Въ сре́дꙋ сре́днїѧ седми́цы на ᲂу҆́трени,
трⷪ҇чны гла́са. По а҃-мъ стїхосло́вїи сѣда́льны крⷭ҇тны ѻ҆смогла́сника. По в҃-мъ же стїхосло́вїи глаго́лемъ настоѧ́щїй сѣда́ленъ господи́на і҆ѡ́сифа. Гла́съ ѕ҃. Подо́бенъ: Оу҆пова́нїе мі́ра:
Воздержа́нїѧ вре́мѧ, ѡ҆сщ҃а́ющїй бж҃е́ственный и҆ всечⷭ҇тны́й крⷭ҇тъ въ поклоне́нїе лежи́тъ, пристꙋ́пимъ со́вѣстїю чи́стою, почерпе́мъ ѡ҆сщ҃е́нїе, и҆ просвѣще́нїе, и҆ со стра́хомъ возопїи́мъ: чл҃вѣколю́бче сп҃се на́шъ, сла́ва бл҃гоꙋтро́бїю твоемꙋ̀. [Два́жды.]
Крⷭ҇тобг҃оро́диченъ. Подо́бенъ:
Предстоѧ́щи крⷭ҇тꙋ̀ неискꙋсобра́чнаѧ мт҃и, ѿ неѧ̀ безсѣ́меннѡ ро́ждшагѡсѧ, взыва́ше: ме́чь се́рдце моѐ про́йде, ѽ сн҃е! не терпѧ́щи повѣ́шена на дре́вѣ тѧ̀ зрѣ́ти, є҆гѡ́же трепе́щꙋтъ всѧ́чєскаѧ, ꙗ҆́кѡ созда́телѧ и҆ бг҃а, долготерпѣли́ве, сла́ва тебѣ̀.
По г҃-мъ стїхосло́вїи сѣда́ленъ, господи́на ѳео́дѡра. Гла́съ а҃.
Подо́бенъ: Ѿча́ѧннаѧ:
Просвѣти́вшесѧ добродѣ́тельми, пристꙋ́пимъ воздержа́нїѧ чистотꙋ̀ стѧжа́вше, и҆ крⷭ҇тꙋ̀ честно́мꙋ вопїю́ще поклони́мсѧ: ѡ҆ст҃ѝ на́шѧ дꙋ́шы и҆ тѣлеса̀, сподо́би на́съ и҆ пречⷭ҇тѣй стрⷭ҇ти твое́й поклони́тисѧ, є҆ди́не бж҃е всѣ́хъ, да́рꙋй на́мъ и҆ млⷭ҇ти твоѧ̑. [Два́жды.]
Крⷭ҇тобг҃оро́диченъ, гла́съ то́йже.
Подо́бенъ: Гро́бъ тво́й:
Зрѧ́щи тѧ̀ хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й собезнача́льне ѻ҆ц҃ꙋ̀ и҆ дх҃ови, ко́е неизрече́нное смотре́нїе твоѐ сїѐ, и҆́мже сп҃слъ є҆сѝ пречⷭ҇тыхъ рꙋ́къ твои́хъ ще́дре созда́нїе;
Канѡ́нъ крⷭ҇та̀, є҆гѡ́же краестро́чїе: Всечⷭ҇тно́мꙋ поклони́мсѧ дре́вꙋ. Творе́нїе господи́на ѳеофа́на. Гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̀:
Дре́вꙋ ст҃о́мꙋ, на не́мже хрⷭ҇то́съ прострѐ дла̑ни, побѣжда́ѧй сопроти̑внаѧ нача̑ла, поклони́мсѧ, посто́мъ ѡ҆чи́стившесѧ, въ хвалꙋ̀ и҆ сла́вꙋ вседержи́телѧ.
Ви́дитсѧ предлежи́мь, ѡ҆сщ҃е́нїе подава́ѧй, крⷭ҇тъ сп҃си́тельный, къ семꙋ̀ пристꙋ́пимъ, ѡ҆чи́стивше и҆ тѣ́ло и҆ се́рдце, и҆ почерпе́мъ бл҃года́ть сп҃си́тельнꙋю.
Ѻ҆гне́мъ мѧ̀ ѡ҆чи́сти за́повѣдей твои́хъ, чл҃вѣколю́бче, и҆ твоѧ̑ сп҃си́тєльнаѧ пода́ждь мѝ стрⷭ҇ти ны́нѣ ви́дѣти, и҆ любо́вїю поклони́тисѧ, крⷭ҇то́мъ ѡ҆гражда́емꙋ, и҆ соблюда́емꙋ.
Бг҃оро́диченъ: Вознесе́нїе ви́дѧщи на крⷭ҇тѣ̀ твоѐ человѣколю́бче, рыда́ше зовꙋ́щи тѧ̀ ро́ждшаѧ: ка́кѡ ѡ҆сꙋжде́нъ, хотѧ́й всѣ̑мъ сꙋди́ти, ви́дитсѧ висѧ́й сла́вы гдⷭ҇ь;
Пѣ́снь г҃.
І҆рмо́съ: Твоѧ̑ пѣсносло́вцы:
Поста̀ водо́ю сердца̀ ѡ҆чи́стивше, дре́во крⷭ҇тное вѣ́рнѡ ѡ҆б̾и́мемъ, на не́мже хрⷭ҇то́съ ви́сѧ, во́дꙋ на́мъ ѡ҆ставле́нїѧ ꙗ҆́кѡ бл҃годѣ́тель и҆сточѝ.
