Сказа́нїе часѡ́въ ст҃а́гѡ и҆ вели́кагѡ пѧтка̀,
творе́нїе кѷрі́лла, а҆рхїепі́скопа а҆леѯандрі́йскагѡ. Ѡ҆ второ́мъ часѣ̀ днѐ кле́плетъ, и҆ ѡ҆блачи́тсѧ сщ҃е́нникъ, и҆ бл҃гослови́вшꙋ є҆мꙋ̀, начина́емъ: Цр҃ю̀ нбⷭ҇ный: Трист҃о́е. Прест҃а́ѧ трⷪ҇це: Ѻ҆́ч҃е на́шъ: Возглаше́нїе: Ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те поклони́мсѧ: три́жды. И҆ глаго́лемъ ѱалмы̀ сїѧ̑, ꙗ҆̀же здѣ̀ и҆з̾ѧвлѧ́ютсѧ.
Ѱало́мъ є҃:
Глаго́лы моѧ̑ внꙋшѝ гдⷭ҇и, разꙋмѣ́й зва́нїе моѐ. Вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й, ꙗ҆́кѡ къ тебѣ̀ помолю́сѧ гдⷭ҇и. Заꙋ́тра ᲂу҆слы́ши гла́съ мо́й, заꙋ́тра предста́нꙋ тѝ, и҆ ᲂу҆́зриши мѧ̀. Ꙗ҆́кѡ бг҃ъ не хотѧ́й беззако́нїѧ, ты̀ є҆сѝ: не присели́тсѧ къ тебѣ̀ лꙋка́внꙋѧй, Нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма: возненави́дѣлъ є҆сѝ всѧ̑ дѣ́лающыѧ беззако́нїе. Погꙋби́ши всѧ̑ глаго́лющыѧ лжꙋ̀, мꙋ́жа крове́й и҆ льсти́ва гнꙋша́етсѧ гдⷭ҇ь. А҆́зъ же мно́жествомъ млⷭ҇ти твоеѧ̀, вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀, въ стра́сѣ твое́мъ. Гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й. Ꙗ҆́кѡ нѣ́сть во ᲂу҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ. Сꙋдѝ и҆̀мъ бж҃е, да ѿпадꙋ́тъ ѿ мы́слей свои́хъ, по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀ гдⷭ҇и. И҆ да возвеселѧ́тсѧ всѝ ᲂу҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ, и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. Ꙗ҆́кѡ ты̀ бл҃гослови́ши првⷣника гдⷭ҇и, ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ.
Ѱало́мъ в҃:
Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ; Предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀: Расто́ргнемъ ᲂу҆́зы и҆́хъ, и҆ ѿве́ржемъ ѿ на́съ и҆́го и҆́хъ. Живы́й на нб҃сѣ́хъ посмѣе́тсѧ и҆̀мъ, и҆ гдⷭ҇ь порꙋга́етсѧ и҆̀мъ. Тогда̀ возглаго́летъ къ ни̑мъ гнѣ́вомъ свои́мъ, и҆ ꙗ҆́ростїю свое́ю смѧте́тъ ѧ҆̀. А҆́зъ же поста́вленъ є҆́смь цр҃ь ѿ негѡ̀ над̾ сїѡ́номъ горо́ю ст҃о́ю є҆гѡ̀, Возвѣща́ѧй повелѣ́нїе гдⷭ҇не. гдⷭ҇ь речѐ ко мнѣ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀. Просѝ ѿ менѐ, и҆ да́мъ тѝ ꙗ҆зы́ки достоѧ́нїе твоѐ, и҆ ѡ҆держа́нїе твоѐ концы̀ землѝ. Оу҆пасе́ши ѧ҆̀ жезло́мъ желѣ́знымъ, ꙗ҆́кѡ сосꙋ́ды скꙋде́льничи сокрꙋши́ши ѧ҆̀. И҆ ны́нѣ ца́рїе разꙋмѣ́йте, накажи́тесѧ всѝ сꙋдѧ́щїи землѝ. Рабо́тайте гдⷭ҇ви со стра́хомъ, и҆ ра́дꙋйтесѧ є҆мꙋ̀ съ тре́петомъ. Прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ пра́веднагѡ, є҆гда̀ возгори́тсѧ вско́рѣ ꙗ҆́рость є҆гѡ̀. бл҃же́ни всѝ надѣ́ющїисѧ на́нь.
