Въ сꙋббѡ́тꙋ пѧ́тыѧ седми́цы, на ᲂу҆́трени,

зна́менаетъ въ ча́съ четве́ртый но́щи, моле́бнагѡ ра́ди послѣ́дованїѧ а҆ка́ѳїста. И҆ собра́вшесѧ въ цр҃ковь: бл҃гослови́вшꙋ і҆ере́ю, начина́емъ ᲂу҆́треню, ꙗ҆́коже предписа́сѧ нача́ло ᲂу҆́трени въ четверто́къ вели́кагѡ канѡ́на: ли́стъ сч҃д на ѡ҆боро́тѣ. По шестоѱа́лмїи, Бг҃ъ гдⷭ҇ь: во гла́съ и҃, и҆ пое́мъ три́жды тропа́рь ко́снѡ.

Гла́съ и҃:

Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ прїе́мша ра́бїй зра́къ, ᲂу҆жаса́юсѧ зва́ти тебѣ̀: ра́дꙋйсѧ невѣ́сто неневѣ́стнаѧ.

Та́же стїхосло́вимъ каѳі́смꙋ ѱалти́ра ѕ҃і: Речѐ гдⷭ҇ь гдⷭ҇ви моемꙋ̀: И҆ по и҆сполне́нїи сеѧ̀, є҆ктенїа̀ ма́лаѧ, и҆ пое́мъ конда́къ на средѣ̀, со сладкопѣ́нїемъ, ко́снѡ. Гла́съ и҃:

Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: Ра́дꙋйсѧ невѣ́сто неневѣ́стнаѧ.

На не́мже кади́тъ дїа́конъ ст҃ы̑ѧ і҆кѡ̑ны, и҆ бра́тїю, по чи́нꙋ. На про́чихъ же то́чїю настоѧ́телѧ и҆ ли́ки. И҆ чте́мъ і҆́косѡвъ и҆ кондакѡ́въ ѕ҃. Стои́мъ на чте́нїи. Ті́и же і҆́косы сꙋ́ть по а҆лфави́тꙋ: сі́есть, к҃д, и҆ глаго́лютсѧ ѿ і҆ере́а во ст҃о́мъ ѻ҆лтарѣ̀.

[А] І҆́косъ а҃: А҆́гг҃лъ предста́тель съ нб҃сѐ по́сланъ бы́сть, рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀ гдⷭ҇и, ᲂу҆жаса́шесѧ и҆ стоѧ́ше, зовы́й къ не́й такова̑ѧ: ра́дꙋйсѧ, є҆́юже ра́дость возсїѧ́етъ: ра́дꙋйсѧ, є҆́юже клѧ́тва и҆сче́знетъ. ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе. ра́дꙋйсѧ, высото̀ неꙋдобовосходи́маѧ человѣ́ческими по́мыслы: ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма. ра́дꙋйсѧ, ꙗ҆́кѡ є҆сѝ цр҃е́во сѣда́лище: ра́дꙋйсѧ, ꙗ҆́кѡ но́сиши носѧ́щаго всѧ̑. ра́дꙋйсѧ, ѕвѣздо̀ ꙗ҆влѧ́ющаѧ сл҃нце: ра́дꙋйсѧ, ᲂу҆тро́бо бж҃е́ственнагѡ воплоще́нїѧ. ра́дꙋйсѧ, є҆́юже ѡ҆бновлѧ́етсѧ тва́рь: ра́дꙋйсѧ, є҆́юже покланѧ́емсѧ творцꙋ̀. Ра́дꙋйсѧ невѣ́сто неневѣ́стнаѧ.

[В] Конда́къ в҃: Ви́дѧщи ст҃а́ѧ себѐ въ чистотѣ̀, глаго́летъ гаврїи́лꙋ де́рзостнѡ: пресла́вное твоегѡ̀ гла́са неꙋдобопрїѧ́тельно дꙋшѝ мое́й ꙗ҆влѧ́етсѧ: безсѣ́меннагѡ бо зача́тїѧ ржⷭ҇тво̀ ка́кѡ глаго́леши, зовы́й: А҆ллилꙋ́їа.

[Г] І҆́косъ в҃: Ра́зꙋмъ недоразꙋмѣва́емый, разꙋмѣ́ти дв҃а и҆́щꙋщи, возопѝ къ слꙋжа́щемꙋ: и҆з̾ бокꙋ̀ чи̑стꙋ, сн҃ꙋ ка́кѡ є҆́сть роди́тисѧ мо́щно, рцы́ ми; къ не́йже ѻ҆́нъ речѐ со стра́хомъ, ѻ҆ба́че зовы́й си́це: ра́дꙋйсѧ, совѣ́та неизрече́ннагѡ таи́ннице: ра́дꙋйсѧ, молча́нїѧ просѧ́щихъ вѣ́ро. ра́дꙋйсѧ, чꙋде́съ хрⷭ҇то́выхъ нача́ло: ра́дꙋйсѧ, велѣ́нїй є҆гѡ̀ глави́зно. ра́дꙋйсѧ, лѣ́ствице нбⷭ҇наѧ, є҆́юже сни́де бг҃ъ: ра́дꙋйсѧ, мо́сте преводѧ́й сꙋ́щихъ ѿ землѝ на нб҃о. ра́дꙋйсѧ, а҆́гг҃лѡвъ многословꙋ́щее чꙋ́до: ра́дꙋйсѧ бѣсѡ́въ многоплаче́вный стрꙋ́пе. ра́дꙋйсѧ, свѣ́тъ неизрече́ннѡ роди́вшаѧ: ра́дꙋйсѧ, є҆́же ка́кѡ, ни є҆ди́нагоже наꙋчи́вшаѧ. ра́дꙋйсѧ, премꙋ́дрыхъ превосходѧ́щаѧ ра́зꙋмъ: ра́дꙋйсѧ, вѣ́рныхъ ѡ҆зарѧ́ющаѧ смы́слы. Ра́дꙋйсѧ невѣ́сто неневѣ́стнаѧ.

[Д] Конда́къ г҃: Си́ла вы́шнѧгѡ ѡ҆сѣнѝ тогда̀ къ зача́тїю браконеискꙋ́снꙋю, и҆ бл҃гоплѡ́днаѧ тоѧ̀ ложесна̀, ꙗ҆́кѡ село̀ показа̀ сла́дкое, всѣ̑мъ хотѧ́щымъ жа́ти сп҃се́нїе, внегда̀ пѣ́ти си́це: А҆ллилꙋ́їа.

[Е] І҆́косъ г҃: И҆мꙋ́щи бг҃опрїѧ́тнꙋю дв҃а ᲂу҆тро́бꙋ, востечѐ ко є҆лїсаве́ти: млⷣнцъ же ѻ҆́ноѧ а҆́бїе позна́въ сеѧ̀ цѣлова́нїе, ра́довашесѧ, и҆ и҆гра́ньми ꙗ҆́кѡ пѣ́сньми вопїѧ́ше къ бцⷣѣ: ра́дꙋйсѧ, ѻ҆́трасли неꙋвѧда́емыѧ розго̀: ра́дꙋйсѧ, плода̀ безсме́ртнагѡ стѧжа́нїе. ра́дꙋйсѧ, дѣ́лателѧ дѣ́лающаѧ чл҃вѣколю́бца: ра́дꙋйсѧ, сади́телѧ жи́зни на́шеѧ ро́ждшаѧ. ра́дꙋйсѧ, ни́во, растѧ́щаѧ гобзова́нїе щедро́тъ: ра́дꙋйсѧ, трапе́зо, носѧ́щаѧ ѻ҆би́лїе ѡ҆чище́нїй. ра́дꙋйсѧ, ꙗ҆́кѡ ра́й пи́щный процвѣта́еши: ра́дꙋйсѧ, ꙗ҆́кѡ приста́нище дꙋша́мъ гото́виши. ра́дꙋйсѧ, прїѧ́тное мл҃твы кади́ло: ра́дꙋйсѧ, всегѡ̀ мі́ра ѡ҆чище́нїе. ра́дꙋйсѧ, бж҃їе къ смє́ртнымъ бл҃говоле́нїе: ра́дꙋйсѧ, сме́ртныхъ къ бг҃ꙋ дерзнове́нїе. Ра́дꙋйсѧ невѣ́сто неневѣ́стнаѧ.

[З] Конда́къ д҃: Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, цѣломꙋ́дренный і҆ѡ́сифъ смѧте́сѧ, къ тебѣ̀ зрѧ̀ небра́чнѣй, и҆ бракоѡкра́дованнꙋю помышлѧ́ѧ, непоро́чнаѧ: ᲂу҆вѣ́дѣвъ же твоѐ зача́тїе ѿ дх҃а ст҃а, речѐ: А҆ллилꙋ́їа.

И҆ па́ки конда́къ: Взбра́нной воево́дѣ: Чте́мъ ѿ сло́ва а҆ка́ѳїста, на даѧ̑нїѧ два̀. Та́же стїхосло́вимъ непоро́чны, и҆ є҆ктенїа̀.

И҆ па́ки глаго́лемъ конда́къ: Взбра́нной воево́дѣ: И҆ дрꙋгі̑ѧ і҆́косы и҆ кондакѝ, ѕ҃:

[И] І҆́косъ д҃: Слы́шаша па́стырїе а҆́гг҃лѡвъ пою́щихъ плотско́е хрⷭ҇то́во прише́ствїе, и҆ те́кше ꙗ҆́кѡ къ па́стырю, ви́дѧтъ сего̀ ꙗ҆́кѡ а҆́гнца непоро́чна, во чре́вѣ мр҃і́инѣ ᲂу҆па́сшасѧ, ю҆́же пою́ще рѣ́ша: ра́дꙋйсѧ, а҆́гнца и҆ па́стырѧ мт҃и: ра́дꙋйсѧ, дво́ре слове́сныхъ ѻ҆ве́цъ. ра́дꙋйсѧ, неви́димыхъ врагѡ́въ мꙋче́нїе: ра́дꙋйсѧ, ра́йскихъ две́рей ѿверзе́нїе. ра́дꙋйсѧ, ꙗ҆́кѡ нбⷭ҇наѧ сра́дꙋютсѧ земны̑мъ: ра́дꙋйсѧ, ꙗ҆́кѡ зємна́ѧ сликовствꙋ́ютъ нбⷭ҇нымъ. ра́дꙋйсѧ, а҆пⷭ҇лѡвъ немѡ́лчнаѧ ᲂу҆ста̀: ра́дꙋйсѧ, страстоте́рпцєвъ непобѣди́маѧ де́рзосте. ра́дꙋйсѧ, тве́рдое вѣ́ры ᲂу҆твержде́нїе: ра́дꙋйсѧ, свѣ́тлое бл҃года́ти позна́нїе. ра́дꙋйсѧ, є҆́юже ѡ҆бнажи́сѧ а҆́дъ: ра́дꙋйсѧ, є҆́юже ѡ҆блеко́хомсѧ сла́вою. Ра́дꙋйсѧ невѣ́сто неневѣ́стнаѧ.