Крⷭ҇тнымъ вѣ́триломъ ѡ҆крили́вшесѧ, кора́бль сп҃си́тельный сѐ поста̀ преполови́вше, мессі́а і҆и҃се бж҃е, и҆́мже на́съ стрⷭ҇ти твоеѧ̀ къ приста́нищꙋ ѡ҆кормѝ.
Ѡ҆бразова́ше мѡѷсе́й тѧ̀ на горѣ̀ врагѡ́въ на ᲂу҆бїе́нїе, крⷭ҇те: мы́ же воѡбража́емъ тѧ̀ се́рдцемъ, и҆ зрѧ́ще тѧ̀, и҆ покланѧ́ющесѧ, побѣжда́емъ врагѝ безплѡ́тныѧ си́лою твое́ю.
Бг҃оро́диченъ: Хотѣ́нїемъ твои́мъ человѣ́къ бы́лъ є҆сѝ, бг҃ъ сы́й, и҆ всѣ́хъ творе́цъ: и҆ ны́нѣ на крⷭ҇тѣ́ тѧ ви́сима зрю̀, сн҃е мо́й, хрⷭ҇тѐ, тѧ̀ ро́ждшаѧ глаго́лаше, и҆ се́рдцемъ ᲂу҆ѧзвлѧ́юсѧ.
Трипѣ́снецъ, гла́съ ѕ҃:
Пѣ́снь г҃.
І҆рмо́съ: Гдⷭ҇ь сы́й всѣ́хъ:
Гдⷭ҇ь сы́й всѣ́хъ, и҆ зижди́тель бг҃ъ, посредѣ̀ землѝ на крⷭ҇тѣ̀ возне́слсѧ є҆сѝ, къ себѣ̀ возносѧ̀ человѣ́ческое сꙋщество̀, па́дшее ѕлы́мъ врага̀ совѣ́томъ. тѣ́мже тѧ̀ вѣ́рнѡ сла́вимъ, стрⷭ҇тїю твое́ю ᲂу҆твержда́еми.
Ѡ҆чи́стивше чꙋ̑вства поще́нїѧ свѣ́томъ, крⷭ҇та̀ мы́сленными лꙋча́ми, бога́тнѡ вѣ́рнїи ѡ҆зари́мсѧ, и҆ се́й бл҃гоговѣ́йнѡ предлежа́щїй дне́сь зрѧ́ще, ᲂу҆стна́ми чи́стыми, и҆ ᲂу҆сты̀ и҆ се́рдцемъ цѣлꙋ́емъ.
Мѣ́стꙋ, на не́мже стоѧ́стѣ но́зѣ хрⷭ҇тѡ́вы, поклони́мсѧ бж҃е́ственномꙋ крⷭ҇тꙋ̀, на ка́мени бж҃їихъ за́повѣдей ᲂу҆тверди́тисѧ нога́мъ просѧ́ще дꙋшѝ на́шеѧ, напра́витисѧ сеѧ̀ стопа́мъ на пꙋ́ть ми́рный, бж҃е́ственною бл҃года́тїю.
Бг҃оро́диченъ: И҆з̾ ѻ҆трокови́цы безмꙋ́жныѧ проше́лъ є҆сѝ хрⷭ҇тѐ, прїи́мъ ѿ сеѧ̀ пло́ть мы́сленнꙋю и҆ ѡ҆дꙋшевле́ннꙋю, и҆ крⷭ҇то́мъ твои́мъ врага̀ потреби́въ, и҆стлѣ́вшее человѣ́ческое сꙋщество̀ па́ки ѡ҆бнови́лъ є҆сѝ: тѣ́мже сла́вимъ бл҃гоꙋтро́бїе твоѐ.
И҆́ный. Гла́съ а҃.
І҆рмо́съ: Оу҆твердѝ гдⷭ҇и:
Восплещи́те всѝ концы̀ пѣ́сньми, зрѧ́ще покланѧ́емое дре́во, на не́мже хрⷭ҇то́съ повѣ́шенъ бы́сть, и҆ дїа́волъ ᲂу҆ѧзви́сѧ.
Предлага́етсѧ дне́сь живоно́снаѧ ра́дость, прїиди́те всѝ поклони́мсѧ со стра́хомъ хрⷭ҇то́вꙋ чⷭ҇тно́мꙋ крⷭ҇тꙋ̀, да прїи́мемъ дх҃а ст҃а́го.
Трⷪ҇ченъ: Трилꙋ́чное со́лнце, трисїѧ́нный свѣ́те, бж҃е ѻ҆́ч҃е, сн҃е, и҆ ст҃ы́й дш҃е, безнача́льное є҆стество̀, и҆ сла́во, пою́щыѧ тѧ̀ и҆зба́ви ѿ бѣ́дъ.
Бг҃оро́диченъ: Пою́тъ тѧ̀ чи́ни а҆́гг҃льстїи, бл҃гослове́ннаѧ бцⷣе всепѣ́таѧ и҆ дв҃о, съ ни́миже ны́нѣ тѧ̀ ро́дъ человѣ́ческїй, ꙗ҆́кѡ безневѣ́стнꙋю славосло́витъ.
Сла́ва тебѣ̀ бж҃е на́шъ сла́ва тебѣ̀.
Грѧды́й прикоснꙋ́тисѧ тебѣ̀ живоно́сный крⷭ҇те, ᲂу҆жаса́юсѧ ѧ҆зы́комъ и҆ мы́слїю, прови́дѧ, ꙗ҆́кѡ на тебѣ̀ и҆злїѧ́сѧ гдⷭ҇а моегѡ̀ бж҃е́ственнаѧ кро́вь.
