и а́ще смири́тся и по́йдетъ пони́кнувъ, наста́ви ду́шу твою́ и храни́ся от него́, и бу́деши ему́ я́ко очище́но зерца́ло, и уразумѣ́еши, я́ко не до конца́ оторжа́вѣ:

не поста́ви его́ при себѣ́, да не когда́ изри́нувъ тя́ ста́нетъ на мѣ́стѣ твое́мъ: не посади́ его́ одесну́ю себе́, да не пои́щетъ когда́ сѣда́лища твоего́, и на послѣ́докъ уразумѣ́еши словеса́ моя́ и о глаго́лѣхъ мои́хъ умили́шися.

Кто́ поми́луетъ обая́нника змі́емъ усѣ́кнена и всѣ́хъ приступа́ющихъ ко звѣре́мъ? та́кожде ходя́щаго съ му́жемъ грѣ́шникомъ и примѣша́ющагося грѣхо́мъ его́:

ча́съ съ тобо́ю пребу́детъ, и а́ще уклони́шися, не стерпи́тъ.

Устна́ма свои́ма услади́тъ вра́гъ, и мно́го поше́пчетъ и рече́тъ добро́ глаго́ля: ^*очи́ма свои́ма прослези́тся, а се́рдцемъ свои́мъ усовѣ́туетъ ври́нути тя́ въ ро́въ, и егда́ обря́щетъ вре́мя, не насы́тится кро́ве.

А́ще сря́щутъ тя́ зла́я, ту́ обря́щеши его́ пе́рвѣе себе́,

и я́ко помага́яй подсѣче́тъ пя́ту твою́:

покива́етъ главо́ю свое́ю и воспле́щетъ рука́ма свои́ма, и мно́го поше́пчетъ и измѣни́тъ лице́ свое́.

Ча́до, согрѣши́лъ ли еси́, не приложи́ ктому́, и о пре́жднихъ твои́хъ помоли́ся.

Я́коже от лица́ змiи́на, бѣжи́ от грѣха́: а́ще бо присту́пиши къ нему́, угры́знетъ тя́:

зу́бы льво́вы зу́бы его́, убива́ющiи ду́шы человѣ́чи.

Я́ко ме́чь обою́ду о́стръ вся́ко беззако́нiе, ра́нѣ его́ нѣ́сть изцѣле́нiя.

Преще́нiе и досажде́нiе опустоша́тъ бога́тство: та́ко и до́мъ го́рдыхъ запустѣ́етъ.

Моле́нiе ни́щаго изъ у́стъ до у́шiю его́, и су́дъ его́ со тща́нiемъ гряде́тъ.

Ненави́дяй обличе́нiя послѣ́дуетъ грѣ́шнику, и боя́йся Го́спода обрати́тся се́рдцемъ.

Позна́нъ е́сть издале́ча си́льный язы́комъ, и разу́мивый вѣ́сть, егда́ пополза́ется.

Созида́яй до́мъ сво́й имѣ́нiемъ чужди́мъ, я́коже собира́яй ка́менiе на гро́бъ себѣ́.

Изгре́бiя со́брана собо́рище беззако́нниковъ, и кончи́на и́хъ пла́мень о́гненъ.

Пу́ть грѣ́шниковъ углажде́нъ от ка́менiя, а на послѣ́докъ его́ ро́въ а́довъ.

Сохраня́яй зако́нъ содержи́тъ помышле́нiе свое́,

и соверше́нiе стра́ха Госпо́дня прему́дрость.

Не нака́жется, и́же не е́сть кова́ренъ:

е́сть бо кова́рство умножа́ющее го́ресть.

Ра́зумъ прему́драго я́ко пото́пъ умно́жится, и совѣ́тъ его́ я́ко исто́чникъ живота́.

Утро́ба бу́яго я́ко сосу́дъ сокруше́нъ и вся́каго ра́зума не удержи́тъ.

