[глⷡ҇а м҃ѳ] ТРІѠ́ДІОНЪ СІ́ЕСТЬ ТРИПѢ́СНЕЦЪ съ бг҃омъ ст҃ы́мъ, ѡ҆бдержа́й подоба́ющее є҆мꙋ̀ послѣ́дованїе

Въ сꙋббѡ́тꙋ ве́чера, на ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю.

На вели́цѣй вече́рни, по предначина́тельномъ ѱалмѣ̀, стїхосло́вимъ: Бл҃же́нъ мꙋ́жъ: а҃-ю каѳі́смꙋ всю̀.

На Гдⷭ҇и воззва́хъ, поста́вимъ стїхѡ́въ і҃: и҆ пое́мъ ѻ҆смогла́сника стїхи̑ры воскрⷭ҇ны г҃: и҆ а҆нато́лїєвы д҃: и҆ трїѡ́ди самогла́сны двѣ̀, повторѧ́юще а҃-ю, гла́съ а҃:

Не помо́лимсѧ фарїсе́йски: в҃- ѧ, Фарїсе́й тщесла́вїемъ:

Сла́ва, гла́съ и҃: Вседержи́телю гдⷭ҇и:

И҆ ны́нѣ, бг҃оро́диченъ а҃-й настоѧ́щагѡ гла́са.

На лїті́и стїхи́ра хра́ма.

Сла́ва, гла́съ г҃: Мытарѧ̀ и҆ фарїсе́а: И҆ ны́нѣ, бг҃оро́диченъ, воскрⷭ҇нъ, въ то́йже гла́съ.

На стїхо́внѣ стїхи̑ры ѻ҆смогла́сника по а҆лфави́тꙋ.

Сла́ва, гла́съ є҃: Ѡ҆тѧгче́нныма ѻ҆чи́ма мои́ма: И҆ ны́нѣ, бг҃оро́диченъ, въ то́йже гла́съ:

Хра́мъ и҆ две́рь є҆сѝ: Тропа́рь: Бцⷣе дв҃о: глаго́летсѧ три́жды.

и҆ быва́етъ бл҃гослове́нїе хлѣ́бѡвъ, и҆ раздаѧ́нїе: и҆ чте́нїе въ посла́нїихъ а҆пⷭ҇льскихъ. [А҆́ще же нѣ́сть бдѣ́нїѧ], по Ны́нѣ ѿпꙋща́еши, глаго́лемъ тропа́рь воскрⷭ҇нъ: Сла́ва, и҆ ны́нѣ, бг҃оро́диченъ є҆гѡ̀. На повече́рїи, по Досто́йно и҆ по Ѻ҆́ч҃е на́шъ, конда́къ трїѡ́ди є҆ди́нъ: Си́це глаго́лемъ и҆ въ недѣ́лю блꙋ́днагѡ, и҆ мѧсопꙋ́стнꙋю, и҆ сыропꙋ́стнꙋю.

[зрѝ] Вѣ́домо бꙋ́ди: Ꙗ҆́кѡ послѣ́дованїе прилꙋчи́вшагѡсѧ ст҃а́гѡ въ недѣ́лю сїю̀, и҆ блꙋ́днагѡ, пое́мъ въ пѧто́къ на повече́рїи, а҆́ще то́кмѡ не слꙋчи́тсѧ ко́егѡ вели́кагѡ ст҃а́гѡ па́мѧть.

На ᲂу҆́трени по шестоѱа́лмїи: Бг҃ъ гдⷭ҇ь, во гла́съ ѻ҆смогла́сника: и҆ глаго́лемъ тропа́рь воскрⷭ҇нъ, два́жды.

Сла́ва, и҆ ны́нѣ, бг҃оро́диченъ а҃-й: и҆ ѻ҆бы́чное стїхосло́вїе. сѣда́льны ѻ҆смогла́сника.

и҆ чте́нїе въ толкова́нїихъ є҆ѵⷢ҇лїа лꙋкѝ настоѧ́щагѡ днѐ: Человѣ̑ка два̀ внидо́ста въ цр҃ковь: и҆ прѡ́чаѧ словеса̀ торже́ствєннаѧ.

По непоро́чнахъ тропарѝ:

А҆́гг҃льскїй собо́ръ: ѵ҆пакоѝ, степє́нна и҆ прокі́менъ гла́са.

Всѧ́кое дыха́нїе: и҆ є҆ѵⷢ҇лїе воскрⷭ҇но.

Воскрⷭ҇нїе хрⷭ҇то́во: ѱало́мъ н҃.

Сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ, бг҃оро́диченъ:

На сп҃се́нїѧ стєзѝ:

Та́же, гла́съ ѕ҃: Поми́лꙋй мѧ̀ бж҃е: Мно́жєства содѣ́ѧнныхъ:

Посе́мъ дїа́конъ, и҆лѝ і҆ере́й глаго́летъ мл҃твꙋ: Сп҃сѝ бж҃е лю́ди твоѧ̑:

мы́ же, Гдⷭ҇и поми́лꙋй: в҃і.

Та́же канѡ́нъ воскрⷭ҇нъ ѻ҆смогла́сника со і҆рмосо́мъ на д҃: и҆ крⷭ҇товоскрⷭ҇ный на в҃: и҆ бцⷣы на в҃, и҆ трїѡ́ди на ѕ҃, гла́съ ѕ҃, творе́нїе геѡ́ргїа.

Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ гла́съ д҃. Подо́бенъ: Ско́рѡ предварѝ: Смире́нїе вознесѐ:

Сла́ва: Смире́нїе дре́вле: И҆ ны́нѣ, бг҃оро́диченъ: Ско́рѡ прїимѝ: По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь:

Воздыха̑нїѧ принесе́мъ мыта̑рскаѧ гдⷭ҇еви, и҆ къ немꙋ̀ пристꙋ́пимъ грѣ́шнїи ꙗ҆́кѡ влⷣцѣ: хо́щетъ бо сп҃се́нїѧ всѣ́хъ человѣ́кѡвъ. ѡ҆ставле́нїе подае́тъ всѣ̑мъ ка́ющымсѧ: на́съ бо ра́ди воплоти́сѧ бг҃ъ сы́й ѻ҆ц҃ꙋ̀ собезнача́льный.

И҆ і҆́косъ. и҆ чте́мъ про́логъ, и҆лѝ сѷнаѯа́рїй.

[зрѝ] [Си́це до́лженствꙋетъ про́логъ пре́жде ꙗ҆́кѡ ѻ҆бы́чай чита́ти, пото́мъ же сѷнаѯа́рїй трїѡ́ди, да́же до недѣ́ли всѣ́хъ ст҃ы́хъ.

По ѳ҃-й пѣ́сни, є҆ѯапостїла́рїй воскрⷭ҇ный: Сла́ва, трїѡ́ди, подо́бенъ: Со ᲂу҆ченикѝ: Высокорѣ́чїѧ ᲂу҆бѣжи́мъ: И҆ ны́нѣ, бг҃оро́диченъ. Подо́бенъ: Творе́цъ созда́нїѧ: На хвали́техъ, ѻ҆смогла́сника д҃: и҆ трїѡ́ди самогла́сны д҃, гла́съ. л҃: Не помо́лимсѧ фарїсе́йски: и҆ Фарїсе́й тщесла́вїемъ: пи́саны на вече́рни. и҆ гла́съ г҃, съ припѣ́вы: а҃, Воскрⷭ҇нѝ гдⷭ҇и бж҃е мо́й: Мытарѧ̀ и҆ фарїсе́а: в҃, И҆сповѣ́мсѧ тебѣ̀ гдⷭ҇и: Фарїсе́а велехва́льный гла́съ:

Сла́ва, гла́съ и҃: Ѿ дѣ́лъ похвале́ньми: И҆ ны́нѣ: Пребл҃гослове́нна є҆сѝ: Славосло́вїе вели́кое.

По трист҃о́мъ тропа́рь воскрⷭ҇нъ то́чїю: Є҆ктєнїѝ, и҆ ѿпꙋ́стъ, и҆ ѻ҆бы́чнаѧ лїті́а въ притво́рѣ, въ не́йже пое́мъ: Сла́ва, и҆ ны́нѣ, стїхи́рꙋ ᲂу҆́треннюю є҆ѵⷢ҇льскꙋю.

И҆ ча́съ а҃-й. На а҃-мъ часѣ̀, тропа́рь воскрⷭ҇нъ. По трист҃о́мъ, конда́къ трїѡ́ди.

[зрѝ] Подоба́етъ вѣ́дати: Ꙗ҆́кѡ стїхи̑ры всѧ̑ а҃і ᲂу҆́трєннїѧ є҆ѵⷢ҇льскїѧ, ѿ сеѧ̀ настоѧ́щїѧ недѣ́ли, и҆ да́же до всѣ́хъ ст҃ы́хъ, на лїті́ахъ ᲂу҆́треннихъ пою́тсѧ въ притво́рѣ, на Сла́ва, и҆ ны́нѣ.

[зрѝ] Вѣ́домо же бꙋ́ди: Ꙗ҆́кѡ ѿ сеѧ̀ недѣ́ли начина́емъ честѝ въ притво́рѣ, по ѿпꙋ́стѣ лїті́и, ѡ҆глашє́нїѧ ст҃а́гѡ ѻ҆тца̀ на́шегѡ ѳео́дѡра стꙋді́та. И҆ а҆́ще та́мѡ є҆́сть и҆гꙋ́менъ, чтꙋ́тсѧ ѿ негѡ̀:

А҆́ще же нѝ, то̀ ѿ є҆кклисїа́рха, стоѧ́щымъ и҆ со внима́нїемъ послꙋ́шающымъ бра́тїѧмъ. [П]о сконча́нїи же чте́нїѧ, глаго́лемъ тропа́рь прпⷣбнагѡ ѳео́дѡра, гла́съ и҃: Правосла́вїѧ наста́вниче: без̾ бг҃оро́дична. и҆ соверше́нный ѿпꙋ́стъ.

На лїтꙋргі́и, бл҃жє́нна ѻ҆смогла́сника на ѕ҃: и҆ трїѡ́ди пѣ́снь ѕ҃-ѧ на д҃.

По вхо́дѣ тропа́рь воскрⷭ҇нъ, и҆ хра́ма бцⷣы, и҆лѝ хра́ма ст҃а́гѡ. Посе́мъ сла́ва, конда́къ трїѡ́ди: И҆ ны́нѣ, хра́ма бцⷣы:

А҆ и҆дѣ́же нѣ́сть хра́ма бцⷣы, глаго́лемъ Сла́ва, конда́къ хра́ма ст҃а́гѡ: И҆ ны́нѣ, трїѡ́ди. Хрⷭ҇то́ва же хра́ма тропарѧ̀ и҆ кондака̀ не глаго́лемъ.

Прокі́менъ гла́са.

А҆по́столъ къ тїмоѳе́ю, зача́ло сч҃ѕ: Ча́до тїмоѳе́е, послѣ́довалъ є҆сѝ моемꙋ̀ ᲂу҆че́нїю: А҆ллилꙋ́їа гла́са.

Є҆ѵⷢ҇лїе лꙋкѝ, зача́ло п҃ѳ: Человѣ̑ка два̀ внидо́ста:

Прича́стенъ: Хвали́те гдⷭ҇а съ нб҃съ:

[зрѝ] Вѣ́стно бꙋ́ди, ꙗ҆́кѡ ѿ дне́сь чте́тсѧ а҆по́столъ и҆ є҆ѵⷢ҇лїе, по сꙋббѡ́тамъ, пре́жде рѧ́дъ сꙋббѡ́ты, пото́мъ ст҃а́гѡ, до недѣ́ли всѣ́хъ ст҃ы́хъ.

[зрѝ] Подоба́етъ вѣ́дати: ꙗ҆́кѡ въ се́й седми́цѣ и҆номꙋ́дрствꙋющїи соде́ржатъ по́стъ, глаго́лемый а҆рцивꙋ́рїевъ. Мы́ же мона́си на кі́йждо де́нь, се́ же въ сре́дꙋ и҆ пѧто́къ, вкꙋша́емъ сы́ръ и҆ ꙗ҆́ица, въ ѳ҃-й ча́съ. Мїрѧ́не же ꙗ҆дѧ́тъ мѧ́со, развраща́юще ѻ҆́нѣхъ велѣ́нїе толи́кїѧ є҆́реси.

[зрѝ] А҆́ще слꙋчи́тсѧ пра́здникъ срѣ́тенїѧ гдⷭ҇нѧ въ сꙋббѡ́тꙋ мѧсопꙋ́стнꙋю:

Слꙋ́жба ᲂу҆ме́ршихъ пое́тсѧ въ гробни́цѣ всѧ̀, ве́черъ и҆ ᲂу҆́трѡ. А҆́ще ли нѣ́сть гробни́цы, пое́тсѧ въ сїю̀ сꙋббѡ́тꙋ пред̾ недѣ́лею ѡ҆ блꙋ́дномъ, а҆ въ сꙋббѡ́тꙋ мѧсопꙋ́стнꙋю пое́тсѧ слꙋ́жба пра́здника є҆ди́нагѡ.

Въ сꙋббѡ́тꙋ ве́чера, на ма́лѣй вече́рни, стїхи̑ры воскрⷭ҇ны, и҆ бцⷣы поѻ҆бы́чаю.

На вели́цѣй вече́рни, по ѻ҆бы́чномъ стїхосло́вїи, На Гдⷭ҇и воззва́хъ, стїхи̑ры на ч҃: воскрⷭ҇ны г҃, и҆ а҆нато́лїєвы г҃, и҆ трїѡ́ди д҃, Повторѧ́юще сїѧ̑, гла́съ а҃: Въ безгрѣ́шнꙋю странꙋ̀: Позна́имъ бра́тїе:

Сла́ва, гла́съ в҃: Ѽ коли́кихъ бла̑гъ ѻ҆каѧ́нный: И҆ ны́нѣ, бг҃оро́диченъ а҃-й, гла́са:

Вхо́дъ. Свѣ́те ти́хїй:

Прокі́менъ: Гдⷭ҇ь воцр҃и́сѧ:

На лїті́и по ѻ҆бы́чаю стїхи́ра хра́ма.

Сла́ва, гла́съ д҃: Ꙗ҆́кѡ блꙋ́дный сы́нъ: И҆ ны́нѣ, При́зри на молє́нїѧ:

На стїхо́внѣ ѻ҆смогла́сника по а҆лфави́тꙋ.

Сла́ва, гла́съ ѕ҃: Ѻ҆те́ческагѡ да́ра расточи́въ бога́тство: И҆ ны́нѣ, Творе́цъ и҆ и҆зба́витель мо́й: Ѿпꙋсти́тельный: Бцⷣе дв҃о: три́жды, и҆ про́чее послѣ́дованїе бдѣ́нїѧ, ꙗ҆́кѡ ѻ҆бы́чнѡ

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды, и҆ бг҃оро́диченъ. Ѻ҆бы̑чныѧ каѳі̑смы, и҆ сѣда́льны.

и҆ чте́нїе въ толкова́нїихъ є҆ѵⷢ҇лїа лꙋкѝ: при́тча ѡ҆ блꙋ́дномъ сы́нѣ, и҆ прѡ́чаѧ торже́ствєннаѧ словеса̀, и҆ полѷеле́й: ѻ҆бы̑чныѧ два̀ ѱалма̀.

Припѣва́емъ же къ си̑мъ и҆ тре́тїй ѱало́мъ: На рѣка́хъ вавѷлѡ́нскихъ, со а҆ллилꙋ́їею кра́сною, и҆ чте́нїе.

Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе ᲂу҆́треннее:

Та́же, Сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ, бг҃оро́диченъ: Подо́бенъ: На сп҃се́нїѧ стєзѝ:

Та́же гла́съ ѕ҃: Поми́лꙋй мѧ̀ бж҃е: Мно́жєства содѣ́ѧнныхъ: ꙗ҆́кѡ предписа́сѧ въ недѣ́лю мытаре́вꙋ. И҆ мл҃тва: Сп҃сѝ бж҃е лю́ди твоѧ̑:

Канѡ́нъ воскрⷭ҇нъ, со і҆рмосо́мъ на д҃: и҆ крⷭ҇товоскрⷭ҇ныхъ два̀, и҆ бцⷣы два̀: и҆ трїѡ́ди канѡ́нъ, гла́съ в҃, на ѕ҃.

Катава́сїа: Мѡѷсе́йскꙋю пѣ́снь: По г҃-й пѣ́сни, сѣда́ленъ, гла́съ а҃. Подо́бенъ: Гро́бъ тво́й: Ѡ҆б̾ѧ̑тїѧ ѻ҆́ч҃а:

Сла́ва, то́йже: И҆ ны́нѣ, подо́бенъ: Безневѣ́стнаѧ чⷭ҇таѧ бцⷣе дв҃о: По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь:

Ѻ҆ч҃ескїѧ сла́вы твоеѧ̀ ᲂу҆дали́хсѧ безꙋ́мнѡ, въ ѕлы́хъ расточи́въ, є҆́же мѝ пре́далъ є҆сѝ бога́тство. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю ѻ҆́ч҃е ще́дрый: прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.

И҆ і҆́косъ, и҆ чте́мъ сѷнаѯа́рїй. По ѳ҃-й пѣ́сни, є҆ѯапостїла́рїй ѻ҆смогла́сника, та́же настоѧ́щїй трїѡ́ди:

Подо́бенъ: Жєны̀ ᲂу҆слы́шите: Бога́тство є҆́же мѝ да́лъ є҆сѝ:

Сла́ва, и҆́ный. Подо́бенъ: Расточи́хъ бога́тство: И҆ ны́нѣ, бг҃оро́диченъ.

Подо́бенъ: Ст҃а́ѧ мт҃и дв҃о:

На хвали́техъ стїхи̑ры ѻ҆ктѡ́иха воскрⷭ҇ны д҃, и҆ а҆нато́лїевъ а҃: и҆ трїѡ́ди самогла́сны г҃, гла́съ в҃: Блꙋ́днагѡ гла́съ приноша́ю тѝ гдⷭ҇и: съ припѣ́вы ѻ҆бы́чными.

Сла́ва, гла́съ ѕ҃: Ѻ҆́ч҃е бл҃гі́й: И҆ ны́нѣ, Пребл҃гослове́нна є҆сѝ:

Славосло́вїе вели́кое. По трист҃о́мъ тропа́рь воскрⷭ҇нъ, є҆ктєнїѝ, и҆ ѿпꙋ́стъ.

и҆ ѻ҆бы́чнаѧ лїті́а, на не́йже пое́тсѧ, Сла́ва, и҆ ны́нѣ, стїхи́ра є҆ѵⷢ҇льскаѧ: и҆ чтꙋ́тсѧ ѡ҆глашє́нїѧ, и҆ ча́съ а҃- й въ притво́рѣ.

На часѣ́хъ, глаго́лемъ тропа́рь и҆ конда́къ, ꙗ҆́кѡ предписа́сѧ въ недѣ́лю мытаре́вꙋ: и҆ соверше́нный ѿпꙋ́стъ.

На лїтꙋргі́и, бл҃жє́нна ѻ҆ктѡ́иха, на ѕ҃: и҆ трїѡ́ди пѣ́снь ѕ҃-ѧ, на д҃. По вхо́дѣ тропа́рь, и҆ конда́къ, глаго́лемъ, ꙗ҆́коже пред̾из̾ѧви́сѧ въ недѣ́лю мытаре́вꙋ. Прокі́менъ а҆пⷭ҇ла по гла́сꙋ.

А҆по́столъ къ корі́нѳѧнѡмъ, зача́ло рл҃є: Всѧ̑ мѝ лѣ́ть сꙋ́ть: А҆ллилꙋ́їа гла́са.

Є҆ѵⷢ҇лїе лꙋкѝ, зача́ло ѻ҃ѳ: Человѣ́къ нѣ́кїй и҆мѣ̀ два̀ сы́на:

Прича́стенъ: Хвали́те гдⷭ҇а съ нб҃съ:

[зрѝ] Подоба́етъ вѣ́дати: Ꙗ҆́кѡ въ седми́цѣ мѧсопꙋ́стной А҆ллилꙋ́їа не пое́мъ, ѡ҆ставлѧ́емъ же и҆ є҆ди́нꙋ каѳі́смꙋ ѱалти́ра ѿ ᲂу҆́трени, и҆ глаго́лемъ сїю̀ на вече́рни. не пое́тсѧ же и҆ междоча́сїе, и҆ канѡ́нъ моле́бный прест҃ѣ́й бцⷣѣ пое́мый на повече́рїи: а҆ повече́рїе пое́тсѧ ма́лое. Та́кожде твори́мъ и҆ въ седми́цѣ сы́рной, ра́звѣ среды̀ и҆ пѧтка̀: но ѡ҆ се́мъ все́мъ та́мѡ, ᲂу҆ка́за зрѝ.

Прочита́емъ же въ се́й недѣ́ли въ кі́йлибо де́нь на ᲂу҆́трени сло́во ст҃а́гѡ мака́рїа, ѡ҆ м҃-цѣ, и҆ н҃-цѣ, є҆гѡ́же нача́ло: Ча́дца моѧ̑, ра́дꙋетсѧ се́рдце моѐ ва́съ ра́ди:

Въ пѧто́къ ве́чера, по предначина́тельномъ ѱалмѣ̀ и҆ ѻ҆бы́чной каѳі́смѣ, на Гдⷭ҇и воззва́хъ, ста́вимъ стїхѡ́въ ѕ҃. и҆ пое́мъ ѻ҆ктѡ́иха стїхи̑ры мч҃ничны г҃, настоѧ́щагѡ гла́са: и҆ трїѡ́ди подо́бны г҃, гла́съ и҃. Подо́бенъ: Во є҆де́мѣ ра́й: Ѿ вѣ́ка ме́ртвыхъ:

Сла́ва, гла́съ и҃: Пла́чꙋ и҆ рыда́ю: И҆ ны́нѣ, бг҃оро́диченъ а҃-й гла́са.

Вмѣ́стѡ же прокі́мена пое́мъ А҆ллилꙋ́їа, во гла́съ и҃.

Сті́хъ: Бл҃же́ни, ꙗ҆̀же и҆збра́лъ:

Сті́хъ: Дꙋ́шы и҆́хъ во бл҃ги́хъ:

На стїхо́внѣ мч҃нченъ гла́са, и҆ два̀ ме́ртвена і҆ѡа́нна дамаскина̀. Припѣ́вы же припѣва́емъ вышеречє́нныѧ: Бл҃же́ни ꙗ҆̀же и҆збра́лъ: и҆, дꙋ́шы и҆́хъ во бл҃ги́хъ:

Сла́ва, гла́съ ѕ҃: Нача́токъ мѝ и҆ соста́въ: И҆ ны́нѣ, гла́съ то́йже: Мл҃твами ро́ждшїѧ тѧ̀ хрⷭ҇тѐ:

Ны́нѣ ѿпꙋща́еши: Тропа́рь, гла́съ и҃: Глꙋбино́ю мꙋ́дрости человѣколю́бнѡ всѧ̑ стро́ѧй, и҆ поле́зное всѣ̑мъ подава́ѧй, є҆ди́не содѣ́телю, ᲂу҆поко́й гдⷭ҇и, дꙋ́ши ра̑бъ твои́хъ: на тѧ́ бо ᲂу҆пова́нїе возложи́ша, творца̀ и҆ зижди́телѧ и҆ бг҃а на́шего.

Сла́ва, и҆ ны́нѣ, бг҃оро́диченъ, гла́съ то́йже: Тебѐ и҆ стѣ́нꙋ, и҆ приста́нище и҆́мамы, и҆ мл҃твенницꙋ бл҃гопрїѧ́тнꙋ къ бг҃ꙋ: є҆го́же родила̀ є҆сѝ бцⷣе безневѣ́стнаѧ вѣ́рныхъ сп҃се́нїе.

Є҆ктенїа̀, и҆ ѿпꙋ́стъ. По ѿпꙋще́нїи вече́рни, твори́мъ паннѷхі́дꙋ за ᲂу҆со́пшихъ. И҆ пое́мъ канѡ́нъ рѧдова́гѡ гла́са ме́ртвыхъ.

На повече́рїи, по Досто́йно конда́къ со ст҃ы́ми ᲂу҆поко́й:

На ᲂу҆́трени, по шестоѱа́лмїи, А҆ллилꙋ́їа, во гла́съ и҃:

Сті́хъ а҃-й: Бл҃же́ни ꙗ҆̀же и҆збра́лъ, и҆ прїѧ́лъ є҆сѝ гдⷭ҇и. Сті́хъ в҃-й: Па́мѧть и҆́хъ въ ро́дъ и҆ ро́дъ. Сті́хъ г҃-й: Дꙋ́шы и҆́хъ во бл҃ги́хъ водворѧ́тсѧ. Тропа́рь: Глꙋбино́ю мꙋ́дрости: два́жды.

Сла́ва, и҆ ны́нѣ, бг҃оро́диченъ: Тебѐ и҆ стѣ́нꙋ, и҆ приста́нище: и҆ ѻ҆бы́чное стїхосло́вїе, и҆ сѣда́льны ѻ҆ктѡ́иха.

Чтꙋ́тсѧ же и҆ словеса̀ ѡ҆ ме́ртвыхъ, къ корі́нѳѧнѡмъ въ а҃-мъ посла́нїи.

Пою́тсѧ же и҆ непоро́чны на двѣ̀ статїѝ: съ припѣ́вомъ: Бл҃гослове́нъ є҆сѝ гдⷭ҇и: во гла́съ є҃. На сла́вахъ А҆ллилꙋ́їа не пое́мъ, но пое́мъ коне́цъ: Ꙗ҆́кѡ а҆́ще бы не зако́нъ тво́й: три́жды.

и҆ по не́мъ є҆ктенїа̀: Па́ки и҆ па́ки ми́ромъ гдⷭ҇ꙋ помо́лимсѧ.

Ли́къ: Гдⷭ҇и поми́лꙋй, є҆ди́ножды.

Є҆щѐ мо́лимсѧ ѡ҆ ᲂу҆покое́нїи дꙋ́шъ ᲂу҆со́пшихъ рабѡ́въ бж҃їихъ пра́ѻтєцъ, ѻ҆тє́цъ, и҆ бра́тїй на́шихъ, здѣ̀ лежа́щихъ, и҆ повсю́дꙋ правосла́вныхъ хрⷭ҇тїа́нъ: и҆ ѡ҆ є҆́же прости́тисѧ и҆̀мъ всѧ́комꙋ прегрѣше́нїю во́льномꙋ же и҆ нево́льномꙋ.

Гдⷭ҇и поми́лꙋй, є҆ди́ножды.

Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же првⷣнїи ᲂу҆покоѧ́ютсѧ.

Гдⷭ҇и поми́лꙋй, є҆ди́ножды.

Млⷭ҇ти бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ и҆́хъ, ᲂу҆ хрⷭ҇та̀ безсме́ртнагѡ цр҃ѧ̀ и҆ бг҃а на́шегѡ про́симъ.

Ли́къ: Пода́й гдⷭ҇и.

І҆ере́й: Гдⷭ҇ꙋ помо́лимсѧ.

Мы́ же: Гдⷭ҇и поми́лꙋй, м҃, тихогла́снѡ.

І҆ере́й глаго́летъ мл҃твꙋ: Бж҃е дꙋхѡ́въ, и҆ всѧ́кїѧ пло́ти:

И҆ возгла́съ: Ꙗ҆́кѡ ты̀ є҆сѝ воскрⷭ҇нїе:

Та́же пое́тъ пра́вый ли́къ в҃-ю статїю̀: Тво́й є҆́смь а҆́зъ: На не́йже припѣ́въ: Сп҃се сп҃си́ мѧ. На коне́цъ: Жива̀ бꙋ́детъ дꙋша̀ моѧ̀: три́жды.

По непоро́чныхъ, тропарѝ и҆́хъ, гла́съ є҃. Припѣ́въ: Бл҃гослове́нъ є҆сѝ гдⷭ҇и: Ст҃ы́хъ ли́къ ѡ҆брѣ́те: и҆ прѡ́чаѧ.

Посе́мъ є҆ктенїа̀ ѡ҆ ᲂу҆со́пшихъ преждепи́саннаѧ. и҆ по возгла́сѣ сѣда́ленъ, гла́съ є҃: Поко́й сп҃се на́шъ:

Сла́ва, и҆ ны́нѣ, бг҃оро́диченъ: Ѿ дв҃ы возсїѧ́вый: и҆ чте́нїе ѡ҆ ᲂу҆со́пшихъ.

Стїхосло́вимъ же и҆ Гдⷭ҇еви пое́мъ: Канѡ́ны же пое́мъ ст҃а́гѡ ѻ҆би́тели, со і҆рмосо́мъ на ѕ҃: и҆ трїѡ́ди на и҃, гла́съ и҃.

Катава́сїа: Пѣ́снь возсле́мъ лю́дїе: Пое́тсѧ же и҆ в҃-ѧ пѣ́снь трїѡ́ди, на и҃. Припѣ́въ, за ᲂу҆поко́й. Стїхи́ же глаго́лемъ, коли́ко и҆́хъ є҆́сть. А҆ ꙗ҆́же во ѱалти́ри в҃-ѧ пѣ́снь, тоѧ̀ не глаго́лемъ, но про́чыѧ глаго́лемъ. По г҃-й пѣ́сни, є҆ктенїа̀ ѻ҆бы́чнаѧ, и҆ сѣда́ленъ трїѡ́ди, гла́съ є҃. Подо́бенъ: Собезнача́льное: На́съ ра́ди претерпѣ́вый крⷭ҇тъ и҆ сме́рть:

Сла́ва, то́йже: И҆ ны́нѣ, бг҃оро́диченъ: Ско́рый тво́й покро́въ:

и҆ чте́нїе. По ѕ҃-й пѣ́сни: є҆ктенїа̀ за ᲂу҆поко́й, ꙗ҆́кѡ предписа́сѧ.

Та́же конда́къ, гла́съ и҃: Со ст҃ы́ми ᲂу҆поко́й хрⷭ҇тѐ дꙋ́шы рабѡ́въ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ.

И҆ і҆́косъ.

и҆ чте́мъ сѷнаѯа́рїй.

По ѳ҃-й пѣ́сни, є҆ктенїа̀ ѻ҆бы́чнаѧ. Та́же свѣти́ленъ: Живы́ми и҆ ме́ртвыми:

Сла́ва: Оу҆поко́й рабы̑ твоѧ̑: И҆ ны́нѣ: Мр҃і́е бг҃оневѣ́сто:

На хвали́техъ стїхи̑ры трїѡ́ди на д҃, гла́съ и҃. Подо́бенъ: Во є҆де́мѣ ра́й: Прїиди́те пре́жде конца̀:

Сла́ва, гла́съ в҃: Ꙗ҆́кѡ цвѣ́тъ ᲂу҆вѧда́етъ: И҆ ны́нѣ: Ра́дꙋйсѧ мр҃і́е бцⷣе:

Посе́мъ є҆ктенїа̀: И҆спо́лнимъ ᲂу҆́треннюю мл҃твꙋ на́шꙋ:

Та́же на стїхо́внѣ поко́йный, кѵ́ръ ѳеофа́на, гла́съ ѕ҃, ѻ҆ктѡ́иха,

Сла́ва, гла́съ то́йже: Болѣ́знь а҆да́мꙋ бы́сть: И҆ ны́нѣ: Ты̀ є҆сѝ бг҃ъ на́шъ:

Та́же, Бл҃го є҆́сть: Трист҃о́е, по Ѻ҆́ч҃е на́шъ: тропа́рь: Глꙋбино́ю мꙋ́дрости:

Сла́ва, и҆ ны́нѣ: Тебѐ и҆ стѣ́нꙋ и҆ приста́нище:

И҆ по ѻ҆бы́чной є҆ктенїѝ, і҆ере́й: Сы́й бл҃гослове́нъ: и҆ прѡ́чаѧ.

и҆ ча́съ а҃-й, и҆ ѿпꙋ́стъ.

На часѣ́хъ, глаго́лемъ тропа́рь и҆ конда́къ за ᲂу҆поко́й.

На лїтꙋргі́и, бл҃жє́нна трїѡ́ди пѣ́снь г҃-ѧ, и҆ ѕ҃-ѧ. По вхо́дѣ тропа́рь: Глꙋбино́ю мꙋ́дрости:

Сла́ва, конда́къ: Со ст҃ы́ми ᲂу҆поко́й: И҆ ны́нѣ: Тебѐ и҆ стѣ́нꙋ и҆ приста́нище:

Прокі́менъ, гла́съ ѕ҃: Дꙋ́шы и҆́хъ во бл҃ги́хъ водворѧ́тсѧ.

Сті́хъ: Къ тебѣ̀ гдⷭ҇и воздвиго́хъ дꙋ́шꙋ мою̀:

А҆по́столъ къ корі́нѳѧнѡмъ, зача́ло рм҃ѕ: Всѧ̑ мѝ лѣ́ть сꙋ́ть:

Дрꙋгі́й за ᲂу҆поко́й, къ солꙋ́нѧнѡмъ, зача́ло с҃ѻ: Не хощꙋ̀ ва́съ не вѣ́дѣти:

А҆ллилꙋ́їа, гла́съ ѕ҃: Бл҃же́ни ꙗ҆̀же и҆збра́лъ:

Є҆ѵⷢ҇лїе днѐ, лꙋкѝ, зача́ло р҃є: Речѐ гдⷭ҇ь: блюди́те, да не прельще́ни бꙋ́дете:

Дрꙋго́е, і҆ѡа́нна, зача́ло ѕ҃і: Речѐ гдⷭ҇ь ко прише́дшымъ къ немꙋ̀ і҆ꙋде́ємъ:

Прича́стенъ: Бл҃же́ни ꙗ҆̀же и҆збра́лъ:

[зрѝ] Вѣ́дати же подоба́етъ: Ꙗ҆́кѡ сїѧ̀ слꙋ́жба непремѣ́ннѡ быва́етъ и҆ въ сꙋббѡ́тꙋ ст҃ы́ѧ н҃-цы. А҆́ще ли же прилꙋчи́тсѧ хра́мъ нѣ́коегѡ ст҃а́гѡ, и҆лѝ ст҃ы́ѧ въ се́й де́нь, и҆ слꙋ́жба сꙋббѡ́ты пое́тсѧ въ гробни́цѣ то́кмѡ, а҆ во хра́мѣ пое́тсѧ слꙋ́жба хра́ма.

Въ сꙋббѡ́тꙋ ве́чера, на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю. На вели́цѣй вече́рни, по ѻ҆бы́чномъ ѱалмѣ̀: Бл҃же́нъ мꙋ́жъ: каѳі́сма всѧ̀. На Гдⷭ҇и воззва́хъ, ста́вимъ стїхѡ́въ і҃. воскрⷭ҇ны г҃, и҆ а҆нато́лїєвы г҃: и҆ трїѡ́ди подо́бны д҃, гла́съ ѕ҃. Подо́бенъ: Всю̀ ѿложи́вше: Є҆гда̀ хо́щеши прїитѝ:

Сла́ва, гла́съ и҃: Є҆гда̀ поста́вѧтсѧ престо́ли: И҆ ны́нѣ, бг҃оро́диченъ а҃-й гла́са.

