Маккаве́йская 3-я, Глава 2

Архiере́й у́бо Си́монъ проти́ву хра́ма преклони́въ колѣ́на и ру́цѣ просте́ръ благо­чи́н­но, творя́ше моли́тву сiю́:

Го́споди, Го́споди, Царю́ небе́сный и Влады́ко вся́каго созда́нiя, Святы́й во святы́хъ, Единонача́лниче, Вседержи́телю, вонми́ на́мъ озло́блен­нымъ от­ непреподо́бнаго и скве́рнаго, проде́рзостiю и си́лою напыще́н­наго:

Ты́ бо, созда́вый вся́ и вся́ содержа́щь, си́ленъ и пра́веденъ еси́, и со укори́зною и го́рдостiю что́ либо творя́щымъ су́диши:

Ты́ пре́жде беззако́нiе сотво́ршихъ, въ ни́хже и исполи́ни бы́ша, на си́лу и де́рзость упова́в­шiи, погуби́лъ еси́, наве́дъ на ни́хъ безмѣ́рную во́ду:

Ты́ прего́рдая творя́щихъ Cодо́млянъ, въ я́вныхъ зло́бахъ бы́в­шихъ, огне́мъ и жу́пеломъ попали́лъ еси́, о́бразъ по ни́хъ бу́дущымъ соста́вль:

Ты́ свирѣ́паго фарао́на поработи́в­шаго лю́ди твоя́ святы́я Изра́иля, разли́чными и мно́гими искуси́лъ еси́ му́ками, показа́въ си́лу твою́,

и во о́нѣхъ ве́лiю держа́ву твою́ яви́лъ еси́, и гоня́щаго его́ съ колесни́цами и наро́довъ мно́же­с­т­вомъ погрузи́лъ еси́ во глубинѣ́ морстѣ́й, вѣ́ру­ю­щихъ же Тебѣ́, вся́кимъ созда́нiемъ облада́ющему, невре́дны преве́лъ еси́: и́же и ви́дѣв­ше дѣла́ Тво­ея́ руки́, восхвали́ша Тебе́ Вседержи́теля:

Ты́, Царю́, созда́вый безконе́чную и безмѣ́рную зе́млю, избра́лъ еси́ гра́дъ се́й и освяти́лъ еси́ мѣ́сто сiе́ во и́мя Тебѣ́ ничто́же тре́бу­ю­щему, и просла́вилъ еси́ во явле́нiи великолѣ́пнѣмъ, составле́нiе сотвори́вый его́ ко сла́вѣ вели́каго и честна́го и́мене Тво­его́:

и лю́бящь до́мъ Изра́илевъ, обѣща́лъ еси́, я́ко а́ще бу́детъ на́мъ злоключе́нiе и объи́метъ на́съ тѣснота́, и при­­ше́дше на мѣ́сто сiе́ помо́лимся, услы́шиши моли́тву на́шу:

и у́бо вѣ́ренъ еси́ и и́стиненъ, а поне́же мно́гащи оскорбле́н­нымъ бы́в­шымъ отце́мъ на́шымъ, помо́глъ еси́ и́мъ Ты́ во смире́нiи и изба́вилъ еси́ я́ от­ вели́кихъ бѣ́дъ:

се́ у́бо ны́нѣ́, Святы́й Царю́, мно́гихъ ра́ди и вели́кихъ на́шихъ грѣхо́въ стра́ждемъ, и повину́емся враго́мъ на́шымъ, и есмы́ въ не́мощехъ:

въ на́­шемъ же низпаде́нiи де́рзостивый и скве́рный се́й начина́етъ оби́дѣти на земли́ воз­вы́шен­ное и́мени сла́вы Тво­ея́ свято́е мѣ́сто:

а́ще бо и жили́ще Твое́ небо небесе́ непости́жно человѣ́комъ е́сть, но поне́же благоволи́лъ еси́ сла́ву Твою́ въ лю́дехъ тво­и́хъ Изра́или, освяти́лъ еси́ мѣ́сто сiе́:

да не от­мсти́ши на́мъ нечистото́ю си́хъ, ниже́ да нака́жеши на́съ скве́рною си́хъ: да не похва́лят­ся пребеззако́н­нiи въ я́рости сво­е́й, ниже́ да воз­ра́дуют­ся въ го́рдости язы́ка сво­его́, глаго́люще: мы́ попра́хомъ хра́мъ святы́ни, я́коже попира́ют­ся хра́мы ме́рзостей:

оста́ви грѣхи́ на́шя и разруши́ непра́вости на́шя и яви́ ми́лость Твою́ въ ча́съ се́й, ско́ро да предваря́тъ ны́ щедро́ты Твоя́, и да́ждь хвале́нiя во уста́ низпа́дшихъ и сокруше́н­ныхъ душа́ми, сотвори́вый на́мъ ми́ръ.

