Въ лѣ́то пе́рвое ки́ра царя́ пе́рсскаго, да испо́лнится сло́во Госпо́дне от у́стъ иеремі́иныхъ, воздви́же Госпо́дь ду́хъ ки́ра царя́ пе́рсскаго, и повелѣ́ проповѣ́дати во все́мъ ца́рствiи свое́мъ, и писа́ньми, глаго́ля:

сiя́ глаго́летъ ки́ръ ца́рь пе́рсскiй: вся́ ца́рства земна́я даде́ мнѣ́ Госпо́дь Бо́гъ небе́сный, и то́й повелѣ́ ми, да сози́жду ему́ до́мъ во Иерусали́мѣ, и́же во Иуде́и:

кто́ въ ва́съ от всѣ́хъ люді́й его́? и бу́детъ Бо́гъ его́ съ ни́мъ, и да взы́детъ во Иерусали́мъ, и́же во Иуде́и, и да сози́ждетъ до́мъ Бо́гу Изра́илеву, то́й е́сть Бо́гъ, и́же во Иерусали́мѣ:

и вся́къ оста́вшiйся от всѣ́хъ мѣ́стъ, идѣ́же то́й обита́етъ, и да помо́гутъ ему́ му́жiе от мѣ́ста его́ сребро́мъ и зла́томъ, и сосу́ды и скоты́, съ доброво́льными обѣща́нiи [принесу́тъ] въ це́рковь Бо́жiю, я́же во Иерусали́мѣ.

И воста́ша кня́зи оте́чествъ Иу́диныхъ и Венiами́нихъ и свяще́нницы и леви́ти, и вси́, и́мже воздви́же Бо́гъ ду́хъ и́хъ, да взы́дутъ созида́нiю це́ркве Госпо́дни, я́же во Иерусали́мѣ:

и вси́, и́же бя́ху о́крестъ, помого́ша рука́мъ и́хъ сосу́ды сре́брбяными, зла́томъ, потре́бными, и скота́ми, и драги́ми вещми́, кромѣ́ доброво́льных.

И ца́рь ки́ръ изнесе́ сосу́ды це́ркве Госпо́дни, и́хже взя́ Навуходоно́соръ изъ Иерусали́ма и положи́ ты́я въ це́ркви бо́га своего́:

изнесе́ же ты́я ки́ръ ца́рь пе́рсскiй руко́ю Миѳрида́та гасвари́нова, и сочте́ ты́я сасавасса́ру кня́зю Иуде́йску.

И сiе́ число́ и́хъ: умыва́лницъ златы́хъ три́десять, умыва́лницъ же сре́бряныхъ ты́сяща, ноже́й два́десять де́вять,

и ча́шъ златы́хъ три́десять, и сре́бряныхъ двойны́хъ четы́реста де́сять, и сосу́довъ ины́хъ ты́сяща:

всѣ́хъ сосу́довъ златы́хъ и сре́бряныхъ пя́ть ты́сящъ и четы́реста, вся́ взя́ съ собо́ю сасавасса́ръ от преселе́нiя Вавило́нскаго во Иерусали́мъ.

Сі́и же су́ть сы́нове страны́, и́же взыдо́ша от плѣ́на преселе́нiя, и́хже пресели́ Навуходоно́соръ ца́рь Вавило́нскiй въ Вавило́нъ: и возврати́шася во Иерусали́мъ и Иуде́ю кі́йждо му́жъ во гра́дъ сво́й.

И́же прiидо́ша съ зорова́велемъ: Иису́съ, Неемі́а, Сараі́а, Реелі́а, Мардохе́й, Валаса́нъ, Масфа́ръ, Вагу́й, Реу́мъ, Ваана́. Сiе́ число́ муже́мъ люді́й Изра́илевыхъ:

сы́нове Фаре́совы двѣ́ ты́сящы сто́ се́дмьдесятъ и два́,

сы́нове Сафати́евы три́ста се́дмьдесятъ два́,

сы́нове Аре́совы се́дмь со́тъ се́дмьдесятъ пя́ть,

сы́нове фаа́ѳъ-моа́вли от сыно́въ Иису́евухъ и Иоа́влихъ двѣ́ ты́сящы о́смь со́тъ двана́десять,

сы́нове Ела́мли ты́сяща двѣ́сти пятьдеся́тъ четы́ри,

сы́нове Заѳу́евы де́вять со́тъ четы́редесять пя́ть,

сы́нове Закха́ни се́дмь со́тъ шестьдеся́тъ,

сы́нове Вану́евы ше́сть со́тъ четы́редесять два́,

сы́нове Вава́евы ше́сть со́тъ два́десять три́,

сы́нове Авга́довы ты́сяща двѣ́сти два́десять два́,

сы́нове Адоника́мовы ше́сть со́тъ шестьдеся́тъ ше́сть,

сы́нове Вагу́евы двѣ́ ты́сящы пятьдеся́тъ ше́сть,

сы́нове ́Адины четы́риста пятьдеся́тъ четы́ри,

сы́нове Ати́ровы, и́же бя́ху от езекі́и, де́вятьдесятъ о́смь,

сы́нове Вассу́евы три́ста два́десять три́,

сы́нове Иора́вовы сто́ двана́десять,

сы́нове Асу́мли двѣ́сти два́десять три́,

сы́нове Гаве́ровы де́вятьдесятъ пя́ть,

сы́нове Веѳлае́мли сто́ два́десять три́,

сы́нове Нетофа́евы пятьдеся́тъ ше́сть,

сы́нове Анаѳо́ѳовы сто́ два́десять о́смь,

сы́нове Азмо́ѳовы четы́редесять три́,

сы́нове Карiаѳiари́мли, Хафира́ и Виро́ѳъ, се́дмь со́тъ четы́редесять три́,

сы́нове от Ра́мы и Гаваи́ ше́сть со́тъ два́десять еди́нъ,

муже́й Махма́скихъ сто́ два́десять два́,

муже́й Веѳи́лскихъ и га́йскихъ четы́реста два́десять три́,

сы́нове от Навы́ пятьдеся́тъ два́,

сы́нове Магеви́совы сто́ пятьдеся́тъ ше́сть,

сы́нове Илама́ровы ты́сяща двѣ́сти пятьдеся́тъ четы́ри,

сы́нове Ира́мли три́ста два́десять,

сы́нове Лиддо́новы, Лодади́довы и ́Оновы се́дмь со́тъ два́десять пя́ть,

сы́нове Иерихо́ни три́ста четы́редесять пя́ть,

сы́нове Сеннаа́евы три́ ты́сящы ше́сть со́тъ три́десять.

Свяще́нницы же: сы́нове Иеду́евы въ дому́ иису́евѣ де́вять со́тъ се́дмьдесятъ три́,

сы́нове Емми́ровы ты́сяща пятьдеся́тъ два́,

сы́нове Фассу́ровы ты́сяща двѣ́сти четы́редесять се́дмь,

сы́нове Ире́мли ты́сяща седмьна́десять.

Леви́ти же сы́нове Иису́евы и Кадмiи́ли от сыно́въ Одуі́евыхъ се́дмьдесятъ четы́ри.

Пѣвцы́ же сы́нове Аса́фовы сто́ два́десять о́смь.

Сы́нове две́рниковъ: сы́нове Селлу́мли, сы́нове ати́ровы, сы́нове Телмо́новы, сы́нове Аку́вовы, сы́нове Ати́товы, сы́нове Соваи́евы, всѣ́хъ сто́ три́десять де́вять.