[Ѳ] Конда́къ є҃: Бг҃оте́чнꙋю ѕвѣздꙋ̀ ᲂу҆зрѣ́вше волсвѝ, тоѧ̀ послѣ́доваша зарѝ: и҆ ꙗ҆́кѡ свѣти́льникъ держа́ще ю҆̀, то́ю и҆спыта́хꙋ крѣ́пкаго царѧ̀: и҆ дости́гше непостижи́маго, возра́довашасѧ є҆мꙋ̀ вопїю́ще: А҆ллилꙋ́їа.

[І] І҆́косъ є҃: Ви́дѣша ѻ҆́троцы халде́йстїи на рꙋкꙋ̀ дв҃и́чꙋ, созда́вшаго рꙋка́ма человѣ́ки, и҆ влⷣкꙋ разꙋмѣва́юще є҆го̀, а҆́ще и҆ ра́бїй прїѧ́тъ зра́къ, потща́шасѧ дармѝ послꙋжи́ти є҆мꙋ̀, и҆ возопи́ти бл҃гослове́ннѣй: ра́дꙋйсѧ, ѕвѣзды̀ незаходи́мыѧ мт҃и: ра́дꙋйсѧ, зарѐ та́инственнагѡ днѐ. ра́дꙋйсѧ, пре́лести пе́щь ᲂу҆гаси́вшаѧ: ра́дꙋйсѧ, трⷪ҇цы таи́нники просвѣща́ющаѧ. ра́дꙋйсѧ, мꙋчи́телѧ безчеловѣ́чнаго и҆змета́ющаѧ ѿ нача́льства: ра́дꙋйсѧ, гдⷭ҇а чл҃вѣколю́бца показа́вшаѧ хрⷭ҇та̀. ра́дꙋйсѧ, ва́рварскагѡ и҆збавлѧ́ющаѧ слꙋже́нїѧ: ра́дꙋйсѧ, тимѣ́нїѧ и҆з̾има́ющаѧ дѣ́лъ. ра́дꙋйсѧ, ѻ҆гнѧ̀ поклоне́нїе ᲂу҆гаси́вшаѧ: ра́дꙋйсѧ, пла́мене страсте́й и҆змѣнѧ́ющаѧ. ра́дꙋйсѧ, вѣ́рныхъ наста́внице цѣломꙋ́дрїѧ: ра́дꙋйсѧ, всѣ́хъ родѡ́въ весе́лїе. Ра́дꙋйсѧ невѣ́сто неневѣ́стнаѧ.

[К] Конда́къ ѕ҃: Проповѣ̑дницы бг҃оно́снїи бы́вше волсвѝ, возврати́шасѧ въ вавѷлѡ́нъ, сконча́вше твоѐ прⷪ҇ро́чество: и҆ проповѣ́давше тѧ̀ хрⷭ҇та̀ всѣ̑мъ, ѡ҆ста́виша и҆́рѡда ꙗ҆́кѡ бꙋесло́вѧща, не вѣ́дꙋща пѣ́ти: А҆ллилꙋ́їа.

[Л] І҆́косъ ѕ҃: Возсїѧ́вый во є҆гѵ́птѣ просвѣще́нїе и҆́стины, ѿгна́лъ є҆сѝ лжѝ тьмꙋ̀: і҆́дѡли бо є҆гѡ̀ сп҃се, не терпѧ́ще твоеѧ̀ крѣ́пости, падо́ша. си́хъ же и҆зба́вльшїисѧ вопїѧ́хꙋ къ бцⷣѣ: ра́дꙋйсѧ, и҆справле́нїе человѣ́кѡвъ: ра́дꙋйсѧ, низпаде́нїе бѣсѡ́въ. ра́дꙋйсѧ, пре́лести держа́вꙋ попра́вшаѧ: ра́дꙋйсѧ, і҆́дѡльскꙋю ле́сть ѡ҆бличи́вшаѧ. ра́дꙋйсѧ мо́ре, потопи́вшее фараѡ́на мы́сленнаго: ра́дꙋйсѧ, ка́меню, напои́вшїй жа́ждꙋщыѧ жи́зни. ра́дꙋйсѧ, ѻ҆́гненный сто́лпе, наставлѧ́ѧй сꙋ́щыѧ во тьмѣ̀: ра́дꙋйсѧ, покро́ве мі́рꙋ, ши́ршїй ѻ҆́блака. ра́дꙋйсѧ пи́ще, ма́нны прїе́мнице: ра́дꙋйсѧ, сла́дости ст҃ы́ѧ слꙋжи́тельнице. ра́дꙋйсѧ, землѐ ѡ҆бѣтова́нїѧ: ра́дꙋйсѧ, и҆з̾ неѧ́же тече́тъ ме́дъ и҆ млеко̀. Ра́дꙋйсѧ невѣ́сто неневѣ́стнаѧ.

[М] Конда́къ з҃: Хотѧ́щꙋ сѷмеѡ́нꙋ ѿ ны́нѣшнѧгѡ вѣ́ка преста́витисѧ преле́стнагѡ, вда́лсѧ є҆сѝ ꙗ҆́кѡ млⷣнцъ томꙋ̀: но позна́лсѧ є҆сѝ є҆мꙋ̀ и҆ бг҃ъ соверше́нный. тѣ́мже ᲂу҆диви́сѧ твое́й неизрече́ннѣй премꙋ́дрости, зовы́й: А҆ллилꙋ́їа.

И҆ па́ки конда́къ: Взбра́нной воево́дѣ: Та́же чте́мъ про́чее сло́ва а҆ка́ѳїста. Ѱало́мъ н҃. И҆ канѡ́ны: ст҃а́гѡ ѻ҆би́тели со і҆рмосо́мъ на ѕ҃: и҆ прест҃ы́ѧ бцⷣы на ѕ҃.

Творе́нїе господи́на і҆ѡ́сифа, є҆гѡ́же краестро́чїе: Ра́дости прїѧ́телище, тебѣ̀ подоба́етъ ра́доватисѧ є҆ди́нѣй.

[А҆́ще ли хра́мъ бцⷣы, пое́мъ канѡ́нъ пра́здника бцⷣы со і҆рмосо́мъ на в҃і. і҆рмосы̀ по два́жды: тропарѝ на і҃.] Гла́съ д҃.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̀:

[Х] Хрⷭ҇то́вꙋ кни́гꙋ ѡ҆дꙋшевле́ннꙋю, запечатлѣ́ннꙋю тѧ̀ дх҃омъ, вели́кїй а҆рха́гг҃лъ чⷭ҇таѧ, зрѧ̀ возглаша́ше тѝ: ра́дꙋйсѧ, ра́дости прїѧ́телище, є҆́юже прама́тернѧѧ клѧ́тва разрѣши́тсѧ.

[А] А҆да́мово и҆справле́нїе, ра́дꙋйсѧ дв҃о бг҃оневѣ́сто, а҆́дово ᲂу҆мерщвле́нїе ра́дꙋйсѧ всенепоро́чнаѧ, пала́то всѣ́хъ цр҃ѧ̀: ра́дꙋйсѧ, прⷭ҇то́ле ѻ҆́гненный вседержи́телѧ.

[Р] Цвѣ́те неꙋвѧда́емый, ра́дꙋйсѧ є҆ди́на прозѧ́бшаѧ ꙗ҆́блоко бл҃гово́нное. ра́дꙋйсѧ ро́ждшаѧ бл҃гоꙋха́нїе є҆ди́нагѡ цр҃ѧ̀. ра́дꙋйсѧ неискꙋсобра́чнаѧ, мі́рови сп҃се́нїе.

[А] Чистоты̀ сокро́вище, ра́дꙋйсѧ, є҆́юже ѿ паде́нїѧ на́шегѡ воста́хомъ. ра́дꙋйсѧ, сладкоꙋха́нный крі́не влⷣчце, вѣ́рныхъ бл҃гоꙋха́ѧй, кади́ло бл҃гово́нное, и҆ мѵ́ро многоцѣ́нное.

Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Пѣ́снь г҃.

І҆рмо́съ: Твоѧ̑ пѣсносло́вцы бцⷣе:

[С] Кла́съ прозѧ́бшаѧ бж҃е́ственный, ꙗ҆́кѡ ни́ва неѡра́ннаѧ ꙗ҆́вѣ, ра́дꙋйсѧ ѡ҆дꙋшевле́ннаѧ трапе́зо, хлѣ́бъ живо́тный вмѣ́щшаѧ. ра́дꙋйсѧ, живѡ́тныѧ воды̀ и҆сто́чниче неистоща́емый влⷣчце.

[Д] Ю҆́нице ю҆нца̀ ро́ждшаѧ непоро́чнаго, ра́дꙋйсѧ вѣ̑рнымъ. ра́дꙋйсѧ а҆́гнице, ро́ждшаѧ бж҃їѧго а҆́гнца, взе́млющаго мі́ра всегѡ̀ прегрѣшє́нїѧ. ра́дꙋйсѧ те́плое ѡ҆чисти́лище.

[О] Оу҆́тро свѣтлѣ́йшее, ра́дꙋйсѧ є҆ди́на сл҃нца носѧ́щаѧ хрⷭ҇та̀ свѣ́та жили́ще. ра́дꙋйсѧ, тьмꙋ̀ разрꙋши́вшаѧ, и҆ мра̑чныѧ бѣ́сы ѿню́дъ ѿгна́вшаѧ.

[Х] Ра́дꙋйсѧ, две́ре є҆ди́на, є҆́юже сло́во про́йде є҆ди́но, верєѝ и҆ врата̀ а҆́дѡва, влⷣчце, ржⷭ҇тво́мъ твои́мъ сокрꙋши́вшаѧ. ра́дꙋйсѧ бж҃е́ственный вхо́де сп҃са́емыхъ, бг҃оневѣ́сто.

Катава́сїа: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.

Є҆ктенїа̀ ма́лаѧ. И҆ по возгла́сѣ, конда́къ: Взбра́нной воево́дѣ: И҆ чте́мъ дрꙋгі̑ѧ ше́сть і҆́косѡвъ и҆ кондакѡ́въ.