І҆рмо́съ: Оу҆твердѝ гдⷭ҇и цр҃ковь твою̀, ю҆́же стѧжа́лъ є҆сѝ си́лою крⷭ҇та̀ твоегѡ̀, и҆́мже врага̀ побѣди́лъ є҆сѝ, и҆ просвѣти́лъ є҆сѝ вселе́ннꙋю.
Сѣда́льны, гла́съ ѕ҃. Самогла́сны:
Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ гдⷭ҇и, и҆ дре́ва сп҃се́нїѧ вкꙋси́вше, грѣхо́вныхъ страсте́й свобо́дꙋ ᲂу҆лꙋчи́хомъ, мл҃твами бцⷣы, є҆ди́не чл҃вѣколю́бче.
Сла́ва: Крⷭ҇тъ тво́й гдⷭ҇и ѡ҆ст҃и́сѧ, въ не́мъ бо быва́ютъ и҆сцѣлє́нїѧ болѧ́щымъ во грѣсѣ́хъ: и҆́мже тебѣ̀ припа́даемъ, поми́лꙋй на́съ.
И҆ ны́нѣ: То́кмѡ водрꙋзи́сѧ дре́во хрⷭ҇тѐ крⷭ҇та̀ твоегѡ̀, ѡ҆снова̑нїѧ поколеба́шасѧ сме́рти гдⷭ҇и: є҆го́же бо поглотѝ жела́нїемъ а҆́дъ, ѿпꙋстѝ тре́петомъ. ꙗ҆ви́лъ є҆сѝ на́мъ сп҃се́нїе твоѐ ст҃ы́й, и҆ славосло́вимъ тѧ̀ сн҃е бж҃їй, поми́лꙋй на́съ.
Пѣ́снь д҃.
І҆рмо́съ: Сѣдѧ́й въ сла́вѣ:
Воѡбража́ѧ зна́менїе крⷭ҇та̀, рꙋ́цѣ простира́ше премѣне́нїемъ, внꙋ́чата дре́вле і҆а́кѡвъ сла́вный бл҃гословлѧ́ѧ, и҆ зна́менꙋѧ сп҃си́тельное бл҃гослове́нїе, на всѣ́хъ на́съ приходѧ́щее.
Соблюда́еми печа́тїю крⷭ҇та̀, и҆ предлежа́ща съ ра́достїю дх҃а того̀ цѣлꙋ́юще, къ сп҃си́тєльнымъ стрⷭ҇те́мъ и҆́демъ, гꙋби́тєльныѧ стра̑сти плотскі̑ѧ ᲂу҆мертви́вше.
Сп҃си́тельное тѧ̀ ѻ҆рꙋ́жїе, непобѣди́мꙋю побѣ́дꙋ, ра́дости зна́менїе, и҆́мже сме́рть ᲂу҆мертви́сѧ, ѡ҆б̾и́мемъ, сла́вою ᲂу҆краша́ющесѧ на тебѣ̀ пригво́ждшагѡсѧ, крⷭ҇те всечⷭ҇тны́й.
Бг҃оро́диченъ: Ви́димый мно́ю, ви́димь бы́лъ є҆сѝ а҆́гг҃лѡмъ непристꙋ́пный, і҆и҃се сн҃е мо́й, пло́ть ѿ менѐ заимова́вый: и҆ ны́нѣ зрѧ́щи тѧ̀ на дре́вѣ пригвожде́на, рыда́ю, хрⷭ҇то́ва мт҃и глаго́лаше.
Пѣ́снь є҃.
І҆рмо́съ: Оу҆жасо́шасѧ:
Ме́ртвъ бы́лъ є҆сѝ на крⷭ҇тѣ̀ пригвожда́емь, всѣ̑мъ сы́й жи́знь и҆ сп҃се́нїе: сего̀ ᲂу҆́бѡ да́рꙋй, ѡ҆чище́нною дꙋше́ю сп҃се, на́мъ ѡ҆б̾ѧ́ти, и҆ твоѧ̑ стрⷭ҇ти сп҃си́тєльныѧ ви́дѣти ра́дꙋющымсѧ.
Предстоѧ́тъ чи́нове тебѣ̀ безпло́тныхъ трепе́щꙋще, дре́во животода́тельное: на тебѣ́ бо честнꙋ́ю кро́вь свою̀ хрⷭ҇то́съ и҆злїѧ̀, лꙋчꙋ̀ и҆спꙋща́ѧ и҆здале́ча, бѣсѡ́мъ носѧ̀ па́гꙋбꙋ безконе́чнꙋю.
Ѻ҆рꙋ́жїемъ ᲂу҆ѧ́звеннаго вра́жїимъ, и҆сцѣли́ мѧ кро́вїю твое́ю сло́ве, и҆ копїе́мъ, грѣхѡ́въ мои́хъ вско́рѣ раздерѝ сп҃се рꙋкописа́нїе, вопїю́ ти, въ кни̑ги написꙋ́ѧ мѧ̀ сп҃се́нныхъ, ꙗ҆́кѡ бл҃гоꙋтро́бенъ.
Бг҃оро́диченъ: Гро́здъ зрѣ́лый, ка́кѡ на дре́вѣ ѡ҆бѣ́силсѧ є҆сѝ; со́лнце сла́вы, ка́кѡ взѧ́лсѧ є҆сѝ, сїѧ́нїе со́лнца ѡ҆мрача́ѧ сп҃се стрⷭ҇тїю твое́ю; ро́ждшаѧ тѧ̀ а҆́гница, дре́вле вопїѧ́ше тѝ, мт҃рски восклица́ющи.
Пѣ́снь ѕ҃.