Ѱало́мъ к҃а:
Бж҃е бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ. Бж҃е мо́й, воззовꙋ̀ во днѝ, и҆ не ᲂу҆слы́шиши, и҆ въ нощѝ, и҆ не въ безꙋ́мїе мнѣ̀. Ты́ же во ст҃ѣ́мъ живе́ши, хвало̀ і҆и҃лева. На тѧ̀ ᲂу҆пова́ша ѻ҆тцы̀ на́ши, ᲂу҆пова́ша, и҆ и҆зба́вилъ є҆сѝ ѧ҆̀. Къ тебѣ̀ воззва́ша, и҆ сп҃со́шасѧ: на тѧ̀ ᲂу҆пова́ша, и҆ не постыдѣ́шасѧ. А҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ, и҆ ᲂу҆ничиже́нїе люде́й. Всѝ ви́дѧщїи мѧ̀ порꙋга́ша ми сѧ, глаго́лаша ᲂу҆стна́ми, покива́ша главо́ю. Оу҆пова̀ на гдⷭ҇а, да и҆зба́витъ є҆го̀, да сп҃се́тъ є҆го̀, ꙗ҆́кѡ хо́щетъ є҆го̀. Ꙗ҆́кѡ ты̀ є҆сѝ и҆сто́ргїй мѧ̀ и҆з̾ чре́ва: ᲂу҆пова́нїе моѐ ѿ сосцꙋ̀ ма́тере моеѧ̀. Къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀, бг҃ъ мо́й є҆сѝ ты̀. Да не ѿстꙋ́пиши ѿ менѐ: ꙗ҆́кѡ ско́рбь бли́зъ, ꙗ҆́кѡ нѣ́сть помога́ѧй мѝ. Ѡ҆быдо́ша мѧ̀ тельцы̀ мно́зи, ю҆нцы̀ тꙋ́чнїи ѡ҆держа́ша мѧ̀. Ѿверзо́ша на мѧ̀ ᲂу҆ста̀ своѧ̑, ꙗ҆́кѡ ле́въ восхища́ѧй и҆ рыка́ѧй. Ꙗ҆́кѡ вода̀ и҆злїѧ́хсѧ, и҆ разсы́пашасѧ всѧ̑ кѡ́сти моѧ̑: бы́сть се́рдце моѐ, ꙗ҆́кѡ во́скъ та́ѧй посредѣ̀ чре́ва моегѡ̀. И҆́зсше ꙗ҆́кѡ скꙋде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемꙋ̀, и҆ въ пе́рсть сме́рти све́лъ мѧ̀ є҆сѝ. Ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀: и҆скопа́ша рꙋ́цѣ моѝ и҆ но́зѣ моѝ. И҆счето́ша всѧ̑ кѡ́сти моѧ̑, ті́и же смотри́ша, и҆ презрѣ́ша мѧ̀. Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй. Ты́ же гдⷭ҇и, не ᲂу҆далѝ по́мощь твою̀ ѿ менѐ, на застꙋпле́нїе моѐ вонмѝ. И҆зба́ви ѿ ѻ҆рꙋ́жїѧ дꙋ́шꙋ мою̀, и҆ и҆з̾ рꙋкѝ пе́сїи є҆диноро́днꙋю мою̀. Сп҃си́ мѧ ѿ ᲂу҆́стъ льво́выхъ, и҆ ѿ рѡ́гъ є҆диноро́жь смире́нїе моѐ. Повѣ́мъ и҆́мѧ твоѐ бра́тїи мое́й, посредѣ̀ цр҃кве воспою́ тѧ. Боѧ́щїисѧ гдⷭ҇а восхвали́те є҆го̀, всѐ сѣ́мѧ і҆а́кѡвле просла́вите є҆го̀. да ᲂу҆бои́тсѧ же ѿ негѡ̀ всѐ сѣ́мѧ і҆и҃лево: Ꙗ҆́кѡ не ᲂу҆ничижѝ, нижѐ негодова̀ мл҃твы ни́щагѡ, нижѐ ѿвратѝ лицѐ своѐ ѿ менѐ: и҆ є҆гда̀ воззва́хъ къ немꙋ̀, ᲂу҆слы́ша мѧ̀. Ѿ тебѐ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: мл҃твы моѧ̑ возда́мъ пред̾ боѧ́щимисѧ є҆гѡ̀. Ꙗ҆дѧ́тъ ᲂу҆бо́зїи, и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀, жива̀ бꙋ́дꙋтъ сердца̀ и҆́хъ въ вѣ́къ вѣ́ка. Помѧнꙋ́тсѧ и҆ ѡ҆братѧ́тсѧ ко гдⷭ҇ꙋ всѝ концы̀ землѝ, и҆ покло́нѧтсѧ пред̾ ни́мъ всѧ̑ ѻ҆те́чєствїѧ ꙗ҆зы̑къ. Ꙗ҆́кѡ гдⷭ҇не є҆́сть црⷭ҇твїе, и҆ то́й ѡ҆блада́етъ ꙗ҆зы́ки. Ꙗ҆до́ша и҆ поклони́шасѧ всѝ тꙋ́чнїи землѝ: пред̾ ни́мъ припадꙋ́тъ всѝ низходѧ́щїи въ зе́млю: и҆ дꙋша̀ моѧ̀ томꙋ̀ живе́тъ. И҆ сѣ́мѧ моѐ порабо́таетъ є҆мꙋ̀: возвѣсти́тъ гдⷭ҇ви ро́дъ грѧдꙋ́щїй. И҆ возвѣстѧ́тъ пра́вдꙋ є҆гѡ̀ лю́демъ ро́ждшымсѧ, ꙗ҆̀же сотворѝ гдⷭ҇ь.
Сла́ва, и҆ ны́нѣ, а҆ллилꙋ́їа, три́жды. Гдⷭ҇и поми́лꙋй, три́жды.
Сла́ва, тропа́рь, гла́съ а҃:
Распе́ншꙋсѧ тебѣ̀ хрⷭ҇тѐ, поги́бе мꙋчи́тельство, попра́на бы́сть си́ла вра́жїѧ: ниже́ бо а҆́гг҃лъ, нижѐ человѣ́къ, но са́мъ гдⷭ҇и сп҃слъ є҆сѝ на́съ, сла́ва тебѣ̀.
