И у́спе Аві́а со отцы́ свои́ми, и погребо́ша его́ во гра́дѣ дави́довѣ. И воцари́ся а́са сы́нъ его́ вмѣ́сто его́ во дни́ же а́сы почи́ земля́ Иу́дина лѣ́тъ де́сять.

И сотвори́ а́са благо́е и пра́вое предъ Го́сподемъ Бо́гомъ свои́мъ:

и отве́рже олтари́ чужды́хъ и высо́кая, и сокруши́ и́долы и посѣче́ дубра́вы:

и повелѣ́ Иу́дѣ, да взы́щетъ Го́спода Бо́га оте́цъ свои́хъ и да сотвори́тъ зако́нъ его́ и за́повѣди:

и изве́рже изъ всѣ́хъ градо́въ Иу́диныхъ олтари́ и и́долы, и ца́рствова въ ми́рѣ.

И созда́ гра́ды крѣ́пки въ земли́ Иу́динѣ, зане́ въ поко́и бы́сть земля́, и не бѣ́ ему́ бра́ни въ лѣ́та сiя́, ми́ръ бо Госпо́дь даде́ ему́.

Рече́ же Иу́дѣ: сози́ждемъ гра́ды сiя́, и сотвори́мъ стѣ́ны и столпы́, и врата́ и вереи́, до́ндеже земле́ю госпо́дствуемъ: зане́ я́коже взыска́хомъ Го́спода Бо́га на́шего, взыска́ и на́съ, и воздаде́ на́мъ ми́ръ о́крестъ, и благопоспѣ́шствова на́мъ.

И бы́сть си́ла а́сѣ оружено́сцевъ нося́щихъ щиты́ и ко́пiя въ земли́ Иу́динѣ три́ста ты́сящъ, въ земли́ же Венiами́ни щи́тниковъ и стрѣлце́въ двѣ́сти о́смьдесятъ ты́сящъ: вси́ сі́и во́ини си́льнiи.

Изы́де же проти́ву и́хъ зара́й еѳiо́плянинъ съ си́лою въ ты́сящы ты́сящей, и колесни́цъ три́ста, и прiи́де да́же до мари́са.

И изы́де а́са проти́ву ему́ и устро́и бра́нь въ де́бри на сѣ́веръ мари́са.

И возопи́ а́са ко Го́споду Бо́гу своему́ и рече́: Го́споди, не изнемо́жетъ у тебе́ спаса́ти во мно́гихъ и въ ма́лыхъ, укрѣпи́ на́съ, Го́споди Бо́же на́шъ, я́ко на тя́ упова́хомъ и о и́мени твое́мъ изыдо́хомъ на мно́жество мно́гое сiе́: Го́споди Бо́же на́шъ, ты́ еси́ Бо́гъ, да не превозмо́жетъ проти́ву тебе́ человѣ́къ.

И порази́ Госпо́дь еѳiо́пы предъ а́сою и Иу́дою и бѣжа́ша еѳiо́пи:

и погна́ и́хъ а́са и лю́дiе его́ да́же до гедо́ра: и падо́ша еѳiо́пи, да́же не бы́ти въ ни́хъ оста́нку, я́ко сотре́ни бы́ша предъ Го́сподемъ и предъ си́лою его́, и плѣни́ша коры́сти мно́ги:

и изсѣко́ша ве́си и́хъ о́крестъ гедо́ра, вели́къ бо стра́хъ Госпо́день объя́тъ и́хъ, и плѣни́ша вся́ гра́ды и́хъ, зане́ мно́ги коры́сти бы́ша въ ни́хъ:

и ку́щы ско́тскiя и Амазо́новъ изсѣко́ша, и взя́ша скота́ мно́жество и велблю́ды, и возврати́шася во Иерусали́мъ.

Аза́рiа же сы́нъ Ада́довъ, бы́сть на не́мъ Ду́хъ Бо́жiй:

и изы́де во срѣ́тенiе а́сѣ и всему́ Иу́дѣ и Венiами́ну и рече́ ему́: услы́шите мя́, а́са и ве́сь Иу́да и Венiами́нъ: Госпо́дь съ ва́ми, я́ко бы́сте съ ни́мъ: и а́ще взы́щете его́, обря́щется ва́мъ, а́ще же оста́вите его́, оста́витъ ва́съ:

мно́зи дні́е [бу́дутъ] во Изра́или безъ Бо́га и́стиннаго и безъ свяще́нника уча́щаго и безъ зако́на:

егда́ же обратя́тся въ печа́ли ко Го́споду Бо́гу Изра́илеву и взы́щутъ его́, и обря́щется и́мъ:

и во вре́мя о́но не бу́детъ ми́ръ исходя́щему и входя́щему, я́ко у́жасъ Госпо́день на всѣ́хъ обита́ющихъ на земли́

и ополчи́тся язы́къ на язы́къ и гра́дъ проти́ву гра́да, я́ко Госпо́дь смути́тъ и́хъ во вся́цѣй печа́ли:

и вы́ укрѣпи́теся, и да не ослабѣ́ютъ ру́ки ва́шя, е́сть бо мзда́ дѣ́лу ва́шему.

И егда́ услы́ша а́са словеса́ сiя́ и проро́чество аза́рiи проро́ка, укрѣпи́ся и отъя́ вся́ и́долы от всея́ земли́ Иу́дины и Венiами́ни и от градо́въ, и́хже содержа́ше иеровоа́мъ въ горѣ́ Ефре́мли, и освяти́ олта́рь Госпо́день, и́же бѣ́ предъ хра́момъ Госпо́днимъ:

собра́ же [всего́] Иу́ду и Венiами́на и прише́лцевъ обита́ющихъ съ ни́мъ от Ефре́ма и от Манассі́и и от Симео́на, мно́зи бо къ нему́ прибѣго́ша от Изра́иля, егда́ уви́дѣша, я́ко Госпо́дь Бо́гъ его́ съ ни́мъ.