Наѳине́е: сы́нове суа́вли, сы́нове суфа́товы, сы́нове Таввао́ѳли,

сы́нове Кира́совы, сы́нове Сирса́вли, сы́нове Фадо́нины,

сы́нове Лава́новы, сы́нове Ага́вовы, сы́нове Аку́вовы,

сы́нове Ага́вовы, сы́нове Селамі́ины, сы́нове Ана́новы,

сы́нове Гедди́лины, сы́нове Гаа́ровы, сы́нове Раiа́евы,

сы́нове Расо́новы, сы́нове Неко́довы, сы́нове Газе́мли,

сы́нове Азо́ковы, сы́нове Фаси́евы, сы́нове Расі́ины,

сы́нове Асена́евы, сы́нове Мунни́новы, сы́нове Нефуси́мли,

сы́нове вакву́ковы, сы́нове Акуфа́евы, сы́нове Ану́ровы,

сы́нове Васало́ѳовы, сы́нове Мида́новы, сы́нове Арса́новы,

сы́нове Варко́совы, сы́нове Сиса́рины, сы́нове Ѳема́вли,

сы́нове Наѳи́евы, сы́нове Ати́фовы.

Сы́нове слу́гъ Соломо́новыхъ: сы́нове Сота́евы, сы́нове Сефи́рины, сы́нове Фаду́ровы,

сы́нове Иеала́евы, сы́нове Дерко́новы, сы́нове Гедди́лины,

сы́нове Сафати́евы, сы́нове Атти́левы, сы́нове Фахера́ѳовы, сы́нове Асевои́мли, сы́нове Име́евы:

вси́ наѳани́мовы и сы́нове слу́гъ Соломо́новыхъ три́ста де́вятьдесятъ два́.

И сі́и, и́же восхожда́ху от Ѳелмеле́ха, Ѳелариса́, херу́въ, Ида́нъ, Емми́ръ, и не мого́ша сказа́ти до́му оте́чества своего́ и сѣ́мене своего́, от Изра́иля ли бы́ша:

сы́нове Далаи́евы, сы́нове Тови́евы, сы́нове Некода́евы, ше́сть со́тъ пятьдеся́тъ два́:

и от сыно́въ свяще́нническихъ сы́нове Оваи́евы, сы́нове Акку́совы, сы́нове Верзелла́евы, и́же поя́ от дще́рей Верзелла́а Галаади́тина жену́ и нарече́ся и́менемъ и́хъ:

ті́и иска́ша писа́нiя ро́ду своему́ и не обрѣто́ша, и изгна́ни су́ть от свяще́нства.

И рече́ Аѳерсаѳа́ и́мъ, да не ядя́тъ от свята́го святы́хъ, до́ндеже воста́нетъ свяще́нникъ со изъявле́нiемъ и и́стиною.

Все́ же мно́жество ку́пно я́ко четы́ри тмы́ двѣ́ ты́сящы три́ста шестьдеся́тъ,

кромѣ́ рабо́въ и́хъ и рабы́нь и́хъ, си́хъ се́дмь ты́сящъ три́ста три́десять се́дмь: и сі́и пѣвцы́ и пѣвни́цы двѣ́сти.

Ко́ней и́хъ се́дмь со́тъ три́десять ше́сть, мско́въ и́хъ двѣ́сти четы́редесять пя́ть,

велблю́довъ и́хъ четы́реста три́десять пя́ть, осло́въ и́хъ ше́сть ты́сящъ се́дмь со́тъ два́десять.

И от князе́й оте́чествъ, егда́ вхожда́ху ті́и въ це́рковь Госпо́дню, я́же во Иерусали́мѣ, доброво́льно принесо́ша въ до́мъ Бо́жiй, поста́вити его́ на основа́нiи его́:

по си́лѣ свое́й да́ша въ росхо́дъ дѣ́ла, зла́та дра́хмъ шестьдеся́тъ ты́сящъ и ты́сящу, и сребра́ мна́съ пя́ть ты́сящъ, и одѣя́нiй свяще́нническихъ сто́.

И сѣдо́ша свяще́нницы и леви́ти, и и́же от люді́й, и пѣвцы́ и две́рницы и наѳини́мляне во градѣ́хъ свои́хъ, и ве́сь Изра́иль во градѣ́хъ свои́хъ.

Прише́дшу же ме́сяцу седмо́му, и бя́ху сы́нове Изра́илевы во градѣ́хъ свои́хъ, и собра́шася лю́дiе а́ки человѣ́къ еди́нъ во Иерусали́мъ.

И воста́ Иису́съ сы́нъ Иоседе́ковъ и бра́тiя его́ свяще́нницы, и зорова́вель сы́нъ Салаѳiи́левъ и бра́тiя его́, и созда́ша олта́рь Бо́гу Изра́илеву, да принесу́тъ на не́мъ всесожже́нiя, я́коже пи́сано е́сть въ зако́нѣ Моисе́а человѣ́ка Бо́жiя.

И угото́ваша олта́рь на основа́нiи его́, поне́же стра́хъ бѣ́ на ни́хъ от люді́й земны́хъ, и вознесо́ша на то́мъ всесожже́нiе Го́сподеви у́тро и въ ве́черъ:

и сотвори́ша пра́здникъ ку́щей, я́коже пи́сано, и всесожже́нiя на вся́къ де́нь число́мъ по повелѣ́нiю, дѣ́ло дне́ въ де́нь сво́й:

и посе́мъ всесожже́нiя непреста́нная и въ новоме́сячiя и во вся́ пра́здники Го́сподеви освяще́нныя, и о вся́цѣмъ доброво́льно принося́щемъ со усе́рдiемъ Го́сподеви.

От пе́рваго дне́ ме́сяца седма́го нача́ша возноси́ти всесожже́нiя Го́сподеви, до́мъ же Госпо́день не бѣ́ еще́ основа́нъ.

И вда́ша пѣ́нязи каменосѣ́чцемъ и древодѣ́лемъ, пи́щу же и питiе́ и еле́й Сидо́няномъ и ти́ряномъ, да принесу́тъ древа́ ке́дрова от Лива́на къ мо́рю Иоппі́йскому, я́коже соизво́ли ки́ръ ца́рь пе́рсскiй о ни́хъ.

И въ лѣ́то второ́е, внегда́ прiити́ и́мъ къ до́му Бо́жiю во Иерусали́мъ, ме́сяца втора́го нача́ зорова́вель сы́нъ Салаѳiи́левъ и Иису́съ сы́нъ Иоседе́ковъ, и про́чiи от бра́тiи и́хъ свяще́нницы и леви́ти, и вси́, и́же прiидо́ша от плѣне́нiя во Иерусали́мъ, и поста́виша леви́товъ от два́десяти лѣ́тъ и вы́шше надъ творя́щими дѣла́ во хра́мѣ Госпо́дни.

И ста́ Иису́съ и сы́нове его́ и бра́тiя его́, кадои́лъ и сы́нове его́, сы́нове Иу́дины, я́коже му́жъ еди́нъ да единоду́шно настоя́тъ надъ творя́щими дѣла́ въ дому́ Бо́жiи, сы́нове инада́довы, сы́нове и́хъ и бра́тiя и́хъ леви́ти.

И основа́ша созида́юще до́мъ Госпо́день: и ста́ша свяще́нницы во украше́нiи свое́мъ со труба́ми, и леви́ти сы́нове Аса́фовы, въ кимва́лѣхъ да хва́лятъ Го́спода, по уста́ву дави́да царя́ Изра́илева:

и вопiя́ху въ пѣ́снехъ и исповѣ́данiи Го́сподеви, я́ко бла́гъ, я́ко въ вѣ́къ ми́лость его́ надъ Изра́илемъ: и вси́ лю́дiе возглаша́ху гла́сомъ вели́кимъ хвале́нiе Го́споду при основа́нiи до́му Госпо́дня.