И҆ ны́нѣ, бг҃оро́диченъ: Что́ тѧ нарече́мъ:
Та́же пое́мъ тропарѝ трѝ ѿ двꙋна́десѧти, повторѧ́юще ѧ҆̀. глаго́лемъ же пе́рвый без̾ стїха̀, та́кѡ бо твори́мъ и҆ въ про́чихъ часѣ́хъ въ пе́рвый тропа́рь. Во вторы́й же, глаго́летъ наче́ншїй ли́къ сті́хъ, и҆ пое́тъ и҆̀. та́же па́ки дрꙋгі́й ли́къ сті́хъ, и҆ пое́тъ и҆ то́й и҆̀. тре́тїй же глаго́лемъ на Сла́ва, и҆ на И҆ ны́нѣ.
Стїхи́ра самогла́сна пе́рвагѡ часа̀, гла́съ и҃:
Дне́сь цр҃ко́внаѧ завѣ́са, на ѡ҆бличе́нїе беззако́нныхъ раздира́етсѧ, и҆ со́лнце лꙋчы̀ своѧ̑ скрыва́етъ, влⷣкꙋ зрѧ̀ распина́ема.
И҆ па́ки тꙋ́юже дрꙋгі́й ли́къ.
Та́же глаго́летъ сті́хъ пе́рвый ли́къ: Вскꙋ́ю шата́шасѧ ꙗ҆зы́цы и҆ лю́дїе поꙋчи́шасѧ тщє́тнымъ;
И҆ пое́мъ настоѧ́щїй тропа́рь:
Ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ хрⷭ҇тѐ цр҃ю̀, и҆ ꙗ҆́кѡ а҆́гнецъ неѕло́бивый пригвозди́лсѧ є҆сѝ крⷭ҇тꙋ̀, ѿ беззако́нныхъ мꙋже́й, грѣ̑хъ ра́ди на́шихъ чл҃вѣколю́бче.
Сті́хъ: Предста́ша ца́рїе зе́мстїи, и҆ кнѧ́зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀.
И҆ пое́тъ па́ки и҆ дрꙋгі́й ли́къ то́йже сті́хъ.
Та́же пе́рвый ли́къ.
Сла́ва: Є҆́мшымъ тѧ̀ беззакѡ́ннымъ, претерпѣва́ѧ, си́це вопїѧ́лъ є҆сѝ гдⷭ҇и: а҆́ще и҆ порази́сте па́стырѧ, и҆ расточи́сте двана́десѧть ѻ҆ве́цъ ᲂу҆ч҃нкѝ моѧ̑, можа́хъ вѧ́щши, не́жели двана́десѧте легео́нѡвъ предста́вити а҆́гг҃лѡвъ. но долготерплю̀, да и҆спо́лнѧтсѧ, ꙗ҆̀же ꙗ҆ви́хъ ва́мъ прⷪ҇ро́ки мои́ми, безвѣ̑стнаѧ и҆ та̑йнаѧ: гдⷭ҇и сла́ва тебѣ̀.
И҆ ны́нѣ, па́ки то́йже.
Прокі́менъ прⷪ҇ро́чества, гла́съ д҃: Се́рдце є҆гѡ̀ собра̀ беззако́нїе себѣ̀. Сті́хъ: Бл҃же́нъ разꙋмѣва́ѧй на ни́ща и҆ ᲂу҆бо́га.
Прⷪ҇ро́чества заха́рїина чте́нїе. [Глава̀ а҃і, ст. і҃- г҃і.]
Та́кѡ глаго́летъ гдⷭ҇ь: прїимѝ же́злъ мо́й до́брый, и҆ ѿве́ргꙋ є҆го̀, є҆́же разори́ти завѣ́тъ мо́й, є҆го́же завѣща́хъ ко всѣ̑мъ лю́демъ: и҆ разори́тсѧ въ де́нь ѻ҆́ный, и҆ ᲂу҆разꙋмѣ́ютъ ханане́и ѻ҆́вцы храни̑мыѧ мнѣ̀, занѐ сло́во гдⷭ҇не є҆́сть. И҆ рекꙋ̀ къ ни̑мъ: а҆́ще добро̀ пред̾ ва́ми є҆́сть, дади́те мздꙋ̀ мою̀, и҆лѝ ѿрецы́тесѧ: и҆ поста́виша мздꙋ̀ мою̀ три́десѧть сре́брєникъ. И҆ речѐ гдⷭ҇ь ко мнѣ̀: вложѝ ѧ҆̀ въ горни́ло, и҆ смотрѝ а҆́ще и҆скꙋше́но є҆́сть, и҆́мже ѡ҆́бразомъ и҆скꙋше́нъ бы́хъ ѡ҆ ни́хъ. и҆ прїѧ́хъ три́десѧть сре́брєникъ, и҆ вложи́хъ и҆́хъ въ хра́мъ гдⷭ҇нь въ горни́ло.
Та́же а҆по́столъ къ гала́тѡмъ, зача́ло сє҃і, ѿ полꙋ̀.
