Во ст҃ы́й и҆ вели́кїй четверто́къ ве́чера,
во в҃-й ча́съ но́щи зна́менꙋетъ. И҆ собра́вшымсѧ на́мъ во хра́мъ, бл҃гослови́вшꙋ сщ҃е́нникꙋ, пое́мъ нача́ло по ѻ҆бы́чаю, ꙗ҆́коже ᲂу҆каза́сѧ въ четверто́къ є҃ недѣ́ли. Та́же шестоѱа́лмїе. Посе́мъ, є҆ктенїа̀ вели́каѧ, и҆ по возгла́сѣ пое́мъ, А҆ллилꙋ́їа, на гла́съ и҃. И҆ тропа́рь: Є҆гда̀ сла́внїи ᲂу҆ч҃нцы̀: три́жды, ко́снѡ и҆ со сладкопѣ́нїемъ. Пи́санъ въ вели́кїй четверто́къ на ᲂу҆́трени, ли́стъ ук҃д на ѡ҆боро́тѣ. Та́же, є҆ктенїа̀ ма́лаѧ. И҆ даю́тсѧ свѣщы̀ бра́тїи ѿ є҆кклисїа́рха. И҆ глаго́летъ сщ҃е́нникъ: И҆ ѡ҆ сподо́битисѧ на́мъ: И҆ чте́тъ пе́рвое є҆ѵⷢ҇лїе ѿ і҆ѡа́нна, завѣ́та ст҃ы́хъ стрⷭ҇те́й, зача́ло м҃ѕ: Речѐ гдⷭ҇ь свои̑мъ ᲂу҆ч҃нкѡ́мъ: ны́нѣ просла́висѧ сн҃ъ чл҃вѣ́ческїй: Коне́цъ: И҆ ᲂу҆ч҃нцы̀ є҆гѡ̀. И҆ сконча́вшꙋсѧ є҆ѵⷢ҇лїю, пое́мъ: Сла́ва долготерпѣ́нїю твоемꙋ̀ гдⷭ҇и. И҆ а҆́бїе пое́мъ а҆нтїфѡ́ны, повторѧ́юще всѧ̑ тропарѝ.
А҆нтїфѡ́нъ а҃.
Гла́съ и҃: Кнѧ́зи лю́дстїи собра́шасѧ на гдⷭ҇а, и҆ на хрⷭ҇та̀ є҆гѡ̀.
То́йже: Сло́во законопрестꙋ́пное возложи́ша на мѧ̀, гдⷭ҇и гдⷭ҇и, не ѡ҆ста́ви менѐ.
Чꙋ̑вствїѧ на̑ша чи́ста хрⷭ҇то́ви предста́вимъ, и҆ ꙗ҆́кѡ дрꙋ́зи є҆гѡ̀, дꙋ́шы на́шѧ пожре́мъ є҆гѡ̀ ра́ди, и҆ не попече́ньми жите́йскими соꙋгнета́емсѧ ꙗ҆́кѡ і҆ꙋ́да, но въ клѣ́техъ на́шихъ возопїи́мъ: ѻ҆́ч҃е на́шъ, и҆́же на нб҃сѣ́хъ, ѿ лꙋка́вагѡ и҆зба́ви на́съ.
Сла́ва, бг҃оро́диченъ: Дв҃а родила̀ є҆сѝ неискꙋсобра́чнаѧ, и҆ дв҃а пребыла̀ є҆сѝ мт҃и безневѣ́стнаѧ, бцⷣе мр҃і́е: хрⷭ҇та̀ бг҃а на́шего молѝ сп҃сти́сѧ на́мъ.
И҆ ны́нѣ, то́йже.
А҆нтїфѡ́нъ в҃.
Гла́съ ѕ҃: Течѐ глаго́лѧ і҆ꙋ́да беззакѡ́ннымъ кни́жникѡмъ: что̀ мнѣ̀ хо́щете да́ти, и҆ а҆́зъ ва́мъ преда́мъ є҆го̀; среди́ же совѣщава́ющихъ са́мъ стоѧ́лъ є҆сѝ неви́димѡ совѣщава́емый: сердцевѣ́дче, пощадѝ дꙋ́шы на́шѧ.
Млⷭ҇тїю бг҃ови послꙋ́жимъ, ꙗ҆́коже марі́а на ве́чери, и҆ не стѧ́жимъ сребролю́бїѧ, ꙗ҆́кѡ і҆ꙋ́да: да всегда̀ со хрⷭ҇то́мъ бг҃омъ бꙋ́демъ.
Сла́ва, бг҃оро́диченъ: Є҆го́же родила̀ є҆сѝ дв҃о неизрече́ннѡ, вы́нꙋ ꙗ҆́кѡ чл҃вѣколю́бца не преста́й молѧ́щи, да ѿ бѣ́дъ сп҃се́тъ всѧ̑ къ тебѣ̀ прибѣга́ющыѧ.
И҆ ны́нѣ, то́йже.
А҆нтїфѡ́нъ г҃.
Гла́съ в҃: Ла́зарева ра́ди воста́нїѧ гдⷭ҇и, ѡ҆са́нна тебѣ̀ зва́хꙋ дѣ́ти є҆врє́йскїѧ чл҃вѣколю́бче. беззако́нный же і҆ꙋ́да не восхотѣ̀ разꙋмѣ́ти.
На ве́чери твое́й хрⷭ҇тѐ бж҃е, ᲂу҆ч҃нкѡ́мъ твои̑мъ предглаго́лалъ є҆сѝ: є҆ди́нъ ѿ ва́съ преда́стъ мѧ̀. беззако́нный же і҆ꙋ́да не восхотѣ̀ разꙋмѣ́ти.
І҆ѡа́ннꙋ вопроси́вшꙋ: гдⷭ҇и, предаѧ́й тѧ̀ кто́ є҆сть; того̀ хлѣ́бомъ показа́лъ є҆сѝ. беззако́нный же і҆ꙋ́да не восхотѣ̀ разꙋмѣ́ти.
На три́десѧтихъ сре́бреницѣхъ гдⷭ҇и, и҆ на лобза́нїи льсти́вномъ, и҆ска́хꙋ і҆ꙋде́є ᲂу҆би́ти тѧ̀. беззако́нный же і҆ꙋ́да не восхотѣ̀ разꙋмѣ́ти.
На ᲂу҆мове́нїи твое́мъ хрⷭ҇тѐ бж҃е, ᲂу҆ч҃нкѡ́мъ твои̑мъ повелѣ́лъ є҆сѝ: си́це твори́те, ꙗ҆́коже ви́дите. беззако́нный же і҆ꙋ́да не восхотѣ̀ разꙋмѣ́ти.
Бди́те и҆ моли́тесѧ, да не вни́дете въ напа́сть, ᲂу҆ч҃нкѡ́мъ твои̑мъ хрⷭ҇тѐ бж҃е на́шъ глаго́лалъ є҆сѝ. беззако́нный же і҆ꙋ́да не восхотѣ̀ разꙋмѣ́ти.
Сла́ва, бг҃оро́диченъ: Сп҃сѝ ѿ бѣ́дъ рабы̑ твоѧ̑ бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ нерꙋши́мѣй стѣнѣ̀ и҆ предста́тельствꙋ.
И҆ ны́нѣ, то́йже.
Сѣда́ленъ. [Не сѣди́мъ же на сицевы́хъ сѣда́льнахъ, за є҆́же сщ҃е́нникꙋ кади́ти ст҃ы́й ѻ҆лта́рь, но стоѧ́ще пое́мъ ѧ҆̀.]
Гла́съ з҃: На ве́чери ᲂу҆ч҃нкѝ пита́ѧ, и҆ притворе́нїе преда́нїѧ вѣ́дый, на не́й і҆ꙋ́дꙋ ѡ҆бличи́лъ є҆сѝ, неиспра́вленна ᲂу҆́бѡ сего̀ вѣ́дый: позна́ти же всѣ̑мъ хотѧ̀, ꙗ҆́кѡ во́лею преда́лсѧ є҆сѝ, да мі́ръ и҆схити́ши ѿ чꙋжда́гѡ: долготерпѣли́ве сла́ва тебѣ̀.
Сла́ва, коне́цъ. И҆ ны́нѣ, ве́сь. Та́же: И҆ ѡ҆ сподо́битисѧ на́мъ: И҆ чте́тъ сщ҃е́нникъ второ́е є҆ѵⷢ҇лїе ѿ і҆ѡа́нна, зача́ло н҃и: Во вре́мѧ ѻ҆́но, и҆зы́де і҆и҃съ со ᲂу҆ч҃нкѝ: Коне́цъ: Но да ꙗ҆дѧ́тъ фа́скꙋ.
По є҆ѵⷢ҇лїи же пое́мъ а҆нтїфѡ́нъ д҃.
Гла́съ є҃: Дне́сь і҆ꙋ́да ѡ҆ставлѧ́етъ ᲂу҆ч҃тлѧ, и҆ прїе́млетъ дїа́вола, ѡ҆слѣплѧ́етсѧ стра́стїю сребролю́бїѧ, ѿпа́даетъ свѣ́та ѡ҆мраче́нный: ка́кѡ бо можа́ше зрѣ́ти, свѣти́ло прода́вый на три́десѧтихъ сре́бреницѣхъ; но на́мъ возсїѧ̀ страда́вый за мі́ръ. къ немꙋ́же возопїи́мъ: пострада́вый и҆ сострада́вый человѣ́кѡмъ, гдⷭ҇и сла́ва тебѣ̀.
Дне́сь і҆ꙋ́да притворѧ́етъ бг҃оче́стїе, и҆ ѿчꙋжда́етсѧ дарова́нїѧ, сы́й ᲂу҆чени́къ быва́етъ преда́тель: во ѻ҆бы́чномъ лобза́нїи ле́сть покрыва́етъ, и҆ предпочита́етъ влⷣчнїѧ любвѐ, несмы́сленнѡ рабо́тати сребролю́бїю, наста́вникъ бы́въ собо́рища беззако́ннагѡ: мы́ же и҆мꙋ́ще сп҃се́нїе хрⷭ҇та̀, того̀ просла́вимъ.
Гла́съ а҃: Братолю́бїе стѧ́жимъ ꙗ҆́кѡ во хрⷭ҇тѣ̀ бра́тїѧ, а҆ не немлⷭ҇тивное є҆́же къ бли̑жнимъ на́шымъ: да не ꙗ҆́кѡ ра́бъ ѡ҆сꙋ́димсѧ неми́лостивый, пѣ́нѧзей ра́ди, и҆ ꙗ҆́кѡ і҆ꙋ́да раска́ѧвшесѧ, ничто́же по́льзꙋемсѧ.