И собра́шася во Иерусали́мъ въ ме́сяцъ тре́тiй, въ лѣ́то пятоена́десять ца́рства а́сы,

и пожро́ша Го́споду въ де́нь то́й от коры́стей, и́хже приведо́ша, воло́въ се́дмь со́тъ и ове́цъ се́дмь ты́сящъ,

и поидо́ша въ завѣ́тѣ, е́же иска́ти Го́спода Бо́га оте́цъ свои́хъ всѣ́мъ се́рдцемъ и все́ю душе́ю свое́ю:

и [рече́]: вся́къ, и́же а́ще не взы́щетъ Го́спода Бо́га Изра́илева, да у́мретъ от ю́наго да́же до старѣ́йшаго, от му́жа да́же до жены́.

И кля́шася Го́споду гла́сомъ вели́кимъ въ восклица́нiи и въ труба́хъ и въ ро́жаныхъ.

И возра́довася ве́сь Иу́да о кля́твѣ, я́ко от всея́ души́ кля́шася, и все́ю во́лею взыска́ша его́, и обрѣ́теся и́мъ, и даде́ и́мъ Госпо́дь поко́й о́крестъ.

И маа́ху ма́терь свою́ отлучи́, да не слу́житъ Аста́рту, и сокруши́ и́дола и сожже́ въ пото́цѣ ке́дрстѣмъ.

То́кмо высо́кихъ не отста́ви, еще́ бо бя́ху во Изра́или, но се́рдце а́сы бѣ́ соверше́нно во всѣ́хъ дне́хъ его́:

и внесе́ свята́я дави́да отца́ своего́ и свята́я своя́ въ до́мъ Бо́жiй, сребро́ и зла́то и сосу́ды.

И бра́нь не бы́сть ему́ да́же до три́десять пя́таго лѣ́та ца́рства а́сина.

И въ лѣ́то три́десять осмо́е ца́рства а́сина, взы́де Ваа́са ца́рь Изра́илевъ на Иу́ду и стѣна́ми укрѣпи́ ра́му, да не да́стъ вхо́да и исхо́да а́сѣ царю́ Иу́дину.

И взя́ а́са сребро́ и зла́то от сокро́вищъ до́му Госпо́дня и до́му царе́ва, и посла́ ко [венада́ду] сы́ну Аде́ра царя́ Си́рска, живу́щему въ дама́сцѣ, глаго́ля:

положи́ завѣ́тъ между́ мно́ю и тобо́ю и между́ отце́мъ мои́мъ и отце́мъ твои́мъ: се́ посла́хъ тебѣ́ сребро́ и зла́то: прiиди́ и отжени́ от мене́ Ваа́су царя́ Изра́илева, и да отъи́детъ от мене́.

И послу́ша сы́нъ Аде́ровъ царя́ а́сы и посла́ нача́лники во́евъ свои́хъ на гра́ды Изра́илевы, и порази́ Аино́на и Да́на, и Авелмаи́на и вся́ окре́стная Нефѳали́мля.

И бы́сть егда́ услы́ша Ваа́са ца́рь Изра́илевъ, оста́ви ктому́ созида́ти ра́му и оста́ви дѣ́ло свое́.

А́са же ца́рь взя́ всего́ Иу́ду и взя́ ка́менiе от ра́мы и лѣ́съ ея́, я́же на созда́нiе угото́ва Ваа́са, и созда́ изъ ни́хъ гаваю́ и Масфу́.

И во вре́мя о́но прiи́де Ана́нiй проро́къ ко а́сѣ царю́ Иу́дину и рече́ ему́: поне́же имѣ́лъ еси́ упова́нiе на царя́ Си́рска, а не упова́лъ еси́ на Го́спода Бо́га твоего́, того́ ра́ди спасе́ся си́ла царя́ Си́рскаго от руку́ твое́ю:

не еѳiо́пи ли и Ливи́ане бя́ху на тя́ въ си́лѣ мно́зѣ, въ де́рзости колесни́цъ и ко́нникъ во мно́жество зѣло́? и егда́ упова́лъ еси́ на Го́спода, предаде́ и́хъ въ ру́ку твою́:

о́чи бо Госпо́дни назира́ютъ всю́ зе́млю, е́же укрѣпи́ти су́щихъ се́рдцемъ соверше́ннымъ къ нему́: бу́е сотвори́лъ еси́ сiе́, [сего́ ра́ди] отны́нѣ бу́детъ на тя́ бра́нь.

Разгнѣ́вася же а́са на проро́ка и всади́ его́ въ темни́цу, поне́же прогнѣ́вася о се́мъ: и уби́ а́са от люді́й во вре́мя то́ [мно́гихъ].

И се́, словеса́ а́сы, пе́рвая и послѣ́дняя, пи́сана су́ть въ кни́зѣ царе́й Иу́диныхъ и Изра́иля.

И разболѣ́ся а́са въ лѣ́то три́десять девя́тое ца́рства своего́ нога́ма, болѣ́знiю зѣ́лнѣйшею: и ниже́ въ не́мощи свое́й взыска́ Го́спода, но враче́въ.

у́спе же а́са со отцы́ свои́ми, и у́мре въ лѣ́то четы́редесять пе́рвое ца́рства своего́:

и погребо́ша его́ во гро́бѣ, его́же ископа́ себѣ́ во гра́дѣ дави́довѣ, и положи́ша его́ на одрѣ́, и напо́лниша арома́тами и ро́дами ми́ровъ благоуха́нныхъ, и сотвори́ша ему́ погребе́нiе вели́ко зѣло́.