Сло́во прему́дро а́ще услы́шитъ разу́мный, восхва́литъ е́ и къ нему́ приложи́тъ: услы́ша е́ бу́й, и не уго́дно ему́ бы́сть, и обрати́ е́ за плещы́ своя́.

По́вѣсть бу́яго я́ко бре́мя на пути́: во устна́хъ же разу́мнаго обря́щется благода́ть.

Уста́ прему́драго взы́щутся въ собра́нiи, и словеса́ его́ размышле́на бу́дутъ въ се́рдцы.

Я́коже до́мъ разоре́нъ, та́ко бу́яго прему́дрость, и ра́зумъ неразу́мнаго неиспы́тны глаго́лы.

Пу́та на нога́хъ неразумѣва́ющымъ наказа́нiя, и я́ко ручні́и око́вы на руцѣ́ деснѣ́й.

Бу́й во смѣ́хѣ возно́ситъ гла́съ сво́й, му́жъ же разу́мный едва́ ти́хо оскла́бится.

Я́коже у́тварь злата́я му́дрому наказа́нiе, и я́коже о́бручь на деснѣ́й мы́шцѣ его́.

Нога́ бу́яго скора́ въ до́мъ, человѣ́къ же многоиску́сный усрами́тся от лица́.

Безу́мный две́рьми прини́четъ во хра́мину, му́жъ же нака́занъ внѣ́ ста́нетъ.

Ненаказа́нiе человѣ́ку слу́шати при две́рехъ, му́дрый же отяготи́тся безче́стiемъ.

Устнѣ́ многорѣ́чивыхъ не своя́ си́ повѣ́дятъ, словеса́ же му́дрыхъ въ мѣ́рилѣхъ ста́нутъ.

Во устѣ́хъ бу́ихъ се́рдце и́хъ, въ се́рдцы же прему́дрыхъ уста́ и́хъ.

Клену́щу нечести́вому сатану́, са́мъ клене́тъ свою́ ду́шу.

Скверни́тъ свою́ ду́шу шепотли́вый, и гдѣ́ либо жи́ти и́мать, возненави́дѣнъ бу́детъ.

Треми́ украси́хся и ста́хъ красна́ предъ Го́сподемъ и человѣ́ки:

единомы́слiемъ бра́тiй и любо́вiю и́скреннихъ, и му́жъ и жена́ между́ собо́ю согла́сни.

Три́ же ви́ды возненави́дѣ душа́ моя́, и зѣло́ ми́ омерзѣ́ живо́тъ и́хъ:

убо́га го́рда, и бога́та лжи́ва, и ста́ра прелюбодѣ́я умаля́ющагося умо́мъ.

Я́же въ ю́ности не собра́лъ еси́, то́ ка́ко мо́жеши обрѣсти́ въ ста́рости твое́й?

Ко́ль е́сть красе́нъ сѣди́намъ су́дъ, и старѣ́йшымъ разумѣ́ти совѣ́тъ?

Ко́ль красна́ ста́рымъ прему́дрость и сла́внымъ разумѣ́нiе и совѣ́тъ?

Вѣне́цъ ста́рцемъ многоразли́чное иску́сство, и похвале́нiе и́хъ стра́хъ Госпо́день.

Де́вять помышле́нiй ублажи́хъ въ се́рдцы мое́мъ, а деся́тое изреку́ язы́комъ:

человѣ́къ веселя́йся о ча́дѣхъ, живя́й и зря́й паде́нiе враго́въ.

Блаже́нъ живя́й со жено́ю разу́мною, и и́же язы́комъ [свои́мъ] не поползну́ся, и и́же не порабо́та недосто́йному себѣ́.

Блаже́нъ, и́же обрѣ́те му́дрость и повѣ́даяй во у́ши послу́шающихъ.

Ко́ль вели́къ, и́же му́дрость обрѣ́те, но нѣ́сть па́че боя́щагося Го́спода.

Стра́хъ Госпо́день па́че всего́ предуспѣ́, держа́й его́ кому́ уподо́бится?

