Въ недѣ́лю пѧ́тꙋю ст҃ы́хъ постѡ́въ,

послѣ́дованїе подо́бнѣ, ꙗ҆́коже и҆ въ про́чихъ недѣ́лѧхъ: въ не́йже пое́мъ и҆ мине́и послѣ́дованїе слꙋчи́вшагѡсѧ ст҃а́гѡ. И҆ні́и же послѣ́днѣйшїи преда́ша пѣ́ти въ сїю̀ недѣ́лю послѣ́дованїе преподо́бныѧ мт҃ре на́шеѧ марі́и є҆гѵ́петскїѧ. Во свѣти́льничномъ по предначина́тельномъ ѱалмѣ̀ и҆ ѻ҆бы́чномъ стїхосло́вїи, на Гдⷭ҇и воззва́хъ поста́вимъ стїхѡ́въ і҃. И҆ пое́мъ ѻ҆смогла́сника стїхи̑ры воскрⷭ҇ны г҃, и҆ а҆натѡ́лїевы г҃, и҆ преподо́бныѧ стїхи̑ры, подѡ́бны г҃, творѧ́ще ѧ҆̀ на д҃. Гла́съ ѕ҃.

Подо́бенъ: Всю̀ ѿложи́вше:

Тебѣ̀ ᲂу҆́бѡ возбранѧ́ше честны́хъ взира̑нїѧ, скве́рнъ пре́жде привлече́нное скверне́нїе: твое́ же чꙋ́вство, и҆ твоѧ̀ бг҃омꙋ́драѧ содѣ́ѧнныхъ со́вѣсть, къ лꙋ́чшымъ тебѣ̀ ѡ҆браще́нїе содѣ́ѧша. на і҆кѡ́нꙋ бо воззрѣ́вши бл҃гослове́нныѧ бг҃оѻтрокови́цы, всѣ́хъ пока́ѧвшисѧ прегрѣше́нїй свои́хъ всехва́льнаѧ пре́жнихъ, въ дерзнове́нїи чⷭ҇тно́мꙋ дре́вꙋ поклони́ласѧ є҆сѝ.

Мѣ́стѡмъ поклони́вшисѧ ра́достнѡ ст҃ы̑мъ, добродѣ́тели напꙋ́тное спаси́тельнѣйшее, ѿтꙋ́дꙋ прїѧ́ла є҆сѝ, и҆ ѕѣлѡ̀ потекла̀ є҆сѝ до́брое ше́ствїе: и҆ стрꙋю̀ преше́дши і҆ѻрда́нскꙋю, въ жили́ще прⷣте́чево ᲂу҆се́рднѡ всели́ласѧ є҆сѝ, и҆ страсте́й свирѣ́пство жи́тельствомъ ѡ҆мрачи́ла є҆сѝ, и҆стончава́ющи въ дерзнове́нїи, приснопа́мѧтнаѧ мт҃и, плотска̑ѧ свѡ́йства.

Въ пꙋсты́ню всели́вшисѧ твои́хъ страсте́й ѡ҆́бразы ѿ дꙋшѝ ѿѧ́ла є҆сѝ, бг҃ови́днѣйшее и҆з̾ѡбраже́нїе въ дꙋшѝ написа́вши, добродѣ́телей ви́ды: и҆ толи́кѡ просїѧ́ла є҆сѝ, ꙗ҆́кѡ и҆ вода́ми легкѡ̀ преходи́ти блаже́ннаѧ, и҆ ѿ землѝ взима́тисѧ въ твои́хъ къ бг҃ꙋ моле́нїихъ: и҆ ны́нѣ въ дерзнове́нїи всесла́внаѧ мр҃і́е хрⷭ҇тꙋ̀ предстоѧ́щи, моли́сѧ ѡ҆ дꙋша́хъ на́шихъ.

Сла́ва, гла́съ д҃: Ѡ҆чꙋдотворѝ хрⷭ҇тѐ крⷭ҇та̀ твоегѡ̀ си́ла, ꙗ҆́кѡ и҆ ꙗ҆́же пре́жде блꙋдни́ца, по́стническимъ по́двигомъ подвиза́сѧ: ѿню́дꙋже и҆ немощно́е ѿве́ргши, до́блественнѡ сопротивоста̀ на дїа́вола. тѣ́мже и҆ по́честь побѣ́ды носѧ́щи, мо́литсѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ а҃-й гла́са.

На стїхо́внѣ стїхи̑ры ѻ҆смогла́сника.

Сла́ва преподо́бныѧ, гла́съ в҃: Дꙋшє́внаѧ ловлє́нїѧ, и҆ стра̑сти плотскі̑ѧ мече́мъ воздержа́нїѧ посѣ́кла є҆сѝ: по́мысла прегрѣшє́нїѧ молча́нїемъ ѡ҆бꙋче́нїѧ подави́ла є҆сѝ, и҆ стрꙋѧ́ми сле́зъ твои́хъ пꙋсты́ню всю̀ напои́ла є҆сѝ, и҆ прозѧбла̀ є҆сѝ на́мъ покаѧ́нїѧ плоды̀. тѣ́мже твою̀ па́мѧть преподо́бнаѧ пра́зднꙋемъ.

И҆ ны́нѣ, бг҃оро́диченъ, въ то́йже гла́съ: Ѽ чꙋдесѐ но́вагѡ!

Ѿпꙋсти́тельный воскрⷭ҇нъ.

И҆ преподо́бныѧ, гла́съ и҃: Въ тебѣ̀ мт҃и и҆звѣ́стнѡ спасе́сѧ є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀ и҆ дѣ́ющи ᲂу҆чи́ла є҆сѝ: презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы сра́дꙋетсѧ, преподо́бнаѧ марі́е, дꙋ́хъ тво́й.

И҆ бг҃оро́диченъ: И҆́же на́съ ра́ди рожде́йсѧ ѿ дв҃ы: Ты́ѧжде и҆ на Бг҃ъ гдⷭ҇ь:

И҆ про́чее послѣ́дованїе ꙗ҆́кѡ ѻ҆бы́чно.