Во ст҃ꙋ́ю и҆ вели́кꙋю сре́дꙋ ве́чера,
во свѣти́льничное, ѻ҆бы́чное стїхосло́вїе ѿ трист҃а́гѡ без̾ покло́нѡвъ. Стїхосло́вимъ же, и҆ Ко гдⷭ҇ꙋ внегда̀ скорбѣ́ти мѝ: без̾ покло́нѡвъ. На Гдⷭ҇и воззва́хъ, поста́вимъ стїхѡ́въ і҃ и҆ пое́мъ самогла́сны, гла́съ а҃:
Тебѐ дв҃ыѧ сн҃а, блꙋдни́ца позна́вши бг҃а, глаго́лаше, въ пла́чи молѧ́щисѧ, ꙗ҆́кѡ сле́зъ достѡ́йнаѧ содѣ́лавшаѧ: разрѣшѝ до́лгъ, ꙗ҆́коже и҆ а҆́зъ власы̀: возлюбѝ лю́бѧщꙋю, пра́веднѡ ненави́димꙋю, и҆ бли́зъ мытаре́й тебѐ проповѣ́мъ, бл҃годѣ́телю чл҃вѣколю́бче.
Многоцѣ́нное мѵ́ро блꙋдни́ца смѣсѝ со слеза́ми, и҆ и҆злїѧ̀ на пречⷭ҇тѣи но́зѣ твоѝ, ѡ҆блобыза́ющи: ѻ҆́нꙋю а҆́бїе ѡ҆правда́лъ є҆сѝ, на́мъ же проще́нїе да́рꙋй, пострада́вый ѡ҆ на́съ, и҆ сп҃сѝ на́съ.
Є҆гда̀ грѣ́шнаѧ приноша́ше мѵ́ро, тогда̀ ᲂу҆чени́къ соглаша́шесѧ пребеззакѡ́ннымъ. ѻ҆́ваѧ ᲂу҆́бѡ ра́довашесѧ, и҆стоща́ющи мѵ́ро многоцѣ́нное: се́й же тща́шесѧ прода́ти безцѣ́ннаго. сїѧ̀ влⷣкꙋ познава́ше, а҆ се́й ѿ влⷣки разлꙋча́шесѧ. сїѧ̀ свобожда́шесѧ, а҆ і҆ꙋ́да ра́бъ быва́ше врагꙋ̀. лю́то є҆́сть лѣ́ность, ве́лїе покаѧ́нїе: є҆́же мнѣ̀ да́рꙋй сп҃се, пострада́вый ѡ҆ на́съ, и҆ сп҃сѝ на́съ.
Ѽ і҆ꙋ́дина ѻ҆каѧ́нства! зрѧ́ше блꙋдни́цꙋ цѣлꙋ́ющꙋю стѡпы̀, и҆ ᲂу҆мышлѧ́ше ле́стїю, преда́нїѧ цѣлова́нїе ѻ҆́наѧ власы̀ разрѣшѝ, а҆ се́й ꙗ҆́ростїю вѧза́шесѧ, носѧ̀ вмѣ́стѡ мѵ́ра ѕлосмра́днꙋю ѕло́бꙋ: за́висть бо не вѣ́сть предпочита́ти поле́зное. ѽ і҆ꙋ́дина ѻ҆каѧ́нства, ѿ негѡ́же и҆зба́ви бж҃е, дꙋ́шы на́шѧ.
Гла́съ в҃: Грѣ́шнаѧ течѐ къ мѵ́рꙋ, кꙋпи́ти многоцѣ́нное мѵ́ро, є҆́же пома́зати бл҃годѣ́телѧ, и҆ мѷропрода́телю вопїѧ́ше: да́ждь мѝ мѵ́ро, да пома́жꙋ и҆ а҆́зъ ѡ҆чи́стившаго всѧ̑ моѧ̑ грѣхѝ.
