И рече́ Госпо́дь къ Моисе́ю: глаго́ли Ааро́ну, бра́ту твоему́, да не вхо́дитъ по вся́ часы́ въ свято́е вну́трь завѣ́сы, предъ лице́ очисти́лища, е́же е́сть надъ киво́томъ свидѣ́нiя, и да не у́мретъ: во о́блацѣ бо явлю́ся надъ очисти́лищемъ:

си́це вни́детъ Ааро́нъ въ свято́е: съ телце́мъ от говя́дъ грѣха́ ра́ди, и со овно́мъ на всесожже́нiе,

и въ ри́зу льня́ну освяще́ну да облече́тся, и надра́ги льня́ны да бу́дутъ на тѣ́лѣ его́, и по́ясомъ льня́нымъ да опоя́шется, и клобу́къ {Въ гре́ч.: ки́дарисъ.} льня́нъ да возложи́тъ, ри́зы свя́ты су́ть: и да омы́етъ водо́ю все́ тѣ́ло свое́, и да облече́тся въ ня́:

и от со́нма сыно́въ Изра́илевыхъ да во́зметъ два́ козла́ от ко́зъ грѣха́ ра́ди, и овна́ еди́наго во всесожже́нiе,

и да приведе́тъ Ааро́нъ телца́, и́же грѣха́ ра́ди своего́, и да помо́лится о себѣ́ и о до́мѣ свое́мъ,

и да во́зметъ два́ козла́, и поста́витъ я́ предъ Го́сподемъ у две́рiй ски́нiи свидѣ́нiя:

и да возложи́тъ Ааро́нъ на о́ба козла́ жре́бiя: жре́бiй еди́нъ Го́споду и жре́бiй другі́й отпуще́нiю.

И да приведе́тъ Ааро́нъ козла́, на не́мже паде́ жре́бiй Го́споду, и да принесе́тъ грѣха́ ра́ди:

и козла́, на не́мже паде́ жре́бiй отпуще́нiя, да поста́витъ его́ жи́ва предъ Го́сподемъ, я́ко помоли́тися надъ ни́мъ и я́ко отпусти́ти его́ во отпуще́нiе, и да отпу́ститъ его́ въ пусты́ню: и во́зметъ козе́лъ на ся́ беззако́нiя и́хъ въ зе́млю непроходи́му.

И да приведе́тъ Ааро́нъ телца́, и́же грѣха́ ра́ди своего́, и да помо́лится о себѣ́ и о до́мѣ свое́мъ: и да зако́летъ телца́, и́же грѣха́ ра́ди своего́.

И да во́зметъ кади́лникъ по́лнъ у́глiя о́гненна от олтаря́, и́же предъ Го́сподемъ, и да напо́лнитъ ру́цѣ ѳимiа́ма сложе́нiя чи́ста, и да принесе́тъ вну́трь завѣ́сы:

и да возложи́тъ ѳимiа́мъ на о́гнь предъ Го́сподемъ, и покры́етъ ды́мъ ѳимiа́мный очисти́лище е́же на свидѣ́нiихъ, и не у́мретъ.

И да во́зметъ от кро́ве телца́, и да воскропи́тъ пе́рстомъ на очисти́лище на восто́ки: предъ лице́мъ очисти́лища да воскропи́тъ седми́жды от кро́ве пе́рстомъ свои́мъ.

И да зако́летъ козла́ и́же грѣха́ ра́ди, и́же за лю́ди, предъ Го́сподемъ: и да внесе́тъ от кро́ве его́ вну́трь завѣсы́, и да сотвори́тъ кро́ви его́, я́коже сотвори́ кро́ви те́лчи, и да воскропи́тъ кро́вiю его́ на очисти́лище пря́мо очисти́лищу,

и очи́ститъ свято́е от нечисто́тъ сыно́въ Изра́илевыхъ и от непра́вдъ и́хъ, о всѣ́хъ грѣсѣ́хъ и́хъ: и та́ко сотвори́тъ ски́нiи свидѣ́нiя сотворе́ннѣй въ ни́хъ посредѣ́ нечистоты́ и́хъ.

