Во о́но вре́мя рече́ Госпо́дь ко мнѣ́: истеши́ себѣ́ двѣ́ скрижа́ли ка́менны я́коже пе́рвыя, и взы́ди ко Мнѣ́ на го́ру, и да сотвори́ши себѣ́ ковче́гъ древя́нъ:

и напишу́ на скрижа́лехъ словеса́, я́же бя́ху на скрижа́лехъ пе́рвыхъ, и́хже сокруши́лъ еси́, и да вложи́ши я́ въ ковче́гъ.

И сотвори́хъ ковче́гъ от дре́въ негнiю́шихъ, и истеса́хъ двѣ́ скрижа́ли ка́менны я́коже и пе́рвыя, и взыдо́хъ на го́ру: и о́бѣ скрижа́ли во обою́ руку́ мое́ю:

и написа́ на скрижа́лехъ по писа́нiю пе́рвому де́сять слове́съ, я́же глаго́ла Госпо́дь къ ва́мъ на горѣ́ от среды́ огня́, и даде́ я́ Госпо́дь мнѣ́.

И обрати́вся снидо́хъ съ горы́, и вложи́хъ скрижа́ли въ ковче́гъ, его́же сотвори́хъ: и бѣ́ста ту́, я́коже повелѣ́ ми Госпо́дь.

И сы́нове Изра́илевы воздвиго́шася от Виро́ѳа сыно́въ Иаки́млихъ въ Мисада́й: та́мо у́мре Ааро́нъ, и погребе́нъ бы́сть ту́, и бы́сть жре́цъ Елеаза́ръ сы́нъ его́ вмѣ́сто его́.

Отту́ду же воздвиго́шася въ Гадга́дъ, и от Гадга́да до Етава́ѳа, земли́ водоте́чи во́дъ.

Во о́но вре́мя отдѣли́ Госпо́дь пле́мя Леві́ино носи́ти ковче́гъ завѣ́та Госпо́дня, предстоя́ти предъ Го́сподемъ, служи́ти и моли́тися и благословля́ти о и́мени Его́ до дне́шняго дне́:

сего́ ра́ди нѣ́сть леви́томъ ча́сти и жре́бiя въ бра́тiи и́хъ: Госпо́дь Са́мъ жре́бiй и́хъ, я́коже рече́ и́мъ.

И а́зъ стоя́хъ на горѣ́ четы́редесять дні́й и четы́редесять ноще́й, и послу́ша Госпо́дь мене́ и во вре́мя сiе́, и не восхотѣ́ Госпо́дь погуби́ти ва́съ.

И рече́ Госпо́дь ко мнѣ́: гряди́, воздви́гнися предъ людьми́ си́ми, и да вни́дутъ и наслѣ́дятъ зе́млю, е́юже кля́хся отце́мъ и́хъ, да́ти ю́ и́мъ.

И ны́нѣ, Изра́илю, что́ проси́тъ Госпо́дь Бо́гъ тво́й у тебе́, то́чiю е́же боя́тися Го́спода Бо́га твоего́ и ходи́ти во всѣ́хъ путе́хъ Его́, и люби́ти Его́ и служи́ти Го́споду Бо́гу твоему́ от всего́ се́рдца твоего́ и от всея́ души́ твоея́,

храни́ти за́повѣди Го́спода Бо́га твоего́ и оправда́нiя Его́, ели́ка а́зъ заповѣ́даю тебѣ́ дне́сь, да бла́го тебѣ́ бу́детъ?

Се́, Го́спода Бо́га твоего́ не́бо и не́бо небесе́, земля́ и вся́ ели́ка су́ть на не́й:

оба́че отцы́ ва́шы произво́ли Госпо́дь люби́ти и́хъ, и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й.

И обрѣ́жите жестокосе́рдiе ва́ше, и вы́и ва́шея не ожесточи́те ктому́:

и́бо Госпо́дь Бо́гъ ва́шъ се́й Бо́гъ бого́въ и Госпо́дь господе́й, Бо́гъ вели́кiй и крѣ́пкiй и стра́шный, и́же не диви́тся лицу́, ниже́ взе́млетъ да́ра:

творя́й су́дъ прише́лцу и си́ру и вдови́цѣ, и лю́битъ прише́лца да́ти ему́ хлѣ́бъ и ри́зу.

И возлюби́те прише́лца: прише́лцы бо бѣ́сте въ земли́ Еги́петстѣй.

Го́спода Бо́га твоего́ да убои́шися, и Тому́ [еди́ному] послу́жиши, и къ Нему́ прилѣпи́шися, и и́менемъ Его́ клене́шися:

То́й хвала́ твоя́ и То́й Бо́гъ тво́й, и́же сотвори́ тебѣ́ вели́кая и сла́вная сiя́, я́же ви́дѣсте о́чи твои́:

въ седми́десятихъ и пяти́ душа́хъ снидо́ша отцы́ твои́ во Еги́петъ: ны́нѣ же сотвори́ тя Госпо́дь Бо́гъ тво́й я́ко звѣ́зды небе́сныя мно́жествомъ.