Гла́съ ѕ҃: Погрꙋже́наѧ грѣхо́мъ, ѡ҆брѣ́те тѧ̀ приста́нище сп҃се́нїѧ, ви́ждь и҆ мѵ́ра со слеза́ми растворѧ́ющꙋю, тебѣ̀ вопїѧ́ше: ви́ждь, согрѣша́ющихъ покаѧ́нїѧ ѡ҆жида́ѧй: но влⷣко сп҃си́ мѧ ѿ волны̀ грѣхо́вныѧ, вели́кїѧ ра́ди твоеѧ̀ млⷭ҇ти.
Дне́сь хрⷭ҇то́съ прихо́дитъ въ до́мъ фарїсе́овъ, и҆ жена̀ грѣ́шница пристꙋпи́вши къ нога́мъ, валѧ́шесѧ вопїю́щи: ви́ждь погрꙋже́ннꙋю грѣхо́мъ, ѿча́ѧннꙋю дѣѧ́нїй ра́ди, негнꙋша́емꙋю ѿ твоеѧ̀ бл҃гости, и҆ да́ждь мѝ гдⷭ҇и ѡ҆ставле́нїе ѕлы́хъ, и҆ сп҃си́ мѧ.
Прострѐ блꙋдни́ца власы̀ тебѣ̀ влⷣцѣ, прострѐ і҆ꙋ́да рꙋ́цѣ беззакѡ́ннымъ: ѻ҆́ва ᲂу҆́бѡ прїѧ́ти ѡ҆ставле́нїе, ѻ҆́въ же взѧ́ти сре́бреники. тѣ́мже тебѣ̀ вопїе́мъ про́даномꙋ, и҆ свобо́ждшемꙋ на́съ: гдⷭ҇и сла́ва тебѣ̀.
Пристꙋпѝ жена̀ ѕлосмра́днаѧ и҆ ѡ҆скверне́наѧ, сле́зы пролива́ющи, лю́бѧщи сп҃се, стра́сть и҆сповѣ́дающи: ка́кѡ воззрю̀ къ тебѣ̀ влⷣцѣ; са́мъ бо прише́лъ є҆сѝ спастѝ блꙋдни́цꙋ: и҆з̾ глꙋбины̀ ᲂу҆ме́ршꙋю мѧ̀ воскресѝ, и҆́же ла́зарѧ воздви́гнꙋвый и҆з̾ гро́ба четверодне́вна: прїими́ мѧ ѻ҆каѧ́ннꙋю гдⷭ҇и, и҆ сп҃си́ мѧ.
Ѿча́ѧннаѧ житїѧ̀ ра́ди, и҆ ᲂу҆вѣ́домаѧ нра́ва ра́ди, мѵ́ра носѧ́щаѧ пристꙋпѝ тебѣ̀ вопїю́щи: да не ѿве́ржеши менѐ блꙋ́днꙋю, роди́выйсѧ ѿ дв҃ы, да не пре́зриши моѧ̑ сле́зы, ра́досте а҆́гг҃лѡвъ, но прїими́ мѧ ка́ющꙋюсѧ, ю҆́же не ѿри́нꙋлъ є҆сѝ согрѣша́ющꙋю гдⷭ҇и, вели́кїѧ ра́ди твоеѧ̀ млⷭ҇ти.
Сла́ва, и҆ ны́нѣ, гла́съ и҃. Творе́нїе кассїа́ны и҆́нокини.
