[глⷡ҇а ѳ҃і] Послѣ́дованїе ме́ртвенное над̾ сконча́вшимсѧ сщ҃е́нникомъ.

Є҆гда̀ кто̀ ѿ мїрски́хъ сщ҃е́нникѡвъ ѿи́детъ ко гдⷭ҇ꙋ, прихо́дѧтъ трѝ сщ҃е́нницы, и҆ сне́млютъ є҆го̀ со ѻ҆дра̀, и҆ полага́ютъ на землѝ на рогози́ницѣ. И҆ поне́же не подоба́етъ и҆змове́нꙋ бы́ти, ѡ҆бнаже́нꙋ ѿ сщ҃е́нникѡвъ, ѡ҆тира́ютъ є҆го̀ со є҆ле́емъ чи́стымъ. Та́же ѡ҆дѣва́ютъ є҆го̀ ѻ҆бы́чными є҆гѡ̀ ѻ҆де́ждами, пото́мъ же во всю̀ сщ҃е́нническꙋю ѻ҆де́ждꙋ, и҆ покрыва́ютъ лицѐ є҆гѡ̀ воздꙋ́хомъ, и҆ полага́ютъ ст҃о́е є҆ѵⷢ҇лїе над̾ ни́мъ. Та́же прихо́дѧтъ сщ҃е́нницы ѡ҆блаче́ны во сщ҃е́нничєскїѧ ѻ҆де́жды.

Предстоѧ́тель же твори́тъ: Бл҃гослове́нъ бг҃ъ на́шъ:

И҆ начина́ютъ сопредстоѧ́щїи: Ст҃ы́й бж҃е: Прест҃а́ѧ трⷪ҇це: И҆ Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:

И҆ а҆́бїе пою́тъ тропарѝ сїѧ̑, гла́съ д҃:

Со дꙋ́хи пра́ведныхъ:

Дїа́конъ глаго́летъ:

Поми́лꙋй на́съ бж҃е:

И҆ а҆́бїе во́зьмꙋтъ сщ҃е́нницы мо́щи, и҆ прино́сѧтъ ѧ҆̀ въ па́перть хра́ма, и҆ полага́ютъ ст҃о́е є҆ѵⷢ҇лїе верхꙋ̀ є҆гѡ̀, ꙗ҆́коже предрѣ́хомъ, и҆ подсвѣ́щники крестови́днѡ со свѣща́ми, и҆ начина́етъ пѣве́цъ:

Непоро́чнїи въ пꙋ́ть: а҆ллилꙋ́їа.

Во гла́съ ѕ҃.

Та́же, Бл҃же́ни непоро́чнїи:

По пе́рвой статїѝ, дїа́конъ:

Па́ки и҆ па́ки:

Посе́мъ начина́емъ вторꙋ́ю статїю̀, на гла́съ є҃, на ко́емждо же концѣ̀ стїха̀ глаго́лемъ: Поми́лꙋй раба̀ твоего̀.

Ли́къ начина́етъ: За́пѡвѣди твоѧ̑:

Поми́лꙋй раба̀ твоего̀.

Па́ки то́йже ли́къ: Рꙋ́цѣ твоѝ сотвори́стѣ мѧ̀:

По в҃-й статїѝ, дїа́конъ:

Па́ки и҆ па́ки:

И҆ па́ки начина́етъ тре́тїю статїю̀, на гла́съ г҃: И҆́мѧ твоѐ: а҆ллилꙋ́їа.

Па́ки то́йже ли́къ пое́тъ: При́зри на мѧ̀, и҆ поми́лꙋй мѧ̀:

По г҃-й статїѝ, и҆ по непоро́чныхъ тропарѣ́хъ, дїа́конъ:

Па́ки и҆ па́ки:

Та́же тропа́рь, гла́съ є҃: Поко́й сп҃се на́шъ съ пра́ведными раба̀ твоего̀, и҆ сего̀ вселѝ во дворы̀ твоѧ̑, ꙗ҆́коже є҆́сть пи́сано, презира́ѧ ꙗ҆́кѡ бл҃гъ прегрѣшє́нїѧ є҆гѡ̀, вѡ́льнаѧ и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.

Сла́ва, и҆ ны́нѣ:

Ѿ дв҃ы возсїѧ́вый мі́рꙋ хрⷭ҇тѐ бж҃е, сы́ны свѣ́та то́ю показа́вый, поми́лꙋй на́съ.

Та́же степє́нны, гла́съ ѕ҃:

На не́бо ѻ҆́чи моѝ возвожꙋ̀ къ тебѣ̀ сло́ве: ᲂу҆ще́дри мѧ̀, да живꙋ̀ тебѣ̀.

Поми́лꙋй на́съ ᲂу҆ничиже́нныхъ, ᲂу҆строѧ́ѧ бл҃гопотрє́бныѧ твоѧ̑ сосꙋ́ды, сло́ве.

Сла́ва: Ст҃о́мꙋ дх҃ꙋ, всѧ́каѧ всеспаси́тельнаѧ вина̀: а҆́ще ко́емꙋ се́й по достоѧ́нїю дхне́тъ, ско́рѡ взе́млетъ ѿ земны́хъ, восперѧ́етъ, возраща́етъ, ᲂу҆строѧ́етъ горѣ̀.

И҆ ны́нѣ, то́йже.

Та́же прокі́менъ, гла́съ ѕ҃:

Бл҃же́нъ пꙋ́ть, во́ньже и҆́деши дне́сь дꙋшѐ, ꙗ҆́кѡ ᲂу҆гото́васѧ тебѣ̀ мѣ́сто ᲂу҆покое́нїѧ.

Сті́хъ: Ѡ҆брати́сѧ дꙋшѐ моѧ̀ въ поко́й тво́й, ꙗ҆́кѡ гдⷭ҇ь бл҃го сотворѝ тебѣ̀.

Къ солꙋ́нѧнѡмъ посла́нїѧ ст҃а́гѡ а҆по́стола па́ѵла чте́нїе, зача́ло с҃ѻ:

Бра́тїе, не хощꙋ̀ ва́съ не вѣ́дѣти ѡ҆ ᲂу҆ме́ршихъ, да не скорбитѐ, ꙗ҆́коже и҆ про́чїи не и҆мꙋ́щїи ᲂу҆пова́нїѧ. А҆́ще бо вѣ́рꙋемъ, ꙗ҆́кѡ і҆и҃съ ᲂу҆́мре и҆ воскр҃се, та́кѡ и҆ бг҃ъ ᲂу҆ме́ршыѧ ѡ҆ і҆и҃сѣ приведе́тъ съ ни́мъ. Сїе́ бо ва́мъ глаго́лемъ сло́вомъ гдⷭ҇нимъ, ꙗ҆́кѡ мы̀ живꙋ́щїи ѡ҆ста́вшїи въ прише́ствїе гдⷭ҇не, не и҆́мамы предвари́ти ᲂу҆ме́ршихъ. Ꙗ҆́кѡ са́мъ гдⷭ҇ь въ повелѣ́нїи во гла́сѣ а҆рха́гг҃ловѣ, и҆ въ трꙋбѣ̀ бж҃їи сни́детъ съ нб҃сѐ, и҆ ме́ртвїи ѡ҆ хрⷭ҇тѣ̀ воскрⷭ҇нꙋтъ пе́рвѣе. Пото́мъ же мы̀ живꙋ́щїи ѡ҆ста́вшїи, кꙋ́пнѡ съ ни́ми восхище́ни бꙋ́демъ на ѻ҆́блацѣхъ, въ срѣ́тенїе гдⷭ҇не на воздꙋ́сѣ: и҆ та́кѡ всегда̀ съ гдⷭ҇емъ бꙋ́демъ.

Сщ҃е́нникъ: Ми́ръ тѝ.

Чте́цъ: И҆ дꙋ́хови твоемꙋ̀.

Чте́цъ, ѱало́мъ дв҃довъ.

А҆ллилꙋ́їа, гла́съ и҃:

Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Дїа́конъ: Премꙋ́рость, про́сти ᲂу҆слы́шимъ ст҃а́гѡ є҆ѵⷢ҇лїа.

Сщ҃е́нникъ: Ѿ і҆ѡа́нна ст҃а́гѡ є҆ѵⷢ҇лїа чте́нїе. Зача́ло ѕ҃і.

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆ми́нь а҆ми́нь глаго́лю ва́мъ, ꙗ҆́кѡ слꙋ́шаѧй словесѐ моегѡ̀ и҆ вѣ́рꙋѧй посла́вшемꙋ мѧ̀, и҆́мать живо́тъ вѣ́чный: и҆ на сꙋ́дъ не прїи́детъ, но пре́йдетъ ѿ сме́рти въ живо́тъ. А҆ми́нь а҆ми́нь глаго́лю ва́мъ: ꙗ҆́кѡ грѧде́тъ ча́съ, и҆ ны́нѣ є҆́сть, є҆гда̀ ме́ртвїи ᲂу҆слы́шатъ гла́съ сн҃а бж҃їѧ, и҆ ᲂу҆слы́шавше ѡ҆живꙋ́тъ. Ꙗ҆́коже бо ѻ҆ц҃ъ и҆́мать живо́тъ въ себѣ̀, та́кѡ да́стъ и҆ сн҃ови живо́тъ и҆мѣ́ти въ себѣ̀: И҆ ѻ҆́бласть да́стъ є҆мꙋ̀, и҆ сꙋ́дъ твори́ти: ꙗ҆́кѡ сн҃ъ чл҃вѣ́чь є҆́сть, не диви́тесѧ семꙋ̀. Ꙗ҆́кѡ грѧде́тъ ча́съ, во́ньже всѝ сꙋ́щїи во гробѣ́хъ ᲂу҆слы́шатъ гла́съ сн҃а бж҃їѧ: И҆ и҆зы́дꙋтъ сотво́ршїи бл҃га̑ѧ въ воскреше́нїе живота̀, а҆ сотво́ршїи ѕла̑ѧ въ воскреше́нїе сꙋда̀. Не могꙋ̀ а҆́зъ ѡ҆ себѣ̀ твори́ти ничесѡ́же: ꙗ҆́коже слы́шꙋ, сꙋждꙋ̀, и҆ сꙋ́дъ мо́й пра́веденъ є҆́сть: ꙗ҆́кѡ не и҆щꙋ̀ во́ли моеѧ̀, но во́ли посла́вшагѡ мѧ̀ ѻ҆ц҃а̀.

Та́же дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

И҆ сщ҃е́нникъ мл҃твꙋ.

Влⷣко гдⷭ҇и бж҃е на́шъ, є҆ди́не и҆мѣ́ѧй безсме́ртїе, во свѣ́тѣ живы́й непристꙋ́пномъ: ᲂу҆бива́ѧй и҆ ѡ҆животворѧ́ѧй, низводѧ́й во а҆́дъ и҆ возводѧ́й. Ты̀ премꙋ́дростїю созда́лъ є҆сѝ человѣ́ка, и҆ па́ки въ зе́млю того̀ возвраща́еши, дꙋше́вный до́лгъ и҆стѧзꙋ́ѧй: тебѐ мо́лимъ, прїимѝ дꙋ́шꙋ раба̀ твоегѡ̀, и҆ ᲂу҆поко́й є҆го̀ въ нѣ́дрѣхъ а҆враа́ма, и҆ і҆саа́ка, и҆ і҆а́кѡва. и҆ да́ждь є҆мꙋ̀ вѣне́цъ пра́вды твоеѧ̀, ча́сть сп҃са́емыхъ, въ сла́вꙋ и҆збра́нныхъ твои́хъ: да ѡ҆ ни́хже трꙋди́сѧ въ мі́рѣ се́мъ и҆́мене твоегѡ̀ ра́ди, прїи́метъ бога́тное воздаѧ́нїе во ѻ҆би́телехъ ст҃ы́хъ твои́хъ бл҃года́тїю и҆ щедро́тами, и҆ человѣколю́бїемъ є҆диноро́днагѡ сн҃а твоегѡ̀, гдⷭ҇а на́шегѡ і҆и҃са хрⷭ҇та̀, а҆ми́нь.

Сѣда́льны, гла́съ в҃:

Дне́сь разлꙋча́юсѧ ѿ сро́дства, и҆ къ тебѣ̀ прибѣга́ю є҆ди́номꙋ безгрѣ́шномꙋ: въ селе́нїихъ пра́ведныхъ со и҆збра́нными твои́ми ᲂу҆поко́й.

Та́же, глаго́летъ ѱало́мъ к҃в.

Гдⷭ҇ь пасе́тъ мѧ̀, и҆ ничто́же мѧ̀ лиши́тъ:

А҆ллилꙋ́їа, три́жды, повторѧ́юще и҆ прѡ́чаѧ ѱалма̀, на кі́йждо сті́хъ а҆ллилꙋ́їа.

Та́же настоѧ́щїй тропа́рь, гла́съ в҃:

Поне́же всѝ къ то́йже нꙋ́димсѧ ѻ҆би́тели, и҆ под̾ то́йжде по́йдемъ ка́мень, и҆ са́ми пра́хъ по ма́лѣ бꙋ́демъ: преста́вльшемꙋсѧ поко́ѧ ѿ хрⷭ҇та̀ про́симъ. сицево́е бо на́ше житїѐ, бра́тїе, сїѐ на землѝ и҆гра́лище, не сꙋ́щымъ бы́ти, и҆ бы́вшымъ растлѣ́тисѧ: со́нїе є҆смы̀ непостоѧ́нное, дꙋнове́нїемъ неѡдержи́мое, паре́нїе птенца̀ преходѧ́щагѡ, кора́бль на мо́ри слѣ́да не и҆мы́й. тѣ́мже возопїи́мъ къ безсме́ртномꙋ цр҃ю̀: гдⷭ҇и, безконе́чнагѡ твоегѡ̀ бл҃же́нства сподо́би є҆го̀.

Прокі́менъ, гла́съ ѕ҃: Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Сті́хъ: Тебѣ̀ подоба́етъ пѣ́снь бж҃е въ сїѡ́нѣ.

