[глⷡ҇а к҃в] Послѣ́дованїе вели́кагѡ ѡ҆сщ҃е́нїѧ воды̀ ст҃ы́хъ бг҃оѧвле́нїй.
По є҆́же рещѝ сщ҃е́нникꙋ заамвѡ́ннꙋю мл҃твꙋ, и҆схо́димъ всѝ ко крести́льницѣ, пред̾идꙋ́щымъ свѣщено́сцємъ, по ни́хъ же дїа́конѡмъ и҆ сщ҃е́нникѡмъ, со є҆ѵⷢ҇лїемъ и҆ кади́ломъ, бра́тїи пою́щымъ настоѧ́щыѧ тропарѝ. Гла́съ и҃:
Гла́съ гдⷭ҇нь на вода́хъ вопїе́тъ, глаго́лѧ: прїиди́те, прїими́те всѝ дх҃а премꙋ́дрости, дх҃а ра́зꙋма, дх҃а стра́ха бж҃їѧ, ꙗ҆́вльшагѡсѧ хрⷭ҇та̀. Три́жды.
Дне́сь во́дъ ѡ҆свѧща́етсѧ є҆стество̀, и҆ раздѣлѧ́етсѧ і҆ѻрда́нъ, и҆ свои́хъ во́дъ возвраща́етъ стрꙋи̑, влⷣкꙋ зрѧ̀ креща́ема. Два́жды.
Ꙗ҆́кѡ чл҃вѣ́къ на рѣкꙋ̀ прише́лъ є҆сѝ хрⷭ҇тѐ цр҃ю̀, и҆ ра́бское креще́нїе прїѧ́ти тщи́шисѧ бл҃же, ѿ прⷣте́чевꙋ рꙋкꙋ̑, грѣ̑хъ ра́ди на́шихъ, чл҃вѣколю́бче. Два́жды.
Сла́ва, и҆ ны́нѣ, гла́съ то́йже:
Ко гла́сꙋ вопїю́щагѡ въ пꙋсты́ни, ᲂу҆гото́вайте пꙋ́ть гдⷭ҇ень, прише́лъ є҆сѝ гдⷭ҇и, зра́къ ра́бїй прїи́мъ, креще́нїѧ просѧ̀, не вѣ́дый грѣха̀: ви́дѣша тѧ̀ во́ды, и҆ ᲂу҆боѧ́шасѧ. тре́петенъ бы́сть предте́ча, и҆ возопѝ глаго́лѧ: ка́кѡ просвѣти́тъ свѣти́льникъ свѣ́та; ка́кѡ рꙋ́кꙋ положи́тъ ра́бъ на влⷣкꙋ; ѡ҆свѧтѝ менѐ и҆ во́ды сп҃се, взе́млѧй мі́ра грѣ́хъ.
И҆ а҆́бїе ста́въ ᲂу҆ крести́льницы, глаго́летъ дїа́конъ: Премꙋ́дрость.
И҆ чте́цъ:
Проро́чества и҆са́їина чте́нїе: [глава̀ л҃є.]
Та́кѡ глаго́летъ гдⷭ҇ь: да возвесели́тсѧ пꙋсты́нѧ жа́ждꙋщаѧ, да возра́дꙋетсѧ пꙋсты́нѧ, и҆ процвѣте́тъ ꙗ҆́кѡ крі́нъ, и҆ да прозѧ́бнетъ, и҆ всѧ̑ возвеселѧ́тсѧ. И҆ возра́дꙋютсѧ пꙋсты̑ннаѧ і҆ѻрда́нова, и҆ сла́ва лїва́нова дана̀ бы́сть є҆́й, и҆ че́сть карми́лова: и҆ лю́дїе моѝ ᲂу҆́зрѧтъ сла́вꙋ гдⷭ҇ню, и҆ высотꙋ̀ бж҃їю. Оу҆крѣпи́тесѧ рꙋ́ки ѡ҆сла́блєныѧ, и҆ колѣ̑на разсла́блєнаѧ ᲂу҆тѣ́шитесѧ. И҆ рцы́те малодꙋ̑шнымъ мы́слїю, ᲂу҆крѣпи́тесѧ, и҆ не бо́йтесѧ: сѐ бг҃ъ на́шъ сꙋ́дъ воздае́тъ, то́й прїи́детъ и҆ сп҃се́тъ на́съ. Тогда̀ ѿве́рзꙋтсѧ ѻ҆чеса̀ слѣпы́хъ и҆ ᲂу҆шеса̀ глꙋхи́хъ ᲂу҆слы́шатъ. Тогда̀ ско́читъ хромы́й ꙗ҆́кѡ є҆ле́нь, и҆ ꙗ҆́сенъ бꙋ́детъ ѧ҆зы́къ гꙋгни́выхъ: ꙗ҆́кѡ прорази́сѧ въ пꙋсты́ни вода̀, и҆ де́брь въ землѝ жа́ждꙋщей. И҆ бꙋ́детъ безвѡ́днаѧ въ бла̑та, и҆ въ жа́ждꙋщей землѝ и҆сто́чникъ воды̀ бꙋ́детъ. та́мѡ бꙋ́детъ весе́лїе пти́цъ, водворе́нїе сѵ́рїнѡвъ, и҆ тро́стїй и҆ бла́та. Та́мѡ бꙋ́детъ пꙋ́ть чи́стъ, и҆ пꙋ́ть свѧ́тъ нарече́тсѧ: и҆ не мимои́детъ та́мѡ нечи́стъ, нижѐ бꙋ́детъ та́мѡ пꙋ́ть нечи́стый, разсѣ́ѧннїи же по́йдꙋтъ по немꙋ̀, и҆ не заблꙋ́дѧтъ. И҆ не бꙋ́детъ та́мѡ льва̀, нижѐ ѕвѣре́й лю́тыхъ взы́детъ на́нь, нижѐ ѡ҆брѧ́щетсѧ та́мѡ: но по́йдꙋтъ по немꙋ̀ и҆зба́вленнїи, и҆ со́браннїи ѿ гдⷭ҇а. И҆ ѡ҆братѧ́тсѧ и҆ прїи́дꙋтъ въ сїѡ́нъ съ весе́лїемъ и҆ ра́достїю, и҆ весе́лїе вѣ́чное над̾ главо́ю и҆́хъ, хвала̀ и҆ ра́дованїе и҆ весе́лїе пости́гнетъ и҆̀хъ, ѿбѣжѐ болѣ́знь, печа́ль и҆ воздыха́нїе.
Проро́чества и҆са́їина чте́нїе: [глава̀ н҃є.]
Та́кѡ глаго́летъ гдⷭ҇ь: жа́ждꙋщїи на во́дꙋ и҆ди́те, и҆ є҆ли́цы не и҆́мате сребра̀, ше́дше кꙋпи́те, и҆ ꙗ҆ди́те и҆ пі́йте, без̾ сребра̀ и҆ цѣны̀, вїно̀ и҆ тꙋ́къ. Вскꙋ́ю цѣнитѐ сребро̀ не въ хлѣ́бы, и҆ трꙋ́дъ ва́шъ не въ сы́тость; послꙋ́шайте менѐ, и҆ снѣ́сте блага̑ѧ, и҆ наслади́тсѧ во бл҃ги́хъ дꙋша̀ ва́ша. Внима́йте ᲂу҆ши́ма ва́шима, и҆ послѣ́дꙋйте пꙋтє́мъ мои̑мъ: ᲂу҆слы́шите менѐ, и҆ жива̀ бꙋ́детъ во бл҃ги́хъ дꙋша̀ ва́ша. и҆ завѣща́ю ва́мъ завѣ́тъ вѣ́ченъ, преподѡ́бнаѧ дв҃дѡва вѣ̑рнаѧ. Сѐ свидѣ́тельство во ꙗ҆зы́цѣхъ да́хъ є҆го̀ кнѧ́зѧ и҆ повели́телѧ во ꙗ҆зы́цѣхъ. Сѐ ꙗ҆зы́цы, и҆̀же не вѣ́дѧхꙋ тѧ̀, призовꙋ́тъ тѧ̀, и҆ лю́дїе, и҆̀же не позна́ша тѧ̀, къ тебѣ̀ прибѣ́гнꙋтъ: ра́ди гдⷭ҇а бг҃а твоегѡ̀ и҆ ст҃а́гѡ, і҆зра́илева ꙗ҆́кѡ просла́вихъ тѧ̀: Взыщи́те бг҃а, и҆ внегда̀ ва́мъ ѡ҆брѣстѝ є҆го̀, призови́те: є҆гда́ же а҆́ще прибли́житсѧ ва́мъ. да ѡ҆ста́витъ нечести́вый пꙋти̑ своѧ̑, и҆ мꙋ́жъ беззако́нный совѣ́ты своѧ̑. И҆ ѡ҆брати́тесѧ ко гдⷭ҇ꙋ бг҃ꙋ ва́шемꙋ, и҆ поми́ловани бꙋ́дете, ꙗ҆́кѡ помно́гꙋ ѡ҆ста́витъ грѣхѝ ва́шѧ. Не сꙋ́ть бо совѣ́ти моѝ, ꙗ҆́коже совѣ́ти ва́ши: нижѐ ꙗ҆́коже пꙋтїѐ ва́ши, пꙋтїѐ моѝ, глаго́летъ гдⷭ҇ь. Но ꙗ҆́коже ѿстои́тъ нб҃о ѿ землѝ, та́кѡ ѿстои́тъ пꙋ́ть мо́й ѿ пꙋте́й ва́шихъ, и҆ размышлє́нїѧ ва̑ша ѿ мы́сли моеѧ̀. Ꙗ҆́коже бо а҆́ще сни́детъ до́ждь и҆лѝ снѣ́гъ съ нб҃сѐ, и҆ не возврати́тсѧ ѿтꙋ́дꙋ, до́ндеже ᲂу҆пои́тъ зе́млю, и҆ роди́тъ и҆ прозѧ́бнетъ, и҆ да́стъ сѣ́мѧ сѣ́ющемꙋ, и҆ хлѣ́бъ въ снѣ́дь: Та́кѡ бꙋ́детъ глаго́лъ мо́й, и҆́же а҆́ще и҆зы́детъ и҆з̾ ᲂу҆́стъ мои́хъ, и҆ не ѡ҆брати́тсѧ ко мнѣ̀ то́щъ, до́ндеже а҆́ще сконча́етъ всѧ̑, є҆ли̑ка восхотѣ́хъ, и҆ поспѣшꙋ̀ пꙋти̑ моѧ̑, и҆ повелѣ̑нїѧ моѧ̑. Весе́лїемъ бо и҆зы́дете, и҆ ра́достїю наꙋчи́тесѧ: го́ры бо и҆ хо́лми ско́чатъ, ждꙋ́ще ва́съ въ ра́дости, и҆ всѧ̑ древеса̀ сє́льнаѧ воспле́щꙋтъ вѣ́твьми. И҆ вмѣ́стѡ дра́чїѧ, взы́детъ кѷпарі́съ, вмѣ́стѡ же кропи́вы, взы́детъ мѷрсі́на: и҆ бꙋ́детъ гдⷭ҇ь во и҆́мѧ и҆ въ зна́менїе вѣ́чное, и҆ не ѡ҆скꙋдѣ́етъ.
Проро́чества и҆са́їина чте́нїе: [глава̀ в҃і.]
Та́кѡ глаго́летъ гдⷭ҇ь: почерпи́те во́дꙋ съ весе́лїемъ, ѿ и҆стѡ́чникъ сп҃се́нїѧ. И҆ рече́ши въ де́нь ѻ҆́нъ: и҆сповѣ́дайтесѧ гдⷭ҇еви, и҆ призови́те и҆́мѧ є҆гѡ̀, возвѣсти́те во ꙗ҆зы́цѣхъ сла́вꙋ є҆гѡ̀: помѧни́те, ꙗ҆́кѡ вознесе́сѧ и҆́мѧ є҆гѡ̀. По́йте и҆́мѧ гдⷭ҇не, ꙗ҆́кѡ высѡ́каѧ сотворѝ: возвѣсти́те сїѧ̑ по все́й землѝ. Ра́дꙋйтесѧ и҆ весели́тесѧ живꙋ́щїи въ сїѡ́нѣ, ꙗ҆́кѡ вознесе́сѧ ст҃ы́й і҆и҃левъ посредѣ̀ є҆гѡ̀.
Дїа́конъ: Премꙋ́дрость.
Чте́цъ, прокі́менъ, гла́съ г҃:
Гдⷭ҇ь просвѣще́нїе моѐ, и҆ сп҃си́тель мо́й, когѡ̀ ᲂу҆бою́сѧ;
Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ;
А҆по́столъ къ корі́нѳѧнѡмъ, зача́ло рм҃г, ѿ полꙋ̀:
Бра́тїе, не хощꙋ̀ ва́съ не вѣ́дѣти, ꙗ҆́кѡ ѻ҆тцы̀ на́ши всѝ под̾ ѻ҆́блакомъ бы́ша, и҆ всѝ сквозѣ̀ мо́ре проидо́ша: И҆ всѝ въ мѡѷсе́а крести́шасѧ, во ѻ҆́блацѣ и҆ въ мо́ри: И҆ всѝ то́жде бра́шно дх҃о́вное ꙗ҆до́ша: И҆ всѝ то́жде пи́во дх҃о́вное пи́ша: пїѧ́хꙋ бо ѿ дх҃о́внагѡ послѣ́дꙋющагѡ ка́мене: ка́мень же бѣ̀ хрⷭ҇то́съ.
А҆ллилꙋ́їа, гла́съ д҃.
Сті́хъ: Гла́съ гдⷭ҇нь на вода́хъ, бг҃ъ сла́вы возгремѣ̀, гдⷭ҇ь на вода́хъ мно́гихъ.
