[Зач. 241.] Тѣ́мже, возлю́бленнiи мои́, я́коже всегда́ послу́шасте мене́, не я́коже въ прише́ствiи мое́мъ то́чiю, но ны́нѣ мно́го па́че во отше́ствiи мое́мъ, со стра́хомъ и тре́петомъ свое́ спасе́нiе содѣва́йте:

Бо́гъ бо е́сть дѣ́йствуяй въ ва́съ и е́же хотѣ́ти и е́же дѣ́яти о благоволе́нiи.

Вся́ твори́те безъ ропта́нiя и размышле́нiя,

да бу́дете непови́нни и цѣ́ли, ча́да Бо́жiя непоро́чна посредѣ́ ро́да стропти́ва и развраще́на, въ ни́хже явля́етеся я́коже свѣти́ла въ мíрѣ,

сло́во живо́тно придержа́ще, въ похвалу́ мнѣ́ въ де́нь Христо́въ, [Зач. 242.] я́ко не вотще́ теко́хъ, ни вотще́ труди́хся.

Но а́ще и жре́нъ быва́ю о же́ртвѣ и слу́жбѣ вѣ́ры ва́шея, ра́дуюся и сора́дуюся всѣ́мъ ва́мъ:

та́кожде и вы́ ра́дуйтеся и сора́дуйтеся мнѣ́.

Упова́ю же о Го́сподѣ Иису́сѣ Тимоѳе́а вско́рѣ посла́ти къ ва́мъ, да и а́зъ благоду́шствую, увѣ́дѣвъ я́же о ва́съ.

Ни еди́наго бо и́мамъ равноду́шна, и́же при́снѣе о ва́съ попече́тся:

вси́ бо свои́хъ си́ и́щутъ, [а] не я́же Христа́ Иису́са.

Иску́сство же его́ зна́ете, зане́ я́коже отцу́ ча́до, со мно́ю порабо́талъ въ благовѣ́стiи.

Сего́ же у́бо упова́ю посла́ти а́бiе, повнегда́ увѣ́мъ я́же о мнѣ́.

[Зач. 243.] Надѣ́юся же о Го́сподѣ, я́ко и са́мъ ско́ро прiиду́ къ ва́мъ.

Потре́бнѣе же возмнѣ́хъ Епафроди́та бра́та и споспѣ́шника и сво́инника моего́, ва́шего же посла́нника и служи́теля потре́бѣ мое́й, посла́ти къ ва́мъ,

поне́же жела́нiемъ жела́ше ви́дѣти всѣ́хъ ва́съ, и тужа́ше, зане́ слы́шасте, я́ко болѣ́.

И́бо болѣ́ бли́зъ сме́рти: но Бо́гъ поми́лова его́, не его́ же то́кмо, но и мене́, да не ско́рбь на ско́рбь прiиму́.

Скорѣ́е у́бо посла́хъ его́, да ви́дѣвше его́ па́ки, возра́дуетеся, и а́зъ безпеча́ленъ пребу́ду.

Прiими́те у́бо его́ о Го́сподѣ со вся́кою ра́достiю, и таковы́я че́стны имѣ́йте,

зане́ за дѣ́ло Христо́во да́же до сме́рти прибли́жися, пону́дивъ себе́ вседу́шно {презрѣ́въ ду́шу свою́}, да испо́лнитъ ва́ше лише́нiе слу́жбы я́же ко мнѣ́.

[Зач. 244.] Про́чее же, бра́тiе моя́, ра́дуйтеся о Го́сподѣ. Та́яжде [бо] писа́ти ва́мъ, мнѣ́ у́бо нелѣ́ностно, ва́мъ же тве́рдо.

Блюди́теся от псо́въ, блюди́теся от злы́хъ дѣ́лателей, блюди́теся от сѣче́нiя:

мы́ бо есмы́ обрѣ́занiе, и́же ду́хомъ Бо́гу слу́жимъ и хва́лимся о Христѣ́ Иису́сѣ, а не въ пло́ти надѣ́емся:

и́бо и а́зъ имѣ́ю надѣ́янiе та́кожде во пло́ти. А́ще кто́ и́нъ мни́тъ надѣ́ятися во пло́ти, а́зъ па́че,

обрѣ́занъ осмодне́вно, от ро́да Изра́илева, колѣ́на Венiами́нова, Евре́инъ от Евре́й, по зако́ну фарисе́й,

по ре́вности гони́хъ Це́рковь Бо́жiю, по пра́вдѣ зако́ннѣй бы́въ непоро́ченъ.

Но я́же ми́ бя́ху приобрѣ́тенiя, сiя́ вмѣни́хъ Христа́ ра́ди тщету́.

Но у́бо вмѣня́ю вся́ тщету́ бы́ти за превосходя́щее разумѣ́нiе Христа́ Иису́са Го́спода моего́, [Зач. 245.] Его́же ра́ди всѣ́хъ отщети́хся, и вмѣня́ю вся́ уме́ты бы́ти, да Христа́ приобря́щу

и обря́щуся въ Не́мъ, не имы́й моея́ пра́вды, я́же от зако́на, но я́же вѣ́рою [Иису́съ] Христо́вою, су́щую от Бо́га пра́вду въ вѣ́рѣ:

я́ко {е́же} разумѣ́ти Его́, и си́лу воскресе́нiя Его́, и сообще́нiе стра́сте́й Его́, сообразу́яся сме́рти Его́,

а́ще ка́ко дости́гну въ воскресе́нiе ме́ртвыхъ.

Не зане́ уже́ достиго́хъ, или́ уже́ соверши́хся: гоню́ же, а́ще и пости́гну, о не́мже и постиже́нъ бы́хъ от Христа́ Иису́са.

Бра́тiе, а́зъ себе́ не у́ помышля́ю дости́гша: еди́но же, за́дняя у́бо забыва́я, въ пре́дняя же простира́яся,

со усе́рдiемъ гоню́ {къ намѣ́ренному теку́}, къ по́чести вы́шняго зва́нiя Бо́жiя о Христѣ́ Иису́сѣ.

Ели́цы у́бо соверше́нни, сiе́ да му́дрствуимъ: и е́же а́ще и́но что́ мы́слите, и сiе́ Бо́гъ ва́мъ откры́етъ.

Оба́че въ не́же достиго́хомъ, то́же да му́дрствуемъ и тѣ́мже пра́виломъ жи́телствуемъ.

Подо́бни ми́ быва́йте, бра́тiе, и смотря́йте та́ко ходя́щыя, я́коже и́мате о́бразъ на́съ.

Мно́зи бо хо́дятъ, и́хже мно́гажды глаго́лахъ ва́мъ, ны́нѣ же и пла́чя глаго́лю, враги́ кре́ста́ Христо́ва:

и́мже кончи́на поги́бель, и́мже бо́гъ чре́во, и сла́ва въ студѣ́ и́хъ, и́же земна́я му́дрствуютъ.

[Зач. 246.] На́ше бо житiе́ на небесѣ́хъ е́сть, отону́дуже и Спаси́теля жде́мъ, Го́спода [на́шего] Иису́са Христа́,

И́же преобрази́тъ тѣ́ло смире́нiя на́шего, я́ко бы́ти сему́ сообра́зну тѣ́лу сла́вы Его́, по дѣ́йству е́же возмога́ти Ему́ и покори́ти Себѣ́ вся́ческая.