Неделя Торжества Православия
Недѣ́лѧ пе́рваѧ ст҃а́гѡ поста̀,
въ ню́же правосла́вїе воспомина́етсѧ.
Бдѣ́нїе ѡ҆бы́чное.
Въ сꙋббѡ́тꙋ ве́чера, на ма́лѣй вече́рни поста́вимъ стїхѝ д҃, и҆ пое́мъ стїхѝ подѡ́бныѧ. Творе́нїе нїкола́а, гла́съ а҃.
Подо́бенъ: Нбⷭ҇ныхъ чинѡ́въ:
Ны́нѣ бл҃гоче́стїѧ свѣ́тлость всѣ̑мъ распростре́сѧ, разгонѧ́ющи ле́сть нече́стїѧ ꙗ҆́кѡ ѡ҆́блакъ, просвѣща́ющи же сердца̀ бл҃гочести́выхъ: прїиди́те, всѝ правосла́внїи, припаде́мъ, бл҃гочестивомꙋ́дреннѡ чтⷭ҇ны̑мъ і҆кѡ́намъ хрⷭ҇тѡ́вымъ покланѧ́ющесѧ.
Сщ҃енноѡбра́зными і҆кѡ́нами ны́нѣ ᲂу҆краша́етсѧ, ꙗ҆́кѡ невѣ́ста ᲂу҆кра́шена, хрⷭ҇то́ва цр҃ковь, и҆ всѣ́хъ созыва́етъ дꙋхо́внѡ пра́здновати: сни́демсѧ во є҆диномы́слїи и҆ вѣ́рѣ ра́достнѡ велича́юще гдⷭ҇а.
Мі́ре ве́сь, весели́сѧ: се́ бо гдⷭ҇ь съ высоты̀ низложѝ нече́стїѧ держа́вꙋ, неизрече́ннымъ промышле́нїемъ: и҆ смире́ннїи вознесо́хомсѧ дне́сь, къ вѣ́рѣ правосла́вїѧ бл҃гочести́вою цари́цею наставлѧ́еми.
Къ первоѡбра́зномꙋ возно́ситъ, глаго́летъ васі́лїй, почита́нїе і҆кѡ́ны: сегѡ̀ ра́ди въ любвѝ чти́мъ і҆кѡ̑ны сп҃са хрⷭ҇та̀ и҆ ст҃ы́хъ всѣ́хъ: да си́хъ держа́щесѧ, никогда́же ны́нѣ въ ѕлоче́стїе ѿведе́ни бꙋ́демъ.
Сла́ва, и҆ ны́нѣ, бг҃оро́диченъ. Подо́бенъ:
Безнача́льнымъ и҆ бж҃е́ственнымъ є҆стество́мъ неви́димый, ви́дѣнъ бы́сть человѣ́къ, ѻ҆трокови́це, ѿ чтⷭ҇ыхъ твои́хъ крове́й, кра́йнѧгѡ ра́ди бл҃госе́рдїѧ: є҆гѡ́же пло́ти написа́вше подо́бїе, чтꙋ́ще покланѧ́емсѧ бл҃гоче́стнѡ всѝ вѣ́рнїи и҆ велича́емъ.
На стїхо́внѣ, гла́съ в҃.
Подо́бенъ: До́ме є҆ѵфра́ѳовъ:
Гꙋби́тельства тлетво́рнагѡ ѕловѣ́рныхъ и҆збѣ́гше, правосла́вїѧ сїѧ́нїемъ въ сердца́хъ просвѣти́мсѧ, вѣ́рнїи, бг҃а сла́вѧще.
Сті́хъ: Принеси́те гдⷭ҇ви сла́вꙋ и҆ че́сть.
А҆́рїево нечи́стое ᲂу҆праздни́сѧ прельще́нїе, македо́нїа, петра̀, севи́ра же и҆ пѵ́рра: и҆ свѣ́титъ свѣ́тъ трисо́лнечный.
Сті́хъ: Поклони́тесѧ гдⷭ҇еви во дворѣ̀ ст҃ѣ́мъ є҆гѡ̀.
Оу҆жѐ не похвалѧ́етсѧ ѕлочести́выхъ ло́жное ᲂу҆че́нїе: бг҃ъ бо правосла̑внымъ, чрез̾ и҆зволе́нїе ѳеодѡ́ры, же́злъ крѣ́пости дае́тъ.
Сла́ва, и҆ ны́нѣ, бг҃оро́диченъ. Подо́бенъ:
Вознесла̀ є҆сѝ ро́гъ смире́нныхъ, бцⷣе, ро́ждши бг҃а сло́ва: тѣ́мже вѣ́рнѡ тѧ̀ всѝ чтꙋ́ще велича́емъ.
Тропа́рь: Пречⷭ҇томꙋ ѡ҆́бразꙋ твоемꙋ̀:
И҆ быва́етъ ѿпꙋ́стъ.
На вели́цѣй вече́рни,
по ѡ҆бы́чнѣмъ стїхосло́вїи, Гдⷭ҇и воззва́хъ, на гла́съ ѻ҆смогла́сника, поста́вимъ стїхѡ́въ і҃: и҆ пое́мъ стїхи̑ры воскрⷭ҇ны г҃, и҆ а҆натѡ́лїевы г҃, и҆ трїѡ́ди подо́бны д҃. Гла́съ ѕ҃.
Подо́бенъ: Всю̀ ѿложи́вше:
Тѧ̀ непостижи́маго, пре́жде денни́цы безнача́льнѡ возсїѧ́вшаго и҆з̾ невеще́ственнагѡ и҆ безпло́тнагѡ чре́ва роди́телева, гдⷭ҇и, прⷪ҇ро́цы, твои́мъ дх҃омъ вдохнове́ни, прореко́ша ѻ҆троча̀ бы́ти, и҆з̾ неискꙋсобра́чныѧ воплоща́ема, человѣ́кѡмъ совокꙋплѧ́ема, и҆ сꙋ́щими на землѝ зри́ма: и҆́хже ра́ди, ꙗ҆́кѡ ще́дрый, просвѣще́нїѧ твоегѡ̀ сподо́би воспѣва́ющыѧ неизрече́нное чтⷭ҇но́е твоѐ воскрⷭ҇нїе.
Сло́вомъ тѧ̀ проповѣ́давше и҆ дѣ́лы поче́тше, бг҃оглаго́ливїи прⷪ҇ро́цы безконе́чнꙋю жи́знь стѧжа́ша: тва́ри бо, влⷣко, па́че тебє̀ содѣ́телѧ, слꙋжи́ти не претерпѣ́вше, мі́ра всегѡ̀ є҆ѵⷢ҇льски ѿврати́шасѧ, и҆ соѡбра́зни бы́ша стрⷭ҇ти твое́й, ю҆́же провозвѣсти́ша: и҆́хже мл҃твами, сподо́би непоро́чнѡ прейтѝ воздержа́нїѧ по́прище, є҆ди́не многомлⷭ҇тиве.
Є҆стество́мъ бж҃е́ственнымъ твои́мъ неѡпи́санъ сы́й, влⷣко, на послѣ̑днѧѧ вопло́щьсѧ, и҆зво́лилъ є҆сѝ ѡ҆писова́тисѧ: пло́ти бо прїѧ́тїемъ, и҆ всѧ̑ свѡ́йства сеѧ̀ взѧ́лъ є҆сѝ. тѣ́мже ви́дъ твоегѡ̀ ѡ҆́браза написꙋ́юще, любе́знѡ цѣлꙋ́емъ, ко твое́й любвѝ возвыша́еми, и҆ и҆сцѣле́нїй бл҃года́ть почерпа́емъ и҆з̾ негѡ̀, послѣ́дꙋюще а҆пⷭ҇льскимъ бж҃е́ствєннымъ преда́нїємъ.
Пречестно́е ᲂу҆краше́нїе хрⷭ҇то́ва цр҃ковь прїѧ́тъ, честны́хъ и҆ ст҃ы́хъ і҆кѡ́нъ сп҃са хрⷭ҇та̀, и҆ бг҃омт҃ре, и҆ всѣ́хъ ст҃ы́хъ свѣтлѣ́йшее возставле́нїе, и҆́мже просвѣща́етсѧ и҆ красꙋ́етсѧ бл҃года́тїю, и҆ ѿверга́етъ со́нмище є҆реті́ческое и҆згонѧ́ющи: и҆ ра́дꙋющисѧ сла́витъ чл҃вѣколю́бца бг҃а, є҆ѧ̀ ра́ди претерпѣ́вшаго стрⷭ҇ти вѡ́льныѧ.
Сла́ва, гла́съ в҃:
Возсїѧ̀ бл҃года́ть и҆́стины: проѡбразꙋ́ємаѧ дре́вле сѣно́внѡ, ны́нѣ ꙗ҆вле́ннѡ сверши́шасѧ: се́ бо цр҃ковь воплоще́ннымъ ѡ҆́бразомъ хрⷭ҇то́вымъ ꙗ҆́кѡ прекра́сным ᲂу҆́краше́нїемъ ѡ҆блача́етсѧ, ски́нїи свидѣ́нїѧ ѡ҆́бразъ пронаписꙋ́ющи и҆ правосла́внꙋю вѣ́рꙋ содержа́щи: да є҆го́же почита́емъ, сегѡ̀ и҆ ѡ҆́бразъ держа́ще, не прельща́емсѧ. да ѡ҆блекꙋ́тсѧ въ стꙋ́дъ си́це не вѣ́рꙋющїи: на́мъ бо сла́ва зра́къ воплоти́вшагѡсѧ бл҃гоче́стнѡ покланѧ́емый, но не бг҃отвори́мый. то́й ѡ҆блобыза́юще, вѣ́рнїи возопїи́мъ: бж҃е, сп҃сѝ лю́ди твоѧ̑ и҆ бл҃гословѝ достоѧ́нїе твоѐ.
И҆ ны́нѣ, бг҃оро́диченъ а҃-й гла́са.
На лїті́и же, ꙗ҆́кѡ ѡ҆бы́чно, стїхи́ра хра́ма.
