на мѣ́стѣ, на не́мже закала́ютъ всесожже́нiе, да зако́лютъ овна́ и́же о преступле́нiи предъ Го́сподемъ, и кро́вь да пролiю́тъ на стоя́ла олтаря́ о́крестъ:

и ве́сь ту́къ его́ да принесе́тъ от него́, и чре́сла, и ве́сь ту́къ покрыва́ющiй утро́бу, и ве́сь ту́къ и́же на утро́бѣ,

и о́бѣ по́чки, и ту́къ и́же на ни́хъ, и́же на сте́гнахъ, и препо́нку, я́же на пе́чени, съ по́чками да отъи́метъ я́:

и вознесе́тъ я́ жре́цъ на олта́рь, прино́съ въ воню́ благово́нiя Го́споду: о преступле́нiи [бо] е́сть:

вся́къ му́жескъ по́лъ от жре́цъ да снѣ́стъ я́, на мѣ́стѣ святѣ да снѣдя́тъ я́: свята́я святы́хъ су́ть:

я́коже грѣха́ ра́ди, та́ко и преступле́нiя ра́ди, зако́нъ еди́нъ и́хъ: жре́цъ и́же помо́лится о не́мъ, ему́ да бу́детъ:

и жре́цъ принося́й всесожже́нiе человѣ́чо, ко́жа всесожже́нiя, е́же прино́ситъ о́нъ, ему́ да бу́детъ:

и вся́ка же́ртва, я́же сотвори́тся въ пещи́, и вся́ка, я́же сотвори́тся на огни́щи, или́ на сковрадѣ́, жерцу́, и́же прино́ситъ ю́, тому́ да бу́детъ:

и вся́ка же́ртва спря́жена съ еле́емъ, и я́же не спря́жена, всѣ́мъ сыно́мъ Ааро́нимъ кому́ждо ра́вно да бу́детъ.

Се́й зако́нъ же́ртвы спасе́нiя, ю́же принесу́тъ Го́споду:

а́ще у́бо похвале́нiя ра́ди принесе́тъ ю́, и принесе́тъ на же́ртву хвале́нiя хлѣ́бы от муки́ пшени́чны пря́жены въ еле́и, и опрѣсно́ки пома́заны еле́емъ, и муку́ пшени́чну смѣ́шену съ еле́емъ:

съ хлѣ́бы ква́сными да принесе́тъ да́ръ сво́й на же́ртву хвале́нiя спаси́телнаго:

и да принесе́тъ еди́нъ от всѣ́хъ даро́въ свои́хъ уча́стiе Го́споду: жерцу́ возлива́ющему кро́вь же́ртвы спасе́нiя, тому́ да бу́детъ:

и мяса́ же́ртвы хвале́нiя спаси́телнаго тому́ да бу́дутъ, и въ о́ньже де́нь принесу́тся, да снѣдя́тся: да не оста́вятъ от него́ на у́трiе:

и а́ще обѣ́тъ бу́детъ, или́ во́льный пожре́тъ да́ръ сво́й, въ о́ньже а́ще де́нь же́ртву свою́ принесе́тъ, да снѣ́стся, и на у́трiе:

и оста́вшееся от мя́съ же́ртвы до дне́ тре́тiяго на огни́ да сожже́тся:

а́ще же яды́й снѣ́стъ от мя́съ въ де́нь тре́тiй, не прiи́мется принося́щему ю́, ниже́ вмѣни́тся ему́: оскверне́нiе е́сть: душа́ же, я́же а́ще снѣ́стъ от ни́хъ, грѣ́хъ прiи́метъ:

и мяса́, я́же а́ще прико́снутся вся́кому нечи́сту, да не снѣдя́тся, на огни́ да сожгу́тся: вся́къ чи́стый да снѣ́стъ мяса́:

душа́ же, я́же а́ще снѣ́стъ от мя́съ же́ртвы спасе́нiя, я́же е́сть Го́споду, и нечистота́ его́ на не́мъ, поги́бнетъ душа́ о́на от люді́й свои́хъ:

и душа́, я́же а́ще прико́снется вся́кой ве́щи нечи́стѣй, или́ от нечистоты́ человѣ́чи или́ от четвероно́гихъ нечи́стыхъ, или́ вся́кой ме́рзости нечи́стѣй, и снѣ́стъ от мя́съ же́ртвы спасе́нiя, я́же е́сть Госпо́дня, поги́бнетъ душа́ та́ от люді́й свои́хъ.

