[глⷡ҇а к҃а] Послѣ́дованїе ма́лагѡ ѡ҆сщ҃е́нїѧ воды̀.
Поставлѧ́етсѧ столе́цъ посредѣ̀ цр҃кве, па́волокою покрове́нный, на ѻ҆бы́чномъ мѣ́стѣ, и҆ вода̀ въ сосꙋ́дѣ: сщ҃е́нникъ же взе́мъ є҆пїтрахи́ль и҆ фелѡ́нь на сѧ̀, держѧ̀ въ рꙋцѣ̀ чⷭ҇тны́й крⷭ҇тъ съ васїлкѝ, пред̾идꙋ́щꙋ є҆мꙋ̀ дїа́конꙋ съ кади́льницею, и҆ двѣма̀ свѣщено́сцема со свѣща́ми. Прише́дъ же пред̾ столе́цъ, полага́етъ на не́мъ крⷭ҇тъ, и҆ взе́мъ кади́льницꙋ, кади́тъ во́дꙋ крⷭ҇тоѡбра́знѡ, и҆ начина́етъ ѻ҆бы́чнѡ. Бл҃гослови́вшꙋ сщ҃е́нникꙋ, начина́емъ.
Ѱало́мъ рм҃в:
Гдⷭ҇и, ᲂу҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й. И҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. Ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. И҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. Помѧнꙋ́хъ дни̑ дрє́внїѧ: поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. Воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. Ско́рѡ ᲂу҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ. Слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ: скажѝ мнѣ̀ гдⷭ҇и, пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. И҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ. Наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вꙋ. И҆́мене твоегѡ̀ ра́ди, гдⷭ҇и, живи́ши мѧ̀: пра́вдою твое́ю и҆зведе́ши ѿ печа́ли дꙋ́шꙋ мою̀. И҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й, ꙗ҆́кѡ а҆́зъ ра́бъ тво́й є҆́смь.
Та́же, Бг҃ъ гдⷭ҇ь, и҆ ꙗ҆ви́сѧ на́мъ: три́жды, во гла́съ д҃.
И҆ настоѧ́щыѧ тропарѝ, гла́съ д҃:
Къ бцⷣѣ прилѣ́жнѡ ны́нѣ притеце́мъ грѣ́шнїи и҆ смире́ннїи и҆ припаде́мъ, въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце, помозѝ на ны̀ млⷭ҇рдовавши: потщи́сѧ, погиба́емъ ѿ мно́жества прегрѣше́нїй, не ѿвратѝ твоѧ̑ рабы̑ тщы̀: тѧ́ бо и҆ є҆ди́нꙋ наде́ждꙋ и҆́мамы. [Два́жды.]
Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи: а҆́ще бо ты̀ не бы̀ предстоѧ́ла молѧ́щи, кто̀ бы на́съ и҆зба́вилъ ѿ толи́кихъ бѣ́дъ; кто́же бы сохрани́лъ до ны́нѣ свобо́дны; не ѿстꙋ́пимъ влⷣчце ѿ тебѐ: твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.
Та́же, ѱало́мъ н҃: Поми́лꙋй мѧ̀ бж҃е:
Та́же, пое́мъ тропарѝ сїѧ̑, гла́съ ѕ҃:
Є҆́же ра́дꙋйсѧ а҆́гг҃ломъ прїи́мшаѧ, и҆ ро́ждшаѧ зижди́телѧ твоего̀, дв҃о, сп҃са́й тѧ̀ велича́ющыѧ.
Глаго́ли пе́рвый тропа́рь два́жды.
Воспѣва́емъ сн҃а твоего̀ бцⷣе, и҆ вопїе́мъ: пречⷭ҇таѧ влⷣчце, всѧ́кїѧ бѣды̀ и҆зба́ви рабы̑ твоѧ̑.
Царє́мъ, прⷪ҇ро́кѡмъ и҆ а҆пⷭ҇лѡмъ, и҆ мч҃нкѡмъ ты̀ є҆сѝ похвала̀, и҆ предста́тельница мі́рꙋ, всенепоро́чнаѧ.
Ꙗ҆зы́къ всѧ́къ правосла́вныхъ похвалѧ́етъ, и҆ бл҃жи́тъ, и҆ сла́витъ пречⷭ҇тое ржⷭ҇тво̀ твоѐ, мр҃і́е бг҃оневѣ́стнаѧ.
Да́ждь хрⷭ҇тѐ мо́й, и҆ мнѣ̀ недосто́йномꙋ долгѡ́въ ѡ҆ставле́нїе, молю́сѧ тѧ̀ ро́ждшїѧ мл҃твами, ꙗ҆́кѡ бл҃гоꙋтро́бенъ.
На тѧ̀ моѧ̑ ᲂу҆пова̑нїѧ возложи́хъ бцⷣе, сп҃си́ мѧ мл҃твами твои́ми, да́рꙋй мѝ прегрѣше́нїй ѡ҆ставле́нїе.
