Приложения

В нем же и о крестном изображении, яко первыми тремя великими персты подобает изображати всякому христианину на лице своем знамение креста.

Глаголанное прежде от лица его к Собору бывшему при нем, в лето 7165-е (1667 г.), при державе царства Великаго Государя-Царя и Великаго князя Алексия Михайловича, всея Великия и Малыя и Белыя России Самодержца.

Зазираху иногда нашему смирению, мне, Никону-Патриарху, приходящий к нам в царствующий град Москву, потреб своих ради, Святыя Восточныя Церкве Святейшии Вселенстии Патриарси: Константиня града Афанасий, и паки святаго града Иерусалима, и святаго града Назарета митрополит Гавриил, и прочии; и поношаху ми много в неисправлении Божественнаго песнопения, и прочих церковных винах. От них же едина есть и сия, яко треми персты, последними, двема малыми с великим палцем соединя, да двема прочими великосредними изобразующе творим на лице нашем знамение креста, от Феодоритова писания неведением внесшееся в печатныя книги, в великия Псалтири со возследованием, и малыя, и прочия рукописныя. А не повелением коего Царя или Патриарха, ниже Собором когда сошедшихся архиерей: прежде бо того вси треми первыми персты изображаху во образ Святыя Троицы, якоже и ныне многих еще видети есть, елицы не ведают Феодоритова писания, якоже в простых мужей, и во всех женах от древняго обычая держащих. И мы, милостию Божиею Российский Патриарх Никон, не токмо себе ползы ища по апостолу, но и прочим, воеже спастися, возбнув убо от сего и разсмотрив яко многая со древнима бывшима и прежде мене святительствовавшими на престоле нашем, нынешняя неслична и несогласна. Ово в словесех Божественнаго Писания, ово в церковных чинех, якоже ми глаголаху они, ничим же иным доумевся внити во двор овчий, и искусити духи лстивыя, познати же истину точию дверми Божественнаго Писания, а не сам собою. Многия убо собра елико возмогох обрести древних харатейных преводов книги славенска языка и сербска. И неудовлихся еще к сему, но болшаго ради уверения, послах и во святую гору Афонскую, в Грецию греческих ради преводов церковных и четьих, еже бы исправити новыя нынешния печатныя книги, и рукописныя неисправленныя их же по желанию моему и получих. И исправих ими елико поспешествовася мне. С ними же и сию настоящую книгу, юже глаголю Скрижали духовныя, или откровение тайн церковных, по умолению нашему посланную от Паисия Вселенскаго Патриарха в лето 7161-е (1653 г.), юже вскоре и превести повелех с греческа языка на славенский, и печатным тиснением издати. К ней же и иныя подобающия вещи, такоже превести повелех с греческа языка на славенский, печатным же тиснением издати повелех, якоже слово премудрейшаго иподиакона Дамаскина Студита о Кресте. В нем же изложено яко треми первыми персты десныя руки изображати подобает всякому христианину на лице своем знамение креста во образ Святыя Единосущныя и Равнославныя Троицы, но новое сие и неприятное Церкви предание, еже печатаное глаголю московския печати, во Псалтирях со возследованием, в предисловии тоя Псалтири, лист 35 и в прочих. Еже глаголю Феодориту и Максииму Греку предати: о его же ми достоит ныне и изложити мудровании, якоже печатано тамо, како он мудрствует. Три персты равно имети вкупе повелевает: великий, иже глаголется палец, да два последних, и прочия тамо чтый да разумеет: в них же полагает Святыя Троицы таинство. Два же перста, вышний указателный, да средний великий вместе сложити, и простерти. Великий убо перст имети глаголет мало наклонно. Им же образует два естества Христова: Божество и человечество; Бог по Божеству, а человек по человечению, во обоем совершен. Вышним убо перстом образовати глаголет Божество, а нижним человечество, понеже сшед от вышних, спасе нижния. Согбение же персту толкует: яко преклонь небеса сниде на землю нашего ради спасения, и прочая тамо речения его неприятая: еже всячески по всему не приемлется Церковию сие предание его. Яко и всякому познати мощно есть, яко не праве сказует обоя таинства. Ни в триех бо перстех, во двою глаголю малых, и в великом пальце, исповедуется добре Святыя Троицы таинство. Ниже во дву, указательнем глаголю и великосреднем извещается употребителне таинство воплощения Божия слова, яко в триех убо предреченных перстех по его мудрованию велие неравенство обрящется Святыя Троицы: и како слышите. Яко аще кто великий палец вознепщует быти вместо Отча лица, всяко возмнится посему Отец быти болии Сына и Духа, великое бо к малому глаголется велико: яко же и великий перст палец к последним малым, глаголется великий. Во Святей же Троице несть первее и последнее, ниже велико и мало, но целы три ипостаси и совершены суть, якоже Великий Афанасий во исповедании православныя веры глаголет. Его же начало. Иже кто хощет спасен быти. И хотяй мудрствовати кто по сему, Арию последовати имать, якоже и он умаляти будет Сына от Отца. Во двух же, указателном глаголю, и великосреднем персте, един простерт, а другий наклонен, по его мудрованию два Сына, и два состава, о Единем Христе Бозе вознепщуется имети. Един убо иже от Отца рожденный, не отлучен Сын от Отца, другий же от Марии рожденный человек, по любви же соединився Слову Божию, и тезоименно тому