Бра́тїе, мнѣ̀ да не бꙋ́детъ хвали́тисѧ, то́кмѡ ѡ҆ крⷭ҇тѣ̀ гдⷭ҇а на́шегѡ і҆и҃са хрⷭ҇та̀, и҆́мже мнѣ̀ мі́ръ распѧ́сѧ, и҆ а҆́зъ мі́рꙋ. Ѡ҆ хрⷭ҇тѣ́ бо і҆и҃сѣ ни ѡ҆брѣ́занїе что̀ мо́жетъ, ни неѡбрѣ́занїе, но нова̀ тва́рь. И҆ є҆ли́цы пра́виломъ си́мъ жи́тельствꙋютъ, ми́ръ на ни́хъ и҆ млⷭ҇ть, и҆ на і҆и҃ли бж҃їи. Про́чее трꙋды̀ да никто́же мѝ дае́тъ: а҆́зъ бо ꙗ҆́звы гдⷭ҇а і҆и҃са на тѣ́лѣ мое́мъ ношꙋ̀. Бл҃года́ть гдⷭ҇а на́шегѡ і҆и҃са хрⷭ҇та̀, со дꙋ́хомъ ва́шимъ бра́тїе, а҆ми́нь.
Та́же є҆ѵⷢ҇лїе ѿ матѳе́а, зача́ло р҃і: Во вре́мѧ ѻ҆́но, ᲂу҆́трꙋ бы́вшꙋ, совѣ́тъ сотвори́ша всѝ а҆рхїере́є: Чте́тъ же въ рѧ́дъ и҆ зача́ло ра҃і, рв҃і, рг҃і. Коне́цъ: И҆ ма́ти сы̑нꙋ зеведе́ѡвꙋ. Та́же, Стѡпы̀ моѧ̑ напра́ви по словесѝ твоемꙋ̀: Да и҆спо́лнѧтсѧ ᲂу҆ста̀ моѧ̑ хвале́нїѧ: Трист҃о́е. И҆ по Ѻ҆́ч҃е на́шъ:
Конда́къ, гла́съ и҃: На́съ ра́ди распѧ́таго прїиди́те всѝ воспои́мъ, того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
Та́же, Гдⷭ҇и поми́лꙋй, м҃. И҆́же на всѧ́кое вре́мѧ: Гдⷭ҇и поми́лꙋй, три́жды. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ. И҆́менемъ гдⷭ҇нимъ бл҃гословѝ ѻ҆́тче. Сщ҃е́нникъ: Бж҃е, ᲂу҆ще́дри ны̀: Хрⷭ҇тѐ свѣ́те и҆́стинный: Посе́мъ пое́мъ тре́тїй ча́съ. Глаго́лемъ: Прїиди́те поклони́мсѧ: три́жды.
И҆ ѱало́мъ л҃д:
Сꙋдѝ гдⷭ҇и, ѡ҆би́дѧщыѧ мѧ̀, поборѝ борю́щыѧ мѧ̀. Прїимѝ ѻ҆рꙋ́жїе и҆ щи́тъ, и҆ воста́ни въ по́мощь мою̀. И҆зсꙋ́ни ме́чь, и҆ заключѝ сопроти́въ гонѧ́щихъ мѧ̀: рцы̀ дꙋшѝ мое́й: сп҃се́нїе твоѐ є҆́смь а҆́зъ. Да постыдѧ́тсѧ и҆ посра́мѧтсѧ и҆́щꙋщїи дꙋ́шꙋ мою̀: да возвратѧ́тсѧ вспѧ́ть, и҆ постыдѧ́тсѧ мы́слѧщїи мѝ ѕла̑ѧ. Да бꙋ́дꙋтъ ꙗ҆́кѡ пра́хъ пред̾ лице́мъ вѣ́тра, и҆ а҆́гг҃лъ гдⷭ҇нь ѡ҆скорблѧ́ѧ и҆̀хъ. Да бꙋ́детъ пꙋ́ть и҆́хъ тьма̀ и҆ по́лзокъ, и҆ а҆́гг҃лъ гдⷭ҇нь погонѧ́ѧ и҆̀хъ. Ꙗ҆́кѡ тꙋ́не скры́ша мѝ па́гꙋбꙋ сѣ́ти своеѧ̀, всꙋ́е поноси́ша дꙋшѝ мое́й. Да прїи́детъ є҆мꙋ̀ сѣ́ть, ю҆́же не вѣ́сть, и҆ лови́тва, ю҆́же скры̀, да ѡ҆б̾и́метъ и҆̀: и҆ въ сѣ́ть