повели́ и́мъ, глаго́ля: возми́те от среды́ Иорда́на, идѣ́же стоя́ша но́зи жре́честiи, гото́выхъ двана́десять ка́меней, и изне́сше я́ съ собо́ю, положи́те въ полцѣ́ ва́шемъ, идѣ́же ста́нете та́мо въ нощи́.

И призва́въ Иису́съ двана́десять муже́й сла́вныхъ от сыно́въ Изра́илевыхъ, еди́наго от коего́ждо пле́мене, рече́ и́мъ:

иди́те предо мно́ю предъ лице́мъ Госпо́днимъ въ среди́ну Иорда́на: и взе́мъ отту́ду кі́йждо ка́мень еди́нъ да возложи́тъ на ра́мена своя́, по числу́ племе́нъ [сыно́въ] Изра́илевыхъ:

да бу́дутъ ва́мъ сі́и въ зна́менiе посредѣ́ ва́съ лежа́ще всегда́, да егда́ вопро́ситъ тебе́ у́тро сы́нъ тво́й, глаго́ля: что́ су́ть ка́менiе сiе́ ва́мъ?

И ты́ возвѣсти́ши сы́ну твоему́, глаго́ля: я́ко оскудѣ́ Иорда́нъ рѣка́ от лица́ киво́та завѣ́та Го́спода всея́ земли́, егда́ прехожда́ше его́, и изся́че вода́ Иорда́нова: и бу́дутъ ва́мъ ка́менiе сiе́ въ па́мять сыно́въ Изра́илевыхъ да́же до вѣ́ка.

И сотвори́ша та́ко сы́нове Изра́илевы, я́коже заповѣ́да Госпо́дь Иису́су: и взе́мше двана́десять ка́меней от среды́ Иорда́на, я́коже заповѣ́да Госпо́дь Иису́су въ сконча́нiи прехожде́нiя сыно́въ Изра́илевыхъ, и принесо́ша и́хъ съ собо́ю въ по́лкъ, и положи́ша и́хъ та́мо.

Поста́ви же Иису́съ и другі́я двана́десять ка́меней въ са́мѣмъ Иорда́нѣ на мѣ́стѣ, идѣ́же стоя́ху но́зи жерце́въ воздвиза́ющихъ киво́тъ завѣ́та Госпо́дня, и су́ть та́мо да́же до сего́ дне́.

Стоя́ху же жерцы́ воздвиза́ющiи киво́тъ завѣ́та Госпо́дня во Иорда́нѣ, до́ндеже сконча́ Иису́съ вся́, ели́ка заповѣ́да Госпо́дь Иису́су повѣ́дати лю́демъ, по всѣ́мъ, ели́ка заповѣ́да Моисе́й Иису́су: и потща́шася лю́дiе, и преидо́ша.

И бы́сть егда́ сконча́ша вси́ лю́дiе преходи́ти [Иорда́нъ], пре́йде и киво́тъ завѣ́та Госпо́дня, и ка́менiе {Вмѣ́сто ка́менiе во ины́хъ гре́ческихъ жерцы́.} предъ ни́ми.

И преидо́ша сы́нове Руви́мли и сы́нове Га́довы и по́лъ пле́мене Манассі́ина устро́ены предъ сынми́ Изра́илевы, я́коже заповѣ́да и́мъ Моисе́й:

четы́редесять ты́сящъ вооруже́ни на ра́ть преидо́ша предъ Го́сподемъ на бра́нь ко гра́ду Иерихо́ну.

Въ то́й де́нь возвели́чи Госпо́дь Иису́са предъ всѣ́мъ ро́домъ Изра́илевымъ: и боя́хуся его́, я́коже боя́хуся Моисе́а, ели́ко вре́мя поживе́.

И рече́ Госпо́дь ко Иису́су, глаго́ля:

заповѣ́ждь жерце́мъ, воздвиза́ющымъ киво́тъ завѣ́та свидѣ́нiя, изступи́ти изъ Иорда́на.

И заповѣ́да Иису́съ жерце́мъ, глаго́ля: изыди́те изъ Иорда́на.

И бы́сть егда́ изыдо́ша жерцы́ воздвиза́ющiи киво́тъ завѣ́та Госпо́дня от среды́ Иорда́на, и поста́виша но́ги на су́сѣ, и устреми́ся вода́ Иорда́нова на мѣ́сто и по́йде я́коже вчера́ и тре́тiяго дне́ по всему́ кра́ю.

И лю́дiе взыдо́ша от Иорда́на въ деся́тый де́нь пе́рваго ме́сяца: и ополчи́шася сы́нове Изра́илевы въ Галга́лѣхъ на странѣ́, я́же на восто́къ со́лнца от Иерихо́на.

И двана́десять ка́менiя сiя́, я́же взя́ от Иорда́на, поста́ви Иису́съ въ Галга́лѣхъ, и рече́ къ сыно́мъ Изра́илевымъ, глаго́ля:

егда́ вопро́сятъ ва́съ сы́нове ва́ши, глаго́люще: что́ су́ть ка́менiе сiе́?

Возвѣсти́те сыно́мъ ва́шымъ: я́ко по су́ху пре́йде Изра́иль Иорда́нъ се́й,

изсуши́вшу Го́споду Бо́гу ва́шему во́ду Иорда́ню предъ ни́ми, до́ндеже преидо́ша, я́коже сотвори́ Госпо́дь Бо́гъ ва́шъ Чермно́му мо́рю, е́же изсуши́ Госпо́дь Бо́гъ ва́шъ предъ ва́ми, до́ндеже преидо́хомъ:

да увѣ́дятъ вси́ язы́цы земні́и, я́ко рука́ Госпо́дня крѣпка́ е́сть, и вы́ да чте́те Го́спода Бо́га ва́шего во вся́кое вре́мя.

И бы́сть егда́ услы́шаша ца́рiе Аморре́йстiи, и́же бя́ху объ ону́ страну́ Иорда́на, и ца́рiе фини́честiи {Евр.: ханаа́ни.}, и́же бя́ху бли́зъ мо́ря, я́ко изсуши́ Госпо́дь Бо́гъ Иорда́нъ рѣку́ предъ сы́ны Изра́илевыми, внегда́ преходи́ти и́мъ, и иста́яша мы́сли и́хъ, и ужасо́шася, и не бя́ше въ ни́хъ смышле́нiя ни еди́наго от лица́ сыно́въ Изра́илевыхъ.

Въ сiе́ же вре́мя рече́ Госпо́дь Иису́су: сотвори́ себѣ́ ножи́ ка́менны от ка́мене о́страго, и сѣ́дъ обрѣ́жи сы́ны Изра́илевы второ́е.

И сотвори́ Иису́съ себѣ́ ножи́ ка́менны остры́ и обрѣ́за сы́ны Изра́илевы на мѣ́стѣ нарече́ннѣмъ хо́лмъ обрѣ́занiя.

И та́ко обрѣ́за Иису́съ сы́ны Изра́илевы: ели́цы тогда́ роди́шася на пути́, и ели́цы тогда́ не обрѣ́зани бы́ша от изше́дшихъ изъ Еги́пта, всѣ́хъ си́хъ обрѣ́за Иису́съ: вси́ лю́дiе изше́дшiи изъ Еги́пта му́жеска по́лу, вси́ му́жiе ра́тнiи измро́ша въ пусты́ни на пути́, внегда́ изыдо́ша изъ Еги́пта:

я́ко обрѣ́зани бы́ша вси́ лю́дiе изше́дшiи, вси́ же лю́дiе, и́же роди́шася въ пусты́ни на пути́, егда́ изыдо́ша изъ Еги́пта, не обрѣ́зани бы́ша:

четы́редесять бо и два́ лѣ́та хожда́ше Изра́иль въ пусты́ни мавдари́тидѣ: сего́ ра́ди не обрѣ́зани бы́ша мно́зи от тѣ́хъ во́иновъ изше́дшихъ изъ земли́ Еги́петскiя, не послу́шавшiи за́повѣдiй Госпо́днихъ, и́мже и опредѣли́ Госпо́дь не ви́дѣти земли́, е́юже кля́тся Госпо́дь отце́мъ и́хъ да́ти на́мъ зе́млю кипя́щую ме́домъ и млеко́мъ:

вмѣ́сто же си́хъ поста́ви сы́ны и́хъ, и́хже обрѣ́за Иису́съ, я́ко сконча́ныя пло́ти бя́ху и́мъ, я́ко роди́шася на пути́ не обрѣ́зани:

обрѣ́завшеся же поко́й имя́ху та́мо сѣдя́ще въ полцѣ́, до́ндеже исцѣли́шася.

И рече́ Госпо́дь Иису́су: въ дне́шнiй де́нь отъя́хъ поноше́нiе Еги́петско от ва́съ. И нарече́ и́мя мѣ́сту тому́ галга́ла, да́же до сего́ дне́.

И ополчи́шася сы́нове Изра́илевы въ Галга́лѣхъ и сотвори́ша па́сху въ четвертыйна́десять де́нь ме́сяца от ве́чера на за́падѣ на по́ли иерихо́нстѣмъ,

и ядо́ша от пшени́цы земли́ о́ноя опрѣсно́ки и но́вая:

въ то́й де́нь преста́ ма́нна, повнегда́ ядо́ша от пшени́цы земли́, и ктому́ не бы́сть сыно́мъ Изра́илевымъ ма́нны: но ядо́ша от плодо́въ земли́ фини́ческiя {Евр.: ханаа́нскiя.} въ лѣ́то о́ное.

И бы́сть егда́ бя́ше Иису́съ у иерихо́на, и воззрѣ́въ очи́ма свои́ма, ви́дѣ человѣ́ка стоя́ща предъ ни́мъ, и ме́чь его́ обнаже́нъ въ руцѣ́ его́. И приступи́въ Иису́съ, рече́ ему́: на́шъ ли еси́, или́ от сопоста́тъ на́шихъ?

О́нъ же рече́ ему́: а́зъ архистрати́гъ си́лы Госпо́дни, ны́нѣ прiидо́хъ [сѣ́мо]. И Иису́съ паде́ лице́мъ свои́мъ на зе́млю и поклони́ся ему́, и рече́: Го́споди, что́ повелѣва́еши рабу́ твоему́?

И рече́ архистрати́гъ Госпо́день ко Иису́су: иззу́й сапо́гъ съ ногу́ твое́ю: мѣ́сто бо, на не́мже ты́ стои́ши, свято е́сть. И сотвори́ Иису́съ та́ко.

Иерихо́нъ же заключе́нъ и огражде́нъ бы́сть от лица́ сыно́въ Изра́илевыхъ: и никто́же изъ него́ исхожда́ше, ниже́ вхожда́ше.

И рече́ Госпо́дь ко Иису́су: се́, а́зъ предаю́ тебѣ́ въ ру́цѣ иерихо́нъ и царя́ его́, и су́щыя въ не́мъ, си́льны крѣ́постiю:

и обходи́те гра́дъ о́крестъ вси́ му́жiе крѣ́пцыи еди́ною [на де́нь], та́ко сотвори́те ше́сть дні́й:

и се́дмь жерцы́ да во́змутъ се́дмь тру́бъ ро́жаныхъ предъ киво́томъ: и въ седмы́й де́нь объиди́те гра́дъ седми́жды, и жерцы́ да востру́бятъ въ трубы́ ро́жаны:

и бу́детъ егда́ востру́бите трубо́ю ро́жаною, внегда́ услы́шати ва́мъ гла́съ трубы́, да воскли́кнутъ вси́ лю́дiе: и воскли́кнувшымъ и́мъ, паду́тъ са́ми стѣ́ны гра́да во основа́нiи свое́мъ, и вни́дутъ вси́ лю́дiе устреми́вшеся кі́йждо пря́мо себѣ́ во гра́дъ.

И вни́де Иису́съ сы́нъ нави́нъ къ жерце́мъ сыно́въ Изра́илевыхъ и рече́ и́мъ глаго́ля: возми́те киво́тъ завѣ́та Госпо́дня, и се́дмь жерцы́ да во́змутъ се́дмь тру́бъ ро́жаныхъ предъ лице́мъ киво́та Госпо́дня.

И рече́ и́мъ глаго́ля: повели́те лю́демъ объити́ и окружи́ти гра́дъ, и во́ини да предъи́дутъ вооруже́ни предъ киво́томъ Госпо́днимъ.

И бы́сть егда́ рече́ Иису́съ къ лю́демъ, и се́дмь жерцы́ иму́ще се́дмь тру́бъ свяще́нныхъ да предъи́дутъ та́кожде предъ Го́сподемъ, и да востру́бятъ доброгла́сно: и киво́тъ завѣ́та Госпо́дня вслѣ́дъ по ни́хъ да и́детъ:

во́ини же да предъи́дутъ напреди́, и жерцы́ трубя́ще въ трубы́, и послѣ́дующiи созади́ киво́та завѣ́та Госпо́дня бя́ху иду́ще и трубя́ще труба́ми.

Лю́демъ же заповѣ́да Иису́съ, глаго́ля: не вопи́те, ниже́ да слы́шитъ кто́ гла́са ва́шего, ниже́ да изы́детъ изъ у́стъ ва́шихъ сло́во до дне́, въ о́ньже повелю́ ва́мъ са́мъ воскли́кнути, и тогда́ воскли́кните.

И обше́дъ киво́тъ завѣ́та Бо́жiя о́крестъ гра́да [еди́ною], а́бiе и́де въ по́лкъ, и ста́ та́мо.

Во вторы́й же де́нь воста́ Иису́съ зау́тра, и воздвиго́ша жерцы́ киво́тъ завѣ́та Госпо́дня.

И жерцы́ се́дмь нося́щiи се́дмь тру́бъ предъидя́ху предъ киво́томъ Госпо́днимъ и труби́ша труба́ми, и во́ини вооруже́ни идя́ху, и про́чiи лю́дiе вслѣ́дъ киво́та завѣ́та Госпо́дня иду́ще, и жерцы́ воструби́ша труба́ми ро́жаными.

И обыдо́ша гра́дъ въ де́нь вторы́й еди́ною, и поидо́ша па́ки въ по́лкъ: си́це творя́ху ше́сть дні́й.

И бы́сть въ седмы́й де́нь, воста́ша въ воста́нiе у́треннее, и обыдо́ша гра́дъ въ то́й де́нь седми́жды.

И бы́сть во обхожде́нiи седмѣ́мъ воструби́ша жерцы́ труба́ми, и рече́ Иису́съ къ сыно́мъ Изра́илевымъ: воскли́кните, предаде́ бо Госпо́дь ва́мъ гра́дъ:

и бу́детъ гра́дъ се́й про́клятъ, и вся́, ели́ка су́ть въ не́мъ, Го́споду си́лъ: то́кмо раа́въ блудни́цу снабди́те ю́, и вся́, ели́ка су́ть въ дому́ ея́, я́ко сокры́ прелага́таи, и́хже посыла́хомъ:

но вы́ соблюди́теся от кля́твы, да не когда́ помы́сливше вы́ во́змете от кля́твы, и сотворите́ по́лкъ сыно́въ Изра́илевыхъ кля́тву, и потребите́ ны́:

зла́то же все́ и сребро́, и мѣ́дь и желѣ́зо свято да бу́детъ Го́споду: въ сокро́вище Госпо́дне да внесе́тся.

И воструби́ша жерцы́ труба́ми: егда́ же услы́шаша лю́дiе гла́съ тру́бный, воскли́кнуша вси́ ку́пно лю́дiе гла́сомъ вели́кимъ и си́льнымъ: и падо́ша вся́ стѣ́ны гра́да о́крестъ, и внидо́ша вси́ лю́дiе во гра́дъ, кі́йждо проти́ву себе́, и прiя́ша гра́дъ.

И прокля́ и́ Иису́съ, и ели́ка бы́ша во гра́дѣ, от му́жеска по́лу и до же́нска, от ю́ноши и до ста́рца, и от телца́ до овцы́ и до осля́те, все́ подъ ме́чь.

И двои́мъ ю́ношамъ согля́давшымъ зе́млю рече́ Иису́съ: вни́дите въ до́мъ жены́ блудни́цы, и изведи́те ю́ отту́ду, и вся́, ели́ка су́ть ея́, я́коже кля́стеся е́й.

И внидо́ста два́ ю́ношы согля́давшiи гра́дъ въ до́мъ жены́, и изведо́сте раа́въ блудни́цу, и отца́ ея́ и ма́терь ея́, и бра́тiю ея́ и все́ сро́дство ея́, и вся́ ели́ка бы́ша е́й, изведо́ста и поста́виста я́ внѣ́ полка́ Изра́илева.

И гра́дъ сожго́ша огне́мъ со всѣ́мъ, е́же бѣ́ въ не́мъ, кромѣ́ зла́та и сребра́, мѣ́ди и желѣ́за, я́же отда́ша въ до́мъ Госпо́день внести́ Го́сподеви.

И раа́въ блудни́цу и ве́сь до́мъ ея́ оте́ческiй оста́ви жи́вы Иису́съ, и обита́ти сотвори́ во Изра́или да́же до дне́ сего́, поне́же сокры́ прелага́таи, и́хже посла́ Иису́съ согля́дати иерихо́на.

И прокля́ Иису́съ въ то́й де́нь, глаго́ля: про́клятъ человѣ́къ предъ Го́сподемъ, и́же поста́витъ и сози́ждетъ гра́дъ се́й иерихо́нъ: на пе́рвенцѣ свое́мъ оснуе́тъ его́, и на ме́ншемъ свое́мъ поста́витъ врата́ его́. И си́це сотвори́ аза́нъ, и́же от Веѳи́ля: на Авиро́нѣ пе́рвенцѣ свое́мъ основа́ и́, и на ме́ншемъ спасе́нѣмъ поста́ви врата́ его́.

И бя́ше Госпо́дь со Иису́сомъ, и бѣ́ и́мя его́ по все́й земли́.

И прегрѣши́ша сы́нове Изра́илевы прегрѣше́нiемъ вели́кимъ, и взя́ша от кля́твы: взя́ бо Аха́ръ сы́нъ Хармі́и, сы́на замврі́и, сы́на За́ры, от пле́мене Иу́дина, от кля́твы. И разгнѣ́вася Госпо́дь я́ростiю на сы́ны Изра́илевы.

