И от гадди́ прибѣго́ша къ дави́ду, [егда́ тая́шеся] въ пусты́ни, му́жiе крѣ́пцы и бойцы́ наро́чити, держа́щiи щиты́ и ко́пiя: ли́ца же и́хъ я́ко ли́ца льво́ва, и легцы́ я́ко се́рны на гора́хъ ско́ростiю:

азе́ръ въ пе́рвыхъ, Авді́а вторы́й, алiа́дъ тре́тiй,

Масма́нъ четве́ртый, Иеремі́а пя́тый,

Иеѳѳі́а шесты́й, Елiи́лъ седмы́й,

Иоана́нъ осмы́й, Ельзаве́ль девя́тый,

Иеремі́а деся́тый, Махавена́й первыйна́десять.

Сі́и от сыно́въ га́довыхъ кня́зи во́инстiи, еди́нъ надъ сто́мъ ма́лый, вели́кiй же надъ ты́сящею:

сі́и и́же преидо́ша Иорда́нъ ме́сяца пе́рваго: и се́й напо́лненъ во всѣ́хъ бре́зѣхъ свои́хъ: и изгна́ша всѣ́хъ, и́же живя́ху въ юдо́лѣхъ от восто́къ да́же до за́падъ.

Прiидо́ша же от сыно́въ Венiами́нихъ и Иу́диныхъ на по́мощь дави́ду.

И изы́де дави́дъ во срѣ́тенiе и́мъ и рече́ и́мъ: а́ще ми́рно прiидо́стѣ ко мнѣ́, да бу́детъ се́рдце мое́ та́кожде къ ва́мъ: а́ще же преда́ти мя́ супоста́томъ мои́мъ не во и́стинѣ руки́, да ви́дитъ Бо́гъ оте́цъ на́шихъ и су́дитъ.

И облече́ Ду́хъ Амасі́ю кня́зя надъ три́десятiю, и рече́: иди́, дави́де сы́не Иессе́евъ, и лю́дiе твои́: ми́ръ, ми́ръ тебѣ́, и ми́ръ помо́щникомъ твои́мъ, я́ко тебѣ́ помога́етъ Бо́гъ тво́й. И воспрiя́тъ и́хъ дави́дъ и поста́ви и́хъ князе́й си́лъ.

И от Манассі́и прибѣго́ша къ дави́ду, егда́ идя́ху иноплеме́нницы на Сау́ла на бра́нь, и не помо́же и́мъ дави́дъ, я́ко совѣ́тъ бы́ти у воево́дъ иноплеме́нничихъ, глаго́лющихъ: съ глава́ми муже́й си́хъ обрати́тся ко господи́ну своему́ Сау́лу.

И егда́ идя́ше дави́дъ въ Сикела́гъ, прибѣго́ша къ нему́ от Манассі́и една́й и Иозава́ѳъ, и Иавни́лъ и Михаи́лъ и Иосафа́ѳъ и Елiу́ и Салаѳі́й, кня́зи надъ ты́сящами у Манассі́и:

сі́и да́ша по́мощь дави́ду на по́лчище гедду́ровъ, вси́ бо крѣ́пцы си́лою: и бѣ́ша крѣ́пцы нача́лницы въ во́инствѣ си́лою.

Зане́ на вся́къ де́нь прихожда́ху къ дави́ду на по́мощь ему́, въ си́лу вели́ку, а́ки си́ла Бо́жiя.

И сiя́ имена́ князе́й во́инства, и́же прiидо́ша ко дави́ду въ Хевро́нъ, да возвратя́тъ ца́рство Сау́лово къ нему́ по словеси́ Госпо́дню:

сы́нове Иу́дины нося́щiи щиты́ и ко́пiя ше́сть ты́сящъ и о́смь со́тъ, крѣ́пцы ко ополче́нiю:

от сыно́въ Симео́нихъ, крѣ́пцы си́лою на ополче́нiе се́дмь ты́сящъ и сто́:

от сыно́въ Леві́иныхъ четы́ри ты́сящы и ше́сть со́тъ:

и Ио́дда кня́зь от колѣ́на Ааро́ня, и съ ни́мъ три́ ты́сящы и се́дмь со́тъ:

и садо́къ, о́трокъ крѣ́пкiй си́лою, и до́му отца́ его́ кня́зи два́десять два́:

от сыно́въ же Венiами́нихъ бра́тiй Сау́ловыхъ три́ ты́сящы, и еще́ бо́лшая ча́сть и́хъ наблюда́ше стражбу́ до́му Сау́ля:

и от сыно́въ Ефре́млихъ два́десять ты́сящъ и о́смь со́тъ крѣ́пцы си́лою, му́жiе имени́тiи по домо́мъ оте́чествъ и́хъ:

и от полупле́мене Манассі́ина осмьна́десять ты́сящъ, и и́же нареко́шася и́менемъ, да поста́вятъ царе́мъ дави́да:

от сыно́въ Иссаха́ровыхъ му́жiе уче́ни, и́же познава́ху времена́ разсужде́нiю, что́ сотвори́ти и́мать Изра́иль, въ нача́ла и́хъ двѣ́сти, и вся́ бра́тiя и́хъ съ ни́ми:

и от Завуло́на исходя́щiи ко ополче́нiю бра́ни, со вся́кими ору́жiи бра́нными, пятьдеся́тъ ты́сящъ, въ по́мощь дави́ду не съ пра́здными рука́ми:

и от Нефѳали́ма князе́й ты́сяща, и съ ни́ми въ щита́хъ и съ ко́пiями три́десять и се́дмь ты́сящъ:

и от сыно́въ да́новыхъ ополча́ющiися на бра́нь два́десять о́смь ты́сящъ и ше́сть со́тъ:

и от Аси́ра исходя́щiи помощи́ въ бра́ни четы́редесять ты́сящъ:

и со о́ныя страны́ Иорда́на от сыно́въ Руви́мовыхъ и от га́довыхъ и от полупле́мене Манассі́ина во все́мъ ору́жiи бра́ннѣмъ сто́ и два́десять ты́сящъ.

Вси́ сі́и му́жiе бра́ннiи упра́влени ко ополче́нiю се́рдцемъ ми́рнымъ: и прiидо́ша въ Хевро́нъ, да поста́вятъ царя́ дави́да надъ всѣ́мъ Изра́илемъ: и про́чiи от Изра́иля еди́но се́рдце бя́ху, да ца́рь бу́детъ дави́дъ.

Бы́ша же ту́ съ дави́домъ три́ дни́, яду́ще и пiю́ще, угото́ваша бо и́мъ бра́тiя и́хъ.

И и́же бли́зъ и́хъ бя́ху да́же до Иссаха́ра и Завуло́на и Нефѳали́ма, приноша́ху и́мъ на ослѣ́хъ и велблю́дѣхъ, и мска́хъ и волѣ́хъ пи́щу, муку́, перевя́сла смо́квей и гро́здiе сухо́е, вино́ и еле́й, и волы́ и овны́ во мно́жествѣ, ра́дость бо бы́сть во Изра́или.

И рече́ дави́дъ ца́рь ко всему́ собра́нiю: Соломо́нъ сы́нъ мо́й, его́же избра́ себѣ́ Госпо́дь, ю́нъ и мла́дъ, а дѣ́ло вели́ко, зане́же не человѣ́ку угото́вится зда́нiе, но Го́споду Бо́гу:

все́ю си́лою угото́вахъ на до́мъ Бо́га моего́ зла́то, сребро́, мѣ́дь, желѣ́зо, древа́, ка́менiе мра́морное, и мно́жество ка́менiй многоцѣ́нныхъ и разли́чныхъ, и вся́кое честно́е ка́менiе, и ка́менiй парі́йскихъ мно́го:

и еще́ внегда́ благоволи́ти ми́ въ дому́ Бо́га моего́, е́сть у мене́ е́же пригото́вахъ зла́то и сребро́, и се́, да́хъ въ до́мъ Бо́га моего́, въ высоту́, кромѣ́ о́ныхъ, я́же угото́вахъ на до́мъ святы́хъ:

три́ ты́сящи тала́нтъ зла́та суфи́рска и се́дмь ты́сящъ тала́нтъ сребра́ искуше́на къ позлаще́нiю стѣ́нъ святи́лища,

идѣ́же дѣ́ло злато́е зла́томъ, а идѣ́же сре́бряное сребро́мъ, и на вся́кое дѣ́ло руко́ю худо́жниковъ: и кто́ благоволя́й испо́лнити ру́ку свою́ дне́сь Го́споду?

И обѣща́ша усе́рдно нача́лницы оте́чествъ и кня́зи сыно́въ Изра́илевыхъ, и ты́сящницы и со́тницы, и нача́лницы дѣ́лъ и иконо́мы царе́вы,

и да́ша на дѣла́ до́му Госпо́дня зла́та тала́нтъ пя́ть ты́сящъ, и златни́къ де́сять ты́сящъ, и сребра́ тала́нтъ де́сять ты́сящъ, и мѣ́ди тала́нтъ осмьна́десять ты́сящъ, желѣ́за же сто́ ты́сящъ тала́нтъ:

и у ни́хже обрѣ́теся ка́менiе, да́ша во влага́лище до́му Госпо́дня, подъ ру́ку Иеiи́ля герсо́нина.