[Н] І҆́косъ з҃: Но́вꙋю показа̀ тва́рь ꙗ҆́вльсѧ зижди́тель, на́мъ И҆ ѿ негѡ̀ бы́вшымъ, и҆з̾ безсѣ́менныѧ прозѧ́бъ ᲂу҆тро́бы, и҆ сохрани́въ ю҆̀, ꙗ҆́коже бѣ̀, нетлѣ́ннꙋ. да чꙋ́до ви́дѧще воспои́мъ ю҆̀, вопїю́ще: ра́дꙋйсѧ, цвѣ́те нетлѣ́нїѧ: ра́дꙋйсѧ, вѣ́нче воздержа́нїѧ. ра́дꙋйсѧ, воскрⷭ҇нїѧ ѡ҆́бразъ ѡ҆блиста́ющаѧ: ра́дꙋйсѧ, а҆́гг҃льское житїѐ ꙗ҆влѧ́ющаѧ. ра́дꙋйсѧ дре́во свѣтлоплодови́тое, ѿ негѡ́же пита́ютсѧ вѣ́рнїи: ра́дꙋйсѧ дре́во бл҃госѣнноли́ственное, и҆́мже покрыва́ютсѧ мно́зи. ра́дꙋйсѧ, во чре́вѣ носѧ́щаѧ и҆зба́вителѧ плѣнє́ннымъ: ра́дꙋйсѧ, ро́ждшаѧ наста́вника заблꙋ́ждшымъ. ра́дꙋйсѧ, сꙋдїѝ првⷣнагѡ ᲂу҆моле́нїе: ра́дꙋйсѧ, мно́гихъ согрѣше́нїй проще́нїе. ра́дꙋйсѧ, ѻ҆де́ждо наги́хъ дерзнове́нїѧ: ра́дꙋйсѧ, любы̀ всѧ́кое жела́нїе побѣжда́ющаѧ. Ра́дꙋйсѧ невѣ́сто неневѣ́стнаѧ.

[Ѯ] Конда́къ и҃: Стра́нное ржⷭ҇тво̀ ви́дѣвше, ᲂу҆страни́мсѧ мі́ра, ᲂу҆́мъ на нб҃са̀ прело́жше: сегѡ́ бо ра́ди высо́кїй бг҃ъ, на землѝ ꙗ҆ви́сѧ смире́нный человѣ́къ, хотѧ́й привлещѝ къ высотѣ̀, томꙋ̀ вопїю́щыѧ: А҆ллилꙋ́їа.

[О] І҆́косъ и҃: Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неѡпи́санное сло́во: снизхожде́нїе бо бж҃е́ственное, не прехожде́нїе же мѣ́стное бы́сть, и҆ ржⷭ҇тво̀ ѿ дв҃ы бг҃опрїѧ́тныѧ, слы́шащїѧ сїѧ̑: ра́дꙋйсѧ, бг҃а невмѣсти́магѡ вмѣсти́лище: ра́дꙋйсѧ, честна́гѡ та́инства двє́ри. ра́дꙋйсѧ, невѣ́рныхъ сꙋмни́тельное слы́шанїе: ра́дꙋйсѧ, вѣ́рныхъ и҆звѣ́стнаѧ похвало̀. ра́дꙋйсѧ, колесни́це прест҃а́ѧ, сꙋ́щагѡ на херꙋві́мѣхъ: ра́дꙋйсѧ, селе́нїе пресла́вное, сꙋ́щагѡ на серафі́мѣхъ. ра́дꙋйсѧ, проти̑внаѧ въ то́жде собра́вшаѧ: ра́дꙋйсѧ, дв҃ство и҆ ржⷭ҇тво̀ сочета́вшаѧ. ра́дꙋйсѧ, є҆́юже разрѣши́сѧ престꙋпле́нїе: ра́дꙋйсѧ, є҆́юже ѿве́рзесѧ ра́й. ра́дꙋйсѧ, ключꙋ̀ црⷭ҇твїѧ хрⷭ҇то́ва: ра́дꙋйсѧ, наде́ждо бла̑гъ вѣ́чныхъ. Ра́дꙋйсѧ невѣ́сто неневѣ́стнаѧ.

[П] Конда́къ ѳ҃: Всѧ́кое є҆стество̀ а҆́гг҃льское ᲂу҆диви́сѧ, вели́комꙋ твоегѡ̀ вочл҃вѣ́ченїѧ дѣ́лꙋ: непристꙋ́пнаго бо ꙗ҆́кѡ бг҃а, зрѧ́ше всѣ̑мъ пристꙋ́пнаго человѣ́ка, на́мъ ᲂу҆́бѡ спребыва́юща, слы́шаща же ѿ всѣ́хъ: А҆ллилꙋ́їа.

[Р] І҆́косъ ѳ҃: Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ, ви́димъ ѡ҆ тебѣ̀ бцⷣе: недоꙋмѣва́ютъ бо глаго́лати, є҆́же ка́кѡ, и҆ дв҃а пребыва́еши, и҆ роди́ти возмогла̀ є҆сѝ; мы́ же та́инствꙋ дивѧ́щесѧ, вѣ́рнѡ вопїе́мъ: ра́дꙋйсѧ, премꙋ́дрости бж҃їѧ прїѧ́телище: ра́дꙋйсѧ, промышле́нїѧ є҆гѡ̀ сокро́вище. ра́дꙋйсѧ, любомꙋ̑дрыѧ немꙋ̑дрыѧ ꙗ҆влѧ́ющаѧ: ра́дꙋйсѧ, хитрословє́сныѧ безсловє́сныѧ ѡ҆блича́ющаѧ: ра́дꙋйсѧ, ꙗ҆́кѡ ѡ҆бꙋѧ́ша лю́тїи взыска́телє: ра́дꙋйсѧ, ꙗ҆́кѡ ᲂу҆вѧдо́ша баснотво́рцы. ра́дꙋйсѧ, а҆ѳїнє́йскаѧ плетє́нїѧ растерза́ющаѧ: ра́дꙋйсѧ, ры̑барскїѧ мрє́жи и҆сполнѧ́ющаѧ. ра́дꙋйсѧ, и҆з̾ глꙋбины̀ невѣ́дѣнїѧ и҆звлача́ющаѧ: ра́дꙋйсѧ, мнѡ́ги въ ра́зꙋмѣ просвѣща́ющаѧ. ра́дꙋйсѧ, кораблю̀ хотѧ́щихъ сп҃сти́сѧ: ра́дꙋйсѧ, приста́нище жите́йскихъ пла́ванїй. Ра́дꙋйсѧ невѣ́сто неневѣ́стнаѧ.

[С] Конда́къ і҃: Сп҃стѝ хотѧ̀ мі́ръ, и҆́же всѣ́хъ ᲂу҆краси́тель, къ семꙋ̀ самоѡбѣтова́нъ прїи́де, и҆ па́стырь сы́й ꙗ҆́кѡ бг҃ъ, на́съ ра́ди ꙗ҆ви́сѧ по на́мъ человѣ́къ: подо́бнымъ бо подо́бное призва́въ, ꙗ҆́кѡ бг҃ъ слы́шитъ: А҆ллилꙋ́їа.

И҆ па́ки конда́къ: Взбра́нной воево́дѣ:

Сѣда́ленъ, гла́съ а҃.

Подо́бенъ: Гро́бъ тво́й:

Вели́кїй во́инъ невеще́ственныхъ а҆́гг҃лѡвъ, во гра́дъ назаре́тъ, предста́въ цр҃ѧ̀ возвѣща́етъ твоего̀ чⷭ҇таѧ, и҆ вѣкѡ́въ гдⷭ҇а: ра́дꙋйсѧ, глаго́лѧ тебѣ̀, бл҃гослове́ннаѧ мр҃і́е, непостижи́маѧ и҆ несказа́ннаѧ глꙋбино̀, человѣ́кѡвъ воззва́нїе.

Сла́ва, и҆ ны́нѣ, то́йже. И҆ па́ки чте́нїе.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀:

[Е] Во гла́сѣхъ пѣ́нїй, дв҃о тебѣ̀ вопїе́мъ всепѣ́таѧ: ра́дꙋйсѧ, тꙋ́чнаѧ горо̀ и҆ ᲂу҆сыре́ннаѧ дх҃омъ. ра́дꙋйсѧ свѣ́щниче, и҆ ста́мно ма́ннꙋ носѧ́щаѧ, ᲂу҆слажда́ющаѧ всѣ́хъ бл҃гочести́выхъ чꙋ̑вства.

[І] Ѡ҆чисти́лище мі́рꙋ, ра́дꙋйсѧ, пречⷭ҇таѧ влⷣчце. ра́дꙋйсѧ лѣ́ствице, ѿ землѝ всѣ́хъ возвы́сившаѧ бл҃года́тїю. ра́дꙋйсѧ мо́сте, вои́стиннꙋ преводѧ́й всѣ́хъ ѿ сме́рти къ животꙋ̀ пою́щихъ тѧ̀.

[О] Нб҃съ превы́шшаѧ, ра́дꙋйсѧ, землѝ ѡ҆снова́нїе, въ твои́хъ ложесна́хъ пречⷭ҇таѧ, нетрꙋ́днѡ носи́вшаѧ. ра́дꙋйсѧ червлени́це, багрѧни́цꙋ бж҃е́ственнꙋю ѡ҆мочи́вшаѧ, ѿ крове́й твои́хъ, цр҃е́ви си́ламъ.

[Н] Законода́вца ро́ждшаѧ и҆́стиннаго, ра́дꙋйсѧ влⷣчце, беззакѡ́нїѧ всѣ́хъ тꙋ́не ѡ҆чища́ющаго. недовѣ́домаѧ глꙋбино̀, высото̀ неизрече́ннаѧ, браконеискꙋ́снаѧ, є҆́юже мы̀ ѡ҆божи́хомсѧ.

[С] Тѧ̀ и҆спле́тшꙋю мі́рови нерꙋкоплете́нный вѣне́цъ пѣсносло́вимъ, ра́дꙋйсѧ, тебѣ̀ дв҃о зовꙋ́ще: храни́лище всѣ́хъ и҆ ѡ҆гражде́нїе, и҆ ᲂу҆твержде́нїе, и҆ сщ҃е́нное прибѣ́жище.

Катава́сїа: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ:

[Ѻ] Пꙋ́ть ро́ждшаѧ жи́зни, ра́дꙋйсѧ пренепоро́чнаѧ, ѿ пото́па грѣхо́внагѡ мі́ръ спа́сшаѧ: ра́дꙋйсѧ бг҃оневѣ́сто, слы́шанїе и҆ глаго́ланїе стра́шное: ра́дꙋйсѧ пребыва́нїе влⷣки тва́ри.

[І] Крѣ́пость и҆ ᲂу҆твержде́нїе человѣ́кѡвъ, ра́дꙋйсѧ пречⷭ҇таѧ, мѣ́сто ѡ҆сщ҃е́нїѧ сла́вы, ᲂу҆мерщвле́нїе а҆́дово, черто́же всесвѣ́тлый. ра́дꙋйсѧ а҆́гг҃лѡвъ ра́досте: ра́дꙋйсѧ по́моще вѣ́рнѡ молѧ́щихсѧ тебѣ̀.