И посла́ Иису́съ му́жы от иерихо́на въ га́й, и́же е́сть проти́ву Виѳа́внъ на восто́къ Веѳи́ля, и рече́ и́мъ, глаго́ля: ше́дше согля́дайте зе́млю. И идо́ша му́жiе и согля́даша га́й.

И возврати́шася ко Иису́су и реко́ша ему́: да не и́дутъ вси́ лю́дiе, но я́ко двѣ́ ты́сящы или́ три́ ты́сящы муже́й да и́дутъ и да вою́ютъ га́й: да не веде́ши та́мо всѣ́хъ люді́й, ма́ло бо е́сть и́хъ [та́мо].

И идо́ша от люді́й та́мо, а́ки три́ ты́сящы муже́й, и побѣго́ша от лица́ муже́й га́йскихъ:

и уби́ша от ни́хъ му́жiе га́йстiи я́ко три́десять и ше́сть муже́й, и отгна́ша и́хъ от вра́тъ, до́ндеже сокруши́ша и́хъ на стремни́нѣ: и ужасе́ся се́рдце люді́й, и бы́сть я́ко вода́.

И растерза́ Иису́съ ри́зы своя́, и паде́ на земли́ на лице́ свое́ предъ Го́сподемъ да́же до ве́чера, са́мъ и ста́рцы Изра́илевы: и посы́паша пе́рсть на главы́ своя́.

И рече́ Иису́съ: молю́ся, Го́споди Го́споди, вску́ю преведе́ ра́бъ тво́й лю́ди сiя́ чрезъ Иорда́нъ преда́ти и́хъ Аморре́омъ на погубле́нiе? о, да бы́хомъ пребы́ли и всели́лися у Иорда́на:

Го́споди, что́ реку́? поне́же отврати́ Изра́иль вы́ю свою́ предъ враги́ свои́ми:

и услы́шавъ Ханане́й и вси́ живу́щiи на земли́ обы́дутъ на́съ и потребя́тъ на́съ от земли́: и что́ сотвори́ши и́мени твоему́ вели́кому?

И рече́ Госпо́дь ко Иису́су: воста́ни, вску́ю ты́ па́лъ еси́ на лице́ твое́?

согрѣши́ша лю́дiе и преступи́ша завѣ́тъ мо́й, его́же завѣща́хъ къ ни́мъ, и укра́дше от кля́твы, скры́ша въ сосу́дѣхъ свои́хъ:

сего́ ра́ди не мо́гутъ сы́нове Изра́илевы ста́ти предъ лице́мъ враго́въ свои́хъ, но хребе́тъ обратя́тъ предъ враги́ свои́ми, я́ко кля́твою ста́шася: не приложу́ ксему́ бы́ти съ ва́ми, а́ще не и́змете кля́твы от себе́ сами́хъ:

воста́въ очи́сти лю́ди и рцы́: очи́ститеся на у́тро: я́ко сiя́ глаго́летъ Госпо́дь Бо́гъ Изра́илевъ: кля́тва е́сть въ ва́съ, не возмо́жете ста́ти предъ враги́ ва́шими, до́ндеже и́змете от себе́ сами́хъ кля́тву:

и собери́теся вси́ зау́тра по племено́мъ [ва́шымъ], и бу́детъ пле́мя, е́же пока́жетъ Госпо́дь, да приведе́те по со́нмомъ: и со́нмъ, его́же пока́жетъ Госпо́дь, да приведе́те по домо́мъ: и до́мъ, его́же пока́жетъ Госпо́дь, да приведе́те по муже́мъ:

и и́же обличи́тся, да сожже́тся огне́мъ, са́мъ и вся́ ели́ка су́ть его́, я́ко преступи́ завѣ́тъ Госпо́день и сотвори́ беззако́нiе во Изра́или.

И воста́ Иису́съ зау́тра, и приведе́ люді́й по племено́мъ: и обличи́ся пле́мя Иу́дино.

И приведе́ся по со́нмомъ, и обличи́ся со́нмъ зара́инъ: и приведе́ся со́нмъ зара́инъ по муже́мъ, и обличи́ся до́мъ замврі́инъ.

И приведе́ся до́мъ его́ по муже́мъ, и обличи́ся Аха́ръ сы́нъ Хармі́инъ сы́на замврі́ина, сы́на зара́ня, от пле́мене Иу́дина.

И рече́ Иису́съ Аха́ру: сы́не мо́й, да́ждь сла́ву дне́сь Го́споду Бо́гу Изра́илеву, и да́ждь ему́ исповѣ́данiе, и исповѣ́ждь ми́, что́ сотвори́лъ еси́, и не ута́й от мене́.

И отвѣща́ Аха́ръ Иису́су и рече́: пои́стиннѣ а́зъ согрѣши́хъ предъ Го́сподемъ Бо́гомъ Изра́илевымъ: си́це и си́це сотвори́хъ:

ви́дѣхъ въ плѣ́нѣ ри́зу красну́ и добру́ и двѣ́сти дидра́хмъ сребра́, и сосу́дъ еди́нъ зла́тъ, пятьдеся́тъ дидра́хмъ вѣ́съ его́: и помы́сливъ на ня́ взя́хъ: и се́, сiя́ сокрове́нна су́ть въ земли́ въ ку́щи мое́й, и сребро́ сокрове́нно подъ ни́ми.

И посла́ Иису́съ послы́, и идо́ша въ ку́щу въ по́лкъ: и сiя́ бя́ху сокрове́нна въ ку́щи его́, и сребро́ подъ ни́ми.

И изнесо́ша я́ изъ ку́щи, и принесо́ша ко Иису́су и къ ста́рцемъ Изра́илевымъ, и положи́ша я́ предъ Го́сподемъ.

И взя́ Иису́съ Аха́ра сы́на зара́ня, и сребро́ и ри́зу и сосу́дъ златы́й, и возведе́ его́ въ де́брь Ахо́ръ, и сы́ны его́ и дще́ри его́, и телцы́ его́ и осля́та его́ и вся́ о́вцы его́, и ку́щу его́ и вся́ имѣ́нiя его́, и ве́сь Изра́иль по не́мъ: и возведе́ я́ [со всѣ́мъ] во Еме́къ {въ де́брь} Ахо́ръ.

И рече́ Иису́съ Аха́ру: почто́ потреби́лъ еси́ на́съ? да потреби́тъ тя́ Госпо́дь, я́коже и дне́сь. И поби́ша его́ ка́менiемъ ве́сь Изра́иль, и сожго́ша вся́ огне́мъ, и намета́ша и́хъ ка́менiемъ,

и намета́ша на не́мъ грома́ду ка́менiя вели́ку. И преста́ Госпо́дь от я́рости гнѣ́ва своего́. Сего́ ра́ди прозва́ся и́мя мѣ́сту тому́ Еме́къ Ахо́ръ да́же до дне́ сего́.

И рече́ Госпо́дь ко Иису́су: не бо́йся, ниже́ ужаса́йся: поими́ съ собо́ю вся́ му́жы вои́нскiя, и воста́въ взы́ди въ га́й: се́, преда́хъ въ ру́цѣ твои́ царя́ га́йска и зе́млю его́, и лю́ди его́ и гра́дъ его́:

и да сотвори́ши га́ю и царю́ его́, я́коже сотвори́лъ еси́ иерихо́ну и царю́ его́: и плѣ́нъ его́ и скоты́ его́ да плѣни́ши себѣ́: устро́й же себѣ́ подса́ду гра́ду за собо́ю.

И воста́ Иису́съ и вси́ му́жiе вои́нстiи, да вни́дутъ въ га́й: и избра́ Иису́съ три́десять ты́сящъ муже́й вои́нскихъ си́льныхъ крѣ́постiю и посла́ и́хъ но́щiю,

и заповѣ́да и́мъ, глаго́ля: вы́ скры́йтеся за гра́домъ: не дале́че бу́дите от гра́да зѣло́, и бу́дите вси́ гото́ви:

а́зъ же и вси́ лю́дiе и́же со мно́ю присту́пимъ ко гра́ду: и бу́детъ егда́ изы́дутъ живу́щiи въ гаи́ въ срѣ́тенiе на́мъ, я́коже и пре́жде, и побѣ́гнемъ от лица́ и́хъ:

и егда́ изы́дутъ вслѣ́дъ на́съ, отто́ргнемъ и́хъ от гра́да: и реку́тъ: бѣжа́тъ сі́и от лица́ на́шего, я́коже и пре́жде:

вы́ же воста́нете от подса́ды, и по́йдете во гра́дъ, и преда́стъ его́ Госпо́дь Бо́гъ на́шъ въ ру́цѣ ва́ши:

и бу́детъ егда́ во́змете гра́дъ, запали́те его́ огне́мъ, по словеси́ сему́ сотвори́те: се́, заповѣ́даю ва́мъ.

И посла́ и́хъ Иису́съ, и идо́ша въ подса́ду: и сѣдо́ша между́ Веѳи́лемъ и между́ га́iемъ, от мо́ря га́iа.

И воста́въ Иису́съ зау́тра, согля́да лю́ди: и взы́де са́мъ и ста́рцы Изра́илтестiи предъ людьми́ въ га́й.

И вси́ лю́дiе вои́нстiи съ ни́мъ взыдо́ша, и иду́ще прiидо́ша сопроти́въ гра́да от восто́ковъ: и подса́ды гра́да от мо́ря.

И ополчи́шася от сѣ́вера га́iа, и [бы́сть] де́брь между́ и́ми и между́ га́iемъ. И взя́ я́ко пя́ть ты́сящъ муже́й, и положи́ и́хъ на подса́ду между́ Веѳи́лемъ и га́iемъ от за́пада га́iа.

И поста́виша лю́дiе ве́сь по́лкъ от сѣ́вера гра́да, а про́чая его́ от мо́ря гра́да. И по́йде Иису́съ въ но́щь о́ну посредѣ́ де́бри.

И бы́сть егда́ уви́дѣ ца́рь га́йскiй, потща́ся, и воста́ ра́но и изы́де въ срѣ́тенiе и́мъ пря́мо на бра́нь, са́мъ и вси́ лю́дiе его́ съ ни́мъ во вре́мя, предъ лице́мъ подса́ды: о́нъ же не вѣ́дяше, я́ко подса́да ему́ е́сть за гра́домъ [его́].

И уви́дѣ, и отъи́де Иису́съ и ве́сь лю́дъ от лица́ и́хъ, и побѣже́ путе́мъ пусты́ни.

И укрѣпи́ся ве́сь лю́дъ гна́ти вслѣ́дъ и́хъ, и погна́ша вслѣ́дъ сыно́въ Изра́илевыхъ, и отступи́ша от гра́да.

[И] не оста́ся никто́же въ гаи́ и Веѳи́ли, и́же не погна́ вслѣ́дъ Изра́иля: и оста́виша гра́дъ отве́рстъ, и гна́ша вслѣ́дъ Изра́иля.

И рече́ Госпо́дь ко Иису́су: простри́ ру́ку твою́ съ копiе́мъ, е́же въ руцѣ́ твое́й, на гра́дъ, зане́ въ ру́ку твою́ преда́хъ его́: и подса́ды воста́нутъ вско́рѣ от мѣ́ста своего́. И простре́ Иису́съ ру́ку свою́ и съ копiе́мъ на гра́дъ.

И подса́ды воста́ша ско́ро от мѣ́ста своего́: и изыдо́ша, егда́ простре́ ру́ку, и внидо́ша во гра́дъ, и взя́ша его́: и потща́вшеся запали́ша гра́дъ огне́мъ.

И озрѣ́вшеся обита́тели га́йстiи вспя́ть себе́, узрѣ́ша ды́мъ восходя́щь от гра́да до небесе́, и ктому́ не имѣ́ша ка́мо побѣ́гнути, сѣ́мо или́ ова́мо: лю́дiе же бѣгу́щiи въ пусты́ню обрати́шася на гоня́щихъ.

Иису́съ же и ве́сь Изра́иль уви́дѣша, я́ко взя́ша подса́ды гра́дъ, и я́ко восхо́дитъ ды́мъ гра́дный до небесе́: и обрати́вшеся изби́ша муже́й га́йскихъ.

И сі́и изыдо́ша изъ гра́да проти́ву и́мъ, и бы́ша посредѣ́ полка́ Изра́илева, сі́и отсю́ду и сі́и отону́ду: и изби́ша и́хъ, до́ндеже не оста́ся ни еди́нъ от ни́хъ цѣ́лъ, ни убѣжа́.

И царя́ га́йска я́ша жи́ва, и приведо́ша его́ ко Иису́су.

И бы́сть егда́ преста́ша сы́нове Изра́илевы сѣку́ще всѣ́хъ су́щихъ въ гаи́ и су́щихъ на поля́хъ и на горѣ́ исхо́да, идѣ́же гони́ша и́хъ, и падо́ша вси́ о́стрiемъ меча́ на не́й до конца́: и обрати́ся Иису́съ въ га́й и посѣче́ и́хъ мече́мъ.

И бы́ша вси́ па́дшiи въ то́й де́нь от му́жеска по́лу и до же́нска двана́десять ты́сящъ, вси́ живу́щiи въ гаи́.

Иису́съ же не обрати́ руки́ своея́, ю́же простре́ съ копiе́мъ, до́ндеже прокля́ всѣ́хъ обита́ющихъ въ гаи́.

Кромѣ́ ското́въ [и́хъ] и имѣ́нiя, я́же во гра́дѣ о́нѣмъ, вся́ плѣни́ша себѣ́ сы́нове Изра́илевы по повелѣ́нiю Госпо́дню, я́коже повелѣ́ Госпо́дь Иису́су.

И запали́ гра́дъ Иису́съ огне́мъ: зе́млю необита́ему во вѣ́къ положи́ его́ да́же до сего́ дне́.

И царя́ га́йска повѣ́си на дре́вѣ сугу́бѣмъ: и бя́ше на дре́вѣ до ве́чера: и заходя́щу со́лнцу повелѣ́ Иису́съ, и сня́ша тѣ́ло его́ съ дре́ва, и поверго́ша е́ въ ро́въ предъ враты́ гра́да: и насы́па надъ ни́мъ грома́ду вели́ку ка́менiя да́же до сего́ дне́.

Тогда́ созда́ Иису́съ олта́рь Го́споду Бо́гу Изра́илеву на горѣ́ Гева́лъ,

я́коже заповѣ́да Моисе́й ра́бъ Госпо́день сыно́мъ Изра́илевымъ, и я́коже написа́ся въ зако́нѣ Моисе́овѣ, олта́рь от ка́менiй всецѣ́лыхъ, на ни́хже не возложи́ся желѣ́зо: и вознесе́ та́мо всесожже́нiя Го́споду и же́ртву спасе́нiя.

И написа́ Иису́съ на ка́менiихъ вторы́й зако́нъ, зако́нъ Моисе́овъ, его́же написа́ предъ сы́ны Изра́илевыми.

И ве́сь Изра́иль, и ста́рцы и́хъ и судiи́ и́хъ и книго́чiя и́хъ предходя́ху сю́ду и сю́ду предъ киво́томъ, и жерцы́ и леви́ти воздвиза́ша киво́тъ завѣ́та Госпо́дня, прише́лецъ же и тузе́мецъ: и́же бы́ша полови́на и́хъ бли́зъ горы́ гаризи́нъ, и полови́на и́хъ бли́зъ горы́ Гева́лъ, я́коже заповѣ́да Моисе́й ра́бъ Госпо́день благослови́ти люді́й Изра́илевыхъ въ пе́рвыхъ.

И по си́хъ та́ко прочте́ Иису́съ вся́ словеса́ зако́на сего́, благослове́нiя и кля́твы, по всему́ напи́санному въ зако́нѣ Моисе́овѣ.

Не бя́ше словесе́ от всѣ́хъ, я́же заповѣ́да Моисе́й Иису́су, его́же не прочте́ Иису́съ во у́ши всего́ со́нма сыно́въ Изра́илевыхъ, муже́мъ и жена́мъ, и дѣ́темъ и прише́лцемъ приходя́щымъ ко Изра́илю.

Егда́ же услы́шаша вси́ ца́рiе Аморре́йстiи, и́же объ ону́ страну́ Иорда́на, и́же въ го́рнѣй и и́же въ ра́внѣй, и и́же во все́мъ примо́рiи мо́ря вели́каго и и́же при антилива́нѣ, и Хетте́и и Аморре́и, и гергесе́и и Ханане́и, и ферезе́и и Еве́и и Иевусе́и,

снидо́шася вку́пѣ сѣщи́ся со Иису́сомъ и со Изра́илемъ единомы́сленно.

И живу́щiи въ хо́лмѣ въ гавао́нѣ слы́шаша вся́, ели́ка сотвори́ Госпо́дь иерихо́ну и га́ю,

и сотвори́ша и сі́и съ лука́вствомъ, и ше́дше угото́ваша бра́шна и угото́вашася: и взе́мше вре́тища ве́тха на ослы́ своя́, и мѣ́хи вина́ ве́тхи и разсѣ́дшыяся завя́заны:

и сапоги́ ве́тхи и запла́чены на ногу́ и́хъ, и ри́зы обветша́ны на ни́хъ, и хлѣ́бы бра́шна и́хъ бѣ́ша пресо́хли и сплѣ́снѣли и сдро́блени.

И прiидо́ша ко Иису́су въ по́лкъ Изра́илевъ въ Галга́лы, и реко́ша ко Иису́су и всему́ Изра́илю: от земли́ да́льнiя прiидо́хомъ, и ны́нѣ завѣща́йте на́мъ завѣ́тъ.

И реко́ша сы́нове Изра́илевы къ Хорре́ю: ви́ждь, не посредѣ́ ли на́съ живе́ши, и ка́ко тебѣ́ завѣща́ю завѣ́тъ?

И реко́ша ко Иису́су: раби́ есмы́ твои́. И рече́ къ ни́мъ Иису́съ: отку́ду есте́? и отку́ду прiидо́сте?