Вся́ка я́зва и не я́зва серде́чная и вся́кое лука́вство и не лука́вство же́нское:

вся́кое нападе́нiе и не нападе́нiе ненави́дящихъ, и вся́кое мще́нiе и не отмще́нiе враго́въ.

Нѣ́сть главы́ па́че главы́ змiи́ны, и нѣ́сть я́рости па́че я́рости вра́жiя.

Лу́чше жи́ти со льво́мъ и змі́емъ, не́же жи́ти со жено́ю лука́вою.

Лука́вство жены́ измѣня́етъ зра́къ ея́ и омрача́етъ лице́ свое́ я́ко вре́тище:

посредѣ́ и́скреннихъ свои́хъ возля́жетъ му́жъ ея́, и слы́шавъ воздо́хнетъ го́рько.

Мала́ е́сть вся́ка зло́ба проти́ву зло́бѣ же́нстѣй: жре́бiй грѣ́шника спаде́тъ на ню́.

Я́коже восхожде́нiе по песку́ нога́ма ста́раго, та́ко жена́ язы́чна му́жу молчали́ву.

Не сматря́й на красоту́ же́нскую и жены́ въ по́хоть не пожела́й.

Гнѣ́въ и безсту́дiе и срамота́ вели́ка жена́, а́ще облада́етъ му́жемъ свои́мъ.

Се́рдце смире́но, и лице́ дря́хло, и я́зва серде́чна жена́ лука́ва:

ру́цѣ немощны́я и колѣ́на разсла́блена, [жена́] я́же не блажи́тъ му́жа своего́.

От жены́ нача́ло грѣха́, и то́ю умира́емъ вси́.

Не да́ждь водѣ́ прохо́да, ни женѣ́ лука́вѣ дерзнове́нiя:

а́ще не хо́дитъ подъ руко́ю твое́ю, отсѣцы́ ю́ от пло́ти твоея́.

То́чiю вдая́й ду́шу свою́ и размышля́яй въ зако́нѣ вы́шняго прему́дрости всѣ́хъ дре́внихъ взы́щетъ и во проро́чествiихъ поуча́тися бу́детъ:

по́вѣсти муже́й имени́тыхъ соблюде́тъ и во изви́тiя при́тчей совни́детъ,

сокрове́нная при́тчей изы́щетъ и въ гада́нiи при́тчей поживе́тъ,

посредѣ́ вельмо́жъ послу́житъ и предъ старѣ́йшину яви́тся,

въ земли́ чужди́хъ язы́къ про́йдетъ, добро́ бо и зло́ въ человѣ́цѣхъ искуси́.

Се́рдце свое́ вда́стъ у́треневати ко Го́споду сотво́ршему его́ и предъ вы́шнимъ помо́лится, и отве́рзетъ уста́ своя́ на моли́тву и о грѣсѣ́хъ свои́хъ помо́лится.

А́ще Госпо́дь ве́лiй восхо́щетъ, ду́хомъ ра́зума испо́лнится:

то́й одожди́тъ глаго́лы прему́дрости своея́ и въ моли́твѣ исповѣ́стся Го́сподеви,

то́й упра́витъ совѣ́тъ его́ и худо́жество и въ сокрове́нныхъ его́ размышля́ти бу́детъ,

то́й извѣсти́тъ наказа́нiе уче́нiя его́ и въ зако́нѣ завѣ́та Госпо́дня похва́лится.

Восхва́лятъ ра́зумъ его́ мно́зи, и до вѣ́ка не поги́бнетъ:

не отъи́детъ па́мять его́, и и́мя его́ поживе́тъ въ ро́ды родо́въ:

прему́дрость его́ повѣ́дятъ язы́цы, и хвалу́ его́ исповѣ́сть це́рковь.

А́ще пребу́детъ, приусво́итъ себѣ́, и а́ще почі́етъ, и́мя оста́витъ па́че ты́сящъ.

