[глⷡ҇а з҃] Вѣ́стно же бꙋ́ди, ꙗ҆́кѡ въ ма́лыхъ ѻ҆би́телехъ и҆ собо́рныхъ и҆ прихо́дскихъ хра́мѣхъ, во дни̑ недѣ̑льныѧ, и҆дѣ́же всенѡ́щныѧ не быва́ютъ, и҆лѝ настоѧ́тель не и҆зво́литъ, пое́тсѧ вече́рнѧ вели́каѧ, та́кожде и҆ ᲂу҆́тренѧ во своѐ вре́мѧ си́це:

Въ сꙋббѡ́тꙋ ве́чера, по ѿпꙋ́стѣ ѳ҃-гѡ часа̀, вхо́дитъ въ цр҃ковь предстоѧ́тель и҆ чредны́й сщ҃е́нникъ, и҆ всѝ: є҆́млѧй же сщ҃е́нникъ бл҃гослове́нїе ѿ предстоѧ́телѧ, ѿхо́дитъ пред̾ ца̑рскаѧ врата̀, и҆ твори́тъ поклонє́нїѧ трѝ.

Взе́мъ же и҆ є҆пїтрахи́лїй, и҆ бл҃гослови́въ и҆̀, и҆ цѣлова́въ ве́рхъ, и҆дѣ́же є҆́сть крⷭ҇тъ начерта́нъ: и҆ возложи́въ на вы́ю свою̀ глаго́летъ: Бл҃гослове́нъ бг҃ъ на́шъ: ѿверза́ѧй и҆ внꙋ́треннюю завѣ́сꙋ сꙋ́щꙋю тафто́ю, и҆лѝ и҆ны́мъ ви́домъ ᲂу҆стро́енꙋю.

Предстоѧ́тель же глаго́летъ: Прїиди́те поклони́мсѧ: и҆ предначина́тельный ѱало́мъ.

А҆́ще же предстоѧ́телѧ не слꙋчи́тсѧ та́мѡ, глаго́летъ и҆́нъ ѿ старѣ́йшихъ сщ҃е́нникѡвъ: Сщ҃е́нникъ же чредны́й стои́тъ пред̾ ца́рскими врата́ми, глаго́лѧ та́йнѡ мл҃твы свѣти̑льничныѧ, стоѧ̀ непокрове́нъ. Глаго́летъ же и҆ є҆ктенїю̀, и҆ возгла́съ подо́бнѣ, и҆ про́чее вече́рни всѐ пое́мъ, ꙗ҆́коже предписа́сѧ во бдѣ́нїи вели́кїѧ вече́рни: то́чїю здѣ̀ по є҆ктенїѝ: И҆спо́лнимъ вече́рнюю мл҃твꙋ на́шꙋ: пое́мъ на стїхо́внѣ стїхи̑ры воскрⷭ҇ны, и҆ по и҆сполне́нїи и҆́хъ глаго́летъ предстоѧ́тель: Ны́нѣ ѿпꙋща́еши:

Чте́цъ глаго́летъ: Трист҃о́е съ про́чими.

Сщ҃е́нникъ, возгла́съ: Ꙗ҆́кѡ твоѐ є҆́сть црⷭ҇тво: внꙋ́трь ст҃а́гѡ ѻ҆лтарѧ̀.

И҆ чте́цъ, ѿпꙋсти́тєльныѧ тропарѝ по ѻ҆бы́чаю.

Дїа́конъ же, ѿ внѣ̀ стоѧ̀ пред̾ ѡ҆́бразомъ сп҃са хрⷭ҇та̀, возглаша́етъ: Премꙋ́дрость.

Ли́къ: Бл҃гословѝ.

Сщ҃е́нникъ, ѿ внꙋ́трь глаго́летъ: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ:

Ли́къ: А҆ми́нь. Оу҆твердѝ бж҃е, бл҃гочести́вѣйшаго, самодержа́внѣйшаго, вели́каго гдⷭ҇рѧ на́шего і҆мпера́тора нїкола́ѧ а҆леѯа́ндровича, и҆ ст҃ꙋ́ю правосла́внꙋю вѣ́рꙋ: и҆ прѡ́чаѧ.