Вхо́дъ, Прокі́менъ днѐ.

На лїті́и стїхи́ра хра́ма. Сла́ва, гла́съ з҃: Гдⷭ҇ни разꙋмѣ́вше за́пѡвѣди: И҆ ны́нѣ: Под̾ кро́въ тво́й влⷣчце: На стїхо́внѣ, стїхи̑ры ѻ҆ктѡ́иха по а҆лфави́тꙋ.

Сла́ва, гла́съ и҃: Оу҆вы̀ мнѣ̀ мра́чнаѧ дꙋшѐ: И҆ ны́нѣ: Безневѣ́стнаѧ дв҃о:

По трист҃о́мъ тропа́рь: Бцⷣе дв҃о ра́дꙋйсѧ: три́жды, съ пѣ́нїемъ: и҆ бл҃гослове́нїе хлѣ́бѡвъ, по ѻ҆бы́чаю: и҆ чте́нїе.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: и҆ бг҃оро́диченъ а҃-й.

и҆ ѻ҆бы̑чныѧ каѳі̑смы, и҆ сѣда́льны воскрⷭ҇ны ѻ҆ктѡ́иха, и҆ бг҃оро́дичны и҆́хъ:

и҆ чте́нїе въ толкова́нїихъ є҆ѵⷢ҇лїа матѳе́а, є҆гѡ́же нача́ло: Стра́шенъ є҆́сть де́нь ѻ҆́нъ:

Полѷеле́й, ѵ҆пакоѝ гла́са, и҆ чте́нїе слове́съ торже́ственныхъ: и҆ про́чее, ꙗ҆́кѡ предписа́сѧ, ли́стъ тч҃ѕ на ѡ҆бор.

Степє́нна гла́са. Прокі́менъ, и҆ є҆ѵⷢ҇лїе воскрⷭ҇но, и҆ прѡ́чаѧ.

Канѡ́нъ воскрⷭ҇нъ со і҆рмосо́мъ на д҃: и҆ бцⷣы на два̀: и҆ трїѡ́ди гла́съ ѕ҃, на и҃.

Катава́сїа: Помо́щникъ и҆ покрови́тель: По г҃-й пѣ́сни, сѣда́ленъ трїѡ́ди, гла́съ ѕ҃: Помышлѧ́ю де́нь стра́шный:

Сла́ва: Во ю҆до́ли пла́ча: И҆ ны́нѣ: Оу҆пова́нїе мі́ра: и҆ чте́нїе.

По ѕ҃-й пѣ́сни,

Конда́къ, гла́съ а҃. Є҆гда̀ прїи́деши бж҃е на зе́млю со сла́вою, и҆ трепе́щꙋтъ всѧ́чєскаѧ, рѣка́ же ѻ҆́гненнаѧ пред̾ сꙋди́щемъ влече́тъ, кни̑ги разгиба́ютсѧ, и҆ та̑йнаѧ ꙗ҆влѧ́ютсѧ: тогда̀ и҆зба́ви мѧ̀ ѿ ѻ҆гнѧ̀ неꙋгаси́магѡ, и҆ сподо́би мѧ̀ ѻ҆деснꙋ́ю тебѐ ста́ти, сꙋдїѐ пра́веднѣйшїй.

И҆ і҆́косъ, и҆ чте́мъ сѷнаѯа́рїй. По ѳ҃-й пѣ́сни, свѣти́ленъ воскрⷭ҇нъ, и҆ трїѡ́ди.

Подо́бенъ: Со ᲂу҆ч҃нкѝ взы́демъ: Стра́шный де́нь сꙋда̀:

Сла́ва: Сѐ де́нь грѧде́тъ: И҆ ны́нѣ: Ча́съ и҆спыта́нїѧ:

На хвали́техъ стїхи̑ры воскрⷭ҇ны ѻ҆ктѡ́иха д҃: и҆ а҆нато́лїевъ а҃: и҆ трїѡ́ди д҃: гла́съ ѕ҃, самогла́сенъ.

Припѣ́въ: Всѧ́кое дыха́нїе: Помышлѧ́ю де́нь ѻ҆́ный и҆ ча́съ: Припѣ́въ: И҆сповѣ́мсѧ тебѣ̀ гдⷭ҇и: гла́съ то́йже: Ѽ каковы́й ча́съ тогда̀: гла́съ и҃. Припѣ́въ: Возра́дꙋюсѧ и҆ возвеселю́сѧ ѡ҆ тебѣ̀: Данїи́лъ прⷪ҇ро́къ: гла́съ а҃-й. Припѣ́въ: Воскрⷭ҇нѝ гдⷭ҇и бж҃е мо́й: Пред̾ѡчи́стимъ себѐ бра́тїе:

Сла́ва, па́ки тꙋ́южде стїхи́рꙋ: И҆ ны́нѣ: Пребл҃гослове́нна є҆сѝ:

Славосло́вїе вели́кое. По трист҃о́мъ тропа́рь воскрⷭ҇нъ. Є҆ктєнїѝ и҆ ѿпꙋ́стъ, и҆ ѻ҆бы́чное и҆схожде́нїе въ притво́ръ.

Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ѡ҆глаше́нїе стꙋді́тово, и҆ ча́съ а҃-й:

На а҃-мъ часѣ̀, тропа́рь воскрⷭ҇нъ.

По трист҃о́мъ конда́къ трїѡ́ди, и҆ про́чее, и҆ соверше́нный ѿпꙋ́стъ.

На лїтꙋргі́и, бл҃жє́нна ѻ҆ктѡ́иха гла́са, на ѕ҃: и҆ ѿ канѡ́на трїѡ́ди пѣ́снь ѕ҃, на д҃.

По вхо́дѣ тропарѝ глаго́лемъ, ꙗ҆́коже ᲂу҆каза́сѧ въ недѣ́лю фарїсе́евꙋ.

Прокі́менъ, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀:

Сті́хъ: Хвали́те гдⷭ҇а, ꙗ҆́кѡ бл҃гъ ѱало́мъ:

А҆по́столъ къ корі́нѳѧнѡмъ, зача́ло р҃м: Бра́шно на́съ не поста́витъ пред̾ бг҃омъ: А҆ллилꙋ́їа, гла́съ и҃: Прїиди́те возра́дꙋемсѧ гдⷭ҇еви:

Сті́хъ: Предвари́мъ лицѐ є҆гѡ̀ во и҆сповѣ́данїи:

Є҆ѵⷢ҇лїе матѳе́а, зача́ло р҃ѕ: Речѐ гдⷭ҇ь: є҆гда̀ прїи́детъ сн҃ъ чл҃вѣ́ческїй:

Прича́стенъ: Хвали́те гдⷭ҇а: Дрꙋгі́й: Ра́дꙋйтесѧ:

На Гдⷭ҇и воззва́хъ, пое́мъ стїхи̑ры на ѕ҃: ѻ҆ктѡ́иха г҃: и҆ мине́и ст҃а́гѡ г҃:

Сла́ва, ст҃а́гѡ, а҆́ще є҆́сть: И҆ ны́нѣ, бг҃оро́диченъ:

а҆́ще ли нѝ, Сла́ва, и҆ ны́нѣ, бг҃оро́диченъ. На стїхо́внѣ трїѡ́ди самогла́сенъ днѐ, ѻ҆́ба ли̑ка вкꙋ́пѣ, гла́съ и҃: Ласкосе́рдствовавше: Припѣ́въ: Къ тебѣ̀ возведо́хъ ѻ҆́чи моѝ: и҆ па́ки то́йже самогла́сенъ: Ласкосе́рдствовавше, в҃-й: Поми́лꙋй на́съ гдⷭ҇и: и҆ мч҃нченъ, гла́съ то́йже: Мч҃нцы гдⷭ҇ни:

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, бг҃оро́диченъ: Нбⷭ҇ныѧ пою́тъ тѧ̀:

[зрѝ] Вѣ́стно бꙋ́ди: Ꙗ҆́кѡ ѿ дне́сь ѻ҆ктѡ́иха стїхо́вна вече́рнѧѧ и҆ ᲂу҆́треннѧѧ ѡ҆ставлѧ́етсѧ, и҆ вмѣ́стѡ є҆ѧ̀ пою́тсѧ стїхи̑ры самогла́сны днѐ трїѡ́ди, до сꙋббѡ́ты ѕ҃ недѣ́ли.

Въ понедѣ́льникъ сы́рный на ᲂу҆́трени.

На Бг҃ъ гдⷭ҇ь, тропа́рь ст҃а́гѡ, два́жды.

Сла́ва, и҆ ны́нѣ, бг҃оро́диченъ, и҆ ѻ҆бы̑чныѧ каѳі̑смы.

По а҃-й каѳі́смѣ сѣда́ленъ ѻ҆ктѡ́иха, и҆ чте́нїе, сло́во вели́кагѡ васі́лїа.

По в҃-й каѳі́смѣ сѣда́ленъ трїѡ́ди, гла́съ а҃. Подо́бенъ: Ка́мени запеча́танꙋ: Ѿверзо́шасѧ бж҃е́ственнагѡ покаѧ́нїѧ:

Сла́ва, то́йже. И҆ ны́нѣ: Рꙋ́цѣ твоѝ бж҃е́ственнїи:

И҆ чте́нїе.

Канѡ́ны же пое́мъ, ꙗ҆́коже ѻ҆бы́чай, ѻ҆ктѡ́иха, и҆ мине́и ст҃а́гѡ. Въ ко́ихъ же пѣ́снехъ прихо́дитъ трипѣ́снецъ, а҆́ще ли є҆́сть двоїрмо́сенъ, ѡ҆ставлѧ́емъ ѻ҆́ба канѡ́на ѻ҆ктѡ́иха. И҆ пое́мъ мине́и канѡ́нъ, со і҆рмосо́мъ на ѕ҃: и҆ трїѡ́ди на и҃, гла́съ а҃, послѣдѝ і҆рмо́съ: Пѣ́снь побѣ́днꙋю: По г҃-й пѣ́сни, сѣда́ленъ ст҃а́гѡ:

Сла́ва, и҆ ны́нѣ, бг҃оро́диченъ. По ѕ҃-й пѣ́сни, конда́къ ст҃а́гѡ. По ѳ҃-й пѣ́сни, свѣти́ленъ ѻ҆ктѡ́иха.

Сла́ва, ст҃а́гѡ, а҆́ще є҆́сть: а҆́ще ли нѝ, Сла́ва, и҆ ны́нѣ, бг҃оро́диченъ.

На стїхо́внѣ трїѡ́ди самогла́сенъ, гла́съ г҃: На всѧ́кое вре́мѧ по́стъ поле́зенъ є҆́сть: Припѣ́въ глаго́лемъ ѻ҆бы́чный: И҆спо́лнихомсѧ: И҆ па́ки то́йже самогла́сенъ. в҃-й: И҆ бꙋ́ди свѣ́тлость:

Та́же мч҃нченъ: Ст҃ы́хъ стрⷭ҇тоте́рпцєвъ:

Сла́ва, и҆ ны́нѣ: Безсѣ́меннѡ зачала̀ є҆сѝ:

Вѣ́домо же бꙋ́ди: Ꙗ҆́кѡ въ понедѣ́льникъ сы́рныѧ седми́цы, ꙗ҆ди́мъ два́жды дне́мъ, сы́ръ и҆ ꙗ҆́ица.

Въ то́йже понедѣ́льникъ ве́чера.

На Гдⷭ҇и воззва́хъ, стїхи̑ры ѻ҆ктѡ́иха г҃: и҆ мине́и ст҃а́гѡ г҃:

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, бг҃оро́диченъ.

На стїхо́внѣ трїѡ́ди самогла́сенъ днѐ, гла́съ и҃: Посто́мъ ѡ҆чи́ститисѧ потщи́мсѧ: и҆ глаго́лемъ припѣ́въ ѻ҆бы́чный: Къ тебѣ̀ возведо́хъ: И҆ па́ки то́йже самогла́сенъ. Припѣ́въ: Поми́лꙋй на́съ гдⷭ҇и:

Та́же мч҃нченъ.

Сла́ва, и҆ ны́нѣ, бг҃оро́диченъ: Пресла́внꙋю и҆ пречⷭ҇тꙋю бцⷣꙋ: Тропа́рь ст҃а́гѡ: Сла́ва, и҆ ны́нѣ, бг҃оро́диченъ.

Во вто́рникъ сы́рный на ᲂу҆́трени:

На Бг҃ъ гдⷭ҇ь, тропа́рь ст҃а́гѡ, два́жды:

Сла́ва, и҆ ны́нѣ, бг҃оро́диченъ.

По а҃-й каѳі́смѣ сѣда́ленъ ѻ҆ктѡ́иха: и҆ чте́нїе.

По в҃-й каѳі́смѣ сѣда́ленъ трїѡ́ди, гла́съ и҃. Подо́бенъ: Премꙋ́дрость и҆ сло́во: Пребл҃гі́й сло́ве:

Сла́ва, то́йже: И҆ ны́нѣ, Премꙋ́дрость и҆ сло́во:

И҆ чте́мъ сло́во вели́кагѡ васі́лїа.

Канѡ́ны пое́мъ ѻ҆ктѡ́иха и҆ мине́и, ꙗ҆́коже въ понедѣ́льникъ предписа́сѧ, и҆ трипѣ́снецъ господи́на і҆ѡ́сифа, пѣ́снь в҃, гла́съ г҃. Припѣ́въ: Сла́ва тебѣ̀ бж҃е на́шъ, сла́ва тебѣ̀. Про́чыѧ же пѣ̑сни пое́мъ по предпи́санномꙋ.

По ѳ҃-й пѣ́сни, свѣти́ленъ ѻ҆ктѡ́иха:

Сла́ва, ст҃а́гѡ, а҆́ще є҆́сть. а҆́ще же нѝ, Сла́ва, и҆ ны́нѣ, бг҃оро́диченъ.

На стїхо́внѣ, трїѡ́ди самогла́сенъ, гла́съ г҃: Любе́знѡ лю́дїе по́стъ ѡ҆блобыза́имъ:

Припѣ́въ: И҆спо́лнихомсѧ заꙋ́тра: и҆ па́ки то́йже самогла́сенъ. Припѣ́въ: И҆ бꙋ́ди свѣ́тлость: и҆ мч҃нченъ.

Сла́ва, и҆ ны́нѣ, бг҃оро́диченъ: Бцⷣе предста́тельство всѣ́хъ молѧ́щихсѧ.

Во вто́рникъ ве́чера.

Ѿ нача́ла вече́рни начина́емъ покло́ны. По ѻ҆бы́чномъ ѱалмѣ̀, каѳі́сма рѧдова́ѧ. На Гдⷭ҇и воззва́хъ, стїхи̑ры ѻ҆ктѡ́иха г҃: и҆ мине́и ст҃а́гѡ г҃.

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, крⷭ҇тобг҃оро́диченъ. Прокі́менъ днѐ.

Та́же, Сподо́би гдⷭ҇и: и҆ покло́ны г҃:

На стїхо́внѣ трїѡ́ди самогла́сенъ, гла́съ а҃: Ра́достнѡ прїи́мемъ вѣ́рнїи: И҆ ѻ҆бы́чный припѣ́въ, и҆ мч҃нченъ: Ѽ до́брыѧ кꙋ́пли ва́шеѧ ст҃і́и:

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, крⷭ҇тобг҃оро́диченъ: Дв҃а нескве́рнаѧ:

И҆ посе́мъ, Ны́нѣ ѿпꙋща́еши: и҆ по трист҃о́мъ, тропа́рь, гла́съ д҃: Бцⷣе дв҃о ра́дꙋйсѧ: Покло́нъ є҆ди́нъ.

Сла́ва, Крⷭ҇ти́телю хрⷭ҇то́въ: Покло́нъ. И҆ ны́нѣ, Моли́те за ны̀: Покло́нъ. Под̾ твоѐ бл҃гоꙋтро́бїе: без̾ покло́на. Гдⷭ҇и поми́лꙋй, м҃.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

И҆́менемъ гдⷭ҇нимъ бл҃гословѝ ѻ҆́тче.

І҆ере́й: Сы́й бл҃гослове́нъ хрⷭ҇то́съ бг҃ъ на́шъ:

И҆ мы̀ глаго́лемъ мл҃твꙋ: Нбⷭ҇ный цр҃ю̀: и҆ покло́ны г҃ вели̑кїѧ, съ мл҃твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: и҆ про́чихъ в҃і. И҆ посе́мъ мл҃твꙋ всю̀ вкꙋ́пѣ: Гдⷭ҇и и҆ влⷣко живота̀ моегѡ̀: и҆ покло́нъ вели́кїй. Посе́мъ трист҃о́е, и҆ покло́ны г҃.

І҆ере́й возгла́съ: Ꙗ҆́кѡ твоѐ є҆́сть црⷭ҇тво:

Гдⷭ҇и поми́лꙋй, в҃і.

Та́же і҆ере́й глаго́летъ: Сла́ва тебѣ̀ хрⷭ҇тѐ бж҃е: и҆ ѿпꙋ́стъ.

Повече́рїе же глаго́лемъ вели́кое съ покло́ны. По Досто́йно, тропа́рь днѐ и҆ хра́ма, и҆ Бж҃е ѻ҆тє́цъ на́шихъ: И҆́же во все́мъ мі́рѣ:

Сла́ва, конда́къ: Со ст҃ы́ми ᲂу҆поко́й: И҆ ны́нѣ: Мл҃твами гдⷭ҇и всѣ́хъ ст҃ы́хъ:

Та́же, Гдⷭ҇и поми́лꙋй, м҃.

И҆ мл҃тва: И҆́же на всѧ́кое вре́мѧ:

и҆ по Чⷭ҇тнѣ́йшꙋю, ѻ҆бы̑чныѧ покло́ны ѕ҃і. Посе́мъ трист҃о́е, и҆ мл҃тва: Нескве́рнаѧ:

И҆ да́ждь на́мъ влⷣко: и҆ ѿпꙋ́стъ ма́лый.

[зрѝ] Та́кожде пое́мъ и҆ въ пѧто́къ всю̀ слꙋ́жбꙋ.

Въ сре́дꙋ сы́рнꙋю.

Полꙋ́нощницꙋ глаго́лемъ всю̀, съ покло́ны є҆ѧ̀. На ᲂу҆́трени, пое́мъ А҆ллилꙋ́їа, въ настоѧ́щїй гла́съ ѻ҆ктѡ́иха, и҆ трⷪ҇чны гла́са: и҆ ѻ҆бы̑чныѧ каѳі̑смы.

По а҃-й каѳі́смѣ сѣда́ленъ ѻ҆ктѡ́иха, и҆ чте́нїе.

По в҃-й каѳі́смѣ, сѣда́ленъ трїѡ́ди, гла́съ в҃. Подо́бенъ: Бл҃гоꙋтро́бїѧ сꙋ́щи: Съ ми́ромъ прейтѝ на́мъ смирє́ннымъ:

Сла́ва, то́йже: И҆ ны́нѣ, крⷭ҇тобг҃оро́диченъ: Предстоѧ́щи крⷭ҇тꙋ̀ твоемꙋ̀:

И҆ чте́мъ сло́во вели́кагѡ васі́лїа, є҆гѡ́же нача́ло: Оу҆тѣша́йте, ᲂу҆тѣша́йте лю́ди моѧ̑: ѱало́мъ н҃:

Канѡ́нъ ѻ҆ктѡ́иха со і҆рмосо́мъ на ѕ҃: и҆ мине́и ст҃а́гѡ на д҃: и҆ трїѡ́ди на д҃. Въ ко́ихъ же пѣ́снехъ приспѣ́етъ трипѣ́снецъ, и҆ пое́мъ канѡ́нъ трїѡ́ди, со і҆рмосо́мъ на ѕ҃: и҆ трипѣ́снецъ на и҃: и҆ послѣдѝ і҆рмо́съ трипѣ́снца. Въ си́хъ же пѣ́снехъ ѡ҆ставлѧ́етсѧ канѡ́нъ ѻ҆ктѡ́иха, и҆ мине́и: и҆ пое́мъ мине́и въ вы́шнихъ пѣ́снехъ си́це: а҃-ѧ пѣ́снь канѡ́нъ ѻ҆ктѡ́иха, со і҆рмосо́мъ на д҃: и҆ мине́и ст҃а́гѡ а҃-ю и҆ г҃-ю пѣ́снь на ѕ҃, и҆ трїѡ́ди на д҃. Подо́бнѣ пое́мъ, и҃-ю съ ѕ҃-ю, и҆ ѳ҃-ю съ з҃-ю, пѣ̑сни. По г҃-й пѣ́сни, сѣда́ленъ мине́и ст҃а́гѡ:

Сла́ва, и҆ ны́нѣ, крⷭ҇тобг҃оро́диченъ.

По ѕ҃-й пѣ́сни, конда́къ ст҃а́гѡ. А҆́ще ст҃ы́й не и҆́мать кондака̀, глаго́лемъ мч҃нченъ гла́са. По ѳ҃-й пѣ́сни, свѣти́ленъ гла́са, трⷪ҇ченъ. На стїхо́внѣ, трїѡ́ди самогла́сенъ днѐ, два́жды, гла́съ а҃: Ѿ бра́шенъ постѧ́щисѧ дꙋшѐ моѧ̀: со ѻ҆бы́чными припѣ́вы. И҆ мч҃нченъ:

Сла́ва, и҆ ны́нѣ, крⷭ҇тобг҃оро́диченъ: Вознесе́на ꙗ҆́кѡ ви́дѣ: посе́мъ, Бл҃го є҆́сть: и҆ трист҃о́е. По Ѻ҆́ч҃е на́шъ: тропа́рь: Въ хра́мѣ стоѧ́ще: Гдⷭ҇и поми́лꙋй, м҃.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

И҆́менемъ гдⷭ҇нимъ бл҃гословѝ ѻ҆́тче.

И҆ возгла́съ ѿ і҆ере́а: Сы́й бл҃гослове́нъ:

Мы́ же, Нбⷭ҇ный цр҃ю̀:

и҆ твори́мъ покло́ны трѝ вели̑кїѧ, съ мл҃твою, и҆ про́чихъ в҃і. и҆ па́ки є҆ди́нъ покло́нъ.

Присовокꙋплѧ́емъ же и҆ ча́съ а҃-й. Начина́етъ предстоѧ́тель, и҆лѝ ᲂу҆чине́нный чте́цъ. глаго́лемъ же и҆ тропа́рь: Заꙋ́тра ᲂу҆слы́ши гла́съ мо́й: ско́рѡ, без̾ пѣ́нїѧ. Стѡпы̀ моѧ̑ напра́ви: и҆ да и҆спо́лнѧтсѧ ᲂу҆ста̀ моѧ̑:

По трист҃о́мъ, тропа́рь гла́съ д҃: Ско́рѡ предварѝ:

Гдⷭ҇и поми́лꙋй, м҃:

и҆ мл҃твꙋ: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

І҆ере́й возгла́съ: Бж҃е ᲂу҆ще́дри ны̀:

и҆ покло́ны ѻ҆бы̑чныѧ, ѕ҃і. Посе́мъ трист҃о́е. Гдⷭ҇и поми́лꙋй, в҃і.

Та́же, хрⷭ҇тѐ свѣ́те и҆́стинный:

и҆ ѿпꙋ́стъ, и҆ и҆схожде́нїе въ притво́ръ, и҆ быва́етъ лїті́а ѡ҆ ᲂу҆со́пшихъ ꙗ҆́кѡ ѻ҆бы́чай.

Въ тꙋ́южде сре́дꙋ сы́рнꙋю.

Пое́мъ часы̀ г҃-й и҆ ѕ҃-й, съ покло́ны, и҆ тропарѝ по́стными. На часѣ́хъ въ кампа́нъ не ᲂу҆дарѧ́емъ. На ѕ҃-мъ часѣ̀, тропа́рь прⷪ҇ро́чества, гла́съ г҃: Цр҃ю̀ ст҃ы́й всеси́льне:

Сла́ва, и҆ ны́нѣ, то́йже.

Та́же, І҆ере́й: Во́нмемъ.

и҆ чте́цъ прокі́менъ не глаго́летъ, то́чїю ска́жетъ, гла́съ ѕ҃: Сп҃сѝ гдⷭ҇и лю́ди твоѧ̑:

Сті́хъ: Къ тебѣ̀ гдⷭ҇и воззовꙋ̀:

Та́же і҆ере́й: Премꙋ́дрость.

Чте́цъ: Прⷪ҇ро́чества і҆ѡ́илева чте́нїе.

І҆ере́й: Во́нмемъ.

и҆ чте́цъ чте́тъ паремїю̀, Та́кѡ глаго́летъ гдⷭ҇ь: ѡ҆брати́тесѧ ко мнѣ̀:

И҆ по чте́нїи, і҆ере́й: Во́нмемъ.

Чте́цъ, гла́съ з҃, прокі́менъ: Гдⷭ҇ь крѣ́пость лю́демъ свои̑мъ да́стъ:

Сті́хъ: Принеси́те гдⷭ҇еви сн҃ове бж҃їи:

[зрѝ] Си́це глаго́лати і҆ере́ю и҆ чтецꙋ̀ во всю̀ ст҃ꙋ́ю м҃- цꙋ прокі́менъ, пред̾ паремїа́ми.

Посе́мъ: Ско́рѡ да предварѧ́тъ ны̀: и҆ трист҃о́е. По Ѻ҆́ч҃е на́шъ: тропарѝ ѻ҆бы̑чныѧ: Сп҃се́нїе содѣ́лалъ є҆сѝ: и҆ прѡ́чаѧ ѻ҆бы̑чнаѧ пѡ́стнаѧ.

и҆ мл҃тва: Бж҃е и҆ гдⷭ҇и си́лъ:

Вкꙋ́пѣ же пое́мъ и҆ ѳ҃ ча́съ. По ѳ҃-мъ часѣ̀, мл҃тва: Влⷣко гдⷭ҇и і҆и҃се хрⷭ҇тѐ бж҃е на́шъ: Посе́мъ и҆з̾ѡбрази́тєльнаѧ: Бл҃гословѝ дꙋшѐ моѧ̀ гдⷭ҇а:

Сла́ва: Хвалѝ дꙋшѐ моѧ̀ гдⷭ҇а: И҆ ны́нѣ: Є҆диноро́дный сн҃е:

И҆ бл҃жє́нны: Во црⷭ҇твїи твое́мъ: ско́рѡ без̾ пѣ́нїѧ.

Сла́ва, и҆ ны́нѣ: Помѧнѝ на́съ гдⷭ҇и: и҆ покло́ны трѝ.

Ли́къ нбⷭ҇ный: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: По Ѻ҆́ч҃е на́шъ, конда́къ хра́ма, и҆ ст҃а́гѡ.

Сла́ва: Со ст҃ы́ми ᲂу҆поко́й: И҆ ны́нѣ: Предста́тельство хрⷭ҇тїа́нъ:

Гдⷭ҇и поми́лꙋй, м҃.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

И҆́менемъ гдⷭ҇нимъ:

и҆ покло́ны трѝ вели̑кїѧ, съ мл҃твою ст҃а́гѡ є҆фре́ма: и҆ про́чихъ в҃і.

И҆ посе́мъ предстоѧ́тель начина́етъ вече́рню.

Прїиди́те, поклони́мсѧ: три́жды, и҆ ѻ҆бы́чный ѱало́мъ чте́тъ чте́цъ.

и҆ по и҆сполне́нїи ѱалма̀ глаго́летъ і҆ере́й є҆ктенїю̀.

и҆ по ѻ҆бы́чной каѳі́смѣ: На Гдⷭ҇и воззва́хъ, стїхи̑ры ѻ҆ктѡ́иха г҃: и҆ мине́и ст҃а́гѡ, г҃.

Сла́ва ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже.

Свѣ́те ти́хїй:

Та́же прокі́менъ, гла́съ є҃. Чте́цъ то́кмѡ ска́жетъ гла́съ, прокі́мена же не глаго́летъ, ꙗ҆́коже пред̾из̾ѧви́сѧ на ѕ҃-мъ часѣ̀. Бж҃е, во и҆́мѧ твоѐ сп҃си́ мѧ:

Сті́хъ: Бж҃е, ᲂу҆слы́ши мл҃твꙋ мою̀:

Паремїа̀: Прⷪ҇ро́чества і҆ѡ́илева: Та́кѡ глаго́летъ гдⷭ҇ь: да воста́нꙋтъ и҆ восхо́дѧтъ всѝ ꙗ҆зы́цы:

Та́же прокі́менъ, гла́съ ѕ҃: Да ᲂу҆пова́етъ і҆и҃ль на гдⷭ҇а ѿ ны́нѣ и҆ до вѣ́ка.

Сті́хъ: Гдⷭ҇и, не вознесе́сѧ се́рдце моѐ:

Та́кожде твори́мъ и҆ въ пѧто́къ, ꙗ҆́коже въ сре́дꙋ ᲂу҆каза́сѧ. [Є]҆ктенїа́ же не глаго́летсѧ: Рце́мъ всѝ, кромѣ̀ пра́здника срѣ́тенїѧ, и҆ прⷣте́чи, и҆ прилꙋчи́вшагѡсѧ вели́кагѡ ст҃а́гѡ.

Та́же, Сподо́би гдⷭ҇и въ ве́черъ се́й:

Посе́мъ є҆ктенїа̀: И҆спо́лнимъ вече́рнюю мл҃твꙋ на́шꙋ гдⷭ҇еви:

На стїхо́внѣ трїѡ́ди самогла́сенъ днѐ, гла́съ г҃: Возсїѧ̀ весна̀ по́стнаѧ: со ѻ҆бы́чными припѣ́вы: и҆ мч҃нченъ.

Сла́ва, и҆ ны́нѣ, бг҃оро́диченъ: Первост҃а́ѧ чⷭ҇таѧ:

Та́же, Ны́нѣ ѿпꙋща́еши:

По трист҃о́мъ тропа́рь ст҃а́гѡ:

Сла́ва, и҆ ны́нѣ, бг҃оро́диченъ.

и҆ посе́мъ є҆ктенїа̀: Поми́лꙋй на́съ бж҃е: и҆ покло́ны г҃ вели̑кїѧ.

и҆ мл҃тва: Всест҃а́ѧ трⷪ҇це: и҆ Бꙋ́ди и҆́мѧ гдⷭ҇не: съ покло́ны.

и҆ ѱало́мъ: Бл҃гословлю̀ гдⷭ҇а:

Та́же, Досто́йно є҆́сть: и҆ ѿпꙋ́стъ.

и҆ и҆схожде́нїе въ притво́ръ, и҆ быва́етъ ѻ҆бы́чнаѧ лїті́а ѡ҆ ᲂу҆со́пшихъ.

[зрѝ] Вѣ́домо же да є҆́сть: Ꙗ҆́кѡ въ палесті́нѣ, є҆́же є҆́сть во і҆ерⷭ҇ли́мской странѣ̀, не прїѧ́хомъ ѿ ст҃ы́хъ ѻ҆тє́цъ сотворѧ́ти соверше́нныѧ лїтꙋргі́и въ сре́дꙋ и҆ пѧто́къ сы́рныѧ седми́цы, нижѐ преждесщ҃е́нныѧ: въ та́ бо два̀ дни̑ пое́мъ А҆ллилꙋ́їа съ покло́ны, ве́черъ и҆ ᲂу҆́трѡ, ꙗ҆́коже вы́ше рече́сѧ. По вече́рни же въ си́хъ двꙋ̀ дне́хъ, ꙗ҆ди́мъ сы́ръ и҆ ꙗ҆́ица, є҆ди́ною дне́мъ разрѣша́юще пра̑вила тетраді́тѡвъ и҆ ꙗ҆кѡві́тѡвъ.

Въ сре́дꙋ ве́чера.

Повече́рїе, глаго́лемъ ма́лое, и҆ пое́мъ канѡ́нъ мине́и на рѧдꙋ̀ въ сꙋббѡ́тꙋ хотѧ́щагѡ прилꙋчи́тисѧ ст҃а́гѡ.

Въ четверто́къ сы́рный.

На ᲂу҆́трени, на Бг҃ъ гдⷭ҇ь, тропа́рь ст҃а́гѡ два́жды:

Сла́ва, и҆ ны́нѣ, бг҃оро́диченъ: и҆ ѻ҆бы̑чныѧ каѳі̑смы.

По а҃-й каѳі́смѣ сѣда́ленъ ѻ҆ктѡ́иха.

и҆ чте́нїе, сло́во ст҃а́гѡ а҆наста́сїа, и҆гꙋ́мена сїна́йскїѧ горы̀, ѡ҆ ѕ҃-мъ ѱалмѣ̀.

По в҃-й каѳі́смѣ, сѣда́ленъ трїѡ́ди, гла́съ є҃.

Подо́бенъ: Собезнача́льное: Четыредесѧ́тницꙋ:

Сла́ва, то́йже: И҆ ны́нѣ, Въ тебѣ̀ наде́жды дв҃о чⷭ҇таѧ:

Ѻ҆́ба канѡ́на ѻ҆ктѡ́иха: и҆ мине́и ст҃а́гѡ на д҃: и҆ трїѡ́ди, ꙗ҆́коже предписа́сѧ въ понедѣ́льникъ сеѧ̀ седми́цы. По г҃- й пѣ́сни сѣда́ленъ ст҃а́гѡ.

Сла́ва, и҆ ны́нѣ, бг҃оро́диченъ.

По ѕ҃-й пѣ́сни, конда́къ и҆ і҆́косъ ст҃а́гѡ: и҆ чте́мъ про́логъ. По ѳ҃-й пѣ́сни, свѣти́ленъ ѻ҆ктѡ́иха: И҆ ст҃а́гѡ, а҆́ще є҆́сть:

Сла́ва, и҆ ны́нѣ, бг҃оро́диченъ.

На стїхо́внѣ трїѡ́ди самогла́сенъ, гла́съ г҃: Возсїѧ̀ воздержа́нїѧ бл҃голѣ́пїе: со ѻ҆бы́чными припѣ́вы: и҆ мч҃нченъ.

Сла́ва, и҆ ны́нѣ, бг҃оро́диченъ: Въ жена́хъ ст҃а́ѧ бцⷣе: и҆ про́чее по ѻ҆бы́чаю всѐ.

Въ четверто́къ сы́рный ве́чера.

Ѿ нача́ла покло́ны начина́емъ, ꙗ҆́коже во вто́рникъ сы́рный. На вече́рни, на ᲂу҆́трени, и҆ на часѣ́хъ, пое́мъ во все́мъ подо́бнѣ, ꙗ҆́коже въ сре́дꙋ сеѧ̀ седми́цы предписа́сѧ.

