Азбука веры » Би́блия » ישעיהו » гл.26

ישעיהו, Глава 26

Толкования

Толкования главы

26:1

см.:Пс.45:2;Пс.124:1;Притч.18:11;

см.:Пс.117:19;

см.:Ис.27:5;

см.:Втор.32:4;

см.:Ис.25:12;

см.:Ис.28:3;

26:7

26:8

см.:Пс.43:18;

26:9

см.:Пс.76:7;

26:10

см.:Ис.5:12;Деян.12:19;

26:11

см.:Ис.33:3;Мф.21:15;

26:12

см.:Рим.8:28;

26:13

26:14

см.:Откр.20:5;

26:15

26:16

см.:Пс.17:7;

26:17

см.:Ин.16:21;4Цар.19:3;Ис.13:8;

26:18

26:19

см.:4Цар.4:35;Иез.37:3;

26:20

см.:Пс.29:6;Ис.54:8;

26:21

см.:Мих.1:3;

Еврейский

Языки

בַּיּוֹם הַהוּא, יוּשַׁר הַשִּׁיר־הַזֶּה בְּאֶרֶץ יְהוּדָה; עִיר עָז־לָנוּ, יְשׁוּעָה יָשִׁית חוֹמוֹת וָחֵל׃

פִּתְחוּ שְׁעָרִים; וְיָבֹא גוֹי־צַדִּיק שֹׁמֵר אֱמֻנִים׃

יֵצֶר סָמוּךְ, תִּצֹּר שָׁלוֹם שָׁלוֹם; כִּי בְךָ בָּטוּחַ׃

בִּטְחוּ בַיהוָה עֲדֵי־עַד; כִּי בְּיָהּ יְהוָה, צוּר עוֹלָמִים׃

כִּי הֵשַׁח יֹשְׁבֵי מָרוֹם, קִרְיָה נִשְׂגָּבָה; יַשְׁפִּילֶנָּה יַשְׁפִּילָהּ עַד־אֶרֶץ, יַגִּיעֶנָּה עַד־עָפָר׃

תִּרְמְסֶנָּה רָגֶל; רַגְלֵי עָנִי פַּעֲמֵי דַלִּים׃

אֹרַח לַצַּדִּיק מֵישָׁרִים; יָשָׁר מַעְגַּל צַדִּיק תְּפַלֵּס׃

אַף אֹרַח מִשְׁפָּטֶיךָ יְהוָה קִוִּינוּךָ; לְשִׁמְךָ וּלְזִכְרְךָ תַּאֲוַת־נָפֶשׁ׃

נַפְשִׁי אִוִּיתִיךָ בַּלַּיְלָה, אַף־רוּחִי בְקִרְבִּי אֲשַׁחֲרֶךָּ; כִּי כַּאֲשֶׁר מִשְׁפָּטֶיךָ לָאָרֶץ, צֶדֶק לָמְדוּ יֹשְׁבֵי תֵבֵל׃

יֻחַן רָשָׁע בַּל־לָמַד צֶדֶק, בְּאֶרֶץ נְכֹחוֹת יְעַוֵּל; וּבַל־יִרְאֶה גֵּאוּת יְהוָה׃ ס

יְהוָה רָמָה יָדְךָ בַּל־יֶחֱזָיוּן; יֶחֱזוּ וְיֵבֹשׁוּ קִנְאַת־עָם, אַף־אֵשׁ צָרֶיךָ תֹאכְלֵם׃ ס

יְהוָה תִּשְׁפֹּת שָׁלוֹם לָנוּ; כִּי גַּם כָּל־מַעֲשֵׂינוּ פָּעַלְתָּ לָּנוּ׃

יְהוָה אֱלֹהֵינוּ, בְּעָלוּנוּ אֲדֹנִים זוּלָתֶךָ; לְבַד־בְּךָ נַזְכִּיר שְׁמֶךָ׃

מֵתִים בַּל־יִחְיוּ, רְפָאִים בַּל־יָקֻמוּ; לָכֵן פָּקַדְתָּ וַתַּשְׁמִידֵם, וַתְּאַבֵּד כָּל־זֵכֶר לָמוֹ׃

יָסַפְתָּ לַגּוֹי יְהוָה, יָסַפְתָּ לַגּוֹי נִכְבָּדְתָּ; רִחַקְתָּ כָּל־קַצְוֵי־אָרֶץ׃

יְהוָה בַּצַּר פְּקָדוּךָ; צָקוּן לַחַשׁ, מוּסָרְךָ לָמוֹ׃

כְּמוֹ הָרָה תַּקְרִיב לָלֶדֶת, תָּחִיל תִּזְעַק בַּחֲבָלֶיהָ; כֵּן הָיִינוּ מִפָּנֶיךָ יְהוָה׃

הָרִינוּ חַלְנוּ, כְּמוֹ יָלַדְנוּ רוּחַ; יְשׁוּעֹת בַּל־נַעֲשֶׂה אֶרֶץ, וּבַל־יִפְּלוּ יֹשְׁבֵי תֵבֵל׃

יִחְיוּ מֵתֶיךָ, נְבֵלָתִי יְקוּמוּן; הָקִיצוּ וְרַנְּנוּ שֹׁכְנֵי עָפָר, כִּי טַל אוֹרֹת טַלֶּךָ, וָאָרֶץ רְפָאִים תַּפִּיל׃ ס

לֵךְ עַמִּי בֹּא בַחֲדָרֶיךָ, וּסְגֹר דְּלָתֶיךָ (דְּלָתְךָ) בַּעֲדֶךָ; חֲבִי כִמְעַט־רֶגַע עַד־יַעֲבוֹר־ (יַעֲבָר־) זָעַם׃

כִּי־הִנֵּה יְהוָה יֹצֵא מִמְּקוֹמוֹ, לִפְקֹד עֲוֹן יֹשֵׁב־הָאָרֶץ עָלָיו; וְגִלְּתָה הָאָרֶץ אֶת־דָּמֶיהָ, וְלֹא־תְכַסֶּה עוֹד עַל־הֲרוּגֶיהָ׃ ס