и вда́хъ се́рдце мое́, е́же взыска́ти и разсмотри́ти въ му́дрости о всѣ́хъ быва́ющихъ подъ небесе́мъ: я́ко попече́нiе лука́во даде́ Бо́гъ сыно́мъ человѣ́ческимъ, е́же упраждня́тися въ не́мъ.

Ви́дѣхъ вся́ческая сотворе́нiя сотворе́нная подъ со́лнцемъ: и се́, вся́ су́етство и произволе́нiе ду́ха.

Развраще́нное не мо́жетъ испра́витися, и лише́нiе не мо́жетъ изчи́слитися.

Глаго́лахъ а́зъ въ се́рдцы мое́мъ, е́же рещи́: се́, а́зъ возвели́чихся и умно́жихъ му́дрость па́че всѣ́хъ, и́же бы́ша пре́жде мене́ во Иерусали́мѣ,

и се́рдце мое́ вда́хъ, е́же вѣ́дѣти прему́дрость и ра́зумъ: и се́рдце мое́ ви́дѣ мно́гая, прему́дрость и ра́зумъ, при́тчи и хи́трость: уразумѣ́хъ а́зъ, я́ко и сiе́ е́сть произволе́нiе ду́ха:

я́ко во мно́жествѣ му́дрости мно́жество ра́зума, и приложи́вый ра́зумъ приложи́тъ болѣ́знь.

Не ско́ръ бу́ди усты́ твои́ми, и се́рдце твое́ да не ускоря́етъ износи́ти сло́во предъ лице́мъ Бо́жiимъ, я́ко Бо́гъ на небеси́ горѣ́, ты́ же на земли́ до́лу: сего́ ра́ди да бу́дутъ словеса́ твоя́ ма́ла:

я́ко прихо́дитъ со́нiе во мно́жествѣ попече́нiя, та́ко и гла́съ безу́мнаго во мно́жествѣ слове́съ.

А́ще обѣща́еши обѣ́тъ Бо́гу, не уме́дли отда́ти его́, я́ко нѣ́сть хотѣ́нiя въ безу́мныхъ: ты́ у́бо, ели́ка а́ще обѣща́еши, отда́ждь.

Бла́го тебѣ́ е́же не обѣщава́тися, не́жели обѣща́вшуся тебѣ́, не отда́ти.

Не да́ждь устна́мъ твои́мъ е́же во грѣ́хъ ввести́ пло́ть твою́, и да не рече́ши предъ лице́мъ Бо́жiимъ, я́ко невѣ́дѣнiе е́сть: да не прогнѣ́вается Бо́гъ о гла́сѣ твое́мъ и растли́тъ творе́нiя ру́къ твои́хъ:

я́ко во мно́жествѣ со́нiй и су́етствiя, [та́ко] и словеса́ мно́га, тѣ́мже Бо́га бо́йся.

А́ще оби́ду ни́щаго и расхище́нiе суда́ и пра́вды уви́диши во странѣ́, не диви́ся о ве́щи: я́ко высо́кiй надъ высо́кимъ надзира́тель, и высо́цыи надъ ни́ми,

и изоби́лiе земли́ надъ всѣ́мъ е́сть ца́рь села́ воздѣ́ланна.

Любя́й сребро́ не насы́тится сребра́: и кто́ наслади́тся во мно́жествѣ его́ плода́? И сiе́ суета́.

Во мно́жествѣ бла́га умно́жишася яду́щiи е́: и ко́е му́жество иму́щему е́? я́ко нача́ло е́же ви́дѣти очи́ма свои́ма.

Со́нъ сла́докъ рабо́тающему, а́ще ма́ло или́ мно́го снѣ́сть: а насы́тившагося бога́тство не оставля́етъ усну́ти.

Е́сть неду́гъ, его́же ви́дѣхъ подъ со́лнцемъ, бога́тство храни́мо от стяжа́теля во зло́ ему́:

и поги́бнетъ бога́тство о́но въ попече́нiи лука́внѣ: и роди́ сы́на, и нѣ́сть въ руцѣ́ его́ ничто́же:

я́коже изы́де изъ чре́ва ма́тере своея́ на́гъ, возврати́тся ити́, я́коже и прiи́де, и ничто́же во́зметъ от труда́ своего́, да понесе́тъ въ руцѣ́ свое́й.

И сiе́ зо́лъ неду́гъ: я́коже бо прiи́де, та́ко и отъи́детъ, и ка́я по́льза ему́, я́ко труди́тся на вѣ́тръ?

И́бо вси́ дні́е его́ во тмѣ́ и пла́чи и въ я́рости мно́зѣ, и въ неду́зѣ и во гнѣ́вѣ.

Се́, ви́дѣхъ а́зъ благо́е, е́же е́сть изря́дно, е́же я́сти и пи́ти и ви́дѣти благосты́ню во все́мъ трудѣ́ свое́мъ, и́мже труди́лся бы подъ со́лнцемъ, въ число́ дні́й живота́ своего́, я́же да́лъ е́сть ему́ Бо́гъ, я́ко сiе́ ча́сть его́:

и́бо вся́кому человѣ́ку, ему́же да́лъ е́сть Бо́гъ бога́тство и имѣ́нiя, и вла́сть даде́ ему́ я́сти от того́ и прiя́ти ча́сть свою́ и возвесели́тися о трудѣ́ свое́мъ, сiе́ да́ръ Бо́жiй е́сть:

я́ко не мно́го па́мятствовати и́мать дни́ живота́ своего́, поне́же Бо́гъ облага́етъ его́ попече́ньми въ весе́лiи се́рдца его́.