І҆рмо́съ: Возопѝ проѡбразꙋ́ѧ:
Стрѧ́слъ є҆сѝ водрꙋже́нный а҆́дово жили́ще, вѣ̑рнымъ же непоколеби́мое ᲂу҆твержде́нїе бы́лъ є҆сѝ, и҆звѣ́стный покро́въ, гдⷭ҇нь крⷭ҇те всечⷭ҇тны́й.
Плодоно́сни добродѣ́тельми бы́вше, ѡ҆б̾и́мемъ бж҃е́ственнагѡ дре́ва живонѡ́сныѧ плоды̀, ꙗ҆̀же прозѧбѐ, простры́йсѧ на се́мъ і҆и҃съ, плодови́таѧ лоза̀.
Пое́мъ твою̀ і҆и҃се мно́гꙋю бл҃гость, покланѧ́ющесѧ крⷭ҇тꙋ̀ твоемꙋ̀, копїю̀, тро́сти: тѣ́ми бо разрꙋши́лъ є҆сѝ вражды̀ ще́дре средогра́дїе.
Бг҃оро́диченъ: Во́дъ тѧ̀ рѣкꙋ̀ живото́чныхъ родѝ всечⷭ҇таѧ, ꙗ҆́кѡ и҆сто́чника на́шегѡ ѡ҆бновле́нїѧ, на крⷭ҇тѣ̀ просте́ршагосѧ, и҆ ка̑пли сп҃се́нїѧ и҆сточи́вшаго.
І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Конда́къ, гла́съ з҃. Самогла́сенъ:
Не ктомꙋ̀ пла́менное ѡ҆рꙋ́жїе храни́тъ вра́тъ є҆де́мскихъ, на ты̑ѧ бо на́йде пресла́вный соꙋ́зъ, дре́во крⷭ҇тное: сме́ртное жа́ло, и҆ а҆́дова побѣ́да прогна́сѧ. предста́лъ бо є҆сѝ сп҃се мо́й, вопїѧ̀ сꙋ́щымъ во а҆́дѣ: вни́дите па́ки въ ра́й.
І҆́косъ: Трѝ крⷭ҇ты̀ водрꙋзѝ на голго́ѳѣ пїла́тъ, два̀ разбо́йникѡвъ, и҆ є҆ди́нъ жизнода́вца, є҆го́же ви́дѣ а҆́дъ, и҆ речѐ сꙋ́щымъ до́лѣ: ѽ слꙋги̑ моѝ, и҆ си̑лы моѧ̑! кто̀ водрꙋзи́въ гво́здїе въ се́рдце моѐ, древѧны́мъ мѧ̀ копїе́мъ внеза́пꙋ прободѐ; и҆ растерза́юсѧ, внꙋ́тренними мои́ми болю̀, ᲂу҆тро́бою ᲂу҆ѧзвлѧ́юсѧ, чꙋ̑вства моѧ̑ смꙋща́ютъ дꙋ́хъ мо́й, и҆ понꙋжда́юсѧ и҆зрыга́ти а҆да́ма, и҆ сꙋ́щыѧ ѿ а҆да́ма, дре́вомъ да̑нныѧ мѝ: дре́во бо сїѧ̑ вво́дитъ па́ки въ ра́й.
Пѣ́снь з҃.
І҆рмо́съ: Не послꙋжи́ша тва́ри:
Сѣки́ра, ю҆́же є҆лїссе́й взѧ̀ ѿ і҆ѻрда́на хрⷭ҇тѐ, крⷭ҇тъ ꙗ҆влѧ́ше, и҆́мже и҆з̾ глꙋбины̀ сꙋ́етїѧ ꙗ҆зы́ки и҆звле́клъ є҆сѝ, воспѣва́ющыѧ: ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Ра́дꙋютсѧ со земны́ми нбⷭ҇наѧ, поклоне́нїю твоемꙋ̀ крⷭ҇те: тобо́ю бо а҆́гг҃лѡмъ и҆ человѣ́кѡмъ соедине́нїе бы́сть всеси́льне, вопїю́щымъ: гдⷭ҇и бж҃е бл҃гослове́нъ є҆сѝ.
Ꙗ҆́кѡ кѷпари́съ милосе́рдїе, ꙗ҆́кѡ ке́дръ же вѣ́рꙋ бл҃гово́ннꙋю, ꙗ҆́кѡ пе́ѵкъ и҆́стиннꙋю любо́вь приносѧ́ще, гдⷭ҇ню крⷭ҇тꙋ̀ поклони́мсѧ, на не́мъ сла́вѧще и҆зба́вителѧ пригвозди́вшагосѧ.
Бг҃оро́диченъ: Не поколеба́въ нбⷭ҇наѧ, во ᲂу҆тро́бꙋ твою̀ бг҃ъ всели́сѧ, гра́де бж҃їй и҆збра́нный: на крⷭ҇тѣ́ же ви́сѧ, тва́рь поколеба̀. є҆го́же молѝ, на недви́жимомъ ка́мени є҆гѡ̀ мнѣ̀ соблюсти́сѧ.
Пѣ́снь и҃.
І҆рмо́съ: Ѻ҆́троки бл҃гочести̑выѧ:
Просте́рлъ є҆сѝ рꙋ́цѣ на дре́вѣ, рꙋкѝ неꙋдержи́мыѧ разрѣша́ѧ грѣ́хъ: копїе́мъ же пробо́дсѧ є҆сѝ, си́мъ борца̀ ᲂу҆ѧзвлѧ́ѧ гдⷭ҇и: же́лчи же вкꙋси́лъ є҆сѝ, сла́стнꙋю ѕло́бꙋ и҆з̾има́ѧ, ѻ҆́цтомъ напои́лсѧ є҆сѝ, всѣ́хъ весе́лїе.
