Въ пѧто́къ ве́чера,

во свѣти́льничное ѻ҆бы́чное стїхосло́вїе. На Гдⷭ҇и воззва́хъ, поста́вимъ стїхѡ́въ, і҃. И҆ пое́мъ самогла́сенъ днѐ два́жды, и҆ мч҃нченъ: и҆ првⷣнагѡ ла́зарѧ самогла́сныхъ є҃, творѧ́ще ѧ҆̀ се́дмь. Самогла́сенъ, гла́съ и҃, два́жды.

Дꙋшеполе́знꙋю соверши́вше четыредесѧ́тницꙋ, и҆ ст҃ꙋ́ю седми́цꙋ стрⷭ҇ти твоеѧ̀, про́симъ ви́дѣти чл҃вѣколю́бче, є҆́же просла́вити въ не́й вели̑чїѧ твоѧ̑, и҆ неизрече́нное на́съ ра́ди смотре́нїе твоѐ, є҆диномꙋ́дреннѡ воспѣва́юще: гдⷭ҇и сла́ва тебѣ̀.

Мч҃нченъ: Мч҃нцы гдⷭ҇ни моли́те бг҃а на́шего, и҆ и҆спроси́те дꙋша́мъ на́шымъ мно́жество щедро́тъ, и҆ ѡ҆чище́нїе мно́гихъ прегрѣше́нїй, мо́лимсѧ.

Та́же пое́мъ ст҃а́гѡ ла́зарѧ, самогла́сны є҃. Творе́нїе бл҃гочести́вагѡ царѧ̀, господи́на льва̀ премꙋ́драгѡ. Гла́съ ѕ҃.

Гдⷭ҇и, ла́заревъ хотѧ̀ гро́бъ ви́дѣти, во́лею хотѧ́й во гро́бъ всели́тисѧ вопроша́лъ є҆сѝ: гдѣ̀ положи́сте є҆го̀; ᲂу҆вѣ́дѣвъ же, є҆́же не невѣ́далъ є҆сѝ, и҆ возглаша́лъ, є҆го́же люби́лъ є҆сѝ: ла́заре грѧдѝ во́нъ. и҆ послꙋ́ша бездыха́нный, дыха́нїе даю́щагѡ є҆мꙋ̀, тебѐ сп҃са дꙋша́мъ на́шымъ. [Два́жды.]

Гдⷭ҇и, на гро́бъ четверодне́внагѡ прише́лъ є҆сѝ ла́зарѧ, и҆ над̾ гро́бомъ сле́зы пролїѧ́въ, мертвеца̀ четверодне́вна возста́вилъ є҆сѝ, кла́се живота̀. тѣ́мже сме́рть свѧ́зана бы́сть гла́сомъ: пелєны̀ разрѣши́шасѧ рꙋка́ми. тогда̀ ра́дости и҆спо́лнисѧ мно́жество ᲂу҆чєни́къ, и҆ є҆ди́но ѿ всѣ́хъ слꙋжа́шесѧ согла́сїе: бл҃гослове́нъ є҆сѝ сп҃се, поми́лꙋй на́съ. [Два́жды.]

Гдⷭ҇и, гла́съ тво́й разрꙋшѝ а҆́дово ца́рствїе, и҆ сло́во вла́сти твоеѧ̀ возста́ви и҆з̾ гро́ба четверодне́внаго, и҆ бы́сть ла́зарь пакибытїѧ̀ проѡбраже́нїе сп҃си́тельное. всѧ̑ возмѡ́жна тебѣ̀ влⷣко всѣ́хъ цр҃ю̀, да́рꙋй рабѡ́мъ твои̑мъ ѡ҆чище́нїе, и҆ ве́лїю млⷭ҇ть. [Є҆ди́ножды.]

Гдⷭ҇и, ᲂу҆вѣ́рити хотѧ̀ ᲂу҆ч҃нкѡ́мъ твои̑мъ и҆з̾ ме́ртвыхъ твоѐ воскрⷭ҇нїе, на гро́бъ ла́заревъ прише́лъ є҆сѝ: и҆ возгласи́вшꙋ тѝ сего̀, а҆́дъ плѣни́сѧ, и҆ ѿпꙋстѝ четверодне́вна, вопїю́ща тебѣ̀: бл҃гослове́нный гдⷭ҇и сла́ва тебѣ̀. [Є҆ди́ножды.]

Гдⷭ҇и, пое́мь ᲂу҆ч҃нкѝ твоѧ̑, въ виѳа́нїю прише́лъ є҆сѝ, да возста́виши ла́зарѧ: и҆ прослези́всѧ над̾ ни́мъ зако́номъ є҆стества̀ чл҃вѣ́ча, ꙗ҆́кѡ бг҃ъ того̀ четверодне́вна воздви́глъ є҆сѝ, и҆ вопїѧ́ше тѝ сп҃се: бл҃гослове́нный гдⷭ҇и сла́ва тебѣ̀.

Сла́ва, гла́съ и҃: Предста́въ гро́бꙋ ла́заревꙋ сп҃се на́шъ, и҆ возгласи́въ ме́ртваго, ꙗ҆́кѡ ѿ сна̀ воскр҃си́лъ є҆сѝ: ѿтрѧсѐ тлѣ́нїе нетлѣ́нїѧ ма́нїемъ, и҆ и҆зы́де сло́вомъ, свѧ́занный ᲂу҆кро́йми. всѧ̑ мо́жеши, всѧ̑ тебѣ̀ рабо́таютъ чл҃вѣколю́бче, всѧ̑ повинꙋ́ютсѧ тѝ, сп҃се на́шъ сла́ва тебѣ̀.

И҆ ны́нѣ, гла́съ то́йже: Дꙋшеполе́знꙋю соверши́вше четыредесѧ́тницꙋ, возопїи́мъ: ра́дꙋйсѧ гра́де виѳа́нїе, ѻ҆те́чество ла́зарево. ра́дꙋйтесѧ ма́рѳа и҆ марі́а, тогѡ̀ сєстры̀, заꙋ́тра бо хрⷭ҇то́съ прихо́дитъ, ѡ҆живи́ти глаго́ломъ ᲂу҆ме́ршаго бра́та: є҆гѡ́же гла́съ ᲂу҆слы́шавъ, го́рькїй и҆ несы́тый а҆́дъ, стра́хомъ вострепета́въ, и҆ вельмѝ возстена́въ, ѿпꙋ́ститъ ла́зарѧ ᲂу҆кро́йми ѡ҆бѧ́зана: є҆гѡ́же чꙋдесѝ собо́ръ є҆вре́йскїй ᲂу҆диви́всѧ, съ ва́їемъ и҆ вѣ́твьми того̀ срѧ́щꙋтъ, и҆ ꙗ҆вѧ́тсѧ похвалѧ́ющїи дѣ́ти, є҆мꙋ́же зави́дѧтъ ѻ҆тцы̀. бл҃гослове́нъ грѧды́й во и҆́мѧ гдⷭ҇не цр҃ь і҆и҃левъ.

Вхо́дъ. Свѣ́те ти́хїй:

Прокі́менъ, ѱало́мъ рк҃г, гла́съ ѕ҃: По́мощь на́ша во и҆́мѧ гдⷭ҇а, сотво́ршагѡ нб҃о и҆ зе́млю. Сті́хъ: Ꙗ҆́кѡ а҆́ще не гдⷭ҇ь бы бы́лъ въ на́съ, да рече́тъ ᲂу҆̀бо і҆и҃ль.

Бытїѧ̀ чте́нїе. [Глава̀ м҃ѳ, ст. л҃г, глава̀ н҃, ст. а҃- к҃ѕ.]

