Азбука веры » Би́блия » Е́здры 3-я » гл.2

Е́здры 3-я, Глава 2

Толкования

Толкования главы

Толковая Библия А.П. Лопухина

2:1

2:2

2:3

2:4

2:5

2:6

2:7

2:8

см.:Быт.9:24;

2:9

2:10

2:11

2:12

2:13

2:14

2:15

2:16

2:17

2:18

2:19

2:20

2:21

2:22

2:23

см.:Тов.2:7;

2:24

2:25

2:26

2:27

2:28

2:29

2:30

2:31

2:32

2:33

2:34

2:35

2:36

2:37

2:38

2:39

2:40

2:41

2:42

см.:Откр.7:9;

2:43

2:44

2:45

2:46

2:47

2:48

Церковнославянский (рус)

Языки

Сiя́ глаго́летъ Госпо́дь: а́зъ изведо́хъ лю́ди сiя́ изъ рабо́ты, и́мже повелѣ́нiя да́хъ рабы́ мои́ми проро́ки, и́хже слу́шати не восхотѣ́ша, но отверго́ша моя́ совѣ́ты.

Ма́ти, я́же и́хъ роди́, глаго́летъ и́мъ: иди́те, сы́нове, поне́же а́зъ вдови́ца е́смь и оста́влена,

воспита́хъ вы́ съ ра́достiю и лиши́хся ва́съ со пла́чемъ и ско́рбiю, я́ко согрѣши́сте предъ Го́сподемъ Бо́гомъ ва́шимъ, и е́же лука́вое е́сть предъ ни́мъ, сотвори́сте:

ны́нѣ же что́ сотворю́ ва́мъ? а́зъ вдова́ е́смь и оста́влена: иди́те, сы́нове, и проси́те от Го́спода ми́лости.

А́зъ же тебе́, о́тче, свидѣ́теля призыва́ю на ма́терь сыно́въ, и́же не восхотѣ́ша завѣ́та моего́ храни́ти:

да да́си и́мъ посрамле́нiе и ма́терь и́хъ на расхище́нiе, да ро́да и́хъ не бу́детъ,

да расточа́тся во язы́ки имена́ и́хъ, да изгла́дятся от земли́, зане́ презрѣ́ша завѣ́тъ мо́й.

Го́ре тебѣ́, Ассу́ръ, и́же сокрыва́еши непра́ведныя у себе́. Ро́де лука́вый, воспомяни́, что́ сотвори́хъ Cодо́му и Гомо́ррѣ,

и́хже земля́ лежи́тъ въ жу́пелнѣй гру́дѣ и въ хо́лмѣхъ пе́пелныхъ: та́ко да́мъ тѣ́хъ, и́же мя́ не слу́шаша, глаго́летъ Госпо́дь Вседержи́тель.

Сiя́ глаго́летъ Госпо́дь ко е́здрѣ: возвѣсти́ лю́демъ мои́мъ, я́ко да́мъ и́мъ ца́рство Иерусали́мское, е́же да́ти имѣ́хъ Изра́илю,

и возму́ мнѣ́ сла́ву и́хъ и да́мъ и́мъ селе́нiя вѣ́чная, я́же предугото́вахъ и́мъ:

дре́во жи́зни бу́детъ и́мъ въ благово́нiе ма́сти, и не и́мутъ тружда́тися, ниже́ утрудя́тся.

Иди́те и прiими́те, проси́те себѣ́ дні́й ма́лыхъ, да закосня́тъ: уже́ гото́во е́сть ва́мъ ца́рство, бди́те.

Засвидѣ́телствуй не́бомъ и земле́ю: сотро́хъ бо зло́е и сотвори́хъ благо́е, я́ко живу́ а́зъ, глаго́летъ Госпо́дь.

Ма́ти, объими́ сы́ны твоя́, воспита́й и́хъ со весе́лiемъ, я́ко голуби́ца утверди́ но́зѣ и́хъ, зане́ тебе́ избра́хъ, глаго́летъ Госпо́дь.

И воскрешу́ ме́ртвыя от мѣ́стъ свои́хъ и изъ гробо́въ изведу́ и́хъ: позна́хъ бо и́мя мое́ во Изра́или.

Не бо́йся, ма́ти сыно́въ, зане́ тебе́ избра́хъ, глаго́летъ Госпо́дь.

Послю́ тебѣ́ по́мощь о́троки моя́, Иса́iю и иеремі́ю, по и́хже совѣ́ту освяти́хъ и угото́вахъ тебѣ́ древе́съ двана́десять отягче́ныхъ разли́чными пло́ды,

и толи́кожде исто́чниковъ теку́щихъ млеко́мъ и ме́домъ, и го́ръ превысо́кихъ се́дмь имѣ́ющихъ ши́покъ и кри́нъ, на ни́хже весе́лiемъ испо́лню сы́ны твоя́.

Вдову́ оправда́й, си́ру суди́, ни́щему да́й, сироту́ защити́, нага́го одѣ́й,

о сокруше́ннѣмъ и немощнѣ́мъ попецы́ся, хромо́му не посмѣ́йся, защити́ безру́каго, а слѣпа́го къ видѣ́нiю свѣ́та моего́ припусти́:

ста́раго и млада́го между́ стѣна́ми твои́ми сокры́й:

ме́ртвыя идѣ́же обря́щеши, назна́менавъ отда́й гро́бу, и да́мъ тебѣ́ пе́рвое сѣдѣ́нiе въ воскресе́нiе мое́.