Сла́ва, бг҃оро́диченъ: Пресла̑внаѧ ѡ҆ тебѣ̀ глаго́лашасѧ вездѣ̀, ꙗ҆́кѡ родила̀ є҆сѝ пло́тїю всѣ́хъ творца̀, бцⷣе мр҃і́е, всепѣ́таѧ и҆ неискꙋсобра́чнаѧ.
И҆ ны́нѣ, то́йже.
А҆нтїфѡ́нъ є҃.
Гла́съ ѕ҃: Оу҆чени́къ ᲂу҆ч҃тлѧ соглаша́ше цѣ́нꙋ, и҆ на три́десѧтихъ сре́бреницѣхъ продадѐ гдⷭ҇а, лобза́нїемъ льсти́внымъ предаѧ̀ є҆го̀ беззако́нникѡмъ на сме́рть.
Дне́сь глаго́лаше зижди́тель нб҃сѐ и҆ землѝ свои̑мъ ᲂу҆ченикѡ́мъ: прибли́жисѧ ча́съ, и҆ приспѣ̀ і҆ꙋ́да предаѧ́й менѐ, да никто́же ѿве́ржетсѧ менѐ, ви́дѧ мѧ̀ на крⷭ҇тѣ̀ посредѣ̀ двою̀ разбѡ́йникꙋ: страждꙋ́ бо ꙗ҆́кѡ чл҃вѣ́къ, и҆ сп҃сꙋ̀ ꙗ҆́кѡ чл҃вѣколю́бецъ, въ мѧ̀ вѣ́рꙋющыѧ.
Сла́ва, бг҃оро́диченъ: Неизрече́ннѡ въ послѣ̑днѧѧ заче́ншаѧ, и҆ ро́ждшаѧ созда́телѧ твоего̀, того̀ молѝ сп҃сти́сѧ дꙋша́мъ на́шымъ.
И҆ ны́нѣ, то́йже.
А҆нтїфѡ́нъ ѕ҃.
Гла́съ з҃: Дне́сь бди́тъ і҆ꙋ́да преда́ти гдⷭ҇а, превѣ́чнаго сп҃са мі́ра, и҆́же ѿ пѧтѝ хлѣ̑бъ насы́тившаго мно́жєства. дне́сь беззако́нный ѿмета́етсѧ ᲂу҆ч҃тлѧ, ᲂу҆чени́къ бы́въ, влⷣкꙋ предадѐ: сребро́мъ продадѐ, ма́нною насы́тившаго человѣ́ка.
Дне́сь крⷭ҇тꙋ̀ пригвозди́ша і҆ꙋде́є гдⷭ҇а, пресѣ́кшаго мо́ре жезло́мъ, и҆ прове́дшаго и҆́хъ въ пꙋсты́ню. дне́сь копїе́мъ ре́бра є҆гѡ̀ прободо́ша, ꙗ҆́звами ра́нившаго и҆́хъ ра́ди є҆гѵ́пта: и҆ же́лчїю напои́ша, ма́ннꙋ пи́щꙋ и҆̀мъ ѡ҆дожди́вшаго.
Гдⷭ҇и, на стрⷭ҇ть во́льнꙋю прише́дъ, вопїѧ́лъ є҆сѝ ᲂу҆ч҃нкѡ́мъ твои̑мъ: а҆́ще и҆ є҆ди́нагѡ часа̀ не возмого́сте бдѣ́ти со мно́ю, ка́кѡ ѡ҆бѣща́стесѧ ᲂу҆мре́ти менѐ ра́ди; понѐ і҆ꙋ́дꙋ зри́те, ка́кѡ не спи́тъ, но тщи́тсѧ преда́ти мѧ̀ беззакѡ́ннымъ. воста́ните, моли́тесѧ, да не кто̀ менѐ ѿве́ржетсѧ, зрѧ̀ менѐ на крⷭ҇тѣ̀, долготерпѣли́ве сла́ва тебѣ̀.
Сла́ва, бг҃оро́диченъ: Ра́дꙋйсѧ бцⷣе, невмѣсти́маго въ нб҃сѣ́хъ вмѣсти́вшаѧ во ᲂу҆тро́бѣ твое́й. ра́дꙋйсѧ дв҃о, прⷪ҇ро́кѡвъ проповѣ́данїе, є҆́юже на́мъ возсїѧ̀ є҆мманꙋ́илъ: ра́дꙋйсѧ мт҃и хрⷭ҇та̀ бг҃а.
И҆ ны́нѣ, то́йже.
Сѣда́ленъ, гла́съ з҃: Кі́й тѧ̀ ѡ҆́бразъ і҆ꙋ́до, преда́телѧ сп҃сꙋ содѣ́ла, є҆да̀ ѿ ли́ка тѧ̀ а҆пⷭ҇льска разлꙋчѝ, є҆да̀ дарова́нїѧ и҆сцѣле́нїй лишѝ, є҆да̀ со ѻ҆́нѣми вечерѧ́въ, тебѐ ѿ трапе́зы ѿри́нꙋ; є҆да̀ и҆ны́хъ но́ги ᲂу҆мы́въ, твои́ же презрѣ̀; ѽ коли́кихъ бла̑гъ непа́мѧтливъ бы́лъ є҆сѝ! и҆ тво́й ᲂу҆́бѡ неблагода́рный ѡ҆блича́етсѧ нра́въ, тогѡ́ же безмѣ́рное проповѣ́дꙋетсѧ долготерпѣ́нїе, и҆ ве́лїѧ млⷭ҇ть.
Сла́ва, и҆ ны́нѣ, то́йже.
Є҆ѵⷢ҇лїе г҃-е, ѿ матѳе́а, зача́ло р҃ѳ: Во вре́мѧ ѻ҆́но, во́ини є҆́мше і҆и҃са ведо́ша къ каїа́фѣ а҆рхїере́ови: Коне́цъ: Пла́касѧ го́рькѡ.
А҆нтїфѡ́нъ з҃.
Гла́съ и҃: Є҆́мшымъ тѧ̀ беззакѡ́ннымъ, претерпѣва́ѧ, си́це вопїѧ́лъ є҆сѝ гдⷭ҇и: а҆́ще и҆ порази́сте па́стырѧ, и҆ расточи́сте двана́десѧть ѻ҆ве́цъ ᲂу҆ч҃нкѝ моѧ̑, можа́хъ вѧ́щше, не́жели двана́десѧте легео́нѡвъ предста́вити а҆́гг҃лѡвъ. но долготерплю̀, да и҆спо́лнѧтсѧ, ꙗ҆̀же ꙗ҆ви́хъ ва́мъ прⷪ҇ро́ки мои́ми, безвѣ̑стнаѧ и҆ та̑йнаѧ: гдⷭ҇и сла́ва тебѣ̀.
Три́щи ѿве́ргсѧ пе́тръ, а҆́бїе рече́нное є҆мꙋ̀ разꙋмѣ̀, но принесѐ къ тебѣ̀ сле́зы покаѧ́нїѧ: бж҃е, ѡ҆чи́сти мѧ̀, и҆ сп҃си́ мѧ.
Сла́ва, бг҃оро́диченъ: Ꙗ҆́кѡ врата̀ сп҃си́тєльнаѧ, и҆ ра́й кра́сный, и҆ свѣ́та присносꙋ́щнагѡ ѻ҆́блакъ, сꙋ́щꙋю ст҃ꙋ́ю дв҃ꙋ, воспои́мъ всѝ глаго́люще є҆́й, є҆́же ра́дꙋйсѧ.
И҆ ны́нѣ, то́йже.
А҆нтїфѡ́нъ и҃.
Гла́съ в҃: Рцы́те беззако́ннїи, что̀ слы́шасте ѿ сп҃са на́шегѡ, не зако́нъ ли положѝ, и҆ прⷪ҇ро́чєскаѧ ᲂу҆чє́нїѧ; ка́кѡ ᲂу҆́бѡ помы́слисте пїла́тꙋ преда́ти, и҆́же ѿ бг҃а бг҃а сло́ва, и҆ и҆зба́вителѧ дꙋ́шъ на́шихъ;
Да ра́спнетсѧ, вопїѧ́хꙋ твои́хъ дарова́нїй при́снѡ наслажда́ющїисѧ, и҆ ѕлодѣ́ѧ вмѣ́стѡ бл҃годѣ́телѧ проша́хꙋ прїѧ́ти, првⷣникѡвъ ᲂу҆бі́йцы: молча́лъ же є҆сѝ хрⷭ҇тѐ, терпѧ̀ и҆́хъ сꙋровство̀, пострада́ти хотѧ̀ и҆ сп҃стѝ на́съ, ꙗ҆́кѡ чл҃вѣколю́бецъ.
Сла́ва, бг҃оро́диченъ: Ꙗ҆́кѡ не и҆́мамы дерзнове́нїѧ за премнѡ́гїѧ грѣхѝ на́шѧ, ты̀ и҆́же ѿ тебѐ ро́ждшагосѧ, молѝ бцⷣе дв҃о: мно́гѡ бо мо́жетъ моле́нїе мт҃рнее ко бл҃госе́рдїю влⷣки. не пре́зри грѣ́шныхъ мольбы̑ всечⷭ҇таѧ, ꙗ҆́кѡ млⷭ҇тивъ є҆́сть, и҆ сп҃стѝ могі́й, и҆́же и҆ страда́ти ѡ҆ на́съ и҆зво́ливый.
И҆ ны́нѣ, то́йже.
А҆нтїфѡ́нъ ѳ҃.
Гла́съ г҃: Воста́виша три́десѧть сре́бреникѡвъ, цѣ́нꙋ цѣне́ннагѡ, є҆го́же ѡ҆цѣни́ша ѿ сынѡ́въ і҆и҃левыхъ. бди́те и҆ моли́тесѧ, да не вни́дете во и҆скꙋше́нїе, дꙋ́хъ ᲂу҆́бѡ бо́дръ, пло́ть же немощна̀: сегѡ̀ ра́ди бди́те.
Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта: ты́ же гдⷭ҇и возста́ви мѧ̀, и҆ возда́мъ и҆̀мъ.
Сла́ва, бг҃оро́диченъ: И҆́же ѿ ꙗ҆зы̑къ, пое́мъ тѧ̀ бцⷣе чⷭ҇таѧ, ꙗ҆́кѡ хрⷭ҇та̀ бг҃а на́шего родила̀ є҆сѝ, ѿ клѧ́твы человѣ́ки тобо́ю свобо́ждшаго.
И҆ ны́нѣ, то́йже.
Сѣда́ленъ, гла́съ и҃: Ка́кѡ і҆ꙋ́да и҆ногда̀ тво́й ᲂу҆чени́къ, преда́тельствꙋ поꙋча́шесѧ на тѧ̀, свечерѧ̀ льсти́внѡ, навѣ́тникъ и҆ непра́ведникъ, ше́дъ речѐ сщ҃е́нникѡмъ: что́ ми подае́те, и҆ преда́мъ ва́мъ ѻ҆́наго, зако́нъ разори́вшаго, и҆ ѡ҆скверни́вшаго сꙋббѡ́тꙋ; долготерпѣли́ве гдⷭ҇и, сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе д҃, ѿ і҆ѡа́нна. зача́ло н҃ѳ: Во вре́мѧ ѻ҆́но, ведо́ша і҆и҃са ѿ каїа́фы въ претѡ́ръ. Коне́цъ: Предадѐ є҆го̀ и҆̀мъ, да ра́спнетсѧ.
А҆нтїфѡ́нъ і҃:
Гла́съ ѕ҃: Ѡ҆дѣѧ́йсѧ свѣ́томъ ꙗ҆́кѡ ри́зою, на́гъ на сꙋдѣ̀ стоѧ́ше, и҆ въ лани́тꙋ ᲂу҆даре́нїе прїѧ́тъ ѿ рꙋ́къ, и҆̀хже созда̀: беззако́ннїи же лю́дїе на крⷭ҇тѣ̀ пригвозди́ша гдⷭ҇а сла́вы: тогда̀ завѣ́са цр҃ко́внаѧ раздра́сѧ, со́лнце поме́рче, не терпѧ̀ зрѣ́ти бг҃а досажда́ема, є҆гѡ́же трепе́щꙋтъ всѧ́чєскаѧ. томꙋ̀ поклони́мсѧ.
Оу҆чени́къ ѿве́ржесѧ, разбо́йникъ возопѝ: помѧни́ мѧ гдⷭ҇и, во црⷭ҇твїи твое́мъ.
Сла́ва, бг҃оро́диченъ: Оу҆мирѝ мі́ръ, ѿ дв҃ы и҆зво́ливый гдⷭ҇и, пло́ть носи́ти за рабы̑, да согла́снѡ тебѐ славосло́вимъ чл҃вѣколю́бче.
И҆ ны́нѣ, то́йже.
А҆нтїфѡ́нъ а҃і.
Гла́съ ѕ҃: За бл҃га̑ѧ, ꙗ҆̀же сотвори́лъ є҆сѝ хрⷭ҇тѐ, ро́дꙋ є҆вре́йскомꙋ, распѧ́ти тѧ̀ ѡ҆сꙋди́ша, ѻ҆́цта и҆ же́лчи напои́вше тѧ̀, но да́ждь и҆̀мъ гдⷭ҇и, по дѣлѡ́мъ и҆́хъ, ꙗ҆́кѡ не разꙋмѣ́ша твоегѡ̀ снизхожде́нїѧ.
Ѡ҆ преда́тельствѣ не дово́льни бы́ша хрⷭ҇тѐ, ро́ди є҆вре́йстїи, но покива́хꙋ глава́ми свои́ми, хꙋлꙋ̀ и҆ рꙋга́нїе приносѧ́ще: но да́ждь и҆̀мъ гдⷭ҇и, по дѣлѡ́мъ и҆́хъ, ꙗ҆́кѡ не разꙋмѣ́ша твоегѡ̀ смотре́нїѧ.
Нижѐ землѧ̀ ꙗ҆́кѡ потрѧсе́сѧ, нижѐ ка́менїе ꙗ҆́кѡ разсѣ́десѧ, є҆вре́ѡвъ ᲂу҆вѣща́ша, нижѐ цр҃ко́внаѧ завѣ́са, нижѐ ме́ртвыхъ воскрⷭ҇нїе. но да́ждь и҆̀мъ гдⷭ҇и, по дѣлѡ́мъ и҆́хъ, ꙗ҆́кѡ тщє́тнымъ на тѧ̀ поꙋчи́шасѧ.
Сла́ва, бг҃оро́диченъ: Бг҃а ѿ тебѐ воплоще́ннаго позна́хомъ бцⷣе дв҃о, є҆ди́на чⷭ҇таѧ, є҆ди́на бл҃гослове́ннаѧ: тѣ́мъ непреста́ннѡ тѧ̀ воспѣва́юще велича́емъ.
И҆ ны́нѣ, то́йже.
А҆нтїфѡ́нъ в҃і.
Гла́съ и҃: Сїѧ̑ глаго́летъ гдⷭ҇ь і҆ꙋде́ѡмъ: лю́дїе моѝ, что̀ сотвори́хъ ва́мъ; и҆лѝ чи́мъ ва́мъ стꙋжи́хъ; слѣпцы̀ ва́шѧ просвѣти́хъ, прокажє́нныѧ ѡ҆чи́стихъ, мꙋ́жа сꙋ́ща на ѻ҆дрѣ̀ возста́вихъ. лю́дїе моѝ, что̀ сотвори́хъ ва́мъ: и҆ что́ ми возда́сте; за ма́ннꙋ же́лчь: за во́дꙋ ѻ҆́цетъ: за є҆́же люби́ти мѧ̀, ко крⷭ҇тꙋ́ мѧ пригвозди́сте. ктомꙋ̀ не терплю̀ про́чее, призовꙋ̀ моѧ̑ ꙗ҆зы́ки, и҆ ті́и мѧ̀ просла́вѧтъ со ѻ҆ц҃е́мъ и҆ дх҃омъ: и҆ а҆́зъ и҆̀мъ да́рꙋю живо́тъ вѣ́чный.
Дне́сь цр҃ко́внаѧ завѣ́са на ѡ҆бличе́нїе беззако́нныхъ раздира́етсѧ, и҆ со́лнце лꙋчы̀ своѧ̑ скрыва́етъ, влⷣкꙋ зрѧ̀ распина́ема.
Законополо́жницы і҆и҃лєвы, і҆ꙋде́є и҆ фарїсе́є, ли́къ а҆пⷭ҇льскїй вопїе́тъ къ ва́мъ: сѐ хра́мъ, є҆го́же вы̀ разори́сте, сѐ а҆́гнецъ, є҆го́же вы̀ распѧ́сте, и҆ гро́бꙋ преда́сте: но вла́стїю свое́ю воскре́се, не льсти́тесѧ і҆ꙋде́є: то́й бо є҆́сть, и҆́же въ мо́ри сп҃сы́й, и҆ въ пꙋсты́ни пита́вый. то́й є҆́сть живо́тъ, и҆ свѣ́тъ, и҆ ми́ръ мі́рови.
Сла́ва, бг҃оро́диченъ: Ра́дꙋйсѧ врата̀ цр҃ѧ̀ сла́вы, ꙗ҆̀же вы́шнїй є҆ди́нъ про́йде, и҆ па́ки запечатлѣ̑нна ѡ҆ста́ви, во сп҃се́нїе дꙋ́шъ на́шихъ.
И҆ ны́нѣ, то́йже.
Сѣда́ленъ, гла́съ и҃: Є҆гда̀ предста́лъ є҆сѝ каїа́фѣ бж҃е, и҆ преда́лсѧ є҆сѝ пїла́тꙋ сꙋдїѐ, нбⷭ҇ныѧ си̑лы ѿ стра́ха поколеба́шасѧ. є҆гда́ же возне́слсѧ є҆сѝ на дре́во, посредѣ̀ двою̀ разбѡ́йникꙋ, вмѣни́лсѧ є҆сѝ съ беззако́нными безгрѣ́шне, за є҆́же сп҃стѝ человѣ́ка: неѕло́биве гдⷭ҇и, сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе є҃-е, ѿ матѳе́а, зача́ло ра҃і: Во вре́мѧ ѻ҆́но, ви́дѣвъ і҆ꙋ́да преда́вый і҆и҃са: Коне́цъ: Понестѝ крⷭ҇тъ є҆гѡ̀.
А҆нтїфѡ́нъ г҃і, гла́съ ѕ҃:
Собра́нїе і҆ꙋде́йское ᲂу҆ пїла́та и҆спроси́ша распѧ́ти тѧ̀ гдⷭ҇и: вины́ бо въ тебѣ̀ не ѡ҆брѣ́тше, пови́ннаго вара́ввꙋ свободи́ша, и҆ тебѐ првⷣнаго ѡ҆сꙋди́ша, скве́рнагѡ ᲂу҆бі́йства грѣ́хъ наслѣ́довавше. но да́ждь и҆̀мъ гдⷭ҇и воздаѧ́нїе и҆́хъ, ꙗ҆́кѡ тщє́тнымъ на тѧ̀ поꙋчи́шасѧ.
Є҆гѡ́же всѧ̑ ᲂу҆жаса́ютсѧ и҆ трепе́щꙋтъ, и҆ всѧ́къ ѧ҆зы́къ пое́тъ, хрⷭ҇та̀ бж҃їю си́лꙋ и҆ бж҃їю премꙋ́дрость, сщ҃е́нницы за лани́тꙋ ᲂу҆да́риша, и҆ да́ша є҆мꙋ̀ же́лчь: и҆ всѧ̑ пострада́ти и҆зво́ли, сп҃сти́ ны хотѧ̀ ѿ беззако́нїй на́шихъ свое́ю кро́вїю, ꙗ҆́кѡ чл҃вѣколю́бецъ.
Сла́ва, бг҃оро́диченъ: Бцⷣе, ро́ждшаѧ сло́вомъ па́че сло́ва, созда́телѧ своего̀, того̀ молѝ сп҃стѝ дꙋ́шы на́шѧ.
И҆ ны́нѣ, то́йже.
А҆нтїфѡ́нъ д҃і, гла́съ и҃:
Гдⷭ҇и, и҆́же разбо́йника спꙋ́тника прїе́мый, въ кро́ви рꙋ́цѣ ѡ҆скверни́вшаго, и҆ на́съ съ ни́мъ причтѝ, ꙗ҆́кѡ бл҃гъ и҆ чл҃вѣколю́бецъ.
Ма́лъ гла́съ и҆спꙋстѝ разбо́йникъ на крⷭ҇тѣ̀, ве́лїю вѣ́рꙋ ѡ҆брѣ́те, во є҆ди́номъ мгнове́нїи сп҃се́сѧ, и҆ пе́рвый ра̑йскаѧ врата̀ ѿве́рзъ вни́де: и҆́же тогѡ̀ покаѧ́нїе воспрїе́мый, гдⷭ҇и, сла́ва тебѣ̀.
Сла́ва, бг҃оро́диченъ: Ра́дꙋйсѧ, а҆́гг҃ломъ ра́дость мі́ра прїе́мшаѧ. ра́дꙋйсѧ, ро́ждшаѧ творца̀ твоего̀ и҆ гдⷭ҇а. ра́дꙋйсѧ, сподо́бльшаѧсѧ бы́ти мт҃и бж҃їѧ.
И҆ ны́нѣ, то́йже.