[П] Ѻ҆гнеѡбра́знаѧ колесни́це сло́ва, ра́дꙋйсѧ влⷣчце, ѡ҆дꙋшевле́нный раю̀, дре́во посредѣ̀ и҆мꙋ́щи жи́зни гдⷭ҇а, є҆гѡ́же сла́дость ѡ҆животворѧ́етъ вѣ́рою причаща́ющихсѧ, и҆ тлѝ подклони́вшихсѧ.

[Р] Оу҆крѣплѧ́еми си́лою твое́ю, вѣ́рнѡ вопїе́мъ тѝ: ра́дꙋйсѧ, гра́де всѣ́хъ цр҃ѧ̀, пресла̑внаѧ и҆ достослы̑шаннаѧ ѡ҆ не́йже глагѡ́лана бы́ша ꙗ҆́вѣ, горо̀ несѣко́маѧ: ра́дꙋйсѧ глꙋбино̀ неизмѣ́римаѧ.

[Е] Простра́нное селе́нїе сло́ва, ра́дꙋйсѧ пречⷭ҇таѧ, сосꙋ́де, бж҃е́ственный би́серъ произве́дшаѧ. ра́дꙋйсѧ, всечꙋ́дное всѣ́хъ къ бг҃ꙋ примире́нїе, бл҃жа́щихъ тѧ̀ бцⷣе всегда̀.

Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Здѣ̀ престае́тъ канѡ́нъ ст҃а́гѡ ѻ҆би́тели.

Пѣ́снь ѕ҃.

І҆рмо́съ: Бж҃е́ственное сїѐ и҆ всечⷭ҇тно́е:

[П] Черто́же сло́ва нескве́рный, вина̀ всѣ́хъ ѡ҆боже́нїѧ, ра́дꙋйсѧ пречⷭ҇таѧ, прⷪ҇ро́кѡвъ ѡ҆глаше́нїе: ра́дꙋйсѧ, а҆пⷭ҇лѡвъ ᲂу҆добре́нїе.

[Е] Ѿ тебѐ роса̀ ᲂу҆ка́нꙋ, пла́мень многобо́жїѧ ᲂу҆гаси́вшаѧ. тѣ́мъ вопїе́мъ тѝ: ра́дꙋйсѧ, рꙋно̀ ѡ҆дꙋшевле́нное, є҆́же гедеѡ́нъ, дв҃о, предви́дѣ.

[І] Сѐ тебѣ̀ [дв҃о] ра́дꙋйсѧ, зове́мъ: приста́нище на́мъ бꙋ́ди вла́ющымсѧ, и҆ ѡ҆ти́шїе въ пꙋчи́нѣ скорбе́й, и҆ собла́знѡвъ всѣ́хъ бори́телѧ.

[Х] Ра́дости вина̀, ѡ҆бл҃годатѝ на́шъ по́мыслъ, є҆́же зва́ти тебѣ̀: ра́дꙋйсѧ неѡпали́маѧ кꙋпино̀, ѻ҆́блаче всесвѣ́тлый, вѣ̑рныѧ непреста́ннѡ ѡ҆сѣнѧ́ющїй.

Та́же четверопѣ́снецъ, є҆гѡ́же краестро́чїе: Сїѧ̀ пѣ́снь і҆ѡ́сифова. Гла́съ ѕ҃.

Пѣ́снь ѕ҃.

І҆рмо́съ: Жите́йское мо́ре воздвиза́емое:

Пострада́вше мч҃нцы, и҆ ꙗ҆́кѡ ка́менїе и҆збра́нное по землѝ валѧ́ющесѧ, зижди́тельство всѧ́кое врага̀ соверше́ннѡ преврати́ша, и҆ хра́ми бг҃а жива́гѡ ꙗ҆ви́шасѧ.

Ва́съ мо́лимъ тече́нїе до́брое соверши́вшихъ мч҃нцы, поста̀ тече́нїе тещѝ на́съ до́брѣ ᲂу҆крѣпи́те, добродѣ́телей соверше́нїемъ просїѧ́вшихъ.

Рабы̑ твоѧ̑ влⷣко, преста́вльшыѧсѧ ѿ землѝ къ тебѣ̀ пребл҃го́мꙋ, твоегѡ̀ црⷭ҇твїѧ сотворѝ ѻ҆́бщники, бж҃е́ственныхъ мч҃нкъ твои́хъ сщ҃е́нными хода́тайствы, многомлⷭ҇тиве.

Бг҃оро́диченъ: Є҆ди́на всепѣ́таѧ, пою́щымъ тѧ̀ вѣ́рнѡ, грѣхѡ́въ ѡ҆ставле́нїе, и҆ дарова́нїй бж҃е́ственныхъ ча́сть да́тисѧ, всест҃о́мꙋ сло́вꙋ моли́сѧ, мт҃и дв҃о.

И҆́ный. І҆рмо́съ, гла́съ є҃: Ѿ ки́та прⷪ҇ро́ка:

Па́мѧть соверша́юще мч҃нкъ, гдⷭ҇ви возсле́мъ пѣ̑сни, дне́сь бж҃е́ственнѡ веселѧ́щесѧ.

Мечє́въ и҆ ѻ҆гнѧ̀ не ᲂу҆боѧ́вшесѧ, дерза́юще въ вѣ́рѣ стрⷭ҇тоте́рпцы, мꙋчи́тели въ се́мъ ᲂу҆ѧзви́сте.

Трⷪ҇ченъ: Трⷪ҇цꙋ ли́цы воспѣва́ю тѧ̀, є҆ди́ницѣ по сꙋществꙋ̀ покланѧ́юсѧ, тебѣ̀ ѻ҆́ч҃е, сн҃е и҆ дш҃е ст҃ы́й.

Бг҃оро́диченъ: А҆́гг҃лъ и҆ человѣ̑къ бл҃гохвале́нїе є҆сѝ, ꙗ҆́кѡ родила̀ є҆сѝ дв҃о хрⷭ҇та̀, сп҃са дꙋша́мъ на́шымъ.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Сме́ртїю живо́тъ премѣни́вше, ра́дꙋетесѧ, на небесѣ́хъ живꙋ́ще, страстоте́рпцы пресла́внїи хрⷭ҇та̀ бг҃а.

Сті́хъ: Дꙋ́шы и҆́хъ во бл҃ги́хъ водворѧ́тсѧ.

Сме́ртїю и҆ живото́мъ ѡ҆блада́ѧй, вѣ́рою преста́вльшыѧсѧ ѿ житїѧ̀ хрⷭ҇тѐ, со ст҃ы́ми твои́ми ᲂу҆поко́й.

І҆рмо́съ: Ѿ ки́та прⷪ҇ро́ка и҆зба́вилъ є҆сѝ, менѐ же и҆з̾ глꙋбины̀ грѣхѡ́въ возведѝ гдⷭ҇и, и҆ сп҃си́ мѧ.

Є҆ктенїа̀ ма́лаѧ.

И҆ па́ки пое́мъ конда́къ: Взбра́нной воево́дѣ:

И҆ чте́мъ ѡ҆ста́вльшыѧсѧ ше́сть і҆́косѡвъ и҆ кондакѡ́въ.

[Т] І҆́косъ і҃: Стѣна̀ є҆сѝ дѣ́вамъ бцⷣе дв҃о, и҆ всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ᲂу҆стро́и тѧ̀ пречⷭ҇таѧ, все́льсѧ во ᲂу҆тро́бѣ твое́й, и҆ всѧ̑ приглаша́ти тебѣ̀ наꙋчи́въ: ра́дꙋйсѧ, сто́лпе дѣ́вства: ра́дꙋйсѧ, две́рь сп҃се́нїѧ: ра́дꙋйсѧ, нача́льнице мы́сленнагѡ назда́нїѧ: ра́дꙋйсѧ, пода́тельнице бж҃е́ственныѧ бл҃гости. ра́дꙋйсѧ, ты́ бо ѡ҆бнови́ла є҆сѝ зача̑тыѧ стꙋ́днѡ: ра́дꙋйсѧ, ты́ бо наказа́ла є҆сѝ ѡ҆кра́дєнныѧ ᲂу҆мо́мъ. ра́дꙋйсѧ, тли́телѧ смы́слѡвъ ᲂу҆пражнѧ́ющаѧ: ра́дꙋйсѧ, сѣ́ѧтелѧ чистоты̀ ро́ждшаѧ. ра́дꙋйсѧ, черто́же безсѣ́меннагѡ ᲂу҆невѣ́щенїѧ: ра́дꙋйсѧ, вѣ́рныхъ гдⷭ҇ви сочета́вшаѧ. ра́дꙋйсѧ, до́браѧ младопита́тельнице дѣ́вамъ: ра́дꙋйсѧ, невѣстокраси́тельнице дꙋ́шъ ст҃ы́хъ. Ра́дꙋйсѧ невѣ́сто неневѣ́стнаѧ.

[Ѵ] Конда́къ а҃і: Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи̑сленныѧ бо песка̀ пѣ̑сни а҆́ще прино́симъ тѝ цр҃ю̀ ст҃ы́й, ничто́же соверша́емъ досто́йно, ꙗ҆̀же да́лъ є҆сѝ на́мъ тебѣ̀ вопїю́щымъ: А҆ллилꙋ́їа.

[Ф] І҆́косъ а҃і: Свѣтопрїе́мнꙋю свѣщꙋ̀, сꙋ́щымъ во тьмѣ̀ ꙗ҆́вльшꙋюсѧ, зри́мъ ст҃ꙋ́ю дв҃ꙋ: невеще́ственный бо вжига́ющи ѻ҆́гнь, наставлѧ́етъ къ ра́зꙋмꙋ бж҃е́ственномꙋ всѧ̑, заре́ю ᲂу҆́мъ просвѣща́ющаѧ, зва́нїемъ же почита́емаѧ, си́ми. ра́дꙋйсѧ, лꙋчѐ ᲂу҆́мнагѡ сл҃нца: ра́дꙋйсѧ, свѣти́ло незаходи́магѡ свѣ́та. ра́дꙋйсѧ, мо́лнїе дꙋ́шы просвѣща́ющаѧ: ра́дꙋйсѧ, ꙗ҆́кѡ гро́мъ, врагѝ ᲂу҆страша́ющаѧ. ра́дꙋйсѧ, ꙗ҆́кѡ многосвѣ́тлое возсїѧва́еши просвѣще́нїе: ра́дꙋйсѧ, ꙗ҆́кѡ многотекꙋ́щꙋю и҆сточа́еши рѣкꙋ̀. ра́дꙋйсѧ, кꙋпѣ́ли живописꙋ́ющаѧ ѡ҆́бразъ: ра́дꙋйсѧ, грѣхо́внꙋю ѿе́млющаѧ скве́рнꙋ. ра́дꙋйсѧ, ба́не, ѡ҆мыва́ющаѧ со́вѣсть: ра́дꙋйсѧ ча́ше, че́рплющаѧ ра́дость. ра́дꙋйсѧ, ѡ҆бонѧ́нїе хрⷭ҇то́ва бл҃гоꙋха́нїѧ: ра́дꙋйсѧ, животѐ та́йнагѡ весе́лїѧ, Ра́дꙋйсѧ невѣ́сто неневѣ́стнаѧ.

