Суббота третьей седмицы
Въ сꙋббѡ́тꙋ тре́тїѧ седми́цы на ᲂу҆́трени,
тропа́рь на а҆ллилꙋ́їа: А҆пⷭ҇ли, мч҃нцы и҆ прⷪ҇ро́цы: Сла́ва: Помѧнѝ, гдⷭ҇и: И҆ ны́нѣ: Мт҃и ст҃а́ѧ: По а҃-мъ стїхосло́вїи глаго́лемъ сѣда́льны мч҃нчны ѻ҆смогла́сника, прилꙋчи́вшагѡсѧ гла́са, трѝ: и҆ бг҃оро́диченъ. По в҃-мъ же стїхосло́вїи глаго́лемъ сѣда́ленъ ме́ртвенъ, гла́съ є҃: Поко́й, сп҃се на́шъ: Ѿ дв҃ы возсїѧ́вый: Ѡ҆ си́хъ всѣ́хъ ᲂу҆каза́сѧ въ мимоше́дшꙋю сꙋббѡ́тꙋ. И҆ чте́нїе въ шестодне́вцѣ. Пое́мъ же канѡ́нъ мине́и, и҆ ст҃а́гѡ ѡ҆би́тели, и҆ четверопѣ́снцы по чи́нꙋ и҆́хъ. Здѣ̀ не стїхосло́вимъ Гдⷭ҇еви пое́мъ, но а҆́бїе глаго́лемъ і҆рмо́съ мине́и.
Четверопѣ́снецъ, є҆гѡ́же краестро́чїе сицево̀: Пое́тъ сїѧ̑ і҆ѡ́сифъ. Творе́нїе господи́на і҆ѡ́сифа. Гла́съ д҃. И҆ стїхосло́вѧтсѧ пѣ̑сни.
Пѣ́снь ѕ҃.
І҆рмо́съ: Прїидо́хъ во глꙋбины̑ мѡрскі́ѧ:
Кро́вными ка́плѧми напои́сте бл҃гочести́выхъ сердца̀, ѕлочести́выхъ же полкѝ ꙗ҆́вѣ въ ни́хъ потопи́сте, стрⷭ҇тоте́рпцы достосла́внїи.
Просла́вивше ᲂу҆десы̀ свои́ми всѣ́хъ влⷣкꙋ, ны́нѣ прославлѧ́етесѧ непреста́ннѡ, страда́льцы, сла́ва вѣ̑рнымъ сꙋ́ще и҆ вели́цыи застꙋ̑пницы.
Въ ро́вѣ преиспо́днѣмъ положе́нъ бы́лъ є҆сѝ: въ вѣ́рѣ ᲂу҆́бо ᲂу҆ме́ршымъ поко́й, сло́ве, пода́ждь,сщ҃е́нныхъ страда́лєцъ мольба́ми, и҆ согрѣше́нїй проще́нїе.
Бг҃оро́диченъ: Да тѧ̀ гла̑сы немо́лчными восхва́лимъ, дв҃о, гла́сы на́шѧ сїѧ̑ прїимѝ, и҆ ѡ҆чище́нїе долгѡ́въ прїѧ́ти на́мъ сн҃а твоего̀ ᲂу҆молѝ.
И҆́ный, господи́на ѳео́дѡра. Гла́съ и҃.
І҆рмо́съ: Содержи́ма мѧ̀ грѣхи̑ мно́гими:
Ны́нѣ мч҃нкъ торжество̀: стеце́мсѧ, и҆ страда̑нїѧ и҆́хъ всечестна̑ѧ ᲂу҆бл҃жи́вше, хрⷭ҇та̀ си́хъ вѣнча́вшаго воспои́мъ.
Бж҃е́ственною любо́вїю ко хрⷭ҇тꙋ̀ разжига́еми, на ᲂу҆́глехъ ѻ҆́гненныхъ прехо́дите ꙗ҆́кѡ на росѣ̀, того̀ воспѣва́юще, мч҃нцы бл҃же́ннїи.
Сла́ва, трⷪ҇ченъ: Тѧ̀, трⷪ҇це пренача́льнаѧ и҆ бж҃е́ственнаѧ є҆ди́нице, свѣ́тъ и҆ свѣ́ты пою̀,жи́знь и҆ жи̑зни, ᲂу҆́мъ, сло́во и҆ дх҃а, ст҃а́го и҆ ст҃ы̑ѧ, є҆ди́наго бг҃а.
Бг҃оро́диченъ: І҆ессе́е пра́ѻтче, взыгра́й: занѐ ѿ ко́рене твоегѡ̀ возсїѧ̀ цвѣ́тъ жи́зни, ѿ чтⷭ҇ыѧ ѻ҆трокови́цы хрⷭ҇то́съ бг҃ъ, сп҃са́ѧй мі́ръ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Ѻ҆гнѧ̀ и҆ меча̀ и҆ сме́рти не ᲂу҆боѧ́вшесѧ, и҆сповѣ́данїе сп҃се́нїѧ соблюдо́сте, бл҃же́ннїи, ѿ хрⷭ҇та̀ ᲂу҆крѣплѧ́еми.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Въ ме́ртвыхъ свобо́дь, ꙗ҆́кѡ сы́й нача́льникъ жи́зни и҆ сме́рти, ты̀ ᲂу҆поко́й, ꙗ҆̀же прїѧ́лъ є҆сѝ, и҆ во дворы̀ твоѧ̑ вселѝ, чл҃вѣколю́бче.
І҆рмо́съ: Содержи́ма мѧ̀ грѣхи̑ мно́гими, и҆ припа́дающа щедро́тамъ твои̑мъ, прїимѝ ꙗ҆́кѡ прⷪ҇ро́ка, чл҃вѣколю́бче гдⷭ҇и, и҆ сп҃сѝ мѧ̀.
Конда́къ: Со ст҃ы́ми ᲂу҆поко́й: І҆́косъ: Са́мъ є҆ди́нъ є҆сѝ безсме́ртенъ:
Пѣ́снь з҃.
І҆рмо́съ: Ю҆́нѡшы трѝ:
Лю́бѧщи стра̑сти безслове́сныхъ, дꙋшѐ, комꙋ̀ вои́стиннꙋ ᲂу҆подо́биласѧ є҆сѝ; кого̀ превосходѧ́ща и҆мѣ́ла є҆сѝ во грѣсѣ́хъ; возопі́й хрⷭ҇тꙋ̀: сп҃си́ мѧ, бл҃же.
Ст҃і́и, на ст҃ы́хъ почива́ющаго моли́те прилѣ́жнѡ, въ сїѧ̑ ст҃ы̑ѧ дни̑ ѡ҆ст҃и́ти всѣ́хъ бл҃гочести́выхъ мꙋдрова̑нїѧ.
Всевы́шнїй, въ млⷭ҇ти бога́тый и҆ бл҃гі́й, рабѡ́мъ твои̑мъ пре́жде ᲂу҆со́пшымъ ѡ҆ставле́нїе пода́ждь, къ ликѡ́мъ ст҃ы́хъ сїѧ̑ причита́ѧ, ꙗ҆́кѡ чл҃вѣколю́бецъ.
Бг҃оро́диченъ: Родила̀ є҆сѝ, кромѣ̀ зако́нѡвъ є҆стества̀, созда́телѧ, бы́вша человѣ́ка,пречⷭ҇таѧ: того̀ ᲂу҆́бо молѝ презрѣ́ти ны́нѣ всѣ́хъ беззакѡ́нїѧ и҆ прегрѣшє́нїѧ.
И҆́ный.
