Азбука веры » Би́блия » Е́здры 3-я » гл.9

Е́здры 3-я, Глава 9

Толкования

Толкования главы

Толковая Библия А.П. Лопухина

9:1

9:2

9:3

9:4

9:5

9:6

9:7

9:8

9:9

9:10

9:11

9:12

9:13

9:14

9:15

9:16

9:17

9:18

9:19

9:20

9:21

9:22

9:23

9:24

9:25

9:26

9:27

9:28

9:29

9:30

9:31

9:32

9:33

9:34

9:35

9:36

9:37

9:38

9:39

9:40

9:41

9:42

9:43

9:44

9:45

9:46

9:47

Церковнославянский (рус)

Языки

И отвѣща ко́ мнѣ́ и рече́: мѣ́рящь мѣ́ри вре́мя въ себѣ́ самѣ́мъ: и бу́детъ, повнегда́ уви́диши, егда́ пре́йдетъ ча́сть нѣ́которая зна́менiй, я́же предрѣче́на су́ть,

тогда́ уразумѣ́еши, я́ко то́ са́мое е́сть вре́мя, въ не́же начне́тъ вы́шнiй посѣща́ти вѣ́къ, и́же от него́ сотворе́нъ бы́сть:

и́ егда́ у́зрится въ вѣ́цѣ зыба́нiе мѣ́стъ и люді́й смуще́нiе,

тогда́ уразумѣ́еши, я́ко о си́хъ глаго́лаше вы́шнiй от дні́й, и́же бы́ша предъ тобо́ю от нача́ла:

я́коже бо все́, е́же сотворе́но е́сть въ вѣ́цѣ, нача́ло и́мать, та́ко и сконча́нiе, и сконча́нiе е́сть явле́но:

та́ко и вы́шняго времена́ нача́ла имѣ́ютъ явле́нна въ чудесѣ́хъ и си́лахъ, и сконча́нiя въ дѣя́нiи и зна́менiихъ:

и бу́детъ, вся́къ и́же спасе́тся и и́же возмо́жетъ избѣжа́ти дѣла́ми свои́ми и вѣ́рою, е́юже вѣ́ровасте,

оста́нется от предрѣче́нныхъ бѣ́дъ и у́зритъ спасе́нiе мое́ на земли́ мое́й и въ предѣ́лѣхъ мои́хъ, я́ко освяти́хъ мене́ от вѣ́ка:

и тогда́ умиля́тся, и́же ны́нѣ отступи́ша от путі́й мои́хъ, и въ муче́нiихъ пребу́дутъ ті́и, и́же отверго́ша я́ въ презо́рствѣ:

и́же бо не позна́ша мя́, живу́ще благодѣя́нiя получи́вше,

и и́же возненави́дѣша зако́нъ мо́й, егда́ еще́ бя́ху имѣ́юще свобо́ду и егда́ еще́ бя́ше и́мъ отве́рсто покая́нiя мѣ́сто, не уразумѣ́ша, но уничижи́ша,

си́мъ подоба́етъ по сме́рти въ муче́нiи позна́ти:

ты́ у́бо ктому́ не бу́ди любопы́тливъ, ка́ко нечести́вiи му́читися бу́дутъ, но испыту́й, ка́ко пра́веднiи спасу́тся, и и́хже вѣ́къ, и ра́ди кото́рыхъ вѣ́къ, и когда́.

И отвѣща́хъ и реко́хъ:

дре́вле глаго́лахъ и ны́нѣ глаго́лю и по́слѣ возглаго́лю, я́ко мно́жае су́ть, и́же поги́бнутъ, не́жели и́же спасу́тся, я́коже умножа́ются во́лны надъ ка́плю.

И отвѣща́ ко мнѣ́ и рече́:

какова́ ни́ва, такова́ и сѣ́мена, и каковы́ цвѣ́ти, таковы́ и пестроты́, и како́въ дѣ́латель, таково́ и дѣ́ло, како́въ земледѣ́лецъ, таково́ и земледѣ́лство, поне́же вре́мя бя́ше вѣ́ка:

и ны́нѣ егда́ бы́хъ уготовля́ющь тѣ́мъ, и́же ны́нѣ су́ть, пре́жде не́же бы́сть вѣ́къ, въ не́мже бы обита́ли: и никто́же проти́ву рече́ мнѣ́:

тогда́ бо вся́къ, и ны́нѣ творе́цъ въ мíрѣ се́мъ угото́ваннѣмъ, и въ жа́твѣ неоскудѣва́ющей, и въ зако́нѣ неизслѣ́димѣмъ растлѣ́ни су́ть нра́вы свои́ми:

и разсмотри́хъ вѣ́къ, и се́, бя́ше бѣда́ ра́ди помышле́нiй, я́же въ не́мъ прiидо́ша:

и ви́дѣхъ, и прости́хъ ему́ зѣло́, и сохрани́хъ мнѣ́ я́году от гро́зда и сажде́нiе от колѣ́на мно́га:

да поги́бнетъ у́бо мно́жество, е́же безъ вины́ рожде́но е́сть, и да сохрани́тся я́годица моя́ и насажде́нiе мое́, е́же вели́кимъ трудо́мъ соверши́хъ:

ты́ же, а́ще и еще́ спу́стиши се́дмь дні́й инѣ́хъ, но да не пости́шися въ ни́хъ,

по́йдеши на по́ле цвѣ́тное, идѣ́же до́мъ нѣ́сть созда́нъ, и снѣ́си то́кмо от цвѣто́въ полевы́хъ, и мя́са да не вку́сиши, и вина́ не пiе́ши, но то́кмо цвѣ́ты:

моли́ся вы́шнему непреста́нно, и прiиду́ и возглаго́лю съ тобо́ю.

И идо́хъ, я́коже рече́ мнѣ́, на по́ле, е́же зове́тся Арда́ѳъ, и сѣдо́хъ та́мо въ цвѣ́тѣхъ, и от тра́въ се́лныхъ ядо́хъ, и бы́сть ми́ пи́ща и́хъ въ сы́тость.

И бы́сть по седми́хъ дне́хъ, и а́зъ лежа́хъ на сѣ́нѣ, и се́рдце мое́ па́ки смуща́шеся, я́коже пре́жде.

И отверзо́шася уста́ моя́, и нача́хъ глаго́лати предъ вы́шнимъ и реко́хъ:

О, Го́споди! тя́ на́мъ показу́яй показа́лся еси́ отце́мъ на́шымъ въ пусты́ни непрохо́днѣй и непло́днѣй, егда́ бя́ху исходя́ще от Еги́пта,

и глаго́лющь ре́клъ еси́: ты́, Изра́илю, послу́шай мя́, и сѣ́мя Иа́ковле, вонми́ словесе́мъ мои́мъ:

се́ бо, а́зъ сѣ́ю зако́нъ мо́й, и сотвори́тъ въ ва́съ пло́дъ, и просла́витеся въ не́мъ во вѣ́къ:

и́бо отцы́ ва́ши прiе́млюще зако́нъ не сохрани́ша и зако́нная моя́ не соблюдо́ша, и бы́сть пло́дъ зако́на неродя́щь: ниже́ бо можа́ше, поне́же тво́й бѣ́:

зане́, и́же прiя́ша, погибо́ша не сохраня́юще, е́же въ ни́хъ сѣ́яно бы́сть:

и се́, обы́чай е́сть, да егда́ прiи́метъ земля́ сѣ́мя, или́ кора́бль мо́ре, или́ сосу́дъ нѣ́кiй пи́щу или́ питiе́: егда́ бу́детъ поврежде́но то́, въ не́мже сѣ́яно е́сть, или́ то́, въ не́мже поста́влено е́сть,

ку́пно и то́, е́же насѣ́яно или́ поста́влено е́сть, или́ я́же прiя́та су́ть, истребля́ются, и воспрiя́тая уже́ не пребыва́ютъ предъ на́ми: на́мъ же не та́ко сотворе́но бы́сть:

мы́ бо, и́же зако́нъ прiя́ли есмы́, согрѣша́юще погибо́хомъ, и се́рдце на́ше, е́же воспрiя́ его́:

я́ко зако́нъ не поги́бе, но пребыва́етъ во свое́мъ трудѣ́.

И егда́ глаго́лахъ сiя́ въ се́рдцы мое́мъ, воззрѣ́хъ очи́ма мои́ма и ви́дѣхъ жену́ въ деснѣ́й странѣ́, и се́, сiя́ рыда́ше и пла́каше со гла́сомъ вели́кимъ и душе́ю боля́ше зѣло́, и одѣя́нiе ея́ раздра́но, и пе́пелъ на главѣ́ ея́.

И оста́вихъ помышле́нiя, въ кото́рыхъ бы́хъ мы́сля, и обрати́хся къ не́й

и реко́хъ е́й: о че́мъ пла́чеши, и что́ боли́ши душе́ю?

И рече́ ко мнѣ́: оста́ви мя́, го́споди мо́й, да воспла́чу себе́ и приложу́ болѣ́зни, я́ко зѣло́ огорчи́хся душе́ю и смире́на е́смь зѣло́.

И реко́хъ е́й: что́ стра́ждеши? рцы́ ми́. И рече́ ко мнѣ́:

непло́дна бы́хъ а́зъ раба́ твоя́ и не роди́хъ, имѣ́ющи му́жа лѣ́тъ три́десять:

а́зъ бо на вся́къ ча́съ и на вся́къ де́нь, и лѣ́тъ си́хъ три́десять молю́ся вы́шнему де́нь и но́щь:

и бы́сть, по три́десятихъ лѣ́тѣхъ услы́ша мя́ Бо́гъ рабу́ твою́, и ви́дѣ смире́нiе мое́, и вня́тъ скорбѣ́нiю моему́, и даде́ мнѣ́ сы́на: и ублажи́хся о не́мъ зѣло́ а́зъ и му́жъ мо́й и вси́ гра́ждане мои́, и почти́хомъ зѣло́ всеси́льнаго:

и вскорми́хъ его́ съ трудо́мъ вели́кимъ:

и бы́сть, егда́ возрасте́ и прiи́де поя́ти жену́, сотвори́хъ де́нь пи́рный.