Еще́ размы́сливъ повѣ́мъ, и я́коже луны́ полнота́ напо́лнихся.

Послу́шайте мене́, преподо́бнiи сы́нове, и прозя́бните я́ко ши́пки произраста́ющыя при пото́цѣ се́лнѣмъ,

и я́коже Лива́нъ дади́те благово́нiе,

и процвѣти́те цвѣ́тъ я́ко кри́нъ, преподади́те воню́ и воспо́йте пѣ́снь.

Благослови́те Го́спода во всѣ́хъ дѣ́лѣхъ его́, дади́те и́мени его́ вели́чiе и исповѣ́дайтеся во хвале́нiи его́,

въ пѣ́снехъ усте́нъ и въ гу́слехъ, и си́це рцы́те во исповѣ́данiи:

дѣла́ Госпо́дня вся́ я́ко добра́ зѣло́, и вся́ко повелѣ́нiе во вре́мя свое́ бу́детъ.

И нѣ́сть рещи́: что́ сiе́? на что́ сiе́? вся́ бо сiя́ во вре́мя свое́ взы́скана бу́дутъ.

Сло́вомъ его́ ста́ вода́ я́ко сто́гъ, и глаго́ломъ у́стъ его́ прiя́телища водна́я.

Повелѣ́нiемъ его́ вся́кое благоволе́нiе, и нѣ́сть, и́же ума́литъ спасе́нiе его́.

Дѣла́ вся́кiя пло́ти предъ ни́мъ, и нѣ́сть укры́тися от оче́съ его́:

от вѣ́ка на вѣ́къ призрѣ́, и ничто́же е́сть ди́вно предъ ни́мъ.

Нѣ́сть рещи́: что́ сiе́? на что́ сiе́? вся́ бо на потре́бу и́хъ создана́ бы́ша.

Благослове́нiе его́ я́ко рѣка́ покры́ и я́ко пото́къ су́шу напои́:

си́це гнѣ́въ его́ язы́цы наслѣ́дятъ, я́ко преврати́ во́ду въ сла́ность.

Путiе́ его́ преподо́бнымъ пра́ви, та́ко беззако́нникомъ претыка́нiя.

Блага́я благи́мъ создана́ бы́ша изъ нача́ла, та́кожде грѣ́шнымъ зла́я.

Нача́ло вся́кiя потре́бы въ житiе́ человѣ́ку, вода́ и о́гнь, и желѣ́зо и со́ль, и семида́лъ пшени́цы и млеко́ и ме́дъ, кро́вь гро́здова и ма́сло и ри́за:

вся́ сiя́ благочести́вымъ во блага́я, си́це и грѣ́шникомъ превратя́тся во зла́я.

Су́ть ду́си, и́же со́здани бы́ша на ме́сть и я́ростiю свое́ю утверди́ша ра́ны и́мъ:

во вре́мя сконча́нiя излiю́тъ крѣ́пость и я́рость сотво́ршаго и́хъ соверша́тъ.

О́гнь и гра́дъ, и гла́дъ и сме́рть, вся́ сiя́ создана́ бы́ша на ме́сть:

зу́бы звѣре́й и скорпі́и, и ехи́дны и ме́чь отмща́яй въ поги́бель нечести́выхъ,

въ за́повѣдехъ его́ возвеселя́тся, и на земли́ на потре́бу угото́вятся, и во бремена́хъ свои́хъ не и́мутъ прейти́ сло́ва.

Сего́ ра́ди испе́рва утверди́хся и размы́слихъ и въ писа́нiи оста́вихъ:

вся́ дѣла́ Госпо́дня бла́га, и всю́ потре́бу во вре́мя свое́ пода́стъ:

и нѣ́сть рещи́: сiе́ сего́ злѣ́е: вся́ бо во вре́мя на угожде́нiе бу́дутъ.

И ны́нѣ всѣ́мъ се́рдцемъ и усты́ воспо́йте и благослови́те и́мя Госпо́дне.