И реко́ша къ нему́: от да́льнiя земли́ зѣло́ прiидо́хомъ раби́ твои́ во и́мя Го́спода Бо́га твоего́: слы́шахомъ бо и́мя его́ и вся́, ели́ка сотвори́ во Еги́птѣ,

и вся́, ели́ка сотвори́ двои́мъ царе́мъ Аморре́йскимъ, и́же бы́ша объ ону́ страну́ Иорда́на, сио́ну царю́ есево́нску и о́гу царю́ Васа́нску, и́же живя́ше во Астаро́ѳѣ и во едраи́нѣ.

И слы́шавше реко́ша къ на́мъ ста́рцы на́ши и вси́ живу́щiи на земли́ на́шей, глаго́люще: возми́те себѣ́ бра́шно на пу́ть и иди́те проти́ву и́мъ, и рцы́те къ ни́мъ: раби́ есмы́ ва́ши, и ны́нѣ завѣща́йте на́мъ завѣ́тъ:

сі́и хлѣ́бы на́ши, те́плыя на пу́ть взя́хомъ и́хъ от домо́въ на́шихъ, въ о́ньже де́нь изыдо́хомъ прiити́ къ ва́мъ: ны́нѣ же пресхо́ша и бы́ша содро́блени:

и сі́и мѣ́си вина́, и́хже налiя́хомъ но́вы, и сі́и разсѣдо́шася: и ри́зы на́шя сiя́ и обу́вища на́ша обетша́ша от до́лгаго пути́ зѣло́.

И взя́ша кня́зи бра́шно и́хъ, а Го́спода не вопроси́ша.

И сотвори́ Иису́съ съ ни́ми ми́ръ, и уста́ви къ ни́мъ завѣ́тъ, е́же снабдѣ́ти и́хъ: и кля́шася и́мъ кня́зи со́нма.

И бы́сть по трiе́хъ дне́хъ по завѣща́нiи къ ни́мъ завѣ́та, услы́шаша, я́ко бли́зъ и́хъ су́ть и я́ко посредѣ́ и́хъ живу́тъ.

И воста́ша сы́нове Изра́илевы и внидо́ша во гра́ды и́хъ въ тре́тiй де́нь: гра́ди же и́хъ [бя́ху] гавао́нъ и кефира́, и виро́тъ и гра́дъ Иари́мъ.

И не сотвори́ша съ ни́ми ра́ти [иису́съ и] сы́нове Изра́илевы, я́ко кля́шася и́мъ вси́ кня́зи со́нма Го́сподемъ Бо́гомъ Изра́илевымъ. И ропта́ша ве́сь со́нмъ Изра́илевъ на князе́й.

И реко́ша вси́ кня́зи всему́ со́нму: мы́ кля́хомся и́мъ Го́сподемъ Бо́гомъ Изра́илевымъ, и ны́нѣ не возмо́жемъ косну́тися и́хъ:

сiе́ сотвори́мъ и́мъ, е́же живи́ти и́хъ, и снабди́мъ и́хъ, и не бу́детъ на на́съ гнѣ́ва кля́твы ра́ди, е́юже кля́хомся и́мъ.

И реко́ша и́мъ кня́зи: да живу́тъ сі́и, и бу́дутъ древосѣ́чцы и водоно́сцы всему́ со́нму. И сотвори́ ве́сь со́нмъ, я́коже реко́ша и́мъ кня́зи.

И созва́ и́хъ Иису́съ и рече́ и́мъ, глаго́ля: почто́ прельсти́сте мя́, глаго́люще: дале́че есмы́ от тебе́ зѣло́? вы́ же насе́лницы есте́ от живу́щихъ въ на́съ:

и ны́нѣ про́кляти есте́: и не оскудѣ́етъ от ва́съ ра́бъ, ниже́ древосѣ́чецъ, ниже́ водоно́сецъ мнѣ́ и Бо́гу моему́.

И отвѣща́ша Иису́су, глаго́люще: поне́же возвѣсти́ся на́мъ [рабо́мъ твои́мъ], ели́ка заповѣ́да Госпо́дь Бо́гъ тво́й Моисе́ю рабу́ своему́, да́ти ва́мъ зе́млю сiю́ и потреби́ти на́съ и вся́ живу́щыя на не́й от лица́ ва́шего, сего́ ра́ди убоя́хомся зѣло́ о душа́хъ на́шихъ от лица́ ва́шего, и сотвори́хомъ дѣ́ло сiе́:

и ны́нѣ, се́, мы́ подру́чни ва́мъ, я́коже уго́дно е́сть ва́мъ, и я́коже ва́мъ мни́тся, твори́те на́мъ.

И сотвори́ша и́мъ си́це: и изба́ви я́ Иису́съ въ то́й де́нь от руку́ сыно́въ Изра́илевыхъ, и не уби́ша и́хъ.

И поста́ви я́ Иису́съ въ то́й де́нь древосѣ́чцы и водоно́сцы всему́ со́нму и олтарю́ Бо́жiю. Сего́ ра́ди бы́ша живу́щiи въ гавао́нѣ древосѣ́чцы и водоно́сцы олтарю́ Бо́жiю, да́же до дне́шняго дне́, и на мѣ́стѣ е́же а́ще избере́тъ Госпо́дь.

Егда́ же услы́ша Адонивезе́къ ца́рь Иерусали́мскiй, я́ко взя́ Иису́съ га́й и потреби́ его́, я́коже сотвори́ иерихо́ну и царю́ его́, та́ко сотвори́ и га́ю и царю́ его́, и я́ко са́ми вда́шася живу́щiи въ гавао́нѣ ко Иису́су и ко Изра́илю, и бы́ша въ ни́хъ,

и убоя́шася са́ми въ себѣ́ зѣло́: вѣ́дяху бо, я́ко гра́дъ бя́ше вели́къ гавао́нъ, я́ко еди́нъ от вели́кихъ градо́въ, и вси́ му́жiе и́же въ не́мъ крѣ́пцы.

И посла́ Адонивезе́къ ца́рь Иерусали́мскiй къ Ела́му царю́ Хевро́нску и фераа́ну царю́ иериму́ѳску, и ко Афі́ю царю́ лахи́сску, и къ дави́ру царю́ Одолла́мску, глаго́ля:

прiиди́те, взы́дите ко мнѣ́ и помози́те ми́, да повою́емъ гавао́на: вда́шася бо са́ми ко Иису́су и къ сыно́мъ Изра́илевымъ.

И собра́шася и взыдо́ша пя́ть царе́й Иевусе́йскихъ: ца́рь Иерусали́мскiй и ца́рь Хевро́нскiй, и ца́рь иериму́ѳскiй и ца́рь лахи́сскiй и ца́рь Одолла́мскiй, са́ми и вси́ лю́дiе и́хъ, и обсѣдо́ша гавао́на и воева́ша на него́.

И посла́ша живу́щiи въ гавао́нѣ ко Иису́су въ по́лкъ Изра́илевъ въ Галга́лы, глаго́люще: не отрѣша́й руки́ твоея́ от ра́бъ твои́хъ: взы́ди къ на́мъ ско́ро и помози́ на́мъ, и изми́ на́съ: я́ко со́брани су́ть на ны́ вси́ ца́рiе Аморре́йстiи, живу́щiи въ го́рнѣй.

И взы́де Иису́съ от Галга́лъ, са́мъ и вси́ лю́дiе вои́нстiи съ ни́мъ, вся́къ си́льный крѣ́постiю.

И рече́ Госпо́дь ко Иису́су: не убо́йся и́хъ, я́ко въ ру́цѣ твои́ преда́хъ я́: не оста́нетъ от ни́хъ ни еди́нъ предъ ва́ми.

И прiи́де на ни́хъ Иису́съ внеза́пу: всю́ бо но́щь и́де от Галга́лъ.

И ужаси́ я́ Госпо́дь от лица́ сыно́въ Изра́илевыхъ: и сокруши́ я́ Госпо́дь сокруше́нiемъ вели́кимъ въ гавао́нѣ: и погна́ша я́ путе́мъ восхо́да Виѳоро́нска, и сѣча́ху и́хъ да́же до ази́ка и до маки́да.

Внегда́ же бѣжа́ти и́мъ от лица́ сыно́въ Изра́илевыхъ до восхо́да Виѳоро́нска, и Госпо́дь ве́рже на ня́ ка́менiе вели́кое гра́да съ небесе́ да́же до ази́ка, и бы́сть мно́жае уме́ршихъ от гра́да ка́менна, не́же убiе́нныхъ от сыно́въ Изра́илевыхъ мече́мъ на бра́ни.

Тогда́ глаго́ла Иису́съ ко Го́споду, въ о́ньже де́нь предаде́ Госпо́дь Бо́гъ Аморре́а подъ ру́ку Изра́илеву, егда́ сокруши́ и́хъ въ гавао́нѣ, и сокруши́шася от лица́ Изра́илева: и рече́ Иису́съ: да ста́нетъ со́лнце пря́мо гавао́ну, и луна́ пря́мо де́бри Ело́нъ.

И ста́ со́лнце и луна́ въ стоя́нiи, до́ндеже отмсти́ Бо́гъ враго́мъ и́хъ. Не сiе́ ли е́сть пи́сано въ кни́гахъ пра́веднаго: и ста́ со́лнце посредѣ́ небесе́ и не идя́ше на за́падъ въ соверше́нiе дне́ еди́наго?

И не бы́сть де́нь таковы́й ниже́ пре́жде, ниже́ послѣди́, е́же послу́шати Бо́гу та́ко гла́са человѣ́ча, я́ко Госпо́дь спобо́рствова Изра́илю.

И возврати́ся Иису́съ и ве́сь Изра́иль съ ни́мъ въ по́лкъ въ Галга́лы.

И убѣго́ша пя́ть ца́рiе сі́и и скры́шася въ пеще́рѣ я́же въ маки́дѣ.

И повѣ́даша Иису́су, глаго́люще: обрѣто́шася пя́ть ца́рiе скры́вшiися въ пеще́рѣ я́же въ маки́дѣ.

И рече́ Иису́съ: привали́те ка́менiе ве́лiе ко у́стiю пеще́ры и приста́вите надъ ни́ми му́жы стрещи́ и́хъ:

вы́ же не сто́йте здѣ́, гоня́ще вслѣ́дъ враго́въ ва́шихъ, и пости́гните оста́нокъ и́хъ, и не дади́те вни́ти и́мъ во гра́ды и́хъ, предаде́ бо я́ Госпо́дь Бо́гъ на́шъ въ ру́цѣ на́ши.

И бы́сть егда́ преста́ Иису́съ и вси́ сы́нове Изра́илевы сѣку́ще и́хъ сѣче́нiемъ вели́кимъ зѣло́ да́же до конца́, и уцѣлѣ́вшiи от ни́хъ внидо́ша во гра́ды тве́рды.

И возврати́шася вси́ лю́дiе въ по́лкъ ко Иису́су въ маки́ду здра́ви, и не возскомлѣ́ никто́же от сыно́въ Изра́илевыхъ язы́комъ свои́мъ.

И рече́ Иису́съ: отве́рзите у́стiе пеще́ры и изведи́те ко мнѣ́ пя́ть царе́й си́хъ изъ пеще́ры.

И сотвори́ша та́ко, и изведо́ша къ нему́ пя́ть царе́й изъ пеще́ры: царя́ Иерусали́мска и царя́ Хевро́нска, и царя́ иериму́ѳска и царя́ лахи́сска и царя́ Одолла́мска.

И егда́ изведо́ша и́хъ ко Иису́су, и созва́ Иису́съ всего́ Изра́иля и нача́лники вои́нскiя ходя́щыя съ ни́мъ, глаго́ля къ ни́мъ: приступи́те и наступи́те нога́ми ва́шими на вы́и царе́й си́хъ. И приступи́вше наступи́ша нога́ми свои́ми на вы́и и́хъ.

И рече́ къ ни́мъ Иису́съ: не бо́йтеся и́хъ, ни ужаса́йтеся: мужа́йтеся и крѣпи́теся, я́ко си́це сотвори́тъ Госпо́дь всѣ́мъ враго́мъ ва́шымъ, и́хже вы́ повою́ете.

И уби́ я́ Иису́съ, и повѣ́си я́ на пяти́ древесѣ́хъ: и бы́ша ви́сяще на древа́хъ да́же до ве́чера.

И бы́сть при захожде́нiи со́лнца, повелѣ́ Иису́съ, и сня́ша я́ съ древе́съ, и вверго́ша я́ въ пеще́ру, въ ню́же вбѣго́ша та́мо: и завали́ша ка́менiемъ вели́кимъ пеще́ру до дне́шняго дне́.

Взя́ша же и маки́ду въ то́й де́нь, и изби́ша ю́ о́стрiемъ меча́ и царя́ ея́, и потреби́ша и́хъ и все́ ды́шущее е́же бя́ше въ не́й: и не оста́ся никто́же въ не́й цѣ́лъ и избѣ́гшiй. И сотвори́ша царю́ маки́дску, я́коже сотвори́ша царю́ иерихо́нску.

И отъи́де Иису́съ и ве́сь Изра́иль съ ни́мъ от маки́ды въ ле́вну, и облеже́ ле́вну.

И предаде́ ю́ Госпо́дь въ ру́цѣ Изра́илю: и взя́ша ю́ и царя́ ея́, и изби́ша ю́ о́стрiемъ меча́, и все́ ды́шущее въ не́й: и не оста́ся въ не́й ни еди́нъ цѣ́лъ и избѣ́гшiй. И сотвори́ша царю́ ея́, я́коже сотвори́ша царю́ иерихо́нску.

И отъи́де Иису́съ и ве́сь Изра́иль съ ни́мъ от ле́вны въ лахи́съ, и облеже́ его́, и воева́ше на́нь.

И предаде́ Госпо́дь лахи́съ въ ру́цѣ Изра́илевы: и взя́ его́ въ де́нь вторы́й, и изби́ша его́ о́стрiемъ меча́ [и все́ ды́шущее въ не́мъ], и потреби́ша его́, я́коже сотвори́ша ле́внѣ.

Тогда́ взы́де ора́мъ ца́рь газе́рскъ, помога́яй лахи́су: и порази́ его́ Иису́съ о́стрiемъ меча́, и лю́ди его́, до́ндеже не оста́ся от ни́хъ ни еди́нъ цѣ́лъ и избѣ́гшiй.

И отъи́де Иису́съ и ве́сь Изра́иль съ ни́мъ от лахи́са во агло́нъ, и облеже́ и́, и воева́ на него́.

И предаде́ и́ Госпо́дь въ ру́цѣ Изра́илю: и взя́ и́ въ то́й де́нь, и изби́ и́ о́стрiемъ меча́, и все́ ды́шущее въ не́мъ уби́, и сотвори́ ему́ я́коже и лахи́су.

И отъи́де Иису́съ и ве́сь Изра́иль съ ни́мъ въ Хевро́нъ, и обся́де и́:

и взя́ его́, и порази́ его́ о́стрiемъ меча́, и царя́ его́, и вся́ ве́си его́, и вся́ ды́шущая ели́ка бя́ху въ не́мъ: не бѣ́ уцѣлѣ́вый: я́коже сотвори́ша агло́ну, потреби́ша и́ и все́ ды́шущее, ели́ка въ не́мъ бя́ху.

И обрати́ся Иису́съ и ве́сь Изра́иль съ ни́мъ въ дави́ръ: и обсѣ́дше и́,

взя́ша его́ и царя́ его́ и вся́ ве́си его́, и порази́ша и́ мече́мъ, и потреби́ша и́ и все́ ды́шущее въ не́мъ, и не оста́виша въ не́мъ ни еди́наго уцѣлѣ́вша: я́коже сотвори́ша Хевро́ну и царю́ его́, та́ко сотвори́ша дави́ру и царю́ его́, и я́коже сотвори́ша ле́внѣ и царю́ ея́.

И порази́ Иису́съ всю́ зе́млю го́рную и наге́въ, и ра́вную и Асидо́ѳъ, и вся́ цари́ его́: не оста́виша въ не́мъ ни еди́наго уцѣлѣ́вша: и все́ ды́шущее потреби́ша, я́коже заповѣ́да Госпо́дь Бо́гъ Изра́илю.

И изби́ и́хъ Иису́съ от Ка́дисъ-варни́ да́же до Га́зы, и всю́ зе́млю госо́мъ да́же до гавао́на:

и вся́ цари́ сiя́ и зе́млю и́хъ взя́ Иису́съ еди́ною: я́ко Госпо́дь Бо́гъ Изра́илевъ помога́ше Изра́илю.

И возврати́ся Иису́съ и ве́сь Изра́иль съ ни́мъ въ по́лкъ въ Галга́лы.

Егда́ же услы́ша Иави́нъ ца́рь Асо́рскъ, посла́ ко Иова́ву царю́ Мадо́нску, и къ царю́ семеро́нску и къ царю́ Ахiа́вску,

и къ царе́мъ и́же въ Сидо́нѣ вели́цѣмъ и въ го́рнѣй, и въ а́раву пря́мо хенере́ѳу, и на поля́ну, и въ Нафеддо́ръ,

и къ примо́рскимъ Ханане́амъ от восто́къ, и къ примо́рскимъ Аморре́омъ и Хетте́омъ, и Ферезе́омъ и Иевусе́омъ, и́же на горѣ́, и Еве́омъ, и и́же подъ аермо́номъ, въ зе́млю Массифа́.

И изыдо́ша сі́и и ца́рiе и́хъ съ ни́ми, лю́дiе мно́зи, я́ко песо́къ и́же при краи́ мо́ря мно́жествомъ, и ко́ни и колесни́цы мно́ги зѣло́.

И снидо́шася вси́ ца́рiе сі́и, и прiидо́ша вку́пѣ, и ополчи́шася при водѣ́ марро́нъ воева́ти на Изра́иля.

И рече́ Госпо́дь ко Иису́су: не убо́йся от лица́ и́хъ, я́ко зау́тра въ се́й ча́съ а́зъ преда́мъ и́хъ я́звенныхъ предъ сы́ны Изра́илевы: ко́немъ и́хъ жи́лы пресѣче́ши и колесни́цы и́хъ да сожже́ши огне́мъ.

И прiи́де Иису́съ и вси́ лю́дiе вои́нстiи съ ни́мъ на ни́хъ къ водѣ́ марро́нстѣй внеза́пу, и нападо́ша на ня́ въ го́рнѣй.