Въ пѧто́къ сы́рный ве́чера, па́мѧть соверша́емъ всѣ́хъ прпⷣбныхъ и҆ бг҃оно́сныхъ ѻ҆тцє́въ, въ по́двизѣ просїѧ́вшихъ.

Ѻ҆бы́чнаѧ каѳі́сма. На Гдⷭ҇и воззва́хъ, ста́вимъ стїхѡ́въ ѕ҃, и҆ пое́мъ стїхи̑ры трїѡ́ди ѻ҆тцє́въ. гла́съ и҃: Прїиди́те всѝ вѣ́рнїи:

Сла́ва, гла́съ ѕ҃: И҆́же по ѡ҆́бразꙋ соблю́дше невреди́мо: И҆ ны́нѣ, бг҃оро́диченъ а҃, гла́са.

Прокі́менъ днѐ, гла́съ з҃: Бж҃е застꙋ́пникъ мо́й є҆сѝ ты̀:

Сті́хъ: И҆зми́ мѧ ѿ вра̑гъ мои́хъ бж҃е:

И҆ чте́нїе: Прⷪ҇ро́чества заха́рїина: Та́кѡ глаго́летъ гдⷭ҇ь вседержи́тель: по́стъ четве́ртый:

Прокі́менъ, гла́съ ѕ҃: Да ᲂу҆пова́етъ і҆и҃ль на гдⷭ҇а ѿ ны́нѣ и҆ до вѣ́ка.

Сті́хъ: Гдⷭ҇и не вознесе́сѧ се́рдце моѐ:

Та́же, Сподо́би гдⷭ҇и:

и҆ И҆спо́лнимъ вече́рнюю мл҃твꙋ на́шꙋ:

На стїхо́внѣ самогла́сенъ днѐ, гла́съ в҃: Ѡ҆чи́стимъ себѐ бра́тїе: и҆ ѻ҆бы̑чныѧ припѣ́вы: и҆ мч҃нченъ.

Сла́ва, гла́съ и҃: Мона́хѡвъ мно́жєства: И҆ ны́нѣ, бг҃оро́диченъ, подо́бенъ: Ѽ пресла́внагѡ чꙋдесѐ! Ра́дꙋйсѧ чистоты̀ сокро́вище:

Тропа́рь, гла́съ д҃: Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѡ҆ на́съ, но мл҃твами и҆́хъ въ ми́рѣ ᲂу҆пра́ви живо́тъ на́шъ.

Сла́ва, и҆ ны́нѣ: Є҆́же ѿ вѣ́ка ᲂу҆тае́ное:

Посе́мъ є҆ктенїа̀: Поми́лꙋй на́съ бж҃е: и҆ г҃ покло́ны вели̑кїѧ.

и҆ мл҃тва: Всест҃а́ѧ трⷪ҇це:

Бꙋ́ди и҆́мѧ гдⷭ҇не: три́жды, и҆ ѱало́мъ, Бл҃гословлю̀ гдⷭ҇а: Досто́йно є҆́сть: и҆ ѿпꙋ́стъ.

И҆ быва́етъ трапе́за по ѻ҆бы́чаю, ꙗ҆́коже въ сре́дꙋ сы́рнꙋю ᲂу҆каза́сѧ.

[зрѝ] На трапе́зѣ же чте́мъ сло́во ѡ҆ постѣ̀, ст҃а́гѡ дѡроѳе́а.

На повече́рїи, пое́мъ канѡ́нъ ᲂу҆со́пшихъ, ѻ҆ктѡ́иха, на рѧдꙋ̀ гла́са.

Въ сꙋббѡ́тꙋ сы́рнꙋю на ᲂу҆́трени.

На Бг҃ъ гдⷭ҇ь, тропа́рь ѻ҆тцє́въ, два́жды.

Сла́ва, и҆ ны́нѣ, Є҆́же ѿ вѣ́ка:

и҆ ѻ҆бы̑чныѧ каѳі̑смы.

По а҃-й каѳі́смѣ сѣда́льны ст҃ы́хъ, гла́съ и҃. Подо́бенъ: Повелѣ́нное: Ѻ҆́ч҃ескими мо́лнїѧми ѡ҆зари́вшесѧ:

Сла́ва: Нача́льника мона́шествꙋющихъ: И҆ ны́нѣ: Бл҃годари́мъ тѧ̀ приснодв҃о:

По в҃-й каѳі́смѣ сѣда́льны, гла́съ д҃. Подо́бенъ: Свирѣ́лей па́стырскихъ: А҆нтѡ́нїа кꙋ́пнѡ:

Сла́ва: Ꙗ҆́коже въ раѝ добродѣ́телей цвѣтꙋ́щемъ: И҆ ны́нѣ: Безпло́тныхъ твои́хъ хрⷭ҇тѐ:

Чте́мъ же во ст҃о́мъ є҆фре́мѣ словеса̀ ѡ҆ преста́вльшихсѧ ѻ҆тцѣ́хъ, и҆ прѡ́чаѧ.

Стїхосло́вимъ же, Пое́мъ гдⷭ҇еви:

Канѡ́нъ ст҃а́гѡ ѻ҆би́тели, со і҆рмосо́мъ на ѕ҃: и҆ ст҃ы́хъ ѻ҆тцє́въ, на и҃, гла́съ и҃.

Катава́сїа, і҆рмо́съ настоѧ́щагѡ канѡ́на: Пѣ́снь возсле́мъ лю́дїе:

в҃-ю пѣ́снь во ѱалти́ри не глаго́лемъ, но припѣва́емъ: Прпⷣбнїи ѻ҆тцы̀ моли́те бг҃а ѡ҆ на́съ.

По г҃-й пѣ́сни, сѣда́льны ст҃ы́хъ, гла́съ д҃. Подо́бенъ: Ско́рѡ предварѝ: Лꙋчы̀ ꙗ҆́коже со́лнце пра́вды: и҆ гла́съ и҃: А҆нтѡ́нїа кро́ткое и҆ чи́стое:

Сла́ва, гла́съ то́йже: Оу҆́зы разрѣ́шше страсте́й: И҆ ны́нѣ: Въ тимѣ́нїи ᲂу҆глѣбо́хъ грѣхѡ́въ:

По ѕ҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ бл҃гоче́стїѧ проповѣ́дники, и҆ нече́стїѧ ѡ҆бꙋзда́тели бг҃оно́сныхъ собо́ръ ᲂу҆ѧсни́лъ є҆сѝ, подсо́лнечнꙋю ѡ҆сїѧва́ющыѧ: въ ми́рѣ соверше́нномъ тѣ́хъ мл҃твами, тебѐ сла́вѧщыѧ и҆ велича́ющыѧ сохранѝ, пою́щыѧ тѝ гдⷭ҇и: а҆ллилꙋ́їа.

И҆ і҆́косъ.

и҆ чте́мъ сѷнаѯа́рїй.

По ѳ҃-й пѣ́сни, свѣти́ленъ ѻ҆тцє́въ: Подо́бенъ: Жєны̀ ᲂу҆слы́шите: Мі́ра ѿве́ргшїисѧ:

Сла́ва, и҆ ны́нѣ:

Подо́бенъ: Со ᲂу҆ч҃нкѝ взы́демъ: Въ по́стничествѣ просїѧ́вшыѧ: На хвали́техъ стїхи̑ры ѻ҆тцє́въ, на д҃, гла́съ и҃. Подо́бенъ: Во є҆де́мѣ ра́й: Ѻ҆тцє́въ всѝ мно́жество:

Сла́ва, гла́съ ѕ҃: Прпⷣбнїи ѻ҆тцы̀, во всю̀ зе́млю: И҆ ны́нѣ: Бцⷣе ты̀ є҆сѝ лоза̀:

Славосло́вїе вели́кое. По трист҃о́мъ тропа́рь ѻ҆тцє́въ:

Сла́ва, и҆ ны́нѣ: бг҃оро́диченъ а҃.

Є҆ктєнїѝ, и҆ ѿпꙋ́стъ, и҆ ча́съ а҃. На часѣ́хъ, тропа́рь ѻ҆тцє́въ. По трист҃о́мъ конда́къ ѻ҆тцє́въ.

На лїтꙋргі́и, бл҃жє́нна ѿ канѡ́на ѻ҆тцє́въ, пѣ́снь г҃-ѧ, и҆ ѕ҃-ѧ.

Прокі́менъ ѻ҆тцє́въ є҆ди́нъ, гла́съ д҃: Восхва́лѧтсѧ прпⷣбнїи во сла́вѣ:

Сті́хъ: Возношє́нїѧ бж҃їѧ въ горта́ни и҆́хъ:

А҆по́столъ днѐ, къ ри́млѧнѡмъ, зача́ло рє҃і: Ми́ръ возлю́бимъ:

и҆ дрꙋгі́й ѻ҆тцє́въ, къ гала́тѡмъ, зача́ло сг҃і: Пло́дъ дх҃о́вный:

А҆ллилꙋ́їа, гла́съ в҃: Насажде́ни въ домꙋ̀ гдⷭ҇ни:

Сті́хъ: Весели́тесѧ првⷣнїи ѡ҆ гдⷭ҇ѣ:

Є҆ѵⷢ҇лїе днѐ, матѳе́а, зача́ло ѕ҃і: Внемли́те ми́лостыни ва́шеѧ:

дрꙋго́е є҆ѵⷢ҇лїе ѻ҆тцє́въ, матѳе́а, зача́ло м҃г: Всѧ̑ мнѣ̀ прєдана̀ сꙋ́ть ѻ҆ц҃е́мъ мои́мъ:

Прича́стенъ, Ра́дꙋйтесѧ:

Въ сꙋббѡ́тꙋ ве́чера на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю. На вели́цѣй вече́рни, по ѻ҆бы́чномъ ѱалмѣ̀, пое́мъ Бл҃же́нъ мꙋ́жъ, каѳі́смꙋ всю̀. На Гдⷭ҇и воззва́хъ стїхи̑ры воскрⷭ҇ны г҃, и҆ а҆натѡ́лїевы г҃, и҆ трїѡ́ди. д҃, гла́съ ѕ҃.

Подо́бенъ: Всю̀ ѿложи́вше: Созда́тель мо́й гдⷭ҇ь:

Сла́ва, гла́съ ѕ҃: Сѣ́де а҆да́мъ прѧ́мѡ раѧ̀: И҆ ны́нѣ, бг҃оро́диченъ а҃-й гла́са.

На лїті́и стїхи̑ры хра́ма.

Сла́ва, гла́съ ѕ҃: Со́лнце лꙋчы̀ скры̀: И҆ ны́нѣ, Та́инственнѡ воспѣва́емъ тѧ̀:

На стїхо́внѣ, ѻ҆ктѡ́иха, по а҆лфави́тꙋ.

Сла́ва, гла́съ ѕ҃: И҆згна́нъ бы́сть а҆да́мъ: И҆ ны́нѣ, Творе́цъ и҆ и҆зба́витель мо́й:

По трист҃о́мъ, Бцⷣе дв҃о: три́жды. и҆ бл҃гослове́нїе хлѣ́бѡвъ.

и҆ чте́мъ сло́во і҆ѡа́нна златоꙋ́стагѡ, на и҆згна́нїе а҆да́ма.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды.

Сла́ва, и҆ ны́нѣ, бг҃оро́диченъ а҃-й гла́са, и҆ ѻ҆бы̑чныѧ каѳі̑смы, и҆ сѣда́льны воскрⷭ҇ны, и҆ бг҃оро́дичны и҆́хъ.

Полѷеле́й, ꙗ҆́коже ᲂу҆каза́сѧ въ прє́жднїѧ недѣ̑ли.

Та́же степє́нна, и҆ прокі́менъ гла́са.

Всѧ́кое дыха́нїе: є҆ѵⷢ҇лїе воскрⷭ҇но.

Воскрⷭ҇нїе хрⷭ҇то́во: ѱало́мъ н҃ и҆ про́чее всѐ по рѧ́дꙋ, ꙗ҆́коже и҆з̾ѧви́сѧ въ недѣ́лю мытарѧ̀ и҆ фарїсе́а.

Канѡ́нъ воскрⷭ҇нъ, со і҆рмосо́мъ на д҃: и҆ крⷭ҇товоскрⷭ҇нъ на в҃: и҆ бцⷣы на в҃. и҆ трїѡ́ди на ѕ҃, гла́съ ѕ҃.

Катава́сїа трїѡ́ди: Ꙗ҆́кѡ но сꙋ́хꙋ: По г҃-й пѣ́сни, сѣда́ленъ трїѡ́ди, гла́съ д҃.

Подо́бенъ: Оу҆диви́сѧ: И҆згна́нъ бы́сть а҆да́мъ ѿ ра́йскїѧ сла́дости:

Сла́ва, гла́съ то́йже.

Подо́бенъ: Вознесы́йсѧ: Ны́нѣ вре́мѧ добродѣ́телей ꙗ҆ви́сѧ:

И҆ ны́нѣ, Не ᲂу҆молчи́мъ никогда̀ бцⷣе: и҆ чте́нїе. По ѕ҃-й пѣ́сни,

Конда́къ, гла́съ ѕ҃: Самоподо́бенъ: Премꙋ́дрости наста́вниче, смы́сла пода́телю, немꙋ́дрыхъ наказа́телю, и҆ ни́щихъ защи́тителю, ᲂу҆твердѝ, вразꙋмѝ се́рдце моѐ влⷣко. ты̀ да́ждь мѝ сло́во, ѻ҆́ч҃ее сло́во, се́ бо ᲂу҆стна́мъ мои́мъ не возбраню̀, во є҆́же зва́ти тебѣ̀: млⷭ҇тиве, поми́лꙋй мѧ̀ па́дшаго.

И҆ і҆́косъ.

и҆ чте́мъ сѷнаѯа́рїй. По ѳ҃-й пѣ́сни, свѣти́ленъ воскрⷭ҇нъ:

Сла́ва, трїѡ́ди: Подо́бенъ: Жєны̀ ᲂу҆слы́шите: За́повѣдь твою̀ гдⷭ҇и: И҆ ны́нѣ, подо́бенъ: Со ᲂу҆ч҃нкѝ: И҆згна́на бы́вша гдⷭ҇и:

На хвали́техъ, стїхи̑ры воскрⷭ҇ны д҃, и҆ а҆нато́лїевъ а҃: и҆ трїѡ́ди самогла́сны г҃, гла́съ є҃: Оу҆вы̀ мнѣ̀, а҆да́мъ рыда́нїемъ возопѝ: со ѻ҆бы́чными припѣ́вы, ꙗ҆́кѡ предписа́сѧ въ мимоше́дшихъ недѣ́лѧхъ.

И҆ ны́нѣ, Пребл҃гослове́нна є҆сѝ:

Славосло́вїе вели́кое. По трист҃о́мъ тропа́рь воскрⷭ҇нъ, є҆ктєнїѝ, и҆ ѿпꙋ́стъ, и҆ и҆схожде́нїе въ притво́ръ. Стїхи́ра є҆ѵⷢ҇льскаѧ, и҆ поꙋче́нїе стꙋді́тово, по ѻ҆бы́чаю: и҆ ча́съ а҃, и҆ коне́чный ѿпꙋ́стъ. На часѣ́хъ, тропа́рь воскрⷭ҇нъ. По трист҃о́мъ: конда́къ трїѡ́ди.

На лїтꙋргі́и, бл҃жє́нна ѻ҆ктѡ́иха на ѕ҃, и҆ трїѡ́ди пѣ́снь ѕ҃-ѧ на д҃.

По вхо́дѣ глаго́лемъ тропарѝ, ꙗ҆́коже ᲂу҆каза́сѧ въ недѣ́лю фарїсе́евꙋ.

Прокі́менъ, гла́съ и҃: Помоли́тесѧ и҆ воздади́те гдⷭ҇еви бг҃ꙋ на́шемꙋ.

Сті́хъ: Вѣ́домъ во і҆ꙋде́и бг҃ъ:

А҆по́столъ къ ри́млѧнѡмъ, зача́ло рв҃і: Ны́нѣ ближа́йшее на́мъ сп҃се́нїе: А҆ллилꙋ́їа, гла́съ ѕ҃: Бл҃го є҆́сть и҆сповѣ́датисѧ гдⷭ҇еви.

Сті́хъ: Возвѣща́ти заꙋ́тра млⷭ҇ть твою̀.

Є҆ѵⷢ҇лїе матѳе́а, зача́ло з҃і: А҆́ще ѿпꙋща́ете человѣ́кѡмъ согрѣшє́нїѧ и҆́хъ:

и҆ по рѧ́дꙋ бж҃е́ственнаѧ лїтꙋргі́а златоꙋ́стова:

Прича́стенъ: Хвали́те гдⷭ҇а съ нб҃съ:

[зрѝ] Подоба́етъ вѣ́дати: Ꙗ҆́кѡ ѿ сеѧ̀ недѣ́ли сы́рныѧ, да́же до воздви́женїѧ чⷭ҇тна́гѡ крⷭ҇та̀ во всѧ̀ недѣ́ли, чрез̾ всѐ лѣ́то, на ᲂу҆́трени ᲂу҆пражнѧ́етсѧ полѷеле́й: пое́тсѧ же то́кмѡ въ пра́здники гдⷭ҇скїѧ, и҆ вели́кихъ ст҃ы́хъ, во бдѣ́нїихъ недѣ́льныхъ.

Въ тꙋ́южде недѣ́лю сы́рнꙋю ве́чера:

По ѻ҆бы́чномъ ѱалмѣ̀, На Гдⷭ҇и воззва́хъ, пое́мъ стїхи̑ры ѻ҆ктѡ́иха, на рѧдꙋ̀ гла́са покаѧ́нны д҃. Сїѧ̑ же пи́саны, два̀ ве́черъ на стїхо́внѣ, и҆ два̀ ᲂу҆́треннихъ стїхо́вныхъ. [Т]а́кожде и҆ въ про́чыѧ недѣ̑ли, ѿ сеѧ̀ да́же до пѧ́тыѧ ст҃а́гѡ поста̀. Гдⷭ҇и воззва́хъ, пое́мъ на гла́съ ѻ҆смогла́сника на рѧдꙋ̀. И҆ трїѡ́ди подо́бны г҃, гла́съ в҃.

Подо́бенъ: Є҆гда̀ ѿ дре́ва:

Двѣ̀, творе́нїе господи́на і҆ѡ́сифа: Воздержа́нїемъ тѣ́ло смири́ти всѝ потщи́мсѧ:

И҆ є҆ди́нъ господи́на ѳео́дѡра, гла́съ то́йже.

и҆ мине́и ст҃а́гѡ, подо́бны г҃:

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, бг҃оро́диченъ, во гла́съ мине́и.

и҆ быва́етъ вхо́дъ съ кади́ломъ, по ѻ҆бы́чаю.

Та́же пое́мъ прокі́менъ вели́кїй, гла́съ и҃: Не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀, ско́рѡ ᲂу҆слы́ши мѧ̀: вонмѝ дꙋшѝ мое́й, и҆ и҆зба́ви ю҆̀.

Сті́хъ а҃: Сп҃се́нїе твоѐ бж҃е да прїи́метъ мѧ̀.

Сті́хъ в҃: Да ᲂу҆́зрѧтъ ни́щїи, и҆ возвеселѧ́тсѧ.

Сті́хъ г҃: Взыщи́те бг҃а, и҆ жива̀ бꙋ́детъ дꙋша̀ ва́ша.

И҆ па́ки вы́шшимъ гла́сомъ: Не ѿвратѝ лица̀ твоегѡ̀:

[зрѝ] Вѣ́домо же бꙋ́ди: Ꙗ҆́кѡ во всѣ́хъ недѣ́лѧхъ ст҃ы́ѧ м҃-цы ве́черъ вхо́дъ быва́етъ, вели́кихъ ра́ди прокі́менѡвъ.

По прокі́менѣ же є҆ктенїѝ: Рце́мъ всѝ, не глаго́лемъ, но а҆́бїе предстоѧ́тель: Сподо́би гдⷭ҇и въ ве́черъ се́й: и҆ твори́мъ мета̑нїѧ г҃. Ѿсе́лѣ начина́емъ твори́ти покло́ны.

Та́же, є҆ктенїа̀: И҆спо́лнимъ вече́рнюю мл҃твꙋ:

и҆ посе́мъ, соше́дшесѧ ѻ҆́ба ли̑ка вкꙋ́пѣ, пое́мъ на стїхо́внѣ трїѡ́ди самогла́сенъ, гла́съ д҃: Возсїѧ̀ бл҃года́ть твоѧ̀ гдⷭ҇и: со ѻ҆бы́чными припѣ́вы: и҆ мч҃нченъ.

Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, бг҃оро́диченъ, гла́съ то́йже:

А҆́гг҃льстїи чи́ни:

Та́же, Ны́нѣ ѿпꙋща́еши: посе́мъ трист҃о́е, и҆ покло́ны г҃. По Ѻ҆́ч҃е на́шъ:

і҆ере́й возгла́съ: Ꙗ҆́кѡ твоѐ є҆́сть црⷭ҇тво:

Та́же глаго́лемъ тропарѝ сїѧ̑, гла́съ д҃: Бцⷣе дв҃о ра́дꙋйсѧ: и҆ покло́нъ є҆ди́нъ.

Сла́ва: Крⷭ҇ти́телю хрⷭ҇то́въ: покло́нъ.

И҆ ны́нѣ: Моли́те ѡ҆ на́съ: покло́нъ.

Та́же, Под̾ твоѐ бл҃гоꙋтро́бїе: без̾ покло́на.

Гдⷭ҇и поми́лꙋй, м҃: кро́ткимъ и҆ ти́химъ гла́сомъ, ра́внѡ всѝ.

Та́же, Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

И҆́менемъ гдⷭ҇нимъ:

І҆ере́й: Сы́й бл҃гослове́нъ:

Мы́ же мл҃твꙋ: Нбⷭ҇ный цр҃ю̀:

И҆ посе́мъ, воздѣ́вше рꙋ́цѣ, мо́лимсѧ во свое́й мы́сли, глаго́люще въ себѣ̀ мл҃твꙋ ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ. Покло́нъ. Дꙋ́хъ же цѣломꙋ́дрїѧ, смиренномꙋ́дрїѧ, терпѣ́нїѧ и҆ любвѐ да́рꙋй мѝ рабꙋ̀ твоемꙋ̀. Покло́нъ. Є҆́й гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ, и҆ не ѡ҆сꙋжда́ти бра́та моегѡ̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь. Покло́нъ.

И҆ цѣлꙋ́емъ ст҃ы́ѧ и҆ честны́ѧ і҆кѡ́ны, и҆ пото́мъ глаго́летъ і҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

И҆ быва́етъ соверше́нный ѿпꙋ́стъ. По вече́рни же въ трапе́зѣ быва́етъ ᲂу҆тѣше́нїе бра́тїи. По воста́нїи же ѿ трапе́зы, повече́рїе пое́мъ ма́лое по ѻ҆бы́чаю, съ мета́нїи и҆ покло́ны по́стными. На Сла́ва въ вы́шнихъ, мета̑нїѧ г҃.

А҆́ще бы́ло бдѣ́нїе, Канѡ́нъ бцⷣы не глаго́летсѧ.

Досто́йно є҆́сть: трист҃о́е, мета̑нїѧ г҃: и҆ ѻ҆бы̑чныѧ тропарѝ. Гдⷭ҇и поми́лꙋй, м҃.

И҆́же на всѧ́кое вре́мѧ:

І҆ере́й, Бж҃е ᲂу҆ще́дри ны̀:

Покло́ны г҃ вели̑кїѧ, съ мл҃твою ст҃а́гѡ є҆фре́ма: Гдⷭ҇и и҆ влⷣко: и҆ про́чыѧ, в҃і.

Та́же трист҃о́е. Ѻ҆́ч҃е на́шъ: Гдⷭ҇и поми́лꙋй, в҃і: и҆ мл҃тва: Нескве́рнаѧ, небла́знаѧ: И҆ да́ждь на́мъ: и҆ ѿпꙋ́стъ.

И҆ и҆́мже ѡ҆́бразомъ ᲂу҆каза́сѧ слꙋ́жба вече́рни и҆ повече́рїѧ сеѧ̀ недѣ́ли: си́це да быва́етъ и҆ про́чыѧ недѣ́ли ст҃ы́ѧ четыредесѧ́тницы.

[зрѝ] Подоба́етъ вѣ́дати: Ꙗ҆́кѡ а҆́ще бꙋ́детъ бра́тꙋ на́шемꙋ ѿитѝ ко гдⷭ҇ꙋ во ст҃ы́хъ си́хъ дне́хъ, посредѣ̀ седми́цы не быва́ютъ трети̑ны є҆гѡ̀, да́же до пѧтка̀ ве́чера, тогда́ бо соверша́етсѧ паннѷхі́да є҆гѡ̀, подо́бнѣ и҆ въ сꙋббѡ́тꙋ лїтꙋргі́а є҆гѡ̀. Во грѧдꙋ́щꙋю же сꙋббѡ́тꙋ быва́ютъ девѧти̑ны є҆гѡ̀, а҆́ще слꙋчи́тсѧ, а҆́ще ли нѝ. четыредесѧти̑ны же є҆гѡ̀ быва́ютъ, є҆гда̀ число̀ дне́й є҆гѡ̀ и҆спо́лнитсѧ. Приношє́нїѧ же и҆ па̑мѧти є҆гѡ̀ начина́ютсѧ ѿ но́выѧ недѣ́ли, да́же до и҆сполне́нїѧ дне́й м҃.

Въ понедѣ́льникъ пе́рвыѧ седми́цы зна́менаетъ параекклисїа́рхъ къ свѣ́тꙋ коснѣ́е, вече́рнѧгѡ ра́ди ᲂу҆тѣше́нїѧ.

И҆ собра́вшесѧ всѝ въ притво́ръ, пое́мъ полꙋ́нощницꙋ без̾ покло́нѡвъ: то́чїю по Чⷭ҇тнѣ́йшꙋю херꙋві̑мъ, г҃ покло́ны вели̑кїѧ, съ мл҃твою: Гдⷭ҇и и҆ влⷣко живота̀ моегѡ̀: Сїе́ же быва́етъ въ а҃-й де́нь то́чїю.

Въ про́чыѧ же дни̑ ст҃а́гѡ и҆ вели́кагѡ поста̀ пое́мъ полꙋ́нощницꙋ всю̀ съ покло́ны.

Въ нача́лѣ трист҃а́гѡ, покло́ны г҃: на Прїиди́те поклони́мсѧ, покло́ны г҃.

На непоро́чнахъ, на ко́ейждо сла́вѣ покло́ны г҃.

По Вѣ́рꙋю во є҆ди́наго бг҃а: трист҃о́е, покло́ны г҃.

По И҆́же на всѧ́кое вре́мѧ, и҆ по Чⷭ҇тнѣ́йшꙋю, по возгла́сѣ: Бж҃е ᲂу҆ще́дри ны̀: твори́мъ покло́ны г҃ вели̑кїѧ, въ ни́хже глаго́лемъ мл҃твꙋ ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: вта́й, въ трѝ раздѣлє́нїѧ, ꙗ҆́коже предписа́сѧ. Та́же ма́лыхъ, в҃і, глаго́люще въ себѣ̀: Бж҃е, ѡ҆чи́сти мѧ̀ грѣ́шнаго. и҆ па́ки послѣдѝ мл҃твꙋ всю̀ вышепи́саннꙋю, и҆ покло́нъ є҆ди́нъ вели́кїй.

Та́же мл҃твꙋ: Влⷣко бж҃е ѻ҆́ч҃е вседержи́телю:

Посе́мъ, Прїиди́те поклони́мсѧ: покло́ны г҃.

Возведо́хъ ѻ҆́чи моѝ въ го́ры:

Сла́ва, и҆ ны́нѣ, трист҃о́е: покло́ны г҃.

По Ѻ҆́ч҃е на́шъ: тропарѝ ѻ҆бы̑чныѧ.

и҆ возгла́съ ѿ і҆ере́а:

и҆ мл҃тва: Помѧнѝ, гдⷭ҇и:

Та́же, Пресла́внаѧ приснодв҃о: и҆ Оу҆пова́нїе моѐ ѻ҆ц҃ъ:

Посе́мъ і҆ере́й: Сла́ва тебѣ̀ хрⷭ҇тѐ бж҃е:

и҆ проще́нїе ѻ҆бы́чное: и҆ воста́въ і҆ере́й глаго́летъ: Помо́лимсѧ ѡ҆ бл҃гочести́вѣйшемъ: ꙗ҆́кѡ ѻ҆бы́чай.

и҆ по и҆сполне́нїи сегѡ̀ воста́въ і҆ере́й, твори́тъ ѻ҆бы́чное мета́нїе предстоѧ́телю, и҆ вхо́дитъ во ст҃ы́й ѻ҆лта́рь, и҆ прїе́мъ кади́льницꙋ, глаго́летъ и҆ мл҃твꙋ кади́ла.

и҆ ста́въ пред̾ ст҃о́ю трапе́зою, кади́тъ крⷭ҇тоѡбра́знѡ, и҆ возгласи́тъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

И҆ на́мъ ѿвѣща́вшымъ: А҆ми́нь.

Та́же ᲂу҆чине́нный чте́цъ глаго́летъ трист҃о́е без̾ мета́нїй.

По Ѻ҆́ч҃е на́шъ: возгла́съ ѿ і҆ере́а: Ꙗ҆́кѡ твоѐ є҆́сть црⷭ҇тво:

Гдⷭ҇и поми́лꙋй, в҃і:

Прїиди́те поклони́мсѧ, три́жды, без̾ мета́нїй.

и҆ ѱало́мъ ѳ҃і: Оу҆слы́шитъ тѧ̀ гдⷭ҇ь: и҆ к҃- й: Гдⷭ҇и си́лою твое́ю: По концѣ̀ и҆́хъ трист҃о́е, без̾ мета́нїй. По Ѻ҆́ч҃е на́шъ: тропарѝ ѻ҆бы̑чныѧ.

Си̑мъ глаго́лємымъ:

кади́тъ і҆ере́й ст҃ы́й ѻ҆лта́рь, и҆ всю̀ цр҃ковь.

и҆ возвра́щьсѧ во ѻ҆лта́рь глаго́летъ є҆ктенїю̀ ма́лꙋю: Поми́лꙋй на́съ, бж҃е:

и҆ возгла́съ: Ꙗ҆́кѡ млⷭ҇тивъ:

Ли́къ: А҆ми́нь. И҆́менемъ гдⷭ҇нимъ:

и҆ а҆́бїе і҆ере́й стоѧ̀ пред̾ ст҃о́ю трапе́зою, возглаша́етъ: Сла́ва ст҃ѣ́й и҆ є҆диносꙋ́щнѣй и҆ животворѧ́щей, и҆ нераздѣ́льнѣй трⷪ҇цѣ, всегда̀, ны́нѣ и҆ при́снѡ, и҆ во вѣ́ки вѣкѡ́въ.

И҆ предстоѧ́тель глаго́летъ: А҆ми́нь.

Сла́ва, въ вы́шнихъ бг҃ꙋ: три́жды, без̾ покло́нѡвъ.

и҆ Гдⷭ҇и ᲂу҆стнѣ̀ моѝ ѿве́рзеши: два́жды.

И҆ глаго́летъ шестоѱа́лмїе со всѧ́кимъ внима́нїемъ, не борзѧ́сѧ, но со стра́хомъ бж҃їимъ, ꙗ҆́кѡ самомꙋ̀ бг҃ꙋ бесѣ́дꙋюще неви́димѡ. И҆ не и҆́мать кто̀ вла́сти шепты̑ твори́ти, нижѐ плю́нꙋти, и҆лѝ хра́кнꙋти: но па́че внима́ти ѿ ѱало́мника глаго́лємымъ, рꙋ́цѣ и҆мꙋ́ще согбе́ны къ пе́рсємъ, главы̑ же преклоне́ны, и҆ ѻ҆́чи и҆мꙋ́ще до́лꙋ, серде́чныма ѻ҆чи́ма зрѧ́ще къ восто́кѡмъ, молѧ́щесѧ ѡ҆ грѣсѣ́хъ на́шихъ, помина́юще сме́рть, и҆ бꙋ́дꙋщꙋю мꙋ́кꙋ, и҆ жи́знь вѣ́чнꙋю.

Въ нача́ло же р҃в-гѡ ѱалма̀, глаго́летъ і҆ере́й ᲂу҆́трєннїѧ мл҃твы, стоѧ̀ непокрове́нъ, по ѻ҆бы́чаю:

По сконча́нїи же шестоѱа́лмїа глаго́летъ є҆ктенїю̀ вели́кꙋю, и҆ возгла́съ.

Та́же глаго́летъ ᲂу҆чине́нный мона́хъ, и҆лѝ і҆ере́й: А҆ллилꙋ́їа: во гла́съ прилꙋчи́вшїйсѧ ѻ҆ктѡ́иха, со стїхѝ и҆́хъ.

Сті́хъ а҃-й: Ѿ но́щи ᲂу҆́тренюетъ дꙋ́хъ мо́й къ тебѣ̀ бж҃е.

Сті́хъ в҃-й: Пра́вдѣ наꙋчи́тесѧ живꙋ́щїи на землѝ.

Сті́хъ г҃-й: За́висть прїи́метъ лю́ди ненака̑занныѧ.

Сті́хъ д҃-й: Приложѝ и҆̀мъ ѕла̀ гдⷭ҇и. приложѝ ѕла̀ сла̑внымъ землѝ.

И҆ по ко́емждо стїсѣ̀ кли́рїцы пою́тъ, А҆ллилꙋ́їа, три́жды.

Та́же трⷪ҇чны гла́са, раздѣлѧ́юще на ли́ки: пое́мъ же со ᲂу҆миле́нїемъ, велегла́снѡ и҆ ко́снѡ, пѣ́нїемъ: На в҃-мъ, Сла́ва: а҆ на г҃-мъ, И҆ ны́нѣ:

Та́же стїхосло́вимъ є҆ди́нꙋ каѳі́смꙋ ѱалти́ра.

По а҆нтїфѡ́нѣхъ же, на А҆ллилꙋ́їа, твори́мъ покло́ны г҃, всѝ ра́внѡ, послѣ́дꙋюще и҆гꙋ́менꙋ, и҆лѝ є҆кклисїа́рхꙋ. По каѳі́смахъ є҆ктєнїѝ не глаго́лютсѧ во всю̀ м҃-цꙋ, кромѣ̀ сꙋббѡ́тъ и҆ недѣ́ль. По а҃-й каѳі́смѣ сѣда́льны ᲂу҆мили́тєльныѧ ѻ҆смогла́сника, и҆ мч҃нченъ:

Та́же чте́нїе во ст҃о́мъ є҆фре́мѣ.

[зрѝ] Ѿ сегѡ́ бо днѐ начина́етсѧ ст҃ы́й є҆фре́мъ: и҆ чте́тсѧ до пѧтка̀ цвѣтоно́сныѧ седми́цы.

