Въ четверто́къ в҃-ѧ седми́цы ве́чера.

На Гдⷭ҇и воззва́хъ, поста́вимъ стїхѡ́въ ѕ҃, и҆ пое́мъ настоѧ́щыѧ подо́бны трѝ трипѣ́снца, господи́на і҆ѡ́сифа. Гла́съ д҃.

Подо́бенъ: Да́лъ є҆сѝ зна́менїе:

Въ ре́бра прободе́нъ, и҆ на дре́вѣ повѣ́шенъ, жи́знь мнѣ̀ и҆сточи́лъ є҆сѝ, ѕло́бою ѕмі́ѧ, дре́ва снѣде́нїемъ ᲂу҆мерщвле́нномꙋ. тѣ́мже сла́влю тѧ̀ хрⷭ҇тѐ, и҆ молю̀ бл҃гоꙋтро́бїе твоѐ: страстє́мъ и҆ воста́нїю покло́нника мѧ̀ покажѝ, ᲂу҆миле́нїемъ соверша́юща по́стное по́прище.

Болѣ́знь ѡ҆бра́вша ѿ сада̀, первосозда́ннаго ѿ раѧ̀ и҆згна́лъ є҆сѝ: пригвозди́всѧ же ꙗ҆́кѡ человѣ́къ сп҃се на дре́вѣ, сего̀ вво́диши. тѣ́мже тѝ зовꙋ̀ и҆зба́вителю: ѿ болѣ́зней мои́хъ ны́нѣ мѧ̀ и҆схитѝ, посто́мъ ѡ҆чи́стивъ мѧ̀, и҆ покаѧ́нїемъ и҆ слеза́ми, і҆и҃се пребл҃гі́й, сп҃се дꙋ́шъ на́шихъ.

И҆́на стїхи́ра подо́бна, гла́съ є҃, господи́на ѳео́дѡра: Гдⷭ҇и, при мѡѷсе́и:

Гдⷭ҇и, животворѧ́щїй тво́й крⷭ҇тъ воспѣва́емъ: се́й бо жи́знь въ мі́рѣ процвѣтѐ, сме́рть ᲂу҆мертви́въ: є҆го́же тебѣ̀ и҆ ны́нѣ въ мл҃твꙋ приво́димъ: во дне́хъ ст҃ы́хъ ᲂу҆крѣпи́ ны постѧ́щыѧсѧ, и҆ да́рꙋй на стра̑сти крѣ́пость, и҆ мі́ра побѣ́дное, за мно́жество млⷭ҇ти чл҃вѣколю́бче.

И҆ мине́и г҃. Сла́ва, и҆ ны́нѣ, бг҃оро́диченъ.

Прокі́менъ, ѱало́мъ л҃є, гла́съ д҃: Гдⷭ҇и, на нб҃сѝ млⷭ҇ть твоѧ̀, и҆ и҆́стина твоѧ̀ до ѻ҆́блакъ. Сті́хъ: Пра́вда твоѧ̀ ꙗ҆́кѡ го́ры бж҃їѧ: сꙋдьбы̑ твоѧ̑ бе́здна мно́га.

Бытїѧ̀ чте́нїе. [Глава̀ є҃, ст. а҃-к҃д.]