именуем: и будет посему Несторию еретику помогати, яко же и Феодорит иже (аще есть писавый сие предание) Несторию помагая, внегда на Кирилла Александрийскаго клевеща писа, и на правую веру, на третием Соборе иже во Ефесе, яко же пишет о несториеве ереси в деянии третияго Собора, в начале книги Кормчии на листе осьмом печатаныя на Москве 158-го лета²¹⁹. И о Феодоритове ложнем списании в деянии пятаго Собора, в той же книзе на листе 12. Аще ли же кто восхощет совершенное богословие уведати на несториеву ересь и на оное списание помогающее Несторию (еже два великосредния персты отлучена от прочих, и простерта имети повелевает, и от того мнети по сему два Сына, и два лица: Единаго от Отца не разлучена, яко же и персты три показуют; другаго же разлучена, яко же и та два перста разлучена суть от триех), да слышит внятно о сем, в толковании исповедания православныя веры: еже есть верую во Единаго Бога: в книзе толкования святыя литургии на листе 371-м. Яко Единаго исповедует Сына, от Отца прежде век без Матере рождена, и Того же в последняя от Матере, без Отца. Отец убо благоволи, сиречь добре восхоте, и созда тело своего Слова, Дух же содейстова: зане едино есть действо и сила триех, и Слово едино воплотися и пребысть паки Сын и Слово, якоже бе прежде Сын от Отца без Матере, последи же Сын от Матере без Отца. Не воплотися Отец, ниже Дух: яко же глаголет Великий Афанасий, но токмо Сын, да пребудет Сын Един. Яко же есть рожден от Отца един без страсти, сиречь без жены, сице родися и от Девы истинен Сын без страсти, сиречь без семене мужеска. И есть, и именуется Сын Бога и Отца по Божеству, и Сын истинен человеческий по человечеству. Не два Сына, далече буди хула, но един Сын, соединен со двема естествома Божества, глаголю, и человечества во единей (л. 8) ипостаси, сиречь во Единем Лице. И по сему предреченному истинному свидетелству, аще кто два простертая великосредния персты имать в крестном изображении слагати, и теми образовати хощет Божество и человечество Сына Божия, всячески по всему неприлично творит, сопротивное же паче. Два бо Сына образовати будет: единаго от Отца, а другаго от Матере рожденна, и два лица исповедовати, якоже и Несторий. Но Церковь Святая Православная сию ересь проклинает, учит же и проповедует о Сыне Божии два существа во единем же лице знати: единаго и тогожде Сына прежде воплощения и по воплощении, неразлучна от Отца и Духа по Божеству, аще и воплотися, яко же Сам глаголет, яко Един несмь, но Аз, и пославый Мя Отец. И паки. Яко Аз во Отце, и Отец во Мне есть. И сего ради посему всякому возможно есть познати истину, яко и деже познавается, или исповедуется таинство Святыя Троицы во образовании, или в именех, тамо есть и Сын Божий во дву естеству, Бог по Божеству, а человек по человечеству, лице же Едино познавается, якоже и в триех первых перстех истинно образует, а не якоже по Феодоритову четвероипостасному разумению, еже Единаго Сына в триех перстех, в дву малых и великом пальце исповедовати: в двух же великосредних другаго, по несториеве ереси познавати. И о сем убо тако суть. К сему же известихся о сем и уверихся. наипаче и отонуду: и первее убо о сем ко Вселенныя председателю, Святейшему Патриарху Паисию архиепископу Константиня града вопросителне писах с прочими главизнами церковных вин, киими персты повелевает Святая Восточная Церковь изображати на лице образ Креста; он же соборне вскоре возписали со многими подписавшимися архиерей рукама, еже и в книзе сей напечатавшася на листе 751-м, их же имена числом 39, яко треми токмо первыма персты Святая Восточная Церковь повелевает изображати на лице своем всякому христианину крестное изображение, а не инако. Потом же и настоящаго сего лета 7164-го и к прилучившимся при нас в царствующем сем граде быти потреб своих ради Божия града Антиохии Патриарху Макарию, и Сербския земли града Пеккска Патриарху Гавриилу, и Никейска града митрополиту Григорию, и Молдавскому и Сучавскому митрополиту Гедиону: такоже вопросителне писав послах, яко да подпишут на вопросе моем, како подобает имети о Кресте, коими персты изображати и на лице нашем. Они же вси без закоснения под клятвою подписавше сице. Аще кто не первыма трема великими персты десныя руки изобразует на лице своем образ Креста, да будет проклят, яко арменов подражатель; иже той вопрос и с подписанием их в книзе сей напечатася. Еще же и от сего, внегда прилучися сего же настоящаго лета во обители Чудове святаго архистратига Михаила, на память святаго Мелетия Патриарха Антиохийскаго, Царю быти со всем своим синклитом и множеству народа. Тамо же и Макарию Патриарху Антиохийскому и прочим с ним, во время утренняго пения на чтении пролога, внегда бяше о Мелетии Патриарсе Антиохийстем слово, яко егда показа той Мелетий три персты, и не бысть знамения, егда же два сложив и един к ним пригнув, тогда яко огнь от руки его изыде. И прочая тамо. Тогда Патриарх Макарий возгласи к сему, мне на сие подвигшу его, и вопросившу: кия Мелетий три персты показа? Он же рече: мужие всего Православия, слышите: аз преемник и наследник сего святаго Мелетия престолу, вем известно, яко сей святый Мелетий три первыя персты разлучены показа друг от друга, от них же