Ѡ҆ ѱалти́ри, ка́кѡ глаго́летсѧ во ст҃ꙋ́ю и҆ вели́кꙋю м҃-цꙋ, предписа́сѧ во главѣ̀ з҃і, ли́стъ л҃в.

Чте́тсѧ же ѿ предстоѧ́телѧ, и҆лѝ ѿ пѣвца̀ пе́рвагѡ десны́ѧ страны̀.

По в҃-й же каѳі́смѣ сѣда́ленъ трїѡ́ди, кѵ́ръ і҆ѡ́сифа.

Сла́ва, то́йже: И҆ ны́нѣ, бг҃оро́диченъ: и҆ па́ки чте́нїе во ст҃о́мъ є҆фре́мѣ.

По г҃-й каѳі́смѣ сѣда́ленъ трїѡ́ди, господи́на ѳео́дѡра.

Сла́ва, то́йже: И҆ ны́нѣ, бг҃оро́диченъ. Чте́нїе въ лаѵсаи́цѣ.

Посе́мъ ѱало́мъ н҃, и҆ а҆́бїе і҆ере́й мл҃твꙋ: Сп҃сѝ бж҃е лю́ди твоѧ̑:

Кли́рїцы же, Гдⷭ҇и поми́лꙋй, в҃і.

и҆ возгла́съ. Млⷭ҇тїю и҆ щедро́тами:

Посе́мъ начина́емъ: Гдⷭ҇еви пое́мъ:

На гла́съ канѡ́на мине́и днѐ ст҃а́гѡ: и҆ глаго́лютъ стїхѝ пѣ́сней ско́рѡ, кі́йждо ли́къ сво́й сті́хъ, до́ндеже дости́гнꙋтъ до Ѡ҆гꙋстѣ́ша: и҆ ѿ тогѡ̀ начина́ютъ стїхѝ держа́ти на д҃і: и҆ пое́мъ мине́и со і҆рмосо́мъ на ѕ҃.

Пое́мъ же си́це:

Пе́рвый ли́къ глаго́летъ сті́хъ: Ѡ҆гꙋстѣ́ша: и҆ пое́тъ і҆рмо́съ.

Вторы́й же ли́къ глаго́летъ вторы́й сті́хъ: Речѐ вра́гъ: и҆ по не́мъ тропа́рь канѡ́на.

и҆ по рѧ́дꙋ стїхѝ, по ликѡ́мъ, до тогда̀ потща́шасѧ: Ѿ стїха́ же, Тогда̀ потща́шасѧ: начина́емъ трипѣ́снецъ господи́на і҆ѡ́сифа на д҃.

На Гдⷭ҇ь же црⷭ҇твꙋѧй, пое́мъ дрꙋгі́й трипѣ́снецъ, господи́на ѳео́дѡра стꙋді́та.

и҆ пое́тъ є҆ди́нъ ли́къ тропа́рь. Дрꙋгі́й же ли́къ вторы́й сті́хъ, и҆ тропа́рь.

Посе́мъ содини́вшымсѧ двꙋ́мъ ликѡ́мъ пою́тъ: Сла́ва, трⷪ҇ченъ, вы́шшимъ гла́сомъ: И҆ ны́нѣ, бг҃оро́диченъ:

Та́же глаго́лемъ высоча́йшимъ гла́сомъ: Сла́ва тебѣ̀ бж҃е на́шъ, сла́ва тебѣ̀:

И҆ пое́мъ и҆́ный тропа́рь господи́на ѳео́дѡра:

Поне́же бо по пѧтѝ тропаре́й и҆́мать пѣ́снь. Послѣди́ же глаго́лемъ катава́сїю, і҆рмо́съ втора́гѡ канѡ́на. Си́це пое́тсѧ ѻ҆сма́ѧ, и҆ девѧ́таѧ пѣ̑сни.

Тре́тїю же пѣ́снь пое́мъ си́це:

Глаго́летъ пе́рвый ли́къ, сті́хъ: Гдⷭ҇ь взы́де на нб҃са̀: и҆ тропа́рь канѡ́на мине́и.

Вторы́й ли́къ, сті́хъ: И҆ да́стъ крѣ́пость цр҃ю̀: И҆ вторы́й тропа́рь канѡ́на мине́и.

Та́же, Сла́ва, и҆ ны́нѣ, съ тропарѝ канѡ́на.

и҆ пое́тъ пе́рвый ли́къ і҆рмо́съ мине́и тре́тїѧ пѣ́сни, послѣдѝ канѡ́на.

Си́мъ ѡ҆́бразомъ пое́мъ и҆ шестꙋ́ю пѣ́снь.

Четве́ртꙋю же, и҆ пѧ́тꙋю, и҆ седьмꙋ́ю пѣ́снь, си́це пое́мъ:

Глаго́ли пе́рвѣе і҆рмо́съ канѡ́на мине́и, та́же конє́чныѧ два̀ стїха̀ пѣ́сни пое́мъ къ тропарє́мъ канѡ́на. и҆ Сла́ва, и҆ ны́нѣ: І҆рмосо́мъ же не покрыва́емъ пѣ́сни, занѐ і҆рмо́съ глаго́летсѧ пре́жде пѣ́сни. Пою́тсѧ же і҆рмосы̀ мине́и по канѡ́нѣ, то́кмѡ по тре́тїей и҆ шесто́й пѣ́снехъ, зане́же ᲂу҆ тѣ́хъ пѣ́сней пе́рвѣе і҆рмо́съ не пое́тсѧ.

Въ про́чыѧ же дни̑ седми́цы кромѣ̀ понедѣ́льника, та́кѡ пое́тсѧ и҆ а҃-ѧ пѣ́снь, ꙗ҆́коже ᲂу҆каза́сѧ ѡ҆ четве́ртой, и҆ пѧ́той пѣ́снехъ. А҆ въ ко́ихъ пѣ́снехъ бꙋ́детъ трипѣ́снецъ, пое́тсѧ послѣдѝ канѡ́на катава́сїа, і҆рмо́съ трипѣ́снца, ꙗ҆́коже вы́ше и҆з̾ѧви́сѧ.

[зрѝ] Вѣ́домо же бꙋ́ди: Ꙗ҆́кѡ ѻ҆смогла́сникъ не пое́тсѧ во всю̀ ст҃ꙋ́ю м҃-цꙋ, кромѣ̀ недѣ́ль: пое́тсѧ же то́чїю мине́а, и҆ трипѣ́снецъ. А҆ въ ко́ихъ пѣ́снехъ нѣ́сть трипѣ́снца, пое́тсѧ то́кмѡ мине́а.

По г҃-й пѣ́сни, глаго́летъ і҆ере́й є҆ктенїю̀ ма́лꙋю.

Та́же сѣда́ленъ ст҃а́гѡ, є҆ди́ножды.

Сла́ва, и҆ ны́нѣ, бг҃оро́диченъ. и҆ чте́нїе въ лаѵсаи́цѣ.

По ѕ҃-й пѣ́сни, є҆ктенїа̀ ма́лаѧ.

Та́же сѣда́ленъ мч҃нченъ:

а҆́ще же и҆́мать ст҃ы́й конда́къ, глаго́лемъ є҆го̀ здѣ̀: мч҃нченъ же глаго́лемъ по пе́рвой каѳі́смѣ, съ сѣда́льны, съ припѣ́вомъ: Ди́венъ бг҃ъ во ст҃ы́хъ свои́хъ: и҆ чте́мъ про́логъ.

По ѳ҃-й пѣ́сни, Досто́йно є҆́сть: и҆ покло́нъ. є҆ктенїа̀ ма́лаѧ: И҆ свѣти́ленъ трⷪ҇ченъ гла́са, три́жды.

Та́же чте́цъ чте́тъ ѻ҆бы̑чныѧ трѝ ѱалмы̀: Хвали́те гдⷭ҇а съ нб҃съ:

[зрѝ] Подоба́етъ вѣ́дати: Ꙗ҆́кѡ а҆́ще слꙋча́тсѧ въ седми̑чныѧ днѝ, кромѣ̀ сꙋббѡ́ты и҆ недѣ́ли, въ мине́и на рѧдꙋ̀ два̀ ст҃ы̑ѧ, пое́мъ є҆ди́нагѡ на вече́рни стїхи̑ры: а҆ дрꙋга́гѡ на хвали́техъ на д҃, а҆́ще є҆́сть. Канѡ́ны же глаго́лемъ ѻ҆бои̑мъ ст҃ы̑мъ на ѕ҃. Настоѧ́щагѡ ст҃а́гѡ пое́мъ і҆рмо́съ є҆ди́ножды, и҆ но не́мъ глаго́лемъ два̀ тропарѧ̀ за є҆ди́нъ, и҆ тропа́рь пред̾ бг҃оро́дичнымъ, бг҃оро́диченъ же ѡ҆ставлѧ́етсѧ. Та́же втора́гѡ ст҃а́гѡ подо́бнѣ два̀ тропарѧ̀ за є҆ди́нъ, и҆ тропа́рь пред̾ бг҃оро́дичнымъ, и҆ бг҃оро́диченъ, та́же, трипѣ́снецъ.

А҆́ще же нѝ, глаго́летъ настоѧ́тель: Тебѣ̀ сла́ва подоба́етъ гдⷭ҇и бж҃е на́шъ: Сла́ва тебѣ̀ показа́вшемꙋ на́мъ свѣ́тъ: и҆ прѡ́чаѧ.

и҆ твори́мъ мета̑нїѧ трѝ, ра́внѡ на мѣ́стѣхъ на́шихъ стоѧ́ще.

Посе́мъ і҆ере́й: И҆спо́лнимъ ᲂу҆́треннюю мл҃твꙋ на́шꙋ гдⷭ҇еви: и҆ возгла́съ.

И҆ посе́мъ соше́дшесѧ ѻ҆́ба ли̑ка вкꙋ́пѣ, пое́мъ на стїхо́внѣ, трїѡ́ди самогла́сенъ днѐ, гла́съ є҃: Прїи́де по́стъ:

Глаго́лемъ же и҆ припѣ́въ: И҆спо́лнихомсѧ заꙋ́тра:

и҆ па́ки то́йже самогла́сенъ. припѣ́въ в҃-й: И҆ бꙋ́ди свѣ́тлость: и҆ мч҃нченъ:

Сла́ва, и҆ ны́нѣ, бг҃оро́диченъ: Тѧ̀ бж҃їю мт҃рь:

А҆́ще ли бꙋ́детъ ст҃а́гѡ на ᲂу҆́трени, на стїхо́внѣ Сла́ва, глаго́лемъ сла́ва, ст҃а́гѡ: И҆ ны́нѣ, бг҃оро́диченъ.

Посе́мъ настоѧ́тель, и҆лѝ чте́цъ глаго́летъ: Бл҃го є҆́сть и҆сповѣ́датисѧ гдⷭ҇еви: два́жды.

Трист҃о́е, и҆ мета̑нїѧ трѝ. По Ѻ҆́ч҃е на́шъ: І҆ере́й возгла́съ.

и҆ мы̀ глаго́лемъ тропа́рь: Въ хра́мѣ стоѧ́ще сла́вы твоеѧ̀:

Гдⷭ҇и поми́лꙋй, м҃, кро́ткимъ гла́сомъ.

Та́же, Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче.

І҆ере́й: Сы́й бл҃гослове́нъ хрⷭ҇то́съ бг҃ъ на́шъ:

и҆ мы̀ глаго́лемъ: Нбⷭ҇ный цр҃ю̀:

Посе́мъ воздѣ́вши рꙋ́цѣ, ста́немъ молѧ́щесѧ въ себѣ̀, глаго́люще мл҃твꙋ прпⷣбнагѡ ѻ҆тца̀ на́шегѡ є҆фре́ма, раздѣлѧ́юще ю҆̀ на трѝ ча́сти, ꙗ҆́коже предписа́сѧ, творѧ́ще покло́ны г҃: Гдⷭ҇и и҆ влⷣко живота̀ моегѡ̀: и҆ та́кѡ во є҆ди́но всѝ преклонѧ́емъ колѣ̑на. Та́же па́ки воста́вше, глаго́лемъ: Дꙋ́хъ же цѣломꙋ́дрїѧ: и҆ покло́нъ є҆ди́нъ. Посе́мъ: Є҆́й гдⷭ҇и цр҃ю̀: и҆ покло́нъ є҆ди́нъ, предварѧ́ющꙋ и҆гꙋ́менꙋ, и҆лѝ є҆кклисїа́рхꙋ. И҆ по си́хъ твори́мъ и҆ про́чихъ, в҃і, и҆злегка̀, ᲂу҆томле́нїѧ ра́ди, на ни́хже глаго́лемъ въ та́йнѣ: Бж҃е ѡ҆чи́сти мѧ̀ грѣ́шнаго. Послѣди́ же глаго́лемъ въ себѣ̀ всю̀ вышепи́саннꙋю мл҃твꙋ во є҆ди́но: Гдⷭ҇и и҆ влⷣко живота̀ моегѡ̀: и҆ покло́нъ вели́кїй.

И҆ по є҆́же воста́ти на́мъ, начина́етъ предстоѧ́тель: Прїиди́те поклони́мсѧ, три́жды: и҆ мета̑нїѧ г҃. ᲂу҆чине́нный чте́цъ чте́тъ ча́съ пе́рвый, по ѻ҆бы́чаю. ѱало́мъ є҃: Глаго́лы моѧ̑ внꙋшѝ гдⷭ҇и: и҆ про́чыѧ два̀ ѱалма̀. Посе́мъ, Сла́ва, и҆ ны́нѣ, а҆ллилꙋ́їа, три́жды, и҆ мета̑нїѧ трѝ.

[зрѝ] Подоба́етъ вѣ́дати: Ꙗ҆́кѡ во всѧ̑ понедѣ́льники ст҃ы́ѧ м҃-цы, на а҃-мъ часѣ̀ каѳі́смы не стїхосло́вимъ. Въ про́чыѧ же дни̑ стїхосло́вимъ каѳі́смꙋ, и҆ твори́мъ на ко́емждо а҆нтїфѡ́нѣ мета̑нїѧ г҃. Та́кожде и҆ въ пѧто́къ, а҃-й ча́съ и҆ ѳ҃-й без̾ каѳі́смы.

Оу҆чине́нный же чте́цъ, и҆лѝ і҆ере́й, ста́въ средѝ цр҃кве, пое́тъ тропа́рь, на гла́съ ѕ҃: Заꙋ́тра ᲂу҆слы́ши гла́съ мо́й, цр҃ю̀ мо́й, и҆ бж҃е мо́й:

И҆ мы̀ пое́мъ велегла́снѡ то́жде, на ѻ҆́ба ли̑ка, три́жды. Предначина́ющїй ли́къ, два́жды: а҆ дрꙋгі́й, є҆ди́ножды.

Глаго́летъ же и҆ стїхѝ пѣве́цъ: въ ни́хже мы̀ твори́мъ колѣнопреклонє́нїѧ на зе́млю. Є҆гда́ же ли́къ пое́тъ, тогда̀ ѻ҆́нъ покланѧ́етсѧ:

Сті́хъ а҃-й: Глаго́лы моѧ̑ внꙋшѝ гдⷭ҇и:

Сті́хъ в҃-й: Ꙗ҆́кѡ къ тебѣ̀ помолю́сѧ гдⷭ҇и. И҆ глаго́летъ, Сла́ва: Посе́мъ чте́цъ, И҆ ны́нѣ, бг҃оро́диченъ: Что́ тѧ нарече́мъ, ѽ бл҃года́тнаѧ! и҆ мета̑нїѧ г҃.

Та́же пое́мъ: Стѡпы̀ моѧ̑ напра́ви но словесѝ твоемꙋ̀, и҆ да не ѡ҆блада́етъ мно́ю всѧ́кое беззако́нїе. И҆ дрꙋгі́й ли́къ пое́тъ то́жде.

Та́же, И҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑. Па́ки то́жде. Лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои̑мъ. Па́ки то́жде.

Сїе́ же глаго́лемъ. три́жды, велегла́снѡ и҆ ко́снѡ: Да и҆спо́лнѧтсѧ ᲂу҆ста̀ моѧ̑:

Посе́мъ трист҃о́е, мета̑нїѧ г҃. По Ѻ҆́ч҃е на́шъ, і҆ере́й возгла́съ.

И҆ глаго́лемъ бг҃оро́диченъ: Въ понедѣ́льникъ ᲂу҆́бѡ, и҆ во вто́рникъ, и҆ четверто́къ: Пресла́внꙋю бж҃їю мт҃рь: Въ сре́дꙋ же и҆ пѧто́къ, Ско́рѡ предварѝ пре́жде да́же не порабо́тимсѧ:

Гдⷭ҇и поми́лꙋй, м҃:

и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче.

І҆ере́й: Бж҃е ᲂу҆ще́дри ны̀ и҆ бл҃гослови́ ны:

и҆ твори́мъ покло́ны г҃ вели̑кїѧ, глаго́люще мл҃твꙋ: Гдⷭ҇и и҆ влⷣко: и҆ про́чихъ, в҃і, ꙗ҆́кѡ предписа́сѧ.

и҆ пото́мъ начина́етъ предстоѧ́тель, и҆лѝ ᲂу҆чине́нный чте́цъ, трист҃о́е. и҆ мета̑нїѧ г҃. По Ѻ҆́ч҃е на́шъ, возгла́съ, и҆ Гдⷭ҇и поми́лꙋй, в҃і.

Та́же мл҃тва: Хрⷭ҇тѐ свѣ́те и҆́стинный: глаго́летсѧ ѿ предстоѧ́телѧ.

Посе́мъ і҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Сла́ва, и҆ ны́нѣ: Гдⷭ҇и поми́лꙋй, три́жды: бл҃гословѝ.

и҆ ѿпꙋ́стъ. Та́же многолѣ́тное: и҆ цѣлꙋ́емъ ст҃ы̑ѧ і҆кѡ̑ны.

По ѿпꙋ́стѣ же и҆схо́димъ въ притво́ръ, и҆ та́мѡ глаго́лютсѧ ѻ҆бы̑чныѧ мл҃твы, и҆ чтꙋ́тсѧ ѡ҆глашє́нїѧ прпⷣбнагѡ ѻ҆тца̀ на́шегѡ ѳео́дѡра стꙋді́та: чтꙋ́тсѧ же непремѣ́ннѡ во всѧ́кꙋю сре́дꙋ и҆ пѧто́къ ст҃ы́ѧ м҃-цы ѿ настоѧ́телѧ и҆лѝ є҆кклисїа́рха, ꙗ҆́коже предписа́сѧ, ли́стъ тч҃в на ѡ҆бор.

и҆ быва́етъ соверше́нный ѿпꙋ́стъ.

Си́це да быва́етъ ᲂу҆́тренѧ, и҆ ча́съ а҃-й во всю̀ ст҃ꙋ́ю м҃-цꙋ непремѣ́ннѡ. По ѿпꙋще́нїи же и҆сходѧ́ще и҆з̾ цр҃кве, и҆́демъ со всѧ́кимъ безмо́лвїемъ въ кє́ллїи своѧ̑, и҆лѝ на слꙋ́жбꙋ: и҆ не подоба́етъ на́мъ бесѣ̑ды твори́ти дрꙋ́гъ со дрꙋ́гомъ на монастырѣ̀, въ пꙋтѝ, ᲂу҆держа́но бо сїѐ ѿ ст҃ы́хъ ѻ҆тє́цъ.

При часѣ́ же г҃-мъ днѐ: Оу҆дарѧ́етъ кандиловжига́тель въ би́ло дово́льнѡ, и҆ собира́емсѧ въ цр҃ковь, и҆ творѧ́ще пре́жде нача́ла пѣ́нїѧ, кі́йждо на́съ, прѧ́мѡ ст҃ы́хъ двере́й, покло́ны г҃, глаго́люще си́це: Бж҃е, ѡ҆чи́сти мѧ̀ грѣ́шнаго. та́кожде и҆ и҆сходѧ́ще и҆з̾ цр҃кве. Си́це твори́мъ по всѧ̑ дни̑.

[Въ сꙋббѡ́тꙋ же, и҆ недѣ́лю, твори́мъ покло́ны ѻ҆бы̑чныѧ.

и҆ цѣлꙋ́емъ ст҃ы̑ѧ і҆кѡ̑ны. и҆ па́ки на ѻ҆́ба ли̑ка по є҆ди́номꙋ ма́лꙋ покло́нꙋ.

Та́же бл҃гослови́вшꙋ і҆ере́ю, начина́етъ предстоѧ́тель, А҆ми́нь. Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: трист҃о́е, и҆ мета̑нїѧ г҃.

Кандиловжига́тель же взе́мъ бл҃гослове́нїе ᲂу҆ настоѧ́телѧ, и҆зше́дъ ᲂу҆дарѧ́етъ въ кампа́нъ три́жды. По Ѻ҆́ч҃е на́шъ, і҆ере́й возгла́съ. Гдⷭ҇и поми́лꙋй, в҃і.

Та́же, Прїиди́те поклони́мсѧ, три́жды. и҆ мета̑нїѧ г҃.

и҆ глаго́летъ чте́цъ ча́съ г҃-й по ѻ҆бы́чаю, триѱа́лмный. Въ концѣ́ же г҃-гѡ ѱалма̀, Сла́ва, и҆ ны́нѣ, а҆ллилꙋ́їа, и҆ мета̑нїѧ г҃.

Та́же стїхологисꙋ́емъ каѳі́смꙋ рѧдовꙋ́ю, и҆ на ко́емждо а҆нтїфѡ́нѣ твори́мъ мета̑нїѧ трѝ.

По стїхосло́вїи же ᲂу҆чине́нный чте́цъ, и҆лѝ і҆ере́й, ста́въ средѝ цр҃кве глаго́летъ тропа́рь, гла́съ ѕ҃: Гдⷭ҇и, и҆́же прест҃а́го твоего̀ дх҃а:

То́йже и҆ мы̀ пое́мъ, въ то́йже гла́съ, на ѻ҆́ба ли̑ка. Є҆ди́нъ ли́къ, два́жды: а҆ дрꙋгі́й, є҆ди́ножды. Глаго́летъ же и҆ стїхѝ.

Сті́хъ а҃: Се́рдце чи́сто сози́жди во мнѣ̀ бж҃е:

Сті́хъ в҃: Не ѿве́ржи менѐ ѿ лица̀ твоегѡ̀:

И҆ є҆гда̀ ѻ҆́нъ пое́тъ, тогда̀ мы̀ твори́мъ колѣнопреклоне́нїе до землѝ. Є҆гда́ же ли́къ пое́тъ, тогда̀ ѻ҆́нъ прекланѧ́етсѧ до землѝ. Та́кожде и҆ на про́чыѧ два̀ стїха̀: и҆ рече́тъ, Сла́ва. Та́же, и҆ ны́нѣ, бг҃оро́диченъ: Бцⷣе, ты̀ є҆сѝ лоза̀: и҆ мета̑нїѧ г҃.

И҆ а҆́бїе чте́мъ въ лѣ́ствичникѣ. Начина́етъ честѝ са́мъ предстоѧ́тель, и҆лѝ а҃-й пѣве́цъ десна́гѡ ли́ка.

[Н]ачина́етъ же ѿ ны́нѣ ᲂу҆чине́нный мона́хъ возбꙋжда́ти бра́тїю во всю̀ ст҃ꙋ́ю м҃-цꙋ, ѡ҆бхо́дитъ же ти́хѡ, и҆ призира́етъ на спѧ́щыѧ, и҆ возставлѧ́етъ ко слы́шанїю по послѣ́довавшемꙋ ѡ҆́бразꙋ, ꙗ҆́кѡ предписа́сѧ въ нача́лѣ ᲂу҆ста́ва.

По чте́нїи же глаго́лемъ: А҆ми́нь. Гдⷭ҇ь бг҃ъ бл҃гослове́нъ: Трист҃о́е, и҆ мета̑нїѧ г҃. По Ѻ҆́ч҃е на́шъ, і҆ере́й возгла́съ, и҆ глаго́лемъ тропа́рь, гла́съ и҃: Бл҃гослове́нъ є҆сѝ хрⷭ҇тѐ бж҃е на́шъ:

Сла́ва, Ско́рое и҆ и҆звѣ́стное: И҆ ны́нѣ, Наде́жда и҆ предста́тельство: Гдⷭ҇и поми́лꙋй, м҃, и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: и҆ покло́нъ. И҆́менемъ гдⷭ҇нимъ:

І҆ере́й: Бж҃е ᲂу҆ще́дри ны̀: и҆ твори́мъ покло́ны, ꙗ҆́кѡ предписа́сѧ.

и҆ а҆́бїе начина́етъ предстоѧ́тель мл҃твꙋ: Влⷣко бж҃е ѻ҆́ч҃е вседержи́телю:

Кандиловжига́тель же сотвори́въ ѻ҆бы́чный покло́нъ предстоѧ́телю, и҆ ше́дъ ᲂу҆дарѧ́етъ въ кампа́нъ, ше́сть кра́тъ. По сконча́нїи же мл҃твы, глаго́летъ: Прїиди́те поклони́мсѧ: три́жды. и҆ мета̑нїѧ г҃.

Та́же ча́съ ѕ҃, ꙗ҆́кѡ ѻ҆бы́чай, и҆ по концѣ̀, Сла́ва, и҆ ны́нѣ, а҆ллилꙋ́їа три́жды. и҆ мета̑нїѧ г҃.

и҆ стїхосло́вимъ каѳі́смꙋ рѧдовꙋ́ю, и҆ по ко́емждо а҆нтїфѡ́нѣ а҆ллилꙋ́їа, три́жды: и҆ мета̑нїѧ г҃.

По стїхосло́вїи же чте́цъ пое́тъ тропа́рь, гла́съ в҃: И҆́же въ шесты́й де́нь же и҆ ча́съ: То́й же и҆ мы̀ пое́мъ, ꙗ҆́кѡ предписа́сѧ.

Глаго́летъ же чте́цъ и҆ стїхѝ:

Сті́хъ а҃: Внꙋшѝ бж҃е мл҃твꙋ мою̀:

Сті́хъ в҃: а҆́зъ къ бг҃ꙋ воззва́хъ: И҆ рече́тъ: Сла́ва:

Та́же, И҆ ны́нѣ, бг҃оро́диченъ: Ꙗ҆́кѡ не и҆́мамы дерзнове́нїѧ: и҆ мета̑нїѧ г҃:

Посе́мъ тропа́рь прⷪ҇ро́чества, ꙗ҆́коже ꙗ҆вле́но є҆́сть въ сре́дꙋ и҆ пѧто́къ сы́рныѧ седми́цы.

Та́же прокі́менъ паремїѝ. и҆ чте́тсѧ прⷪ҇ро́чество и҆са́їино. И҆ па́ки и҆́нъ прокі́менъ паремїѝ.

и҆ чте́нїе въ лѣ́ствицѣ, и҆ пото́мъ, Ско́рѡ да предварѧ́тъ ны̀: Трист҃о́е, и҆ мета̑нїѧ г҃. По Ѻ҆́ч҃е на́шъ на́шъ, і҆ере́й возгла́съ.

Та́же глаго́лемъ тропа́рь, гла́съ в҃: Сп҃се́нїе содѣ́лалъ є҆сѝ: Сла́ва: Пречⷭ҇томꙋ твоемꙋ̀ ѡ҆́бразꙋ: и҆ покло́нъ. И҆ ны́нѣ, Млⷭ҇рдїѧ сꙋ́щи и҆сто́чникъ:

[Въ сре́дꙋ же и҆ пѧто́къ глаго́лемъ крⷭ҇тобг҃оро́диченъ: Препросла́влена є҆сѝ бцⷣе дв҃о:

Гдⷭ҇и поми́лꙋй, м҃. и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ:

І҆ере́й: Бж҃е ᲂу҆ще́дри ны̀: и҆ твори́мъ г҃ покло́ны вели̑кїѧ съ мл҃твою, и҆ про́чихъ в҃і, ꙗ҆́коже и҆з̾ѧви́сѧ.

И҆ посе́мъ, глаго́летъ предстоѧ́тель коне́чное трист҃о́е, и҆ мета̑нїѧ г҃. По Ѻ҆́ч҃е на́шъ, Гдⷭ҇и поми́лꙋй, в҃і.

Та́же і҆ере́й: Сла́ва тебѣ̀ хрⷭ҇тѐ бж҃е:

И҆ мы̀, Сла́ва, и҆ ны́нѣ, ѿпꙋ́стъ. Помина́етъ ст҃а́го, є҆го́же є҆́сть де́нь. и҆ пое́мъ многолѣ́тны: и҆ цѣлꙋ́емъ ст҃ы̑ѧ і҆кѡ̑ны, и҆ на пе́рсѣхъ на́шихъ чⷭ҇тны́й крⷭ҇тъ, творѧ́ще кі́йждо на́съ по трѝ покло́ны. Сицевы́й ѡ҆́бразъ и҆ чи́нъ до́лженъ є҆́сть быва́ти и҆ въ про́чыѧ дни̑ ст҃ы́ѧ вели́кїѧ м҃-цы г҃-гѡ часа̀, и҆ ѕ҃-гѡ.

[зрѝ] А҆ и҆дѣ́же росхо́да не быва́етъ, по мл҃твѣ: Бж҃е и҆ гдⷭ҇и си́лъ: и҆ а҆́бїе глаго́лемъ: Прїиди́те поклони́мсѧ три́жды: и҆ ѳ҃-й ча́съ.

А҆ и҆дѣ́же росхо́дъ быва́етъ, ѡ҆ часѣ̀ ѳ҃-мъ: Кандиловжига́тель взе́мъ бл҃гослове́нїе ᲂу҆ настоѧ́телѧ ᲂу҆дарѧ́етъ въ вели́кое дре́во, и҆ собра́вшесѧ въ цр҃ковь, Бл҃гослови́вшꙋ і҆ере́ю, пое́мъ ѳ҃-й ча́съ: глаго́лемъ трист҃о́е: и҆ мета̑нїѧ г҃.

По Ѻ҆́ч҃е на́шъ, і҆ере́й возгла́съ: Гдⷭ҇и поми́лꙋй, в҃і. Прїиди́те поклони́мсѧ, три́жды. и҆ мета̑нїѧ г҃.

Параекклисїа́рхъ же и҆зше́дъ ᲂу҆дарѧ́етъ въ кампа́нъ, ѳ҃ кра́тъ, и҆ пое́мъ ча́съ ѳ҃-й, триѱа́лмный. Въ коне́цъ же тре́тїѧгѡ ѱалма̀, на А҆ллилꙋ́їа, мета̑нїѧ г҃. и҆ стїхосло́вимъ каѳі́смꙋ рѧдовꙋ́ю: и҆ по ко́емждо а҆нтїфѡ́нѣ, твори́мъ мета̑нїѧ г҃.

По стїхосло́вїи же ᲂу҆чине́нный чте́цъ средѝ цр҃кве пое́тъ тропа́рь на гла́съ и҃: И҆́же въ девѧ́тый ча́съ:

То́йже и҆ мы̀ пое́мъ въ то́йже гла́съ, на ѻ҆́ба ли̑ка, три́жды.

Глаго́летъ же и҆ стїхѝ:

Сті́хъ а҃: Да прибли́житсѧ мл҃тва моѧ̀:

Сті́хъ в҃: Да вни́детъ проше́нїе моѐ: И҆ творѧ́ще покло́ны въ си́хъ.

Сла́ва, и҆ ны́нѣ: И҆́же на́съ ра́ди рожде́йсѧ ѿ дв҃ы: мета̑нїѧ г҃, и҆ чтє́нїѧ въ лѣ́ствицѣ.

И҆ по чте́нїи, Не преда́ждь на́съ до конца̀: Трист҃о́е, и҆ мета̑нїѧ г҃. По Ѻ҆́ч҃е на́шъ, і҆ере́й возгла́съ, и҆ глаго́лемъ тропарѝ сїѧ̑, гла́съ и҃: Ви́дѧ разбо́йникъ:

Сла́ва: Посредѣ̀ двою̀ разбѡ́йникꙋ: И҆ ны́нѣ: А҆́гнца и҆ па́стырѧ и҆ сп҃са мі́ра:

Гдⷭ҇и поми́лꙋй, м҃. И҆́же на всѧ́кое вре́мѧ:

Гдⷭ҇и поми́лꙋй, три́жды:

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

И҆́менемъ гдⷭ҇нимъ:

Та́же і҆ере́й: Бж҃е ᲂу҆ще́дри ны̀:

и҆ твори́мъ трѝ вели̑кїѧ покло́ны, глаго́люще въ себѣ̀ и҆ пред̾ѧвле́ннꙋю мл҃твꙋ прпⷣбнагѡ є҆фре́ма. Про́чихъ же в҃і не твори́мъ. И҆ глаго́лемъ мл҃твꙋ: Влⷣко гдⷭ҇и і҆и҃се хрⷭ҇тѐ бж҃е на́шъ:

и҆ а҆́бїе пое́тъ предначина́ѧй ли́къ, во гла́съ и҃: Во црⷭ҇твїи твое́мъ помѧнѝ на́съ гдⷭ҇и:

И҆ глаго́летъ па́ки то́йже ли́къ: Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.

Припѣ́въ: Помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.

И҆ а҆́бїе в҃-й ли́къ: Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ. Помѧнѝ на́съ гдⷭ҇и: И҆ про́чыѧ бл҃жє́нны со сладкопѣ́нїемъ въ то́йже гла́съ, велегла́снѡ и҆ ко́снѡ.

Сла́ва: Помѧнѝ на́съ гдⷭ҇и: И҆ ны́нѣ: Помѧнѝ на́съ гдⷭ҇и:

Та́же соше́дшесѧ ѻ҆́ба ли̑ка, и҆ пое́мъ согла́снѡ высоча́йшимъ гла́сомъ, ѿкрове́нными глава́ми: Помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.

И҆ покло́нъ є҆ди́нъ всѝ ра́внѡ до землѝ.

И҆ па́ки повы́шшимъ гла́сомъ: Помѧнѝ на́съ влⷣко, є҆гда̀ прїи́деши во црⷭ҇твїи твое́мъ. И҆ покло́нъ до землѝ.

Та́же и҆ є҆щѐ повы́шшимъ гла́сомъ: Помѧнѝ на́съ ст҃ы́й, є҆гда̀ прїи́деши во црⷭ҇твїи твое́мъ. И҆ покло́нъ до землѝ.

И҆ посе́мъ глаго́лемъ: Ли́къ нбⷭ҇ный: и҆ про́чее:

Сла́ва: Ли́къ ст҃ы́хъ а҆́гг҃лъ и҆ а҆рха̑гг҃лъ: И҆ ны́нѣ: Вѣ́рꙋю во є҆ди́наго бг҃а:

Ѡ҆сла́би, ѡ҆ста́ви: Ѻ҆́ч҃е на́шъ: Та́же конда́къ днѐ, и҆ хра́ма.

