Подвигополо́жнику Христу́ вопия́л еси́: Аллилу́иа.
Икос 8
Все́ю душе́ю пре́дан быв Христу́ Го́споду, не отве́рглся еси́ и госуда́ря своего́ во вре́мя ско́рби, но, я́ко друг ве́рен и сострада́телен, сою́з любве́ нерасторжи́м сохрани́л еси́, те́мже от благогове́йно чту́щих па́мять твою́ слы́шиши сия́:
Ра́дуйся, ве́рный слуго́ царя́ земна́го и Царя́ Небе́снаго;
ра́дуйся, о́бразе че́сти и сла́вы сыно́в росси́йских.
Ра́дуйся, я́ко досто́йно зва́ния, в него́же зва́н бы́сть, ходи́л еси́;
ра́дуйся, я́ко безсме́ртных и нетле́нных благ возжела́л еси́.
Ра́дуйся, я́ко в любви́ до конца́ устоя́л еси́;
ра́дуйся, я́ко от тебе́ ве́рности науча́емся.
Ра́дуйся, земны́я по́чести отри́нувый;
ра́дуйся, сла́ву Небе́сную избра́вый.
Ра́дуйся, я́ко пома́занника Бо́жия чти́л еси́;
ра́дуйся, я́ко с ни́м на Небесе́х при́сно весели́шися.
Ра́дуйся, я́ко в сыне́х Бо́жиих вмени́лся еси́;
ра́дуйся, я́ко вене́ц испове́дания прия́л еси́.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 9
Все мно́жество ве́рных удиви́ся вели́чию ду́ха твоего́ и тве́рдости нра́ва, ты бо угото́вал еси́ ду́шу твою́ во искуше́ние и лю́тыя треволне́ния крепкоду́шне претерпева́л еси́, Го́сподеви прилепля́яйся и со благодаре́нием взыва́яй к Нему́: Аллилу́иа.
Икос 9
Вети́йствующий язы́к не возмо́жет по достоя́нию восхвали́ти высоту́ по́двиг твои́х, богоизбра́нне Евге́ние, оба́че мы, припа́дающе ко Влады́це Христу́, мо́лим пода́ти нам си́лу и дерзнове́ние воспева́ти тя си́це:
Ра́дуйся, я́ко крест страда́ний поне́сл еси́;
ра́дуйся, я́ко доброво́льное заточе́ние подъя́л еси́.
Ра́дуйся, на ка́мени за́поведей Бо́жиих се́рдце утверди́вый;
ра́дуйся, кро́тостию ко озлобля́ющим тя́ мир серде́чный стяжа́вый.
Ра́дуйся, ско́рби мно́гия до́блественно претерпе́вый;
ра́дуйся, кре́постию ду́ха адама́нту уподо́бивыйся.
Ра́дуйся, я́ко сама́го себе́ в же́ртву Влады́це прине́сл еси́;
ра́дуйся, я́ко на Го́спода всю наде́жду возложи́л еси́.
Ра́дуйся, я́ко до́бре по́двиг сво́й соверши́л еси́;
ра́дуйся, я́ко ве́ру пра́вую соблю́л еси́.
Ра́дуйся, жезло́м Креста́ враги́ порази́вый;
ра́дуйся, страда́нием на Не́бо возше́дый.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 10
Спасти́ хотя́ ду́шу свою́, служе́ния бли́жним и во изгна́нии свое́м во хла́дной Сиби́ри не оставля́л еси́, свя́те, и сего́ ра́ди прича́стник любве́ Бо́жия соде́лался еси́ и от вся́каго земна́го пристра́стия свободи́лся еси́, Еди́ному Го́споду угоди́ти жела́я, Ему́же вопия́л еси́: Аллилу́иа.
Икос 10
Стена́ и прибе́жище был еси́ лю́дем гра́да Тобо́льска, и́бо все́м благопристу́пна себе́ явля́л еси́ и неду́ги безме́здно врачева́л еси́. Бу́ди и ны́не ско́рый помо́щник в боле́знех и ско́рбех всем вопию́щым ти такова́я:
Ра́дуйся, бли́жнему я́ко Христу́ послужи́вый;
ра́дуйся, за́поведи ева́нгельския испо́лнивый.
Ра́дуйся, лю́тых неду́гов прогони́телю;
ра́дуйся, Врача́ душ и теле́с подража́телю.