[Х] Конда́къ в҃і: Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прїи́де собо́ю ко ѿше́дшымъ тогѡ̀ бл҃года́ти: и҆ раздра́въ рꙋкописа́нїе, слы́шитъ ѿ всѣ́хъ си́це: А҆ллилꙋ́їа.

[Ѱ] І҆́косъ в҃і: Пою́ще твоѐ ржⷭ҇тво̀, хва́лимъ тѧ̀ всѝ, ꙗ҆́кѡ ѡ҆дꙋшевле́нный хра́мъ бцⷣе: во твое́й бо всели́всѧ ᲂу҆тро́бѣ, содержа́й всѧ̑ рꙋко́ю гдⷭ҇ь, ѡ҆свѧтѝ, просла́ви, наꙋчѝ вопи́ти тебѣ̀ всѣ́хъ: ра́дꙋйсѧ, селе́нїе бг҃а и҆ сло́ва: ра́дꙋйсѧ, ст҃а́ѧ ст҃ы́хъ бо́льшаѧ. ра́дꙋйсѧ, ковче́же позлаще́нный дх҃омъ: ра́дꙋйсѧ, сокро́вище живота̀ неистощи́мое. ра́дꙋйсѧ, честны́й вѣ́нче царе́й бл҃гочести́выхъ: ра́дꙋйсѧ, честна́ѧ похвало̀ і҆ере́євъ бл҃гоговѣ́йныхъ. ра́дꙋйсѧ, це́ркве непоколеби́мый сто́лпе: ра́дꙋйсѧ, ца́рствїѧ нерꙋши́маѧ стѣно̀. ра́дꙋйсѧ, є҆́юже воздви́жꙋтсѧ побѣ̑ды: ра́дꙋйсѧ, є҆́юже низпа́даютъ вразѝ. ра́дꙋйсѧ, тѣ́ла моегѡ̀ врачева́нїе: ра́дꙋйсѧ, дꙋшѝ моеѧ̀ сп҃се́нїе. Ра́дꙋйсѧ невѣ́сто неневѣ́стнаѧ.

[Ѡ] Конда́къ г҃і: Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ны́нѣшнее прїе́мши приноше́нїе, ѿ всѧ́кїѧ и҆зба́ви напа́сти всѣ́хъ, и҆ бꙋ́дꙋщїѧ и҆змѝ мꙋ́ки, тебѣ̀ вопїю́щихъ: А҆ллилꙋ́їа.

Се́й конда́къ глаго́ли три́жды.

И҆ па́ки чте́тсѧ а҃-й і҆́косъ: А҆́гг҃лъ предста́тель: И҆ па́ки конда́къ: Взбра́нной воево́дѣ:

Та́же чтꙋ́тсѧ сѷнаѯа́рїй: пе́рвѣе мине́и: та́же настоѧ́щїй.

Стїхѝ: Пѣ́сньми неꙋсы́пными бл҃года́рственнѡ,

Гра́дъ во бране́хъ бо́дрꙋю пое́тъ предста́тельницꙋ.

Въ се́й де́нь несѣда́льнꙋю пѣ́снь пра́зднꙋемъ прест҃ы́ѧ влⷣчцы на́шеѧ бцⷣы, вины̀ ра́ди сицевы̀: и҆раклі́ю самодержа́вное гре́ческое нача́льство пра́вѧщꙋ, хосро́й же пе́рсскїй ца́рь, ви́дѣвъ гре́чєскаѧ ски́птра смири́вшасѧ, ѿ фѡ́ки царѧ̀ мꙋчи́телѧ, є҆ди́наго ѿ вельмо́жъ свои́хъ са́рвара и҆́менемъ, съ ты́сѧщами мно́гими во́инствъ посыла́етъ, всѧ̑ востѡ́чныѧ страны̑ покори́ти себѣ̀. предвари́ бо и҆ пре́жде, ꙗ҆́кѡ де́сѧть тє́мъ хрїстїа́нъ погꙋби́въ хосро́й: ꙗ҆́кѡ жидовѡ́мъ прекꙋплѧ́ющымъ и҆̀хъ ѿ негѡ̀ и҆ погꙋблѧ́ющымъ. Нача́льный же вельмо́жа са́рваръ, восто́ки всѧ̑ поплѣни́въ, пости́же и҆ до сама́гѡ злата́гѡ гра́да, и҆́же ны́нѣ скꙋта́рь нарица́етсѧ. Ца́рь бо и҆раклі́й и҆мѣ́нїемъ ѻ҆́бщагѡ зла́та ѡ҆скꙋдѣ́въ сщ҃є́нныѧ сосꙋ́ды церкѡ́вныѧ на златни̑цы претвори́въ, во ѿдаѧ́нїе бо́льшее и҆ соверше́ннѣйшее. По є҆ѵѯі́нскомꙋ же мо́рю съ кораблѝ въ персі̑дскїѧ страны̑ прише́дъ, потреблѧ́етъ ѧ҆̀: и҆ ѿню́дъ побѣжда́етсѧ, ѿ негѡ̀ хосро́й съ про́чими во́инствы. пома́лѣ же и҆ сїро́й сы́нъ хосро́евъ, ѿ ѻ҆тца̀ своегѡ̀ ѿстꙋпи́въ нача́льство себѣ̀ прїе́млетъ, и҆ ѻ҆тца̀ хосро́ѧ ᲂу҆би́въ, царю̀ и҆раклі́ю содрꙋжи́сѧ. Хага́нъ же мѵ́сѡнскїй, и҆ скѵ́ѳскїй нача́льникъ ᲂу҆вѣ́дѣвъ ѡ҆ царѣ̀, ꙗ҆́кѡ по мо́рю по́нтскомꙋ ѿше́лъ є҆́сть разрѣши́въ ми́ръ на гре́ки, полкѝ тьмочи́слєнныѧ подви́гъ, ѿ за́падныхъ стра́нъ на кѡнстанті́нь гра́дъ прихо́дитъ, на бг҃а хꙋ̑льныѧ гла́сы возсыла́ѧ. А҆́бїе же кꙋ́пнѡ мо́ре ᲂу҆́бѡ корабльмѝ, землѧ́ же пѣ́шими и҆ вса́дники безчи́сленными и҆спо́лнь бѧ́ше. Се́ргїй же патрїа́рхъ кѡнстанті́нѧ гра́да, лю́ди мно́гѡ ᲂу҆тѣша́ше, не ѿпа́дати, ни разслаблѧ́тисѧ: но всѐ ᲂу҆пова́нїе ѿ дꙋшѝ на бг҃а возноси́ти, и҆ на мт҃рь є҆гѡ̀ пречⷭ҇тꙋю бцⷣꙋ: та́коже и҆ вѡ́носъ патрі́кїй, и҆́же тогда̀ гра́дъ пра́влѧше, подѡ́бнаѧ на ѿвраще́нїе ра́тникѡвъ ᲂу҆строѧ́ше. Подоба́етъ бо и҆ на́мъ съ по́мощїю вы́шнею, и҆ на прили̑чнаѧ дѣ́йствовати. Патрїа́рхъ же бж҃е́ствєнныѧ і҆кѡ̑ны бг҃ома́тере, со всѣ́мъ мно́жествомъ носѧ̀ ѡ҆бхожда́ше по стѣна́мъ свы́ше, и҆ ѿтꙋ́дꙋ ᲂу҆твержде́нїе и҆̀мъ подава́ѧ. Ꙗ҆́кѡ ᲂу҆́бѡ са́рваръ ѿ восто́ка, хага́нъ же ѿ за́пада и҆дѧ́ста, сожещѝ ѻ҆крє́стнаѧ гра́да: патрїа́рхъ же нерꙋкотворе́ннꙋю хрⷭ҇то́вꙋ і҆кѡ́нꙋ, и҆ честна̑ѧ и҆ животворѧ̑щаѧ древа̀, къ семꙋ́ же и҆ честнꙋ́ю ри́зꙋ бг҃ома́тере носѧ̀, по стѣна́мъ ѡ҆бхожда́ше. Хага́нъ же скѵ́ѳѧнинъ сꙋ́шею, стѣна́мъ кѡнстанті́нѧ гра́да напа́даетъ, со мно́жествомъ безчи́сленнымъ, крѣпкоизрѧ́днѡ ѻ҆рꙋ́жїи ᲂу҆твержде́ни: и҆ толи́ко мно́жество бѧ́ше, ꙗ҆́кѡ є҆ди́номꙋ гре́чинꙋ съ десѧтмѝ скѵ́ѳѧны ꙗ҆́вѣ бра́тисѧ. Но неѡбори́маѧ побо́рница, ѡ҆брѣ́тшимисѧ ма́лыми ѕѣлѡ̀ во́ины въ хра́мѣ є҆ѧ̀, нарица́емѣмъ пигі́и, мно́жайшыѧ и҆́хъ погꙋбѝ. Ѿсю́дꙋ же гре́цы дерзнове́нїе прїе́мше, и҆ восплеска́вше, ѿ воево́ды неѡбори́мыѧ бж҃їѧ мт҃ре, и҆̀хъ при́снѡ до конца̀ побѣжда́хꙋ. Воззрѣ́вше же и҆ на примире́нїе, гра́ждане ѿраже́ни бы́ша. ѿвѣща́ бо и҆̀мъ хага́нъ: не прельща́йтесѧ ѡ҆ бз҃ѣ, въ него́же вѣ́рꙋете, всѧ́чески бо ᲂу҆́трѣ гра́дъ ва́шъ прїимꙋ̀. Гра́ждане же слы́шавше, рꙋ́ки къ бг҃ꙋ простира́хꙋ. Согласи́вшесѧ ᲂу҆́бѡ, хага́нъ же и҆ са́рваръ сꙋ́шею и҆ мо́ремъ на гра́дъ ᲂу҆стремлѧ́ютсѧ, козньмѝ плѣни́ти жела́юще: но толи́кѡ побѣжде́ни бы́ша ѿ грє́къ, ꙗ҆́коже недово́льнымъ бы́ти живы̑мъ мє́ртвыѧ жещѝ. Моно́ѯѷла же ѻ҆рꙋ́жникѡвъ и҆спо́лнена, нѣ́дромъ глаго́лемымъ ро́гомъ, ко хра́мꙋ бг҃ома́тере сꙋ́щемꙋ во влахе́рнахъ, бꙋ́ри внеза́пꙋ си́льнѣ мо́рю припа́дши, и҆ раздѣ́льшꙋсѧ є҆мꙋ̀ въ сѣче́нїе, съ кораблѝ всѣ́ми врагѡ́въ растлѣ́шасѧ. И҆ бѧ́ше ви́дѣти то̀ пресла́вное и҆зрѧднодѣ́йствїе пречⷭ҇тыѧ и҆ бг҃ома́тере, всѣ́хъ при бре́зѣ мо́рѧ сꙋ́щемꙋ во влахе́рнахъ и҆зврѣ̀. Лю́дїе же, є҆ли́кѡ ско́рѡ врата̀ ѿве́рзше, вкꙋ́пѣ всѧ̑ и҆зби́ша, и҆ дѣ́ти и҆ жєны̀ на нѧ̀ вмꙋжестви́вшыѧсѧ. Нача̑льницы же и҆́хъ возврати́шасѧ пла́чꙋще кꙋ́пнѡ и҆ рыда́юще. Бг҃олюби́вїи ᲂу҆́бѡ лю́дїе кѡнстанті́нѧ гра́да, бг҃ома́тери бл҃годаре́нїе даю́ще, всено́щнꙋю пѣ́снь, и҆ несѣда́льнꙋю є҆́й воспѣ́ша, ꙗ҆́кѡ ѡ҆ ѻ҆́ныхъ бдѣ́вши, и҆ преесте́ственною си́лою содѣ́ѧвши на врагѝ побѣ́дꙋ. Ѿто́лѣ ᲂу҆́бѡ на воспомина́нїе толи́кагѡ и҆ преесте́ственнагѡ чꙋдесѐ це́рковь сицевы́й пра́здникъ прїѧ́тъ, мт҃ри бж҃їи возлага́ти въ настоѧ́щее вре́мѧ, є҆гда̀ и҆ повѣ́да бг҃ома́терїю бы́сть. Несѣда́льное же и҆менова́сѧ, за є҆́же тогда̀ та́кѡ дѣ́ѧти гра́дскомꙋ же кли́росꙋ, и҆ лю́демъ всѣ̑мъ. По прехожде́нїи же три́десѧти и҆ шестѝ лѣ́тъ, при ца́рствѣ кѡнстанті́на пѡгона́та, а҆га́рѧне безчи́сленное во́инство водѧ́ще, па́ки на кѡнстанті́нь гра́дъ нападо́ша, и҆ се́дмь лѣ́тъ се́й борю́ще, є҆гда̀ и҆ въ кѵ́зїческихъ страна́хъ презимова́хꙋ, мнѡ́гїѧ своѧ̑ погꙋби́ша. Та́же ѿре́кшесѧ бра́ни, и҆ съ во́инствомъ свои́мъ возвраща́ющеесѧ, и҆ бы́вше въ мо́ри нарица́емѣмъ сѷле́ѡ, всѝ потопи́шасѧ, предста́тельствомъ всечи́стыѧ и҆ бг҃ома́тере. Но и҆ въ тре́тїе па́ки, при львѣ̀ і҆са́ѵрѣ, а҆га́рѧне па́че мно́жайшихъ тє́мъ число́мъ, пе́рвѣе ᲂу҆́бѡ пе́рсское разорѧ́ютъ ца́рство, та́же є҆гѵ́петъ и҆ лївѵ́ю. Ѡ҆бте́кше же и҆ і҆нді́ю, є҆ѳїо́пїю же и҆ і҆спа́нїю, напослѣ́докъ же и҆ на са́мый ца́рскїй гра́дъ вою́ютъ, ты́сѧщїю ѻ҆смїю̀ сѡ́тъ корабле́й носи́ми: ѡ҆крꙋжи́вше ᲂу҆́бѡ є҆го̀, ꙗ҆́кѡ а҆́бїе расхи́тити є҆го̀ жда́хъ. Гра́дстїи же свѧще́ннїи лю́дїе, честно́е дре́во честна́гѡ и҆ животворѧ́щагѡ крⷭ҇та̀, и҆ чⷭ҇тнꙋ́ю і҆кѡ́нꙋ бг҃ома́тере ѻ҆диги́трїи ѡ҆бносѧ́ще, стѣ́нꙋ ѡ҆крꙋжа́хꙋ, со слеза́ми бг҃а ᲂу҆милостивлѧ́юще. Возмечта́сѧ ᲂу҆́бѡ, си́це а҆га́рѧнѡмъ на двѣ̀ ча̑сти раздѣли́тисѧ: и҆ ѻ҆́вїи ᲂу҆́бѡ на бо́лгары вою́ютъ, и҆ та́мѡ па́даютъ вѧ́щше двою̀ тмꙋ̀: ѻ҆́вїи же ѡ҆ста́вльшесѧ на ца́рь гра́дъ прїитѝ, возбрани́вшесѧ же ѿ вери́ги, бы́вшїѧ ѿ гала́ты до стѣ́нъ царѧ̀ гра́да. Восплы́вшымъ же нѣ́гдѣ до мѣ́ста нарица́емагѡ сѡсѳе́нъ, та́мѡ вѣ́трꙋ сѣ́вернꙋ возвѣ́ѧвшꙋ, мно́ги кораблѝ и҆́хъ сокрꙋши́шасѧ, и҆ погибо́ша: ѡ҆ста́вльшїисѧ же въ гла́дъ ѕѣ́льный впадо́ша, ꙗ҆́кѡ и҆ пло́темъ человѣ́чєскимъ прикоснꙋ́тисѧ, и҆ ка́лъ мѣси́ти и҆ ꙗ҆́сти. Та́же бѣжа́вше, и҆ во є҆ге́йскꙋю пꙋчи́нꙋ дости́гше, кораблецы̀ своѧ̑ всѧ̑, и҆ самѣ́хъ себѐ глꙋбинѣ̀ морско́й преда́ша: гра́дъ бо си́ленъ съ небесѐ спа́дъ, возврѣ́нїе мо́рѧ сотвори́въ, смо́лꙋ корабле́й распꙋстѝ: и҆ та́кѡ мно́жество безчи́сленное ѻ҆́ное во́инскихъ корабле́й поги́бе, тре́мъ то́кмѡ на возвѣще́нїе ѡ҆ста́вльшымсѧ. Си́хъ ра́ди ᲂу҆́бѡ всѣ́хъ преесте́ственныхъ чꙋде́съ всечи́стыѧ и҆ бг҃ома́тере, настоѧ́щїй пра́здникъ пра́зднꙋемъ. Несѣда́льный же рече́сѧ, занѐ про́стѡ стоѧ́ще тогда̀ всѝ лю́дїе въ но́щь ѻ҆́нꙋю, сло́ва мт҃ри пѣ́снь воспѣ́ша. и҆ ꙗ҆́кѡ во всѣ́хъ и҆ны́хъ сѣдѣ́ти ѿ ѻ҆бы́чаѧ и҆мꙋ́ще, въ настоѧ́щихъ бг҃ома́тере, про́сти всѝ слꙋ́шаемъ. Твоеѧ̀ побо́рницы же и҆ непобори́мыѧ мт҃ре мл҃твами, хрⷭ҇тѐ бж҃е, ѿ ѡ҆блежа́щихъ напа́стей и҆ на́съ и҆зба́ви, и҆ поми́лꙋй на́съ ꙗ҆́кѡ є҆ди́нъ чл҃вѣколю́бецъ.