А҆́ще ли хра́мъ хрⷭ҇то́въ, глаго́лемъ пре́жде хра́ма хрⷭ҇то́ва, и҆ хра́ма ст҃а́гѡ, и҆лѝ ст҃ы́ѧ: та́же днѐ, и҆ ст҃а́гѡ рѧдова́гѡ, є҆гѡ́же є҆́сть де́нь. Сла́ва: Со ст҃ы́ми ᲂу҆поко́й: И҆ ны́нѣ: хра́ма бцⷣы: и҆лѝ, Предста́тельство хрⷭ҇тїа́нъ: Гдⷭ҇и поми́лꙋй, м҃:

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ:

и҆ глаго́летъ і҆ере́й: Бж҃е ᲂу҆ще́дри ны̀:

и҆ покло́ны г҃ вели̑кїѧ, и҆ про́чыѧ в҃і, ꙗ҆́коже мно́гажды ᲂу҆каза́сѧ.

Параекклисїа́рхъ же, покло́нъ сотвори́въ настоѧ́телю, и҆ бл҃гослове́нїе взе́мъ, и҆ ше́дъ звони́тъ.

Та́же начина́етъ предстоѧ́тель, Прїиди́те поклони́мсѧ, три́жды: и҆ мета̑нїѧ г҃:

и҆ ᲂу҆чине́нный чте́цъ глаго́летъ ѱало́мъ ѻ҆бы́чный: Бл҃гословѝ дꙋшѐ моѧ̀ гдⷭ҇а: ти́химъ и҆ кро́ткимъ гла́сомъ.

І҆ере́й же глаго́летъ ѻ҆бы̑чныѧ мл҃твы вечє́рнїѧ пред̾ ст҃ы́ми враты̀.

По сконча́нїи же ѱалма̀, Сла́ва, и҆ ны́нѣ, а҆ллилꙋ́їа, три́жды, и҆ мета̑нїѧ г҃.

Та́же є҆ктенїа̀ вели́каѧ: и҆ пото́мъ стїхосло́вимъ каѳі́смꙋ и҃і: Ко гдⷭ҇ꙋ внегда̀ скорбѣ́ти мѝ: и҆ по ко́емждо а҆нтїфѡ́нѣ, Сла́ва, и҆ ны́нѣ, а҆ллилꙋ́їа, три́жды: и҆ мета̑нїѧ г҃.

Та́же пое́мъ: Гдⷭ҇и воззва́хъ, во гла́съ подо́бна трїѡ́ди.

и҆ пое́мъ стїхи̑ры на ѕ҃: Трїѡ́ди подо́бна два̀, кѵ́ръ і҆ѡ́сифа, и҆ є҆ди́нъ, кѵ́ръ ѳео́дѡра стꙋді́та: и҆ мине́и ст҃а́гѡ, подо́бны г҃:

Сла́ва, ст҃а́гѡ, а҆́ще є҆́сть: а҆́ще же нѝ, Сла́ва и҆ ны́нѣ, бг҃оро́диченъ, гла́съ и҆ подо́бенъ то́йже.

Та́же, Свѣ́те ти́хїй: и҆ глаго́летсѧ прокі́менъ паремїѝ, гла́съ ѕ҃. и҆ чте́нїе бытїѧ̀:

Пото́мъ и҆́ный прокі́менъ паремїѝ, гла́съ є҃. и҆ чте́нїе при́тчей.

Поне́же во всю̀ вели́кꙋю м҃-цꙋ ве́чера чте́тсѧ є҆ди́на паремїа̀, бытїѧ̀, в҃-ѧ при́тчей.

Та́же предстоѧ́тель: Сподо́би гдⷭ҇и въ ве́черъ: и҆ мета̑нїѧ г҃.

І҆ере́й: И҆спо́лнимъ вече́рнюю мл҃твꙋ:

И҆ по возгла́сѣ, соше́дшесѧ ѻ҆́ба ли̑ка вкꙋ́пѣ, пое́мъ трїѡ́ди самогла́сенъ днѐ, два́жды, гла́съ г҃: Пости́мсѧ посто́мъ прїѧ́тнымъ: и҆ мч҃нченъ въ то́йже гла́съ.

Сла́ва, ст҃а́гѡ, а҆́ще є҆́сть: а҆́ще же нѝ, Сла́ва, и҆ ны́нѣ, трїѡ́ди.

И҆ твори́тъ канѡна́рхъ ѻ҆бы́чный покло́нъ въ ли́ки: та́кожде и҆ ѻ҆́ба ли̑ка проти́въ себѐ, и҆ ѿстꙋпа́ютъ на мѣ́ста своѧ̑. Посе́мъ, Ны́нѣ, ѿпꙋща́еши: Трист҃о́е, и҆ мета̑нїѧ г҃. По Ѻ҆́ч҃е на́шъ, і҆ере́й возгла́съ и҃ по А҆ми́нѣ, Бцⷣе дв҃о ра́дꙋйсѧ: Покло́нъ є҆ди́нъ.

Сла́ва, Крⷭ҇ти́телю хрⷭ҇то́въ: И҆ покло́нъ. И҆ ны́нѣ, Моли́те за ны̀: И҆ покло́нъ.

Та́же, Под̾ твоѐ бл҃гоꙋтро́бїе: без̾ покло́на. Гдⷭ҇и поми́лꙋй, м҃, кро́ткимъ гла́сомъ.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ:

І҆ере́й: Сы́й бл҃гослове́нъ: И҆ мл҃тва: Нбⷭ҇ный цр҃ю̀:

И҆ твори́мъ ѻ҆бы̑чныѧ ѕ҃і покло́ны съ мл҃твою, ꙗ҆́коже мно́гажды предписа́сѧ. И҆ по си́хъ начина́етъ предстоѧ́тель трист҃о́е, и҆ мета̑нїѧ г҃. По Ѻ҆́ч҃е на́шъ, Гдⷭ҇и поми́лꙋй, в҃і.

и҆ глаго́летъ предстоѧ́тель мл҃твꙋ: Всест҃а́ѧ трⷪ҇це:

И҆ Бꙋ́ди и҆́мѧ гдⷭ҇не, три́жды: и҆ мета̑нїѧ г҃:

и҆ чте́цъ, Сла́ва, и҆ ны́нѣ: и҆ ѱало́мъ: Бл҃гословлю̀ гдⷭ҇а на всѧ́кое вре́мѧ:

Посе́мъ, досто́йно є҆́сть: и҆ покло́нъ.

Посе́мъ дрꙋгі́й ли́къ пое́тъ: Сла́ва, и҆ ны́нѣ, Гдⷭ҇и поми́лꙋй, три́жды, бл҃гословѝ. и҆ ѿпꙋ́стъ. и҆ многолѣ́тны.

И҆сходѧ́ще же въ притво́ръ, пое́мъ, ꙗ҆́коже ѻ҆бы́чай, стїхи́рꙋ хра́ма ст҃а́гѡ. Глаго́лютсѧ же ѿ і҆ере́а ѻ҆бы̑чныѧ мл҃твы, и҆ помина́етъ ᲂу҆со́пшыѧ: и҆ быва́етъ соверше́нный ѿпꙋ́стъ.

Сїѐ послѣ́дованїе быва́етъ свѣти́льничнагѡ, во все́й ст҃ѣ́й м҃-цѣ, не сꙋ́щей преждеѡсщ҃е́ннѣй:

Не прїѧ́хомъ бо твори́ти преждеѡсщ҃е́нныѧ, да́же до среды̀, за є҆́же пости́тисѧ по преда́нїю всемꙋ̀ бра́тствꙋ: могꙋ́щїи же да пребꙋ́дꙋтъ постѧ́щесѧ до пѧтка̀. Ст҃ы́ѧ же горы̀ тѵ́пїкъ въ пе́рвый ᲂу҆́бѡ де́нь ѿню́дъ не повелѣва́етъ ꙗ҆́сти. Во вто́рникъ же, въ сре́дꙋ и҆ въ четверто́къ, ꙗ҆́сти подоба́етъ по є҆ди́ной ли́трѣ хлѣ́ба, и҆ во́дꙋ, и҆ и҆́но ничто́же, ра́звѣ со́ли тре́бꙋѧ съ хлѣ́бомъ.

[зрѝ] Подоба́етъ вѣ́дати: Ꙗ҆́кѡ въ ла́ѵрѣ прпⷣбнагѡ ѻ҆тца̀ на́шегѡ са́ввы, не пое́мъ повече́рїй въ цр҃кви, но въ ке́ллїахъ пое́мъ кі́йждо: та́кѡ бо прїѧ́хомъ. Во ѻ҆бщежи́тїѧхъ же палесті́ны пою́тсѧ повечє́рїѧ си́це:

Ѡ҆ часѣ̀ девѧ́томъ. Вхо́дитъ свѣщевжига́тель, и҆ сотвори́въ покло́нъ предстоѧ́телю, и҆ ше́дъ бїе́тъ въ би́ло в҃і, и҆ собира́емсѧ всѝ въ цр҃ковь: и҆ сотвори́вше кі́йждо вчинє́нныѧ покло́ны, и҆ ма́лѡ сѣ́дше, во є҆́же собра́тисѧ всѣ̑мъ, воста́въ і҆ере́й твори́тъ покло́нъ настоѧ́телю, и҆ ста́въ на ѻ҆бы́чномъ мѣ́стѣ, глаго́летъ: Бл҃гослове́нъ бг҃ъ на́шъ: и҆ мы̀ глаго́лемъ: тебѣ̀. Цр҃ю̀ нбⷭ҇ный: трист҃о́е, и҆ мета̑нїѧ г҃, ꙗ҆́кѡ ѻ҆бы́чно: подо́бнѣ, и҆ на Прїиди́те поклони́мсѧ, мета̑нїѧ г҃: и҆ а҆́бїе глаго́лемъ ѱало́мъ ѯ҃ѳ: Бж҃е въ по́мощь мою̀ вонмѝ: [В]ъ про́чихъ же седми́цахъ глаго́лемъ се́й ѱало́мъ по мл҃твѣ: Влⷣко бж҃е ѻ҆́ч҃е: Та́же начина́емъ вели́кїй канѡ́нъ, творѧ́ще и҆̀ на ча̑сти четы́ре со і҆рмосо́мъ, ꙗ҆́кѡ и҆спо́лнитисѧ є҆мꙋ̀ въ четверто́къ ве́чера, гла́съ ѕ҃, і҆рмосы̀ по два́жды. Твори́мъ же на кі́йждо тропа́рь мета̑нїѧ г҃, глаго́люще настоѧ́щїй припѣ́въ: Поми́лꙋй мѧ̀ бж҃е, поми́лꙋй мѧ̀. По ѕ҃-й пѣ́сни,

Конда́къ, вели́кагѡ канѡ́на. Дꙋшѐ моѧ̀, дꙋшѐ моѧ̀, воста́ни, что̀ спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ хрⷭ҇то́съ бг҃ъ, вездѣ̀ сы́й, и҆ всѧ̑ и҆сполнѧ́ѧй.

По ѳ҃-й пѣ́сни, послѣдѝ і҆рмо́съ: Безсѣ́меннагѡ зача́тїѧ:

По сконча́нїи же канѡ́на начина́емъ ѱало́мъ д҃: Внегда̀ призва́ти мѝ: та́кожде и҆ про́чыѧ ѱалмы̀ повече́рїѧ. На А҆ллилꙋ́їа мета̑нїѧ г҃.

и҆ а҆́бїе начина́емъ в҃-ю статїю̀: Къ тебѣ̀ гдⷭ҇и воздвиго́хъ дꙋ́шꙋ мою̀: и҆ про́чыѧ два̀ ѱалма̀: глаго́люще въ коне́цъ си́хъ а҆ллилꙋ́їа, и҆ твори́мъ мета̑нїѧ г҃.

Та́же начина́етъ а҃-й ли́къ: Съ на́ми бг҃ъ:

Вторы́й ли́къ то́йжде: и҆ глаго́лемъ стїхѝ велегла́снѡ и҆ со сладкопѣ́нїемъ, кі́йждо ли́къ сво́й сті́хъ: Подо́бнѣ, и҆ Безпло́тное є҆стество̀: Вѣ́рꙋю же во є҆ди́наго бг҃а, глаго́лемъ ни́зкимъ гла́сомъ.

Та́же наче́ншїй ли́къ: Прест҃а́ѧ влⷣчце бцⷣе, молѝ ѡ҆ на́съ:

И҆ твори́тъ дрꙋгі́й ли́къ покло́нъ. И҆ востаю́щꙋ дрꙋго́мꙋ ли́кꙋ и҆ ѿвѣщава́ющꙋ, твори́тъ пе́рвый ли́къ покло́нъ. Та́кожде и҆ на про́чыѧ стїхѝ моли́тєльныѧ всѧ̑.

Є҆гда́ же рече́мъ: Бж҃е ѡ҆чи́сти мѧ̀ грѣ́шнаго: три́жды, пое́мъ ѻ҆́ба ли̑ка ра́внѡ: И҆ покло́ны г҃.

Та́же трист҃о́е без̾ покло́нѡвъ.

и҆ глаго́лемъ настоѧ́щыѧ тропарѝ на гла́съ в҃, ꙗ҆̀же и҆ пое́мъ велегла́снѡ и҆ со сладкопѣ́нїемъ: Просвѣтѝ ѻ҆́чи моѝ хрⷭ҇тѐ бж҃е: Сла́ва, Застꙋ́пникъ дꙋшѝ моеѧ̀: И҆ ны́нѣ, Ꙗ҆́кѡ не и҆́мамы дерзнове́нїѧ:

Сꙋ́ть же и҆ и҆́ны тропарѝ, и҆̀же пою́тсѧ чрез̾ де́нь на гла́съ и҃, си́рѣчь во вто́рникъ и҆ четверто́къ ве́чера: Неви́димыхъ врагѡ́въ мои́хъ неꙋсыпа́нїе:

Сті́хъ: При́зри и҆ ᲂу҆слы́ши мѧ̀ гдⷭ҇и бж҃е мо́й: Ꙗ҆́кѡ стра́шенъ сꙋ́дъ тво́й гдⷭ҇и:

Сла́ва: Сле́зы мѝ да́ждь бж҃е: И҆ ны́нѣ, Непосты́днꙋю бцⷣе наде́ждꙋ твою̀: Гдⷭ҇и поми́лꙋй, м҃.

Сті́хъ ѿ і҆ере́а, и҆ мл҃тва: Гдⷭ҇и гдⷭ҇и, и҆збавле́й на́съ:

Та́же, Прїиди́те поклони́мсѧ, три́жды: и҆ глаго́лемъ ѱало́мъ н҃, и҆ р҃а:

И҆ мл҃твꙋ манассі́и царѧ̀: Гдⷭ҇и вседержи́телю бж҃е ѻ҆тє́цъ на́шихъ: Трист҃о́е, и҆ мета̑нїѧ г҃.

І҆ере́й: Ꙗ҆́кѡ твоѐ є҆́сть црⷭ҇тво:

и҆ по а҆ми́нѣ глаго́лемъ сїѧ̑ тропарѝ на гла́съ ѕ҃: Поми́лꙋй на́съ гдⷭ҇и: Сла́ва, Гдⷭ҇и поми́лꙋй на́съ: И҆ ны́нѣ, Млⷭ҇рдїѧ двє́ри: Гдⷭ҇и поми́лꙋй, м҃.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче.

І҆ере́й: Мл҃твами ст҃ы́хъ ѻ҆тє́цъ на́шихъ: и҆ мл҃тва: Влⷣко бж҃е ѻ҆́ч҃е вседержи́телю:

Прїиди́те поклони́мсѧ, три́жды. и҆ мета̑нїѧ г҃: и҆ Гдⷭ҇и ᲂу҆слы́ши мл҃твꙋ мою̀: и҆ Сла́ва въ вы́шнихъ бг҃ꙋ: Гдⷭ҇и прибѣ́жище бы́лъ є҆сѝ на́мъ: Сподо́би гдⷭ҇и въ но́щь сїю̀:

Та́же трист҃о́е, и҆ покло́ны г҃. Прест҃а́ѧ трⷪ҇це, поми́лꙋй на́съ: Ѻ҆́ч҃е на́шъ:

І҆ере́й: Ꙗ҆́кѡ твоѐ є҆́сть црⷭ҇тво:

Та́же пое́мъ велегла́снѡ, и҆ ко́снѡ, на гла́съ ѕ҃: Гдⷭ҇и си́лъ съ на́ми бꙋ́ди, и҆но́гѡ бо ра́звѣ тебѐ помо́щника въ ско́рбехъ не и҆́мамы, гдⷭ҇и си́лъ поми́лꙋй на́съ.

И҆ ѿвѣща́етъ то́жде дрꙋгі́й ли́къ. И҆ глаго́летъ наче́ншїй а҃ ли́къ,

Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ᲂу҆твержде́нїи си́лы є҆гѡ̀. И҆ тропа́рь: Гдⷭ҇и си́лъ съ на́ми бꙋ́ди:

Та́же то́йжде тропа́рь, дрꙋгі́й ли́къ на ко́емждо стїсѣ̀. По и҆сполне́нїи же пѧтѝ стїхѡ́въ, глаго́лютъ ѻ҆́ба ли̑ка вкꙋ́пѣ пе́рвый сті́хъ, и҆ тропа́рь:

Та́же начина́етъ наче́ншїй ли́къ:

Сла́ва: Гдⷭ҇и а҆́ще не бы́хомъ:

И҆ ны́нѣ: Мнѡ́гаѧ мно́жєства мои́хъ бцⷣе прегрѣше́нїй:

Всест҃а́ѧ бцⷣе: Всѐ ᲂу҆пова́нїе моѐ: Гдⷭ҇и поми́лꙋй, м҃.

и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ ѻ҆́тче.

І҆ере́й: Бж҃е ᲂу҆ще́дри ны̀:

и҆ твори́мъ ѕ҃і покло́нѡвъ, ꙗ҆́кѡ ѻ҆бы́чно, съ мл҃твою ст҃а́гѡ є҆фре́ма: и҆ твори́мъ кѡ́сныѧ, за є҆́же ᲂу҆равнѧ́тисѧ всѣ̑мъ.

Та́же начина́етъ предстоѧ́тель трист҃о́е, и҆ мета̑нїѧ г҃. По Ѻ҆́ч҃е на́шъ: Гдⷭ҇и поми́лꙋй, в҃і. и҆ глаго́лемъ мл҃твꙋ: Нескве́рнаѧ, небла́знаѧ: И҆ да́ждь на́мъ влⷣко: Пресла́внаѧ приснодв҃о: Оу҆пова́нїе моѐ ѻ҆ц҃ъ:

Посе́мъ глаго́летъ і҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Ли́къ: Гдⷭ҇и поми́лꙋй, три́жды. Бл҃гословѝ.

На́мъ же на зе́млю прикло́ншымсѧ, глаго́летъ предстоѧ́тель мл҃твꙋ, ꙗ҆́же въ вели́цѣй вече́рни: Влⷣко многомлⷭ҇тиве, гдⷭ҇и і҆и҃се хрⷭ҇тѐ бж҃е на́шъ:

По мл҃твѣ на́мъ воскло́ншымсѧ, твори́тъ предстоѧ́тель покло́нъ на зе́млю, глаго́лѧ бра́тїи: Бл҃гослови́те ѻ҆тцы̀ ст҃і́и, прости́те мѝ грѣ́шномꙋ, є҆ли̑ка согрѣши́хъ сло́вомъ, дѣ́ломъ, помышле́нїемъ и҆ всѣ́ми мои́ми чꙋ́вствы.

И҆ бра́тїѧ: Бг҃ъ прости́тъ тѝ ѻ҆́тче ст҃ы́й.

І҆ере́й же глаго́летъ: Помо́лимсѧ ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ +і҆мпера́торѣ нїкола́ѣ а҆леѯа́ндровичѣ+ всеѧ̀ рѡссі́и, и҆ прѡ́чаѧ, ꙗ҆́коже предписа́сѧ въ полꙋ́нощницѣ.

И҆ мы̀, Гдⷭ҇и поми́лꙋй, на всѧ́кїй сті́хъ.

И҆ послѣдѝ предстоѧ́тель глаго́летъ: Мл҃твами ст҃ы́хъ ѻ҆тє́цъ на́шихъ:

И҆ начина́ютъ бра́тїѧ ѿ десна́гѡ и҆ лѣ́вагѡ ли́ка по чи́нꙋ, є҆ди́нъ по є҆ди́номꙋ твори́ти покло́нъ, и҆ проси́ти и҆ прїѧ́ти проще́нїе, ѿ предстоѧ́телѧ, подо́бнѣ глаго́люще: Бл҃гословѝ ѻ҆́тче ст҃ы́й, и҆ прости́ мѧ грѣ́шнаго: и҆ прѡ́чаѧ. Стоѧ́щꙋ предстоѧ́телю посредѣ̀ цр҃кве, до́ндеже и҆спо́лнѧтсѧ всѧ̑. И҆ прїе́мше проще́нїе ѿ предстоѧ́телѧ, ѿхо́димъ въ кє́ллїи на́шѧ, глаго́люще мл҃твꙋ сїю̀: ꙗ҆́же и҆ ѿ всѧ́кагѡ человѣ́ка глаго́летсѧ: Ненави́дѧщихъ и҆ ѡ҆би́дѧщихъ на́съ: Се́й чи́нъ быва́етъ во всю̀ ст҃ꙋ́ю м҃-цꙋ въ повече́рїѧхъ. Подоба́етъ же є҆кклисїа́рхꙋ и҆ сїѐ смотри́ти прилѣ́жнѡ, да є҆гда̀ повече́рїѧ ѿпꙋща́ютъ, бы́ти зна́менїю днѐ, си́рѣчь пре́жде сомра́ка.

[зрѝ] Сѐ ᲂу҆́бѡ ꙗ҆́кѡ предписа́сѧ є҆ди́нъ де́нь ст҃ы́хъ постѡ́въ, прилѣ́жнѡ и҆спыта́вше предложи́хомъ любвѝ ва́шей. Коли́чество пѣ́нїѧ, и҆ въ не́мъ воѡбражє́нныѧ ѿ ст҃ы́хъ ѻ҆тцє́въ покло́ны, ꙗ҆̀же нѣ́сть лѣ́по презира́ти, нижѐ вели́комꙋ законоположи́телю. Коли́чество же днено́щныхъ, быва́емыхъ въ цр҃кви покло́нѡвъ, сꙋ́ть т҃, кромѣ̀ полꙋ́нощницы. Прїѧ́хомъ же въ палесті́нѣ, и҆ въ свои́хъ ке́ллїѧхъ коемꙋ́ждо пѣ́ти ѱалти́рь: и҆ могꙋ́щїи ᲂу҆́бѡ соверша́ютъ ю҆̀ днено́щнѡ, ѻ҆́вїи же три́жды въ седми́цѣ, ѻ҆́вїи же два́жды. Покло́ны же твори́ти, є҆ли́кѡ коемꙋ́ждо по свое́й си́лѣ предстоѧ́тель воѡбрази́тъ

Ѡ҆ покло́нѣхъ и҆ мл҃твѣ церко́вное законоположе́нїе.

Не бо̀ тꙋ́не, ни ꙗ҆́коже прилꙋчи́сѧ ѡ҆ ст҃ы́хъ покло́нѣхъ и҆ мл҃твѣ ᲂу҆мы́слиша ст҃і́и ѻ҆тцы̀, и҆ цр҃кви ᲂу҆ста́въ преда́ша: но ра́зꙋмъ и҆мꙋ́ще во ст҃ы́хъ покло́нѣхъ и҆ мл҃твѣ, съ пра́вою мы́слїю пло́дъ и҆мѣ́ти бꙋ́демъ. Но пре́жде ѡ҆ вели́кихъ покло́нѣхъ глаго́лемъ, ꙗ҆̀же во ст҃ꙋ́ю вели́кꙋю четыредесѧ́тницꙋ поста̀, и҆ во и҆ны̑ѧ посты̀ творѧ́тсѧ, є҆́же вы́ше ва́шей любвѝ назна́менахомъ, ѿ дре́внихъ харате́йныхъ ст҃ы́хъ кни́гъ списа́вше, и҆ ѿ вѣ́дꙋщихъ на сїѐ и҆скꙋ́съ и҆спыта́хомъ, что̀ глаго́лютсѧ вели̑кїѧ покло́ны; и҆ кі́й ѡ҆́бразъ и҆́мꙋтъ творе́нїѧ, є҆гда̀ съ мл҃твою ст҃а́гѡ є҆фре́ма творѧ́тсѧ; И҆́бо є҆гда̀ вре́мѧ прибли́житсѧ ст҃ы̑мъ вели̑кимъ покло́нѡмъ бы́ти тогда̀ кі́йждо воздѣ́въ рꙋ́цѣ, и҆ кꙋ́пнѡ чꙋ́вствєнныѧ ѻ҆́чи и҆ ᲂу҆́мныѧ возвестѝ къ бг҃ꙋ, ꙗ҆́коже бж҃е́ственный а҆пⷭ҇лъ па́ѵелъ ᲂу҆чи́тъ, къ тїмоѳе́ю пишѧ̀: Хощꙋ̀, речѐ, да мл҃твы творѧ́тъ мꙋ́жїе на всѧ́комъ мѣ́стѣ, воздѣ́юще прпⷣбныѧ рꙋ́ки без̾ гнѣ́ва и҆ размышле́нїѧ.

Та́же мл҃твꙋ нача́ти со ᲂу҆миле́нїемъ и҆ стра́хомъ бж҃їимъ, а҆́ще ли и҆́мать и҆ дарова́нїе сле́зъ, и҆ та́кѡ мо́литсѧ мл҃твою ст҃а́гѡ є҆фре́ма, глаго́лѧ: Гдⷭ҇и и҆ влⷣко живота̀ моегѡ̀: стоѧ̀ пра́вѡ, и҆ неꙋкло́ннѡ зрѧ̀ къ бг҃ꙋ дꙋше́внѣ и҆ тѣле́снѣ. И҆ соверши́въ мл҃твꙋ, твори́тъ покло́нъ вели́кїй, є҆ли́кѡ мощѝ главо́ю до землѝ довестѝ. Та́же восклони́всѧ и҆ ста́въ пра́вѡ, па́ки ᲂу҆пра́вивсѧ ꙗ҆́коже и҆ пре́жде, дꙋше́внѣ и҆ тѣле́снѣ зрѧ̀ къ бг҃ꙋ мо́литсѧ, глаго́лѧ вторꙋ́ю ча́сть мл҃твы ст҃а́гѡ є҆фре́ма: Дх҃ъ же цѣломꙋ́дрїѧ: И҆ ѡ҆конча́въ, па́ки твори́тъ покло́нъ вели́кїй, ꙗ҆́коже и҆ пре́жде ᲂу҆каза́сѧ. И҆ восклони́всѧ второ́е, глаго́летъ тре́тїю ча́сть мл҃твы ст҃а́гѡ є҆фре́ма: Є҆́й гдⷭ҇и цр҃ю̀, да́ждь мѝ зрѣ́ти моѧ̑ прегрѣшє́нїѧ: И҆ соверши́въ ю҆̀, па́ки твори́тъ тре́тїй покло́нъ вели́кїй. И҆́бо вели́кїй, не про́стѡ глаго́летсѧ вели́кїй, но є҆́сть вели́чество, є҆ли́кѡ человѣ́къ мо́жетъ пра́вѡ стоѧ̀, и҆ ни ма́лѡ наклонѧ́сѧ главо́ю на зе́млю поклони́тисѧ, и҆ без̾ нѣ́коегѡ прибавле́нїѧ, є҆́же и҆ні́и скамє́йцы представлѧ́ютъ себѣ̀, и҆ні́и же и҆́но что̀, и҆ свою̀ лѣ́ность си́мъ ᲂу҆добрѧ́ютъ, и҆ мнѧ́тсѧ съ правотрꙋди́вшимисѧ сравнѧ́тисѧ во ст҃ы́хъ вели́кихъ покло́нѣхъ. [И]҆ сѐ є҆́сть ѡ҆́бразъ вели́кихъ покло́нѡвъ.

Па́ки по си́хъ ѡ҆ дрꙋги́хъ двоюна́десѧти начина́емъ писа́ти: ꙗ҆́коже и҆ во ᲂу҆ста́вѣхъ та́кѡ глаго́летсѧ, въ дрꙋги́хъ же лє́гкїѧ и҆менꙋ́ютсѧ, во и҆ны́хъ же и҆ ма̑лыѧ. А҆́ще невѣ́жди и҆ глаго́лютъ, такі̑ѧ же подоба́етъ ꙗ҆́коже и҆ вели̑кїѧ, и҆ сїѧ̑ твори́ти: то̀ не бы̀ глаго́лалисѧ. Дрꙋгі̑ѧ и҆лѝ лє́гкїѧ, и҆лѝ ма̑лыѧ. И҆ а҆́ще бы таковы́ же подоба́ло твори́ти, ꙗ҆́коже и҆ вели̑кїѧ, то̀ бы и҆ мл҃твꙋ тꙋ́южде ст҃а́гѡ є҆фре́ма, а҆ не и҆нꙋ́ю кратча́йшꙋю, є҆́же є҆́сть, Бж҃е, ѡ҆чи́сти мѧ̀ грѣ́шнаго, и҆ поми́лꙋй мѧ̀. И҆ не ѡ҆ста́лосѧ бы та́кожде написа́тисѧ, ꙗ҆́коже и҆ вели́кїй покло́нъ: но є҆́сть вездѣ̀ напи́санъ про́стѡ покло́нъ. Покло́нъ же и҆менꙋ́етсѧ, є҆ли́кѡ мо́жетъ человѣ́къ пра́вѡ стоѧ̀ поклони́тисѧ, не па́даѧ колѣ́нми, нижѐ главꙋ̀ преклонѧ́ти до землѝ, и҆ сѐ є҆́сть ѡ҆́бразъ ле́гкагѡ покло́на. Тѣ́мже є҆ли́кѡ ва́съ хотѧ́й кто̀ ст҃ы́хъ ѻ҆тє́цъ преда̑нїѧ храни́ти, и҆ во ст҃ѣ́й цр҃кви бл҃гочи́ннѡ ᲂу҆пра́вити мл҃твꙋ и҆ покло́ны: а҆́ще ли предстоѧ́тель, да не неради́тъ ни ма́лѡ ѡ҆ си́хъ: а҆́ще ли приче́тникъ, и҆лѝ людѧни́нъ, да внима́етъ, и҆дѣ́же напи́сано вели́кїй покло́нъ, да твори́тъ вели́кїй неспѣ́шнѡ, по и҆зглаго́ланїи ст҃ы́ѧ мл҃твы, со стра́хомъ бж҃їимъ. А҆ и҆дѣ́же про́стѡ покло́нъ напи́санъ, то̀ да твори́тъ про́стѡ покло́нъ, ꙗ҆́коже вы́ше сегѡ̀ и҆з̾ѡбрази́сѧ: и҆ не вкꙋ́пѣ съ мл҃твою, но пре́жде мл҃твꙋ, и҆ по мл҃твѣ покло́ны. И҆ не ꙗ҆́коже нѣ́цыи не покарѧ́ющесѧ ст҃ы́хъ ѻ҆тє́цъ преда́нїю, нижѐ вѣ́дꙋще са́ми и҆скꙋ́съ ст҃ы́хъ покло́нѡвъ, нижѐ ст҃о́ю мл҃твою до́брѣ разꙋмѣ́ютъ моли́тисѧ, но поклони́всѧ є҆ди́ною нагорби́всѧ, ма́лѡ восклонѧ́ѧсѧ крестѧ́сѧ, главо́ю кива́етъ, и҆ тѣ́мъ свои́мъ безчи́нїемъ а҆́ки чи́нъ наполнѧ́етъ пре́данныхъ ѿ ѻ҆тє́цъ покло́нѡвъ: нижѐ мл҃твою ᲂу҆́мнѣ и҆ дꙋше́внѣ къ бг҃ꙋ мо́литсѧ, но є҆ли́кѡ вре́мѧ сго́рбивсѧ твори́тъ сꙋ́єтныѧ своѧ̑ покло́ны, та́кѡ и҆ мл҃твꙋ ст҃а́гѡ є҆фре́ма, а҆́ки и҆зꙋмле́нный спѣши́тъ проговори́ти.

Та́кожде и҆ всѧ̑ мл҃твы поспѣша́етъ съ покло́ны ᲂу҆пра́вити, и҆ ѿ тѣ́хъ мни́мыхъ безче́стныхъ покло́нѡвъ, и҆ ѿ безꙋ́мнагѡ моле́нїѧ своегѡ̀ воста́нетъ, а҆́ки ю҆ро́дъ, нижѐ са́мъ себѐ вѣ́сть, что̀ твори́лъ, нижѐ зрѧ́тъ на предстоѧ́телѧ цр҃кве, но и҆́нъ и҆на́го предварѧ́етъ, мѧтꙋ́тсѧ а҆́ки тро́стїе вѣ́тромъ коле́блеми, не смотрѧ̀ лꙋ́чшагѡ, нижѐ хотѧ́тъ наꙋчи́тисѧ: но є҆ли́кѡ кто̀ ка́кѡ соста́вилъ сво́й нра́въ, та́кѡ и҆ ᲂу҆твержда́етсѧ бы́ти. Стра́шно, ѻ҆ба́че рекꙋ̀, да не невѣ́дꙋще ѻ҆ч҃ескагѡ ᲂу҆твержде́нїѧ и҆́мꙋтъ под̾ запрещє́нїѧ впа́дати, ꙗ҆̀же чте́тсѧ въ правосла́внꙋю недѣ́лю ст҃а́гѡ поста̀, собо́рное ст҃а́гѡ седма́гѡ вселе́нскагѡ собо́ра си́це: Всѧ̑, кромѣ̀ цр҃ко́внагѡ преда́нїѧ и҆ ᲂу҆че́нїѧ и҆ и҆з̾ѻбраже́нїѧ ст҃ы́хъ, и҆ приснопа́мѧтныхъ ѻ҆тє́цъ, ѡ҆бновлѧ́ємаѧ и҆лѝ посе́мъ содѣ̑ѧннаѧ, а҆на́ѳема. Въ покло́нѣхъ же и҆ мл҃твѣ бꙋ́демъ подража́тельны глаго́лющемꙋ: и҆́бо бг҃ъ дх҃ъ є҆́сть, дх҃омъ и҆ и҆́стиною кла́нѧющихсѧ хо́щетъ. И҆ бж҃е́ственный и҆ верхо́вный а҆пⷭ҇лъ, и҆́же и҆скꙋ́съ вѣ́дый въ мл҃твѣ, глаго́летъ си́це: А҆́ще бо помолю́сѧ ѧ҆зы́комъ, дꙋ́хъ мо́й мо́литсѧ, а҆ ᲂу҆́мъ мо́й без̾ плода̀ є҆́сть. Что̀ ᲂу҆́бѡ є҆́сть; помолю́сѧ дх҃омъ, помолю́сѧ и҆ ᲂу҆мо́мъ. воспою̀ дх҃омъ, воспою̀ и҆ ᲂу҆мо́мъ. и҆ па́ки: Хощꙋ̀, речѐ, въ цр҃кви пѧ́ть слове́съ ᲂу҆мо́мъ мои́мъ глаго́лати, не́жели тьмы̑ слове́съ ѧ҆зы́комъ. И҆ ст҃ы́й лѣ́ствичникъ, воззва́хъ, речѐ: поѧ̀ всѣ́мъ се́рдцемъ мои́мъ, си́рѣчь, тѣ́ломъ и҆ дх҃омъ. бж҃е́ственный же григо́рїй сїнаи́тъ глаго́летъ: Нача́ло ᲂу҆́мныѧ мл҃твы дѣ́йство, си́рѣчь, чисти́тельнаѧ дх҃а си́ла, и҆ та̑йнаѧ ᲂу҆ма̀ сщ҃еннодѣ́йства: коне́цъ же, и҆зстꙋпле́нїе и҆ восхище́нїе ᲂу҆ма̀ къ бг҃ꙋ. И҆ ст҃ы́й а҆нтїо́хъ речѐ: Мл҃тва ᲂу҆́бѡ бесѣ́да є҆́сть ᲂу҆ма̀ къ бг҃ꙋ: тако́гѡ ᲂу҆́бѡ тре́бꙋетъ ᲂу҆ма̀ ᲂу҆́мъ ᲂу҆строе́нїѧ, да возмо́жетъ бесѣ́довати къ бг҃ꙋ. И҆ па́ки ст҃ы́й лѣ́ствичникъ: Мл҃тва є҆́сть по тоѧ̀ ᲂу҆́бѡ творе́нїю, ссꙋще́ствїе и҆ соедине́нїе человѣ́кѡвъ къ бг҃ꙋ: И҆ па́ки то́йже речѐ: Нача́ло ᲂу҆́бѡ мл҃твѣ прило́зи, є҆диносло́внѣ ѿгони́ми ѿ нача́лъ самѣ́хъ. Среда́ же, є҆́же во глаго́лемыхъ є҆ди́нѣй бы́ти мы́сли тоѧ́ же соверше́нїе восхище́нїе къ бг҃ꙋ.