И предаде́ и́хъ Госпо́дь подъ ру́цѣ Изра́илевы: и сѣку́ще и́хъ, прогна́ша да́же до Сидо́на вели́каго и до Масрефо́ѳъ-маи́ма и до по́ль Масси́фскихъ къ восто́комъ: и изсѣко́ша и́хъ, до́ндеже не оста́ся въ ни́хъ ни еди́нъ цѣ́лъ и избѣ́гшiй.

И сотвори́ и́мъ Иису́съ, я́коже заповѣ́да ему́ Госпо́дь: ко́немъ и́хъ жи́лы пресѣче́ и колесни́цы и́хъ сожже́ огне́мъ.

И обрати́ся Иису́съ въ то́ вре́мя, и взя́ Асо́ръ, и царя́ его́ уби́ мече́мъ: Асо́ръ бо бѣ́ пре́жде облада́ющiй всѣ́ми ца́рствы си́ми:

и изби́ все́ ды́шущее, е́же въ не́мъ бы́сть, о́стрiемъ меча́, и потреби́ша вся́, и не оста́ся въ не́мъ все́ ды́шущее: и Асо́ръ запали́ша огне́мъ.

И вся́ гра́ды ца́рствъ си́хъ и вся́ цари́ и́хъ взя́ Иису́съ и изби́ я́ мече́мъ, и потреби́ и́хъ, я́коже повелѣ́ и́мъ Моисе́й ра́бъ Госпо́день.

Но вся́ гра́ды крѣ́пки не запали́ Изра́иль, то́чiю Асо́ръ еди́нъ запали́ Иису́съ.

И вся́ коры́сти и́хъ и вся́ скоты́ и́хъ плѣни́ша себѣ́ сы́нове Изра́илевы: люді́й же всѣ́хъ потреби́ша мече́мъ, до́ндеже погуби́ша и́хъ, и не оста́виша от ни́хъ ни еди́наго ды́шущаго.

Я́коже повелѣ́ Госпо́дь Моисе́ю рабу́ своему́, та́ко Моисе́й заповѣ́да Иису́су: и та́ко сотвори́ Иису́съ, не преступи́ ни еди́наго же от всѣ́хъ, я́же заповѣ́да Госпо́дь Моисе́ю.

И взя́ Иису́съ всю́ зе́млю го́рную и всю́ зе́млю наге́въ, и всю́ зе́млю госо́мску, и ра́вную, и я́же на за́падъ, и го́ру Изра́илеву, и по́ля я́же при горѣ́,

от горы́ хелха́, и я́же восхо́дитъ къ сеи́ру, и да́же до Валга́да, и по́ле Лива́на подъ горо́ю аермо́нъ: и вся́ цари́ и́хъ взя́ и изби́.

И мно́ги дни́ сотвори́ Иису́съ съ цари́ си́ми бра́нь:

и не бѣ́ ни еди́наго гра́да, его́же не предаде́ Госпо́дь сыно́мъ Изра́илевымъ, кромѣ́ Еве́а обита́ющаго въ гавао́нѣ: всѣ́хъ взя́ша бра́нiю:

я́ко Го́сподемъ бы́сть укрѣпи́тися и́хъ се́рдцу, сопроти́витися на бра́ни проти́ву Изра́иля, да потребя́тъ и́хъ, я́ко да не да́стся и́мъ ми́лость, но да потребя́тся, я́коже глаго́ла Госпо́дь къ Моисе́ю.

И прiи́де Иису́съ въ то́ вре́мя, и потреби́ [вся́] енаки́мы от го́рныя, от Хевро́на и от дави́ра и от Ано́ва, и от всея́ горы́ Изра́илевы и от всея́ горы́ Иу́дины, съ гра́ды и́хъ, и потреби́ я́ Иису́съ:

не оста́ся ни еди́нъ енаки́мъ от сыно́въ Изра́илевыхъ, но то́чiю въ Га́зѣ и въ ге́ѳѣ и во Асидо́ѳѣ оста́шася.

И взя́ Иису́съ всю́ зе́млю, я́коже заповѣ́да Госпо́дь Моисе́ю: и даде́ ю́ Иису́съ въ наслѣ́дiе Изра́илю, раздѣле́нiемъ по племено́мъ и́хъ. И преста́ земля́ вою́ема бы́ти.

И сі́и ца́рiе земли́, и́хже изби́ша сы́нове Изра́илевы и наслѣ́диша зе́млю и́хъ объ ону́ страну́ Иорда́на, от восто́къ со́лнца, от де́бри Арно́нскiя да́же до горы́ аермо́нъ, и всю́ зе́млю а́раву от восто́къ:

сио́на царя́ Аморре́йска, и́же живя́ше во есево́нѣ, облада́яй от Арои́ра, и́же е́сть въ де́бри Арно́нстѣй от страны́ де́бри, и по́лъ [земли́] Галаа́да да́же до Иаво́ка, [идѣ́же] предѣ́лы сыно́въ Аммо́нихъ:

и а́рава да́же до мо́ря хенере́ѳъ на восто́ки, и да́же до мо́ря а́рава, мо́ря соли́щнаго от восто́къ, путе́мъ и́же ко Виѳсимо́ѳу, и от Ѳема́на и́же подъ Асидо́ѳъ-фа́сгою:

и о́гъ ца́рь Васа́нскiй оста́ся от исполи́новъ, и́же обита́ во Астаро́ѳѣ и во едраи́нѣ,

облада́яй от горы́ аермо́нъ, и от селхи́, и все́ю земле́ю Васа́нъ да́же до предѣ́лъ гесури́, и Махаѳи́, и по́лъ Галаа́да до предѣ́лъ сио́на царя́ есево́нска.

Моисе́й ра́бъ Госпо́день и сы́нове Изра́илевы порази́ша я́: и даде́ ю́ Моисе́й ра́бъ Госпо́день въ наслѣ́дiе Руви́му и га́ду и полпле́мени Манассі́ину.

И сі́и ца́рiе Аморре́йстiи, я́же изби́ Иису́съ и сы́нове Изра́илевы объ ону́ страну́ Иорда́на, при мо́ри Валга́дъ на по́ли Лива́на, и да́же до горы́ ало́къ, восходя́щихъ въ Сии́ръ: и даде́ ю́ Иису́съ племено́мъ Изра́илевымъ въ наслѣ́дiе по жре́бiю и́хъ,

на горѣ́ и на по́ли, и во а́равѣ и во Асидо́ѳѣ, и въ пусты́ни и во наге́вѣ, Хетте́а и Аморре́а, и Ханане́а и Ферезе́а, и Еве́а и Иевусе́а:

царя́ иерихо́нска и царя́ га́йска, и́же е́сть бли́зъ Веѳи́ля,

царя́ Иерусали́мска, царя́ Хевро́нска,

царя́ иериму́ѳска, царя́ лахи́сска,

царя́ егло́нска, царя́ газе́рска,

царя́ дави́рска, царя́ Гаде́рска,

царя́ ерма́ѳска, царя́ Аде́рска,

царя́ ле́внска, царя́ Одолла́мска,

царя́ маки́дска, царя́ Веѳи́лска,

царя́ апфу́ска, царя́ Офе́рска,

царя́ Афе́кска, царя́ хесаро́мска,

царя́ Самвро́нска, царя́ Фу́вска,

царя́ маро́нска, царя́ Ахса́фска,

царя́ Ѳана́хска, царя́ Магдедо́нска,

царя́ Кеде́сска, царя́ Иекона́ма херме́ла,

царя́ Адо́рска Нафеддо́ря,

царя́ гои́мска гелге́ля, царя́ Ѳерска́. Вси́ сі́и ца́рiе три́десять еди́нъ.

Иису́съ же состарѣ́ся проше́дъ дни́. И рече́ Госпо́дь ко Иису́су: ты́ состарѣ́лся еси́ де́нми, и земля́ оста́ся мно́га въ наслѣ́дiе:

и сiя́ земля́ оста́вшаяся: предѣ́лы Филисти́мли, гесури́ и Ханане́й,

от необита́емыя, я́же от лица́ Еги́пта да́же до предѣ́лъ аккаро́нскихъ ошу́юю Ханане́овъ, причисля́ется пяти́мъ о́бластемъ Филисти́мскимъ: газе́у и азо́тiю, и Аскалони́ту и Гетѳе́ю, и аккарони́ту и Еве́ю:

от Ѳема́нъ и все́й земли́ Ханаа́нстѣй пря́мо Га́зѣ, и Сидо́нiи да́же до Афе́ка, да́же до предѣ́лъ Аморре́йскихъ:

и всю́ зе́млю гавли́ Филисти́млю, и ве́сь Лива́нъ от восто́къ со́лнца, от Галга́лъ подъ горо́ю аермо́нъ да́же до вхо́да Ема́ѳъ:

вся́къ обита́ющiй въ го́рнѣй от Лива́на да́же до Масрефоѳмаи́ма, всѣ́хъ Сидо́нянъ а́зъ потреблю́ от лица́ Изра́илева: но разда́й ю́ во жре́бiй Изра́илю, я́коже заповѣ́дахъ тебѣ́:

и ны́нѣ раздѣли́ зе́млю сiю́ въ наслѣ́дiе девяти́ племено́мъ и полпле́мени Манассі́ину от Иорда́на да́же до мо́ря вели́каго, къ за́паду со́лнца да́си ю́: мо́ре вели́кое предѣ́лъ бу́детъ.

Дву́ же племено́мъ и полупле́мени Манассі́ину, Руви́му и га́ду, даде́ Моисе́й объ ону́ страну́ Иорда́на: къ восто́комъ со́лнца даде́ и́мъ Моисе́й ра́бъ Госпо́день,

от Арои́ра, и́же е́сть на у́стiи водоте́чи Арно́ни, и гра́дъ и́же посредѣ́ де́бри, и ве́сь Мисо́ръ от медава́на:

вся́ гра́ды сио́на царя́ Аморре́йска, и́же ца́рствова во есево́нѣ, да́же до предѣ́лъ сыно́въ Аммо́нихъ:

и Галаа́дъ, и предѣ́лы гесури́, и Махаѳи́, всю́ го́ру аермо́нъ, и всю́ Васани́тску до Елхи́:

все́ ца́рство о́гово въ Васани́тидѣ, и́же ца́рствова во Астаро́ѳѣ и во едраи́нѣ: се́й оста́ся [еди́нъ] от исполи́новъ, и уби́ его́ Моисе́й, и потреби́.

И не потреби́ша сы́нове Изра́илевы гесу́ра и Маха́ѳа и Ханане́а: и живя́ше ца́рь гесури́ и Махаѳи́ въ сынѣ́хъ Изра́илевыхъ да́же до сего́ дне́.

То́кмо пле́мени Леві́ину не даде́ся наслѣ́дiе: Госпо́дь Бо́гъ Изра́илевъ, са́мъ наслѣ́дiе и́хъ, я́коже рече́ и́мъ Госпо́дь. И сiе́ раздѣле́нiе, е́же раздѣли́ Моисе́й сыно́мъ Изра́илевымъ [по племено́мъ и́хъ] во Араво́ѳѣ Моа́вли объ ону́ страну́ Иорда́на проти́ву иерихо́на.

И даде́ Моисе́й пле́мени сыно́въ Руви́млихъ по со́нмомъ и́хъ:

и бы́ша и́мъ предѣ́лы от Арои́ра, и́же е́сть пря́мо де́бри Арно́нскiя, и гра́дъ, и́же е́сть въ де́бри Арно́нстѣй,

и всю́ зе́млю Мисо́рску да́же до есево́на, и вся́ гра́ды и́же су́ть въ Мисо́рѣ, и Дево́ръ, и вамо́ѳъ-ваа́лъ, и до́мы веелмо́ни,

и Иа́сса и Кедимо́ѳа и мифаа́ѳъ,

и карiаѳе́мъ и Севама́, и Са́рѳъ и Сiо́ръ на горѣ́ ена́къ,

и веѳфого́ръ и Асидо́ѳъ-фасга́ и Виѳсиму́ѳъ,

и вся́ гра́ды Мисо́рски, и все́ ца́рство сио́на царя́ Аморре́йска, его́же уби́ Моисе́й самаго́, и старѣ́йшины Мадiа́мли, и Еві́а и роко́ма, и Су́ра и у́ра и рове́ка, кня́зи Сiо́рскiя, и живу́щихъ на земли́ [то́й]:

и Валаа́ма сы́на Вео́рова волхва́ уби́ша мече́мъ сы́нове Изра́илевы въ сраже́нiи.

Бы́ша же предѣ́лы Руви́мли, Иорда́нъ предѣ́лъ. Сiе́ наслѣ́дiе сыно́въ Руви́млихъ по со́нмомъ и́хъ, гра́ды и́хъ и се́ла и́хъ.

Даде́ же Моисе́й сыно́мъ га́довымъ по со́нмомъ и́хъ,

и бы́ша и́мъ предѣ́лы Иази́ръ: вси́ гра́ди Галаа́ди и полземли́ сыно́въ Аммо́нихъ до Арои́ра, и́же е́сть предъ лице́мъ равва́ѳа:

и от есево́на до рамо́ѳа къ ма́сфѣ, и вотани́му, и Манаи́му до предѣ́лъ дави́ровыхъ,

и во Еме́кѣ Виѳара́мъ и Виѳнамра́, и сохо́ѳъ и Сафо́нъ, и про́чее ца́рство сио́на царя́ есево́нска: и Иорда́нъ опредѣля́етъ да́же до страны́ мо́ря хенере́ѳъ, объ ону́ страну́ Иорда́на от восто́къ.

Сiе́ наслѣ́дiе сыно́въ га́довыхъ по со́нмомъ и́хъ и по градо́мъ и́хъ и се́ламъ и́хъ.

И даде́ Моисе́й полупле́мени Манассі́ину по со́нмомъ и́хъ,

и бы́ша предѣ́лы и́хъ от Манаи́ма, и все́ ца́рство Васа́нско, и все́ ца́рство о́га царя́ Васа́нска, и вся́ ве́си Иаи́ра, я́же су́ть въ Васани́тидѣ, шестьдеся́тъ градо́въ:

и по́лъ Галаа́да, и во Астаро́ѳѣ, и во едраи́нѣ, гра́ды ца́рства о́гова въ Васани́тидѣ: и да́шася сыно́мъ Махи́ровымъ, сыно́мъ Манассі́инымъ, и полови́нѣ сыно́въ Махи́ровыхъ по со́нмомъ и́хъ.

Сі́и су́ть, и́мже даде́ наслѣ́дiе Моисе́й объ ону́ страну́ Иорда́на во Араво́ѳѣ Моа́вли, пря́мо иерихо́на на восто́ки.

Пле́мени же Леві́ину не даде́ Моисе́й наслѣ́дiя: поне́же са́мъ Госпо́дь Бо́гъ Изра́илевъ наслѣ́дiе его́ е́сть, я́коже глаго́ла и́мъ.

И сі́и наслѣ́довавшiи от сыно́въ Изра́илевыхъ въ земли́ Ханаа́нстѣй, и́мже раздѣли́ша ю́ въ наслѣ́дiе Елеаза́ръ жре́цъ и Иису́съ сы́нъ нави́нъ и кня́зи оте́чествъ племе́нъ сыно́въ Изра́илевыхъ:

по жре́биемъ наслѣ́диша, я́коже заповѣ́да Госпо́дь Моисе́омъ да́ти девяти́ племено́мъ и полпле́мени [манассі́ину],

даде́ бо Моисе́й наслѣ́дiе дву́ племено́мъ и полпле́мени Манассі́ину объ ону́ страну́ Иорда́на: леви́томъ же не даде́ жре́бiя въ ни́хъ:

зане́же бы́ша сы́нове Ио́сифовы два́ племена́, Манассі́ино и Ефре́мле: и не даде́ся ча́сти въ земли́ леви́томъ, но то́кмо гра́ды обита́ти, и предгра́дiя ското́мъ и́хъ, и скоты́ и́хъ.

Я́коже заповѣ́да Госпо́дь Моисе́ю, та́ко сотвори́ша сы́нове Изра́илевы и раздѣли́ша зе́млю.

И прiидо́ша сы́нове Иу́дины ко Иису́су въ Галга́лы. И рече́ къ нему́ хале́въ Иефонні́инъ Кенезе́й: ты́ вѣ́си сло́во, е́же глаго́ла Госпо́дь къ Моисе́ю человѣ́ку Бо́жiю о мнѣ́ и о тебѣ́ въ Ка́дисъ-варни́:

четы́редесяти бо лѣ́тъ бѣ́хъ, егда́ посла́ мя Моисе́й ра́бъ Госпо́день от Ка́дисъ-варни́ согля́дати зе́млю: и отвѣща́хъ ему́ сло́во по се́рдцу его́:

бра́тiя моя́ ходи́вшiи со мно́ю преврати́ша се́рдце люді́й, а́зъ же приложи́хся послѣ́довати Го́сподеви Бо́гу моему́:

и кля́тся Моисе́й въ то́й де́нь, глаго́ля: земля́, на ню́же возше́лъ еси́, тебѣ́ бу́детъ въ жре́бiй и ча́домъ твои́мъ во вѣ́къ, я́ко приложи́лся еси́ послѣ́довати Го́споду Бо́гу моему́:

и ны́нѣ препита́ мя Госпо́дь, я́коже рече́, сiе́ четы́редесять и пя́тое лѣ́то, отне́лѣже глаго́ла Госпо́дь сло́во сiе́ къ Моисе́ю, и хожда́ше Изра́иль въ пусты́ни: и ны́нѣ се́, ми́ дне́сь о́смьдесятъ и пя́ть лѣ́тъ:

еще́ е́смь дне́сь могі́й, я́коже егда́ посла́ мя Моисе́й: та́ко и ны́нѣ могу́ входи́ти и исходи́ти на бра́нь:

и ны́нѣ прошу́ у тебе́ горы́ сея́, я́коже рече́ Госпо́дь въ де́нь о́нъ, я́ко ты́ слы́шалъ еси́ сло́во сiе́ въ де́нь о́ный: ны́нѣ же енаки́ми та́мо су́ть, гра́ды тве́рды и вели́цы: а́ще у́бо бу́детъ Госпо́дь со мно́ю, потреблю́ и́хъ, я́коже рече́ ми Госпо́дь.

