[глⷡ҇а к҃] Чи́нъ погребе́нїѧ младе́нческагѡ.
По є҆́же бл҃гослови́ти сщ҃е́нникꙋ, пѣвцы̀ пою́тъ:
Живы́й въ по́мощи вы́шнѧгѡ:
И҆ посе́мъ, А҆ллилꙋ́їа, во гла́съ и҃.
Сті́хъ: Бл҃же́нъ, є҆го́же и҆збра́лъ:
Сті́хъ: И҆ па́мѧть є҆гѡ̀ въ ро́дъ и҆ ро́дъ.
Трист҃о́е. И҆ по Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:
Та́же, Глꙋбино́ю мꙋ́дрости чл҃вѣколю́бнѡ:
Сла́ва: Творца̀ и҆ зижди́телѧ и҆ бг҃а на́шегѡ:
И҆ ны́нѣ: Тебѐ и҆ стѣ́нꙋ и҆ приста́нище и҆́мамы:
Та́же, н҃ ѱало́мъ.
И҆ посе́мъ начина́етъ канѡ́нъ поко́йный над̾ младе́нцемъ сконча́вшимсѧ. Гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Припѣ́въ: Гдⷭ҇и, ᲂу҆поко́й младе́нца.
Пло́тїю ѡ҆бнища́вый сло́ве бж҃їй, и҆ младе́нецъ бы́ти бл҃говоли́вый кромѣ̀ премѣне́нїѧ, въ нѣ́дрѣхъ а҆враа́млихъ, мо́лимъ, є҆го́же прїѧ́лъ є҆сѝ, сочета́й младе́нца.
Ѻ҆троча̀ ви́дѣнъ бы́лъ є҆сѝ пре́жде всѣ́хъ вѣкѡ́въ сы́й, и҆ ѻ҆троча́тѡмъ ꙗ҆́кѡ бл҃гъ твоѐ ѡ҆бѣща́лъ є҆сѝ црⷭ҇тво: томꙋ̀ настоѧ́щаго причтѝ младе́нца.
Сла́ва: Пре́жде и҆скꙋ́са земны́хъ сла́достей, прїѧ́лъ є҆сѝ хрⷭ҇тѐ сп҃се, непоро́чнаго младе́нца, вѣ́чныхъ сподоблѧ́ѧй бл҃ги́хъ, ꙗ҆́кѡ чл҃вѣколю́бецъ.
И҆ ны́нѣ: Премꙋ́дрость и҆ сло́во ѻ҆́ч҃ее неизрече́ннѡ ро́ждшаѧ, дꙋшѝ моеѧ̀ лю́тꙋю и҆сцѣлѝ ꙗ҆́звꙋ, и҆ серде́чнꙋю болѣ́знь ᲂу҆кротѝ.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Припѣ́въ: Гдⷭ҇и ᲂу҆поко́й младе́нца.
Пресоверше́нный сло́ве, млⷣнцъ ꙗ҆ви́выйсѧ соверше́нный, младе́нца несоверше́нна во́зрастомъ къ себѣ̀ преста́вилъ є҆сѝ: є҆го́же ᲂу҆поко́й съ првⷣными всѣ́ми бл҃гоꙋгоди́вшими тебѣ̀, є҆ди́не чл҃вѣколю́бче.
Мїрски́хъ сла́достей не вкꙋси́вша восхище́на премі́рныхъ ще́дре бл҃ги́хъ прича́стника покажѝ, мо́лимсѧ, нерастлѣ́ннаго млⷣнца, є҆го́же преложи́лъ є҆сѝ бж҃е́ственнымъ повелѣ́нїемъ твои́мъ.
Сла́ва: Нбⷭ҇ныхъ черто́гѡвъ, и҆ свѣ́тлагѡ поко́ѧ, и҆ сщ҃е́ннѣйшагѡ ли́ка ст҃ы́хъ, гдⷭ҇и прича́стника сотворѝ чистѣ́йшаго младе́нца, є҆го́же ꙗ҆́кѡ бл҃говоли́лъ є҆сѝ сп҃се, преста́вилъ є҆сѝ.
И҆ ны́нѣ: Лиши́выйсѧ ѿ всѣ́хъ, къ твоемꙋ̀ пречⷭ҇таѧ влⷣчце и҆ є҆ди́номꙋ прибѣга́ю покро́вꙋ, помози́ ми: мно́гое бо совокꙋпи́хъ грѣхо́вное бога́тство, добродѣ́телей же нището́ю ве́сь и҆спо́лнихсѧ.
Та́же, і҆рмо́съ: И҆ по і҆рмосѣ̀ сщ҃е́нникъ глаго́летъ є҆ктенїю̀ сїю̀:
Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Є҆щѐ мо́лимсѧ ѡ҆ ᲂу҆покое́нїи бл҃же́ннагѡ младе́нца, (и҆́мⷬ҇къ), и҆ ѡ҆ є҆́же по нело́жномꙋ своемꙋ̀ ѡ҆бѣща́нїю, нбⷭ҇номꙋ своемꙋ̀ црⷭ҇твїю того̀ сподо́бити.
Ли́къ: Гдⷭ҇и поми́лꙋй, три́жды.
Ꙗ҆́кѡ да гдⷭ҇ь бг҃ъ на́шъ ᲂу҆чини́тъ дꙋ́хъ є҆гѡ̀, и҆дѣ́же всѝ првⷣнїи почива́ютъ.
Ли́къ: Гдⷭ҇и поми́лꙋй, три́жды.
Млⷭ҇ти бж҃їѧ, црⷭ҇тва нбⷭ҇нагѡ и҆ со ст҃ы́ми ᲂу҆покое́нїѧ, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ томꙋ̀, и҆ са́ми себѣ̀, про́симъ.
Ли́къ: Пода́й гдⷭ҇и. Сщ҃е́нникъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Гдⷭ҇и і҆и҃се хрⷭ҇тѐ бж҃е на́шъ, породи́вшымсѧ ѿ воды̀ и҆ дх҃а, и҆ въ непоро́чномъ житїѝ къ тебѣ̀ преставлѧ́ющымсѧ црⷭ҇тво нбⷭ҇ное да́ти ѡ҆бѣща́вый, и҆ рекі́й: ѡ҆ста́вите дѣ́ти приходи́ти ко мнѣ̀, таковы́хъ бо є҆́сть црⷭ҇тво нбⷭ҇ное. смире́ннѡ мо́лимсѧ, ны́нѣ ѿ на́съ преста́вленномꙋ рабꙋ̀ твоемꙋ̀ непоро́чномꙋ младе́нцꙋ, (и҆́мⷬ҇къ), по твоемꙋ̀ нело́жномꙋ ѡ҆бѣща́нїю, црⷭ҇твїѧ твоегѡ̀ наслѣ́дїе да́рꙋй: на́съ же безпоро́чное сподо́би прейтѝ, и҆ хрⷭ҇тїа́нское сконча́ти житїѐ, со всѣ́ми ст҃ы́ми твои́ми, въ нбⷭ҇ныхъ черто́зѣхъ водвори́тисѧ.
И҆ возглаша́етъ: Ꙗ҆́кѡ ты̀ є҆сѝ воскрⷭ҇нїе, живо́тъ и҆ ᲂу҆покое́нїе всѣ́хъ рабѡ́въ твои́хъ, и҆ ны́нѣ преста́вленномꙋ рабꙋ̀ твоемꙋ̀ младе́нцꙋ, (и҆́мⷬ҇къ), хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
Та́же, тропа́рь:
Вои́стиннꙋ сꙋета̀ всѧ́чєскаѧ, житїе́ же сѣ́нь, и҆ со́нїе: и҆́бо всꙋ́е мѧте́тсѧ всѧ́къ земноро́дный, ꙗ҆́коже речѐ писа́нїе: є҆гда̀ мі́ръ прїѡбрѧ́щемъ, тогда̀ во гро́бъ всели́мсѧ, и҆дѣ́же вкꙋ́пѣ ца́рїе и҆ ни́щїи, ста́рцы и҆ младе́нцы. тѣ́мже хрⷭ҇тѐ бж҃е, преста́вльшагосѧ младе́нца ᲂу҆поко́й, ꙗ҆́кѡ чл҃вѣколю́бецъ.
Пѣ́снь д҃.
І҆рмо́съ: Оу҆слы́шахъ гдⷭ҇и смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Припѣ́въ: Гдⷭ҇и, ᲂу҆поко́й младе́нца.
Не младе́нцы пла́чемъ, но са́ми себѐ наипа́че возрыда́имъ согрѣша́ющїи всегда̀, ꙗ҆́кѡ да гее́нны и҆зба́вимсѧ.
Земны́хъ лиши́лъ є҆сѝ влⷣко младе́нца наслажде́нїй, нбⷭ҇ныхъ бл҃ги́хъ сего̀ ꙗ҆́кѡ правосꙋ́децъ сподо́би.
Сла́ва: Раѧ̀ жи́телѧ тѧ̀ показꙋ́етъ, бл҃же́нный вои́стиннꙋ младе́нче, и҆́же ѿ земли́ тѧ воспрїи́мый, и҆ ликѡ́мъ ст҃ы́хъ счинѧ́етъ тѧ̀.