да впаде́тъ въ ню̀: дꙋша́ же моѧ̀ возра́дꙋетсѧ ѡ҆ гдⷭ҇ѣ, возвесели́тсѧ ѡ҆ сп҃се́нїи є҆гѡ̀. Всѧ̑ кѡ́сти моѧ̑ рекꙋ́тъ: гдⷭ҇и, гдⷭ҇и, кто̀ подо́бенъ тебѣ̀; и҆збавлѧ́ѧй ни́ща и҆з̾ рꙋкѝ крѣ́пльшихъ є҆гѡ̀, и҆ ни́ща и҆ ᲂу҆бо́га ѿ расхища́ющихъ є҆го̀. Воста́вше на мѧ̀ свидѣ́телє непра́веднїи, ꙗ҆̀же не вѣ́дѣхъ, вопроша́хꙋ мѧ̀. Возда́ша мѝ лꙋка̑ваѧ воз̾ блага̑ѧ, и҆ безча́дїе дꙋшѝ мое́й. А҆́зъ же, внегда̀ ѻ҆нѝ стꙋжа́хꙋ мѝ, ѡ҆блача́хсѧ во вре́тище, и҆ смирѧ́хъ посто́мъ дꙋ́шꙋ мою̀, и҆ мл҃тва моѧ̀ въ нѣ́дро моѐ возврати́тсѧ. Ꙗ҆́кѡ бли́жнемꙋ, ꙗ҆́кѡ бра́тꙋ на́шемꙋ, та́кѡ ᲂу҆гожда́хъ: ꙗ҆́кѡ пла́чѧ и҆ сѣ́тꙋѧ, та́кѡ смирѧ́хсѧ. И҆ на мѧ̀ возвесели́шасѧ, и҆ собра́шасѧ, собра́шасѧ на мѧ̀ ра̑ны, и҆ не позна́хъ: раздѣли́шасѧ, и҆ не ᲂу҆мили́шасѧ. И҆скꙋси́ша мѧ̀, подражни́ша мѧ̀ подражне́нїемъ, поскрежета́ша на мѧ̀ зꙋбы̀ свои́ми. Гдⷭ҇и, когда̀ ᲂу҆́зриши; ᲂу҆стро́й дꙋ́шꙋ мою̀ ѿ ѕлодѣ́йства и҆́хъ, ѿ лє́въ є҆диноро́днꙋю мою̀. И҆сповѣ́мсѧ тебѣ̀ въ цр҃кви мно́зѣ, въ лю́дехъ тѧ́жцѣхъ восхвалю́ тѧ. Да не возра́дꙋютсѧ ѡ҆ мнѣ̀ враждꙋ́ющїи мѝ непра́веднѡ. ненави́дѧщїи мѧ̀ тꙋ́не, и҆ помиза́ющїи ѻ҆чи́ма. Ꙗ҆́кѡ мнѣ̀ ᲂу҆́бѡ ми̑рнаѧ глаго́лахꙋ, и҆ на гнѣ́въ ле́сти помышлѧ́хꙋ. Разшири́ша на мѧ̀ ᲂу҆ста̀ своѧ̑, рѣ́ша: бл҃гоже бл҃гоже, ви́дѣша ѻ҆́чи на́ши. Ви́дѣлъ є҆сѝ гдⷭ҇и, да не премолчи́ши: гдⷭ҇и не ѿстꙋпѝ ѿ менѐ. Воста́ни гдⷭ҇и, и҆ вонмѝ сꙋдꙋ̀ моемꙋ̀, бж҃е мо́й, и҆ гдⷭ҇и мо́й, на прю̀ мою̀. Сꙋди́ ми гдⷭ҇и, по пра́вдѣ твое́й, гдⷭ҇и бж҃е мо́й, и҆ да не возра́дꙋютсѧ ѡ҆ мнѣ̀. Да не рекꙋ́тъ въ сердца́хъ свои́хъ: бл҃гоже бл҃гоже дꙋшѝ на́шей: нижѐ да рекꙋ́тъ: пожро́хомъ є҆го̀. Да постыдѧ́тсѧ и҆ посра́мѧтсѧ вкꙋ́пѣ ра́дꙋющїисѧ ѕлѡ́мъ мои̑мъ: да ѡ҆блекꙋ́тсѧ въ стꙋ́дъ и҆ сра́мъ велерѣ́чꙋющїи на мѧ̀. Да возра́дꙋютсѧ и҆ возвеселѧ́тсѧ хотѧ́щїи пра́вды моеѧ̀: и҆ да рекꙋ́тъ вы́нꙋ, да возвели́читсѧ гдⷭ҇ь, хотѧ́щїи ми́ра рабꙋ̀ є҆гѡ̀. И҆ ѧ҆зы́къ мо́й поꙋчи́тсѧ пра́вдѣ твое́й, ве́сь де́нь хвалѣ̀ твое́й.