И благослови́ его́ Иису́съ, и даде́ Хевро́нъ хале́ву сы́ну Иефонні́ину, сы́ну Кенезе́ину въ жре́бiй.

Сего́ ра́ди бы́сть Хевро́нъ хале́ву Иефонні́ину Кенезе́ину въ жре́бiй да́же до дне́ сего́: поне́же возслѣ́дова повелѣ́нiю Го́спода Бо́га Изра́илева.

И́мя же Хевро́ну пре́жде бя́ше гра́дъ Арго́въ: митропо́ль енаки́млянъ се́й. И почи́ земля́ от бра́ни.

И бы́ша предѣ́лы сыно́въ Иу́диныхъ по со́нмомъ и́хъ, от предѣ́лъ Идуме́йскихъ, от пусты́ни Си́нъ къ Ли́ву да́же до Ка́дисъ къ ю́гу:

и бы́ша предѣ́лы и́хъ от полу́дне до ча́сти мо́ря сла́наго, от верха́ клоня́щагося къ ю́гу,

и прохо́дятъ пря́мо восхожде́нiю акравви́мъ, и обхо́дятъ сена́, и восхо́дятъ от ю́га до Ка́дисъ-варни́: и исхо́дятъ изъ Есро́на, и восхо́дятъ во Адда́ру, и исхо́дятъ на за́пады Ка́дисъ, обхо́дятъ аккарки́,

и исхо́дятъ во Асемо́ну, и прехо́дятъ да́же до де́бри Еги́петскiя: и бу́детъ исхо́дъ предѣ́ловъ его́ къ мо́рю. Сі́и су́ть предѣ́лы и́хъ от ю́га.

И предѣ́лы от восто́къ, все́ мо́ре сла́ное да́же до ча́сти Иорда́на, и предѣ́лы и́хъ къ сѣ́веру, и от верха́ мо́ря, и от ча́сти Иорда́нски:

восхо́дятъ предѣ́лы [ті́и] въ Виѳа́глу и прехо́дятъ от сѣ́вера къ веѳа́ру, и восхо́дятъ предѣ́лы къ ка́мени Вео́ра сы́на Руви́мля,

и восхо́дятъ предѣ́лы къ Деви́ру де́бри Ахо́ровы, и низхо́дятъ до Галга́лы, я́же е́сть пря́мо схожде́нiю Адомми́нъ, и́же е́сть къ ю́гу де́бри, и восхо́дитъ предѣ́лъ къ водѣ́ исто́чника со́лнечна, и бу́детъ исхо́дъ его́ исто́чникъ роги́ль:

и восхо́дятъ предѣ́лы въ де́брь енно́мъ, созади́ Иеву́са от полу́дне, се́й е́сть Иерусали́мъ: и исхо́дятъ предѣ́лы на ве́рхъ горы́, я́же е́сть предъ лице́мъ де́бри енно́мъ къ мо́рю, я́же е́сть от ча́сти земли́ Рафаи́нъ къ сѣ́веру:

и прехо́дитъ предѣ́лъ от верха́ горы́ ко исто́чнику воды́ Нафѳо́ и прехо́дитъ къ горѣ́ Ефро́ни, и изведе́тъ предѣ́лъ въ Ваа́лъ, се́й е́сть гра́дъ Иари́мъ:

и обы́детъ предѣ́лъ от Ваа́ла къ мо́рю и пре́йдетъ въ го́ру Сии́ръ, и пре́йдетъ созади́ гра́да Иари́ма от сѣ́вера, се́й е́сть хасало́нъ: и сни́детъ ко гра́ду со́лнечну и пре́йдетъ къ ю́гу:

и прехо́дитъ предѣ́лъ созади́ аккаро́на до сѣ́вера, и прехо́дятъ предѣ́лы въ сакхаро́нъ, и пре́йдутъ го́ру земли́ Валаа́ни, и прехо́дятъ ко Иавни́лу, и бу́детъ исхо́дъ предѣ́ловъ къ мо́рю, и предѣ́лы и́хъ от мо́ря, мо́ре вели́кое опредѣли́тъ.

Сі́и предѣ́лы сыно́въ Иу́диныхъ о́крестъ по со́нмомъ и́хъ.

И даде́ [иису́съ] хале́ву сы́ну Иефонні́ину ча́сть посредѣ́ сыно́въ Иу́диныхъ повелѣ́нiемъ Бо́жiимъ, и даде́ ему́ Иису́съ гра́дъ Арво́къ, отца́ ена́кова: се́й е́сть Хевро́нъ.

И потреби́ отту́ду хале́въ сы́нъ Иефонні́инъ три́ сы́ны ена́ковы, сусі́а и Ѳолмаи́ и Ахима́:

и взы́де отту́ду хале́въ на живу́щихъ въ дави́рѣ: и́мя же пре́жде бя́ше дави́ру гра́дъ пи́сменъ.

И рече́ хале́въ: и́же а́ще во́зметъ кто́ гра́дъ пи́сменъ и возоблада́етъ и́мъ, да́мъ ему́ Асха́нь дще́рь мою́ въ жену́.

И взя́ его́ Гоѳонiи́лъ сы́нъ Кене́за, бра́та хале́вова, юнѣ́йшiй: и даде́ ему́ Асха́нь дще́рь свою́ въ жену́.

И бы́сть внегда́ отходи́ти е́й, и совѣща́ съ ни́мъ, глаго́лющи: попрошу́ у отца́ моего́ села́. И воззва́ со осля́ти. И рече́ е́й хале́въ: что́ ти е́сть?

И рече́ ему́: да́ждь ми́ благослове́нiе, я́ко въ зе́млю полу́денную отда́лъ еси́ мя́: да́ждь ми́ Гола́ѳъ-маи́мъ. И даде́ е́й хале́въ Гола́ѳъ-маи́мъ вы́шнiй и Гола́ѳъ ни́жнiй.

Сiе́ наслѣ́дiе пле́мене сыно́въ Иу́диныхъ по со́нмомъ и́хъ:

бы́ша же гра́ди и́хъ гра́ди пле́мене сыно́въ Иу́диныхъ къ предѣ́ломъ Едо́млимъ въ пусты́ни, кавсеи́лъ и едраи́мъ и Иагу́ръ,

и кина́ и димона́ и Адада́,

и Кеде́съ и Асо́ръ и Иѳнакси́фъ,

и теле́мъ и Вало́ѳъ,

и Асо́ръ но́вый и гра́дъ Асеро́мъ [се́й е́сть Асо́ръ]:

Ама́мъ и самаа́ и модада́,

и Асергадда́ и веѳфале́ѳъ,

и Асарсула́ и вирсавее́ [и се́ла и́хъ и предгра́дiя и́хъ]:

и Ваала́ и ави́мъ и Асе́мъ,

и Елѳола́дъ и хеси́лъ и ерма́,

и Сикеле́гъ и ведевина́ и сансанна́,

и Лаво́ѳъ и селеи́мъ, и Аи́нъ и реммо́нъ: всѣ́хъ градо́въ два́десять и де́вять, и се́ла и́хъ.

Въ напо́льнѣй, есѳао́лъ и сараа́, и Асна́ [и раме́нъ],

и зано́ и ингони́мъ, и Ѳаффуа́ и инаи́мъ,

и иериму́ѳъ и Одолла́мъ, [и немра́] и сохо́ и азика́,

и сагари́мъ и Адiаѳаи́мъ, и га́дира и се́ла ея́: гра́ди четырена́десять и ве́си и́хъ.

Сенна́мъ и Адаса́ и Магдалга́дъ,

и далаа́нъ и Масфа́ и Иекѳаи́лъ,

и лахи́съ и Васха́ѳъ и егло́мъ,

и хавво́нъ и лама́съ и хаѳло́съ,

и гадиро́ѳъ и ви́ѳъ-даго́нъ, и нома́ и макида́: гра́ди шестьна́десять и ве́си и́хъ.

Левна́ и Аѳе́ръ и Аса́нъ,

и Иефѳа́ и Асенна́ и неси́въ,

и кеила́ и Ахзе́въ, и мариса́ [и Едо́мъ]: гра́ди де́вять и ве́си и́хъ.

Аккаро́нъ и се́ла его́ и предгра́дiя его́.

[И] от аккаро́на, Иемне́ и вси́ ели́ки су́ть бли́зъ Асдо́ѳа, и ве́си и́хъ:

Асдо́ѳъ и ве́си его́ и предгра́дiя его́: Га́за и ве́си ея́ и предгра́дiя ея́, да́же до водоте́чи Еги́петскiя, и мо́ре вели́кое опредѣля́етъ.

И въ го́рнѣй, Сафи́ръ и Иеѳе́ръ и сохо́,

и ренна́, гра́дъ пи́сменъ [се́й е́сть дави́ръ],

и Ано́въ и есѳемо́ и Ани́мъ,

и госо́мъ и хилуо́нъ и гило́нъ: градо́въ единона́десять и ве́си и́хъ.

Ере́въ и еса́нъ и рума́,

и иану́мъ и ве́ѳъ-ѳапфуе́ и Афака́,

и хаммата́ и гра́дъ Арво́ [се́й е́сть Хевро́нъ] и Сiо́ръ: градо́въ де́вять и се́ла и́хъ.

Мао́нъ и херме́лъ, и зи́фъ и Иетта́,

и Иездрае́ль и Иекдаа́мъ и зано́,

аки́мъ и гаваа́ и Ѳамна́: гра́ди де́сять и ве́си и́хъ.

Алу́лъ и веѳсу́ръ и гедо́ръ,

и маро́ѳъ и веѳано́нъ и Елѳеке́нъ: гра́ди ше́сть и ве́си и́хъ:

Ѳеко́ и Ефраѳа́ [се́й е́сть Виѳлее́мъ]: и фаго́ръ и ета́мъ, и куло́нъ и татами́, и сори́съ и каре́мъ, и Галли́мъ и веѳи́ръ и манохо́: градо́въ единона́десять и ве́си и́хъ.

Карiа́ѳъ-ваа́лъ [се́й гра́дъ Иари́мъ] и Аревва́: гра́ди два́, и се́ла и́хъ и предгра́дiя и́хъ.

Ваддарги́съ и Виѳарава́, [и] Мадо́нъ и сохоха́,

и невса́нъ и гра́дъ со́ли и ингадди́: гра́ди ше́сть и ве́си и́хъ.

И Иевусе́й обита́ше во Иерусали́мѣ, и не возмого́ша сы́нове Иу́дины погуби́ти и́хъ: и обита́ша Иевусе́е съ сынми́ Иу́диными во Иерусали́мѣ да́же до дне́ о́наго.

И бы́ша предѣ́лы сыно́въ Ио́сифовыхъ от Иорда́на и́же ко иерихо́ну от восто́къ, и восхо́дятъ от иерихо́на въ го́рную пусты́ню въ Веѳи́ль,

и исхо́дятъ от Веѳи́ля въ Лу́зу, и прехо́дятъ къ предѣ́ломъ Ахiатаро́ѳа:

и пре́йдутъ къ мо́рю къ предѣ́ломъ Иефалти́мскимъ, да́же до предѣ́лъ веѳоро́на ни́жняго и да́же до газе́ра, и бу́детъ исхо́дъ и́хъ къ мо́рю.

И наслѣ́дствоваша сы́нове Ио́сифовы Ефре́мъ и Манассі́й,

и бы́ша предѣ́лы сыно́въ Ефре́млихъ по со́нмомъ и́хъ: и бы́ша предѣ́лы наслѣ́дiя и́хъ от восто́къ атаро́ѳъ и Ада́ръ, да́же до веѳоро́на вы́шняго и газа́ры,

и прехо́дятъ предѣ́лы къ мо́рю въ Махѳо́ѳъ от сѣ́вера, и и́дутъ на восто́къ во Ѳина́ѳъ-сило́мъ, и пре́йдутъ от восто́къ во Ианоха́,

и от Ианоха́ сни́дутъ во атаро́ѳъ и въ Наараѳа́ и ве́си и́хъ: и прихо́дятъ ко иерихо́ну и исхо́дятъ ко Иорда́ну,

и от тапфу́ по́йдутъ предѣ́лы къ мо́рю къ водоте́чи кана́, и бу́детъ исхо́дъ его́ къ мо́рю. Сiе́ наслѣ́дiе пле́мене сыно́въ Ефре́млихъ по со́нмомъ и́хъ.

И гра́ды отлуче́нныя сыно́мъ Ефре́млимъ посредѣ́ наслѣ́дiя сыно́въ Манассі́иныхъ, вси́ гра́ди и ве́си и́хъ.

И не погуби́ Ефре́мъ Ханане́а живу́щаго въ газе́рѣ: и обита́ша Ханане́е посредѣ́ Ефре́ма, даю́ще ему́ да́ни до дне́шняго дне́, до́ндеже взы́де фарао́нъ ца́рь Еги́петскiй, и взя́ гра́дъ, и запали́ его́ огне́мъ: и Ханане́евъ и Ферезе́евъ и живу́щихъ въ газе́рѣ избодо́ша: и даде́ его́ фарао́нъ въ вѣ́но дще́ри свое́й.

И бы́ша предѣ́лы пле́мене сыно́въ Манассі́иныхъ, я́ко се́й пе́рвенецъ Ио́сифу, Махи́рови пе́рвенцу Манассі́ину, отцу́ Галаа́дову, [се́й бо бы́сть му́жъ хра́бръ] въ Галаади́тидѣ и Васани́тидѣ.

И бы́ша сыно́мъ Манассі́инымъ про́чымъ по со́нмомъ и́хъ: сыно́мъ Ахiезе́ровымъ и сыно́мъ еле́ковымъ и сыно́мъ Есрiи́левымъ, и сыно́мъ сехе́мовымъ и сыно́мъ семiрае́ловымъ и сыно́мъ Офе́ровымъ: сі́и су́ть сы́нове Манассі́ины, сы́на Ио́сифова, му́жескъ по́лъ по племено́мъ свои́мъ.

И Салпаа́ду сы́ну Офе́рову, сы́на Галаа́дова, сы́на Махи́рова, сы́на Манассі́ина, не бы́ша сы́ны, но то́кмо дще́ри: и сiя́ имена́ дще́ремъ Салпаа́довымъ: маала́ и нуа́, и егла́ и Мелха́ и Ѳерса́.

И ста́ша предъ Елеаза́ромъ жерце́мъ и предъ Иису́сомъ сы́номъ нави́нымъ и предъ кня́зи, глаго́лющя: Бо́гъ заповѣ́да руко́ю Моисе́овою да́ти на́мъ наслѣ́дiе посредѣ́ бра́тiи на́шея. И даде́ся и́мъ наслѣ́дiе повелѣ́нiемъ Госпо́днимъ, жре́бiй въ бра́тiи отца́ и́хъ.

И паде́ жре́бiй Манассі́ю по́ле Лаве́ково кромѣ́ земли́ Галаа́довы и Васа́ни, я́же е́сть объ ону́ страну́ Иорда́на,

поне́же дще́ри сыно́въ Манассі́иныхъ наслѣ́диша жре́бiй посредѣ́ бра́тiй свои́хъ: земля́ же Галаа́дова бы́сть сыно́мъ Манассі́инымъ про́чымъ.

И бы́ша предѣ́лы сыно́въ Манассі́иныхъ от Аси́ръ-махѳо́ѳа, и дана́ѳъ, я́же е́сть предъ лице́мъ Cихе́ма, и и́дутъ предѣ́лы на Иами́нъ и на Иаси́фъ ко исто́чнику Ѳафѳо́ѳъ.

Манассі́ю бу́детъ земля́ Ѳафѳо́ѳъ: и Ѳафѳо́ѳъ надъ предѣ́лы Манассі́иными сыно́мъ Ефре́млимъ:

и сни́дутъ предѣ́лы къ де́бри кана́ на ю́гъ по де́бри Иари́мъ: тереви́нѳъ Ефре́му посредѣ́ гра́да Манассі́ина. И предѣ́лы Манассі́ины къ сѣ́веру на водоте́чь, и бу́детъ исхо́дъ его́ мо́ре:

от ю́га Ефре́му, и къ сѣ́веру Манассі́и, и бу́детъ мо́ре предѣ́лъ и́мъ: и ко Аси́ру совокупя́тся къ сѣ́веру, и Иссаха́ру от восто́къ.

И бу́детъ Манассі́ю [предѣ́лъ] между́ Иссаха́ромъ и между́ Аси́ромъ веѳса́нъ и ве́си и́хъ, и Иевлаа́мъ и ве́си его́, и живу́щыя въ до́рѣ и ве́си его́, и живу́щыя въ ендо́рѣ и ве́си его́, и живу́щыя въ Маге́ддѣ и ве́си его́, и живу́щыя въ тана́хѣ и ве́си его́, и тре́тiя ча́сть Нафе́ѳа и ве́си его́.

И не возмого́ша сы́нове Манассі́ины потреби́ти градо́въ си́хъ: и нача́ Ханане́й жи́ти въ земли́ се́й.

И бы́сть егда́ укрѣпи́шася сы́нове Изра́илевы, и сотвори́ша Ханане́овъ послу́шныхъ, потребле́нiемъ же не потреби́ша и́хъ.

Противорѣ́ша же сы́нове Ио́сифовы Иису́су, глаго́люще: почто́ наслѣ́дствовалъ еси́ на́съ жре́бiемъ еди́нымъ и у́жемъ еди́нымъ? а́зъ же лю́дъ мно́гъ е́смь, и благослови́ мя Бо́гъ [да́же досе́лѣ].

И рече́ и́мъ Иису́съ: а́ще лю́дъ мно́гъ еси́, взы́ди въ дубра́ву и отреби́ себѣ́ та́мо мѣ́сто въ земли́ Ферезе́а и Рафаи́ма, а́ще утѣсня́етъ тя́ гора́ Ефре́мля.

И рѣ́ша сы́нове Ио́сифовы: не дово́лно на́мъ горы́ Ефре́мли: и ко́нь преизбра́нный и желѣ́зо всему́ Ханане́ю живу́щему въ земли́ Еме́къ, въ веѳса́нѣ и въ ве́сехъ ея́, и во юдо́лѣ Иезрае́ль.