И҆ ны́нѣ, бг҃оро́диченъ: Бцⷣꙋ тѧ̀ всечⷭ҇таѧ просвѣще́ннїи всѝ вѣ́мы, сл҃нца бо родила̀ є҆сѝ пра́вды, приснодв҃о.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ, ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑, напра́ви молю́сѧ.
Припѣ́въ: Гдⷭ҇и, ᲂу҆поко́й младе́нца.
Првⷣнымъ твои́мъ сꙋдо́мъ, пре́жде прозѧбе́нїѧ, соверше́ннѣ пожа́лъ є҆сѝ, ꙗ҆́коже млады́й ѕла́къ, є҆го́же преста́вилъ є҆сѝ гдⷭ҇и младе́нца: но сего̀ сло́ве вве́дъ въ бж҃е́ственнꙋю го́рꙋ бла̑гъ вѣ́чныхъ, насадѝ.
Ꙗ҆́коже мла́до вѣ́твїе, ме́чь наше́дъ сме́ртный тѧ̀ посѣчѐ, не прїи́мшаго и҆скꙋ́са мїрски́хъ сласте́й, ѽ бл҃же́нне: но сѐ хрⷭ҇то́съ тебѣ̀ нбⷭ҇наѧ врата̀ ѿверза́етъ, и҆збра̑ннымъ сочетава́ѧ тѧ̀, ꙗ҆́кѡ бл҃гоꙋтро́бенъ.
Сла́ва: Ѡ҆ мнѣ̀ не рыда́йте, пла́ча бо ничто́же начина́хъ досто́йное, па́че же сами́хъ себѐ согрѣша́ющихъ пла́чите всегда̀, срѡ́дницы и҆ дрꙋ́зи, ᲂу҆ме́ршїй зове́тъ младе́нецъ: ꙗ҆́кѡ да и҆скꙋ́са не воз̾и́мете мꙋче́нїѧ.
И҆ ны́нѣ: Самаго̀ себѐ ѿчаѧва́ю, є҆гда̀ на мно́жество дѣ́лъ мои́хъ взира́ю: є҆гда́ же во ᲂу҆́мъ тѧ̀ па́че ᲂу҆ма̀ ро́ждшꙋю гдⷭ҇а бг҃ома́ти прїе́млю, прохлажда́юсѧ наде́ждею: предста́тельство бо тѧ̀ є҆ди́но и҆́мамы.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.
Припѣ́въ: Гдⷭ҇и, ᲂу҆поко́й младе́нца.
Ꙗ҆́кѡ младе́нецъ въ ꙗ҆́слехъ положи́лсѧ є҆сѝ, и҆ ѡ҆б̾ѧ́тїємъ вда́лсѧ є҆сѝ ста́рца, младодѣ́ѧй во чре́вѣ младе́нцы, и҆ пре́жде дости́гнꙋти въ соверше́нное возраще́нїе, преве́лъ є҆сѝ сего̀ къ животꙋ̀: тѣ́мже тѧ̀ бл҃года́рственнѡ сла́вимъ.
Вопїѧ́лъ є҆сѝ а҆по́столѡмъ: ѡ҆ста́вите ѻ҆троча́та ко мнѣ̀ приходи́ти, сло́ве, црⷭ҇тво бо моѐ такѡвы́мъ сꙋ́щымъ мꙋдрова́нїемъ подава́емо быва́етъ: младе́нца ᲂу҆̀бо къ тебѣ̀ преста́вленнаго свѣ́та твоегѡ̀ сподо́би.
Сла́ва: Лиши́лъ є҆сѝ бла̑гъ земны́хъ твоего̀ младе́нца, да нбⷭ҇ныхъ твои́хъ бла̑гъ сего̀ прича́стника пока́жеши, не престꙋ́пльшагѡ бж҃е́ственное твоѐ повелѣ́нїе: сла́вимъ твои́хъ бл҃же, сꙋде́бъ глꙋбинꙋ̀ безмѣ́рнꙋю.
И҆ ны́нѣ, бг҃оро́диченъ: Ꙗ҆́кѡ стѣ́нꙋ прибѣ́жища и҆́мамы, и҆ дꙋша́мъ тѧ̀ всесоверше́нное сп҃се́нїе, и҆ простра́нство въ ско́рбехъ ѻ҆трокови́це: и҆ свѣ́томъ твои́мъ при́снѡ ра́дꙋемсѧ, и҆́мже влⷣчце и҆ ны́нѣ на́съ ѿ страсте́й и҆ бѣ́дъ сп҃са́й.