А҆по́столъ къ ри́млѧнѡмъ, зача́ло п҃ѳ:

Бра́тїе, ꙗ҆́коже є҆ди́нѣмъ человѣ́комъ грѣ́хъ въ мі́ръ вни́де, и҆ грѣхо́мъ сме́рть: и҆ та́кѡ сме́рть во всѧ̑ человѣ́ки вни́де, въ не́мже всѝ согрѣши́ша. До зако́на бо грѣ́хъ бѣ̀ въ мі́рѣ: грѣ́хъ же не вмѣнѧ́шесѧ, не сꙋ́щꙋ зако́нꙋ. Но ца́рствова сме́рть ѿ а҆да́ма да́же до мѡѷсе́а, и҆ над̾ несогрѣ́шшими, по подо́бїю престꙋпле́нїѧ а҆да́мова, и҆́же є҆́сть ѡ҆́бразъ бꙋ́дꙋщагѡ. Но не ꙗ҆́коже прегрѣше́нїе, та́кѡ и҆ да́ръ. а҆́ще бо прегрѣше́нїемъ є҆ди́нагѡ мно́зи ᲂу҆мро́ша: мно́жае па́че бл҃года́ть бж҃їѧ, и҆ да́ръ бл҃года́тїю є҆ди́нагѡ человѣ́ка і҆и҃са хрⷭ҇та̀, во мно́гихъ преизли́шествова. И҆ не ꙗ҆́коже є҆ди́нѣмъ согрѣ́шшимъ, дарова́нїе: грѣ́хъ бо и҆з̾ є҆ди́нагѡ бо ѡ҆сꙋжде́нїе, да́ръ же ѿ мно́гихъ прегрѣше́нїй, во ѡ҆правда́нїе. А҆́ще бо є҆ди́нагѡ прегрѣше́нїемъ, сме́рть ца́рствова є҆ди́нѣмъ: мно́жае па́че и҆збы́токъ бл҃года́ти, и҆ да́ръ пра́вды прїе́млюще, въ жи́зни воцарѧ́тсѧ є҆ди́нѣмъ і҆и҃съ хрⷭ҇то́мъ. Тѣ́мже ᲂу҆́бѡ, ꙗ҆́коже є҆ди́нагѡ прегрѣше́нїемъ во всѧ̑ человѣ́ки вни́де ѡ҆сꙋжде́нїе: та́коже и҆ є҆ди́нагѡ ѡ҆правда́нїемъ во всѧ̑ человѣ́ки вни́де ѡ҆правда́нїе жи́зни. Ꙗ҆́коже бо ѡ҆слꙋша́нїемъ є҆ди́нагѡ человѣ́ка грѣ́шни бы́ша мно́зи: си́це и҆ послꙋша́нїемъ є҆ди́нагѡ пра́ведни бꙋ́дꙋтъ мно́зи. Зако́нъ же привни́де, да ᲂу҆мно́житсѧ прегрѣше́нїе: и҆дѣ́же бо ᲂу҆мно́жисѧ грѣ́хъ, преизбы́точествова бл҃года́ть. Да ꙗ҆́коже ца́рствова грѣ́хъ во сме́рть: та́коже и҆ бл҃года́ть воцари́тсѧ пра́вдою въ жи́знь вѣ́чнꙋю і҆и҃съ хрⷭ҇то́мъ гдⷭ҇емъ на́шимъ.

А҆ллилꙋ́їа, гла́съ ѕ҃:

Сті́хъ: Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Є҆ѵⷢ҇лїе ѿ і҆ѡа́нна, зача́ло є҃і:

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: ѻ҆ц҃ъ мо́й досе́лѣ дѣ́лаетъ и҆ а҆́зъ дѣ́лаю. Сегѡ́ же ра́ди па́че и҆ска́хꙋ є҆го̀ і҆ꙋде́є ᲂу҆би́ти, ꙗ҆́кѡ не то́кмѡ разорѧ́ше сꙋббѡ́тꙋ, но и҆ ѻ҆ц҃а̀ своего̀ глаго́лаше бг҃а, ра́венъ сѧ̀ творѧ̀ бг҃ꙋ. Ѿвѣща́въ же і҆и҃съ, и҆ речѐ и҆̀мъ: а҆ми́нь а҆ми́нь глаго́лю ва́мъ: не мо́жетъ сн҃ъ твори́ти ѡ҆ себѣ̀ ничесѡ́же, а҆́ще не є҆́же ви́дитъ ѻ҆ц҃а̀ творѧ́ща: ꙗ҆̀же бо ѻ҆́нъ твори́тъ, сїѧ̑ и҆ сн҃ъ та́кожде твори́тъ. Ѻ҆ц҃ъ бо лю́битъ сн҃а, и҆ всѧ̑ показꙋ́етъ є҆мꙋ̀, ꙗ҆̀же са́мъ твори́тъ: и҆ бѡ́льша си́хъ пока́жетъ є҆мꙋ̀ дѣла̀, да вы̀ чꙋдите́сѧ. Ꙗ҆́коже бо ѻ҆ц҃ъ воскреша́етъ мє́ртвыѧ и҆ живи́тъ: та́кѡ и҆ сн҃ъ, и҆̀хже хо́щетъ, живи́тъ. Ѻ҆ц҃ъ бо не сꙋ́дитъ никомꙋ́же, но сꙋ́дъ ве́сь да́стъ сн҃ови: Да всѝ чтꙋ́тъ сн҃а, ꙗ҆́коже чтꙋ́тъ ѻ҆ц҃а̀: а҆ и҆́же не чти́тъ сн҃а, не чти́тъ ѻ҆ц҃а̀ посла́вшагѡ є҆го̀. А҆ми́нь а҆ми́нь глаго́лю ва́мъ: ꙗ҆́кѡ слꙋ́шаѧй словесѐ моегѡ̀ и҆ вѣ́рꙋѧй посла́вшемꙋ мѧ̀, и҆́мать живо́тъ вѣ́чный, и҆ на сꙋ́дъ не прїи́детъ: но пре́йдетъ ѿ сме́рти въ живо́тъ.

Та́же дїа́конъ: Гдⷭ҇ꙋ помо́лимсѧ.

И҆ сщ҃е́нникъ:

Бл҃годари́мъ тѧ̀ гдⷭ҇и бж҃е на́шъ, ꙗ҆́кѡ твоѐ то́чїю є҆́сть є҆́же жи́ти безсме́ртнѣ, и҆ сла́ва непостижи́ма, и҆ чл҃вѣколю́бїе неизрече́нно, и҆ црⷭ҇тво непрее́мно, и҆ лицемѣ́рїѧ нѣ́сть ᲂу҆ тебѐ: всѣ̑мъ бо человѣ́кѡмъ ѻ҆́бщїи житїѧ̀ счини́лъ є҆сѝ предѣ́лъ, житїю̀ и҆спо́лншꙋсѧ. тѣ́мже тѧ̀ про́симъ гдⷭ҇и: раба̀ твоего̀, и҆ сослꙋжи́телѧ на́шего бы́вшаго, (и҆́мⷬ҇къ), въ наде́ждѣ воскрⷭ҇нїѧ жи́зни вѣ́чныѧ ᲂу҆со́пшаго, въ нѣ́дрѣхъ а҆враа́ма, и҆ і҆саа́ка, и҆ і҆а́кѡва ᲂу҆поко́й. ꙗ҆́коже на землѝ въ цр҃кви слꙋжи́телѧ того̀ поста́вилъ є҆сѝ, та́кѡ и҆ въ нбⷭ҇номъ твое́мъ же́ртвенницѣ покажѝ гдⷭ҇и: поне́же въ человѣ́цѣхъ дх҃о́вныхъ досто́инствомъ сего̀ ᲂу҆краси́лъ є҆сѝ, и҆ во а҆́гг҃льскꙋю сла́вꙋ неѡсꙋжде́нна того̀ прїимѝ: са́мъ на землѝ жи́знь є҆гѡ̀ просла́вилъ є҆сѝ, са́мъ же и҆ и҆схо́дъ житїѧ̀ є҆гѡ̀, во вхо́дѣ ст҃ы́хъ твои́хъ пра́ведныхъ вчинѝ: дꙋ́хъ є҆гѡ̀ со всѣ́ми ѿ вѣ́ка тебѣ̀ бл҃гоꙋгоди́вшими счислѝ.

Ꙗ҆́кѡ ты̀ є҆сѝ воскрⷭ҇нїе, и҆ живо́тъ, и҆ поко́й ᲂу҆со́пшагѡ раба̀ твоегѡ̀, (и҆́мⷬ҇къ), хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

А҆нтїфѡ́нъ в҃:

А҆́ще не гдⷭ҇ь бы бы́лъ въ на́съ, никто́же ѿ на́съ проти́вꙋ возмо́глъ бы вра̑жїимъ бра́немъ ѡ҆долѣ́ти: побѣжда́ющїи бо ѿ здѣ̀ возно́сѧтсѧ.

Зꙋбы̀ и҆́хъ да не ꙗ҆́та бꙋ́детъ дꙋша̀ моѧ̀ ꙗ҆́кѡ птене́цъ, сло́ве. ᲂу҆вы̀ мнѣ̀, ка́кѡ и҆́мамъ ѿ врага̀ и҆збы́ти грѣхолюби́въ сы́й!

Сла́ва: Ст҃ы́мъ дх҃омъ, ѡ҆боже́нїе всѣ́хъ, бл҃говоле́нїе, ра́зꙋмъ, ми́ръ и҆ бл҃гослове́нїе: равнодѣ́тельный бо є҆́сть ѻ҆ц҃ꙋ̀ и҆ сло́вꙋ.

И҆ ны́нѣ, то́йже.

Гдⷭ҇нѧ землѧ̀ и҆ и҆сполне́нїе є҆ѧ̀.

А҆ллилꙋ́їа, три́жды, повторѧ́юще и҆ прѡ́чаѧ ѱалма̀.

Сла́ва, а҆ллилꙋ́їа: И҆ ны́нѣ, а҆ллилꙋ́їа.

Тропа́рь, гла́съ в҃:

Въ вѣ́рѣ, и҆ наде́ждѣ, и҆ любвѝ, и҆ кро́тости, и҆ чистотѣ̀, и҆ въ сщ҃е́нническомъ досто́инствѣ бл҃гоче́стнѡ пожи́лъ є҆сѝ, приснопа́мѧтне. тѣ́мже тѧ̀ превѣ́чный бг҃ъ, є҆мꙋ́же и҆ рабо́талъ є҆сѝ, са́мъ вчини́тъ дꙋ́хъ тво́й, въ мѣ́стѣ свѣ́тлѣ и҆ кра́снѣ, и҆дѣ́же пра́веднїи ᲂу҆покоева́ютсѧ: и҆ полꙋчи́ши на сꙋдѣ̀ хрⷭ҇то́вѣ ѡ҆ставле́нїе, и҆ ве́лїю млⷭ҇ть.

Сѣда́ленъ, гла́съ є҃:

Вѣ́си бж҃е на́шъ, ꙗ҆́кѡ во грѣсѣ́хъ роди́хомсѧ: тѣ́мже тѧ̀ мо́лимъ, преста́вльшагосѧ ѿ на́съ ᲂу҆поко́й, презира́ѧ ꙗ҆́кѡ бл҃гъ согрѣшє́нїѧ, ꙗ҆̀же ꙗ҆́кѡ человѣ́къ сме́ртный въ житїѝ содѣ́ѧ, мл҃твами бцⷣы, є҆ди́не чл҃вѣколю́бче.

Прокі́менъ, гла́съ ѕ҃:

Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Сті́хъ: Па́мѧть є҆гѡ̀ въ ро́дъ и҆ ро́дъ.

А҆по́столъ къ корі́нѳѧнѡмъ, зача́ло рн҃и.

Бра́тїе, сказꙋ́ю ва́мъ бл҃говѣствова́нїе, є҆́же бл҃говѣсти́хъ ва́мъ, є҆́же и҆ прїѧ́сте, въ не́мже и҆ стоитѐ: И҆́мже и҆ сп҃са́етесѧ, ка́цѣмъ сло́вомъ бл҃говѣсти́хъ ва́мъ, а҆́ще содержитѐ, ра́звѣ а҆́ще не всꙋ́е вѣ́ровасте. Преда́хъ бо ва́мъ и҆спе́рва, є҆́же и҆ прїѧ́хъ, ꙗ҆́кѡ хрⷭ҇то́съ ᲂу҆́мре грѣ̑хъ на́шихъ ра́ди, по писа́нїємъ: И҆ ꙗ҆́кѡ погребе́нъ бы́сть, и҆ ꙗ҆́кѡ воста̀ въ тре́тїй де́нь, по писа́нїємъ: И҆ ꙗ҆́кѡ ꙗ҆ви́сѧ ки́фѣ, та́же є҆динона́десѧтимъ. Пото́мъ же ꙗ҆ви́сѧ бо́лѣ пѧтѝ сѡ́тъ бра́тїѧмъ є҆ди́ною, ѿ ни́хже мно́жайшїи пребыва́ютъ досе́лѣ, нѣ́цыи же и҆ почи́ша. Пото́мъ же ꙗ҆ви́сѧ і҆а́кѡвꙋ, та́же а҆пⷭ҇лѡмъ всѣ̑мъ. Послѣди́ же всѣ́хъ, ꙗ҆́кѡ нѣ́коемꙋ и҆́звергꙋ, ꙗ҆ви́сѧ и҆ мнѣ̀. а҆́зъ бо є҆́смь мні́й а҆пⷭ҇лѡвъ, и҆́же нѣ́смь досто́инъ нарещи́сѧ а҆пⷭ҇лъ, занѐ гони́хъ цр҃ковь бж҃їю. Бл҃года́тїю же бж҃їею є҆́смь, є҆́же є҆́смь: и҆ бл҃года́ть є҆гѡ̀, ꙗ҆́же во мнѣ̀, не тща̀ бы́сть, но па́че всѣ́хъ и҆̀хъ потрꙋди́хсѧ: не а҆́зъ же, но бл҃года́ть бж҃їѧ ꙗ҆́же со мно́ю. А҆́ще ᲂу҆́бѡ а҆́зъ, а҆́ще ли ѻ҆нѝ, та́кѡ проповѣ́дꙋемъ, и҆ та́кѡ вѣ́ровасте.

А҆ллилꙋ́їа: Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Є҆ѵⷢ҇лїе ѿ і҆ѡа́нна, зача́ло к҃а.