Є҆ѵⷢ҇лїе ѿ ма́рка, зача́ло в҃:
Во вре́мѧ ѻ҆́но, прїи́де і҆и҃съ ѿ назаре́та галїле́йскагѡ, и҆ крести́сѧ ѿ і҆ѡа́нна во і҆ѻрда́нѣ. И҆ а҆́бїе восходѧ̀ ѿ воды̀, ви́дѣ разводѧ̑щасѧ нб҃са̀, и҆ дх҃ъ ꙗ҆́кѡ го́лꙋбь сходѧ́щь на́нь. И҆ гла́съ бы́сть съ нб҃сѐ: ты̀ є҆сѝ сн҃ъ мо́й возлю́бленный, ѡ҆ не́мже бл҃говоли́хъ.
Дїа́конъ же глаго́летъ є҆ктенїю̀:
Ми́ромъ гдⷭ҇ꙋ помо́лимсѧ.
Ѡ҆ свы́шнѣмъ ми́рѣ:
Ѡ҆ ми́рѣ всегѡ̀ мі́ра:
Ѡ҆ ст҃ѣ́мъ хра́мѣ се́мъ:
Ѡ҆ ст҃ѣ́йшемъ прави́тельствꙋющемъ сѷно́дѣ:
Ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ і҆мпера́торѣ нїкола́ѣ а҆леѯа́ндровичѣ всеѧ̀ рѡссі́и: и҆ ѡ҆ сꙋпрꙋ́гѣ є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ а҆леѯа́ндрѣ ѳео́дѡровнѣ:
Ѡ҆ ма́тери є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ марі́и ѳео́дѡровнѣ: ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ а҆леѯі́и нїкола́евичѣ, и҆ ѡ҆ все́мъ ца́рствꙋющемъ до́мѣ:
Ѡ҆ пособи́ти и҆ покори́ти:
Ѡ҆ гра́дѣ се́мъ: [А҆́ще въ монастырѣ̀: ѡ҆ ст҃ѣ́й ѻ҆би́тели се́й:]
Ѡ҆ бл҃горастворе́нїи воздꙋ́хѡвъ:
Ѡ҆ пла́вающихъ, пꙋтеше́ствꙋющихъ:
Ѡ҆ є҆́же ѡ҆свѧти́тисѧ вода́мъ си̑мъ, си́лою и҆ дѣ́йствїемъ и҆ наи́тїемъ ст҃а́гѡ дх҃а, гдⷭ҇ꙋ помо́лимсѧ.
Ѡ҆ є҆́же снизходи́ти на во́ды сїѧ̑ ѡ҆чисти́тельномꙋ пресꙋ́щныѧ трⷪ҇цы дѣ́йствꙋ, гдⷭ҇ꙋ помо́лимсѧ.
Ѡ҆ є҆́же дарова́тисѧ и҆̀мъ бл҃года́ти и҆збавле́нїѧ, бл҃гослове́нїю і҆ѻрда́новꙋ, си́лою и҆ дѣ́йствомъ и҆ наи́тїемъ ст҃а́гѡ дх҃а, гдⷭ҇ꙋ помо́лимсѧ.
Ѡ҆ є҆́же сокрꙋши́тисѧ сатанѣ̀ под̾ нога́ма на́шима вско́рѣ, и҆ разори́тисѧ всѧ́комꙋ совѣ́тꙋ лꙋка́вомꙋ дви́жимомꙋ на ны̀, гдⷭ҇ꙋ помо́лимсѧ.
Ꙗ҆́кѡ да гдⷭ҇ь бг҃ъ и҆́зметъ на́съ ѿ всѧ́кагѡ навѣ́та, и҆ и҆скꙋше́нїѧ сопроти́вника, и҆ досто́йны содѣ́лаетъ ѡ҆бѣща́нныхъ бла̑гъ, гдⷭ҇ꙋ помо́лимсѧ.
Ѡ҆ є҆́же просвѣти́тисѧ на́мъ просвѣще́нїемъ ра́зꙋма и҆ бл҃гоче́стїѧ, наи́тїемъ ст҃а́гѡ дх҃а, гдⷭ҇ꙋ помо́лимсѧ.
Ѡ҆ є҆́же низпосла́ти гдⷭ҇ꙋ бг҃ꙋ бл҃гослове́нїе і҆ѻрда́ново, и҆ ѡ҆ст҃и́ти во́ды сїѧ̑, гдⷭ҇ꙋ помо́лимсѧ.
Ѡ҆ є҆́же бы́ти водѣ̀ се́й, ѡ҆сщ҃е́нїѧ да́рꙋ, грѣхѡ́въ и҆збавле́нїю, во и҆сцѣле́нїе дꙋшѝ и҆ тѣ́ла, и҆ на всѧ́кꙋю по́льзꙋ и҆зрѧ́днꙋю, гдⷭ҇ꙋ помо́лимсѧ.
Ѡ҆ є҆́же бы́ти водѣ̀ се́й ска́чꙋщей въ жи́знь вѣ́чнꙋю, гдⷭ҇ꙋ помо́лимсѧ.