Ра́дуйся, я́ко о боля́щих оте́ческое попече́ние име́л еси́;
ра́дуйся, я́ко заблу́ждших на пу́ть и́стинный наставля́л еси́.
Ра́дуйся, я́ко все́м от чи́стаго се́рдца благоде́тельствовал еси́;
ра́дуйся, я́ко в по́двизе самоотверже́ния чрез все́ житие́ пребы́л еси́.
Ра́дуйся, я́ко никого́же из приходя́щих к тебе́ без по́мощи оставля́л еси́;
ра́дуйся, я́ко и ны́не излива́еши врачевство́, исцеля́ющее ду́ши на́ша.
Ра́дуйся, я́ко скорбя́щим серде́чную ра́дость подае́ши;
ра́дуйся, я́ко моли́твами твои́ми исцеле́ния прие́млем.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 11
Пе́ние умиле́нное приими́ от нас, страстоте́рпче Евге́ние, ты бо, я́ко фимиа́м, во огнь вве́рженный, посреде́ пла́мене скорбе́й облагоуха́л еси́ ве́рных сердца́ благоуха́нием доброде́телей твои́х, те́мже тя, соше́дшеся, почита́ем и Бо́гу вопие́м: Аллилу́иа.
Икос 11
Свети́льник всесве́тлый, во мра́це безбо́жия сия́ющ, ви́дим тя, всехва́льне Евге́ние, дух бо твой па́че разгора́шеся от находя́щих искуше́ний, мы же, восхваля́юще му́жество и долготерпе́ние тво́е, взыва́ем си́це:
Ра́дуйся, страда́ний и уз не убоя́выйся;
ра́дуйся, вся до конца́ претерпе́вый.
Ра́дуйся, све́том благода́ти просвеще́нный;
ра́дуйся, стра́ха Бо́жия испо́лненный.
Ра́дуйся, я́ко убива́ющих те́ло не убоя́лся еси́;
ра́дуйся, я́ко ча́шу страда́ний до дна́ испи́л еси́.
Ра́дуйся, страстоте́рпче, я́ко зла́то в горни́ле искуше́нный;
ра́дуйся, терпе́ние непобеди́мое стяжа́вый.
Ра́дуйся, пра́ведному Авраа́му уподо́бивыйся;
ра́дуйся, чад свои́х Бо́гу преда́вый.
Ра́дуйся, я́ко ны́не на ло́не Авраа́мли почива́еши;
ра́дуйся, я́ко с му́ченики и пра́ведными ликовству́еши.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 12
Благода́тию Бо́жиею осеня́емь, досточу́дне Евге́ние, ле́стным глаго́лом богобо́рцев не внял еси́ и себе́ жи́ва мертвеца́ вмени́л еси́, ча́я улучи́ти жизнь ве́чную. Вре́менная бо су́етная вмени́в, ду́хом устреми́лся еси́ ко о́ному блаже́нству и сме́рти за Христа́ не устраши́лся еси́, в се́рдце свое́м воспева́я Ему́: Аллилу́иа.
Икос 12
Пою́ще му́ченическую кончи́ну твою́, ве́даем, я́ко а́ще и пред лице́м челове́ческим му́ку прия́л еси́, но упова́ние твое́ бысть безсме́ртия испо́лнено, те́мже сла́вим Го́спода, Победи́теля сме́рти, и благогове́йно взыва́ем ти:
Ра́дуйся, я́ко от се́тей вра́жиих душа́ твоя́ изба́вися;
ра́дуйся, я́ко от сме́рти в жизнь ве́чную преше́л еси́.
Ра́дуйся, на по́двиг му́ченичества во́лею устреми́выйся;
ра́дуйся, излия́нием крове́й твои́х ри́зу души́ своея́ убели́вый.
Ра́дуйся, сквозе́ огнь и во́ду проше́дый;
ра́дуйся, в поко́й ве́чный вше́дый.
Ра́дуйся, я́ко неви́димаго врага́ победи́л еси́;
ра́дуйся, я́ко в Небе́сный Иерусали́м восте́кл еси́.
Ра́дуйся, Христо́во благоуха́ние;
ра́дуйся, венцено́сче добропобе́дный.
Ра́дуйся, я́ко со А́нгелы ны́не водворя́ешися;
ра́дуйся, я́ко с ли́ки новому́чеников о нас ко Го́споду мо́лишися.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 13
О всехва́льный страстоте́рпче Христо́в Евге́ние! Пребыва́яй ны́не в Небе́сных оби́телех, приими́ от нас пе́сненное сие́ приноше́ние и моли́твами твои́ми испроси́ нам у Бо́га исцеле́ние от вся́каго неду́га и очище́ние грехо́в и беззако́ний на́ших, да обря́щем вход в ве́чное Ца́рство Го́спода на́шего Иису́са Христа́ и та́мо со все́ми святы́ми пое́м Ему́ при́сно: Аллилу́иа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
А́нгельстии чи́ни возра́довашася, ви́дяще све́тлую ду́шу твою́ восходя́щу от земли́ на не́бо и ку́пно с ца́рственными страстоте́рпцы за прия́тие страда́ний венце́м нетле́нным увенча́нну. Мы же, дивя́щеся твоему́ по́двигу, воспева́ем ти си́це:
Ра́дуйся, к му́ченическому во́инству сопричте́нный;
ра́дуйся, насле́дниче жи́зни и воскресе́ния.
Ра́дуйся, я́ко от Бо́га побе́дныя по́чести прия́л еси́;
ра́дуйся, я́ко сы́ном све́та соде́лался еси́.
Ра́дуйся, бу́рное мо́ре жития́ сего́ безбе́дно преплы́вый;
ра́дуйся, в приста́нище Небе́снаго Ца́рствия дости́гнувый.
Ра́дуйся, я́ко врата́ ра́йская тебе́ отверзо́шася;
ра́дуйся, я́ко во све́тлостех святы́х ны́не водворя́ешися.
Ра́дуйся, я́ко вене́ц благода́ти восприя́л еси́;
ра́дуйся, я́ко в ве́чныя кро́вы всели́лся еси́.
Ра́дуйся, я́ко с ца́рственными страстоте́рпцы в ве́чней сла́ве соца́рствуеши;
ра́дуйся, я́ко кровьми́ твои́ми, я́коже багряни́цею, Це́рковь украша́ется.
Ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Кондак 1
Избра́нному на служе́ние царю́ и оте́честву страстоте́рпцу но́вому Евге́нию, да́же до конца́ ве́рность соблю́дшему и по за́поведи Христо́вой за дру́ги своя́ ду́шу свою́ положи́вшему, похва́льное воспева́ем пе́ние: я́ко предстоя́й со дерзнове́нием Царю́ ца́рствующих, твои́ми моли́твами от вся́ких бед и боле́зней свобожда́й нас, да благода́рственно зове́м ти: ра́дуйся, страстоте́рпче врачу́ Евге́ние, любви́ и милосе́рдию нас науча́яй.
Молитва
О пресла́вный и добропобе́дный страстоте́рпче Христо́в, цели́телю и врачу́ Евге́ние, и́стинный во́ине Святы́я Це́ркве, оте́честву твоему́ сла́во и похвало́! Ты чрез все́ житие́ твое́ бе́дным и стра́ждущым послужи́л еси́ и царю́ боговенча́нному с супру́жницею его́ и ча́ды до́брый врач и друг при́сный показа́лся еси́, любо́вь нелицеме́рную ра́вно ко всем челове́ком име́я. Ты, не убоя́вся безбо́жнаго гоне́ния, Царю́ Небе́сному и царю́ земно́му да́же до сме́рти ве́рен пребы́л еси́ и я́ко пле́нник, ку́пно с ца́рственными страда́льцы от ме́ста на ме́сто преходи́л еси́, до́ндеже врата́ми пра́вды в Царство Небе́сное вшел еси́. Те́мже мо́лим тя, врачу́ изря́днейший, сто́лпе терпе́ния, земли́ Ру́сския ве́лие украше́ние, и́же му́жество тве́рдое и преклоне́ние пред во́лею Бо́жиею яви́вый: не преста́й моли́тися о нас ко Го́споду, да исцели́т я́звы душ и теле́с на́ших, да пода́ст на́м си́лу за́поведи Его́ животво́рныя соблюда́ти, да изба́вит нас от уз греха́ и безбо́жия, и оте́чество на́ше да сохрани́т в правосла́вии до сконча́ния ве́ка. Ами́нь.
Комментировать