Въ то́йже пѧто́къ повече́рїе глаго́лемъ вели́кое.

На повече́рїи пое́мъ настоѧ́щїй канѡ́нъ, творе́нїе ст҃а́гѡ ѻ҆тца̀ господи́на а҆ндре́а кри́тскагѡ, і҆ерⷭ҇лимі́ты. Гла́съ а҃.

Пѣ́снь а҃.

І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀, мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Припѣ́въ: Сла́ва тебѣ̀ бж҃е на́шъ, сла́ва тебѣ̀.

Ме́ртва четверодне́вна воскр҃си́въ сп҃се мо́й ла́зарѧ, тлѝ и҆змѣни́лъ є҆сѝ мы́шцею высо́кою, и҆ показа́лъ є҆сѝ ꙗ҆́кѡ си́льный вла́сть твою̀.

Возгласи́въ ла́зарѧ и҆з̾ гро́ба, а҆́бїе воскр҃си́лъ є҆сѝ: но а҆́дъ до́лѣ го́рцѣ рыда́ше, и҆ стенѧ̀ трепета́ше, сп҃се, вла́сти твоеѧ̀.

Прослези́лсѧ є҆сѝ гдⷭ҇и, над̾ ла́заремъ, показꙋ́ѧ воплоще́нїе смотре́нїѧ твоегѡ̀, и҆ ꙗ҆́кѡ є҆стество́мъ бг҃ъ сы́й, є҆стество́мъ по на́мъ бы́лъ є҆сѝ чл҃вѣ́къ.

Ма́рѳины сле́зы и҆ марі́ины ᲂу҆толи́лъ є҆сѝ гдⷭ҇и, и҆з̾ ме́ртвыхъ ла́зарѧ воскр҃си́въ сп҃се, и҆ показа́въ ѡ҆дх҃новле́нна ме́ртваго вла́стїю твое́ю.

Зако́номъ є҆стества̀ человѣ́ча вопроси́лъ є҆сѝ влⷣко: гдѣ̀ положе́нъ бы́сть ла́зарь; показꙋ́ѧ всѣ̑мъ сп҃се, и҆́стинное є҆́же къ на́мъ смотре́нїе твоѐ.

Закле́пы сокрꙋши́лъ є҆сѝ тогда̀ а҆́дѡвы, возгласи́въ ла́зарѧ, и҆ держа́вꙋ стрѧ́слъ є҆сѝ борца̀, и҆ покори́лъ є҆сѝ пре́жде крⷭ҇та̀, трепета́ти тебѐ є҆ди́не сп҃се.

Свѧ́знѧ ла́зарѧ, ѿ а҆́да держи́маго влⷣко, ꙗ҆́кѡ бг҃ъ предвари́лъ є҆сѝ, и҆ разрѣши́лъ є҆сѝ ѿ ᲂу҆́зъ: къ твоемꙋ́ бо всѧ̑ си́льне, и҆́дꙋтъ повелѣ́нїю.

Сла́ва: Ѻ҆ц҃а̀ просла́вимъ, сн҃а, и҆ дх҃а, трⷪ҇цꙋ нераздѣ́льнꙋю, во є҆ди́ницѣ є҆стества̀, и҆ со а҆́гг҃лы ю҆̀, ꙗ҆́кѡ є҆ди́наго несозда́ннаго бг҃а славосло́вимъ.

И҆ ны́нѣ, бг҃оро́диченъ: Непрело́жнѡ родила̀ є҆сѝ дв҃о мт҃и созда́телѧ є҆стества̀, ѿ ст҃а́гѡ дх҃а по бл҃говоле́нїю ѻ҆́ч҃ꙋ бы́вша є҆́же є҆смы̀, кромѣ̀ и҆змѣне́нїѧ и҆ смѣше́нїѧ.

Пѣ́снь в҃.

І҆рмо́съ: Вонмѝ нб҃о и҆ возглаго́лю, и҆ воспою̀ хрⷭ҇та̀, є҆ди́наго чл҃вѣколю́бца.