Пѣ́снь з҃.

І҆рмо́съ: Не послꙋжи́ша тва́ри:

[А] Воспѣва́емъ тѧ̀ вопїю́ще: ра́дꙋйсѧ, колесни́це сл҃нца ᲂу҆́мнагѡ, лозо̀ и҆́стиннаѧ, гро́здъ зрѣ́лый воздѣ́лавшаѧ, вїно̀ и҆сточа́ющїй, дꙋ́шы веселѧ́щее вѣ́рою тѧ̀ сла́вѧщихъ.

[І] Врача̀ всѣ́хъ человѣ̑къ ро́ждшаѧ, ра́дꙋйсѧ бг҃оневѣ́сто, же́зле та́йный, цвѣ́тъ неꙋвѧда́емый процвѣ́тшїй, ра́дꙋйсѧ влⷣчце, є҆́юже ра́дости наполнѧ́емсѧ, и҆ жи́знь наслѣ́дствꙋемъ.

[Р] Вѣті́йствꙋющїй не мо́жетъ ѧ҆зы́къ влⷣчце пѣсносло́вити тѧ̀, па́че бо серафі́мѡвъ возвы́силасѧ є҆сѝ, ро́ждши цр҃ѧ̀ хрⷭ҇та̀. є҆го́же молѝ гра́дꙋ семꙋ̀ и҆зба́витисѧ ѿ мно́гихъ и҆скꙋше́нїй.

[Е] Хва́лѧтъ тѧ̀ бл҃жа́ще концы̀, и҆ любо́вїю зовꙋ́тъ тебѣ̀: ра́дꙋйсѧ сви́тче, въ не́мже пе́рстомъ написа́сѧ ѻ҆́ч҃ее сло́во чⷭ҇таѧ. є҆го́же молѝ, въ кни̑ги живѡ́тныѧ, рабѡ́мъ твои̑мъ написа́тисѧ бцⷣе.

[І] Мо́лимъ рабѝ твоѝ, и҆ приклонѧ́емъ колѣ́но се́рдца на́шегѡ: приклонѝ ᲂу҆́хо твоѐ чⷭ҇таѧ, и҆ сп҃сѝ скорбьмѝ погрꙋжа́ємыѧ при́снѡ, и҆ соблюдѝ ѿ всѧ́кагѡ вра́жїѧ плѣне́нїѧ тво́й гра́дъ бцⷣе.

И҆́ный. І҆рмо́съ, гла́съ ѕ҃: Росода́тельнꙋ:

Пресвѣ́тлое собра́нїе бж҃е́ственныхъ твои́хъ мч҃нкѡвъ многомлⷭ҇тиве, во свѣ́тѣ твое́мъ незаходи́мѣмъ ны́нѣ жи́тельствꙋетъ. тѣ́хъ мл҃твами просвѣще́нїе, и҆ грѣхѡ́въ ѡ҆чище́нїе пода́ждь всѣ̑мъ хрⷭ҇тѐ.

Ко́ль кра́сное вре́мѧ, є҆́же на́мъ да́лъ є҆сѝ воздержа́нїѧ гдⷭ҇и: въ не́мже ᲂу҆ще́дри дꙋ́шы на́шѧ ꙗ҆́кѡ бл҃гъ, мл҃твами ст҃ы́хъ страда́лєцъ, кра̑сныѧ и҆ чєстны́ѧ возлюби́вшихъ стрⷭ҇ти твоѧ̑.