Оу҆мо́мъ чи́стымъ и҆ со́вѣстїю свѣ́тлѡ пристꙋпи́вше поклони́мсѧ, предлежи́тъ честно́е дре́во и҆ ст҃о́е, и҆́мже хрⷭ҇то́съ безче́стнꙋю под̾ѧ́тъ сме́рть, че́сть наложи́въ высоча́йшꙋю, престꙋпле́нїемъ лю́тѣ ѡ҆безче́стившымсѧ.
Дре́вомъ грѣха̀ ᲂу҆мертви́хсѧ, и҆ вкꙋше́нїемъ сла́стнымъ погребо́хсѧ, ѡ҆живи́ мѧ гдⷭ҇и, воздви́гни мѧ̀ лежа́щаго, покло́нника ꙗ҆вѝ стрⷭ҇те́й твои́хъ, и҆ прича́стника воста́нїѧ бж҃е́ственнагѡ, и҆ наслѣ́дника возлюби́вшихъ тѧ̀.
Бг҃оро́диченъ: Вознесе́на тѧ̀ ви́дѧщи, ни добро́ты въ стрⷭ҇ти, ни ви́да и҆мꙋ́ща, є҆го́же воплоще́нна разꙋмѣ́хъ, краснѣ́йша па́че сынѡ́въ человѣ́ческихъ, тѧ̀ є҆диноро́дный сн҃е, всечⷭ҇таѧ вопїѧ́ше дв҃а: покажѝ твою̀ сла́вꙋ, всѣ́хъ сп҃се́нїе.
И҆́ный. І҆рмо́съ: За зако́ны ѻ҆те́чєскїѧ:
Въ полꙋ́дни распе́ншꙋсѧ тебѣ̀ посредѣ̀ землѝ во́лею, мїрскі̑ѧ концы̀ и҆з̾ среды̀ горта́ни ѕмі́евы и҆сто́рглъ є҆сѝ ще́дре. тѣ́мже въ сре́днюю седми́цꙋ бж҃е́ственныхъ постѡ́въ, покланѧ́ющесѧ сла́вимъ чⷭ҇тны́й крⷭ҇тъ тво́й, гдⷭ҇а по́йте, вопїю́ще, и҆ превозноси́те во вѣ́ки.
Ра́дости зна́менїе, ѻ҆рꙋ́жїе нерꙋши́мое, цр҃кве стѣно̀, мч҃нкѡвъ похвало̀, а҆пⷭ҇лѡвъ ᲂу҆краше́нїе, а҆рхїере́євъ ᲂу҆твержде́нїе, ᲂу҆крѣпи́въ и҆знемо́гшꙋю мою̀ дꙋ́шꙋ, поклони́тисѧ сподо́би, и҆ пѣ́ти тебѣ̀ вопїю́ща: гдⷭ҇а по́йте дѣла̀ и҆ превозноси́те во всѧ̑ вѣ́ки.
Рыда́ю и҆ пла́чꙋ, є҆гда̀ во ᲂу҆мѣ̀ мое́мъ прїимꙋ̀ сꙋди́ще неꙋмы́тное, долготерпѣли́ве, ѡ҆сꙋжде́нъ сы́й. тѣ́мже пощади́ мѧ, и҆ ѡ҆тѧгче́нное бре́мѧ дꙋшѝ моеѧ̀ ѡ҆блегчѝ, да ра́дꙋѧсѧ зовꙋ̀: гдⷭ҇а по́йте дѣла̀, и҆ превозноси́те во всѧ̑ вѣ́ки.
Бг҃оро́диченъ: Ѡ҆бразова́ше кꙋпина̀ та́йнꙋ, па́че ᲂу҆ма̀ твоегѡ̀ рождества̀, дв҃о всенепоро́чнаѧ: ꙗ҆́коже бо ѻ҆на̀, пребыла̀ є҆сѝ, неѡпа́льнѡ ѻ҆́гнь ро́ждшаѧ хрⷭ҇та̀ сп҃са, возне́сшагосѧ на крⷭ҇тъ. є҆го́же молѝ, и҆зба́вити мѧ̀ ѻ҆гнѧ̀ вѣ́чнагѡ, вопїю́ща: гдⷭ҇а воспѣва́йте дѣла̀, и҆ превозноси́те во всѧ̑ вѣ́ки.
И҆́ный. І҆рмо́съ: Се́й нарече́нный и҆ ст҃ы́й де́нь:
Прїиди́те, крⷭ҇тъ предлежа́щїй гдⷭ҇нь, посто́мъ ѡ҆чи́стившесѧ, ѡ҆блобыза́имъ любо́вїю: сокро́вище бо на́мъ свѧще́нїѧ є҆́сть и҆ си́лы. тѣ́мже пое́мъ є҆го̀ во вѣ́ки.
Се́й крⷭ҇тъ трича́стный и҆ вели́кїй, малови́димь сы́й, небе́съ ши́ршїй є҆́сть си́лою свое́ю, человѣ́ки къ бг҃ꙋ возво́дитъ при́снѡ: и҆́мже бл҃гослови́мъ хрⷭ҇та̀ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Є҆ди́но въ тре́хъ начерта́нїихъ сꙋщество̀ сла́вѧ, не слива́ю є҆диноли́чнѡ тре́хъ, нижѐ пресѣца́ю зра́ка, ѻ҆ц҃а̀, и҆ сн҃а, со дх҃омъ: є҆ди́нъ бо над̾ всѣ́ми бг҃ъ въ трⷪ҇цѣ.
