Неделя Крестопоклонная
Недѣ́лѧ тре́тїѧ ст҃ы́хъ постѡ́въ.
Поклоне́нїе пра́зднꙋемъ чтⷭ҇но́мꙋ и҆ животворѧ́щемꙋ крⷭ҇тꙋ̀.
Въ сꙋббѡ́тꙋ ве́чера,
на ма́лѣй вече́рни, стїхи̑ры на д҃, гла́съ ѕ҃.
Подо́бенъ: А҆́гг҃льскїѧ си̑лы:
Ны́нѣ а҆́гг҃льскаѧ вѡ́инства провожда́ютъ дре́во чтⷭ҇но́е, бл҃гоговѣ́йнѡ ѡ҆крꙋжа̑юща и҆ всѧ̑ вѣ̑рныѧ созыва̑ющѧ на поклоне́нїе. прїиди́те ᲂу҆̀бо, посто́мъ просвѣти́вшесѧ, припаде́мъ къ немꙋ̀ съ ра́достїю и҆ стра́хомъ, вѣ́рнѡ зовꙋ́ще: ра́дꙋйсѧ, чтⷭ҇ны́й крⷭ҇те, мі́ра ᲂу҆твержде́нїе. [Два́жды.]
Да а҆да́мово проклѧ́тїе ᲂу҆праздни́ши, пло́ть на́шꙋ прїе́млеши кромѣ̀ скве́рны, распина́ешисѧ и҆ ᲂу҆мира́еши, і҆и҃се пребл҃гі́й: тѣ́мже крⷭ҇тъ тво́й и҆ копїѐ, гꙋ́бꙋ же и҆ тро́сть и҆ гво́здїе вѣ́рнѡ почита́имъ, и҆ воскрⷭ҇нїе твоѐ ви́дѣти про́симъ.
Заключа́етъ є҆де́мъ дре́вомъ дре́вле ѕмі́й: дре́во же крⷭ҇та̀ ѿверза́етъ се́й всѣ̑мъ хотѧ́щымъ посто́мъ и҆ слеза́ми ѡ҆чи́ститисѧ. прїиди́те ᲂу҆̀бо, вѣ́рнїи, предлежа́щее ви́дѧще, къ томꙋ̀ припаде́мъ со стра́хомъ, зовꙋ́ще: ѿве́рзи врата̀ нбⷭ҇наѧ, крⷭ҇те, лю́бѧщымъ тѧ̀.
Сла́ва, и҆ ны́нѣ, крⷭ҇тобг҃оро́диченъ, подо́бенъ:
Є҆гда̀ ко крⷭ҇тꙋ̀ пригвожда́ема ви́дѣ тѧ̀, сло́ве бж҃їй, безсѣ́меннѡ тебѐ ро́ждшаѧ, взыва́ше вопїю́щи: ᲂу҆вы̀ мнѣ̀, ча́до сладча́йшее! ко́е твоѐ смире́нїе, бж҃е мо́й; ка́кѡ безстра́стный стрⷭ҇ть терпи́ши непра́веднымъ сꙋдо́мъ; пѣсносло́влю твоѐ стра́шное и҆ кра́йнее снизхожде́нїе.
На стїхо́внѣ стїхи̑ры подѡ́бны, гла́съ в҃.
Подо́бенъ: До́ме є҆ѵфра́ѳовъ:
Разрѣши́вшесѧ ѿ ᲂу҆́зъ дре́внѧгѡ ѡ҆сꙋжде́нїѧ дре́вомъ крⷭ҇та̀, вѣ́рнїи, на не́мъ пригвожде́ннаго хрⷭ҇та̀ просла́вимъ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Прїидѝ ны́нѣ съ на́ми, дв҃де, цѣвни́цꙋ дви́жи, поѧ̀: возноси́те хрⷭ҇та̀, вѣ́рнїи, и҆ покланѧ́йтесѧ є҆гѡ̀ подно́жїю.
Сті́хъ: Бг҃ъ же цр҃ь на́шъ пре́жде вѣ́ка содѣ́ла сп҃се́нїе посредѣ̀ землѝ.
Воззри́мъ, лю́дїе, на предлежа́щее дре́во, и҆́мже сп҃се́нїе на́мъ хрⷭ҇то́съ подае́тъ, и҆ вѣ́рою цѣлꙋ́имъ.
Сла́ва, и҆ ны́нѣ, крⷭ҇тобг҃оро́диченъ, подо́бенъ:
Возноси́ма на крⷭ҇тъ за человѣ́ки ви́дѧщи твоего̀ сн҃а, дв҃о, вопїѧ́ла є҆сѝ рыда́ющи: сла́ва бл҃госе́рдїю твоемꙋ̀.
Та́же, Ны́нѣ ѿпꙋща́еши: Трист҃о́е. По Ѻ҆́ч҃е на́шъ:
Тропа́рь, гла́съ а҃:
Сп҃сѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ, побѣ̑ды [бл҃говѣ́рномꙋ і҆мпера́торꙋ на́шемꙋ нїкола́ю а҆леѯа́ндровичꙋ] правосла̑внымъ хрⷭ҇тїа́нѡмъ на сопроти̑вныѧ да́рꙋѧ и҆ твоѐ сохранѧ́ѧ крⷭ҇то́мъ твои́мъ жи́тельство.
И҆ быва́етъ ѿпꙋ́стъ.
По ѿпꙋ́стѣ же вхо́дитъ сщ҃е́нникъ со є҆кклисїа́рхомъ въ сосꙋдохрани́тельницꙋ, и҆ взе́млютъ чтⷭ҇но́е дре́во, пред̾идꙋ́щꙋ свѣ́щникꙋ и҆ кади́лꙋ, пою́ще тропа́рь: Сп҃сѝ, гдⷭ҇и, лю́ди твоѧ̑: И҆ прино́сѧтъ на ст҃ꙋ́ю трапе́зꙋ, и҆ вжига́ютъ свѣщꙋ̀ на всю̀ но́щь.
На вели́цѣй вече́рни,
бл҃гословлѧ́етъ сщ҃е́нникъ, и҆ пое́мъ ꙗ҆́кѡ ѡ҆бы́чно предначина́тельный ѱало́мъ.
Та́же стїхосло́вїе, пе́рваѧ каѳі́сма.
На Гдⷭ҇и воззва́хъ, поста́вимъ стїхѡ́въ і҃, и҆ пое́мъ стїхи̑ры воскрⷭ҇ны ѻ҆смогла́сника г҃, и҆ а҆нато́лїєвы г҃: и҆ чтⷭ҇на́гѡ крⷭ҇та̀ д҃,
гла́съ є҃:
Подо́бенъ: Ра́дꙋйсѧ по́стникѡмъ:
Ѡ҆сїѧ́й, гдⷭ҇нь крⷭ҇те, свѣтолꙋ́чными мо́лнїѧми твоеѧ̀ бл҃года́ти, сердца̀ чтꙋ́щихъ тѧ̀ и҆ бг҃опрїѧ́тною любо́вїю ѡ҆б̾е́млющихъ, мїровожделѣ́нне, и҆́мже сле́зное ᲂу҆праздни́сѧ сѣ́тованїе, и҆ ѿ сѣте́й сме́рти и҆зба́вихомсѧ, и҆ къ несконча́емомꙋ весе́лїю преидо́хомъ. покажѝ красоты̀ твоеѧ̀ бл҃голѣ́пїе, воздаѧ́нїе подаѧ̀ за воздержа́нїе рабѡ́мъ твои̑мъ, вѣ́рнѡ просѧ́щымъ, твоѐ бога́тное застꙋпле́нїе и҆ ве́лїю млⷭ҇ть.
Ра́дꙋйсѧ, живоно́сный крⷭ҇те, цр҃кве прекра́сный раю̀, дре́во нетлѣ́нїѧ, произрасти́вшее на́мъ вѣ́чныѧ сла́вы наслажде́нїе: и҆́мже бѣсо́встїи ѿгонѧ́ютсѧ полцы̀, и҆ а҆́гг҃льстїи свеселѧ́тсѧ чи́нове, и҆ собра̑нїѧ вѣ́рныхъ пра́зднꙋютъ: ѡ҆рꙋ́жїе непобѣди́мое, ᲂу҆твержде́нїе нерꙋши́мое, царє́мъ побѣ́до, сщ҃е́нникѡмъ похвало̀. и҆ на́мъ ны́нѣ подава́й дости́гнꙋти хрⷭ҇то́выхъ стрⷭ҇те́й и҆ воскрⷭ҇нїѧ.
Ра́дꙋйсѧ, живоно́сный крⷭ҇те, бл҃гоче́стїѧ непобѣди́маѧ побѣ́до, две́рь раѧ̀, вѣ́рныхъ ᲂу҆твержде́нїе, цр҃кве ѡ҆гражде́нїе: и҆́мже проклѧ̀тїе разори́сѧ и҆ ᲂу҆праздни́сѧ, и҆ поглоти́сѧ сме́рти держа́ва, и҆ вознесо́хомсѧ ѿ землѝ къ нбⷭ҇нымъ: ѡ҆рꙋ́жїе непобѣди́мое, бѣсѡ́въ сопротивобо́рче, сла́во мч҃нкѡвъ, прпⷣбныхъ и҆́стинное ᲂу҆краше́нїе, приста́нище сп҃се́нїѧ, да́рꙋѧй мі́рови ве́лїю млⷭ҇ть.
Грѧдѝ, первозда́нныхъ дво́ице, дре́вле ѿпа́дшаѧ ѿ ли́ка го́рнѧгѡ за́вистїю человѣкоꙋбі́йцы, го́рькою сла́стїю, ѿ дре́ва вкꙋше́нїемъ. сѐ всечⷭ҇тно́е вои́стиннꙋ дре́во прихо́дитъ, къ немꙋ́же прите́кше съ ра́достїю ѡ҆блобыза́йте, и҆ возопі́йте къ немꙋ̀ съ вѣ́рою: ты̀ на́ше застꙋпле́нїе, крⷭ҇те всечⷭ҇тны́й, є҆гѡ́же плода̀ причасти́вшесѧ, нетлѣ́нїе полꙋчи́хомъ, є҆де́мъ пре́жнїй прїе́мше несꙋмнѣ́ннѡ, и҆ ве́лїю млⷭ҇ть.
Сла́ва, гла́съ г҃:
Хрⷭ҇тѐ бж҃е на́шъ, во́льное распѧ́тїе во ѻ҆́бщее воскрⷭ҇нїе ро́да человѣ́ческагѡ воспрїе́мый, и҆, своѧ̑ пе́рсты ѡ҆кровави́въ, ѿпꙋсти́тєльнаѧ на́мъ тро́стїю крⷭ҇та̀, ѡ҆багре́нїемъ червле́нымъ ца́рски подписа́ти чл҃вѣколю́бствовавый, не пре́зри на́съ и҆ па́ки ѿ тебє̀ ᲂу҆дали́тисѧ бѣ́дствꙋющихъ: но ᲂу҆ще́дри, є҆ди́не долготерпѣли́ве, сꙋ́щыѧ во ѡ҆бстоѧ́нїи лю́ди твоѧ̑, и҆ воста́ни, поборѝ борю́щыѧ ны̀, ꙗ҆́кѡ всеси́ленъ.
И҆ ны́нѣ, бг҃оро́диченъ гла́са. Вхо́дъ. Свѣ́те ти́хїй:
Прокі́менъ: Гдⷭ҇ь воцр҃и́сѧ:
Є҆ктенїа̀, и҆ про́чее ꙗ҆́кѡ ѡ҆бы́чно.
На лїті́и стїхи́ра хра́ма.
Сла́ва, и҆ ны́нѣ, гла́съ є҃:
Зрѧ́щи тѧ̀ на крⷭ҇тѣ̀ на́га ви́сѧща, содѣ́телѧ и҆ зижди́телѧ всѣ́хъ, тва́рь всѧ̀ и҆змѣнѧ́шесѧ стра́хомъ и҆ рыда́ше: со́лнце же свѣ́тъ ѡ҆мрачѝ, и҆ землѧ̀ колеба́шесѧ, ка́менїе же разсѣка́хꙋсѧ, и҆ хра́ма свѣ́тлость раздира́шесѧ. ме́ртвїи востава́хꙋ ѿ гробѡ́въ, и҆ а҆́гг҃льскїѧ си̑лы ᲂу҆жаса́хꙋсѧ, глаго́лющѧ: ѽ чꙋдесѐ! сꙋдїѧ̀ сꙋ́дитсѧ и҆ стра́ждетъ во́лею за сп҃се́нїе мі́ра и҆ ѡ҆бновле́нїе.
На стїхо́внѣ стїхи̑ры ѻ҆смогла́сника, ꙗ҆̀же по а҆лфави́тꙋ.
Сла́ва, и҆ ны́нѣ, гла́съ д҃:
Пособи́вый кро́ткомꙋ дв҃дꙋ побѣди́ти и҆ноплеме́нника, гдⷭ҇и, [вѣ́рномꙋ царю̀ на̀шемꙋ] вѣ́рнымъ лю́демъ на́шимъ спобо́рствꙋй, и҆ ѡ҆рꙋ́жїемъ крⷭ҇та̀ низложѝ врагѝ на́шѧ: покажѝ, бл҃госе́рде, на на́съ дрє́внїѧ млⷭ҇ти твоѧ̑, и҆ да разꙋмѣ́ютъ вои́стиннꙋ, ꙗ҆́кѡ ты̀ є҆сѝ бг҃ъ: и҆ на тѧ̀ надѣ́ющесѧ побѣжда́емъ, молѧ́щейсѧ ѡ҆бы́чнѡ пречⷭ҇тѣй твое́й мт҃ри, дарова́тисѧ на́мъ вели́цѣй млⷭ҇ти.
Тропа́рь Бцⷣе Дв҃о: два́жды: и҆ крⷭ҇тный є҆ди́ножды, гла́съ а҃: Сп҃сѝ, гдⷭ҇и, лю́ди твоѧ̑.
И҆ про́чее послѣ́дованїе бдѣ́нїѧ, ꙗ҆́кѡ ѡ҆бы́чно.
На ᲂу҆́трени
по шестоѱа́лмїи, Бг҃ъ гдⷭ҇ь, во гла́съ ѻ҆смогла́сника, и҆ глаго́лемъ тропа́рь воскрⷭ҇ный, два́жды. Сла́ва, крⷭ҇тный: Сп҃сѝ, гдⷭ҇и, лю́ди твоѧ̑: И҆ ны́нѣ, бг҃оро́диченъ: Гаврїи́лꙋ вѣща́вшꙋ: И҆ ѡ҆бы́чное стїхосло́вїе. Сѣда́льны глаго́лемъ воскрⷭ҇ны. По полѷеле́и, [а҆́ще гдѣ̀ хра́мъ чтⷭ҇на́гѡ крⷭ҇та̀,] сѣда́ленъ крⷭ҇та̀, гла́съ и҃.
Подо́бенъ: Повелѣ́нное та́йнѡ:
Въ раѝ ᲂу҆́бѡ пре́жде дре́вомъ ѡ҆бнажѝ вра́гъ, во вкꙋше́нїи наносѧ̀ ᲂу҆мерщвле́нїе: крⷭ҇та́ же дре́во, ѡ҆дѣѧ́нїе жи́зни человѣ́кѡмъ носѧ̀, водрꙋзи́сѧ на землѝ, и҆ мі́ръ ве́сь и҆спо́лнисѧ всѧ́кїѧ ра́дости. є҆го́же ви́дѧще покланѧ́ема, лю́дїе, бг҃ꙋ въ вѣ́рѣ согла́снѡ воззове́мъ: и҆спо́лнь сла́вы хра́мъ є҆гѡ̀. [Два́жды.]
Степє́нна гла́са. Є҆ѵⷢ҇лїе ᲂу҆́треннее. Воскрⷭ҇нїе хрⷭ҇то́во: ѱало́мъ н҃. Сла́ва, гла́съ и҃: Покаѧ́нїѧ ѿве́рзи мѝ: И҆ ны́нѣ: На сп҃се́нїѧ стєзѝ: Та́же, гла́съ ѕ҃: Поми́лꙋй мѧ̀, бж҃е: Мно́жєства содѣ́ѧнныхъ мно́ю лю́тыхъ:
Канѡ́нъ воскрⷭ҇нъ, и҆ бцⷣы, на ѕ҃: та́же трїѡ́ди на и҃, творе́нїе господи́на ѳео́дѡра стꙋді́та. Гла́съ а҃.
Пѣ́снь а҃.
І҆рмо́съ: Воскрⷭ҇нїѧ де́нь! просвѣти́мсѧ, лю́дїе:
Торжества̀ де́нь! воста́нїемъ хрⷭ҇то́вымъ сме́рть безвѣ́стна показа́сѧ, жи́зни зарѧ̀ возсїѧ̀,а҆да́мъ воста́въ ликꙋ́етъ въ ра́дости: тѣ́мже воскли́кнемъ, побѣ́днꙋю пою́ще.
Поклоне́нїѧ де́нь чтⷭ҇но́мꙋ крⷭ҇тꙋ̀! прїиди́те къ семꙋ̀ всѝ: воста́нїѧ бо хрⷭ҇то́ва зарю̀ возсїѧва́ѧй, предлага́етсѧ ны́нѣ. то́й ѡ҆блобыза́имъ дꙋше́внѡ ра́дꙋющесѧ.
Ꙗ҆ви́сѧ, вели́кїй гдⷭ҇ень крⷭ҇те, покажѝ ми зра́къ бж҃е́ственный красоты̀ твоеѧ̀ ны́нѣ, во є҆́же бы́ти мѝ досто́йномꙋ покло́нникꙋ твоемꙋ̀. и҆́бо ꙗ҆́кѡ ѡ҆дꙋшевле́нномꙋ тебѣ̀ и҆ возглаша́ю, и҆ ѡ҆блобыза́ю тѧ̀.