И рече́ Госпо́дь къ Моисе́ю, глаго́ля:

рцы́ сыно́мъ Изра́илевымъ, глаго́ля: вся́каго ту́ка говя́жа и о́вча и ко́зiя да не снѣ́сте:

и ту́къ мертвечи́ненъ и звѣроя́дный да сотвори́тся на вся́ко дѣ́ло, въ яде́нiи же да не снѣ́стся:

вся́къ яды́й ту́къ от ското́въ, от ни́хже принесе́тъ да́ръ Го́споду, поги́бнетъ душа́ та́ от люді́й свои́хъ:

вся́кiя кро́ве да не снѣ́сте во всѣ́хъ селе́нiихъ ва́шихъ и от ското́въ и от пти́цъ:

вся́ка душа́, я́же а́ще снѣ́стъ кро́вь, поги́бнетъ душа́ та́ от люді́й свои́хъ.

И рече́ Госпо́дь къ Моисе́ю, глаго́ля:

и сыно́мъ Изра́илевымъ рече́ши, глаго́ля: принося́й же́ртву спасе́нiя Го́споду да принесе́тъ да́ръ сво́й Го́споду, и от же́ртвы спасе́нiя:

ру́цѣ его́ да принесу́тъ прино́съ Го́споду: ту́къ и́же на гру́дехъ, и препо́нку пе́чени да принесе́тъ я́, я́коже возложи́ти да́ръ предъ Го́спода:

и да вознесе́тъ жре́цъ ту́къ и́же на гру́дехъ, на олта́рь, и гру́ди да бу́дутъ Ааро́ну и сыно́мъ его́,

и ра́мо десно́е да да́стся уча́стiе жерцу́ от же́ртвъ спасе́нiя ва́шего:

принося́щему кро́вь спасе́нiя и ту́къ от сыно́въ Ааро́новыхъ, тому́ да бу́детъ ра́мо десно́е во уча́стiе:

гру́дь бо возложе́нiя и ра́мо уча́стiя взя́хъ от сыно́въ Изра́илевыхъ от же́ртвъ спасе́нiя ва́шего, и да́хъ я́ Ааро́ну жерцу́ и сыно́мъ его́, зако́нно вѣ́чно от сыно́въ Изра́илевыхъ.

Сiе́ пома́занiе Ааро́не и пома́занiе сыно́въ его́ от прино́совъ Госпо́днихъ, въ о́ньже де́нь приведе́ я́ жре́ти Го́споду:

я́коже заповѣ́да Госпо́дь да́ти и́мъ, въ о́ньже де́нь пома́за я́ от сыно́въ Изра́илевыхъ: зако́нно вѣ́чно въ ро́ды и́хъ.

Се́й зако́нъ всесожже́нiй и же́ртвы, и о грѣсѣ́ и о преступле́нiи, и соверше́нiи и же́ртвѣ спасе́нiя:

я́коже заповѣ́да Госпо́дь Моисе́ю на горѣ́ Сина́йстѣй, въ о́ньже де́нь заповѣ́да сыно́мъ Изра́илевымъ приноси́ти да́ры своя́ предъ Го́спода, въ пусты́ни Сина́йстѣй.

И рече́ Госпо́дь къ Моисе́ю, глаго́ля:

поими́ Ааро́на и сы́ны его́, и ри́зы его́, и еле́й пома́занiя, и телца́ и́же за грѣ́хъ, и два́ овна́, и ко́шницу опрѣсно́ковъ,

и ве́сь со́нмъ собери́ предъ две́ри ски́нiи свидѣ́нiя.

И сотвори́ Моисе́й, я́коже повелѣ́ ему́ Госпо́дь: и собра́ со́нмъ предъ две́ри ски́нiи свидѣ́нiя.

И рече́ Моисе́й къ со́нму: сiе́ е́сть сло́во, е́же завѣща́ Госпо́дь сотвори́ти.