И҆ ны́нѣ: Є҆ди́на въ ма́терехъ показа́ласѧ є҆сѝ, дв҃о бг҃оневѣ́сто мр҃і́е, без̾ мꙋ́жа роди́вшаѧ сп҃са хрⷭ҇та̀, чистоты̀ печа́ть сохра́нши: тѧ̀ бл҃жи́мъ человѣ́цы во вѣ́ки.
Сла́ва тебѣ̀ бж҃е на́шъ, сла́ва тебѣ̀.
Сїѐ всест҃о́е дре́во да почти́тсѧ, є҆́же прⷪ҇ро́къ дре́вле вложи́ти въ хлѣ́бъ хрⷭ҇то́въ взыва́етъ, ѿ і҆и҃льтѧнъ, распе́ншихъ є҆го̀. є҆го́же превозно́симъ во всѧ̑ вѣ́ки.
І҆рмо́съ: Рꙋ́цѣ въ ро́въ ве́рженный львѡ́въ, и҆ногда̀ вели́кїй во проро́цѣхъ, крⷭ҇тоѡбра́знѡ просте́ръ данїи́лъ, неврежде́нъ ѿ си́хъ снѣ́ди сп҃се́сѧ, бл҃гословѧ̀ хрⷭ҇та̀ бг҃а во вѣ́ки.
Пѣ́снь ѳ҃.
І҆рмо́съ: Всѧ́къ земноро́дный:
Вопїе́мъ твоѐ ребро̀ ѿверза́еши, ѡ҆ставле́нїѧ распростира́ѧ мѝ и҆сто́чникъ: на дре́вѣ же пригвозди́лсѧ є҆сѝ, дре́вомъ ᲂу҆ставлѧ́ѧ ѡ҆сꙋжде́нїе, посредѣ̀ землѝ, чл҃вѣколю́бче: є҆́же мы̀ преполове́нїемъ поста̀ ны́нѣ ѡ҆блобыза́емъ, воспѣва́юще твою̀ бл҃госты́ню.
Го́ры сла́дость, хо́лми ра́дованїе, любо́вїю и҆ска́пайте: древа́ же польска̑ѧ, лїва́нстїи ке́дри ликꙋ́йте, поклоне́нїемъ дне́сь живоно́снагѡ крⷭ҇та̀: прⷪ҇ро́цы, мꙋ́чєницы, а҆пⷭ҇ли, и҆ пра́ведныхъ дꙋ́си взыгра́йте.
При́зри на лю́ди и҆ достоѧ́нїе твоѐ гдⷭ҇и, стра́хомъ пою́щыѧ тѧ̀, сме́рть во́льнꙋю и҆́хже ра́ди претерпѣ́лъ є҆сѝ, да не побѣди́тъ твоегѡ̀ бл҃гоꙋтро́бїѧ безмѣ́рное мно́жество ѕѡ́лъ на́шихъ: но сп҃сѝ всѧ̑ ны̀ пребл҃гі́й крⷭ҇то́мъ твои́мъ, ꙗ҆́кѡ чл҃вѣколю́бецъ.
Бг҃оро́диченъ: Манове́нїемъ твои́мъ коле́блеши ви́димый мі́ръ, распина́емый, пребыва́еши же ви́симый, бцⷣа пла́чꙋщи глаго́лаше, страстна̑ѧ ᲂу҆мышлє́нїѧ первозда́ннагѡ хрⷭ҇тѐ, потреби́ти хотѧ̀, и҆ и҆сцѣли́ти тогѡ̀ сокрꙋше́нїе бл҃гостїю.
И҆́ный. І҆рмо́съ: Недоꙋмѣ́етъ всѧ́къ:
Є҆лїссе́й дре́вле и҆з̾ рѣкѝ сѣ́чиво влекі́й, дре́вомъ тѧ̀ крⷭ҇те, животода́тельное дре́во воѡбража́ше: и҆́мже и҆звлечѐ и҆з̾ глꙋбины̀ хрⷭ҇то́съ ꙗ҆зы́ки і҆́дѡльскагѡ бѣсова́нїѧ, на тебѣ̀ пригвозди́всѧ: тѣ́мже покланѧ́ющесѧ тебѣ̀, держа́вꙋ є҆гѡ̀ сла́вимъ.
Со́лнєчныѧ лꙋчы̀ сп҃се, преложи́шасѧ во тьмꙋ̀, твои́мъ распѧ́тїемъ, ѡ҆сїѧ́нїе же лꙋны̀ ᲂу҆гасѐ: и҆ стїхі̑и тре́петомъ и҆змѣнѧ́хꙋсѧ всѧ̑. тѣ́мже вопїю́ ти: и҆змѣнє́на тьмо́ю страсте́й помышлє́нїѧ моѧ̑, сло́ве, твое́ю десни́цею премѣни́въ просвѣтѝ, и҆ сп҃си́ мѧ.
Ꙗ҆́звою твое́ю и҆сцѣлѝ дꙋшѝ моеѧ̀ стра̑сти: ре́бръ твои́хъ прободе́нїемъ ᲂу҆ста́ви болѣ́знєннаѧ прободє́нїѧ бѣсѡ́въ: гвоздьмѝ твои́ми хрⷭ҇тѐ, и҆згвоздѝ сластна̑ѧ и҆ страстна̑ѧ похотѣ̑нїѧ, подаѧ́ ми безстра́стнѡ страсте́мъ твои̑мъ чⷭ҇тны̑мъ поклони́тисѧ, и҆ воскрⷭ҇нїю.