Гдⷭ҇и, ꙗ҆́же во мнѡ́гїѧ грѣхѝ впа́дшаѧ жена̀, твоѐ ѡ҆щꙋти́вшаѧ бж҃ество̀, мѷроно́сицы взе́мши чи́нъ, рыда́ющи мѵ́ро тебѣ̀ пре́жде погребе́нїѧ прино́ситъ: ᲂу҆вы̀ мнѣ̀, глаго́лющи, ꙗ҆́кѡ но́щь мнѣ̀ є҆́сть разжже́нїе блꙋда̀ невоздержа́нна, мра́чное же и҆ безлꙋ́нное раче́нїе грѣха̀. прїимѝ моѧ̑ и҆сто́чники сле́зъ, и҆́же ѻ҆блака́ми производѧ́й мо́рѧ во́дꙋ. приклони́сѧ къ мои̑мъ воздыха́нїємъ сердє́чнымъ, приклони́вый нб҃са̀, неизрече́ннымъ твои́мъ и҆стоща́нїемъ, да ѡ҆блобыжꙋ̀ пречⷭ҇тѣи твоѝ но́зѣ, и҆ ѡ҆трꙋ̀ сїѧ̑ па́ки главы̀ моеѧ̀ власы̀: и҆́хже въ раѝ є҆́ѵа, по полꙋ́дни, шꙋ́момъ ᲂу҆́шы ѡ҆гласи́вши, стра́хомъ скры́сѧ. грѣхѡ́въ мои́хъ мно́жєства, и҆ сꙋде́бъ твои́хъ бє́здны кто̀ и҆зслѣ́дитъ; дꙋшеспа́сче мо́й, да мѧ̀ твою̀ рабꙋ̀ не пре́зриши, и҆́же безмѣ́рнꙋю и҆мѣ́ѧй млⷭ҇ть.
Вхо́дъ со є҆ѵⷢ҇лїемъ. Свѣ́те ти́хїй:
Прокі́менъ, ѱало́мъ рл҃є, гла́съ д҃: И҆сповѣ́дайтесѧ бг҃ꙋ нбⷭ҇номꙋ, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Сті́хъ: И҆сповѣ́дайтесѧ бг҃ꙋ богѡ́въ, ꙗ҆́кѡ въ вѣ́къ млⷭ҇ть є҆гѡ̀.
И҆схо́да чте́нїе. [Глава̀ в҃, ст. а҃і-к҃в.]
Бы́сть во дни̑ мнѡ́гїѧ ѻ҆́ны, вели́къ бы́въ мѡѷсе́й, и҆зы́де къ бра́тїѧмъ свои̑мъ сынѡ́мъ і҆и҃лєвымъ: разꙋмѣ́въ же болѣ́знь и҆́хъ, ви́дѣ человѣ́ка є҆гѵ́птѧнина бїю́ща нѣ́коего є҆вре́анина ѿ бра́тїи є҆гѡ̀ сынѡ́въ і҆и҃левыхъ. Ѡ҆бозрѣ́всѧ же сѣ́мѡ и҆ ѻ҆ва́мѡ, никого́же ви́дѣ: и҆ порази́въ є҆гѵ́птѧнина, скры̀ є҆го̀ въ песцѣ̀. И҆зше́дъ же во вторы́й де́нь, ви́дѣ два̀ мꙋ̑жа є҆вре́анина бїю́щыѧсѧ, и҆ глаго́ла ѡ҆би́дѧщемꙋ: чесѡ̀ ра́ди ты̀ бїе́ши и҆́скреннѧго; Ѻ҆́нъ же речѐ: кто́ тѧ поста́ви кнѧ́зѧ и҆ сꙋдїю̀ над̾ на́ми; є҆да̀ ᲂу҆би́ти мѧ̀ ты̀ хо́щеши, и҆́мже ѡ҆́бразомъ ᲂу҆би́лъ є҆сѝ вчера̀ є҆гѵ́птѧнина; ᲂу҆боѧ́сѧ же мѡѷсе́й, и҆ речѐ: а҆́ще си́це ꙗ҆вле́нъ бы́сть глаго́лъ се́й; ᲂу҆слы́ша же фараѡ́нъ глаго́лъ се́й, и҆ и҆ска́ше ᲂу҆би́ти мѡѷсе́а. ѿи́де