Суббота первой седмицы
Въ сꙋббѡ́тꙋ пе́рвꙋю ст҃ы́хъ постѡ́въ,
на ᲂу҆́трени по шестоѱа́лмїи, пое́мъ Бг҃ъ гдⷭ҇ь, на гла́съ в҃, и҆ глаго́лемъ тропа́рь ст҃а́гѡ ѳео́дѡра, два́жды: Вє́лїѧ вѣ́ры: Сла́ва, и҆ ны́нѣ, бг҃оро́диченъ є҆ди́ножды: Всѧ̑ па́че смы́сла: И҆ ѡ҆бы́чное стїхосло́вїе. По а҃-мъ же стїхосло́вїи, пое́мъ сѣда́льны мч҃нчны ѻ҆смогла́сника, слꙋчи́вшагѡсѧ гла́са, съ бг҃оро́дичнымъ. По в҃-мъ же стїхосло́вїи пое́мъ настоѧ́щыѧ сѣда́льны ст҃а́гѡ ѳео́дѡра.
Гла́съ г҃.
Подо́бенъ: Бж҃е́ствєнныѧ вѣ́ры:
Кипѧ̀ вѣ́ры правосла́вїемъ, ᲂу҆гаси́лъ є҆сѝ прельще́нїе ѕлосла́вїѧ, ᲂу҆праздни́въ і҆́дѡльское безбо́жїе: и҆ всесожже́нїе бж҃е́ственное бы́въ, чꙋдодѣ̑йствїи ѡ҆роша́еши концы̀. мч҃нче пресла́вне, хрⷭ҇та̀ бг҃а молѝ дарова́ти на́мъ ве́лїю млⷭ҇ть.
Дрꙋгі́й сѣда́ленъ ст҃а́гѡ, подо́бенъ:
Бж҃е́ственный да́ръ дадѐ тѧ̀ ко сп҃се́нїю все́й вселе́ннѣй ᲂу҆крѣпи́вый тѧ̀ во страда́льчествахъ гдⷭ҇ь, дꙋшє́вныѧ на́шѧ болѣ̑зни и҆сцѣлѧ́ѧ и҆ тѣлє́сныѧ стра̑сти побѣжда́ѧ. мч҃нче ѳео́дѡре, хрⷭ҇та̀ бг҃а молѝ дарова́ти на́мъ ве́лїю млⷭ҇ть.
Бг҃оро́диченъ, подо́бенъ:
Невмѣсти́маго бг҃а носи́вшаѧ во ᲂу҆тро́бѣ твое́й, дв҃о пречⷭ҇таѧ, пре́жде вѣ̑къ ѿ ѻ҆ц҃а̀ нетлѣ́ннѡ возсїѧ́вшаго, сло́ва ѵ҆поста́снагѡ и҆ сн҃а є҆диносꙋ́щнаго: сего̀ молѝ съ прⷪ҇рѡ́ки и҆ мч҃нки, прпⷣбными, пѡ́стники и҆ првⷣными, дарова́ти на́мъ разрѣше́нїе прегрѣше́нїй.
Та́же чте́мъ мꙋче́нїе ст҃а́гѡ. Та́же ѱало́мъ н҃. И҆ канѡ́нъ ст҃а́гѡ ѡ҆би́тели, со і҆рмосы̑ на ѕ҃: и҆ ст҃а́гѡ ѳео́дѡра на и҃. Стїхосло́вимъ же и҆ Гдⷭ҇еви пое́мъ.
Канѡ́нъ, [є҆гѡ́же краестро́чїе: Тѵ́рѡнъ пресла́вный, сла́ва пе́рвѣй сꙋббѡ́тѣ. Въ пе́рвыхъ же тропаре́хъ канѡ́на и҆́ное краестро́чїе: І҆ѡа́ннъ.] Творе́нїе і҆ѡа́нна, митрополі́та є҆ѵхаі́тскагѡ, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑:
Всѣ́хъ превы́шшїй тѧ̀ неизрече́ннѡ роди́вшꙋю положѝ превы́ше всѣ́хъ и҆збра́нныхъ свои́хъ: тѣ́мже дне́сь вѣнча́ннаго си́мъ воспѣва́юще, всепѣ́таѧ, тебѣ̀ пе́рвѣе начина́емъ.
Вели́каго въ мч҃нцѣхъ, страда́льца пресвѣ́тлаго, и҆мени́таго и҆ пресла́внаго, въ чꙋдесѣ́хъ ѿ конє́цъ землѝ и҆ до конє́цъ знамени́таго, пѣ́сньми воспою̀ ѳео́дѡра.
Де́нь весе́лый въ ско́рбныхъ возсїѧ̀, и҆ сѣ́тованїе си́хъ ѡ҆свѣтѝ, предпра́зднствєннаѧ преддвє́рїѧ и҆здале́ча ѡ҆зари́въ бл҃года́тїю бж҃е́ственнагѡ мч҃нка.
Кропи́тъ ѡ҆чища́ѧ цр҃ковь кровьмѝ ст҃о́е заколе́нїе, є҆́же прїѧ́тъ пожре́нный и҆ въ же́ртвꙋ прїѧ́тый, страда́льчествовавшаго бж҃е́ственныѧ ра́ди сла́вы є҆гѡ̀.
Бг҃оро́диченъ: Прекра́сно а҆́ще и҆ не ко вре́мени ᲂу҆зако́нисѧ пра́здновати: ᲂу҆краси́вшаѧ бо всѧ̑ влⷣчца и҆ ны́нѣ показа̀ въ се́й па́мѧти прїѻбща́ющисѧ предбѣ́дствꙋющемꙋ кро́вїю.
И҆́ный канѡ́нъ, тогѡ́же і҆ѡа́нна є҆ѵхаі́тскагѡ, гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ:
Ди́вный во ст҃ы́хъ вои́стиннꙋ, бж҃е, во мнѣ̀ ᲂу҆дивѝ млⷭ҇ти твоѧ̑, хрⷭ҇тѐ, сло́во мѝ да́рꙋѧ, ꙗ҆́кѡ да ди̑внаѧ восхвалю̀ твоегѡ̀ мч҃нка.
Тве́рдость во страда́нїихъ и҆ терпѣ́нїе во трꙋдѣ́хъ показа́лъ є҆сѝ, стрⷭ҇тоте́рпче хрⷭ҇то́въ, ско́рость же па́ки по́мощи твоеѧ̀ на на́съ ꙗ҆влѧ́еши, ѳео́дѡре.
Сла́ва: Бл҃гочести́вꙋю ѻ҆тє́цъ вѣ́рꙋ ѿ дꙋшѝ своеѧ̀ мꙋчи́тель ѿри́нꙋвъ ѕлѣ̀, бг҃ꙋ сопроти́вльсѧ, восхотѣ̀ нечести́вомꙋ совѣ́тꙋ при́снѡ слѣ́довати.
Бг҃оро́диченъ: Бг҃орѣ́чивыхъ мꙋже́й дрє́внѧѧ проречє́нїѧ на тебѣ̀ ꙗ҆́вѣ и҆спо́лнишасѧ, мт҃и дв҃о, ꙗ҆́кѡ бг҃а ро́ждшей вои́стиннꙋ, и҆ чл҃вѣ́ка и҆́стиннаго, па́че є҆стества̀ и҆ ᲂу҆жа́снѡ.
Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Пѣ́снь г҃.
І҆рмо́съ: Твоѧ̑ пѣсносло́вцы:
Ви́дѣти де́нь сн҃а твоегѡ̀ жела́юще хрⷭ҇тоимени́тїи лю́дїе, во ѡ҆́бразъ сегѡ̀ ны́нѣ предпра́зднствꙋютъ тебѣ̀, влⷣчце, носѧ́щей ѡ҆снова́нїе, и҆ сла́вномꙋ стрⷭ҇тоте́рпцꙋ твоемꙋ̀.
Всѧ́кими ѡ҆́бразы побѣжда́ютъ лꙋ̑чшаѧ: вели́кїй бо во страда́льцѣхъ въ весе́лїе и҆змѣнѝ ско́рбное вре́мѧ, сꙋро́вость ст҃а́гѡ поста̀ ѡ҆брати́въ во ѡ҆слабле́нїе.
Сво́йственъ и҆ подоба́ѧй тебѣ̀ да́ръ, и҆́бо ѿ свои́хъ, страда́льче: и҆̀хже бо са́мъ всели́лъ є҆сѝ въ се́й ча́сти твое́й, ѡ҆бра́дованнѡ тебѣ̀ похва́лъ да́ры прино́симъ.
Добрѣ́йшее ѡ҆снова́нїе положи́лъ є҆сѝ, твои́ми и҆зрѧ́дствы, и҆зрѧ́дне, ѕвѣ́рѧ всегꙋби́тельна, ѻ҆гне́мъ и҆ ᲂу҆бі́йствомъ ды́шꙋща, низложи́въ ꙗ҆́кѡ ле́гкое подѣ́лїе преесте́ственныѧ до́блести.
Неи́стовствовавъ но́вый ѿстꙋ́пникъ лю́тѣ, ра́внѡ дре́внемꙋ, жє́ртвы ꙗ҆́коже ꙗ҆́дъ бра́шнѡмъ присмѣсѝ: но прельсти́всѧ ѡ҆каѧ́нникъ премꙋдре́нъ бы́сть мч҃нкомъ.
Бг҃оро́диченъ: И҆спо́лнисѧ ᲂу҆́бѡ всѧ̑ землѧ̀ позна́нїѧ гдⷭ҇а, и҆з̾ тебє̀, дв҃о, мі́рꙋ ꙗ҆́вльшагѡсѧ: но бж҃є́ственнымъ мч҃нкѡмъ бл҃годаре́нїе мно́гое, ᲂу҆тверди́вшымъ самѣ́ми собо́ю и҆́стинꙋ.
И҆́ный.
І҆рмо́съ: Нѣ́сть ст҃ъ:
Пе́рвѣе во є҆́ѵины ᲂу҆́ши пошепта́вый ле́стнѡ, и҆ а҆да́ма то́юже прельсти́вый ко́зненнѡ, то́й и҆ ны́нѣ ꙗ҆́дъ ѕло́бы ко прельще́нїю и҆злїѧ̀.
Кова́рство и҆мѧ́ше на него̀ пребеззако́ннѣйшїй, пита́ше неи́стовство проти́вꙋ правоживꙋ́щымъ, и҆ска́ше ᲂу҆до́бна вре́мене, въ не́же ме́рзость сотвори́ти ᲂу҆мышлѧ́ше.
Сла́ва: Наста̀ нача́токъ дне́й ст҃ы́хъ постѡ́въ, въ ни́хже всѧ́кїй хрⷭ҇тїа́нинъ самаго̀ себѐ воздержа́нїемъ мно́гимъ ѡ҆чища́етъ, ѿ всѣ́хъ ᲂу҆клонѧ́ѧсѧ.
Бг҃оро́диченъ: Наде́ждо мі́рꙋ держа́внаѧ, покро́ве и҆ предста́тельство, всест҃а́ѧ дв҃о, не пре́зри, бл҃га́ѧ, молє́нїѧ рабѡ́въ, ѿ любвѐ тѧ̀ при́снѡ ᲂу҆бл҃жа́ющихъ.
Катава́сїа: Твоѧ̑ пѣсносло́вцы, бцⷣе, живы́й и҆ и҆з̾ѻви́льный и҆сто́чниче, въ ли́къ дꙋхо́вный совокꙋ́пльшыѧсѧ ᲂу҆твердѝ: и҆ въ бж҃е́ственнѣй твое́й сла́вѣ, вѣнцє́въ сла́вы сподо́би.
Сѣда́ленъ, гла́съ и҃.
Подо́бенъ: Премꙋ́дрость и҆ сло́во:
Бж҃е́ственное всеѡрꙋ́жїе воспрїи́мъ, и҆ і҆́дѡлѡвъ прельще́нїе низложи́въ а҆́гг҃лы воздви́глъ є҆сѝ восхвалѧ́ти по́двиги твоѧ̑: бж҃е́ственною бо любо́вїю во ᲂу҆́мѣ̀ распалѧ́ѧсѧ, сме́рть во ѻ҆гнѝ до́блественнѡ презрѣ́лъ є҆сѝ. тѣ́мже просѧ́щымъ тѧ̀ да́рꙋеши по и҆мени твоемꙋ̀ бж҃е́ствєнныѧ да́ры, и҆сцѣле́нїй подаѧ̑нїѧ. стрⷭ҇тоте́рпче ѳео́дѡре, моли́сѧ хрⷭ҇тꙋ̀ бг҃ꙋ, согрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.
Сла́ва, подо́бенъ:
Маѯїмі́новыми ласка́ньми не ᲂу҆клони́всѧ, хрⷭ҇то́выми же словесы̀ мꙋ́жествовавъ, і҆́дѡльское ка́пище во ѻ҆гнѝ и҆спепели́лъ є҆сѝ, страда́льчески побѣди́въ до́брѣ сопроти́вника, прⷪ҇ро́чески преше́лъ є҆сѝ ѻ҆́гнь, ꙗ҆́коже въ водѣ̀: тѣ́мже прїи́мъ досто́йное воздаѧ́нїе подвигѡ́въ, и҆сточа́еши и҆сцѣлє́нїѧ просѧ́щымъ вѣ́рою. страстоте́рпче ѳео́дѡре, моли́сѧ хрⷭ҇тꙋ̀ бг҃ꙋ, согрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.
И҆ ны́нѣ, бг҃оро́диченъ, подо́бенъ:
Ꙗ҆́кѡ всенепоро́чнаѧ невѣ́ста творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, ꙗ҆́кѡ вмѣсти́лище сꙋ́щи вы́шнѧгѡ, всепѣ́таѧ, беззако́нїй мѧ̀ сꙋ́ща скве́рное жили́ще, и҆ въ ра́зꙋмѣ бы́вша бѣсѡ́мъ и҆гра́лище, потщи́сѧ и҆ ѿ си́хъ ѕлодѣ́йствїѧ мѧ̀ и҆зба́вити, свѣ́тлое жили́ще добродѣ́телїю содѣ́лавши: свѣтопрїе́мнице нетлѣ́ннаѧ, ѿженѝ ѡ҆блакъ страсте́й, и҆ сподо́би го́рнїѧ свѣ́тлости и҆ неле́стнагѡ ѡ҆сїѧ́нїѧ свѣ́та невече́рнѧгѡ твоегѡ̀.