И рече́ Иису́съ къ сыно́мъ Ио́сифовымъ, Ефре́му и Манассі́ю, глаго́ля: а́ще лю́дъ мно́гъ еси́ и си́лу вели́ку и́маши, не бу́детъ ти́ жре́бiй еди́нъ:

зане́ дубра́ва бу́детъ тебѣ́, поне́же дубра́ва е́сть, и отреби́ши ю́, и бу́детъ тебѣ́, и концы́ ея́, егда́ потреби́ши Ханане́а, а́ще ко́нь преизбра́нный ему́ е́сть: [и са́мъ си́ленъ,] ты́ бо преси́лиши его́.

И собра́ся ве́сь со́нмъ сыно́въ Изра́илевыхъ въ Сило́мъ, и водрузи́ша та́мо ски́нiю свидѣ́нiя: и земля́ одержа́ся от ни́хъ.

И оста́шася сы́нове Изра́илевы, и́же не наслѣ́диша наслѣ́дiя своего́ се́дмь племе́нъ.

И рече́ Иису́съ сыно́мъ Изра́илевымъ: доко́лѣ вы́ разслабля́етеся вни́ти наслѣ́дити зе́млю, ю́же даде́ ва́мъ Госпо́дь Бо́гъ оте́цъ ва́шихъ?

да́йте от ва́съ по три́ му́жы от пле́мене, и послю́ и́хъ, и воста́вше да про́йдутъ зе́млю и да опи́шутъ ю́ предо мно́ю, я́коже е́сть лѣ́по раздѣли́ти ю́. И прiидо́ша къ нему́.

И раздѣли́ и́мъ на се́дмь часте́й: Иу́да да поста́витъ предѣ́лъ свои́мъ от Ли́ва, и сы́нове Ио́сифли да поста́вятъ предѣ́лъ свои́мъ от сѣ́вера:

вы́ же раздѣли́те зе́млю на се́дмь часте́й, и принеси́те ко мнѣ́ сѣ́мо, и изнесу́ ва́мъ жре́бiй предъ Го́сподемъ Бо́гомъ ва́шимъ:

нѣ́сть бо ча́сти у ва́съ сыно́мъ Леві́инымъ, зане́ жре́чество Госпо́дне ча́сть и́хъ: га́дъ же и Руви́мъ и полпле́мене Манассі́ина взя́ша наслѣ́дiе свое́ объ ону́ страну́ Иорда́на на восто́ки, е́же даде́ и́мъ Моисе́й ра́бъ Госпо́день.

И воста́вше му́жiе поидо́ша. И заповѣ́да Иису́съ муже́мъ иду́щымъ описа́ти зе́млю, глаго́ля: иди́те и обыди́те зе́млю, и опиши́те ю́, и прiиди́те ко мнѣ́, и изнесу́ ва́мъ здѣ́ жре́бiй предъ Го́сподемъ въ Сило́мѣ.

И идо́ша му́жiе, и обыдо́ша зе́млю и согля́даша ю́, и описа́ша ю́ по градо́мъ ея́ на се́дмь часте́й въ кни́гу, и принесо́ша ко Иису́су въ по́лкъ въ Сило́мъ.

И ве́рже и́мъ Иису́съ жре́бiй предъ Го́сподемъ въ Сило́мѣ: и раздѣли́ та́мо зе́млю Иису́съ сыно́мъ Изра́илевымъ по раздѣле́нiю и́хъ.

И изы́де жре́бiй пле́мене сыно́въ Венiами́новыхъ пе́рвый по со́нмомъ и́хъ: и изыдо́ша предѣ́лы жре́бiя и́хъ посредѣ́ сыно́въ Иу́диныхъ и посредѣ́ сыно́въ Ио́сифовыхъ.

И бы́ша предѣ́лы и́хъ от сѣ́вера: от Иорда́на взы́дутъ предѣ́лы созади́ иерихо́на къ сѣ́веру и взы́дутъ къ горѣ́ къ мо́рю, и бу́детъ исхо́дъ его́ мавдари́тъ веѳа́внъ:

и про́йдутъ отту́ду предѣ́лы лу́зы созади́ лу́зы от ю́га: сiя́ е́сть Веѳи́ль: и сни́дутъ предѣ́лы сі́и от атаро́ѳъ-адда́ръ на го́рную, я́же е́сть къ Ли́ву веѳоро́нъ ни́жнiй,

и пре́йдутъ предѣ́лы, и обы́дутъ къ странѣ́ зря́щи къ мо́рю от Ли́вы, от горы́ къ лицу́ веѳоро́нъ Ли́ва, и бу́детъ исхо́дъ его́ въ карiа́ѳъ-ваа́лъ: се́й е́сть карiаѳiари́мъ, гра́дъ сыно́въ Иу́диныхъ. Сiя́ е́сть ча́сть я́же къ мо́рю.

И ча́сть я́же къ Ли́ву от ча́сти карiа́ѳъ-ваа́лъ: и про́йдутъ предѣ́лы морскі́я въ гаи́нъ, на исто́чникъ воды́ Нафѳо́новы,

и сни́дутъ предѣ́лы на страну́ горы́, я́же е́сть предъ лице́мъ дубра́вы, сы́на ено́ма, я́же е́сть от ча́сти Еме́къ Рафаи́нъ от сѣ́вера, и сни́дутъ къ геенно́му созади́ Иеву́са от ю́га, и сни́дутъ на исто́чникъ роги́ль,

и про́йдутъ сквозѣ́ от сѣ́вера, и про́йдутъ на исто́чникъ саме́са, и про́йдутъ на Галило́ѳъ, и́же е́сть пря́мо къ восхо́ду Едоми́мъ: и сни́дутъ на ка́мень Ваа́нъ сыно́въ Руви́млихъ,

и про́йдутъ созади́ веѳара́вы от сѣ́вера, и сни́дутъ ко а́равѣ,

и сни́дутъ съ а́равы [на] предѣ́лы созади́ веѳагла́ от сѣ́вера, и бу́детъ исхо́дъ предѣ́ловъ на хо́лмъ мо́ря сла́наго от сѣ́вера въ страну́ Иорда́нову от Ли́вы. Сі́и предѣ́лы су́ть от ю́га: и Иорда́нъ опредѣли́тъ ю́ от страны́ восто́ка.

Сiе́ наслѣ́дiе сыно́въ Венiами́новыхъ, предѣ́лы его́ о́крестъ по со́нмомъ и́хъ.

И бы́ша гра́ды пле́мене сыно́въ Венiами́новыхъ по со́нмомъ и́хъ, иерихо́ и Виѳагла́ и Амеккаси́съ,

и веѳарава́ и семри́мъ и Виѳи́лъ,

и ави́мъ и Афара́, и Афра́ [и екаре́нъ],

и кафирамми́нъ и Афни́ и гаваа́: гра́ды двана́десять и ве́си и́хъ:

гавао́нъ и рама́ и виро́ѳъ,

и Масфа́ и хефира́ и Амоса́,

и реке́мъ и иерфаи́лъ и Ѳарала́,

и силале́фъ и Иеву́съ [се́й е́сть Иерусали́мъ], и гаваа́ѳъ и гра́дъ Иари́мъ: гра́ды трина́десять и ве́си и́хъ. Сiе́ наслѣ́дiе сыно́въ Венiами́новыхъ по со́нмомъ и́хъ.

И изы́де вторы́й жре́бiй Симео́ну, пле́мени сыно́въ Симео́новыхъ по со́нмомъ и́хъ, и бы́сть наслѣ́дiе и́хъ посредѣ́ жре́бiя сыно́въ Иу́диныхъ.

И бы́сть жре́бiй и́хъ вирсавее́ и Савее́ и молада́,

и Асерсуа́лъ и ваѳу́лъ, и велвола́ и Асо́мъ,

и Елѳула́дъ и ерма́,

и секела́гъ и веѳаммаргасво́ѳъ, и Асерсуси́мъ

и веѳалва́ѳъ, и се́ла и́хъ: гра́ды трина́десять и ве́си и́хъ.

Аи́нъ и реммо́ѳъ, и ееѳе́ръ и Аса́мъ, гра́ды четы́ри и ве́си и́хъ:

и вся́ предгра́дiя, я́же о́крестъ градо́въ си́хъ да́же до Ваалѳерирраммо́ѳъ, иду́щихъ во Иаме́ѳъ къ Ли́ву. Сiе́ наслѣ́дiе племе́нъ сыно́въ Симео́новыхъ по со́нмомъ и́хъ.

От жре́бiя Иу́дина наслѣ́дiе пле́мене сыно́въ Симео́новыхъ, я́ко бы́сть ча́сть сыно́въ Иу́диныхъ бо́лшая не́жели и́хъ: и наслѣ́диша сы́нове Симео́новы посредѣ́ жре́бiя и́хъ.

И изы́де жре́бiй тре́тiй Завуло́ну по со́нмомъ и́хъ: и бу́дутъ предѣ́лы наслѣ́дiя и́хъ до сари́да:

и восхо́дятъ предѣ́лы и́хъ къ мо́рю и Марилѣ́, и до́йдутъ къ давасе́ѳу, и сни́дутся въ де́брь, я́же е́сть къ лицу́ Иекна́ма,

и обратя́тся от сари́да проти́ву от восто́ковъ саме́съ на предѣ́лы хасало́ѳъ-ѳаво́ръ, и про́йдутъ къ давра́ѳу, и взы́дутъ къ Иафаги́:

и отту́ду обы́дутъ супроти́въ на восто́ки въ геѳаефе́ръ, во гра́дъ каси́мъ, и про́йдутъ на реммона́мъ маѳари́мъ Аннуа́,

и обы́дутъ предѣ́лы къ сѣ́веру на еннаѳо́ѳъ, и бу́детъ исхо́дъ и́хъ къ га́ю Иефѳаи́лъ,

и катта́ѳъ и Наало́лъ, и семро́нъ и Иадила́ и Виѳлее́мъ: гра́ды двана́десять и ве́си и́хъ.

Сiе́ наслѣ́дiе пле́мене сыно́въ Завуло́новыхъ по со́нмомъ и́хъ, гра́ды и́хъ и ве́си и́хъ.

И Иссаха́ру изы́де жре́бiй четве́ртый, сыно́мъ Иссаха́ровымъ по сродство́мъ и́хъ,

и бы́ша предѣ́лы и́хъ Иезрае́ль и Ахасело́ѳъ и суна́мъ,

и Аферари́мъ и Сiа́нъ, [и рена́ѳъ] и Анахаре́ѳъ,

и равво́ѳъ и кесiо́нъ и аеме́,

и рама́ѳъ и инганни́мъ, и инадда́ и веѳфаси́съ:

и сни́дутся предѣ́лы къ Ѳаво́ру и къ сасима́ѳу къ мо́рю, и веѳсма́съ, и бу́детъ его́ исхо́дъ предѣ́лъ Иорда́нъ: гра́ды шестьна́десять и ве́си и́хъ.

Сiе́ наслѣ́дiе пле́мене сыно́въ Иссаха́ровыхъ по со́нмомъ и́хъ, гра́ды и предгра́дiя и́хъ.

И изы́де жре́бiй пя́тый пле́мене сыно́въ Аси́ровыхъ по со́нмомъ и́хъ,

и бы́ша предѣ́лы и́хъ хелка́ѳъ и ооли́, и ватне́ и Ахса́фъ,

и Елиме́лехъ и Ама́дъ и Маса́лъ: и прибли́жатся къ карми́лу къ мо́рю, и Сiо́ру и Лавана́ѳу,

и обратя́тся от восто́къ со́лнца въ ви́ѳъ-даго́нъ, и прибли́жатся къ Завуло́ну, и въ га́й Иефѳаи́лъ къ сѣ́веру, [и вни́дутъ предѣ́лы Асаѳа́] въ ви́ѳъ-аеме́къ, и да и́дутъ по доли́нѣ Анiи́ла, и про́йдутъ въ хаво́лъ ошу́юю,

и Ахра́нъ и роо́въ, и Аммо́нъ и кана́, да́же до Сидо́на вели́каго:

и возвратя́тся предѣ́лы въ раму́, и да́же до гра́да тве́рда тирі́анъ, и возвратя́тся предѣ́лы до сусы́, и бу́детъ исхо́дъ его́ мо́ре, и от у́жа въ Ахзи́фъ,

и Амма́ и Афе́къ и рао́въ: гра́ды два́десять два́ и ве́си и́хъ.

Сiе́ наслѣ́дiе пле́мене сыно́въ Аси́ровыхъ по со́нмомъ и́хъ, гра́ды и́хъ и ве́си и́хъ.

И Нефѳали́му изы́де жре́бiй шесты́й, сыно́мъ Нефѳали́млимъ по со́нмомъ и́хъ,

и бы́ша предѣ́лы и́хъ мееле́фъ и мило́нъ, и весенани́мъ и Арме́, и наке́въ и Иавни́лъ, да́же до лакку́нъ: и бы́ша исхо́ди и́хъ Иорда́нъ:

и возвратя́тся предѣ́лы къ мо́рю въ азано́ѳъ-ѳаво́ръ, и про́йдутъ отту́ду во ико́къ, и при́ткнутся къ Завуло́ну от ю́га, и Аси́ру прибли́жатся къ мо́рю, и ко Иу́дѣ Иорда́нъ от восто́къ со́лнца.

И гра́ды огражде́ни тирі́анъ, ти́ръ и Ама́ѳъ, и рекка́ѳъ и хенеро́ѳъ,

и Адами́ и рама́ и Асо́ръ,

и Кеде́съ и едраи́ и исто́чникъ Асо́ръ,

и Иарiо́нъ и Магдалiи́лъ, ора́нъ и веѳана́ѳъ и Ѳасму́съ: гра́ды девятьна́десятъ и ве́си и́хъ.

Сiе́ наслѣ́дiе пле́мене сыно́въ Нефѳали́млихъ по сро́дству и́хъ, гра́ды и предгра́дiя и́хъ.

И да́ну и пле́мени сыно́въ да́новыхъ по со́нмомъ и́хъ изы́де жре́бiй седмы́й,

и бы́ша предѣ́лы и́хъ сараа́ и есѳао́лъ и гра́ды саме́съ,

и Салами́нь и еало́нъ и Иеѳла́,

и Ело́нъ и Ѳамна́ и аккаро́нъ,

и Елѳеко́ и гаваѳо́нъ и Вааѳо́ѳъ,

и иу́ѳъ и ванивара́къ и геѳреммо́нъ,

и от мо́ря иерако́нска, и Ира́кконъ, предѣ́лъ бли́зъ Ио́ппы, и изы́де предѣ́лъ сыно́въ да́новыхъ от ни́хъ.

И изыдо́ша сы́нове Да́новы и воева́ша Ласе́мъ, и взя́ша его́ и порази́ша его́ о́стрiемъ меча́: и обита́ша въ не́мъ, и нареко́ша и́мя его́ Ласенда́нъ, по и́мени Да́на отца́ своего́.

И Аморре́й оста́ся жи́ти во Ело́мѣ и въ Салами́нѣ: и отяготѣ́ рука́ Ефре́мля на ни́хъ, и бы́ша и́мъ да́нницы.

Сiе́ наслѣ́дiе пле́мене сыно́въ да́новыхъ по со́нмомъ и́хъ, гра́ды и́хъ и ве́си и́хъ.

И не истреби́ша сы́нове Да́новы Аморре́а озлобля́ющаго и́хъ на горѣ́, и не дая́ху и́мъ Аморре́е исходи́ти на юдо́ль, и утѣсни́ша от ни́хъ предѣ́лъ ча́сти и́хъ.

И соверши́ша раздѣля́ти зе́млю въ предѣ́лѣхъ ея́: и да́ша сы́нове Изра́илевы жре́бiй Иису́су сы́ну нави́ну повелѣ́нiемъ Госпо́днимъ средѣ́ себе́,

и да́ша ему́ гра́дъ, его́же проси́, Ѳамна́ѳъ-сараи́, и́же е́сть въ горѣ́ Ефраи́мъ: и созда́ гра́дъ, и всели́ся въ не́мъ.

Сiя́ раздѣле́нiя, я́же раздѣли́ша Елеаза́ръ жре́цъ и Иису́съ нави́нъ и кня́зи оте́чествъ въ племенѣ́хъ Изра́илевыхъ по жре́бiямъ въ Сило́мѣ предъ Го́сподемъ, у две́рiй ски́нiи свидѣ́нiя. И сконча́ша дѣли́ти зе́млю.

И рече́ Госпо́дь ко Иису́су, глаго́ля:

рцы́ сыно́мъ Изра́илевымъ, глаго́ля: дади́те гра́ды убѣже́нiй, я́же реко́хъ къ ва́мъ Моисе́омъ:

убѣ́жище убі́йцѣ порази́вшему ду́шу нево́лею: и бу́дутъ ва́мъ гра́ды убѣ́жище, и не у́мретъ убі́йца от у́жика кро́ве, до́ндеже предста́нетъ предъ со́нмомъ на су́дъ.

И [а́ще кто́] убѣ́гнетъ во еди́нъ от градо́въ си́хъ, и ста́нетъ во вратѣ́хъ гра́да, и исповѣ́сть во у́ши ста́рцемъ гра́да того́ словеса́ своя́: и прiи́мутъ его́ со́нмъ къ себѣ́, и дадя́тъ ему́ мѣ́сто жи́ти съ ни́ми:

и егда́ пожене́тъ у́жикъ кро́ве вслѣ́дъ его́, и не даду́тъ уби́вшаго въ ру́цѣ его́: я́ко не вѣ́дый уби́ бли́жняго своего́ и не ненави́дя то́й его́ от вчера́ и тре́тiяго дне́:

и да всели́тся въ то́й гра́дъ, до́ндеже ста́нетъ предъ лице́мъ со́нма на су́дъ, и до́ндеже у́мретъ жре́цъ вели́кiй, и́же бу́детъ въ ты́я дни́: тогда́ да обрати́тся убі́йца, и вни́детъ во гра́дъ сво́й и въ до́мъ сво́й, и во гра́дъ, отню́дуже избѣже́.