Тѣ́мже мы̀ всѝ, є҆ли́кѡ ѡ҆ ст҃ы́хъ писа́нїй ѿ мно́гихъ ма̑лаѧ сїѧ̑ слы́шавше во́нмемъ, и҆ не многосло́вимъ въ мл҃твѣ, ꙗ҆́кѡ ꙗ҆зы̑чницы, къ ни̑мже хрⷭ҇то́съ глаго́летъ: мнѧ́тъ бо сѧ во многоглаго́ланїи свое́мъ ᲂу҆слы́шани бы́ти. И҆ па́ки лѣ́ствичникъ речѐ: не мꙋдри́сѧ въ мл҃твы твое́й глаго́лѣхъ: дѣ̑тскаѧ бо мно́гажды нѣмова̑нїѧ проста̑ и҆ не хи̑тра, ѻ҆ц҃ꙋ̀ и҆́хъ и҆́же на нб҃сѣ́хъ ᲂу҆годи́ша. Не многосло́вити начина́й, ꙗ҆́кѡ да не ко взыска́нїю слове́съ разы́детсѧ ᲂу҆́мъ, є҆ди́но сло́во мытаре́во бг҃а ᲂу҆ми́лостиви: є҆ди́нъ глаго́лъ вѣ́ренъ разбо́йника сп҃сѐ. Многосло́вїе ᲂу҆́бѡ въ мл҃твѣ мно́гажды ᲂу҆́мъ возмечта̀, и҆ разлїѧ̀: є҆диносло́вїе же мно́жицею ᲂу҆́мъ собира́ти мо́жетъ, ᲂу҆слажда́емь и҆лѝ поꙋверза́емь въ сло́вѣ мл҃твы, пребыва́й въ не́мъ, храни́тель бо на́шъ тогда̀ є҆́сть молѧ́йсѧ съ на́ми.

Тѣ́мже мы̀ съ трꙋдо́мъ, и҆ мно́жествомъ коли́чества, ꙗ҆́кѡ несоверше́ннїи мо́лимсѧ, второ́е бо пе́рвомꙋ ходата́йственно: даѧ́й бо, речѐ, мл҃твꙋ чи́стꙋ без̾ лѣ́ности, молѧ́щемꙋсѧ скве́рненнѣ и҆ болѣ́зненнѣ. И҆́бо скве́рна мл҃твѣ, и҆ и҆́но погꙋбле́нїе и҆ и҆́но краде́нїе, и҆ дрꙋго́е поро́къ. Скве́рна є҆́сть, є҆́же бг҃ови предстоѧ́ти, и҆ неподо́бною мы́слїю мечта́тисѧ. Погꙋбле́нїе є҆́сть, въ попечє́нїѧ неполє́знаѧ плѣнѧ́тисѧ. Краде́нїе є҆́сть, є҆́же нечꙋ́встеннѣ мы̑сли пари́ти. Поро́къ є҆́сть прило́гъ ꙗ҆ко́въ-любо тогда̀ на́мъ приближа́ющсѧ. И҆ сѐ здѣ̀ ᲂу҆́бѡ ѡ҆ ст҃ѣ́й сщ҃е́ннѣй и҆ приснопа́мѧтнѣй ᲂу҆́мнѣй мл҃твѣ коне́цъ твори́мъ. Но да рече́мъ и҆ ѡ҆ ст҃ѣ́й всѣ́мъ є҆ди́нѣй мл҃твѣ, ꙗ҆́же въ цр҃ко́вномъ та́инствѣ лежи́тъ, глава̀ п҃в, ѿне́лѣже рече́тъ сщ҃е́нникъ славосло́вїе, глаго́летъ: Ми́ромъ гдⷭ҇ꙋ помо́лимсѧ. Съ ми́ромъ да мо́лимъ гдⷭ҇а, и҆ да про́симъ, кꙋ́ю мл҃твꙋ твори́ти, ꙗ҆́коже подоба́етъ, не вѣ́мы. и҆ да не многосло́вимъ, наꙋча́етъ на́съ ѻ҆́нымъ, и҆́мже подоба́етъ ѡ҆ мл҃твѣ, и҆ пе́рвѣе нра́вꙋ, ꙗ҆́кѡ въ ми́рѣ подоба́етъ моли́тисѧ.

Что̀ ᲂу҆́бѡ по славосло́вїи а҆́бїе повелѣ̀ да про́симъ; нижѐ и҆сповѣ́дающесѧ пре́жде, нижѐ даю́ще бг҃ꙋ бл҃годаре́нїе: но что̀ про́сѧтъ; да поми́ловани бꙋ́дꙋтъ. Сїе́ же проше́нїе є҆́сть человѣ́кѡвъ ѡ҆сꙋжде́нныхъ и҆ прегрѣши́вшихъ, и҆̀же ни є҆ди́нъ ѿвѣ́тъ и҆мꙋ́ще, и҆лѝ пра́веднꙋ винꙋ̀ рещѝ сꙋдїѝ, и҆спꙋска́ютъ. се́й гла́съ, и҆ вопїю́тъ: Гдⷭ҇и поми́лꙋй, не ѿ пра́вдъ на́шихъ, но ѿ чл҃вѣколю́бїѧ твоегѡ̀: и҆ прѡ́чаѧ. Та́же глаго́летъ пресвѵ́теръ: Ѡ҆ свы́шнѣмъ ми́рѣ, и҆ ѡ҆ сп҃се́нїи дꙋ́шъ на́шихъ гдⷭ҇ꙋ помо́лимсѧ. Сщ҃е́нникъ бо помо́литсѧ вкꙋ́пѣ съ людьмѝ, и҆ глаго́летъ: Ѽ лю́дїе, помо́лимсѧ гдⷭ҇ꙋ, да да́стъ ми́ръ сво́й на́мъ, и҆ сп҃се́тъ дꙋ́шы на́шѧ. И҆ ѿвѣща́ютъ лю́дїе: Гдⷭ҇и поми́лꙋй. Посе́мъ же и҆ прѡ́чаѧ разꙋмѣ̑нїѧ. Є҆гда́ же глаго́летъ дїа́конъ: Рце́мъ всѝ: се́й же глаго́лъ не и҆́но что̀ прино́ситъ разꙋмѣ́ти, но то́чїю са́мое, є҆́же всѣ̑мъ вкꙋ́пѣ моли́тисѧ, не кли́рꙋ то́чїю є҆ди́номꙋ, но и҆ всѣ̑мъ ѡ҆брѣта́ющымсѧ въ цр҃кви. Та́же рече́тъ дїа́конъ: И҆ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ. Но что̀ ᲂу҆́бѡ рце́мъ; ничто́же ᲂу҆́бѡ и҆́но, ра́звѣ є҆́же ѻ҆́нꙋю же ѻ҆́бщꙋю мл҃твꙋ: Гдⷭ҇и поми́лꙋй. ѡ҆ се́й ᲂу҆́бѡ ст҃ѣ́й мл҃твѣ сщ҃е́нный златоꙋ́стъ пи́шетъ къ корі́нѳѧнѡмъ, во и҃і нравоꙋче́нїи: И҆́бо ѡ҆ дѣ́йствꙋемыхъ ѡ҆ и҆̀же въ покаѧ́нїи ѻ҆́бщыѧ и҆ ѿ сщ҃е́нника и҆ ѿ люде́й быва́ютъ мл҃твы: и҆ всѝ є҆ди́нꙋ глаго́лютъ мл҃твꙋ, млⷭ҇ти и҆спо́лненꙋ, є҆́же є҆́сть, Гдⷭ҇и поми́лꙋй. Сегѡ̀ ра́ди въ слꙋже́бникахъ пи́шетсѧ, лю́дїе глаго́лютъ сїѐ, и҆лѝ ѻ҆́но, на ни́хже мѣ́стѣхъ написа́сѧ. Во ст҃ѣ́й же восто́чной цр҃кви не и҆́накѡ твори́тсѧ, но та́кѡ ꙗ҆́коже пи́шетсѧ. И҆дѣ́же написа́сѧ, лю́дїе глаго́лютъ, то̀ всѝ вкꙋ́пѣ, є҆ли́цы ѡ҆брѣта́ютсѧ въ цр҃кви, глаго́лютъ: и҆лѝ Гдⷭ҇и поми́лꙋй, и҆лѝ Пода́й гдⷭ҇и, и҆лѝ И҆ со дх҃омъ твои́мъ, и҆лѝ Ѻ҆́ч҃е на́шъ: А҆́ще ᲂу҆ на́съ и҆ не твори́тсѧ сегѡ̀, ѻ҆ба́че подоба́етъ твори́ти. И҆́бо ꙗ҆́коже вы́ше рече́сѧ, є҆гда̀ рече́тъ дїа́конъ: Ми́ромъ гдⷭ҇ꙋ помо́лимсѧ, и҆лѝ Рце́мъ всѝ, тогда̀ всѣ̑мъ подоба́етъ и҆ ѿвѣща́ти: Гдⷭ҇и поми́лꙋй. А҆́ще бы ко є҆ди́номꙋ кли́рꙋ глаго́лалосѧ ѿвѣща́ти, то̀ не бы̀ написа́ли: лю́дїе глаго́лютъ. Та́кожде и҆ ст҃ы́й сщ҃е́нный златоꙋ́стъ въ то́мже нравоꙋче́нїи глаго́летъ па́ки: Во вре́мѧ са́мыхъ стра́шныхъ та̑инъ, привѣ́тствꙋетъ і҆ере́й лю́демъ: Ми́ръ ва́мъ. привѣ́тствꙋютъ и҆ лю́дїе і҆ере́ю глаго́люще: И҆ дꙋ́хови твоемꙋ̀. Ничто́же и҆́но є҆́сть, ра́звѣ сїѐ: ꙗ҆̀же бл҃годарє́нїѧ па́ки ѻ҆́бщаѧ, ниже́ бо ѻ҆́нъ са́мъ бл҃годари́тъ, но и҆ лю́дїе всѝ. Пе́рвѣе бо и҆́хъ прїе́мъ гла́съ: та́же согласи́вшымсѧ ꙗ҆́кѡ досто́йнѡ и҆ пра́веднѡ сїѐ быва́етъ, тогда̀ начина́етъ бл҃годарє́нїѧ. И҆ что̀ чꙋди́шисѧ, а҆́ще нѣ́гдѣ со сщ҃е́нникомъ лю́дїе вѣща́ютъ, и҆дѣ́же и҆ съ са́мыми херꙋві́мы, и҆ съ вы́шними си́лами ѻ҆́бще сщ҃є́нныѧ ѻ҆́ны пѣ̑сни возсыла́ютъ;

Сїѧ̑ же всѧ̑ ѻ҆́наѧ речє́на бы́ша, да ко́ждо и҆ ѿ начина́емыхъ трезви́тсѧ въ поꙋче́нїи се́мъ: да ᲂу҆вѣ́мы, ꙗ҆́кѡ тѣ́ло є҆смы̀ всѝ є҆ди́но, толи́ко и҆мꙋ́ще дрꙋ́гъ ко дрꙋ́гꙋ разли́чїе, є҆ли́ко ᲂу҆́дъ ко ᲂу҆дѡ́мъ. и҆ не всѐ на сщ҃е́нники возве́рземъ, но и҆ са́ми ꙗ҆́коже ѡ҆ ѻ҆́бщемъ тѣ́лѣ, ѡ҆ цр҃кви все́й та́кѡ да печа́лꙋемъ. Сїе́ бо ᲂу҆твержде́нїе бо́льшее и҆ на́мъ и҆ ва́мъ преподае́тъ множа́йшыѧ ᲂу҆строѧ́ти добродѣ́тєли: да́же проходѧ́щїи сїѧ̑, полꙋчи́мъ млⷭ҇ть бж҃їю здѣ̀, и҆ въ бꙋ́дꙋщемъ вѣ́цѣ црⷭ҇тво нбⷭ҇ное, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ: ꙗ҆́кѡ томꙋ̀ подоба́етъ сла́ва, со ѻ҆ц҃е́мъ, и҆ ст҃ы́мъ дх҃омъ, во вѣ́ки, а҆ми́нь.

Въ сре́дꙋ а҃-ѧ седми́цы ве́чера,

Є҆гда̀ и҆́мать і҆ере́й сщ҃еннодѣ́йствовати преждеѡсщ҃е́ннꙋю, вше́дъ во ст҃и́лище ѡ҆блачи́тсѧ во сщ҃е́нническꙋю ѻ҆де́ждꙋ, ꙗ҆́коже писа́сѧ въ лїтꙋргїа́рїи. И҆ по ѕ҃і покло́нѣхъ глаго́лемъ трист҃о́е, и҆ Ѻ҆́ч҃е на́шъ: Гдⷭ҇и поми́лꙋй, в҃і. и҆ мл҃тва: Всест҃а́ѧ трⷪ҇це: посе́мъ, досто́йно є҆́сть: и҆ ѿпꙋ́стъ по ѻ҆бы́чаю. И҆ твори́тъ нача́ло вече́рни по ѻ҆бы́чаю, и҆ на є҆ди́номъ ко́емждо а҆нтїфѡ́нѣ стїхосло́вїѧ, глаго́летъ ма́лꙋю є҆ктенїю̀ і҆ере́й и҆лѝ дїа́конъ.

На Гдⷭ҇и воззва́хъ, ста́вимъ стїхѡ́въ і҃, ѿ И҆зведѝ и҆з̾ темни́цы дꙋ́шꙋ мою̀, на гла́съ самогла́сна днѐ, повторѧ́юще то́йжде. Та́же мч҃нченъ, въ то́йже гла́съ: и҆ г҃ подо́бны трїѡ́ди: и҆ г҃ мине́и, повторѧ́юще є҆ди́нꙋ. Сла́ва, и҆ ны́нѣ, бг҃оро́диченъ.

и҆ быва́етъ вхо́дъ съ кади́льницею без̾ є҆ѵⷢ҇лїа [Є҆гда́ же и҆́мать чести́сѧ є҆ѵⷢ҇лїе, и҆ со є҆ѵⷢ҇лїемъ. Свѣ́те ти́хїй: Чте́цъ прокі́менъ, и҆ чте́нїе бытїѧ̀.

Посе́мъ вторы́й прокі́менъ: и҆ возглаша́етъ дїа́конъ: Повели́те.

Сщ҃е́нникъ же взе́мъ ѻ҆бѣ́ма рꙋка́ма кади́льницꙋ, и҆ свѣ́щникъ со свѣще́ю, стои́тъ пред̾ ст҃о́ю трапе́зою зрѧ̀ къ восто́кѡмъ, и҆ назна́менꙋѧ крⷭ҇тъ, глаго́летъ: Премꙋ́дрость про́сти:

Та́же ѡ҆братѧ́сѧ на за́падъ къ наро́дꙋ глаго́летъ: Свѣ́тъ хрⷭ҇то́въ просвѣща́етъ всѣ́хъ.

Чте́цъ: При́тчей чте́нїе.

Дїа́конъ Во́нмемъ.

И҆ по и҆сполне́нїи паремі́й, глаго́летъ і҆ере́й: Ми́ръ тѝ.

И҆ дїа́конъ: Премꙋ́дрость.

Чте́цъ: Да и҆спра́витсѧ мл҃тва моѧ̀:

Тогда̀ пра́вагѡ и҆ лѣ́вагѡ ли́ка, и҆ предстоѧ́щїй наро́дъ ѻ҆́бѣ страны̑ во все́й цр҃кви стоѧ́тъ на колѣ́нахъ молѧ́щесѧ. И҆ по пѣ́нїи чтеца̀, а҃-й ли́къ пое́тъ то́йжде: Да и҆спра́витсѧ мл҃тва моѧ̀: И҆ чте́цъ, и҆ дрꙋга́ѧ страна̀ ли́ка, и҆ предстоѧ́щїй наро́дъ, стоѧ́тъ на колѣ́нахъ, до́ндеже пропою́тъ. Та́же чте́цъ пое́тъ а҃-й сті́хъ: Гдⷭ҇и воззва́хъ къ тебѣ̀, ᲂу҆слы́ши мѧ̀: И҆ по пропѣ́тїи стїха̀, пое́тъ в҃-й ли́къ: Да и҆спра́витсѧ мл҃тва моѧ̀: Тогда̀ чте́цъ, и҆ а҃-й ли́къ, и҆ тоѧ̀ страны̀ предстоѧ́щїй наро́дъ припа́даютъ на колѣ̑на: Та́же чте́цъ пое́тъ в҃-й сті́хъ: Положѝ гдⷭ҇и хране́нїе: И҆ а҃-й ли́къ па́ки пое́тъ: Да и҆спра́витсѧ мл҃тва моѧ̀: И҆ чте́цъ и҆ в҃-й ли́къ, и҆ предстоѧ́щїй наро́дъ, па́ки приклонѧ́ютъ колѣ̑на. И҆ па́ки чте́цъ пое́тъ г҃-й сті́хъ: Не ᲂу҆клонѝ се́рдце моѐ: и҆ в҃-й ли́къ пое́тъ: Да и҆спра́витсѧ мл҃тва моѧ̀: И҆ приклонѧ́етъ колѣ̑на чте́цъ, и҆ а҃-й ли́къ, и҆ наро́дъ. И҆ па́ки чте́цъ пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю. И҆ тогда̀ ѻ҆́ба ли̑ка, и҆ во цр҃кви предстоѧ́щїй ве́сь наро́дъ, припа́даютъ на колѣ̑на, и҆ стоѧ́тъ, до́ндеже чте́цъ пое́тъ. И҆ воста́вше допѣва́ютъ на кли́росѣ: Воздѣѧ́нїе рꙋкꙋ̀ моє́ю же́ртва вече́рнѧѧ. И҆ по и҆сполне́нїи твори́мъ покло́ны г҃. И҆ про́чее быва́етъ послѣ́дованїе преждеѡсщ҃е́нныхъ по чи́нꙋ, ꙗ҆́коже въ слꙋже́бникахъ и҆з̾ѧви́сѧ.

[зрѝ] Вѣ́стно же бꙋ́ди: Ꙗ҆́кѡ є҆гда̀ бж҃е́ствєнныѧ прено́сѧтсѧ та̑йны, всѝ лю́дїе поклоне́нїе бг҃оподо́бное, и҆ пѣвцы̀ ни́цъ па́дше хрⷭ҇тꙋ̀ бг҃ꙋ въ та́йнахъ сꙋ́щемꙋ творѧ́тъ: поне́же соверше́ннѡ пред̾ѡсщ҃е́нны сꙋ́ть.

По происхожде́нїи же ст҃ы́хъ дарѡ́въ, и҆сполнѧ́емꙋ, Ны́нѣ си̑лы нбⷭ҇ныѧ: твори́мъ покло́ны г҃, непокрове́ни сꙋ́ще.

Кїнони́къ: Вкꙋси́те и҆ ви́дите, ꙗ҆́кѡ бл҃гъ гдⷭ҇ь. А҆ллилꙋ́їа, три́жды.

По ѿверзе́нїи же вра́тъ, рече́тъ дїа́конъ: Со стра́хомъ бж҃їимъ и҆ вѣ́рою пристꙋпи́те.

Мы́ же покло́нъ є҆ди́нъ. И҆ пое́мъ: Бл҃гословлю̀ гдⷭ҇а на всѧ́кое вре́мѧ, хвала̀ є҆гѡ̀ во ᲂу҆стѣ́хъ мои́хъ: и҆ про́чее. А҆ллилꙋ́їа, три́жды.

По возглаше́нїи же ѿ і҆ере́а: Всегда̀, ны́нѣ и҆ при́снѡ:

Ли́къ, да и҆спо́лнѧтсѧ ᲂу҆ста̀ на̑ша: А҆ллилꙋ́їа, три́жды.

По заамвѡ́нной же мл҃твѣ: Бꙋ́ди и҆́мѧ гдⷭ҇не: И҆ мета̑нїѧ г҃.

Бл҃гословлю̀ гдⷭ҇а на всѧ́кое вре́мѧ: и҆ подае́тсѧ на́мъ а҆нті́дѡръ: и҆ соверше́нный ѿпꙋ́стъ.

[зрѝ] Сїѐ послѣ́дованїе быва́етъ во всю̀ м҃-цꙋ преждеѡсщ҃е́нной сꙋ́щей. А҆ и҆дѣ́же нѣ́сть преждесщ҃е́нныѧ, пою́тсѧ на вече́рни стїхи̑ры на ѕ҃, подо́бны трїѡ́ди: и҆ мине́и. Сла́ва, и҆ ны́нѣ, бг҃оро́диченъ, по гла́сꙋ мине́и. На стїхо́внѣ трїѡ́ди самогла́сенъ днѐ, два́жды: и҆ мч҃нченъ, и҆́же є҆́сть на Гдⷭ҇и воззва́хъ: Сла́ва, и҆ ны́нѣ, бг҃оро́диченъ тогѡ́же гла́са, и҆ ѻ҆бы́чное конча́нїе. Входѧ́ще же въ трапе́зꙋ, ꙗ҆ди́мъ сꙋхоѧде́нїе: пїе́мъ и҆ со́къ съ ме́домъ. Въ четверто́къ же тоѧ̀ седми́цы трапе́зы не поставлѧ́емъ, но пребыва́емъ постѧ́щесѧ да́же до пѧтка̀: тогда́ бо ꙗ҆ди́мъ входѧ́ще въ трапе́зꙋ.

Въ пѧто́къ ве́чера во свѣти́льничное, по ѻ҆бы́чномъ стїхосло́вїи.

На Гдⷭ҇и воззва́хъ, ста́вимъ стїхѡ́въ і: и҆ пое́мъ трїѡ́ди самогла́сенъ два́жды: и҆ д҃ мч҃ничны ѻ҆ктѡ́иха, прилꙋчи́вшагѡсѧ гла́са: Та́же ст҃а́гѡ ѳео́дѡра самогла́сны д҃, гла́съ в҃: Прїиди́те мч҃нколю́бцы всѝ: Сла́ва, гла́съ ѕ҃: Сосꙋ́да ᲂу҆потреби́въ вра́гъ: И҆ ны́нѣ, бг҃оро́диченъ гла́са. Вхо́дъ без̾ є҆ѵⷢ҇лїа. Свѣ́те ти́хїй: Прокі́менъ, и҆ чте́нїе бытїѧ̀. Посе́мъ дрꙋгі́й прокі́менъ, и҆ чте́нїе при́тчей. Та́же, да и҆спра́витсѧ мл҃тва моѧ̀: И҆ про́чее послѣ́дованїе преждесщ҃е́нныхъ.

По заамвѡ́нной же мл҃твѣ: Пое́мъ настоѧ́щїй моле́бный канѡ́нъ ст҃а́гѡ ѳео́дѡра. Предло́жше же ко́лѷво, глаго́лемъ ѱало́мъ рм҃в: Гдⷭ҇и, ᲂу҆слы́ши мл҃твꙋ мою̀: Та́же: Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не. И҆ а҆́бїе:

Тропа́рь, гла́съ в҃: Ве́лїѧ вѣ́ры и҆справлє́нїѧ, во и҆сто́чницѣ пла́мене, ꙗ҆́кѡ на водѣ̀ ᲂу҆покое́нїѧ, ст҃ы́й мч҃нкъ ѳео́дѡръ ра́довашесѧ: ѻ҆гне́мъ бо всесожже́гсѧ, ꙗ҆́кѡ хлѣ́бъ сла́дкїй трⷪ҇цѣ принесе́сѧ. тогѡ̀ мл҃твами хрⷭ҇тѐ бж҃е сп҃сѝ дꙋ́шы на́шѧ.

Сла́ва, то́йже: И҆ ны́нѣ, Всѧ̑ па́че смы́сла:

И҆ а҆́бїе, ѱало́мъ н҃. и҆ кади́тъ сщ҃е́нникъ ко́лѷво, и҆ настоѧ́телѧ, и҆ ли́ки, по чи́нꙋ.

Та́же глаго́лемъ канѡ́нъ на д҃, без̾ і҆рмосѡ́въ, гла́съ и҃. Припѣ́въ: Ст҃ы́й великомч҃нче ѳео́дѡре, молѝ бг҃а ѡ҆ на́съ. По ѕ҃-й пѣ́сни,

Конда́къ, гла́съ и҃: Вѣ́рꙋ хрⷭ҇то́вꙋ ꙗ҆́кѡ щи́тъ внꙋ́трь прїи́мъ въ се́рдцѣ твое́мъ, проти̑вныѧ си̑лы попра́лъ є҆сѝ многострада́льче: и҆ вѣнце́мъ нбⷭ҇нымъ вѣнча́лсѧ є҆сѝ вѣ́чнѡ ѳео́дѡре, ꙗ҆́кѡ непобѣди́мый.

По ѳ҃-й пѣ́сни, і҆рмо́съ: Тѧ̀ неискꙋсобра́чнꙋю мт҃рь: И҆ а҆́бїе трист҃о́е. Тропа́рь ст҃а́гѡ: Ве́лїѧ вѣ́ры:

Сла́ва, конда́къ: Вѣ́рꙋ хрⷭ҇то́вꙋ: И҆ ны́нѣ, бг҃оро́диченъ, гла́съ то́йже: Ꙗ҆́коже предста́тельство всѝ:

И҆ быва́етъ мл҃тва на бл҃гослове́нїе ко́лѷвъ.

Та́же, Бꙋ́ди и҆́мѧ гдⷭ҇не: и҆ Бл҃гословлю̀ гдⷭ҇а: и҆ дае́тсѧ преломле́нїе ѿ і҆ере́а: и҆ ѿпꙋ́стъ.

[зрѝ] А҆ и҆дѣ́же не бы́ти преждесщ҃е́нной, конча́емъ часы̀ си́це: По Ѡ҆сла́ви, ѡ҆ста́ви: и҆ по коне́чныхъ покло́нѣхъ, глаго́лемъ трист҃о́е: И҆ Ѻ҆́ч҃е на́шъ: Гдⷭ҇и поми́лꙋй, в҃і. и҆ мл҃тва: Всест҃а́ѧ трⷪ҇це: И҆ начина́емъ вече́рню: Прїиди́те поклони́мсѧ, три́жды. ѱало́мъ р҃г. каѳі́сма и҃і. И҆ пое́мъ на Гдⷭ҇и воззва́хъ, стїхи̑ры на ѕ҃: мч҃нчны г҃, во ѻ҆ктѡ́ихѣ гла́са, и҆́же на рѧдꙋ̀: и҆ ст҃а́гѡ ѳео́дѡра г҃: Сла́ва, ѳео́дѡра: Сосꙋ́да ᲂу҆потреби́въ: И҆ ны́нѣ, бг҃оро́диченъ гла́са рѧдова́гѡ. Свѣ́те ти́хїй: без̾ вхо́да, и҆ чте́нїе. На стїхо́внѣ трїѡ́ди самогла́сенъ днѐ два́жды: и҆ мч҃нченъ, гла́съ є҃: Бл҃гослове́но во́инство: Сла́ва, ѳео́дѡра, гла́съ в҃: Бж҃е́ственныхъ дарѡ́въ: пи́сана въ стїхи́рахъ. И҆ ны́нѣ: Всѐ ᲂу҆пова́нїе моѐ: Ны́нѣ ѿпꙋща́еши: Трист҃о́е. По Ѻ҆́ч҃е на́шъ, тропа́рь: Вє́лїѧ вѣ́ры: Сла́ва, и҆ ны́нѣ: Всѧ̑ па́че смы́сла: Та́же є҆ктенїа̀ Поми́лꙋй на́съ бж҃е: и҆ покло́ны г҃. и҆ по покло́нѣхъ глаго́лемъ ѱало́мъ р҃в: Гдⷭ҇и, ᲂу҆слы́ши мл҃твꙋ мою̀: и҆ про́чее, ꙗ҆́коже ᲂу҆ка́зано пре́жде, и҆ до ѿпꙋ́ста. И҆ вхо́димъ въ трапе́зꙋ, вкꙋша́емъ же вїна̀ и҆ є҆ле́а, ра́ди ст҃а́гѡ. Сїѐ прїѧ́хомъ въ ла́ѵрѣ прпⷣбнагѡ ѻ҆тца̀ на́шегѡ са́ввы, и҆ кїнові́и прпⷣбнагѡ вели́кагѡ є҆ѵѳѵ́мїа: но не твори́мъ сегѡ̀ ны́нѣ за че́стность днѐ, ѻ҆ба́че ꙗ҆ди́мъ варе́нїе съ сли́вами без̾ є҆ле́а, и҆ а҆рме́а: произволѧ́ющїи же ꙗ҆дѧ́тъ сꙋхоѧде́нїе, ꙗ҆́коже и҆ въ сре́дꙋ.

[зрѝ] Вѣ́стно бꙋ́ди, ꙗ҆́кѡ въ се́й а҃-й седми́цѣ пѣ́сни, ѕ҃-ѧ, з҃-ѧ, и҃-ѧ и҆ ѳ҃-ѧ, глаго́лютсѧ пре́жде въ пѧто́къ. Во в҃-й же, г҃-й, и҆ д҃-й, седми́цахъ глаго́лютсѧ на рѧдꙋ̀.

Подоба́етъ вѣ́дати, ꙗ҆́кѡ во всѣ́хъ пѧтка́хъ ст҃ы́ѧ и҆ вели́кїѧ м҃-цы на вече́рнѧхъ, и҆ повече́рїѧхъ, покло́нѡвъ не твори́мъ, то́кмѡ воѡбражє́нныѧ въ преждесщ҃е́нной, є҆́же є҆́сть, по да и҆спра́витсѧ: покло́ны г҃. По вхо́дѣ ст҃ы́хъ дарѡ́въ, покло́ны г҃. И҆ на Бꙋ́ди и҆́мѧ гдⷭ҇не: покло́ны г҃. Повече́рїе же пое́мъ вели́кое, на не́мже по а҃- мъ трист҃о́мъ глаго́лемъ тропа́рь мч҃нка: Сла́ва, и҆ ны́нѣ, бг҃оро́диченъ. По в҃-мъ ѻ҆бы̑чныѧ тропарѝ: Поми́лꙋй на́съ гдⷭ҇и: и҆ пое́мъ поко́йный канѡ́нъ настоѧ́щагѡ гла́са. По Досто́йно и҆ по трист҃о́мъ, конда́къ мч҃нченъ: и҆ прѡ́чаѧ, и҆ ѿпꙋ́стъ ма́лый.

[зрѝ] Вѣ́домо да є҆́сть, Ꙗ҆́кѡ послѣ́дованїе мине́и, прилꙋча́ющихсѧ ст҃ы́хъ въ сꙋббѡ́ты и҆ недѣ̑ли ст҃ы́ѧ м҃-цы, пое́тсѧ въ пове́черїѧхъ, и҆лѝ є҆гда̀ и҆зво́литъ є҆кклисїа́рхъ. Та́кѡ твори́мъ во всѣ́хъ пѧтка́хъ въ ве́черъ ст҃ы́ѧ и҆ вели́кїѧ м҃-цы.

Въ сꙋббѡ́тꙋ а҃-ю ст҃ы́хъ постѡ́въ.

На ᲂу҆́трени, по шестоѱа́лмїи пое́мъ Бг҃ъ гдⷭ҇ь, на гла́съ в҃. И҆ глаго́лемъ тропа́рь ст҃а́гѡ ѳео́дѡра: Вє́лїѧ вѣ́ры: два́жды.

Сла́ва, и҆ ны́нѣ, бг҃оро́диченъ: Всѧ̑ па́че смы́сла: и҆ ѻ҆бы̑чныѧ каѳі̑смы.

По а҃-й каѳі́смѣ сѣда́ленъ мч҃нченъ ѻ҆смогла́сника, настоѧ́щагѡ гла́са, съ бг҃оро́дичнымъ. По в҃-й каѳі́смѣ сѣда́ленъ ст҃а́гѡ ѳео́дѡра, гла́съ г҃. Подо́бенъ: Бж҃їѧ вѣ́ры: Кипѧ̀ вѣ́ры правосла́вїемъ: Дрꙋгі́й сѣда́ленъ ст҃а́гѡ: Бж҃е́ственный да́ръ тѧ̀: Бг҃оро́диченъ: Невмѣсти́маго бг҃а: и҆ чте́мъ мꙋче́нїе ст҃а́гѡ. Та́же ѱало́мъ н҃: И҆ канѡ́нъ хра́ма, со і҆рмосо́мъ на ѕ҃: И҆ ст҃а́гѡ ѳео́дѡра два̀, на и҃: а҃-й, гла́съ д҃: в҃-й, гла́съ ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ ст҃а́гѡ, гла́съ и҃. Подо́бенъ: Премꙋ́дрости сло́ва: Бж҃е́ственное всеѻрꙋ́жїе воспрїи́мъ:

Сла́ва: Маѯїмїа́новыми ласка́ньми: И҆ ны́нѣ: Ꙗ҆́кѡ всенепоро́чнаѧ невѣ́сто творца̀:

По ѕ҃-й пѣ́сни, конда́къ ст҃а́гѡ, гла́съ и҃: Вѣ́рꙋ хрⷭ҇то́вꙋ: И҆ і҆́косъ. и҆ чте́мъ сѷнаѯа́рїй. По ѳ҃-й пѣ́сни, є҆ѯапостїла́рїй ст҃а́гѡ: и҆ бг҃оро́диченъ. На хвали́техъ, стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ:

Сла́ва, гла́съ ѕ҃: Сщ҃е́нїѧ да́ръ: И҆ ны́нѣ: Бцⷣе, ты̀ є҆сѝ лоза̀:

На стїхо́внѣ стїхи̑ры ст҃а́гѡ, гла́съ д҃, самогла́сны, съ припѣ́вы и҆́хъ: а҃-й, Првⷣникъ ꙗ҆́кѡ фі́нїѯъ процвѣте́тъ: в҃-й, Насажде́ни въ домꙋ̀ гдⷭ҇ни:

Сла́ва, гла́съ и҃: Страда́льческимъ мꙋ́жествомъ: И҆ ны́нѣ: Влⷣчце, прїимѝ мл҃твы: и҆ про́чее послѣ́дованїе ᲂу҆́трени. присовокꙋплѧ́емъ и҆ ча́съ а҃-й.