Та́же і҆рмо́съ. И҆ по і҆рмосѣ̀ глаго́летъ сщ҃е́нникъ є҆ктенїю̀ вышепи́саннꙋю, и҆ мл҃твꙋ.
Та́же конда́къ, гла́съ и҃: Со ст҃ы́ми ᲂу҆поко́й хрⷭ҇тѐ дꙋ́шꙋ раба̀ твоегѡ̀, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.
І҆́косъ: Са́мъ є҆ди́нъ є҆сѝ безсме́ртный, сотвори́вый и҆ созда́вый человѣ́ка, земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ созда́вый мѧ̀, и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши, а҆́може всѝ человѣ́цы по́йдемъ, надгро́бное рыда́нїе творѧ́ще пѣ́снь: а҆ллилꙋ́їа.
И҆ настоѧ́щыѧ і҆́косы:
Ничто́же є҆́сть мт҃ре сострада́тельншее ничто́же є҆́сть ѻ҆тца̀ ᲂу҆миле́ншее: ᲂу҆трѡ́бы бо и҆́хъ смꙋща́ютсѧ, є҆гда̀ младе́нцы ѿсю́дꙋ предсыла́ютъ: ве́лїѧ жа́лость ю҆́же и҆́мꙋтъ сердца̀ и҆́хъ, ѻ҆троча́тъ ра́ди, наи́паче є҆гда̀ сꙋ́ть бл҃гоглагѡ́ливаѧ, помина́юще словеса̀ и҆́хъ съ пѣ́снїю: а҆ллилꙋ́їа.
Мно́гажды бо пред̾ гро́бомъ сосцы̀ бїю́тъ и҆ глаго́лютъ: ѽ сы́не мо́й и҆ ча́до сладча́йшее, не слы́шиши ли мт҃ре твоеѧ̀, что̀ вѣща́етъ; сѐ и҆ чре́во носи́вшее тѧ̀: чесѡ̀ ра́ди не глаго́леши, ꙗ҆́кѡ глаго́лалъ є҆сѝ на́мъ; но та́кѡ молчи́ши глаго́лати съ на́ми: а҆ллилꙋ́їа.
Бж҃е бж҃е, призва́вый мѧ̀, ᲂу҆тѣше́нїе ны́нѣ бꙋ́ди до́мꙋ моемꙋ̀, пла́чь бо ве́лїй слꙋчи́сѧ и҆̀мъ: на мѧ́ бо взира́хꙋ всѝ, є҆диноро́дна мѧ̀ сі́и и҆мꙋ́ще. но ты̀ рожде́йсѧ ѿ мт҃ре дв҃ы, мт҃ре моеѧ̀ ᲂу҆трѡ́бы прохладѝ, и҆ ѡ҆росѝ се́рдце ѻ҆тца̀, и҆́мже: а҆ллилꙋ́їа.
Та́же конда́къ, гла́съ и҃: Со ст҃ы́ми ᲂу҆поко́й:
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ, попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки.
Припѣ́въ: Гдⷭ҇и, ᲂу҆поко́й младе́нца.
Напишѝ въ кни́зѣ сп҃са́емыхъ, ꙗ҆́кѡ чл҃вѣколю́бецъ ще́дрый, твоего̀ младе́нца, да ра́дꙋѧсѧ вопїе́тъ держа́вѣ твоеѧ̀ сла́вы: бл҃гослове́нъ є҆сѝ.
Свѣ́томъ твоегѡ̀ сло́ве лица̀ просвѣтѝ младе́нца твоего̀, вѣ́рою преста́вльшагосѧ ны́нѣ къ тебѣ̀ незрѣ́лымъ во́зрастомъ, и҆ воспѣ́вшаго тебѣ̀: гдⷭ҇и бж҃е, бл҃гослове́нъ є҆сѝ.
Сла́ва: Ско́рби вино́вно показа́сѧ лю́бѧщымъ тѧ̀ ны́нѣ разлꙋче́нїе твоѐ, но тебѣ̀ вои́стиннꙋ ра́дости и҆ весе́лїѧ хода́тайственно: наслѣ́диши бо младе́нче живо́тъ во вѣ́ки,
И҆ ны́нѣ, бг҃оро́диченъ: Ви́ждь ско́рбь мою̀ дв҃о, ю҆́же мѝ наведѐ мно́жество ѕѡ́лъ мои́хъ, и҆ пре́жде и҆схо́да ѡ҆хла́дꙋ мѝ пода́ждь мт҃рними мл҃твами, во є҆́же млⷭ҇тивꙋ мѝ бы́ти бг҃ꙋ.
Пѣ́снь и҃.
І҆рмо́съ: Седмери́цею пе́щь. халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею, сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.
Припѣ́въ: Гдⷭ҇и, ᲂу҆поко́й младе́нца.
Въ нѣ́дрѣхъ а҆враа́млихъ тѧ̀, въ селе́нїихъ поко́ѧ, и҆дѣ́же ра́дость пра́зднꙋющихъ всегда̀, въ мѣ́стѣхъ ѡ҆сла́бы, и҆дѣ́же є҆́сть вода̀ живꙋ́щаѧ, счини́тъ тѧ̀ хрⷭ҇то́съ на́съ ра́ди младе́нствовавый, пою́щихъ є҆мꙋ̀ непреста́ннѡ: сщ҃е́нницы воспо́йте, лю́дїе превозноси́те є҆го̀ во вѣ́ки.
Печа́ли на́мъ всевино́вное, и҆ слеза́мъ приснопа́мѧтное твоѐ разлꙋче́нїе вои́стиннꙋ бы́сть: пре́жде бо вкꙋше́нїѧ въ житїѝ се́мъ красо́тныхъ, ѡ҆ста́вилъ є҆сѝ зе́млю, и҆ роди́телей нѣ́дра: но ᲂу҆́бѡ а҆враа́мле тѧ̀ прїѧ́тъ нѣ́дро ꙗ҆́кѡ младе́нца, и҆ всѧ́кїѧ неприча́стна скве́рны.
Сла́ва: Что́ мѧ пла́чете младе́нца преста́вльшагосѧ; лежа́й вопїе́тъ неви́димѡ, нѣ́смь бо плаче́вный: младе́нцємъ бо ѡ҆предѣли́сѧ првⷣныхъ всѣ́хъ ра́дость, достѡ́йнаѧ слеза́мъ не содѣ́лавшымъ дѣла̀. хрⷭ҇тꙋ́ бо воспѣва́ютъ: свѧще́ннїи по́йте, лю́дїе превозноси́те є҆го̀ во вѣ́ки.
И҆ ны́нѣ, бг҃оро́диченъ: Въ по́мощь мою̀ бцⷣе воста́ни, вонмѝ мл҃твѣ мое́й, и҆ и҆зба́ви мѧ̀ лю́тагѡ ѡ҆сꙋжде́нїѧ, тѧ́жкагѡ и҆спыта́нїѧ, тьмы̀ и҆ ѻ҆гнѧ̀, и҆ скре́жета зꙋ́бнагѡ, бѣсо́вскагѡ же нало́га, и҆ всѧ́кїѧ нꙋ́жды, наде́ждо ненаде́жныхъ, животѐ ѿча́ѧнныхъ.
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀: ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
Припѣ́въ: Гдⷭ҇и, ᲂу҆поко́й младе́нца.
Хрⷭ҇тѐ младе́нствовавый кромѣ̀ премѣне́нїѧ, и҆ крⷭ҇тꙋ̀ прїѡбщи́выйсѧ во́лею, и҆ на ма́тєрнїѧ бѡлѣ́зни ро́ждшїѧ тѧ̀ воззрѣ́вый, печа́ль ѡ҆блегчѝ, и҆ болѣ́знь лю́тꙋю, младе́нца ᲂу҆ме́ршагѡ вѣ́рныхъ роди́телей: да сла́вимъ держа́вꙋ твою̀.
Посла́вый съ высоты̀ всецр҃ю̀, и҆ прїимы́й бл҃же́ннаго младе́нца, ꙗ҆́кѡ чи́стꙋю влⷣко пти́цꙋ въ гнѣ́зда нбⷭ҇наѧ, сп҃слъ є҆сѝ сегѡ̀ дꙋ́хъ ѿ сѣ́тей многови́дныхъ, и҆ съ првⷣными дꙋ́хи совокꙋпѝ, ᲂу҆слажда́ѧ црⷭ҇твїѧ твоегѡ̀.
Сла́ва: Ничто́же сотво́ршымъ сло́ве бж҃їй, младе́нцємъ по́далъ є҆сѝ селе́нїе нбⷭ҇ное: си́це бо бл҃говоли́лъ є҆сѝ бл҃же, съ тѣ́ми чи́слити созда́нїе твоѐ. младе́нцꙋ прїитѝ ны́нѣ къ тебѣ̀, болѣ́знь роди́телей са́мъ ѡ҆блегчѝ, ꙗ҆́кѡ всеще́дрый и҆ чл҃вѣколюби́вый.