Ѱало́мъ р҃и:
Бж҃е, хвалы̀ моеѧ̀ не премолчѝ. Ꙗ҆́кѡ ᲂу҆ста̀ грѣ́шнича, и҆ ᲂу҆ста̀ льсти́вагѡ на мѧ̀ ѿверзо́шасѧ, глаго́лаша на мѧ̀ ѧ҆зы́комъ льсти́вымъ: И҆ словесы̀ ненави́стными ѡ҆быдо́ша мѧ̀, и҆ бра́шасѧ со мно́ю тꙋ́не. Вмѣ́стѡ є҆́же люби́ти мѧ̀, ѡ҆болга́хꙋ мѧ̀, а҆́зъ же молѧ́хсѧ. И҆ положи́ша на мѧ̀ ѕла̑ѧ за бл҃га̑ѧ, и҆ не́нависть за возлюбле́нїе моѐ. Поста́ви на него̀ грѣ́шника, и҆ дїа́волъ да ста́нетъ ѡ҆деснꙋ́ю є҆гѡ̀. Внегда̀ сꙋди́тисѧ є҆мꙋ̀, да и҆зы́детъ ѡ҆сꙋжде́нъ, и҆ мл҃тва є҆гѡ̀ да бꙋ́детъ въ грѣ́хъ. Да бꙋ́дꙋтъ дні́е є҆гѡ̀ ма́ли, и҆ є҆пі́скопство є҆гѡ̀ да прїи́метъ и҆́нъ. Да бꙋ́дꙋтъ сы́нове є҆гѡ̀ си́ри, и҆ жена̀ є҆гѡ̀ вдова̀. Дви́жꙋщесѧ да преселѧ́тсѧ сы́нове є҆гѡ̀, и҆ воспро́сѧтъ, да и҆згна́ни бꙋ́дꙋтъ и҆з̾ домѡ́въ свои́хъ. Да взы́щетъ заимода́вецъ всѧ̑, є҆ли̑ка сꙋ́ть є҆гѡ̀, и҆ да восхи́тѧтъ чꙋжді́и трꙋды̀ є҆гѡ̀. Да не бꙋ́детъ є҆мꙋ̀ застꙋ́пника, нижѐ да бꙋ́детъ ᲂу҆щедрѧ́ѧй сироты̑ є҆гѡ̀. Да бꙋ́дꙋтъ ча̑да є҆гѡ̀ въ погꙋбле́нїе, въ ро́дѣ є҆ди́номъ да потреби́тсѧ и҆́мѧ є҆гѡ̀. Да воспомѧне́тсѧ беззако́нїе ѻ҆тє́цъ є҆гѡ̀ пред̾ гдⷭ҇емъ, и҆ грѣ́хъ ма́тере є҆гѡ̀ да не ѡ҆чи́ститсѧ. Да бꙋ́дꙋтъ пред̾ гдⷭ҇емъ вы́нꙋ, и҆ да потреби́тсѧ ѿ землѝ па́мѧть и҆́хъ. Зане́же не помѧнꙋ̀ сотвори́ти млⷭ҇ть, и҆ погна̀ человѣ́ка ни́ща и҆ ᲂу҆бо́га, и҆ ᲂу҆миле́на се́рдцемъ ᲂу҆мертви́ти. И҆ возлюбѝ клѧ́твꙋ, и҆ прїи́детъ є҆мꙋ̀: и҆ не восхотѣ̀ бл҃гослове́нїѧ, и҆ ᲂу҆дали́тсѧ ѿ негѡ̀. И҆ ѡ҆блече́сѧ въ клѧ́твꙋ ꙗ҆́кѡ въ ри́зꙋ, и҆ вни́де ꙗ҆́кѡ вода̀ во ᲂу҆тро́бꙋ є҆гѡ̀, и҆ ꙗ҆́кѡ є҆ле́й въ кѡ́сти є҆гѡ̀. Да бꙋ́детъ є҆мꙋ̀ ꙗ҆́кѡ ри́за, въ ню́же ѡ҆блачи́тсѧ, и҆ ꙗ҆́кѡ по́ѧсъ, и҆́мже вы́нꙋ ѡ҆поѧсꙋ́етсѧ. Сїѐ дѣ́ло ѡ҆болга́ющихъ мѧ̀ ᲂу҆ гдⷭ҇а, и҆ глаго́лющихъ лꙋка̑ваѧ на дꙋ́шꙋ мою̀. И҆ ты̀ гдⷭ҇и гдⷭ҇и, сотворѝ со мно́ю и҆́мене ра́ди твоегѡ̀, ꙗ҆́кѡ бл҃га млⷭ҇ть твоѧ̀. И҆зба́ви мѧ̀, ꙗ҆́кѡ ни́щъ и҆ ᲂу҆бо́гъ є҆́смь а҆́зъ, и҆ се́рдце моѐ смѧте́сѧ внꙋ́трь менѐ. Ꙗ҆́кѡ сѣ́нь внегда̀ ᲂу҆клони́тисѧ є҆́й, ѿѧ́хсѧ, стрѧсо́хсѧ ꙗ҆́кѡ прꙋ́зи. Кѡлѣ́на моѧ̑ и҆знемого́ста ѿ поста̀, и҆ пло́ть моѧ̀ и҆змѣни́сѧ є҆ле́а ра́ди. И҆ а҆́зъ бы́хъ поноше́нїе и҆̀мъ: ви́дѣша мѧ̀, покива́ша глава́ми свои́ми. Помози́ ми гдⷭ҇и бж҃е мо́й, и҆ сп҃си́ мѧ по млⷭ҇ти твое́й. И҆ да разꙋмѣ́ютъ, ꙗ҆́кѡ рꙋка̀ твоѧ̀ сїѧ̀, и҆ ты̀ гдⷭ҇и, сотвори́лъ є҆сѝ ю҆̀. Прокленꙋ́тъ ті́и, и҆ ты̀ бл҃гослови́ши: востаю́щїи на мѧ̀ да постыдѧ́тсѧ, ра́бъ же тво́й возвесели́тсѧ. Да ѡ҆блекꙋ́тсѧ ѡ҆болга́ющїи мѧ̀ въ срамотꙋ̀, и҆ ѡ҆де́ждꙋтсѧ ꙗ҆́кѡ ѻ҆де́ждею стꙋдо́мъ свои́мъ. И҆сповѣ́мсѧ гдⷭ҇ви ѕѣлѡ̀ ᲂу҆сты̀ мои́ми, и҆ посредѣ̀ мно́гихъ восхвалю̀ є҆го̀. Ꙗ҆́кѡ предста̀ ѡ҆деснꙋ́ю ᲂу҆бо́гагѡ, є҆́же сп҃стѝ ѿ гонѧ́щихъ дꙋ́шꙋ мою̀.