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆́зъ є҆́смь хлѣ́бъ живо́тный: грѧды́й ко мнѣ̀, не и҆́мать взалка́тисѧ: и҆ вѣ́рꙋѧй въ мѧ̀, не и҆́мать вжажда́тисѧ никогда́же. Но рѣ́хъ ва́мъ, ꙗ҆́кѡ и҆ ви́дѣсте мѧ̀, и҆ не вѣ́рꙋете. Всѐ є҆́же да́стъ мнѣ̀ ѻ҆ц҃ъ, ко мнѣ̀ прїи́детъ: и҆ грѧдꙋ́щаго ко мнѣ̀ не и҆зженꙋ̀ во́нъ. ꙗ҆́кѡ снидо́хъ съ нб҃сѐ, не да творю̀ во́лю мою̀, но во́лю посла́вшагѡ мѧ̀ ѻ҆ц҃а̀. Се́ же є҆́сть во́лѧ посла́вшагѡ мѧ̀ ѻ҆ц҃а̀, да всѐ, є҆́же да́стъ мѝ, не погꙋблю̀ ѿ негѡ̀, но воскрешꙋ̀ є҆̀ въ послѣ́днїй де́нь.

Та́же дїа́конъ: Гдⷭ҇ꙋ помо́лимсѧ.

И҆ сщ҃е́нникъ мл҃твꙋ сїю̀:

Гдⷭ҇и си́лъ, скорбѧ́щихъ ра́досте, и҆ пла́чꙋщихъ ᲂу҆тѣше́нїе, и҆ всѣ́хъ въ малодꙋ́шїи сꙋ́щихъ застꙋпле́нїе сы́й: пла́чемъ ᲂу҆со́пшагѡ содержи̑мыѧ, твои́мъ бл҃гоꙋтро́бїемъ ᲂу҆тѣ́шивъ, всѧ́кꙋю болѣ́знь слежа́щꙋю въ сердца́хъ и҆́хъ и҆сцѣлѝ, и҆ раба̀ твоего̀, (и҆́мⷬ҇къ), въ наде́ждѣ воскрⷭ҇нїѧ жи́зни вѣ́чныѧ ᲂу҆со́пшаго, въ нѣ́дрѣхъ а҆враа́млихъ ᲂу҆поко́й.

Ꙗ҆́кѡ ты̀ є҆сѝ воскрⷭ҇нїе, живо́тъ и҆ ᲂу҆покое́нїе раба̀ твоегѡ̀, (и҆́мⷬ҇къ), хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

А҆нтїфѡ́нъ г҃:

Надѣ́ющїисѧ на гдⷭ҇а врагѡ́мъ стра́шни и҆ всѣ̑мъ ди́вни, горѣ́ бо зрѧ́тъ.

Въ беззакѡ́нїѧ рꙋ́къ свои́хъ, пра́ведныхъ жре́бїй, помо́щника тѧ̀ и҆мѣ́ѧй сп҃се, не простира́етъ.

Сла́ва: Ст҃а́гѡ дх҃а держа́ва на всѣ́хъ: є҆мꙋ́же вы̑шнѧѧ вѡ́инства покланѧ́ютсѧ, со всѧ́кимъ дыха́нїемъ до́льнимъ.

И҆ ны́нѣ, то́йже: Ко́ль возлю́бленна селє́нїѧ твоѧ̑ гдⷭ҇и си́лъ:

А҆ллилꙋ́їа, три́жды, повторѧ́юще по чи́нꙋ и҆ прѡ́чаѧ ѱалма̀.

Та́же тропа́рь, гла́съ ѕ҃:

Бра́тїе моѝ возлю́бленнїи, не забыва́йте мѧ̀, є҆гда̀ пое́те гдⷭ҇а: но помина́йте и҆ бра́тство, и҆ моли́те бг҃а, да ᲂу҆поко́итъ мѧ̀ съ пра́ведными гдⷭ҇ь.

Тропа́рь, гла́съ ѕ҃:

Напра́снаѧ наста̀ на мѧ̀ сме́рть, и҆ разлꙋчи́ла мѧ̀ є҆́сть ѿ свои́хъ мои́хъ дне́сь: но преста́вивый мѧ̀ хрⷭ҇тѐ, въ мѣ́стѣхъ прохла́дныхъ ᲂу҆поко́й.

Поми́лꙋй на́съ гдⷭ҇и, поми́лꙋй на́съ, всѧ́кагѡ бо ѿвѣ́та недоꙋмѣ́юще, сїю̀ тѝ мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.

Сла́ва: Гдⷭ҇и, поми́лꙋй на́съ, на тѧ́ бо ᲂу҆пова́хомъ, не прогнѣ́вайсѧ на ны̀ ѕѣлѡ̀. нижѐ помѧнѝ беззако́нїй на́шихъ: но при́зри и҆ ны́нѣ ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ вра̑гъ на́шихъ. ты́ бо є҆сѝ бг҃ъ на́шъ, и҆ мы̀ лю́дїе твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.

И҆ ны́нѣ, бг҃оро́диченъ: Млⷭ҇рдїѧ двє́ри ѿве́рзи на́мъ, бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нїе ро́да хрⷭ҇тїа́нскагѡ.

Прокі́менъ, гла́съ ѕ҃:

Дꙋша̀ є҆гѡ̀ во бл҃ги́хъ водвори́тсѧ.

Сті́хъ: Къ тебѣ̀ гдⷭ҇и воззовꙋ̀:

А҆по́столъ къ корі́нѳѧнѡмъ, зача́ло р҃ѯ.

Бра́тїе, хрⷭ҇то́съ воста̀ ѿ ме́ртвыхъ нача́токъ ᲂу҆ме́ршымъ бы́сть: Поне́же бо человѣ́комъ сме́рть бы́сть, и҆ человѣ́комъ воскрⷭ҇нїе ме́ртвыхъ. Ꙗ҆́коже бо ѡ҆ а҆да́мѣ всѝ ᲂу҆мира́ютъ, та́кожде и҆ ѡ҆ хрⷭ҇тѣ̀ всѝ ѡ҆живꙋ́тъ. Ко́ждо же во свое́мъ чинꙋ̀: нача́токъ хрⷭ҇то́съ, пото́мъ же хрⷭ҇тꙋ̀ вѣ́ровавшїи въ прише́ствїи є҆гѡ̀. Та́же кончи́на, є҆гда̀ преда́стъ црⷭ҇тво бг҃ꙋ и҆ ѻ҆ц҃ꙋ̀, є҆гда̀ и҆спраздни́тъ всѧ́ко нача́льство, и҆ всѧ́кꙋ вла́сть и҆ си́лꙋ. Подоба́етъ бо є҆мꙋ̀ ца́рствовати, до́ндеже положи́тъ всѧ̑ врагѝ под̾ нога́ма свои́ма. Послѣ́днїй же вра́гъ и҆спраздни́тсѧ, сме́рть: Всѧ̑ бо покорѝ под̾ но́зѣ є҆гѡ̀, внегда́ же рещѝ, ꙗ҆́кѡ всѧ̑ покорє́на сꙋ́ть є҆мꙋ̀, ꙗ҆́вѣ ꙗ҆́кѡ ра́звѣ поко́ршагѡ є҆мꙋ̀ всѧ̑. Є҆гда́ же покори́тъ є҆мꙋ̀ всѧ́чєскаѧ, тогда̀ и҆ са́мъ сн҃ъ покори́тсѧ поко́ршемꙋ є҆мꙋ̀ всѧ́чєскаѧ: да бꙋ́детъ бг҃ъ всѧ́чєскаѧ во всѣ́хъ.

А҆ллилꙋ́їа: Бл҃же́нъ мꙋ́жъ боѧ́йсѧ гдⷭ҇а.

Сті́хъ: Си́льно на землѝ бꙋ́детъ сѣ́мѧ є҆гѡ̀.

Є҆ѵⷢ҇лїе ѿ і҆ѡа́нна, зача́ло к҃в.

Речѐ гдⷭ҇ь ко прише́дшымъ къ немꙋ̀ і҆ꙋде́ѡмъ: сѐ є҆́сть во́лѧ посла́вшагѡ мѧ̀, да всѧ́къ ви́дѧй сн҃а, и҆ вѣ́рꙋѧй въ него̀, и҆́мать живо́тъ вѣ́чный: и҆ воскрешꙋ̀ є҆го̀ а҆́зъ въ послѣ́днїй де́нь. Ропта́хꙋ ᲂу҆́бѡ і҆ꙋде́є ѡ҆ не́мъ, ꙗ҆́кѡ речѐ: а҆́зъ є҆́смь хлѣ́бъ сше́дый съ нб҃сѐ: И҆ глаго́лахꙋ: не се́й ли є҆́сть і҆и҃съ сы́нъ і҆ѡ́сифовъ, є҆мꙋ́же мы̀ зна́емъ ѻ҆тца̀ и҆ мт҃рь; ка́кѡ ᲂу҆́бѡ глаго́летъ се́й, ꙗ҆́кѡ съ нб҃сѐ снидо́хъ; Ѿвѣща̀ ᲂу҆́бѡ і҆и҃съ, и҆ речѐ и҆̀мъ: не ропщи́те междꙋ̀ собо́ю: Никто́же мо́жетъ прїитѝ ко мнѣ̀, а҆́ще не ѻ҆ц҃ъ посла́вый мѧ̀ привлече́тъ є҆го̀, и҆ а҆́зъ воскрешꙋ̀ є҆го̀ въ послѣ́днїй де́нь.

Та́же бл҃жє́нны, во гла́съ в҃:

Во црⷭ҇твїи твое́мъ, помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.

Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.

Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.

Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.

Бл҃же́ни а҆́лчꙋщїи, и҆ жа́ждꙋщїи пра́вды, ꙗ҆́кѡ ті́и насы́тѧтсѧ.

Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.

Дре́вле ᲂу҆́бѡ а҆да́мъ, вкꙋси́вый дре́ва снѣ́днагѡ, и҆з̾ раѧ̀ и҆згна́нъ бы́сть: разбо́йникъ же на крⷭ҇тѣ̀ повѣ́шенъ, бг҃а тѧ̀ и҆сповѣ́давъ, въ ра́й всели́сѧ: и҆ мы̀ спа́сшїисѧ стра́стїю твое́ю влⷣко, разбо́йника подража́юще, вѣ́рою вопїе́мъ: помѧнѝ и҆ на́съ, є҆гда̀ прїи́деши во црⷭ҇твїи твое́мъ.

Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.

Пе́рсть взе́мъ ѿ землѝ созда́вый мѧ̀, тѣ́ло моѐ созда́лъ є҆́сть бж҃е́ственнымъ хотѣ́нїемъ: дꙋ́шꙋ же живоно́снымъ дꙋнове́нїемъ вдохнꙋ́въ, вложѝ повелѣ́нїемъ ст҃ы́мъ. ѿню́дꙋже тлѣ́нїю грѣхо́вномꙋ ѕлѣ̀ подведе́на мѧ̀ воззва́лъ є҆сѝ чл҃вѣколю́бче, за кра́йнее бл҃гоꙋтро́бїе. но ᲂу҆поко́й. бж҃е, є҆го́же прїѧ́лъ є҆сѝ, со ст҃ы́ми твои́ми.

Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.

Є҆гда̀ дꙋша̀ ѿ тѣ́ла разлꙋча́етсѧ, ᲂу҆жа́сное та́инство и҆ стра́шное всѣ̑мъ: дꙋша̀ ᲂу҆́бѡ плаче́внѡ ѿхо́дитъ, тѣ́ло же покрыва́етсѧ землѝ предано̀: тѣ́мже и҆ мы̀, позна́вше коне́чный и҆схо́дъ, ко сп҃сꙋ предвари́мъ, со слеза́ми вопїю́ще: помѧнѝ и҆ на́съ, є҆гда̀ прїи́деши во црⷭ҇твїи твое́мъ.

Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.

Почто̀ менѐ рыда́ете лю́тѡ, ѽ человѣ́цы; почто̀ всꙋ́е мѧте́тесѧ; преста́вленный всѣ̑мъ провѣщава́етъ: сме́рть бо є҆́сть всѣ̑мъ ᲂу҆покое́нїе. ѿню́дꙋже гла́съ і҆́ѡва ᲂу҆слы́шимъ глаго́люще: сме́рть мꙋ́жꙋ поко́й є҆́сть. но ᲂу҆поко́й бж҃е, є҆го́же прїѧ́лъ є҆сѝ, со ст҃ы́ми твои́ми.

Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.

Всемꙋ́дрый па́ѵелъ предречѐ ꙗ҆́вѣ преставле́нїе, всѣ́хъ наꙋча́ѧй, ꙗ҆́кѡ ме́ртвїи воста́нꙋтъ нетлѣ́нни, мы́ же и҆змѣни́мсѧ бж҃їимъ повелѣ́нїемъ: тѣ́мъ стра́шнѡ и҆ трꙋба̀ ѻ҆́наѧ возгласи́тъ, ѿ вѣ́ка спѧ́щыѧ ѿ сна̀ возста́витъ. но ᲂу҆поко́й бж҃е, є҆го́же прїѧ́лъ є҆сѝ, со ст҃ы́ми твои́ми.

Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.

Преста́вленный и҆ во гро́бѣ лежа́й ме́ртвый, бл҃гопримири́тельный всѣ̑мъ вопїе́тъ: прїиди́те земноро́днїи ко мнѣ̀, ᲂу҆́зрите добро́тꙋ тѣле́снꙋю ѡ҆чернѣ́вшꙋ: тѣ́мже ѿ неѧ̀ позна́вше бра́тїе и҆схо́дъ, ко сп҃сꙋ предвари́мъ со сле́зами вопїю́ще: ᲂу҆поко́й того̀ бж҃е, є҆го́же прїѧ́лъ є҆сѝ, со ст҃ы́ми твои́ми.

Сла́ва и҆ ны́нѣ, бг҃оро́диченъ:

Преесте́ственнѣ во чре́вѣ твое́мъ влⷣчце безсѣ́меннѡ зачала̀ є҆сѝ бг҃а превѣ́чнаго, и҆ пло́тїю того̀ родила̀ є҆сѝ, бг҃а же и҆ человѣ́ка, непрело́жнѡ и҆ неслїѧ́ннѡ. ѿню́дꙋже и҆ мы̀ бцⷣꙋ тѧ̀ при́снѡ зна́юще, ро́ждшемꙋсѧ и҆з̾ тебѐ бг҃ꙋ вѣ́рою вопїе́мъ: помѧнѝ и҆ на́съ во црⷭ҇твїи твое́мъ.

Прокі́менъ, гла́съ ѕ҃:

Бл҃же́нъ, є҆го́же и҆збра́лъ и҆ прїѧ́лъ є҆сѝ гдⷭ҇и.

Сті́хъ: Дꙋша̀ є҆гѡ̀ во бл҃ги́хъ водвори́тсѧ.

А҆по́столъ къ ри́млѧнѡмъ, зача́ло рг҃і.

Бра́тїе, мꙋ́дрствꙋѧй де́нь, гдⷭ҇еви мꙋ́дрствꙋетъ: и҆ не мꙋ́дрствꙋѧй де́нь, гдⷭ҇ви не мꙋ́дрствꙋетъ. ꙗ҆ды́й, гдⷭ҇еви ꙗ҆́стъ, бл҃годари́тъ бо бг҃а: и҆ не ꙗ҆ды́й, гдⷭ҇еви не ꙗ҆́стъ, и҆ бл҃годари́тъ бг҃а. Никто́же бо на́съ себѣ̀ живе́тъ и҆ никто́же себѣ̀ ᲂу҆мира́етъ. А҆́ще ᲂу҆́бѡ живе́мъ, гдⷭ҇еви живе́мъ: а҆́ще же ᲂу҆мира́емъ, гдⷭ҇еви ᲂу҆мира́емъ: а҆́ще ᲂу҆́бѡ живе́мъ, а҆́ще ᲂу҆мира́емъ, гдⷭ҇ни є҆смы̀. На сїе́ бо хрⷭ҇то́съ и҆ ᲂу҆́мре, и҆ воскре́се и҆ ѡ҆живѐ, да и҆ ме́ртвыми и҆ живы́ми ѡ҆блада́етъ.

А҆ллилꙋ́їа, гла́съ ѕ҃:

Бл҃же́нъ, є҆го́же и҆збра́лъ и҆ прїѧ́лъ є҆сѝ, гдⷭ҇и.

Сті́хъ: Дꙋша̀ є҆гѡ̀ во бл҃ги́хъ водвори́тсѧ.

Є҆ѵⷢ҇лїе ѿ і҆ѡа́нна, зача́ло к҃г:

Речѐ гдⷭ҇ь ко прише́дшымъ къ немꙋ̀ і҆ꙋде́ємъ: а҆́зъ є҆́смь хлѣ́бъ живо́тный. Ѻ҆тцы̀ ва́ши ꙗ҆до́ша ма́ннꙋ въ пꙋсты́ни, и҆ ᲂу҆мро́ша. Се́й є҆́сть хлѣ́бъ сходѧ́й съ нб҃сѐ, да а҆́ще кто̀ ѿ негѡ̀ ꙗ҆́стъ, не ᲂу҆́мретъ. а҆́зъ є҆́смь хлѣ́бъ живо́тный, и҆́же сше́дый съ нб҃сѐ: а҆́ще кто̀ снѣ́сть ѿ хлѣ́ба сегѡ̀, жи́въ бꙋ́детъ во вѣ́ки: и҆ хлѣ́бъ є҆го́же а҆́зъ да́мъ, пло́ть моѧ̀ є҆́сть, ю҆́же а҆́зъ да́мъ за живо́тъ мі́ра. Прѧ́хꙋсѧ же междꙋ̀ собо́ю жи́дове, глаго́люще: ка́кѡ мо́жетъ се́й на́мъ да́ти пло́ть свою̀ ꙗ҆́сти; Рече́ же и҆̀мъ і҆и҃съ: а҆ми́нь а҆ми́нь глаго́лю ва́мъ, а҆́ще не снѣ́сте пло́ти сн҃а чл҃вѣ́ческагѡ, ни пїе́те кро́ве є҆гѡ̀, живота̀ не и҆́мате въ себѣ̀. Ꙗ҆ды́й мою̀ пло́ть, и҆ пїѧ́й мою̀ кро́вь, и҆́мать живо́тъ вѣ́чный: и҆ а҆́зъ воскр҃шꙋ̀ є҆го̀ въ послѣ́днїй де́нь.

Та́же ѱало́мъ н҃. И҆ канѡ́нъ, гла́съ ѕ҃:

Пѣ́снь а҃.

І҆рмо́съ: Волно́ю морско́ю, скры́вшагѡ дре́вле гони́телѧ мꙋчи́телѧ, под̾ земле́ю скры́ша, сп҃се́нныхъ ѻ҆́троцы: но мы̀ ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.

Припѣ́въ: Оу҆поко́й гдⷭ҇и, дꙋ́шꙋ ᲂу҆со́пшагѡ раба̀ твоегѡ̀.

Тебѣ̀ бл҃годѣ́телю, и҆ всѣ́хъ влⷣцѣ хрⷭ҇тꙋ̀ припа́даемъ со слеза́ми те́плѣ, надгро́бнꙋю сїю̀ съ пла́чемъ взыва́юще пѣ́снь: вѣ́рнаго раба̀ твоего̀ ᲂу҆поко́й, ꙗ҆́кѡ бл҃гоꙋтро́бенъ.

Є҆́же ѡ҆деснꙋ́ю тебѐ сподо́би сло́ве, ст҃а́гѡ стоѧ́нїѧ со и҆збра́нными твои́ми, въ наде́ждѣ воскресе́нїѧ ᲂу҆ме́ршаго чл҃вѣколю́бче, прилѣ́жнѡ мо́лимсѧ со гла́сомъ хвале́нїѧ.

Въ нбⷭ҇номъ честно́мъ црⷭ҇твїи твоего̀ и҆збра́ннаго раба̀ свѣ́тлѡ ра́доватисѧ, ѿ землѝ преста́вльшагосѧ сподо́би чл҃вѣколю́бче, презира́ѧй, ꙗ҆́кѡ бл҃гоꙋтро́бенъ, дꙋшє́вныѧ согрѣшє́нїѧ.

Сла́ва: Оу҆вы̀ мнѣ̀, ꙗ҆́кѡ трава̀ жите́йскаѧ сла́ва вкꙋ́пѣ прозѧбѐ, и҆ а҆́бїе ᲂу҆́сше. гдѣ̀ во гро́бѣ са́нъ; гдѣ̀ зра́къ, и҆лѝ добро́та та́мѡ; тѣ́мже пощадѝ, гдⷭ҇и, раба̀ твоего̀, ꙗ҆́кѡ бл҃гоꙋтро́бенъ.

И҆ ны́нѣ, бг҃оро́диченъ: По до́лгꙋ всѝ любо́вїю воспѣва́емъ тѧ̀ дв҃о пречⷭ҇таѧ мр҃і́е, мт҃и бж҃їѧ, ꙗ҆́кѡ неꙋсыпа́емое и҆́маши мл҃твы твоеѧ̀ ѻ҆́ко при́снѡ, ѿ прегрѣше́нїй и҆зба́ви ны́нѣ и҆ сꙋда̀ сме́ртнагѡ на́съ.

Пѣ́снь г҃.

І҆рмо́съ: Нѣ́сть ст҃ъ, ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бла́же и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Нѣ́сть человѣ́къ на землѝ, и҆́же не согрѣшѝ, сло́ве: тѣ́мже моле́нїе прїимѝ, на́ми смире́нными. но ѡ҆сла́би, ѡ҆ста́ви сп҃се, твоегѡ̀ раба̀ всѧ̑ согрѣшє́нїѧ.

И҆ кто̀ чл҃вѣколю́бецъ, ꙗ҆́коже ты̀ гдⷭ҇и млⷭ҇тивъ, проща́ѧй грѣхѝ и҆ живы̑мъ и҆ мє́ртвымъ вла́стїю мно́гою; тѣ́мже то́ю сп҃сѝ и҆ раба̀ твоего̀.

Сла́ва: Го́рнѧгѡ зва́нїѧ сп҃се, вѣ́рнѡ преста́вльшагосѧ покажѝ снаслѣ́дника, прїе́млѧ тогѡ̀ коне́чнꙋю мл҃твꙋ сле́знꙋю, є҆ди́не безгрѣ́шне.

И҆ ны́нѣ, бг҃оро́диченъ: Сꙋ́щаѧ влⷣчца на́ша, всест҃а́ѧ дв҃о, молѧ́щи не преста́й, то́же родила̀ є҆сѝ бг҃а, преста́вльшагосѧ вѣ́рнѡ, црⷭ҇твїѧ своегѡ̀ сподо́бити.

Сѣда́ленъ, гла́съ ѕ҃:

Вои́стиннꙋ сꙋета̀ всѧ́чєскаѧ, житїе́ же сѣ́нь и҆ со́нїе є҆́сть. и҆́бо всꙋ́е мѧте́тсѧ всѧ́къ земноро́дный, ꙗ҆́коже речѐ писа́нїе: є҆гда̀ мі́ръ прїѡбрѧ́щемъ, тогда̀ во гро́бъ всели́мсѧ, и҆дѣ́же кꙋ́пнѡ ца́рїе и҆ ни́щїи. тѣ́мже хрⷭ҇тѐ, раба̀ твоего̀ во странѣ̀ живы́хъ, въ селе́нїихъ првⷣныхъ ᲂу҆поко́й.

Пѣ́снь д҃.

І҆рмо́съ: На крⷭ҇тѣ̀ твоѐ бж҃е́ственное и҆стоща́нїе, прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.

Ꙗ҆́кѡ сꙋ́дъ нестерпи́мый є҆́сть стра́шнагѡ преще́нїѧ ѻ҆́нагѡ днѐ, преста́вльшемꙋсѧ въ вѣ́рѣ и҆ наде́ждѣ воскресе́нїѧ, ѡ҆ставле́нїе всѣ́хъ согрѣше́нїй прилѣ́жнѡ ᲂу҆ хрⷭ҇та̀ про́симъ.

Ꙗ҆́коже покаѧ́нїемъ возже́гшаго тебѣ̀ свѣщꙋ̀ хрⷭ҇тѐ свѣ́тлѡ, пре́жде сме́рти, раба̀ влⷣко бл҃гоꙋтро́бне сп҃се, черто́га твоегѡ̀ сего̀ свѣ́тлѡ сподо́би.

Сла́ва: Є҆гда̀ ѡ҆бнажи́ши сокровє́ннаѧ всѧ̑, и҆ ѡ҆бличи́ши хрⷭ҇тѐ на́шѧ грѣхѝ, є҆го́же прїѧ́лъ є҆сѝ гдⷭ҇и, пощадѝ бл҃гі́й, є҆гѡ̀ помина́ѧй и҆сповѣ́данїе.

И҆ ны́нѣ, бг҃оро́диченъ: Не забыва́й вопїю́щихъ тѝ съ пла́чемъ прилѣ́жнѡ, ст҃а́ѧ бцⷣе, всѣ́хъ ᲂу҆покое́нїе, ѡ҆брѣстѝ бл҃га̑ѧ вѣ́рномꙋ твоемꙋ̀ рабꙋ̀, ѿ на́съ преста́вльшемꙋсѧ.

Пѣ́снь є҃.

І҆рмо́съ: Бг҃оѧвле́нїѧ твоегѡ̀ хрⷭ҇тѐ, къ на́мъ ми́лостивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскре́снꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.

Въ ли́цѣ и҆збра́нныхъ, и҆ въ сла́дости ще́дре ра́йской, є҆го́же въ вѣ́рѣ ѡ҆ на́съ преста́вилъ є҆сѝ, ᲂу҆поко́й: ты́ бо положи́лъ є҆сѝ всѣ̑мъ, сп҃се на́шъ, согрѣша́ющымъ человѣ́кѡмъ покаѧ́нїе бж҃е́ственное. ꙗ҆́кѡ влⷣка, и҆ сего̀ црⷭ҇твїѧ твоегѡ̀ сподо́би.

По вла́сти ꙗ҆́кѡ бг҃ъ, влⷣчнѣ ми́лꙋеши твоѐ созда́нїе, є҆го́же зако́нꙋ человѣ́ческомꙋ гдⷭ҇и покори́лъ є҆сѝ, є҆ди́не чл҃вѣколю́бче: тѣ́мже ѡ҆сла́би, ѡ҆ста́ви сп҃се, преста́вльшагѡсѧ вѣ́рою грѣхѝ, и҆ сего̀ црⷭ҇твїѧ твоегѡ̀ сподо́би.

Сла́ва: Никто́же ᲂу҆бѣ́гнетъ та́мѡ стра́шнагѡ сꙋда̀ твоегѡ̀ прⷭ҇то́ла. ца́рїе си́льнїи, всѝ съ рабы̀ вкꙋ́пѣ предста́нꙋтъ, и҆ гла́съ сꙋдїѝ стра́шный согрѣши́вшихъ люде́й на сꙋ́дъ гее́нны ѿшле́тъ: ѿ неѧ́же хрⷭ҇тѐ, и҆зба́ви раба̀ твоего̀.

И҆ ны́нѣ, бг҃оро́диченъ: И҆з̾ тебѐ рожде́йсѧ и҆зба́витель преесте́ственнѣ по є҆стествꙋ̀ человѣ́ческомꙋ: є҆го́же дв҃о неневѣ́стнаѧ прилѣ́жнѡ молѝ, и҆зба́вити всѣ́хъ мꙋ́къ, и҆ лю́тыхъ и҆ стра́шныхъ а҆́дскихъ мꙋче́нїй: сп҃сѝ и҆́же ѿ на́съ ны́нѣ преста́вльшагосѧ вѣ́рнѡ.

Пѣ́снь ѕ҃.

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на влⷣцѣ вопїю́ ти: ѿ тли́ мѧ возведѝ.

Сме́рть и҆ гро́бъ, и҆ сꙋ́дъ на́съ ѡ҆жида́етъ, ѡ҆блича́ющїй дѣла̀ всѧ̑: ѿ негѡ́же раба̀ твоего̀ и҆зба́ви чл҃вѣколю́бче, є҆го́же преста́вилъ є҆сѝ.

Ѿве́рзи сп҃се мо́й, преста́вльшемꙋсѧ, мо́лимсѧ тебѣ̀, млⷭ҇ти твоеѧ̀ хрⷭ҇тѐ две́рь, да ликовствꙋ́етъ въ сла́вѣ причаща́ѧйсѧ весе́лїѧ держа́вы твоеѧ̀.

Сла́ва: И҆зба́ви прегрѣше́нїй твое́ю млⷭ҇тїю сп҃се твоего̀ раба̀, є҆го́же ны́нѣ въ вѣ́рѣ преста́вилъ є҆сѝ: ꙗ҆́кѡ никто́же ѡ҆правда́етсѧ ѿ дѣ́лъ человѣ́ческихъ, чл҃вѣколю́бче.

И҆ ны́нѣ, бг҃оро́диченъ: Сме́рти ᲂу҆мерщвле́нїе, и҆ клѧ́твы ѿѧ́тїе созда́тель, пло́тїю роди́сѧ бг҃ороди́тельнице, и҆ всѣ́хъ въ вѣ́рѣ ᲂу҆ме́ршихъ сп҃са́етъ, ꙗ҆́кѡ бл҃гъ и҆ чл҃вѣколю́бецъ.

Та́же, є҆ктенїа̀ ѻ҆бы́чнаѧ: Па́ки и҆ па́ки: И҆ мл҃тва, Бж҃е дх҃ѡ́въ:

Конда́къ, гла́съ и҃:

Со ст҃ы́ми ᲂу҆поко́й хрⷭ҇тѐ, дꙋ́шꙋ раба̀ твоегѡ̀, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.

І҆́косъ: Са́мъ є҆ди́нъ є҆сѝ безсме́ртный, сотвори́вый и҆ созда́вый человѣ́ка: земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ, созда́вый мѧ̀ и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши, а҆́може всѝ человѣ́цы по́йдемъ, надгро́бное рыда́нїе, творѧ́ще пѣ́снь:

А҆ллилꙋ́їа.

Мы́сленнѡ молю̀, ᲂу҆слы́шите, съ трꙋды́ бо сїѧ̑ и҆ вѣща́ю: ва́съ бо ра́ди сотвори́хъ рыда́нїе, не́гли и҆мѣ́ти комꙋ̀ въ по́льзѣ: но є҆гда̀ сїѧ̑ пѣ́ти и҆́мате, помина́йте мѧ̀ и҆ногда̀ зна́емаго. мно́гажды бо вкꙋ́пѣ снидо́хомсѧ, и҆ въ домꙋ̀ бж҃їи вкꙋ́пѣ поѧ́хомъ:

А҆ллилꙋ́їа.

Воста́вше ᲂу҆́бѡ всѝ собери́тесѧ, и҆ сѣ́дше сло́во ᲂу҆слы́шите: стра́шное, бра́тїе, сꙋди́ще, и҆дѣ́же и҆́мамы всѝ предста́ти: нѣ́сть та́мѡ ра́бъ, нижѐ свобо́денъ, нижѐ є҆́сть та́мѡ ма́лый, нижѐ вели́кїй, но всѝ на́зи предста́немъ. сегѡ̀ ра́ди добро̀ є҆́сть вопи́ти ча́стѡ ѱало́мъ:

А҆ллилꙋ́їа.

Ѡ҆блїи́мсѧ всѝ слеза́ми, є҆гда̀ ви́димъ мо́щи лежа́щыѧ, и҆ прибли́жившесѧ всѝ цѣлова́ти, ра́внѣ же и҆ сїѧ̑ привѣщава́ти: сѐ ѡ҆ста́вилъ є҆сѝ лю́бѧщыѧ тѧ̀, не глаго́леши съ на́ми про́чее. ѽ дрꙋ́же, чесѡ̀ ра́ди не глаго́леши, ꙗ҆́коже глаго́лалъ є҆сѝ на́мъ; но си́це молчи́ши, є҆́же глаго́лати съ на́ми:

А҆ллилꙋ́їа.

Что̀ гѡ́рькїѧ ᲂу҆мира́ющихъ глаго́лы, бра́тїе, ꙗ҆̀же вѣща́ютъ, є҆гда̀ ѿхо́дѧтъ; бра́тїй разлꙋча́юсѧ, дрꙋгѡ́въ ѡ҆ставлѧ́ю всѣ́хъ, и҆ ѿхождꙋ̀. ка́мѡ ᲂу҆́бѡ и҆дꙋ̀, не вѣ́мъ: и҆лѝ ка́кѡ и҆́мамъ бы́ти та́мѡ, не вѣ́мъ: то́чїю бг҃ъ призва́вый мѧ̀. но па́мѧть твори́те съ пѣ́снїю:

А҆ллилꙋ́їа.

Ка́мѡ ᲂу҆́бѡ дꙋ́шы ны́нѣ и҆́дꙋтъ; ка́кѡ ᲂу҆́бѡ ны́нѣ та́мѡ пребыва́ютъ; жела́хъ вѣ́дати та́инство, но никто́же дово́ленъ повѣ́дати. є҆да̀ и҆ ѻ҆нѝ помина́ютъ своѧ̑, ꙗ҆́коже и҆ мы̀ ѻ҆́ныѧ; и҆лѝ ѻ҆нѝ про́чее забы́ша пла́чꙋщыѧ и҆́хъ, и҆ творѧ́щыѧ пѣ́снь:

А҆ллилꙋ́їа.

Провожда́йте дрꙋ́зи ᲂу҆ме́ршыѧ, и҆ со тща́нїемъ ко гро́бꙋ дости́гните, и҆ та́мѡ внима́тельнѣ взира́йте, и҆ но́ги ва́шѧ ᲂу҆гото́вите: всѧ́каѧ ю҆́ность та́мѡ растли́сѧ, всѧ́къ во́зрастъ та́мѡ ᲂу҆вѧдѐ: та́мѡ пра́хъ и҆ пе́пелъ и҆ че́рвїе, та́мѡ всѧ́кое молча́нїе, и҆ никто́же глаго́лѧй:

А҆ллилꙋ́їа.

Сѐ ны́нѣ ви́димъ лежа́ща, но на́мъ ктомꙋ̀ не предлежа́ща: сѐ ᲂу҆жѐ и҆ ѧ҆зы́къ ᲂу҆молчѐ, сѐ ᲂу҆жѐ и҆ ᲂу҆стнѣ̀ преста́ша. здра́вствꙋйте дрꙋ́зи, ча̑да: сп҃са́йтесѧ бра́тїе, сп҃са́йтесѧ зна́емїи, а҆́зъ бо въ пꙋ́ть мо́й ше́ствꙋю: но па́мѧть твори́те ѡ҆ мнѣ̀, съ пѣ́снїю:

А҆ллилꙋ́їа.

Никто́же бо та́мошнихъ па́ки ѡ҆живѐ, да рече́тъ на́мъ, ка́кѡ пребыва́ютъ, и҆̀же и҆ногда̀ бра́тїѧ и҆ внꙋ́цы та́мѡ предвари́вше ко гдⷭ҇ꙋ. тѣ́мже мно́жицею при́снѡ глаго́лемъ: є҆да̀ є҆́сть та́мѡ ви́дѣти дрꙋ́гъ дрꙋ́га; є҆да̀ є҆́сть та́мѡ ви́дѣти бра́тїю; є҆да̀ є҆́сть та́мѡ вкꙋ́пѣ рещѝ ѱало́мъ:

А҆ллилꙋ́їа.

И҆́демъ пꙋте́мъ вѣ́чнымъ, предстоѧ́ще ꙗ҆́коже ѡ҆сꙋжде́ны, до́лѣ маа́юще всѝ ли́цами. гдѣ̀ тогда̀ добро́та; гдѣ̀ пѣ́нѧзи; гдѣ̀ сла́ва тогда̀ житїѧ̀ сегѡ̀; ничто́же си́хъ та́мѡ помо́жетъ на́мъ, то́кмѡ глаго́лати ча́стѡ ѱало́мъ:

А҆ллилꙋ́їа.

Что̀ мѧте́шисѧ безвре́меннѡ, ѽ человѣ́че! є҆ди́нъ ча́съ, и҆ всѧ̑ прехо́дѧтъ: нѣ́сть бо во а҆́дѣ покаѧ́нїѧ, нѣ́сть та́мѡ про́чее ѡ҆сла́бы: та́мѡ че́рвь неꙋсыпа́емый, та́мѡ землѧ̀ темна̀ и҆ помраче́на всѧ̀, и҆дѣ́же и҆́мамъ а҆́зъ ѡ҆сꙋди́тисѧ. не бо̀ потща́хсѧ весьма̀ глаго́лати ча́стѡ ѱало́мъ:

А҆ллилꙋ́їа.

Ничто́же си́це є҆́сть ᲂу҆добозабыва́емое, ꙗ҆́кѡ человѣ́кꙋ ѿ человѣ́ка разлꙋча́емꙋ: а҆́ще бо и҆ ма́ло вре́мѧ помина́емъ, но а҆́бїе сме́рть забыва́емъ, ꙗ҆́кѡ не ᲂу҆ме́рша сего̀ и҆мꙋ́ще. и҆ роди́телїе бо ча̑да всѧ́чески забыва́ютъ, ꙗ҆̀же ѿ ᲂу҆тро́бъ ро́ждше воспита́ша, и҆ и҆спꙋсти́ша сле́зы съ пѣ́снїю:

А҆ллилꙋ́їа.

Воспомина́ю ва́мъ, бра́тїе моѝ, и҆ ча̑да, и҆ дрꙋ́зи моѝ, не забыва́йте мѧ̀, є҆гда̀ мо́литесѧ ко гдⷭ҇ꙋ: молю̀, прошꙋ̀, и҆ ми́лъ сѧ дѣ́ю, навыка́йте си̑мъ въ па́мѧть, и҆ пла́чите менѐ де́нь и҆ но́щь. ꙗ҆́коже і҆́ѡвъ къ дрꙋгѡ́мъ рекꙋ̀ къ ва́мъ: сѣди́те па́ки рещѝ:

А҆ллилꙋ́їа.

Всѧ̑ ѡ҆ста́вльше и҆́демъ, и҆ на́зи и҆ ско́рбни предста́немъ: добро́та бо ꙗ҆́кѡ трава̀ ᲂу҆вѧда́етъ, но то́кмѡ прельща́емсѧ человѣ́цы. на́гъ роди́лсѧ є҆сѝ, ѽ ѻ҆каѧ́нне, на́гъ и҆ та́мѡ и҆́маши предста́ти всѧ́кѡ: не мечта́йсѧ человѣ́че въ житїѝ когда̀, но то́кмѡ. всегда̀ стенѝ съ пла́чемъ:

А҆ллилꙋ́їа.

А҆́ще поми́ловалъ є҆сѝ человѣ́че человѣ́ка, то́й и҆́мать та́мѡ поми́ловати тѧ̀: и҆ а҆́ще кото́ромꙋ сиротѣ̀ сострада́лъ є҆сѝ, то́й и҆зба́витъ тѧ̀ та́мѡ ѿ нꙋ́жды. а҆́ще въ житїѝ на́га покры́лъ є҆сѝ, то́й и҆́мать та́мѡ покры́ти тѧ̀, и҆ пѣ́ти ѱало́мъ:

А҆ллилꙋ́їа.

Лꙋка́вый пꙋ́ть, и҆́мже ѿхождꙋ̀, и҆́мже никогда́же си́це ходи́хъ, и҆ страна̀ ѻ҆́на незна́ема, и҆дѣ́же никто́же ника́коже познава́етъ мѧ̀. ᲂу҆жа́сно є҆́сть ви́дѣти водѧ́щыѧ стра́шнѡ, призва́вшаго мѧ̀ живото́мъ и҆ сме́ртїю влады́чествꙋюща, и҆ зовꙋ́ща на́съ, є҆гда̀ хо́щетъ, та́мѡ:

А҆ллилꙋ́їа.

А҆́ще ѿ страны̀ нѣ́кїѧ и҆дꙋ́ще, водѧ́щыѧ нѣ̑кїѧ тре́бꙋемъ, что̀ сотвори́мъ, а҆́може и҆́демъ во странꙋ̀, и҆дѣ́же не познава́емъ: мно́гихъ тебѣ̀ тогда̀ води́телей потре́ба: мно́гихъ тебѣ̀ мл҃твъ спꙋтеше́ствꙋющихъ, сп҃стѝ дꙋ́шꙋ ѻ҆каѧ́ннꙋю, до́ндеже дости́гнꙋти ко хрⷭ҇тꙋ̀, и҆ рещѝ къ немꙋ̀:

А҆ллилꙋ́їа.

Веще́ствєннымъ страсте́мъ подлежа́щїи, та́мѡ ѡ҆сла́бы ника́коже и҆́мꙋтъ: та́мѡ ᲂу҆́бѡ ѡ҆бличи́телїе стра́шнїи, та́мѡ же и҆ кни̑ги ѿверза́ютсѧ: гдѣ̀ ѻ҆́крестъ ᲂу҆́зриши тогда̀ человѣ́че; и҆лѝ кто̀ и҆́мать та́мѡ помощѝ тебѣ̀ тогда̀; ра́звѣ живы́й бл҃го́е что̀ сотвори́лъ є҆сѝ, и҆ добро̀ ни́щымъ что̀ сотвори́лъ є҆сѝ, поѧ̀:

А҆ллилꙋ́їа.

Ю҆́ность и҆ добро́та тѣле́снаѧ во вре́мѧ сме́рти ᲂу҆вѧда́етъ, и҆ ѧ҆зы́къ лю́тѣ тогда̀ ѡ҆палѧ́етсѧ, и҆ горта́нь и҆зсꙋши́всѧ воспалѧ́етсѧ: ѻ҆че́съ добро́та тогда̀ ᲂу҆гаса́етъ, добро́та лица̀ и҆змѣнѧ́етсѧ всѧ̀, добро́та вы́и сокрꙋша́етсѧ, и҆ про́чее безмо́лвствꙋетъ глаго́лати ча́стѡ:

А҆ллилꙋ́їа.