І҆рмо́съ: А҆́гг҃ломъ ѻ҆́троки:
Чтⷭ҇ны́хъ мч҃нкъ па̑мѧти показа́вый цр҃кви твое́й ра́дость и҆ дꙋше́вное ᲂу҆тѣше́нїе, бл҃гослове́нъ є҆сѝ, бж҃е ѻ҆тє́цъ на́шихъ.
Не лже́мъ тѝ, хрⷭ҇тѐ, не ѿмета́емсѧ, мч҃нцы вопїѧ́хꙋ посредѣ̀ мꙋче́нїй, беззакѡ́нныѧ сꙋдїи̑ ᲂу҆дивлѧ́юще: бл҃гослове́нъ є҆сѝ, бж҃е ѻ҆тє́цъ на́шихъ.
Сла́ва, трⷪ҇ченъ: Въ трїе́хъ ли́цахъ є҆ди́но є҆стество̀ чти́мъ, ѻ҆ц҃а̀, и҆ сн҃а, и҆ дх҃а, прⷪ҇ро́чески вопїю́ще: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ: Ка́кѡ ꙗ҆́кѡ мт҃и ражда́еши, и҆ дв҃а пребыла̀ є҆сѝ; а҆́зъ бг҃а роди́хъ, не и҆спытꙋ́й ѿ менє̀ ѡ҆́браза: є҆ли̑ка бо хо́щетъ, твори́тъ: бг҃оѻтрокови́ца вопїе́тъ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀:
Мч҃нческїй ли́че бг҃освѣ́тлѣйшїй, рабы̑ твоѧ̑ сподо́би покло́нники бы́ти бж҃е́ственномꙋ и҆ животворѧ́щемꙋ сп҃совꙋ крⷭ҇тꙋ̀.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ, гдⷭ҇и.
Жи́зни раздаѧ́телю, цр҃ю̀ безсме́ртне, ꙗ҆̀же и҆збра́лъ є҆сѝ рабы̑ твоѧ̑ въ вѣ́рѣ и҆ наде́ждѣ,вѣ́чныѧ твоеѧ̀ жи́зни сподо́би.
І҆рмо́съ: А҆́гг҃ломъ ѻ҆́троки въ пещѝ ѡ҆роси́вый и҆ гремѧ́щꙋю пе́щь въ ро́сꙋ преложи́вый, бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃.
І҆рмо́съ: И҆зба́вителю всѣ́хъ:
Небоѧ́зненнымъ мꙋдрова́нїемъ и҆дꙋ́ще къ болѣ́знєннымъ трꙋдѡ́мъ, мч҃нцы, болѣ̑зни плотскі̑ѧ под̾ѧ́сте, и҆ къ неболѣ́зненномꙋ жре́бїю преста́влени, всѧ́кꙋю болѣ́знь се́рдца ѡ҆блегча́ете.
Вы̑шнѧѧ вмѣ́стѡ тлѣ́нныхъ полꙋчи́вше, страстьмѝ плотски́ми мѧ̀ и҆стлѣ́ва́юща сп҃си́те поще́нїемъ и҆ моли́твами прилѣ́жными, мч҃нцы бж҃е́ственнїи, всѣ́хъ бг҃а молѧ́ще.
Мл҃твами мч҃нкъ твои́хъ, хрⷭ҇тѐ, млⷭ҇ти твоѧ̑ всѣ̑мъ низпослѝ: и҆ къ тебѣ̀ бл҃госе́рдомꙋ ѿ житїѧ̀ преста́вльшымсѧ пода́ждь разрѣше́нїе долгѡ́въ и҆ бж҃е́ственный поко́й.
Бг҃оро́диченъ: Ꙗ҆́кѡ ро́ждшаѧ бг҃а безгрѣ́шнаго, на́шѧ грѣхѝ и҆стребѝ мт҃рними твои́ми мл҃твами, бцⷣе, и҆ сп҃са́й вопїю́щыѧ: бл҃гослови́те, дѣла̀ гдⷭ҇нѧ, гдⷭ҇а.
И҆́ный.