И҆ сщ҃е́нникъ глаго́летъ ти́химъ гла́сомъ: Прест҃а́ѧ бцⷣе, сп҃сѝ на́съ.

Ли́къ: Чⷭ҇тнѣ́йшꙋю:

И҆ па́ки сщ҃е́нникъ: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

И҆ глаго́летъ ли́къ:

Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Сщ҃е́нникъ же ѿве́рзъ ст҃ы̑ѧ двє́ри, и҆ ѡ҆пꙋсти́въ фелѡ́нь, стоѧ́щꙋ дїа́конꙋ ѿ внѣ̀ ѡ҆деснꙋ́ю, и҆ ѻ҆ра́рь держа́щꙋ ѻ҆бы́чнѡ, глаго́летъ і҆ере́й ѿпꙋ́стъ по дню̀.

[зрѝ] Посе́мъ многолѣ́тїе. И҆ по є҆́же вечерѧ́ти бра́тїѧмъ, є҆́млетъ па́ки бл҃гослове́нїе цр҃ко́вникъ ѿ предстоѧ́телѧ, а҆́ще є҆́сть: а҆́ще же нѝ ѿ чредна́гѡ сщ҃е́нника. И҆ кле́плетъ въ ма́лый кампа́нъ, и҆лѝ въ рꙋчно́е клепа́ло, по ѻ҆бы́чаю. И҆ собра́вшымсѧ бра́тїѧмъ въ притво́ръ, твори́тъ нача́ло чредны́й сщ҃е́нникъ, и҆ пое́мъ повече́рїе, ꙗ҆́кѡ ѻ҆бы́чай съ канѡ́номъ.

И҆ по ѻ҆бы́чномъ ѿпꙋ́стѣ предстоѧ́тель глаго́летъ: Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ.

Бра́тїѧ же и҆сходѧ́ще, два̀, два̀, по чи́нꙋ, творѧ́тъ покло́нъ пред̾ предстоѧ́телемъ, и҆ є҆́млютъ ѿ негѡ̀ бл҃гослове́нїе и҆ проще́нїе:

Та́же предстоѧ́тель, сотвори́въ ѡ҆́бразъ покло́на, про́ситъ и҆ са́мъ проще́нїѧ ѿ ни́хъ.

Во ᲂу҆́трїи же: Кле́плетъ параекклисїа́рхъ въ кампа́нъ, ꙗ҆́кѡ ѻ҆бы́чай, и҆ въ би́ло, и҆ собира́ютсѧ бра́тїѧ въ притво́рѣ, твори́тъ же сщ҃е́нникъ нача́ло: Бл҃гослове́нъ бг҃ъ на́шъ:

И҆ а҆́бїе чте́цъ глаго́летъ: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е, и҆ по Ѻ҆́ч҃е на́шъ: Гдⷭ҇и поми́лꙋй, в҃і. Прїиди́те поклони́мсѧ: три́жды: и҆ ѱало́мъ н҃.

Та́же пое́тсѧ трⷪ҇чный канѡ́нъ, со бл҃гоговѣ́нїемъ и҆ ᲂу҆миле́нїемъ. По канѡ́нѣ же пою́тъ трⷪ҇чное велича́нїе, сі́есть: Досто́йно є҆́сть ꙗ҆́кѡ вои́стиннꙋ, сла́вити тѧ̀ бг҃а сло́ва: И҆ про́чыѧ тропарѝ.

Та́же трист҃о́е, и҆ Ѻ҆́ч҃е на́шъ: и҆ ѵ҆пакоѝ гла́са: Гдⷭ҇и поми́лꙋй, м҃.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

И҆ возгла́съ ѿ сщ҃е́нника: Бж҃е ᲂу҆ще́дри ны̀:

И҆ мл҃тва глаго́летсѧ ѿ і҆ере́а: Всемогꙋ́щаѧ и҆ животворѧ́щаѧ:

И҆ ѿпꙋ́стъ, и҆ проще́нїе ѻ҆бы́чное.