Сла́ва тебѣ̀ возгласи́вшемꙋ то́кмѡ, и҆ и҆з̾ гро́ба ме́ртва четверодне́вна дрꙋ́га воздви́гшемꙋ ла́зарѧ.

Оу҆слы́ша гла́са твоегѡ̀ бездꙋ́шный, и҆ ѡ҆дꙋшевле́нъ ѿ ме́ртвыхъ воста̀ а҆́бїе, сла́вѧ тѧ̀ гдⷭ҇и.

Повелѣ́нїе живоно́снагѡ гла́са твоегѡ̀ прїи́мъ, смердѧ́щїй воста̀ ѿ гро́ба, сп҃се мо́й, ла́зарь.

Прослези́лсѧ є҆сѝ над̾ дрꙋ́гомъ сп҃се мо́й, ᲂу҆вѣрѧ́ѧ на́ше, ꙗ҆́коже носи́лъ є҆сѝ, є҆стество̀, и҆ сего̀ воскр҃си́лъ є҆сѝ.

Вострепета̀ ꙗ҆́коже ви́дѣ а҆́дъ, па́ки текꙋ́ща а҆́бїе свѧ́зана ᲂу҆кро́йми, гла́сомъ къ здѣ́шнемꙋ животꙋ̀.

Оу҆жасо́шасѧ є҆вре́йстїи наро́ди є҆гда̀ возгласи́въ сп҃се, воскр҃си́лъ є҆сѝ сло́вомъ смердѧ́щаго ла́зарѧ.

Сотрѧсо́шасѧ сокрѡ́вища а҆́дѡва, ꙗ҆́кѡ ѡ҆дꙋшевле́нъ бы́сть а҆́бїе ни́зꙋ ла́зарь, тогда̀ гла́сомъ ѡ҆живи́вшагѡ.

Пѣ́снь г҃.

І҆рмо́съ: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла. то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ꙗ҆зы̑къ и҆скꙋпѝ.

Чꙋ́до стра́нное и҆ пресла́вное, ка́кѡ созда́тель всѣ́хъ, є҆́же не невѣ́дѧше, ꙗ҆́кѡ не вѣ́дый вопроша́ше: гдѣ̀ лежи́тъ, є҆го́же рыда́ете; гдѣ̀ погребе́сѧ ла́зарь, є҆го́же пома́лѣ и҆з̾ ме́ртвыхъ жи́ва ва́мъ воскр҃шꙋ̀ а҆́зъ;

Ка́мень, є҆го́же тебѣ̀ привали́ша погре́бшїи тѧ̀, сего̀ взѧ́ти і҆и҃съ повелѣ́въ, а҆́бїе воскр҃си́ тѧ, возгласи́въ тебѣ̀: ла́заре воста́ни, грѧдѝ ко мнѣ̀, да твоегѡ̀ а҆́дъ ᲂу҆страши́тсѧ гла́са.

Ма́рѳа и҆ марі́а гдⷭ҇и, рыда́ньми вопїѧ́стѣ: сѐ є҆го́же люби́лъ є҆сѝ четверодне́венъ смерди́тъ: а҆́ще бы є҆сѝ бы́лъ здѣ̀, тогда̀ не бы̀ ᲂу҆́мерлъ ла́зарь. но ꙗ҆́кѡ неразлꙋ́ченъ вездѣ̀, сего̀ а҆́бїе возгласи́въ воздви́глъ є҆сѝ.

Пролїѧ́въ над̾ дрꙋ́гомъ сле́зы смотре́нїѧ ра́ди, показа́лъ є҆сѝ пло́ть ѿ на́съ взе́млемꙋю, сꙋщество́мъ не мнѣ́нїемъ сп҃се, соедини́вшꙋюсѧ тебѣ̀, и҆ ꙗ҆́кѡ чл҃вѣколю́бецъ бг҃ъ, сего̀ а҆́бїе возгласи́въ воздви́глъ є҆сѝ.

Оу҆вы̀ мнѣ̀ вои́стиннꙋ, ны́нѣ погибо́хъ, вопїѧ́ше а҆́дъ, си́це возглаша́ше сме́рти глаго́лѧ: сѐ назѡрѧни́нъ дѡ́льнѧѧ подвиза̀, и҆ ᲂу҆тро́бꙋ мою̀ посѣка́ѧ, бездыха́нна ме́ртва возгласи́въ воздви́же.

Гдѣ̀ є҆вре́йское безꙋ́мїе; гдѣ̀ невѣ́рїе; доко́лѣ чꙋжді́и, доко́лѣ лестцы̀, зритѐ ᲂу҆ме́ршаго гла́сомъ и҆сходѧ́ща, и҆ не вѣ́рꙋете хрⷭ҇тꙋ̀, вои́стиннꙋ сы́нове тьмы̀ всѝ вы̀.

Сла́ва: Є҆ди́наго ѿ трⷪ҇цы вѣ́мъ тѧ̀, а҆́ще и҆ воплоти́лсѧ є҆сѝ, є҆ди́наго и҆ сла́влю, сн҃а воплоще́нна, ѿ бцⷣы безсѣ́меннѡ прозѧ́бшаго, и҆ со ѻ҆ц҃е́мъ и҆ дх҃омъ є҆ди́наго сн҃а славосло́вима.

И҆ ны́нѣ, бг҃оро́диченъ: Стра́нное и҆ стра́шное видѣ́нїе смотре́нїѧ, є҆́же предзрѣ́ша нело́жнїи прⷪ҇ро́цы дв҃ꙋ бцⷣꙋ: безсѣ́меннѡ ᲂу҆́бѡ заче́ншꙋю, и҆ нетлѣ́ннѡ ро́ждшꙋю бг҃а, пребыва́ющꙋю же по ржⷭ҇твѣ̀ чⷭ҇тꙋю.

Пѣ́снь д҃.

І҆рмо́съ: Взѧ́тсѧ сл҃нце, и҆ лꙋна̀ ста̀ въ чи́нѣ свое́мъ, возне́слсѧ є҆сѝ долготерпѣли́ве на дре́во, и҆ водрꙋзи́лъ є҆сѝ на не́мъ цр҃ковь твою̀.

Прослези́лсѧ є҆сѝ гдⷭ҇и над̾ ла́заремъ, показа́въ ꙗ҆́кѡ человѣ́къ є҆сѝ, и҆ воздви́глъ є҆сѝ влⷣко ᲂу҆ме́ршаго, и҆ показа́лъ є҆сѝ лю́демъ, ꙗ҆́кѡ сн҃ъ є҆сѝ бж҃їй.

Бездыха́нный ᲂу҆слы́ша повелѣ́нїе твоѐ, грѧдѝ во́нъ ла́заре, текі́й воста́ше съ пелена́ми, и҆ скака́ше, бл҃же, показꙋ́ѧ держа́вꙋ твою̀.

Ма́рѳины сле́зы и҆ марі́ины ᲂу҆толи́лъ є҆сѝ хрⷭ҇тѐ бж҃е, возгласи́въ ла́зарѧ самовла́стнѡ, воздви́глъ є҆сѝ гла́сомъ, и҆ поклони́сѧ тебѣ̀.

Прослези́всѧ ꙗ҆́кѡ человѣ́къ над̾ ла́заремъ, воздви́глъ є҆сѝ є҆го̀ ꙗ҆́кѡ бг҃ъ. вопроси́лъ є҆сѝ: гдѣ̀ погребе́сѧ четверодне́вный; ᲂу҆вѣрѧ́ѧ бл҃же, вочл҃вѣ́ченїе твоѐ.

Стрⷭ҇ти зна́мєнїѧ и҆ крⷭ҇та̀ твоегѡ̀, ᲂу҆вѣрѧ́ти хотѧ̀ бл҃же, а҆́дово несы́тное чре́во растерза́въ, возста́вилъ є҆сѝ ꙗ҆́кѡ бг҃ъ четверодне́внаго.

Кто̀ ви́дѣ, кто̀ слы́ша, ꙗ҆́кѡ воста̀ человѣ́къ ме́ртвый смердѧ́щїй; и҆лїа̀ ᲂу҆́бѡ воздви́же и҆ є҆лїссе́й, но не ѿ гро́ба, но нижѐ четверодне́вна.