На лїтꙋргі́и и҆з̾ѡбрази́тєльнаѧ.

И҆ канѡ́на ст҃а́гѡ, пѣ́снь г҃-ѧ, и҆ ѕ҃-ѧ.

Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ:

Сті́хъ: Оу҆слы́ши бж҃е гла́съ мо́й:

А҆по́столъ днѐ, ко є҆вре́ємъ, зача́ло т҃г: Многоча́стнѣ и҆ многоѡбра́знѣ: И҆ ст҃а́гѡ, къ тїмоѳе́ю, зача́ло сч҃в: Возмога́й ѡ҆ бл҃года́ти: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ:

Є҆ѵⷢ҇лїе ма́рка, зача́ло і҃: И҆дѧ́ше і҆и҃съ въ сꙋббѡ́ты сквозѣ̀ сѣ̑ѧнїѧ: И҆ ст҃а́гѡ, і҆ѡа́нна, зача́ло н҃в: Сѝ заповѣ́даю ва́мъ:

Прича́стенъ: Въ па́мѧть вѣ́чнꙋю:

а трапе́зѣ чте́мъ сло́во похва́льное ѡ҆ ст҃о́мъ ѳео́дѡрѣ, ст҃а́гѡ григо́рїа нѵ́сскагѡ. И҆ ꙗ҆ди́мъ бо́бъ ѡ҆бваре́нный, съ ма́слинами бѣ́лыми и҆ че́рными, и҆ варе́нїе со є҆ле́емъ: Вїна́ же и҆спива́емъ по красово́лю, ра́ди ст҃а́гѡ. Сїе́ же прїѧ́хомъ ѿ ла́ѵры прпⷣбнагѡ ѻ҆тца̀ на́шегѡ са́ввы, и҆ ѿ бг҃оно́снагѡ ѻ҆тца̀ на́шегѡ є҆ѵѳѵ́мїа.

[зрѝ] Вѣ́дати подоба́етъ, ꙗ҆́кѡ два́жды прїѧ́хомъ ꙗ҆́сти ры̑бы въ се́й вели́кїй по́стъ: въ пра́здникъ бл҃говѣ́щенїѧ, и҆ цвѣтоно́сїѧ.

Въ сꙋббѡ́тꙋ ве́чера, на ма́лѣй вече́рни, ста́вимъ стїхѝ д҃: и҆ пое́мъ стїхѝ подѡ́бныѧ, творе́нїе нїкола́а, гла́съ а҃. Подо́бенъ: Нбⷭ҇ныхъ чинѡ́въ: Ны́нѣ бл҃гоче́стїѧ свѣ́тлость: Сла́ва, и҆ ны́нѣ: Подо́бенъ: Безнача́льнымъ: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Гꙋби́тельства тлетво́рнагѡ: Сла́ва, и҆ ны́нѣ: Подо́бенъ: то́йже: Вознесла̀ є҆сѝ смире́нныхъ: Тропа́рь: Пречⷭ҇томꙋ твоемꙋ̀ ѡ҆́бразꙋ: и҆ ѿпꙋ́стъ.

На вели́цѣй вече́рни, по предначина́тельномъ ѱалмѣ̀, пое́мъ: Бл҃же́нъ мꙋ́жъ: каѳі́смꙋ всю̀. На Гдⷭ҇и воззва́хъ, ста́вимъ стїхѡ́въ і҃: и҆ пое́мъ стїхи̑ры воскрⷭ҇ны г҃, и҆ а҆натѡ́лїевы г҃, и҆ трїѡ́ди д҃, гла́съ ѕ҃. Подо́бенъ: Всю̀ ѿложи́вше: Тѧ̀ непостижи́маго:

Сла́ва, гла́съ в҃: Бл҃года́ть возсїѧ̀ и҆́стины: И҆ ны́нѣ, бг҃оро́диченъ а҃-й гла́са.

На лїті́и стїхи́ра хра́ма. Сла́ва, гла́съ въ ра́дꙋйтесѧ прⷪ҇ро́цы честні́и: И҆ ны́нѣ, бг҃оро́диченъ:

Всѐ ᲂу҆пова́нїе моѐ: На стїхо́внѣ ѻ҆ктѡ́иха. Сла́ва, гла́съ в҃: И҆з̾ нече́стїѧ во бл҃гоче́стїе преше́дше: И҆ ны́нѣ: Ѽ чꙋдесѐ но́вагѡ!

По трист҃о́мъ тропа́рь: Бцⷣе дв҃о ра́дꙋйсѧ: два́жды: и҆ пра́здника: Пречⷭ҇томꙋ твоемꙋ̀ ѡ҆́бразꙋ: є҆ди́ножды.

и҆ ѻ҆бы́чное бл҃гослове́нїе хлѣ́бѡвъ, и҆ раздаѧ́нїе и҆́хъ.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды.

Сла́ва: Пречⷭ҇томꙋ твоемꙋ̀ ѡ҆́бразꙋ: И҆ ны́нѣ, Всѧ̑ па́че смы́сла:

Посе́мъ ѻ҆бы́чное стїхосло́вїе: По а҃-й каѳі́смѣ сѣда́льны воскрⷭ҇ны:

Сла́ва, и҆ ны́нѣ, бг҃оро́диченъ а҃-й гла́са, и҆ чте́нїе во є҆ѵⷢ҇лїи толково́мъ ѡ҆ ст҃ы́хъ і҆кѡ́нахъ, леѡ́нтїа па́пы ри́мскагѡ: є҆гѡ́же нача́ло: Четверодесѧ́тный по́стъ: По в҃-й каѳі́смѣ сѣда́льны воскрⷭ҇ны:

Сла́ва, и҆ ны́нѣ, бг҃оро́диченъ, и҆ чте́нїе тогѡ́жде сло́ва: Непоро́чны съ тропарѝ свои́ми, ѵ҆пакоѝ гла́са, и҆ чте́нїе. Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇но рѧдово́е. Воскрⷭ҇нїе хрⷭ҇то́во: ѱало́мъ н҃.

Сла́ва, гла́съ и҃: Покаѧ́нїѧ ѿве́рзи мѝ двє́ри: И҆ ны́нѣ: На сп҃се́нїѧ стєзѝ: ꙗ҆́кѡ предписа́сѧ въ недѣ́лю мытаре́вꙋ.

Канѡ́нъ воскрⷭ҇нъ, со і҆рмосо́мъ на д҃, и҆ крⷭ҇товоскрⷭ҇нъ на два̀, и҆ бцⷣы на два̀, и҆ трїѡ́ди на ѕ҃, творе́нїе ѳеофа́ново, гла́съ д҃. Катава́сїа: Мо́рѧ чермнꙋ́ю пꙋчи́нꙋ: По г҃-й пѣ́сни, сѣда́льны, гла́съ а҃. Подо́бенъ: Ли́къ а҆́гг҃льскїй: Бж҃е́ственный тво́й зра́къ:

Сла́ва: Зра́ками прⷪ҇ро́кѡвъ: И҆ ны́нѣ: Любо́вїю чⷭ҇таѧ: и҆ чте́нїе. По ѕ҃-й пѣ́сни,

Конда́къ, гла́съ и҃. Неѡпи́санное сло́во ѻ҆́тчее, и҆з̾ тебѐ бцⷣе ѡ҆писа́сѧ воплоща́емь, и҆ ѡ҆скве́рншїйсѧ ѡ҆́бразъ въ дре́внее воѡбрази́въ, бж҃е́ственною добро́тою смѣсѝ: но и҆сповѣ́дающе сп҃се́нїе, дѣ́ломъ и҆ сло́вомъ сїѐ воѡбража́емъ.

И҆ і҆́косъ, и҆ чте́мъ сѷнаѯа́рїй. По ѳ҃-й пѣ́сни, свѣти́ленъ воскрⷭ҇нъ:

Сла́ва, трїѡ́ди. Подо́бенъ: Со ᲂу҆ч҃нкѝ: Взыгра́йте, восплещи́те: И҆ ны́нѣ: Ѻ҆рꙋ̑жїѧ ны́нѣ ѡ҆скꙋдѣ́ша:

На хвали́техъ стїхи̑ры воскрⷭ҇ны д҃, и҆ а҆нато́лїевъ є҆ди́нъ: и҆ трїѡ́ди г҃, гла́съ д҃. Подо́бенъ: Да́лъ є҆сѝ зна́менїе: Въ тебѣ̀ ны́нѣ ра́дꙋетсѧ цр҃ковь: Припѣ́въ глаго́лемъ: И҆сповѣ́мсѧ тебѣ̀ гдⷭ҇и: Припѣ́въ: Возвеселю́сѧ и҆ возра́дꙋюсѧ ѡ҆ тебѣ̀: Та́же припѣ́въ, гла́съ ѕ҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀: и҆ пое́мъ трїѡ́ди самогла́сенъ: Мѡѷсе́й во вре́мѧ воздержа́нїѧ:

Сла́ва, па́ки пое́мъ то́йже самогла́сенъ. И҆ ны́нѣ: Пребл҃гослове́нна є҆сѝ:

Славосло́вїе вели́кое. По трист҃о́мъ тропа́рь воскрⷭ҇нъ. Є҆ктєнїѝ, и҆ ѿпꙋ́стъ, и҆ и҆схожде́нїе въ притво́ръ.

Сла́ва, и҆ ны́нѣ: Стїхи́ра є҆ѵⷢ҇льскаѧ, и҆ поꙋче́нїе стꙋді́тово, и҆ ча́съ а҃.

На а҃-мъ часѣ̀, тропа́рь воскрⷭ҇нъ:

Сла́ва: Пречⷭ҇томꙋ твоемꙋ̀ ѡ҆́бразꙋ: По трист҃о́мъ конда́къ трїѡ́ди, и҆ коне́чный ѿпꙋ́стъ.

На лїтꙋргі́и, бл҃жє́нна гла́са, на ѕ҃: трїѡ́ди пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ пра́здника.

Сла́ва, и҆ ны́нѣ, конда́къ: Неѡпи́санное сло́во:

Прокі́менъ, гла́съ д҃, пѣ́снь ѻ҆тцє́въ: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ:

Сті́хъ: Ꙗ҆́кѡ првⷣнъ є҆сѝ ѡ҆ всѣ́хъ:

А҆по́столъ ко є҆вре́ємъ, зача́ло тк҃ѳ ѿ полꙋ̀: Вѣ́рою мѡѷсе́й вели́къ бы́въ: А҆ллилꙋ́їа, гла́съ д҃: Мѡѷсе́й и҆ а҆арѡ́нъ во і҆ере́ехъ є҆гѡ̀:

Сті́хъ: Призыва́хꙋ гдⷭ҇а:

Є҆ѵⷢ҇лїе і҆ѡа́нна, зача́ло є҃: Восхотѣ̀ і҆и҃съ и҆зы́ти въ галїле́ю:

[зрѝ] Ꙗ҆́кѡ въ недѣ́лѧхъ вели́кїѧ м҃-цы, кромѣ̀ недѣ́ли ва́їй, соверша́етсѧ лїтꙋргі́а вели́кагѡ васі́лїа. Вмѣ́стѡ, Досто́йно: Ѡ҆ тебѣ̀ ра́дꙋетсѧ:

Прича́стенъ: Хвали́те гдⷭ҇а съ нб҃съ: Дрꙋгі́й: Ра́дꙋйтесѧ:

На трапе́зѣ же ꙗ҆ди́мъ варе́нїе съ є҆ле́емъ, а҆ не ры̑бы. А҆́ще же прилꙋчи́тсѧ, пїе́мъ вїно̀ ᲂу҆ста́вленое въ сла́вꙋ бж҃їю, по двѣ̀ ча̑ши: та́кожде и҆ въ ве́черъ по двѣ̀.

Въ тꙋ́южде недѣ́лю ве́чера.

На Гдⷭ҇и воззва́хъ, ста́вимъ стїхѡ́въ і҃: и҆ пое́мъ ѻ҆ктѡ́иха покаѧ́нны д҃: пи́саны въ недѣ́лю ве́чера, на стїхо́внѣ два̀, и҆ въ понедѣ́льникъ на ᲂу҆́трени на стїхо́внѣ два̀, и҆ трїѡ́ди подо́бны г҃: и҆ мине́и ст҃а́гѡ г҃.

Сла́ва, и҆ ны́нѣ, бг҃оро́диченъ.

Вхо́дъ.

Прокі́менъ, гла́съ и҃: Да́лъ є҆сѝ достоѧ́нїе боѧ́щымсѧ тебѐ гдⷭ҇и.

Сті́хъ а҃: Ѿ конє́цъ землѝ къ тебѣ̀ воззва́хъ.

Сті́хъ в҃: Покры́юсѧ въ кро́вѣ кри́лъ твои́хъ.

Сті́хъ г҃: Та́кѡ воспою̀ и҆́мени твоемꙋ̀ во вѣ́ки.

И҆ па́ки: Да́лъ є҆сѝ достоѧ́нїе:

[зрѝ] Подоба́етъ вѣ́дати, Ꙗ҆́кѡ сїѧ̀ два̀ вели́кїѧ прокі́мены, є҆́же є҆́сть: Не ѿвратѝ лица̀ твоегѡ̀: и҆ Да́лъ є҆сѝ достоѧ́нїе: со стїхѝ и҆́хъ, є҆ди́нъ по є҆ди́номꙋ пое́тсѧ чрез̾ ве́сь ст҃ы́й по́стъ. Начина́емъ ѿ недѣ́ли сы́рныѧ до недѣ́ли ва́їй. Ѿ Сподо́би гдⷭ҇и начина́ютсѧ покло́ны.

Є҆ктенїа̀: И҆спо́лнимъ вече́рнюю моли́твꙋ на́шꙋ:

И҆ посе́мъ соше́дшесѧ ѻ҆́ба ли̑ка, пое́мъ на стїхо́внѣ трїѡ́ди самогла́сенъ днѐ, два́жды, со ѻ҆бы́чными припѣ́вы, и҆ мч҃нченъ.

Сла́ва, и҆ ны́нѣ, бг҃оро́диченъ.

Ны́нѣ ѿпꙋща́еши: Трист҃о́е, и҆ мета̑нїѧ трѝ.

По Ѻ҆́ч҃е на́шъ, і҆ере́й возгла́съ: Ꙗ҆́кѡ твоѐ є҆́сть црⷭ҇тво:

И҆ а҆́бїе тропа́рь: Бцⷣе дв҃о ра́дꙋйсѧ, бл҃года́тнаѧ: И҆ покло́нъ є҆ди́нъ.

Сла́ва, Крⷭ҇ти́телю хрⷭ҇то́въ: Покло́нъ. И҆ ны́нѣ, Моли́те ѡ҆ на́съ: Покло́нъ.

Та́же, Под̾ твоѐ бл҃гоꙋтро́бїе: без̾ покло́на. Гдⷭ҇и поми́лꙋй, м҃.

Сла́ва, и҆ ны́нѣ, Чⷭ҇тнѣ́йшꙋю: и҆ про́чее всѐ, ꙗ҆́коже предписа́сѧ въ недѣ́лю сыропꙋ́стнꙋю ве́чера.

[зрѝ] Въ сїю́ же а҃-ю недѣ́лю на повече́рїи пое́мъ канѡ́нъ ст҃ы́хъ прⷪ҇ро́кѡвъ, гла́съ є҃, творе́нїе ѳеофа́на.

[зрѝ] Подоба́етъ вѣ́дати: Ꙗ҆́коже ᲂу҆каза́сѧ слꙋ́жба преше́дшїѧ недѣ́ли, на вече́рни: си́це до́лжно є҆́сть быва́ти и҆ въ про́чихъ недѣ́лѧхъ ст҃ы́ѧ четыредесѧ́тницы на вече́рнѧхъ.

Въ понедѣ́льникъ в҃-ѧ седми́цы постѡ́въ.

Соверша́етсѧ послѣ́дованїе всѐ, ꙗ҆́коже пред̾ѧвле́нно въ понедѣ́льникъ а҃-ѧ седми́цы поста̀. На ᲂу҆́трени, по ѻ҆бы́чныхъ каѳі́смахъ, и҆ на часѣ́хъ чте́нїе ѻ҆бы́чное. [Н]ѣ́цыи же чтꙋ́тъ сказа́нїе ѡ҆ чꙋдесѣ́хъ прест҃ы́ѧ влⷣчцы на́шеѧ бцⷣы и҆ приснодв҃ы мр҃і́и, ꙗ҆̀же пречⷭ҇тою и҆ чⷭ҇тно́ю і҆кѡ́ною є҆ѧ̀ содѣ́ѧшасѧ, ꙗ҆̀же и҆ ри́млѧныни нарица́тисѧ ѡ҆бы́кши. Є҆́же и҆ лѣ́потственнѡ чита́тисѧ въ собо́рныхъ и҆ прихо́дскихъ хра́мѣхъ. [зрѝ] Да бꙋ́детъ же и҆ сїѐ вѣ́домо, ꙗ҆́кѡ ѿ сегѡ̀ понедѣ́льника в҃-ѧ седми́цы поста̀, пою́тсѧ въ повече́рїихъ канѡ́ны мине́и, и҆мꙋ́щихъ прилꙋчи́тисѧ ст҃ы́хъ, ѿ сꙋббѡ́ты ла́заревы до недѣ́ли ѳѡмины̀, съ канѡ́ны бг҃оро́дичными. Пре́жде пое́мъ канѡ́нъ бцⷣы, та́же мине́и. По г҃-й пѣ́сни, конда́къ и҆ сѣда́ленъ мине́и. По ѕ҃-й пѣ́сни, сѣда́ленъ бцⷣы.

[зрѝ] Потре́бно є҆́сть, и҆ сїѐ вѣ́дати, Ꙗ҆́кѡ въ пѧтцѣ́хъ ст҃ы́ѧ четыредесѧ́тницы, пое́мъ ча́съ г҃, и҆ ѕ҃, вкꙋ́пѣ же и҆ ѳ҃. На вече́рни же ѡ҆ставлѧ́емъ покло́ны ѿ нача́ла, кромѣ̀ тре́хъ вели́кихъ.

Въ пѧто́къ в҃-ѧ седми́цы ве́чера,

Стїхосло́вимъ каѳі́смꙋ, Ко гдⷭ҇ꙋ внегда̀ скорбѣ́ти мѝ: И҆ по ко́емждо а҆нтїфѡ́нѣ, твори́тъ і҆ере́й є҆ктенїю̀ ма́лꙋю. И҆ пое́мъ Гдⷭ҇и воззва́хъ, во гла́съ самогла́сна трїѡ́ди. И҆ про́чаѧ слꙋ́жба ве́чера, и҆ лїтꙋргі́и преждесщ҃е́нныѧ, ꙗ҆́коже и҆з̾ѧви́сѧ въ сре́дꙋ и҆ пѧто́къ мимоше́дшїѧ седми́цы.

[зрѝ] А҆́ще ли не бꙋ́детъ преждесщ҃е́нныѧ, по ѻ҆бы́чной каѳі́смѣ, пое́мъ Гдⷭ҇и воззва́хъ, во гла́съ ѻ҆ктѡ́иха, и҆ стїхи̑ры на ѕ҃: мч҃нчны гла́са трѝ: и҆ мине́ист҃а́гѡ подо́бны г҃.

Сла́ва, ст҃а́гѡ, а҆́ще є҆́сть: А҆́ще ли нѝ, Сла́ва, ме́ртвенъ дамаски́новыхъ ѻ҆ктѡ́иха. И҆ ны́нѣ, бг҃оро́диченъ а҃-й гла́са.

На стїхо́внѣ трїѡ́ди самогла́сенъ днѐ, два́жды: и҆ мч҃нченъ, въ то́йже гла́съ: пи́саны на Гдⷭ҇и воззва́хъ.

Сла́ва, и҆ ны́нѣ, бг҃оро́диченъ, въ то́йже гла́съ.

Ны́нѣ ѿпꙋща́еши: Трист҃о́е. Тропа́рь: А҆пⷭ҇ли, мч҃нцы и҆ прⷪ҇ро́цы:

Сла́ва, Помѧнѝ гдⷭ҇и: И҆ ны́нѣ, бг҃оро́диченъ, Мт҃и ст҃а́ѧ:

Та́же, є҆ктенїа̀: Поми́лꙋй на́съ бж҃е: и҆ покло́ны г҃ вели̑кїѧ, и҆ мл҃тва: Всест҃а́ѧ трⷪ҇це: Бꙋ́ди и҆́мѧ гдⷭ҇не: и҆ ѱало́мъ, Бл҃гословлю̀ гдⷭ҇а: и҆ ѿпꙋ́стъ.

[зрѝ] До́лжно є҆́сть вѣ́дати, ꙗ҆́кѡ си́це соверша́етсѧ слꙋ́жба во всѧ̑ пѧткѝ, ѿ сеѧ̀ седми́цы, да́же до пѧтка̀ пѧ́тыѧ седми́цы поста̀. На повече́рїи, по а҃-мъ трист҃о́мъ, Тропа́рь: А҆пⷭ҇ли, мч҃нцы:

Сла́ва, Помѧнѝ гдⷭ҇и: И҆ ны́нѣ, бг҃оро́диченъ, Мт҃и ст҃а́ѧ:

По в҃-мъ трист҃о́мъ, Поми́лꙋй на́съ гдⷭ҇и: По Досто́йно, и҆ по трист҃о́мъ, конда́къ, Со ст҃ы́ми ᲂу҆поко́й: И҆ ѿпꙋ́стъ ма́лый.

Въ сꙋббѡ́тꙋ в҃-ю постѡ́въ на ᲂу҆́трени.

Пое́мъ А҆ллилꙋ́їа, на гла́съ в҃-й. Стїхѝ зрѝ въ сꙋббѡ́тꙋ мѧсопꙋ́стнꙋю, ли́стъ тч҃є. Тропа́рь, гла́съ в҃: А҆пⷭ҇ли, мч҃нцы и҆ прⷪ҇ро́цы: два́жды.

Сла́ва, ме́ртвенъ: Помѧнѝ гдⷭ҇и: И҆ ны́нѣ, Мт҃и ст҃а́ѧ:

и҆ стїхосло́вимъ каѳі́смꙋ ѕ҃і: Речѐ гдⷭ҇ь гдⷭ҇еви моемꙋ̀: и҆ сѣда́льны мч҃нчны ѻ҆ктѡ́иха г҃, и҆ ме́ртвенъ.

Сла́ва, и҆ ны́нѣ, бг҃оро́диченъ а҃-й настоѧ́щагѡ гла́са.

И҆ чте́нїе въ шестодне́вѣ златоꙋ́стовѣ.

Та́же, Бл҃же́ни непоро́чнїи, пое́мъ на гла́съ є҃, съ припѣ́вы: Бл҃гослове́нъ є҆сѝ гдⷭ҇и: Раздѣлѧ́емъ на двѣ̀ статїи̑.

І҆ере́й же кади́тъ посредѝ каѳі́смы, и҆ твори́тъ є҆ктенїю̀ ѡ҆ ᲂу҆со́пшихъ. пи́сана ли́стъ тч҃є.

Та́же дрꙋгі́й ли́къ пое́тъ, Тво́й є҆́смь а҆́зъ: Припѣ́въ: Сп҃се, сп҃си́ мѧ. По концѣ́ же каѳі́смы, пое́мъ тропарѝ поко́йны, гла́съ є҃: Ст҃ы́хъ ли́къ: и҆ прѡ́чаѧ. По сконча́нїи же тропаре́й є҆ктенїа̀ ѡ҆ ᲂу҆со́пшихъ.

и҆ мл҃тва, Бж҃е дꙋхѡ́въ:

і҆ере́й помина́етъ всѣ́хъ преждеꙋсо́пшихъ ѻ҆тє́цъ и҆ бра́тїй на́шихъ.

Мы́ же глаго́лемъ: Гдⷭ҇и поми́лꙋй, м҃.

Та́же сѣда́ленъ, гла́съ є҃: Поко́й сп҃се на́шъ:

Сла́ва, и҆ ны́нѣ, Ѿ дв҃ы возсїѧ́вый мі́рꙋ:

и҆ чте́нїе ѿ шестодне́вника златоꙋ́стагѡ пе́рвыѧ кни́ги.

ѱало́мъ н҃. Пое́мъ канѡ́нъ мине́и, со і҆рмосо́мъ на ѕ҃: и҆ хра́ма ст҃а́гѡ на д҃. Глаго́летсѧ бо і҆рмо́съ и҆ тропа́рь без̾ стїхѡ́въ, и҆ держи́мъ стїхѝ, ѿ Тогда̀ потща́шасѧ влады̑ки: Не стїхосло́вимъ бо пѣ́сней ѿ нача́ла до ѕ҃-ѧ пѣ́сни, во всѣ́хъ сꙋббѡ́тахъ ст҃ы́ѧ м҃-цы, до а҆ка́ѳїста.

А҆́ще ли хра́мъ хрⷭ҇то́въ, и҆лѝ бцⷣы, пое́мъ канѡ́нъ хра́ма со і҆рмосо́мъ на ѕ҃, и҆ мине́и на д҃. По г҃-й пѣ́сни, є҆ктенїа̀ ѻ҆бы́чнаѧ, а҆ не за ᲂу҆поко́й. Конда́къ и҆ і҆́косъ ст҃а́гѡ, та́же сѣда́ленъ.

Сла́ва, и҆ ны́нѣ, бг҃оро́диченъ.

Ѿ ѕ҃-ѧ же пѣ́сни начина́етсѧ четверопѣ́снецъ трїѡ́ди: тогда̀ ѡ҆ставлѧ́етсѧ канѡ́нъ хра́ма. Пѣ́сни же ѕ҃-ѧ, ꙗ҆̀же во ѱалти́ри не глаго́лемъ, но пое́мъ ю҆̀ всю̀ въ запѣ́вѣхъ. Предварѧ́етъ же канѡ́нъ мине́и ст҃а́гѡ со і҆рмосо́мъ на ѕ҃: и҆ трїѡ́ди пое́мъ д҃ тропарѝ і҆ѡ́сифа, и҆ ѕ҃ тропаре́й ѳео́дѡра стꙋді́та.

Сла́ва, трⷪ҇ченъ: И҆ ны́нѣ, бг҃оро́диченъ.

Та́же ѻ҆́ба ли̑ка пою́тъ и҆ ѻ҆́ба стїха̀, мч҃нченъ и҆ ме́ртвенный, съ припѣ́вы и҆́хъ: та́же і҆рмо́съ трїѡ́ди. Пото́мъ є҆ктенїа̀ за ᲂу҆поко́й, и҆ конда́къ: Со ст҃ы́ми ᲂу҆поко́й: И҆ і҆́косъ.

и҆ чте́мъ про́логъ. И҆ стїхосло́вимъ з҃-ю пѣ́снь во ѱалти́ри: Бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ: и҆ пое́мъ і҆рмо́съ з҃-ѧ пѣ́сни, мине́и: та́же трїѡ́ди подо́бнѣ и҃-ю и҆ ѳ҃-ю пѣ́снь, по чи́нꙋ и҆́хъ. Свѣти́ленъ гла́са. На хвали́техъ, стїхи̑ры на д҃, мч҃нчны ѻ҆ктѡ́иха,

Сла́ва, самогла́сенъ ме́ртвенъ: И҆ ны́нѣ, бг҃оро́диченъ.

На стїхо́внѣ ме́ртвены стїхи̑ры господи́на ѳеофа́на, прилꙋчи́вшагѡсѧ гла́са:

Сла́ва, и҆ ны́нѣ, бг҃оро́диченъ.

По Бл҃го є҆́сть, и҆ по трист҃о́мъ тропа́рь: А҆пⷭ҇ли, мч҃нцы и҆ прⷪ҇ро́цы:

Сла́ва, Помѧнѝ гдⷭ҇и: И҆ ны́нѣ, Мт҃и ст҃а́ѧ:

є҆ктенїа̀, и҆ ча́съ а҃-й, и҆ ѿпꙋ́стъ.

На лїтꙋргі́и бл҃жє́нна гла́са на ѕ҃. По вхо́дѣ тропа́рь: А҆пⷭ҇ли, мч҃нцы и҆ прⷪ҇ро́цы: Дрꙋгі́й, Помѧнѝ гдⷭ҇и:

Сла́ва, конда́къ, Со ст҃ы́ми ᲂу҆поко́й: И҆ ны́нѣ, бг҃оро́диченъ: Тебѐ и҆ стѣ́нꙋ:

Прокі́менъ: Весели́тесѧ ѡ҆ гдⷭ҇ѣ:

Сті́хъ: Бл҃же́ни, и҆́хже ѡ҆ста́вишасѧ беззакѡ́нїѧ: Дрꙋгі́й за ᲂу҆поко́й: Дꙋ́шы и҆́хъ во бл҃ги́хъ водворѧ́тсѧ.

А҆по́столъ днѐ, ко є҆вре́ємъ, зача́ло т҃ѳ: Блюди́те, да не когда̀ бꙋ́детъ: И҆ за ᲂу҆поко́й къ солꙋ́нѧнѡмъ, зача́ло с҃ѻ: Не хощꙋ̀ ва́съ не вѣ́дѣти ѡ҆ ᲂу҆ме́ршихъ: А҆ллилꙋ́їа: Воззва́ша пра́веднїи:

Сті́хъ: Бл҃же́ни, ꙗ҆̀же и҆збра́лъ:

Є҆ѵⷢ҇лїе ма́рка, зача́ло ѕ҃: И҆́де і҆и҃съ въ пꙋ́сто мѣ́сто: Дрꙋго́е і҆ѡа́нна, зача́ло ѕ҃і: А҆ми́нь а҆ми́нь глаго́лю ва́мъ, ꙗ҆́кѡ слꙋ́шаѧй словесѐ моегѡ̀:

Прича́стенъ: Ра́дꙋйтесѧ пра́веднїи: Дрꙋгі́й: Бл҃же́ни, ꙗ҆̀же и҆збра́лъ:

[зрѝ] Си́це ᲂу҆́бѡ быва́етъ слꙋ́жба за ᲂу҆поко́й, въ трѝ сꙋббѡ́ты ст҃а́гѡ и҆ вели́кагѡ поста̀, є҆гда̀ ни є҆ди́нъ є҆́сть ѿ трїе́хъ пра́здникѡвъ: Прⷣте́чевъ, Ст҃ы́хъ четы́редесѧть мч҃нкъ, и҆лѝ Бл҃говѣ́щенїе.

Пое́тсѧ настоѧ́щее послѣ́дованїе, во ст҃ы́хъ ѻ҆тца̀ на́шегѡ григо́рїа а҆рхїепⷭ҇кпа, ѳессалоні́тскаго чꙋдотво́рца, и҆ пала́мы, сложе́нное ѡ҆ всест҃ѣ́йшагѡ патрїа́рха фїлоѳе́а.

Въ сꙋббѡ́тꙋ ве́чера, на ма́лѣй вече́рни по ѻ҆бы́чаю.

На вели́цѣй вече́рни, по предначина́тельномъ ѱалмѣ̀: Бл҃же́нъ мꙋ́жъ, каѳі́сма всѧ̀. На Гдⷭ҇и воззва́хъ ста́вимъ стїхѡ́въ и҆ пое́мъ стїхи̑ры воскрⷭ҇ны гла́са, г҃: и҆ а҆натѡ́лїевы г҃: и҆ настоѧ́щыѧ ст҃а́гѡ на д҃, гла́съ в҃. Подо́бенъ: Кі́ими похва́льными: Кі́ими бл҃гопохвале́нїй пѣ́сньми:

Сла́ва, гла́съ ѕ҃: Прпⷣбне требл҃же́нне: И҆ ны́нѣ, бг҃оро́диченъ а҃-й гла́са.

На лїті́и стїхи́ра хра́ма, по ѻ҆бы́чаю:

Сла́ва, и҆ ны́нѣ, бг҃оро́диченъ:

На стїхо́внѣ стїхи̑ры по а҆лфави́тꙋ.

Сла́ва, гла́съ и҃: Бо́дрый ѧ҆зы́къ тво́й ко ᲂу҆чи́тельствꙋ: И҆ ны́нѣ: Безневѣ́стнаѧ дв҃о:

По Ны́нѣ ѿпꙋща́еши: ѿпꙋсти́тельный: Бцⷣе дв҃о: три́жды, и҆ про́чее послѣ́дованїе бдѣ́нїѧ по ѻ҆бы́чаю.

На ᲂу҆́трени по шестоѱа́лмїи, на Бг҃ъ гдⷭ҇ь: Тропа́рь воскрⷭ҇нъ, два́жды.

Сла́ва,

Тропа́рь ст҃а́гѡ, гла́съ и҃: Правосла́вїѧ свѣти́льниче, цр҃кве ᲂу҆твержде́нїе и҆ ᲂу҆чи́телю, мона́хѡвъ добро́то, бг҃осло́вѡвъ побо́рниче непребори́мый, григо́рїе чꙋдотво́рче, ѳессалоні́тскаѧ похвало̀, проповѣ́дниче бл҃года́ти, моли́сѧ вы́нꙋ сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ:

И҆́же на́съ ра́ди: По каѳі́смахъ сѣда́льны воскрⷭ҇ны съ бг҃оро́дичны и҆́хъ: и҆ чтє́нїѧ ѻ҆бы̑чнаѧ. По непоро́чныхъ тропарѝ: А҆́гг҃льскїй собо́ръ: и҆ прѡ́чаѧ. ѵ҆пакоѝ гла́са. Степє́нна и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: и҆ ѱало́мъ н҃.