Да восхва́лѧтъ согла́снѡ нб҃о и҆ землѧ̀, ꙗ҆́кѡ предлежи́тъ всѣ̑мъ всебл҃же́нный крⷭ҇тъ, на не́мже пригвожде́нъ тѣле́снѣ принесе́сѧ въ же́ртвꙋ хрⷭ҇то́съ: того̀ ѡ҆блобыза́имъ, дꙋше́внѡ ра́дꙋющесѧ.
Сла́ва, трⷪ҇ченъ: ѽ трⷪ҇це ли̑цы, ѽ є҆ди́нице зра́комъ, ѻ҆́ч҃е, сн҃е и҆ дш҃е, є҆диноси́льнаѧ є҆ди́нице въ совѣ́тѣ и҆ хотѣ́нїи и҆ держа́вы нача́лѣ! мі́ръ тво́й сохранѧ́й, ми́ръ подаю́щи.
Бг҃оро́диченъ: И҆скꙋ́са мꙋ́жеска ника́коже вѣ́дꙋщи, дв҃о, безсѣ́меннѡ ражда́еши млⷣнца, чи́сто но́сиши рожде́нїе, всѣ́хъ творца̀ хрⷭ҇та̀ бг҃а: того̀ молѝ ᲂу҆мири́ти всѧ́чєскаѧ.
Катава́сїа: Бж҃е́ственнѣйшїй мѡѷсе́й проѡбразѝ дре́вле, въ чермнѣ́мъ мо́ри прове́дъ і҆и҃лѧ крⷭ҇то́мъ твои́мъ, во́дꙋ жезло́мъ пресѣ́къ, пѣ́снь и҆схо́днꙋю тебѣ̀ воспѣва́ѧ, хрⷭ҇тѐ бж҃е.
Пѣ́снь г҃.
І҆рмо́съ: Прїиди́те, пи́во пїе́мъ:
Прїиди́те, пѣ́снь пои́мъ но́вꙋ, разрꙋше́нїе а҆́дово торжествꙋ́юще: и҆з̾ гро́ба хрⷭ҇то́съ воскре́се, сме́рть плѣни́въ, и҆ сп҃сѐ всѧ́чєскаѧ.
Прїиди́те, вѣ́рнїи, почерпи́мъ не ѿ и҆сто́чника и҆сточа́ющагѡ во́дꙋ тлѣ́ннꙋю, но ѿ и҆сто́чника просвѣще́нїѧ, крⷭ҇тꙋ̀ хрⷭ҇то́вꙋ поклоне́нїемъ, ѡ҆ не́мже и҆ хва́лимсѧ.
Є҆го́же дре́вле проѡбразова́ше мѡѷсе́й дла́ньма, крⷭ҇тъ тво́й ны́нѣ ѡ҆блобыза́юще, мы́сленнаго а҆мали́ка побѣжда́емъ, влⷣко хрⷭ҇тѐ, и҆́мже и҆ сп҃со́хомсѧ.
Ѻ҆чи́ма и҆ ᲂу҆стна́ма чи́стыма пою́ще пѣ́снь ра́дованїѧ, гдⷭ҇ню крⷭ҇тꙋ̀ въ ра́дости поклони́мсѧ, вѣ́рнїи, пле́щꙋще въ пѣ́снехъ.
Сла́ва, трⷪ҇ченъ: Є҆ди́наго въ тре́хъ ѵ҆поста́сехъ бг҃а безнача́льнаго чтꙋ̀, нераздѣ́льнаго сꙋщества̀ зра́комъ, ѻ҆ц҃а̀, сн҃а и҆ дх҃а жива́го, въ ни́хже крⷭ҇ти́хомсѧ.
Бг҃оро́диченъ: Въ кꙋпинѣ̀ мѡѷсе́й твоѐ та́инство ѡ҆бра́знѡ дре́вле ви́дѣ, чтⷭ҇аѧ: ꙗ҆́коже бо ѻ҆́нꙋю пла́мень, ѻ҆́гнь бж҃ества̀ твою̀ ᲂу҆тро́бꙋ не ѡ҆палѝ.
Катава́сїа: Оу҆твердѝ мѧ̀, влⷣко хрⷭ҇тѐ, крⷭ҇то́мъ твои́мъ на ка́мени вѣ́ры, не поколеба́тисѧ ᲂу҆мꙋ̀ прилѡ́ги врага̀ ѕла́гѡ: є҆ди́нъ бо є҆сѝ ст҃ъ.
Сѣда́ленъ, гла́съ ѕ҃:
Крⷭ҇тъ тво́й, гдⷭ҇и, ѡ҆ст҃и́сѧ: въ не́мъ бо быва́ютъ и҆сцѣлє́нїѧ немощствꙋ́ющымъ грѣхмѝ. тѣ́мъ тебѣ̀ припа́даемъ, поми́лꙋй на́съ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ, гдⷭ҇и: и҆ ѿ дре́ва сп҃си́тельнагѡ вкꙋси́вше, ѿ грѣхо́вныхъ страсте́й свобо́дꙋ полꙋчи́хомъ, мл҃твами бцⷣы, є҆ди́не чл҃вѣколю́бче.
Сла́ва: То́кмѡ водрꙋзи́сѧ дре́во крⷭ҇та̀ твоегѡ̀, хрⷭ҇тѐ, ѡ҆снова̑нїѧ сме́рти поколеба́шасѧ, гдⷭ҇и: є҆го́же бо поглотѝ жела́нїемъ а҆́дъ, ѿпꙋстѝ съ тре́петомъ. ꙗ҆ви́лъ є҆сѝ на́мъ сп҃се́нїе твоѐ, ст҃ы́й, и҆ славосло́вимъ тѧ̀: сн҃е бж҃їй, поми́лꙋй на́съ.
И҆ ны́нѣ, бг҃оро́диченъ:
Бцⷣе дв҃о, молѝ сн҃а твоего̀, во́лею пригвозди́вшагосѧ на крⷭ҇тѣ̀ и҆ воскре́сшаго и҆з̾ ме́ртвыхъ, хрⷭ҇та̀ бг҃а на́шего, сп҃сти́сѧ дꙋша́мъ на́шымъ.
Пѣ́снь д҃.
І҆рмо́съ: На бж҃е́ственнѣй стра́жи:
Сѐ воскре́се хрⷭ҇то́съ, мѷроно́сицамъ жена́мъ а҆́гг҃лъ речѐ: не рыда́йте, ше́дшѧ рцы́те а҆пⷭ҇лѡмъ: ра́дꙋйтесѧ, дне́сь сп҃се́нїе мі́рꙋ, мꙋчи́тельство врага̀ сме́ртїю разрꙋши́сѧ.
Живоно́сномꙋ твоемꙋ̀ крⷭ҇тꙋ̀ поклоне́нїе ра́достное дне́сь срѣта́юще, хрⷭ҇тѐ, предсрѣ́тенїе твори́мъ всест҃ы́ѧ стрⷭ҇ти твоеѧ̀, ю҆́же во сп҃се́нїе мі́ра содѣ́лалъ є҆сѝ, сп҃се, ꙗ҆́кѡ всеси́ленъ.
Дне́сь быва́етъ ра́дость на нб҃сѝ и҆ на землѝ, ꙗ҆́кѡ хрⷭ҇то́во зна́менїе мі́рꙋ ꙗ҆влѧ́етсѧ крⷭ҇тъ требл҃же́нный: се́й бо предложе́нъ бы́въ, и҆сточа́етъ кла́нѧющымсѧ є҆мꙋ̀ бл҃года́ть приснотекꙋ́щꙋю.
Что́ ти принесе́мъ, хрⷭ҇тѐ, ꙗ҆́кѡ да́лъ є҆сѝ на́мъ чтⷭ҇но́мꙋ крⷭ҇тꙋ̀ поклони́тисѧ, на не́мже всест҃а́ѧ кро́вь твоѧ̀ и҆злїѧ́сѧ, и҆дѣ́же и҆ пло́ть твоѧ̀ гвоздьмѝ водрꙋзи́сѧ; є҆го́же ѡ҆блобыза́юще ны́нѣ, бл҃годари́мъ тѧ̀.
Сла́ва, трⷪ҇ченъ: Є҆ди́нагѡ бж҃ества̀ пою̀ трѝ ѵ҆поста̑си, нераздѣ́льнѡ, є҆стества̀ про́ста проповѣ́даѧ ѻ҆ц҃а̀ безнача́льна, сн҃а, и҆ дх҃а ст҃а́го сопрⷭ҇то́льна, гдⷭ҇ство є҆ди́но и҆ є҆ди́но црⷭ҇тво, є҆ди́нꙋ держа́вꙋ присносꙋ́щнꙋю.
Бг҃оро́диченъ: Є҆ди́на въ жена́хъ ꙗ҆ви́ласѧ є҆сѝ, чтⷭ҇аѧ: ве́щь пречꙋ́дна, дѣ́ло стра́шное: є҆стество́ бо ты̀ ѡ҆бнови́ла є҆сѝ, без̾ сѣ́мене ро́ждши, пребы́вши па́ки ꙗ҆́коже пре́жде дв҃а: роди́выйсѧ бо и҆з̾ тебє̀ є҆́сть бг҃ъ и҆́стинный.
Катава́сїа: На крⷭ҇тѣ́ ви́дѣвъ тѧ, си́льне, свѣти́ло вели́кое тре́петомъ ѡ҆б̾ѧ́то бы́сть, лꙋчы̀ сопрѧ́тавъ скры̀, всѧ́ же тва́рь воспѣ̀ со стра́хомъ твоѐ долготерпѣ́нїе: и҆́бо и҆спо́лнисѧ землѧ̀ твоегѡ̀ хвале́нїѧ.
Пѣ́снь є҃.
І҆рмо́съ: Оу҆́тренюемъ ᲂу҆́треннюю:
Возсїѧ́лъ є҆сѝ ѿ гро́ба, незаходи́мый свѣ́те, мі́рꙋ ѡ҆блиста́ѧ нетлѣ́нїе: потреби́лъ є҆сѝ ѿ конє́цъ, гдⷭ҇и, сме́рти сѣ́тованїе, ꙗ҆́кѡ бл҃госе́рдъ.
Пристꙋ́пимъ ѡ҆чище́ннїи воздержа́нїемъ, те́плѣ ѡ҆блобыза́юще во хвале́нїихъ дре́во всест҃о́е, на не́мже хрⷭ҇то́съ распина́емь сп҃сѐ мі́ръ, ꙗ҆́кѡ бл҃госе́рдъ.
Ликꙋ́ютъ въ весе́лїи а҆́гг҃льстїи чи́ни дне́сь, крⷭ҇тꙋ̀ твоемꙋ̀ поклоне́нїемъ: на не́мъ бо, хрⷭ҇тѐ, сокрꙋши́лъ є҆сѝ бѣсѡ́вскїѧ полкѝ, сп҃сы́й человѣ́чество.
Ра́й дрꙋгі́й позна́сѧ цр҃ковь, ꙗ҆́коже пре́жде и҆мꙋ́щи дре́во живоно́сное, крⷭ҇тъ тво́й, гдⷭ҇и, и҆з̾ негѡ́же прикоснове́нїемъ безсме́ртїю причаща́емсѧ.
Сла́ва, трⷪ҇ченъ: Собезнача́льны трѝ сла́влю, є҆ди́нагѡ сꙋщества̀: бг҃а ѻ҆ц҃а̀, сн҃а и҆ дх҃а, свѣ́тъ є҆ди́нъ трисїѧ́тельный, кꙋ́пнодержа́вный, ца́рственный, въ неслїѧ́ннѣмъ то́ждествѣ.
Бг҃оро́диченъ: Родила̀ є҆сѝ є҆стества̀ зако́номъ, но па́че зако́на: тебє̀ бо є҆ди́ныѧ безсѣ́менно ржⷭ҇тво̀. стра́шенъ є҆́сть и҆ помышлѧ́емый и҆ глаго́лемый ѡ҆́бразъ рожде́нїѧ твоегѡ̀, всенепоро́чнаѧ.
Катава́сїа: Оу҆́треннююще тѧ̀ воспѣва́емъ, сп҃се мі́ра, ми́ръ ѡ҆брѣ́тше крⷭ҇то́мъ твои́мъ, и҆́мже ѡ҆бнови́лъ є҆сѝ ро́дъ человѣ́ческїй, ко свѣ́тꙋ невече́рнемꙋ вводѧ̀ на́съ.
Пѣ́снь ѕ҃.
І҆рмо́съ: Снизше́лъ є҆сѝ:
Воскре́слъ є҆сѝ, сме́рть сокрꙋши́въ, хрⷭ҇тѐ, ꙗ҆́коже вели́кїй цр҃ь: ѿ а҆́довыхъ храни́лищъ воззва́лъ є҆сѝ на́съ въ наслажде́нїе црⷭ҇тва нбⷭ҇нагѡ, въ зе́млю безсме́ртїѧ.
Пле́щꙋще въ пѣ́снехъ бж҃е́ственныхъ, вѣ́рнїи, воскли́кнемъ бг҃ꙋ, крⷭ҇тъ гдⷭ҇ень цѣлꙋ́юще: ѡ҆сщ҃е́нїѧ бо и҆сто́чникъ и҆злива́етъ всѣ̑мъ сꙋ́щымъ въ мі́рѣ.
И҆сполнѧ́етсѧ ѱало́мскїй гла́съ: се́ бо покланѧ́емсѧ пречⷭ҇тыхъ но́гъ твои́хъ подно́жїю, всеси́льне, крⷭ҇тꙋ̀ твоемꙋ̀ чтⷭ҇но́мꙋ, тривожделѣ́нномꙋ дре́вꙋ.
Є҆́же ви́дѣ прⷭ҇ро́къ рыда́тель во тво́й хлѣ́бъ вложе́нное дре́во, крⷭ҇тъ тво́й, ще́дре, ѡ҆блобыза́юще, воспѣва́емъ твоѧ̑ ᲂу҆́зы и҆ погребе́нїе, копїе́ же и҆ гво́зди.
Ст҃ы́й крⷭ҇тъ, є҆го́же на ра́мѣхъ и҆зво́лилъ є҆сѝ, хрⷭ҇тѐ, носи́ти и҆ на се́мъ вознести́сѧ, и҆ распѧ́тисѧ пло́тїю, ѡ҆блобыза́юще, прїе́млемъ крѣ́пость на врагѝ неви̑димыѧ.
Сла́ва, трⷪ҇ченъ:
Є҆ди́ницꙋ въ тре́хъ начерта́нїихъ пою̀, и҆ трⷪ҇цꙋ во є҆ди́номъ є҆стествѣ̀ покланѧ́емꙋю, бг҃а трѝ кꙋ́пнѡ, свѣ́тъ трисо́лнечный, ѻ҆ц҃а̀, и҆ сн҃а, и҆ ст҃а́го дх҃а.
Бг҃оро́диченъ: Чꙋде́съ превели́кое чꙋ́до въ тебѣ̀ ꙗ҆ви́сѧ, нескве́рнаѧ а҆́гнице: взе́млющаго бо мі́ра грѣ́хъ, а҆́гнца родила̀ є҆сѝ: є҆го́же молѝ прилѣ́жнѡ ѡ҆ пою́щихъ тѧ̀.
Катава́сїа: Ѡ҆́бразъ бж҃е́ственнагѡ крⷭ҇та̀ і҆ѡ́на во чре́вѣ ки́товѣ просте́ртыма дла́ньма проначерта̀, и҆ и҆зскочѝ сп҃се́нъ ѿ ѕвѣ́рѧ си́лою твое́ю, сло́ве.
Конда́къ, гла́съ з҃. Самогла́сенъ:
Ꙋ҆жѐ пла́менное ѡ҆рꙋ́жїе не храни́тъ вра́тъ є҆де́мскихъ: на то́е бо на́йде пресла́вное ᲂу҆гаше́нїе, дре́во крⷭ҇тное. сме́рти жа́ло и҆ а҆́дова побѣ́да прогна́сѧ, и҆ предста́лъ є҆сѝ, сп҃се мо́й, вопїѧ̀ сꙋ́щымъ во а҆́дѣ: вни́дите па́ки въ ра́й.
І҆́косъ: Трѝ кресты̀ водрꙋзѝ на голго́ѳѣ пїла́тъ, два̀ разбо́йникѡмъ и҆ є҆ди́нъ жизнода́вцꙋ. сего́ ви́дѣ а҆́дъ, и҆ речѐ сꙋ́щымъ до́лꙋ: ѽ слꙋги̑ моѝ и҆ си̑лы моѧ̑! кто̀ водрꙋзи́въ гво́здь въ се́рдце моѐ древѧны́мъ мѧ̀ копїе́мъ внеза́пꙋ прободѐ; и҆ растерза́юсѧ внꙋ́тренними мои́ми, болю̀ ᲂу҆тро́бою мое́ю, страждꙋ̀ чꙋ́вствы мои́ми, смꙋща́етсѧ дꙋ́хъ мо́й, и҆ понꙋжда́юсѧ и҆зве́ргнꙋти а҆да́ма и҆ сꙋ́щыѧ ѿ а҆да́ма, дре́вомъ да̑нныѧ мѝ: дре́во бо сїѧ̑ вво́дитъ па́ки въ ра́й.
Сѷнаѯа́рїй.
Стїхѝ: Всѧ̀ землѧ̀ да покло́нитсѧ крⷭ҇тꙋ̀,
И҆́мже позна́ла є҆́сть тебѣ̀ покланѧ́тисѧ, сло́ве.
Въ сі́й де́нь, въ недѣ́лю тре́тїю постѡ́въ, поклоне́нїе пра́зднꙋемъ чтⷭ҇но́мꙋ и҆ животворѧ́щемꙋ крⷭ҇тꙋ̀, вины̀ ра́ди сицевы̀. Поне́же чрез̾ четыредесѧтодне́вный по́стъ ѡ҆́бразомъ нѣ́кимъ и҆ мы̀ распина́емсѧ, ᲂу҆мерщвлѧ́еми ѿ страсте́й, и҆ чꙋ́вство го́рести и҆́мамы, ᲂу҆ныва́юще и҆ па́дающе: сегѡ̀ ра́ди предлага́етсѧ чтⷭ҇ны́й и҆ животворѧ́щїй крⷭ҇тъ, ꙗ҆́кѡ прохлажда́ѧй и҆ ᲂу҆твержда́ѧй на́съ, и҆ воспомина́ѧй на́мъ стрⷭ҇ти гдⷭ҇а на́шегѡ і҆и҃са хрⷭ҇та̀, и҆ ᲂу҆тѣша́ѧй,ѡ҆блегча́ѧй же болѣ̑зни на́шѧ предложе́нїемъ и҆ воспомина́нїемъ влⷣчнихъ скорбе́й и҆ ᲂу҆пова́нїемъ сла́вы ѿ крⷭ҇та̀: а҆́ще бг҃ъ на́шъ на́съ ра́ди распѧ́тсѧ, коли́кѡ подоба́етъ на́мъ є҆гѡ̀ ра́ди дѣ́ѧти; Ꙗ҆́кѡже сп҃съ на́шъ, на крⷭ҇тъ возше́дъ, просла́висѧ порꙋга́нїѧ ра́ди и҆ ѡ҆горче́нїѧ: си́це подоба́етъ и҆ на́мъ дѣ́ѧти, да просла́вимсѧ съ ни́мъ, а҆́ще и҆ нѣ́что нѣ́когда стра́ждемъ печа́льное. И҆ и҆́накѡ: ꙗ҆́коже до́лгїй и҆ жесто́кїй пꙋ́ть проходѧ́щїи и҆ трꙋдо́мъ ѡ҆тѧгче́ннїи, а҆́ще гдѣ̀ дре́во благосѣнноли́ственное ѡ҆брѧ́щꙋтъ, ма́лѡ сѣ́дше ᲂу҆покоѧ́ютсѧ, и҆ ꙗ҆́кѡ ю҆́ни бы́вше ѡ҆ста́нокъ пꙋтѝ прохо́дѧтъ: та́кѡ и҆ ны́нѣ, въ по́стное вре́мѧ и҆ посредѣ̀ приско́рбнагѡ пꙋтѝ и҆ по́двига, насади́сѧ ѿ ст҃ы́хъ ѻ҆тє́цъ живоно́сный крⷭ҇тъ, ѡ҆сла́бꙋ и҆ прохлажде́нїе на́мъ подаѧ́й, ᲂу҆трꙋди́вшыѧсѧ ᲂу҆строѧ́ѧй мꙋ́жествєнны и҆ лє́гки къ про́чемꙋ трꙋдꙋ̀. И҆лѝ ꙗ҆́коже быва́етъ при царе́вѣ прише́ствїи: пре́жде ѻ҆́нагѡ и҆дꙋ́тъ зна́мєнїѧ и҆ ски́птры, та́же и҆ са́мъ прихо́дитъ, ра́дꙋѧсѧ ѡ҆ побѣ́дѣ и҆ веселѧ́сѧ, свеселѧ́тсѧ же вкꙋ́пѣ и҆ владо́мїи. Та́кѡ и҆ гдⷭ҇ь на́шъ і҆и҃съ хрⷭ҇то́съ, хотѧ̀ над сме́ртїю показа́ти побѣ́дꙋ и҆ со сла́вою ꙗ҆ви́тисѧ въ де́нь воскрⷭ҇нїѧ, предпосла̀ пред̾ собо́ю ски́птръ сво́й, ца́рское зна́менїе, животворѧ́щїй крⷭ҇тъ, и҆сполнѧ́ющїй на́съ премно́гагѡ ѡ҆бра́дованїѧ и҆ прохлажде́нїѧ, и҆ ᲂу҆строѧ́ющїй на́съ готѡ́вы воспрїѧ́ти є҆ли́кѡ мо́щно и҆ самаго̀ цр҃ѧ̀ и҆ восхвали́ти свѣ́тлѡ побѣ́дꙋ є҆гѡ̀. Въ сре́днюю же ст҃ы́ѧ четыредесѧ́тницы седми́цꙋ: сїѐ ᲂу҆чини́сѧ, занѐ ст҃а́ѧ четыредесѧ́тница го́рькомꙋ и҆сто́чникꙋ мѐрры подо́бна є҆́сть, сокрꙋше́нїѧ ра́ди и҆ сꙋ́щїѧ на́мъ ѿ поста̀ го́рести и҆ печа́ли. Ꙗ҆́коже бж҃е́ственный мѡѷсе́й во ѻ҆́ный и̑сто́чникъ дре́во вложѝ и҆ ᲂу҆сладѝ є҆го̀: та́кѡ и҆ бг҃ъ, проведы́й на́съ чрез̾ мы́сленное чермно́е мо́ре и҆ фараѡ́на, ᲂу҆слажда́етъ животворѧ́щимъ дре́вомъ чтⷭ҇на́гѡ и҆ животворѧ́щагѡ крⷭ҇та̀ го́ресть поста̀ четыредесѧ́тницы, ᲂу҆тѣша́ѧ на́съ ꙗ҆́кѡ въ пꙋсты́ни пребыва́ющихъ, до́ндеже къ мы́сленномꙋ і҆ерⷭ҇ли́мꙋ возведе́тъ свои́мъ воскрⷭ҇нїемъ. И҆лѝ, поне́же крⷭ҇тъ глаго́летсѧ и҆ є҆́сть дре́во жи́зни, ѻ҆́ное же дре́во насажде́нно бѧ́ше посредѣ̀ раѧ̀ є҆де́ма: прили́чнѡ и҆ бж҃е́ственнїи ѻ҆тцы̀ посредѣ̀ ст҃ы́ѧ четыредесѧ́тницы насади́ша крⷭ҇тное дре́во, вкꙋ́пѣ ᲂу҆́бѡ и҆ а҆да́мово невоздержа́нїе помина́юще, вкꙋ́пѣ же и҆ ѿ ѻ҆́нагѡ свобожде́нїе прописꙋ́юще настоѧ́щимъ дре́вомъ, ѿ сего́ бо вкꙋша́юще ᲂу҆жѐ не ᲂу҆мира́емъ, но па́че и҆ ѡ҆живлѧ́емсѧ.
Тогѡ̀ си́лою, хрⷭ҇тѐ бж҃е, и҆ на́съ сохранѝ ѿ и҆скꙋше́нїй лꙋка́вагѡ и҆ сподо́би свѣ́тлѡ преитѝ четыредесѧтодне́вное по́прище и҆ бж҃е́ствєннымъ твои̑мъ стрⷭ҇те́мъ и҆ живоно́сномꙋ воскрⷭ҇нїю поклони́тисѧ, и҆ поми́лꙋй на́съ, ꙗ҆́кѡ є҆ди́нъ бл҃гъ и҆ чл҃вѣколю́бецъ. а҆ми́нь.
Пѣ́снь з҃.
І҆рмо́съ: Ѻ҆́троки ѿ пе́щи:
Воскре́слъ є҆сѝ и҆з̾ гро́ба тридне́внѡ, ꙗ҆́кѡ спѧ́й, гдⷭ҇и, а҆́дѡвы вра́тари порази́въ бж҃е́ственною си́лою, и҆ дрє́внїѧ воздви́гъ пра́ѻтцы, є҆ди́не бл҃гослове́нный ѻ҆тцє́въ бж҃е и҆ препросла́вленный.
Цѣвни́цею пѣ́сней ликꙋ́юще возра́дꙋемсѧ дне́сь, лю́дїе, крⷭ҇тꙋ̀ поклоне́нїемъ, на се́мъ пригвожде́ннаго хрⷭ҇та̀ сла́вѧще, є҆ди́наго бл҃гослове́ннаго ѻ҆тцє́въ бг҃а и҆ препросла́вленнаго.
Оу҆мерщвле́нїѧ ѡ҆рꙋ́дїе показа́вый мі́рꙋ жи́зни дѣ́лателище, любе́зный тво́й крⷭ҇тъ, всеще́дре, томꙋ̀ покланѧ́ющыѧсѧ ѡ҆ст҃ѝ, є҆ди́не бл҃гослове́нный ѻ҆тцє́въ бж҃е и҆ препросла́вленный.
Є҆ди́не млⷭ҇тиве и҆ бл҃госе́рде, просвѣтѝ, ѡ҆ст҃ѝ, є҆ди́не і҆и҃се покланѧ́ющыѧсѧ вѣ́рнѡ твоемꙋ̀ крⷭ҇тꙋ̀ и҆ бж҃е́ствєннымъ страда́нїємъ, є҆ди́не бл҃гослове́нный ѻ҆тцє́въ бж҃е и҆ препросла́вленный.
Сла́ва, трⷪ҇ченъ: Є҆ди́ницꙋ въ тре́хъ ѵ҆поста́сехъ пою̀ бж҃ество̀: свѣ́тъ бо ѻ҆ц҃ъ, свѣ́тъ сн҃ъ, свѣ́тъ дх҃ъ, свѣ́тꙋ нераздѣ́льнꙋ пребыва́ющꙋ во є҆ди́нствѣ є҆сте́ства и҆ тремѝ лꙋча́ми ли́цъ сїѧ́ющꙋ.
Бг҃оро́диченъ: Всѣ́хъ прⷪ҇рѡ́къ многоимени́тое ты̀ є҆сѝ проповѣ́данїе: врата́ бо бж҃їѧ,ста́мна злата́ѧ, землѧ̀ ст҃а́ѧ ꙗ҆ви́ласѧ є҆сѝ, дв҃о бг҃оневѣ́стнаѧ, ро́ждши пло́тїю і҆и҃са хрⷭ҇та̀, ѻ҆тцє́въ бг҃а и҆ препросла́вленна.
Катава́сїа: И҆з̾ пла́мене ѻ҆́троки и҆зба́вивый пло́ть прїи́мъ прїи́де на зе́млю, и҆ на крⷭ҇тѣ̀ пригвожде́нъ, сп҃се́нїе на́мъ дарова́ є҆ди́нъ бл҃гослове́нный ѻ҆тцє́въ бг҃ъ и҆ препросла́вленный.
Пѣ́снь и҃.
І҆рмо́съ: Се́й нарече́нный:
Мѵ́ро въ рꙋка́хъ что̀ ᲂу҆́бѡ держитѐ; кого́ же взыскꙋ́ете; ны́нѣ ꙗ҆вле́йсѧ во гро́бѣ ю҆́ноша вопїе́тъ: воскре́се хрⷭ҇то́съ и҆ бг҃ъ на́шъ, возста́вивый є҆стество̀ человѣ́ческое ѿ а҆́довыхъ глꙋби́нъ.
Ра́дꙋйсѧ, требога́тое дре́во и҆ бж҃е́ственное, крⷭ҇те, свѣ́те сꙋ́щымъ во тьмѣ̀, четвероконе́чномꙋ мі́рꙋ сїѧ́нїемъ твои́мъ предсказа́вый воста́нїѧ хрⷭ҇то́ва зарю̀, сподо́би всѧ̑ вѣ̑рныѧ дости́гнꙋти па́схи.
Въ сі́й де́нь бл҃гоꙋха́етъ мѵ́ро бж҃е́ственныѧ мѷрополо́жницы, жи́знїю бл҃гоꙋха́ющее дре́во, крⷭ҇тъ хрⷭ҇то́въ: ѡ҆бонѧ́имъ є҆гѡ̀ бг҃одꙋхнове́ннꙋю воню̀, томꙋ̀ покланѧ́ющесѧ вѣ́рнѡ во вѣ́ки.
Грѧдѝ, є҆лїссе́е прⷪ҇ро́че, рцы̀ ꙗ҆́вѣ, что̀ є҆́сть дре́во ѻ҆́ное, є҆́же въ во́дꙋ вложи́лъ є҆сѝ; крⷭ҇тъ хрⷭ҇то́въ, и҆́мже ѿ глꙋбины̀ тлѣ́нїѧ и҆звлеко́хомсѧ, томꙋ̀ покланѧ́ющесѧ вѣ́рнѡ во вѣ́ки.
Дре́вле і҆а́кѡвъ проѡбразꙋ́ѧ крⷭ҇тъ тво́й, хрⷭ҇тѐ, покланѧ́шесѧ і҆ѡ́сифова бж҃е́ственнагѡ жезла̀ ве́рхꙋ, ски́птръ се́й стра́шный црⷭ҇твїѧ твоегѡ̀ предви́дѧ: є҆мꙋ́же ны́нѣ покланѧ́емсѧ вѣ́рнѡ во вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.
Трⷪ҇ченъ: Є҆ди́но въ тре́хъ ли́цахъ сꙋщество̀ сла́влю, не слива́ю є҆диноли́чнѡ тре́хъ, нижѐ пресѣца́ю зра́комъ ѻ҆ц҃а̀ и҆ сн҃а со дх҃омъ: є҆ди́нъ бо над̾ всѣ́ми бг҃ъ во вѣ́ки.
Бг҃оро́диченъ: Є҆ди́на въ ма́терехъ ꙗ҆ви́ласѧ є҆сѝ дв҃а, бг҃оневѣ́сто мр҃і́е, без̾ мꙋ́жа роди́вши хрⷭ҇та̀ сп҃са, чистоты̀ печа́ть сохрани́вши: тебѐ ᲂу҆бл҃жи́мъ вѣ́рнїи во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви:
Катава́сїа: Рꙋ́цѣ дре́вле крⷭ҇тоѡбра́знѡ просте́ръ вели́кїй во прⷪ҇ро́цѣхъ данїи́лъ, въ ро́въ ве́рженный львѡ́въ, неврежде́нъ ѿ си́хъ снѣде́нїѧ сп҃се́сѧ, бл҃гословлѧ̀ѧ хрⷭ҇та̀ бг҃а во вѣ́ки.
Пѣ́снь ѳ҃.
І҆рмо́съ: Свѣти́сѧ, свѣти́сѧ:
Во гро́бъ низше́лъ є҆сѝ, жизнода́вче и҆ бж҃е, и҆ сокрꙋши́лъ є҆сѝ всѧ̑ закле́пы и҆ верєѝ, и҆ мє́ртвыѧ воскреси́лъ є҆сѝ, вопїю́щыѧ: сла́ва воста́нїю твоемꙋ̀, хрⷭ҇тѐ сп҃се всеси́льне.
Гро́бъ тво́й и҆сточѝ жи́знь мнѣ̀, хрⷭ҇тѐ. содержа́й бо жи́знь, предста́въ возопи́лъ є҆сѝ живꙋ́щымъ во гробѣ́хъ: сꙋ́щїи во ᲂу҆́захъ, разрѣши́тесѧ: а҆́зъ бо мі́ра и҆збавле́нїе прїидо́хъ.
Пѣ́сньми да взыгра́ютъ всѧ̑ древа̀ дꙋбра̑внаѧ, соиме́нное дре́во крⷭ҇та̀ зрѧ̑ща ѡ҆блобыза́емо дне́сь: є҆гѡ́же главꙋ̀ вознесѐ хрⷭ҇то́съ, ꙗ҆́коже прⷪ҇ро́чествꙋетъ бж҃е́ственный дв҃дъ.
Дре́вомъ ᲂу҆ме́рый, дре́во жи́зни тѧ̀ ѡ҆брѣто́хъ, хрⷭ҇тоно́сне крⷭ҇те мо́й, храни́телю мо́й нерꙋши́мый, на де́моны крѣ́пкаѧ держа́во. тебѣ̀ покланѧ́ѧсѧ дне́сь зовꙋ̀: ѡ҆ст҃ѝ мѧ̀ сла́вою твое́ю.
Весели́сѧ, ра́дꙋйсѧ, цр҃ковь бж҃їѧ, дре́вꙋ требога́тномꙋ покланѧ́ющисѧ дне́сь всест҃а́гѡ крⷭ҇та̀ хрⷭ҇то́ва, є҆мꙋ́же слꙋ́жатъ чи́нове а҆́гг҃льстїи, и҆ со стра́хомъ предстоѧ́тъ.
Сла́ва, трⷪ҇ченъ: Трⷪ҇цѣ ли̑цы, є҆ди́ницѣ є҆стество́мъ, покланѧ́юсѧ тебѣ̀, бж҃ество̀ ст҃о́е, ѻ҆ц҃ꙋ̀ и҆ сн҃ꙋ со ст҃ы́мъ дх҃омъ, є҆ди́номꙋ нача́лꙋ, є҆ди́номꙋ црⷭ҇твꙋ, всѣ́ми влады́чествꙋющемꙋ.
Бг҃оро́диченъ: Гора̀ вели́каѧ, въ ню́же всели́сѧ хрⷭ҇то́съ, ты̀ є҆сѝ, дв҃о, ꙗ҆́коже бж҃е́ственный дв҃дъ вопїе́тъ: є҆́юже мы̀ вознесо́хомсѧ къ нб҃сѝ, ᲂу҆сыновле́ннїи дх҃омъ,всебл҃же́ннаѧ.
Катава́сїа: Ѽ мт҃и дв҃о и҆ бцⷣе нело́жнаѧ, ро́ждшаѧ безсѣ́меннѡ хрⷭ҇та̀ бг҃а на́шего, на крⷭ҇тъ вознесе́ннаго пло́тїю! тѧ̀ вѣ́рнїи всѝ досто́йнѡ съ ни́мъ ны́нѣ велича́емъ.
Є҆ѯапостїла́рїй воскре́сенъ. И҆ крⷭ҇та̀.
Подо́бенъ: Со ᲂу҆ч҃нки̑ взы́демъ:
Крⷭ҇тъ хрⷭ҇то́въ чтⷭ҇ны́й дне́сь предложе́нный ви́дѣвше поклони́мсѧ, и҆ вѣ́рнѡ возвесели́мсѧ, ѡ҆блобыза́юще любо́вїю, просѧ́ще на се́мъ во́лею распе́ншагосѧ гдⷭ҇а, сподо́бити всѣ́хъ на́съ крⷭ҇тꙋ̀ чтⷭ҇но́мꙋ поклони́тисѧ и҆ дости́гнꙋти воскрⷭ҇нїѧ всѣ̑мъ неѡсꙋжде́ннѡ.