Ѡ҆ є҆́же ꙗ҆ви́тисѧ се́й ѿгна́нїю всѧ́кагѡ навѣ́та ви́димыхъ и҆ неви́димыхъ вра̑гъ, гдⷭ҇ꙋ помо́лимсѧ.
Ѡ҆ че́рплющихъ и҆ є҆́млющихъ ю҆̀ во ѡ҆сщ҃е́нїе домѡ́въ, гдⷭ҇ꙋ помо́лимсѧ.
Ѡ҆ є҆́же бы́ти се́й, во ѡ҆чище́нїе дꙋ́шъ и҆ тѣле́съ, всѣ̑мъ вѣ́рою че́рплющымъ же и҆ причаща́ющымсѧ ѿ неѧ̀, гдⷭ҇ꙋ помо́лимсѧ.
Ѡ҆ є҆́же сподо́битисѧ на́мъ и҆спо́лнитисѧ ѡ҆сщ҃е́нїѧ, во́дъ си́хъ причаще́нїемъ, неви́димымъ ꙗ҆вле́нїемъ ст҃а́гѡ дх҃а, гдⷭ҇ꙋ помо́лимсѧ.
Ѡ҆ є҆́же ᲂу҆слы́шати гдⷭ҇ꙋ бг҃ꙋ гла́съ моле́нїѧ на́съ грѣ́шныхъ, и҆ поми́ловати на́съ, гдⷭ҇ꙋ помо́лимсѧ.
Ѡ҆ и҆зба́витисѧ на́мъ ѿ всѧ́кїѧ ско́рби:
Застꙋпѝ, сп҃сѝ, поми́лꙋй:
Прест҃ꙋ́ю, пречⷭ҇тꙋю, пребл҃гослове́ннꙋю:
Си̑мъ глаго́лємымъ, сщ҃е́нникъ та́йнѡ мл҃твꙋ сїю̀ глаго́летъ:
Гдⷭ҇и і҆и҃се хрⷭ҇тѐ, є҆диноро́дный сн҃е, сы́й въ нѣ́дрѣ ѻ҆́ч҃и, и҆́стинный бж҃е, и҆сто́чниче жи́зни и҆ безсме́ртїѧ: свѣ́те ѿ свѣ́та, прише́дый въ мі́ръ, є҆́же просвѣти́ти є҆го̀, ѡ҆зарѝ на́шꙋ мы́сль ст҃ы́мъ твои́мъ дх҃омъ, и҆ прїимѝ на́съ, вели́чество и҆ бл҃годаре́нїе тебѣ̀ приносѧ́щихъ, ѡ҆ ꙗ҆̀же ѿ вѣ́ка ди́вныхъ твои́хъ великодѣ́йствїихъ, и҆ є҆́же въ послѣ̑днїѧ вѣ́ки сп҃си́тельномъ твое́мъ смотре́нїи, въ не́мже въ на́ше немощно́е и҆ ни́щее ѡ҆дѣ́ѧвсѧ смѣше́нїе, и҆ рабѡ́тнымъ мѣ́рамъ снизше́дый, и҆́же всѣ́хъ цр҃ю̀, є҆щѐ и҆ ра́бскою рꙋко́ю во і҆ѻрда́нѣ крⷭ҇ти́тисѧ претерпѣ́лъ є҆сѝ: да водно́е є҆стество̀ ѡ҆ст҃и́въ безгрѣ́шне, пꙋтесотвори́ши на́мъ, є҆́же водо́ю и҆ дх҃омъ па́ки рожде́нїе, и҆ къ пе́рвомꙋ на́съ ᲂу҆стро́иши свобожде́нїю: є҆гѡ́же бж҃е́ственнагѡ та́инства воспомина́нїе пра́зднꙋюще, мо́лимсѧ тебѣ̀ влⷣко чл҃вѣколю́бче, воскропѝ и҆ на ны̀ недостѡ́йныѧ рабы̑ твоѧ̑, по бж҃е́ственномꙋ твоемꙋ̀ ѡ҆бѣща́нїю, во́дꙋ чи́стꙋ, твоегѡ̀ бл҃гоꙋтро́бїѧ да́ръ, во є҆́же над̾ водо́ю се́ю проше́нїю на́съ грѣ́шныхъ бл҃гопрїѧ́тнꙋ бы́ти твое́ю бл҃гостїю, и҆ бл҃гослове́нїю твоемꙋ̀ є҆́й, на́мъ же и҆ всѣ̑мъ вѣ̑рнымъ лю́демъ твои̑мъ дарова́тисѧ, въ сла́вꙋ ст҃а́гѡ и҆ покланѧ́емагѡ твоегѡ̀ и҆́мене. Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
И҆ ре́къ въ себѣ̀: а҆ми́нь.
Дїа́конꙋ же и҆спо́лншꙋ є҆ктенїю̀, начина́етъ сщ҃е́нникъ велегла́снѡ мл҃твꙋ сїю̀:
Ве́лїй є҆сѝ гдⷭ҇и, и҆ чꙋ̑дна дѣла̀ твоѧ̑, и҆ ниеди́но же сло́во дово́льно бꙋ́детъ къ пѣ́нїю чꙋде́съ твои́хъ. Три́жды.
Ты́ бо хотѣ́нїемъ ѿ не сꙋ́щихъ во є҆́же бы́ти приведы́й всѧ́чєскаѧ, твое́ю держа́вою содержи́ши тва́рь, и҆ твои́мъ про́мысломъ стро́иши мі́ръ. Ты̀ ѿ четы́рехъ стїхі́й тва́рь сочини́вый, четы́рьми времены̀ крꙋ́гъ лѣ́та вѣнча́лъ є҆сѝ. Тебѐ трепе́щꙋтъ ᲂу҆́мныѧ всѧ̑ си̑лы: тебѐ пое́тъ со́лнце, тебѐ сла́витъ лꙋна̀, тебѣ̀ присꙋ́тствꙋютъ ѕвѣ́зды: тебѐ слꙋ́шаетъ свѣ́тъ, тебѐ трепе́щꙋтъ бє́здны, тебѣ̀ рабо́таютъ и҆сто́чницы. Ты̀ просте́рлъ є҆сѝ нб҃о ꙗ҆́кѡ ко́жꙋ: ты̀ ᲂу҆тверди́лъ є҆сѝ зе́млю на вода́хъ: ты̀ ѡ҆гради́лъ є҆сѝ мо́ре песко́мъ: ты̀ ко ѿдыха́нїємъ воздꙋ́хъ и҆злїѧ́лъ є҆сѝ. А҆́гг҃льскїѧ си̑лы тебѣ̀ слꙋ́жатъ: а҆рха́гг҃льстїи ли́цы тебѣ̀ кла́нѧютсѧ: многоѻчи́тїи херꙋві́ми, и҆ шестокрила́тїи, серафі́ми, ѻ҆́крестъ стоѧ́ще и҆ ѡ҆блета́юще, стра́хомъ непристꙋ́пныѧ сла́вы твоеѧ̀ покрыва́ютсѧ. Ты́ бо бг҃ъ сы́й неѡпи́санный, безнача́льный же и҆ неизглаго́ланный, прише́лъ є҆сѝ на зе́млю, зра́къ раба̀ прїи́мъ, въ подо́бїи чл҃вѣ́честѣмъ бы́въ: не бо̀ терпѣ́лъ є҆сѝ влⷣко, млⷭ҇рдїѧ ра́ди млⷭ҇ти твоеѧ̀, зрѣ́ти ѿ дїа́вола мꙋ́чима ро́да человѣ́ча, но прише́лъ є҆сѝ, и҆ сп҃слъ є҆сѝ на́съ. и҆сповѣ́дꙋемъ бл҃года́ть, проповѣ́дꙋемъ млⷭ҇ть, не таи́мъ бл҃годѣѧ́нїѧ: є҆стества̀ на́шегѡ ро́ды свободи́лъ є҆сѝ, дв҃ственнꙋю ѡ҆свѧти́лъ є҆сѝ ᲂу҆тро́бꙋ ржⷭ҇тво́мъ твои́мъ, всѧ̀ тва́рь воспѣва́етъ тѧ̀ ꙗ҆́вльшагосѧ. Ты́ бо бг҃ъ на́шъ, на землѝ ꙗ҆ви́лсѧ є҆сѝ, и҆ съ человѣ́ки пожи́лъ є҆сѝ: ты̀ и҆ і҆ѻрда̑нскїѧ стрꙋи̑ ѡ҆ст҃и́лъ є҆сѝ, съ нб҃сѐ низпосла́вый ст҃а́го твоего̀ дх҃а, и҆ главы̑ та́мѡ гнѣздѧ́щихсѧ сокрꙋши́лъ є҆сѝ ѕмїє́въ.
И҆ сїѐ ᲂу҆́бѡ сщ҃е́нникъ глаго́лѧ три́жды, и҆ во́дꙋ рꙋко́ю бл҃гословлѧ́етъ на кі́йждо сті́хъ:
Са́мъ ᲂу҆́бѡ чл҃вѣколю́бче цр҃ю̀, прїидѝ и҆ ны́нѣ наи́тїемъ ст҃а́гѡ твоегѡ̀ дх҃а, и҆ ѡ҆свѧтѝ во́дꙋ сїю̀.
И҆ да́ждь є҆́й бл҃года́ть и҆збавле́нїѧ, бл҃гослове́нїе і҆ѻрда́ново: сотворѝ ю҆̀ нетлѣ́нїѧ и҆сто́чникъ, ѡ҆сщ҃е́нїѧ да́ръ, грѣхѡ́въ разрѣше́нїе, недꙋ́гѡвъ и҆сцѣле́нїе, де́мѡнѡвъ гꙋби́тельнꙋ, сопроти̑внымъ си́ламъ непристꙋ́пнꙋ, а҆́гг҃льскїѧ крѣ́пости и҆спо́лненꙋ: да всѝ почерпа́ющїи и҆ причаща́ющїисѧ и҆мѣ́ютъ ю҆̀ ко ѡ҆чище́нїю дꙋ́шъ и҆ тѣле́съ, ко и҆сцѣле́нїю страсте́й, ко ѡ҆сщ҃е́нїю домѡ́въ, и҆ ко всѧ́кой по́льзѣ и҆зрѧ́днꙋ. Ты́ бо є҆сѝ бг҃ъ на́шъ, и҆́же водо́ю и҆ дх҃омъ ѡ҆бнови́вый ѡ҆бетша́вшее грѣхо́мъ є҆стество̀ на́ше. ты̀ є҆сѝ бг҃ъ на́шъ, водо́ю потопи́вый при нѡ́и грѣ́хъ. ты̀ є҆сѝ бг҃ъ на́шъ, и҆́же мо́ремъ свободи́вый ѿ рабо́ты фараѡ́ни мѡѷсе́омъ ро́дъ є҆вре́йскїй. ты́ бо є҆сѝ бг҃ъ на́шъ, разрази́вый ка́мень въ пꙋсты́ни, и҆ потеко́ша во́ды, и҆ пото́цы наводни́шасѧ, и҆ жа́ждꙋщыѧ лю́ди твоѧ̑ насы́тивый. ты̀ є҆сѝ бг҃ъ на́шъ, и҆́же водо́ю и҆ ѻ҆гне́мъ премѣни́вый и҆лїе́ю і҆и҃лѧ ѿ пре́лести ваа́ловы. Са́мъ и҆ ны́нѣ влⷣко, ѡ҆ст҃ѝ во́дꙋ сїю̀ дх҃омъ твои́мъ ст҃ы́мъ. Три́жды.
Да́ждь же всѣ̑мъ прикаса́ющымсѧ є҆́й и҆ причаща́ющымсѧ, и҆ ма́жꙋщымсѧ є҆́ю, ѡ҆сщ҃е́нїе, здра́вїе, ѡ҆чище́нїе и҆ бл҃гослове́нїе.
И҆ сп҃сѝ гдⷭ҇и раба̀ твоего̀ бл҃гочести́вѣйшаго, самодержа́внѣйшаго, вели́каго гдⷭ҇рѧ на́шего і҆мпера́тора нїкола́ѧ а҆леѯа́ндровича всеѧ̀ рѡссі́и. Три́жды.
И҆ сꙋпрꙋ́гꙋ є҆гѡ̀, бл҃гочести́вѣйшꙋю гдⷭ҇рню, і҆мператрі́цꙋ а҆леѯа́ндрꙋ ѳео́дѡровнꙋ.
И҆ ма́терь є҆гѡ̀, бл҃гочести́вѣйшꙋю гдⷭ҇рню, і҆мператрі́цꙋ марі́ю ѳео́дѡровнꙋ, наслѣ́дника є҆гѡ̀, бл҃говѣ́рнагѡ гдⷭ҇рѧ цесаре́вича и҆ вели́кагѡ кн҃зѧ а҆леѯі́ѧ нїкола́евича, и҆ ве́сь ца́рствꙋющїй до́мъ.
Сп҃сѝ гдⷭ҇и, и҆ поми́лꙋй ст҃ѣ́йшїй прави́тельствꙋющїй сѷно́дъ.
И҆ сохранѝ и҆̀хъ под̾ кро́вомъ твои́мъ въ ми́рѣ, покорѝ и҆̀мъ всѧ́каго врага̀ и҆ сꙋпоста́та, да́рꙋй и҆̀мъ всѧ̑ ꙗ҆̀же ко сп҃се́нїю прошє́нїѧ и҆ жи́знь вѣ́чнꙋю: да и҆ стїхі́ами, и҆ человѣ́ки, и҆ а҆́гг҃лы, ви́димыми и҆ неви́димыми сла́витсѧ твоѐ прест҃о́е и҆́мѧ, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
Сщ҃е́нникъ прикло́ньсѧ мо́литсѧ:
Приклонѝ гдⷭ҇и ᲂу҆́хо твоѐ, и҆ ᲂу҆слы́ши ны̀, и҆́же во і҆ѻрда́нѣ крⷭ҇ти́тисѧ и҆зво́ливый, и҆ ѡ҆ст҃и́вый во́ды, бл҃гословѝ всѣ́хъ на́съ, и҆̀же преклоне́нїемъ своеѧ̀ вы́и назна́менающихъ рабо́тное воѡбраже́нїе: и҆ сподо́би на́съ и҆спо́лнитисѧ ѡ҆сщ҃е́нїѧ твоегѡ̀, воды̀ сеѧ̀ причаще́нїемъ: и҆ да бꙋ́детъ на́мъ гдⷭ҇и, во здра́вїе дꙋшѝ и҆ тѣ́ла.
Возглаше́нїе: Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ и҆ бл҃годаре́нїе и҆ поклоне́нїе возсыла́емъ, со безнача́льнымъ твои́мъ ѻ҆ц҃е́мъ и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ а҆́бїе бл҃гословлѧ́ѧ во́дꙋ крⷭ҇тови́днѡ чⷭ҇тны́мъ крⷭ҇то́мъ, погрꙋжа́етъ и҆̀ пра́вѡ, низводѧ̀ въ во́дꙋ, и҆ возводѧ̀, держа̀ є҆го̀ ѻ҆бѣ́ма рꙋка́ма, поѧ̀ настоѧ́щїй тропа́рь, во гла́съ а҃:
Во і҆ѻрда́нѣ креща́ющꙋсѧ тебѣ̀ гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнагѡ тѧ̀ сн҃а и҆менꙋ́ѧ: и҆ дх҃ъ въ ви́дѣ голꙋби́нѣ и҆звѣ́ствоваше словесѐ ᲂу҆твержде́нїе. ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.
Пѣвцє́мъ то́же пою́щымъ.
Па́ки второ́е, та́коже крⷭ҇то́мъ зна́менꙋетъ во́ды. И҆ тре́тїе та́кожде. И҆ взе́мъ сщ҃е́нникъ сщ҃е́ннꙋю во́дꙋ на блю́до, и҆ ѡ҆брати́тсѧ на за́падъ лице́мъ, въ лѣ́вой рꙋцѣ̀ держа̀ крⷭ҇тъ, въ пра́вой же васїлкѝ.
И҆ прихо́дитъ пре́жде настоѧ́тель, и҆ цѣлꙋ́етъ чⷭ҇тны́й крⷭ҇тъ, и҆ зна́менꙋетъ є҆го̀ сщ҃е́нникъ по лицꙋ̀ васїлко́мъ со сщ҃е́нною водо́ю.
Та́же сщ҃е́нницы прихо́дѧтъ по чи́нꙋ своемꙋ̀. По томꙋ́же чи́нꙋ и҆ всѧ̑ бра́тїѧ.
Пое́тсѧ же тогда̀ тропа́рь: Во і҆ѻрда́нѣ креща́ющꙋсѧ тебѣ̀ гдⷭ҇и: мно́гащи, до́ндеже ѡ҆ст҃ѧ́тсѧ всѧ̑ бра́тїѧ водны́мъ кропле́нїемъ.
И҆ а҆́бїе вхо́димъ во хра́мъ, пою́ще самогла́сенъ, гла́съ ѕ҃:
Воспои́мъ вѣ́рнїи, є҆́же ѡ҆ на́съ бж҃їѧ бл҃годѣѧ́нїѧ вели́чество: ѡ҆ на́шемъ бо прегрѣше́нїи бы́въ человѣ́къ, на́шимъ ѡ҆чище́нїемъ ѡ҆чища́етсѧ во і҆ѻрда́нѣ, є҆ди́нъ чи́стый и҆ нетлѣ́нный, ѡ҆сщ҃а́ѧй менѐ и҆ во́ды, и҆ главы̑ ѕмїє́въ сокрꙋша́ѧй въ водѣ̀. почерпе́мъ ᲂу҆́бѡ во́дꙋ съ весе́лїемъ, бра́тїе: бл҃года́ть бо дх҃а вѣ́рнѡ почерпа́ющымъ, неви́димѡ подава́етсѧ ѿ хрⷭ҇та̀ бг҃а, и҆ сп҃са дꙋ́шъ на́шихъ.
Та́же, Бꙋ́ди и҆́мѧ гдⷭ҇не бл҃гослове́но: три́жды.
И҆ ѱало́мъ л҃г: Бл҃гословлю̀ гдⷭ҇а на всѧ́кое вре́мѧ.
И҆ пре́жде пи́вше ѡ҆сщ҃е́ннꙋю во́дꙋ, взе́млемъ ѿ сщ҃е́нника а҆нті́дѡръ.
И҆ быва́етъ соверше́нный ѿпꙋ́стъ:
И҆́же во і҆ѻрда́нѣ крⷭ҇ти́тисѧ и҆зво́ливый ѿ і҆ѡа́нна, на́шегѡ ра́ди сп҃се́нїѧ, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.