Глава 33. Чи́н благослове́ния пче́л

Прише́д иере́й на ме́сто, иде́же стоя́т пче́лы, начина́ет:

Благослове́н Бо́г на́ш:

Чте́ц: Трисвято́е. И О́тче на́ш: И по возгла́се: Я́ко Твое́ е́сть Ца́рство: рече́т Го́споди поми́луй, 12.

Прииди́те, поклони́мся: Три́жды.

И псало́м 50:

Поми́луй мя́ Бо́же:

Та́же, псало́м 84:

Благоволи́л еси́, Го́споди, зе́млю Твою́, возврати́л еси́ пле́н Иа́ковль: оста́вил еси́ беззако́ния люде́й Твои́х, покры́л еси́ вся́ грехи́ и́х. Укроти́л еси́ ве́сь гне́в Тво́й, возврати́лся еси́ от гне́ва я́рости Твоея́. Возврати́ на́с Бо́же спасе́ний на́ших, и отврати́ я́рость Твою́ от на́с. Еда́ во ве́ки прогне́ваешися на ны́? Или́ простре́ши гне́в Тво́й от ро́да в ро́д? Бо́же, Ты́ обра́щься оживи́ши ны́, и лю́дие Твои́ возвеселя́тся о Тебе́. Яви́ на́м Го́споди ми́лость Твою́, и спасе́ние Твое́ да́ждь на́м. Услы́шу, что́ рече́т о мне́ Госпо́дь Бо́г, я́ко рече́т ми́р на лю́ди Своя́ и на преподо́бныя Своя́, и на обраща́ющыя сердца́ к Нему́. Оба́че бли́з боя́щихся Его́ спасе́ние Его́, всели́ти сла́ву в зе́млю на́шу. Ми́лость и и́стина срето́стеся, пра́вда и ми́р облобыза́стася. И́стина от земли́ возсия́, и пра́вда с небесе́ прини́че, и́бо Госпо́дь да́ст бла́гость, и земля́ на́ша да́ст пло́д сво́й. Пра́вда пред Ни́м предъи́дет, и положи́т в пу́ть стопы́ своя́.

Та́же псало́м 122.

К Тебе́ возведо́х о́чи мои́, живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́. Поми́луй на́с Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Чита́емым же псалмо́м, окропля́ет иере́й места́ пче́л вся́, глаго́ля и са́м псало́м 50-й та́йно: Поми́луй мя́ Бо́же:

Та́же ре́к: Го́споду помо́лимся.

И чте́ц: Го́споди поми́луй.

Чте́т иере́й моли́твы сия́

Созда́телю все́х Бо́же, се́мена благословля́яй и умножа́яй, и к употребле́нию на́шему сия́ благопотре́бна творя́й, хода́тайством Предте́чи и Крести́теля Иоа́нна, ми́лостивно вне́мля моли́твам на́шим, пче́лы сия́ благослови́ти и освяти́ти Свои́м благоутро́бием благоизво́ли, да оби́льнее плоды́ своя́ прино́сят, во е́же ко хра́му Твоему́ и святы́х олтаре́й Твои́х ле́поте и украше́нию, ку́пно же и к на́шему употребле́нию бы́ти и́м, о Христе́ Иису́се Го́споде на́шем, Ему́же че́сть и сла́ва, во ве́ки веко́в, ами́нь.

Го́споду помо́лимся.

Чте́ц: Го́споди поми́луй.

Иере́й:

Бо́же, трудо́м челове́ческим и безслове́сными живо́тными благоде́йствовати ве́дый, и неизрече́нным милосе́рдием Твои́м саме́х пче́л плоды́ и дела́ к ну́ждам на́шим употребля́ти научи́вый, смире́нно мо́лимся вели́чествию Твоему́: пче́лы сия́ благослови́ти изво́ли, и к приобре́тению челове́ческому ро́ду умно́жи я́, снабдева́я и́х, и препитава́я, да ки́йждо на вели́чество Твое́ и безме́рныя щедро́ты Твоя́ упова́яй, в хране́нии же си́х живо́тных тружда́яйся, трудо́в свои́х оби́льныя плоды́ сподо́бится восприя́ти, и небе́снаго благослове́ния испо́лнится, о Христе́ Иису́се Го́споде на́шем, Ему́же че́сть и сла́ва во ве́ки веко́в, ами́нь.

И па́ки окропля́ет ме́сто пче́л, и чте́т Ева́нгелие от Луки́, зача́ло 114.

Во вре́мя о́но, воскре́с Иису́с от ме́ртвых, ста́ посреде́ учени́к свои́х, и глаго́ла и́м: ми́р ва́м. Убоя́вшеся же и пристра́шни бы́вше, мня́ху ду́х ви́дети. И рече́ и́м: что́ смуще́ни есте́? И почто́ помышле́ния вхо́дят в сердца́ ва́ша? Ви́дите ру́це Мои́ и но́зе Мои́, я́ко Са́м А́з е́смь. Осяжи́те Мя́ и ви́дите, я́ко ду́х пло́ти и ко́сти не и́мать, я́коже Мене́ ви́дите иму́ща. И сие́ ре́к, показа́ и́м ру́це и но́зе. Еще́ же не ве́рующым и́м от ра́дости и чудя́щымся, рече́ и́м: и́мате ли что́ сне́дно зде́? Они́ же да́ша Ему́ ры́бы печены́ ча́сть, и от пче́л со́т. И взе́м пред ни́ми яде́. Рече́ же и́м: сия́ су́ть словеса́, я́же глаго́лах к ва́м, еще́ сы́й с ва́ми, я́ко подоба́ет сконча́тися все́м напи́санным в зако́не Моисе́ове и проро́цех и псалме́х о Мне́.

По Ева́нгелии же глаго́лет сие́:

Си́ми ева́нгльскими словесы́, да очи́стятся грехи́ на́шя, и разоря́тся и поги́бнут вся́ обая́ния, а́ще ка́я су́ть на ме́сте се́м, да сни́дет же на не́ благослове́ние всемогу́щаго Бо́га Отца́, и Сы́на, и Свята́го Ду́ха, ами́нь.

И па́ки кропи́т ме́сто пче́л, и быва́ет отпу́ст.