Здѣ́ всеви́децъ Бо́гъ и пре́жде всѣ́хъ Святы́й во святы́хъ, услы́шавъ моли́тву смире́нiя, хуло́ю и де́рзостiю вельми́ воз­несе́н­наго уязви́, от­сю́ду и от­ону́ду сотря́съ его́, я́коже тро́сть вѣ́тромъ, я́ко и на помо́стѣ недѣй­ст­ви́телну ктому́ лежа́ти и у́дами разсла́блен­ну, ниже́ прогласи́ти воз­мощи́ ему́, пра́веднымъ уя́звлен­ну судо́мъ.

Отню́дуже дру́зи и тѣ́ла его́ охрани́теле внеза́пную и о́струю ви́дѣв­ше объе́мшую его́ ка́знь, убоя́в­шеся, да и живота́ не лиши́т­ся, вско́рѣ его́ извлеко́ша во́нъ, превели́кимъ уя́звлен­ни стра́хомъ.

По вре́мени же при­­ше́дъ въ себе́, ника́коже въ покая́нiе прiи́де нака́зан­ный и съ преще́нiемъ го́рькимъ отъи́де.

Прише́дъ же во Еги́петъ и зло́бу умножа́ющь чрезъ предрѣче́н­ныхъ при­­трапе́зниковъ и друго́въ от­ вся́кiя пра́вды от­луче́н­ныхъ, не то́кмо безчи́слен­ными студодѣя́нiи дово́л­ст­вовася, но и на толи́кую де́рзость про­изы́де, я́ко хуле́нiя на мѣ́стѣхъ соста́ви, и мно́зи дру́зи взира́юще на ца́рское хотѣ́нiе, и ті́и послѣ́доваша о́наго во́ли.

И предложи́ ца́рь наро́днѣ на язы́къ Иуде́йскiй изда́ти хулу́: и повелѣ́въ на столпѣ́ су́щемъ при­­ дворѣ́ поста́вити и́дола, извая́ писа́нiе: е́же ни еди́ному от­ нежру́щихъ во свята́я и́хъ входи́ти, всѣ́хъ же Иуде́евъ вписа́ти въ лю́ди просты́я и въ служе́бный чи́нъ поста́вити, сопроти́въ же глаго́лющихъ ну́ждею я́тыхъ живота́ лиши́ти.

Тѣ́хже запи́сан­ныхъ назна́меновати и огне́мъ на тѣ́лѣ знамени́тымъ Дiони́са ки́ссовымъ листо́мъ, и тѣ́хъ от­лучи́ти въ преждесокраше́н­ную свобо́ду.

Но да не всѣ́мъ ненави́димь яви́т­ся, подписа́: а́ще же нѣ́цыи от­ ни́хъ про­изво́лятъ жи́тел­ст­вовати во обря́дѣхъ язы́ческихъ, сі́и ра́вни гра́жданомъ Александри́йскимъ бу́дутъ.

Тѣ́мже у́бо нѣ́цыи во гра́дѣ, благо­че́стiя своя́ ни во что́же вмѣня́юще, съ ра́достiю себе́ вда́ша, мня́ще себе́ а́ки ве́лiей нѣ́ко­ей иму́щiи при­­общи́тися сла́вѣ от­ бу́дущаго со царе́мъ сожи́тел­ст­ва.

Мно́жайшiи же хра́брою душе́ю укрѣпи́шася и не от­ступи́ша от­ благо­че́стiя: и сре́бреники за живо́тъ обѣща́в­ше во измѣне́нiе да́ти, безбоя́знен­но тща́хуся свободи́ти себе́ от­ вписа́нiй: благонаде́жни бы́ша по́мощь получи́ти,

а от­лучи́в­шихся от­ ни́хъ гнуша́хуся, и а́ки супоста́товъ ро́ду сво­ему́ суди́ша, и о́бщаго сожи́тел­ст­ва и благодѣя́нiя лиша́ху.