и знамения не бысть. Тыя же паки трие соединив, ими же и знамение показа. И аще кто сими трема персты на лице своем образ Креста не изобразует, но имать творити два последния соединя с великим пальцем, да два великосредния простерты имети, и тем образ Креста изображати, таковый арменоподражатель есть, арменове бо тако воображают на себе крест. К сему же и в Неделю Православия тому же Патриарху Макарию Божия града Антиохии, и Сербскому Патриарху Гавриилу, и Григорию, митрополиту Никейскому в велицей соборней церкви пресвятыя Богородицы Успения, ту сущу Царю и всему синклиту, той преблаженнейший Патриарх Макарий и прочий с ним стояще пред Царем и его синклитом, и пред всем освященным Собором, внегда святым Божиим угодником подвизавшимся за Христа Церковь Святая вечное помяновение совершает, сопротивным же проклятие, показуя сложи три великия персты во образ Пресвятыя и Неразделныя Троицы, сице глаголе, яко сими трема первыма великима персты всякому православному христианину подобает изображати на лице своем крестное изображение. А еже кто по Феодоритову писанию и ложному преданию творит, той проклят есть. Тако же тогда проклинал и Сербский Патриарх Гавриил, и Никейский митрополит Григорий. И егда убо сия бываху делу же, сия богодухновенныя книги в конец (уже) произношашеся, тогда аз, милостию Божиею Российский Патриарх Никон, изволением Божиим, советом же благочестиваго Великаго Государя-Царя и Великаго князя Алексия Михайловича всея Великия и Малыя и Белыя России Самодержца по правилом святых духоносных отец, яже на коеждо лето управления ради церковных вещей повелевают к великому архиерею приходити, повелех собратися всем архиереом сущым во области нашей во уреченный день настоящаго сего лета от создания мира 7164-го. От воплощения же Божия Слова 1656-го, индикта 9, месяца априлиа, в 23 день. Иже и собрашася. Им же с прочими церковными винами изволих и сий новозрелый плод, сию святую книгу во свидетелство на среду предложити, преоблеченную уже в красоту от славнаго греческаго языка во много родословный славенский язык, аще обрящут в ней яковый порок; они же ю пред нами соборне чтоша во многия дни с велиим прилежанием, всяку вещь и всяко слово со опасством разсуждающе. И обретоша ю всячески не токмо безпорочну, но к сему и славе, и похвале, и великому удивлению быти достойну. Видеша бо в ней все сокровище христианскаго Таинства отверсто, и пользу всем неоскудно готову сущу предлежащу, и много о сем Бога благодариша, яко таковое сокровище безценное открыв дарова, его же ниже слыша кто когда. По чтении же тоя книги разсмотривши мы соборне от словес Паисиины грамоты, и иподиакона Дамаскина Слова о Кресте, и от подписавшихся к вопросу нашему Макария Патриарха Антиохийскаго и прочих с ним, яже суть писаны в сей книзе на листе 757-м. К тому же и от держащагося еще древняго обычая до печатных книг Псалтирей, в них же сказуемое Феодоритово и Максимове изложение о крестном изображении печатано, яко трема токмо первыма великима персты изображах на лице своем образ Креста, якоже и ныне многих видети есть, елицы не ведают Феодоритова списания, изгласихом вкупе и о крестнем изображении с прочими церковыми винами утвердити, якоже Святая Восточная Церковь содержит, еже трема первыма великима персты всякому христианину изображати на себе Крест, а еже Феодоритово и Максимове обретаемое в книзе Псалтире со возследованием московския печати, и во иных рукописанных писанно, еже два малыя последния соединити с великим пальцем, ими же неравенство Святыя Троицы показуется, и есть арианство. И еже к тому два великосредния простерты имети, и посему два Сына и два состава о единем Христе Бозе исповедовати, яко Несторию, о нем же зде напреди доволне рекохом, за кую вину неприятие есть Церкви: сия всячески отринути повелехом изрекше правило о сем сице: аще кто отселе ведый не повинится творити крестное изображение на лице своем яко же древле Святая Восточная Церковь прияла есть, и якоже ныне четыре Вселенстии Патриарси со всеми сущими под ними христианы повсюду Вселенныя обретающимися имеют; и якоже зде прежде православный содержаша до печатания слова Феодоритова во Псалтирях со возследованием московския печати, еже трема первыма великима персты десныя руки изображати во образ Святыя и Единосущныя и Неразделныя и Равнопокланяемыя Троицы, но имать творити сие неприятное Церкви, еже соединя два малыя персты с великим пальцем, в них же неравенство Святыя Троицы извещается, и два великосредния простерта суща, в них же заключати два Сына, и два состава по несториеве ереси, якоже прежде рекохом, или инако изображати Крест²²⁰: сего имамы последующу святых отец седми Вселенских Соборов и прочих поместных правилом, и Святыя Восточныя Церкве четырем Вселенским Патриархом, всячески отлучена от Церкве вкупе и с писанием Феодоритовым, якоже и на Пятом прокляша его ложная списания на Кирилла, архиепископа Александрийскаго, и на правую веру, сущая по несториеве ереси, проклинаем и мы. И к сему настоящему правилу и ко прочим вещем Божественнаго Писания обретаемых в книзе сей, и руки своя подписуем лета от создания мира 7164-го, от воплощения же Божия Слова 1656-го, индикта 9, месяца иуниа, 2.

Никон, Божиею милостию Архиепископ

царствующаго великаго града Москвы,

и всея Великия и Малыя и Белыя России Патриарх

Макарий, митрополит Великаго Нова града и Великих Лук. Корнилий, митрополит Казанский и Свияжский. Иона, митрополит Ростовский и Ярославский. Маркел, архиепископ Волотоцкий и Великопермский. Лаврентий, архиепископ Тверский и Кашинский. Иосиф, архиепископ Астраханский и Терский. Макарий, архиепископ Псковский и Изборский. Александр, епископ Коломенский и Коширский. Троицы Живоначалныя Сергиева монастыря архимандрит Иоасаф. Из Владимира Рождественскаго монастыря архимандрит Иосиф. Чюдова монастыря архимандрит Иосиф. Всемилостиваго Спаса Новаго монастыря архимандрит Сергий. Симонова монастыря архимандрит Феодосий. Свияжскаго Богородицкаго монастыря архимандрит Антоний. Андроникова монастыря архимандрит Дионисей. Казанскаго Преображенскаго монастыря архимандрит Прохор. С Костромы Ипатиевскаго монастыря архимандрит Тихон. Из Нижняго Нова града Печерскаго монастыря архимандрит Иларион. Хутыня монастыря архимандрит Евфимий. Пречистые Богородицы Иверскаго монастыря наместник Филофей. Из Ростова Богоявленскаго монастыря архимандрит Дионисей. С Костромы Богоявленскаго монастыря игумен Герасим. Богоявленскаго монастыря из-за торгу архимандрит Аврамий. Знаменскаго монастыря игумен Иосиф. Из Ярославля Спасскаго монастыря строитель Ефрем. Иосифова монастыря Волотскаго архимандрит Тихон. Из Суждаля Спаса Евфимиева монастыря архимандрит Аврамий. Из Нова града Антониева монастыря римлянина архимандрит Макарий. С Унжи Макариева монастыря игумен Карион. С Рязани Спасскаго монастыря архимандрит Боголеп. С Вологды Каменскаго монастыря архимандрит Филарет. Отроча монастыря архимандрит Аврамий. Из Ростова Борисоглебскаго монастыря Сустия игумен Иона. С Рязани Рождества Богородицы Солочинскаго монастыря архимандрит Сергий. С Вологды Прилуцкаго монастыря архимандрит Иона. Великаго Нова града Духова монастыря архимандрит Иаков. С Вологды Корнилиева монастыря игумен Антоний. Переяславля-Залесскаго Никитскаго монастыря игумен Моисей. Новинскаго монастыря игумен Иосиф.

Никон, Божиею милостию Патриарх Московский и всея Русии сыном своим, архимандритом и игуменом, протопопом и всем священником, и диаконом, и причетником

Ведомо нам учинилося, что во святых церквах небрежение велико есть и житие зазорно, и о преданных евангелских повелений и апостолских преданий и святых богоносных отец седми Вселенских Соборов и прочих святых отец, еже должно вам хранити, и не сохраняете тоя, яко же божественный Павел уча ны пишет к Титу, глаголя: во еже обучати же ся всегда к благочестию, трезвению, целомудрию, благоговению и будете, рече, честни, страннолюбивы, не пианицы, не бийцы, не мшелоимцы, не сварливы, но кротцы, смотреливы, не завистливы, не сребролюбцы, учителны, яко же Вселенскаго Собора 19-е правило глаголет: иереи должни суть учити причет церковный и вся люди благоверию и Божественным повелением; паче же иных дний, во всякую неделю всего причта и народа поучати благочестию словесы, яко же предречеся от Божественнаго Писания, избирающем истинная разумения же и судбы, и не преступати еже положенныя пределы и богоносных отец предания, но точию от Божественных Писаний сказывати и учити истинному разумению Божиих Заповедей. Аще ж кто вопросит словесе Божественных Писаний, да не своего ума то сказовати, но якоже церковнии светилницы и учителие своих писаний истолковаша; то бо есть благоволно, еже ведети и умети предания богоносных отец, и потом разрешати вопрошаемая, да не како недоумеюще от себе разрешите, восхотят таковии истиннаго сказания далече отпадут. Небрегущих же иереов, не учащих причетников людей благоверию 58-е апостолское правило первее отлучает; потом, аще в ленности пребывает, от сана измещет. Потщитеся, о презвитери, представити себе делателие непостыдны: правяще слово истинное николи же да не станете в соборе вражду имея на кого, да непрощением Утешителя в день собора молвы не творити и не препирайтеся, но в церкви пребывая молитеся и почитайте книги святыя до часа, вонь же подобает вам совершити Божественную службу, и так о предстаните соумилением и чистым сердцем святому жертвеннику не озираяся семо и овамо, но в страсе и трепете предстояще Небесному Царю ничим же мнее небеснаго предстояния; да не угодия ради человеческаго подщитеся скратити молитвы, не приимите ж лица человеча, но взирающе ко Единому Царю и предстоящим окрест Его силам достойны себе творити священным правилом, и их же отрекоша с теми не служите жи, блюдите, кому предстоите и кому служите и которым даете причащения, не забывайте Владычних заповедей и святых Его апостол: не дадите бо, рече, святых псом и бисера не мещите пред свиниями; блюдите пес и яж по сих смотрите, да не убойтеся человече на грех себе не дадите Сына Божия в руки недостойным, не устыдитеся никого же от славных земли в час той, ни самаго того, носящаго венец; причащения же достойным подавайте, якоже и вы сами прияли, есте имже Божественная правила не повелевают, не подавайте яко иноязычницы бо вменишася и аще не обратятся, горе и тем и причащающим их; блюдите, аз и о сем дела не имам, вы узрите такожде иже аще кто от вас причащаяй люди Пречистым и Животворящим Тайнам, и аще бо просит медницы, таковый извержется по 23-му правилу шестаго Вселенскаго Собору. Такожде аще который презвитер, или диакон, или поддиакон, или чтец, или певец в четыредесят дней, сиречь в Великий пост, не постится и во вся лета во всякия среды и пятки, да извержен будет по 69-му правилу святых апостол. Аще же мирский человек не постится, да отлучится, или аще кто преданыя посты, хранимыя Церковию, разреша, таковый проклят есть по 18-му правилу иже в Гангрех Собора; а от престола, к нему же кто благословен есть и у него же кто служити начнет, преходити, никако же власти не имати по 3-му правилу иже во Антиохии, и двема церквама да никто же владеет по 15-му правилу седмаго Вселенскаго Собора, да не святая корчемствовати от вас явитца, но кийждо единому и тому ж до престолу да предстоит в церкви свободою изобилующей, а в церкви, куплею стяжанеи, рекше не у купленнаго места ея ж ради извержению предает. Той же Вселенский Собор по 13-му правилу, или аще кто от вас лихву взяв от должника, да извержется по 44-му правилу святых апостол²²¹.

