Въ сре́дꙋ сре́днїѧ седми́цы ве́чера.

На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ настоѧ́щыѧ самогла́сны, и҆ мꙋ́чениченъ, и҆ въ мине́и д҃. Самогла́сенъ. Гла́съ д҃:

По́стъ бл҃ги́хъ хода́тай, своѐ преполове́нїе ны́нѣ введѐ, преше́дшими де́ньми бл҃гоꙋгоди́въ, и҆ про́чими по́льзованїе предложи́въ: и҆́бо бл҃ги́хъ напрѧже́нїе, мно́жайшее бл҃годѣѧ́нїе твори́тъ. тѣ́мже всѣ́хъ бл҃ги́хъ да́телю хрⷭ҇тꙋ̀ бл҃гоꙋгожда́юще, вопїе́мъ: пости́выйсѧ на́съ ра́ди, и҆ распѧ́тїе претерпѣ́вый, неѡсꙋжде́ны на́съ сподо́би, причасти́тисѧ и҆ бж҃е́ственныѧ па́схи твоеѧ̀, въ ми́рѣ пожи́вшыѧ, и҆ досто́йнѡ со ѻ҆ц҃е́мъ тебѐ и҆ дх҃омъ сла́вѧщыѧ.

И҆́нъ. Гла́съ є҃: Въ та́йнѣ добродѣ́тєли дѣ́лающїи, дх҃ѡ́внаѧ воздаѧ̑нїѧ ча́ющїи, не посредѣ̀ то́ржищъ и҆ распꙋ́тїй ꙗ҆влѧ́ютъ сїѧ̑, но внꙋ́трь се́рдца но́сѧтъ па́че: и҆ всѣ́хъ ви́дѧй быва́ємаѧ въ та́йнѣ, мздꙋ̀ воздержа́нїѧ подае́тъ на́мъ. по́стъ соверша́имъ, не сѣ́тꙋюще ли́цы, но въ клѣ́техъ дꙋ́шъ на́шихъ молѧ́щесѧ, непреста́ннѡ возопїи́мъ: ѻ҆́ч҃е на́шъ, и҆́же є҆сѝ на нб҃сѣ́хъ, не введѝ на́съ во и҆скꙋше́нїе, мо́лимсѧ, но и҆зба́ви на́съ ѿ лꙋка́вагѡ.

Мꙋ́чениченъ: Несы́тною любо́вїю дꙋшѝ, хрⷭ҇та̀ не ѿверго́стесѧ ст҃і́и мꙋ́чєницы, и҆̀же разли̑чныѧ ра̑ны страсте́й претерпѣ́вше, мꙋчи́телей де́рзость низложи́сте, непрекло́ннꙋ и҆ невреди́мꙋ вѣ́рꙋ сохра́нше, на нб҃са̀ преста́вистесѧ. тѣ́мже и҆ дерзнове́нїе полꙋчи́вше къ немꙋ̀, проси́те дарова́ти ми́ръ мі́рови, и҆ дꙋша́мъ на́шымъ ве́лїю млⷭ҇ть.

И҆́ны стїхи̑ры, гла́съ а҃.

Подо́бенъ: Прехва́льнїи мꙋ́чєницы:

Поста̀ водо́ю, дꙋ́шы всѝ ѡ҆мы́имъ, и҆ пристꙋпи́вше къ чⷭ҇тно́мꙋ и҆ животворѧ́щемꙋ крⷭ҇тꙋ̀ гдⷭ҇ню, вѣ́рою поклони́мсѧ, бж҃е́ственное просвѣще́нїе почерпа́юще, и҆ вѣ́чное сп҃се́нїе ны́нѣ прїѡбрѣта́юще, ми́ръ и҆ ве́лїю млⷭ҇ть.

А҆пⷭ҇лѡвъ похвало̀ крⷭ҇те, є҆го́же ѡ҆крꙋжа́ютъ нача̑ла, си̑лы, а҆рха́гг҃ли, покланѧ́ющыѧсѧ тебѣ̀ ѿ всѧ́кагѡ вре́да спаса́й, и҆ бж҃е́ственное по́прище воздержа́нїѧ на́съ сподо́би до́брѣ соверша́ющыѧ, де́нь сп҃си́тельный дости́гнꙋти, и҆́мже и҆ сп҃са́емсѧ.

И҆́нъ подо́бенъ, гла́съ з҃: Дне́сь бди́тъ:

Дне́сь крⷭ҇тꙋ̀ гдⷭ҇ню покланѧ́ющесѧ возопїи́мъ: ра́дꙋйсѧ дре́во жи́зни, а҆́да разори́телю. ра́дꙋйсѧ ра́досте мі́ра, и҆ тлѣ́нїѧ потреби́телю. ра́дꙋйсѧ, бѣ́сы прогонѧ́ѧй си́лою твое́ю, вѣ́рныхъ ᲂу҆твержде́нїе, ѻ҆рꙋ́жїе нерꙋши́мое, ѡ҆блобыза́ющыѧ тѧ̀ соблюдѝ, ѡ҆свѧтѝ, мо́лимсѧ.