Та́же і҆ере́й глаго́летъ є҆ктенїю̀: Помо́лимсѧ ѡ҆ бл҃гочести́вѣйшемъ:

Мы́ же: Гдⷭ҇и поми́лꙋй, кро́ткимъ и҆ ти́химъ гла́сомъ.

И҆ по и҆сполне́нїи тоѧ̀ глаго́летъ предстоѧ́тель: Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ.

И҆ по ѿпꙋ́стѣ вхо́димъ во хра́мъ.

Сщ҃е́нникъ же вше́дъ во ст҃ы́й ѻ҆лта́рь, и҆ возложи́въ є҆пїтрахи́лїй и҆ вложи́въ ѳѷмїа́мъ въ кади́льницꙋ, пред̾ꙋгото́вленѣ є҆́й ѿ цр҃ко́внагѡ слꙋжи́телѧ, глаго́летъ и҆ ѻ҆бы́чнꙋю мл҃твꙋ кади́ла, стоѧ̀ пред̾ ст҃о́ю трапе́зою начертава́ѧй крⷭ҇тъ съ кади́льницею, глаго́лѧ: Бл҃гослове́нъ бг҃ъ на́шъ всегда̀, ны́нѣ и҆ при́снѡ, и҆ во вѣ́ки вѣкѡ́въ: ѿверза́ѧй пре́жде и҆ тафто́ю ᲂу҆стро́енꙋю завѣ́сꙋ, сꙋ́щꙋю внꙋ́трь ца́рскихъ вра́тъ.

Та́же кади́тъ ст҃ꙋ́ю трапе́зꙋ ѻ҆́крестъ, и҆ ве́сь же́ртвенникъ: И҆ и҆схо́дитъ сѣ́верною страно́ю, и҆ кади́тъ ст҃ы̑ѧ і҆кѡ̑ны, и҆ предстоѧ́телѧ, и҆ всѧ̑ ꙗ҆́кѡ ѻ҆бы́чай.

Чте́цъ же, по Бл҃гослове́нъ бг҃ъ на́шъ, глаго́летъ, А҆ми́нь. Прїиди́те поклони́мсѧ: и҆ ѻ҆бы̑чныѧ ѱалмы̀: Оу҆слы́шитъ тѧ̀ гдⷭ҇ь: и҆ Гдⷭ҇и си́лою твое́ю: Трист҃о́е, и҆ Ѻ҆́ч҃е на́шъ:

[зрѝ] До́лженствꙋетъ же внима́ти чте́цъ и҆ сщ҃е́нникъ, є҆гда и҆́мать рещѝ: Ꙗ҆́кѡ твоѐ є҆́сть црⷭ҇тво: бы́ти є҆мꙋ̀ посредѣ̀ хра́ма.]

Та́же тропарѝ: Сп҃сѝ гдⷭ҇и лю́ди твоѧ̑, и҆ прѡ́чаѧ.

И҆ сщ҃е́нникъ кади́тъ па́ки предстоѧ́телѧ, и҆ ст҃ы̑ѧ і҆кѡ̑ны: и҆ вхо́дитъ во ст҃ы́й ѻ҆лта́рь ю҆́жною страно́ю, и҆ стои́тъ пред̾ ст҃о́ю трапе́зою съ кади́льницею, и҆ глаго́летъ є҆ктенїю̀: Поми́лꙋй на́съ бж҃е, по вели́цѣй млⷭ҇ти твое́й, и҆ прѡ́чаѧ.

Та́же возгла́съ: Ꙗ҆́кѡ млⷭ҇тивъ и҆ чл҃вѣколю́бецъ бг҃ъ є҆сѝ:

Пѣвцы̀, А҆ми́нь. И҆́менемъ гдⷭ҇нимъ бл҃гословѝ, ѻ҆́тче.