Сїѧ̀ кни́га бытїѧ̀ человѣ́ча, во́ньже де́нь сотворѝ бг҃ъ а҆да́ма: по ѡ҆́бразꙋ бж҃їю сотворѝ є҆го̀. Мꙋ́жа и҆ женꙋ̀ сотворѝ и҆́хъ, и҆ бл҃гословѝ и҆́хъ: и҆ наречѐ и҆́мѧ є҆мꙋ̀ а҆да́мъ, во́ньже де́нь сотворѝ и҆́хъ. Поживе́ же а҆да́мъ лѣ́тъ двѣ́стѣ три́десѧть, и҆ родѝ сы́на по ви́дꙋ своемꙋ̀, и҆ по ѡ҆́бразꙋ своемꙋ̀: и҆ наречѐ и҆́мѧ є҆мꙋ̀ си́ѳъ. Бы́ша же дні́е а҆да́мовы, ꙗ҆̀же поживѐ, по є҆́же роди́ти є҆мꙋ̀ си́ѳа, лѣ́тъ се́дмь сѡ́тъ, и҆ родѝ сы́ны и҆ дщє́ри. И҆ бы́ша всѝ дні́е а҆да́мѡвы, ꙗ҆̀же поживѐ, лѣ́тъ де́вѧть сѡ́тъ и҆ три́десѧть: и҆ ᲂу҆́мре. Поживе́ же си́ѳъ лѣ́тъ двѣ́стѣ пѧ́ть, и҆ родѝ є҆нѡ́са: И҆ поживѐ си́ѳъ, по є҆́же роди́ти є҆мꙋ̀ є҆нѡ́са, лѣ́тъ се́дмь сѡ́тъ и҆ се́дмь, и҆ родѝ сы́ны и҆ дщє́ри. И҆ бы́ша всѝ дні́е си́ѳѡвы, лѣ́тъ де́вѧть сѡ́тъ и҆ двана́десѧть: и҆ ᲂу҆́мре. И҆ поживѐ є҆нѡ́съ лѣ́тъ сто̀ де́вѧтьдесѧтъ, и҆ родѝ каїна́на: И҆ поживѐ є҆нѡ́съ, по є҆́же роди́ти є҆мꙋ̀ каїна́на, лѣ́тъ се́дмь сѡ́тъ и҆ пѧтьна́десѧть, и҆ родѝ сы́ны и҆ дщє́ри. И҆ бы́ша всѝ дні́е є҆нѡ́совы лѣ́тъ де́вѧть сѡ́тъ и҆ пѧ́ть: и҆ ᲂу҆́мре. И҆ поживѐ каїна́нъ лѣ́тъ сто̀ се́дмьдесѧтъ, и҆ родѝ малелеи́ла. И҆ поживѐ каїна́нъ, по є҆́же роди́ти є҆мꙋ̀ малелеи́ла, лѣ́тъ се́дмь сѡ́тъ и҆ четы́редесѧть, и҆ родѝ сы́ны и҆ дщє́ри. И҆ бы́ша всѝ дні́е каїна́новы, лѣ́тъ де́вѧть сѡ́тъ и҆ де́сѧть: и҆ ᲂу҆́мре. И҆ поживѐ малелеи́лъ лѣ́тъ сто̀ шестьдесѧ́тъ пѧ́ть, и҆ родѝ і҆а́реда. И҆ поживѐ малелеи́лъ, по є҆́же роди́ти є҆мꙋ̀ і҆а́реда, лѣ́тъ се́дмь сѡ́тъ и҆ три́десѧть, и҆ родѝ сы́ны и҆ дщє́ри. И҆ бы́ша всѝ дні́е малелеи́ловы, лѣ́тъ ѻ҆́смь сѡ́тъ и҆ де́вѧтьдесѧтъ пѧ́ть: и҆ ᲂу҆́мре. И҆ поживѐ і҆а́редъ лѣ́тъ сто̀ шестьдесѧ́тъ два̀, и҆ родѝ є҆нѡ́ха. И҆ поживѐ і҆а́редъ, по є҆́же роди́ти є҆мꙋ̀ є҆нѡ́ха, лѣ́тъ ѻ҆́смь сѡ́тъ, и҆ родѝ сы́ны и҆ дщє́ри. И҆ бы́ша всѝ дні́е і҆а́редовы лѣ́тъ девѧтьсѡ́тъ и҆ шестьдесѧ́тъ два̀: и҆ ᲂу҆́мре. И҆ поживѐ є҆нѡ́хъ лѣ́тъ сто̀ шестьдесѧ́тъ пѧ́ть, и҆ родѝ маѳꙋса́ла. Оу҆годи́ же є҆нѡ́хъ бг҃ꙋ, и҆ поживѐ є҆нѡ́хъ, по є҆́же роди́ти є҆мꙋ̀ маѳꙋса́ла, лѣ́тъ двѣ́стѣ, и҆ родѝ сы́ны и҆ дщє́ри. И҆ бы́ша всѝ дні́е є҆нѡ́ховы лѣ́тъ три́ста шестьдесѧ́тъ пѧ́ть. И҆ ᲂу҆годѝ є҆нѡ́хъ бг҃ꙋ, и҆ не ѡ҆брѣта́шесѧ, занѐ преложѝ є҆го̀ бг҃ъ.

Прокі́менъ, ѱало́мъ л҃ѕ, гла́съ ѕ҃: Потерпѝ гдⷭ҇а, и҆ сохранѝ пꙋ́ть є҆гѡ̀. Сті́хъ: Не ревнꙋ́й лꙋка́внꙋющымъ, нижѐ зави́ди творѧ́щымъ беззако́нїе.

При́тчей чте́нїе. [Глава̀ ѕ҃, ст. г҃-к҃.]

Творѝ сы́не, ꙗ҆̀же а҆́зъ заповѣ́дꙋю тѝ, и҆ сп҃са́йсѧ: и҆́деши бо въ рꙋ́цѣ ѕлы́хъ за твоего̀ дрꙋ́га, бꙋ́ди не ѡ҆слабѣва́ѧ: поѡщрѧ́й же и҆ твоего̀ дрꙋ́га, є҆го́же и҆спорꙋчи́лъ є҆сѝ. Не да́ждь сна̀ твои́ма ѻ҆чи́ма, нижѐ да воздре́млеши твои́ма вѣ́ждома: Да сп҃се́шисѧ а҆́ки се́рна ѿ тене́тъ, и҆ ꙗ҆́кѡ пти́ца ѿ сѣ́ти. И҆дѝ ко мра́вїю, ѽ лѣни́ве, и҆ поревнꙋ́й, ви́дѣвъ пꙋти̑ є҆гѡ̀, и҆ бꙋ́ди ѻ҆́нагѡ мꙋдрѣ́йшїй. Ѻ҆́нъ бо не сꙋ́щꙋ є҆мꙋ̀ земледѣ́льцꙋ, нижѐ нꙋ́дѧщаго є҆го̀ и҆мꙋ́щїй, нижѐ под̾ влады́кою сы́й, Гото́витъ въ жа́твꙋ пи́щꙋ, и҆ мно́гое въ лѣ́то твори́тъ ᲂу҆гото́ванїе. и҆лѝ и҆дѝ ко пчелѣ̀, и҆ ᲂу҆вѣ́ждь, ко́ль дѣ́лательница є҆́сть, дѣ́ланїе же ко́ль честно́е твори́тъ: є҆ѧ́же трꙋдѡ́въ ца́рїе и҆ прості́и во здра́вїе ᲂу҆потреблѧ́ютъ, люби́ма же є҆́сть всѣ́ми и҆ сла́вна: а҆́ще си́лою и҆ немощна̀ сꙋ́щи, [но] премꙋ́дростїю почте́на произведе́сѧ. Доко́лѣ, ѽ лѣни́ве, лежи́ши; когда́ же ѿ сна̀ воста́неши; Ма́лѡ ᲂу҆́бѡ спи́ши, ма́лѡ же сѣди́ши, ма́лѡ же дре́млеши, ма́лѡ же ѡ҆б̾е́млеши пє́рси рꙋка́ма: Пото́мъ же на́йдетъ тебѣ̀ а҆́ки ѕо́лъ пꙋ́тникъ ᲂу҆бо́жество: скꙋ́дость же а҆́ки бл҃гі́й тече́цъ. а҆́ще же не лѣни́въ бꙋ́деши, прїи́детъ ꙗ҆́кѡ и҆сто́чникъ жа́тва твоѧ̀, скꙋ́дость же а҆́ки ѕлы́й тече́цъ [ѿ тебѐ] ѿбѣжи́тъ. Мꙋ́жъ безꙋ́менъ и҆ законопрестꙋ́пный хо́дитъ въ пꙋти̑ не бла̑ги: То́йже намиза́етъ ѻ҆́комъ, и҆ зна́менїе дае́тъ ного́ю, ᲂу҆чи́тъ же помава́нїемъ пе́рстѡвъ. Развраще́нно же се́рдце кꙋе́тъ ѕла̑ѧ: на всѧ́кое вре́мѧ таковы́й мѧте́жы составлѧ́етъ гра́дꙋ. Сегѡ̀ ра́ди внеза́пꙋ прихо́дитъ є҆мꙋ̀ поги́бель, разсѣче́нїе и҆ сокрꙋше́нїе неисцѣ́льное. Ꙗ҆́кѡ ра́дꙋетсѧ ѡ҆ всѣ́хъ, и҆̀хже ненави́дитъ бг҃ъ: сокрꙋша́етсѧ же за нечистотꙋ̀ дꙋшѝ. Ѻ҆́ко досади́телѧ, ѧ҆зы́къ непра́ведный, рꙋ́цѣ пролива́ющыѧ кро́вь првⷣнагѡ: И҆ се́рдце кꙋю́щее мы̑сли ѕлы̀, и҆ но́зѣ тща́щїисѧ ѕло̀ твори́ти, потребѧ́тсѧ. Разжиза́етъ лжи̑ свидѣ́тель непра́веденъ, и҆ насыла́етъ сꙋды̀ посредѣ̀ бра́тїй. Сы́не, хранѝ зако́ны ѻ҆тца̀ твоегѡ̀, и҆ не ѿри́ни наказа́нїѧ ма́тере твоеѧ̀.