Сла́ва, преждепи́саннаѧ стїхи́ра: Покаѧ́нїѧ ѿве́рзи мѝ двє́ри: и҆ прѡ́чаѧ. Канѡ́нъ воскрⷭ҇нъ, со і҆рмосо́мъ на д҃, и҆ трїѡ́ди на д҃: и҆ ст҃а́гѡ на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни,

Конда́къ, гла́съ д҃: Ны́нѣ вре́мѧ дѣ́лательное ꙗ҆ви́сѧ, при две́рехъ сꙋ́дъ, воста́немъ ᲂу҆́бѡ постѧ́щесѧ, принесе́мъ сле́зы ᲂу҆миле́нїѧ, ми́лостынѧми, зовꙋ́ще: согрѣши́хомъ па́че песка̀ морска́гѡ. но ѡ҆сла́би содѣ́телю всѣ́хъ, ꙗ҆́кѡ да прїи́мемъ нетлѣ̑нныѧ вѣнцы̀.

Та́же сѣда́ленъ ст҃а́гѡ, гла́съ д҃. Подо́бенъ: Ско́рѡ предварѝ: Пре́лесть попали́лъ є҆сѝ:

Сла́ва, то́йже: И҆ ны́нѣ: Ско́рѡ прїимѝ влⷣчце:

По ѕ҃-й пѣ́сни,

Конда́къ ст҃а́гѡ, гла́съ и҃. Подо́бенъ: Взбра́нной: Премꙋ́дрости сщ҃е́нный и҆ бж҃е́ственный ѻ҆рга́нъ, бг҃осло́вїѧ свѣ́тлꙋю согла́снѡ трꙋбꙋ̀, воспѣва́емъ тѧ̀ григо́рїе бг҃оглаго́льниче. но ꙗ҆́кѡ ᲂу҆́мъ ᲂу҆мꙋ̀ пе́рвомꙋ предстоѧ́й къ немꙋ̀ ᲂу҆́мъ на́шъ ѻ҆́тче наста́ви, да зове́мъ: ра́дꙋйсѧ проповѣ́дниче бл҃года́ти.

И҆ і҆́косъ и҆ чте́мъ сѷнаѯа́рїй. По ѳ҃-й пѣ́сни, свѣти́ленъ воскрⷭ҇нъ.

Сла́ва, ст҃а́гѡ. Подо́бенъ: Со ᲂу҆ч҃нкѝ: Ра́дꙋйсѧ ѻ҆тцє́въ похвало̀: И҆ ны́нѣ, бг҃оро́диченъ: Влⷣчце, всѣ́хъ влⷣчце:

На хвали́техъ стїхи̑ры воскрⷭ҇ны д҃, и҆ а҆нато́лїевъ а҃: и҆ настоѧ́щыѧ г҃, гла́съ а҃. Подо́бенъ: Нбⷭ҇ныхъ чинѡ́въ: Бл҃же́ннꙋю въ мі́рѣ жи́знь соверши́въ: Припѣ́въ а҃: Оу҆ста̀ првⷣнагѡ поꙋча́тсѧ премꙋ́дрости: в҃: Оу҆слы́шите сїѧ̑ всѝ ꙗ҆зы́цы:

Та́же, Припѣ́въ: Воскрⷭ҇нѝ гдⷭ҇и бж҃е мо́й: и҆ пое́мъ стїхи́рꙋ самогла́снꙋ трїѡ́ди, гла́съ ѕ҃: Во тьмѣ̀ согрѣше́нїй ходѧ́щымъ:

Сла́ва, па́ки тꙋ́южде стїхи́рꙋ, высоча́йшимъ гла́сомъ. И҆ ны́нѣ, Пребл҃гослове́нна є҆сѝ бцⷣе дв҃о:

и҆ про́чее вослѣ́дованїе ᲂу҆́трени, ꙗ҆́коже пред̾ꙋказа́сѧ въ недѣ́лю правосла́вїѧ.

На лїтꙋргі́и, бл҃жє́нна гла́са, на ѕ҃: и҆ ст҃а́гѡ пѣ́снь г҃-ѧ, на д҃. По вхо́дѣ тропа́рь воскрⷭ҇нъ, и҆ хра́ма бцⷣы, и҆ хра́ма ст҃а́гѡ, и҆лѝ ст҃ы́ѧ, та́же ст҃а́гѡ. Конда́къ трїѡ́ди, и҆ хра́ма ст҃а́гѡ, и҆лѝ ст҃ы́ѧ.

Сла́ва, ст҃а́гѡ: И҆ ны́нѣ, хра́ма бцⷣы: А҆ и҆дѣ́же нѣ́сть хра́ма бцⷣы, глаго́лемъ конда́къ трїѡ́ди.

Прокі́менъ, гла́съ є҃: Ты̀ гдⷭ҇и сохрани́ши ны̀:

Сті́хъ: Сп҃си́ мѧ гдⷭ҇и, ꙗ҆́кѡ ѡ҆скꙋдѣ̀ прпⷣбный: и҆ ст҃а́гѡ, гла́съ а҃: Оу҆ста̀ моѧ̑ возглаго́лютъ премꙋ́дрость:

А҆по́столъ къ є҆вре́ємъ, зача́ло т҃д: Въ нача́лѣ ты̀ гдⷭ҇и зе́млю ѡ҆снова́лъ є҆сѝ: и҆ ст҃а́гѡ, къ є҆вре́ємъ, зача́ло ти҃і: Тако́въ на́мъ подоба́ше а҆рхїере́й: А҆ллилꙋ́їа гла́са.

Є҆ѵⷢ҇лїе ма́рка, зача́ло з҃: Вни́де і҆и҃съ въ капернаꙋ́мъ: Дрꙋго́е і҆ѡа́нна, зача́ло л҃ѕ: А҆́зъ є҆́смь две́рь:

Бж҃е́ственнаѧ лїтꙋргі́а вели́кагѡ васі́лїа.

Прича́стенъ: Хвали́те гдⷭ҇а: Дрꙋгі́й: Въ па́мѧть вѣ́чнꙋю: На трапе́зѣ же ꙗ҆ди́мъ, и҆́миже и҆ въ а҃-ю недѣ́лю ᲂу҆дово́лихомсѧ, во сла́вꙋ бж҃їю.

Въ тꙋ́южде недѣ́лю ве́чера пое́мъ всѐ послѣ́дованїе,

Ꙗ҆́коже пред̾ꙋказа́сѧ въ мимоше́дшꙋю недѣ́лю. На вече́рни по вхо́дѣ прокі́менъ, гла́съ и҃: Не ѿвратѝ лица̀ твоегѡ̀: со стїхѝ є҆гѡ̀.

Тоѧ́жде тре́тїѧ недѣ́ли,

Въ пѧто́къ ве́чера, на Гдⷭ҇и воззва́хъ, трїѡ́ди самогла́сенъ, гла́съ з҃: Ꙗ҆́кѡ блꙋ́дный ѿстꙋпи́хъ: два́жды. и҆ мч҃нчны д҃, ѻ҆ктѡ́иха, и҆ мине́и д҃.

Сла́ва, ме́ртвенъ: И҆ ны́нѣ, бг҃оро́диченъ а҃-й, гла́са, и҆ чтє́нїѧ.

[зрѝ] А҆́ще же нѣ́сть преждесщ҃е́нныѧ, тогда̀ стїхи̑ры на ѕ҃: мч҃нчны ѻ҆ктѡ́иха г҃, и҆ мине́и г҃.

Сла́ва, ме́ртвенъ, И҆ ны́нѣ, бг҃оро́диченъ а҃-й, и҆ чтє́нїѧ. На стїхо́внѣ самогла́сенъ днѐ два́жды: и҆ мч҃нченъ.

Сла́ва, и҆ ны́нѣ, бг҃оро́диченъ: Ты̀ є҆сѝ бг҃ъ на́шъ:

Въ пѧто́къ се́й на повече́рїи пое́мъ слꙋ́жбꙋ мине́и, и҆мꙋ́щагѡ ст҃а́гѡ прилꙋчи́тисѧ въ недѣ́лю тре́тїю поста̀.

Подоба́етъ вѣ́дати: Ꙗ҆́кѡ въ по́стъ, во всѣ́хъ пѧтка́хъ, на повече́рїи твори́тъ і҆ере́й ѿпꙋ́стъ ма́лый.

Въ сꙋббѡ́тꙋ г҃-ѧ седми́цы постѡ́въ.

Пое́тсѧ всѐ вослѣ́дованїе, ꙗ҆́коже и҆ во вторꙋ́ю сꙋббѡ́тꙋ ꙗ҆вле́нно є҆́сть.

На лїтꙋргі́и, бл҃жє́нна гла́са. Прокі́менъ днѐ, и҆ за ᲂу҆поко́й.

А҆по́столъ ко є҆вре́ємъ, зача́ло тк҃є: Воспомина́йте пє́рвыѧ дни̑ ва́шѧ: Дрꙋгі́й къ солꙋ́нѧнѡмъ, зача́ло с҃ѻ: Не хощꙋ̀ ва́съ не вѣ́дѣти ѡ҆ ᲂу҆ме́ршихъ: А҆ллилꙋ́їа днѐ, и҆ за ᲂу҆поко́й.

Є҆ѵⷢ҇лїе ма́рка, зача́ло и҃: Ми́мѡ грѧды́й і҆и҃съ: И҆ дрꙋго́е за ᲂу҆поко́й, і҆ѡа́нна, зача́ло ѕ҃і.

Прича́стенъ: Ра́дꙋйтесѧ: Дрꙋгі́й: Бл҃же́ни, ꙗ҆̀же и҆збра́лъ:

поклоне́нїе пра́зднꙋемъ чⷭ҇тна́гѡ и҆ животворѧ́щагѡ крⷭ҇та̀.

Въ сꙋббѡ́тꙋ ве́чера, на ма́лѣй вече́рни, стїхи̑ры на д҃, гла́съ ѕ҃. Подо́бенъ: А҆́гг҃льскїѧ пред̾иди́те си̑лы: Ны́нѣ а҆́гг҃льскаѧ вѡ́инства: Сла́ва, и҆ ны́нѣ: Є҆гда̀ крⷭ҇тꙋ̀ пригвожде́нна: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Разрѣши́вшесѧ ᲂу҆́зъ: Сла́ва, и҆ ны́нѣ, подо́бенъ то́йже: Вознесе́на на крⷭ҇тѣ̀: Та́же, Ны́нѣ ѿпꙋща́еши: По трист҃о́мъ тропа́рь, гла́съ а҃: Сп҃сѝ гдⷭ҇и лю́ди твоѧ̑: и҆ ѿпꙋ́стъ. По ѿпꙋ́стѣ же вхо́дитъ і҆ере́й со є҆кклисїа́рхомъ въ сосꙋдохрани́льницꙋ: и҆ взе́млютъ чⷭ҇тно́е дре́во, пред̾идꙋ́щꙋ свѣ́щникꙋ и҆ кади́лꙋ, пою́щымъ тропа́рь: Сп҃сѝ гдⷭ҇и лю́ди твоѧ̑: и҆ прино́сѧтъ на ст҃ꙋ́ю трапе́зꙋ, и҆ вжига́ютъ свѣщꙋ̀ на всю̀ но́щь, ꙗ҆́коже предписа́сѧ септе́мврїа въ г҃і де́нь, ве́чера.

На вели́цѣй вече́рни, по ѻ҆бы́чномъ ѱалмѣ̀, Бл҃же́нъ мꙋ́жъ: каѳі́сма всѧ̀. На Гдⷭ҇и воззва́хъ ста́вимъ стїхѡ́въ і҃: и҆ пое́мъ стїхи̑ры воскрⷭ҇ны г҃: и҆ а҆натѡ́лїевы г҃: и҆ чⷭ҇тна́гѡ крⷭ҇та̀ д҃: гла́съ є҃. Подо́бенъ: Ра́дꙋйсѧ: Возсїѧ́й гдⷭ҇ень крⷭ҇те:

Сла́ва, гла́съ г҃: хрⷭ҇тѐ бж҃е на́шъ: И҆ ны́нѣ, бг҃оро́диченъ а҃-й гла́са.

Вхо́дъ. Прокі́менъ днѐ. На лїті́и стїхи́ра хра́ма.

Сла́ва, и҆ ны́нѣ, гла́съ є҃: Зрѧ́щи тѧ̀ тва́рь: На стїхо́внѣ ѻ҆ктѡ́иха.

Сла́ва, и҆ ны́нѣ, гла́съ д҃: Пособи́вый гдⷭ҇и кро́ткомꙋ дв҃дꙋ:

По Ны́нѣ ѿпꙋща́еши, и҆ по трист҃о́мъ тропа́рь: Бцⷣе дв҃о ра́дꙋйсѧ: два́жды:

и҆ крⷭ҇та̀: Сп҃сѝ гдⷭ҇и лю́ди твоѧ̑: є҆ди́ножды:

и҆ бл҃гослове́нїе хлѣ́бѡвъ, по ѻ҆бы́чаю.

и҆ чте́нїе.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды:

Сла́ва: Сп҃сѝ гдⷭ҇и лю́ди твоѧ̑: И҆ ны́нѣ, бг҃оро́диченъ: Гаврїи́лꙋ вѣща́вшꙋ:

и҆ ѻ҆бы̑чныѧ каѳі̑смы. По каѳі́смахъ сѣда́льны воскрⷭ҇ны съ бг҃оро́дичны и҆́хъ.

и҆ чте́нїе во є҆ѵⷢ҇лїи толково́мъ. [П]о полѷеле́и, а҆́ще гдѣ̀ хра́мъ чⷭ҇тна́гѡ крⷭ҇та̀, сѣда́ленъ крⷭ҇та̀, гла́съ и҃. Подо́бенъ: Повелѣ́нное: Въ раѝ ᲂу҆́бѡ пре́жде: Сла́ва, и҆ ны́нѣ, то́йже. А҆́ще же нѝ пое́мъ непоро́чны, и҆ тропарѝ: А҆́гг҃льскїй собо́ръ: и҆ чте́нїе. Степє́нна и҆ прокі́менъ гла́са. Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: ѱало́мъ н҃. Стїхи́ра, гла́съ и҃: Покаѧ́нїѧ ѿве́рзи мѝ: и҆ прѡ́чаѧ, ꙗ҆́коже ᲂу҆каза́сѧ въ недѣ́лю мытаре́вꙋ.

Канѡ́нъ воскрⷭ҇нъ со і҆рмосо́мъ на д҃: и҆ бцⷣы на в҃: и҆ трїѡ́ди на и҃, гла́съ а҃. Катава́сїа: Бж҃е́ственнѣйшїй проѡбразѝ: ѻ҆́ба ли̑ка вкꙋ́пѣ. По г҃-й пѣ́сни, сѣда́ленъ крⷭ҇та̀ въ трїѡ́ди, гла́съ ѕ҃: Крⷭ҇тъ тво́й гдⷭ҇и ѡ҆ст҃и́сѧ:

Сті́хъ: Возноси́те гдⷭ҇а бг҃а на́шего: Дне́сь прⷪ҇ро́ческое и҆спо́лнисѧ сло́во:

Сла́ва: То́кмѡ водрꙋзи́сѧ дре́во: И҆ ны́нѣ: Бцⷣе дв҃о:

По ѕ҃-й пѣ́сни,

Конда́къ, гла́съ з҃, самогла́сенъ: Не ктомꙋ̀ пла́менное ѻ҆рꙋ́жїе храни́тъ вра́тъ є҆де́мскихъ, на ты̑ѧ бо на́йде пресла́вный соꙋ́зъ, дре́во крⷭ҇тное: сме́ртное жа́ло и҆ а҆́дова побѣ́да прогна́сѧ. предста́лъ бо є҆сѝ сп҃се мо́й, вопїѧ̀ сꙋ́щымъ во а҆́дѣ: вни́дите па́ки въ ра́й.

И҆ і҆́косъ: и҆ чте́мъ сѷнаѯа́рїй. По ѳ҃-й пѣ́сни, свѣти́ленъ воскрⷭ҇нъ:

Сла́ва, крⷭ҇та̀. Подо́бенъ: Со ᲂу҆ч҃нкѝ: Крⷭ҇тъ хрⷭ҇то́въ чⷭ҇тны́й: И҆ ны́нѣ, бг҃оро́диченъ: Дре́вꙋ, на не́мже всечⷭ҇таѧ:

На хвали́техъ стїхи̑ры воскрⷭ҇ны, д҃: и҆ крⷭ҇та̀ г҃, на д҃, гла́съ д҃. Подо́бенъ: Ꙗ҆́кѡ до́блѧ: Во гла́сѣхъ воскли́кнемъ: повторѧ́юще ю҆̀. Припѣ́вы же глаго́лемъ: Возноси́те гдⷭ҇а бг҃а на́шего: Бг҃ъ же цр҃ь на́шъ пре́жде вѣ́ка: Та́же глаго́лемъ припѣ́въ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀: и҆ пое́мъ самогла́сенъ трїѡ́ди, гла́съ и҃: Высокомꙋ́драгѡ ра́зꙋма:

Сла́ва, па́ки то́йже. И҆ ны́нѣ: Пребл҃гослове́нна є҆сѝ бцⷣе дв҃о:

Славосло́вїе вели́кое тихогла́снѡ.

Тогда̀ прихо́дитъ і҆ере́й ѡ҆болче́нъ во всѧ̑ сщ҃е́нничєскїѧ ѻ҆дє́жды. и҆лѝ а҆́ще гдѣ̀ бꙋ́детъ старѣ́йшїй, то̀ ѿ пе́рвѣйшагѡ во свои́хъ и҆̀мъ мѣ́стѣхъ до́лжно є҆́сть семꙋ̀ бы́ти. и҆ взе́мъ кади́льницꙋ, кади́тъ ст҃ꙋ́ю трапе́зꙋ, и҆ чⷭ҇тны́й крⷭ҇тъ.

Та́же под̾е́млетъ є҆го̀ на ді́скосѣ со храни́льницею на главꙋ̀ свою̀, и҆ и҆схо́дитъ сѣ́верными две́рьми, пред̾идꙋ́щымъ є҆мꙋ̀ свѣща́мъ двꙋ́мъ, и҆ кади́льницѣ, и҆ ѿхо́дитъ до црⷭ҇кихъ вра́тъ.

Сконча́нꙋ же бы́вшꙋ славосло́вїю и҆ трист҃о́мꙋ, глаго́летъ і҆ере́й: Премꙋ́дрость, про́сти.

и҆ начина́емъ тропа́рь: Сп҃сѝ гдⷭ҇и лю́ди твоѧ̑: три́жды.

И҆ прихо́дитъ і҆ере́й носѧ̀ чⷭ҇тны́й крⷭ҇тъ, пред̾ ст҃ы̑ѧ двє́ри, и҆ та́мѡ ᲂу҆гото́ванꙋ четвероно́жцꙋ, полага́етсѧ верхꙋ̀ є҆гѡ̀ чⷭ҇тны́й крⷭ҇тъ: и҆ ѿве́рзъ храни́льницꙋ, кади́тъ крⷭ҇тоѡбра́знѡ ѿ четы́рехъ стра́нъ.

И҆ а҆́бїе пое́мъ

Тропа́рь, гла́съ ѕ҃: Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ. три́жды.

Та́же пою́тъ и҆ ли́кове велегла́снѡ три́жды.

и҆ начина́ютъ покланѧ́тисѧ, а҆́ще во ѻ҆би́тели и҆гꙋ́менъ, и҆лѝ и҆́нъ пе́рвенствꙋѧй во сщ҃е́нныхъ. Та́кожде и҆ про́чїи сщ҃е́нницы, покланѧ́ющесѧ пред̾ чⷭ҇тны́мъ крⷭ҇то́мъ, два́жды: цѣлꙋ́ютъ же пре́жде старѣ́йшїй, и҆ по цѣлова́нїи па́ки покланѧ́ютсѧ є҆ди́ножды. та́кожде творѧ́тъ и҆ про́чїи сщ҃е́нницы, десна́ѧ страна̀ и҆ лѣ́ваѧ. та́кожде прихо́дѧтъ и҆ бра́тїѧ два̀ два̀, покланѧ́ющесѧ по чи́нꙋ и҆́хъ.

Кла́нѧющымсѧ же бра́тїѧмъ, пое́мъ стїхи̑ры самогла́сны сїѧ̑, гла́съ в҃: Прїиди́те вѣ́рнїи животворѧ́щемꙋ дре́вꙋ поклони́мсѧ: И҆́нъ, гла́съ и҃: Дне́сь влⷣка тва́ри:

Сла́ва, гла́съ то́йже: Дне́сь неприкоснове́нный сꙋщество́мъ: И҆ ны́нѣ, гла́съ то́йже: Дне́сь прⷪ҇ро́ческое и҆спо́лнисѧ сло́во:

Та́же є҆ктєнїѝ, и҆ ѿпꙋ́стъ: и҆ стїхи́ра є҆ѵⷢ҇льскаѧ въ притво́рѣ, и҆ ча́съ а҃-й.

На а҃-мъ часѣ̀, тропа́рь воскрⷭ҇нъ.

Сла́ва, крⷭ҇та̀: И҆ ны́нѣ, бг҃оро́диченъ часѡ́въ.

По трист҃о́мъ, конда́къ крⷭ҇та̀: и҆ про́чее по ѻ҆бы́чаю. и҆ соверше́нный ѿпꙋ́стъ.

На лїтꙋргі́и, бл҃жє́нны гла́са, на ѕ҃: и҆ ѿ канѡ́на крⷭ҇та̀ пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ крⷭ҇та̀,

Сла́ва, и҆ ны́нѣ, конда́къ крⷭ҇та̀.

Вмѣ́стѡ же трист҃а́гѡ пое́мъ: Крⷭ҇тꙋ̀ твоемꙋ̀ покланѧ́емсѧ влⷣко:

Прокі́менъ, гла́съ ѕ҃: Сп҃сѝ гдⷭ҇и лю́ди твоѧ̑:

Сті́хъ: Къ тебѣ̀ гдⷭ҇и воззовꙋ̀:

А҆по́столъ ко є҆вре́ємъ, зача́ло та҃і. И҆мꙋ́ще а҆рхїере́а вели́ка: А҆ллилꙋ́їа, гла́съ и҃: Помѧнѝ со́нмъ тво́й:

Сті́хъ: Бг҃ъ же цр҃ь на́шъ пре́жде вѣ́ка:

Є҆ѵⷢ҇лїе ма́рка, зача́ло л҃з: И҆́же хо́щетъ по мнѣ̀ и҆тѝ, да ѿве́ржетсѧ себѐ:

Прича́стенъ: Зна́менасѧ на на́съ:

На трапе́зѣ же ᲂу҆чрежда́емсѧ, ꙗ҆́коже ᲂу҆каза́сѧ въ а҃-ю недѣ́лю правосла́вїѧ.

Въ тꙋ́южде недѣ́лю ве́чера.

Послѣ́дованїе пое́мъ, ꙗ҆́коже и҆ въ пе́рвыхъ недѣ́лѧхъ ᲂу҆каза́сѧ. По вхо́дѣ прокі́менъ, гла́съ и҃: Да́лъ є҆сѝ достоѧ́нїе: и҆ про́чыѧ стїхѝ:

[зрѝ] Подоба́етъ вѣ́дати: Ꙗ҆́кѡ поклоне́нїе чⷭ҇тна́гѡ крⷭ҇та̀ твори́мъ по д҃ днѝ, по преждепи́санномꙋ ѡ҆́бразꙋ: си́рѣчь, въ недѣ́лю, въ понедѣ́льникъ, въ сре́дꙋ и҆ пѧто́къ: Быва́етъ же си́це: Въ понедѣ́льникъ на а҃-мъ часѣ̀ твори́мъ поклоне́нїе чⷭ҇тно́мꙋ крⷭ҇тꙋ̀, ꙗ҆́коже и҆ въ недѣ́лю, по напи́санномꙋ ѡ҆́бразꙋ, пою́ще вмѣ́стѡ: Стѡпы̀ моѧ̑: Крⷭ҇тꙋ̀ твоемꙋ̀ покланѧ́емсѧ влⷣко: Покланѧ́ющымсѧ бра́тїѧмъ, пое́мъ стїхи̑ры, гла́съ в҃: Прїиди́те вѣ́рнїи: и҆ прѡ́чаѧ. По трист҃о́мъ глаго́лемъ конда́къ крⷭ҇та̀: та́кожде и҆ на про́чихъ часѣ́хъ.

Во вто́рникъ тоѧ́же седми́цы ве́чера.

По ѻ҆бы́чной каѳі́смѣ, на Гдⷭ҇и воззва́хъ, ста́вимъ стїхѡ́въ ѕ҃: и҆ пое́мъ стїхи̑ры подо́бны трїѡ́ди днѐ г҃: и҆ чⷭ҇тна́гѡ крⷭ҇та̀, г҃: гла́съ д҃.

Подо́бенъ: Да́лъ є҆сѝ зна́менїе:

Сла́ва, и҆ ны́нѣ, гла́съ и҃: Дне́сь влⷣка тва́ри:

Та́же прокі́менъ, и҆ чте́нїе днѐ: и҆ па́ки прокі́менъ, и҆ чте́нїе. На стїхо́внѣ трїѡ́ди самогла́сенъ, гла́съ г҃: Побѣжда́ѧ мытарѧ̀: два́жды, и҆ мч҃нченъ.

Сла́ва, и҆ ны́нѣ, крⷭ҇та̀, гла́съ є҃: Зрѧ́щи тѧ̀ тва́рь:

Канѡ́нъ мине́и ст҃а́гѡ глаго́лемъ на повече́рїи.

Въ сре́дꙋ д҃-ѧ седми́цы на ᲂу҆́трени:

Ѻ҆бы́чное вослѣ́дованїе, ꙗ҆́коже на всѧ́къ де́нь. Канѡ́нъ крⷭ҇та̀ со і҆рмосо́мъ на ѕ҃: и҆ трипѣ́снецъ, по ѻ҆бы́чаю. По г҃-й пѣ́сни, сѣда́ленъ крⷭ҇та̀, гла́съ ѕ҃: Дне́сь прⷪ҇ро́ческое:

Сла́ва, Крⷭ҇тъ тво́й гдⷭ҇и: И҆ ны́нѣ: То́кмѡ водрꙋзи́сѧ:

По ѕ҃-й пѣ́сни, конда́къ, гла́съ з҃: Не ктомꙋ̀ пла́менное ѻ҆рꙋ́жїе: пи́санъ въ недѣ́лю. По ѳ҃-й пѣ́сни, свѣти́ленъ. Подо́бенъ: Дх҃омъ: Преполове́нїемъ постѡ́въ:

Сла́ва, и҆ ны́нѣ, крⷭ҇тобг҃оро́диченъ: Безневѣ́стнаѧ:

На стїхо́внѣ трїѡ́ди самогла́сенъ днѐ, два́жды, и҆ мч҃нченъ.

Сла́ва, гла́съ а҃: Преполови́вше пꙋчи́нꙋ воздержа́нїѧ. И҆ ны́нѣ, па́ки то́йже.

Твори́мъ же и҆ поклоне́нїе крⷭ҇тꙋ̀ на а҃-мъ часѣ̀, ꙗ҆́коже пре́жде и҆з̾ѧви́сѧ ѡ҆ се́мъ въ понедѣ́льникъ. покланѧ́ющымсѧ бра́тїѧмъ, пое́мъ преднапи̑санныѧ стїхи̑ры, гла́съ в҃: Прїиди́те вѣ́рнїи, и҆ про́чее, и҆ ѿпꙋ́стъ.

Въ тꙋ́южде сре́дꙋ ве́чера,

Ѻ҆бы́чнаѧ каѳі́сма. на Гдⷭ҇и воззва́хъ: ста́вимъ стїхѡ́въ і҃. и҆ пое́мъ трїѡ́ди самогла́сенъ, гла́съ д҃. По́стъ бл҃ги́хъ хода́тай: є҆ди́ножды. И҆́нъ, гла́съ є҃: Въ та́йнѣ добродѣ́тєли дѣ́лающїи: є҆ди́ножды. и҆ мч҃нченъ: и҆ подо́бны трїѡ́ди г҃, и҆ мине́и на д҃.

Сла́ва, и҆ ны́нѣ, крⷭ҇та̀, гла́съ и҃: Дне́сь неприкоснове́нный сꙋщество́мъ:

Вхо́дъ, прокі́менъ, и҆ чте́нїе днѐ, и҆ про́чее преждесщ҃е́нныхъ. Ѿ сегѡ̀ днѐ глаго́летсѧ на лїтꙋргі́ахъ ѡ҆глаше́ннаѧ є҆ктенїа̀ сꙋгꙋ́баѧ, на преждесщ҃е́нныхъ, ꙗ҆́коже писа́сѧ въ слꙋже́бникахъ.

[зрѝ] Вѣ́домо же да бꙋ́детъ и҆ сїѐ: Ꙗ҆́кѡ въ сїю̀ средопо́стнꙋю сре́дꙋ, на трапе́зѣ не досто́итъ разрѣша́ти на є҆ле́й и҆ вїно̀, ꙗ҆́кѡ па́че де́нь пла́ча є҆́сть, а҆ не ра́дости: поне́же и҆ Бг҃ъ гдⷭ҇ь не пое́тсѧ на ᲂу҆́трени въ сїю̀ сре́дꙋ, но А҆ллилꙋ́їа.

Въ пѧто́къ же тоѧ̀ седми́цы:

Пое́мъ слꙋ́жбꙋ всю̀ ве́черъ и҆ ᲂу҆́трѡ, ꙗ҆́коже въ сре́дꙋ предписа́сѧ, и҆ по ѿпꙋ́стѣ часѡ́въ быва́етъ поклоне́нїе чⷭ҇тно́мꙋ крⷭ҇тꙋ̀, пою́щымъ на́мъ стїхи̑ры самогла́сны, ꙗ҆́коже пре́жде и҆з̾ѧви́сѧ: и҆ взима́етсѧ і҆ере́емъ чⷭ҇тны́й крⷭ҇тъ, и҆ ѿно́ситсѧ во ст҃ы́й ѻ҆лта́рь.

Въ сꙋббѡ́тꙋ д҃-ю постѡ́въ.

Пое́тсѧ возслѣ́дованїе, ꙗ҆́коже и҆ въ минꙋ́вшихъ сꙋббѡ́тахъ, всѐ непремѣ́ннѡ. На вече́рни, и҆ на ᲂу҆́трени, и҆ про́чее всѐ, ꙗ҆́коже ᲂу҆каза́сѧ въ сꙋббѡ́тꙋ вторꙋ́ю поста̀.

На лїтꙋргі́и, бл҃жє́нна гла́са. Прокі́менъ днѐ: и҆ за ᲂу҆поко́й.

А҆по́столъ днѐ, ко є҆вре́ємъ, зача́ло тг҃і: Надѣ́емсѧ ѡ҆ ва́съ возлю́бленнїи: Дрꙋгі́й за ᲂу҆поко́й, къ корі́нѳѧнѡмъ, зача́ло рѯ҃г: Пе́рвый человѣ́къ ѿ землѝ пе́рстенъ: А҆ллилꙋ́їа, ме́ртвыхъ. Є҆ѵⷢ҇лїе днѐ, ма́рка, зача́ло л҃а: И҆зы́де і҆и҃съ ѿ предѣ̑лъ тѵ́рскихъ и҆ сїдѡ́нскихъ: и҆ за ᲂу҆поко́й, і҆ѡа́нна, зача́ло ѕ҃і: А҆ми́нь а҆ми́нь глаго́лю ва́мъ: ꙗ҆́кѡ слꙋша́ѧй словесѐ моегѡ̀:

Прича́стенъ: Ра́дꙋйтесѧ: Дрꙋгі́й: за ᲂу҆поко́й: Бл҃же́ни, ꙗ҆̀же и҆збра́лъ:

Въ сꙋббѡ́тꙋ ве́чера, на ма́лѣй вече́рни, ѻ҆бы́чное.

На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны г҃: и҆ а҆натѡ́лїевы д҃: и҆ мине́и г҃. И҆ні́и же послѣ́днѣйшїи ѡ҆предѣли́ша пѣ́тисѧ послѣ́дованїю ст҃а́гѡ і҆ѡа́нна лѣ́ствичника. Стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! Ѻ҆́тче і҆ѡа́нне прпⷣбне:

Сла́ва, гла́съ є҃: Прпⷣбне ѻ҆́тче: И҆ ны́нѣ, бг҃оро́диченъ а҃-й гла́са.

На лїті́и стїхи̑ры по ѻ҆бы́чаю. На стїхо́внѣ стїхи̑ры ѻ҆ктѡ́иха.

Сла́ва, ст҃а́гѡ, гла́съ в҃: На землѝ а҆́гг҃ла: И҆ ны́нѣ, Ѽ чꙋдесѐ но́вагѡ!

Ны́нѣ ѿпꙋща́еши: та́же, Бцⷣе дв҃о: три́жды.

и҆ бл҃гослове́нїе хлѣ́бѡвъ, по ѻ҆бы́чаю. А҆ и҆дѣ́же нѣ́сть бдѣ́нїѧ, глаго́лемъ тропа́рь воскрⷭ҇нъ. Сла́ва,

Тропа́рь ст҃а́гѡ, гла́съ а҃: Пꙋсты́нный жи́тель, и҆ въ тѣлесѝ а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ бг҃оно́се ѻ҆́тче на́шъ і҆ѡа́нне: посто́мъ, бдѣ́нїемъ, мл҃твою, нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ къ тебѣ̀. сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

И҆ ны́нѣ, бг҃оро́диченъ.

На ᲂу҆́трени, по ѻ҆бы́чаю послѣ́дованїй. Канѡ́ны: воскрⷭ҇ный съ бг҃оро́дичнымъ на ѕ҃: и҆ трїѡ́ди на д҃, гла́съ є҃: и҆ ст҃а́гѡ на д҃, гла́съ и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни,

Конда́къ ст҃а́гѡ, гла́съ д҃. Подо́бенъ: Ꙗ҆ви́лсѧ є҆сѝ: На высотѣ̀ гдⷭ҇и воздержа́нїѧ, и҆́стинна тѧ̀ положѝ, ꙗ҆́коже ѕвѣздꙋ̀ неле́стнꙋю, свѣтоводѧ́щꙋю концы̀, наста́вниче і҆ѡа́нне ѻ҆́тче на́шъ.

Сѣда́ленъ, гла́съ є҃. Подо́бенъ: Стра́нное: Пречⷭ҇тый крⷭ҇тъ тво́й:

Сла́ва, прпⷣбнагѡ, гла́съ д҃. Подо́бенъ: Вознесы́йсѧ: Добродѣ́тельми къ нб҃сѝ возсїѧ́вый: И҆ ны́нѣ: На прⷭ҇то́лѣ херꙋві́мскомъ сѣдѧ́й:

По ѕ҃-й пѣ́сни, конда́къ и҆ і҆́косъ воскрⷭ҇нъ.

и҆ чте́мъ сѷнаѯа́рїй.

По ѳ҃-й пѣ́сни, Свѣти́ленъ воскрⷭ҇нъ:

Сла́ва, прпⷣбнагѡ: Подо́бенъ: Жєны̀ ᲂу҆слы́шите: Мі́ра бл҃гостра́стїѧ: И҆ ны́нѣ: Гдⷭ҇ьтвеннѡ бцