Въ то́йже вели́кїй четверто́къ
повече́рїе глаго́лемъ ма́лое, на не́мже пое́мъ трипѣ́снецъ. Творе́нїе господи́на а҆ндре́а кри́тскагѡ. Гла́съ и҃.
Пѣ́снь є҃.
І҆рмо́съ: Мра́къ дꙋшѝ моеѧ̀ разженѝ свѣтода́вче хрⷭ҇тѐ бж҃е, началоро́днꙋю тьмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ сло́ве, да ᲂу҆́тренюѧ сла́влю тѧ̀.
Оу҆раси́сѧ ве́черѧ, и҆ ᲂу҆гото́васѧ тебѣ̀ па́сха, ꙗ҆́коже ре́клъ є҆сѝ хрⷭ҇тѐ: но і҆ꙋ́да на преда́нїе твоѐ поꙋча́шесѧ, и҆ сы́й съ тобо́ю внѣ̀ твоеѧ̀ цѣны̀, соглаша́шесѧ сребролю́бїемъ.
Востае́тъ съ ве́чери, и҆ ле́нтїемъ препоѧсꙋ́етсѧ по чре́слѡмъ хрⷭ҇то́съ во́лею, и҆ преклонѧ́етъ вы́ю, петрꙋ̀ вопїю́щꙋ: никогда́же моѝ но́зѣ ᲂу҆мы́еши тво́рче мо́й, но ѻ҆ба́че ѡ҆мы́й.
Прїѧ́тъ хлѣ́бъ въ рꙋ́цѣ, на преда́нїе і҆ꙋ́да, льсти́вый ᲂу҆чени́къ, и҆́мже и҆ преда́нїе содѣ́ла тебѣ̀, простира́ше но́зѣ, и҆̀хже са́мъ є҆сѝ ѡ҆мы́лъ и҆ ле́нтїемъ ѡ҆те́рлъ.
Лобза́нїемъ льсти́внымъ і҆ꙋ́да тогда̀ ᲂу҆ста̀ распира́ше тебѣ̀, и҆́миже тѣ́ло твоѐ сло́ве недосто́йнѡ ѡ҆мака́ше, вопїѧ̀ тебѣ̀: ра́дꙋйсѧ ᲂу҆ч҃тлю, лобза́тель и҆ преда́тель, ра́бъ и҆ льсте́цъ.
Пе́тръ ꙗ҆́коже зрѧ́ше содѣва́ємаѧ тогда̀, ᲂу҆́жасомъ ѡ҆держи́мь бы́въ рабы́ни ѡ҆бличи́сѧ хꙋды́мъ вопроше́нїемъ: и҆́бо ѿве́ржесѧ тебѐ гдⷭ҇а, не то́кмѡ ꙗ҆́коже ре́клъ є҆сѝ, но и҆ ꙗ҆́кѡ вѣ́далъ є҆сѝ, всѧ̑ вѣ́дый.
Заꙋша́етсѧ зижди́тель, и҆ ᲂу҆дарѧ́етсѧ тва́рь поноше́нїемъ є҆гѡ̀: тро́стїю бїе́тсѧ хотѧ̀, и҆ вы̑шнѧѧ преклонѧ́ютсѧ: ѡ҆плева́етсѧ сꙋдїѧ̀, и҆ ѡ҆снѡва́нїѧ всѧ̑ земна̑ѧ подвиза́ютсѧ.
Сла́ва: Те́рнїемъ вѣнчава́етсѧ бг҃ъ, зе́млю всю̀ ᲂу҆краше́й цвѣ́ты, и҆ ра̑ны прїе́млетъ, и҆ терпи́тъ поноше́нїе долготерпѣли́внѡ, и҆ багрѧни́цꙋ порꙋга́нїѧ но́ситъ, и҆ терпи́тъ всѧ̑ бг҃ъ сы́й, и҆ стра́ждетъ свое́ю пло́тїю.
И҆ ны́нѣ: Да вопїе́тъ і҆ѡа́ннъ, сказꙋ́ѧ ᲂу҆че́нїи бж҃е́ственными воплоще́нїе твоѐ: сло́во пло́ть бы́въ и҆з̾ дв҃ы непрело́жнѡ, и҆ пребы́сть є҆стество́мъ бг҃ъ ꙗ҆́коже бѣ̀, не ѿстꙋпи́въ ѻ҆те́ческихъ є҆гѡ̀ нѣ́дръ.
Пѣ́снь и҃.
І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑: тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Ѡ҆дѣва́ѧй ѻ҆́блаки нб҃о і҆и҃се, на прⷭ҇то́лѣ сла́вы црⷭ҇твꙋѧ съ нетлѣ́ннымъ ѻ҆ц҃е́мъ, ты̀ прїе́мь ле́нтїй, си́мъ препоѧ́салсѧ є҆сѝ ѡ҆мы́ти но́ги бре́ннїи, ве́сь ѻ҆́гнь сы́й сло́ве, а҆́ще и҆ воплоти́лсѧ є҆сѝ.
Ꙗ҆́коже всѧ̑ ѡ҆мы́въ, возле́гъ і҆и҃съ, къ свои̑мъ ᲂу҆ченикѡ́мъ глаго́летъ: вѣ́сте всѝ, что̀ сотвори́хъ ны́нѣ: ѡ҆́бразъ бо да́хъ ва́мъ смире́нїѧ всѣ̑мъ: да и҆́же хо́щетъ пе́рвый бы́ти, да бꙋ́детъ всѣ́хъ послѣ́днїй произволе́нїемъ.
Чи́сти ᲂу҆́бѡ є҆стѐ, но не всѝ вы̀, хрⷭ҇то́съ дрꙋгѡ́мъ возлежа́щымъ на ве́чери речѐ: є҆ди́нъ ᲂу҆́бѡ къ дрꙋго́мꙋ не довѣ́дѧще, речѐ, сло́ва: тѣ́мже по си́хъ глаго́летъ ꙗ҆́вѣ и҆́мѧ преда́телѧ.
Ꙗ҆́коже сїѧ̑ глаго́лѧ, на горѣ̀ є҆леѡ́нстѣй прише́дъ, сꙋдїѧ̀ всѣ́хъ со ᲂу҆ченикѝ, тогда̀ ᲂу҆́бѡ глаго́лаше: прїиди́те и҆ по́йдемъ ѿсю́дꙋ, приспѣ́ бо ᲂу҆жѐ преда́тель: никто́же ѿве́ржисѧ менѐ, во́лею бо страждꙋ̀.
Ѽ ле́стнагѡ лобза́нїѧ! ра́дꙋйсѧ ᲂу҆ч҃тлю, хрⷭ҇тꙋ̀ і҆ꙋ́да глаго́летъ, вкꙋ́пѣ съ сло́вомъ преда́стъ на заколе́нїе: се́ бо дадѐ зна́менїе беззакѡ́ннымъ: є҆го́же а҆́зъ лобжꙋ̀, то́й є҆́сть, є҆го́же преда́ти ва́мъ ѡ҆бѣща́хсѧ.
Ꙗ҆́тъ бы́въ бж҃е на́шъ ѿ беззако́нныхъ люде́й, и҆ не пререкꙋ́ѧ ѿню́дъ, ни вопїѧ̀ а҆́гнче бж҃їй, претерпѣ́лъ є҆сѝ всѧ̑, и҆спыта́тисѧ, и҆ сꙋди́тисѧ, и҆ бїе́нъ бы́ти, свѧ́занъ и҆ ведо́мъ бы́ти со ѻ҆рꙋ́жїи и҆ дреко́льми къ каїа́фѣ.
Да ра́спнетсѧ, вопїѧ́хꙋ є҆вре́йстїи лю́дїе со сщ҃е́нники и҆ кни́жники, і҆и҃съ хрⷭ҇то́съ. ѽ лю́дїе невѣ́рнїи! что́ бо сотворѝ ꙗ҆ви́выйсѧ, воздви́гнꙋвый ла́зарѧ ѿ гро́ба, и҆ пꙋ́ть сотвори́вый человѣ́кѡмъ на сп҃се́нїе;
Пїла́товꙋ сꙋди́щꙋ беззако́ннїи лю́дїе, крича́ще вопїѧ́хꙋ: распнѝ сего̀, ѿпꙋсти́ же на́мъ свѧ́зана сꙋ́ща вара́ввꙋ, ᲂу҆бі́йцꙋ: хрⷭ҇та́ же пе́рвѣе би́въ, возмѝ возмѝ, распнѝ со ѕлодѣ́и.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Ѽ несказа́ннагѡ и҆стоща́нїѧ! ѽ неизглаго́ланнагѡ совѣ́та! ꙗ҆́кѡ ѻ҆́гнь сы́й, ѡ҆мы́лъ є҆сѝ но́зѣ преда́телю сп҃се: ѡ҆мы́въ же не ѡ҆пали́лъ є҆сѝ, и҆ подава́ѧ хлѣ́бъ на ве́чери, и҆ та́йной слꙋ́жбѣ наꙋча́лъ є҆сѝ.
И҆ ны́нѣ, бг҃оро́диченъ: Ѽ но́вагѡ слы́шанїѧ! бг҃ъ сн҃ъ жены̀, и҆ безсѣ́менна ржⷭ҇тва̀, безмꙋ́жнаѧ мт҃и, и҆ рожде́нное бг҃ъ: ѽ ᲂу҆жа́снагѡ слы́шанїѧ! ѽ зача́тїѧ стра́шнагѡ! ѽ дв҃ы нетлѣ́ннагѡ ржⷭ҇тва̀! вои́стиннꙋ па́че ᲂу҆ма̀ всѧ̑, и҆ вы́ше вѣ́дѣнїѧ.
Пѣ́снь ѳ҃.