Пѣ́снь д҃.
І҆рмо́съ: Сѣдѧ́й въ сла́вѣ:
Ѽ но́вагѡ и҆ пресла́внагѡ смѣше́нїѧ и҆ растворе́нїѧ! дѣ́втвꙋ ржⷭ҇тво̀ соединѝ роди́выйсѧ бг҃очл҃вѣ́къ, къ сѣ́тѡваннымъ же днє́мъ весе́лїе примѣсѝ, почита́ѧ своего̀ страда́льца.
Ви́ждь, ка́кѡ хрⷭ҇та̀ люблѧ́ше хрⷭ҇то́ви во́инствꙋѧй: враги́ бо сегѡ̑ ре́вностїю и҆ ѻ҆гне́мъ погꙋбѝ, и҆ себѐ кончи́нѣ до́брꙋю же́ртвꙋ и҆ прїѧ́тное заколе́нїе є҆мꙋ̀ ᲂу҆се́рднѡ ѿдадѐ.
Побѣдоно́снѣ ѿ страда́льчествъ до́блїй разрѣшѝсѧ, зри́тєли ᲂу҆диви́въ дерзнове́нными глагѡ́лы и҆ презрѣ́нїемъ мꙋче́нїй, и҆ бы́въ все́й тва́ри но́вое и҆ пресла́вное зрѣ́лище.
Ко́сть ᲂу҆́бѡ не сокрꙋши́сѧ бг҃а и҆ влⷣки моегѡ̀, ѽ долготерпѣ́нїѧ! и҆ по ᲂу҆мерщвле́нїи стра́ждꙋща: во́ина же є҆гѡ̀ ѻ҆́гнь прїе́мъ и҆ ко́ло ᲂу҆стыдѣ́сѧ ᲂу҆ме́ршꙋ прикоснꙋ́тисѧ.
Бг҃оро́диченъ: Соꙋме́ршїи влⷣцѣ жи́зни и҆ совоста́вшїи слꙋжи́тєли живꙋ́тъ ᲂу҆ негѡ̀ ны́нѣ вѣ́чнѡ, и҆ съ сн҃омъ мт҃рь прославлѧ́ютъ, бл҃гословѧ́ще ѻ҆ц҃а̀, сн҃а и҆ дх҃а ст҃а́го.
И҆́ный.
І҆рмо́съ: Хрⷭ҇то́съ моѧ̀ си́ла:
Совѣ́тъ совѣщава́етъ нечести́вѣйшїй, и҆ зри́те, ꙗ҆́кѡ вои́стиннꙋ є҆́сть стра́шно: ᲂу҆мы́сли бо ѡ҆каѧ́нный, ме́рзкими бра́шны лю́ди хрⷭ҇тѡ́вы ѡ҆скверни́ти.
Въ дѣ́ло приведѐ совѣ́тъ беззако́нный: возбрани́ти бо повелѣ́ чи́стыхъ ꙗ҆де́нїй кꙋ́плю и҆ предложи́ти, ꙗ҆̀же ѻ҆́нъ ѡ҆сквернѝ кровьмѝ.
Сла́ва: Бы́сть ꙗ҆́вственно и҆ ѡ҆глаше́но беззако́нїе всѣ̑мъ хрⷭ҇тїа́нѡмъ: тѣ́мже, є҆гда̀ ᲂу҆вѣ́дѣша, стеко́шасѧ всѝ кꙋ́пнѡ въ хра́мъ гдⷭ҇нь ст҃ы́й.
Бг҃оро́диченъ: Ро́ждшꙋю тѧ̀ предвѣ́чнаго ѿ ѻ҆ц҃а̀ рожде́ннаго ны́нѣ вѣ́рнїи мл҃твенницꙋ предлага́емъ: тоѧ̀ мл҃твами преклоне́нъ, хрⷭ҇тѐ, бл҃гоꙋвѣ́тливъ бꙋ́ди рабѡ́мъ твои̑мъ.
Катава́сїа: Сѣдѧ́й въ сла́вѣ на прⷭ҇то́лѣ бж҃ества̀, во ѡ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃се зовꙋ́щыѧ: сла́ва, хрⷭ҇тѐ, си́лѣ твое́й.
Пѣ́снь є҃.
І҆рмо́съ: Оу҆жасо́шасѧ всѧ́чєскаѧ:
Ѿверза́ютсѧ дне́сь преддвє́рїѧ бл҃года́ти, и҆ сїѐ ны́нѣшнее ᲂу҆покое́нїе проѡбража́етъ воскрⷭ҇нїе, си́це свѣтоно́снѣ свѣ́тлꙋю влⷣчцꙋ и҆ сла́внаго мч҃нка почита́ющее.
Да́рꙋетъ бг҃ъ тезоимени́тый да́ръ, ѳео́дѡра, возлюби́вшымъ ꙗ҆́вльшагѡсѧ возлю́бленнагѡ ꙗ҆вле́нїе,пресла́вныхъ дѣ́лъ творца̀, и҆ бж҃е́ственныхъ си́лъ самодѣ́телѧ содѣ́ѧвшасѧ.
Ничто́же мч҃нкꙋ лꙋ́цы и҆ стрѣ́лы твоѧ̑, вра́же человѣ́ческагѡ сп҃се́нїѧ: и҆ ᲂу҆ме́рый бо живе́тъ и҆ бо́дрствꙋетъ, и҆ ѕлодѣ́йствѡмъ твои̑мъ противлѧ́ѧсѧ, сп҃са́етъ всѧ́каго правосла́внаго.
Бг҃оро́диченъ: Стра́нно бѧ́ше пре́жде чꙋ́до бг҃оѻтрокови́цы: мꙋчє́нїи же страда́льческими прїѧ́тъ вѣ́рꙋ несꙋмнѣ́ннꙋ, и҆ вѣ́рꙋемое при́снѡ пребыва́етъ чꙋ́дно и҆ вѣ́рнѣ покланѧ́емо.
И҆́ный.
І҆рмо́съ: Бж҃їимъ свѣ́томъ твои́мъ:
Тогда́шнїй ᲂу҆́бѡ а҆рхїере́й, ѕѣлѡ̀ ᲂу҆жаснꙋ́всѧ, є҆гда̀ ᲂу҆вѣ́дѣ нечести́вагѡ совѣ́тъ, пѣ́сньми всено́щными бг҃а молѧ́ше, не презрѣ́ти въ коне́цъ люде́й жре́бїѧ є҆гѡ̀.
Но ско́рый вои́стиннꙋ помо́щникъ, во и҆́стинѣ и҆ те́плѣмъ моле́нїи призыва́ющихъ є҆го̀̀ не презрѣ̀ ѿню́дь, но скорѣ́йшее и҆́мъ содѣ́ловаетъ ᲂу҆́мысла разрꙋше́нїе.
Сла́ва: Ѿ вы́шнихъ помо́щникъ наискорѣ́е посыла́етсѧ на зе́млю, стрⷭ҇тоте́рпецъ ѳео́дѡръ, и҆ пастыренача́льникꙋ ꙗ҆влѧ́етсѧ, наꙋча́ѧ разрꙋше́нїю беззако́ннагѡ совѣ́та.