Сла́ва, гла́съ в҃: Ра́дꙋйтесѧ, прⷪ҇ро́цы честні́и, зако́нъ гдⷭ҇ень до́брѣ ᲂу҆чини́вшїи, и҆ вѣ́рою ꙗ҆́вльшїисѧ неѡбори́мїи столпѝ неꙋкло́ннїи: вы́ бо и҆ хода̑таи ꙗ҆ви́стесѧ но́вагѡ завѣ́та хрⷭ҇то́ва: и҆ преста́вившесѧ на нб҃са̀, того̀ моли́те, ᲂу҆мири́ти мі́ръ и҆ сп҃стѝ дꙋ́шы на́шѧ.
И҆ ны́нѣ, бг҃оро́диченъ, гла́съ то́йже: Всѐ ᲂу҆пова́нїе моѐ:
На стїхо́внѣ ѻ҆смогла́сника.
Сла́ва, гла́съ в҃: И҆з̾ нече́стїѧ во бл҃гоче́стїе преше́дшїи, и҆ свѣ́томъ вѣ́дѣнїѧ просвѣти́вшїисѧ, ѱало́мски рꙋка́ми воспле́щимъ, бл҃года́рственнѡ хвалꙋ̀ бг҃ꙋ приносѧ́ще: и҆ начерта̑ннымъ на стѣна́хъ, и҆ дска́хъ, и҆ сщ҃е́нныхъ сосꙋ́дѣхъ, сщ҃є́ннымъ і҆кѡ́намъ хрⷭ҇та, и҆ пречⷭ҇тыѧ, и҆ всѣ́хъ ст҃ы́хъ, че́стнѡ поклони́мсѧ, ѿверга́юще нечести́вꙋю ѕлосла́вныхъ вѣ́рꙋ: почита́нїе бо ѡ҆́браза, ꙗ҆́коже глаго́летъ васі́лїй, на первоѡбра́зное прехо́дитъ: просѧ́ще мл҃твами пречⷭ҇тыѧ твоеѧ̀ мт҃ре, хрⷭ҇тѐ бж҃е на́шъ, и҆ всѣ́хъ ст҃ы́хъ, дарова́ти на́мъ ве́лїю млⷭ҇ть.
И҆ ны́нѣ, бг҃оро́диченъ: Ѽ чꙋдесѐ но́вагѡ: Тропа́рь: Бцⷣе дв҃о, ра́дꙋйсѧ: два́жды. И҆ пра́здника: Пречⷭ҇томꙋ ѡ҆́бразꙋ твоемꙋ̀: є҆ди́ножды.
И҆ про́чее послѣ́дованїе бдѣ́нїѧ.
На ᲂу҆́трени,
на Бг҃ъ гдⷭ҇ь, тропа́рь воскре́сенъ, два́жды.
Сла́ва, настоѧ́щїй, гла́съ в҃:
Пречⷭ҇томꙋ ѡ҆́бразꙋ твоемꙋ̀ покланѧ́емсѧ, бл҃гі́й, просѧ́ще проще́нїѧ прегрѣше́нїй на́шихъ,хрⷭ҇тѐ бж҃е: во́лею бо бл҃говоли́лъ є҆сѝ пло́тїю взы́ти на крⷭ҇тъ, да и҆зба́виши, ꙗ҆̀же созда́лъ є҆сѝ, ѿ рабо́ты врагꙋ̀. тѣ́мже бл҃года́рственнѡ вопїе́мъ тѝ: ра́дости и҆спо́лнилъ є҆сѝ всѧ̑, сп҃се на́шъ, прише́дый сп҃стѝ мі́ръ.
И҆ ны́нѣ: Всѧ̑ па́че смы́сла, всѧ̑ пресла̑вна твоѧ̑, бцⷣе, та̑инства: чистотѣ̀ запеча́таннѣй, и҆ дѣ́вствꙋ храни́мꙋ, мт҃и позна́ласѧ є҆сѝ нело́жна, бг҃а ро́ждши и҆́стиннаго. того̀ молѝ сп҃сти́сѧ дꙋша́мъ на́шымъ.
И҆ ѡ҆бы́чное стїхосло́вїе, и҆ про́чее послѣ́дованїе.
Канѡ́ны: воскрⷭ҇ный, и҆ бцⷣы, и҆ трїѡ́ди на ѕ҃. Канѡ́нъ трїѡ́ди, творе́нїе господи́на ѳеофа́на [є҆гѡ́же краестро́чїе: Дне́сь бл҃гоче́стїѧ бг҃освѣ́тлаѧ прїи́де зарѧ̀]. Гла́съ д҃.
Пѣ́снь а҃.
І҆рмо́съ: Мо́рѧ чермнꙋ́ю:
И҆гра́юще съ весе́лїемъ, дне́сь вѣ́рнїи возопїи́мъ: ко́ль ди̑вна дѣла̀ и҆ вели́ка си́ла твоѧ̑, хрⷭ҇тѐ, на́ше є҆диномы́слїе и҆ согла́сїе содѣ́лавый!
Де́нь ра́достный, бг҃омꙋ́дрїи прїиди́те, соверши́мъ: ны́нѣ нб҃о весели́тсѧ и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ собра̑нїѧ, и҆зрѧ́днѡ пра́зднꙋюще.
Преве́лїе бл҃годѣѧ́нїе, разстоѧ́щыѧсѧ ᲂу҆́ды хрⷭ҇тѡ́вы совокꙋ́плєны во є҆ди́нство ви́дѧще, рꙋка́ми воспле́щимъ и҆ бг҃а восхва́лимъ, ми́ръ пода́вшаго.
Даны̀ бы́ша цр҃кви дне́сь побѣ̑ды бг҃одви́жнымъ манове́нїемъ и҆ совѣ́томъ мїхаи́ла и҆ ѳеодѡ́ры,царе́й на́шихъ, бл҃гоче́стнѡ вѣ́рꙋ содержа́щихъ.
Бг҃оро́диченъ: Ѡ҆рꙋ̑жїѧ ѕлочести́выхъ є҆ресе́й ꙗ҆́вѣ и҆счезо́ша: хра́мъ бо тво́й, пречтⷭ҇аѧ чтⷭ҇на́ѧ, і҆кѡ́нами ᲂу҆краша́емь всебл҃гоче́стнѡ зрѧ́ще, ны́нѣ всесщ҃е́ннѡ ра́дꙋемсѧ.
Катава́сїа: Мо́рѧ чермнꙋ́ю пꙋчи́нꙋ невла́жными стопа́ми пѣшеше́ствовавъ дре́внїй і҆и҃ль,крⷭ҇тоѡбра́зныма мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Пѣ́снь г҃.
І҆рмо́съ: Весели́тсѧ ѡ҆ тебѣ̀:
Ны́нѣ бро́вь нечести́выхъ є҆ретїкѡ́въ ᲂу҆жѐ не возвыша́етсѧ: бж҃їѧ бо си́ла правосла́вїе ᲂу҆крѣпи́ла є҆́сть.
Ѡ҆́блацы прⷪ҇ро́чески животворѧ́щꙋю ро́сꙋ съ нб҃сѐ дне́сь на́мъ да кропѧ́тъ, на возставле́нїе вѣ́ры.
Бл҃гогла́снѡ та́инствєнныѧ а҆пⷭ҇лѡвъ хрⷭ҇то́выхъ трꙋбы̑ преесте́ственнѣ да возвѣща́ютъ, честны́хъ і҆кѡ́нъ возставле́нїе.
Воспои́мъ хрⷭ҇та̀, показа́вшаго на́мъ цари́цꙋ бл҃гочести́вꙋю, хрⷭ҇толюби́вꙋю, съ бг҃овѣнча́нною ѻ҆́траслїю.
Бг҃оро́диченъ: Селе́нїѧ твоегѡ̀ сщ҃е́ннагѡ дости́гше вѣ́рнїи, пречтⷭ҇аѧ, мо́лимсѧ свѣтови́дною бл҃года́тїю ны́нѣ ѡ҆зари́тисѧ.
Катава́сїа: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Сѣда́ленъ, гла́съ а҃.
Подо́бенъ: Ли́къ а҆́гг҃льскїй:
Бж҃е́ственный тво́й зра́къ на і҆кѡ́нѣ и҆з̾ѡбража́юще, хрⷭ҇тѐ, ꙗ҆́снѡ возвѣща́емъ рождество̀,чꙋдеса̀ неизглагѡ́ланнаѧ, во́льное распѧ́тїе, и҆́мже бѣ́сове ѿгонѧ́ютсѧ стра́хомъ, и҆ ѕловѣ́рнїи въ печа́ли рыда́ютъ, ꙗ҆́кѡ си́хъ соприча̑стницы.
Сла́ва: Зра̑ки прⷪ҇ро́кѡвъ, а҆пⷭ҇лѡвъ ви̑ды, мч҃нкѡвъ сщ҃е́нныхъ и҆ всѣ́хъ ст҃ы́хъ і҆кѡ́нами и҆ и҆з̾ѡбраже́ньми, сщ҃е́ннѡ красꙋ́етсѧ мт҃и вы́шнїй сїѡ́нъ, и҆ жениха́ мы́сленнагѡ и҆ невѣ́сты мы́сленными красота́ми ᲂу҆краша́етсѧ.
И҆ ны́нѣ, бг҃оро́диченъ: Любо́вїю, чтⷭ҇аѧ, твою̀ ст҃ꙋ́ю і҆кѡ́нꙋ почита́ющымъ, и҆ и҆́стиннꙋю бж҃їю мт҃рь тѧ̀ согла́снѡ возвѣща́ющымъ, и҆ вѣ́рнѡ покланѧ́ющымсѧ тѝ храни́тельница бꙋ́ди и҆ держа́вное предста́тельство, ѿвраща́ющи всѧ́кое лю́тое дале́че ѿ си́хъ, ꙗ҆́кѡ всѧ̑ могꙋ́щаѧ.
Пѣ́снь д҃.
І҆рмо́съ: Вознесе́на на крⷭ҇тѣ̀̀:
Наи́тїемъ бж҃е́ственнымъ ᲂу҆тѣ́шителѧ, тво́й хра́мъ ѡ҆ст҃ѝ, и҆ прише́ствїемъ сегѡ̀ є҆реті́ческое заблꙋжде́нїе ѿженѝ, сло́ве бж҃їй многомлⷭ҇тиве.
Ѿ лютѣ́йшагѡ ѕлоче́стїѧ и҆зба́вивый твоѧ̑ лю́ди, покажѝ бл҃гоче́стїѧ ре́вностїю разжжє́ны и҆ съ вѣ́рою взыва́ющѧ: сла́ва си́лѣ твое́й, гдⷭ҇и.
Сщ҃енноѡбра́зными и҆з̾ѡбраже́ньми і҆кѡ́нъ хрⷭ҇та и҆ бцⷣы сїѧ̑ющаѧ бж҃е́ствєннаѧ селє́нїѧ зрѧ́ще,сщ҃еннолѣ́пнѡ ра́дꙋемсѧ.
Цари́ца вѣнце́мъ ᲂу҆кра́шена, возжелѣ́вше и҆́стиннагѡ црⷭ҇тва хрⷭ҇та̀, написа̀ сегѡ̀ ѡ҆́бразъ пречⷭ҇тый и҆ ст҃ы́хъ и҆з̾ѡбражє́нїѧ.
Бг҃оро́диченъ: Воплоще́нна бж҃е́ственнаго сло́ва роди́вши, бл҃года́тнаѧ, бг҃олѣ́пное ѡ҆сщ҃е́нїе сего̀ показа́ла є҆сѝ: тѣ́мже тво́й хра́мъ свѣтови́дный ѡ҆бновлѧ́емъ.
Катава́сїа: Вознесе́на на крⷭ҇тѣ̀ тѧ̀, сл҃нце пра́вды, ви́дѣвши цр҃ковь ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Пѣ́снь є҃.
І҆рмо́съ: Ты̀, гдⷭ҇и мо́й:
Положѝ, гдⷭ҇и, твое́й цр҃кви ᲂу҆твержде́нїе, пребыва́ти въ вѣ́къ вѣ́ка непрекло́ннѣй ѿ смѧте́нїй є҆ресе́й.
Во всю̀ зе́млю возсїѧ̀ свѣ́тлость да́ннагѡ свы́ше вѣ̑рнымъ весе́лїѧ и҆ бж҃е́ственнагѡ застꙋпле́нїѧ.
Є҆ди́не бл҃гі́й и҆ и҆сто́чниче бл҃гости, ты̀ возвы́си ро́гъ правосла́вныхъ царе́й, чтꙋ́щихъ і҆кѡ́нꙋ твою̀.
Свѣ́тъ незаходи́мый бл҃гоче́стїѧ на́мъ возсїѧ̀, велѣ́нїемъ бг҃одꙋхнове́ннымъ и҆ ма́нїемъ бг҃омꙋ́дрымъ вѣ́рныхъ царе́й.
Бг҃оро́диченъ: Ѡ҆бновѝ на́мъ дре́внее бл҃голѣ́пїе, пречтⷭ҇аѧ бг҃омт҃и, и҆ до́мъ тво́й се́й ѡ҆ст҃ѝ твое́ю бл҃года́тїю.
Катава́сїа: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ съ вѣ́рою воспѣва́ющыѧ тѧ̀.
Пѣ́снь ѕ҃.
І҆рмо́съ: Принесꙋ́ ти же́ртвꙋ:
Пи́шетсѧ и҆ почита́етсѧ вѣ́рнѡ покланѧ́емый ѡ҆́бразъ влⷣки, и҆ прїе́млетъ па́ки цр҃ковь дерзнове́нїе, бл҃гоче́стнѡ сп҃са прославлѧ́ющи.
Ѿлага́етъ сѣ́тованїе и҆ тьмꙋ̀ є҆ресе́й хрⷭ҇то́ва цр҃ковь, и҆ но́ситъ ри́зꙋ весе́лїѧ, и҆ покрыва́етсѧ бж҃е́ственною и҆ свѣтоно́сною бл҃года́тїю.
Сла́вꙋ дре́внѧгѡ ѡ҆сїѧ̑нїѧ полꙋчѝ правосла́вныхъ собо́ръ, манове́нїемъ ѳеодѡ́ры цр҃и́цы и҆ є҆ѧ̀ сы́на бл҃гочести́вагѡ мїхаи́ла самоде́ржца.
Бг҃оро́диченъ: Дре́вле ски́нїи свидѣ́нїѧ повелѣ́вый бы́ти, ꙗ҆́кѡ во ски́нїи слове́снѣй, въ тебѣ̀ живе́тъ є҆ди́нъ препросла́вленный, прославлѧ́ѧй хра́мъ тво́й, дв҃о, чꙋдесы̀.
Катава́сїа: Принесꙋ́ ти же́ртвꙋ со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ и҆сте́кшею ра́ди млⷭ҇ти ѿ ре́бръ твои́хъ кро́вїю.
Конда́къ, гла́съ в҃. Самогла́сенъ:
Неѡписꙋ́емое сло́во ѻ҆́ч҃ее ѡ҆писа́сѧ воплоща́емо и҆з̾ тебє̀, бцⷣе: и҆ ѡ҆скве́рншїйсѧ ѡ҆́бразъ въ дре́внее воз̾ѡбрази́въ, съ бж҃е́ственною добро́тою смѣсѝ. мы́ же, дѣ́ломъ и҆ сло́вомъ и҆сповѣ́дающе сп҃се́нїе, сїѐ и҆з̾ѡбража́емъ.
І҆́косъ: Сїѐ смотре́нїѧ та́инство дре́вле прⷪ҇ро́цы, бг҃ови́днѡ вдохнове́ни бы́вше, на́съ ра́ди въ концы̀ вѣкѡ́въ дости́гшихъ предвозвѣсти́ша, полꙋчи́вше сегѡ̀ сїѧ̑нїѧ. вѣ́дѣнїе ᲂу҆́бо бж҃е́ственное ѿ негѡ̀ взе́мше, є҆ди́наго гдⷭ҇а бг҃а зна́емъ, въ трїе́хъ ѵ҆поста́сѣхъ сла́вимаго: и҆ томꙋ̀ є҆ди́номꙋ слꙋжа́ще, є҆ди́нꙋ вѣ́рꙋ и҆ є҆ди́но креще́нїе и҆мꙋ́ще во хрⷭ҇та̀ ѡ҆блеко́хомсѧ. но тѣ́мже дѣ́ломъ и҆ сло́вомъ и҆сповѣ́дающе сп҃се́нїе, сїѐ и҆з̾ѡбража́емъ.
Сѷнаѯа́рїй.
Стїхѝ: Непра́вѡ ѿри̑нꙋтыѧ і҆кѡ̑ны:
Па́ки ви́дѧ пра́вѡ покланѧ́ємы, ра́дꙋюсѧ.
Въ сі́й де́нь, въ недѣ́лю пе́рвꙋю ст҃ы́хъ постѡ́въ, си́рѣчь въ недѣ́лю правосла́вїѧ, цр҃ковь хрⷭ҇то́ва прїѧ́тъ пра́здновати возстановле́нїе ст҃ы́хъ и҆ чтⷭ҇ны́хъ і҆кѡ́нъ, бы́вшее ѿ приснопа́мѧтныхъ самоде́ржцєвъ кѡнстантїнопо́льскихъ мїхаи́ла и҆ ма́тере є̑гѡ̀ ѳеодѡ́ры, при патрїа́ршествѣ ст҃а́гѡ меѳо́дїа и҆сповѣ́дника. Бы́сть же си́це:
Є҆гда̀ ле́въ і҆са́ѵръ, по бж҃їю попꙋще́нїю, и҆з̾ ѻ҆слѧтоводи́телѧ и҆ свинопа́стырѧ прїѧ́тъ ски́птръ ца́рствїѧ, а҆́бїе ст҃ы́й ге́рманъ, тогда̀ корми̑ла цр҃кѡ́внаѧ держѧ́й, призыва́етсѧ ѿ ѻ҆́нагѡ и҆ слы́шитъ: мнѣ̀ мни́тсѧ, влады́ко, ꙗ҆́кѡ ст҃ы̑ѧ і҆кѡ̑ны ничто́же ра́знствꙋютъ ѿ і҆́дѡлѡвъ: повелѝ ᲂу҆́бо є҆ли́кѡ ско́рѡ и҆знестѝ сїѧ̑: а҆́ще и҆ и҆́стиннїи сꙋ́ть ст҃ы́хъ зра́цы, но вы́шше да повѣ́сѧтсѧ, да мы̀ всѝ, во грѣсѣ́хъ валѧ́ющїисѧ, не ѡ҆сквернѧ́емъ сїѧ̑ всегда̀ цѣлꙋ́юще. Патрїа́рхъ же ѿ толи́кїѧ ме́рзости ѿвраща́ше царѧ̀, глаго́лѧ: да не бꙋ́детъ сегѡ̀ тебѣ̀, ѽ царю̀! слы́шимъ, ꙗ҆́кѡ нѣ́кто бѣснова́сѧ нѣ́когда на ст҃ы̑ѧ і҆кѡ́ны: ко́нѡнъ є҆́сть є҆гѡ̀ проименова́нїе. Ца́рь же глаго́летъ: но а҆́зъ є҆щѐ младе́нецъ си́це нарица́хсѧ. Не повинꙋ́ющꙋсѧ ᲂу҆́бо є҆мꙋ̀ патрїа́рхꙋ, и҆згонѧ́етъ є҆го̀, и҆ поставлѧ́етъ себѣ̀ є҆диномы́сленна а҆наста́сїа: и҆ та́кѡ дерза́етъ тогда̀ на бра́нь со ст҃ы́ми і҆кѡ́нами. Глаго́летсѧ же, ꙗ҆́кѡ є҆вре́є пре́жде таковꙋ́ю не́нависть є҆мꙋ̀ подложи́ша, ѿ нѣ́коегѡ волше́бства предре́кше на ца́рство возведе́нїе, внегда̀, неимꙋ́щь сы́й, съ ни́ми ѿ ѻ҆слѧтовожде́нїѧ живѧ́ше. Львꙋ̀ же ѕлѣ̀ житїѐ прекрати́вшꙋ, ѿ ѻ҆́нагѡ рожде́нный сꙋровѣ́йшїй скѵ́менъ, копрѡнѵ́мъ кѡнстанті́нъ, быва́етъ прее́мникъ нача́льства, наипа́че же на ст҃ы̑ѧ і҆кѡ̑ны бѣснова́нїѧ. И҆ подоба́етъ ли глаго́лати, є҆ли̑ка и҆ ꙗ҆кѡва̀ ѕла̑ѧ и҆ се́й беззако́нный содѣ́ла; Но ѻ҆ба́че и҆ ѻ҆́номꙋ стꙋ́днѣйше сконча́вшꙋсѧ, ѿ хаза́рыни рожде́нный сы́нъ ѻ҆́нагѡ на ца́рство поставлѧ́етсѧ. Є҆гда́ же и҆҆ то́й житїѐ своѐ ѕлѣ̀ прекратѝ, і҆ри́на и҆ кѡнстанті́нъ ца́рства наслѣ̑дницы быва́ютъ. Сі́и, ѿ тара́сїа ст҃ѣ́йшагѡ патрїа́рха наставлѧ́еми,седмы́й собо́ръ собира́ютъ, и҆ ст҃ы̑ѧ і҆кѡ́ны па́ки хрⷭ҇то́ва цр҃ковь прїе́млетъ. Си̑мъ же ца́рство ѿло́жшымъ, возво́дитсѧ ѿ пала́ты нїки́форъ, та́же стаѵра́кїй, посе́мъ мїхаи́лъ раггаве́й,бж҃е́ствєнныѧ і҆кѡ̑ны чтꙋ́щїи. Мїхаи́лꙋ наслѣ́дꙋетъ ѕвѣронра́вный ле́въ а҆рмени́нъ, и҆́же, ѿ мона́ха нѣ́коегѡ затво́рника и҆ ѕлочести́вагѡ ле́стїю растлѣ́всѧ, второ́е і҆кѡнобо́рство воздвиза́етъ: и҆ па́ки лише́на лѣ́поты бж҃їѧ цр҃ковь показꙋ́етсѧ. Семꙋ̀ наслѣ́дꙋетъ мїхаи́лъ а҆морре́й, томꙋ̀ па́ки сы́нъ ѳео́фїлъ, въ неи́стовствѣ на і҆кѡ́ны про́чихъ превосходѧ́щїи. Се́й ѳео́фїлъ предадѐ мнѡ́гїѧ ѿ ст҃ы́хъ ѻ҆тє́цъ томлє́нїемъ и҆ мꙋ́камъ разли̑чнымъ за і҆кѡ́ны чтⷭ҇ны̑ѧ: ѻ҆ба́че ѡ҆ пра́вдѣ толи́кѡ печа́шесѧ, ꙗ҆́кѡ взыска́ше и҆ногда̀, а҆́ще кто̀ є҆́сть во гра́дѣ творѧ́й крамолꙋ̀ дрꙋго́мꙋ, и҆, ꙗ҆́коже глаго́лютъ, во мнѡ́ги дни̑ не ѡ҆брѣ́те ни є҆ди́нагѡ. И҆ двана́десѧте лѣ́тъ самодово́льствовавъ, и҆ чре́внымъ недꙋ́гомъ ѡ҆б̾ѧ́тъ бы́въ, расто́ргнꙋтисѧ хотѧ́ше ѿ жи́зни: ᲂу҆ста̀ є҆гѡ̀ преѕѣ́льнѡ ѿверзо́шасѧ, ꙗ҆́коже и҆ самѣ̑мъ ᲂу҆тро́бамъ и҆звнꙋ́трь ꙗ҆ви́тисѧ. Цари́ца же ѳеодѡ́ра, болѣ́зненна ѡ҆ приключи́вшемсѧ бы́вши, є҆два̀ ко снꙋ̀ ѡ҆браща́етсѧ, и҆ во снѣ̀ ви́дитъ пречтⷭ҇ꙋю бцⷣꙋ, ѡ҆б̾е́мшꙋ млⷣнца превѣ́чнаго, ѡ҆бстои́мꙋ пресвѣ́тлыми а҆́гг҃лы: ѳео́фїла же, своего̀ мꙋ́жа, ѿ тѣ́хъ бїе́ма и҆ ᲂу҆ничижа́ема. Є҆гда̀ же ѿи́де ѿ неѧ̀ со́нъ, тогда̀ и҆ ѳео́фїлъ, ма́лѡ въ себѐ прише́дъ, возопѝ: ᲂу҆вы̀ мнѣ̀ ѡ҆каѧ́нномꙋ! ст҃ы́хъ ра́ди і҆кѡ́нъ бїе́нъ є҆́смь. А҆́бїе цари́ца полага́етъ верхꙋ̀ є҆гѡ̀ ѡ҆́бразъ бцⷣы, молѧ́щисѧ се́й со слеза́ми.Ѳео́фїлъ же, си́це и҆мы́й, ви́дѣвъ нѣ́коего ѿ предстоѧ́щихъ носѧ́ща є҆гко́лпїй, си́рѣчь панагі́ю, ско́рѡ взе́мъ ѿ негѡ̀, ѡ҆блобыза́ше: и҆ на і҆кѡ̑ны шата̑вшаѧсѧ ᲂу҆ста̀ и҆ безстꙋ́днѡ разве́рстый горта́нь а҆́бїе въ пе́рвый ви́дъ ᲂу҆стро́ишасѧ: и҆ ѿ ѡ҆бдержа́щїѧ бѣды̀ и҆ нꙋ́жды преста̀, и҆ ᲂу҆снꙋ̀, и҆сповѣ́давъ, ꙗ҆́кѡ добро̀ є҆́сть ст҃ы̑ѧ і҆кѡ̑ны почита́ти и҆ покланѧ́тисѧ. И҆зне́сши же цари́ца ѿ свои́хъ ковче́жцевъ ст҃ы̑ѧ и҆ честны̑ѧ ѡ҆́бразы, ᲂу҆вѣща̀ ѳео́фїла лобыза́ти ѧ҆̀ и҆ все́ю дꙋше́ю почита́ти. Пома́лѣ ᲂу҆̀бо ѿхо́дитъ ѿ житїѧ̀ сегѡ̀ ѳео́фїлъ. Ѳеодѡ́ра же, возврати́вши всѣ́хъ сꙋ́щихъ во и҆згна́нїихъ и҆ въ темни́цахъ, свобо́днѣ пребыва́ти повелѣ̀. И҆ низверга́етсѧ ᲂу҆́бѡ ѿ патрїа́ршескагѡ престо́ла і҆ѡа́ннъ, є҆мꙋ́же бы нарещи́сѧ і҆анні́й, волхвонача́льникъ и҆ бѣсонача́льникъ па́че, не́жели патрїа́рхъ. На престо́лъ же восхо́дитъ хрⷭ҇то́въ и҆сповѣ́дникъ меѳо́дїй, мнѡ́га пострада́вый пре́жде и҆ жи́въ затворе́нъ бы́вый во гро́бѣ.
Си̑мъ же та́кѡ и҆мꙋ́щымъ, посѣще́нїе нѣ́кое бж҃е́ственное быва́етъ і҆ѡанні́кїю вели́комꙋ, въ гора́хъ ѻ҆лѵ́мпа подвиза́вшемꙋсѧ. Вели́кїй по́стникъ а҆рсаа́кїй, прише́дъ къ немꙋ̀, глаго́ла: бг҃ъ мѧ̀ къ тебѣ̀ посла̀, ꙗ҆́кѡ да ко прпⷣбномꙋ мꙋ́жꙋ и҆са́їи затво́рникꙋ въ нїкомиді́ю прише́дше, ѿ негѡ̀ наꙋчи́мсѧ, є҆ли̑ка сꙋ́ть любѡ́вна бг҃ꙋ и҆ полє́зна є҆гѡ̀ цр҃кви. И҆ та́кѡ ко прпⷣбномꙋ и҆са́їи прише́дше, слы́шатъ ѿ негѡ̀: сїѧ̑ глаго́летъ гдⷭ҇ь: сѐ прибли́жисѧ коне́цъ врагѡ́мъ моегѡ̀ и҆з̾ѡбраже́нїѧ: вы̀ ᲂу҆̀бо, къ цари́цѣ ѳеодѡ́рѣ и҆ къ патрїа́рхꙋ меѳо́дїю ше́дше, рцы́те си́це: ѿста́ви всѣ́хъ несщ҃е́нныхъ, и҆ та́кѡ со а҆́гг҃лы же́ртвꙋ мнѣ̀ да принесе́ши, зра́ка моегѡ̀ и҆ крⷭ҇та̀ ѡ҆́бразъ почита́ѧ. Сїѧ̑ ᲂу҆слы́шавше, въ кѡнстанті́нь гра́дъ а҆́бїе достига́ютъ, и҆ речє́ннаѧ возвѣща́ютъ меѳо́дїю патрїа́рхꙋ и҆ и҆збра̑ннымъ всѣ̑мъ бж҃їимъ. Ті́и же собра́вшесѧ къ цари́цѣ прихо́дѧтъ, и҆ поко́рнꙋ сїю̀ во всѣ́хъ ѡ҆брѣта́ютъ: ѿ ро́да бо своегѡ̀ бѧ́ше бл҃гочести́ва и҆ бг҃олюби́ва. А҆́бїе ᲂу҆̀бо цари́ца бг҃оро́дичный ѡ҆́бразъ на вы́и ѡ҆бвѣ́сивши и҆зне́се, всѣ̑мъ зрѧ́щымъ, и҆ лобза́ше глаго́лющи: а҆́ще кто̀ си̑мъ не покланѧ́етсѧ и҆ не цѣлꙋ́етъ ѿноси́тельнѣ, а҆ не бг҃ослꙋже́бнѣ, не ꙗ҆́кѡ бо́ги, но ꙗ҆́кѡ ѡ҆́бразы, любвѐ ра́ди къ первоѡбра̑знымъ: бꙋ́ди про́клѧтъ. Ѻ҆ни́ же ве́лїею ра́достїю возра́довашасѧ. Цари́ца же про́ситъ и҆́хъ, ꙗ҆́кѡ да сотворѧ́тъ моле́нїе ѡ҆ мꙋ́жѣ є҆ѧ̀ ѳео́фїлѣ. Ѻ҆ни́ же, а҆́ще и҆ ѿрица́ютсѧ, ѻ҆ба́че вѣ́рꙋ є҆ѧ̀ ви́дѣвше повинꙋ́ютсѧ. И҆́ ст҃ы́й меѳо́дїй патрїа́рхъ, лю́ди всѧ̑ собра́въ и҆ приче́тъ ве́сь и҆ а҆рхїерє́и, въ вели́кꙋю бж҃їю цр҃ковь прихо́дѧтъ. Съ ни́ми бѧ́хꙋ и҆збра́ннїи сі́и: и҆з̾ ѻ҆лѵ́мпа вели́кїй і҆ѡанні́кїй и҆ а҆рсаа́кїй, наѵкра́тїй же, и҆ ᲂу҆ченицы̀ ѳео́дѡра стꙋді́та, и҆ вели́кагѡ села̀ ѳеофа́нъ и҆ ѳео́дѡръ начерта́ннїи и҆ и҆сповѣ̑дницы, мїхаи́лъ ст҃огра́децъ, и҆ сѵ́ггелъ, и҆ и҆ні́и мно́жайшїи. Моле́нїе всено́щное къ бг҃ꙋ сотворѧ́ютъ ѡ҆ ѳео́фїлѣ, всѣ̑мъ молѧ́щымсѧ со слеза́ми и҆ протѧже́ннымъ моле́нїемъ: и҆ сїѐ во всю̀ пе́рвꙋю седми́цꙋ постѡ́въ соверша́шесѧ, и҆ сама̀ цари́ца ѳеодѡ́ра подо́бнѣ съ жена́ми и҆ про́чими людьмѝ содѣва́ше.
Си̑мъ же си́це и҆мꙋ́щымъ, ѳеодѡ́ра цари́ца, свита́ющꙋ ᲂу҆́трꙋ пѧтка̀ ѡ҆бра́щшисѧ на со́нъ, ви́дѣ ꙗ҆́кѡ бы̀ ѡ҆брѣла́сѧ ᲂу҆ столпа̀ кре́стнагѡ, и҆ нѣ́цыи съ шꙋ́момъ проходи́ша пꙋ́ть, разли̑чнаѧ мꙋчи́тєльнаѧ ѡ҆рꙋ̑дїѧ носѧ́ще: посредѣ́ же си́хъ веде́тсѧ свѧ́занъ и҆ царь ѳео́фїлъ, со свѧ́занныма созадѝ рꙋка́ма: сего́ же позна́вши, послѣ́доваше и҆ та̀ за ведꙋ́щими. Є҆гда́ же до мѣ́дѧныхъ вра́тъ достиго́ша, ви́дѣ мꙋ́жа нѣ́коего, преди́вна видѣ́нїемъ, сѣдѧ́ща пред̾ ѡ҆́бразомъ хрⷭ҇то́вымъ, пред̾ него́же и҆ ѳео́фїла поста́ви. Цари́ца же, нога́мъ сегѡ̀ чꙋ́днагѡ мꙋ́жа прикоснꙋ́вшисѧ, ѡ҆ царѣ̀ молѧ́шесѧ. То́й же, є҆два̀ ѿве́рзъ ᲂу҆ста̀, глаго́летъ: же́но, ве́лїѧ вѣ́ра твоѧ̀: разꙋмѣ́й ᲂу҆́бо, ꙗ҆́кѡ сле́зъ ра́ди твои́хъ и҆ вѣ́ры, є҆ще́ же и҆ ра́ди проше́нїѧ и҆ моле́нїѧ рабѡ́въ мои́хъ, проще́нїе даю̀ мꙋ́жꙋ твоемꙋ̀ ѳео́фїлꙋ. Та́же глаго́летъ ведꙋ́щымъ: разрѣши́те є҆го̀ и҆ предади́те женѣ̀ є҆гѡ̀. Ѻ҆на́ же, взе́мши сего̀, ѿи́де веселѧ́щисѧ и҆ ра́дꙋющисѧ: и҆ а҆́бїе ю҆̀ со́нъ ѡ҆ста́ви. Сїѧ̑ ᲂу҆́бѡ ѳеодѡ́ра цари́ца ви́дѣ. Патрїа́рхъ же меѳо́дїй, мл҃твамъ и҆ моле́нїємъ быва́ємымъ ѡ҆ ѳео́фїлѣ, хартїю̀ но́вꙋ взе́мъ, написа̀ въ не́й всѣ́хъ є҆ретїкѡ́въ царе́й и҆мена̀, вчини́въ и҆ ѳео́фїла: и҆ взе́мъ всѧ̑ положѝ под̾ ст҃о́ю трапе́зою. Ѡ҆ пѧтцѣ́ же ви́дитъ и҆ то́й нѣ́коего а҆́гг҃ла стра́шна, входѧ́ща во хра́мъ вели́кїй, и҆ къ немꙋ̀ прише́дша, и҆ ре́кша: ᲂу҆слы́шасѧ моле́нїе твоѐ, є҆пі́скопе, и҆ проще́нїе полꙋчѝ ца́рь ѳео́фїлъ: не ᲂу҆трꙋжда́й ᲂу҆́бо бо́лѣе ѡ҆ се́мъ бж҃ество̀. Ѻ҆́нъ же и҆спытꙋ́ѧ, а҆́ще и҆́стинно є҆́сть ви́димое, ѿ мѣ́ста своегѡ̀ сше́дъ, и҆ хартїю̀ взе́мъ, и҆ разви́въ, ѡ҆брѣ́те, ѽ бж҃їихъ сꙋде́бъ! соверше́ннѣ и҆загла́жено бг҃омъ ѳео́фїлово и҆́мѧ. Сїѐ ᲂу҆вѣ́дѣвши, цари́ца преѡбра́довасѧ ѕѣлѡ̀, и҆ къ патрїа́рхꙋ посыла́етъ, собра́ти всѧ̑ лю́ди съ чтⷭ҇ны́ми крⷭ҇ты̑ и҆ со ст҃ы́ми ѡ҆́бразы въ вели́кꙋю це́рковь, ꙗ҆́кѡ да ст҃ы́ми ѡ҆́бразы па́ки ᲂу҆краси́тсѧ, и҆ но́вое бж҃їе чꙋ́до всѣ̑мъ позна́но бꙋ́детъ. И҆ всѣ̑мъ вско́рѣ въ це́рковь собра́вшымсѧ со свѣща́ми, и҆ цари́ца съ сы́номъ прїи́де. И҆ лїті́и та́мѡ бы́вшей, со ст҃ы́ми і҆кѡ́нами и҆ бж҃е́ственными и҆ чтⷭ҇ны́ми древесы̀ крⷭ҇тными и҆ сщ҃е́ннымъ и҆ бж҃е́ственнымъ є҆ѵⷢ҇лїемъ да́же и҆ до глаго́лемагѡ мїлі́а и҆зыдо́ша, взыва́юще: гдⷭ҇и, поми́лꙋй. И҆ та́кѡ па́ки въ це́рковь возврати́вшесѧ, бж҃е́ственнꙋю лїтꙋргі́ю соверши́ша. Возста́влєннымъ ст҃ы̑мъ и҆ чтⷭ҇ны̑мъ і҆кѡ́намъ ѿ предрече́нныхъ ст҃ы́хъ мꙋже́й, многолѣ́тствовани ᲂу҆́бѡ бы́ша бл҃гочести́вїи и҆ правосла́вѧщїи: проти́внїи же, нече́ствꙋющїи и҆ ст҃ы́хъ і҆кѡ́нъ че́сти не прїе́млющїи ѿрече́ни бы́ша и҆ пре́дани проклѧ́тїю. И҆ ѿто́лѣ ѡ҆предѣли́ша сі́и ст҃і́и и҆сповѣ̑дницы, є҆желѣ́тно си́це семꙋ̀ сщ҃е́нномꙋ торжествꙋ̀ быва́ти, да не когда̀ и҆ па́ки въ то́жде ѕлоче́стїе впаде́мъ.
Неизмѣ́нный ѡ҆́бразе ѻ҆́ч҃їй, мл҃твами ст҃ы́хъ твои́хъ и҆сповѣ́дникѡвъ, поми́лꙋй на́съ. А҆ми́нь.
Пѣ́снь з҃.
І҆рмо́съ: Въ пещѝ персі́дстѣй:
Да сликовствꙋ́етъ цр҃ко́внѣй свѣ́тлости любо́вїю бж҃е́ственною а҆́гг҃льское во́инство, бг҃омꙋ́дреннѡ воспѣва́ющее: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Цр҃ковь и҆ торжество̀ перворо́дныхъ ра́дꙋетсѧ, зрѧ́щи ны́нѣ бж҃е́ствєнныѧ лю́ди, є҆диномꙋ́дреннѡ воспѣва́ющыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
И҆зба́влени ѿ пре́жнѧгѡ мра́ка є҆́реси, ма́нїемъ ѳеодѡ́ры достолѣ́пныѧ цари́цы, воспѣва́емъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Бг҃оро́диченъ: Па́че вы́шнихъ ликостоѧ́нїй вознесла́сѧ є҆сѝ, всечⷭ҇таѧ, є҆ди́на бы́вши мт҃и вседѣ́телѧ. ра́дꙋющесѧ ᲂу҆́бо взыва́емъ: бл҃гослове́на ты̀ въ жена́хъ, всенепоро́чнаѧ влⷣчце.
Катава́сїа: Въ пещѝ персі́дстѣй а҆враа́мстїи ѻ҆́троцы, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Пѣ́снь и҃.
І҆рмо́съ: Рꙋ́цѣ распросте́ръ:
Зако́ны ѻ҆те́чєскїѧ цр҃кве сохранѧ́юще, пи́шемъ и҆ лобза́емъ ᲂу҆сты̀ и҆ се́рдцемъ и҆ хотѣ́нїемъ і҆кѡ̑ны хрⷭ҇та̀ и҆ є҆гѡ̀ ст҃ы́хъ, зовꙋ́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
На первоѡбра́зное ꙗ҆́вѣ че́сть и҆ поклоне́нїе і҆кѡ̑ны возносѧ́ще, чти́мъ, бг҃оглаго́ливыхъ ᲂу҆че́нїємъ послѣ́дꙋюще, и҆ хрⷭ҇тꙋ̀ вѣ́рою зове́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Оу҆́мъ ѡ҆зари́вши просвѣще́нїемъ бж҃е́ственнагѡ дх҃а, плоды̀ бг҃омꙋ́дрєнныѧ и҆мꙋ́щи, честна́ѧ цари́ца возлюбѝ бл҃голѣ́пїе и҆ красотꙋ̀ цр҃кве хрⷭ҇то́вы, бл҃гословѧ́щи кꙋ́пнѡ съ вѣ́рными і҆и҃са бг҃очеловѣ́ка.
Бг҃оро́диченъ: Лꙋча́ми свѣ́та мы́сленнагѡ ѡ҆свѣща́емь бж҃е́ственный до́мъ тво́й ѡ҆сѣнѧ́етъ ны́нѣ всѣ́хъ ѡ҆́блакомъ дх҃а, и҆ ѡ҆сщ҃а́етъ вѣ̑рныѧ согла́снѡ пою́щыѧ: бл҃гослови́те, всѧ̑ дѣла̀ гдⷭ҇нѧ,гдⷭ҇а.
Катава́сїа: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ. ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ: Ка́мень нерꙋкосѣ́чный:
Сщ҃еннописа́ньми і҆кѡ́нъ ᲂу҆кра́шенꙋ зрѧ́ще па́ки чтⷭ҇нꙋ́ю цр҃ковь, со бл҃гоговѣ́нїемъ всѝ притеце́мъ и҆ бг҃ꙋ возопїи́мъ: тебѐ велича́емъ, трист҃ы́й.
Че́сть и҆ сла́вꙋ стѧжа́вши крⷭ҇тъ тво́й, влⷣко, и҆ чтⷭ҇ны̑ѧ і҆кѡ̑ны, и҆ ст҃ы́хъ и҆з̾ѡбражє́нїѧ, цр҃ковь съ весе́лїемъ и҆ ра́достїю велича́етъ тѧ̀.
Ѡ҆свѣтѝ бж҃е́ственною твое́ю сла́вою царѝ на́шѧ, ще́дре, и҆ ѡ҆полче́ньми а҆́гг҃льскими и҆ всеѡрꙋ̑жїи сїѧ̑ ѡ҆градѝ, ꙗ҆зы́кѡвъ де́рзость покарѧ́ѧ и҆̀мъ, влⷣко.
Бг҃оро́диченъ: Ѿѧ́тсѧ прама́тере є҆́ѵы ѡ҆сꙋжде́нїе, бцⷣе, ꙗ҆́кѡ ты̀, чтⷭ҇аѧ, всѣ́хъ влⷣкꙋ несказа́ннѡ родила̀ є҆сѝ: є҆гѡ́же и҆ ны́нѣ подо́бїе на і҆кѡ́нахъ цѣлꙋ́емъ.
Катава́сїа: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ,хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Є҆ѯапостїла́рїй ᲂу҆́треннїй, воскрⷭ҇ный, є҆ди́ножды.
И҆ настоѧ́щїй.
Подо́бенъ: Со ᲂу҆ч҃нки̑ взы́демъ:
Взыгра́йте, восплещи́те, съ весе́лїемъ воспо́йте, вопїю́ще: ко́ль чꙋ̑дна и҆ ди̑вна дѣла̀ твоѧ̑,хрⷭ҇тѐ! и҆ кто̀ возмо́жетъ и҆зрещѝ, сп҃се, си̑лы твоѧ̑, на́ше є҆диномы́слїе и҆ согла́сїе соедини́вшагѡ во є҆ди́нꙋ цр҃ковь;
Бг҃оро́диченъ: Ѡ҆рꙋ̑жїѧ ны́нѣ ѡ҆скꙋдѣ́ша вражде́бныѧ є҆́реси, и҆ па́мѧть є҆ѧ̀ и҆счезѐ съ шꙋ́момъ: хра́мъ бо тво́й, всечтⷭ҇аѧ, зрѧ́ще всебл҃голѣ́пнѡ ᲂу҆кра́шенъ бл҃года́тьми чтⷭ҇ны́хъ і҆кѡ́нъ, ра́дости и҆сполнѧ́емсѧ всѝ.
На хвали́техъ стїхи̑ры воскрⷭ҇ны д҃: и҆ а҆нато́лїева а҃: и҆ трїѡ́ди подо́бны трѝ, гла́съ д҃.
Подо́бенъ: Да́лъ є҆сѝ зна́менїе:
Въ тебѣ̀ ны́нѣ весели́тсѧ цр҃ковь, чл҃вѣколю́бче, женисѣ̀ и҆ созда́телѣ свое́мъ, сїю̀ во́лею бг҃олѣ́пною ѿ і҆́дѡльскїѧ ле́сти и҆зба́вльшемъ и҆ себѣ̀ ѡ҆брꙋчи́вшемъ чтⷭ҇но́ю кро́вїю, свѣ́тлѡ прїе́млющи сщ҃е́нное возстановле́нїе і҆кѡ́нъ, и҆ ра́дꙋющисѧ тѧ̀ пое́тъ и҆ сла́витъ вѣ́рнѡ.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ:
Пло́ти твоеѧ̀ и҆з̾ѡбраже́нїе возставлѧ́юще, гдⷭ҇и, любе́знѡ лобыза́емъ, вели́кое та́инство смотре́нїѧ твоегѡ̀ и҆з̾ѧснѧ́юще: не привидѣ́нїемъ бо, ꙗ҆́коже глаго́лютъ бг҃обѡ́рныѧ дѣ́ти мане́сѡвы, на́мъ ꙗ҆ви́лсѧ є҆сѝ, чл҃вѣколю́бче, но и҆́стиною и҆ є҆стество́мъ пло́ти. тѣ́мъ возводи́ми ко твое́й любвѝ и҆ жела́нїю.
Сті́хъ: Возвеселю́сѧ и҆ возра́дꙋюсѧ ѡ҆ тебѣ̀:
Де́нь ра́достный и҆ весе́лїѧ и҆спо́лненный ꙗ҆ви́сѧ дне́сь: свѣ́тлость бо догма̑тъ и҆́стиннѣйшихъ блиста́етъ, и҆ сїѧ́етъ цр҃ковь хрⷭ҇то́ва, ᲂу҆кра́шена возставле́ньми і҆кѡ́нъ ст҃ы́хъ ны́нѣ и҆ сїѧ́ньми и҆з̾ѡбраже́нїй, и҆ є҆диномы́слїе быва́етъ вѣ́рныхъ бг҃остѧжа́нное.
Гла́съ ѕ҃.
Сті́хъ: Воскреснѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ᲂу҆бо́гихъ твои́хъ до конца̀.
И҆ пое́мъ самогла́сенъ днѐ:
Мѡѷсе́й во вре́мѧ воздержа́нїѧ зако́нъ прїѧ́тъ, и҆ лю́ди привлечѐ: и҆лїа̀ пости́всѧ небеса̀ заключѝ: трїе́ же ѻ҆́троцы а҆враа́мстїи мꙋчи́телѧ беззако́ннꙋюща поще́нїемъ побѣди́ша. тѣ́мъ и҆ на́съ, сп҃се, сподо́би воскрⷭ҇нїе ᲂу҆лꙋчи́ти, си́це вопїю́щихъ: ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
Сла́ва, па́ки то́йже. И҆ ны́нѣ: Пребл҃гослове́на є҆сѝ, бцⷣе дв҃о:
Славосло́вїе вели́кое. И҆ ѿпꙋ́стъ.
Сла́ва, и҆ ны́нѣ: стїхи́ра є҆ѵⷢ҇льскаѧ. И҆ ча́съ пе́рвый.
На лїтꙋргі́и, бл҃жє́нны гла́са, на ѕ҃: и҆ ѿ канѡ́на днѐ, пѣ́снь ѕ҃-ѧ, на д҃. Прокі́менъ, гла́съ д҃, пѣ́снь ѻ҆тцє́въ: Бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ пра́веденъ є҆сѝ ѡ҆ всѣ́хъ, ꙗ҆̀же сотвори́лъ є҆сѝ на́мъ. А҆пⷭ҇лъ ко є҆вре́ємъ, зача́ло тк҃ѳ ѿ полꙋ̀. А҆ллилꙋ́їа, гла́съ и҃: Мѡѷсе́й и҆ а҆арѡ́нъ во і҆ере́ехъ є҆гѡ̀, и҆ самꙋи́лъ въ призыва́ющихъ и҆́мѧ є҆гѡ̀. Сті́хъ: Призыва́хꙋ гдⷭ҇а,и҆ то́й послꙋ́шаше и҆́хъ. Є҆ѵⷢ҇лїе ѿ і҆ѡа́нна, зача́ло є҃. Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ, првⷣнїи, ѡ҆ гдⷭ҇ѣ:
На трапе́зѣ же ꙗ҆ди́мъ варе́нїе со є҆ле́емъ, а҆ не ры̑бы. А҆́ще же прилꙋчи́тсѧ, пїе́мъ вїно̀,ᲂу҆ста́вленное во сла́вꙋ бж҃їю, по двѣ̀ ча̑ши: та́кожде и҆ въ ве́черъ по двѣ̀.
Въ недѣ́лю ве́чера,
во свѣти́льничное, поста́вимъ стїхѡ́въ і҃: и҆ глаго́лемъ стїхи̑ры ᲂу҆мили́тєльныѧ ѻ҆смогла́сника, покаѧ̑нны д҃: и҆ трїѡ́ди подо́бны господи́на і҆ѡ́сифа, гла́съ д҃.
Подо́бенъ: Да́лъ є҆сѝ зна́менїе:
Да́ждь мѝ ᲂу҆миле́нїе, и҆ ѕлы́хъ ѿчꙋжде́нїе, и҆ соверше́нное и҆справле́нїе, въ стра̑сти тѣлє́сныѧ ны́нѣ погрꙋже́нномꙋ, и҆ ѿдале́нномꙋ ѿ тебє̀, бж҃е всецр҃ю̀, и҆ ниѿкꙋ́дꙋже ᲂу҆пова́нїѧ и҆мꙋ́щемꙋ: и҆ сп҃си́ мѧ блꙋ́днаго, мно́гїѧ ра́ди бл҃гости, і҆и҃се всеси́льне, сп҃се дꙋ́шъ на́шихъ.
