да о́ни у́бо вожделѣ́вшiи пи́щи, показа́нiемъ по́сланыхъ, и от ну́жнаго хотѣ́нiя отвратя́тся, сі́и же вма́лѣ ску́дни бы́вше, и стра́нна приобща́тся вкуше́нiя.

Подоба́ше бо на о́ныхъ у́бо неизбѣ́жнѣй нищетѣ́ наити́ мучи́телствующихъ, си́мъ же то́кмо показа́ти, ка́ко врази́ и́хъ му́чишася.

И́бо егда́ тѣ́мъ на́йде же́стокъ звѣре́й гнѣ́въ, и угрызе́ньми сверѣ́пыхъ истребля́хуся змие́въ,

но не до конца́ пребы́сть гнѣ́въ тво́й: въ наказа́нiе же вма́лѣ смуще́ни бы́ша, зна́менiе имѣ́юще спасе́нiя, на воспомина́нiе за́повѣди зако́на твоего́:

обрати́выйся бо не [ве́щiю] зри́мою цѣля́шеся, но тобо́ю всѣ́хъ спаси́телемъ.

И въ се́мъ же показа́лъ еси́ враго́мъ на́шымъ, я́ко ты́ еси́ избавля́яй от вся́каго зла́:

тѣ́хъ бо акри́ды и му́хи поби́ша угрызе́нiемъ, и не обрѣ́теся цѣльба́ душа́мъ и́хъ, я́ко досто́йни бя́ху от таковы́хъ му́читися.

Сыно́въ же твои́хъ ниже́ ядови́тыхъ змие́въ зу́бы одолѣ́ша: ми́лость бо твоя́ прихожда́ше и изцѣля́ше и́хъ.

Въ па́мять бо слове́съ твои́хъ бя́ху усѣ́чени и ско́ро изцѣля́хуся, да не во глубину́ впа́дше забве́нiя отлуча́тся твоего́ благодѣя́нiя:

ниже́ бо зе́лiе, ниже́ обяза́нiе изцѣли́ и́хъ, но сло́во твое́, Го́споди, изцѣля́ющее вся́.

Ты́ бо живота́ и сме́рти вла́сть и́маши, и низво́диши да́же до вра́тъ а́да, и возво́диши.

Человѣ́къ же убива́етъ у́бо зло́бою свое́ю: изше́дшаго же ду́ха не возврати́тъ, ниже́ па́ки призыва́етъ ду́шу взя́тую.

Твоея́ же руки́ избѣжа́ти невозмо́жно е́сть:

отмета́ющiися бо тебе́ вѣ́дѣти нечести́вiи, въ крѣ́пости мы́шцы твоея́ бiе́ни бы́ша стра́нными дождьми́ и гра́дами, и бу́рями гони́ми неизбѣ́жно, и огне́мъ растаева́еми.

Пресла́вное бо, въ водѣ́ вся́ угаша́ющей мно́жае дѣ́йствоваше о́гнь: спобо́рникъ бо е́сть мíръ о пра́ведныхъ.

Овогда́ бо у́бо укроща́шеся пла́мень, да не сожже́тъ по́сланныхъ живо́тныхъ на нечести́выя: но сі́и зря́ще да вѣ́дятъ, я́ко от Бо́жiя суда́ стра́ждутъ гоне́нiе.

Овогда́ же и между́ водо́ю вы́ше си́лы о́гненныя паля́ше, да беззако́нныя земли́ порожде́нiя растли́тъ.

Вмѣ́сто же си́хъ а́нгелскою пи́щею пита́лъ еси́ лю́ди твоя́, и угото́ванъ хлѣ́бъ съ небесе́ посла́лъ еси́ и́мъ безъ труда́, вся́кое услажде́нiе въ себѣ́ имѣ́ющь и ко вся́кому сли́чный вкуше́нiю.

Существо́ бо твое́ сла́дость твою́ ко сыно́мъ пока́зоваше, и угожда́я еди́наго коего́ждо во́ли, я́коже кто́ хотя́ше, превраща́шеся.

Снѣ́гъ же и ле́дъ терпя́ху о́гнь и не растаява́ху: да увѣ́дятъ, я́ко плоды́ враго́въ истребля́ше о́гнь горя́щь во гра́дѣ и въ дожде́хъ блиста́ющь:

то́йже па́ки, да пита́ются пра́веднiи, [о́гнь] и свою́ забы́ си́лу.

Творе́нiе бо, тебѣ́ творцу́ всѣ́хъ служа́щее, распростира́ется на му́ку проти́ву непра́ведныхъ и легча́е твори́тся во благодѣя́нiе ра́ди на тя́ надѣ́ющихя.

Сего́ ра́ди и тогда́ во вся́ преобразу́емое всѣ́хъ корми́телницѣ благода́ти твое́й служа́ше къ во́ли тре́бующихъ:

да науча́тся сы́нове твои́, и́хже возлюби́лъ еси́, Го́споди, я́ко не рожде́нiя плодо́въ пита́ютъ человѣ́ка, но сло́во твое́ тебѣ́ вѣ́рующихъ соблюда́етъ.

Е́же бо огне́мъ нерастлѣ́но ско́ро от ма́лыя лучи́ со́лнечныя грѣ́емое растаява́шеся:

да зна́емо бу́детъ [всѣ́мъ], я́ко подоба́етъ предвари́ти со́лнце на благодаре́нiе тебѣ́ и къ восто́ку свѣ́та тебѣ́ поклони́тися.

Неблагода́рнаго бо упова́нiе я́ко зи́мный и́ней раста́етъ, и излiе́тся я́ко вода́ неключи́ма.

Преподо́бнымъ же твои́мъ превели́къ бѣ́ свѣ́тъ: и́хже у́бо гла́съ слы́шаше, о́браза же не ви́дяще, зане́же у́бо и они́ [того́жде] не страда́ху, ублажа́ху.

А я́ко не па́коствуютъ предоби́димiи, благодаря́ху, и е́же пронести́ся, благода́ти моля́ху.

Си́хъ ра́ди сто́лпъ огнегоря́щь, вожда́ у́бо невѣ́домаго путьше́ствiя, со́лнце же невреди́телное любоче́стнаго стра́нствованiя по́далъ еси́.

Досто́йни бо они́ лиши́тися свѣ́та и блюсти́ся во тмѣ́, и́же заключе́ныхъ стрежа́ху сыно́въ твои́хъ, и́миже имя́ше нетлѣ́нный зако́на свѣ́тъ вѣ́ку да́тися.

Совѣ́товавшихъ же и́хъ убива́ти младе́нцы преподо́бныхъ, и еди́ному отложе́ну ча́ду и спасе́ну, во обличе́нiе и́хъ отъя́лъ еси́ мно́жество ча́дъ, и ку́пно погуби́лъ еси́ въ водѣ́ зѣ́лнѣй.

О́ная бо но́щь предувѣ́дѣна бы́сть отце́мъ на́шымъ, да тве́рдо вѣ́дуще, и́мже кля́твамъ вѣ́роваша, возблагоду́шествуютъ.

Воспрiя́то же бы́сть от люді́й твои́хъ спасе́нiе у́бо пра́ведныхъ, враго́въ же истребле́нiе:

и́мже бо наказа́лъ еси́ супоста́ты на́шя, си́мъ на́съ призва́въ просла́вилъ еси́.

Сокрове́нно бо жря́ху преподо́бнiи о́троцы благи́хъ, и зако́нъ Божественный единомы́слiемъ завѣща́ша, та́яжде подо́бно, блага́я же и бѣ́дственная воспрiима́ти святы́мъ, отце́мъ уже́ предвоспѣва́ющымъ хвалу́.

Противоглася́ше же несогла́сный враго́въ во́пль, и плаче́вный слы́шашеся гла́съ пла́чущихъ младе́нцевъ.

Подо́бною же ме́стiю ра́бъ ку́пно съ господи́номъ казне́нъ бы́сть, и просты́й человѣ́къ съ царе́мъ та́яжде пострада́:

единоду́шно же вси́ во еди́нѣмъ и́мени сме́ртнѣмъ ме́ртвыхъ имѣ́яху безчи́сленныхъ: ниже́ бо ко погребе́нiю живі́и бя́ху дово́лни, поне́же во еди́нѣмъ мгнове́нiи честнѣ́йшiй ро́дъ и́хъ истребле́нъ бы́сть.

О всѣ́хъ бо не вѣ́рующе ра́ди чародѣя́нiй, а ра́ди пе́рвенцевъ истребле́нiя, исповѣ́даша люді́й сыно́въ Бо́жiихъ бы́ти.

Ти́хому бо молча́нiю содержа́щу вся́, и но́щи во свое́мъ тече́нiи преполовля́ющейся,

всемогу́щее сло́во твое́, [Го́споди,] съ небе́съ от престо́ловъ ца́рскихъ же́стокъ ра́тникъ въ среди́ну поги́бельныя земли́ сни́де.

Ме́чь о́стръ нелицемѣ́рное повелѣ́нiе твое́ нося́й, и ста́въ испо́лни вся́ сме́рти: и небесе́ у́бо каса́шеся, стоя́ше же на земли́.

Тогда́ внеза́пу привидѣ́нiя у́бо сно́въ лю́тѣ смути́ша и́хъ, стра́си же наидо́ша неча́янни,

и и́нъ ина́мо ве́рженъ е́ле жи́въ, ея́же ра́ди вины́ умира́ше, объявля́ше:

со́нiя бо, смути́вше и́хъ, сiе́ предвозвѣсти́ша: да не вѣ́дяще, его́же ра́ди злѣ́ стра́ждутъ, поги́бнутъ.

Прикосну́ся же нѣ́когда и пра́ведныхъ искуше́нiе сме́рти, пораже́нiе во пусты́ни бы́сть мно́жества: но не до́лго пребы́сть гнѣ́въ.

Потща́вся бо му́жъ непоро́ченъ предпобо́рствова, своея́ слу́жбы ору́жiе, моли́тву и ѳимiа́ма умилостивле́нiе прине́съ, сопроти́въ ста́ гнѣ́ву и коне́цъ положи́ бѣ́дствованiю, показа́въ, я́ко тво́й е́сть ра́бъ.

Одолѣ́ же поража́ющаго не си́лою тѣле́сною, ниже́ ору́жiя дѣ́йствiемъ, но сло́вомъ покори́ наказу́ющаго, кля́твы отце́въ и завѣ́ты воспомяну́въ.

Грома́дами бо уже́ па́дшымъ дру́гъ на дру́га ме́ртвымъ, посредѣ́ ста́въ, пресѣче́ гнѣ́въ и раздѣли́ къ живы́мъ пу́ть.

На оде́жди бо поди́ра бѣ́ ве́сь мíръ, и отце́въ сла́вы на извая́нiи четырерядова́го ка́менiя, и вели́чество твое́ на дiади́мѣ главы́ его́.

Си́мъ уступи́лъ искореня́яй и си́хъ устраши́ся: бѣ́ бо то́кмо искуше́нiе гнѣ́ва дово́лно.