[глⷡ҇а ѕ҃] Ѡ҆ бдѣ́нїихъ всено́щныхъ, быва́ющихъ чре́зъ всѐ лѣ́то

Подоба́етъ вѣ́дати: Ꙗ҆́кѡ всегѡ̀ лѣ́та сꙋ́ть седми́цъ н҃в, въ ни́хже твори́мъ на кꙋ́юждо недѣ́лю бдѣ́нїе, ꙗ҆́кѡ да и҆зочтє́ннымъ бы́вшымъ всѣ̑мъ воскрⷭ҇нымъ бдѣ́нїѧмъ всегѡ̀ лѣ́та, ѡ҆брѣта́ютсѧ н҃в.

Быва́ютъ же ᲂу҆́бѡ и҆ во влⷣчнихъ пра́здникахъ, на кі́йждо мѣ́сѧцъ бдѣ̑нїѧ. Вкꙋ́пѣ же ᲂу҆́бѡ и҆ со и҆нѣ́ми быва́ютъ всегѡ̀ лѣ́та бдѣ́нїй ѯ҃и.

Сꙋ́ть же и҆ и҆́на бдѣ̑нїѧ, ꙗ҆̀же ᲂу҆ка́жꙋтсѧ по и҆менѡ́мъ, во ᲂу҆ста́вѣ на рѧдꙋ̀ свое́мъ, гдѣ̀ ко́е пи́сано є҆́сть, и҆̀хже а҆́ще предстоѧ́тель произво́литъ, а҆́ще зри́тъ своѧ̑ цр҃ко́вники бо́дростнѣ ѡ҆ сп҃се́нїихъ свои́хъ тща́щихсѧ. Є҆́сть же и҆ и҆́но бдѣ́нїе къ си̑мъ ст҃а́гѡ хра́ма, во ѻ҆би́тели, є҆́же до́лжно є҆́сть быва́ти, и҆ ника́коже ѡ҆ставлѧ́тисѧ въ па́мѧть є҆гѡ̀.