Преста̀ і҆а́кѡвъ завѣща́ѧ сынѡ́мъ свои̑мъ: и҆ возложи́въ і҆а́кѡвъ но́зѣ своѝ на ѻ҆́дръ, ᲂу҆́мре, и҆ приложи́сѧ къ лю́демъ свои̑мъ. И҆ припа́дъ і҆ѡ́сифъ на лицѐ ѻ҆тца̀ своегѡ̀, пла́касѧ [го́рькѡ] ѡ҆ не́мъ, и҆ ѡ҆блобыза̀ є҆го̀. И҆ повелѣ̀ і҆ѡ́сифъ рабѡ́мъ свои̑мъ погреба́телємъ погребстѝ ѻ҆тца̀ своего̀: и҆ погребо́ша погреба́тели і҆и҃лѧ. И҆ и҆спо́лнишасѧ є҆мꙋ̀ четы́редесѧть дне́й, та́кѡ бо и҆счислѧ́ютсѧ дні́е погребе́нїѧ: и҆ пла́касѧ є҆гѡ̀ є҆гѵ́петъ се́дмьдесѧтъ дне́й. Є҆гда́ же преидо́ша дні́е пла́ча, глаго́ла і҆ѡ́сифъ къ вельмо́жамъ фараѡ́нѡвымъ, глаго́лѧ: а҆́ще ѡ҆брѣто́хъ бл҃года́ть пред̾ ва́ми, рцы́те ѡ҆ мнѣ̀ во ᲂу҆́ши фараѡ́нꙋ, глаго́люще: Ѻ҆те́цъ мо́й заклѧ́ мѧ пре́жде сконча́нїѧ [своегѡ̀], глаго́лѧ: во гро́бѣ, є҆го́же и҆скопа́хъ себѣ̀ въ землѝ ханаа́ни, та́мѡ мѧ̀ погребѝ ны́нѣ ᲂу҆̀бо возше́дъ погребꙋ̀ ѻ҆тца̀ моего̀, и҆ возвращꙋ́сѧ. и҆ реко́ша фараѡ́нꙋ по словесѝ і҆ѡ́сифовꙋ. И҆ речѐ фараѡ́нъ къ і҆ѡ́сифꙋ: взы́ди, погребѝ ѻ҆тца̀ твоего̀, ꙗ҆́коже заклѧ́ тѧ. И҆ взы́де і҆ѡ́сифъ погребстѝ ѻ҆тца̀ своего̀: и҆ совзыдо́ша съ ни́мъ всѝ рабѝ фараѡ́ни, и҆ старѣ́йшины до́мꙋ є҆гѡ̀, и҆ всѝ старѣ́йшины землѝ є҆гѵ́петскїѧ. И҆ ве́сь до́мъ і҆ѡ́сифовъ, и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀, и҆ сро́дницы є҆гѡ̀: ѻ҆́вцы же и҆ волы̀ ѡ҆ста́виша въ землѝ гесе́мъ. И҆ совзыдо́ша съ ни́мъ и҆ колесни̑цы и҆ кѡ́нницы, и҆ бы́сть по́лкъ вели́къ ѕѣлѡ̀. И҆ прїидо́ша на гꙋмно̀ а҆та́дово, є҆́же є҆́сть ѡ҆б̾ ѻ҆́нъ по́лъ і҆ѻрда́на, и҆ рыда́ша є҆гѡ̀ рыда́нїемъ ве́лїимъ и҆ крѣ́пкимъ ѕѣлѡ̀: и҆ сотворѝ пла́чь ѻ҆тцꙋ̀ своемꙋ̀ се́дмь дне́й. И҆ ви́дѣша жи́тели землѝ ханаа́нскїѧ пла́чь на гꙋмнѣ̀ а҆та́довѣ, и҆ рѣ́ша: пла́чь вели́къ се́й є҆́сть є҆гѵ́птѧнѡмъ: сегѡ̀ ра́ди нарече́сѧ и҆́мѧ мѣ́стꙋ томꙋ̀, пла́чь є҆гѵ́петскъ, є҆́же є҆́сть ѡ҆б̾ ѻ҆́нъ по́лъ і҆ѻрда́на. И҆ сотвори́ша є҆мꙋ̀ та́кѡ сы́нове є҆гѡ̀, ꙗ҆́коже заповѣ́да и҆̀мъ. И҆ взѧ́ша