Бг҃оро́диченъ: Кра́снаго добро́тою, родила́ тѧ кра́снаѧ ѻ҆трокови́ца, є҆го́же зрѧ́щи ни добро́ты въ страда́нїи, нижѐ ви́да и҆мꙋ́ща, сп҃се, рыда́ющи глаго́лаше: дивлю́сѧ па́че ᲂу҆ма̀ сн҃е мо́й, твоемꙋ̀ смире́нїю, и҆́мже сп҃са́еши смири́вшеесѧ є҆стество̀ человѣ́ческое.
И҆́ный. І҆рмо́съ: Свѣти́сѧ, свѣти́сѧ:
Предгрѧди́те, ᲂу҆ѧсни́тесѧ всѝ лю́дїе бж҃їи, и҆ дре́во крⷭ҇тное предви́дѧще предлежа́щее, цѣлꙋ́йте со стра́хомъ, и҆ прїими́те ра́дость, на не́мъ гдⷭ҇а сла́вы возне́сшагосѧ сла́вѧще при́снѡ.
Ѻ҆рꙋ́жїе бж҃е́ственное ты̀ жи́зни мое́й крⷭ҇те, на тебѐ влⷣка возше́дъ спасе́ мѧ: и҆сточѝ кро́вь и҆ во́дꙋ, прободе́нъ въ ре́бра, и҆́мже причаща́юсѧ ра́дꙋѧсѧ, сла́вѧ є҆го̀.
Трⷪ҇ченъ: Трⷪ҇цѣ ли́цы, є҆ди́ницѣ є҆стество́мъ, покланѧ́юсѧ тебѣ̀ бж҃ество̀ ст҃о́е, ѻ҆ц҃ꙋ̀, и҆ сн҃ꙋ, со ст҃ы́мъ же дх҃омъ, є҆ди́номꙋ нача́лꙋ, є҆ди́номꙋ ца́рствꙋ, всѣ́ми влады́чествꙋющемꙋ.
Бг҃оро́диченъ: Гора̀ вели́каѧ, въ ню́же всели́сѧ хрⷭ҇то́съ, ты̀ ꙗ҆ви́ласѧ є҆сѝ дв҃о, ꙗ҆́коже бж҃е́ственный дв҃дъ вопїе́тъ: є҆́юже мы̀ вознесо́хомсѧ къ нб҃сѝ, всыни́вшесѧ дх҃омъ всебл҃же́ннаѧ.
Сла́ва тебѣ̀ бж҃е на́шъ, сла́ва тебѣ̀.
Ски́петре бж҃е́ственный ца́рскїй крⷭ҇те, во́инства мꙋ́жество, во ᲂу҆пова́нїи твое́мъ ра́тники побѣжда́емъ: побѣ̑ды при́снѡ тебѣ̀ кла́нѧющымсѧ на ва́рвары пода́ждь на́мъ.
І҆рмо́съ: Ѽ мт҃и дв҃о, и҆ бцⷣе нело́жнаѧ, ро́ждшаѧ безсѣ́меннѡ хрⷭ҇та̀ бг҃а на́шего, на крⷭ҇тъ возне́сшагосѧ пло́тїю: тѧ̀ вѣ́рнїи всѝ досто́йнѡ съ ни́мъ ны́нѣ велича́емъ.
Свѣти́ленъ гла́са, и҆ настоѧ́щїй є҆ѯапостїла́рїй.
Подо́бенъ: Дх҃омъ:
Преполове́нїемъ постѡ́въ всечестно́е дре́во всѣ́хъ въ поклоне́нїе призыва́етъ, є҆ли́цы страстьмѝ свои́ми, хрⷭ҇тѡ́вымъ стрⷭ҇те́мъ досто́йнѡ спослѣ́дꙋютъ: прїиди́те всѝ вѣ́рнїи, поклони́мсѧ дре́вꙋ стра́шнагѡ та́инства.
Крⷭ҇тобг҃оро́диченъ: Безневѣ́стнаѧ и҆ всечⷭ҇таѧ бг҃а сло́ва мт҃и, вопїѧ́ше крича́щи, пла́чемъ рыда́ющи: сицевы̑ѧ ли мѝ гаврїи́лъ ра́дѡсти приносѧ́ше бл҃говѣ́щенїѧ, ча́до; ѿидѝ и҆спо́лнити неизрече́нный совѣ́тъ и҆ бж҃е́ственное смотре́нїе.
На стїхо́внѣ самогла́сенъ днѐ, два́жды. Гла́съ и҃:
Поще́нїѧ пꙋ́ть преполови́вше, ведꙋ́щїй ко крⷭ҇тꙋ̀ твоемꙋ̀ чⷭ҇тно́мꙋ, тво́й де́нь ви́дѣти, є҆го́же ви́дѣ а҆враа́мъ, и҆ возра́довасѧ ꙗ҆́кѡ и҆з̾ гро́ба хо́лма жи́ва і҆саа́ка прїе́мъ. бл҃говолѝ и҆ на́съ вѣ́рою и҆зба́вившихсѧ ѿ врага̀, и҆ ве́чери причасти́тисѧ та́йнѣй, въ ми́рѣ зовꙋ́щихъ: просвѣще́нїе и҆ сп҃си́телю на́шъ, сла́ва тебѣ̀.
Мꙋ́чениченъ: Мч҃нцы хрⷭ҇тѡ́вы непобѣди́мїи, побѣди́вше пре́лесть си́лою крⷭ҇тною, воспрїѧ́сте бл҃года́ть вѣ́чныѧ жи́зни, мꙋчи́телей преще́нїѧ не ᲂу҆боѧ́стесѧ, мꙋ́ками ᲂу҆ранѧ́еми веселите́сѧ: и҆ ны́нѣ крѡ́ви ва́шѧ бы́ша и҆сцѣлє́нїѧ дꙋ́шъ на́шихъ. моли́те сп҃сти́сѧ дꙋша́мъ на́шымъ.