Ѡ҆живи́ мѧ, ро́ждшаѧ жизнода́вца и҆ сп҃са, сп҃сѝ мл҃твами твои́ми: бл҃гослове́ннаѧ наде́ждо дꙋ́шъ на́шихъ.
Зижди́телѧ всѣ́хъ во ᲂу҆тро́бѣ твое́й заче́ншаѧ дв҃о всенепоро́чнаѧ, мл҃твами твои́ми сп҃сѝ дꙋ́шы на́шѧ.
Бцⷣе ро́ждшаѧ сло́вомъ па́че сло́ва, сло́во всепѣ́таѧ, того̀ молѝ сп҃стѝ дꙋ́шы на́шѧ.
Млⷭ҇тива мнѣ̀ сꙋдїю́ же и҆ сн҃а твоего̀ прегрѣши́вшемꙋ па́че всѧ́кагѡ человѣ́ка, твои́ми мл҃твами содѣ́лай влⷣчце.
По до́лгꙋ вопїе́мъ тѝ: ра́дꙋйсѧ бцⷣе чⷭ҇таѧ приснодв҃о, молѧ́щесѧ мл҃твами твои́ми сп҃сти́сѧ.
И҆зба́ви мѧ̀ ѻ҆гнѧ̀ вѣ́чнагѡ, и҆ мꙋ́къ предлежа́щихъ мнѣ̀ бг҃ороди́тельнице, ꙗ҆́кѡ да ᲂу҆блажа́ю тѧ̀.
Не пре́зри молє́нїѧ твои́хъ рабѡ́въ, мо́лимсѧ влⷣчце всепѣ́таѧ, ꙗ҆́кѡ да и҆зба́вимсѧ всѧ́кагѡ ѡ҆бстоѧ́нїѧ.
Недꙋ́гѡвъ, и҆ всѧ́кихъ болѣ́зней, и҆ бѣ́дъ на́съ свободѝ, къ сщ҃е́нномꙋ твоемꙋ̀ покро́вꙋ прибѣга́ющихъ.
Стра́нное чꙋ́до, є҆́же въ тебѣ̀ бг҃ороди́тельнице: на́съ бо ра́ди по на́мъ роди́сѧ всѣ́хъ зижди́тель и҆з̾ тебѐ, и҆ бг҃ъ на́шъ.
Хра́мъ тво́й бцⷣе показа́сѧ врачевство̀ недꙋ́гѡвъ безме́здное, и҆ ѡ҆скорблѧ́емыхъ дꙋ́шъ ᲂу҆тѣше́нїе.
Прест҃а́ѧ бцⷣе, ро́ждшаѧ сп҃са, ѿ бѣ́дъ сп҃сѝ, и҆ всѧ́кїѧ и҆ны́ѧ нꙋ́жды рабы̑ твоѧ̑.
И҆зба́ви ѿ всѧ́кагѡ преще́нїѧ находѧ́щагѡ рабы̑ твоѧ̑ прест҃а́ѧ влⷣчце, и҆ всѧ́кагѡ вре́да дꙋше́внагѡ же и҆ тѣле́снагѡ.
Сп҃сѝ всѣ́хъ мл҃твами твои́ми, дв҃о бцⷣе, къ тебѣ̀ притека́ющихъ, и҆ и҆зба́ви всѧ́кїѧ нꙋ́жды и҆ ско́рби.
Кто̀ притека́ѧй въ хра́мъ тво́й бцⷣе, не прїе́млетъ ско́рѡ и҆сцѣле́нїѧ, дꙋше́внагѡ вкꙋ́пѣ и҆ тѣле́снагѡ, пречⷭ҇таѧ;
Ѿ всѣ́хъ ᲂу҆молѧ́емь ще́дре, ст҃ы́хъ и҆ го́рнихъ чинѡ́въ, ѡ҆чи́сти мѧ̀ ро́ждшею тѧ̀.
Пощадѝ сп҃се, дꙋ́шы ᲂу҆ме́ршихъ бра́тїй на́шихъ, въ наде́жди жи́зни: и҆ ѡ҆сла́би, ѡ҆ста́ви и҆̀мъ согрѣшє́нїѧ.
Ра́дꙋйсѧ мі́ра ѡ҆чисти́лище дв҃о, ра́дꙋйсѧ рꙋ́чко и҆ свѣ́щниче всезлаты́й, бж҃е́ственныѧ ма́нны и҆ свѣ́та, бг҃оневѣ́сто.
Пое́мъ тѧ̀ бг҃а є҆ди́наго въ трⷪ҇цѣ, вопїю́ще гла́съ трист҃ы́й, молѧ́щесѧ сп҃се́нїе полꙋчи́ти.