Ѱало́мъ н҃:
Поми́лꙋй мѧ̀ бж҃е, по вели́цѣй млⷭ҇ти твое́й, и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. Наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. Ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. Тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ: ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши внегда̀ сꙋди́ти тѝ. Се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. Се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. Ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ᲂу҆бѣлю́сѧ: Слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ ко́сти смирє́нныѧ. Ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й. Не ѿве́ржи менѐ ѿ лица̀ твоегѡ̀, и҆ дх҃а твоегѡ̀ ст҃а́гѡ не ѿимѝ ѿ менѐ. Возда́ждь мѝ ра́дость сп҃се́нїѧ твоегѡ̀, и҆ дх҃омъ влⷣчнимъ ᲂу҆тверди́ мѧ. Наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. И҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. Гдⷭ҇и, ᲂу҆стнѣ̀ моѝ ѿве́рзеши, и҆ ᲂу҆ста̀ моѧ̑ возвѣстѧ́тъ хвалꙋ̀ твою̀. Ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ᲂу҆́бѡ, всесожже́нїѧ не бл҃говоли́ши. Же́ртва бг҃ꙋ дх҃ъ сокрꙋше́нъ, се́рдце сокрꙋше́нно и҆ смире́нно бг҃ъ не ᲂу҆ничижи́тъ. Оу҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. Тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ, тогда̀ возложа́тъ на ѻ҆лта́рь тво́й тельцы̀.
Сла́ва, и҆ ны́нѣ, а҆ллилꙋ́їа, три́жды. Гдⷭ҇и поми́лꙋй, три́жды.
Сла́ва, тропа́рь, гла́съ ѕ҃:
Гдⷭ҇и, ѡ҆сꙋди́ша тѧ̀ і҆ꙋде́є на сме́рть, жи́знь всѣ́хъ, и҆̀же чермно́е мо́ре жезло́мъ проше́дшїи, на крⷭ҇тѣ́ тѧ пригвозди́ша: и҆ и҆̀же ѿ ка́мене ме́дъ сса́вшїи, же́лчь тебѣ̀ принесо́ша. но во́лею претерпѣ́лъ є҆сѝ, да на́съ свободи́ши ѿ рабо́ты вра́жїѧ, хрⷭ҇тѐ бж҃е, сла́ва тебѣ̀.
И҆ ны́нѣ, бг҃оро́диченъ: Бцⷣе ты̀ є҆сѝ лоза̀:
И҆ пое́мъ трѝ тропарѝ ѿ двꙋна́десѧти, повторѧ́юще ѧ҆̀.
Гла́съ и҃.
Стра́ха ра́ди і҆ꙋде́йскагѡ, дрꙋ́гъ тво́й и҆ бли́жнїй пе́тръ ѿве́ржесѧ тебѐ гдⷭ҇и, и҆ рыда́ѧ си́це вопїѧ́ше: сле́зъ мои́хъ не премолчѝ, рѣ́хъ бо сохрани́ти вѣ́рꙋ ще́дре, и҆ не сохрани́хъ: и҆ на́ше покаѧ́нїе та́кожде прїимѝ, и҆ поми́лꙋй на́съ.
Па́ки то́йже.
Та́же сті́хъ: Глаго́лы моѧ̀ внꙋшѝ гдⷭ҇и:
Пре́жде чⷭ҇тна́гѡ твоегѡ̀ крⷭ҇та̀, во́инѡмъ рꙋга́ющымсѧ тебѣ̀ гдⷭ҇и, ᲂу҆́мнаѧ вѡ́инства дивлѧ́хꙋсѧ: ѡ҆бложи́лсѧ бо є҆сѝ вѣнце́мъ порꙋга́нїѧ, зе́млю живописа́вый цвѣ́ты, багрѧни́цею порꙋга́нїѧ ѡ҆дѣ́ѧлсѧ є҆сѝ, ѻ҆́блаки ѡ҆дѣва́ѧй тве́рдь. таковы́мъ бо смотре́нїемъ разꙋмѣ́сѧ твоѐ бл҃гоꙋтро́бїе хрⷭ҇тѐ, ве́лїѧ твоѧ̀ млⷭ҇ть, сла́ва тебѣ̀.
Сті́хъ: Вонмѝ гла́сꙋ моле́нїѧ моегѡ̀.
И҆ па́ки то́йже.
Сла́ва, гла́съ є҃: Влеко́мь на крⷭ҇тъ си́це вопїѧ́лъ є҆сѝ гдⷭ҇и: за ко́е дѣ́ло хо́щете мѧ̀ распѧ́ти і҆ꙋде́є; ꙗ҆́кѡ разсла́блєнныѧ ва́шѧ стѧгнꙋ́хъ, занѐ мертвецы̀ а҆́ки ѿ сна̀ возста́вихъ, кровоточи́вꙋю и҆сцѣли́хъ, ханане́ю поми́ловахъ. за ко́е дѣ́ло хо́щете мѧ̀ ᲂу҆би́ти і҆ꙋде́є; но ᲂу҆́зрите, въ него́же ны́нѣ пробода́ете хрⷭ҇та̀, беззако́ннїи.