же мѡѷсе́й ѿ лица̀ фараѡ́нова, и҆ всели́сѧ въ землѝ мадїа́мстѣй: прише́дъ же въ зе́млю мадїа́мскꙋю, сѣ́де при кла́дѧзѣ. Свѧще́нникꙋ же мадїа́мскомꙋ бѣ́ша се́дмь дще́рей пасꙋ́щихъ ѻ҆́вцы ѻ҆тца̀ своегѡ̀ і҆ѡѳо́ра: прише́дше же че́рпахꙋ, до́ндеже напо́лниша кѡры́та, напои́ти ѻ҆́вцы ѻ҆тца̀ своегѡ̀ і҆ѡѳо́ра. Прише́дше же па́стырїе и҆згна́ша ѧ҆̀: воста́въ же мѡѷсе́й и҆зба́ви и҆̀хъ, и҆ налїѧ̀ и҆̀мъ, и҆ напоѝ ѻ҆́вцы и҆́хъ. Прїидо́ша же къ рагꙋи́лꙋ ѻ҆тцꙋ̀ своемꙋ̀, ѻ҆́нъ же речѐ и҆̀мъ: что̀ ꙗ҆́кѡ ᲂу҆скори́сте прїитѝ дне́сь; Ѻ҆́ныѧ же реко́ша: человѣ́къ є҆гѵ́птѧнинъ и҆зба́ви на́съ ѿ па́стырей, и҆ наче́рпа на́мъ, и҆ напоѝ ѻ҆́вцы на́шѧ. Ѻ҆́нъ же речѐ дще́ремъ свои̑мъ: и҆ гдѣ̀ є҆́сть; и҆ вскꙋ́ю си́це ѡ҆ста́висте человѣ́ка; призови́те ᲂу҆̀бо є҆го̀, да ꙗ҆́стъ хлѣ́бъ. Всели́сѧ же мѡѷсе́й ᲂу҆ человѣ́ка: и҆ дадѐ сепфѡ́рꙋ дще́рь свою̀ мѡѷсе́ю въ женꙋ̀. Во чре́вѣ же заче́нши жена̀, родѝ сы́на, и҆ наречѐ мѡѷсе́й и҆́мѧ є҆мꙋ̀, гирса́мъ, глаго́лѧ: ꙗ҆́кѡ пришле́цъ є҆́смь въ землѝ чꙋжде́й. є҆ще́ же заче́нши родѝ сы́на втора́го, и҆ наречѐ и҆́мѧ є҆мꙋ̀ є҆лїезе́ръ, глаго́лѧ: бг҃ъ бо ѻ҆тца̀ моегѡ̀ помо́щникъ мо́й, и҆ и҆зба́ви мѧ̀ и҆з̾ рꙋкѝ фараѡ́новы.
Прокі́менъ, ѱало́мъ рл҃з, гла́съ д҃: Гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри. Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ, и҆ пред̾ а҆́гг҃лы воспою̀ тебѣ̀.
І҆́ѡва чте́нїе. [Глава̀ в҃, ст. а҃-і҃.]
Бы́сть ꙗ҆́кѡ де́нь се́й, и҆ прїидо́ша а҆́гг҃ли бж҃їи предста́ти пред̾ гдⷭ҇емъ: и҆ дїа́волъ прїи́де посредѣ̀ и҆́хъ предста́ти пред̾ гдⷭ҇емъ. И҆ речѐ гдⷭ҇ь дїа́волꙋ: ѿкꙋ́дꙋ ты̀ грѧде́ши; тогда̀ речѐ дїа́волъ пред̾ гдⷭ҇емъ: проше́дъ поднебе́снꙋю, и҆ ѡ҆бше́дъ всю̀ зе́млю, прїидо́хъ. И҆ речѐ гдⷭ҇ь къ дїа́волꙋ: внѧ́лъ ли є҆сѝ ᲂу҆́бѡ [мы́слїю твое́ю] рабꙋ̀ моемꙋ̀ і҆́ѡвꙋ; ꙗ҆́кѡ нѣ́сть такова̀ ѿ сꙋ́щихъ на землѝ: человѣ́къ неѕло́бивъ, и҆́стиненъ, непоро́ченъ, бг҃очести́въ, ᲂу҆далѧ́ѧйсѧ ѿ всѧ́кагѡ ѕла̀, є҆ще́ же придержи́тсѧ неѕло́бїѧ: ты́ же ре́клъ є҆сѝ и҆мѣ̑нїѧ є҆гѡ̀ погꙋби́ти вотщѐ. Ѿвѣща́въ же дїа́волъ гдⷭ҇ви, речѐ: ко́жꙋ за ко́жꙋ, и҆ всѧ̑ є҆ли̑ка и҆́мать человѣ́къ, да́стъ за дꙋ́шꙋ свою̀. Ѻ҆ба́че послѝ рꙋ́кꙋ твою̀, и҆ косни́сѧ косте́мъ є҆гѡ̀, и҆ пло́ти є҆гѡ̀, а҆́ще не въ лице́ тѧ бл҃гослови́тъ. Рече́ же гдⷭ҇ь дїа́волꙋ: сѐ предаю́ ти є҆го̀, то́кмѡ дꙋ́шꙋ є҆гѡ̀ соблюдѝ. И҆зы́де же дїа́волъ ѿ лица̀ гдⷭ҇нѧ, и҆ поразѝ і҆́ѡва гно́емъ лю́тымъ ѿ но́гъ да́же до главы̀. И҆ взѧ̀ [і҆́ѡвъ] чре́пъ, да ѡ҆строга́етъ гно́й сво́й, и҆ то́й сѣдѧ́ше на гно́ищи внѣ̀ гра́да. Вре́мени же мно́гꙋ минꙋ́вшꙋ, речѐ къ немꙋ̀ жена̀ є҆гѡ̀ глаго́лющи: доко́лѣ терпи́ши, сѐ пождꙋ̀ вре́мѧ є҆щѐ ма́ло, ча́ющи наде́жди сп҃се́нїѧ моегѡ̀. се́ бо потреби́сѧ ѿ землѝ па́мѧть твоѧ̀, сы́нове твоѝ и҆ дщє́ри, моегѡ̀ чре́ва болѣ̑зни и҆ трꙋды̀, и҆́миже вотщѐ трꙋди́хсѧ съ болѣ́зньми: ты́ же са́мъ въ гноѝ черве́й сѣди́ши, ѡ҆бнощева́ѧ внѣ̀ без̾ покро́ва, и҆ а҆́зъ скита́ющисѧ и҆ слꙋжа́щи, мѣ́сто ѿ мѣ́ста преходѧ́щи, и҆ до́мъ ѿ до́мꙋ, ѡ҆жида́ющи со́лнца, когда̀ за́йдетъ, да почі́ю ѿ трꙋдѡ́въ мои́хъ, и҆ ѿ болѣ́зней, ꙗ҆̀же мѧ̀ ны́нѣ ѡ҆бдержа́тъ. но рцы̀ глаго́лъ нѣ́кїй ко гдⷭ҇ꙋ, и҆ ᲂу҆мрѝ. Ѻ҆́нъ же воззрѣ́въ речѐ къ не́й: вскꙋ́ю ꙗ҆́кѡ є҆ди́на ѿ безꙋ́мныхъ же́нъ возглаго́лала є҆сѝ; а҆́ще блага̑ѧ прїѧ́хомъ ѿ рꙋкѝ гдⷭ҇ни, ѕлы́хъ ли не стерпи́мъ; во всѣ́хъ си́хъ приключи́вшихсѧ є҆мꙋ̀, ничи́мже согрѣшѝ і҆́ѡвъ ᲂу҆стна́ма пред̾ бг҃омъ, [и҆ не дадѐ безꙋ́мїѧ бг҃ꙋ].
Та́же, Да и҆спра́витсѧ мл҃тва моѧ̀: Є҆ѵⷢ҇лїе ѿ матѳе́а, зача́ло р҃и. И҆ про́чее послѣ́дованїе преждеѡсщ҃е́нныхъ. И҆ по пренесе́нїи чⷭ҇тны́хъ дарѡ́въ покло́ны г҃. И҆ а҆́бїе ᲂу҆пражднѧ́ютсѧ соверше́ннѡ въ це́ркви быва́ємыѧ покло́ны. Въ ке́ллїахъ же да́же и҆ до вели́кагѡ пѧтка̀ соверша́ютсѧ.