И҆ ны́нѣ, бг҃оро́диченъ: Ѻ҆́комъ серде́чнымъ вы́нꙋ взира́ю къ тебѣ̀, мт҃рнюю и҆мꙋ́щей мл҃твꙋ, ко и҆з̾ тебѐ ро́ждшемꙋсѧ: тѧ́ бо пою̀ всечⷭ҇таѧ, ᲂу҆спѝ стра̑сти моеѧ̀ дꙋшѝ, ко ᲂу҆́трꙋ покаѧ́нїѧ воздви́гни мѧ̀ ѻ҆трокови́це, и҆ свѣ́томъ твои́мъ просвѣтѝ.
Та́же, є҆ктенїа̀ ма́лаѧ.
И҆ є҆ѯапостїла́рїй:
Ны́нѣ, ᲂу҆поко́ихсѧ, и҆ ѡ҆брѣто́хъ ѡ҆сла́бꙋ мно́гꙋ, ꙗ҆́кѡ преста́вихсѧ ѿ и҆стлѣ́нїѧ, и҆ преложи́хсѧ къ животꙋ̀: гдⷭ҇и, сла́ва тебѣ̀.
И҆ лю́дїе то́йжде.
Сті́хъ: Человѣ́къ ꙗ҆́кѡ трава̀, дні́е є҆гѡ̀ ꙗ҆́кѡ цвѣ́тъ се́льный:
Сті́хъ: Ꙗ҆́кѡ дꙋ́хъ про́йде въ не́мъ, и҆ не бꙋ́детъ:
Сті́хъ: И҆ и҆́стина гдⷭ҇нѧ пребыва́етъ во вѣ́къ.
И҆ на кі́йждо сті́хъ є҆ѯапостїла́рїй.
Та́же, Сла́ва, и҆ ны́нѣ: Ны́нѣ и҆збра́хъ бг҃омт҃рь ѻ҆трокови́цꙋ, ꙗ҆́кѡ роди́сѧ и҆з̾ неѧ̀ хрⷭ҇то́съ, всѣ́хъ и҆зба́витель: гдⷭ҇и, сла́ва тебѣ̀.
А҆́бїе же сщ҃е́нникъ возглаша́етъ:
Ꙗ҆́кѡ ст҃ъ є҆сѝ бж҃е на́шъ, и҆ на ст҃ы́хъ почива́еши, и҆ тебѣ̀ сла́вꙋ возсыла́емъ ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: а҆ми́нь.
И҆ пою́тъ: Ст҃ы́й бж҃е: Прокі́менъ, гла́съ ѕ҃:
Бл҃же́нъ пꙋ́ть, во́ньже по́йдеши дꙋшѐ:
Сті́хъ: Ѡ҆брати́сѧ дꙋшѐ моѧ̀ въ поко́й тво́й.
А҆по́столъ къ корі́нѳѧнѡмъ, зача́ло рѯ҃в.
Бра́тїе, не всѧ́ка пло́ть, та́же пло́ть: но и҆́на ᲂу҆́бѡ пло́ть человѣ́кѡмъ, и҆́на же пло́ть скотѡ́мъ, и҆́на же ры́бамъ, и҆́на же пти́цамъ. И҆ тѣлеса̀ нбⷭ҇наѧ, и҆ тѣлеса̀ зємна́ѧ: но и҆́на ᲂу҆́бѡ нбⷭ҇нымъ сла́ва и҆ и҆́на земны̑мъ. И҆́на сла́ва со́лнцꙋ, и҆ и҆́на сла́ва лꙋнѣ̀, и҆ и҆́на сла́ва ѕвѣзда́мъ: ѕвѣзда́ бо ѿ ѕвѣзды̀ ра́знствꙋетъ во сла́вѣ. Та́кожде и҆ воскр҃се́нїе ме́ртвыхъ: сѣ́етсѧ въ тлѣ́нїе, востае́тъ въ нетлѣ́нїи. Сѣ́етсѧ не въ че́сть, востае́тъ въ сла́вѣ: сѣ́етсѧ въ не́мощи, востае́тъ въ си́лѣ. Сѣ́етсѧ тѣ́ло дꙋше́вное, востае́тъ тѣ́ло дꙋхо́вное: є҆́сть тѣ́ло дꙋше́вное, и҆ є҆́сть тѣ́ло дꙋхо́вное. Та́кѡ и҆ пи́сано є҆́сть: бы́сть пе́рвый человѣ́къ а҆да́мъ въ дꙋ́шꙋ жи́вꙋ, послѣ́днїй а҆да́мъ въ дх҃ъ животворѧ́щъ.