И вся́къ человѣ́къ да не бу́детъ въ ски́нiи свидѣ́нiя, егда́ вхо́дитъ моли́тися во свято́е, до́ндеже изы́детъ: и да помо́лится о себѣ́ и о до́мѣ свое́мъ и о все́мъ со́нмѣ сыно́въ Изра́илевыхъ.

И изы́детъ ко олтарю́, и́же е́сть предъ Го́сподемъ, и помо́лится на не́мъ, и да во́зметъ от кро́ве телца́ и от кро́ве козла́, и возложи́тъ на ро́ги олтаря́ о́крестъ:

и да воскропи́тъ пе́рстомъ свои́мъ на́нь седми́жды от кро́ве, и очи́ститъ его́ и освяти́тъ его́ от нечисто́тъ сыно́въ Изра́илевыхъ.

И соверши́тъ очища́я свято́е и ски́нiю свидѣ́нiя и олта́рь, и от жерцѣ́хъ очи́ститъ, и приведе́тъ козла́ жива́го:

и да возложи́тъ Ааро́нъ о́бѣ ру́цѣ свои́ на главу́ козла́ жива́го, и да исповѣ́сть на не́мъ вся́ беззако́нiя сыно́въ Изра́илевыхъ и вся́ непра́вды и́хъ и вся́ грѣхи́ и́хъ: и возложи́тъ я́ на главу́ козла́ жива́го, и отпу́ститъ руко́ю человѣ́ка угото́ваннаго въ пусты́ню:

и во́зметъ козе́лъ на ся́ непра́вды и́хъ въ зе́млю непроходи́му: и да отпу́ститъ козла́ въ пусты́ню.

И да вни́детъ Ааро́нъ въ ски́нiю свидѣ́нiя, и да совлече́тъ ри́зы льня́ны, въ ня́же оболче́нъ бя́ше, входя́щу ему́ во свято́е, и положи́тъ я́ та́мо:

и омы́етъ тѣ́ло свое́ водо́ю на мѣ́стѣ святѣ и да облече́тся въ ри́зы своя́, и изше́дъ да сотвори́тъ всесожже́нiе свое́ и всепло́дiе людско́е, и да помо́лится о себѣ́ и о до́мѣ свое́мъ, и о лю́дехъ я́коже и о жерцѣ́хъ:

и ту́къ и́же грѣхо́въ ра́ди да вознесе́тъ на олта́рь.

И отпусти́вый козла́ отпуще́наго во отпуще́нiе да испере́тъ ри́зы своя́ и да омы́етъ пло́ть свою́ водо́ю, и по си́хъ да вни́детъ въ по́лкъ.

И телца́ и́же грѣха́ ра́ди, и козла́ и́же грѣха́ ра́ди, и́хже кро́вь внесе́ся на очище́нiе во свято́е, да изнесу́тъ я́ внѣ́ полка́ и да сожгу́тъ я́ на огни́, и ко́жы и́хъ и мяса́ и́хъ и моты́ла и́хъ:

сожига́яй же я́ да испере́тъ ри́зы своя́ и да омы́етъ тѣ́ло свое́ водо́ю, и по се́мъ да вни́детъ въ по́лкъ.

И бу́детъ сiе́ ва́мъ зако́нное вѣ́чное: въ ме́сяцъ седмы́й, въ деся́тый де́нь ме́сяца, покори́те ду́шы ва́шя, и вся́каго дѣ́ла да не сотворите́, ни тузе́мецъ, ни пришле́цъ прилежа́й въ ва́съ:

въ то́й бо де́нь помо́лится о ва́съ, е́же очи́стити ва́съ от всѣ́хъ грѣхо́въ ва́шихъ предъ Го́сподемъ, и чи́сти бу́дете:

суббо́та суббо́тъ поко́й да бу́детъ сiя́ ва́мъ, и покори́те ду́шы ва́шя, зако́нно вѣ́чно.