А́ще же изы́деши на бра́нь на враги́ твоя́, и у́зриши ко́ни и вса́дники и лю́ди мно́жайшыя тебе́, да не убои́шися и́хъ: я́ко Госпо́дь Бо́гъ тво́й съ тобо́ю, изведы́й тя́ изъ земли́ Еги́петскiя.

И бу́детъ егда́ прибли́жишися къ ра́ти, и приступи́въ жре́цъ да возглаго́летъ къ лю́демъ и рече́тъ къ ни́мъ:

послу́шай, Изра́илю, вы́ исхо́дите дне́сь на ра́ть ко враго́мъ ва́шымъ: да не ослабѣ́етъ се́рдце ва́ше, ни убо́йтеся, ниже́ устраши́теся и не уклони́теся от лица́ и́хъ:

я́ко Госпо́дь Бо́гъ ва́шъ иды́й предъ ва́ми спобо́рствуетъ ва́мъ на враги́ ва́шя и спасе́тъ ва́съ.

И да реку́тъ книго́чiя къ лю́демъ, глаго́люще: кі́й человѣ́къ созда́вый хра́мину но́ву, и не обнови́ ея́? Да и́детъ, и да возврати́тся въ до́мъ сво́й, да не у́мретъ на ра́ти, и человѣ́къ и́нъ обнови́тъ ю́:

и кі́и человѣ́къ, и́же насади́ виногра́дъ, и не весели́ся от него́? Да и́детъ, и возврати́тся въ до́мъ сво́й, да не у́мретъ на ра́ти, и человѣ́къ и́нъ возвесели́тся от него́:

и кі́й человѣ́къ, и́же обручи́ себѣ́ жену́, и не поня́лъ ю́? Да и́детъ, и возврати́тся въ до́мъ сво́й, да не у́мретъ на ра́ти, и и́нъ человѣ́къ по́йметъ ю́.

И да приложа́тъ книго́чiя глаго́лати къ лю́демъ, и да реку́тъ: кі́й человѣ́къ страшли́въ и сла́бъ се́рдцемъ? Да и́детъ, и возврати́тся въ до́мъ сво́й, да не устраши́тъ се́рдца бра́та своего́, а́ки се́рдце свое́.

И бу́детъ егда́ умо́лкнутъ книго́чiя глаго́люще къ лю́демъ, и поста́вятъ воево́ды во́инства вожды́ люді́й.

А́ще же прiи́деши ко гра́ду воева́ти на́нь, и воззове́ши я́ съ ми́ромъ:

а́ще у́бо ми́рное отвѣща́ютъ ти́, и отве́рзутъ тебѣ́ [гра́дъ], вси́ лю́дiе обрѣ́тшiися во гра́дѣ да бу́дутъ тебѣ́ да́нь даю́ще и послу́шающiи тебе́:

а́ще же не покоря́тся тебѣ́, и сотворя́тъ съ тобо́ю ра́ть, да обся́деши его́,

до́ндеже преда́стъ я́ Госпо́дь Бо́гъ тво́й въ ру́цѣ твои́: да избiе́ши вся́къ му́жескъ по́лъ въ не́мъ убі́йствомъ меча́,

кромѣ́ же́нъ и имѣ́нiя, и вся́ скоты́, и вся́ ели́ка су́ть во гра́дѣ, и все́ стяжа́нiе да плѣни́ши себѣ́, и да снѣ́си ве́сь плѣ́нъ враго́въ твои́хъ, я́же Госпо́дь Бо́гъ тво́й дае́тъ тебѣ́.

Та́ко да сотвори́ши всѣ́мъ градо́мъ, и́же су́ть дале́че от тебе́ зѣло́, и́же не су́ть от градо́въ язы́ковъ си́хъ, и́хже Госпо́дь Бо́гъ дае́тъ тебѣ́ наслѣ́дити зе́млю и́хъ:

от ни́хъ да не оста́вите жи́ва вся́каго дыха́нiя:

но и прокля́тiемъ проклени́те и́хъ, Хетте́а и Аморре́а, и Ханане́а и Ферезе́а, и Еве́а и Иевусе́а и Гергесе́а, я́коже заповѣ́да тебѣ́ Госпо́дь Бо́гъ тво́й:

да не науча́тъ ва́съ твори́ти вся́кiя ме́рзости своя́, ели́ки твори́ша бого́мъ свои́мъ, и согрѣшите́ предъ Го́сподемъ Бо́гомъ ва́шимъ.

А́ще же обся́деши гра́дъ еди́нъ дни́ мно́ги воева́ти его́ въ прiя́тiе себѣ́, да не истреби́ши садо́вiя его́, возложи́въ желѣ́зо на́нь, но то́кмо да я́си пло́дъ от ни́хъ, самого́ же да не посѣче́ши: еда́ дре́во, е́же въ дубра́вѣ, человѣ́къ е́сть, е́же вни́ти от лица́ твоего́ въ забра́ла?

но дре́во, е́же вѣ́си, я́ко не я́стся пло́дъ его́, сiе́ потреби́ши и посѣче́ши, и сотвори́ши лѣ́ствицы на гра́дъ, и́же твори́тъ на тя́ ра́ть, до́ндеже преда́стся.