А҆нтїфѡ́нъ є҃і, гла́съ ѕ҃:
Дне́сь виси́тъ на дре́вѣ, и҆́же на вода́хъ зе́млю повѣ́сивый: вѣнце́мъ ѿ те́рнїѧ ѡ҆блага́етсѧ, и҆́же а҆́гг҃лѡвъ цр҃ь: въ ло́жнꙋю багрѧни́цꙋ ѡ҆блача́етсѧ, ѡ҆дѣва́ѧй нб҃о ѻ҆́блаки: заꙋше́нїе прїѧ́тъ, и҆́же во і҆ѻрда́нѣ свободи́вый а҆да́ма: гвоздьмѝ пригвозди́сѧ жени́хъ цр҃ко́вный: копїе́мъ прободе́сѧ сн҃ъ дв҃ы. покланѧ́емсѧ стрⷭ҇те́мъ твои̑мъ хрⷭ҇тѐ: покланѧ́емсѧ стрⷭ҇те́мъ твои̑мъ хрⷭ҇тѐ: покланѧ́емсѧ стрⷭ҇те́мъ твои̑мъ хрⷭ҇тѐ, покажѝ на́мъ и҆ сла́вное твоѐ воскрⷭ҇нїе.
Не ꙗ҆́кѡ і҆ꙋде́є пра́зднꙋемъ, и҆́бо па́сха на́ша за ны̀ пожре́сѧ хрⷭ҇то́съ: но ѡ҆чи́стимъ са́ми себѐ ѿ всѧ́кїѧ скве́рны, и҆ чи́стѣ помо́лимсѧ є҆мꙋ̀: воскрⷭ҇нѝ гдⷭ҇и, сп҃сѝ на́съ, ꙗ҆́кѡ чл҃вѣколю́бецъ.
Крⷭ҇тъ тво́й гдⷭ҇и жи́знь и҆ застꙋпле́нїе лю́демъ твои̑мъ є҆́сть, и҆ на́нь надѣ́ющесѧ, тебѐ распѧ́таго бг҃а на́шего пое́мъ, поми́лꙋй на́съ.
Сла́ва, бг҃оро́диченъ: Ви́дѧщи тѧ̀ ви́сима хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́ждꙋ та́инство, сн҃е мо́й; ка́кѡ на дре́вѣ ᲂу҆мира́еши пло́тїю водрꙋже́нъ, жи́зни пода́телю;
И҆ ны́нѣ, то́йже.
Сѣда́ленъ, гла́съ д҃: И҆скꙋпи́лъ ны̀ є҆сѝ ѿ клѧ́твы зако́нныѧ, честно́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дсѧ, безсме́ртїе и҆сточи́лъ є҆сѝ человѣ́кѡмъ, сп҃се на́шъ сла́ва тебѣ̀.
Сла́ва, и҆ ны́нѣ, то́йже.
Є҆ѵⷢ҇лїе ѕ҃-е, ѿ ма́рка, зача́ло ѯ҃з: Во вре́мѧ ѻ҆́но, во́ини ведо́ша і҆и҃са: Коне́цъ: Да ви́димъ, и҆ вѣ́рꙋ и҆́мемъ є҆мꙋ̀.
Та́же бл҃жє́нны поста́вимъ стїхѡ́въ и҃, гла́съ д҃:
Во црⷭ҇твїи твое́мъ помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.
Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Дре́вомъ а҆да́мъ раѧ̀ бы́сть и҆зселе́нъ, дре́вомъ же крⷭ҇тнымъ разбо́йникъ въ ра́й всели́сѧ. ѻ҆́въ ᲂу҆́бѡ вкꙋ́шъ, за́повѣдь ѿве́рже сотво́ршагѡ, ѻ҆́въ же сраспина́емь, бг҃а тѧ̀ и҆сповѣ́да таѧ́щагосѧ: помѧнѝ и҆ на́съ во црⷭ҇твїи твое́мъ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
Зако́нꙋ творца̀ ѿ ᲂу҆ченика̀ кꙋпи́ша беззако́ннїи, и҆ ꙗ҆́кѡ законопрестꙋ́пника, того̀ пїла́товꙋ сꙋди́щꙋ предста́виша, зовꙋ́ще: распнѝ, въ пꙋсты́ни си̑мъ маннода́вшаго. мы́ же првⷣнагѡ разбо́йника подража́вше, вѣ́рою зове́мъ: помѧнѝ и҆ на́съ сп҃се, во црⷭ҇твїи твое́мъ.
Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
Бг҃оꙋбі́йцъ собо́ръ, і҆ꙋде́йскїй ꙗ҆зы́къ беззако́нный, къ пїла́тꙋ неи́стовнѣ зовы́й, и҆ глаго́лаше: распнѝ хрⷭ҇та̀ непови́ннаго, вара́ввꙋ же па́че на́мъ ѿпꙋстѝ. мы́ же вѣща́имъ къ немꙋ̀ разбо́йника бл҃горазꙋ́мнагѡ гла́съ: помѧнѝ и҆ на́съ сп҃се, во црⷭ҇твїи твое́мъ.
Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
Живонѡ́снаѧ твоѧ̑ ре́бра, ꙗ҆́кѡ и҆з̾ є҆де́ма и҆сто́чникъ и҆сточа̑ющаѧ, цр҃ковь твою̀ хрⷭ҇тѐ, ꙗ҆́кѡ слове́сный напаѧ́етъ ра́й, ѿсю́дꙋ раздѣлѧ́ѧсѧ ꙗ҆́кѡ въ нача̑ла, въ четы́ри є҆ѵⷢ҇лїа, мі́ръ напаѧ́ѧ, тва́рь веселѧ̀, и҆ ꙗ҆зы́ки вѣ́рнѡ наꙋча́ѧ покланѧ́тисѧ црⷭ҇твїю твоемꙋ̀.
Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Распѧ́лсѧ є҆сѝ менѐ ра́ди, да мнѣ̀ и҆сточи́ши ѡ҆ставле́нїе: прободе́нъ бы́лъ є҆сѝ въ ре́бра, да ка̑пли жи́зни и҆сточи́ши мѝ: гвоздьмѝ пригвозди́лсѧ є҆сѝ, да а҆́зъ глꙋбино́ю стрⷭ҇те́й твои́хъ къ высотѣ̀ держа́вы твоеѧ̀ ᲂу҆вѣрѧ́емь, зовꙋ́ ти: живода́вче хрⷭ҇тѐ, сла́ва крⷭ҇тꙋ̀ сп҃се, и҆ стрⷭ҇ти твое́й.
Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ на вы̀ лжꙋ́ще менѐ ра́ди.
Распина́емꙋ тебѣ̀ хрⷭ҇тѐ, всѧ̀ тва́рь ви́дѧщи трепета́ше, ѡ҆снова̑нїѧ землѝ колеба́хꙋсѧ, стра́хомъ держа́вы твоеѧ̀, свѣти̑ла скрыва́хꙋсѧ, и҆ цр҃ко́внаѧ раздра́сѧ завѣ́са, го́ры вострепета́ша, и҆ ка́менїе разсѣ́десѧ, и҆ разбо́йникъ вѣ́рный зове́тъ съ на́ми сп҃се: є҆́же помѧнѝ во црⷭ҇твїи твое́мъ.
Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
Рꙋкописа́нїе на́ше на крⷭ҇тѣ̀ растерза́лъ є҆сѝ гдⷭ҇и, и҆ вмѣни́всѧ въ ме́ртвыхъ, та́мошнѧго мꙋчи́телѧ свѧза́лъ є҆сѝ, и҆зба́вль всѣ́хъ ѿ ᲂу҆́зъ сме́ртныхъ воскрⷭ҇нїемъ твои́мъ, и҆́мже просвѣти́хомсѧ чл҃вѣколю́бче гдⷭ҇и, и҆ вопїе́мъ тебѣ̀: помѧнѝ и҆ на́съ сп҃се, во црⷭ҇твїи твое́мъ.
Сла́ва: Ѻ҆ц҃а̀, и҆ сн҃а, и҆ дх҃а ст҃а́го, всѝ є҆диномꙋ́дреннѡ вѣ́рнїи славосло́вити досто́йнѡ помо́лимсѧ, є҆ди́ницꙋ бж҃ества̀, въ трїе́хъ сꙋ́щꙋю ѵ҆поста́сѣхъ, неслїѧ́ннꙋ пребыва́ющꙋ, про́стꙋ, нераздѣ́льнꙋ и҆ непристꙋ́пнꙋ, є҆́юже и҆збавлѧ́емсѧ ѻ҆́гненнагѡ мꙋче́нїѧ.
И҆ ны́нѣ, бг҃оро́диченъ: Мт҃рь твою̀ хрⷭ҇тѐ, пло́тїю безсѣ́меннѡ ро́ждшꙋю тѧ̀, и҆ дв҃ꙋ вои́стиннꙋ, и҆ по ржⷭ҇твѣ̀ пребы́вшꙋю нетлѣ́ннꙋ, сїю̀ тебѣ̀ приво́димъ въ мл҃твꙋ влⷣко многомлⷭ҇тиве, прегрѣше́нїй проще́нїю дарова́тисѧ всегда̀ зовꙋ́щымъ: помѧнѝ на́съ сп҃се, во црⷭ҇твїи твое́мъ.
Прокі́менъ, гла́съ д҃: Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй. Сті́хъ: Бж҃е бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ;
Є҆ѵⷢ҇лїе з҃-е, ѿ матѳе́а, зача́ло рг҃і: Во вре́мѧ ѻ҆́но, прише́дше во́ини: Коне́цъ: Вои́стиннꙋ бж҃їй сн҃ъ бѣ̀ се́й. И҆ полага́етсѧ чте́нїе.
Та́же ѱало́мъ н҃. И҆ посе́мъ є҆ѵⷢ҇лїе и҃-е, ѿ лꙋкѝ, зача́ло ра҃і: Во вре́мѧ ѻ҆́но, ведѧ́хꙋ со і҆и҃сомъ и҆ и҆́на два̀: Коне́цъ: Ѿ галїле́и зрѧ́щѧ си́хъ.
И҆ а҆́бїе пое́мъ трипѣ́снецъ, творе́нїе господи́на космы̀: і҆рмосы̀ по два́жды, тропарѝ на в҃і. Послѣдѝ же і҆рмо́съ ѻ҆́ба ли̑ка вкꙋ́пѣ. А҆крості́хїсъ, и҆лѝ краегране́сїе трипѣ́снца є҆́сть: Просаввато́н те: є҆́же є҆́сть: Предсꙋббѡ́тїе же. Гла́съ ѕ҃.
Пѣ́снь є҃.
[П] І҆рмо́съ: Къ тебѣ̀ ᲂу҆́тренюю, милосе́рдїѧ ра́ди себѐ и҆стощи́вшемꙋ непрело́жнѡ, и҆ до стрⷭ҇те́й безстра́стнѡ прикло́ншемꙋсѧ сло́ве бж҃їй, ми́ръ пода́ждь мѝ па́дшемꙋ, чл҃вѣколю́бче.