Сла́ва, гла́съ то́йже: Преполови́вше пꙋчи́нꙋ воздержа́нїѧ, приста́нище прїи́мемъ сп҃се́нїѧ, вре́мѧ стрⷭ҇ти твоеѧ̀ во́льныѧ гдⷭ҇и: но ꙗ҆́кѡ бл҃гоꙋтро́бенъ и҆ ще́дръ, и҆ де́нь сла́внагѡ воскрⷭ҇нїѧ твоегѡ̀, въ ми́рѣ сподо́би на́съ ви́дѣти чл҃вѣколю́бче.
И҆ ны́нѣ, па́ки то́йже.
Крⷭ҇топоклоне́нїе же быва́етъ въ а҃-й ча́съ, во́ньже пое́мъ преднапи̑санныѧ стїхи̑ры недѣ̑льныѧ, самогла́сны, гла́съ в҃: Прїиди́те вѣ́рнїи: И҆ прѡ́чаѧ. И҆ ѿпꙋ́стъ.
На ѕ҃-мъ часѣ̀ тропа́рь прⷪ҇ро́чества, гла́съ ѕ҃:
Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ.
Прокі́менъ, ѱало́мъ ѯ҃ѳ. Гла́съ ѕ҃: Да возра́дꙋютсѧ, и҆ возвеселѧ́тсѧ ѡ҆ тебѣ̀ всѝ и҆́щꙋщїи тебѐ бж҃е. Сті́хъ: Да возвратѧ́тсѧ вспѧ́ть и҆ постыдѧ́тсѧ:
Прⷪ҇ро́чества и҆са́їина чте́нїе. [Глава̀ к҃ѕ, ст. к҃а. глава̀ к҃з, ст. а҃-ѳ҃.]
Сѐ гдⷭ҇ь ѿ ст҃а́гѡ [мѣ́ста] наво́дитъ гнѣ́въ на живꙋ́щыѧ на землѝ, и҆ ѿкры́етъ землѧ̀ кро́вь свою̀, и҆ не покры́етъ и҆збїе́нныхъ. Въ то́й де́нь наведе́тъ гдⷭ҇ь ме́чь ст҃ы́й, и҆ вели́кїй, и҆ крѣ́пкїй на дра́конта ѕмі́а бѣжа́ща, на дра́конта ѕмі́а лꙋка́ваго: и҆ ᲂу҆бїе́тъ дра́конта сꙋ́щаго въ мо́ри. Въ то́й де́нь вїногра́дъ до́брый, жела́ше пѣ́ти над̾ ни́мъ. А҆́зъ гра́дъ крѣ́пкїй, гра́дъ вою́емый, всꙋ́е напою̀ є҆го̀: плѣне́нъ бо бꙋ́детъ но́щїю, въ де́нь же паде́тсѧ стѣна̀ є҆гѡ̀. нѣ́сть тогѡ̀, и҆́же не во́зметъ є҆гѡ̀. Кто́ мѧ приста́витъ стрещѝ стє́блїѧ на ни́вѣ; ра́ди вражды̀ сеѧ̀ ѿри́нꙋхъ и҆̀: ᲂу҆̀бо сегѡ̀ ра́ди сотворѝ гдⷭ҇ь бг҃ъ всѧ̑, є҆ли̑ка совѣща̀: И҆ сгорѣ́хъ, возопїю́тъ живꙋ́щїи въ не́мъ: сотвори́мъ ми́ръ є҆мꙋ̀, сотвори́мъ ми́ръ. Приходѧ̑щаѧ ча̑да і҆а́кѡвлѧ: прозѧ́бнетъ и҆ процвѣте́тъ і҆и҃ль, и҆ напо́лнитсѧ вселе́ннаѧ плода̀ є҆гѡ̀. Є҆да̀ ꙗ҆́коже то́й поразѝ, и҆ са́мъ си́це ᲂу҆ѧзви́тсѧ; и҆ ꙗ҆́коже са́мъ ᲂу҆бѝ, та́кожде ᲂу҆бїе́нъ бꙋ́детъ. Сварѧ́сѧ и҆ ᲂу҆корѧ́ѧ ѿпꙋ́ститъ ѧ҆̀: не ты́ ли бы́лъ є҆сѝ помышлѧ́ѧ дх҃омъ жесто́кимъ ᲂу҆би́ти ѧ҆̀ дх҃омъ ꙗ҆́рости; Сегѡ̀ ра́ди ѿи́метсѧ беззако́нїе і҆а́кѡвле, и҆ сїѐ є҆́сть бл҃гослове́нїе є҆гѡ̀, є҆гда̀ ѿимꙋ̀ грѣ́хъ є҆гѡ̀, є҆гда̀ положа́тъ всѐ ка́менїе тре́бищъ сокрꙋше́но а҆́ки пра́хъ дро́бный: и҆ не пребꙋ́дꙋтъ древеса̀ и҆́хъ, и҆ кꙋмі́ры и҆́хъ бꙋ́дꙋтъ посѣ́чени, а҆́ки дꙋбра́ва дале́че.
Прокі́менъ, ѱало́мъ ѻ҃. Гла́съ ѕ҃: На тѧ̀ гдⷭ҇и, ᲂу҆пова́хъ, да не постыжꙋ́сѧ въ вѣ́къ. Сті́хъ: Пра́вдою твое́ю и҆зба́ви мѧ̀.