Помо́лится жре́цъ, его́же а́ще пома́жутъ и его́же а́ще соверша́тъ ру́цѣ его́, е́же жре́ти ему́ по отцѣ́ свое́мъ, и да облече́тся въ ри́зу льня́ну свою́, ри́зу свя́ту,

и да очи́ститъ Свято́е свята́го и ски́нiю свидѣ́нiя, и олта́рь да очи́ститъ, и о жерцѣ́хъ и о все́мъ со́нмѣ да помо́лится.

И бу́детъ сiе́ ва́мъ зако́нное вѣ́чное, е́же моли́тися о сынѣ́хъ Изра́илевыхъ о всѣ́хъ грѣсѣ́хъ и́хъ, еди́ною въ лѣ́то да сотвори́тся, я́коже заповѣ́да Госпо́дь Моисе́ю.

И рече́ Госпо́дь къ Моисе́ю, глаго́ля:

глаго́ли сыно́мъ Изра́илевымъ и рече́ши къ ни́мъ, глаго́ля: человѣ́къ, и́же а́ще обѣща́етъ обѣ́тъ, я́ко цѣ́ну души́ своея́ Го́споду,

да бу́детъ цѣна́ му́жеска по́лу от два́десяти лѣ́тъ до шести́десяти лѣ́тъ, да бу́детъ цѣна́ его́ пятьдеся́тъ дидра́хмъ сребра́ вѣ́сомъ святы́мъ,

же́нска же по́лу да бу́детъ цѣна́ три́десять дидра́хмъ:

а́ще же от пяти́ лѣ́тъ до два́десяти лѣ́тъ, да бу́детъ цѣна́ му́жеску по́лу два́десять дидра́хмъ, же́нску же по́лу де́сять дидра́хмъ:

от ме́сяца же еди́наго до пяти́ лѣ́тъ, да бу́детъ цѣна́ му́жеска по́лу пя́ть дидра́хмъ сребра́, же́нска же по́лу три́ дидра́хмы сребра́:

а́ще же от шести́десяти лѣ́тъ и вы́шше, а́ще у́бо му́жескъ по́лъ бу́детъ, да бу́детъ цѣна́ его́ пятьна́десять дидра́хмъ сребра́, а́ще же же́нскъ по́лъ, де́сять дидра́хмъ.

А́ще же убо́гъ бу́детъ цѣно́ю свое́ю, да ста́нетъ предъ жерце́мъ, и да оцѣни́тъ его́ жре́цъ: я́коже мо́жетъ рука́ обѣща́вшагося, та́ко оцѣни́тъ его́ жре́цъ.

А́ще же от ското́въ приноси́мыхъ от ни́хъ да́ръ Го́споду, и́же а́ще да́стъ от си́хъ Го́споду, бу́детъ свято.

Да не премѣни́тъ добра́ злы́мъ, ниже́ зла́ до́брымъ: а́ще же измѣня́я измѣни́тъ о́ный ско́тъ ското́мъ, да бу́детъ и то́й и премѣне́нiе свя́та.

А́ще же вся́къ ско́тъ нечи́стъ, от ни́хже не прино́сится да́ръ Го́споду, да поста́витъ скота́ предъ жерце́мъ,

и оцѣни́тъ его́ жре́цъ между́ до́брымъ и между́ злы́мъ: и я́коже оцѣни́тъ его́ жре́цъ, та́ко да бу́детъ.

А́ще же искупу́я иску́питъ его́, да приложи́тъ пя́тую ча́сть къ цѣнѣ́ его́.

И человѣ́къ, и́же а́ще освяти́тъ до́мъ сво́й свя́тъ Го́споду, и оцѣни́тъ его́ жре́цъ между́ до́брымъ и между́ злы́мъ: я́коже оцѣни́тъ его́ жре́цъ, та́ко да ста́нетъ.

А́ще же освяти́вый его́ иску́питъ до́мъ сво́й, да приложи́тъ къ сему́ пя́тую ча́сть сребра́ цѣны́ его́, и бу́детъ ему́.