І҆рмо́съ: Бг҃оглаго́ливїи ѻ҆́троцы:
Ѻ҆гнепа̑льныѧ мꙋ̑ки претерпѣ́вше ꙗ҆́кѡ ѡ҆роше́нїе, страда́льцы, съ ра́достїю взыва́сте: бл҃гослови́те, дѣла̀ гдⷭ҇нѧ, гдⷭ҇а.
Бг҃ово́инственный по́лкъ мч҃нкъ, побѣди́въ прельще́нїе, побѣди́тельнѡ взыва́ше: бл҃гослови́те, дѣла̀ гдⷭ҇нѧ, гдⷭ҇а.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Съ сн҃омъ ѻ҆ц҃ꙋ̀ и҆ всест҃о́мꙋ дх҃ꙋ поклонѧ́ющесѧ, всѝ вѣ́рнѡ возопїи́мъ: трⷪ҇це во є҆ди́ницѣ,сп҃сѝ дꙋ́шы на́шѧ.
Бг҃оро́диченъ: Ты̀ и҆ дв҃а и҆ мт҃и ꙗ҆ви́ласѧ є҆сѝ, ро́ждши безмꙋ́жнѡ бг҃а всѣ́хъ, всечⷭ҇таѧ: того̀ ᲂу҆́бо молѝ сп҃стѝсѧ рабѡ́мъ твои̑мъ.
Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ.
Стрⷭ҇тоте́рпєцъ мл҃твами, твоѧ̑ рабы̑ сподо́би, хрⷭ҇тѐ сп҃се, и҆ поклони́тисѧ и҆ ви́дѣти животворѧ́щїй крⷭ҇тъ твоеѧ̀ бл҃гости.
Сті́хъ: Дꙋ́шы и҆́хъ во бл҃ги́хъ водворѧ́тсѧ.
Разрꙋши́вый держа́вꙋ сме́рти твои́мъ и҆з̾ ме́ртвыхъ воста́нїемъ, преста́вльшыѧсѧ ᲂу҆поко́й со и҆збра́нными твои́ми хвали́ти тѧ̀ гдⷭ҇а.
Хва́лимъ, бл҃гослови́мъ, покланѧ́емсѧ гдⷭ҇еви.
І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ и҆ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ: Є҆́ѵа ᲂу҆́бѡ недꙋ́гомъ:
Оу҆крѣпи́вше на ка́мени мы́сленнѣмъ мꙋдрова́нїе, стрⷭ҇тоте́рпцы, ѿ всѣ́хъ вра́жїихъ кова́рствъ пребы́сте непрекло́нни: тѣ́мже мѧ̀, ᲂу҆клонѧ́ющасѧ ко страсте́мъ дꙋшетлѣ̑ннымъ, ᲂу҆тверди́те къ бг҃ꙋ мл҃твами.
Бж҃е́ственный и҆ свѣтоза́рный вои́стиннꙋ собо́ре мч҃нкъ, молѝ пребл҃га́го влⷣкꙋ, во вре́мѧ воздержа́нїѧ проще́нїе прегрѣше́нїй на́мъ всѣ̑мъ дарова́ти и҆ вѣ́чное ра́дованїе.
Чл҃вѣколю́бче є҆ди́не бл҃же, рабы̑ твоѧ̑, въ наде́ждѣ воскрⷭ҇нїѧ вѣ́чнагѡ почи́вшыѧ, свѣ́та твоегѡ̀ невече́рнѧгѡ сподо́би причасти́тисѧ и҆ сла́дости вкꙋше́нїѧ, да тѧ̀ со стра́хомъ велича́емъ.
Бг҃оро́диченъ: Свѣ́та жили́ще бы́сть твоѧ̀ всест҃а́ѧ ᲂу҆тро́ба, всечⷭ҇таѧ. тѣ́мже вѣ́рнѡ вопїю́ ти: зѣ̑ницы дꙋшѝ моеѧ̀ ѡ҆зарѝ, и҆ стезю̀ пра́вꙋю покажѝ тѧ̀ и҆́стиннѡ ᲂу҆бл҃жа́ющемꙋ.
И҆́ный.
І҆рмо́съ: Велича́емъ тѧ̀ мт҃рь свѣ́та:
Мч҃нкѡвъ па́мѧть соверши́мъ, вѣ́рнїи, да тѣ́хъ сла́вы причасти́мсѧ, восхвалѧ́юще страда́льчество подвигѡ́въ и҆́хъ.
Ва́шегѡ мꙋ́жества ѕвѣ́рїе ᲂу҆боѧ́шасѧ ѕѣлѡ̀, ᲂу҆стꙋпѝ ѻ҆́гнь, сокрꙋши́шасѧ лꙋ́цы: въ ва́съ,стрⷭ҇тоте́рпцы, ди́венъ бг҃ъ.
Сла́ва, трⷪ҇ченъ: Пренача́льное є҆стество̀, трїѷпоста́снаѧ є҆ди́нице, ѻ҆́ч҃е, сн҃е и҆ дш҃е ст҃ы́й, свѣ́те и҆ жи́зне бг҃онача́льнаѧ, тебѐ славосло́вѧщыѧ сохранѧ́й.
Бг҃оро́диченъ: Бл҃гослови́мъ тѧ̀ бг҃а і҆и҃лева, ѿ дв҃ы ꙗ҆ви́вшагосѧ мі́рꙋ и҆ воздви́гшаго на́мъ ро́гъ сп҃се́нїѧ.
Сті́хъ: Ст҃ы̑мъ, и҆̀же сꙋ́ть на землѝ є҆гѡ̀:
Мл҃твєнницы мі́ра, стрⷭ҇тоте́рпцы хрⷭ҇тѡ́вы, тогѡ̀ крⷭ҇тъ ви́дѣти и҆ поклони́тисѧ сподо́бите всѣ́хъ мл҃твами ва́шими.
Сті́хъ: Бл҃же́ни, ꙗ҆̀же и҆збра́лъ и҆ прїѧ́лъ є҆сѝ гдⷭ҇и.
И҆дѣ́же и҆стека́етъ и҆сто́чникъ жи́зни, сн҃е бж҃їй, и҆ призира́етъ свѣ́тъ лица̀ твоегѡ̀, къ тебѣ̀ преста́вльшыѧсѧ ᲂу҆чинѝ.
І҆рмо́съ: Велича́емъ тѧ̀ мт҃рь свѣ́та, и҆ сла́вимъ тѧ̀, бцⷣе дв҃о, ꙗ҆́кѡ ро́ждшꙋю хрⷭ҇та̀, сп҃са дꙋ́шъ на́шихъ.
Та́же, Досто́йно є҆́сть: Свѣти́ленъ: Нб҃о ѕвѣзда́ми: Сла́ва: Живы́ми: И҆ ны́нѣ, бг҃оро́диченъ: Сла́дость а҆́гг҃лѡвъ: Та́кожде ᲂу҆ка́зъ на хвали́техъ, и҆ на стїхо́внѣ, въ сꙋббѡ́тꙋ вторꙋ́ю поста̀ [стр. ]. Та́же, Бл҃го є҆́сть: и҆ ча́съ а҃-й. И҆ ѿпꙋ́стъ.
На лїтꙋргі́и: Бл҃жє́нна гла́са. Прокі́менъ днѐ, и҆ за ᲂу҆поко́й. А҆пⷭ҇лъ ко є҆вре́ємъ, зача́ло тк҃є. Дрꙋгі́й за ᲂу҆поко́й. А҆ллилꙋ́їа, гла́съ ѕ҃. Є҆ѵⷢ҇лїе ѿ ма́рка, зача́ло ѻ҆смо́е, и҆ за ᲂу҆поко́й. Прича́стенъ днѐ, и҆ за ᲂу҆поко́й.