Ведомо ж нам и се, что во святыя посты поклоны творят не по церковному преданию, еже есть метание с великима не разлучают, овии поклонився единою на землю и тако не всклоняся множицею крестится да точию головою кивает, а инии на скамейки. И о том бы вам самем испытно ведати, что метание и что суть великия поклоны метание суть: в пояс поклонитися как мощи до земли рукою достати, а великий поклон в землю челом ударити. И отныне клали бы есте сами поклоны и прочим повелевали по уставу Святые Восточные Церкви и по благословению нашего смирения вси вкупе равно тихо. Егда полагаются седмь на десять поклонов по Сущую Богородицу поклон земный и прочих три великия в землю с молитвою «Господи, Владыко животу моему», к сем же два на десять метания в пояс, и последний великий ж поклон в землю. Тако и «Святый Боже» и на «Приидите, поклонимся». Поясныя ж поклоны клали со всяким благочинием немятежно. Аще ли же кто от вас о сем завещании не брещи имать или чесого неподобающаго священства кто от вас начнет деяти еже чрез заповедь святых апостол и богоносных отец и нашего благословения, яже выше рекохом, таковым будет суд без милости от нас по правилом святых апостол и богоносных отец; такоже аще кто и мирский человек прекослов и нерадив явится о преданых заповедех Христовых и святых апостол и святых отец, и вам бы им запрещати по правилом святых апостол и святых отец. А аще кто зело явится прекословен, и вам бы возвещати нам, Великому Государю, Святейшему Никону, Патриарху Московскому и всея Русии. А аще ли же таковым сам не запретит и нам не возвестит, таковый о всяцем неисправлении сам ответ даст в день праведнаго суда Христова, еже зде правилным судом от нас истязай немилостиво будет. Сего ради, братие, завещанным внимайте да сохраняюще Заповеди Божия и предания святых апостол и святых богоносных отец злобы избывше, с правдою поживем о Христе Иисусе Господе нашем, Ему же слава со безначалным Его Отцем и со Пресвятым и Благим и Животворящим Духом ныне и присно и во веки веков. Аминь.

февраль 1654 г.

Великому государю царю и великому князю Алексею Михайловичу всея великия и малыя Русии самодержцу. Богомолец ваш, смиренный и грешный Никон, бывший патриарх, о вашем государеве душевном спасении и телесном здравии, и о еже на супостаты победе и одолении Бога молю, да здравствуеши с своею царицею, а с нашею государынею, и великою княгинею Мариею Ильиничною, и с своими сынами, а с нашими государями, царевичами и великими князьями Алексеем и Феодором Алексеевичами, с своими сестрами, а с нашими государынями, царевнами и великими княжнами, ц. и в. к. Ириною Михайловною, ц. и в. к. Анною Михайловною, ц. и в. к. Татияною Михайловною, и с своими дщерями, а с нашими государынями, царевнами и великими княжнами ц. и в. к. Евдокиею Алексеевною, ц. и в. к. Марфою Алексеевною, ц. и в. к. Софиею Алексеевною, и со всем синклитом, и со всем христолюбивым воинством, и со всеми православными христианы. Еще же молю не прогневатися на Богомольца вашего, яко нужнейших ми дерзнух писати к тебе великому государю, уповая на прежде бывший Твой благий нрав о Бозе²²².

Слышахом, яко яже дал еси святей велицей церкви, паки ныне повелел возвратити. Молю Тя Господом Богом нашим Иисус Христом таковая не деяти. Понеже сам еси чтеши Божественное писание, еже гласит: Дайте, рече, и дастся вам. И паки инде речено есть: Анание, почто сатана искуси сердце твое солгати Духу Святому? Не сущее ли твое бе, и в твоей бе власти дати или ни. А яже преднаписашася, вся к пользе нам преднаписашася. И паки молю Тя, великого государя, престати от таковых; не уподобляйтеся, рече, злым, но паче благим; поревнуй оной убогой вдовице, давшей две медницы, и второй, возлиявшей миро на нозе Христовы, ей же рече Христос в память о бытии, и есть доныне чтомо и хвалимо, и образ всем Боголюбцам, даящим Святым Божиим церквам. Не неради, Господа ради, а малых сих, да не в великое нерадение приидеши и прогневаеши Господа своего; ибо от малаго презорства великое возрастает. Еще бои наши многа блага, и не сущее свое даеши, но Божие Богу. Сего ради и во церкви гласят: Твоя от Твоих Тебе приносяще.

Еще мысль моя понуди мя к Тебе великому государю и се писати: Аще и аз по долгу моему прощения от Тебе великого государя чрез писание просих, в нихже, яко человек согреших, по заповеди Господней рекшей: аще принесеши дар твой ко олтарю и помянеши, яко имать нечто брат твой на тя, остави ту дар и шед прежде смирися с братом своим. Аз же не яко брат, но яко последний Богомолец есмь Ваш; и Ты великий государь чрез стольника своего Афанасия Ивановича Матюшкина прислал свое милостивое прошение. Ныне же слышу, многое твориши не яко прощенному, но яко последнему злодею. Худыя моего смирения вещи повелел еси взятии, яже суть в келии осталися, и письма, в нихже многое таинство, егоже никому же от мирских достоит ведати. Понеже попущением Божиим и Вашим государским советом с освященным собором избран бых, яко первый святитель, и многое Ваше государево таинство имех у себя, такожде и иных много, они требующее совершенного прощения грехов своих, написующе своима рукама и запечатлеюще подаша ми, да яко святитель имея власть по благодати Божией, даней нам от Пресвятаго и Животворящаго Духа, власть на земли вязати и решити человеческие грехи, разрешу им грехи, их же разрешити никому иному и ведати подобало, мню, ниже самому Тебе великому государю. И дивлюся о сем, како вскоре в таковое дерзновение пришел еси, иже иногда страшился еси на простых церковных причетников суд наносити, якоже и святыя законы не повелевают, ныне же всего мира иногда бывша аки пастыря восхотел еси грехи и таинства ведати и не сам точию, но и мирским попустил еси, имже дерзающим безстрашно на таковая, не постави Господи во грех, аще покаются. Векую ныне ваши судятся от неправедных, а не от святых? Аще ли что изволил Ты, великий государь, требовати от нас, и мы, что Тебе подобало, сотворили быхом.