Бг҃оро́диченъ: Никто́же притека́ѧ те́плѣ ко твоемꙋ̀, влⷣчце, застꙋпле́нїю, посрами́тсѧ когда̀: но про́ситъ бл҃года́ти, и҆ да́ръ прїе́млетъ на по́льзꙋ скорѣ́е проше́нїѧ.
Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющи.
Пѣ́снь ѕ҃.
І҆рмо́съ: Бж҃е́ственное сїѐ и҆ всечестно́е:
Пости́тисѧ, сп҃се, не мо́гꙋтъ дрꙋ́зи и҆ сы́нове черто́га твоегѡ̀: тебе́ бо жениха̀ съ мт҃рїю и҆ съ дрꙋ́гомъ твои́мъ ᲂу҆гоща́ютъ предстоѧ́ща, и҆ слꙋ́жатъ.
Ѿстꙋпѝ ѕлоимени́тый ѿ бг҃а сп҃са́ющагѡ, ѿстꙋпѝ и҆ ѿ ра́зꙋма, и҆ безꙋ́мїемъ воста̀ на вѣ́рꙋ: но прити́вꙋ сегѡ̀ ѡ҆брѣ́те великоимени́таго.
До́блїй пострада́въ ꙗ҆ви́сѧ мꙋ́дрѣйшїй, и҆ подвѝгсѧ содѣ́ласѧ теплѣ́йшїй: бра́нїю бо проти́вꙋ мꙋчи́телей и҆ побѣ́дою до́брѣ ᲂу҆́соверши́всѧ, нижѐ по сме́рти ѿстꙋпѝ добродѣ́ланїѧ.
Бг҃оро́диченъ: И҆зба́вльшесѧ дне́сь, влⷣчце, ѿ бѣды̀ дꙋшетлѣ́нныѧ, чꙋ́домъ стрⷭ҇тоте́рпца твоегѡ̀, по твоемꙋ̀ бж҃е́ственномꙋ промышле́нїю, бл҃годаре́нїе ѻ҆бои́мъ возно́симъ.
И҆́ный.
І҆рмо́съ: Жите́йское мо́ре:
Стра́нномꙋ ꙗ҆вле́нїю твоемꙋ̀ дивѧ́сѧ, а҆рхїере́й ѿвѣща̀: ты̀ кто̀ є҆сѝ, го́споди, глаго́лѧй мнѣ̀; вразꙋмѝ и҆ наꙋчѝ, ка́кѡ ѡ҆брѧ́щемъ скорѣ́йшꙋю по́мощь;
Ѳео́дѡръ речѐ: а҆́зъ вои́стиннꙋ є҆́смь стрⷭ҇тоте́рпецъ, и҆ слы́ши: пшени́цꙋ свари́въ раздѣлѝ лю́демъ, и҆ та́кѡ сп҃се́тесѧ ѿ ѡ҆скверне́нныхъ бра́шенъ ѕлодѣ́ѧ.
Сла́ва: Ко́ль вели́ко чꙋ́до твоѐ и҆ пресла́вно твоѐ застꙋпле́нїе, ѳео́дѡре! тѣ́мже дерза́юще всѝ чи́стѡ къ тебѣ̀ прибѣга́емъ и҆ мо́лимсѧ: сп҃сѝ рабы̑ твоѧ̑.
Бг҃оро́диченъ: Свѣ́та жили́ще и҆ вмѣсти́лище чи́стое сло́ва ꙗ҆ви́ласѧ є҆сѝ, ѻ҆ц҃а̀ бл҃говоле́нїемъ и҆ посѣще́нїемъ тебє̀ ѿ дх҃а ст҃а́гѡ: тѣ́мже мѧ̀ просвѣтѝ.
Катава́сїа: Бж҃е́ственное сїѐ и҆ всечестно́е празднество̀ бг҃омт҃ре соверша́юще, бг҃омꙋ́дрїи, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вѧще.
Конда́къ, гла́съ и҃:
Вѣ́рꙋ хрⷭ҇то́вꙋ ꙗ҆́кѡ щи́тъ внꙋ́трь прїи́мъ въ се́рдцѣ твое́мъ, проти̑вныѧ си̑лы попра́лъ є҆сѝ, многострада́льче, и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ, ѳео́дѡре, ꙗ҆́кѡ непобѣди́мый.
І҆́косъ: На прⷭ҇то́лѣ свѣ́та носи́маго, бл҃года́рственнѡ вѣ́рою воспѣва́емъ тѧ̀, ꙗ҆́кѡ дарова́нїе бж҃е́ственное дарова́лъ є҆сѝ, до́блѧго страда́ньми ѳео́дѡра, въ житїѝ требл҃же́ннаго, ꙗ҆́кѡ побо́рника сꙋ́ща и҆́стины: и҆́же бл҃гочести́вымъ помышле́нїемъ стѧжа́въ хрⷭ҇та̀, крѣ́пкїй бы́сть побѣди́тель на ѕлоко́зненнаго, ꙗ҆́кѡ непобѣди́мый.
Сѷнаѯа́рїй.
Стїхѝ: Ко́лѷвомъ пита́етъ тѵ́рѡнъ гра́дъ,
Пи́щꙋ ѡ҆скверне́ннꙋю ᲂу҆чини́въ непотреблѧ́емꙋ.
Въ сі́й де́нь, въ сꙋббѡ́тꙋ пе́рвꙋю постѡ́въ, пра́зднꙋемъ пресла́вное над̾ ко́лѷвомъ чꙋ́до ст҃а́гѡ и҆ сла́внагѡ великомч҃нка ѳео́дѡра тѵ́рѡна, є҆мꙋ́же нача́ло бы́сть си́це. По кѡнста́нтїи,вели́кагѡ кѡнстанті́на сы́нѣ, ски́птромъ ца́рствїѧ ѡ҆владѣ́вшꙋ і҆ꙋлїа́нꙋ ѿстꙋ́пникꙋ и҆ ѿ хрⷭ҇та̀ во і҆долослꙋже́нїе прело́жшꙋсѧ, воздвиза́етсѧ преве́лїе на хрⷭ҇тїа́ны гоне́нїе ꙗ҆́вное и҆ не ꙗ҆́вное. И҆скꙋша́ѧ хрⷭ҇тїа́ны, не восхотѣ̀ ѕлочести́вый мꙋчи́ти ѧ҆́ ѡ҆б̾ѧвле́ннѡ сꙋ́ровѣ и҆ безчеловѣ́чнѣ, стыдѧ́сѧ и҆ назира́ѧ, да не прилага́ютсѧ въ вѣ́рѣ мно́жайшїи: ᲂу҆мы́сли же льсти́вый и҆ скве́рный сокрове́ннѣ нѣ́какѡ ѡ҆скверни́ти сїѧ̑. Посемꙋ̀ и ᲂу҆смотри́въ, ꙗ҆́кѡ на́шъ ро́дъ хрⷭ҇тїа́нскїй въ пе́рвꙋю седми́цꙋ ст҃ы́хъ постѡ́въ наипа́че ѡ҆чища́етсѧ и҆ внима́етъ бг҃ꙋ: призва́въ є҆па́рха гра́да, повелѣва́етъ є҆мꙋ̀ ѡ҆бы́чнѣ продає́мыѧ снѣ̑ди ѿнестѝ съ то́ржища, предложи́ти же дрꙋгі̑ѧ снѣ̑ди, си́рѣчь хлѣ́бы и҆ питїѧ̑, пре́жде смѣшє́нныѧ съ кровьмѝ же́ртвъ є҆гѡ̀ и҆ въ смѣше́нїи ѡ҆сквернє́нныѧ, ꙗ҆́кѡ да поста̀ ра́ди сїѧ̑ кꙋпꙋ́ющїи ѡ҆сквернѧ́тсѧ па́че въ чистотѣ̀ свое́й. А҆́бїе ᲂу҆́бо є҆па́рхъ въ дѣ́ло приво́дитъ повелѣ́нное, и҆ предлага́етъ во все́мъ то́ржищи бра̑шна и҆ питїѧ̑, ѡ҆сквернє́ннаѧ ѿ же́ртвъ и҆ крове́й. Но всеви́дѧщее бж҃їе ѻ҆́ко, запина́ющее премꙋ́дрыѧ въ кова́рствѣ и҆́хъ (а҃ Корі́нѳ. г҃, ѳ҃і) и҆ ѡ҆ на́съ рабѣ́хъ свои́хъ при́снѡ промышлѧ́ющее, и҆ гнꙋ̑снаѧ на на́съ кова̑рства ѿстꙋ́пника разрꙋшѝ. А҆рхїере́ю бо гра́да є҆ѵдоѯі́ю бг҃ъ посыла́етъ вели́каго своего̀ страстоте́рпца ѳео́дѡра, ѿ тѵ́рѡнскагѡ полка̀, тѵ́рѡна и҆менꙋ́ема. И҆ се́й ꙗ҆́вѣ, а҆ не во снѣ̀ а҆рхїере́ю предста́въ, си́це речѐ: є҆ли́кѡ мо́жеши ско́рѡ воста́въ, соберѝ хрⷭ҇то́во ста́до, и҆ повелѣва́й тве́рдѣ, никомꙋ́же ничто́же ѿ предложе́нныхъ на то́ржищи кꙋпи́ти: кровьмѝ бо же́ртвъ сїѧ̑ ѡ҆сквернє́на сꙋ́ть ѿ нечести́вагѡ царѧ̀. Архїере́ю же недоꙋмѣва́ющꙋ и҆ вопроша́ющꙋ: ка́кѡ бы ᲂу҆до́бно бы́ло сїѐ, недоста́токъ въ домꙋ̀ и҆мꙋ́щымъ не кꙋпи́ти ѿ предложе́нныхъ въ то́ржищи; ст҃ы́й глаго́летъ: ко́лѷво да́въ и҆̀мъ, недоста́токъ ᲂу҆толѝ. Семꙋ́ же недоꙋмѣва́ющꙋ и҆ неразꙋмѣва́ющꙋ, и҆ вопроша́ющꙋ, что̀ бы́ло бы сїѐ ко́лѷво, вели́кїй ѳео́дѡръ глаго́летъ: варе́наѧ пшени́ца: си́це бо мы̀ во є҆ѵхаі́тѣхъ глаго́лати ѡ҆быко́хомъ. И҆спы́товаше же патрїа́рхъ: кто̀ є҆́сть се́й ѡ҆ хрⷭ҇тїа́нѣхъ промышлѧ́ѧй; Ст҃ы́й же ѿвѣща̀: а҆зъ є҆́смь хрⷭ҇то́въ мч҃нкъ ѳео́дѡръ: ѿ хрⷭ҇та въ помо́щь ва́мъ ны́нѣ по́сланный. Воста́ ᲂу҆́бо а҆́бїе патрїа́рхъ, и҆ мно́жествꙋ вѣ́рныхъ возвѣсти ви̑дѣннаѧ: и҆ та́кѡ содѣ́ѧвъ, хрⷭ҇то́во ста́до соблюдѐ невреди́мо ѿ кова́рства врага̀ и҆ ѿстꙋ́пника. Ѻ҆́нъ же ᲂу҆зрѣ́въ своѐ лови́тельство ѡ҆бличе́но бы́вшо и҆ ничто́же соверши́вшо, и҆ дово́льнѣ постыди́всѧ, па́ки повелѣ̀ предложи́ти ѡ҆бы̑чнѣ на то́ржищи продае́мое. Хрⷭ҇тѡ́вы ᲂу҆́бо лю́дїе, седми́цѣ ᲂу҆жѐ соверши́вшейсѧ, бл҃годаре́нїе воздаю́ще бл҃годѣ́телю и҆ мч҃нкꙋ, въ сїю̀ сꙋббѡ́тꙋ ко́лѷвомъ є҆мꙋ̀ па́мѧть ра́дꙋющесѧ сотвори́ша. Ѿто́лѣ и҆ мы̀ вѣ́рнїи, да́же и҆ доны́нѣ чꙋ́до ѡ҆бновлѧ́юще, да не забве́но толи́кое дѣ́ло мч҃нка вре́менемъ бꙋ́детъ, вели́каго ѳео́дѡра ко́лѷвомъ почита́емъ.
Сего́ же вели́каго ѳео́дѡра ѕлочести́вый врі́нга при маѯїмі́нѣ ᲂу҆мꙋ́чи, и҆зꙋвѣ́чивъ пре́жде, занѐ хра́мъ боги́ни ѻ҆́ныхъ сожже́ и҆ ни́щымъ ᲂу҆крашє́нїѧ є҆ѧ̀ раздѣлѝ. Нѣ̑кимъ же и҆ ᲂу҆вѣща́вшымъ є҆го, и҆ соврати́ти є҆го̀ хотѣ́вшымъ, и҆ совѣ́тъ твори́вшымъ, не ѿстꙋпѝ. Мно́гѡ ᲂу҆́бо пострада́въ, послѣдѝ въ пе́щь вели́кꙋю разжже́ннꙋю вмета́етсѧ, и҆ ничто́же ѿ неѧ̀ тѣ́ломъ пострада́въ, посредѣ̀ є҆ѧ̀ дꙋ́хъ бг҃ꙋ предадѐ.
Тогѡ̀ мл҃твами, хрⷭ҇тѐ бж҃е, поми́лꙋй и҆ сп҃сѝ на́съ. А҆ми́нь.
Пѣ́снь з҃.
І҆рмо́съ: Не послꙋжи́ша бго҃мꙋ́дрїи:
Зако́нъ не лежи́тъ првⷣникѡмъ твои̑мъ, ре́клъ є҆сѝ, првⷣный влⷣко: тѣ́мже мт҃и твоѧ̀ и҆ многочꙋ́дный се́й слꙋжи́тель тво́й, свѣ́тлостїю па́мѧти и҆́хъ дне́сь зако́ны поще́нїѧ разрѣша́ютъ.
Ко́ль сла́дко, и҆ вели́ко, и҆ ра́достно ны́нѣшнее торжество̀! є҆́же мч҃нкѡвъ до́блѣйшїй и҆ преве́лїй ны́нѣ на́мъ соста́ви, є҆ди́нѣмъ чꙋ́домъ лю́ди хрⷭ҇тѡ́вы ѿ нечи́стыхъ чи̑сты соверши́въ.
ѕмїє́мъ лю̑тымъ сопроти́вльшагосѧ, и҆ превозмо́гшаго дꙋшетли́телѧ и҆ ѡ҆сквернѧ́ющаго ѡ҆дꙋшевлє́ннаѧ тѣлеса̀, вѣнча́имъ ны́нѣ побѣ́дными пѣ́сньми и҆ вѣнцє́въ похвала́ми.
Бг҃оро́диченъ: Родонача́льникъ ᲂу҆́бѡ пред̾ꙋвѣ́дѣвъ, ꙗ҆́кѡ дꙋшетлѣ́нно є҆́сть бра́шно, не ᲂу҆бѣжѐ: твои́ же вѣ́рнїи лю́дїе, ѿ твоегѡ̀ мч҃нка преднаꙋче́ни бы́вше и҆ и҆збѣ́гше всепа́гꙋбныѧ пи́щи, съ си́мъ, влⷣчце, же́ртвꙋ сп҃се́нїѧ тебѣ̀ прино́сѧтъ.
И҆́ный.
І҆рмо́съ: Росода́тельнꙋ ᲂу҆́бѡ пе́щь:
Росода́тельный на ᲂу҆ны́нїе и҆ распале́нїе ѡ҆́блакъ ꙗ҆ви́лсѧ є҆сѝ, пресла́вне, и҆ сп҃слъ є҆сѝ ѿ пе́щи мꙋчи́тельскїѧ всѧ̑ вѣ̑рныѧ, зовꙋ́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.
Царю̀ пребеззако́ннѣйшїй! посрами́сѧ, и҆ да заградѧ́тсѧ ᲂу҆ста̀ твоѧ̑, ᲂу҆мы̑слившаѧ на ва́съ беззако́нный совѣ́тъ: разрꙋши́ бо твою̀ крѣ́пость ца́рствꙋѧй цр҃ь и҆ всѣ́хъ гдⷭ҇ь.
Сла́ва: І҆ꙋлїа́не безꙋ́мне! се́рдце твоѐ всѐ ѕло́бы и҆спо́лнисѧ, ѡ҆бꙋева́етсѧ же ѿ премꙋ́драгѡ бг҃а на́шегѡ, подви́гшеесѧ лꙋка́внѡ на на́съ, вопїю́щихъ къ немꙋ̀: бл҃года́ть подава́й на́мъ.
Бг҃оро́диченъ: Па́че сло́ва твоѐ бы́сть зача́тїе, и҆ па́че ᲂу҆ма̀ ржⷭ҇тво̀ твоѐ, всенепоро́чнаѧ: бг҃а бо родила̀ є҆сѝ пло́тїю, спа́сшаго всѧ̑ ѿ тлѣ́нїѧ, бл҃гослове́ннаѧ. тѣ́мже ны́нѣ, бцⷣе, тѧ̀ сла́вимъ.
Катава́сїа: Не послꙋжи́ша бг҃омꙋ́дрїи тва́ри па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇и и҆ бж҃е, бл҃гослове́нъ є҆сѝ.
Пѣ́снь и҃.
І҆рмо́съ: И҆зба́вителю всѣ́хъ:
Ра́дости ржⷭ҇тво́мъ и҆спо́лнившаѧ нбⷭ҇наѧ и҆ земна̑ѧ въ сѣ́тованное вре́мѧ бл҃года́ть бл҃говре́меннꙋю подае́тъ, свѣ́тлѡ ᲂу҆строѧ́ющи вѣне́чникꙋ пра́зднствєннаѧ.
Сꙋббѡ́тствꙋимъ человѣ́цы дне́сь, ѿ трꙋдѡ́въ вчера́шнихъ почи́вше, бл҃гослови́вшагѡ ра́ди настоѧ́щїй де́нь ᲂу҆покое́нїемъ и҆ ны́нѣшнимъ торжество́мъ мч҃нка.
Вои́стиннꙋ сїѧ̀ пе́рваѧ въ сꙋббѡ́тахъ, и҆ сꙋббѡ́тамъ сꙋббѡ́та да и҆менꙋ́етсѧ, мч҃нческїѧ бл҃года́ти и҆ си́лы бж҃е́ственныѧ и҆спо́лнена, сп҃се́нїѧ вели́кагѡ воспомина́нїе.
Цр҃ѧ̀ бг҃а чи́стыми бра́шны, ᲂу҆празднѝ чи́стый ца́рствїѧ беззако́ннагѡ сквернє́нїѧ, и҆ пресла́внымъ ѡ҆́бразомъ чꙋдодѣ́йства ст҃ꙋ́ю седми́цꙋ ѡ҆ст҃ѝ.
Бг҃оро́диченъ: Оу҆твержда́етъ твоѐ та́инство, ѻ҆трокови́це, мч҃нкѡвъ ᲂу҆се́рднаѧ сме́рть: и҆́бо, ꙗ҆́кѡ бг҃ꙋ вѣ́ровавше ро́ждшемꙋсѧ, а҆́ще и҆ стрⷭ҇ть во́лею претерпѣ̀, самѣ́хъ себѐ до́блїи въ же́ртвꙋ взнесо́ша.
И҆́ный.
І҆рмо́съ: И҆з̾ пла́мене преподѡ́бнымъ:
Ꙗ҆́кѡже и҆з̾ пла́мене и҆зба́вилсѧ є҆сѝ, мч҃нче ѳео́дѡре, бж҃е́ственною си́лою: си́це и҆ ны́нѣ на́съ сп҃слъ є҆сѝ са́мъ, предста́тельствомъ бж҃е́ственнымъ твои́мъ, ѿ беззако́ннагѡ совѣ́та ѕлоко́зненнагѡ.
Въ ве́черъ водвори́сѧ пла́чь рабѡ́мъ твои̑мъ ѿ лꙋка́вагѡ лови́тельства ѿстꙋ́пника на́шегѡ: но во ᲂу҆́трїе ра́дость возсїѧ̀, мч҃нче терпѣливомꙋ́дре, те́плою твое́ю по́мощїю.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
И҆зба́вителѧ тѧ̀ ѡ҆брѣ́тше, въ бѣды̑ мы̀ впа́дшїи, и҆ разори́телѧ ко́зни вра́жїѧ, мч҃нче хрⷭ҇то́въ страстоте́рпче ѳео́дѡре, тѧ̀ славосло́вимъ во всѧ̑ вѣ́ки.
Бг҃оро́диченъ: Недоꙋмѣва́етъ ᲂу҆́мъ человѣ́ческїй та́инство твоегѡ̀ ржⷭ҇тва̀, чтⷭ҇аѧ, и҆зрещѝ: и҆ сегѡ̀ ра́ди тѧ̀ вѣ́рою бл҃гоче́стнѡ ꙗ҆́кѡ бцⷣꙋ почита́емъ и҆ славосло́вимъ во всѧ̑ вѣ́ки.
Катава́сїа: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти: гдⷭ҇а по́йте, дѣла̀, и҆ превозноси́те во всѧ̑ вѣ́ки.
Пѣ́снь ѳ҃.
І҆рмо́съ: Ржⷭ҇тво̀ твоѐ нетлѣ́нно ꙗ҆ви́сѧ:
Стека́етсѧ мно́жество ѿвсю́дꙋ въ сѣ́нь мꙋ́ченическꙋю, и҆ въ то́й живꙋ́щꙋю бл҃года́ть сїѧ́ющагѡ во сла́вѣ па́че всѣ́хъ мч҃нкъ, со влⷣчцею всѣ́хъ, велича́емъ.
Мꙋжа́йсѧ, хрⷭ҇то́ва цр҃ковь, и҆ держа́вствꙋй над̾ всꙋ́е борю́щими: хрⷭ҇тѡ́вы бо дрꙋ́зи ѡ҆ тебѣ̀ пекꙋ́тсѧ и҆ предстоѧ́ще и҆ ѿстоѧ́ще, ꙗ҆́коже се́й до́блїй, є҆мꙋ́же соверша́еши бл҃года́рствєннаѧ.
Є҆го́же мнѧ́хꙋ дре́вле ᲂу҆ме́рша, вє́щи показꙋ́ютъ, ꙗ҆́кѡ живе́тъ и҆ по кончи́нѣ, и҆ ѡ҆ вѣ́рѣ па́ки предста́тельствꙋетъ съ ра́вною ре́вностїю: є҆́юже богатѧ́щїисѧ бл҃годѣ́телѧ велича́емъ.
Бг҃оро́диченъ: Ꙗ҆́кѡ бж҃е́ственнꙋю печа́ть тѧ̀ пѣ́снемъ налага́ю, и҆ сверша́ю похвалы̑ тебѣ̀ запеча́таннѣй бж҃їей кни́зѣ, дв҃о, си́це па́че прославлѧ́ѧ твоего̀ мч҃нка.
И҆́ный.
І҆рмо́съ: Бг҃а человѣ́кѡмъ невозмо́жно:
До́брѣ ꙗ҆ви́лсѧ є҆сѝ, пресла́вне, побо́рникъ и҆ крѣ́пкое застꙋпле́нїе на́мъ чтꙋ́щымъ ны́нѣ твою̀ честнꙋ́ю и҆ сла́внꙋю па́мѧть и҆ твои́хъ страда́льчествъ по́двиги, и҆ бы́вшее въ на́съ бж҃е́ственное застꙋпле́нїе.
Твоѐ чꙋ́до, всебл҃же́нне ѳео́дѡре, соверше́нное ст҃ы́ми тꙋ́чами, воспѣва́етсѧ на ве́сь мі́ръ, бл҃же́нне: тѣ́мже и҆ є҆желѣ́тнѡ собира́ющесѧ, сла́вꙋ возсыла́емъ хрⷭ҇тꙋ̀, тебѐ просла́вльшемꙋ.
Сла́ва: Зрѧ̀ любо́вь восхвалѧ́ющихъ тѧ̀, мч҃нче хрⷭ҇то́въ, бл҃года́ть возда́рствꙋй вѧ́щшꙋю: и҆ вѣ́рꙋ вѣ́дый, є҆ли́ка є҆́сть, пресла́вне, не преста́й, мч҃нче, ꙗ҆влѧ́ѧсѧ мл҃твенникъ теплѣ́йшїй и҆ хода́тай къ бг҃ꙋ на́шемꙋ.
Бг҃оро́диченъ: Воспѣва́ти, дв҃о, тѧ̀ не престае́мъ, помо́щницꙋ, покро́въ, ско́рое застꙋпле́нїе и҆ предста́тельницꙋ на́шꙋ непосты́днꙋю: соблюдѝ твоѧ̑ рабы̑ ѿ всѧ́кагѡ ѡ҆ѕлобле́нїѧ, ѿ всѧ́кїѧ ко́зни лꙋка́вагѡ свобожда́ющи при́снѡ.
Катава́сїа: Всѧ́къ земноро́дный да взыгра́етсѧ дꙋ́хомъ, просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ѧ сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чтⷭ҇аѧ приснодв҃о.
Є҆ѯапостїла́рїй.
Подо́бенъ: Со ᲂу҆ч҃нкѝ взы́демъ:
Вѣнцено́сче ст҃е, предстоѧ́ ны́нѣ со а҆́гг҃лы хрⷭ҇то́вꙋ прⷭ҇то́лꙋ, и҆ свѣ́та ѿтꙋ́дꙋ и҆сполнѧ́ѧсѧ,стрⷭ҇тоте́рпче, ми́ръ мі́рови непреста́ннѡ хода́тайствꙋй, и҆ на́мъ сп҃се́нїе, бл҃гоче́стнѡ свѣтоно́снꙋю па́мѧть твою̀ соверша́ющымъ, ѳео́дѡре всебл҃же́нне, мч҃нче преꙋкраше́нне.
Бг҃оро́диченъ: Мі́ръ погиба́ющїй ѿ тлѣ́нїѧ призва́ти восхотѣ́въ, гдⷭ҇ь во чре́вѣ твое́мъ, ꙗ҆́коже вѣ́сть, всели́сѧ, бцⷣе. сп҃се́нїе ᲂу҆́бо всѝ ѡ҆брѣ́тше, вопїе́мъ тебѣ̀ всесла́вное а҆́гг҃лово ра́дꙋйсѧ, во всѣ́хъ жена́хъ бл҃гослове́ннаѧ: и҆́бо ра́дость породи́ла є҆сѝ все́й вселе́ннѣй.
На хвали́техъ поста́вимъ стїхѝ д҃, гла́съ а҃.
Подо́бенъ: Нбⷭ҇ныхъ чинѡ́въ:
Мꙋ́жа и҆зрѧ́дна вы́шнѧгѡ во́инства, ꙗ҆́кѡ крѣ́пкаго вои́телѧ на́шегѡ бл҃гоче́стїѧ, вѣ́рнїи, согла́снѡ соше́дшесѧ, пѣ́сньми та́инственными восхва́лимъ, глаго́люще, досточꙋ́дне мч҃нче і҆и҃совъ, моли́сѧ ѡ҆ чтꙋ́щихъ тѧ̀.
Тезоимени́тымъ твои́мъ зва́нїемъ, да́ре бж҃їй вои́стиннꙋ, скорбѧ́щымъ всѣ̑мъ ᲂу҆тѣше́нїе да́нь є҆сѝ, ѳео́дѡре требл҃же́нне: всѧ́къ бо приближа́ѧйсѧ ко твоемꙋ̀ хра́мꙋ, съ весе́лїемъ прїе́млѧ воздаѧ̑нїѧ чꙋде́съ твои́хъ, почита́етъ хрⷭ҇та̀ вои́стиннꙋ.
Бл҃гоче́стїѧ бога́тство и҆ свѣ́тлость страда́льческими пѡ́двиги себѣ̀ сокро́виществовавъ, всю̀ крѣ́пость твою̀ да́ръ прїѧ́тный бг҃ꙋ прине́слъ є҆сѝ, и҆сполнѧ́ѧ въ по́двизѣхъ со тща́нїемъ бг҃ода́рственное твоѐ и҆менова́нїе.
Всесвѣ́тлымъ торжество́мъ бж҃е́ственнагѡ мч҃нка напита́имсѧ и҆ вѣ́рнѡ возвесели́мсѧ, всѝ празднолю́бцы, почита́юще свѣ́тлое празднество̀ є҆гѡ̀ сконча́нїѧ, пѣ́сненнѡ воспѣва́юще і҆и҃са,просла́вившаго па́мѧть є҆гѡ̀.
Сла́ва, гла́съ ѕ҃: Сщ҃е́нїѧ да́ръ и҆ бога́тство бж҃е́ственныѧ жи́зни показа́лсѧ є҆сѝ мі́рꙋ, ѳео́дѡре: хрⷭ҇то́съ бо, мꙋ́дрѣ, твою̀ па́мѧть просла́ви, въ ню́же согла́снѡ вѣ́рнїи ра́дꙋющесѧ, воспѣва́емъ по́двиги трꙋдѡ́въ твои́хъ.
И҆ ны́нѣ, бг҃оро́диченъ, гла́съ то́йже.
Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀. тебѣ̀ мо́лимсѧ: моли́сѧ, влⷣчце, со стрⷭ҇тоте́рпцемъ и҆ всѣ́ми ст҃ы́ми, поми́ловатисѧ дꙋша́мъ на́шымъ.
На стїхо́внѣ стїхи̑ры ст҃а́гѡ, гла́съ д҃. Самогла̑сны:
Ликꙋ́ютъ собо́ри мч҃нкѡвъ ра́достнѡ ны́нѣ во хра́мѣ твое́мъ, стрⷭ҇тоте́рпче ѳео́дѡре, и҆ а҆́гг҃льстїи чи́нове воспѣва́ютъ страда́льчєства терпѣ́нїѧ твоегѡ̀: и҆ са́мъ вѣнцеда́вецъ хрⷭ҇то́съ предстои́тъ, богатотвѡ́рнаѧ дарова̑нїѧ твои̑мъ пѣвцє́мъ десни́цею подаѧ̀, є҆го́же возжелѣ́въ и҆ска́лъ є҆сѝ, и҆ ѡ҆брѣ́тъ собесѣ́довалъ є҆сѝ, є҆го́же возжелѣ́лъ є҆сѝ. того̀ молѝ, сп҃стѝ и҆ просвѣти́ти дꙋ́шы на́шѧ.
Сті́хъ: Првⷣникъ ꙗ҆́кѡ фі́нїѯъ процвѣте́тъ:
Чи́стый и҆ всенепоро́чный по́стъ, прише́дый ны́нѣ къ на́мъ, мч҃нческихъ чꙋде́съ пра́здникъ совведѐ: посто́мъ бо ѿ дꙋшє́вныхъ сквє́рнъ ѡ҆чища́емсѧ, и҆ мч҃нческими зна́меньми и҆ страда́льчествы до́блественнѡ на стра̑сти мꙋ́жествꙋемъ. тѣ́мже и҆ сщ҃е́ннагѡ воздержа́нїѧ бл҃года́тїю просвѣща́ющесѧ, и҆ чꙋдодѣ́йствы ѳео́дѡра мч҃нка, въ вѣ́рѣ во хрⷭ҇та̀ ᲂу҆твержда́емсѧ, просѧ́ще є҆го̀ сп҃се́нїе пода́ти дꙋша́мъ на́шымъ.
Сті́хъ: Насажде́ни въ домꙋ̀ гдⷭ҇ни:
Мч҃нческимъ твои́мъ дерзнове́нїемъ къ бг҃ꙋ, ѳео́дѡре, ѿстꙋ́пничꙋ на вѣ́рꙋ хрⷭ҇то́вꙋ ко́знь тще́тнꙋ сотвори́лъ є҆сѝ, побо́рникъ бы́въ бл҃гоче́ствꙋющымъ лю́демъ предста́нїемъ ᲂу҆жа́снымъ ѿ бра́шенъ, же́́ртвами і҆́дѡльскими ѡ҆скверне́нныхъ, ты̑ѧ и҆зба́вль. тѣ́мже тѧ̀ и҆ ꙗ҆́кѡ і҆́дѡлѡвъ и҆стреби́телѧ, и҆ ꙗ҆́кѡ ста́да хрⷭ҇то́ва сп҃си́телѧ и҆ храни́телѧ, и҆ предста́телѧ на́шего бл҃гопослꙋшли́ваго чтꙋ́ще, въ пѣ́снехъ мо́лимъ, дарова́тисѧ тобо́ю ѡ҆чище́нїю и҆ просвѣще́нїю дꙋша́мъ на́шымъ.
Сла́ва, гла́съ и҃:
Страда́льческимъ мꙋ́жествомъ бл҃гоче́стнѡ воѡрꙋжи́всѧ, стрⷭ҇тоте́рпче хрⷭ҇то́въ, и҆ ѡ҆ слове́снѣмъ слꙋже́нїи та́инственнѡ побора́ѧ си́лою є҆гѡ̀, і҆́дѡлѡвъ нече́стїе и҆ мꙋчи́телей преще́нїе не́мощно показа́лъ є҆сѝ, презира́ѧ мꙋчє́нїѧ и҆ вре́менный ѻ҆́гнь. но, ѽ бж҃е́ственныхъ дарѡ́въ и҆ ве́щь и҆ и҆́мѧ! мл҃твою твое́ю сп҃са́й соверша́ющыѧ па́мѧть твою̀.
И҆ ны́нѣ, бг҃оро́диченъ: Влⷣчце, прїимѝ мл҃твы:
И҆ про́чее послѣ́дованїе ᲂу҆́трени. Совокꙋплѧ́емъ и҆ ча́съ а҃.
На лїтꙋргі́и и҆з̾ѡбрази́тєльнаѧ, и҆ ѿ канѡ́на ст҃а́гѡ пѣ́снь г҃ и҆ ѕ҃. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀: Сті́хъ: Оу҆слы́ши, бж҃е, гла́съ мо́й, внегда̀ моли́ти ми́ сѧ къ тебѣ̀. А҆пⷭ҇лъ днѐ, ко є҆вре́ємъ, зача́ло т҃г. Ст҃о́мꙋ а҆пⷭ҇лъ, къ тїмоѳе́ю, зача́ло сч҃в. А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ и҆́же въ лїва́нѣ ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ до́мꙋ бг҃а на́шегѡ процвѣтꙋ́тъ. Є҆ѵⷢ҇лїе ѿ ма́рка, зача́ло і҃. И҆ ст҃а́гѡ, ѿ і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю: На трапе́зѣ чте́мъ сло́во похва́льное ѡ҆ ст҃ѣ́мъ ѳео́дѡрѣ, ст҃а́гѡ григо́рїа нѵ́сскагѡ. И҆ ꙗ҆ди́мъ бо́бъ ѡ҆бваре́нный, съ ма́слинами бѣ́лыми и҆ че́рными. Причаща́емсѧ же и҆ варе́нїѧ съ ма́сломъ прилꙋчи́вшагѡсѧ, и҆ ко́лѷва: вїна́ же и҆спива́емъ по красово́лю, ра́ди ст҃а́гѡ. Сїе́ же прїѧ́хомъ ѿ ла́ѵры прпⷣбнагѡ ѻ҆тца̀ на́шегѡ са́ввы и҆ ѿ бг҃оно́снагѡ ѻ҆тца̀ на́шегѡ є҆ѵѳѵ́мїа.
Вѣ́дати подоба́етъ, ꙗ҆́кѡ прїѧ́хомъ два́жды ꙗ҆́сти ры̑бы въ се́й вели́кїй по́стъ, въ пра́здникъ бл҃говѣ́щенїѧ, и҆ цвѣтоно́сїѧ.