И утиши́теся и препоко́йтеся, лю́дiе мои́, зане́ прiи́детъ поко́й ва́шъ.

Корми́лице блага́я, корми́ сы́ны твоя́, утвержда́й но́зѣ и́хъ.

Рабо́въ, и́хже тебѣ́ да́хъ, ни еди́нъ от ни́хъ поги́бнетъ, и́хъ бо а́зъ взыщу́ от числа́ твоего́.

Не изнемога́й: егда́ бо прiи́детъ де́нь печа́ли и тѣсноты́, ині́и воспла́чутся и печа́льни бу́дутъ, ты́ же ра́достна и оби́лна бу́деши.

Поревну́ютъ [тебѣ́] язы́цы и ничто́же проти́ву тебе́ возмо́гутъ, глаго́летъ Госпо́дь.

Ру́цѣ мои́ покры́ютъ тя́, да сы́нове твои́ гее́нны не у́зрятъ.

Утѣша́йся, ма́ти, съ сы́ны твои́ми, зане́ а́зъ тя́ изба́влю, глаго́летъ Госпо́дь.

Воспомяни́ ча́да твоя́ спя́щыя, поне́же а́зъ изведу́ и́хъ изъ боко́въ земли́ и ми́лость съ ни́ми сотворю́: ми́лостивъ бо е́смь, глаго́летъ Госпо́дь Вседержи́тель.

Объими́ ча́да твоя́, до́ндеже а́зъ прiиду́ и сотворю́ и́мъ милосе́рдiе: исто́чницы бо мои́ изоби́луютъ и благода́ть моя́ не оскудѣ́етъ.

А́зъ Е́здра взя́хъ повелѣ́нiе от Го́спода на горѣ́ ори́въ, да иду́ ко Изра́илю, къ ни́мже егда́ прiидо́хъ, отри́нуша мя́ и уничижи́ша за́повѣдь Госпо́дню.

И сего́ ра́ди ва́мъ глаго́лю, язы́цы, и́же слы́шите и разумѣ́ете: жди́те па́стыря ва́шего, и́же да́стъ ва́мъ поко́й вѣ́чный: поне́же о́нъ уже́ бли́зъ е́сть и и́мать прiити́ во сконча́нiи вѣка.

Бу́дите гото́ви къ воздая́ниемъ ца́рствiя, свѣ́тъ бо вѣ́чный возсiя́етъ на вы́ во вѣ́ки:

бѣжи́те сѣ́ни вѣ́ка сего́, прiими́те наслажде́нiе сла́вы ва́шея, а́зъ я́вѣ свидѣ́телствую спаси́телемъ мои́мъ.

Ввѣ́ренный да́ръ прiими́те и весели́теся, благодаря́ще призва́вшаго вы́ въ ца́рство небе́сное.

Воста́ните и сто́йте, и смотря́йте число́ зна́менаныхъ на пиру́ Госпо́днемъ,

и́же пресели́шася от сѣ́ни вѣ́ка сего́, воспрiя́ша свѣ́тлая одѣя́нiя от Го́спода.

Воспрiими́ число́ твое́, Сiо́не, и заключи́ одѣ́янныхъ твои́хъ въ бѣ́лая, и́же испо́лниша зако́нъ Госпо́день.

Испо́лнено е́сть число́ ча́дъ твои́хъ, и́хже жела́лъ еси́: моли́ ца́рства Госпо́дня, да бу́дутъ освяще́ни лю́дiе твои́, призва́ннiи изъ нача́ла.

А́зъ Е́здра ви́дѣхъ на горѣ́ Сiо́нстѣй наро́дъ мно́гъ, и́хже исчи́слити не мого́хъ, и вси́ пѣ́сньми хваля́ху Го́спода:

посредѣ́ же и́хъ бѣ́ ю́ноша высоча́е во́зрастомъ па́че всѣ́хъ о́ныхъ, и́же полага́ше вѣнцы́ на главу́ коего́ждо и па́че возвыша́шеся, а́зъ же диви́хся зѣло́.

Тогда́ вопроси́хъ а́нгела, глаго́ля: что́ су́ть сі́и, го́споди?

О́нъ же отвѣща́: сі́и су́ть, и́же совлеко́шася одѣя́нiя сме́ртнаго и облеко́шася въ безсме́ртное и исповѣ́даша и́мя Бо́жiе: ны́нѣ вѣнча́ются и прiе́млютъ фи́ники.

И вопроси́хъ а́нгела о ю́ноши: кто́ е́сть о́ный ю́ноша, и́же возлага́етъ на ни́хъ вѣнцы́ и фи́ники въ ру́цѣ дае́тъ?

О́нъ же отвѣща́ ми́: се́й е́сть Сы́нъ Бо́жiй, его́же исповѣ́даша въ вѣ́цѣ се́мъ. А́зъ же нача́хъ велича́ти и́хъ, и́же крѣ́пко за и́мя Госпо́дне вооружа́шася.

Тогда́ рече́ ми́ Ангелъ: иди́ и возвѣ́сти лю́демъ мои́мъ, какова́я и коли́кая чудеса́ Го́спода Бо́га ви́дѣлъ еси́.