[Р] Оу҆мы́вше но́ги, и҆ пред̾ѡчи́стившесѧ та́инства причаще́нїемъ бж҃е́ственнагѡ ны́нѣ хрⷭ҇тѐ твоегѡ̀, слꙋжи́телїе ѿ сїѡ́на на є҆леѡ́нскꙋю го́рꙋ вели́кꙋю съ тобо́ю взыдо́ша, пою́ще тѧ̀ чл҃вѣколю́бче.
[О] Зри́те, ре́клъ є҆сѝ, дрꙋ́зи, не бо́йтесѧ: ны́нѣ бо прибли́жисѧ ча́съ, ꙗ҆́тꙋ мѝ бы́ти, и҆ ᲂу҆бїе́нꙋ рꙋка́ма беззако́нныхъ: вси́ же расточите́сѧ, менѐ ѡ҆ста́вивше, и҆̀хже соберꙋ̀ проповѣ́дати мѧ̀ чл҃вѣколю́бца.
Конда́къ, гла́съ и҃: На́съ ра́ди распѧ́таго, прїиди́те всѝ воспои́мъ, того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.
І҆́косъ: Своего̀ а҆́гнца а҆́гница зрѧ́щи къ заколе́нїю влеко́ма, послѣ́доваше мр҃і́а просте́ртыми власы̀ со и҆нѣ́ми жена́ми, сїѧ̑ вопїю́щи: ка́мѡ и҆́деши ча́до; чесѡ̀ ра́ди ско́рое тече́нїе соверша́еши, є҆да̀ дрꙋгі́й бра́къ па́ки є҆́сть въ ка́нѣ галїле́йстѣй, и҆ та́мѡ ны́нѣ тщи́шисѧ, да ѿ воды̀ и҆̀мъ вїно̀ сотвори́ши; и҆дꙋ́ ли съ тобо́ю ча́до, и҆лѝ па́че пождꙋ̀ тебѐ; да́ждь мѝ сло́во сло́ве, не молчѧ̀ мимоидѝ менѐ, чи́стꙋ соблюды́й мѧ̀: ты́ бо є҆сѝ сн҃ъ и҆ бг҃ъ мо́й.
Сѷнаѯа́рь. Стїхѝ на распѧ́тїе:
Живы́й є҆сѝ бж҃е ты̀, и҆ ᲂу҆мерщвле́нный на дре́вѣ:
Ѽ мертвечѐ нагі́й, и҆ бг҃а жива́гѡ сло́ве!
Стїхѝ на сраспе́ншагосѧ хрⷭ҇тꙋ̀ разбо́йника:
Заключє́ннаѧ ѿве́рзе є҆дє́мскаѧ врата̀,
Вложи́въ разбо́йникъ клю́чь, є҆́же помѧни́ мѧ.
Во ст҃ы́й и҆ вели́кїй пѧто́къ, ст҃ы̑ѧ и҆ сп҃си́тєльныѧ и҆ стра̑шныѧ стрⷭ҇ти соверша́емъ, гдⷭ҇а и҆ бг҃а сп҃са на́шегѡ і҆и҃са хрⷭ҇та̀, ꙗ҆̀же на́съ ра́ди во́лею прїѧ́тъ: ѡ҆плева̑нїѧ, бїє́нїѧ, заꙋшє́нїѧ, доса̑ды, насмѣѧ̑нїѧ, багрѧ́нꙋю ѻ҆де́ждꙋ, тро́сть, гꙋ́бꙋ, ѻ҆́цетъ, гвѡ́здїѧ, копїѐ, и҆ по си́хъ всѣ́хъ, крⷭ҇тъ и҆ сме́рть: ꙗ҆̀же всѧ̑ въ пѧто́къ содѣ́ѧшасѧ. По внегда́ бо на три́десѧтихъ сре́бреницѣхъ, ѿ дрꙋ́га и҆ ᲂу҆ченика̀ про́данъ бы́въ предаде́сѧ, пре́жде ко а҆́ннѣ ѿво́дитсѧ а҆рхїере́ю, и҆́же посыла́етъ є҆го̀ къ каїа́фѣ: и҆дѣ́же ѡ҆плева́нъ бы́сть, и҆ заꙋша́емь по лани́тѣ, кꙋ́пнѡ же порꙋга́емь и҆ посмѣва́емь, слы́шаше: прорцы̀ на́мъ хрⷭ҇тѐ, кто́ є҆сть ᲂу҆да́ривый тѧ̀; Та́мѡ же и҆ лжесвидѣ́тели прїидо́ша ѡ҆клевета́ющїи, ꙗ҆́кѡ речѐ: разоритѐ хра́мъ се́й, и҆ тремѝ де́ньми воздви́гнꙋ и҆̀: и҆ ꙗ҆́кѡ речѐ себѐ сн҃а бж҃їѧ, є҆гда̀ и҆ а҆рхїере́й хꙋлы̀ не терпѧ̀, ри́зꙋ свою̀ растерза̀. Оу҆́трꙋ же бы́вшꙋ, ѿво́дитсѧ къ пїла́тꙋ въ претѡ́ръ: и҆ ті́и не внидо́ша, глаго́летъ, да не ѡ҆сквернѧ́тсѧ, но да ꙗ҆дѧ́тъ па́схꙋ. Па́схꙋ же ве́сь пра́здникъ глаго́летъ, и҆лѝ и҆ тогда̀ бы́сть, ꙗ҆́коже подоба́ше: хрⷭ҇то́съ же пре́жде є҆ди́нагѡ днѐ сїю̀ сотворѝ зако́ннꙋю па́схꙋ, сзакла́тисѧ хотѧ̀ въ пѧто́къ. И҆зше́дъ же пїла́тъ, вопроша́етъ ѧ҆̀: ѡ҆ чесо́мъ є҆го̀ ѡ҆глаго́лꙋютъ; и҆ поне́же ничто́же подо́бно ѡ҆брѣ́те во ѡ҆глаго́ланїи, посыла́етъ є҆го̀ къ каїа́фѣ. Ѻ҆́нъ же па́ки къ пїла́тꙋ, и҆́бо то́й бѣ̀ на є҆гѡ̀ ᲂу҆бі́йство ᲂу҆стремлѧ́ѧйсѧ. Ѻ҆́нъ же глаго́летъ: поими́те є҆го̀ вы̀ и҆ распни́те, и҆ по зако́нꙋ ва́шемꙋ сꙋди́те. Ѻ҆ни́ же па́ки глаго́лютъ: не досто́итъ на́мъ ᲂу҆би́ти никого́же, распѧ́ти пїла́та поѻщрѧ́юще. Вопроша́етъ же хрⷭ҇та̀ пїла́тъ: а҆́ще цр҃ь і҆ꙋде́ѡвъ є҆́сть; Ѻ҆́нъ же не и҆сповѣ́дꙋетъ, но вѣ́чный: не бо̀ ѿ мі́ра сегѡ̀ моѐ црⷭ҇тво, глаго́летъ. Хотѧ́ же ѿрѣши́ти є҆го̀ пїла́тъ, пе́рвѣе ᲂу҆́бѡ ѻ҆́нѣмъ глаго́летъ, ни є҆ди́ныѧ на него̀ вины̀ бл҃голи́чныѧ ѡ҆брѣта́ти. Та́же є҆ди́наго на кі́йждо пра́здникъ свѧ́знѧ ѻ҆бы́чай ѿрѣша́ти предлага́етъ: и҆̀мже ᲂу҆го́денъ вара́вва па́че хрⷭ҇та̀ мни́тсѧ. Пїла́тъ же і҆ꙋде́ѡмъ да́рꙋѧй, би́въ і҆и҃са пре́жде, и҆зво́дитъ съ во́ины, во ѡ҆дѣѧ́нїе ѡ҆болче́на червле́ное, терно́вымъ же вѣнце́мъ ѡ҆бложе́на, и҆ въ десни́цꙋ є҆гѡ̀ тро́сть вложи́въ, рꙋга́ема же ѿ вѡ́инъ, ра́дꙋйсѧ, глаго́лющихъ, цр҃ю̀ і҆ꙋде́йскїй. Ѻ҆ба́че си́це ко бл҃года́ти порꙋга́всѧ, па́ки глаго́летъ пїла́тъ: ни є҆ди́нꙋ же сме́рти винꙋ̀ ѡ҆брѣта́ю въ не́мъ. Ѻ҆ни́ же, но мы̀ є҆го̀ ᲂу҆мꙋ́чимъ, глаго́люще, ꙗ҆́кѡ себѐ и҆менꙋ́етъ сн҃а бж҃їѧ. Си̑мъ же глаго́лємымъ, і҆и҃съ молча́ше, наро́дъ же крича́ше къ пїла́тꙋ: распнѝ, распнѝ є҆го̀. Безче́стною бо сме́ртїю ѡ҆бложи́ти є҆го̀ хотѧ́хꙋ, да ѿ среды̀ бл҃гꙋ́ю є҆гѡ̀ па́мѧть сотворѧ́тъ. Пїла́тъ же, а҆́ки бы срамлѧ́ѧ и҆̀хъ, глаго́летъ: цр҃ѧ́ ли ва́шегѡ распнꙋ̀; Ѻ҆ни́ же не и҆мѣ́ти глаго́лютъ и҆́нагѡ цр҃ѧ̀, но ке́сарѧ. Поне́же бо хꙋлꙋ̀ ре́кше, ничто́же ᲂу҆спѣ́ша, на ке́сарѧ возно́сѧтъ, да понѐ си́це неи́стовство и҆спо́лнѧтъ. Глаго́лютъ бо: всѧ́къ и҆́же царѧ̀ себѐ творѧ́й, прерѣкꙋ́етъ ке́сарю. Въ си́хъ же сꙋ́щымъ, жена̀ къ пїла́тꙋ посла̀, сны̀ стра́шными ᲂу҆боѧ́вшисѧ, ничто́же, глаго́лющи, тебѣ̀ и҆ пра́ведникꙋ ѻ҆́номꙋ: ᲂу҆же́ бо є҆гѡ̀ ра́ди мнѡ́гаѧ въ нощѝ пострада́хъ: и҆ то́й ᲂу҆мы́всѧ, кро́ве ѻ҆́нагѡ винꙋ̀ ѿража́етъ. Ѻ҆ни́ же крича́хꙋ: кро́вь є҆гѡ̀ на на́съ, и҆ на ча̑да на̑ша: а҆́ще сего̀ ѡ҆ста́виши свобо́дна, нѣ́си дрꙋ́гъ ке́сарю. Сегѡ̀ ᲂу҆́бѡ ᲂу҆боѧ́всѧ пїла́тъ, а҆́ще и҆ ѻ҆па́снѡ того̀ вѣ́дый непови́нна, крⷭ҇тномꙋ ѡ҆сꙋжде́нїю и҆здае́тъ, ѿрѣши́въ вара́ввꙋ. Сїе́ же ви́дѣвъ і҆ꙋ́да, сре́бреники пове́ргъ, ѿхо́дитъ, и҆ ѿше́дъ ᲂу҆давле́нїю себѐ предадѐ, на дре́вѣ ѡ҆бѣ́сивсѧ, послѣди́ же ѕѣлѡ̀ надꙋ́всѧ растерза́етсѧ. Во́ини ᲂу҆́бѡ тро́стїю по главѣ̀ є҆гѡ̀ порꙋга́вше, ѡ҆бременѧ́ютъ є҆мꙋ̀ крⷭ҇тъ. та́же ѿ кѷрині́и сі́мѡна понꙋ́дивше, крⷭ҇тъ понестѝ задѣва́ютъ. Ѡ҆ часѣ́ же тре́тїемъ на ло́бнѣмъ мѣ́стѣ бы́вше, та́мѡ распина́ютъ є҆го̀, ѿѻбою́дꙋ томꙋ̀ и҆ дрꙋга̑ѧ два̀ разбѡ́йника ѡ҆бѣ́сивше, да и҆ ѻ҆́нъ ꙗ҆́кѡ ѕлодѣ́й вмѣни́тсѧ. Хꙋ́дости же ра́ди, раздѣле́нїе во́ини ри́замъ є҆гѡ̀ полага́ютъ, жре́бїемъ же нешве́нꙋю є҆гѡ̀ ѻ҆де́ждꙋ даю́тъ, всѧ́кое доса́ды премно́жество дѣ́лающе. Не сїѧ̑ же то́чїю, но и҆ на крⷭ҇тѣ̀ сꙋ́щꙋ рꙋга́ющесѧ глаго́лахꙋ: ᲂу҆а̀, разорѧ́ѧй хра́мъ, и҆ тремѝ де́ньми созида́ѧй, сп҃сѝ са́мъ себѐ. И҆ па́ки: и҆ны̑ѧ сп҃сѐ, себе́ ли не мо́жетъ сп҃стѝ; И҆ па́ки: а҆́ще цр҃ь і҆и҃левъ є҆́сть, да сни́детъ ны́нѣ со крⷭ҇та̀, и҆ вѣ́рꙋемъ въ него̀. И҆ ᲂу҆́бѡ а҆́ще и҆́стинꙋ глаго́лахꙋ, подоба́ше несꙋмнѣ́ннѡ къ немꙋ̀ пристꙋпи́ти: не то́чїю бо і҆и҃левъ цр҃ь познава́шесѧ, но и҆ всегѡ̀ мі́ра. Что́ бо хотѧ́ше, є҆́же помрачи́тисѧ со́лнцꙋ на часы̀ трѝ, и҆ посредѣ̀ ᲂу҆́бѡ днѐ; да всѣ̑мъ бꙋ́детъ стрⷭ҇ть ꙗ҆вле́на. Є҆́же землѝ трѧсти́сѧ, ка́менїю разсѣда́тисѧ, противоѡбра́зное і҆ꙋде́ѡвъ ѡ҆блича́ющемꙋ: мнѡ́гимъ тѣлесє́мъ воскре́снꙋти, во ᲂу҆вѣре́нїе ѻ҆́бщагѡ воскрⷭ҇нїѧ, и҆ въ ꙗ҆вле́нїе стра́ждꙋщагѡ си́лы. Завѣ́сѣ цр҃ко́вной раздира́тисѧ, ꙗ҆́кѡ хра́мꙋ ꙗ҆рѧ́щꙋсѧ, за є҆́же въ не́мъ стра́ждꙋщемꙋ сла́вимꙋ, и҆ мнѡ́гимъ ѿкрыва́ющꙋ незри̑маѧ. Въ тре́тїй ᲂу҆́бѡ ча́съ распѧ́тсѧ хрⷭ҇то́съ, ꙗ҆́коже бж҃е́ственный ма́ркъ глаго́летъ: ѿ шеста́гѡ же часа̀ до девѧ́тагѡ тьма̀ бы́сть, є҆гда̀ и҆ ло́ггїнъ со́тникъ пресла̑внаѧ ви́дѣвъ, и҆ па́че со́лнца вельмѝ воззва̀: вои́стиннꙋ сн҃ъ бѣ̀ бж҃їй се́й! Ѿ разбо́йникѡвъ ᲂу҆́бѡ є҆ди́нъ досажда́ше і҆и҃сꙋ, дрꙋгі́й же возбранѧ́ше є҆мꙋ̀ претѧ̀ запрети́тельнѣйше, и҆ хрⷭ҇та̀ сн҃а бж҃їѧ и҆сповѣ́дꙋетъ: вѣ́рѣ же є҆гѡ̀ сп҃съ воздаѧ̀, є҆́же съ собо́ю въ раѝ ѡ҆бѣщава́етъ пребыва́нїе. Всѧ́кой ᲂу҆́бѡ доса́дѣ на не́мъ и҆спо́лншейсѧ, пїла́тъ и҆ ті́тлъ надписа̀ на не́мъ глаго́лющь: і҆и҃съ назарѧни́нъ, цр҃ь і҆ꙋде́йскїй. А҆́ще и҆ ѻ҆нѝ возбранѧ́хꙋ не писа́ти си́це, но ꙗ҆́кѡ ѻ҆́нъ речѐ си́це, пїла́тъ же є҆́же писа́хъ, писа́хъ, па́ки проти́вꙋ речѐ. Та́же сп҃сꙋ возре́кшꙋ, жа́ждꙋ: ѵ҆ссѡ́пъ со ѻ҆́цтомъ є҆мꙋ̀ растворѧ́ютъ. И҆ ре́къ: соверши́шасѧ, прекло́нь главꙋ̀, предадѐ дх҃ъ. Всѣ̑мъ же ѿше́дшымъ, мт҃и є҆гѡ̀ предстоѧ́ше ᲂу҆ крⷭ҇та̀, и҆ сестра̀ є҆ѧ̀ марі́а клеѡ́пова, ю҆́же і҆а́кѡвъ родѝ, клеѡ́пѣ безча́днꙋ ᲂу҆ме́ршꙋ, є҆ще́ же и҆ і҆ѡа́ннъ люби́мый є҆мꙋ̀ ᲂу҆ч҃нкъ. Неразꙋ́мнїи ᲂу҆́бѡ і҆ꙋде́є, нижѐ на крⷭ҇тѣ̀ тѣлесѐ зрѣ́ти довлѣ́еми, проси́ша пїла́та, поне́же вели́кїй бѣ̀ де́нь па́схи, и҆ пѧто́къ, да ѡ҆сꙋжде́нныхъ го́лєни сокрꙋша́тсѧ, ꙗ҆́кѡ да скорѣ́е сме́рть прїи́детъ. И҆ ѻ҆́вѣхъ ᲂу҆́бѡ го́лєни сокрꙋши́ша, є҆ще́ бо жи́ви бѧ́хꙋ: на і҆и҃са же прише́дше, ꙗ҆́кѡ ви́дѣша є҆го̀ ᲂу҆жѐ ᲂу҆ме́рша, є҆́же сокрꙋши́ти ᲂу҆́бѡ, ѡ҆ста́виша. Є҆ди́нъ же нѣ́кто во́инѡвъ, ло́ггїнъ зово́мый, безꙋ̑мнымъ ᲂу҆гожда́ѧ, воздви́гъ копїѐ, въ десна̑ѧ ре́бра пробода́етъ хрⷭ҇та̀: и҆ а҆́бїе и҆зы́де кро́вь и҆ вода̀, ѻ҆́во ᲂу҆́бѡ ꙗ҆́кѡ человѣ̑ка, ѻ҆́во же ꙗ҆́кѡ па́че человѣ́ка. И҆лѝ, кро́вь ᲂу҆́бѡ бж҃е́ственныхъ ра́ди ѡ҆сщ҃е́нїй прича́стїѧ, вода́ же кр҃ще́нїѧ ра́ди. То́й бо двоето́чный и҆сто́чникъ вои́стиннꙋ, є҆́же по на́мъ содержи́тъ та́инство: сїѧ̑ и҆ і҆ѡа́ннъ ви́дѣвъ свидѣ́тельствова, и҆ и҆́стинно є҆́сть свидѣ́тельство є҆гѡ̀, ꙗ҆́кѡ предстоѧ̀ при всѣ́хъ, и҆ ви́дѧ пи́шетъ: и҆ ꙗ҆́кѡ а҆́ще бы лѡ́жнаѧ и҆мѣ́лъ глаго́лати, не бы̀ на безче́стїе ᲂу҆чи́телю непщꙋ́ємаѧ списа́лъ. Семꙋ̀, глаго́лютъ, тогда̀ сꙋ́щꙋ, сосꙋ́домъ нѣ́кимъ ѿ живото́чныхъ ре́бръ бж҃е́ственнꙋю и҆ прест҃ꙋ́ю кро́вь прїѧ́ти. Си̑мъ же та́кѡ преесте́ственнѡ содѣ̑ѧнымъ, поне́же къ ве́черꙋ бѧ́ше ᲂу҆жѐ, і҆ѡ́сифъ и҆́же ѿ а҆рїмаѳе́а и҆схо́дитъ, ᲂу҆ч҃нкъ пре́жде, ꙗ҆́коже про́чїи, ᲂу҆тае́нный, и҆ къ пїла́тꙋ прише́дъ со дерзнове́нїемъ, ꙗ҆́кѡ зна́емꙋ сꙋ́щꙋ, про́ситъ тѣ́ло і҆и҃сово: ѻ҆́нъ же взѧ́ти повелѣва́етъ. И҆ ᲂу҆́бѡ съ крⷭ҇та̀ сїѐ сне́мъ всебл҃гоговѣ́йнѡ положѝ. И҆ ᲂу҆жѐ прише́дшей но́щи, прихо́дитъ нїкоди́мъ, носѧ̀ смѵ́рны и҆ а҆лѡ́й, нѣ́кое смѣше́нїе, состро́еное вре́менемъ, и҆ плащани́цею ѡ҆бви́вше, ꙗ҆́коже ѻ҆бы́чай бѣ̀ і҆ꙋде́ѡмъ твори́ти, бли́зꙋ положи́ша, во и҆зсѣ́ченномъ ѿ ка́мене гро́бѣ і҆ѡ́сифовѣ, и҆дѣ́же никто́же пре́жде лежа̀, да не хрⷭ҇тꙋ̀ воскрⷭ҇шꙋ, и҆но́мꙋ воскрⷭ҇нїе напи́шꙋтъ. Смѣше́нїю же а҆лѡ́а и҆ смѵ́рны, прилѣпи́тєльнымъ сꙋ́щымъ, є҆ѵⷢ҇лі́стъ воспомѧнꙋ̀, да є҆гда̀ ви́дѧтъ плащани́цꙋ и҆ сꙋда́рь, во