Сті́хъ: Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.
Сті́хъ: Дꙋша̀ є҆гѡ̀ во бл҃ги́хъ водвори́тсѧ.
Є҆ѵⷢ҇лїе ѿ і҆ѡа́нна, зача́ло к҃а.
Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆́зъ є҆́смь хлѣ́бъ живо́тный, грѧды́й ко мнѣ̀, не и҆́мать взалка́тисѧ: и҆ вѣ́рꙋѧй въ мѧ̀, не и҆́мать вжажда́тисѧ никогда́же. Но рѣ́хъ ва́мъ: ꙗ҆́кѡ и҆ ви́дѣсте мѧ̀, и҆ не вѣ́рꙋете. Всѐ є҆́же да́стъ мнѣ̀ ѻ҆ц҃ъ, ко мнѣ̀ прїи́детъ: и҆ грѧдꙋ́щаго ко мнѣ̀ не и҆зженꙋ̀ во́нъ. ꙗ҆́кѡ снидо́хъ съ нб҃сѐ, не да творю̀ во́лю мою̀, но во́лю посла́вшагѡ мѧ̀ ѻ҆ц҃а̀. Се́ же є҆́сть во́лѧ посла́вшагѡ мѧ̀ ѻ҆ц҃а̀, да всѐ, є҆́же да́стъ мѝ, не погꙋблю̀ ѿ негѡ̀, но воскрⷭ҇шꙋ є҆̀ въ послѣ́днїй де́нь.
И҆ а҆́бїе быва́етъ послѣ́днее цѣлова́нїе, пѣвцє́мъ пою́щымъ стїхи̑ры сїѧ̑. Гла́съ и҃.
Подо́бенъ: Ѽ пресла́внагѡ чꙋдесѐ!
Ѽ кто̀ не воспла́четъ, ча́до моѐ, є҆́же ѿ житїѧ̀ сегѡ̀ плаче́вное твоѐ преставле́нїе! ꙗ҆́кѡ младе́нецъ незрѣ́лый ѿ ма́тернихъ ѡ҆б̾ѧ́тїй, ны́нѣ ꙗ҆́коже птене́цъ ско́рѡ ѿлетѣ́лъ є҆сѝ, и҆ къ созда́телю всѣ́хъ и҆збѣ́глъ є҆сѝ. ѽ ча́до, кто̀ не воспла́четъ, зрѧ̀ твоѐ ꙗ҆́сное лицѐ ᲂу҆вѧда́емо, є҆́же пре́жде ꙗ҆́кѡ крі́нъ кра́сный; ѽ кто̀ не возстене́тъ, ча́до моѐ, и҆ съ пла́чемъ не возопїе́тъ. мно́гагѡ твоегѡ̀ бл҃голѣ́пїѧ и҆ красоты̀ жи́тельства твоегѡ̀; ꙗ҆́коже бо кора́бль слѣ́да не и҆мы́й, си́це заше́лъ є҆сѝ ѿ ѻ҆́чїю ско́рѡ: прїиди́те дрꙋ́зи моѝ, срѡ́дницы и҆ бли́жнїи, вкꙋ́пѣ со мно́ю сего̀ цѣлꙋ́емъ, ко гро́бꙋ посыла́юще.
Сме́рть младе́нцємъ ѡ҆сла́ба: жите́йскихъ бо ѕѡ́лъ неприча́стни ꙗ҆ви́шасѧ, и҆ къ поко́ю приспѣ́ша, и҆ ра́достїю нбⷭ҇ною во а҆враа́млихъ нѣ́дрѣхъ ра́дꙋютсѧ, и҆ млⷣнєцъ ст҃ы́хъ бж҃е́ственнымъ ликѡ́мъ ны́нѣ свеселѧ́тсѧ, и҆ вѣ́рнѡ ликꙋ́ютъ, ꙗ҆́кѡ ѿ тлѣ́нїѧ грѣхолю́бнагѡ чи́сты ѿидо́ша.
Сла́ва, гла́съ ѕ҃:
Болѣ́знь а҆да́мꙋ бы́сть дре́ва вкꙋше́нїемъ дре́вле во є҆де́мѣ, є҆гда̀ ѕмі́й ꙗ҆́дъ и҆зблева̀. тѣ́мъ бо вни́де сме́рть всеро́днаѧ, снѣда́ющаѧ человѣ́ка. но прише́дъ влⷣка, низложѝ ѕмі́ѧ, и҆ ᲂу҆покое́нїе на́мъ дарова̀. къ немꙋ̀ ᲂу҆́бѡ возопїи́мъ: пощадѝ сп҃се, и҆ ꙗ҆̀же прїѧ́лъ є҆сѝ, со и҆збра́нными твои́ми ᲂу҆поко́й.