А́ще же от ни́въ одержа́нiя своего́ освяти́тъ человѣ́къ Го́споду, и да бу́детъ цѣна́ его́ по сѣ́янiю его́, за спу́дъ ячме́ня пятьдеся́тъ дидра́хмъ сребра́.

А́ще же от лѣ́та оставле́нiя освяти́тъ ни́ву свою́, по цѣнѣ́ ея́ да ста́нетъ.

А́ще же напослѣ́докъ по оставле́нiи освяти́тъ ни́ву свою́, да причте́тъ ему́ сребро́ жре́цъ къ лѣ́томъ оста́вшымся да́же до лѣ́та оставле́нiя, и отъи́мется от цѣны́ его́

А́ще же иску́питъ ни́ву освяти́вый ю́, да приложи́тъ пя́тую ча́сть сребра́ къ цѣнѣ́ ея́, и да бу́детъ ему́.

А́ще же не иску́питъ ни́вы, и отда́стъ ни́ву человѣ́ку ино́му, не ктому́ да иску́питъ ю́:

но да бу́детъ ни́ва мину́вшу лѣ́ту оставле́нiя, свята́ хва́лна Го́споду, я́коже земля́ отлуче́ная: жерцу́ да бу́детъ во одержа́нiе его́.

А́ще же от ни́вы, ю́же стяжа́, я́же нѣ́сть от села́ одержа́нiя его́, освяти́тъ Го́споду,

да сочте́тъ ему́ жре́цъ оста́нокъ цѣны́ от лѣ́та оставле́нiя, и да отда́стъ цѣ́ну въ то́й де́нь свя́ту Го́споду:

и въ лѣ́то оставле́нiя да отда́стся ни́ва человѣ́ку, от него́же притяжа́ ю́, его́же бѣ́ одержа́нiе земли́.

И вся́ка цѣна́ да бу́детъ вѣ́сами святы́ми, два́десять пѣ́нязей бу́детъ дидра́хма.

И вся́къ пе́рвенецъ, и́же а́ще роди́тся въ скотѣ́ твое́мъ, да бу́детъ Го́споду, и да не освяти́тъ его́ никто́же: а́ще теле́цъ, а́ще овча́, Го́споду е́сть.

А́ще же от четвероно́жныхъ нечи́стыхъ, да премѣни́тъ по цѣнѣ́ его́, и да приложи́тъ пя́тую ча́сть его́ къ сему́, и да бу́детъ ему́: а́ще же не иску́пится, да прода́стся по цѣнѣ́ его́.

Вся́къ же обѣ́тъ, его́же а́ще обѣща́етъ человѣ́къ Го́споду от всѣ́хъ, ели́ка ему́ су́ть, от человѣ́ка да́же до скота́, и от ни́въ одержа́нiя его́, не прода́стся, ниже́ иску́пится вся́кiй обѣ́тъ свя́тъ святы́хъ бу́детъ Го́споду.

И вся́къ обѣ́тъ, и́же а́ще обѣща́нъ бу́детъ от человѣ́къ, не иску́пится, но сме́ртiю да умертви́тся.

Вся́ка десяти́на земли́, от сѣ́мене земна́го и от плода́ древя́наго Го́споду е́сть, свято Го́споду.

А́ще же искупу́я иску́питъ человѣ́къ десяти́ну свою́, пя́тую ча́сть его́ да приложи́тъ къ нему́, и да бу́детъ ему́.

И вся́ка десяти́на воло́въ и ове́цъ, и вся́ко, е́же а́ще прiи́детъ въ число́ подъ же́злъ деся́тое, бу́детъ свято Го́споду.

Не премѣни́ши до́браго злы́мъ, ниже́ до́брымъ зла́го: а́ще же премѣня́я премѣни́ши е́, то́ и премѣне́нiе его́ бу́детъ свято, да не иску́пится,

Сiя́ су́ть за́повѣди, я́же заповѣ́да Госпо́дь Моисе́ю къ сыно́мъ Изра́илевымъ на горѣ́ Сина́йстѣй.

Коне́цъ кни́зѣ тре́тiей Моисе́овѣ: и́мать въ себѣ́ гла́въ 27.