гро́бѣ ѡ҆ста́влєны не непщꙋ́ютъ ᲂу҆кра́денꙋ є҆мꙋ̀ бы́ти: ка́кѡ бо свобо́дѣ толи́цѣй не сꙋ́щей, ꙗ҆́коже и҆ ѿто́ргнꙋти ѻ҆́наѧ си́це всаждє́ннаѧ пло́ти; Сїѧ̑ всѧ̑ пресла́внѡ бы̑вшаѧ въ тогда́шнее пѧтка̀ вре́мѧ, и҆ на́мъ си́хъ всѣ́хъ па́мѧть твори́ти съ сокрꙋше́нїемъ се́рдца и҆ ᲂу҆миле́нїемъ, бг҃оно́снїи ѻ҆тцы̀ повелѣ́ша. Вѣ́домо же ᲂу҆́бѡ, ꙗ҆́кѡ въ шесты́й де́нь седми́цы, ꙗ҆́вѣ въ пѧто́къ распѧ́тсѧ гдⷭ҇ь, зане́же и҆ въ шесты́й де́нь и҆знача́ла созда́тисѧ человѣ́кꙋ. Но и҆ въ шесты́й ча́съ днѐ на крⷭ҇тѣ̀ повѣ́шенъ бы́сть: занѐ въ то́й ча́съ, ꙗ҆́коже глаго́лютъ, и҆ а҆да́мъ на ѿрече́нное дре́во рꙋ́цѣ просте́ръ коснꙋ́сѧ, и҆ ᲂу҆́мре: подоба́ше бо во́ньже ча́съ сокрꙋше́нꙋ, въ то́й па́ки возсозда́тисѧ. Въ вертогра́дѣ же, ꙗ҆́кѡ и҆ а҆да́мъ въ раѝ. Го́рькое питїѐ: вкꙋше́нїе ѡ҆бразова́ше. Заꙋше́нїе: на́шꙋ свобо́дꙋ ꙗ҆влѧ́ше. Ѡ҆плева́нїе, и҆ безче́стное ѡ҆бвожде́нїе: є҆́же ѡ҆ на́съ че́сть. Терно́вый вѣне́цъ: клѧ́твы ꙗ҆́же на на́съ ѿгна́нїе. Багрѧ́наѧ ѻ҆де́жда: за кѡ́жаныѧ ри̑зы, и҆ за є҆́же на на́съ ца́рскꙋю ᲂу҆́тварь. Гво́здїе: всеконе́чное на́шегѡ грѣха̀ недвиже́нїе. Крⷭ҇тъ: дре́во є҆́же въ раѝ. Пронзє́наѧ рє́бра: а҆да́мово ѡ҆бразова́хꙋ ребро̀, ѿ негѡ́же є҆́ѵа, ѿ неѧ́же престꙋпле́нїе. Копїѐ: пла́менное ѻ҆рꙋ́жїе мнѣ̀ ѿвраща́етъ. И҆з̾ ре́бръ вода̀: ѡ҆́бразъ кр҃ще́нїѧ. Кро́вь, и҆ тро́сть: и҆́миже на́мъ червле́ными пи́смены ꙗ҆́кѡ цр҃ь, дре́внее ѻ҆те́чество дарова̀ и҆ подписа̀. Глаго́летсѧ ᲂу҆́бѡ а҆да́мовѣ главѣ̀ та́мѡ лежа́ти, и҆дѣ́же и҆ хрⷭ҇то́съ глава̀ всѣ́хъ распѧ́тсѧ: крⷭ҇ти́сѧ ᲂу҆́бѡ хрⷭ҇то́вою кро́вїю и҆сте́кшею. Ло́бное же мѣ́сто глаго́летсѧ, зане́же въ пото́пѣ восте́кшей внѣ̀ землѝ а҆да́мовѣ главѣ̀, ко́сти то́чїю носи́мѣ бы́ти, ꙗ҆́кѡ нѣ́коемꙋ чꙋ́дꙋ зри́момꙋ, ю҆́же соломѡ́нъ че́стїю пра́ѻтца, со всѣ́мъ свои́мъ во́инствомъ, ка́менїемъ мно́жайшимъ покры̀. Тѣ́мже и҆ мѣ́сто то̀ ѿто́лѣ лїѳострѡто́нъ, сі́есть, каменопо́стланное и҆менова́сѧ: Глаго́лютъ ᲂу҆́бѡ ст҃ы́хъ и҆зѧ́щнїи, ѿ преда́нїѧ и҆мѣ́ти, и҆ самомꙋ̀ а҆да́мꙋ та́мѡ ѿ а҆́гг҃ла погребе́нꙋ бы́ти. И҆дѣ́же ᲂу҆́бѡ трꙋ́пъ, та́мѡ и҆ ѻ҆ре́лъ прїи́де хрⷭ҇то́съ, вѣ́чный цр҃ь, но́вый а҆да́мъ, ве́тхаго и҆ дре́вомъ па́дшаго а҆да́ма, дре́вомъ и҆сцѣлѧ́ѧй. Преесте́ственнымъ, и҆ є҆́же ѡ҆ на́съ неисче́тнымъ твои́мъ бл҃гоꙋтро́бїемъ, хрⷭ҇тѐ бж҃е, поми́лꙋй на́съ, а҆ми́нь.
Пѣ́снь и҃.
[С] І҆рмо́съ: Сто́лпъ ѕло́бы бг҃опроти́вныѧ, бж҃е́ственнїи ѻ҆́троцы ѡ҆бличи́ша: на хрⷭ҇та́ же шата́ющеесѧ беззако́нныхъ собо́рище, совѣ́тꙋетъ тщє́тнаѧ, ᲂу҆би́ти поꙋча́етсѧ, живо́тъ держа́щаго дла́нїю: є҆го́же всѧ̀ тва́рь бл҃гослови́тъ, сла́вѧщи во вѣ́ки.
[А] Ѿ вѣ́ждей ᲂу҆ч҃нкѡ́мъ ны́нѣ со́нъ, ре́клъ є҆сѝ хрⷭ҇тѐ, ѿтрѧси́те, въ мл҃твѣ же бди́те, да не въ напа́сть вни́дете, и҆ наипа́че сі́мѡне: крѣпча́йшемꙋ бо бо́лїй и҆скꙋ́съ. разꙋмѣ́й мѧ̀ пе́тре: є҆го́же всѧ̀ тва́рь бл҃гослови́тъ, сла́вѧщи во вѣ́ки.
[В] Скве́рна сло́ва ᲂу҆сте́нъ, никогда́же и҆зрекꙋ̀ тебѣ̀ влⷣко, съ тобо́ю ᲂу҆мрꙋ̀ ꙗ҆́кѡ бл҃горазꙋ́менъ, а҆́ще и҆ всѝ ѿве́ргꙋтсѧ, возопѝ пе́тръ. ни пло́ть, нижѐ кро́вь, но ѻ҆ц҃ъ тво́й ѿкры́ ми тѧ̀: є҆го́же всѧ̀ тва́рь бл҃гослови́тъ, сла́вѧщи во вѣ́ки.
[В] Глꙋбинꙋ̀ премꙋ́дрости бж҃е́ственныѧ и҆ ра́зꙋма, не всю̀ и҆спыта́лъ є҆сѝ, бе́зднꙋ же мои́хъ сꙋде́бъ не пости́глъ є҆сѝ человѣ́че, гдⷭ҇ь речѐ. пло́ть ᲂу҆́бѡ сы́й не хвали́сѧ, три́жды бо ѿве́ржешисѧ менѐ: є҆го́же всѧ̀ тва́рь бл҃гослови́тъ, сла́вѧщи во вѣ́ки.
[А] Ѿрица́ешисѧ сі́мѡне пе́тре, є҆́же сотвори́ши ско́рѡ, ꙗ҆́коже рече́сѧ, и҆ къ тебѣ̀ ѻ҆трокови́ца є҆ди́на прише́дши ᲂу҆страши́тъ тѧ̀, гдⷭ҇ь речѐ. го́рцѣ прослези́въ, ѡ҆брѧ́щеши мѧ̀ ѻ҆ба́че млⷭ҇тива: є҆го́же всѧ̀ тва́рь бл҃гослови́тъ, сла́вѧщи во вѣ́ки.
Пѣ́снь ѳ҃.
[Т] І҆рмо́съ: Чⷭ҇тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
[Ѻ] Па́гꙋбное собо́рище бг҃оме́рзкихъ, лꙋка́внꙋющихъ бг҃оꙋбі́йцъ со́нмище, предста̀ хрⷭ҇тѐ тебѣ̀, и҆ ꙗ҆́кѡ непра́ведника влеча́ше зижди́телѧ всѣ́хъ, є҆го́же велича́емъ.
[Н] Зако́на не разꙋмѣ́юще нечести́вїи, гласѡ́мъ прⷪ҇ро́чєскимъ поꙋча́ющесѧ вотщѐ, ꙗ҆́кѡ ѻ҆вча̀ влеча́хꙋ тѧ̀ всѣ́хъ влⷣкꙋ, непра́веднѡ закла́ти, є҆го́же велича́емъ.
[Т] Ꙗ҆зы́кѡмъ и҆зда́ннꙋю жи́знь, съ кни́жники ᲂу҆би́ти сщ҃е́нницы преда́хꙋ, ᲂу҆ѧ́звлени самозави́стною ѕло́бою, є҆стество́мъ животода́вца, є҆го́же велича́емъ.
[Е] Ѡ҆быдо́ша ꙗ҆́кѡ псѝ мно́зи, и҆ ᲂу҆да́риша, цр҃ю̀, лани́тꙋ твою̀ заꙋше́нїемъ, вопроша́хꙋ тѧ̀, тебе́ же ло́жна свидѣ́тельствовахꙋ: и҆ всѧ̑ претерпѣ́въ, всѣ́хъ сп҃слъ є҆сѝ.
Та́же, є҆ѯапостїла́рїй, три́жды:
Разбо́йника бл҃горазꙋ́мнаго, во є҆ди́номъ часѣ̀ ра́еви сподо́билъ є҆сѝ гдⷭ҇и, и҆ менѐ дре́вомъ крⷭ҇тнымъ просвѣтѝ, и҆ сп҃си́ мѧ.
Та́же, є҆ѵⷢ҇лїе ѳ҃, ѿ і҆ѡа́нна, зача́ло ѯ҃а: Во вре́мѧ ѻ҆́но, стоѧ́хꙋ при крⷭ҇тѣ̀ і҆и҃совѣ: Коне́цъ: Воззрѧ́тъ на́нь, є҆го́же прободо́ша.