І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ сп҃се́нїѧ на́мъ, въ домꙋ̀ дв҃довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Па́ки вы̀ спитѐ, хрⷭ҇то́съ ᲂу҆ч҃нкѡ́мъ речѐ: бди́те, прибли́жисѧ ча́съ про́чее, воста́ните, и҆́демъ дрꙋ́зи моѝ, сѐ преда́тель ᲂу҆чени́къ всю̀ спі́рꙋ и҆мѣ́ѧ, грѧде́тъ преда́ти мѧ̀ чл҃вѣкоꙋбі́йцамъ.
Лобза́нїе твоѐ льсти́вное, и҆ цѣлова́нїе го́рькое, комꙋ̀ зове́ши ле́стче; глаго́лѧ бо, ра́дꙋйсѧ равві̀, хрⷭ҇то́съ ко і҆ꙋ́дѣ вѣща́ше: дрꙋ́же, на не́же прише́лъ є҆сѝ, речѐ: а҆́ще бо цѣлова́ти прише́лъ є҆сѝ, что̀ предлага́еши но́жъ ме́домъ пома́занный;
Пїла́товꙋ сꙋди́щꙋ непови́нный сꙋдїѧ̀, во́лею прише́лъ є҆сѝ предста́ти хрⷭ҇тѐ, и҆ и҆зба́вити на́съ ѿ долгѡ́въ на́шихъ. тѣ́мже претерпѣ́лъ є҆сѝ бл҃гі́й пло́тїю ᲂу҆ра́ненъ бы́ти, да всѝ прїи́мемъ свобожде́нїе.
Милосе́рдїѧ пꙋчи́на, ка́кѡ предстои́тъ ѻ҆́гнь пїла́тꙋ, сѣ́нꙋ и҆ тро́сти и҆ землѝ сꙋ́щей, є҆гѡ́же не ѡ҆палѝ ѻ҆́гнь бж҃ества̀ хрⷭ҇то́съ, но пожида́ше терпѣли́внѡ, и҆́же є҆стество́мъ свобо́дь ꙗ҆́кѡ чл҃вѣколю́бецъ.
Возмѝ возмѝ, распнѝ глаго́лемаго хрⷭ҇та̀, і҆ꙋде́є взыва́хꙋ пїла́тꙋ и҆ногда̀: се́й же рꙋ́цѣ ѡ҆мыва́ше, и҆ тро́стїю и҆̀мъ писа́ше на него̀ винꙋ̀, всѣ̑мъ да́рꙋющꙋю безсме́ртїе.
Вопїю́ще беззако́ннїи пїла́тꙋ и҆зли́ше: возмѝ возмѝ, распнѝ хрⷭ҇та̀, просѧ́хꙋ ᲂу҆би́ти ꙗ҆́кѡ ѡ҆сꙋжде́на: не се́й ли воскр҃сѝ мє́ртвыѧ, прокажє́нныѧ ѡ҆чи́сти, кровоточи́вꙋю и҆сцѣлѝ, разсла́блєнныѧ стѧгнꙋ́въ;
Что́ бо ѕло̀ сотворѝ, ꙗ҆́кѡ взыва́ете вельмѝ: возмѝ возмѝ, распнѝ є҆го̀; пїла́тъ и҆ногда̀ вопїѧ́ше лю́демъ неразꙋ̑мнымъ: вины̀ не ѡ҆брѣта́ю въ не́мъ. ѻ҆ни́ же го́рькѡ вопїѧ́хꙋ: возмѝ возмѝ, распнѝ сп҃са всѣ́хъ.
Ѽ і҆ꙋде́є беззако́ннїи! ѽ неразꙋ́мнїи лю́дїе! не помѧнꙋ́сте ли что̀ ѿ чꙋде́съ хрⷭ҇то́выхъ, мно́жество и҆сцѣле́нїй; но и҆ всеѧ̀ є҆гѡ̀ не разꙋмѣ́сте ли бж҃е́ственныѧ си́лы, ꙗ҆́коже пе́рвїи ѻ҆тцы̀ ва́ши, ны́нѣ же и҆ вы̀ не разꙋмѣ́сте;
Сла́ва: Бїе́нъ бы́въ зижди́телю мо́й, и҆ преда́лсѧ є҆сѝ менѐ ра́ди распѧ́тисѧ, да сп҃се́нїе моѐ посредѣ̀ землѝ содѣ́лавъ, и҆сточи́ши мі́рови жи́знь: и҆ ѡ҆безсме́ртиши честно́ю твое́ю кро́вїю покланѧ́ющыѧсѧ тебѣ̀.
И҆ ны́нѣ, бг҃оро́диченъ: А҆́гница твоѧ̀ влⷣко, предстоѧ́щи ᲂу҆ крⷭ҇та̀, и҆ рыда́ющи тебѐ творца̀ всѧ́ческихъ, зрѧ́ше твоѐ долготерпѣ́нїе: во́лею бо роди́лсѧ є҆сѝ пло́тїю, и҆ стрⷭ҇ти всѧ̑ въ не́й претерпѣ́лъ є҆сѝ, да сп҃се́ши мі́ръ.