Во ст҃ы́й и҆ вели́кїй четверто́къ ве́чера,
во свѣти́льничное, кле́плетъ во и҃ ча́съ, и҆ бл҃гослови́вшꙋ а҆рхїере́ю, и҆лѝ сщ҃е́нникꙋ, начина́емъ вече́рню: Прїиди́те поклони́мсѧ: и҆ предначина́тельный ѱало́мъ. Быва́етъ є҆ктенїа̀ ѿ сщ҃е́нника. Та́же, Гдⷭ҇и воззва́хъ, на гла́съ в҃, поставлѧ́емъ стїхѡ́въ і҃. Сщ҃е́нникъ же и҆змѣнѧ́ѧй сщ҃е́нническꙋю ѻ҆де́ждꙋ, и҆схо́дитъ, и҆ кади́тъ, и҆ по є҆́же возврати́тисѧ, твори́тъ проскомі́дїю. Мы́ же пое́мъ стїхи̑ры самогла́сны днѐ, гла́съ в҃, повторѧ́юще ѧ҆̀.
Стека́етсѧ про́чее собо́рище і҆ꙋде́йское, да содѣ́телѧ и҆ зижди́телѧ всѧ́ческихъ пїла́тꙋ преда́стъ. ѽ беззако́нныхъ, ѽ невѣ́рныхъ! ꙗ҆́кѡ грѧдꙋ́щаго сꙋди́ти живы̑мъ и҆ мє́ртвымъ, на сꙋ́дъ гото́вѧтъ: и҆сцѣлѧ́ющаго стра̑сти, ко стрⷭ҇те́мъ ᲂу҆готовлѧ́ютъ: гдⷭ҇и долготерпѣли́ве, ве́лїѧ твоѧ̀ млⷭ҇ть, сла́ва тебѣ̀.
І҆ꙋ́да беззако́нный, ѡ҆мочи́вый на ве́чери рꙋ́кꙋ въ соли́лѣ съ тобо́ю, прострѐ къ беззакѡ́ннымъ рꙋ́цѣ прїѧ́ти сре́бреники: и҆ мѵ́ра ᲂу҆мы́сливый цѣ́нꙋ, тебѐ безцѣ́ннаго не ᲂу҆боѧ́сѧ прода́ти: но́зѣ простры́й, во є҆́же ᲂу҆мы́ти: влⷣкꙋ ѡ҆блобыза̀ льсти́внѡ, во є҆́же преда́ти беззакѡ́ннымъ: ли́ка же а҆пⷭ҇льскагѡ ѿве́ргсѧ, и҆ три́десѧть пове́ргъ сре́бреники, твоегѡ̀ тридне́внагѡ воскрⷭ҇нїѧ не вѣ́дѣ, и҆́мже поми́лꙋй на́съ.
І҆ꙋ́да преда́тель льсти́въ сы́й, льсти́внымъ лобза́нїемъ предадѐ сп҃са гдⷭ҇а, и҆ влⷣкꙋ всѣ́хъ, ꙗ҆́кѡ раба̀ продадѐ і҆ꙋде́ѡмъ: ꙗ҆́кѡ ѻ҆вча̀ на заколе́нїе, та́кѡ послѣ́доваше, а҆́гнецъ бж҃їй, сн҃ъ ѻ҆́ч҃їй, є҆ди́нъ многомлⷭ҇тивый.
І҆ꙋ́да ра́бъ и҆ льсте́цъ, ᲂу҆чени́къ и҆ навѣ́тникъ, дрꙋ́гъ и҆ дїа́волъ, ѿ дѣ́лъ ꙗ҆ви́сѧ: послѣ́доваше бо ᲂу҆чи́телю, и҆ на него̀ поꙋча́шесѧ преда́нїю, глаго́лаше въ себѣ̀: преда́мъ того̀, и҆ прїѡбрѧ́щꙋ сѡ́браннаѧ и҆мѣ̑нїѧ: и҆ска́ше же и҆ мѵ́рꙋ про́данꙋ бы́ти, и҆ і҆и҃са ле́стїю ꙗ҆́ти, ѿдадѐ цѣлова́нїе, предадѐ хрⷭ҇та̀. и҆ ꙗ҆́кѡ ѻ҆вча̀ на заколе́нїе, си́це послѣ́доваше а҆́гнецъ бж҃їй, є҆ди́нъ бл҃гоꙋтро́бный и҆ чл҃вѣколю́бецъ.
Є҆го́же проповѣ́да а҆́гнца и҆са́їа, грѧде́тъ на заколе́нїе во́льное, и҆ плещи̑ дае́тъ на ра̑ны, лани̑ты на заꙋшє́нїѧ, лица́ же не ѿвратѝ ѿ срамоты̀ заплева́нїй, сме́ртїю же без̾ѡбра́зною ѡ҆сꙋжда́етсѧ: всѧ̑ безгрѣ́шный во́лею прїе́млетъ, да всѣ̑мъ да́рꙋетъ и҆з̾ ме́ртвыхъ воскрⷭ҇нїе.
Сла́ва, и҆ ны́нѣ, гла́съ ѕ҃: Рожде́нїе є҆хі́днѡвъ вои́стиннꙋ і҆ꙋ́да, ꙗ҆́дшихъ ма́ннꙋ въ пꙋсты́ни, и҆ ро́пщꙋщихъ на пита́телѧ: є҆ще́ бо бра́шнꙋ сꙋ́щꙋ во ᲂу҆стѣ́хъ и҆́хъ, клевета́хꙋ на бг҃а небл҃года́рнїи: и҆ се́й ѕлочести́вый нбⷭ҇ный хлѣ́бъ во ᲂу҆стѣ́хъ носѧ́й, на сп҃са преда́тельство содѣ́ла. ѽ нра́ва несы́тнагѡ, и҆ де́рзости безчеловѣ́чныѧ! пита́ющаго продае́тъ, и҆ є҆го́же люблѧ́ше влⷣкꙋ, предаѧ́ше на сме́рть: вои́стиннꙋ ѻ҆́нѣхъ сы́нъ беззако́нный, и҆ съ ни́ми па́гꙋбꙋ наслѣ́дова. но пощадѝ гдⷭ҇и, дꙋ́шы на́шѧ ѿ такова́гѡ безчеловѣ́чества, є҆ди́не въ долготерпѣ́нїи неизрече́нный.
Вхо́дъ со є҆ѵⷢ҇лїемъ. Свѣ́те ти́хїй:
Прокі́менъ, гла́съ а҃: И҆зми́ мѧ гдⷭ҇и, ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀. Сті́хъ: И҆́же помы́слиша непра́вдꙋ въ се́рдцѣ ве́сь де́нь.
И҆схо́да чте́нїе. [Глава̀ ѳ҃і, ст. і҃-ѳ҃і.]
Речѐ гдⷭ҇ь мѡѷсе́ю: соше́дъ засвидѣ́тельствꙋй лю́демъ, и҆ ѡ҆чи́сти ѧ҆̀ дне́сь и҆ ᲂу҆́трѣ: и҆ да и҆сперꙋ́тъ ри̑зы. И҆ да бꙋ́дꙋтъ гото́вы въ де́нь тре́тїй: въ тре́тїй бо де́нь сни́детъ гдⷭ҇ь на го́рꙋ сїна́йскꙋю, пред̾ всѣ́ми людьмѝ. И҆ ᲂу҆стро́иши лю́ди ѻ҆́крестъ, глаго́лѧ: внемли́те себѣ̀ не восходи́ти на го́рꙋ, и҆ ничи́мже коснꙋ́тисѧ є҆ѧ̀: всѧ́къ прикоснꙋ́выйсѧ горѣ̀, сме́ртїю ᲂу҆́мретъ. Не ко́снетсѧ є҆́й рꙋка̀, ка́менїемъ бо побїе́тсѧ, и҆лѝ стрѣло́ю ᲂу҆стрѣли́тсѧ, а҆́ще ско́тъ, а҆́ще человѣ́къ, не бꙋ́детъ жи́въ: є҆гда́ же гла́си и҆ трꙋбы̑ и҆ ѻ҆́блакъ ѿи́детъ ѿ горы̀, сі́и взы́дꙋтъ на го́рꙋ. Сни́де же мѡѷсе́й съ горы̀ къ лю́демъ, и҆ ѡ҆ст҃ѝ ѧ҆̀: и҆ и҆спра́ша ри̑зы своѧ̑. И҆ речѐ лю́демъ: бꙋ́дите гото́ви, трѝ дни̑ не входи́те къ жена́мъ. Бы́сть же въ тре́тїй де́нь бы́вшꙋ ко ᲂу҆́трꙋ, и҆ бы́ша гла́си и҆ мо́лнїѧ, и҆ ѻ҆́блакъ мра́ченъ на горѣ̀ сїна́йстѣй, гла́съ трꙋ́бный глаша́ше ѕѣлѡ̀: и҆ ᲂу҆боѧ́шасѧ всѝ лю́дїе и҆̀же въ полцѣ̀. И҆зведе́ же мѡѷсе́й лю́ди во срѣ́тенїе бг҃ꙋ и҆з̾ полка̀, и҆ ста́ша под̾ горо́ю. Гора́ же сїна́йскаѧ дымѧ́шесѧ всѧ̀, схожде́нїѧ ра́ди бж҃їѧ на ню̀ во ѻ҆гнѝ: и҆ восхожда́ше ды́мъ, ꙗ҆́кѡ ды́мъ пе́щный: и҆ ᲂу҆жасо́шасѧ всѝ лю́дїе ѕѣлѡ̀. Бы́ша же гла́си трꙋ́бнїи происходѧ́ще крѣ́пцы ѕѣлѡ̀. мѡѷсе́й глаго́лаше, бг҃ъ же ѿвѣщава́ше є҆мꙋ̀ гла́сомъ.
Прокі́менъ, гла́съ з҃: И҆зми́ мѧ ѿ вра̑гъ мои́хъ бж҃е, и҆ ѿ востаю́щихъ на мѧ̀ и҆зба́ви мѧ̀. Сті́хъ: И҆зба́ви мѧ̀ ѿ дѣ́лающихъ беззако́нїе.
І҆́ѡва чте́нїе. [Глава̀ л҃и, ст. а҃-к҃г: гл. м҃в, ст. а҃-є҃].
Речѐ гдⷭ҇ь і҆́ѡвꙋ сквозѣ̀ бꙋ́рю и҆ ѻ҆́блаки: Кто̀ се́й скрыва́ѧй ѿ менѐ совѣ́тъ, содержа́й же глаго́лы въ се́рдцѣ, мене́ же ли мни́тсѧ ᲂу҆таи́ти; Препоѧ́ши ꙗ҆́кѡ мꙋ́жъ чре́сла твоѧ̑: вопрошꙋ́ же тѧ̀, ты́ же мѝ ѿвѣща́й. Гдѣ̀ бы́лъ є҆сѝ є҆гда̀ ѡ҆снова́хъ зе́млю; возвѣсти́ ми, а҆́ще вѣ́си ра́зꙋмъ; Кто̀ положѝ мѣ̑ры є҆ѧ̀, а҆́ще вѣ́си; и҆лѝ кто̀ наведы́й ве́рвь на ню̀; На че́мже столпѝ є҆ѧ̀ ᲂу҆твержде́ни сꙋ́ть; кто́ же є҆́сть положи́вый ка́мень краеꙋго́льный на не́й; Є҆гда̀ [сотворе́ны] бы́ша ѕвѣ́зды, восхвали́ша мѧ̀ гла́сомъ ве́лїимъ всѝ а҆́гг҃ли моѝ. Загради́хъ же мо́ре враты̀, є҆гда̀ и҆злива́шесѧ и҆з̾ чре́ва мт҃ре своеѧ̀ и҆сходѧ́щее. Положи́хъ же