И҆ мине́и д҃. Сла́ва, и҆ ны́нѣ, самогла́сенъ, гла́съ и҃:

Дне́сь неприкоснове́нный сꙋщество́мъ, прикоснове́нъ мнѣ̀ быва́етъ, и҆ стра́ждетъ стрⷭ҇ти, свобожда́ѧй мѧ̀ ѿ страсте́й, свѣ́тъ подава́ѧй слѣпы̑мъ, ѿ беззако́нныхъ ᲂу҆сте́нъ ѡ҆плева́етсѧ, и҆ дае́тъ плещы̀ за плѣнє́нныѧ на ра̑ны. сего̀ чⷭ҇таѧ дв҃а и҆ мт҃и на крⷭ҇тѣ̀ зрѧ́щи, болѣ́зненнѡ вѣща́ше: ᲂу҆вы̀ мнѣ̀ ча́до моѐ, что̀ сїѐ сотвори́лъ є҆сѝ; кра́сный добро́тою па́че всѣ́хъ человѣ̑къ, бездыха́нный, беззра́чный ꙗ҆влѧ́ешисѧ, не и҆мѣ́ѧ ви́да, нижѐ добро́ты: ᲂу҆вы̀ мнѣ̀ мо́й свѣ́те, не могꙋ̀ спѧ́ща зрѣ́ти тѧ̀, ᲂу҆тро́бою ᲂу҆ѧзвлѧ́юсѧ, и҆ лю́тое ѻ҆рꙋ́жїе се́рдце моѐ прохо́дитъ. воспѣва́ю твоѧ̑ стрⷭ҇ти, покланѧ́юсѧ бл҃гоꙋтро́бїю твоемꙋ̀: долготерпѣли́ве сла́ва тебѣ̀.

Вхо́дъ. Свѣ́те ти́хїй:

Прокі́менъ, ѱало́мъ ѻ҃а, гла́съ д҃: Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ. Сті́хъ: Бж҃е, сꙋ́дъ тво́й цр҃е́ви да́ждь, и҆ пра́вдꙋ твою̀ сн҃ꙋ цр҃е́вꙋ.

Бытїѧ̀ чте́нїе. [Глава̀ ѳ҃, ст. и҃і-к҃д, глава̀ і҃, ст. а҃.]

Бы́ша сы́нове нѡ́євы и҆зше́дшїи и҆з̾ ковче́га, си́мъ, ха́мъ, і҆а́феѳъ: ха́мъ же бѧ́ше ѻ҆те́цъ ханаа́нь. Трїѐ сі́и сꙋ́ть сы́нове нѡ́євы, ѿ си́хъ разсѣ́ѧшасѧ по все́й землѝ. И҆ нача́тъ нѡ́е человѣ́къ дѣ́латель [бы́ти] землѝ, и҆ насадѝ вїногра́дъ: И҆ и҆спѝ ѿ вїна̀, и҆ ᲂу҆пи́сѧ, и҆ ѡ҆бнажи́сѧ въ домꙋ̀ свое́мъ. И҆ ви́дѣ ха́мъ ѻ҆те́цъ ханаа́нь, наготꙋ̀ ѻ҆тца̀ своегѡ̀, и҆ и҆зше́дъ во́нъ повѣ́да ѻ҆бѣ́ма бра́тома свои́ма. И҆ взе́мше си́мъ и҆ і҆а́феѳъ ри́зꙋ, возложи́ша [ю҆̀] на ѻ҆́бѣ ра́мѣ своѝ, и҆ и҆до́ша вспѧ́ть зрѧ́ще, и҆ покры́ша наготꙋ̀ ѻ҆тца̀ своегѡ̀, и҆ лицѐ и҆́хъ вспѧ́ть зрѧ̀, и҆ наготы̀ ѻ҆тца̀ своегѡ̀ не ви́дѣша. И҆стрезви́сѧ же нѡ́е ѿ вїна̀, и҆ разꙋмѣ̀ є҆ли̑ка сотворѝ є҆мꙋ̀ сы́нъ є҆гѡ̀ ю҆нѣ́йшїй. И҆ речѐ: про́клѧтъ [бꙋ́ди] ханаа́нъ ѻ҆́трокъ: ра́бъ бꙋ́детъ бра́тїѧмъ свои̑мъ. И҆ речѐ: бл҃гослове́нъ гдⷭ҇ь бг҃ъ си́мовъ: и҆ бꙋ́детъ ханаа́нъ ѻ҆́трокъ ра́бъ є҆мꙋ̀. Да распространи́тъ бг҃ъ і҆а́феѳа, и҆ да всели́тсѧ въ селе́нїихъ си́мовыхъ, и҆ да бꙋ́детъ ханаа́нъ ра́бъ є҆мꙋ̀. Поживе́ же нѡ́е по пото́пѣ лѣ́тъ три́ста пѧтьдесѧ́тъ: И҆ бы́ша всѝ дні́е нѡ́євы, лѣ́тъ де́вѧть сѡ́тъ пѧтьдесѧ́тъ, и҆ ᲂу҆́мре. Сїѧ̑ же [сꙋ́ть] бытїѧ̑ сынѡ́въ нѡ́евыхъ, си́ма, ха́ма, і҆а́феѳа: и҆ роди́шасѧ и҆̀мъ сы́нове по пото́пѣ.