И҆ ны́нѣ, бг҃оро́диченъ: Преложе́нїе скорбѧ́щихъ, свобожде́нїе немощствꙋ́ющихъ сꙋ́щи бцⷣе дв҃о, сп҃са́й гра́дъ и҆ лю́ди, ра́тꙋемыхъ ми́ре, ѡ҆бꙋрева́емыхъ тишино̀, є҆ди́но предста́тельство вѣ́рныхъ.
Та́же, Трист҃о́е. Прест҃а́ѧ трⷪ҇це: Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:
Та́же тропарѝ: Со дꙋ́хи првⷣныхъ:
И҆ помина́етъ по ѻ҆бы́чаю, глаго́лѧ є҆ктенїю̀ вышепи́саннꙋю, и҆ мл҃твꙋ.
Та́же, дїа́конъ: Премꙋ́дрость.
Ли́къ: Чⷭ҇тнѣ́йшꙋю херꙋві̑мъ:
Сла́ва, и҆ ны́нѣ:
Гдⷭ҇и поми́лꙋй, три́жды. Бл҃гословѝ.
І҆ере́й же твори́тъ ѿпꙋ́стъ се́й:
Воскр҃сы́й и҆з̾ ме́ртвыхъ, и҆ живы́ми и҆ ме́ртвыми ѡ҆блада́ѧй, хрⷭ҇тѐ и҆́стинный бж҃е на́шъ, мл҃твами прест҃ы́ѧ твоеѧ̀ мт҃ре, и҆ всѣ́хъ ст҃ы́хъ твои́хъ, дꙋ́шꙋ ѿ на́съ преста́вленнагѡ млⷣнца, (и҆́мⷬ҇къ), въ ски́нїѧхъ ст҃ы́хъ вселѝ: и҆ съ пра́ведными причтѝ, ꙗ҆́кѡ бл҃гъ и҆ чл҃вѣколю́бецъ.
Ли́къ: а҆ми́нь.
По ѿпꙋ́стѣ же глаго́летъ і҆ере́й:
Вѣ́чнаѧ твоѧ̀ па́мѧть, достобл҃же́нне и҆ приснопомина́емый младе́нче, (и҆́мⷬ҇къ).
Ли́къ же пое́тъ, три́жды: Вѣ́чнаѧ па́мѧть.
Посе́мъ сщ҃е́нникъ глаго́летъ мл҃твꙋ сїю̀:
Ре́кшꙋ дїа́конꙋ: Гдⷭ҇ꙋ помо́лимсѧ.
И҆ пѣвцє́мъ: Гдⷭ҇и поми́лꙋй.
Хранѧ́й младе́нцы гдⷭ҇и, въ ны́нѣшнемъ житїѝ, въ бꙋ́дꙋщемъ же вѣ́цѣ ᲂу҆гото́вавый и҆̀мъ простра́нство, а҆враа́мово ло́но, и҆ по чистотѣ̀ а҆́гг҃льскаѧ свѣтоѡбра́знаѧ мѣста̀, въ ни́хже водворѧ́ютсѧ пра́ведныхъ дꙋ́си: ты̀ са́мъ влⷣко хрⷭ҇тѐ, дꙋ́шꙋ раба̀ твоегѡ̀ младе́нца, (и҆́мⷬ҇къ), прїимѝ съ ми́ромъ. ты́ бо ре́клъ є҆сѝ: ѡ҆ста́вите дѣ́ти прїитѝ ко мнѣ̀, таковы́хъ бо є҆́сть црⷭ҇тво нбⷭ҇ное. тебѣ́ бо подоба́етъ всѧ́каѧ сла́ва, че́сть и҆ поклоне́нїе, со ѻ҆ц҃е́мъ, и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ взе́мше тѣ́ло и҆́дꙋтъ ко гро́бꙋ пред̾идꙋ́щымъ і҆ере́ѡмъ и҆ дїа́конѡмъ и҆ всемꙋ̀ кли́рꙋ, пою́щымъ: Ст҃ы́й бж҃е:
Вложи́вше же мо́щи во гро́бъ, і҆ере́й нача́льствꙋѧй взе́мъ лопа́тꙋ, сы́плетъ зе́млю во гро́бъ глаго́лѧ:
Гдⷭ҇нѧ є҆́сть землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живꙋ́щїи на не́й.
И҆ ѿхо́дѧтъ бл҃годарѧ́ще бг҃а.
Коне́цъ погребе́нїю младе́нческомꙋ.