И приведе́ Моисе́й Ааро́на и сы́ны его́ и измы́ я́ водо́ю:

и облече́ его́ въ срачи́цу {Гре́ч.: хито́нъ.}, и опоя́са его́ по́ясомъ, и облече́ его́ въ испо́днюю ри́зу {Гре́ч.: иподи́тисъ и епенди́тисъ.}, и возвлече́ на́нь ве́рхнюю ри́зу {Гре́ч.: епоми́съ, евр.: Ефу́дъ.}:

и опоя́са его́ по устрое́нiю Ефу́да, и сти́сне его́ и́мъ: и возложи́ на́нь сло́во {Гре́ч.: логі́онъ.}, и возложи́ на сло́во явле́нiе и и́стину:

и возложи́ увя́сло {Гре́ч.: ми́тра.} на главу́ его́, и возложи́ на увя́сло проти́въ лица́ его́ дщи́цу злату́ю освяще́нную святу́ю, я́коже повелѣ́ Госпо́дь Моисе́ю.

И взя́ Моисе́й от еле́а пома́занiя,

и воскропи́ от него́ на олта́рь седми́жды, и пома́за олта́рь и освяти́ его́ и вся́ сосу́ды его́, и умыва́лницу и стоя́ло ея́, и освяти́ я́, и пома́за ски́нiю и вся́ сосу́ды ея́, и освяти́ ю́,

и возлiя́ Моисе́й от еле́а пома́занiя на главу́ Ааро́ню, и пома́за его́, и освяти́ его́.

И приведе́ Моисе́й сы́ны Ааро́ни, и облече́ я́ въ срачи́цы, и опоя́са я́ по́ясы, и возложи́ на ня́ клобуки́ {Въ гре́ч.: ки́дарисъ.}, я́коже повелѣ́ Госпо́дь Моисе́ю.

И приведе́ Моисе́й телца́ и́же за грѣ́хъ, и возложи́ Ааро́нъ и сы́нове его́ ру́ки на главу́ телца́ и́же за грѣ́хъ,

и закла́ его́. И взя́ Моисе́й от кро́ве, и возложи́ на ро́ги олтаря́ о́крестъ пе́рстомъ, и очи́сти олта́рь: и кро́вь пролiя́ на стоя́ло олтаря́, и освяти́ его́, е́же моли́тися у него́.

И взя́ Моисе́й ве́сь ту́къ и́же на утро́бѣ, и препо́нку я́же на пе́чени, и о́бѣ по́чки, и ту́къ и́же на ни́хъ, и вознесе́ Моисе́й на олта́рь:

телца́ же и ко́жу его́, и мяса́ его́ и моты́лы его́, сожже́ я́ огне́мъ внѣ́ полка́, я́коже повелѣ́ Госпо́дь Моисе́ю.

И приведе́ Моисе́й овна́ и́же во всесожже́нiе, и возложи́ Ааро́нъ и сы́нове его́ ру́ки своя́ на главу́ о́вню.

И закла́ Моисе́й овна́, и пролiя́ Моисе́й кро́вь на олта́рь о́крестъ:

овна́ же раздроби́ на у́ды его́, и вознесе́ Моисе́й главу́ и у́ды и ту́къ, и утро́бу и но́ги измы́ водо́ю:

и вознесе́ Моисе́й всего́ овна́ на олта́рь: всесожже́нiе е́сть въ воню́ благово́нiя: прино́съ е́сть Го́споду, я́коже заповѣ́да Госпо́дь Моисе́ю.

И приведе́ Моисе́й овна́ втора́го, овна́ соверше́нiя: и возложи́ Ааро́нъ и сы́нове его́ ру́ки своя́ на главу́ о́вню,

и закла́ его́: и взя́ Моисе́й от кро́ве его́, и возложи́ на кра́й у́ха Ааро́ня десна́го, и на кра́й руки́ его́ десны́я, и на кра́й ноги́ его́ десны́я.

И приведе́ Моисе́й сы́ны Ааро́ни, и возложи́ Моисе́й от кро́ве на кра́й уше́съ и́хъ десны́хъ, и на кра́й ру́къ и́хъ десны́хъ, и на кра́й но́гъ и́хъ десны́хъ: и пролiя́ Моисе́й кро́вь на олта́рь о́крестъ:

и взя́ Моисе́й ту́къ и чре́сла, и ту́къ и́же на утро́бѣ, и препо́нку пе́чени, и о́бѣ по́чки, и ту́къ и́же на ни́хъ, и ра́мо десно́е,

и от ко́шницы соверше́нiя, я́же е́сть предъ Го́сподемъ, и взя́ хлѣ́бъ еди́нъ прѣ́сный, и хлѣ́бъ еле́енъ еди́нъ, и опрѣсно́къ еди́нъ, и возложи́ на ту́къ, и ра́мо десно́е:

и возложи́ вся́ на ру́цѣ Ааро́ни и на ру́цѣ сыно́въ его́, и вознесе́ я́ уча́стiе предъ Го́спода.