Преше́дшыѧ многоболѣ́зненнꙋю бꙋ́рю житїѧ̀ рабы̑ твоѧ̑, ᲂу҆стремѝ въ приста́нище влⷣко жи́зни, вопи́ти со всѣ́ми и҆збра́нными: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Бг҃оро́диченъ: Зако́на да́телѧ приснодв҃о ро́ждшаѧ молѝ, беззакѡ́нїѧ ѿѧ́ти всѧ̑, во вре́мѧ ны́нѣ настоѧ́щее, до́брѣ произво́лившымъ ѡ҆бꙋча́тисѧ бж҃е́ственнагѡ поста̀ тща́нїемъ.

И҆́ный. І҆рмо́съ, гла́съ є҃: Бл҃гослове́нъ є҆сѝ:

Бл҃гослове́нъ є҆сѝ бж҃е, показа́вый дѡ́блїѧ ѡ҆ тебѣ̀ стра́ждꙋщыѧ мч҃нки, препѣ́тый и҆ препросла́вленный.

Бл҃гослове́нъ є҆сѝ бж҃е, страстоте́рпцы моли́твенники на́мъ къ тебѣ̀ подава́ѧй, препѣ́тый и҆ препросла́вленный.

Трⷪ҇ченъ: Бл҃гослове́нъ є҆сѝ бж҃е, є҆ди́нъ ᲂу҆́бѡ є҆стество́мъ, ли́цы же тремѝ познава́емый, препѣ́тый и҆ препросла́вленный.

Бг҃оро́диченъ: Бл҃гослове́нъ є҆сѝ бж҃е, рожде́йсѧ безсѣ́меннѡ, и҆ ро́ждшꙋю показа́вый чисто́тствꙋющꙋю, препѣ́тый и҆ препросла́вленный.

Сті́хъ: Ст҃ы̑мъ и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ.

Бл҃гослове́нъ є҆сѝ бж҃е, ѕвѣ́ри ᲂу҆кроти́вый, и҆ погаси́вый ѻ҆́гнь, въ сла́вꙋ ст҃ы́хъ твои́хъ, препѣ́тый и҆ препросла́вленный.

Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.

Бл҃гослове́нъ є҆сѝ бж҃е, ѿ сме́рти въ безконе́чный живо́тъ преложи́вый, вѣ́рою въ житїѝ послꙋжи́вшыѧ тебѣ̀.

І҆рмо́съ: Бл҃гослове́нъ є҆сѝ бж҃е, ви́дѧй бє́здны, и҆ на прⷭ҇то́лѣ сла́вы сѣдѧ́й, препѣ́тый и҆ пресла́вный.

Пѣ́снь и҃.

І҆рмо́съ: Ѻ҆́троки бл҃гочести̑выѧ:

[Н] Ложесны̀ сло́во прїѧ́ла є҆сѝ, всѧ̑ носѧ́щаго носи́ла є҆сѝ, млеко́мъ пита́ла є҆сѝ, ма́нїемъ пита́ющаго вселе́ннꙋю всю̀, чⷭ҇таѧ, є҆мꙋ́же пое́мъ: гдⷭ҇а по́йте дѣла̀, и҆ превозноси́те во всѧ̑ вѣ́ки.

[М] Мѡѷсе́й ᲂу҆разꙋмѣ̀ въ кꙋпинѣ̀ вели́кое та́инство ржⷭ҇тва̀ твоегѡ̀: ѻ҆́троцы же проѡбрази́ша сїѐ ꙗ҆́вственнѣе посредѣ̀ ѻ҆гнѧ̀ стоѧ́ще, и҆ не ѡ҆палѧ́еми, нетлѣ́ннаѧ ст҃а́ѧ дв҃о. тѣ́мъ тѧ̀ почита́емъ во всѧ̑ вѣ́ки.

[О] Пре́жде пре́лестїю ѡ҆бнажи́вшїисѧ въ ри́зꙋ нетлѣ́нїѧ ѡ҆блеко́хомсѧ ржⷭ҇тво́мъ твои́мъ: и҆ сѣдѧ́щїи во тьмѣ̀ прегрѣше́нїй, свѣ́тъ ви́дѣхомъ, свѣ́та жили́ще ѻ҆трокови́це. тѣ́мъ тѧ̀ пое́мъ во всѧ̑ вѣ́ки.

[Н] Ме́ртвїи тобо́ю ѡ҆живлѧ́ютсѧ, жи́знь бо ѵ҆поста́снꙋю родила̀ є҆сѝ, нѣмі́и пре́жде, благоглаго́ливи быва́ютъ, прокаже́ннїи ѡ҆чища́ютсѧ, недꙋ́зи ѿгонѧ́ютсѧ, дꙋхѡ́въ воздꙋ́шныхъ мно́жєства побѣжда́ютсѧ, дв҃о человѣ́кѡвъ сп҃се́нїе.

[И] Мі́рꙋ ро́ждшаѧ сп҃се́нїе, и҆́мже ѿ землѝ на высотꙋ̀ взѧ́ти бы́хомъ, ра́дꙋйсѧ всебл҃гослове́ннаѧ, покро́ве и҆ держа́во, стѣно̀ и҆ ᲂу҆твержде́нїе, пою́щымъ чⷭ҇таѧ: гдⷭ҇а по́йте дѣла̀, и҆ превозноси́те во всѧ̑ вѣ́ки.

И҆́ный. І҆рмо́съ: И҆з̾ пла́мене преподѡ́бнымъ ро́сꙋ:

Ст҃ы́хъ мч҃нкъ и҆справле́нїемъ, небе́снїи ᲂу҆́мове преꙋдиви́шасѧ: тѣ́хъ мл҃твами, млⷭ҇ти твоѧ̑ влⷣко въ на́съ бога́тнѡ ᲂу҆дивѝ, ще́дре.

Ѻ҆́гнь бж҃е́ственною росо́ю попра́вшїи, страда́льцы гдⷭ҇ни досточꙋ́днїи, и҆зба́вите на́съ ѻ҆гнѧ̀ мꙋ́чащагѡ, ко влⷣцѣ те́плыми ва́шими мл҃твами.

Пребл҃гі́й сло́ве, ѿше́дшыѧ ѿ на́съ правосла́внѡ, жи́зни сподо́би ꙗ҆̀же на небесѣ́хъ, и҆ ст҃ы́ѧ свѣ́тлости, добропобѣ́дныхъ мч҃нкъ мл҃твами.

Бг҃оро́диченъ: Мл҃твами ще́дре, ро́ждшїѧ тѧ̀, и҆ ст҃ы́хъ мч҃нкъ, и҆ а҆пⷭ҇лъ твои́хъ, просвѣтѝ на́шѧ дꙋ́шы, є҆́же сла́вити тѧ̀, въ весе́лїи дꙋше́внѣмъ во вѣ́ки.

И҆́ный. І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли:

Ли́цы мч҃нкъ ст҃і́и, помѧни́те любо́вїю воспѣва́ющыѧ вы̀, и҆ превозносѧ́щыѧ хрⷭ҇та̀ во вѣ́ки.

Мече́мъ ᲂу҆сѣка́еми, ра́довахꙋсѧ мч҃нцы, пою́ще хрⷭ҇та̀, и҆ превозносѧ́ще во всѧ̑ вѣ́ки.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.

Трⷪ҇ченъ: Страннолѣ́пнѡ раздѣлѧ́етсѧ трⷪ҇ца, и҆ пребыва́етъ нераздѣ́льна ꙗ҆́кѡ бг҃ъ: ю҆́же превозно́симъ во всѧ̑ вѣ́ки.

Бг҃оро́диченъ: Дв҃а млⷣнца родѝ, бг҃ъ бо и҆з̾ неѧ̀ вочеловѣ́чисѧ: всѧ̀ тва́рь да пое́тъ є҆го̀ во вѣ́ки.

Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.

Столпѝ мꙋ́жества ꙗ҆ви́шасѧ, паде́нїемъ дїа́волимъ ра́дꙋющесѧ мꙋ́чєницы, пою́ще хрⷭ҇та̀ и҆ превозносѧ́ще во вѣ́ки.

Сті́хъ: Дꙋ́шы и҆́хъ во бл҃ги́хъ водворѧ́тсѧ.

Оу҆ а҆враа́ма внѣ́дритисѧ сподо́би гдⷭ҇и рабы̑ твоѧ̑, вѣ́рою преста́вльшыѧсѧ къ тебѣ̀, и҆ наде́ждею.

Хва́лимъ, бл҃гослови́мъ, покланѧ́емсѧ гдⷭ҇ви:

І҆рмо́съ: Творца̀ тва́ри, є҆гѡ́же ᲂу҆жаса́ютсѧ а҆́гг҃ли, по́йте лю́дїе, и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный:

[І] Да тебѣ̀ вѣ́рнїи, ра́дꙋйсѧ зове́мъ тобо́ю ра́дости прича̑стницы бы́вше присносꙋ́щныѧ, и҆зба́ви на́съ напа́стей, ва́рварскагѡ плѣне́нїѧ, и҆ всѧ́кїѧ и҆ны́ѧ ра́ны, за мно́жество ѻ҆трокови́це прегрѣше́нїй, находѧ́щїѧ человѣ́кѡмъ согрѣша́ющымъ.

[Ѡ] Ꙗ҆ви́ласѧ є҆сѝ просвѣще́нїе на́ше и҆ ᲂу҆твержде́нїе. тѣ́мже вопїе́мъ тѝ: ра́дꙋйсѧ ѕвѣздо̀ незаходи́маѧ, вводѧ́щаѧ въ мі́ръ вели́кое сл҃нце. ра́дꙋйсѧ, є҆де́мъ ѿве́рзшаѧ заключе́нный чⷭ҇таѧ. ра́дꙋйсѧ сосꙋ́де, мѵ́ро неистощи́мое на тѧ̀ и҆злїѧ́нное прїе́мшїй.

[С] Ста́немъ бл҃гоговѣ́йнѡ въ домꙋ̀ бг҃а на́шегѡ, и҆ возопїи́мъ: ра́дꙋйсѧ, мі́рꙋ влⷣчце. ра́дꙋйсѧ мр҃і́е, гпⷭ҇жѐ всѣ́хъ на́съ. ра́дꙋйсѧ, є҆ди́на непоро́чнаѧ въ жена́хъ и҆ до́браѧ. ра́дꙋйсѧ, сто́лпе ѻ҆́гненный, вводѧ́щїй въ вы́шнюю жи́знь человѣ́чество.

[Н] Голꙋби́це ми́лостиваго ро́ждшаѧ, ра́дꙋйсѧ приснодв҃о: преподо́бныхъ всѣ́хъ, ра́дꙋйсѧ похвало̀, страда́льцєвъ вѣнча́нїе. ра́дꙋйсѧ всѣ́хъ пра́ведныхъ бж҃е́ственное ᲂу҆добре́нїе, и҆ на́мъ вѣ̑рнымъ сп҃се́нїе.

[Ф] Пощадѝ бж҃е наслѣ́дїе твоѐ, грѣхѝ на́шѧ всѧ̑ презрѣ́въ ны́нѣ, на сїѐ и҆мѣ́ѧ молѧ́щꙋю тѧ̀, на землѝ безсѣ́меннѡ тебѐ ро́ждшꙋю, вели́кїѧ ра́ди млⷭ҇ти восхотѣ́вшагѡ воѡбрази́тисѧ хрⷭ҇тѐ въ человѣ́чество.

И҆́ный. І҆рмо́съ: Бг҃а человѣ́кѡмъ невозмо́жнѡ:

Ꙗ҆́кѡ свѣ́тъ, ꙗ҆́кѡ со́лнце возсїѧ́вше, всю̀ зе́млю лꙋча́ми бл҃гоче́стїѧ мч҃нцы, и҆ свѣти́лами чꙋде́съ просвѣти́ша, и҆ многобо́жїѧ тьмꙋ̀ разгна́ша: и҆́хже мл҃твами бж҃е, поми́лꙋй на́съ.

Во́инство мꙋ́ченикѡвъ непобѣди́мое, всѣ́хъ на́съ ᲂу҆крѣпѝ до́брѣ подвиза́тисѧ, и҆ соверши́ти поста̀ по́прище: ꙗ҆́кѡ да бж҃е́ственнагѡ житїѧ̀ дѣ́ло соверши́вше, прича̑стницы бꙋ́демъ жи́зни, веселѧ́щесѧ.

Твоѧ̀ да предвари́тъ бл҃гость гдⷭ҇и, ѿ на́съ стра́шнымъ преста́вльшихсѧ повелѣ́нїемъ твои́мъ: да ѡ҆крꙋжи́тъ и҆̀хъ твоѧ̀ млⷭ҇ть, и҆ да наста́витъ къ селе́нїємъ просвѣщє́ннымъ свѣ́томъ лица̀ твоегѡ̀.

Бг҃оро́диченъ: Гла́сомъ а҆́гг҃ловымъ совѣ́та ѻ҆́ч҃а а҆́гг҃ла, неизрече́ннѡ бцⷣе родила̀ є҆сѝ: гла́сы ᲂу҆́бѡ рабѡ́въ твои́хъ прїимѝ, ꙗ҆̀же во вре́мѧ поста̀ прино́симъ, и҆ сїѧ̑ принесѝ бг҃ꙋ ꙗ҆́коже кади́ло.

И҆́ный. І҆рмо́съ: И҆са́їе ликꙋ́й:

Соверша́юще торжество̀ мч҃нческое, дне́сь лю́дїе воскли́кнемъ пѣ́сньми, пою́ще хрⷭ҇тꙋ̀ подвигополо́жникꙋ, и҆ побѣ̑ды на врагѝ и҆̀мъ пода́вшемꙋ: є҆го́же въ пѣ́снехъ велича́емъ.

Ноготьмѝ растерза́еми, и҆ ᲂу҆сѣца́еми мече́мъ на ᲂу҆́ды, совокꙋпи́стесѧ хрⷭ҇тꙋ̀ любе́знѡ, всехва́льнїи мч҃нцы. тѣ́мъ и҆ ны́нѣ на небесѣ́хъ веселѧ́щесѧ, ѡ҆ всѣ́хъ моли́тесѧ.

Трⷪ҇ченъ: Є҆ди́но сꙋщество́мъ воспѣва́ю тѧ̀ безнача́льнаѧ трⷪ҇це, честна́ѧ, живонача́льнаѧ, несѣко́маѧ є҆ди́нице, ѻ҆́ч҃е нерожде́нный, и҆ рожде́нный сло́ве и҆ сн҃е, дш҃е ст҃ы́й на́съ сп҃сѝ пою́щихъ тѧ̀.

Бг҃оро́диченъ: Па́че ᲂу҆ма̀ ржⷭ҇тво̀ твоѐ бг҃омт҃и, без̾ мꙋ́жа бо зача́тїе въ тебѣ̀, и҆ дѣ́вственно рожде́нїе бы́сть: и҆́бо бг҃ъ є҆́сть роди́выйсѧ, є҆го́же велича́юще, тѧ̀ дв҃о ᲂу҆бл҃жа́емъ.

Сті́хъ: Ст҃ы̑мъ, и҆̀же сꙋ́ть на землѝ є҆гѡ̀:

До́блее во́инство цр҃ѧ̀ всѣ́хъ и҆ бг҃а, мч҃нкѡвъ пѣ́сньми вѣнча́имъ лю́дїе: ті́и бо побѣди́ша бѣсѡ́вскїѧ полкѝ ꙗ҆́вѣ, ꙗ҆̀же воспѣва́юще, влⷣкꙋ велича́емъ.

Сті́хъ: Бл҃же́ни, ꙗ҆̀же и҆збра́лъ, и҆ прїѧ́лъ є҆сѝ гдⷭ҇и.

Є҆гда̀ всѐ созда́нїе твоѐ возста́виши сꙋди́тисѧ хрⷭ҇тѐ, ꙗ҆̀же прїѧ́лъ є҆сѝ, и҆ ны́нѣ рабы̑ твоѧ̑ вѣ̑рныѧ поми́лꙋй, простѝ ꙗ҆̀же въ житїѝ прегрѣшє́нїѧ и҆́хъ, и҆ со ст҃ы́ми твои́ми ᲂу҆поко́й ѧ҆̀ во вѣ́ки.

І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ.

Є҆ѯапостїла́рїй. Подо́бенъ: Жєны̀ ᲂу҆слы́шите:

Є҆́же ѿ вѣ́ка дне́сь познава́етсѧ та́инство: бж҃їе бг҃ъ сло́во, сн҃ъ дв҃ы мр҃і́и за милосе́рдїе быва́етъ. и҆ ра́дость бл҃говѣ́щенїѧ гаврїи́лъ провѣщава́етъ, съ ни́мже возопїи́мъ всѝ: ра́дꙋйсѧ мт҃и гдⷭ҇нѧ.

На хвали́техъ: Всѧ́кое дыха́нїе: Поста́вимъ стїхѡ́въ д҃: и҆ пое́мъ стїхи̑ры, гла́съ д҃. Подо́бенъ: Ꙗ҆́кѡ до́блѧ:

Сокрове́нное та́инство, и҆ а҆́гг҃лѡмъ невѣ́домое, гаврїи́лъ ᲂу҆вѣрѧ́етъ а҆рха́гг҃лъ, и҆ къ тебѣ̀ ны́нѣ прїи́детъ є҆ди́нѣй нетлѣ́ннѣй и҆ до́брѣй голꙋби́цѣ, и҆ ро́да на́шегѡ воззва́нїю, и҆ возопїе́тъ тебѣ̀ прест҃а́ѧ, є҆́же ра́дꙋйсѧ: ᲂу҆гото́висѧ сло́вомъ, бг҃а сло́ва, твои́ми ложесна́ми прїѧ́ти. Два́жды.

Свѣтоно́снаѧ пала́та ᲂу҆гото́васѧ тебѣ̀ влⷣко, ᲂу҆тро́ба чⷭ҇таѧ бг҃оѻтрокови́цы: грѧдѝ къ се́й и҆ сни́ди, ᲂу҆ще́дри созда́нїе твоѐ, зави́стнѡ бра́нь прїи́мшее, и҆ рабо́тою ᲂу҆держа́нное льсти́вагѡ, и҆ добро́тꙋ пе́рвꙋю погꙋби́вшее, и҆ твоегѡ̀ сп҃си́тельнагѡ ча́ющее соше́ствїѧ.

Гаврїи́лъ а҆рха́гг҃лъ, къ тебѣ̀ всенепоро́чнаѧ, ꙗ҆вле́ннѡ прїи́детъ, и҆ возопїе́тъ тебѣ̀: ра́дꙋйсѧ клѧ́твы разрѣше́нїе, па́дшихъ воста́нїе. ра́дꙋйсѧ, є҆ди́на и҆збра́ннаѧ бг҃ꙋ бы́вшаѧ. ра́дꙋйсѧ, колесни́це сл҃нца сла́вы: прїимѝ безпло́тнаго, во ᲂу҆тро́бѣ твое́й всели́тисѧ хотѧ́щаго.

Сла́ва, и҆ ны́нѣ, самогла́сенъ, гла́съ д҃:

Ѧ҆зы́ка, є҆гѡ́же не вѣ́дѧше, ᲂу҆слы́ша бцⷣа, глаго́лаше бо къ не́й а҆рха́гг҃лъ бл҃говѣ́щенїѧ глаго́лы: ѿню́дꙋже вѣ́рнѡ прїи́мши цѣлова́нїе, зача́тъ тѧ̀ превѣ́чнаго бг҃а. тѣ́мже и҆ мы̀ ра́дꙋющесѧ вопїе́мъ тѝ: и҆з̾ неѧ̀ воплоти́выйсѧ непрело́жнѡ бж҃е, ми́ръ мі́рови да́рꙋй, и҆ дꙋша́мъ на́шымъ ве́лїю млⷭ҇ть.

Славосло́вїе вели́кое и҆ ѿпꙋ́стъ.

На лїтꙋргі́и и҆з̾ѡбрази́тєльнаѧ. И҆ ѡ҆ канѡ́на а҆ка́ѳїста, пѣ́снь г҃ и҆ ѕ҃. Прокі́менъ, гла́съ г҃: Пѣ́снь бцⷣы: Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: се́ бо ѿ ны́нѣ ᲂу҆блажа́тъ мѧ̀ всѝ ро́ди. А҆пⷭ҇лъ днѐ ко є҆вре́ємъ, зача́ло тк҃в. И҆ бцⷣы, ѿ тогѡ́же посла́нїѧ, зача́ло т҃к. А҆ллилꙋ́їа, гла́съ и҃: Воскрⷭ҇нѝ гдⷭ҇и въ поко́й тво́й: Сті́хъ: Помѧнѝ гдⷭ҇и дв҃да, и҆ всю̀ кро́тость є҆гѡ̀. Є҆ѵⷢ҇лїе днѐ, ѿ ма́рка, зача́ло л҃є. И҆ бцⷣы, ѿ лꙋкѝ, зача́ло н҃д. Прича́стенъ: Ча́шꙋ сп҃се́нїѧ прїимꙋ̀, и҆ и҆́мѧ гдⷭ҇не призовꙋ̀.

На трапе́зѣ ꙗ҆ди́мъ два̀ варє́нїѧ съ є҆ле́емъ, и҆ пїе́мъ вїно̀, бл҃годарѧ́ще всест҃ꙋ́ю влⷣчцꙋ на́шꙋ бг҃ꙋ ѡ҆ бы́вшемъ ѿ неѧ̀ чꙋдесѝ.