Но слышим, яко сего ради сие бысть, да писание святыя десницы Твоея не останется у нас, еже писал еси, жалуя нас Богомольца своего, любо почитая великим государем в проч. не по нашей воли, но по своему изволению. Не веем, откуду сие начаса; помню Тобою великим государем такия начатки явишася. Понеже Ты, великий государь, писал тако и в граматах Твоих государевых во всех, и в отписках изо всех полков к Тебе, великому государю, так писано, и во всяких делах, и не возможно сего испразднити. Да потребится злое сие и горделивое, проклятое проименование, аще и не моею волею бысть сие. Надеюся на Господа, яко ни где не обрящется моего на сие хотения или веления, разве лживаго сочинения, егоже ради денсь много пострадах и стражду Господа ради от лжебратии, их же уста полны суть горести и льсти, под языком их неправда и проч. Понеже елико речено нами смиренно, се исповедано гордо, и елико благохвально, се речено хульно, и толико лживыми словесы возвеличен гнев Твой на мя, мню, ни на кого инаго тако. Что не вельми велико, се вельми возвеличено, чего не причастен бых в Твоих государевых чинех, о том истязан, чего не хотех, ни произволях, еже зватися великим государем, о том пред всеми людьми укорен и поруган туне. Мню и Тебе великому государю не безпамятно, что и во святей Литургии слышал еси, по нашему указу, по Трисвятом кликали великим господином, а не великим государем; о сем и веление наше было. Аще ли Тебе великому государю не памятно, изволь церковников и дьяков соборных допросити; аще не солгут, такожде Тебе рекут, якоже и аз ныне глаголю.

Но паки о лжебратских неправдах да глаголем. Толика лжа их на мя возвеличися, яко и сущих враг Твоих аз осуждение явихся, иже бе иногда во всякой благостыни и единотрапезен с тобою (не постыждуся о сих похвалитися), и питан бых, яко телец на заколение, многими тучными брашнами, по обычаю вашему государеву, его же аз много насладився, не могу вскоре забыти. Ныне же Иуния в 25-й день, егда торжествовася рождение благоверныя царевны и великия княжны Анны Михайловны, вси возвеселившееся о добром том рождестве насладишася трапезы твоея: един аз, яко пес, лишен богатыя вашея трапезы; но и пси, по реченному, насыщаются от крупиц падающих от трапезы господей своих. Аще не бы яко враг вменен бых, не бы лишен бых малаго уломка хлеба от богатыя Вашея трапезы. Сам Ты, великий государь, не невеси Божественное писание, о чесом первее иных в день судный истязании будем. Алчен бе, рече, и не накормисте мя. Сие же речеся на аки о алчных печашеся Христос, но любовь составлял. Понеже не богатый точию се может творити, но и нищ и всяк. Понеже никто же лишаяся лишен бывает дневныя своея пищи, аще и нищ есть. Аще бы о нищих точию печаловася Христос, не бы инде глаголах: не пецытеся что ясте, или что пиете; воззрите на птицы небесныя, яко ни сеют, ни жнут, ни собирают, и Отец небесный питает их. Се и аз пищу, не яко хлеба лишаяся, но милости и любве истизуя от Тебе великого государя, да не посрамишися и о сих от Господа Бога в день судный. Аще ли и враг вменен есмь, им же благодатию Божиею не бых никогда же Вам, великим государем; но и о вразех речено есть: аще враг твой алчет, ухлеби его; и паки: любите враги ваша. Мнози и врази и ратоборствующия приемлют благодать вашу: аз же егда не зело обогатихся нищетою, тогда паче и паче приумножися милость Ваша; ныне же егда Господа ради всех лишихся и нищетствую, лишен есмь и милости Вашея, аще и умножена суть молитвы наши о Вашем душевном спасении и о телесном здравии. Не забываем бо реченнаго Апостолом, иже заповеда молитися первее за царя и всех иже во власти сущих, яко да даст Вам Господь тихое, мирное и безмятежное житие, яко да и мы поживем во всяком благоверии и чистоте.