є҆го̀ сы́нове є҆гѡ̀, въ зе́млю ханаа́ню: и҆ погребо́ша є҆го̀ въ пеще́рѣ сꙋгꙋ́бѣй, ю҆́же стѧжа̀ а҆враа́мъ, пеще́рꙋ въ стѧжа́нїе гро́ба ѿ є҆фрѡ́на хеттеа́нина, прѧ́мѡ мамврі́и. И҆ возврати́сѧ і҆ѡ́сифъ во є҆гѵ́петъ, са́мъ и҆ бра́тїѧ є҆гѡ̀, и҆ всѝ совозше́дшїи погребстѝ ѻ҆тца̀ є҆гѡ̀. Ви́дѣвше же бра́тїѧ і҆ѡ́сифовы, ꙗ҆́кѡ ᲂу҆́мре ѻ҆те́цъ и҆́хъ, рѣ́ша: да не когда̀ воспомѧне́тъ ѕло́бꙋ на́шꙋ і҆ѡ́сифъ, и҆ воздаѧ́нїемъ возда́стъ на́мъ за всѧ̑ ѕла̑ѧ, ꙗ҆̀же показа́хомъ є҆мꙋ̀. И҆ прише́дше ко і҆ѡ́сифꙋ, реко́ша: ѻ҆те́цъ тво́й заклѧ̀ пре́жде кончи́ны своеѧ̀, глаго́лѧ: Та́кѡ рцы́те і҆ѡ́сифꙋ: ѡ҆ста́ви и҆̀мъ непра́вдꙋ и҆ грѣ́хъ и҆́хъ, ꙗ҆́кѡ лꙋка̑ваѧ тебѣ̀ показа́ша, и҆ ны́нѣ прїимѝ непра́вдꙋ рабѡ́въ бг҃а ѻ҆тца̀ твоегѡ̀. и҆ пла́касѧ і҆ѡ́сифъ, глаго́лющымъ и҆̀мъ къ немꙋ̀. И҆ прише́дше къ немꙋ̀ реко́ша: сѐ мы̀ тебѣ̀ рабѝ. И҆ речѐ къ ни̑мъ і҆ѡ́сифъ: не бо́йтесѧ, бж҃їй бо є҆́смь а҆́зъ. Вы̀ совѣща́сте на мѧ̀ ѕла̑ѧ, бг҃ъ же совѣща̀ ѡ҆ мнѣ̀ во бл҃га̑ѧ, дабы̀ бы́ло ꙗ҆́коже дне́сь, и҆ препита́лисѧ бы лю́дїе мно́зи. И҆ речѐ и҆̀мъ: не бо́йтесѧ, а҆́зъ препита́ю ва́съ, и҆ до́мы ва́ши. и҆ ᲂу҆тѣ́ши и҆́хъ, и҆ глаго́ла и҆̀мъ по се́рдцꙋ и҆́хъ. И҆ всели́сѧ і҆ѡ́сифъ во є҆гѵ́птѣ са́мъ и҆ бра́тїѧ є҆гѡ̀, и҆ ве́сь до́мъ ѻ҆тца̀ є҆гѡ̀: и҆ поживѐ і҆ѡ́сифъ лѣ́тъ сто̀ де́сѧть. И҆ ви́дѣ і҆ѡ́сифъ є҆фре́мли дѣ́ти до тре́тїѧгѡ ро́да: и҆ сы́нове махі́ра сы́на манассі́ина роди́шасѧ при бе́дрѣхъ і҆ѡ́сифовыхъ. И҆ речѐ і҆ѡ́сифъ бра́тїи свое́й, глаго́лѧ: а҆́зъ ᲂу҆мира́ю: посѣще́нїемъ же посѣти́тъ ва́съ бг҃ъ, и҆ и҆зведе́тъ ва́съ ѿ землѝ сеѧ̀ въ зе́млю, ѡ҆ не́йже клѧ́тсѧ бг҃ъ ѻ҆тцє́мъ на́шымъ, а҆враа́мꙋ, і҆саа́кꙋ, и҆ і҆а́кѡвꙋ. И҆ заклѧ̀ і҆ѡ́сифъ сы́ны і҆и҃лєвы, глаго́лѧ: въ посѣще́нїи, и҆́мже посѣти́тъ ва́съ бг҃ъ, совознеси́те и҆ кѡ́сти моѧ̑ ѿсю́дꙋ съ ва́ми. И҆ сконча́сѧ і҆ѡ́сифъ сы́й лѣ́тъ ста̀ десѧтѝ: и҆ погребо́ша є҆го̀, и҆ положи́ша въ ра́цѣ во є҆гѵ́птѣ.