И возвесели́шася лю́дiе о усе́рднѣмъ подая́нiи, поне́же всѣ́мъ се́рдцемъ приноша́ху Го́споду, и дави́дъ ца́рь возвесели́ся зѣло́:

и благослови́ ца́рь дави́дъ Го́спода предъ всѣ́мъ мно́жествомъ, глаго́ля: благослове́нъ еси́, Го́споди Бо́же Изра́илевъ, Оте́цъ на́шъ, от вѣ́ка и до вѣ́ка:

тебѣ́, Го́споди, вели́чество, и си́ла, и сла́ва, и одолѣ́нiе, и исповѣ́данiе, и крѣ́пость, я́ко ты́ всѣ́ми, и́же на небеси́ и на земли́, Влады́чствуеши: от лица́ твоего́ трепе́щетъ вся́къ ца́рь и язы́къ: и тебѣ́, Го́споди, ца́рство и великолѣ́пiе во всѣ́хъ и во вся́цѣмъ нача́лѣ:

от тебе́ бога́тство и сла́ва, ты́ надъ всѣ́ми нача́лствуеши, Го́споди, нача́ло вся́каго нача́ла, и въ руку́ твое́ю крѣ́пость и вла́сть, и въ руку́ твое́ю ми́лость, Вседержи́телю, возвели́чити и укрѣпи́ти вся́:

и ны́нѣ, Го́споди, исповѣ́даемся тебѣ́ и хва́лимъ и́мя хвале́нiя твоего́:

и кто́ а́зъ е́смь, и кто́ лю́дiе мои́, я́ко возмого́хомъ сiя́ тебѣ́ благово́льнѣ обѣща́ти? твоя́ бо су́ть вся́, и от твои́хъ да́хомъ тебѣ́:

прише́лцы бо есмы́ предъ тобо́ю и пресе́лницы, я́коже вси́ отцы́ на́ши: дні́е на́ши я́ко сѣ́нь на земли́, и нѣ́сть постоя́нiя:

Го́споди Бо́же на́шъ, ко всему́ мно́жеству сему́, е́же угото́вахъ, да сози́ждется до́мъ и́мени свято́му твоему́, от руку́ твое́ю су́ть, и тебѣ́ вся́:

и вѣ́мъ, Го́споди мо́й, я́ко ты́ еси́ испыту́яй сердца́, и пра́вду лю́биши: въ простотѣ́ се́рдца моего́ произво́лихъ сiя́ вся́, и ны́нѣ люді́й твои́хъ, и́же здѣ́ обрѣто́шася, ви́дѣхъ съ ра́достiю тебѣ́ произво́лившихъ [принести́ да́ры]:

Го́споди Бо́же Авраа́ма и Исаа́ка и Изра́иля оте́цъ на́шихъ, сохрани́ сiя́ въ во́ли се́рдца люді́й твои́хъ во вѣ́ки, и испра́ви сердца́ и́хъ къ тебѣ́:

Соломо́ну же сы́ну моему́ да́ждь се́рдце бла́го, да храни́тъ за́повѣди твоя́ и свидѣ́нiя твоя́ и повелѣ́нiя твоя́, и къ соверше́нiю привести́ зда́нiе до́му твоего́.

И рече́ дави́дъ всему́ собра́нiю [люді́й]: благослови́те Го́спода Бо́га на́шего. И благослови́ша все́ собра́нiе Го́спода Бо́га оте́цъ свои́хъ: и прекло́нше колѣ́на поклони́шася Го́споду и царю́.

И пожре́ дави́дъ же́ртвы Го́споду, и вознесе́ всесожже́нiя Бо́гу на у́трiе пе́рваго дне́, теле́цъ ты́сящу, овно́въ ты́сящу, а́гнецъ ты́сящу, и возлiя́нiя и́хъ, и же́ртвы мно́жество от всего́ Изра́иля.

И ядо́ша и пи́ша предъ Го́сподемъ въ де́нь то́й съ вели́кимъ весе́лiемъ: и поста́виша царе́мъ второ́е Соломо́на сы́на дави́дова, и пома́заша его́ Го́споду въ царя́, и садо́ка же во архiере́а.

И сѣ́де Соломо́нъ на престо́лѣ Госпо́дни въ царя́, вмѣ́сто дави́да отца́ своего́, и благоуго́денъ бы́сть: и покори́ся ему́ ве́сь Изра́иль.

Кня́зи и си́льнiи и вси́ сы́нове царя́ дави́да отца́ его́ повину́шася ему́.

И возвели́чи Госпо́дь Соломо́на надъ всѣ́мъ Изра́илемъ и даде́ ему́ сла́ву ца́рства, ея́же ни́ еди́нъ ца́рь имѣ́ пре́жде его́.

И дави́дъ сы́нъ Иессе́евъ ца́рствова надъ всѣ́мъ Изра́илемъ четы́редесять лѣ́тъ,

въ Хевро́нѣ се́дмь лѣ́тъ, а во Иерусали́мѣ лѣ́тъ три́десять три́,

и у́мре въ ста́рости бла́зѣ, испо́лнь дні́й, въ бога́тствѣ и сла́вѣ, и воцари́ся Соломо́нъ сы́нъ его́ вмѣ́сто его́.

Про́чая же словеса́ царя́ дави́да пе́рвая и послѣ́дняя напи́сана су́ть въ словесѣ́хъ самуи́ла ви́дящаго и въ словесѣ́хъ наѳа́на проро́ка и въ словесѣ́хъ га́да прови́дящаго,

о все́мъ ца́рствѣ его́ и крѣ́пости его́, и времена́ я́же бы́ша при не́мъ и во Изра́или и во всѣ́хъ ца́рствахъ земны́хъ.