И мно́зи от свяще́нниковъ и Леви́тъ, и кня́зи оте́чествъ и старѣ́йшины, и́же ви́дѣша до́мъ пре́жднiй на основа́нiи свое́мъ, и се́й до́мъ предъ очесы́ свои́ми, пла́каху гла́сомъ ве́лiимъ: и наро́дъ возглаша́ющь, въ весе́лiи возвыша́ху:

и не можа́ху лю́дiе позна́ти гла́са восклица́нiя веселя́щихся от гласо́въ пла́ча наро́днаго, поне́же лю́дiе восклица́ху гла́сомъ вели́кимъ, и гла́съ вели́къ слы́шашеся издале́ча.

И услы́шаша врази́ Иу́дины и Венiами́ни, я́ко сы́нове преселе́нiя созида́ютъ це́рковь Го́споду Бо́гу Изра́илеву,

и приступи́ша къ зорова́велю и ко князе́мъ оте́чествъ и реко́ша и́мъ: сози́ждемъ съ ва́ми, поне́же, я́коже и вы́, и́щемъ Бо́га ва́шего и ему́ мы́ жре́мъ же́ртву от дні́й Асарада́на царя́ Ассу́рска приве́дшаго ны сѣ́мо.

И рече́ и́мъ зорова́вель и Иису́съ и про́чiи кня́зи оте́чествъ Изра́илевыхъ: нѣ́сть на́мъ и ва́мъ созда́ти до́мъ Бо́гу на́шему, поне́же мы́ са́ми осо́бно сози́ждемъ Го́споду Бо́гу на́шему, я́коже повелѣ́ на́мъ ки́ръ ца́рь пе́рсскiй.

И бы́ша лю́дiе земли́ [тоя́] ослабля́юще ру́ки люді́й Иуде́йскихъ, и препина́ху и́мъ въ созида́нiи,

и наима́ху на ни́хъ совѣ́тниковъ, да разоря́тъ совѣ́тъ и́хъ, во вся́ дни́ ки́ра царя́ пе́рсскаго и да́же до ца́рства да́рiа царя́ пе́рсскаго.

[Въ ца́рство же Ассуи́ра, [и́же е́сть Артаксе́рксъ,] въ нача́лѣ ца́рства его́, написа́ша сви́токъ на живу́щихъ во Иуде́и и во Иерусали́мѣ.

И во дни́ Арѳасаѳа́на написа́ въ ми́рѣ Миѳрида́тъ и тавеи́лъ со про́чими сослужи́тели ко Артаксе́рксу царю́ пе́рсскому: написа́ писмоно́сецъ писа́нiе Си́рскимъ язы́комъ и претолко́вано.

Реу́мъ Валтаа́мъ и сампса́ книго́чiй написа́ста посла́нiе еди́но на Иерусали́мъ ко Артаксе́рксу царю́:

та́ко суди́лъ реу́мъ Валтаа́мъ и сампса́ книго́чiй и про́чiи сослужи́телiе на́ши, дине́е, Афарсаѳахе́е, тарфале́е, Арфасе́е, архие́е, Вавило́няне, сусанахе́е, Саве́е, Елами́те

и про́чiи от язы́къ, и́хже преведе́ Ассенафа́ръ вели́кiй и пресла́вный и всели́ и́хъ во градѣ́хъ самарі́йскихъ и про́чихъ объ о́нъ по́лъ рѣки́.

Сiе́ е́сть сказа́нiе посла́нiя, е́же посла́ша къ нему́, ко Артаксе́рксу царю́: раби́ твои́, му́жiе, и́же за рѣко́ю:

вѣ́домо да бу́детъ царю́, я́ко Иуде́е, и́же взыдо́ша от тебе́ къ на́мъ, прiидо́ша во Иерусали́мъ гра́дъ отсту́пный и лука́вый, его́же созида́ютъ: и стѣ́ны его́ состро́ены су́ть, и основа́нiе его́ возвы́сиша:

ны́нѣ у́бо вѣ́домо да бу́детъ царю́, я́ко, а́ще гра́дъ се́й со́зданъ бу́детъ, и стѣ́ны его́ соверша́тся, да́ни не бу́дутъ тебѣ́, ниже́ [лѣ́тняго воздая́нiя] даду́тъ: и сiе́ царе́мъ зло́ твори́тъ,

и посрамоще́нiя царе́ва не лѣ́ть на́мъ ви́дѣти: сего́ ра́ди посла́хомъ и возвѣсти́хомъ царю́,

да разсмо́трено бу́детъ въ кни́зѣ памятопи́снѣй отце́въ твои́хъ, и обря́щеши въ кни́зѣ памятопи́снѣй и позна́еши, я́ко гра́дъ о́нъ отсту́пный е́сть и оби́дящь царе́й и страны́, и убѣ́жища слу́гъ быва́ютъ посредѣ́ его́ от дні́й дре́внихъ, сего́ ра́ди и гра́дъ то́й опустоше́нъ е́сть:

вѣ́домо у́бо твори́мъ царю́, я́ко, а́ще гра́дъ то́й со́зданъ бу́детъ и стѣ́ны его́ соверша́тся, то́ не бу́детъ ти́ ми́ра.

И посла́ ца́рь ко реу́му Валтаа́му и сампса́ю книго́чiю и ко про́чымъ сослужи́телемъ и́хъ обита́ющымъ въ самарі́и и про́чымъ за рѣко́ю ми́ръ

и рече́: писмоно́сецъ, его́же посла́сте къ на́мъ, при́званъ предъ мене́,

и от мене́ повелѣ́но е́сть, и согля́дахомъ и обрѣто́хомъ, я́ко гра́дъ то́й от дні́й дре́внихъ на царе́й возно́сится, отступле́нiя и убѣ́жища быва́ютъ въ не́мъ:

и ца́рiе крѣ́пцы бы́ша во Иерусали́мѣ и облада́ху все́ю страно́ю, я́же за рѣко́ю, да́ни же мно́ги и ча́сть дава́шеся и́мъ:

и ны́нѣ повели́те муже́мъ о́нымъ преста́ти от дѣ́ла, и гра́дъ о́ный да не созида́ется ктому́:

я́ко да от повелѣ́нiя сего́ опа́сни бу́дете нерадѣ́нiе твори́ти о се́мъ, да не когда́ умно́жится поги́бель на зло́ царе́мъ.

Тогда́ писмоно́сецъ Артаксе́ркса царя́ прочте́ сви́токъ предъ реу́момъ Валтаа́момъ и сампса́емъ книго́чiемъ и сослужи́телми и́хъ: и идо́ша тща́телно во Иерусали́мъ и во Иуде́ю, и удержа́ша и́хъ мы́шцею си́льною.

Тогда́ преста́ дѣ́ло до́му Бо́жiя, е́же во Иерусали́мѣ, и не творя́шеся да́же до лѣ́та втора́го ца́рства да́рiа царя́ пе́рсскаго.

Проро́чествова же Агге́й проро́къ и Заха́рiа сы́нъ а́ддовъ прорица́нiе ко Иуде́омъ, и́же бя́ху во Иуде́и и Иерусали́мѣ, во и́мя Бо́га Изра́илева на ни́хъ.

Тогда́ воста́ста зорова́вель сы́нъ Салаѳiи́левъ и Иису́съ сы́нъ Иоседе́ковъ и нача́ста зда́ти до́мъ Бо́жiй, и́же во Иерусали́мѣ: и съ ни́ма проро́цы Бо́жiи помога́юще и́ма.

Въ то́ вре́мя прiи́де къ ни́мъ Ѳаѳана́й кня́зь су́щiй за рѣко́ю и саѳарвузана́й и сослужи́телiе и́хъ, и сiя́ реко́ша и́мъ: кто́ даде́ ва́мъ вла́сть созида́ти до́мъ се́й и стѣ́ны сiя́ возставля́ти?

Тогда́ сiя́ реко́ша и́мъ: ка́я су́ть имена́ муже́й созида́ющихъ гра́дъ се́й?

И о́чи Бо́жiи на плѣне́нiе Иу́дино, и не возбрани́ша и́мъ, до́ндеже посла́нiе къ да́рiю отнесе́но, и тогда́ посла́ся съ писмоно́сцемъ о се́мъ.

Изъявле́нiе посла́нiя, е́же посла́ Ѳаѳана́й кня́зь объ о́нъ по́лъ рѣки́ и саѳарвузана́й и сослужи́телiе и́хъ Афарсахе́е, и́же бя́ху за рѣко́ю, да́рiю царю́:

словесы́ посла́ша къ нему́, и сiя́ пи́сана въ не́мъ: да́рiю царю́ ми́ръ вся́къ:

вѣ́домо да бу́детъ царю́, я́ко ходи́хомъ во Иуде́йскую страну́ къ до́му Бо́га вели́каго, и то́й созида́ется ка́менiемъ избра́ннымъ, и древа́ ста́вятся въ стѣна́хъ, дѣ́ло же то́ со тща́нiемъ стро́ится и благопоспѣша́ется въ рука́хъ и́хъ:

тогда́ вопроси́хомъ старѣ́йшинъ тѣ́хъ и та́ко реко́хомъ и́мъ: кто́ даде́ ва́мъ вла́сть до́мъ се́й созида́ти и стѣ́ны сiя́ возставля́ти?

и о и́менѣхъ и́хъ вопроси́хомъ и́хъ, да возвѣсти́мъ тебѣ́, я́ко да напи́шемъ тебѣ́ имена́ муже́й, и́же су́ть нача́лницы и́хъ:

и сицева́ словеса́ отвѣща́ша на́мъ глаго́люще: мы́ есмы́ раби́ Бо́га небесе́ и земли́, и созида́емъ до́мъ, и́же бы́сть устро́енъ пре́жде сего́ за лѣ́та мно́га, и ца́рь Изра́илевъ вели́кiй созда́ его́ и соверши́ его́ и́мъ:

егда́ же прогнѣ́ваша отцы́ на́ши Бо́га небе́снаго, предаде́ и́хъ въ ру́ки Навуходоно́сора царя́ Вавило́нскаго халде́анина, и до́мъ се́й разори́ и лю́ди преведе́ въ Вавило́нъ:

но въ лѣ́то пе́рвое ки́ра царя́, ки́ръ ца́рь Вавило́нскiй поста́ви повелѣ́нiе, да до́мъ Бо́жiй се́й сози́ждется,

и сосу́ды до́му Бо́жiя златы́я и сре́бряныя, я́же Навуходоно́соръ взя́ изъ до́му, и́же во Иерусали́мѣ, и отнесе́ я́ въ хра́мъ Вавило́нскiй, изнесе́ ты́я ки́ръ ца́рь от хра́ма Вавило́нскаго и даде́ и́хъ Саванаса́ру храни́телю, и́же надъ сокро́вищемъ,

и рече́ ему́: вся́ сосу́ды сiя́ возми́ и иди́, и поста́ви и́хъ въ дому́, и́же е́сть во Иерусали́мѣ, на мѣ́сто и́хъ:

тогда́ Саванаса́ръ то́й прiи́де и поста́ви основа́нiе до́му Бо́жiя во Иерусали́мѣ, и от того́ вре́мене да́же доны́нѣ созида́ется, и еще́ не соверше́нъ е́сть:

и ны́нѣ а́ще [ви́дится] царю́ бла́го, да посмотри́тъ въ дому́ сокро́вища царя́ Вавило́нскаго, да увѣ́си, я́ко от царя́ ки́ра бы́сть повелѣ́нiе созида́ти до́мъ Бо́жiй се́й, и́же во Иерусали́мѣ, и увѣ́давъ о се́мъ ца́рь да по́слетъ къ на́мъ.

Тогда́ да́рiй ца́рь повелѣ́, и иска́ша во книгохрани́телницахъ, идѣ́же сокро́вище лежи́тъ въ Вавило́нѣ.

И обрѣ́теся во Ама́ѳѣ гра́дѣ миді́йстѣмъ въ пала́тѣ глави́зна еди́на, и сiе́ пи́сано бѣ́ въ не́й на па́мять:

въ лѣ́то пе́рвое ки́ра царя́, ки́ръ ца́рь ца́рь повелѣ́ о до́мѣ Бо́жiи, и́же во Иерусали́мѣ: до́мъ да сози́ждется, и мѣ́сто, идѣ́же жру́тъ же́ртвы: и положи́ мѣ́ру высоты́ лако́тъ шестьдеся́тъ, широта́ его́ лако́тъ шестьдеся́тъ:

и стѣ́ны ка́менныя тве́рдыя три́, и стѣна́ древя́ная еди́на, иждиве́нiе же от до́му царе́ва да да́стся:

и сосу́ди до́му Бо́жiя златі́и и сре́брянiи, и́хже Навуходоно́соръ взя́ от до́му, и́же во Иерусали́мѣ, и пренесе́ и́хъ въ Вавило́нъ, да отдаду́тся и внесу́тся въ до́мъ, и́же во Иерусали́мѣ, на мѣ́сто, идѣ́же и поста́влени бя́ху въ дому́ Бо́жiи:

ны́нѣ у́бо дади́те, кня́зiе су́щiи за рѣко́ю, саѳарвузана́й и сослужи́телiе и́хъ Афарсахе́е, и́же за рѣко́ю, дале́че отиди́те отту́ду:

ны́нѣ оста́вите дѣ́ло до́му Бо́жiя: кня́зiе Иуде́йстiи и старѣ́йшины и́хъ до́мъ Бо́жiй то́й да созида́ютъ на мѣ́стѣ свое́мъ:

и от мене́ повелѣ́но бы́сть, да не когда́ что́ сотвори́те проти́вно старѣ́йшинамъ жидо́вскимъ въ созида́нiи до́му Бо́жiя о́наго: и от имѣ́нiй ца́рскихъ да́ней су́щихъ за рѣко́ю прилѣ́жно на иждиве́нiе да дае́тся муже́мъ тѣ́мъ, е́же бы не преста́ло дѣ́ло то́:

и е́же а́ще оскудѣ́етъ, и телцы́ и овны́ и а́гнцы, во всесожже́нiя Бо́гу небе́сному, пшени́ца, со́ль, вино́, еле́й, по словеси́ свяще́нниковъ, и́же во Иерусали́мѣ, да дае́тся и́мъ по вся́ дни́, е́же а́ще воспро́сятъ,

да бу́дутъ принося́щiи благоуха́нiя Бо́гу небе́сному и да мо́лятся о жи́зни царя́ и сыно́въ его́:

и от мене́ уста́влено повелѣ́нiе, да вся́къ человѣ́къ, и́же престу́питъ повелѣ́нiе сiе́, во́змется дре́во от до́му его́, и воздви́женъ обѣ́сится на не́мъ, и до́мъ его́ мнѣ́ бу́детъ взя́тъ:

и Бо́гъ, его́же обита́етъ и́мя та́мо, да низврати́тъ вся́каго царя́ и лю́ди, и́же простру́тъ ру́ку свою́ премѣни́ти или́ разори́ти до́мъ Бо́жiй, и́же е́сть во Иерусали́мѣ: а́зъ да́рiй поста́вихъ повелѣ́нiе, съ прилѣжа́нiемъ да бу́детъ.

Тогда́ Ѳаѳана́й кня́зь страны́ зарѣ́чныя, саѳарвузана́й и сослуже́бницы его́, я́коже посла́ да́рiй ца́рь, та́ко сотвори́ша тща́телно.

Старѣ́йшины же Иуде́йстiи созида́ху и леви́ти по проро́честву Агге́а проро́ка и Заха́рiи сы́на а́ддова. И созда́ша и соверши́ша по повелѣ́нiю Бо́га Изра́илева и по повелѣ́нiю ки́ра и да́рiа и Артаксе́ркса царе́й пе́рсскихъ,

и соверши́ша до́мъ то́й да́же до дне́ тре́тiяго, ме́сяца Ада́ра, и́же е́сть въ лѣ́то шесто́е ца́рства да́рiа царя́.

Сотвори́ша же сы́нове Изра́илевы, свяще́нницы и леви́ти, и про́чiи сыно́въ преселе́нiя обновле́нiе до́му Бо́жiя въ ра́дости,

и принесо́ша на обновле́нiе до́му Бо́жiя телце́въ сто́, овно́въ двѣ́сти, а́гнцевъ четы́реста, козло́въ от ко́зъ за грѣхи́ всего́ Изра́иля двана́десять, по числу́ колѣ́нъ Изра́илевыхъ:

и поста́виша свяще́нниковъ въ чинѣ́хъ свои́хъ и леви́ты въ ча́стехъ свои́хъ на служе́нiе до́му Бо́жiя во Иерусали́мѣ, я́коже пи́сано е́сть въ кни́зѣ Моисе́овѣ.

И сотвори́ша сы́нове преселе́нiя па́сху въ четвертыйна́десять де́нь ме́сяца пе́рваго:

очище́ни бо бя́ху свяще́нницы и леви́ти да́же до еди́наго вси́ чи́сти, и пожро́ша па́сху всѣ́мъ сыно́мъ преселе́нiя и бра́тiи и́хъ свяще́нникомъ и себѣ́ самы́мъ.

И ядо́ша сы́нове Изра́илевы па́сху, и́же от преселе́нiя, и вся́къ отлучи́выйся от оскверне́нiя язы́ковъ земли́ къ ни́мъ, е́же взыска́ти Го́спода Бо́га Изра́илева.

И сотвори́ша пра́здникъ опрѣсно́чный се́дмь дні́й въ весе́лiи, я́ко возвесели́ и́хъ Госпо́дь и обрати́ се́рдце царя́ Ассу́рска къ ни́мъ, укрѣпи́ти ру́ки и́хъ въ дѣ́лѣхъ до́му Бо́га Изра́илева.

По си́хъ же словесѣ́хъ, въ ца́рство Артаксе́ркса царя́ пе́рсскаго, взы́де Е́здра сы́нъ саре́а, сы́на азарі́ева, сы́на хелкі́ева,

сы́на Селлу́мля, сы́на садду́кова, сы́на Ахито́вля,

сы́на самарі́ева, сы́на Есрі́ева, сы́на марео́ѳова,

сы́на зараі́ева, сы́на езеі́ева, сы́на воккі́ева,

сы́на Авису́ева, сы́на Финее́сова, сы́на Елеаза́рова, сы́на Ааро́на свяще́нника пе́рваго:

се́й Е́здра взы́де от Вавило́на и се́й писе́цъ ско́ръ въ зако́нѣ Моисе́овѣ, его́же даде́ Госпо́дь Бо́гъ Изра́илю. И даде́ ему́ ца́рь, я́ко рука́ Го́спода Бо́га его́ на не́мъ бѣ́ во всѣ́хъ, я́же иска́ше о́нъ.

И взыдо́ша от сыно́въ Изра́илевыхъ и от свяще́нниковъ и от леви́товъ, и пѣвцы́ и придве́рницы и наѳини́ми во Иерусали́мъ, въ лѣ́то седмо́е Артаксе́ркса царя́,

и прiидо́ша во Иерусали́мъ ме́сяца пя́таго: сiе́ е́сть лѣ́то седмо́е царе́во:

зане́ въ пе́рвый де́нь ме́сяца пе́рваго то́й нача́ восходи́ти от Вавило́на, и въ пе́рвый де́нь ме́сяца пя́таго прiидо́ша во Иерусали́мъ, я́ко рука́ Бо́га его́ блага́ на не́мъ бѣ́:

Е́здра бо угото́ва се́рдце свое́, да взы́щетъ зако́на [Госпо́дня] и да тво́ритъ и учи́тъ во Изра́или повелѣ́ниемъ и судьба́мъ.

И сiе́ е́сть сказа́нiе посла́нiя е́же даде́ ца́рь Артаксе́рксъ е́здрѣ свяще́ннику, писцу́ кни́ги слове́съ за́повѣдiй Госпо́днихъ и повелѣ́нiй его́ во Изра́или:

Артаксе́рксъ ца́рь царе́й е́здрѣ свяще́ннику, писцу́ зако́на Го́спода Бо́га небе́снаго: да соверши́тся сло́во и отвѣ́тъ:

от мене́ повелѣ́но есть, да кі́йждо, и́же и́мать усе́рдiе бла́го во ца́рствѣ мое́мъ от люді́й Изра́илевыхъ и от свяще́нниковъ и от леви́товъ поити́ во Иерусали́мъ, съ тобо́ю да и́детъ:

от лица́ царе́ва и седми́ совѣ́тниковъ его́ по́сланъ еси́, да посѣти́ши Иуде́ю и Иерусали́мъ въ зако́нѣ Бо́га и́хъ, су́щемъ въ руку́ твое́ю,

и да отнесе́ши въ до́мъ Госпо́день сребро́ и зла́то, е́же ца́рь и совѣ́тницы его́ со усе́рдiемъ да́ша Бо́гу Изра́илеву, и́же во Иерусали́мѣ обита́етъ,

и все́ зла́то и сребро́, е́же а́ще обря́щеши во все́й о́бласти Вавило́нстѣй, съ доброво́льнымъ дая́нiемъ людски́мъ и свяще́нниковъ, во́лею принося́щихъ въ до́мъ Бо́жiй, и́же во Иерусали́мѣ:

и вся́кiй дохо́дъ то́й усе́рдно впиши́ въ кни́гу сiю́: телцы́, овны́, а́гнцы, и же́ртвы и́хъ и возлiя́нiя и́хъ: и принеси́ та́ на олта́рь до́му Бо́га ва́шего, и́же е́сть во Иерусали́мѣ:

и а́ще что́ тебѣ́ и бра́тiи твое́й бла́го возмни́тся от оста́вшагося сребра́ и зла́та сотвори́ти, я́коже уго́дно Бо́гу ва́шему, сотвори́те:

и сосу́ды, и́же даны́ тебѣ́ въ слу́жбу до́му Бо́жiя, вда́ждь предъ Бо́гомъ во Иерусали́мѣ:

и про́чыя потре́бы до́му Бо́га твоего́, е́же а́ще возмни́тся тебѣ́ да́ти, да да́си изъ домо́въ сокро́вища царе́ва

и от мене́ а́зъ Артаксе́рксъ ца́рь уста́вихъ повелѣ́нiе всѣ́мъ храни́телемъ сокро́вищъ, и́же су́ть за рѣко́ю, да все́, е́же а́ще воспро́ситъ от ва́съ Е́здра свяще́нникъ и писе́цъ зако́на Бо́га небе́снаго, гото́во да бу́детъ:

сребра́ да́же до ста́ тала́нтъ, и пшени́цы да́же до ста́ мѣ́ръ, и вина́ да́же до ста́ бо́чекъ, и еле́а да́же до ста́ чва́новъ, а со́ли безъ записа́нiя:

все́, е́же е́сть по во́ли Бо́га небе́снаго, да бу́детъ въ дому́ Бо́га небе́снаго: вонми́те, да не кто́ простре́тъ ру́ку на до́мъ Бо́га небе́снаго, да не когда́ бу́детъ гнѣ́въ на ца́рство царе́во и сыно́въ его́:

и ва́мъ зна́емо твори́мъ сiе́, от всѣ́хъ свяще́нниковъ и леви́товъ, пѣвце́въ, две́рниковъ, наѳини́мовъ и слу́гъ дому́ Бо́жiя да́нь да не бу́детъ тебѣ́, ниже́ имѣ́йте вла́сти порабоща́ти и́хъ:

ты́ же, Е́здра, по прему́дрости Бо́га твоего́, я́же въ руцѣ́ твое́й, поста́ви кни́жники и судiи́, да су́дятъ вся́ лю́ди, и́же су́ть за рѣко́ю, всѣ́мъ зна́ющымъ зако́нъ Бо́га твоего́, и не вѣ́дающему вѣ́дати сотвори́те:

и вся́къ, и́же не сотвори́тъ зако́на Бо́га твоего́ и зако́на царе́ва усе́рдно, су́дъ да бу́детъ сотворе́нъ на него́, а́ще въ сме́рть, или́ въ наказа́нiе, или́ во отщетѣ́нiе живота́, или́ въ темни́цу.

Благослове́нъ Госпо́дь Бо́гъ оте́цъ на́шихъ, и́же даде́ си́це въ се́рдце царе́во, да просла́витъ до́мъ Госпо́день, и́же во Иерусали́мѣ,

и на мя́ уклони́ милосе́рдiе предъ очи́ма царя́ и совѣ́тниковъ его́ и всѣ́хъ князе́й царе́выхъ си́льныхъ: и а́зъ укрѣпле́нъ бы́хъ, я́ко рука́ Бо́жiя блага́я на мнѣ́, и собра́хъ от Изра́иля князе́й взы́ти со мно́ю.

И сі́и кня́зiе оте́чествъ и́хъ вожде́ве, и́же взыдо́ша со мно́ю въ ца́рство Артаксе́ркса царя́ Вавило́нска:

от сыно́въ Финее́совыхъ Гирсо́нъ, от сыно́въ Иѳама́рихъ данiи́лъ, от сыно́въ дави́довыхъ атту́съ,

от сыно́въ сахані́иныхъ, от сыно́въ форо́совыхъ Заха́рiа, и съ ни́мъ муже́й сто́ пятьдеся́тъ,

от сыно́въ фаа́ѳъ-моа́ва Елiана́ сы́нъ Сараі́евъ, и съ ни́мъ двѣ́сти муже́й,

и от сыно́въ заѳои́совыхъ ехені́а сы́нъ азiи́левъ, и съ ни́мъ три́ста муже́й,

и от сыно́въ Ади́ныхъ ови́нъ сы́нъ Ионаѳа́новъ, и съ ни́мъ пятьдеся́тъ муже́й,

и от сыно́въ еда́млихъ Иса́iа сы́нъ Аѳелі́инъ, и съ ни́мъ се́дмьдесятъ муже́й,

и от сыно́въ Сафаті́евыхъ завді́а сы́нъ Михаи́ловъ, и съ ни́мъ о́смьдесятъ муже́й,

и от сыно́въ Иоа́влихъ Авді́а сы́нъ Иеiи́левъ и съ ни́мъ двѣ́сти осмьна́десять муже́й,

и от сыно́въ Ваані́евыхъ селиму́ѳъ сы́нъ Иосефі́евъ, и съ ни́мъ сто́ шестьдеся́тъ муже́й,

и от сыно́въ ваві́евыхъ Заха́рiа сы́нъ ваві́евъ, и съ ни́мъ два́десять о́смь муже́й,

и от сыно́въ азга́довыхъ Иона́нъ сы́нъ иката́новъ, и съ ни́мъ сто́ де́сять муже́й,

и от сыно́въ Адоника́млихъ послѣ́днiи, и сiя́ имена́ и́хъ: едифала́ѳъ, Иеiи́лъ и самаі́а, и съ ни́мъ шестьдеся́тъ муже́й,

и от сыно́въ вагуа́евыхъ уѳа́й и Заву́дъ, и съ ни́ми се́дмьдесятъ муже́й.

Собра́хъ же и́хъ къ рѣцѣ́ теку́щей ко Еві́и, и пребы́хомъ ту́ три́ дни́: иска́хъ же въ лю́дехъ и во свяще́нницѣхъ, и от сыно́въ Леві́иныхъ не обрѣто́хъ та́мо.

И посла́хъ ко Елеаза́ру, Арiи́лу, семеі́ю и къ маона́ну, и иери́ву и Елнаѳа́му, и наѳа́ну и Заха́рiи и Месолла́му, и ко Иоари́му и Елнаѳа́ну, прему́дрыхъ,

и изведо́хъ и́хъ ко Ада́ю нача́лнику на мѣ́стѣ ка́сфiа и вложи́хъ во уста́ и́хъ словеса́ глаго́лати ко Ада́ю и бра́тiи его́ Аѳини́момъ на мѣ́стѣ ка́сфiи, привести́ на́мъ пою́щихъ въ до́мъ Бо́га на́шего.

И прiидо́ша къ на́мъ, поне́же рука́ Бо́га на́шего бѣ́ блага́ на на́съ, му́жъ сахо́нъ от сыно́въ Моолі́евыхъ сы́на Леві́ина, сы́на Изра́илева, и сараві́а, и сы́нове его́ и бра́тiя его́ осмьна́десять:

и Асеві́а, и Иса́iа от сыно́въ Мера́риныхъ и бра́тiя его́ и сы́нове его́ два́десять:

и от наѳини́мовъ, и́хже даде́ дави́дъ и кня́зiе ко слу́жбѣ леви́томъ, наѳини́мовъ двѣ́сти два́десять, вси́ собра́шася по имено́мъ.

И проповѣ́дахъ та́мо по́стъ бли́зъ рѣ́ки ауи́, е́же смири́тися предъ Го́сподемъ Бо́гомъ на́шимъ, проси́ти от него́ пути́ пра́ваго на́мъ и ча́домъ на́шымъ и всему́ стяжа́нiю на́шему:

устыдѣ́хся бо испроси́ти от царя́ си́лы и ко́нникъ защи́тити на́съ от врага́ на пути́, поне́же рѣ́хомъ царю́ глаго́люще: рука́ Бо́га на́шего е́сть на всѣ́хъ и́щущихъ его́ во благо́е и крѣ́пость его́, я́рость же его́ на всѣ́хъ оставля́ющихъ его́.

Пости́хомся же и моли́хомся Бо́гу на́шему о се́мъ, и услы́ша на́съ.

И отлучи́хъ от князе́й свяще́нническихъ двана́десять, Сараі́ю, Асаві́ю и съ ни́ми от бра́тiи и́хъ де́сять:

возвѣ́сихъ же и́мъ сребро́ и зла́то и сосу́ды нача́тковъ до́му Бо́га на́шего, я́же вознесе́ ца́рь и совѣ́тницы его́ и кня́зiе его́, и ве́сь Изра́иль обрѣта́яйся,

и да́хъ вѣ́сомъ въ ру́ки и́хъ сребра́ тала́нтовъ ше́сть со́тъ пятьдеся́тъ, и сосу́довъ сре́бряныхъ сто́, и зла́та сто́ тала́нтъ,

и ча́шъ златы́хъ два́десять, дра́хмъ ты́сящу, и сосу́ды мѣ́ди свѣ́тлыя до́брыя разли́чныя, драгоцѣ́нныя я́ко зла́то,

и реко́хъ и́мъ: вы́ свя́ти Го́споду Бо́гу, и сосу́ди свя́ти и сребро́ и зла́то, е́же во́лею вдано́ е́сть Го́споду Бо́гу оте́цъ на́шихъ:

бди́те и стреги́те, до́ндеже вѣ́сомъ отдадите́ предъ кня́зи свяще́нниковъ и леви́товъ и предъ кня́зи оте́чествъ Изра́илевыхъ во Иерусали́мѣ, во ски́нiихъ до́му Госпо́дня.

И прiя́ша свяще́нницы и леви́ти вѣ́съ сребра́ и зла́та и сосу́довъ, да вознесу́тъ во Иерусали́мъ въ до́мъ Бо́га на́шего.

И воздвиго́хомся от рѣ́ки ауи́ во вторыйна́десять де́нь ме́сяца пе́рваго, да и́демъ во Иерусали́мъ: и рука́ Бо́га на́шего бѣ́ на на́съ и изба́ви на́съ от ру́къ вра́жiихъ и ра́тниковъ на пути́,

и прiидо́хомъ во Иерусали́мъ и пребы́хомъ ту́ три́ дни́.

И бы́сть въ де́нь четве́ртый, отда́хомъ вѣ́сомъ сребро́ и зла́то и сосу́ды въ дому́ Бо́га на́шего подъ ру́ку Маримо́ѳа сы́на урі́и свяще́нника, и съ ни́мъ Елеаза́ръ сы́нъ Финее́совъ, и съ ни́ми Иозава́дъ сы́нъ Иису́совъ и ноаді́а сы́нъ ванаі́евъ леви́ти,

по числу́ и вѣ́су вся́: и напи́санъ бы́сть ве́сь вѣ́съ.

Во вре́мя то́, и́же прiидо́ша от плѣне́нiя сы́нове преселе́нiя, принесо́ша всесожже́нiя Бо́гу Изра́илеву, телце́въ двана́десять за всего́ Изра́иля, овно́въ де́вятьдесятъ ше́сть, а́гнцевъ се́дмьдесятъ се́дмь, козло́въ за грѣхи́ двана́десять, вся́ во всесожже́нiе Го́споду.

И да́ша повелѣ́нiе царе́во прави́телемъ ца́рскимъ и князе́мъ, и́же за рѣко́ю: и просла́виша люді́й и до́мъ Бо́жiй.

И егда́ соверше́на бы́ша сiя́, приступи́ша ко мнѣ́ кня́зiе, глаго́люще: не отлучи́шася лю́дiе Изра́илевы и свяще́нницы и леви́ти от люді́й земны́хъ, [но] въ ме́рзостехъ и́хъ [су́ть], и́же су́ть Ханане́е, еѳѳе́е, Ферезе́е, Иевусе́е, Аммони́тяне, Моави́тяне и мосери́тяне и Аморре́ане,

поне́же поя́ша от дще́рей и́хъ себѣ́ и сыно́мъ свои́мъ, и смѣси́ся сѣ́мя свято́е съ людьми́ земны́ми, и рука́ князе́й и воево́дъ въ преступле́нiи се́мъ въ нача́лѣ.

И егда́ услы́шахъ словеса́ сiя́, раздра́хъ ри́зы моя́, и вострепета́хъ, и терза́хъ власы́ главы́ моея́ и брады́ моея́, и сѣдо́хъ тужа́.

И собра́шася ко мнѣ́ вси́ боя́щiися сло́ва Бо́га Изра́илева за преступле́нiе прише́дшихъ от плѣне́нiя, и а́зъ сѣдя́хъ приско́рбенъ да́же до же́ртвы вече́рнiя.

И въ же́ртву вече́рнюю воста́хъ от сѣ́тованiя моего́, и внегда́ раздра́хъ ри́зы моя́, и трепета́хъ, и преклони́хъ колѣ́на моя́, и простро́хъ руцѣ́ мои́ ко Го́споду Бо́гу моему́

и реко́хъ: Го́споди Бо́же мо́й, стыжду́ся и срамля́юся воздви́гнути лице́ мое́ къ тебѣ́, я́ко беззако́нiя на́ша умно́жишася па́че гла́въ на́шихъ, и прегрѣше́нiя на́ша возрасто́ша да́же до небесе́:

от дні́й оте́цъ на́шихъ въ преступле́нiи вели́цѣмъ есмы́ да́же до дне́ сего́, и въ беззако́нiихъ на́шихъ пре́дани есмы́ мы́ и ца́рiе на́ши и свяще́нницы на́ши и сы́нове на́ши въ руку́ царе́й язы́ческихъ, въ ме́чь и въ плѣне́нiе, и въ расхище́нiе и въ стыдѣ́нiе лица́ на́шего, я́коже въ де́нь се́й:

и ны́нѣ уми́лостивися надъ на́ми Бо́гъ на́шъ, е́же оста́вити ны́ во спасе́нiе и да́ти на́мъ тве́рдость на мѣ́стѣ святы́ни его́, е́же просвѣти́ти очеса́ на́ша и да́ти оживле́нiе ма́лое въ рабо́тѣ на́шей:

я́ко раби́ есмы́, и въ рабо́тѣ на́шей не оста́ви на́съ Госпо́дь Бо́гъ на́шъ: и преклони́ на на́съ милосе́рдiе предъ цари́ пе́рсскими, да́ти на́мъ живо́тъ, е́же воздви́гнути и́мъ до́мъ Бо́гу на́шему и возста́вити запустѣ́вшая его́, и да́ти на́мъ огражде́нiе во Иуде́и и Иерусали́мѣ:

и ны́нѣ что́ рече́мъ, Бо́же на́шъ, по се́мъ? я́ко оста́вихомъ повелѣ́нiя твоя́,

я́же да́лъ еси́ на́мъ руко́ю ра́бъ твои́хъ проро́ковъ, глаго́ля: земля́, на ню́же вы́ вхо́дите наслѣ́дити ю́, земля́ нечиста́ е́сть, по нечистотѣ́ люді́й язы́ческихъ, въ ме́рзостехъ и́хъ, и́миже напо́лниша ю́ от у́стъ да́же до у́стъ во скверне́нiихъ свои́хъ,

и ны́нѣ дще́рей ва́шихъ не дади́те сыно́мъ и́хъ и дще́рей и́хъ не прiе́млите сыново́мъ ва́шымъ, и не ищи́те ми́ра и́хъ и бла́га и́хъ да́же до вѣ́ка, я́ко да укрѣпи́теся и снѣ́сте блага́я земли́, и наслѣ́дiе дадите́ сыново́мъ ва́шымъ да́же до вѣ́ка:

и по всѣ́хъ, я́же прiидо́ша на на́съ въ дѣ́лѣхъ на́шихъ злы́хъ и грѣсѣ́ на́шемъ вели́цѣмъ, поне́же нѣ́сть я́коже Бо́гъ на́шъ, и́же изба́вилъ еси́ на́съ от беззако́нiй на́шихъ и да́лъ еси́ на́мъ спасе́нiе:

зане́ обрати́хомся разори́ти за́повѣди твоя́ и смѣси́тися съ людьми́ земны́ми: не прогнѣ́вайся на на́съ да́же до сконча́нiя, е́же не бы́ти оста́нку и спаса́емому:

Го́споди Бо́же Изра́илевъ, пра́веденъ еси́ ты́, я́ко оста́хомся спасе́ни, я́коже де́нь се́й: се́, мы́ предъ тобо́ю есмы́ вси́ въ беззако́нiихъ на́шихъ, поне́же не возмо́жно ста́ти предъ тобо́ю сего́ ра́ди.

И егда́ моля́шеся Е́здра и егда́ исповѣ́дашеся пла́чущь и моля́ся предъ до́момъ Бо́жiимъ, собра́шася къ нему́ от Изра́иля собра́нiе ве́лiе зѣло́, му́жiе и жены́ и о́троцы я́ко пла́кахуся лю́дiе и вознесо́ша пла́чь.

