Повече́рїе же глаго́лемъ ма́лое,
на не́мже пое́мъ трипѣ́снецъ господи́на а҆ндре́а вели́кагѡ четвертка̀. Гла́съ ѕ҃.
Пѣ́снь д҃.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, сла́ва си́лѣ твое́й гдⷭ҇и.
Го́рница по́стланаѧ, прїѧ́тъ тѧ̀ созда́телѧ и҆ с̾таи́нники, и҆ та́мѡ па́схꙋ сконча́лъ є҆сѝ, и҆ та́мѡ содѣ́лалъ є҆сѝ та̑инства: та́мѡ бо двѣма̀ по́сланома ны́нѣ ᲂу҆ченико́ма твои́ма, па́сха ᲂу҆гото́васѧ тебѣ̀.
И҆ди́те ко ѻ҆́нсицѣ, всѧ̑ вѣ́дый предглаго́летъ а҆пⷭ҇лѡмъ, и҆ бл҃же́нъ є҆́сть, и҆́же мо́жетъ вѣ́рнѡ прїѧ́ти гдⷭ҇а: го́рницꙋ ᲂу҆́бѡ се́рдце пред̾ꙋгото́вавъ, и҆ ве́черю бл҃гоче́стїе.
Нра́въ сребролю́бїѧ, и҆ ѡ҆́бразъ тво́й безꙋ́мїѧ и҆спо́лнь несмы́сленный і҆ꙋ́до: ввѣ́ренъ бо бы́въ є҆ди́нъ то́кмѡ ковче́жцꙋ, всѧ́кѡ не преклони́лсѧ є҆сѝ къ милосе́рдїю: но заключи́лъ є҆сѝ жесто́кагѡ твоегѡ̀ се́рдца ᲂу҆тро́бꙋ, преда́въ є҆ди́наго бл҃гоꙋтро́бнаго.
Нра́въ бг҃оꙋбі́йцъ прода́нїю сребролю́бца смѣси́выйсѧ: ѻ҆́въ ᲂу҆́бѡ ко ᲂу҆бїе́нїю воѡрꙋжи́всѧ, ѻ҆́въ же къ сре́бреникѡмъ ᲂу҆стремлѧ́шесѧ: ᲂу҆давле́нїемъ бо тогда̀ предразсꙋди́въ покаѧ́нїе ѕлѣ̀, є҆́же жи́ти лиши́сѧ.
Лобыза́нїе и҆спо́лнено льстѝ, є҆́же ра́дꙋйсѧ, со ѻ҆рꙋ́жїемъ, льсти́вый і҆ꙋ́до: ѧ҆зы́комъ ᲂу҆́бѡ провѣщава́еши ꙗ҆̀же къ соедине́нїю, нра́вомъ же помава́еши къ разстоѧ́нїю: преда́ти бо беззако́нникѡмъ бл҃годѣ́телѧ ле́стнѣ поꙋчи́лсѧ є҆сѝ.
Лобыза́еши и҆ продае́ши і҆ꙋ́до, цѣлꙋ́еши и҆ не стыди́шисѧ, ле́стїю притекі́й. кто̀ ненави́дѧ лобыза́етъ треѻкаѧ́нне; кто̀ любѧ̀ продае́тъ на цѣнѣ̀; лобыза́нїе твоегѡ̀ безстꙋ́днагѡ ѕлосовѣ́тїѧ ѡ҆блича́етъ произволе́нїе.
Сла́ва: Нераздѣ́льное сꙋщество́мъ, несли́тное ли́цы, бг҃осло́влю тѧ̀, трⷪ҇ческое є҆ди́но бж҃ество̀, ꙗ҆́кѡ є҆диноца́рственное и҆ сопресто́льное, вопїю̀ тебѣ̀ пѣ́снь вели́кꙋю, въ вы́шнихъ трегꙋ́бѡ пѣсносло́вимꙋю.
И҆ ны́нѣ, бг҃оро́диченъ: Зача́тїе па́че сло́ва, ржⷭ҇тво̀ твоѐ па́че є҆стества̀ бг҃ороди́тельнице: ѻ҆́во ᲂу҆́бѡ ѿ дх҃а без̾ сѣ́мене, ѻ҆́во же зако́нѡвъ є҆стества̀ таѧ́щеесѧ, ꙗ҆́кѡ нетлѣ́нно, и҆ па́че є҆стества̀ всѧ́кагѡ рожде́нїѧ: бг҃ъ бо ражда́емое.
Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Ꙗ҆ды́й влⷣко со ᲂу҆ченикѝ твои́ми, та́инственнѡ ꙗ҆ви́лъ є҆сѝ всест҃о́е твоѐ заколе́нїе, и҆́мже тлѝ и҆зба́вихомсѧ, честна̑ѧ твоѧ̑ почита́ющїи страда̑нїѧ.
Пѣ́снь и҃.
І҆рмо́съ: Є҆го́же вѡ́инства небє́снаѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь: по́йте, бл҃гослови́те и҆ превозноси́те во всѧ̑ вѣ́ки.
Зако́нное сконча́въ повелѣ́нїе, скрижа̑ли закѡ́нныѧ написа́вый въ сїна́и, снѣдѐ ᲂу҆́бѡ па́схꙋ дре́внюю и҆ сѣно́внꙋю: бы́сть же па́сха та́йнаѧ и҆ живоже́ртвеннаѧ.
Ѿ вѣ́ка сокрове́ннꙋю хрⷭ҇тѐ премꙋ́дрость тайноводѧ̀, показа́лъ є҆сѝ кꙋ́пнѡ всѣ̑мъ а҆пⷭ҇лѡмъ сп҃се на ве́чери, ю҆́же цр҃квамъ преда́ша бг҃оно́снїи.
Є҆ди́нъ ѿ ва́съ ле́стїю преда́стъ мѧ̀, є҆вре́ємъ прода́въ въ но́щь сїю̀, сїѐ хрⷭ҇то́съ возопи́въ смꙋща́ше дрꙋ́ги: тогда̀ є҆ди́нъ ко є҆ди́номꙋ, недоꙋмѣва́ѧсѧ колеба́шесѧ.
Смири́всѧ на́съ ра́ди бога́тый, ѿ ве́чери воста́въ, ле́нтїй прїе́мъ, си́мъ препоѧ́салсѧ є҆сѝ, и҆ прекло́нь вы́ю, ѡ҆мы́лъ є҆сѝ но́ги ᲂу҆ч҃нкѡ́въ и҆ преда́телѧ.
Па́че ᲂу҆ма̀, и҆ неизрече́нна ра́зꙋма высотѣ̀ твое́й і҆и҃се, кто̀ не ᲂу҆диви́тсѧ! ꙗ҆́кѡ бре́нїю предста́лъ є҆сѝ, содѣ́телю всѧ́ческихъ, ѡ҆мыва́ѧ ᲂу҆́бѡ но́ги, ѡ҆тира́ѧ же и҆ ле́нтїемъ.
Оу҆ч҃нкъ, є҆го́же люблѧ́ше гдⷭ҇ь, на пе́рси возле́гъ, речѐ къ немꙋ̀: кто́ є҆сть предаѧ́й тѧ̀; хрⷭ҇то́съ же ко ѻ҆́номꙋ: се́й вложи́вый въ соли́ло ны́нѣ рꙋ́кꙋ.
Оу҆чени́къ хлѣ́бъ прїе́мый, по хлѣ́бѣ ѿлꙋча́етсѧ, прода́нїю поꙋча́ѧйсѧ, тече́тъ ко і҆ꙋде́ємъ, глаго́летъ беззакѡ́ннымъ: что̀ мнѣ̀ хо́щете да́ти: и҆ а҆́зъ є҆го̀ ва́мъ преда́мъ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Є҆ди́наго бг҃а по сꙋществꙋ̀ чтꙋ̀, трѝ ѵ҆поста̑си пою̀ ѡ҆предѣли́тельнѣ, и҆́ныѧ, но не и҆́накѡвыѧ: поне́же бж҃ество̀ є҆ди́но, въ трїе́хъ ли́цѣхъ, и҆́бо ѻ҆ц҃ъ, и҆ сн҃ъ, и҆ бж҃е́ственный дх҃ъ.
И҆ ны́нѣ, бг҃оро́диченъ: И҆зба́ви на́съ і҆и҃се сп҃се на́шъ ѿ ле́сти лꙋка́вагѡ, и҆ напа́сти: прїимѝ бцⷣꙋ молѧ́щꙋюсѧ непреста́ннѡ: мт҃и бо є҆́сть, и҆ мо́жетъ тѧ̀ ᲂу҆моли́ти.
Хва́лимъ, бл҃гослови́мъ:
И҆ па́ки і҆рмо́съ: Є҆го́же вѡ́инства небє́снаѧ: И҆ покло́нъ.
Пѣ́снь ѳ҃.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Вели́кое та́инство твоегѡ̀ вочл҃вѣ́ченїѧ, на ве́чери совозлежа́щꙋ тебѣ̀ ᲂу҆ч҃нкѡ́мъ твои̑мъ чл҃вѣколю́бче, ѿкры́въ ре́клъ є҆сѝ: ꙗ҆ди́те хлѣ́бъ живо́тный вѣ́рою, пі́йте и҆ кро́вь и҆злїѧ́ннꙋю ѿ бг҃оре́бреннагѡ заколе́нїѧ.
Сѣ́нь нбⷭ҇наѧ ꙗ҆ви́сѧ го́рница, и҆дѣ́же па́схꙋ хрⷭ҇то́съ совершѝ: ве́черѧ безкро́внаѧ, и҆ слове́снаѧ слꙋ́жба, трапе́за же та́мѡ соверше́нныхъ та̑инъ, мы́сленный же́ртвенникъ.