Безмо́лвствꙋйте ᲂу҆́бѡ, безмо́лвствꙋйте: лежа́щемꙋ про́чее ᲂу҆молчи́те и҆ вели́кое та́инство ᲂу҆́зрите, стра́шный бо ча́съ. ᲂу҆молчи́те, да съ ми́ромъ дꙋша̀ ѿи́детъ, въ по́двизѣ бо вели́цѣмъ соде́ржитсѧ, и҆ во стра́сѣ мно́зѣ мо́литъ бг҃а:

А҆ллилꙋ́їа.

А҆́зъ ᲂу҆́бѡ ви́дѣхъ млⷣнца ᲂу҆мира́юща, и҆ живо́тъ мо́й ѡ҆пла́кахъ: возмѧте́сѧ бо весьма̀ и҆ трепета́ше, и҆ є҆гда̀ прїи́де ча́съ, возопѝ: ѻ҆́тче, помози́ ми, ма́ти, сп҃си́ мѧ, и҆ никто́же дово́ленъ тогда̀ помощѝ є҆мꙋ̀, то́кмѡ ви́дѧще ᲂу҆вѧда́ютъ, и҆ во гро́бѣ пла́чꙋтъ є҆го̀:

А҆ллилꙋ́їа.

Коли́цы ᲂу҆́бѡ внеза́пꙋ восхи́тишасѧ ѿ самѣ́хъ сосцє́въ во гро́бъ, и҆ спрѧго́шасѧ спрѧжа́нїемъ вѣ́чнымъ, и҆ сотвори́ша пла́чь неиждиви́мый, и҆ ѿ черто́га не воста́ша: но вкꙋ́пѣ бра́къ, вкꙋ́пѣ гро́бъ, вкꙋ́пѣ спрѧже́нїе, вкꙋ́пѣ и҆ распрѧже́нїе, вкꙋ́пѣ смѣ́хъ, вкꙋ́пѣ и҆ пла́чь, вкꙋ́пѣ и҆ ѱало́мъ:

А҆ллилꙋ́їа.

Разжига́емсѧ то́кмѡ слы́шаще, ꙗ҆́кѡ є҆́сть та́мѡ свѣ́тъ вѣ́чный, та́мѡ и҆сто́чникъ живота̀ на́шегѡ, и҆ та́мѡ наслажде́нїе вѣ́чное: та́мѡ є҆́сть ра́й, ѡ҆ не́мже всѧ́каѧ дꙋша̀ пра́ведныхъ ра́дꙋетсѧ. сни́демсѧ всѝ во хрⷭ҇тѣ̀ и҆ мы̀, да си́це возопїи́мъ всѝ бг҃ꙋ:

А҆ллилꙋ́їа.

Всест҃а́ѧ дв҃о безневѣ́стнаѧ, ро́ждшаѧ свѣ́тъ непристꙋ́пный, молю̀, ми́лъ сѧ дѣ́ю и҆ прошꙋ̀: молѧ́щи не преста́й гдⷭ҇а ѡ҆ ᲂу҆со́пшемъ рабѣ̀ твое́мъ, пречⷭ҇таѧ, ꙗ҆́кѡ да ѡ҆брѧ́щетъ та́мѡ ѡ҆ставле́нїе прегрѣше́нїй въ де́нь сꙋ́дный, всечⷭ҇таѧ. дерзнове́нїе бо и҆́маши ꙗ҆́кѡ влⷣчца, моли́ти сн҃а твоего̀ всегда̀:

А҆ллилꙋ́їа.

Та́же па́ки конда́къ: Со ст҃ы́ми ᲂу҆поко́й хрⷭ҇тѐ:

Пѣ́снь з҃.

І҆рмо́съ: Неизрече́нное чꙋ́до, въ пещѝ и҆зба́вивый преподѡ́бныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.

Ѻ҆гнѧ̀ гее́нскагѡ, и҆ стра́шнагѡ и҆зрече́нїѧ ꙗ҆́кѡ ще́дръ и҆зба́ви хрⷭ҇тѐ, є҆го́же въ вѣ́рѣ ѿ ны́нѣ прїѧ́лъ є҆сѝ раба̀ твоего̀, и҆ пѣ́ти тебѣ̀ пода́ждь твоемꙋ̀ рабꙋ̀: и҆зба́вителю бж҃е, бл҃гослове́нъ є҆сѝ.

Въ землѝ кро́ткихъ, и҆ въ ра́йскомъ наслажде́нїи, ᲂу҆со́пшаго раба̀ твоего̀ вѣ́рнѡ, въ мѣ́стѣ селе́нїѧ сла́вы ди́вныѧ бж҃е сподо́бивый, пода́ждь пѣ́ти тебѣ̀: и҆зба́вителю бж҃е, бл҃гослове́нъ є҆сѝ.

Сла́ва: Вели́къ сꙋ́дъ, нꙋ́жда же неисповѣди́маѧ гее́нны є҆́сть, бра́тїе: та́мѡ бо дꙋ́шы грѣ́шныхъ съ тѣ́ломъ ᲂу҆́бѡ палѧ́тсѧ, и҆ съ болѣ́знїю слезѧ́тъ, не могꙋ́ще вопи́ти: и҆зба́вителю бж҃е, бл҃гослове́нъ є҆сѝ.

И҆ ны́нѣ: Несꙋмнѣ́ннѡ бж҃їю мт҃рь, пою́щыѧ тѧ̀ бцⷣе пренепоро́чнаѧ, и҆ живꙋ́щыѧ при́снѡ ѡ҆гражда́й мл҃твами твои́ми, преста́вльшыѧсѧ, го́рькихъ мꙋче́нїй и҆зба́ви, да съ тобо́ю хрⷭ҇тꙋ̀ вопїю́тъ: и҆зба́вителю бж҃е бл҃гослове́нъ є҆сѝ.

Пѣ́снь и҃.

І҆рмо́съ: Оу҆жасни́сѧ боѧ́йсѧ нб҃о, и҆ да подви́жатсѧ ѡ҆снова̑нїѧ землѝ: се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆го́же ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Ѽ кі́й ча́съ стра́шный согрѣша́ющихъ ѡ҆жида́етъ, бра́тїе! ѽ кі́й стра́хъ тогда̀! ѻ҆́гнь поѧ́стъ гее́нскїй, и҆ вѣ́чнѡ мꙋ́чити бꙋ́детъ. тѣ́мже хрⷭ҇тѐ ще́дрый влⷣко, ѿ на́съ преста́вленнаго ны́нѣ стра́шнагѡ преще́нїѧ и҆зба́ви, гее́нскагѡ мꙋче́нїѧ и҆схи́ти во вѣ́ки.

Ѽ ра́дости првⷣныхъ, ю҆́же прїе́млютъ, є҆гда̀ прїи́детъ сꙋдїѧ̀! та́мѡ бо черто́гъ ᲂу҆гото́васѧ и҆ ра́й, и҆ всѐ хрⷭ҇то́во црⷭ҇тво: въ не́мже твоѧ̑ рабы̑ веселѧ́щыѧсѧ покажѝ, со ст҃ы́ми хрⷭ҇тѐ во вѣ́ки.

Сла́ва: Кто̀ постои́тъ хрⷭ҇тѐ, прише́ствїѧ твоегѡ̀ стра́шномꙋ преще́нїю, та́мѡ не́бо свїе́тсѧ ꙗ҆́коже сви́токъ стра́шнѡ, и҆ падꙋ́тъ ѕвѣ́зды, стра́хомъ поколе́блетсѧ всѧ̀ тва́рь, и҆ свѣ́тъ и҆змѣни́тсѧ: но тогда̀ пощадѝ сло́ве, ѿ на́съ преста́вльшагосѧ.

И҆ ны́нѣ, бг҃оро́диченъ: Є҆го́же воплоти́ла є҆сѝ сн҃а, па́че є҆стества̀ чи́стаѧ, се́й є҆́сть сꙋдїѧ̀ и҆ живы́хъ и҆ ме́ртвыхъ, и҆ сꙋдѧ́й все́й землѝ, и҆ сп҃са́етъ ѿ мꙋче́нїй, и҆̀хже хо́щетъ: па́че же любо́вїю покланѧ́ющихсѧ во и҆з̾ѡбраже́нїихъ томꙋ̀, и҆ тѧ̀ воспѣва́ющихъ бцⷣꙋ во всѧ̑ вѣ́ки.

Пѣ́снь ѳ҃.

І҆рмо́съ: Не рыда́й менѐ мт҃и зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.

Не рыда́йте всѝ и҆̀же въ вѣ́рѣ ᲂу҆ме́ршїи, ꙗ҆́кѡ хрⷭ҇то́съ ѡ҆ на́съ претерпѣ̀ пло́тїю и҆ крⷭ҇тъ и҆ погребе́нїе, безсме́ртїѧ сы́ны содѣ́ла всѧ̑ вопїю́щыѧ къ немꙋ̀: не вни́ди въ сꙋ́дъ съ рабо́мъ твои́мъ.

Ꙗ҆́кѡ въ вѣ́рѣ и҆ наде́ждѣ воскрⷭ҇нїѧ ᲂу҆со́пшаго бра́та во ѻ҆би́телехъ ст҃ы́хъ вчини́ти, хрⷭ҇то́ви ᲂу҆се́рднѡ помо́лимсѧ вѣ́рнїи: сꙋ́дъ бо та́мѡ гро́зный, и҆ и҆спыта́нїе стра́шное: и҆ никто́же са́мъ себѣ̀ помощѝ мо́жетъ, ра́звѣ бл҃га̑ѧ дѣла̀, и҆ ѻ҆́бщаѧ вѣ́рныхъ мл҃тва, и҆ возопїи́мъ: не вни́ди въ сꙋ́дъ гдⷭ҇и, съ рабо́мъ твои́мъ.

Сла́ва: Въ нестарѣ́емѣй твое́й сла́вѣ, и҆ сла́дости ра́йской, ѿ на́съ преста́вльшагосѧ ны́нѣ вчинѝ бл҃же, ꙗ҆́кѡ правосла́вїемъ и҆ покаѧ́нїемъ прите́кшагѡ къ тебѣ̀ въ вѣ́рѣ, и҆ сотворѝ є҆го̀ и҆збра́нна предста́телѧ црⷭ҇твїѧ твоегѡ̀.

И҆ ны́нѣ, бг҃оро́диченъ: Тѧ̀ ꙗ҆́кѡ мт҃рь жи́зни па́че є҆стества̀ сꙋ́щꙋю бцⷣе дв҃о, бл҃гоче́стнѡ воспѣва́емъ вѣ́рнїи: тобо́ю бо мы̀ ᲂу҆ме́ршїи пре́жде ѡ҆безсме́ртившесѧ, ѡ҆брѣто́хомъ живо́тъ, и҆ сѐ тебѣ̀ пѣ́снь и҆сполнѧ́емъ.

Дїа́конъ: Па́ки и҆ па́ки:

И҆ мл҃тва: Бж҃е дꙋхѡ́въ:

Є҆ѯапостїла́рїй:

Ны́нѣ ᲂу҆поко́ихсѧ, и҆ ѡ҆брѣто́хъ ѡ҆сла́бꙋ мно́гꙋ, ꙗ҆́кѡ преста́вихсѧ ѿ и҆стлѣ́нїѧ, и҆ преложи́хсѧ къ животꙋ̀: гдⷭ҇и сла́ва тебѣ̀.

И҆ лю́дїе то́йжде.

Сті́хъ: Человѣ́къ ꙗ҆́кѡ трава̀, дні́е є҆гѡ̀ ꙗ҆́кѡ цвѣ́тъ се́льный.

Сті́хъ в҃: Ꙗ҆́кѡ дꙋ́хъ про́йде въ не́мъ, и҆ не бꙋ́детъ.

Сті́хъ г҃: И҆ и҆́стина гдⷭ҇нѧ пребыва́етъ во вѣ́къ.

И҆ на кі́йждо сті́хъ є҆ѯапостїла́рїй.

Та́же, Сла́ва, и҆ ны́нѣ:

Ны́нѣ и҆збра́хъ бг҃омт҃рь ѻ҆трокови́цꙋ, ꙗ҆́кѡ роди́сѧ и҆з̾ неѧ̀ хрⷭ҇то́съ и҆зба́витель всѣ́хъ: гдⷭ҇и сла́ва тебѣ̀.

И҆ а҆́бїе: Хвали́те гдⷭ҇а съ нб҃съ:

Та́же стїхи̑ры, гла́съ ѕ҃.

Подо́бенъ: Ѿча́ѧннаѧ:

Ѡ҆бг҃отворе́нъ въ преставле́нїи животворѧ́щимъ твои́мъ хрⷭ҇тѐ ны́нѣ та́инствомъ, къ тебѣ̀ пре́йде бж҃е́ственный слꙋжи́тель тво́й: прїимѝ въ рꙋ́цѣ твоѝ дꙋ́шꙋ є҆гѡ̀ ꙗ҆́кѡ птенца̀, ᲂу҆чинѝ є҆го̀ во дво́рѣхъ твои́хъ и҆ во а҆́гг҃льскаѧ ликостоѧ̑нїѧ, и҆ ᲂу҆поко́й, є҆го́же прїѧ́лъ є҆сѝ повелѣ́нїемъ твои́мъ гдⷭ҇и, вели́кїѧ ра́ди твоеѧ̀ млⷭ҇ти.

Стра́нное сме́рти та́инство: надхо́дитъ бо всѣ̑мъ въ безго́дїи, є҆стество̀ растлѣва́етсѧ нꙋ́ждею, ста́рцы взима́етъ, и҆гꙋ́мены, кни́жники, ᲂу҆чи́тели сꙋ́єтнаѧ мꙋ́дрствꙋющыѧ тли́тъ, є҆пі́скопы, па́стыри. но воззове́мъ со слеза́ми: повелѣ́нїемъ твои́мъ гдⷭ҇и, є҆го́же прїѧ́лъ є҆сѝ, ᲂу҆поко́й вели́кїѧ ра́ди твоеѧ̀ млⷭ҇ти.