Прокі́менъ, ѱало́мъ ѻ҃в, гла́съ д҃: Мнѣ́ же прилѣплѧ́тисѧ бг҃ови бла́го є҆́сть. Сті́хъ: Ко́ль бл҃гъ бг҃ъ і҆и҃левъ:

При́тчей чте́нїе. [Глава̀ в҃і, ст. к҃г-к҃и, глава̀ г҃і, ст. а҃-ѳ҃.]

Мꙋ́жъ разꙋми́вый престо́лъ чꙋ́вствїѧ: се́рдце же безꙋ́мныхъ срѧ́щетъ клѧ̑твы. Рꙋка̀ и҆збра́нныхъ ѡ҆держи́тъ ᲂу҆до́бь: льсти́вїи же бꙋ́дꙋтъ въ плѣне́нїи. Стра́шное сло́во се́рдце мꙋ́жа пра́ведна смꙋща́етъ: вѣ́сть же бл҃га́ѧ весели́тъ є҆го̀. Разꙋми́въ првⷣникъ себѣ̀ дрꙋ́гъ бꙋ́детъ: мы̑сли же нечести́выхъ некро́тки: согрѣша́ющихъ пости́гнꙋтъ ѕла̑ѧ: пꙋ́ть же нечести́выхъ прельсти́тъ ѧ҆̀. Не ᲂу҆лꙋчи́тъ льсти́вый лови́твы: стѧжа́нїе же честно́е мꙋ́жъ чи́стый. Въ пꙋте́хъ пра́вды живо́тъ: пꙋтїе́ же ѕлопо́мнѧщихъ въ сме́рть. Сы́нъ бл҃горазꙋ́мный послꙋшли́въ ѻ҆тцꙋ̀: сы́нъ же непокорли́вый въ поги́бель. Ѿ плодѡ́въ пра́вды снѣ́сть бл҃гі́й: дꙋ́шы же беззако́нныхъ погиба́ютъ безвре́меннѡ. И҆́же храни́тъ своѧ̑ ᲂу҆ста̀, соблюда́етъ свою̀ дꙋ́шꙋ: проде́рзивый же ᲂу҆стна́ма, ᲂу҆страши́тъ себѐ. Въ по́хотехъ є҆́сть всѧ́къ пра́здный: рꙋ́ки же мꙋ́жественныхъ въ прилѣжа́нїи. Словесѐ непра́ведна ненави́дитъ пра́ведникъ: нечести́вый же стыди́тсѧ, и҆ не воз̾имѣ́етъ дерзнове́нїѧ. Пра́вда храни́тъ неѕлѡ́бивыѧ: нечести̑выѧ же ѕлы̀ твори́тъ грѣ́хъ. Сꙋ́ть богатѧ́ще себѐ, ничесо́же и҆мꙋ́ще: и҆ сꙋ́ть смирѧ́ющесѧ во мно́зѣ бога́тствѣ. И҆збавле́нїе мꙋ́жа дꙋшѝ своѐ є҆мꙋ̀ бога́тство: ни́щїй же не терпи́тъ преще́нїѧ. Свѣ́тъ пра́вєднымъ всегда̀: свѣ́тъ же нечести́выхъ ᲂу҆гаса́етъ, дꙋ́шы льсти̑выѧ заблꙋжда́ютъ во грѣсѣ́хъ: пра́веднїи же ще́дрѧтъ и҆ ми́лꙋютъ.

И҆ про́чее послѣ́дованїе преждеѡсщ҃е́нныхъ.

Ѿ сегѡ́ же днѐ начина́етъ свѧще́нникъ, [и҆лѝ дїа́конъ, а҆́ще є҆́сть] двосꙋгꙋ̑баѧ є҆ли́кѡ ѡ҆глашє́нїѧ просвѣща́емыхъ и҆ моли́твꙋ. глаго́лютсѧ же да́же до среды̀ вели́кїѧ, кромѣ̀ сꙋббѡ́тъ и҆ недѣ́ль.