И отдѣли́ша Кеде́съ въ Галиле́и, въ горѣ́ Нефѳали́мли, и Cихе́мъ въ горѣ́ Ефре́мли, и гра́дъ Арво́ [се́й е́сть Хевро́нъ] въ горѣ́ Иу́дѣ:

и объ ону́ страну́ Иорда́на ко иерихо́ну на восто́къ, да́ша Восо́ръ въ пусты́ни въ по́ли от пле́мене Руви́мля, и рамо́ѳъ въ Галаа́дѣ от пле́мене га́дова, и Гола́нъ въ Васани́тидѣ от пле́мене Манассі́ина:

сі́и гра́ды избра́ны бы́ша всѣ́мъ сыно́мъ Изра́илевымъ и прише́лцу прилежа́щему въ ни́хъ, е́же убѣжа́ти та́мо вся́кому убива́ющему ду́шу нево́лею, да не у́мретъ от руку́ у́жика кро́ве, до́ндеже ста́нетъ предъ со́нмомъ на су́дъ.

И прiидо́ша старѣ́йшины оте́чествъ сыно́въ Леві́иныхъ къ Елеаза́ру жерцу́ и ко Иису́су сы́ну нави́ну и къ старѣ́йшинамъ оте́чествъ от племе́нъ сыно́въ Изра́илевыхъ,

и рѣ́ша къ ни́мъ въ Сило́мѣ въ земли́ Ханаа́ни, глаго́люще: заповѣ́да Госпо́дь руко́ю Моисе́овою да́ти на́мъ гра́ды е́же обита́ти, и окре́стная и́хъ предгра́дiя ското́мъ на́шымъ.

И да́ша сы́нове Изра́илевы леви́томъ от уча́стiй свои́хъ по повелѣ́нiю Госпо́дню гра́ды сiя́ и окре́стная предгра́дiя и́хъ.

И изы́де жре́бiй со́нму Каа́ѳову, и бы́сть сыно́мъ Ааро́нимъ жерце́мъ леви́томъ от пле́мене Иу́дина и от пле́мене Симео́ня и от пле́мене Венiами́ня по жре́биемъ гра́ды трина́десять:

и сыно́мъ Каа́ѳовымъ оста́вшымся от [сро́дства] пле́мене Ефре́мова и от пле́мене да́нова и от полупле́мене Манассі́ина по жре́бiю гра́ды де́сять:

и сыно́мъ Гирсо́нимъ от пле́мене Иссаха́рова и от пле́мене Аси́рова, и от пле́мене Нефѳали́мля и от полупле́мене Манассі́ина [е́же] въ Васа́нѣ, по жре́бiю гра́ды трина́десять:

и сыно́мъ Мера́ринымъ по со́нмомъ и́хъ, от пле́мене Руви́мля и от пле́мене га́дова и от пле́мене Завуло́ня, по жре́бiю гра́ды двана́десять.

И да́ша сы́нове Изра́илевы леви́томъ гра́ды сiя́ и окре́стная и́хъ, я́коже заповѣ́да Госпо́дь Моисе́ю, по жре́бiю.

И даде́ пле́мя сыно́въ Иу́диныхъ и пле́мя сыно́въ Симео́новыхъ и пле́мя сыно́въ Венiами́новыхъ гра́ды сiя́: и нареко́ша по и́мени.

И бы́ша сыно́мъ Ааро́новымъ от со́нма Каа́ѳова сыно́въ Леві́иныхъ, я́ко си́мъ бы́сть жре́бiй пе́рвый.

И даде́ и́мъ карiаѳарво́къ, митропо́ль сыно́въ ена́ковыхъ [се́й е́сть Хевро́нъ въ горѣ́ Иу́динѣ], и окре́стная и́хъ.

И се́ла гра́да [сего́] и ве́си его́ даде́ Иису́съ хале́ву сы́ну Иефонні́ину во обдержа́нiе его́.

И сыно́мъ Ааро́на жерца́ даде́ гра́дъ убѣ́жище уби́вшему Хевро́нъ и отлуче́нная я́же къ нему́:

и левну́ и отлуче́нная я́же къ не́й: и Иеѳе́ръ и отлуче́нная я́же къ нему́: и есѳемо́ и отлуче́нная я́же къ нему́:

и оло́нъ и отлуче́нная я́же къ нему́: и дави́ръ и отлуче́нная я́же къ нему́:

и Аи́нъ и отлуче́нная ему́: и Иетта́ и отлуче́нная ему́: и веѳсами́съ и отлуче́нная ему́: гра́ды де́вять от дву́ племе́нъ си́хъ.

И от пле́мене Венiами́ня гавао́нъ и отлуче́нная ему́: и гавее́ и окре́стная его́:

и Анаѳо́ѳъ и окре́стная его́: и алмо́нъ и окре́стная его́: гра́ды четы́ри.

Вси́ гра́ды сыно́въ Ааро́новыхъ жерце́въ, гра́ды трина́десять и окре́стная и́хъ.

И со́нмомъ сыно́въ Каа́ѳовыхъ леви́томъ, оста́вльшымся от сыно́въ Каа́ѳовыхъ, и бы́сть гра́дъ предѣ́ловъ и́хъ от пле́мене Ефре́мова.

И да́ша и́мъ гра́дъ убѣ́жище уби́вшему Cихе́мъ и окре́стная его́ въ горѣ́ Ефре́мли: и газе́ръ и окре́стная его́:

и кавсаи́мъ и окре́стная его́: и веѳоро́нъ и окре́стная его́: гра́ды четы́ри.

И от пле́мене да́нова Елѳеко́ и окре́стная его́: и гавеѳо́нъ и окре́стная его́:

и Ело́нъ и окре́стная его́: и геѳреммо́нъ и окре́стная его́: гра́ды четы́ри.

И от полупле́мене Манассі́ина Ѳаана́хъ и окре́стная его́: и веѳса́мъ и окре́стная его́: гра́да два́.

Вси́ гра́ды де́сять и окре́стная и́хъ со́нмомъ сыно́въ Каа́ѳовыхъ оста́вльшымся.

И сыно́мъ Гирсо́нимъ сро́дникомъ Леви́тскимъ, от полупле́мене Манассі́ина, гра́ды отлуче́нныя уби́вшымъ, Гола́нъ въ Васани́тидѣ и окре́стная его́: и веесѳера́ и окре́стная его́: гра́да два́.

И от пле́мене Иссаха́рова кисiо́нъ и окре́стная его́: и Девра́ѳъ и окре́стная его́:

и иермо́ѳъ и окре́стная его́: и исто́чникъ пи́сменъ и окре́стная его́: гра́ды четы́ри.

И от пле́мене Аси́рова Масаа́лъ и окре́стная его́: и Авдо́нъ и окре́стная его́:

и Ѳелка́ѳъ и окре́стная его́: и роо́въ и окре́стная его́: гра́ды четы́ри.

И от пле́мене Нефѳали́мова гра́дъ опредѣле́нный уби́вшему Кеде́съ въ Галиле́и и окре́стная его́: и Емаѳдо́ръ и окре́стная его́: и Ноеммо́нъ и отлуче́нная его́: гра́ды три́.

Вси́ гра́ды Гирсо́новы по со́нмомъ и́хъ, гра́ды трина́десять и отлуче́нная и́хъ.

И со́нму сыно́въ Мера́риныхъ леви́томъ про́чымъ, от пле́мене сыно́въ Завуло́нихъ, Иекнаа́мъ и окре́стная его́: и карѳа́ и окре́стная его́:

и дамна́ и окре́стная его́: и Наало́лъ и окре́стная его́: гра́ды четы́ри.

И объ ону́ страну́ Иорда́на ко иерихо́ну от пле́мене Руви́мова даде́ гра́дъ убѣ́жище уби́вшему Восо́ръ въ пусты́ни Мисо́ръ и окре́стная его́: и Иази́ръ и окре́стная его́:

и гедсо́нъ и окре́стная его́: и Масфа́ и окре́стная его́: гра́ды четы́ри.

И от пле́мене га́дова гра́дъ убѣ́жища уби́вшему рамо́ѳъ въ Галаа́дѣ и окре́стная его́: и Манаи́мъ и окре́стная его́:

и есево́нъ и окре́стная его́: и Иази́ръ и окре́стная его́: гра́ды четы́ри.

Вси́ гра́ды сыно́мъ Мера́ринымъ по со́нмомъ и́хъ, оста́вльшихся от пле́мене Леві́ина, и бы́ша предѣ́лы и́хъ гра́ды двана́десять.

Вси́ гра́ды леви́тстiи посредѣ́ обдержа́нiя сыно́въ Изра́илевыхъ четы́редесять и о́смь градо́въ и окре́стная и́хъ, о́крестъ градо́въ си́хъ:

гра́дъ и окре́стная о́крестъ гра́да: та́ко всѣ́мъ градо́мъ си́мъ.

И соверши́ Иису́съ раздѣли́вый зе́млю въ предѣ́лѣхъ ея́:

и да́ша сы́нове Изра́илевы ча́сть Иису́су повелѣ́нiемъ Госпо́днимъ: да́ша ему́ гра́дъ, его́же проси́: Ѳамнасаха́ръ да́ша ему́ на горѣ́ Ефре́мовѣ.

И созда́ Иису́съ гра́дъ, его́же проси́, и всели́ся въ не́мъ.

И взя́ Иису́съ ножы́ ка́менныя, и́миже обрѣ́зова сы́ны Изра́илевы, роди́вшыяся на пути́ въ пусты́ни, я́ко не обрѣ́зашася въ пусты́ни, и положи́ я́ во Ѳамнасаха́рѣ.

И даде́ Госпо́дь Изра́илю всю́ зе́млю, ю́же кля́тся да́ти отце́мъ и́хъ: и наслѣ́диша ю́ и всели́шася въ не́й.

И упоко́и Госпо́дь и́хъ о́крестъ, я́коже кля́тся отце́мъ и́хъ: не воста́ никто́же проти́ву и́мъ от всѣ́хъ враго́въ и́хъ: и вся́ враги́ и́хъ предаде́ и́мъ Госпо́дь въ ру́ки и́хъ.

Не оскудѣ́ сло́во [ни еди́но] от всѣ́хъ глаго́лъ благи́хъ, я́же рече́ Госпо́дь сыно́мъ Изра́илевымъ: вся́ собы́шася.

Тогда́ созва́ Иису́съ сы́ны Руви́мли и сы́ны га́довы и полпле́мене Манассі́ина, и рече́ и́мъ:

вы́ слы́шасте вся́, ели́ка заповѣ́да ва́мъ Моисе́й ра́бъ Госпо́день, и послу́шасте гла́са моего́, по всему́ ели́ка заповѣ́дахъ ва́мъ:

не оста́висте бра́тiи ва́шея въ сiя́ дни́ и мно́жайшыя, да́же до дне́ сего́: сохрани́сте за́повѣдь Го́спода Бо́га ва́шего:

ны́нѣ же упоко́и Госпо́дь Бо́гъ ва́шъ бра́тiю ва́шу, я́коже рече́ и́мъ: ны́нѣ у́бо возврати́вшеся отиди́те въ до́мы ва́шя и въ зе́млю обдержа́нiя ва́шего, ю́же даде́ ва́мъ Моисе́й ра́бъ Госпо́день объ ону́ страну́ Иорда́на:

но сохрани́те зѣло́ твори́ти за́повѣди и зако́нъ, его́же заповѣ́да ва́мъ Моисе́й ра́бъ Госпо́день, люби́ти Го́спода Бо́га ва́шего и ходи́ти во всѣ́хъ путе́хъ его́, храни́ти за́повѣди его́ и прилѣжа́ти ему́ и служи́ти ему́ от всего́ се́рдца ва́шего и от всея́ души́ ва́шея.

И благослови́въ и́хъ Иису́съ отпусти́ и́хъ: и отидо́ша въ до́мы своя́.

И полу́ [пле́мене] Манассі́ину даде́ Моисе́й [обдержа́нiе] въ Васа́нѣ, и полови́нѣ даде́ Иису́съ съ бра́тiею и́хъ у Иорда́на къ мо́рю. И егда́ отпусти́ и́хъ Иису́съ въ до́мы и́хъ, и благослови́ и́хъ:

и со имѣ́нiемъ мно́гимъ отидо́ша въ до́мы своя́: и скоты́ мно́ги зѣло́, и сребро́ и зла́то, и мѣ́дь и желѣ́зо, и ри́зы мно́ги зѣло́, и раздѣли́ша плѣ́нъ враго́въ свои́хъ съ бра́тiею свое́ю.

И возврати́вшеся отидо́ша сы́нове Руви́мли и сы́нове га́довы и полпле́мене Манассі́ина от сыно́въ Изра́илевыхъ, от Сило́ма земли́ Ханаа́ни, отити́ въ зе́млю Галаа́дску, въ зе́млю обдержа́нiя своего́, ю́же наслѣ́диша по повелѣ́нiю Госпо́дню руко́ю Моисе́овою.

И прiидо́ша въ Галило́ѳъ Иорда́нскъ, и́же е́сть въ земли́ Ханаа́ни: и созда́ша сы́нове Руви́мли и сы́нове га́довы и полпле́мене Манассі́ина та́мо олта́рь у Иорда́на, олта́рь вели́къ е́же ви́дѣти.

И услы́шаша сы́нове Изра́илевы глаго́лющихъ: се́, созда́ша сы́нове Руви́мли и сы́нове га́довы и полпле́мене Манассі́ина олта́рь у предѣ́ловъ земли́ Ханаа́ни, въ Галило́ѳѣ у Иорда́на объ ону́ страну́ сыно́въ Изра́илевыхъ.

И услы́шаша сы́нове Изра́илевы, и собра́шася вси́ сы́нове Изра́илевы въ Сило́нъ, е́же возше́дше воева́ти и́хъ.

И посла́ша сы́нове Изра́илевы къ сыно́мъ Руви́млимъ и къ сыно́мъ га́довымъ и къ полупле́мени Манассі́ину въ зе́млю Галаа́дску Финее́са сы́на Елеаза́ра, сы́на Ааро́на жерца́,

и де́сять князе́й съ ни́мъ: кня́зь еди́нъ от до́му оте́чества, от всѣ́хъ племе́нъ сыно́въ Изра́илевыхъ: му́жiе кня́зи домо́въ оте́чествъ и́хъ, и́же су́ть тысященача́лницы Изра́илевы.

И прiидо́ша къ сыно́мъ Руви́млимъ и къ сыно́мъ га́довымъ и къ полупле́мени Манассі́ину въ зе́млю Галаа́дову, и рѣ́ша къ ни́мъ, глаго́люще:

сiя́ глаго́летъ ве́сь со́нмъ Госпо́день: ко́е прегрѣше́нiе сiе́, и́мже согрѣши́сте предъ Го́сподемъ Бо́гомъ Изра́илевымъ, отврати́тися дне́сь от Го́спода Бо́га Изра́илева, созда́вше себѣ́ тре́бище, е́же отсту́пникомъ ва́мъ бы́ти дне́сь от Го́спода?

еда́ ма́лъ ва́мъ грѣ́хъ Фого́ровъ, я́ко не очи́стихомся от него́ да́же до сего́ дне́? и бы́сть я́зва въ со́нмѣ Госпо́дни:

и вы́ отврати́стеся дне́сь от Го́спода: и бу́детъ егда́ отсту́пите дне́сь от Го́спода, и зау́тра на все́мъ Изра́или бу́детъ гнѣ́въ Госпо́день:

и ны́нѣ а́ще мала́ ва́мъ земля́ обдержа́нiя ва́шего, прейди́те вы́ въ зе́млю обдержа́нiя Госпо́дня, идѣ́же пребыва́етъ ски́нiя Госпо́дня, и наслѣ́дите средѣ́ на́съ, и не бу́дите отсту́пницы от Го́спода, и от на́съ не отступи́те, за е́же созда́ти ва́мъ тре́бище кромѣ́ олтаря́ Го́спода Бо́га на́шего:

не се́ ли Аха́ръ сы́нъ зара́новъ прегрѣше́нiемъ прегрѣши́ от прокля́тiя, и бы́сть на ве́сь со́нмъ Изра́илевъ гнѣ́въ? а́ще и еди́нъ бя́ше, но не еди́нъ у́мре грѣхо́мъ свои́мъ.

И отвѣща́ша сы́нове Руви́мли и сы́нове га́довы и полпле́мене Манассі́ина, и рѣ́ша тысященача́лникомъ Изра́илевымъ, глаго́люще:

Бо́гъ Бо́гъ, Госпо́дь е́сть, и Бо́гъ Бо́гъ Госпо́дь са́мъ вѣ́сть, и Изра́иль са́мъ позна́етъ, а́ще во отступле́нiи прегрѣши́хомъ предъ Го́сподемъ, да не изба́витъ на́съ во дне́шнiй де́нь:

и а́ще созда́хомъ себѣ́ тре́бище, е́же отступи́ти на́мъ от Го́спода Бо́га на́шего, или́ вознести́ на́мъ на́нь же́ртву всесожже́нiй, или́ е́же сотвори́ти на не́мъ же́ртву спасе́нiя, са́мъ Госпо́дь взы́щетъ:

но ра́ди благоговѣ́нiя глаго́ла сотвори́хомъ сiе́, глаго́люще: да не реку́тъ зау́тра ча́да ва́ша ча́домъ на́шымъ, глаго́люще: что́ ва́мъ и Го́сподеви Бо́гу Изра́илеву?

и предѣ́лы поста́ви Госпо́дь между́ ва́ми и на́ми, сы́нове Руви́мли и сы́нове га́довы, Иорда́нъ, и нѣ́сть ва́мъ ча́сти Госпо́дни: и отчуждя́тъ сы́нове ва́ши сыно́въ на́шихъ, я́ко да не слу́жатъ Го́споду:

и реко́хомъ сотвори́ти си́це, е́же созда́ти тре́бище сiе́, не приноше́нiй ра́ди, ниже́ же́ртвъ ра́ди,

но да бу́детъ свидѣ́телство сiе́ между́ ва́ми и на́ми и между́ ро́ды на́шими по на́съ, е́же служи́ти слу́жбу Го́сподеви предъ ни́мъ въ приноше́нiихъ на́шихъ и въ же́ртвахъ на́шихъ и въ же́ртвахъ спасе́нiй на́шихъ: и да не реку́тъ ча́да ва́ша зау́тра ча́домъ на́шымъ: нѣ́сть ва́мъ ча́сти Госпо́дни.