И҆ а҆́бїе: Всѧ́кое дыха́нїе: На гла́съ г҃, поста́вимъ стїхѝ д҃. И҆ пое́мъ стїхи̑ры самогла́сны трѝ, повторѧ́юще пе́рвый:
Два̀ и҆ лꙋка̑внаѧ сотворѝ, перворожде́нный сы́нъ мо́й і҆и҃ль: менѐ ѡ҆ста́ви и҆сто́чника воды̀ живо́тныѧ, и҆ и҆скопа̀ себѣ̀ кладене́цъ сокрꙋше́нный: менѐ на дре́вѣ распѧ́тъ, вара́ввꙋ же и҆спросѝ, и҆ ѿпꙋстѝ. ᲂу҆жасе́сѧ нб҃о ѡ҆ се́мъ, и҆ со́лнце лꙋчы̀ скры̀: ты́ же і҆и҃лю не ᲂу҆срами́лсѧ є҆сѝ, но сме́рти мѧ̀ пре́далъ є҆сѝ. ѡ҆ста́ви и҆̀мъ ѻ҆́ч҃е ст҃ы́й, не вѣ́дѧтъ бо, что̀ сотвори́ша.
Кі́йждо ᲂу҆́дъ ст҃ы́ѧ твоеѧ̀ пло́ти, безче́стїе на́съ ра́ди претерпѣ̀: те́рнїе, глава̀: лицѐ, ѡ҆плева̑нїѧ: чє́люсти, заꙋшє́нїѧ: ᲂу҆ста̀ во ѻ҆́цтѣ растворе́ннꙋю же́лчь вкꙋ́сомъ: ᲂу҆шеса̀, хꙋлє́нїѧ ѕлочести̑ваѧ: плещѝ, бїє́нїѧ, и҆ рꙋка̀, тро́сть. всегѡ̀ тѣлесѐ протѧжє́нїѧ на крⷭ҇тѣ̀: чле́нове, гвѡ́здїѧ: и҆ ре́бра, копїѐ. пострада́вый за ны̀, и҆ ѿ страсте́й свободи́вый на́съ, снизше́дый къ на́мъ чл҃вѣколю́бїемъ, и҆ вознесы́й на́съ всеси́льне сп҃се, поми́лꙋй на́съ.
Распе́ншꙋсѧ тѝ хрⷭ҇тѐ, всѧ̀ тва́рь ви́дѧщи трепета́ше, ѡ҆снова̑нїѧ землѝ позыба́шасѧ стра́хомъ держа́вы твоеѧ̀: тебѣ́ бо возне́сшꙋсѧ дне́сь, ро́дъ є҆вре́йскїй поги́бе, цр҃ко́внаѧ завѣ́са раздра́сѧ на дво́е, и҆ ме́ртвїи ѿ гробѡ́въ воскр҃со́ша: со́тникъ ви́дѣвъ чꙋ́до, ᲂу҆жасе́сѧ. предстоѧ́щи же мт҃и твоѧ̀ вопїѧ́ше, рыда́ющи мт҃рски: ка́кѡ не возрыда́ю, и҆ ᲂу҆тро́бы моеѧ̀ не бїю̀, зрѧ́щи тѧ̀ на́га ꙗ҆́кѡ ѡ҆сꙋжде́на, на дре́вѣ ви́сѧща; распны́йсѧ и҆ погребы́йсѧ, и҆ воскр҃сы́й и҆з̾ ме́ртвыхъ, гдⷭ҇и сла́ва тебѣ̀.
Сла́ва, гла́съ ѕ҃: Совлеко́ша съ менѐ ри̑зы моѧ̑, и҆ ѡ҆блеко́ша мѧ̀ въ ри́зꙋ червле́нꙋ, возложи́ша на главꙋ̀ мою̀ вѣне́цъ ѿ те́рнїй, и҆ въ деснꙋ́ю мою̀ рꙋ́кꙋ вда́ша тро́сть, да сокрꙋшꙋ̀ и҆̀хъ, ꙗ҆́кѡ сосꙋ́ды скꙋде́льничи.
И҆ ны́нѣ, гла́съ то́йже: Плещѝ моѧ̑ да́хъ на ра̑ны, лица́ же моегѡ̀ не ѿврати́хъ ѿ заплева́нїй, сꙋди́щꙋ пїла́товꙋ предста́хъ, и҆ крⷭ҇тъ претерпѣ́хъ за сп҃се́нїе мі́ра.
Та́же є҆ѵⷢ҇лїе і҃-е, ѿ ма́рка, зача́ло ѯ҃ѳ: Во вре́мѧ ѻ҆́но, прїи́де і҆ѡ́сифъ: Коне́цъ: Зрѧ́стѣ, гдѣ̀ є҆го̀ полага́хꙋ. Та́же: Сла́ва въ вы́шнихъ бг҃ꙋ: Сщ҃е́нникъ же є҆ктенїю̀: И҆спо́лнимъ ᲂу҆́треннюю мл҃твꙋ: И҆ про́чее по ѻ҆бы́чаю, и҆ по возгла́сѣ: Ꙗ҆́кѡ бг҃ъ млⷭ҇ти:
А҆́бїе, є҆ѵⷢ҇лїе а҃і, ѿ і҆ѡа́нна, зача́ло ѯ҃в: Во вре́мѧ ѻ҆́но, молѝ пїла́та і҆ѡ́сифъ: Коне́цъ: Положи́ста і҆и҃са:
И҆ пое́мъ стїхи̑ры самогла́сны, ѻ҆́ба ли̑ка вкꙋ́пѣ.
Гла́съ а҃: Всѧ̀ тва́рь и҆змѣнѧ́шесѧ стра́хомъ, зрѧ́щи тѧ̀ на крⷭ҇тѣ̀ ви́сима хрⷭ҇тѐ: со́лнце ѡ҆мрача́шесѧ, и҆ землѝ ѡ҆снова̑нїѧ сотрѧса́хꙋсѧ, всѧ̑ сострада́хꙋ созда́вшемꙋ всѧ̑. во́лею на́съ ра́ди претерпѣ́вый, гдⷭ҇и сла́ва тебѣ̀.
Гла́съ в҃: Сті́хъ: Раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй.
Лю́дїе ѕлочести́вїи и҆ беззако́ннїи, вскꙋ́ю поꙋча́ютсѧ тщє́тнымъ; вскꙋ́ю живота̀ всѣ́хъ на сме́рть ѡ҆сꙋди́ша; ве́лїе чꙋ́до, ꙗ҆́кѡ созда́тель мі́ра въ рꙋ́ки беззако́нныхъ предае́тсѧ, и҆ на дре́во возвыша́етсѧ чл҃вѣколю́бецъ, да ꙗ҆̀же во а҆́дѣ ю҆́зники свободи́тъ зовꙋ́щыѧ: долготерпѣли́ве гдⷭ҇и сла́ва тебѣ̀.
Сті́хъ: Да́ша въ снѣ́дь мою̀ же́лчь, и҆ въ жа́ждꙋ мою̀ напои́ша мѧ̀ ѻ҆́цта.
Дне́сь зрѧ́щи тѧ̀ непоро́чнаѧ дв҃а на крⷭ҇тѣ̀ сло́ве возвыша́ема, рыда́ющи мт҃рнею ᲂу҆тро́бою, ᲂу҆ѧзвлѧ́шесѧ се́рдцемъ го́рцѣ, и҆ стенѧ́щи болѣ́зненнѡ и҆з̾ глꙋбины̀ дꙋшѝ, лицѐ со власы̀ терза́ющи. тѣ́мже и҆ пе́рси бїю́щи, взыва́ше жа́лостнѡ: ᲂу҆вы̀ мнѣ̀, бж҃е́ственное ча́до, ᲂу҆вы̀ мнѣ̀, свѣ́те мі́ра: что̀ заше́лъ є҆сѝ ѿ ѻ҆́чїю моє́ю а҆́гнче бж҃їй; тѣ́мже вѡ́инства безпло́тныхъ, тре́петомъ содержи́ми бѧ́хꙋ, глаго́люще: непостижи́ме гдⷭ҇и сла́ва тебѣ̀.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
На дре́вѣ ви́дѧщи ви́сима хрⷭ҇тѐ, тебѐ всѣ́хъ зижди́телѧ и҆ бг҃а, безсѣ́меннѡ ро́ждшаѧ тѧ̀, вопїѧ́ше го́рькѡ: сн҃е мо́й, гдѣ̀ добро́та за́йде зра́ка твоегѡ̀; не терплю̀ зрѣ́ти тѧ̀ непра́веднѡ распина́ема: потщи́сѧ ᲂу҆̀бо, воста́ни, ꙗ҆́кѡ да ви́жꙋ и҆ а҆́зъ твоѐ и҆з̾ ме́ртвыхъ тридне́вное воскрⷭ҇нїе.
Сла́ва, гла́съ и҃: Гдⷭ҇и, восходѧ́щꙋ тѝ на крⷭ҇тъ, стра́хъ и҆ тре́петъ нападѐ на тва́рь, и҆ землѝ ᲂу҆́бѡ возбранѧ́лъ є҆сѝ поглоти́ти распина́ющихъ тѧ̀, а҆́дꙋ же повелѣва́лъ є҆сѝ и҆спꙋсти́ти ю҆́зники, на ѡ҆бновле́нїе человѣ́кѡвъ, сꙋдїѐ живы́хъ и҆ ме́ртвыхъ, жи́знь прише́лъ є҆сѝ пода́ти, а҆ не сме́рть: чл҃вѣколю́бче сла́ва тебѣ̀.
И҆ ны́нѣ, гла́съ ѕ҃: Оу҆жѐ ѡ҆мака́етсѧ тро́сть и҆зрече́нїѧ, ѿ сꙋде́й непра́ведныхъ, і҆и҃съ сꙋди́мь быва́етъ, и҆ ѡ҆сꙋжда́етсѧ на крⷭ҇тъ, и҆ стра́ждетъ тва́рь, на крⷭ҇тѣ̀ ви́дѧщи гдⷭ҇а. но є҆стество́мъ тѣлесѐ, менѐ ра́ди стражда́й бл҃гі́й, гдⷭ҇и, сла́ва тебѣ̀.
Та́же, є҆ѵⷢ҇лїе в҃і, ѿ матѳе́а, зача́ло рд҃і: Во ᲂу҆́трїй де́нь, и҆́же є҆́сть по пѧтцѣ̀: Коне́цъ: Зна́менавше ка́мень съ кꙋстѡді́ею.
Та́же, Бл҃го є҆́сть и҆сповѣ́датисѧ гдⷭ҇ви: Трист҃о́е. По Ѻ҆́ч҃е на́шъ:
Тропа́рь, гла́съ д҃: И҆скꙋпи́лъ ны̀ є҆сѝ ѿ клѧ́твы зако́нныѧ честно́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дсѧ, безсме́ртїе и҆сточи́лъ є҆сѝ человѣ́кѡмъ, сп҃се на́шъ, сла́ва тебѣ̀.
Та́же, є҆ктенїа̀ ѻ҆бы́чнаѧ. И҆ ѿпꙋ́стъ. Пе́рвый же ча́съ не совокꙋплѧ́емъ ны́нѣ, но ѡ҆ второ́мъ часѣ̀ днѐ.