И҆ ны́нѣ, бг҃оро́диченъ: Дре́вꙋ, на не́мже, всечⷭ҇тна́ѧ, пречⷭ҇тѣи дла̑ни за ны̀ прострѐ пригвожде́нный сн҃ъ тво́й, ны́нѣ бл҃гоче́стнѡ покланѧ́емсѧ: да́ждь на́мъ ми́ръ, и҆ мїросп҃си́тельныхъ всечⷭ҇тны́хъ стрⷭ҇те́й дости́гнꙋти, и҆ свѣ́тломꙋ мїрора́достномꙋ гдⷭ҇оимени́томꙋ и҆ свѣтоно́сномꙋ дню̀ па́схи поклони́тисѧ.
На хвали́техъ поста́вимъ стїхѡ́въ ѕ҃, и҆ пое́мъ стїхи̑ры воскрⷭ҇ны ѻ҆смогла́сника д҃: и҆ трїѡ́ди подо́бны г҃, гла́съ д҃.
Подо́бенъ: Ꙗ҆́кѡ до́блѧ:
Во гла́сѣхъ воскли́кнемъ, въ пѣ́снехъ возвели́чимъ, крⷭ҇тъ чтⷭ҇ны́й лобыза́юще, и҆ къ немꙋ̀ возопїи́мъ: крⷭ҇те всечⷭ҇тне, ѡ҆ст҃ѝ на́шѧ дꙋ́шы и҆ тѣлеса̀ си́лою твое́ю, и҆ ѿ всѧ́кагѡ вре́да сопроти́вныхъ соблюдѝ невреждє́ны, бл҃гоче́стнѡ покланѧ́ющыѧсѧ тебѣ̀.
Пристꙋпи́вше почерпи́те неистоща́емыхъ во́дъ, крⷭ҇та̀ бл҃года́тїю и҆злива́емыхъ, здѣ́ предлежа́щее ви́дѧще дре́во ст҃о́е, дарова́нїй и҆сто́чникъ, напоѧ́емый кро́вїю и҆ водо́ю влⷣки всѣ́хъ, на то́мъ во́лею возне́сшагѡсѧ и҆ земны̑ѧ возне́сшагѡ.
Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.
Цр҃кве ᲂу҆твержде́нїе, царе́й держа́ва, мона́шествꙋющихъ похвала̀ и҆ сп҃се́нїе ты̀ є҆сѝ, крⷭ҇те всечⷭ҇тне: тѣ́мже покланѧ́ющесѧ тебѣ̀, и҆ се́рдцемъ и҆ дꙋше́ю просвѣща́емсѧ дне́сь, бж҃е́ственною бл҃года́тїю на тебѣ̀ пригвожде́ннагѡ, и҆ держа́вꙋ льсти́вагѡ разори́вшагѡ, и҆ проклѧ́тїе ᲂу҆праздни́вшагѡ.
Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.
И҆ повторѧ́емъ пе́рвꙋю стїхи́рꙋ. Та́же глаго́лемъ:
Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ, гла́съ и҃:
Высокоꙋ́мнагѡ мнѣ́нїѧ ѕлы́хъ фарїсе́євъ, всѣ́хъ гдⷭ҇ь при́тчею ᲂу҆бѣга́ти сегѡ̀ наꙋчѝ: и҆ не высокомꙋ́дрствовати па́че, є҆́же подоба́етъ мꙋ́дрствовати, всѣ́хъ наста́ви: подо́бїе и҆ ѡ҆́бразъ са́мъ бы́въ, да́же до распѧ́тїѧ и҆ сме́рти са́мъ себѐ и҆стощѝ. бл҃годарѧ́ще ᲂу҆̀бо съ мытаре́мъ рце́мъ: пострада́вый за ны̀, и҆ безстра́стенъ пребы́вый, бж҃е, ѿ страсте́й на́съ и҆зба́ви, и҆ сп҃сѝ дꙋ́шы на́шѧ.
Сла́ва, па́ки то́йже. И҆ ны́нѣ: Пребл҃гослове́на є҆сѝ: Славосло́вїе вели́кое. Є҆гда́ же начина́емъ пѣ́ти: Сла́ва въ вы́шнихъ: тогда̀ прїи́детъ і҆ере́й ѡ҆болче́нъ во всѧ̑ сщ҃е́нничєскїѧ ѡ҆дє́жды [и҆лѝ а҆́ще гдѣ̀ бꙋ́дꙋтъ мно́зи, то ѿ пе́рвѣйшагѡ въ свои́хъ и҆̀мъ мѣ́стѣхъ до́лжно є҆́сть семꙋ̀ бы́ти]. И҆ взе́мъ кади́льницꙋ, кади́тъ ст҃ꙋ́ю трапе́зꙋ и҆ чтⷭ҇ны́й крⷭ҇тъ, та́же под̾е́млетъ є҆го̀ на ді́скосѣ со храни́льницею на главꙋ̀ свою̀, и҆ и҆схо́дитъ ѿ лѣ́выѧ страны̀ престо́ла сѣ́верными две́рьми, пред̾идꙋ́щымъ є҆мꙋ̀ свѣща́мъ двꙋ́мъ и҆ кади́льницѣ, и҆ ѿхо́дитъ до црⷭ҇кихъ вра́тъ. Сконча́нꙋ же бы́вшꙋ славосло́вїю и҆ трист҃о́мꙋ, глаго́летъ сщ҃е́нникъ: Премꙋ́дрость, про́сти. И҆ начина́емъ тропа́рь: Сп҃сѝ, гдⷭ҇и, лю́ди твоѧ̑: три́жды. И҆ прихо́дитъ і҆ере́й носѧ̀ чтⷭ҇ны́й крⷭ҇тъ пред̾ ст҃ы̑ѧ двє́ри: и҆ та́мѡ ᲂу҆гото́ванꙋ сꙋ́щꙋ четвероно́жникꙋ, и҆ полага́етъ верхꙋ̀ є҆гѡ̀ чтⷭ҇ны́й крⷭ҇тъ, и҆ ѿве́рзъ храни́льницꙋ, кади́тъ крⷭ҇тоѡбра́знѡ ѿ четы́рехъ стра́нъ.
И҆ а҆́бїе пое́мъ тропа́рь, гла́съ ѕ҃:
Крⷭ҇тꙋ̀ твоемꙋ̀ покланѧ́емсѧ, влⷣко, и҆ ст҃о́е воскрⷭ҇нїе твоѐ сла́вимъ. [Три́жды].
И҆ начина́ютъ покланѧ́тисѧ: а҆́ще гдѣ̀ во ѡ҆би́тели, пе́рвѣе и҆гꙋ́менъ, и҆лѝ и҆́нъ пе́рвенствꙋѧй во сщ҃е́нныхъ, та́кожде и҆ про́чїи сщ҃е́нницы покланѧ́ютсѧ пред̾ чтⷭ҇ны́мъ крⷭ҇то́мъ два́жды, цѣлꙋ́ютъ и҆̀, и҆ по цѣлова́нїи па́ки покланѧ́ютсѧ є҆ди́ножды. Та́кожде прихо́дѧтъ и҆ бра́тїѧ два̀ два̀, покланѧ́ющесѧ по чи́нꙋ и҆́хъ.
Кла́нѧющымсѧ же бра́тїѧмъ, пое́мъ самогла́сны сїѧ̑,
гла́съ в҃:
Прїиди́те, вѣ́рнїи, животворѧ́щемꙋ дре́вꙋ поклони́мсѧ, на не́мже хрⷭ҇то́съ цр҃ь сла́вы во́лею рꙋ́цѣ распросте́ръ, вознесѐ на́съ въ пе́рвое бл҃же́нство, и҆́хже пре́жде вра́гъ, сла́стїю ᲂу҆кра́дъ, и҆згна̑ны ѿ бг҃а сотворѝ. прїиди́те, вѣ́рнїи, дре́вꙋ поклони́мсѧ, и҆́мже сподо́бихомсѧ неви́димыхъ вра̑гъ сокрꙋша́ти главы̑. прїиди́те, всѧ̑ племена̀ ꙗ҆зы̑къ, крⷭ҇тъ гдⷭ҇ень пѣ́сньми почти́мъ: ра́дꙋйсѧ, крⷭ҇те, па́дшагѡ а҆да́ма соверше́нное и҆збавле́нїе! ѡ҆ тебѣ̀ вѣ́рнѣйшїи ца́рїе на́ши хва́лѧтсѧ, ꙗ҆́кѡ твое́ю си́лою і҆сма́ильтєскїѧ лю́ди держа́внѡ покарѧ́ющїи. тебѐ ны́нѣ со стра́хомъ хрⷭ҇тїа́не цѣлꙋ́емъ, и҆ на тебѣ̀ пригвожде́ннаго бг҃а сла́вимъ, глаго́люще: гдⷭ҇и, на то́мъ пригвожде́нный, поми́лꙋй на́съ, ꙗ҆́кѡ бл҃гъ и҆ чл҃вѣколю́бецъ.