Пое́мъ твоѐ гдⷭ҇и, могꙋ́тство, пое́мъ и҆ стрⷭ҇ти хрⷭ҇тѐ: ѻ҆́нѣмъ бо ꙗ҆́кѡ бл҃гоꙋтро́бенъ чꙋдодѣ́йствовалъ є҆сѝ, си́ми же смотри́тельнѡ ꙗ҆́тъ є҆сѝ ꙗ҆́кѡ человѣ́къ.

Бг҃ъ є҆сѝ и҆ человѣ́къ, и҆́стинствꙋѧй вещьмѝ и҆ и҆мены̀, предста́лъ є҆сѝ гро́бꙋ пло́тїю сло́ве, и҆ воздви́глъ є҆сѝ ꙗ҆́кѡ бг҃ъ четверодне́внаго.

Оу҆жасо́шасѧ влⷣко, є҆вре́йстїи наро́ди, ꙗ҆́кѡ ви́дѣша воста́вша ме́ртва и҆з̾ гро́ба ла́зарѧ со гла́сомъ твои́мъ, и҆ пребы́ша непокорли́ви чꙋдесє́мъ твои̑мъ.

Сла́ва: Безнача́льнѡ возсїѧ́лъ є҆сѝ ѿ ѻ҆ц҃а̀ твоегѡ̀, ꙗ҆́кѡ є҆ди́нъ сы́й ѿ трⷪ҇цы сп҃се, въ лѣ́то въ дс҃ѣ и҆з̾ дв҃ственныхъ ты̀ проше́лъ є҆сѝ крове́й, пло́ть взе́мъ пресꙋ́щественный.

И҆ ны́нѣ, бг҃оро́диченъ: Зача́тїе безсѣ́менное бцⷣы, ржⷭ҇тво̀ кромѣ̀ стра́сти тлѣ́нїѧ: бг҃ъ бо ѻ҆боѧ̑ чꙋдодѣ́йствовавый и҆стощѝ себѐ, да на́мъ соедини́тсѧ.

Пѣ́снь є҃.

І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆ и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Жи́знь сы́й гдⷭ҇и, и҆ свѣ́тъ и҆́стинный, ла́зарѧ возгласи́въ воскр҃си́лъ є҆сѝ: ꙗ҆́кѡ си́ленъ бо всѣ̑мъ показа́лъ є҆сѝ, ꙗ҆́кѡ бг҃ъ живы́хъ и҆ ме́ртвыхъ є҆сѝ.

Нестерпи́мое твоѐ повелѣ́нїе і҆и҃се, не терпѧ̀ а҆́дъ мно́гихъ прїе́мый ᲂу҆боѧ́сѧ, и҆ четверодне́вна сꙋ́ща ла́зарѧ, со гла́сомъ жи́ва, а҆ не ме́ртва даѧ́ше.

Пе́рсть совокꙋ́пль дꙋ́хꙋ, дре́вле бре́нїе дꙋ́хомъ жи́зни, ѡ҆дꙋши́вый сло́ве сло́вомъ твои́мъ: и҆ ны́нѣ же сло́вомъ воскр҃си́лъ є҆сѝ ѿ тлѝ дрꙋ́га и҆з̾ преиспо́днихъ.

Ма́нїю твоемꙋ̀ гдⷭ҇и, сопроти́висѧ никто́же: є҆гда́ бо ме́ртваго гласи́лъ є҆сѝ ла́зарѧ, а҆́бїе бездыха́нный востава́ше, и҆ ᲂу҆́зы носѧ̀, нога́ма хожда́ше.

Ѽ і҆ꙋде́йское безꙋ́мїе! ѽ ѡ҆мраче́нїе врагѡ́въ! кто̀ ви́дѣ мертвеца̀ и҆з̾ гро́ба востаю́ща; и҆лїа̀ дре́вле воскр҃сѝ, но не ѿ гро́ба, но нижѐ четверодне́вна.