И҆ ны́нѣ, па́ки то́йже:
Прокі́менъ, гла́съ д҃: Ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ. Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Прⷪ҇ро́чества и҆са́їина чте́нїе. [Глава̀ и҃, ст. д҃- а҃і.]
Гдⷭ҇ь дае́тъ мнѣ̀ ѧ҆зы́къ наꙋче́нїѧ, є҆́же разꙋмѣ́ти, є҆гда̀ подоба́етъ рещѝ сло́во: положи́ мѧ ᲂу҆́трѡ ᲂу҆́трѡ, приложи́ ми ᲂу҆́хо є҆́же слы́шати. И҆ наказа́нїе гдⷭ҇не ѿверза́етъ ᲂу҆́ши моѝ, а҆́зъ же не проти́влюсѧ, ни противоглаго́лю. Плещѝ моѝ вда́хъ на ра̑ны и҆ лани̑тѣ моѝ на заꙋшє́нїѧ, лица́ же моегѡ̀ не ѿврати́хъ ѿ стꙋда̀ заплева́нїй. И҆ гдⷭ҇ь гдⷭ҇ь помо́щникъ мѝ бы́сть: сегѡ̀ ра́ди не ᲂу҆срами́хсѧ, но положи́хъ лицѐ своѐ а҆́ки тве́рдый ка́мень, и҆ разꙋмѣ́хъ, ꙗ҆́кѡ не постыждꙋ́сѧ. Занѐ приближа́етсѧ ѡ҆правда́вый мѧ̀: кто̀ прѧ́йсѧ со мно́ю; да сопротивоста́нетъ мнѣ̀ кꙋ́пнѡ: и҆ кто̀ сꙋдѧ́йсѧ со мно́ю; да прибли́житсѧ ко мнѣ̀. Сѐ гдⷭ҇ь гдⷭ҇ь помо́жетъ мѝ: кто̀ ѡ҆ѕло́битъ мѧ̀; сѐ всѝ вы̀ ꙗ҆́кѡ ри́за ѡ҆бетша́ете, и҆ ꙗ҆́кѡ мо́лїе и҆з̾ѧ́стъ вы̀. Кто̀ въ ва́съ боѧ́йсѧ гдⷭ҇а; да послꙋ́шаетъ гла́са ѻ҆́трока є҆гѡ̀: ходѧ́щїи во тьмѣ̀, и҆ нѣ́сть и҆̀мъ свѣ́та: надѣ́йтесѧ на и҆́мѧ гдⷭ҇не, и҆ ᲂу҆тверди́тесѧ ѡ҆ бз҃ѣ. Сѐ всѝ вы̀ ѻ҆́гнь раждиза́ете, и҆ ᲂу҆крѣплѧ́ете пла́мень: ходи́те свѣ́томъ ѻ҆гнѧ̀ ва́шегѡ, и҆ пла́менемъ, є҆го́же разжего́сте: менѐ ра́ди бы́ша сїѧ̑ ва́мъ, въ печа́ли ᲂу҆́спнете.
Та́же а҆по́столъ, къ ри́млѧнѡмъ посла́нїѧ, зача́ло п҃и ѿ полꙋ̀.
Бра́тїе, хрⷭ҇то́съ сꙋ́щымъ на́мъ немѡщны́мъ, по вре́мени за нечести́выхъ ᲂу҆́мре. Є҆два́ бо за пра́ведника кто̀ ᲂу҆́мретъ: за бл҃га́го бо не́гли кто̀ и҆ де́рзнетъ ᲂу҆мре́ти: Составлѧ́етъ же свою̀ любо́вь въ на́съ бг҃ъ, ꙗ҆́кѡ є҆щѐ грѣ́шникѡмъ сꙋ́щымъ на́мъ, хрⷭ҇то́съ за ны̀ ᲂу҆́мре. Мно́гѡ же ᲂу҆̀бо па́че ѡ҆правда́ни бы́вше ны́нѣ кро́вїю є҆гѡ̀, сп҃се́мсѧ и҆́мъ ѿ гнѣ́ва. А҆́ще бо вразѝ бы́вше, примири́хомсѧ бг҃ꙋ сме́ртїю сн҃а є҆гѡ̀, мно́жае па́че примири́вшесѧ, сп҃се́мсѧ въ животѣ̀ є҆гѡ̀.
Є҆ѵⷢ҇лїе ѿ ма́рка, зача́ло ѯ҃ѕ, ѯ҃з и҆ ѯ҃и, въ рѧ́дъ. Во вре́мѧ ѻ҆́но, совѣ́тъ сотвори́ша а҆рхїере́и со ста́рцы: Коне́цъ: Ꙗ҆̀же взыдо́ша съ ни́мъ во і҆ерⷭ҇ли́мъ. И҆ посе́мъ чте́мъ по сказа́нїи, є҆́же ѿ матѳе́а, сло́во крⷭ҇тное. Та́же: Гдⷭ҇ь бг҃ъ бл҃гослове́нъ: Трист҃о́е. И҆ по Ѻ҆́ч҃е на́шъ: Конда́къ: На́съ ра́ди распѧ́таго: Гдⷭ҇и поми́лꙋй, м҃. Мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче. І҆ере́й: Бж҃е, ᲂу҆ще́дри ны̀:
Влⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е, є҆ди́но бж҃ество̀, є҆ди́на си́ла, поми́лꙋй мѧ̀ грѣ́шнаго и҆ и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.