Та́же сщ҃е́нникъ начертава́ѧй съ кади́льницею крⷭ҇тъ пред̾ ст҃о́ю трапе́зою, глаго́летъ возгла́снѡ: Сла́ва ст҃ѣ́й, и҆ є҆диносꙋ́щнѣй, и҆ животворѧ́щей, и҆ нераздѣ́льнѣй трⷪ҇цѣ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

Предстоѧ́тель же глаго́летъ: Сла́ва въ вы́шнихъ бг҃ꙋ: И҆ шестоѱа́лмїе, ꙗ҆́кѡ ѻ҆бы́чай.

Сщ҃е́нникъ же полага́ѧй кади́льницꙋ на мѣ́стѣ, и҆схо́дитъ и҆з̾ ѻ҆лтарѧ̀, и҆ стои́тъ на ѻ҆бы́чномъ мѣ́стѣ свое́мъ. По внегда́ же рещѝ предстоѧ́телю трѝ ѱалмы̀, и҆ на́чнетъ: Гдⷭ҇и бж҃е сп҃се́нїѧ моегѡ̀: ѿхо́дитъ сщ҃е́нникъ пред̾ ца̑рскїѧ и҆ ст҃ы̑ѧ двє́ри: И҆ поклони́всѧ и҆ возложи́въ є҆пїтрахи́лїй, глаго́летъ та́йнѡ ᲂу҆́трєннїѧ мл҃твы, и҆ є҆ктенїю̀, ꙗ҆́кѡ ѻ҆бы́чай. И҆ про́чее ᲂу҆́трени, всѐ пое́мъ, ꙗ҆́коже предписа́сѧ во бдѣ́нїи ᲂу҆́трени ли́стъ є҃, на ѡ҆боро́тѣ, да́же до конца̀: и҆ ча́съ а҃-й, и҆ на лїтꙋргі́и.

[зрѝ] Вѣ́домо же бꙋ́ди, Ꙗ҆́кѡ, Вѣ́рꙋю во є҆ди́наго бг҃а, и҆ Ѻ҆́ч҃е на́шъ, въ лїтꙋргі́и: Въ вече́рнѣ предначина́тельный ѱало́мъ. Свѣ́те ти́хїй: Сподо́би гдⷭ҇и: Ны́нѣ ѿпꙋща́еши:

На ᲂу҆́трени, Шестоѱа́лмїе: Тебѣ̀ сла́ва подоба́етъ:

Сла́ва въ вы́шнихъ бг҃ꙋ, и҆ на землѝ ми́ръ:

Бл҃го є҆́сть и҆сповѣ́датисѧ гдⷭ҇ви:

Нбⷭ҇ный цр҃ю̀:

Предстоѧ́тель глаго́летъ. Трист҃о́е же и҆ Ѻ҆́ч҃е на́шъ, на вече́рни, по Ны́нѣ ѿпꙋща́еши, и҆ на ᲂу҆́трени, по Бл҃го є҆́сть и҆сповѣ́датисѧ гдⷭ҇ви, чте́цъ глаго́летъ.

[зрѝ] Подоба́етъ вѣ́дати, Ꙗ҆́кѡ приходѧ́щемꙋ гдⷭ҇скомꙋ пра́здникꙋ, и҆лѝ бцⷣы, и҆ ѻ҆́ба пра́здника прⷣте́чева, рождество̀ и҆ ᲂу҆сѣкнове́нїе, и҆ ст҃ы́хъ а҆пⷭ҇лъ петра̀ и҆ па́ѵла, и҆ і҆ѡа́нна бг҃осло́ва, и҆лѝ а҆́ще бꙋ́детъ хра́мъ: до́лжно є҆́сть прочита́ти а҆по́столъ, и҆ є҆ѵⷢ҇лїе рѧдово́е, хотѧ́щее бы́ти тогда̀ въ са́мый де́нь пра́здника, за де́нь напре́дь пре́жде пра́здника, под̾ зача́ло. На са́мый же пра́здника де́нь, чте́мъ пра́здника є҆ди́нагѡ, ꙗ҆́коже и҆ всѧ̀ слꙋ́жба.