Па́сха хрⷭ҇то́съ є҆́сть вели́каѧ и҆ всечестна́ѧ, снѣде́нъ бы́въ ꙗ҆́кѡ хлѣ́бъ, закла́нъ же ꙗ҆́кѡ ѻ҆вча̀: то́й бо вознесе́сѧ ѡ҆ на́съ же́ртва. тогѡ̀ тѣ́ла бл҃гоче́стнѡ, и҆ тогѡ̀ кро́ве всѝ та́йнѡ причаща́емсѧ.
Хлѣ́бъ бл҃гослови́въ, хлѣ́бъ сы́й нбⷭ҇ный, бл҃годари́въ ѻ҆ц҃ꙋ̀ роди́телю, прїе́мый, и҆ ча́шꙋ ᲂу҆ч҃нкѡ́мъ дава́лъ є҆сѝ: прїими́те, ꙗ҆ди́те, вопїѧ̀, сїѐ є҆́сть тѣ́ло моѐ, и҆ кро́вь нетлѣ́нныѧ жи́зни.
А҆ми́нь глаго́лѧ, речѐ ро́ждїѧмъ лоза̀, а҆пⷭ҇лѡмъ хрⷭ҇то́съ и҆́стина: ѿсе́лѣ не и҆́мамъ пи́ти ѿ лозы̀ питїѐ, до́ндеже пїю̀ є҆̀ но́вое, во сла́вѣ ѻ҆ц҃а̀ моегѡ̀, съ ва́ми наслѣ́дники мои́ми.
Продае́ши на три́десѧтихъ сре́бреницѣхъ гдⷭ҇а, и҆ не помышлѧ́еши і҆ꙋ́до беззако́нный ве́чери та́инство, и҆лѝ честно́е ᲂу҆мове́нїе. ѽ ка́кѡ попо́лзсѧ паде́нїемъ въ коне́цъ свѣ́та прише́лъ є҆сѝ, ᲂу҆давле́нїе ѡ҆блобыза́въ!
Рꙋ́цѣ просте́рлъ є҆сѝ, и҆́миже хлѣ́бъ прїѧ́лъ є҆сѝ нетлѣ́нїѧ, прїѧ́ти сре́бреники, ᲂу҆ста̀ къ цѣлова́нїю приносѧ̀ льсти́внѡ, и҆́миже тѣ́ло хрⷭ҇то́во и҆ кро́вь прїѧ́лъ є҆сѝ: но го́ре тебѣ̀, ꙗ҆́коже речѐ хрⷭ҇то́съ.
Хрⷭ҇то́съ ᲂу҆чредѝ мі́ръ, нбⷭ҇ный и҆ бж҃е́ственный хлѣ́бъ: прїиди́те ᲂу҆́бѡ хрⷭ҇толю́бцы, бре́нными ᲂу҆стна́ми, чи́стыми же сердцы̀, прїи́мемъ вѣ́рнѡ жре́мꙋю па́схꙋ, въ на́съ свѧщеннодѣ́йствꙋемꙋю.
Сла́ва: Ѻ҆ц҃а̀ просла́вимъ, сн҃а превознесе́мъ, бж҃е́ственномꙋ дх҃ꙋ вѣ́рнѡ поклони́мсѧ, трⷪ҇цѣ нераздѣ́льнѣй, є҆ди́ницѣ по сꙋществꙋ̀: ꙗ҆́кѡ свѣ́тꙋ и҆ свѣ́тѡмъ, животꙋ̀ и҆ животѡ́мъ, животворѧ́щемꙋ и҆ просвѣща́ющемꙋ концы̀.
И҆ ны́нѣ, бг҃оро́диченъ: Черто́гъ нбⷭ҇ный, и҆ невѣ́ста приснодв҃а, є҆ди́на ꙗ҆ви́ласѧ є҆сѝ, бг҃а носи́вши, ро́ждши же непрело́жнѡ, и҆з̾ тебѐ воплоще́нна. тѣ́мже тѧ̀ всѝ ро́ди ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
И҆ па́ки і҆рмо́съ: Безсѣ́меннагѡ зача́тїѧ:
И҆ про́чее повече́рїѧ ма́лагѡ по ѻ҆бы́чаю, и҆ ѿпꙋ́стъ, и҆ твори́мъ покло́ны г҃, всѝ ра́внѡ ко́снѡ. И҆ бы́вшей мл҃твѣ, ѿ предстоѧ́телѧ, ѿхо́димъ въ кє́ллїи своѧ̑.
Вѣ́домо же бꙋ́ди, ꙗ҆́кѡ ѿ сегѡ̀ ст҃а́гѡ днѐ, полꙋ́нощница не пое́тсѧ въ цр҃кви, до седми́цы ѳѡмины̀.