Мѡѷсе́й ди́вный, посто́мъ ѡ҆чи́щьсѧ, ви́дѣ жела́емаго. семꙋ̀ ᲂу҆́бо поревнова́вши, смире́ннаѧ дꙋшѐ моѧ̀, потщи́сѧ ѿ ѕлы́хъ ѡ҆чи́ститисѧ въ де́нь воздержа́нїѧ, ꙗ҆́кѡ да гдⷭ҇а даю́щаго тебѣ̀ ѡ҆ставле́нїе, и҆ ѡ҆чище́нїе, и҆ и҆збавле́нїе, ᲂу҆́зриши сꙋ́щаго бл҃га́го и҆ чл҃вѣколюби́ваго.
Дрꙋгі́й, кѵ́ръ ѳео́дѡра, гла́съ ѕ҃.
Подо́бенъ: А҆рха́гг҃льски воспои́мъ:
Постѡ́въ вторꙋ́ю седми́цꙋ ны́нѣ свѣ́тлѡ начне́мъ, соверша́юще де́нь ѿ днѐ, бра́тїе, колесни́цꙋ ѻ҆́гненнꙋ содѣ́лавше себѣ̀, ꙗ҆́коже и҆лїа̀ ѳесві́тѧнинъ, четы́ре вели̑кїѧ добродѣ́тєли, ᲂу҆́мъ возвы́симъ безстра́стїемъ, пло́ть воѡрꙋжи́мъ чистото́ю, вспѧ́ть ѡ҆браща́юще и҆ побѣжда́юще врага̀.
И҆ мине́и г҃. Сла́ва, и҆ ны́нѣ, бг҃оро́диченъ. Вхо́дъ. Свѣ́те ти́хїй: Прокі́менъ, гла́съ и҃: Да́лъ є҆сѝ достоѧ́нїе боѧ́щымсѧ тебє̀, гдⷭ҇и. Сті́хъ а҃: Ѿ конє́цъ землѝ къ тебѣ̀ воззва́хъ. Сті́хъ в҃: Покры́юсѧ въ кро́вѣ кри́лъ твои́хъ. Сті́хъ г҃: Та́кѡ воспою̀ и҆́мени твоемꙋ̀ во вѣ́ки. И҆ па́ки: Да́лъ є҆сѝ достоѧ́нїе боѧ́щымсѧ:
Подоба́етъ вѣ́дати, ꙗ҆́кѡ сі́и два̀ вели́цыи прокі́мени, є҆́же є҆́сть: Не ѿвратѝ лица̀ твоегѡ̀: и҆ Да́лъ є҆сѝ достоѧ́нїе: со стїхи̑ и҆́хъ, є҆ди́нъ по є҆ди́номꙋ пою́тсѧ чрез̾ ве́сь ст҃ы́й по́стъ ѿ недѣ́ли сы́рныѧ до недѣ́ли пѧ́тыѧ поста̀. И҆ ѿ Сподо́би, гдⷭ҇и: начина́ютсѧ покло́ны.
На стїхо́внѣ самогла́сенъ днѐ два́жды, гла́съ и҃:
Прїиди́те, ѡ҆чи́стимъ себѐ ми́лостынѧми и҆ щедро́тами ко ᲂу҆бѡ́гимъ, не трꙋбѧ́ще, ни ꙗ҆влѧ́юще на́ше бл҃готворе́нїе. да не ᲂу҆вѣ́сть шꙋ́йца десни́цы дѣ́ло, да не расточи́тсѧ тщесла́вїемъ пло́дъ ми́лостыни, но въ та́йнѣ та̑йнаѧ вѣ́дꙋщемꙋ воззове́мъ: ѻ҆́ч҃е, ѡ҆ста́ви прегрѣшє́нїѧ на̑ша, ꙗ҆́кѡ чл҃вѣколю́бецъ.
Мч҃нченъ: Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те,и҆зба́витисѧ ѿ сѣте́й вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ:
Нбⷭ҇ныѧ си̑лы пою́тъ тѧ̀, бл҃года́тнаѧ мт҃и безневѣ́стнаѧ: и҆ мы̀ славосло́вимъ неизслѣ́димое твоѐ ржⷭ҇тво̀. бцⷣе, молѝ сп҃сти́сѧ дꙋша́мъ на́шымъ.
И҆ про́чее послѣ́дованїе, ꙗ҆́кѡ ѡ҆бы́чно.
На повече́рїи
пое́мъ канѡ́нъ ст҃ы̑мъ прⷪ҇ро́кѡмъ, [є҆гѡ́же краестро́чїе: Ли́къ да пле́щетъ прⷪ҇ро́кѡвъ бл҃гото́чнѡ.] Ѳеофа́ново, гла́съ є҃.
Пѣ́снь а҃.
І҆рмо́съ: Конѧ̀ и҆ вса́дника въ мо́ре чермно́е:
Бл҃года́ть бж҃е́ственнагѡ дх҃а и҆ согрѣше́нїй ѡ҆ставле́нїе да́ти мнѣ̀, чтⷭ҇нꙋ́ю ва́шꙋ па́мѧть пою́щꙋ, всевино́внаго хрⷭ҇та̀ ᲂу҆моли́те, ꙗ҆́кѡ прⷪ҇ро́цы бж҃е́ственныѧ бл҃года́ти.
Сосꙋ́ды бг҃одꙋхнове́нныхъ слове́съ согла̑сныѧ, и҆ зерца̑ла бж҃е́ственнагѡ блиста́нїѧ, ꙗ҆вле́нїе бж҃е́ственно прїе́млющыѧ, прⷪ҇ро́ки всѧ̑ бг҃омꙋ̑дрыѧ воспои́мъ.
Глаго́лы закѡ́нныѧ на горѣ̀ сїна́йстѣй мѡѷсе́й бг҃ови́децъ ѿ бг҃а прїе́мъ, лице́мъ просвѣти́сѧ,бг҃овидѣ́нїѧ бл҃года́тїю зна́менꙋемь чꙋ́дный.
Сла́ва: Тꙋ́чами бг҃оразꙋ́мїѧ бл҃года́тнїи ѡ҆́блацы бж҃їи мо́ре ꙗ҆зы́ческагѡ многобо́жїѧ съ шꙋ́момъ разори́ша, є҆динонача́льнꙋю си́лꙋ бг҃омꙋ́дреннѡ проповѣ́дающе.
Бг҃оро́диченъ: Трꙋбы̑ бг҃огла̑сныѧ, прⷪ҇ро́цы вѣща́ютъ тѧ̀ мт҃рь бж҃їю, напослѣ́докъ вѣкѡ́въ ро́ждшꙋю, пречтⷭ҇аѧ, наꙋчи́вшесѧ свы́ше, бцⷣе, твои̑мъ та́йнамъ.
Пѣ́снь г҃.
І҆рмо́съ: Водрꙋзи́вый на ничесо́мже:
Цѣвни̑цы брѧца́ломъ дх҃а ᲂу҆дарѧ́ємыѧ, прⷪ҇ро́цы всѝ подо́бный гла́съ твоегѡ̀ позна́нїѧ, хрⷭ҇тѐ, бг҃огласѧ́ще всѣ̑мъ бг҃олюбє́знымъ воспѣва́ютъ, богатѧ́ще свы́ше сїѧ́нїемъ.
Ѡ҆рꙋ̑жїѧ востаю̑щаѧ повелѣ́нїемъ твои́мъ, прⷪ҇ро́цы всѝ многомѧте́жнꙋю ле́сть пресѣца́ютъ,хрⷭ҇тѐ, бж҃е́ственною твое́ю си́лою и҆ непостижи́мою держа́вою твое́ю бл҃гоче́стнѡ ѡ҆дѣ́ѧвшесѧ.
Сла́ва: Бж҃е́ствєнныѧ и҆ мы́слєнныѧ ча́шы ра́зꙋма, прⷪ҇ро́цы всю̀ зе́млю ᲂу҆пои́ша, проѡбража́юще ꙗ҆́вѣ твоегѡ̀ смотре́нїѧ неꙋдобопости́жное та́инство, и҆́ный и҆́накѡ тебѐ проповѣ́дающе.
Бг҃оро́диченъ: Дре́вле повелѣ́нное та́инство, и҆ пре́жде вѣкѡ́въ предразꙋмѣва́емое всѧ̑ вѣ́дꙋщимъ бг҃омъ, въ послѣ́днее вре́мѧ во чре́вѣ твое́мъ, дв҃о пренепоро́чнаѧ, коне́цъ прїе́мшее ꙗ҆ви́сѧ.
Пѣ́снь д҃.
І҆рмо́съ: Бж҃е́ственное твоѐ:
Дх҃омъ вѣща́юще, и҆́стины нело́жнїи свѣти́льницы ꙗ҆ви́стесѧ, прⷪ҇ро́цы премꙋ́дрїи, просвѣща́юще всѧ̑ ꙗ҆зы́ки житїѧ̀ свѣ́тлостїю.
Сѐ ны́нѣ зрѧ́ще сбытїѧ̑ рече́нныхъ ѿ ва́съ, прⷪ҇ро́цы бж҃е́ственнїи, сла́вимъ ва́ми проповѣ́даннаго и҆ дѣ́ломъ проречє́нїѧ и҆спо́лньшаго.
Сла́ва: Премꙋ́дростїю просвѣща́еми, бж҃е́ственнїи, ꙗ҆зы́кѡвъ приведе́нїе бж҃їею бл҃года́тїю предразꙋмѣ́сте, і҆и҃лево же паде́нїе и҆ во всѣ́хъ бл҃ги́хъ запꙋстѣ́нїе.
Бг҃оро́диченъ: Бг҃а воплоще́нна зрѧ́ще, всебога́тїи, на бж҃е́ственнѣй стра́жи ста́вше, сего̀ сподо́бистесѧ ви́дѣти, ѿ горы̀ дѣ́вы приходѧ́ща.
Пѣ́снь є҃.