є҆мꙋ̀ ѻ҆́блакъ во ѡ҆дѣѧ́нїе, мгло́ю же пови́хъ є҆̀: И҆ положи́хъ є҆мꙋ̀ предѣ́лы, ѡ҆бложи́въ затво́ры и҆ врата̀. Рѣ́хъ же є҆мꙋ̀: до сегѡ̀ до́йдеши и҆ не пре́йдеши, но въ тебѣ̀ сокрꙋша́тсѧ во́лны твоѧ̑. И҆лѝ при тебѣ̀ соста́вихъ свѣ́тъ ᲂу҆́треннїй; денни́ца же вѣ́сть чи́нъ сво́й, Ꙗ҆́тисѧ кри́лъ землѝ, ѿтрѧстѝ нечести̑выѧ ѿ неѧ̀. И҆лѝ ты̀ бре́нїе взе́мъ ѿ землѝ, созда́лъ є҆сѝ живо́тно, и҆ глаго́ливаго сего̀ посади́лъ є҆сѝ на землѝ; Ѿѧ́лъ же ли є҆сѝ ѿ нечести́выхъ свѣ́тъ; мы́шцꙋ же го́рдыхъ сокрꙋши́лъ ли є҆сѝ; Прише́лъ же ли є҆сѝ на и҆сто́чники мо́рѧ; въ слѣда́хъ же бе́здны ходи́лъ ли є҆сѝ; Ѿверза́ютсѧ же ли тебѣ̀ стра́хомъ врата̀ смє́ртнаѧ; вра́тницы же а҆́дѡвы ви́дѣвше тѧ̀ ᲂу҆боѧ́шасѧ ли; Навы́клъ же ли є҆сѝ широты̀ поднебе́сныѧ, повѣ́ждь ᲂу҆̀бо мѝ, коли́ка є҆́сть, Въ ко́ей же землѝ вселѧ́етсѧ свѣ́тъ; тьмѣ́ же ко́е є҆́сть мѣ́сто; А҆́ще ᲂу҆̀бо введе́ши мѧ̀ въ предѣ́лы и҆́хъ, а҆́ще же ли и҆ вѣ́си стєзѝ и҆́хъ; Вѣ́мъ ᲂу҆̀бо ꙗ҆́кѡ тогда̀ рожде́нъ є҆сѝ, число́ же лѣ́тъ твои́хъ мно́го. Прише́лъ же ли є҆сѝ въ сокрѡ́вища снѣ̑жнаѧ, и҆ сокрѡ́вища гра̑днаѧ ви́дѣлъ ли є҆сѝ; Подлежа́тъ же ли тебѣ̀ въ ча́съ врагѡ́въ въ де́нь бра́ней и҆ ра́ти; Ѿвѣща́въ же і҆́ѡвъ, речѐ ко гдⷭ҇ꙋ: Вѣ́мъ ꙗ҆́кѡ всѧ̑ мо́жеши, невозмо́жно же тебѣ̀ ничто́же. Кто́ є҆сть таѧ́й ѿ тебѐ совѣ́тъ; щадѧ́й же словеса̀, и҆ ѿ тебѐ мни́тсѧ ᲂу҆таи́ти; кто́ же возвѣсти́тъ мѝ, и҆́хже не вѣ́дѣхъ, вє́лїѧ и҆ ди̑внаѧ, и҆́хже не зна́хъ; Послꙋ́шай же менѐ гдⷭ҇и, да и҆ а҆́зъ возглаго́лю: вопрошꙋ́ же тѧ̀, ты́ же мѧ̀ наꙋчѝ. Слꙋ́хомъ ᲂу҆́бѡ ᲂу҆́ха слы́шахъ тѧ̀ пе́рвѣе, ны́нѣ же ѻ҆́ко моѐ ви́дѣ тѧ̀.
Прⷪ҇ро́чества и҆са́їина чте́нїе. [Глава̀ и҃, ст. д҃- а҃і.]