И реко́хомъ: а́ще бу́детъ когда́, и возглаго́лютъ къ на́мъ или́ къ родо́мъ на́шымъ зау́тра и реку́тъ: зри́те подо́бiе же́ртвенника Госпо́дня, его́же сотвори́ша отцы́ на́ши, не приноше́нiя ра́ди, ниже́ же́ртвъ ра́ди, но свидѣ́телство е́сть между́ на́ми и между́ ва́ми и между́ сы́ны на́шими:

да не бу́детъ у́бо на́мъ отступи́ти от Го́спода, е́же отврати́тися во дне́шнiй де́нь от Го́спода, е́же сотвори́ти на́мъ же́ртвенникъ приноше́ниемъ и же́ртвамъ салами́нъ {ми́рнымъ} и же́ртвѣ спасе́нiя, кромѣ́ олтаря́ Го́спода Бо́га на́шего, и́же е́сть предъ ски́нiею его́.

И услы́шавше Финее́съ жре́цъ и вси́ кня́зи со́нма, и тысященача́лницы Изра́илевы, и́же бы́ша съ ни́мъ, словеса́ сiя́, я́же глаго́лаша сы́нове Руви́мли и сы́нове га́довы и полпле́мене Манассі́ина, и уго́дно и́мъ бы́сть сiе́.

И рече́ Финее́съ жре́цъ сыно́мъ Руви́млимъ и сыно́мъ га́довымъ и полупле́мени Манассі́ину: дне́сь позна́хомъ, я́ко съ на́ми е́сть Госпо́дь, и́же не погрѣши́сте предъ Го́сподемъ прегрѣше́нiя, но дне́сь изба́висте сы́ны Изра́илевы от руки́ Госпо́дни.

И возврати́ся Финее́съ жре́цъ и кня́зи оте́чествъ от сыно́въ Руви́млихъ и от сыно́въ га́довыхъ и от полупле́мене Манассі́ина от земли́ Галаа́довы въ зе́млю Ханаа́ню къ сыно́мъ Изра́илевымъ: и отвѣща́ша и́мъ словеса́ сiя́.

И уго́дно бы́сть сло́во сiе́ сыно́мъ Изра́илевымъ, и благослови́ша Бо́га сы́нове Изра́илевы и реко́ша: ктому́ да не изы́демъ къ ни́мъ на бра́нь потреби́ти зе́млю сыно́въ Руви́млихъ и сыно́въ га́довыхъ и полупле́мене Манассі́ина. И всели́шася на не́й.

И нарече́ Иису́съ тре́бище сыно́въ Руви́млихъ и сыно́въ га́довыхъ и полупле́мене Манассі́ина и рече́: я́ко свидѣ́нiе е́сть между́ и́ми, я́ко Госпо́дь Бо́гъ Бо́гъ и́хъ е́сть.

И бы́сть по дне́хъ мно́зѣхъ, егда́ упоко́и Госпо́дь Бо́гъ Изра́иля от всѣ́хъ враго́въ его́ и́же о́крестъ, и Иису́съ состарѣ́ся проше́дъ дни́.

И созва́ Иису́съ вся́ сы́ны Изра́илевы и старѣ́йшины и́хъ, и кня́зи и́хъ и судiи́ и́хъ и книго́чiя и́хъ, и рече́ къ ни́мъ: а́зъ состарѣ́хся и проидо́хъ дни́:

вы́ же ви́дѣсте вся́, ели́ка сотвори́ Госпо́дь Бо́гъ ва́шъ всѣ́мъ язы́комъ си́мъ от лица́ ва́шего, зане́ Госпо́дь Бо́гъ на́шъ спобо́рствовавый на́мъ:

ви́дите, я́ко низверго́хъ ва́мъ язы́ки оста́вшыяся ва́мъ сiя́ во жре́бiихъ племено́мъ ва́шымъ, от Иорда́на вся́ язы́ки потреби́хъ, и от мо́ря вели́каго, е́же опредѣли́тъ на за́падъ со́лнца:

Госпо́дь же Бо́гъ ва́шъ са́мъ потреби́тъ и́хъ от лица́ ва́шего, до́ндеже поги́бнутъ, и по́слетъ на ня́ звѣ́ри ди́вiя, до́ндеже потреби́тъ и́хъ и цари́ и́хъ от лица́ ва́шего, и наслѣ́дите зе́млю и́хъ, я́коже глаго́ла ва́мъ Госпо́дь Бо́гъ ва́шъ:

укрѣпи́теся у́бо зѣло́ храни́ти и твори́ти вся́ напи́санная въ кни́гахъ зако́на Моисе́ова, да не уклоните́ся от него́ на де́сно или́ на лѣ́во:

я́ко да не вни́дете во язы́ки оста́вшыяся сiя́, и имена́ бого́въ и́хъ да не возъимену́ются въ ва́съ, ниже́ да клене́теся и́ми, ниже́ да послу́жите и́мъ, ниже́ поклони́теся и́мъ:

но то́кмо Го́споду Бо́гу ва́шему прилѣпи́теся, я́коже твори́сте до сего́ дне́:

и потреби́ Госпо́дь от лица́ ва́шего язы́ки вели́ки и си́льны, и никто́ противоста́ ва́мъ до сего́ дне́:

еди́нъ от ва́съ прогна́ ты́сящы, я́ко Госпо́дь Бо́гъ ва́шъ спобо́рствоваше ва́мъ, я́коже глаго́ла ва́мъ:

и сохрани́те зѣло́ люби́ти Го́спода Бо́га ва́шего:

а́ще бо отвратите́ся и приложите́ся ко оста́вшымся язы́комъ си́мъ, и́же съ ва́ми, и бра́ки сотворите́ съ ни́ми, и смѣсите́ся съ ни́ми, и они́ съ ва́ми,

вѣ́дѣнiемъ увѣ́дите, я́ко не приложи́тъ Госпо́дь потреби́ти язы́ки сiя́ от лица́ ва́шего: и бу́дутъ ва́мъ въ сѣ́ти и въ собла́зны, и въ гво́здiя въ пята́хъ ва́шихъ и въ стрѣ́лы во очесѣ́хъ ва́шихъ, до́ндеже поги́бнете от земли́ благі́я сея́, ю́же даде́ ва́мъ Госпо́дь Бо́гъ ва́шъ:

а́зъ же дне́сь отхожду́ въ пу́ть, я́коже и вси́ и́же на земли́: и позна́ете всѣ́мъ се́рдцемъ ва́шимъ и душе́ю ва́шею, я́ко ни еди́но сло́во отпаде́ от всѣ́хъ слове́съ благи́хъ, я́же рече́ Госпо́дь Бо́гъ ва́шъ къ ва́мъ: вся́ прихо́дятъ ва́мъ, и не ра́знствова от ни́хъ ни еди́но сло́во:

и бу́детъ, и́мже о́бразомъ прихо́дятъ на ва́съ вся́ словеса́ до́брая, я́же глаго́ла Госпо́дь Бо́гъ къ ва́мъ, та́ко наведе́тъ Госпо́дь на вы́ вся́ словеса́ зла́я, до́ндеже потреби́тъ вы́ от земли́ благі́я сея́, ю́же даде́ ва́мъ Госпо́дь Бо́гъ ва́шъ:

внегда́ престу́пите завѣ́тъ Го́спода Бо́га ва́шего, его́же заповѣ́да ва́мъ, и ше́дше послу́жите бого́мъ ины́мъ и покло́нитеся и́мъ: и разгнѣ́вается я́ростiю Госпо́дь на вы́, и поги́бнете ско́ро от земли́ благі́я, ю́же даде́ Госпо́дь ва́мъ.

И собра́ Иису́съ вся́ племена́ Изра́илева въ Cихе́мъ, и созва́ старѣ́йшины Изра́илевы и кня́зи и́хъ, и судiи́ и́хъ и книго́чiя и́хъ, и ста́ша предъ Го́сподемъ Бо́гомъ.

И рече́ Иису́съ ко всѣ́мъ лю́демъ, глаго́ля: сiя́ глаго́летъ Госпо́дь Бо́гъ Изра́илевъ: объ ону́ страну́ рѣки́ жи́ша отцы́ ва́ши испе́рва, Ѳа́ра оте́цъ Авраа́мовъ и оте́цъ Нахо́ровъ, и служи́ша бого́мъ ины́мъ:

и поя́хъ отца́ ва́шего Авраа́ма от объ ону́ страну́ рѣки́, и води́хъ его́ во все́й земли́ Ханаа́нстѣй: и умно́жихъ сѣ́мя его́, и да́хъ ему́ Исаа́ка:

Исаа́ку же да́хъ Иа́кова и Иса́ва, и да́хъ Иса́ву го́ру Сии́ръ наслѣ́дiе ему́: Иа́ковъ же и сы́нове его́ снидо́ша во Еги́петъ, и бы́ша та́мо въ язы́къ вели́къ и крѣ́покъ и мно́гъ, и озло́биша и́хъ Еги́птяне:

и посла́хъ Моисе́а и Ааро́на, и порази́хъ Еги́пта во зна́менiихъ, я́же сотвори́хъ въ ни́хъ, и по се́мъ изведо́хъ ва́съ,

и изведо́хъ отцы́ ва́шя изъ Еги́пта, и внидо́сте въ мо́ре Чермно́е: и погна́ша Еги́птяне вслѣ́дъ оте́цъ ва́шихъ на колесни́цахъ и на ко́нехъ въ мо́ре Чермно́е:

и возопи́хомъ ко Го́споду, и даде́ о́блакъ и мглу́ между́ на́ми и между́ Еги́птяны, и наведе́ на ни́хъ мо́ре, и покры́ и́хъ: и ви́дѣша очеса́ ва́ша, ели́ка сотвори́ Госпо́дь въ земли́ Еги́петстѣй: и бы́сте въ пусты́ни дни́ мно́ги:

и приведе́ ва́съ въ зе́млю Аморре́овъ живу́щихъ объ ону́ страну́ Иорда́на, и ополчи́шася на вы́: и предаде́ я́ Госпо́дь въ ру́ки ва́шя, и наслѣ́дисте зе́млю и́хъ, и потреби́сте и́хъ от лица́ ва́шего:

и воста́ Вала́къ сы́нъ Сепфо́ровъ, ца́рь Моа́вль, и ополчи́ся проти́ву Изра́иля, и посла́въ призва́ Валаа́ма сы́на Вео́рова кля́ти ва́съ:

и не восхотѣ́ Госпо́дь Бо́гъ погуби́ти тя́, но благослове́нiемъ благослови́ ва́съ и изба́ви ва́съ от ру́къ и́хъ:

и преидо́сте Иорда́нъ и прiидо́сте во иерихо́нъ, и би́шася съ ва́ми живу́щiи во иерихо́нѣ, Аморре́й и Ферезе́й, и Ханане́й и Хетте́й, и Гергесе́й и Еве́й и Иевусе́й, и предаде́ и́хъ Госпо́дь въ ру́ки ва́шя:

и посла́ предъ ва́ми ше́ршни, и изгна́ от лица́ ва́шего два́ царя́ Аморре́йска, не ору́жiемъ твои́мъ, ниже́ лу́комъ твои́мъ,

и даде́ ва́мъ зе́млю, о не́йже не труди́стеся на не́й, и гра́ды, и́хже не созда́сте, и пожи́сте въ ни́хъ, и виногра́ды и ма́сличiе, и́хже не насади́сте вы́, ядо́сте:

и ны́нѣ убо́йтеся Го́спода, и послужи́те ему́ въ пра́вдѣ и правотѣ́: и отве́ржите бо́ги чужды́я, и́мже служи́ша отцы́ ва́ши объ ону́ страну́ рѣки́ и во Еги́птѣ, и служи́те Го́сподеви:

а́ще же не уго́дно ва́мъ служи́ти Го́сподеви, избери́те са́ми себѣ́ дне́сь, кому́ послу́жите, или́ бого́мъ оте́цъ ва́шихъ, и́же бы́ша объ ону́ страну́ рѣки́, или́ бого́мъ Аморре́йскимъ, въ ни́хже вы́ живе́те на земли́ и́хъ: а́зъ же и до́мъ мо́й служи́ти бу́демъ Го́сподеви, я́ко свя́тъ е́сть.

И отвѣща́вше лю́дiе, рѣ́ша: не бу́ди на́мъ оста́вити Го́спода, е́же служи́ти бого́мъ ины́мъ:

Госпо́дь бо Бо́гъ на́шъ то́й Бо́гъ е́сть, то́й изведе́ на́съ и отцы́ на́шы от земли́ Еги́петскiя, от до́му рабо́ты, и́же сотвори́ предъ очи́ма на́шима зна́менiя ве́лiя, и сохрани́ на́съ во все́мъ пути́, по нему́же идо́хомъ, и во всѣ́хъ язы́цѣхъ, и́хже сквозѣ́ проидо́хомъ:

и изгна́ Госпо́дь вся́ язы́ки и Аморре́а живу́щаго на земли́ от лица́ на́шего: но и мы́ послу́жимъ Го́сподеви, се́й бо е́сть Бо́гъ на́шъ.

И рече́ Иису́съ къ лю́демъ: не возмо́жете служи́ти Го́сподеви Бо́гу, я́ко Бо́гъ свя́тъ е́сть и ревни́тель се́й: не оста́витъ грѣ́хъ ва́шихъ и беззако́нiй ва́шихъ:

егда́ оста́вите Го́спода и послу́жите бого́мъ чужди́мъ, и прише́дъ озло́битъ ва́съ и потреби́тъ ва́съ, вмѣ́сто е́же бла́го сотвори́ ва́мъ.

И реко́ша лю́дiе ко Иису́су: ни́, но Го́сподеви послу́жимъ.

И рече́ Иису́съ къ лю́демъ: свидѣ́тели вы́ са́ми на ся́, я́ко вы́ избра́сте служи́ти Го́сподеви самому́. И реко́ша: свидѣ́тели мы́.

И ны́нѣ отве́ржите бо́ги чужды́я, и́же су́ть въ ва́съ, и испра́вите сердца́ ва́ша ко Го́споду Бо́гу Изра́илеву.

И реко́ша лю́дiе ко Иису́су: Го́сподеви Бо́гу на́шему послу́жимъ, и гла́са его́ послу́шаемъ.

И завѣща́ Иису́съ завѣ́тъ къ лю́демъ въ де́нь о́нъ, и даде́ и́мъ зако́нъ и су́дъ въ Cихе́мѣ, предъ ски́нiею Го́спода Бо́га Изра́илева.

И вписа́ Иису́съ словеса́ сiя́ въ кни́гу зако́на Бо́жiя: и взя́ ка́мень ве́лiй, и поста́ви его́ подъ тереви́нѳомъ, и́же е́сть предъ Го́сподемъ.

И рече́ Иису́съ къ лю́демъ: се́, ка́мень се́й бу́детъ ва́мъ во свидѣ́нiе: я́ко се́й слы́ша вся́ глаго́ланная от Го́спода, ели́ка глаго́ла къ ва́мъ дне́сь, и се́й бу́детъ ва́мъ во свидѣ́нiе въ послѣ́днiя дни́, егда́ солже́те Го́сподеви Бо́гу ва́шему.

И отпусти́ Иису́съ лю́ди, коего́ждо въ мѣста́ своя́.

И послужи́ Изра́иль Го́сподеви во вся́ дни́ Иису́совы и во вся́ дни́ ста́рцевъ, и́же препроводи́ша вре́мя со Иису́сомъ и и́же ви́дѣша вся́ дѣла́ Госпо́дня, ели́ка сотвори́ Изра́илю.

И бы́сть по си́хъ, и у́мре Иису́съ сы́нъ нави́нъ ра́бъ Госпо́день, [пожи́въ] сто́ и де́сять лѣ́тъ.

И погребо́ша его́ въ предѣ́лѣхъ жре́бiя его́ во Ѳамнасаха́рѣ, въ горѣ́ Ефре́мли, от сѣ́вера горы́ гаа́совы,

и положи́ша та́мо съ ни́мъ во гро́бѣ, въ не́мже погребо́ша его́, ножы́ ка́менныя, и́миже обрѣ́за сы́ны Изра́илевы въ Галга́лѣхъ [иису́съ], егда́ изведе́ и́хъ изъ Еги́пта, я́коже повелѣ́ Госпо́дь: и та́мо су́ть да́же до дне́ сего́.

И ко́сти Ио́сифовы изнесо́ша сы́нове Изра́илевы изъ Еги́пта и закопа́ша и́хъ въ Cихе́мѣхъ, въ ча́сти села́, е́же притяжа́ Иа́ковъ от Аморре́й живу́щихъ въ Cихе́мѣхъ сто́мъ а́гницъ, и даде́ ю́ Ио́сифу въ ча́сть.

И бы́сть по си́хъ, и Елеаза́ръ сы́нъ Ааро́новъ архiере́й сконча́ся: и погребе́нъ бы́сть въ гаваа́ѳѣ Финее́са сы́на своего́, его́же даде́ ему́ въ горѣ́ Ефре́мовѣ.

Въ то́й де́нь взе́мше сы́нове Изра́илевы киво́тъ Бо́жiй, обноша́ху съ собо́ю: и Финее́съ жре́чествова вмѣ́сто Елеаза́ра отца́ своего́, до́ндеже у́мре и погребе́ся въ гаваа́ѳѣ свое́мъ.

Сы́нове же Изра́илевы отидо́ша кі́йждо въ мѣ́сто свое́ и въ сво́й гра́дъ.

И почита́ху сы́нове Изра́илевы Аста́рту и Астаро́ѳа и бо́ги язы́ковъ су́щихъ о́крестъ и́хъ. И предаде́ и́хъ Госпо́дь въ ру́ки егло́му царю́ Моа́влю, и облада́ и́ми лѣ́тъ осмьна́десять.

Коне́цъ кни́зѣ Иису́са нави́на: и́мать въ себѣ́ гла́въ 24.