І҆рмо́съ: Ѡ҆дѣѧ́йсѧ свѣ́томъ:
Оу҆́тренева дꙋ́хъ тво́й къ сѣдѧ́щемꙋ на прⷭ҇то́лѣ превознесе́нѣ, и҆са́їе премꙋ́дре, и҆ съ вы́шними ли̑ки воспѣ́лъ є҆сѝ.
Ѧ҆зы́ки дх҃омъ дви́жꙋще, ст҃і́и, сегѡ̀ словеса̀ вселе́ннѣй бл҃гопостоѧ́ннѡ проповѣ́дꙋюще,бг҃оразꙋ́мїѧ зарю̀ ᲂу҆ѧсни́сте.
Сла́ва: Ꙗ҆́коже жили̑ща бж҃їѧ бы́вше, вы́ше є҆стества̀ соверша́юща, сего̀ въ себѣ̀ и҆мѣ́сте: є҆мꙋ́же ны́нѣ предстоѧ́ще, ѡ҆ на́съ моли́тесѧ.
Бг҃оро́диченъ: Оу҆́мъ сво́й премꙋ́дрый и҆ дре́внїй совѣ́тъ сказа́лъ є҆́сть ва́мъ, прⷪ҇ро́цы и҆́стины, бг҃ъ ѿ дв҃ы рожде́йсѧ, ꙗ҆́кѡ є҆ди́нъ милосе́рдъ.
Пѣ́снь ѕ҃.
І҆рмо́съ: Неи́стовствꙋющеесѧ бꙋ́рею:
Житїѐ бж҃е́ственное, бл҃гоче́стїѧ сло́во и҆́стинное стѧжа́вше, проповѣ̑дницы бы́сте всеи́стиннїи бж҃е́ственнагѡ воплоще́нїѧ, ст҃і́и.
Си́лꙋ бж҃е́ственнꙋю и҆мꙋ́ще, царе́й неꙋдержи́мое стремле́нїе и҆ ѕвѣре́й ᲂу҆ста̀ загради́сте, и҆з̾ чре́ва ки́това цѣ́лы сп҃со́стесѧ.
Сла́ва: Ѿ ложе́снъ ст҃і́и сїѧ́юще мі́рꙋ всемꙋ̀, добродѣ́тели ᲂу҆чи́телїе и҆ насади́телїе бы́сте, прⷪ҇ро́цы всѝ пребога́тїи.
Бг҃оро́диченъ: Бг҃олюби́ваѧ и҆мꙋ́ще помышлє́нїѧ, ржⷭ҇тво̀ твоѐ, влⷣчце, прⷪ҇ро́цы провозвѣсти́ша многоѡбра́зными начерта́ньми и҆ ѡ҆́бразы, чтⷭ҇аѧ.
Сѣда́ленъ, гла́съ в҃, самогла́сенъ:
Ли́къ прⷪ҇ро́ческїй съ мѡѷсе́омъ и҆ а҆арѡ́номъ весе́лїемъ ра́дꙋетсѧ дне́сь: ꙗ҆́кѡ коне́цъ прⷪ҇ро́чества наводѧ́й, сїѧ́етъ крⷭ҇тъ, и҆́мже на́съ сп҃слъ є҆сѝ. тѣ́хъ мл҃твами, хрⷭ҇тѐ бж҃е, поми́лꙋй на́съ.
Пѣ́снь з҃.
І҆рмо́съ: Превозноси́мый ѻ҆тцє́въ:
Неизче́тнаѧ си́ла гдⷭ҇нѧ велѣ́нїѧ въ ро́вѣ львы̀ ѡ҆бꙋзда̀, вопїю́щꙋ прⷪ҇ро́кꙋ: бж҃е, бл҃гослове́нъ є҆сѝ.
Трⷪ҇цѣ чтⷭ҇нѣ́й равночи́слени сꙋ́ще, всемꙋ́дрїи ѻ҆́троцы твоѝ пла́мень ᲂу҆гаси́ша, согла́снѡ пою́ще: бж҃е, бл҃гослове́нъ є҆сѝ.
Сла́ва: Ꙗ҆́кѡ свѣти̑ла сїѧ́юще, добродѣ́тельными цвѣ̑ты зе́млю ѡ҆небеси́сте, а҆враа́мстїи ѻ҆́трасли, прⷪ҇ро́цы, пою́ще: бж҃е, бл҃гослове́нъ є҆сѝ.
Бг҃оро́диченъ: Зако́ны є҆стества̀ превозшла̀ є҆сѝ, влⷣчце, ро́ждши гдⷭ҇а зако́номъ ѡ҆блада́юща, є҆мꙋ́же всѝ пое́мъ: бж҃е, бл҃гослове́нъ є҆сѝ.
Пѣ́снь и҃.
І҆рмо́съ: Тебѣ̀ вседѣ́телю:
Внꙋ́трь сла́дости ра́йскїѧ сꙋ́ще, бг҃опрїѧ́тнїи прⷪ҇ро́цы, ли́къ соста́вльше, всѣ̑мъ вѣ́рою ва́съ восхвалѧ́ющымъ, и҆зба́витисѧ ѿ бѣ́дъ хрⷭ҇та̀ ᲂу҆моли́те.
Пѣ́нїе бг҃огла̑снымъ всѣ̑мъ прⷪ҇ро́кѡмъ принесе́мъ, ли́къ и҆спле́тше, вси вѣ́рнїи, си́хъ словесы̀ ᲂу҆тверди́вшесѧ: да мл҃твами и҆́хъ ѡ҆правди́мсѧ.
Сла́ва: Сосꙋ́ди мы́сленнїи бл҃гоꙋха́нїѧ дх҃а ꙗ҆́вѣ бы́сте, всѝ прⷪ҇ро́цы, всѧ̑ ꙗ҆зы́ки къ ра́зꙋмꙋ наставлѧ́юще и҆ превозносѧ́ще хрⷭ҇та̀ во вѣ́ки.
Бг҃оро́диченъ: Ѿ ѻ҆ц҃а̀ безнача́льнꙋю зарю̀, дв҃о, родила̀ є҆сѝ пло́ти прїѧ́тїемъ: тѣ́мже,ра́дꙋйсѧ, непреста́ннѡ тебѣ̀ зове́мъ, и҆ превозно́симъ, чтⷭ҇аѧ, во вѣ́ки.
Пѣ́снь ѳ҃.
І҆рмо́съ: И҆са́їе, ликꙋ́й:
Є҆диномꙋ́дреннѡ прїиди́те, ны́нѣ восхва́лимъ прⷪ҇ро́ки всѧ̑ бж҃їѧ всечⷭ҇тны̑ѧ, чꙋде́съ соверши́тєли преесте́ственныхъ, ꙗ҆́кѡ проповѣ́давшыѧ хрⷭ҇та̀, вѣ́твь чтⷭ҇нꙋ́ю, и҆збра́нїе і҆а́кѡвле.
Ра́дости всемі́рныѧ провозвѣ̑стницы, проповѣ̑дницы ꙗ҆́вѣ, и҆ ра́зꙋма сокрѡ́вища, свѣ́тлїи, бж҃е́ственнїи, бы́сте премꙋ́дрости всеи́стинныѧ ᲂу҆ста̀ чи̑стаѧ, ѧ҆зы́цы дх҃а ст҃а́гѡ всечⷭ҇тні́и.
Сла́ва: Ꙗ҆́кѡ прⷪ҇ро́цы премꙋ́дрїи, всѣ́хъ созда́телѧ и҆ бг҃а ꙗ҆́кѡ си́льна зрѧ́ще и҆ ѿ негѡ̀ свѣ́томъ ѡ҆свѣща́еми, ва́шꙋ па́мѧть бл҃гоче́стнѡ вѣ́рою чтꙋ́щыѧ ѿ бѣ́дъ сп҃са́йте.
Бг҃оро́диченъ: Сп҃се́нїѧ хода́таица человѣ́кѡмъ была̀ є҆сѝ, чтⷭ҇аѧ, ро́ждши пло́тски содѣ́телѧ и҆ гдⷭ҇а, тебє̀ ра́ди всѣ̑мъ велича́ющымъ тѧ̀, дв҃о, ѡ҆чище́нїе подаю́щаго.
Та́же стїхи̑ры прⷪ҇ро́кѡмъ, гла́съ а҃.
Подо́бенъ: Прехва́льнїи мч҃нцы:
Прⷪ҇ро́цы пресла́внїи, вы̀ царѧ̀ ѡ҆бличи́сте, лю́демъ же де́рзѡстнымъ сопроти́вистесѧ, въ трⷪ҇цѣ є҆ди́наго бг҃а проповѣ́дающе и҆ те́плѣ ѿгонѧ́ще ѿ землѝ ле́сть многобо́жнꙋю: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Прⷪ҇ро́цы пресла́внїи, вы̀ бл҃гоче́стнѡ блꙋжда́юще въ пꙋсты́нѧхъ и҆ гора́хъ, и҆ ѡ҆ѕлоблѧ́еми въ гла́дѣ и҆ жа́ждѣ, ꙗ҆́кѡ бж҃їи ᲂу҆гѡ́дницы, со хрⷭ҇то́мъ на нб҃сѣ́хъ водворѧ́етесѧ: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Прⷪ҇ро́цы прехва́льнїи, вы̀ терпѣли́внѡ претре́ни, ка́менїемъ же побива́еми, и҆ ᲂу҆мерщвлѧ́еми ме́чнымъ ᲂу҆сѣче́нїемъ, бл҃гоче́стїѧ ра́ди свѣ́тли страда́ньми бы́сте: и҆ ны́нѣ моли́тесѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ: Вои́стиннꙋ па́че ᲂу҆ма̀ ди̑вна, бг҃оневѣ́сто, вели̑чїѧ ржⷭ҇тва̀ твоегѡ̀, ꙗ҆̀же проповѣ́даша прⷪ҇ро́цы всѝ, всепресла́вное зача́тїе, всепѣ́таѧ, и҆ ржⷭ҇тво̀ недомы́сленное и҆ несказа́нное, и҆́мже мі́ръ сп҃се́сѧ.
КОНЕ́ЦЪ ПЕ́РВОЙ СЕДМИ́ЦЫ