Жи́тельствовавъ во бл҃гоче́стїи, и҆ ᲂу҆кра́шенъ сщ҃е́нникъ тво́й хрⷭ҇тѐ, жре́цъ и҆ приноси́тель бж҃е́ственныхъ та́инствъ, твои́мъ бж҃е́ственнымъ повелѣ́нїемъ пре́йде ѿ жите́йскихъ мо́лвъ къ тебѣ̀: є҆го́же ꙗ҆́кѡ сщ҃е́нника сп҃се прїи́мъ сп҃сѝ, и҆ съ првⷣными ᲂу҆поко́й, є҆го́же прїѧ́лъ є҆сѝ, вели́кїѧ ра́ди твоеѧ̀ млⷭ҇ти.

Сла́ва, и҆ ны́нѣ, бг҃оро́диченъ:

Бг҃а и҆з̾ тебѐ вопло́щшагосѧ позна́хомъ бг҃оро́дице дв҃о: того̀ молѝ, сп҃сти́сѧ дꙋша́мъ на́шымъ.

Та́же глаго́лютъ: Сла́ва въ вы́шнихъ: И҆ по є҆́же: Сподо́би гдⷭ҇и: глаго́летъ настоѧ́щыѧ стїхи̑ры, самогла́сны дамаски́нѡвы, гла́съ а҃:

Ка́ѧ жите́йскаѧ сла́дость пребыва́етъ печа́ли неприча́стна; ка́ѧ ли сла́ва стои́тъ на землѝ непрело́жна; всѧ̑ сѣ́ни немѡщнѣ́йша, всѧ̑ со́нїй прелє́стнѣйша: є҆ди́нѣмъ мгнове́нїемъ, и҆ сїѧ̑ всѧ̑ сме́рть прїе́млетъ. но во свѣ́тѣ хрⷭ҇тѐ лица̀ твоегѡ̀, и҆ въ наслажде́нїи твоеѧ̀ красоты̀, є҆го́же и҆збра́лъ є҆сѝ ᲂу҆поко́й, ꙗ҆́кѡ чл҃вѣколю́бецъ.

Сті́хъ: Гдⷭ҇ь пасе́тъ мѧ̀, и҆ ничто́же мѧ̀ лиши́тъ.

Дѣ́ломъ сп҃се мо́й показꙋ́еши, ꙗ҆́кѡ ты̀ є҆сѝ всѣ́хъ воскрⷭ҇нїе, сло́вомъ сло́ве ла́зарѧ и҆з̾ ме́ртвыхъ воскр҃си́лъ є҆сѝ: тогда̀ верєѝ сотро́шасѧ, врата́ же а҆́дѡва смꙋти́шасѧ: тогда̀ со́нъ сме́рть показа́сѧ человѣ́ческаѧ. но во є҆́же сп҃стѝ твоѐ созда́нїе, а҆ не во є҆́же ѡ҆сꙋди́ти прише́дый, є҆го́же и҆збра́лъ є҆сѝ, ᲂу҆поко́й ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ:

Всѣ̑мъ предста́тельница те́плаѧ показа́ласѧ є҆сѝ бг҃ороди́тельнице, всѣ́хъ покро́ве, держа́ва же ѿ бг҃а прибѣга́ющымъ къ тебѣ̀: въ нꙋ́ждахъ сꙋ́щымъ помо́щница. плѣ̑ннымъ ско́рое и҆збавле́нїе. тебе́ бо хрⷭ҇то́съ на ва́рвары положи́лъ є҆́сть мсти́тельницꙋ, и҆ застꙋ́пницꙋ, и҆ стѣ́нꙋ неразрꙋши́мꙋю, и҆ немощны̑мъ крѣ́пость непребори́мꙋю, и҆ ми́ра пода́тельницꙋ дꙋша́мъ на́шымъ.

Стїхи̑ры, гла́съ в҃:

Оу҆вы̀ мнѣ̀, ꙗ҆ковы́й по́двигъ и҆́мать дꙋша̀ разлꙋча́ющисѧ ѿ тѣлесѐ! ᲂу҆вы̀, тогда̀ коли́кѡ слези́тъ, и҆ нѣ́сть поми́лꙋѧй ю҆̀! ко а҆́гг҃лѡмъ ѻ҆́чи возводѧ́щи, бездѣ́льнѡ мо́литсѧ: къ человѣ́кѡмъ рꙋ́цѣ простира́ющи, не и҆́мать помога́ющагѡ. тѣ́мже возлю́бленнїи моѝ бра́тїе, помы́сливше на́шꙋ кра́ткꙋю жи́знь, преста́вленномꙋ ᲂу҆покое́нїѧ ѿ хрⷭ҇та̀ про́симъ, и҆ дꙋша́мъ на́шымъ ве́лїю млⷭ҇ть.

Сті́хъ: Ко гдⷭ҇ꙋ, внегда̀ скорбѣ́ти мѝ, воззва́хъ, и҆ ᲂу҆слы́ша мѧ̀.

Прїиди́те, ᲂу҆́зримъ всѝ чꙋ́до па́че ᲂу҆ма̀, и҆́же вчера̀ съ на́ми сы́й, ны́нѣ лежи́тъ ме́ртвъ. прїиди́те, позна́емъ, ꙗ҆́кѡ пома́лѣ въ погреба̑льнаѧ пови́ты и҆ мы̀ сконча́емсѧ: и҆̀же мѵ́ры помазꙋ́ющїисѧ бл҃гоꙋха́нными, лежа́тъ смра́дни: ка́кѡ зла́томъ красѧ́щїисѧ, не ᲂу҆кра́шени лежа́тъ и҆ без̾ѡбра́зни. тѣ́мже, возлю́бленнїи моѝ бра́тїе, разꙋмѣ́вше на́шꙋ кра́ткꙋю жи́знь, преста́вленномꙋ ᲂу҆покое́нїѧ ᲂу҆ хрⷭ҇та̀ про́симъ, и҆ дꙋша́мъ на́шымъ ве́лїю млⷭ҇ть.

Сті́хъ: Гдⷭ҇и, и҆зба́ви дꙋ́шꙋ мою̀ ѿ ᲂу҆сте́нъ непра́ведныхъ.

Сп҃са́йсѧ сꙋ́етный животѐ. сп҃са́йтесѧ всѝ дрꙋ́зи, срѡ́дницы же и҆ ча̑да: въ пꙋ́ть бо и҆дꙋ̀, и҆́мже никогда́же ше́ствовахъ. но прїиди́те помѧнꙋ́вше мою̀ къ ва́мъ любо́вь, послѣ́дꙋйте, и҆ гро́бꙋ предади́те бре́нїе моѐ сїѐ: и҆ и҆мꙋ́щаго сꙋди́ти смире́ннꙋю мою̀ дꙋ́шꙋ, со слеза́ми хрⷭ҇та̀ моли́те, ꙗ҆́кѡ да ѻ҆гнѧ̀ и҆́зметъ мѧ̀ неꙋгаси́магѡ.

Сла́ва, и҆ ны́нѣ, бг҃оро́диченъ:

Непроходи́маѧ врата̀, та́йнѡ запеча́тствѡваннаѧ, бл҃гослове́ннаѧ бцⷣе дв҃о, прїимѝ молє́нїѧ на̑ша, и҆ принесѝ твоемꙋ̀ сн҃ꙋ и҆ бг҃ꙋ, да сп҃се́тъ тобо́ю дꙋ́шы на́шѧ.

Стїхи̑ры самогла́сны, гла́съ г҃:

Сѐ лежꙋ̀ возлю́бленнїи моѝ бра́тїе, посредѣ̀ всѣ́хъ молчали́въ и҆ безгла́сенъ: ᲂу҆ста̀ ᲂу҆праздни́шасѧ, ѧ҆зы́къ преста̀ и҆ ᲂу҆стнѣ̀ препѧ́шасѧ: рꙋ́цѣ свѧза́стѣсѧ, и҆ но́зѣ сплето́стѣсѧ: зра́къ и҆змѣни́сѧ, ѻ҆́чи ᲂу҆гасо́стѣ, и҆ не ви́дѧтъ рыда́ющихъ: слꙋ́хъ не прїе́млетъ печа́лꙋющихъ во́плѧ, но́съ не ᲂу҆ха́етъ кади́льнагѡ бл҃гово́нїѧ: и҆́стиннаѧ же любо́вь никогда́же ᲂу҆мерщвлѧ́етсѧ. тѣ́мже молю̀ всѣ́хъ зна́емыхъ, и҆ дрꙋгѡ́въ мои́хъ, помѧни́те мѧ̀ пред̾ гдⷭ҇емъ, ꙗ҆́кѡ да въ де́нь сꙋ́дный ѡ҆брѧ́щꙋ млⷭ҇ть на сꙋди́щи ѻ҆́номъ стра́шномъ.

Сті́хъ: Возведо́хъ ѻ҆́чи моѝ въ го́ры, ѿню́дꙋже прїи́детъ по́мощь моѧ̀.

Всѧ̑ сꙋета̀ человѣ́чєскаѧ, є҆ли̑ка не пребыва́ютъ по сме́рти: не пребыва́етъ бога́тство, ни сше́ствꙋетъ сла́ва: прише́дши бо сме́рти, сїѧ̑ всѧ̑ потреби́шасѧ. тѣ́мже хрⷭ҇тꙋ̀ безсме́ртномꙋ возопїи́мъ: преста́вленнагѡ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще.

Сті́хъ: Гдⷭ҇ь сохрани́тъ вхожде́нїе твоѐ и҆ и҆схожде́нїе твоѐ ѿ ны́нѣ и҆ до вѣ́ка.

Человѣ́цы, что̀ всꙋ́е мѧте́мсѧ; тече́нїе ско́рое и҆ жесто́кое є҆́сть, и҆́мже тече́мъ: ды́мъ є҆́сть житїѐ, па́ра, и҆ пе́пелъ, и҆ пра́хъ по ма́лѣ бꙋ́демъ, и҆ ꙗ҆́кѡ цвѣ́тъ ᲂу҆вѧда́емъ. тѣ́мже хрⷭ҇тꙋ̀ безсме́ртномꙋ возопїи́мъ: преста́вльшагосѧ ѿ на́съ ᲂу҆поко́й, и҆дѣ́же всѣ́хъ є҆́сть веселѧ́щихсѧ жили́ще.

Сла́ва, и҆ ны́нѣ, бг҃оро́диченъ:

Приста́нище тѧ̀ сп҃се́нїѧ и҆́мамы бцⷣе дв҃о, въ пꙋчи́нѣ житїѧ̀ ѡ҆бꙋрева́емїи. тѣ́мже молѝ ѿ тебѐ безсѣ́меннѡ вопло́щшагосѧ бг҃а, и҆ неизрече́ннѡ вочл҃вѣ́чшагосѧ, сп҃стѝ дꙋ́шы на́шѧ.

Стїхи̑ры, гла́съ д҃:

Гдѣ́ є҆сть мїрско́е пристра́стїе; гдѣ́ є҆сть привре́менныхъ мечта́нїе; гдѣ́ є҆сть зла́то и҆ сребро̀; гдѣ́ є҆сть рабѡ́въ мно́жество и҆ молва̀; всѧ̑ пе́рсть, всѧ̑ пе́пелъ, всѧ̑ сѣ́нь. но прїиди́те, возопїи́мъ безсме́ртномꙋ цр҃ю̀: гдⷭ҇и, вѣ́чныхъ твои́хъ бла̑гъ сподо́би преста́вльшагосѧ ѿ на́съ, ᲂу҆покоѧ́ѧ є҆го̀ въ нестарѣ́ющемсѧ бл҃же́нствѣ твое́мъ.

Сті́хъ: Возвесели́хсѧ ѡ҆ ре́кшихъ мнѣ̀: въ до́мъ гдⷭ҇ень по́йдемъ.

На́йде сме́рть ꙗ҆́кѡ хи́щникъ, на́йде тли́тель, и҆ низложи́ мѧ, на́йде и҆ не сꙋ́ща мѧ̀ показа̀: на́йде, и҆ землѧ̀ сы́й, ꙗ҆́кѡ не сы́й лежꙋ̀. вои́стиннꙋ со́нїе, вои́стиннꙋ привидѣ́нїе є҆смы̀ человѣ́цы. но прїиди́те, возопїи́мъ безсме́ртномꙋ цр҃ю̀: гдⷭ҇и, вѣ́чныхъ твои́хъ бла̑гъ сподо́би преста́вльшагосѧ ѿ на́съ, ᲂу҆покоѧ́ѧ є҆го̀ въ нестарѣ́емѣй жи́зни.

Сла́ва, и҆ ны́нѣ, бг҃оро́диченъ:

Є҆ди́на чⷭ҇таѧ и҆ непоро́чнаѧ дв҃о, бг҃а безсѣ́меннѡ ро́ждшаѧ, молѝ сп҃сти́сѧ дꙋша́мъ на́шымъ.

Стїхи̑ры, гла́съ є҃:

Помѧнꙋ́хъ прⷪ҇ро́ка вопїю́ща: а҆́зъ є҆́смь землѧ̀ и҆ пе́пелъ. и҆ па́ки разсмотри́хъ во гробѣ́хъ, и҆ ви́дѣхъ кѡ́сти ѡ҆бнаже́ны и҆ рѣ́хъ: ᲂу҆̀бо кто̀ є҆́сть ца́рь, и҆лѝ во́инъ, и҆лѝ бога́тъ, и҆лѝ ᲂу҆бо́гъ, и҆лѝ пра́ведникъ, и҆лѝ грѣ́шникъ, но ᲂу҆поко́й гдⷭ҇и, съ првⷣными раба̀ твоего̀.

Сті́хъ: Стоѧ́ще бѧ́хꙋ но́ги на́шѧ во дво́рѣхъ твои́хъ, і҆ерⷭ҇ли́ме.

Ты̀ ре́клъ є҆сѝ, вѣ́рꙋѧй въ тѧ̀ хрⷭ҇тѐ, сме́рти не ᲂу҆́зритъ: но ꙗ҆́коже а҆́зъ ѿ свѣ́та во свѣ́тъ, свѣ́тъ є҆́смь, та́кѡ просвѣти́тесѧ и҆ во мнѣ̀ въ сла́вѣ мое́й: и҆́стинный бо бг҃ъ сы́й прїидо́хъ сп҃стѝ, и҆̀же во и҆́стинномъ правосла́вїи чтꙋ́щихъ мѧ̀ є҆ди́наго гдⷭ҇а бг҃а, сꙋгꙋ́ба є҆стество́ма пло́ти и҆ бж҃ества̀, є҆ди́наго же ѵ҆поста́сїю. тѣ́мъ си́це тѧ̀ и҆сповѣ́давшаго вѣ́рнаго твоего̀ раба̀, во свѣ́тѣ лица̀ твоегѡ̀ со ст҃ы́ми ᲂу҆поко́й, ꙗ҆́кѡ чл҃вѣколю́бецъ.

Сла́ва, и҆ ны́нѣ, бг҃оро́диченъ:

Тебѣ̀ мо́лимсѧ, ꙗ҆́кѡ бж҃їи мт҃ри, бл҃гослове́ннаѧ, молѝ сп҃сти́сѧ на́мъ.

Стїхи̑ры, гла́съ ѕ҃:

Нача́токъ мнѣ̀ и҆ соста́въ, зижди́тельное твоѐ бы́сть повелѣ́нїе: восхотѣ́въ бо ѿ неви́димагѡ же и҆ ви́димагѡ, жи́ва мѧ̀ соста́вити є҆стества̀: ѿ землѝ тѣ́ло моѐ созда́лъ є҆сѝ, да́лъ же мѝ є҆сѝ дꙋ́шꙋ бж҃е́ственнымъ твои́мъ и҆ животворѧ́щимъ вдохнове́нїемъ. тѣ́мже хрⷭ҇тѐ, раба̀ твоего̀ въ странѣ̀ живꙋ́щихъ, въ селе́нїихъ пра́ведныхъ ᲂу҆поко́й.

Сті́хъ: Къ тебѣ̀ возведо́хъ ѻ҆́чи моѝ живꙋ́щемꙋ на нб҃сѝ.

Поче́лъ є҆сѝ ѡ҆́бразомъ твои́мъ рꙋ́къ твои́хъ, сло́ве, созда́нїе: живописа́въ бо въ веще́ственномъ зра́цѣ, ᲂу҆́мнагѡ сꙋщества̀ подо́бїе, є҆гѡ́же и҆ прича́стника мѧ̀ поста́вилъ є҆сѝ, положи́въ на землѝ нача́льствовати тва́ремъ самовла́стїемъ. тѣ́мже сп҃се, раба̀ твоего̀ во странѣ̀ живы́хъ, и҆ въ ски́нїѧхъ првⷣныхъ ᲂу҆поко́й.

Сла́ва, и҆ ны́нѣ, бг҃оро́диченъ:

Бг҃а и҆з̾ тебѐ вопло́щшагосѧ позна́хомъ бцⷣе дв҃о: того̀ молѝ сп҃сти́сѧ дꙋша́мъ на́шымъ.

Стїхи̑ры, гла́съ з҃:

По ѡ҆́бразꙋ твоемꙋ̀ и҆ по подо́бїю созда́вый въ нача́лѣ человѣ́ка, въ раѝ поста́вилъ є҆сѝ владѣ́ти твои́ми тва́рьми: за́вистїю же дїа́волею прельсти́всѧ, снѣ́ди причасти́сѧ, за́повѣдей твои́хъ престꙋ́пникъ бы́въ. тѣ́мже па́ки въ зе́млю, ѿ неѧ́же взѧ́тъ бы́сть, ѡ҆сꙋди́лъ є҆сѝ возврати́тисѧ гдⷭ҇и, и҆ и҆спроси́ти [ᲂу҆ тебѣ̀] ᲂу҆покое́нїѧ.

Сті́хъ: Ко́ль возлю́блєнна селє́нїѧ твоѧ̑, гдⷭ҇и си́лъ!

Разрѣша́етъ всѧ́кꙋю печа́ль сме́рть, пода́ннаѧ є҆стествꙋ̀ а҆да́мовꙋ: и҆́бо тлѣ́нни бы́хомъ, снѣ́ди причасти́вшесѧ: позна́емъ ᲂу҆́бѡ, ꙗ҆́кѡ созда́вшесѧ ѿ землѝ, па́ки пра́хъ и҆ пе́пелъ бꙋ́демъ, ꙗ҆́коже бѣ́хомъ пре́жде. тѣ́мже со гла́сомъ плаче́внымъ созда́телѧ ᲂу҆мо́лимъ, преста́вльшемꙋсѧ ѡ҆сла́бꙋ дарова́ти, и҆ млⷭ҇ть.

Сла́ва, и҆ ны́нѣ, бг҃оро́диченъ:

Тѧ̀ бцⷣе стѣ́нꙋ нерꙋши́мꙋю, и҆ наде́ждꙋ вѣ́рнїи и҆́мамы. тѣ́мже не преста́й влⷣчце, моли́ти ѡ҆ и҆̀же вѣ́рою ᲂу҆со́пшихъ твои́хъ рабѣ́хъ, ѡ҆сла́бѣ и҆̀мъ бы́ти въ сꙋдѣ̀, є҆гда̀ сѧ́детъ сн҃ъ тво́й и҆ бг҃ъ: є҆стество́ бо ты̀ вѣ́си, ꙗ҆́кѡ всѧ́кими грѣхѝ ны́нѣ смѣси́сѧ, да тѧ̀ всѝ ᲂу҆бл҃жи́мъ.

Стїхи̑ры, гла́съ и҃:

Пла́чꙋ и҆ рыда́ю, є҆гда̀ помышлѧ́ю сме́рть, и҆ ви́ждꙋ во гробѣ́хъ лежа́щꙋю, по ѡ҆́бразꙋ бж҃їю созда́ннꙋю на́шꙋ красотꙋ̀, без̾ѡбра́знꙋ, безсла́внꙋ, не и҆мꙋ́щꙋю ви́да. ѽ чꙋдесѐ, что̀ сїѐ є҆́же ѡ҆ на́съ бы́сть та́инство; ка́кѡ преда́хомсѧ тлѣ́нїю; ка́кѡ сопрѧго́хомсѧ сме́рти, вои́стиннꙋ бг҃а повелѣ́нїемъ, ꙗ҆́коже пи́сано є҆́сть, подаю́щагѡ преста́вльшемꙋсѧ ᲂу҆покое́нїе.

Тлѣ́нни ка́кѡ бы́хомъ, нетлѣ́нный ѡ҆́бразъ носи́вше, и҆ дꙋнове́нїемъ бж҃е́ственнымъ безсме́ртнꙋю прїе́мше дꙋ́шꙋ, смѣше́ни бы́вше, ꙗ҆́коже пи́сано є҆́сть; ка́кѡ же престꙋпи́хомъ бж҃їѧ повелѣ̑нїѧ; ѽ чꙋдесѐ, ка́кѡ снѣ́дь жи́зни ѡ҆ста́вльше, ꙗ҆до́хомъ снѣ́дь, хода́таицꙋ го́рькїѧ сме́рти; ка́кѡ прельще́ни лиши́хомсѧ жи́зни бж҃е́ственныѧ; про́чее возопїи́мъ хрⷭ҇тꙋ̀: є҆го́же преста́вилъ є҆сѝ, во дво́рѣхъ твои́хъ вселѝ.

Сла́ва, и҆ ны́нѣ, бг҃оро́диченъ:

Покро́въ тво́й бцⷣе дв҃о, врачевство̀ є҆́сть дх҃о́вное: въ то́й бо прибѣга́юще дꙋше́вныхъ недꙋ́гѡвъ и҆збавлѧ́емсѧ.

Стїхи̑ры, гла́съ и҃. Самогла́сны:

Безмѣ́рна є҆́сть блꙋ́днѡ живꙋ́щымъ мꙋ́ка, скре́жетъ зꙋ́бный, и҆ пла́чь неꙋтѣ́шимый, мра́къ несвѣти́мый, и҆ тьма̀ кромѣ́шнѧѧ, и҆ че́рвь неꙋсыпа́емый, сле́зы недѣйстви́тельны, и҆ сꙋ́дъ без̾ млⷭ҇ти. сегѡ̀ ра́ди пре́жде конца̀ возопїи́мъ, глаго́люще: влⷣко хрⷭ҇тѐ, є҆го́же и҆збра́лъ є҆сѝ, со и҆збра́нными твои́ми ᲂу҆поко́й.

Подо́бенъ:

Возгласи́тъ трꙋба̀, и҆ ꙗ҆́кѡ ѿ сна̀ ме́ртвїи воста́нꙋтъ, живо́тъ нбⷭ҇ный прїѧ́ти жела́юще, надѣ́ѧшасѧ на тѧ̀ созда́телѧ и҆ гдⷭ҇а: не ѡ҆сꙋдѝ ᲂу҆̀бо раба̀ твоего̀, сме́ртенъ бо безсме́ртне, на́съ ра́ди бы́лъ є҆сѝ. сегѡ̀ ра́ди пре́жде конца̀ возопїи́мъ, глаго́люще: влⷣко хрⷭ҇тѐ, є҆го́же и҆збра́лъ є҆сѝ, со и҆збра́нными твои́ми ᲂу҆поко́й.

Сѐ и҆ стїхі̑и, нб҃о и҆ землѧ̀ и҆змѣнѧ́тсѧ, и҆ всѧ̀ тва́рь въ нетлѣ́нїе ѡ҆блече́тсѧ: разрꙋши́тсѧ тлѣ́нїе, и҆ поги́бнетъ тьма̀ въ прише́ствїи твое́мъ: и҆́маши бо па́ки прїитѝ со сла́вою, ꙗ҆́коже пи́сано є҆́сть, возда́ти комꙋ́ждо, ꙗ҆́коже содѣ́ла. влⷣко хрⷭ҇тѐ, є҆го́же и҆збра́лъ є҆сѝ, со и҆збра́нными твои́ми ᲂу҆поко́й.

Сла́ва, гла́съ ѕ҃.

Прїиди́те и҆ ви́дите всѝ стра́нное и҆ гро́зное видѣ́нїе всѣ̑мъ познава́емое, ѡ҆́бразъ ны́нѣ ви́димый, и҆ не ктомꙋ̀ мꙋ́дрствꙋйте привре́мєннаѧ. дне́сь дꙋша̀ ѿ тѣ́ла разлꙋча́етсѧ, къ вѣ́чномꙋ преставлѧ́ема мі́рꙋ: въ пꙋ́ть бо и҆́детъ, и҆́мже никогда́же ше́ствова, и҆ къ сꙋдїѝ нелицепрїе́мномꙋ, и҆дѣ́же предстоѧ́тъ а҆́гг҃лѡвъ чи́ни. стра́шнѡ бо, бра́тїе моѝ, сꙋди́ще ѻ҆́но, и҆дѣ́же всѝ предста́немъ на́зи! ѻ҆́вїи ᲂу҆́бѡ вѣнчава́еми, ѻ҆́вїи же посрамлѧ́еми. тѣ́мже возопїи́мъ къ безсме́ртномꙋ цр҃ю̀: є҆гда̀ и҆́маши и҆спыта́ти сокровє́ннаѧ человѣ́чєскаѧ, пощадѝ раба̀ твоего̀, є҆го́же прїѧ́лъ є҆сѝ, гдⷭ҇и чл҃вѣколю́бче.

И҆ ны́нѣ, бг҃оро́диченъ:

Мл҃твами хрⷭ҇тѐ ро́ждшїѧ тѧ̀, и҆ прⷣте́чи твоегѡ̀, а҆пⷭ҇лѡвъ, прⷪ҇ро́кѡвъ, і҆ера́рхѡвъ, прпⷣбныхъ и҆ првⷣныхъ, и҆ всѣ́хъ ст҃ы́хъ, ᲂу҆со́пшаго раба̀ твоего̀ ᲂу҆поко́й.

Та́же: Бл҃го є҆́сть и҆сповѣ́датисѧ гдⷭ҇еви: ве́сь. Трист҃о́е. По Ѻ҆́ч҃е на́шъ:

Поко́й сп҃се на́шъ съ првⷣными раба̀ твоего̀, и҆ сего̀ вселѝ во дворы̀ твоѧ̑, ꙗ҆́коже є҆́сть пи́сано, презира́ѧ ꙗ҆́кѡ бл҃гъ прегрѣшє́нїѧ є҆гѡ̀, вѡ́льнаѧ и҆ невѡ́льнаѧ, и҆ всѧ̑ ꙗ҆̀же въ вѣ́дѣнїи и҆ не въ вѣ́дѣнїи, чл҃вѣколю́бче.

Въ поко́ищи твое́мъ гдⷭ҇и, и҆дѣ́же всѝ ст҃і́и твоѝ ᲂу҆покоева́ютсѧ, ᲂу҆поко́й и҆ дꙋ́шꙋ раба̀ твоегѡ̀, ꙗ҆́кѡ є҆ди́нъ є҆сѝ чл҃вѣколю́бецъ.

Мт҃и ст҃а́ѧ неизрече́ннагѡ свѣ́та, а҆́гг҃льскими тѧ̀ пѣ́сньми почита́юще, бл҃гоче́стнѡ велича́емъ.

Дїа́конъ глаго́летъ:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

По возгла́сѣ мл҃твенномъ быва́етъ цѣлова́нїе, ли́кꙋ пою́щꙋ стїхи̑ры, гла́съ в҃:

Прїиди́те, послѣ́днее цѣлова́нїе:

И҆ прѡ́чаѧ, ꙗ҆́коже преднаписа́шасѧ въ послѣ́дованїи мїрско́мъ.

Та́же: Сла́ва, гла́съ ѕ҃: Зрѧ́ще мѧ̀ безгла́сна:

И҆ ны́нѣ, бг҃оро́диченъ:

Ѿходѧ́ще же ко гро́бꙋ пою́тъ сщ҃е́нницы і҆рмосы̀ вели́кагѡ канѡ́на, сі́есть:

Помо́щникъ и҆ покрови́тель: И҆ прѡ́чаѧ. Трист҃о́е. По Ѻ҆́ч҃е на́шъ:

Въ поко́ищи твое́мъ, гдⷭ҇и:

Є҆ди́на чⷭ҇таѧ и҆ непоро́чнаѧ дв҃о:

Та́же, Поми́лꙋй на́съ бж҃е: и҆ про́чее, ꙗ҆́кѡ ѻ҆бы́чно. Бж҃е дꙋхѡ́въ:

И҆ погреба́ютсѧ мо́щи.

И҆ быва́етъ соверше́нный ѿпꙋ́стъ.