И отвѣща́ сехені́а сы́нъ Иеи́левъ от сыно́въ Ила́млихъ и рече́ е́здрѣ: мы́ преступи́хомъ предъ Бо́гомъ на́шимъ и поя́хомъ жены́ чужді́я от люді́й земли́, и ны́нѣ е́сть упова́нiе Изра́илю о се́мъ:

и ны́нѣ завѣща́емъ завѣ́тъ Бо́гу на́шему, да отве́ржемъ вся́ жены́ и рожде́ныхъ от ни́хъ, я́коже хо́щетъ: воста́ни и устраши́ и́хъ за́повѣдьми Бо́га на́шего, и по зако́ну да бу́детъ:

воста́ни, поне́же на тебѣ́ е́сть глаго́лъ, и мы́ съ тобо́ю: укрѣпи́ся и сотвори́.

И воста́ Е́здра, и закля́ кня́зи, свяще́нники и леви́ты и всего́ Изра́иля, да сотворя́тъ по словеси́ сему́. И кля́шася.

И воста́ Е́здра от лица́ до́му Бо́жiя и и́де въ сокро́вищный до́мъ Иона́на сы́на Елису́вова и сѣ́де та́мо: хлѣ́ба не яде́ и воды́ не пи́, пла́каше бо о преступле́нiи прише́дшихъ от плѣне́нiя.

И по́слано бы́сть сло́во во Иуде́ю и во Иерусали́мъ всѣ́мъ сыново́мъ преселе́нiя, да соберу́тся во Иерусали́мъ:

вся́къ, и́же а́ще не прiи́детъ въ три́ дни́, по совѣ́ту князе́й и старѣ́йшинъ, во́змется все́ имѣ́нiе его́, и то́й отлуче́нъ бу́детъ от со́нмища преселе́нiя.

И собра́шася вси́ му́жiе Иу́дины и Венiами́ни во Иерусали́мъ тре́ми де́нми: се́й е́сть ме́сяцъ девя́тый: въ двадеся́тый де́нь ме́сяца сѣдо́ша вси́ лю́дiе предъ до́момъ Бо́жiимъ трепе́щуще о словеси́ и от зимы́.

И воста́ Е́здра свяще́нникъ и рече́ къ ни́мъ: вы́ преступи́сте и взя́сте жены́ иноплеме́ннически, е́же приложи́ти ко грѣху́ Изра́илеву:

и ны́нѣ дади́те хвалу́ Го́споду Бо́гу оте́цъ на́шихъ, и сотвори́те уго́дное предъ ни́мъ, и отлучи́теся от люді́й земли́ и от же́нъ иноплеме́нническихъ.

И отвѣща́ша все́ мно́жество гла́сомъ вели́кимъ и рѣ́ша: по словеси́ твоему́ къ на́мъ сотвори́мъ:

оба́че лю́дiе мно́зи су́ть, и вре́мя зи́мнее, и нѣ́сть мо́щно стоя́ти внѣ́: и дѣ́ло нѣ́сть дне́ еди́наго или́ дву́хъ, зѣло́ бо мно́го согрѣши́хомъ во словеси́ се́мъ:

да поста́вятся кня́зiе на́ши во все́мъ мно́жествѣ и во всѣ́хъ градѣ́хъ на́шихъ, и́же поя́ша жены́ иноплеме́нничи, да прiи́дутъ во времена́ повелѣ́нная, и съ ни́ми старѣ́йшины от вся́каго гра́да и судiи́, е́же отврати́ти гнѣ́въ я́рости Бо́га на́шего от на́съ словесе́ ра́ди сего́.

Оба́че Ионаѳа́нъ сы́нъ Асаи́левъ и Иа́сса сы́нъ Ѳеку́евъ со мно́ю о се́мъ, и Месолла́мъ и Саваѳа́й Леви́тинъ помага́яй и́мъ.

И сотвори́ша та́ко сы́нове преселе́нiя: и разыдо́шася Е́здра свяще́нникъ и му́жiе кня́зiе оте́чествъ въ до́мы, и вси́ по имено́мъ, я́ко обрати́шася въ де́нь пе́рвый ме́сяца деся́таго, да взы́щутъ глаго́ла:

и соверши́ша во всѣ́хъ муже́хъ, и́же поя́ша жены́ иноплеме́нничи, да́же до дне́ пе́рваго ме́сяца пе́рваго.

И обрѣ́тени су́ть от сыно́въ свяще́нническихъ и́же введо́ша жены́ иноплеме́нничи, от сыно́въ Иису́са сы́на Иоседе́кова и бра́тiя его́ маасі́а и Елiезе́ръ, и Иари́мъ и гадалі́а:

и да́ша ру́ки своя́ изгони́ти жены́ своя́, и согрѣши́вшiи принесо́ша от ове́цъ о преступле́нiи свое́мъ овна́:

и от сыно́въ Емми́ровыхъ Анані́й и завді́а:

и от сыно́въ Ира́млихъ маасі́а и Еллі́а, и самі́а и Иеiи́лъ и Озі́а:

и от сыно́въ фассу́ровыхъ Елiоина́й, маасі́а и Исма́илъ, и наѳана́ель и Иозава́дъ и Иласа́:

и от леви́товъ Иозава́дъ и Ѳаму́й и колі́а, то́йже и коли́тъ, и феѳеі́а, и Иу́да и Елiе́зеръ:

и от пѣвце́въ Елиса́въ: и от две́рникъ солми́нъ и телми́нъ и оду́а:

и от Изра́иля, от сыно́въ форо́совыхъ рамі́а и азі́а, и Мелхі́а и мелми́нъ, и Елiаза́ръ и Асаві́а и ване́а:

и от сыно́въ Ила́мовыхъ Матѳані́а и Заха́рiа, и Иаiи́лъ и Авді́й, и иеримо́ѳъ и илі́а:

и от сыно́въ заѳу́евыхъ Елiона́й, Елису́въ, маѳана́й и Армо́ѳъ, и зава́дъ и Озиза́:

и от сыно́въ ваве́иныхъ Иона́нъ, Анані́а и Заву́й и Ѳали́:

и от сыно́въ вану́евыхъ мосолла́мъ, маллу́хъ, Адаі́а, Иасу́въ и саа́лъ и римо́ѳъ:

и от сыно́въ фаа́ѳъ-моа́влихъ едне́а и хали́лъ и ванаі́а, маасі́а, Матѳані́а, веселеи́лъ и вану́й и Манассі́й:

и от сыно́въ Ира́мовыхъ Елiезе́ръ, Иесі́а, Мелхі́а, самаі́а, семео́нъ,

Венiами́нъ, малу́хъ, самарі́а:

и от сыно́въ Аси́мовыхъ метѳана́iа, маѳаѳа́, зава́дъ, Елифале́тъ, иерами́ Манассі́й, Семе́й:

и от сыно́въ Вані́иныхъ Мооді́а, Амра́мъ и Уи́лъ,

Ванаі́а, Вадаі́а, Хелі́а,

Уані́а, Маримо́ѳъ и Елiаси́въ,

Матѳані́а, Маѳана́й.

И сотвори́ша сы́нове вануи́евы и сы́нове Семе́ины,

и Салемі́а и Наѳа́нъ и Адаі́а,

Махнада́, Авусесе́й,

Аруесрiи́лъ и Самарі́а,

Селлу́мъ, Амарі́а, Ио́сифъ:

от сыно́въ Наву́иныхъ Иеiи́лъ, Маѳаѳі́а, Зава́дъ, Зевена́й, Иада́й и Иои́ль и Ване́а.

Вси́ ті́и поя́ша жены́ иноплеме́ннически, и роди́ша от ни́хъ сы́ны.