Сла́ва: Ѽ дв҃о, ро́ждшаѧ сп҃са и҆ влⷣкꙋ мі́ра и҆ гдⷭ҇а, того̀ молѝ сп҃стѝ дꙋ́шы на́шѧ.
И҆ ны́нѣ: Ра́дꙋйсѧ горо̀, ра́дꙋйсѧ кꙋпино̀, ра́дꙋйсѧ врата̀, ра́дꙋйсѧ лѣ́ствице, ра́дꙋйсѧ бж҃е́ственнаѧ трапе́зо, ра́дꙋйсѧ всѣ́хъ по́моще влⷣчце.
Мл҃твами, млⷭ҇тиве, мт҃ре твоеѧ̀ пречⷭ҇тыѧ, и҆ всѣ́хъ ст҃ы́хъ твои́хъ, твоѧ̑ млⷭ҇ти лю́демъ твои̑мъ да́рꙋй.
Мл҃твами сла́вныхъ а҆рха̑гг҃лъ, и҆ а҆́гг҃лъ, и҆ го́рнихъ чинѡ́въ, рабы̑ твоѧ̑ сп҃се до́брѣ сохранѝ.
Мл҃твами чⷭ҇тна́гѡ и҆ сла́внагѡ крⷭ҇ти́телѧ твоегѡ̀, прⷪ҇ро́ка, предте́чи, хрⷭ҇тѐ сп҃се мо́й, рабы̑ твоѧ̑ сохранѝ.
Мл҃твами сла́вныхъ а҆пⷭ҇лѡвъ и҆ мꙋ́ченикѡвъ, и҆ всѣ́хъ ст҃ы́хъ твои́хъ, твоѧ̑ млⷭ҇ти лю́демъ твои̑мъ да́рꙋй.
Мл҃твами сла́вныхъ безсре́брєнникъ, бцⷣе рабы̑ твоѧ̑ сохранѝ, ꙗ҆́кѡ предста́тельство мі́ра и҆ ᲂу҆твержде́нїе.
Сла́ва: Ѻ҆ц҃а̀ и҆ сн҃а славосло́вимъ, и҆ дх҃а ст҃а́го, глаго́люще: трⷪ҇це ст҃а́ѧ, сп҃сѝ дꙋ́шы на́шѧ.
И҆ ны́нѣ: Неизрече́ннѡ въ послѣ̑днѧѧ заче́ншаѧ, и҆ ро́ждшаѧ созда́телѧ твоего̀, дв҃о, сп҃са́й тѧ̀ велича́ющыѧ.
Та́же: Млⷭ҇рдїѧ двє́ри ѿве́рзи на́мъ бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нїе ро́да хрⷭ҇тїа́нскагѡ.
Та́же, Гдⷭ҇ꙋ помо́лимсѧ.
Сщ҃е́нникъ: Ꙗ҆́кѡ ст҃ъ є҆сѝ бж҃е на́шъ:
Ли́къ: а҆ми́нь.
Та́же, настоѧ́щыѧ тропарѝ, гла́съ ѕ҃:
Ны́нѣ наста̀ вре́мѧ всѣ́хъ ѡ҆сщ҃а́ющее, и҆ првⷣный на́съ жде́тъ сꙋдїѧ̀, но ѡ҆брати́сѧ дꙋшѐ къ покаѧ́нїю, ꙗ҆́кѡ блꙋдни́ца зовꙋ́щи со слеза́ми: гдⷭ҇и, поми́лꙋй мѧ̀.
Вода́ми ѡ҆дожди́вый хрⷭ҇тѐ и҆сто́чникъ и҆сцѣле́нїй, во всечⷭ҇тнѣ́мъ хра́мѣ дв҃ы дне́сь, твоегѡ̀ бл҃гослове́нїѧ ѡ҆кропле́нїемъ, ѿгонѧ́еши недꙋ́ги немощствꙋ́ющихъ, врачꙋ̀ дꙋ́шъ и҆ тѣле́съ на́шихъ.
Дв҃а родила̀ є҆сѝ неискꙋсобра́чнаѧ и҆ дв҃о пребыла̀ є҆сѝ мт҃и безневѣ́стнаѧ, бцⷣе мр҃і́е, хрⷭ҇та̀ бг҃а на́шего молѝ сп҃сти́сѧ на́мъ.
Прест҃а́ѧ бцⷣе дв҃о, рꙋ́къ на́шихъ дѣла̀ и҆спра́ви, и҆ проще́нїе прегрѣше́нїй на́шихъ и҆спросѝ, внегда̀ пѣ́ти на́мъ а҆́гг҃льское пѣ́нїе:
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
Ѿпѣ́вше же по ѻ҆бы́чаю, и҆ по трист҃о́мъ дїа́конъ глаго́летъ: Во́нмемъ.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Чте́цъ, прокі́менъ, гла́съ г҃:
Гдⷭ҇ь просвѣще́нїе моѐ, и҆ сп҃си́тель мо́й, когѡ̀ ᲂу҆бою́сѧ;
Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ;
А҆по́столъ къ є҆вре́ѡмъ, зача́ло т҃ѕ.
Бра́тїе, ст҃ѧ́й и҆ ѡ҆свѧща́емїи, ѿ є҆ди́нагѡ всѝ: є҆ѧ́же ра́ди вины̀ не стыди́тсѧ бра́тїю нарица́ти и҆̀хъ, глаго́лѧ: Возвѣщꙋ̀ и҆́мѧ твоѐ бра́тїи мое́й, посредѣ̀ цр҃кве воспою̀ тѧ̀. И҆ па́ки: а҆́зъ бꙋ́дꙋ надѣ́ѧсѧ на́нь. и҆ па́ки: сѐ а҆́зъ и҆ дѣ́ти, ꙗ҆̀же мѝ да́лъ є҆́сть бг҃ъ. Поне́же ᲂу҆́бѡ дѣ́ти прїѡбщи́шасѧ пло́ти и҆ кро́ви, и҆ то́й прїи́скреннѣ прїѡбщи́сѧ тѣ́хже, да сме́ртїю ᲂу҆праздни́тъ и҆мꙋ́щаго держа́вꙋ сме́рти, си́рѣчь дїа́вола: И҆ и҆зба́витъ си́хъ є҆ли́цы стра́хомъ сме́рти чрез̾ всѐ житїѐ пови́нни бѣ́ша рабо́тѣ. Не ѿ а҆́гг҃лъ ᲂу҆́бѡ когда̀ прїе́млетъ, но ѿ сѣ́мене а҆враа́мова прїе́млетъ. Ѿню́дꙋже до́лженъ бѣ̀ по всемꙋ̀ подо́битисѧ бра́тїи, да млⷭ҇тивъ бꙋ́детъ и҆ вѣ́ренъ первосщ҃е́нникъ, ꙗ҆̀же къ бг҃ꙋ, во є҆́же ѡ҆чи́стити грѣхѝ людскі̑ѧ. Въ не́мже бо пострада̀ са́мъ, и҆скꙋше́нъ бы́въ, мо́жетъ и҆ и҆скꙋша́ємымъ помощѝ.
Сщ҃е́нникъ: Ми́ръ тѝ.
А҆ллилꙋ́їа. Гла́съ ѕ҃.
Сті́хъ а҃: Ѿры́гнꙋ се́рдце моѐ сло́во бла́го.
Сті́хъ в҃: Глаго́лю а҆́зъ дѣла̀ моѧ̑ цр҃е́ви.
Є҆ѵⷢ҇лїе ѿ і҆ѡа́нна, зача́ло д҃і:
Во вре́мѧ ѻ҆́но, взы́де і҆и҃съ во і҆ерⷭ҇ли́мъ. Є҆́сть же во і҆ерⷭ҇ли́мѣхъ на ѻ҆́вчей кꙋпѣ́ли, ꙗ҆́же глаго́летсѧ є҆вре́йски виѳесда̀, пѧ́ть притвѡ́ръ и҆мꙋ́щи. Въ тѣ́хъ слежа́ше мно́жество болѧ́щихъ, слѣпы́хъ, хромы́хъ, сꙋхи́хъ, ча́ющихъ движе́нїѧ воды̀. А҆́гг҃лъ бо гдⷭ҇ень на всѧ́ко лѣ́то схожда́ше въ кꙋпѣ́ль, и҆ возмꙋща́ше во́дꙋ: и҆ и҆́же пе́рвѣе вла́зѧше по возмꙋще́нїи воды̀, здра́въ быва́ше, ꙗ҆цѣ́мже недꙋ́гомъ ѡ҆держи́мь быва́ше.
Та́же, дїа́конъ є҆ктенїю̀:
Ми́ромъ гдⷭ҇ꙋ помо́лимсѧ.
Ѡ҆ свы́шнѣмъ ми́рѣ:
Ѡ҆ ми́рѣ всегѡ̀ мі́ра:
Ѡ҆ ст҃ѣ́мъ хра́мѣ се́мъ:
Ѡ҆ ст҃ѣ́йшемъ, прави́тельствꙋющемъ сѷно́дѣ:
Ѡ҆ бл҃гочести́вѣйшемъ:
Ѡ҆ пособи́ти и҆ покори́ти под̾ но́зѣ и҆́хъ:
Ѡ҆ гра́дѣ се́мъ: [а҆́ще въ монастырѣ̀,]
Ѡ҆ ст҃ѣ́й ѻ҆би́тели се́й:
Ѡ҆ бл҃горастворе́нїи воздꙋ́хѡвъ:
Ѡ҆ пла́вающихъ, пꙋтеше́ствꙋющихъ:
Ѡ҆ є҆́же ѡ҆свѧти́тисѧ вода́мъ си̑мъ, си́лою и҆ дѣ́йствїемъ, и҆ наи́тїемъ ст҃а́гѡ дх҃а:
Ѡ҆ є҆́же снизходи́ти на во́ды сїѧ̑ ѡ҆чисти́тельномꙋ пресꙋ́щныѧ трⷪ҇цы дѣ́йствꙋ:
Ѡ҆ є҆́же бы́ти водѣ̀ се́й цѣли́тельной дꙋ́шъ и҆ тѣле́съ, и҆ всѧ́кїѧ сопроти́вныѧ си́лы ѿгна́тельнѣй:
Ѡ҆ є҆́же низпосла́ти гдⷭ҇ꙋ бг҃ꙋ бл҃гослове́нїе і҆ѻрда́ново, и҆ ѡ҆свѧти́ти во́ды сїѧ̑:
Ѡ҆ всѣ́хъ тре́бꙋющихъ ѿ бг҃а по́мощи и҆ застꙋпле́нїѧ:
Ѡ҆ є҆́же просвѣти́тисѧ на́мъ просвѣще́нїемъ ра́зꙋма, є҆диносꙋ́щною трⷪ҇цею:
Ꙗ҆́кѡ да гдⷭ҇ь бг҃ъ на́шъ пока́жетъ ны̀ сы́ны, и҆ наслѣ́дники црⷭ҇твїѧ своегѡ̀, воды̀ сеѧ̀ причаще́нїемъ же и҆ кропле́нїемъ:
Ѡ҆ и҆зба́витисѧ на́мъ ѿ всѧ́кїѧ ско́рби:
Застꙋпѝ, сп҃сѝ, поми́лꙋй:
Прест҃ꙋ́ю, пречⷭ҇тꙋю:
Ли́къ: Тебѣ̀ гдⷭ҇и.
Возгла́съ: Ꙗ҆́кѡ подоба́етъ тебѣ̀ всѧ́каѧ сла́ва:
Та́же мл҃твꙋ сїю̀:
Гдⷭ҇и бж҃е на́шъ, вели́кїй въ совѣ́тѣ, и҆ ди́вный въ дѣ́лѣхъ, всеѧ̀ тва́ри содѣ́телю, хранѧ́й завѣ́тъ тво́й, и҆ млⷭ҇ть твою̀ лю́бѧщымъ тѧ̀, и҆ соблюда́ющымъ повелѣ̑нїѧ твоѧ̑, всѣ́хъ въ нꙋ́ждахъ ᲂу҆милє́нныѧ прїе́млѧй сле́зы, сегѡ́ бо ра́ди прише́лъ є҆сѝ въ ра́бїи зра́цѣ. не привидѣ́нїи на́съ ᲂу҆страша́ѧ, но здра́вїе тѣ́лꙋ и҆́стинное подава́ѧй, и҆ глаго́лѧй: сѐ здра́въ бы́лъ є҆сѝ, ктомꙋ̀ не согрѣша́й. но и҆ ѿ бре́нїѧ здра́вы ѻ҆́чи содѣ́лалъ є҆сѝ, и҆ ᲂу҆мы́тисѧ повелѣ́въ, свѣ́тꙋ всели́тисѧ сотвори́лъ є҆сѝ сло́вомъ, сопроти́вныхъ страсте́й во́лны смꙋща́ѧй, и҆ житїѧ̀ сегѡ̀ сла́ное мо́ре и҆зсꙋша́ѧй. и҆ тѧжелонѡ́сныѧ сласте́й ᲂу҆кроща́ѧй во́лны: са́мъ чл҃вѣколю́бче цр҃ю̀, да́вый на́мъ снѣгосвѣ́тлою ѡ҆дѣ́ѧтисѧ ѻ҆де́ждею, ѿ воды́ же и҆ дх҃а, и҆ прича́стїемъ же воды̀ сеѧ̀ и҆ ѡ҆кропле́нїемъ твоѐ бл҃гослове́нїе на́мъ низпослѝ, скве́рнꙋ страсте́й ѡ҆мыва́ющее. є҆́й, мо́лимсѧ посѣтѝ на́шꙋ бл҃же не́мощь, и҆ и҆сцѣлѝ на́шѧ недꙋ́ги дꙋшє́вныѧ же и҆ тѣлє́сныѧ, млⷭ҇тїю твое́ю: мл҃твами всепречⷭ҇тыѧ, пребл҃гослове́нныѧ влⷣчцы на́шеѧ бцⷣы и҆ приснодв҃ы мр҃і́и. си́лою чⷭ҇тна́гѡ и҆ животворѧ́щагѡ крⷭ҇та̀. предста́тельствы чⷭ҇тны́хъ нбⷭ҇ныхъ си́лъ безпло́тныхъ. чⷭ҇тна́гѡ, сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна. ст҃ы́хъ сла́вныхъ и҆ всехва́льныхъ а҆пⷭ҇лъ. преподо́бныхъ и҆ бг҃оно́сныхъ ѻ҆тє́цъ на́шихъ. и҆̀же во ст҃ы́хъ ѻ҆тє́цъ на́шихъ, вели́кихъ і҆ера́рхѡвъ, и҆ вселе́нскихъ ᲂу҆чи́телей: васі́лїа вели́кагѡ, григо́рїа бг҃осло́ва и҆ і҆ѡа́нна златоꙋ́стагѡ. и҆̀же во ст҃ы́хъ ѻ҆тє́цъ на́шихъ, а҆ѳана́сїа и҆ кѷрі́лла, патрїа́рхѡвъ а҆леѯандрі́йскихъ. и҆́же во ст҃ы́хъ ѻ҆тца̀ на́шегѡ спѷрїдѡ́на, трїмѷѳꙋ́нтскагѡ чꙋдотво́рца. и҆́же во ст҃ы́хъ ѻ҆тца̀ на́шегѡ нїкола́а а҆рхїепі́скопа, мѷрлѷкі́йскагѡ чꙋдотво́рца. и҆̀же во ст҃ы́хъ ѻ҆тє́цъ на́шихъ, меѳо́дїа и҆ кѷрі́лла ᲂу҆чи́телей слове́нскихъ. ст҃а́гѡ равноапⷭ҇льнагѡ вели́кагѡ кн҃зѧ влади́мїра. и҆̀же во ст҃ы́хъ ѻ҆тє́цъ на́шихъ всеѧ̀ рѡссі́и чꙋдотво́рцѡвъ, петра̀, а҆леѯі́а, і҆ѡ́ны и҆ фїлі́ппа. ст҃а́гѡ и҆ сла́внагѡ великомч҃нка геѡ́ргїа побѣдоно́сца. ст҃а́гѡ и҆ сла́внагѡ великомч҃нка дими́трїа мѷроточи́вагѡ. ст҃ы́хъ и҆ добропобѣ́дныхъ мꙋ́чєникъ. ст҃ы́хъ и҆ пра́ведныхъ бг҃оѻтє́цъ і҆ѡакі́ма и҆ а҆́нны. ст҃ы́хъ сла́вныхъ и҆ чꙋдотво́рцѡвъ безсре́бреникѡвъ, космы̀ и҆ дамїа́на, кѵ́ра и҆ і҆ѡа́нна, пантелеи́мона и҆ є҆рмола́а, самѱѡ́на и҆ дїоми́да, мѡкі́а и҆ а҆нїки́ты, ѳалале́а и҆ трѵ́ѳѡна. и҆ ст҃а́гѡ, (и҆́мⷬ҇къ), є҆гѡ́же и҆ па́мѧть соверша́емъ, и҆ всѣ́хъ ст҃ы́хъ твои́хъ.
И҆ сохранѝ гдⷭ҇и раба̀ твоего̀, бл҃гочести́вѣйшаго, самодержа́внѣйшаго вели́каго гдⷭ҇рѧ на́шего, і҆мпера́тора нїкола́ѧ а҆леѯа́ндровича всеѧ̀ рѡссі́и: три́жды.
И҆ сꙋпрꙋ́гꙋ є҆гѡ̀, бл҃гочести́вѣйшꙋю гдⷭ҇рню, і҆мператрі́цꙋ а҆леѯа́ндрꙋ ѳео́дѡровнꙋ:
И҆ ма́терь є҆гѡ̀ бл҃гочести́вѣйшꙋю гдⷭ҇рню і҆мператрі́цꙋ марі́ю ѳео́дѡровнꙋ:
Наслѣ́дника є҆гѡ̀, бл҃говѣ́рнаго гдⷭ҇рѧ, цесаре́вича и҆ вели́каго кн҃зѧ а҆леѯі́ѧ нїкола́евича, и҆ ве́сь ца́рствꙋющїй до́мъ.
Сп҃сѝ гдⷭ҇и, и҆ поми́лꙋй ст҃ѣ́йшїй прави́тельствꙋющїй сѷно́дъ, да́рꙋй и҆̀мъ дꙋше́вное и҆ тѣле́сное здра́вїе, и҆ рабо́тномꙋ тебѣ̀ семꙋ̀ хрⷭ҇тїа́нскомꙋ жи́тельствꙋ во все́мъ млⷭ҇тивъ бꙋ́ди. Помѧнѝ гдⷭ҇и всѧ́кое є҆пі́скопство правосла́вныхъ, пра́вѡ пра́вѧщихъ сло́во твоеѧ̀ и҆́стины, и҆ ве́сь сщ҃е́нническїй, и҆ мона́шескїй чи́нъ, и҆ сп҃се́нїе и҆́хъ. Помѧнѝ гдⷭ҇и, ненави́дѧщихъ и҆ лю́бѧщихъ на́съ, слꙋжа́щихъ бра́тїй на́шихъ, предстоѧ́щихъ, и҆ бл҃госло́вною вино́ю ѿше́дшихъ, и҆ заповѣ́давшихъ на́мъ недостѡ́йнымъ моли́тисѧ ѡ҆ ни́хъ. Помѧнѝ гдⷭ҇и, въ плѣне́нїи и҆ ско́рбехъ сꙋ́щихъ бра́тїй на́шихъ, и҆ поми́лꙋй и҆̀хъ по вели́цѣй млⷭ҇ти твое́й, всѧ́кїѧ нꙋ́жды и҆збавлѧ́ѧй: ꙗ҆́кѡ ты̀ є҆сѝ и҆сто́чникъ и҆сцѣле́нїй, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
Сщ҃е́нникъ же мл҃твꙋ та́йнѡ:
Приклонѝ гдⷭ҇и ᲂу҆́хо твоѐ, и҆ ᲂу҆слы́ши ны̀, и҆́же во і҆ѻрда́нѣ крести́тисѧ и҆зво́ливый, и҆ ѡ҆свѧти́вый во́ды: и҆ бл҃гословѝ всѣ́хъ на́съ, и҆̀же преклоне́нїемъ своеѧ̀ вы́и, назна́менающихъ рабо́тное воѡбраже́нїе: и҆ сподо́би на́съ и҆спо́лнитисѧ ѡ҆свѧще́нїѧ твоегѡ̀, воды̀ сеѧ̀ причаще́нїемъ: и҆ да бꙋ́детъ на́мъ гдⷭ҇и, во здра́вїе дꙋшѝ и҆ тѣ́ла.
Возгла́съ: Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ и҆ бл҃годаре́нїе и҆ поклоне́нїе возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ, бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
Та́же взе́мъ чⷭ҇тны́й крⷭ҇тъ, бл҃гословлѧ́етъ во́ды три́жды, крⷭ҇тоѡбра́знѡ низводѧ̀ и҆ возводѧ̀ и҆ пра́вѡ, и҆ поѧ̀ настоѧ́щїй тропа́рь, гла́съ а҃, три́жды:
Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ, побѣ̑ды бл҃говѣ́рномꙋ і҆мпера́торꙋ на́шемꙋ, нїкола́ю а҆леѯа́ндровичꙋ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.
И҆ посе́мъ пою́тъ тропа́рь се́й, гла́съ в҃:
Твои́хъ дарѡ́въ досто́йны на́съ сотворѝ бцⷣе дв҃о, презира́ющи согрѣшє́нїѧ на̑ша, и҆ подаю́щи и҆сцѣлє́нїѧ вѣ́рою прїе́млющымъ бл҃гослове́нїе твоѐ пречⷭ҇таѧ.
Та́же лобза́етъ і҆ере́й чⷭ҇тны́й крⷭ҇тъ, та́кожде и҆ всѝ лю́дїе, и҆ кропи́тъ всѣ́хъ сщ҃е́нною водо́ю, ѻ҆лта́рь и҆ цр҃ковь всю̀. Лю́дїе же пою́тъ настоѧ́щїй тропа́рь, гла́съ д҃:
И҆сто́чникъ и҆сцѣле́нїй, и҆мꙋ́ще ст҃і́и безсре́брєницы, и҆сцѣлє́нїѧ подава́ете всѣ̑мъ тре́бꙋющымъ, ꙗ҆́кѡ преве́лїихъ дарова́нїй сподо́бльшїисѧ ѿ приснотекꙋ́щагѡ и҆сто́чника сп҃са на́шегѡ. глаго́летъ бо къ ва́мъ гдⷭ҇ь, ꙗ҆́кѡ є҆диноревни́телємъ а҆пⷭ҇льскимъ: сѐ да́хъ ва́мъ вла́сть на дꙋ́хи нечи̑стыѧ, ꙗ҆́коже тѣ́хъ и҆згони́ти, и҆ цѣли́ти всѧ́кїй недꙋ́гъ, и҆ всѧ́кꙋю ꙗ҆́зю: тѣ́мже въ повелѣ́нїихъ є҆гѡ̀ до́брѣ жи́тельствовавше, тꙋ́не прїѧ́сте, тꙋ́не подава́ете, и҆сцѣлѧ́юще стра̑сти дꙋ́шъ и҆ тѣле́съ на́шихъ.
При́зри на молє́нїѧ твои́хъ ра̑бъ всенепоро́чнаѧ, ᲂу҆толѧ́ющи лю̑таѧ на ны̀ воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ тве́рдое и҆ и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не постыди́мсѧ влⷣчце, тѧ̀ призыва́ющїи, потщи́сѧ на ᲂу҆моле́нїе, тебѣ̀ вѣ́рнѡ вопїю́щихъ: ра́дꙋйсѧ влⷣчце, всѣ́хъ по́моще, ра́досте и҆ покро́ве, и҆ сп҃се́нїе дꙋ́шъ на́шихъ.
Влⷣчце, прїимѝ мл҃твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
По кропле́нїи же є҆ктенїа̀:
Поми́лꙋй на́съ бж҃е:
Є҆щѐ мо́лимсѧ, ѡ҆ є҆́же сохрани́тисѧ ст҃ѣ́й ѻ҆би́тели се́й, и҆ всѧ́комꙋ гра́дꙋ и҆ странѣ̀ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ, и҆ междоꙋсо́бныѧ бра́ни: ѡ҆ є҆́же млⷭ҇тивꙋ и҆ бл҃гоꙋвѣ́тливꙋ бы́ти бл҃го́мꙋ и҆ чл҃вѣколюби́вомꙋ бг҃ꙋ на́шемꙋ, ѿврати́ти всѧ́кїй гнѣ́въ на ны̀ дви́жимый, и҆ и҆зба́вити ны̀ ѿ належа́щагѡ и҆ првⷣнагѡ своегѡ̀ преще́нїѧ, и҆ поми́ловати ны̀.
Гдⷭ҇и поми́лꙋй, м҃.
Сщ҃е́нникъ же возглаша́етъ:
Оу҆слы́ши ны̀ бж҃е сп҃си́телю на́шъ, ᲂу҆пова́нїе всѣ́хъ концє́въ землѝ: И҆ про́чее.
Ли́къ: а҆ми́нь.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ на́шѧ гдⷭ҇еви прикло́нимъ:
Ли́къ: Тебѣ̀ гдⷭ҇и.
Сщ҃е́нникъ мл҃твꙋ сїю̀ велегла́снѡ:
Влⷣко многомлⷭ҇тиве гдⷭ҇и і҆и҃се хрⷭ҇тѐ бж҃е на́шъ, мл҃твами всепречⷭ҇тыѧ влⷣчцы на́шеѧ бцⷣы и҆ приснодв҃ы мр҃і́и: си́лою чⷭ҇тна́гѡ и҆ животворѧ́щагѡ крⷭ҇та̀: предста́тельствы чⷭ҇тны́хъ нбⷭ҇ныхъ си́лъ безпло́тныхъ: чⷭ҇тна́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лъ: ст҃ы́хъ сла́вныхъ и҆ добропобѣ́дныхъ мч҃нкъ: прпⷣбныхъ и҆ бг҃оно́сныхъ ѻ҆тє́цъ на́шихъ: и҆̀же во ст҃ы́хъ ѻ҆тє́цъ на́шихъ, и҆ вселе́нскихъ вели́кихъ ᲂу҆чи́телей и҆ ст҃и́телей: васі́лїа вели́кагѡ, григо́рїа бг҃осло́ва и҆ і҆ѡа́нна златоꙋ́стагѡ: и҆́же во ст҃ы́хъ ѻ҆тца̀ на́шегѡ нїкола́а а҆рхїепі́скопа, мѷрлѷкі́йскагѡ чꙋдотво́рца: и҆̀же во ст҃ы́хъ ѻ҆тє́цъ на́шихъ, меѳо́дїа и҆ кѷрі́лла ᲂу҆чи́телей слове́нскихъ: ст҃а́гѡ равноапⷭ҇тольнагѡ вели́кагѡ кн҃зѧ влади́мїра: и҆̀же во ст҃ы́хъ ѻ҆тє́цъ на́шихъ всеѧ̀ рѡссі́и чꙋдотво́рцѡвъ, петра̀, а҆леѯі́а, і҆ѡ́ны и҆ фїлі́ппа: ст҃ы́хъ и҆ првⷣныхъ бг҃оѻтє́цъ і҆ѡакі́ма и҆ а҆́нны, [и҆ ст҃а́гѡ, (и҆́мⷬ҇къ), є҆гѡ́же є҆́сть хра́мъ,] и҆ всѣ́хъ ст҃ы́хъ твои́хъ, бл҃гопрїѧ́тнꙋ сотворѝ мл҃твꙋ на́шꙋ: да́рꙋй на́мъ ѡ҆ставле́нїе прегрѣше́нїй на́шихъ: покры́й на́съ кро́вомъ крилꙋ̀ твоє́ю: ѿженѝ ѿ на́съ всѧ́каго врага̀ и҆ сꙋпоста́та: ᲂу҆мирѝ на́шꙋ жи́знь, гдⷭ҇и поми́лꙋй на́съ, и҆ мі́ръ тво́й, и҆ сп҃сѝ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ.
Ли́къ: а҆ми́нь.
И҆ ѿпꙋ́стъ.