Гла́съ и҃: Дне́сь влⷣка тва́ри и҆ гдⷭ҇ь сла́вы на крⷭ҇тѣ̀ пригвожда́етсѧ и҆ въ ре́бра пробода́етсѧ: же́лчи и҆ ѻ҆́цта вкꙋша́етъ, сла́дость цр҃ко́внаѧ: вѣнце́мъ ѿ те́рнїѧ ѡ҆блага́етсѧ, покрыва́ѧй нб҃о ѡ҆́блаки: ѡ҆де́ждою порꙋга́нїѧ ѡ҆блача́етсѧ, и҆ заꙋша́етсѧ бре́нною рꙋко́ю, рꙋко́ю созда́вый человѣ́ка: по плещма̀ бїе́нъ быва́етъ, ѡ҆дѣва́ѧй не́бо ѡ҆́блаки: заплева̑нїѧ и҆ ра̑ны прїе́млетъ, поношє́нїѧ и҆ заꙋшє́нїѧ: и҆ всѧ̑ терпи́тъ менє̀ ра́ди ѡ҆сꙋжде́ннагѡ, и҆зба́витель мо́й и҆ бг҃ъ, да сп҃се́тъ мі́ръ ѿ прельще́нїѧ, ꙗ҆́кѡ бл҃госе́рдъ.
Сла́ва, гла́съ и҃:
Дне́сь непристꙋ́пный сꙋщество́мъ пристꙋ́пенъ мнѣ̀ быва́етъ и҆ стра́ждетъ стрⷭ҇ти свобожда́ѧй мѧ̀ ѿ страсте́й: свѣ́тъ подава́ѧй слѣпы̑мъ, ѿ беззако́нныхъ ᲂу҆сте́нъ ѡ҆плева́етсѧ, и҆ за плѣнє́нныѧ дае́тъ плещѝ на ра̑ны. сего̀ чтⷭ҇аѧ дв҃а и҆ мт҃и на крⷭ҇тѣ̀ зрѧ́щи, болѣ́зненнѡ вѣща́ше: ᲂу҆вы̀ мнѣ̀, ча́до моѐ! что̀ сїѐ сотвори́лъ є҆сѝ; кра́сный добро́тою па́че всѣ̑хъ человѣ̑къ,бездыха́ненъ, беззра́ченъ ꙗ҆влѧ́ешисѧ, не и҆мѣ́ѧ ви́да, нижѐ добро́ты: ᲂу҆вы̀ мнѣ̀, мо́й свѣ́те! не могꙋ̀ спѧ́ща зрѣ́ти тѧ̀, ᲂу҆тро́бою ᲂу҆ѧзвлѧ́юсѧ, и҆ лю́тое ѡ҆рꙋ́жїе се́рдце моѐ прохо́дитъ. воспѣва́ю твоѧ̑ стрⷭ҇ти, покланѧ́юсѧ бл҃госе́рдїю твоемꙋ̀: долготерпѣли́ве гдⷭ҇и, сла́ва тебѣ̀.
И҆ ны́нѣ, гла́съ то́йже:
Дне́сь прⷪ҇ро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́стѣ но́зѣ твоѝ, гдⷭ҇и: и҆ ѿ дре́ва сп҃си́тельнагѡ вкꙋси́вше, ѿ грѣхо́вныхъ страсте́й свобо́дꙋ полꙋчи́хомъ, мл҃твами бцⷣы, є҆ди́не чл҃вѣколю́бче.
Та́же є҆ктєнїѝ, и҆ ѿпꙋ́стъ. Сла́ва, и҆ ны́нѣ, стїхи́ра є҆ѵⷢ҇льскаѧ въ притво́рѣ: и҆ чте́тсѧ ѡ҆глаше́нїе стꙋді́тово, и҆ ча́съ пе́рвый, и҆ соверше́нный ѿпꙋ́стъ. На лїтꙋргі́и и҆з̾ѡбрази́тєльнаѧ. Бл҃жє́нна гла́са, на ѕ҃: и҆ ѿ канѡ́на крⷭ҇та̀, пѣ́снь г҃-ѧ на д҃.
Вмѣ́стѡ же трист҃а́гѡ пое́мъ: Крⷭ҇тꙋ̀ твоемꙋ̀ покланѧ́емсѧ, влⷣко, и҆ ст҃о́е воскрⷭ҇нїе твоѐ сла́вимъ.
Прокі́менъ а҆пⷭ҇ла, гла́съ ѕ҃: Сп҃сѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ.Сті́хъ: Къ тебѣ̀, гдⷭ҇и, воззовꙋ̀, бж҃е мо́й, да не премолчи́ши ѿ менє̀. А҆пⷭ҇лъ ко є҆вре́ємъ, зача́ло та҃і. А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ. Є҆ѵⷢ҇лїе ѿ ма́рка, зача́ло л҃з. Прича́стенъ: Зна́менасѧ на на́съ свѣ́тъ лица̀ твоегѡ̀, гдⷭ҇и.
Въ недѣ́лю ве́чера.
На Гдⷭ҇и воззва́хъ, поста́вимъ стїхѡ́въ і҃: и҆ пое́мъ д҃ стїхи̑ры ѻ҆смогла́сника ᲂу҆мили́тєльны, гла́са: и҆ трїѡ́ди г҃, подо́бны господи́на і҆ѡ́сифа.
Гла́съ и҃.
Подо́бенъ: Гдⷭ҇и, а҆́ще и҆ на сꙋди́лищи:
Гдⷭ҇и, на крⷭ҇тѣ̀ во́лею простры́й дла̑ни твоѧ̑, семꙋ̀ во ᲂу҆миле́нїи се́рдца поклони́тисѧ на́съ сподо́би, просвѣще́нныхъ до́брѣ посто́мъ и҆ мл҃твами, и҆ воздержа́нїемъ и҆ бл҃готворе́нїемъ, ꙗ҆́кѡ бла́гъ и҆ чл҃вѣколю́бецъ.
Гдⷭ҇и, грѣхѡ́въ мои́хъ мно́жєства ѡ҆чи́сти по мно́жествꙋ щедро́тъ твои́хъ, всеще́дре, и҆ крⷭ҇тъ тво́й сподо́би чи́стою дꙋше́ю ви́дѣти и҆ цѣлова́ти, въ настоѧ́щей седми́цѣ воздержа́нїѧ, ꙗ҆́кѡ чл҃вѣколю́бецъ.
И҆́на стїхи́ра, господи́на ѳео́дѡра, гла́съ г҃.
Подо́бенъ: Преве́лїе чꙋ́до:
Преве́лїе чꙋ́до! дре́во ви́дитсѧ, на не́мже хрⷭ҇то́съ во́лею распѧ́тсѧ пло́тїю: поклонѧ́етсѧ мі́ръ, и҆ просвѣща́емь взыва́етъ: ѽ крⷭ҇та̀ си́ло! и҆ зри́мый де́моны пали́тъ, и҆ и҆з̾ѡбража́емь си́хъ палѧ̀ ꙗ҆влѧ́етсѧ. ᲂу҆блажа́ю тѧ̀, пречⷭ҇тое дре́во, почита́ю и҆ покланѧ́юсѧ со стра́хомъ, и҆ бг҃а сла́влю, тобо́ю да́рꙋющаго мнѣ̀ жи́знь безконе́чнꙋю.
И҆ мине́и г҃. Сла́ва, и҆ ны́нѣ, бг҃оро́диченъ.
Вхо́дъ. Свѣ́те ти́хїй:
Прокі́менъ, гла́съ и҃: Да́лъ є҆сѝ достоѧ́нїе боѧ́щымсѧ тебє̀, гдⷭ҇и. Сті́хъ: Ѿ конє́цъ землѝ къ тебѣ̀ воззва́хъ. Сті́хъ: Покры́юсѧ въ кро́вѣ кри́лъ твои́хъ. Сті́хъ: Та́кѡ воспою̀ и҆́мени твоемꙋ̀.
На стїхо́внѣ самогла́сенъ днѐ, два́жды, гла́съ и҃:
Воззрѣ́ти ѻ҆чи́ма на нб҃о не смѣ́ю ѡ҆каѧ́нный а҆́зъ ѿ лꙋка́выхъ мои́хъ дѣѧ́нїй, но ꙗ҆́кѡ мыта́рь воздохнꙋ́въ взыва́ю тѝ: бж҃е, млⷭ҇тивъ бꙋ́ди мнѣ́ грѣ́шномꙋ и҆ ѿ фарїсе́йскагѡ лицемѣ́рїѧ и҆зба́ви мѧ̀, ꙗ҆́кѡ є҆ди́нъ бл҃госе́рдъ.
Сті́хъ а҃: Къ тебѣ̀ возведо́хъ ѻ҆́чи моѝ:
Сті́хъ в҃: Поми́лꙋй на́съ, гдⷭ҇и:
Мч҃нченъ: Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те,и҆зба́витисѧ ѿ сѣте́й вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже.
Нбⷭ҇ныѧ си̑лы пою́тъ тѧ̀, бл҃года́тнаѧ мт҃и безневѣ́стнаѧ: и҆ мы̀ славосло́вимъ неизслѣ́димое твоѐ ржⷭ҇тво̀. бцⷣе, молѝ сп҃сти́сѧ дꙋша́мъ на́шымъ.