Еще же и Самого Тебе, великий государь, молю, престани Господа ради туне на мя гневатися. Солнце, речеся, во гневе Вашем да не зайдет. Кто бо, рече Св. Дух усты Пророка Давида и Царя, взыдет на гору Господню? – ходяй без порока и делаяй правду, глаголяй истину, иже не ульсти в сердце своем, и не сотвори искреннему своему зла и поношения на ближняго не прият. Творяй сия не подвижится во век. Сицев Царя и Пророка устав. Аз же ныне паче всех человек оболган Тебе, в. г., поношен и укорен неправедно. Сего ради молю Тя претворися Господа ради и не дей мне грешному немилосердия, не попусти истязати моя худыя вещи; убойся глаголющаго: им же судом судите, осудитеся, и ею же мерою мерите, возмерится вам; яко же хощете, да творят вам человецы, и вы творите им такожде; и еже себе не хощеши, инем не твори. Похощеши ли, да твои таинства не по воле твоей, ведати дерзнут человецы? Убойся глаголющаго: небо и земля мимо идет, словеса же моя не мимо идут. И паки: йота и едина черта не прейдут от закона, дóндеже вся будут. Како не имаши постыдитися глаголющаго: балжени милостивии, яко тии помиловании будут? Како имаши помилован быти, сам не быв милостив? Како помолишися и оставление долгов испросивши глаголя: остави нам долги наша, яко же и мы оставляем должником нашим, а не оставляя никогдаже? Како имаши узрети по многим своем и долголетном житии лице Божие, не быв чист сердцем? Еще же не аз точию, но мнози мене ради страждут. Пред малыми сими днями со князь Юрьем Ты, в. государь, приказывал, что яко бы Ты един ко мне добр и князь Юрья; ныне же точию сам ты ко мне убогому Богомольцу зело не милостив явился, но и хотящим миловати мя возбраняеши и всем заказ крепкий положен ко мне приходити. Господа, Господа ради молю, престани от таковых. Аще и царь еси великий, от Господа поставленный, но правды ради.

Что же ли моя неправда пред Тобою? Что церкви ради суда на обидяшаго просих? Что же? Не точию суд праведен не получих, но ответы исполнены немилосердия. Ныне же слышу, яко чрез законы церковные Сам изволиши священные чины судити, их же не поверево ти есть судити от Бога. Воззри Господа ради на первые роды, иже чрез закон дерзаша, еже бы священная деяти. Сам Ты, в. г., не невеси, како Озия прокажеся и пр. Такожде о Мануиле царе Гречестем и сему явлении мню не невеси, иже восхоте священников судити, како явися ему Христос подобием тем, имже написан у главы его стоящь; ныне же по смотрению Божию имеет той Святый Христов образ святая, великая соборная Апостольская церковь в недрах коих в царствующем граде Москве и святая десница Христова яко исправися указательным перстом, тако до днесь показуется, егда повеле Ангелом показнити царя, да накажется не судити моих рабов прежде общаго суда, яко же и прочее повести сея святыя возследование показует. Умилися Господа ради и не озлобляй мене ради грешнаго жалящихся о мне грешнем. Вси бо людие твои суть, и в руку твою суть, и несть избавляющаго их от святыя державы твоею. Сего ради паче милуй и заступай, якоже учит Божественный Апостол глаголя: Божий бо слуга еси во отмщение злодеем, в похвалу же Боготворцем, и не на лица зрящее суд суди, но праведен суд суди, и иже суть озлоблении и заточении, или малых вин ради или по оболганию, Господа Бога ради свободи и возврати, да Бог Святый оставит многая твоя согрешения.

Елицы же глаголют на мя, яко бы много ризницы взях с собою, Бог Святый не постави им сего во грех, аз чист есмь от сих. Един саккос взях, и той недорог, простый, а омофор прислал мне Гавриил Халкидонский митрополит, и не корысти ради, но егда жив и потреба молитвы о вашем государевом душевном спасении и о телесном здравии, да сотворю в них, а по смерти на грешное тело да положатся. А елицы глаголют казны много взя с собою: и не взях, но точию удержах, елико потребно будет издержати в церковное строение, и по времени хотех отдати, и еще казначею отдах Воскресенскому в отшествие мое, не корысти ради, но да в долгу братию не оставлю, понеже с деловцами нечим было расплатитися. А где же иная казна, яве есть пред очами всех человек: двор Московский строен, тысящь десяток ова и больше стало, насадный завод тысящь десяток стал, и Тебе, в. г., тем челом ударил на подъем ратный, тысящь с десять в казне на лицо, девять тысящь дано ныне на насад, на три тысящи летось лошадей куплено, шапка архиерейская тысящь пять, шесть стала, а иного расходу Святый Бог весть, елико убогим, сирым, вдовам, нищим, и тому всему книга есть в казне. Но о всех, аще чим преогорчих Тя, в. г., каюся и Господа ради прощения прошу, да и сам у Господа прощен будеши. Отпустите, рече, и отпустятся вам. На письмо Господа ради не позазри, мало вижу, а на бело писати некому. Здравствуй, в. г., во всем своим благодатным Домом на многа лета.

Лета 7167 (1659) в Иулии