И взя́ Моисе́й от ру́къ и́хъ и вознесе́ я́ на олта́рь на всесожже́нiе соверше́нiя, е́же е́сть воня́ благоуха́нiя: прино́съ е́сть Го́споду.

И взе́мъ Моисе́й гру́дь, отлучи́ ю́ возложе́нiе предъ Го́сподемъ от овна́ соверше́нiя: и бы́сть Моисе́ю въ ча́сть, я́коже заповѣ́да Госпо́дь Моисе́ю.

И взя́ Моисе́й от еле́а пома́занiя и от кро́ве я́же на олтари́, и воскропи́ на Ааро́на и на ри́зы его́, и на сы́ны его́ и на ри́зы сыно́въ его́ съ ни́мъ: и освяти́ Ааро́на и ри́зы его́, и сы́ны его́ и ри́зы сыно́въ его́ съ ни́мъ.

И рече́ Моисе́й Ааро́ну и сыно́мъ его́: свари́те мя́са во дворѣ́ ски́нiи свидѣ́нiя на мѣ́стѣ святѣ, и та́мо да снѣ́сте я́, и хлѣ́бы и́же въ ко́шницѣ соверше́нiя, я́коже заповѣ́дано бы́сть мнѣ́ глаго́ля: Ааро́нъ и сы́нове его́ да снѣдя́тъ я́:

и оста́нокъ мя́съ и хлѣ́бовъ на огни́ да сожже́те:

и изъ две́рiй ски́нiи свидѣ́нiя да не изы́дете се́дмь дні́й, до́ндеже де́нь сконча́ется, де́нь соверше́нiя ва́шего: въ се́дмь бо дні́й соверши́тъ ру́ки ва́шя:

я́коже сотвори́ въ де́нь се́й, въ о́ньже заповѣ́да Госпо́дь сотвори́ти, я́ко моли́тися о ва́съ:

и у две́рiй ски́нiи свидѣ́нiя сѣди́те се́дмь дні́й, де́нь и но́щь, и сохрани́те повелѣ́нiя Госпо́дня, да не у́мрете: та́ко бо заповѣ́да мнѣ́ Госпо́дь Бо́гъ.

И сотвори́ Ааро́нъ и сы́нове его́ вся́ словеса́, я́же завѣща́ Госпо́дь Моисе́ю.

И взе́мше два́ сы́на Ааро́ня, Нада́въ и Авiу́дъ, кі́йждо свою́ кади́лницу, вложи́ста въ ня́ о́гнь и возложи́ста на́нь ѳимiа́мъ, и принесо́ста предъ Го́спода о́гнь чу́ждь, его́же не повелѣ́ и́ма Госпо́дь.

И изы́де о́гнь от Го́спода, и пояде́ я́, и умро́ста предъ Го́сподемъ.

И рече́ Моисе́й ко Ааро́ну: сiе́ е́сть, е́же рече́ Госпо́дь, глаго́ля: въ приближа́ющихся Мнѣ́ освящу́ся и во все́мъ со́нмѣ просла́влюся. И умили́ся Ааро́нъ.

И призва́ Моисе́й Мисаи́ла и Елисафа́на, сы́ны Озiи́левы, сы́ны бра́та отца́ Ааро́ня, и рече́ и́мъ: приступи́те и возми́те бра́тiй свои́хъ от лица́ святы́хъ внѣ́ полка́.

И приступи́ша, и взя́ша и́хъ въ ри́захъ и́хъ, [и изнесо́ша] внѣ́ полка́, я́коже рече́ Моисе́й.

И рече́ Моисе́й ко Ааро́ну и Елеаза́ру и Иѳама́ру, сыно́мъ его́ оста́вшымся: гла́въ ва́шихъ не открыва́йте и ри́зъ ва́шихъ не раздира́йте, да не у́мрете, и на ве́сь со́нмъ бу́детъ гнѣ́въ: бра́тiя же ва́шя ве́сь до́мъ Изра́илевъ да пла́чутся запале́нiя, и́мже запали́шася от Го́спода:

и изъ две́рiй ски́нiи свидѣ́нiя не исходи́те, да не у́мрете: еле́й бо пома́занiя, и́же от Го́спода, на ва́съ е́сть. И сотвори́ша по словеси́ Моисе́ову.

И рече́ Госпо́дь ко Ааро́ну, глаго́ля:

вина́ и сике́ра не пі́йте, ты́ и сы́нове твои́ съ тобо́ю, егда́ вхо́дите въ ски́нiю свидѣ́нiя, или́ приступа́ющымъ ва́мъ ко олтарю́, да не у́мрете: [и бу́детъ сiе́] зако́нно вѣ́чно въ ро́ды ва́шя:

отлучи́ти между́ вещми́ святы́ми и между́ скверна́выми, и между́ нечи́стыми и между́ чи́стыми,

и устро́ити сыно́мъ Изра́илевымъ вся́ зако́нная, я́же глаго́ла Госпо́дь къ ни́мъ руко́ю Моисе́овою.

И рече́ Моисе́й ко Ааро́ну, и Елеаза́ру и Иѳама́ру, сыно́мъ его́ оста́вшымся: возми́те же́ртву оста́вшуюся от прино́совъ Госпо́днихъ и яди́те опрѣсно́ки у олтаря́: я́ко свята́я святы́хъ су́ть:

и яди́те я́ на мѣ́стѣ свя́тѣ: зако́нно бо тебѣ́ е́сть, и зако́нно сыно́мъ твои́мъ сiе́ от прино́совъ Госпо́днихъ: си́це бо ми́ заповѣ́да Госпо́дь:

и гру́ди уча́стiя и ра́мо уча́стiя яди́те на мѣ́стѣ свя́тѣ ты́ и сы́нове твои́, и до́мъ тво́й съ тобо́ю: зако́нно бо тебѣ́, и зако́нно сыно́мъ твои́мъ даде́ся от же́ртвъ спасе́нiи сыно́въ Изра́илевыхъ:

ра́мо уча́стiя и гру́ди уча́стiя въ прино́сѣхъ ту́чныхъ да принесу́тъ, уча́стiе е́же приноси́ти предъ Го́спода: и да бу́детъ тебѣ́ и сыно́мъ твои́мъ и дще́ремъ твои́мъ съ тобо́ю зако́нно вѣ́чно, я́коже повелѣ́ Госпо́дь Моисе́ю.

И козла́, и́же грѣха́ ра́ди, взыску́я взыска́ Моисе́й: и се́й сожже́нъ бя́ше. И разгнѣ́вася Моисе́й на Елеаза́ра и Иѳама́ра, сы́ны Ааро́ни оста́вльшыяся, глаго́ля:

почто́ не снѣдо́сте на мѣ́стѣ свя́тѣ, е́же грѣха́ ра́ди? я́ко свята́я святы́хъ су́ть, сiе́ даде́ ва́мъ я́сти, да отъи́мете грѣ́хъ со́нма и помо́литеся о ни́хъ предъ Го́сподемъ:

не внесе́ся бо от кро́ве его́ въ свято́е: предъ лице́мъ вну́трь да я́сте е́ на мѣ́стѣ свя́тѣ, я́коже повелѣ́ мнѣ́ Госпо́дь.

И рече́ Ааро́нъ къ Моисе́ю, глаго́ля: а́ще дне́сь принесо́ша я́же грѣха́ ра́ди своего́ и всесожже́нiя своего́ предъ Го́спода, и случи́шася мнѣ́ сицева́я, и снѣ́мъ, я́же грѣха́ ра́ди, дне́сь, еда́ уго́дно бу́детъ Го́споду?

И слы́ша Моисе́й, и уго́дно ему́ бы́сть.

И рече́ Госпо́дь къ Моисе́ю, глаго́ля:

глаго́ли сыно́мъ Изра́илевымъ и рече́ши къ ни́мъ: пра́здницы Госпо́дни, я́же нарече́те наро́читыя святы́я, сі́и су́ть пра́здницы Мои́:

въ ше́сть дні́й да сотвори́ши дѣла́, и въ де́нь седмы́й суббо́та, поко́й нарече́нный свя́тъ Го́сподеви, вся́каго дѣ́ла да не сотворите́: суббо́та е́сть Го́сподеви во все́мъ обита́нiи ва́шемъ.

Сі́и пра́здницы Го́споду нарече́ны святи, я́же нарече́те сiя́ во времена́ и́хъ:

въ пе́рвѣмъ ме́сяцѣ въ четвертыйна́десять де́нь ме́сяца, между́ вече́рними, Па́сха Го́споду:

и въ пятыйна́десять де́нь ме́сяца пе́рваго пра́здникъ опрѣсно́ковъ Го́споду: се́дмь дні́й опрѣсно́ки да я́сте.

И де́нь пе́рвый нарече́нъ свя́тъ бу́детъ ва́мъ: вся́каго дѣ́ла рабо́тня не сотвори́те:

и да принесе́те всесожже́нiя Го́споду се́дмь дні́й, и де́нь седмы́й нарече́нъ свя́тъ бу́детъ ва́мъ: вся́каго дѣ́ла рабо́тня не сотвори́те.

И рече́ Госпо́дь къ Моисе́ю, глаго́ля:

глаго́ли сыно́мъ Изра́илевымъ и рече́ши къ ни́мъ: егда́ вни́дете въ зе́млю, ю́же А́зъ даю́ ва́мъ, и по́жнете жа́тву ея́, и принесе́те снопы́ нача́токъ жа́твы ва́шея къ жерцу́,

и вознесе́тъ сно́пъ предъ Го́спода прiя́тенъ ва́мъ: на у́трiе пе́рваго дне́ суббо́ты да вознесе́тъ его́ жре́цъ.

И сотвори́те въ де́нь, въ о́ньже а́ще принесе́те сно́пъ, овча́ непоро́чно единолѣ́тно во всесожже́нiе Го́споду:

и же́ртву его́ двѣ́ десяти́ны муки́ пшени́чны спря́жены въ еле́и: же́ртва Го́споду, въ воню́ благово́нiя Го́споду: и возлiя́нiе его́ вина́ четве́ртую ча́сть и́на.

И хлѣ́ба, и пря́женыхъ кла́совъ но́выхъ да не снѣ́сте, да́же до того́ дне́ сама́го, до́ндеже принесе́те вы́ да́ры Бо́гу ва́шему: зако́нно вѣ́чно въ ро́ды ва́шя во все́мъ населе́нiи ва́шемъ.

И сочти́те себѣ́ от нау́трiя суббо́тъ, от дне́, въ о́ньже а́ще принесе́те снопы́ возложе́нiя, се́дмь седми́цъ цѣ́лыхъ

да́же до нау́трiя послѣ́днiя седми́цы да сочте́те пятьдеся́тъ дні́й, и да принесе́те же́ртву но́ву Го́споду.

От вселе́нiя ва́шего да принесе́те хлѣ́бы возложе́нiе, два́ хлѣ́ба: от дву́хъ десяти́нъ муки́ пшени́чны да бу́дутъ, ква́шены да испеку́тся от пе́рвыхъ плодо́въ Го́споду:

и да принесе́те со хлѣ́бами се́дмь а́гнцевъ непоро́чныхъ единолѣ́тныхъ, и телца́ еди́наго от ста́дъ, и овна́ два́ непоро́чна: и бу́дутъ во всесожже́нiе Го́споду, и же́ртвы и́хъ, и возлiя́нiя и́хъ, же́ртва воня́ благово́нiя Го́споду.

И сотвори́те козла́ от ко́зъ еди́наго о грѣсѣ́, и два́ а́гнца единолѣ́тна въ же́ртву спасе́нiя съ хлѣ́бами пе́рвыхъ жи́тъ.

И да возложи́тъ я́ жре́цъ съ хлѣ́бами пе́рвыхъ жи́тъ, возложе́нiе предъ Го́сподемъ со обѣ́ма а́гнцы: свя́та бу́дутъ Го́споду, жерцу́ и́же прино́ситъ я́, тому́ да бу́дутъ.

И прозове́те се́й де́нь, наро́читъ свя́тъ бу́детъ ва́мъ: вся́каго дѣ́ла рабо́тня не сотвори́те въ о́нь: зако́нно вѣ́чно въ ро́ды ва́шя во все́мъ населе́нiи ва́шемъ.

И егда́ жне́те жа́тву земли́ ва́шея, не потреби́те оста́нка жа́твы ни́вы своея́, егда́ жне́те, и от па́дающихъ от жа́твы ва́шея да не собере́ши: ни́щему и прише́лцу оста́виши я́: А́зъ Госпо́дь Бо́гъ ва́шъ.

И рече́ Госпо́дь къ Моисе́ю, глаго́ля:

рцы́ сыно́мъ Изра́илевымъ, глаго́ля: ме́сяца седма́го, въ пе́рвый де́нь ме́сяца, да бу́детъ ва́мъ поко́й, па́мять тру́бъ: нарече́нъ свя́тъ бу́детъ ва́мъ:

вся́каго дѣ́ла рабо́тня не сотвори́те, и принесе́те всесожже́нiе Го́споду.

И рече́ Госпо́дь къ Моисе́ю, глаго́ля:

и въ деся́тый де́нь седма́го ме́сяца сего́ де́нь очище́нiя, нарече́нъ свя́тъ да бу́детъ ва́мъ: и смири́те ду́шы ва́шя, и принеси́те всесожже́нiе Го́споду:

вся́каго дѣ́ла не сотвори́те въ са́мый де́нь се́й: е́сть бо де́нь очище́нiя се́й ва́мъ, умоли́ти о ва́съ предъ Го́сподемъ Бо́гомъ ва́шимъ:

вся́ка бо душа́, я́же не покори́тся въ де́нь то́й, потреби́тся от люді́й свои́хъ:

и вся́ка душа́, я́же сотвори́тъ дѣ́ло въ са́мый де́нь се́й, поги́бнетъ душа́ та́ от люді́й свои́хъ:

вся́каго дѣ́ла не сотвори́те, зако́нно вѣ́чно въ ро́ды ва́шя, во всѣ́хъ селе́нiихъ ва́шихъ.

Суббо́ты суббо́тъ бу́дутъ ва́мъ: и смири́те ду́шы ва́шя, от девя́таго дне́ ме́сяца от ве́чера, да́же до деся́таго дне́ ме́сяца, до ве́чера, суббо́тствуйте суббо́ты ва́шя.

И рече́ Госпо́дь къ Моисе́ю, глаго́ля:

рцы́ сыно́мъ Изра́илевымъ, глаго́ля: въ пятыйна́десять де́нь ме́сяца седма́го сего́, пра́здникъ ку́щей се́дмь дні́й Го́споду:

и де́нь пе́рвый нарече́нъ свя́тъ бу́детъ: вся́каго дѣ́ла рабо́тня не сотвори́те:

се́дмь дні́й да принесе́те всесожже́нiя Го́споду: и де́нь осмы́й нарече́нъ свя́тъ бу́детъ ва́мъ, и принесе́те всесожже́нiя Го́споду: исхо́дное е́сть, вся́каго дѣ́ла рабо́тня не сотвори́те.

Сі́и пра́здницы Госпо́дни, я́же нарече́те наро́читы свя́ты, е́же приноси́ти прино́сы Го́споду: всесожже́нiя и же́ртвы и́хъ, и возлiя́нiя и́хъ от дне́ до дне́,

кромѣ́ суббо́тъ Госпо́днихъ и кромѣ́ даро́въ ва́шихъ, и кромѣ́ всѣ́хъ обѣ́товъ ва́шихъ и кромѣ́ благово́льныхъ ва́шихъ, я́же а́ще дади́те Го́споду.

И въ пятыйна́десять де́нь ме́сяца седма́го сего́, егда́ сконча́ете жи́та земли́, пра́зднуйте Го́споду се́дмь дні́й: въ де́нь пе́рвый поко́й, и въ де́нь осмы́й поко́й:

и да во́змете себѣ́ въ де́нь пе́рвый пло́дъ дре́ва красе́нъ, и вѣ́твь фи́ническую, и вѣ́тви дре́ва ча́стыя, и ве́рбы, и а́гновы вѣ́тви {садо́вiе палести́нское} от пото́ка, и возвесели́теся предъ Го́сподемъ Бо́гомъ ва́шимъ се́дмь дні́й въ лѣ́то:

зако́нно вѣ́чно въ ро́ды ва́шя, въ ме́сяцъ седмы́й пра́зднуйте его́:

въ ку́щахъ да пребу́дете се́дмь дні́й: вся́къ тузе́мецъ во Изра́или да пребу́детъ въ ку́щахъ:

я́ко да увѣ́дятъ ро́ды ва́шя, я́ко въ ку́щахъ всели́хъ сы́ны Изра́илевы, внегда́ извести́ Мнѣ́ и́хъ изъ земли́ Еги́петскiя: А́зъ Госпо́дь Бо́гъ ва́шъ.

И повѣ́да Моисе́й пра́здники Госпо́дни сыно́мъ Изра́илевымъ.