Въ четверто́къ вторы́ѧ седми́цы ст҃а́гѡ поста̀.
На ᲂу҆́трени, трⷪ҇чны гла́са. По а҃-мъ стїхосло́вїи сѣда́льны а҆пⷭ҇льскїѧ ѻ҆смогла́сника, съ бг҃оро́дичнымъ. По в҃-мъ же стїхосло́вїи глаго́лемъ настоѧ́щыѧ сѣда́льны, гла́съ г҃.
Подо́бенъ: Красотѣ̀ дв҃ства.
Хрⷭ҇то́съ лоза̀ кра́снаѧ, грѡ́здїѧ ва́съ принесѐ, сла́дость сп҃си́тельнꙋю напаѧ́ющыѧ землѝ, а҆по́столи бг҃оно́снїи: тѣ́мже мѧ̀ и҆зба́вите сласте́й пїѧ́нства, молю́сѧ, стрꙋи̑ ᲂу҆миле́нїѧ дꙋшѝ мое́й да́рꙋюще въ бж҃е́ственнѣмъ поще́нїѧ днѝ: ꙗ҆́кѡ да спа́ссѧ живо́тъ полꙋчꙋ̀.
Сла́ва, то́йже.
И҆ ны́нѣ, бг҃оро́диченъ: Млⷭ҇рдїѧ твоегѡ̀ бога́тство безмѣ́рное, и҆ могꙋ́тства твоегѡ̀ держа́вꙋ непребори́мꙋю прїе́млѧ во ᲂу҆́мъ, притеко́хъ къ кро́вꙋ твоемꙋ̀, ско́рбїю содержи́мь, и҆ лю́тѣ недоꙋмѣва́ѧ, зовꙋ̀ и҆з̾ глꙋбины̀ моегѡ̀ се́рдца со слеза́ми: дв҃о бцⷣе, помога́й мѝ, є҆ди́на мі́рꙋ предста́тельство.
По г҃-мъ стїхосло́вїи сѣда́ленъ, гла́съ ѕ҃.
Подо́бенъ: Гдⷭ҇и предстоѧ́ше:
Гдⷭ҇и бл҃гоꙋвѣ́тливъ бꙋ́ди на́мъ, въ сїѐ бж҃е́ственное вре́мѧ, сле́зы точи́ти тебѣ̀ ѿ се́рдца сподо́би всегда̀, ко ѿмове́нїю скве́рнъ дꙋше́вныхъ, и҆ къ прозѧбе́нїю ст҃ы́хъ за́повѣдей: ꙗ҆́кѡ да си́це постѧ́щесѧ, досто́йнѡ бл҃гоꙋгоди́мъ тебѣ̀, и҆ всечестнꙋ́ю твою̀ стрⷭ҇ть всѣ̑мъ ви́дѣти бл҃гоизво́ли, мл҃твами твои́хъ мїроспаси́тельныхъ а҆пⷭ҇лъ, сла́ва тебѣ̀.
Сла́ва, то́йже.
И҆ ны́нѣ, бг҃оро́диченъ: Млⷭ҇рдїѧ и҆сто́чникъ пречⷭ҇таѧ, чⷭ҇тна́ѧ дв҃о мт҃и бцⷣе, бога́тнѡ на ны̀ чⷭ҇таѧ и҆зле́й, и҆ да́рꙋй на́мъ согрѣше́нїй ѡ҆ставле́нїе: ты́ бо є҆сѝ предста́тельство на́ше и҆ бж҃е́ственный покро́въ.
Канѡ́нъ мине́и, и҆ настоѧ́щїй трипѣ́снецъ гдⷭ҇и́на і҆ѡ́сифа. Гла́съ г҃.
Пѣ́снь д҃.
І҆рмо́съ: Є҆да̀ въ рѣка́хъ прогнѣ́ваешисѧ:
Пїѧ́нство сласте́й дꙋшетлѣ́нныхъ ᲂу҆гаси́вше, ᲂу҆миле́нїѧ питїе́мъ, поста̀ ра́ди ᲂу҆гобзи́мсѧ.
Пости́сѧ дꙋшѐ невоздержа́нїѧ снѣ́ди, наслади́сѧ до́брыхъ видѣ́ньми, да вы́шнюю трапе́зꙋ ᲂу҆лꙋчи́ши.
Оу҆́глїе ѻ҆гнѧ̀ невеще́ственнагѡ сꙋ́ще, попали́те страсте́й мои́хъ вещество̀, бж҃е́ственнїи а҆пⷭ҇ли сп҃сѡвы.
Бг҃оро́диченъ: Пло́ть хрⷭ҇тꙋ̀ ѿ твоеѧ̀ взаи́мъ да́вшаѧ, ᲂу҆мертвѝ пло́ти моеѧ̀ стра̑сти, жизнороди́тельнице чⷭ҇таѧ дв҃о.
И҆́ный трипѣ́снецъ господи́на ѳео́дѡра. Гла́съ ѕ҃.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и:
Двоенадесѧ́тице а҆пⷭ҇лѡвъ, пе́тре, па́ѵле, і҆а́кѡве и҆ і҆ѡа́нне, а҆ндре́е, варѳоломе́е, фїлі́ппе, ѳѡмо̀ и҆ матѳе́е и҆ і҆а́кѡве, съ сі́мѡномъ и҆ і҆ꙋ́дою, мл҃твы сотвори́те хрⷭ҇тꙋ̀, сп҃сти́сѧ на́мъ.
Мрє́жи ᲂу҆че́нїй вве́ргше въ мо́ре житїѧ̀ стра́ннѡ, къ трїе́мъ сто̀ и҆ пѧтьдесѧ́тъ, та́йнѡ ꙗ҆зы́ки ꙗ҆́кѡ ры̑бы пре́жде ᲂу҆лови́сте, сїѧ̑ ко гдⷭ҇ꙋ приве́дше ст҃і́и а҆пⷭ҇ли.
Сла́ва, трⷪ҇ченъ: Сн҃а ѿ ѻ҆ц҃а̀ и҆ дх҃а сла́влю, ꙗ҆́кѡ ѿ со́лнца свѣ́тъ, и҆ лꙋчꙋ̀. ѻ҆́вагѡ ᲂу҆́бѡ рожде́ственнѣ, занѐ и҆ рожде́нїе: ѻ҆́вагѡ же происхо́днѣ, занѐ и҆ происхожде́нїе, собезнача́льнꙋю бж҃е́ственнꙋю трⷪ҇цꙋ, покланѧ́емꙋю ѿ всѧ́кїѧ тва́ри.
Бг҃оро́диченъ: Дв҃о младе́нца роди́вшаѧ, и҆ чистотꙋ̀ соблю́дшаѧ, чⷭ҇таѧ ты̀ ꙗ҆ви́ласѧ є҆сѝ, бг҃а ро́ждши и҆ чл҃вѣ́ка, є҆ди́наго того̀ во ѻ҆бою̀ зра̑кꙋ: чꙋ́до твоѐ дв҃о мт҃и, ᲂу҆жаса́етъ всѧ́кїй слꙋ́хъ и҆ по́мыслъ.
Сла́ва тебѣ̀ бж҃е на́шъ, сла́ва тебѣ̀.
Вы̀ є҆стѐ свѣ́тъ мі́рꙋ, ꙗ҆́коже ва́мъ речѐ хрⷭ҇то́съ, сїѧ́нїемъ сло́ва: но моли́тесѧ а҆пⷭ҇ли, великодꙋ́шнѡ препроводи́ти на́мъ по́прище воздержа́нїѧ, и҆ поклони́тисѧ тогѡ̀ воскрⷭ҇нїю.
І҆рмо́съ: Оу҆слы́ша прⷪ҇ро́къ прише́ствїе твоѐ гдⷭ҇и, и҆ ᲂу҆боѧ́сѧ, ꙗ҆́кѡ хо́щеши ѿ дв҃ы роди́тисѧ, и҆ человѣ́кѡмъ ꙗ҆ви́тисѧ, и҆ глаго́лаше: ᲂу҆слы́шахъ слꙋ́хъ тво́й и҆ ᲂу҆боѧ́хсѧ, сла́ва си́лѣ твое́й гдⷭ҇и.
Пѣ́снь и҃.
І҆рмо́съ: Въ пла́мень ко ѻ҆трокѡ́мъ:
Оу҆мертви́всѧ мно́гими грѣхѝ, ме́ртвꙋю приношꙋ̀ дꙋ́шꙋ въ житїѝ. тѣ́мже мѧ̀ ᲂу҆ще́дрите живоно́сными моли́твами ва́шими бг҃ови́дцы, ᲂу҆ченицы̀ сп҃сѡвы.
Ѡ҆б̾ѧ́тъ бы́въ грѣха̀ мгло́ю, а҆́дꙋ прибли́жихсѧ ѿча́ѧнїѧ вои́стиннꙋ. тѣ́мже мѧ̀ просвѣти́те, со́лнца сла́вы та̑йныѧ лꙋчы̀, сꙋ́ще бг҃ови́дцы.
Ѿ страсте́й воздержи́сѧ, и҆ спаса́йсѧ дꙋшѐ стра́стнаѧ: ѿложе́нїе бо бра́шенъ, по́стъ непрїѧ́тный, пра́вѣ и҆́щꙋщымъ, а҆́ще и҆ прегрѣше́нїй и҆справле́нїе не бꙋ́детъ.
Бг҃оро́диченъ: Кꙋпинꙋ̀ ѻ҆гне́мъ горѧ́щꙋю, мѡѷсе́й тѧ̀ предзрѧ́ше, дв҃о бг҃ома́ти. тѣ́мже ᲂу҆гасѝ мои́хъ страсте́й пе́щь, и҆ ѻ҆гнѧ̀ гее́нны и҆схитѝ и҆ сп҃сѝ.
И҆́ный. І҆рмо́съ: Є҆го́же вѡ́инства:
И҆з̾ і҆а́кѡва ꙗ҆́кѡ дванадесѧтоколѣ́нное, а҆пⷭ҇лъ и҆з̾ тебѐ дрꙋга́ѧ двоенадесѧ́тица ꙗ҆ви́сѧ хрⷭ҇тѐ въ мі́рѣ, є҆́юже ѿроди́сѧ всѧ́кїй вѣ́рный въ сло́вѣ, тебѐ воспѣва́ѧй во вѣ́ки.
Мы́сленнагѡ фараѡ́на колесни̑цы потопи́вше та́йнѣ, ꙗ҆́кѡ въ чермнѣ́мъ, лю́ди гдⷭ҇ни къ землѝ бг҃овѣ́дѣнїѧ и҆зведо́сте пою́щыѧ, а҆пⷭ҇ли, во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Є҆ди́наго бг҃а по сꙋществꙋ̀ чтꙋ̀, трѝ ѵ҆поста̑си пою̀ ѡ҆предѣли́тельнѣ, и҆́ныѧ, но не и҆́накѡвыѧ, поне́же бж҃ество̀ є҆ди́но въ трїе́хъ ли́цѣхъ: и҆́бо ѻ҆ц҃ъ, и҆ сн҃ъ, и҆ бж҃е́ственный дх҃ъ.
Бг҃оро́диченъ: И҆з̾ свѣтлѣ́йшагѡ чре́ва твоегѡ̀ проше́дъ, ꙗ҆́кѡ жени́хъ и҆з̾ черто́га возсїѧ̀ хрⷭ҇то́съ, свѣ́тъ ве́лїй сꙋ́щымъ во тьмѣ̀, и҆́бо пра́вды со́лнце ѡ҆блиста́въ, просвѣтѝ чⷭ҇таѧ мі́ръ.
Сла́ва тебѣ̀ бж҃е на́шъ, сла́ва тебѣ̀.
Хрⷭ҇тѡ́вы таи̑нницы и҆ сопресто́льницы, прилѣ́жнѡ ѡ҆ на́съ грѣ́шныхъ всегда̀ молѧ́щїисѧ, и҆ ны́нѣ моли́те поще́нїе всѐ чи́стѣ преитѝ.
Хва́лимъ, бл҃гослови́мъ, покланѧ́емсѧ гдⷭ҇ви:
І҆рмо́съ: Є҆го́же вѡ́инства нбⷭ҇наѧ сла́вѧтъ, и҆ трепе́щꙋтъ херꙋві́ми и҆ серафі́ми, всѧ́ко дыха́нїе и҆ тва́рь, по́йте, бл҃гослови́те, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: На сїна́йстѣй горѣ̀:
Рѣ́ки бы́вше а҆пⷭ҇ли, и҆сто́чника ᲂу҆́мнагѡ, и҆ во́дꙋ живꙋ́ю бл҃гоисточи́вше се́рдцемъ чи́стымъ, моегѡ̀ грѣха̀ стрꙋи̑ и҆зсꙋши́те мл҃твами ва́шими, и҆ ко сп҃се́нїѧ пꙋтє́мъ наста́вите.
Грѣхо́внаѧ ѡ҆бꙋрева́етъ бꙋ́рѧ ѻ҆каѧ́ннꙋю мою̀ дꙋ́шꙋ, десни́цꙋ ꙗ҆́кѡ петрꙋ̀ мнѣ̀ прострѝ, ѡ҆корми́телю бл҃гі́й: да мѧ̀ глꙋбина̀ не покры́етъ ѿча́ѧнїѧ, снѣ́дь да не бꙋ́дꙋ ки́тꙋ дꙋшетлѣ́нномꙋ, хрⷭ҇тѐ многомлⷭ҇тиве.
А҆пⷭ҇тольскїй ли́къ мо́литъ тѧ̀ і҆и҃се всецр҃ю̀, мо́лѧтъ тѧ̀ а҆́гг҃льстїи чи́ни за мно́жество щедро́тъ, лю́демъ твои̑мъ пода́ждь ѕлы́хъ и҆збавле́нїе, житїѧ̀ и҆справле́нїе, и҆ црⷭ҇твїѧ твоегѡ̀ присвое́нїе.
Бг҃оро́диченъ: Дѣ́вство и҆ рождество̀ стеко́стасѧ па́че є҆стества̀ на тебѣ̀, ковче́же чⷭ҇тна́гѡ ѡ҆сщ҃е́нїѧ, мт҃и дв҃о чⷭ҇таѧ. тѣ́мже вѣ́рою вопїю́ ти: всего̀ мѧ̀ ѡ҆ст҃ѝ, всего̀ и҆зба́ви всѧ́кагѡ дѣ́йства страсте́й ѡ҆скорблѧ́ющихъ мѧ̀.
И҆́ный. І҆рмо́съ: Безсѣ́меннагѡ зача́тїѧ:
Въ мі́рѣ ꙗ҆́кѡ безпло́тнїи, и҆ во пло́ти ꙗ҆́кѡ а҆́гг҃ли, сло́во є҆ди́но въ се́рдцѣ носѧ́ще, привлеко́сте ꙗ҆зы́ки во хрⷭ҇то́вꙋ є҆ди́нꙋ вѣ́рꙋ, премꙋ̑дрыѧ и҆ вѣті̑и ꙗ҆́кѡ ю҆ро́ди ѡ҆бличи́вше ра́зꙋмомъ, всебл҃же́ннїи а҆пⷭ҇ли.
Пе́тре, вѣ́ры ка́меню, и҆ ѡ҆снова́нїе: па́ѵле проповѣ́дниче, и҆ ᲂу҆чи́телю ꙗ҆зы́кѡвъ: сы̑на зеведе́ѡва, съ про́чею ѻ҆смери́цею хрⷭ҇тꙋ̀ моли́тесѧ прилѣ́жнѡ, бл҃гомо́щнѡ преитѝ на́мъ поще́нїѧ по́прище.
Сла́ва: Є҆ди́нагѡ є҆динороди́телю, є҆диноро́днагѡ сн҃а ѻ҆́ч҃е, и҆ є҆ди́не є҆ди́нагѡ свѣ́те, свѣ́та сїѧ́нїе: и҆ є҆ди́ный є҆ди́нѣ є҆ди́нагѡ бг҃а, ст҃ы́й дш҃е, гдⷭ҇а гдⷭ҇ь вои́стиннꙋ сы́й. ѽ трⷪ҇це, є҆ди́нице ст҃а́ѧ, сп҃сѝ мѧ̀ бг҃осло́вѧща тѧ̀.
И҆ ны́нѣ, бг҃оро́диченъ: Чꙋ́до ржⷭ҇тва̀ твоегѡ̀ ᲂу҆дивлѧ́етъ мѧ̀ всенепоро́чнаѧ, ка́кѡ зачина́еши безсѣ́меннѡ неѡбыме́ннаго; рцы̀, ка́кѡ дѣ́вствꙋеши, ро́ждши ꙗ҆́кѡ мт҃и; є҆́же па́че є҆стества̀ вѣ́рою прїе́мъ, рожде́нномꙋ поклони́сѧ: є҆ли̑ка хо́щетъ бо, и҆ мо́жетъ.
Сла́ва тебѣ̀ бж҃е на́шъ, сла́ва тебѣ̀.
Си́лою дх҃а къ царє́мъ и҆ кнѧзє́мъ и҆зше́дше, ника́коже ᲂу҆боѧ́вшесѧ, ни ѻ҆гнѧ̀, ни меча̀, побѣди́сте всѧ́кꙋю пре́лесть, и҆ сп҃са́ете человѣ́ки, воевѡ́ды гдⷭ҇ни сꙋ́ще, всебл҃же́ннїи а҆пⷭ҇ли.
І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стества̀, тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь, правосла́внѡ велича́емъ.
Свѣти́ленъ гла́са.
На стїхо́внѣ самогла́сенъ, два́жды. Гла́съ и҃:
Покаѧ́нїѧ вре́мѧ, и҆ жи́зни вѣ́чныѧ хода́тай на́мъ є҆́сть по́стный по́двигъ, а҆́ще простре́мъ рꙋ́ки во бл҃готворе́нїе: ничесѡ́же бо та́кѡ сп҃са́етъ дꙋ́шꙋ, ꙗ҆́коже подаѧ́нїе тре́бꙋющымъ. млⷭ҇тынѧ растворе́ннаѧ посто́мъ, ѿ сме́рти и҆збавлѧ́етъ человѣ́ка: сїю̀ цѣлꙋ́имъ, є҆́йже ничто́же ра́вно, дово́льна бо є҆́сть сп҃стѝ дꙋ́шы на́шѧ.
Мꙋ́чениченъ: Въ бронѧ̀ вѣ́ры ѡ҆бо́лкшесѧ до́брѣ, и҆ ѡ҆́бразомъ крⷭ҇тнымъ воѡрꙋжи́вше себѐ, во́ини бл҃гомо́щнїи показа́стесѧ, мꙋчи́телємъ мꙋ́жески проти́вистесѧ, и҆ дїа́волю пре́лесть потреби́сте, побѣди́телє бы́вше вѣнцє́въ сподо́бистесѧ: моли́тесѧ хрⷭ҇тꙋ̀ ѡ҆ на́съ, во є҆́же сп҃сти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ, гла́съ то́йже: А҆́зъ дв҃о ст҃а́ѧ бцⷣе, къ покро́вꙋ твоемꙋ̀ прибѣга́ю, вѣ́мъ, ꙗ҆́кѡ ѡ҆брѧ́щꙋ тобо́ю сп҃се́нїе: мо́жеши бо чⷭ҇таѧ помощи́ ми.
На ѕ҃-мъ часѣ̀ тропа́рь прⷪ҇ро́чества, гла́съ а҃:
Па́дшыѧ возста́ви ны̀, ѿвра́щшыѧсѧ ѡ҆братѝ къ тебѣ̀ бж҃е, ꙗ҆́кѡ чл҃вѣколю́бецъ, земны̑ѧ содержа́й концы̀.
Прокі́менъ, ѱало́мъ л҃г, гла́съ ѕ҃: Взыска́хъ гдⷭ҇а, и҆ ᲂу҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. Сті́хъ: Бл҃гословлю̀ гдⷭ҇а на всѧ́кое вре́мѧ.
Прⷪ҇ро́чества и҆са́їина чте́нїе. [Глава̀ ѕ҃ ст. а҃- в҃і.].
Бы́сть въ лѣ́то, въ не́же ᲂу҆́мре ѻ҆зі́а ца́рь, ви́дѣхъ гдⷭ҇а сѣдѧ́ща на прⷭ҇то́лѣ высо́цѣ, и҆ превознесе́ннѣ, и҆ и҆спо́лнь до́мъ сла́вы є҆гѡ̀. И҆ серафі́ми стоѧ́хꙋ ѻ҆́крестъ є҆гѡ̀, ше́сть кри́лъ є҆ди́номꙋ, и҆ ше́сть кри́лъ дрꙋго́мꙋ: и҆ двѣма̀ ᲂу҆́бѡ покрыва́хꙋ ли́ца своѧ̑, двѣма́ же покрыва́хꙋ но́ги своѧ̑, и҆ двѣма̀ лета́хꙋ. И҆ взыва́хꙋ дрꙋ́гъ ко дрꙋ́гꙋ, и҆ глаго́лахꙋ: ст҃ъ, ст҃ъ, ст҃ъ гдⷭ҇ь саваѡ́ѳъ: и҆спо́лнь всѧ̀ землѧ̀ сла́вы є҆гѡ̀. И҆ взѧ́сѧ наддве́рїе ѿ гла́са, и҆́мже вопїѧ́хꙋ, и҆ до́мъ напо́лнисѧ ды́ма. И҆ реко́хъ: ѽ ѻ҆каѧ́нный а҆́зъ, ꙗ҆́кѡ ᲂу҆мили́хсѧ, ꙗ҆́кѡ человѣ́къ сы́й, и҆ не чи́сты ᲂу҆стнѣ̀ и҆мы́й, посредѣ̀ люде́й нечи̑стыѧ ᲂу҆стнѣ̀ и҆мꙋ́щихъ а҆́зъ живꙋ̀: и҆ цр҃ѧ̀ гдⷭ҇а саваѡ́ѳа ви́дѣхъ ѻ҆чи́ма мои́ма. И҆ по́сланъ бы́сть ко мнѣ̀ є҆ди́нъ ѿ серафі́мѡвъ, и҆ въ рꙋцѣ̀ свое́й и҆мѧ́ше ᲂу҆́гль горѧ́щь, є҆го́же клеща́ми взѧ́тъ ѿ ѻ҆лтарѧ̀, И҆ прикоснꙋ́сѧ ᲂу҆стна́мъ мои̑мъ, и҆ речѐ: сѐ прикоснꙋ́сѧ сїѐ ᲂу҆стна́мъ твои̑мъ, и҆ ѿи́метъ беззакѡ́нїѧ твоѧ̑, и҆ грѣхѝ твоѧ̑ ѡ҆чи́ститъ. И҆ слы́шахъ гла́съ гдⷭ҇а глаго́люща: кого̀ послю̀ и҆ кто̀ по́йдетъ къ лю́демъ си̑мъ; и҆ реко́хъ: сѐ а҆́зъ є҆́смь, послѝ мѧ̀. И҆ речѐ: и҆дѝ и҆ рцы̀ лю́демъ си̑мъ: слꙋ́хомъ ᲂу҆слы́шите, и҆ не ᲂу҆разꙋмѣ́ете: и҆ ви́дѧще, ᲂу҆́зрите, и҆ не ᲂу҆ви́дите: Ѡ҆дебелѣ́ бо се́рдце люде́й си́хъ, и҆ ᲂу҆ши́ма свои́ма тѧ́жкѡ слы́шаша, и҆ ѻ҆́чи своѝ смѣжи́ша: да не когда̀ ᲂу҆́зрѧтъ ѻ҆чи́ма, и҆ ᲂу҆ши́ма ᲂу҆слы́шатъ, и҆ се́рдцемъ ᲂу҆разꙋмѣ́ютъ, и҆ ѡ҆братѧ́тсѧ и҆ и҆сцѣлю̀ ѧ҆̀. И҆ реко́хъ: доко́лѣ гдⷭ҇и; и҆ речѐ: до́ндеже ѡ҆пꙋстѣ́ютъ гра́ди, ѿ є҆́же ненаселє́нымъ бы́ти, и҆ до́мы, ѿ є҆́же не бы́ти человѣ́кѡмъ, и҆ землѧ̀ ѡ҆ста́нетсѧ пꙋста̀. И҆ посе́мъ продолжи́тъ бг҃ъ человѣ́ки, и҆ ᲂу҆мно́жатсѧ ѡ҆ста́вльшїисѧ на землѝ.
Прокі́менъ, ѱало́мъ л҃д, гла́съ ѕ҃: Воста́ни гдⷭ҇и, и҆ вонмѝ сꙋдꙋ̀ моемꙋ̀. Сті́хъ: Сꙋдѝ гдⷭ҇и ѡ҆би́дѧщыѧ мѧ̀.