Гдⷭ҇ь дае́тъ мнѣ̀ ѧ҆зы́къ наꙋче́нїѧ, є҆́же разꙋмѣ́ти, є҆гда̀ подоба́етъ рещѝ сло́во: положи́ мѧ ᲂу҆́трѡ ᲂу҆́трѡ, приложи́ ми ᲂу҆́хо, є҆́же слы́шати. И҆ наказа́нїе гдⷭ҇не ѿверза́етъ ᲂу҆́шы моѝ, а҆́зъ же не проти́влюсѧ, ни противоглаго́лю. Плещы̀ моѝ вда́хъ на ра̑ны, и҆ лани̑тѣ моѝ на заꙋшє́нїѧ, лица́ же моегѡ̀ не ѿврати́хъ ѿ стꙋда̀ заплева́нїй. И҆ гдⷭ҇ь гдⷭ҇ь помо́щникъ мѝ бы́сть: сегѡ̀ ра́ди не ᲂу҆срами́хсѧ, но положи́хъ лицѐ своѐ а҆́ки тве́рдый ка́мень, и҆ разꙋмѣ́хъ, ꙗ҆́кѡ не постыждꙋ́сѧ. Занѐ приближа́етсѧ ѡ҆правда́вый мѧ̀: кто̀ прѧ́йсѧ со мно́ю; да сопротивоста́нетъ мнѣ̀ кꙋ́пнѡ: и҆ кто̀ сꙋдѧ́йсѧ со мно́ю: да прибли́житсѧ ко мнѣ̀. Сѐ гдⷭ҇ь гдⷭ҇ь помо́жетъ мѝ: кто̀ ѡ҆ѕло́битъ мѧ̀; сѐ всѝ вы̀, ꙗ҆́кѡ ри́за ѡ҆бетша́ете, и҆ ꙗ҆́кѡ мо́лїе и҆з̾ѧ́стъ вы̀. Кто̀ въ ва́съ боѧ́йсѧ гдⷭ҇а; да послꙋ́шаетъ гла́са ѻ҆́трока є҆гѡ̀: ходѧ́щїи во тьмѣ̀, и҆ нѣ́сть и҆̀мъ свѣ́та, надѣ́йтесѧ на и҆́мѧ гдⷭ҇не, и҆ ᲂу҆тверди́тесѧ ѡ҆ бз҃ѣ. Сѐ всѝ вы̀ ѻ҆́гнь раждиза́ете, и҆ ᲂу҆крѣплѧ́ете пла́мень: ходи́те свѣ́томъ ѻ҆гнѧ̀ ва́шегѡ, и҆ пла́менемъ, є҆го́же разжего́сте: менѐ ра́ди бы́ша сїѧ̑ ва́мъ, въ печа́ли ᲂу҆́спнете.
Та́же, є҆ктенїа̀ ма́лаѧ. Трист҃о́е.
Прокі́менъ а҆пⷭ҇ла, гла́съ з҃: Кнѧ́зи лю́дстїи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀. Сті́хъ: Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ. А҆по́столъ къ корі́нѳѧнѡмъ, зача́ло рм҃ѳ. Бра́тїе, а҆́зъ прїѧ́хъ ѿ гдⷭ҇а: А҆ллилꙋ́їа, гла́съ ѕ҃: Бл҃же́нъ разꙋмѣва́ѧй на ни́ща и҆ ᲂу҆бо́га, въ де́нь лю́тъ и҆зба́витъ є҆го̀ гдⷭ҇ь. Сті́хъ: Вразѝ моѝ рѣ́ша мнѣ̀ ѕла̑ѧ: когда̀ ᲂу҆́мретъ и҆ поги́бнетъ и҆́мѧ є҆гѡ̀; Сті́хъ: Ꙗ҆ды́й хлѣ́бы моѧ̑, возвели́чи на мѧ̀ запина́нїе. Є҆ѵⷢ҇лїе ѿ матѳе́а, зача́ло р҃з: Речѐ гдⷭ҇ь свои̑мъ ᲂу҆ч҃нкѡ́мъ: вѣ́сте, ꙗ҆́кѡ по двою̀ дню̑ па́сха бꙋ́детъ:
И҆ по чи́нꙋ бж҃е́ственнаѧ лїтꙋргі́а вели́кагѡ васі́лїа. Вмѣ́стѡ же херꙋві́мскїѧ пѣ́сни пое́мъ тропа́рь се́й, на гла́съ ѕ҃, три́жды.
Ве́чери твоеѧ̀ та́йныѧ дне́сь, сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ гдⷭ҇и во црⷭ҇твїи твое́мъ.
То́йже и҆ прича́стенъ, и҆ вмѣ́стѡ, Да и҆спо́лнѧтсѧ ᲂу҆ста̀ на̑ша то́йже пое́мъ мно́жицею, до́ндеже причастѧ́тсѧ бра́тїѧ бж҃е́ственныхъ та̑инъ. По заамвѡ́нной же мл҃твѣ быва́етъ ᲂу҆мове́нїе, и҆ є҆гѡ̀ послѣ́дованїе, ꙗ҆́коже ꙗ҆влѧ́етъ ᲂу҆ста́въ. Та́же дае́тсѧ а҆нті́дѡръ, и҆ ѿпꙋ́стъ. На трапе́зѣ же причаща́емсѧ вїна̀ и҆ є҆ле́а.