Непобѣди́ме, долготерпѣли́ве, всѧ̑ на́съ ра́ди творѧ́й ꙗ҆́кѡ бг҃ъ, и҆ терпѧ́й ꙗ҆́кѡ человѣ́къ, прича́стники всѧ̑ ны̀ сотворѝ црⷭ҇твїѧ твоегѡ̀, мл҃твами ла́заревыми.

Сла́ва: Пребезнача́льнаѧ, собезнача́льнаѧ, є҆диночⷭ҇тна́ѧ трⷪ҇це, ѻ҆́ч҃е вседержи́телю, и҆ сн҃е, и҆ дш҃е ст҃ы́й, є҆ди́нице ст҃а́ѧ трїѷпоста́снаѧ, сꙋ́щыѧ ѿ а҆да́ма сп҃са́й, вѣ́рнѡ тѧ̀ воспѣва́ющыѧ.

И҆ ны́нѣ, бг҃оро́диченъ: Пречⷭ҇тое чре́во твоѐ ѡ҆ст҃ѝ чⷭ҇таѧ, пло́ть и҆з̾ негѡ̀ прїе́мый пребж҃е́ственный, въ трⷪ҇цѣ покланѧ́емый, и҆з̾ ѻ҆ц҃а̀ сло́во, и҆ съ дх҃омъ бг҃ъ.

Пѣ́снь ѕ҃.

І҆рмо́съ: Ѿве́рглъ мѧ̀ є҆сѝ во глꙋбины̑ се́рдца морска́гѡ, и҆ спа́слъ є҆сѝ мѧ̀ сп҃се ѿ рабо́ты сме́ртныѧ, и҆ разрѣши́лъ є҆сѝ ᲂу҆́зы беззако́нїй мои́хъ.

Вопроси́лъ є҆сѝ: гдѣ́ є҆сть; всѧ̑ вѣ́дый, прослези́лсѧ же є҆сѝ сп҃се, ꙗ҆́кѡ чл҃вѣ́къ є҆стество́мъ, воздви́глъ мѧ̀ є҆сѝ ме́ртва повелѣ́нїемъ твои́мъ.

Возгласи́лъ мѧ̀ є҆сѝ сп҃се, и҆з̾ а҆́да преиспо́днѧгѡ, вопїе́тъ ла́зарь къ тебѣ̀ разрꙋши́телю а҆́да, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.

Ѡ҆дѣ́ѧлъ мѧ̀ є҆сѝ сп҃се, въ бре́нное тѣ́ло, и҆ вдохнꙋ́лъ мѝ є҆сѝ жи́знь, и҆ ви́дѣхъ свѣ́тъ тво́й, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.

Ѡ҆дꙋши́лъ є҆сѝ ты̀, бездыха́нный ѡ҆́бразъ пло́ти моеѧ̀ сп҃се, стѧгнꙋ́лъ мѧ̀ є҆сѝ костьмѝ и҆ жи́лами, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.

Всеснѣ́дное растерза́въ чре́во а҆́дово, и҆сто́ргнꙋлъ мѧ̀ є҆сѝ сп҃се, твое́ю вла́стїю, и҆ воздви́глъ мѧ̀ є҆сѝ ме́ртва повелѣ́нїемъ твои́мъ.

Носи́лъ є҆сѝ сп҃се, смѣше́нїе моѐ всецѣ́ло: сохрани́лъ же є҆сѝ чи́стꙋ пречⷭ҇тꙋю ᲂу҆тро́бꙋ, и҆з̾ неѧ́же проше́лъ є҆сѝ воплоти́всѧ, є҆ди́нъ сы́й трⷪ҇цы.

Сла́ва, трⷪ҇ченъ: Трⷪ҇це ст҃а́ѧ, прославлѧ́ю твоѐ бл҃гоꙋтро́бїе, и҆ со а҆́гг҃лы пою̀ трист҃ꙋ́ю пѣ́снь: поми́лꙋй дꙋ́шы на́съ воспѣва́ющихъ тѧ̀.