Прокі́менъ, ѱало́мъ рк҃д, гла́съ д҃: Надѣ́ющїисѧ на гдⷭ҇а, ꙗ҆́кѡ гора̀ сїѡ́нъ не подви́житсѧ во вѣ́къ. Сті́хъ: Ꙗ҆́кѡ не ѡ҆ста́витъ гдⷭ҇ь жезла̀ грѣ́шныхъ на жре́бїй првⷣныхъ.

При́тчей чте́нїе. [Глава̀ л҃а, ст. и҃-л҃в.]

Сы́не, ѿверза́й ᲂу҆ста̀ твоѧ̑ сло́вꙋ бж҃їю, и҆ сꙋдѝ всѧ̑ здра́вѡ. Ѿверза́й ᲂу҆ста̀ твоѧ̑, и҆ сꙋдѝ пра́веднѡ, разсꙋжда́й же ᲂу҆бо́га и҆ не́мощна. Женꙋ̀ до́блю кто̀ ѡ҆брѧ́щетъ, дража́йши є҆́сть ка́менїѧ многоцѣ́ннагѡ такова́ѧ. Дерза́етъ на ню̀ се́рдце мꙋ́жа є҆ѧ̀: такова́ѧ до́брыхъ коры́стей не лиши́тсѧ. Дѣ́лаетъ бо мꙋ́жꙋ своемꙋ̀ бл҃га̑ѧ во всѐ житїѐ. Ѡ҆брѣ́тши во́лнꙋ и҆ ле́нъ, сотворѝ бл҃гопотре́бное рꙋка́ма свои́ма. Бы́сть ꙗ҆́кѡ кора́бль кꙋ́плю дѣ́ющїй, и҆здале́ча собира́етъ себѣ̀ бога́тство. И҆ востае́тъ и҆з̾ но́щи, и҆ дадѐ бра̑шна до́мꙋ, и҆ дѣла̀ рабы́нѧмъ. Оу҆зрѣ́вши село̀ кꙋпѝ: ѿ плодѡ́въ же рꙋ́къ свои́хъ насадѝ стѧжа́нїе. Препоѧ́савши крѣ́пкѡ чре́сла своѧ̑, ᲂу҆тверди́тъ мы́шцы своѧ̑ на дѣ́ло. И҆ вкꙋсѝ, ꙗ҆́кѡ добро̀ є҆́сть дѣ́лати, и҆ не ᲂу҆гаса́етъ свѣти́льникъ є҆ѧ̀ всю̀ но́щь. Ла́кти своѧ̑ простира́етъ на полє́знаѧ, рꙋ́цѣ же своѝ ᲂу҆твержда́етъ на вретено̀. И҆ рꙋ́цѣ своѝ ѿверза́етъ ᲂу҆бо́гомꙋ, дла́нь же прострѐ ни́щꙋ. Не пече́тсѧ ѡ҆ сꙋ́щихъ въ домꙋ̀ мꙋ́жъ є҆ѧ̀, є҆гда̀ гдѣ̀ заме́длитъ: вси́ бо ᲂу҆ неѧ̀ ѡ҆дѣ́ѧни сꙋ́ть. Сꙋгꙋ́ба ѻ҆дѣѧ̑нїѧ сотворѝ мꙋ́жꙋ своемꙋ̀, ѿ вѷссо́на же и҆ порфѵ́ры себѣ̀ ѡ҆дѣѧ̑нїѧ. Сла́венъ быва́етъ во вратѣ́хъ мꙋ́жъ є҆ѧ̀, внегда̀ а҆́ще сѧ́детъ въ со́нмищи со старѣ́йшины жи́тельми землѝ. Плащани̑цы сотворѝ, и҆ продадѐ фїнїкі́анѡмъ, ѡ҆поѧ̑санїѧ же ханане́ѡмъ. Оу҆ста̀ своѧ̑ ѿве́рзе внима́тельнѡ и҆ зако́ннѡ, и҆ чи́нъ заповѣ́да ѧ҆зы́кꙋ своемꙋ̀. Крѣ́постїю и҆ лѣ́потою ѡ҆блече́сѧ, и҆ возвесели́сѧ во дни̑ послѣ̑днїѧ. Тѣ́сны стєзѝ до́мꙋ є҆ѧ̀: бра́шна же лѣ́ностнагѡ не ꙗ҆дѐ. Оу҆ста̀ своѧ̑ ѿве́рзе мꙋ́дрѡ и҆ зако́ннѡ: Ми́лостынѧ же є҆ѧ̀ возста́ви ча̑да є҆ѧ̀, и҆ ѡ҆богати́шасѧ: и҆ мꙋ́жъ є҆ѧ̀ похвалѝ ю҆̀. Мно́ги дщє́ри стѧжа́ша бога́тство, мно́ги сотвори́ша си́лꙋ: ты́ же пред̾ꙋспѣ́ла и҆ превознесла́сѧ є҆сѝ над̾ всѣ́ми. Ло́жнагѡ ᲂу҆гожде́нїѧ, и҆ сꙋ́етныѧ добро́ты же́нскїѧ нѣ́сть въ тебѣ̀: жена́ бо разꙋ́мнаѧ бл҃гослове́на є҆́сть. стра́хъ же гдⷭ҇нь сїѧ̑ да хвали́тъ. Дади́те є҆́й ѿ плодѡ́въ ᲂу҆сте́нъ є҆ѧ̀, и҆ да хвали́мь бꙋ́детъ во вратѣ́хъ мꙋ́жъ є҆ѧ̀.

И҆ про́чее послѣ́дованїе преждеѡсщ҃е́нныхъ ꙗ҆́кѡ ѻ҆бы́чно.

Вѣ́домо бꙋ́ди, ꙗ҆́кѡ ѿ дне́сь нижѐ мч҃нченъ, нижѐ бг҃оро́диченъ, нижѐ ѻ҆смогла́сникъ пое́тсѧ, да́же до сꙋббѡ́ты ст҃а́гѡ ѳѡмы̀.