На стїхо́внѣ самогла́сенъ днѐ.

Гла́съ є҃. Не пости́вшесѧ по за́повѣди созда́вшагѡ, ѿ сада̀ ра́зꙋма первозда́ннїи, сме́рть ѿ преслꙋша́нїѧ приплоди́ша, дре́ва же жи́зни и҆ ра́йскїѧ сла́дости ᲂу҆страни́вшесѧ. тѣ́мже пости́мсѧ вѣ́рнїи ѿ пи́щей тлѣ́нныхъ, и҆ страсте́й всегꙋби́тельныхъ, да ѿ бж҃е́ственнагѡ крⷭ҇та̀ жи́знь ѡ҆бы́мемъ, и҆ со бл҃гоꙋ́мнымъ разбо́йникомъ къ нача́льномꙋ ѻ҆ч҃ествꙋ возрати́мсѧ, прїе́млюще ѿ хрⷭ҇та̀ бг҃а ве́лїю млⷭ҇ть. [Два́жды.]

Мч҃нченъ: Ѡ҆ земны́хъ всѣ́хъ неради́вше, и҆ на мꙋ̑ки мꙋ́жески дерзнꙋ́вше, бл҃же́нныхъ наде́ждъ не погрѣши́сте, но нбⷭ҇номꙋ црⷭ҇твїю наслѣ̑дницы бы́сте, всехва́льнїи мч҃нцы, и҆мꙋ́ще дерзнове́нїе къ чл҃вѣколю́бцꙋ бг҃ꙋ, ми́ръ мі́рови и҆спроси́те, и҆ дꙋша́мъ на́шымъ ве́лїю млⷭ҇ть.

Сла́ва, и҆ ны́нѣ, крⷭ҇тобг҃оро́диченъ.

Подо́бенъ: Ра́дꙋйсѧ по́стникѡмъ:

А҆́гнца своего̀, а҆́гница и҆ногда̀ зрѧ́щи къ заколе́нїю тща́щасѧ, ᲂу҆се́рднѡ послѣ́доваше, сїѧ̑ вопїю́щи є҆мꙋ̀: ка́мѡ и҆́деши ча́до моѐ сладча́йшее хрⷭ҇тѐ, чесѡ̀ ра́ди ско́рое тече́нїе сїѐ, долготерпѣли́ве, тече́ши нелѣ́ностнѡ; і҆и҃се возжелѣ́ннѣйшїй безгрѣ́шне, многомлⷭ҇тиве гдⷭ҇и, да́ждь мѝ сло́во рабѣ̀ твое́й, сн҃е мо́й вселюбе́знѣйшїй, не пре́зри менѐ ще́дре молча̀, тѧ̀ стра́ннѡ ро́ждшꙋю, бж҃е всеще́дре, да́рꙋѧй мі́рови ве́лїю млⷭ҇ть.