И҆ ны́нѣ, бг҃оро́диченъ: Въ пречⷭ҇тꙋю твою̀ ᲂу҆тро́бꙋ вни́де сло́во, соблюде́ же па́ки по ржⷭ҇твѣ̀ сїю̀ чⷭ҇тꙋю, бг҃ороди́тельнице, чꙋ́до вои́стиннꙋ пресла́вное.

Пѣ́снь з҃.

І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ, и҆ бл҃гословлѧ́хꙋ глаго́люще: бл҃гослове́нъ бг҃ъ ѻ҆тє́цъ на́шихъ.

Над̾ мертвеце́мъ прослези́лсѧ є҆сѝ сп҃се чл҃вѣколю́бче: да пока́жеши всѣ̑мъ лю́демъ, ꙗ҆́кѡ бг҃ъ сы́й, на́съ ра́ди человѣ́къ ꙗ҆ви́лсѧ є҆сѝ, и҆ во́лею прослези́лсѧ є҆сѝ, ѡ҆́бразы на́мъ предлага́ѧ серде́чныѧ любвѐ.

Четверодне́вный ла́зарь сп҃се, ꙗ҆́кѡ ᲂу҆слы́ша ни́зꙋ гла́съ тво́й, воста́въ воспѣ́ тѧ, и҆ ра́дꙋѧсѧ си́це вопїѧ́ше: ты̀ бг҃ъ и҆ созда́тель мо́й, тебѣ̀ покланѧ́юсѧ, и҆ пою̀ воскр҃си́вшаго мѧ̀.

А҆́ще и҆ ᲂу҆́зами ѡ҆бложе́нъ є҆́смь, ла́зарь ни́зꙋ вопїѧ́ше свободи́телю: но ника́коже во чре́вѣ пребꙋ́дꙋ а҆́довѣ, а҆́ще то́кмѡ воззове́ши мѧ̀, ла́заре, грѧдѝ во́нъ: ты́ бо свѣ́тъ мо́й и҆ живо́тъ.

Молю́ тѧ ла́заре, а҆́дъ речѐ, воста́ни, и҆зы́ди ѿ закле́пѡвъ мои́хъ ско́рѡ, ѿидѝ ᲂу҆́бѡ: добро́ бо мнѣ̀ є҆ди́наго рыда́ти го́рцѣ ѿе́млема, не́жели всѣ́хъ, и҆̀хже пре́жде а҆́лчѧ поглоти́хъ.

Ѽ что̀ косни́ши ла́заре, глаго́летъ, грѧдѝ во́нъ, зове́тъ стоѧ̀ дрꙋ́гъ тво́й: и҆зы́ди ᲂу҆̀бо, да и҆ а҆́зъ ѡ҆сла́бꙋ прїимꙋ̀, ѿне́лѣже бо тѧ̀ снѣдо́хъ, на блева́нїе пи́ща ᲂу҆стро́исѧ мѝ.

Что̀ не воста́неши ла́заре ско́рѡ, воззва̀ и҆з̾ до́лꙋ а҆́дъ рыда́ѧ; что̀ не а҆́бїе воскре́съ тече́ши ѿсю́дꙋ; да не и҆ дрꙋги́хъ мѝ плѣни́тъ хрⷭ҇то́съ, воскр҃си́въ тѧ̀.

Оу҆дивлѧ́емь бы́лъ є҆сѝ влⷣко хрⷭ҇тѐ, чꙋ̑днаѧ тогда̀ содѣ́лавъ мнѡ́гаѧ, свѣ́тъ бо слѣпы̑мъ, глꙋхи̑мъ же ᲂу҆́шы ѿве́рзлъ є҆сѝ сло́вомъ, и҆ дрꙋ́га ла́зарѧ и҆з̾ ме́ртвыхъ, ꙗ҆́кѡ бг҃ъ возгласи́въ воздви́глъ є҆сѝ.

Сла́ва, трⷪ҇ченъ: Трⷪ҇ческꙋю воспои́мъ пѣ́снь, сла́вѧще безнача́льнаго ѻ҆ц҃а̀, и҆ сн҃а, и҆ дх҃а пра́ваго, є҆ди́нственное є҆ди́но сꙋщество̀, є҆́же трⷪ҇чески воспои́мъ: ст҃ъ, ст҃ъ, ст҃ъ є҆сѝ трⷪ҇це.

