Глава 24. Моли́тва на основа́ние до́му

Бо́же Вседержи́телю, сотвори́вый небеса́ ра́зумом, и основа́вый зе́млю на тве́рди ея́, Созда́телю и Соде́телю все́х, при́зри на раба́ Твоего́, и́мярек, изво́лившаго в держа́ве кре́пости Твоея́, воздви́гнути до́м в жили́ще, и зда́нием его́ воздви́гнути, утверди́ его́ на тве́рдом ка́мени, и основа́й по Твоему́ Боже́ственному ева́нгльскому гла́су, его́же ни ве́тр, ни вода́, ни и́но что́ повреди́ти возмо́жет, благоволи́ ему́ в коне́ц привести́ся, и в не́м жи́ти хотя́щих от вся́каго наве́та сопроти́внаго свободи́.

Я́ко Твоя́ держа́ва, и Твое́ е́сть Ца́рство, и си́ла, и сла́ва, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.