И҆ ны́нѣ, бг҃оро́диченъ: Ꙗ҆́кѡ є҆ди́наго ѿ трⷪ҇цы тѧ̀ хрⷭ҇тѐ сла́вимъ, ꙗ҆́кѡ ѿ дв҃ы вопло́щьсѧ, кромѣ̀ преложе́нїѧ человѣ́чески всѧ̑ претерпѣ́лъ є҆сѝ, не ѿстꙋ́пль є҆стества̀ ѻ҆ч҃еска і҆и҃се, а҆́ще и҆ соедини́лсѧ є҆сѝ на́мъ.

Пѣ́снь и҃.

І҆рмо́съ: Нб҃са̀ нб҃съ, и҆ вода̀ ꙗ҆́же превы́ше нб҃съ, бл҃гослови́те, по́йте гдⷭ҇а, и҆ превозноси́те є҆го̀ во вѣ́ки.

Творе́цъ и҆ содержи́тель всѣ́хъ, за млⷭ҇рдїе во виѳа́нїю прїи́де, воздви́гнꙋти ла́зарѧ.

Четверодне́вный смердѧ̀, и҆ пово́йми ѡ҆бѧ́занъ, и҆змѣни́сѧ дыха́нїемъ бездыха́нный, возгласи́вшꙋ тѝ гдⷭ҇и.

І҆ꙋде́йстїи лю́дїе, ꙗ҆́кѡ ви́дѣша ᲂу҆ме́ршаго, твои́мъ гла́сомъ воста́вша хрⷭ҇тѐ, распыха́хꙋсѧ.

Ѡ҆мраче́ннїи ѡ҆ свѣ́тѣ і҆ꙋде́є, что̀ не вѣ́рꙋете ла́заревꙋ воста́нїю, хрⷭ҇то́вꙋ начина́нїю;

Да ра́дꙋетсѧ сїѡ́нъ, и҆ да пое́тъ жизнода́вца, воскр҃си́вшаго сло́вомъ ѿ гро́ба ла́зарѧ.

Во́и нбⷭ҇нїи, и҆ ро́дъ земны́хъ воспѣ́ша тѧ̀, є҆гда̀ сп҃се мо́й ла́зарѧ воздви́глъ є҆сѝ.

Сла́ва: Со ѻ҆ц҃е́мъ и҆ сн҃омъ дх҃а славосло́влю и҆ поѧ̀ немо́лчнѡ взыва́ю: трист҃ы́й, сла́ва тебѣ̀.

И҆ ны́нѣ, бг҃оро́диченъ: Тебѐ бл҃гословлю̀ и҆ покланѧ́юсѧ ро́ждшемꙋсѧ и҆з̾ дв҃ы, не разлꙋ́чшꙋсѧ прⷭ҇то́ла ст҃ы́ѧ сла́вы твоеѧ̀.

Пѣ́снь ѳ҃.

І҆рмо́съ: Сотворѝ держа́вꙋ мы́шцею свое́ю: низложи́ бо си̑льныѧ со престѡ́лъ, и҆ вознесѐ смирє́нныѧ бг҃ъ і҆и҃левъ. въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Да пое́тъ чꙋ́до виѳа́нїа съ на́ми: въ не́й бо прослези́сѧ созда́тель, зако́номъ є҆стества̀ пло́ти, ла́зарѧ воскр҃ша́ѧ, и҆ ма́рѳины сле́зы про́чее, и҆ пла́чь марі́инъ въ ра́дость прелага́ѧ, мертвеца̀ воздви́глъ є҆́сть.

Оу҆вѣрѧ́ѧ сло́ве, воскрⷭ҇нїе твоѐ, призва́лъ є҆сѝ ла́зарѧ и҆з̾ гро́ба, и҆ воздви́глъ є҆сѝ ꙗ҆́кѡ бг҃ъ, да пока́жеши лю́демъ бг҃а же и҆ чл҃вѣ́ка вкꙋ́пѣ вои́стиннѣ сꙋ́ща, и҆ воздви́гша хра́мъ тѣлесѐ твоегѡ̀.

Стрѧ́слъ є҆сѝ врата̀ и҆ верєѝ желѣ̑зныѧ, ᲂу҆страши́лъ є҆сѝ а҆́дъ гла́сомъ твои́мъ, ᲂу҆жасе́сѧ же съ ни́мъ и҆ сме́рть а҆́бїе, ꙗ҆́кѡ ви́дѣша ла́зарѧ сп҃се, сꙋ́ща въ ни́хъ ᲂу҆́зника, ѡ҆дꙋшевле́нна гла́сомъ и҆ воскре́сша.

Оу҆жасо́шасѧ всѝ, ꙗ҆́кѡ ви́дѣша тѧ̀ сп҃се слезѧ́ща, ла́зарѧ ᲂу҆ме́рша, и҆ глаго́лахꙋ наро́ди: ви́ждь, ка́кѡ є҆го̀ люблѧ́ше. а҆́бїе ᲂу҆́бѡ возгласи́лъ є҆сѝ є҆го̀, и҆ воста́въ бездыха́нный, ѿложѝ тлѣ́нїе повелѣ́нїемъ твои́мъ.

Потрѧсо́шасѧ врата̀, сокрꙋши́шасѧ верєѝ, разрѣши́шасѧ ᲂу҆́зы ме́ртвагѡ гла́сомъ си́лы хрⷭ҇то́вы, и҆ а҆́дъ го́рькѡ воздыха́ше рыда́ѧ, и҆ свои̑мъ вопїѧ́ше: ᲂу҆вы̀ мнѣ̀, кі́й и҆ ѿкꙋ́дꙋ гла́съ ѡ҆живлѧ́ѧй мє́ртвыѧ;

Воста́ни ѿсю́дꙋ послꙋ́шавъ гла́са, дрꙋ́гъ бо тво́й во́нъ приглаша́етъ тѧ̀: се́й є҆́сть пре́жде воскр҃си́вый мє́ртвыѧ. и҆лїа̀ ᲂу҆́бѡ воздви́же ме́ртва, и҆ є҆лїссе́й кꙋ́пнѡ: но се́й бѣ̀ ѻ҆́нѣми и҆ глаго́лѧй и҆ дѣ́йствꙋѧй.

Пое́мъ твою̀ сло́ве непобѣди́мꙋю крѣ́пость: костьми́ бо и҆ жи́лами ᲂу҆ме́рша воздви́глъ є҆сѝ сло́вомъ твои́мъ, ꙗ҆́кѡ всѣ́хъ созда́тель, и҆ сего̀ воскр҃си́лъ є҆сѝ сп҃се, ѿ преиспо́днихъ, ꙗ҆́коже вдо́выѧ сы́на сꙋ́ща на ѻ҆дрѐ.

Сла́ва: Трⷪ҇це всест҃а́ѧ, ѻ҆́ч҃е безнача́льный бж҃е, собезнача́льный сн҃е и҆ бж҃е́ственный сло́ве, ᲂу҆тѣ́шителю бл҃гі́й, дш҃е ст҃ы́й бж҃їй: є҆ди́ный и҆ трисл҃нечный свѣ́те, соесте́ственное сꙋщество̀, є҆ди́не бж҃е и҆ гдⷭ҇и, ᲂу҆ще́дри мі́ръ.

И҆ ны́нѣ, бг҃оро́диченъ: Всѧ̑ сотвори́вый въ премꙋ́дрости і҆и҃се, и҆ во всего́ мѧ ѡ҆болкі́йсѧ и҆з̾ дв҃ы, и҆ ве́сь пребыва́ѧй при́снѡ въ нѣ́дрѣхъ ѻ҆ц҃а̀: ст҃ы́й дх҃ъ тво́й хрⷭ҇тѐ, на ста́до твоѐ низпосла́въ ꙗ҆́кѡ бг҃ъ, ѡ҆сѣнѝ на́съ.

Вмѣ́стѡ Досто́йно, і҆рмо́съ. Сотворѝ держа́вꙋ: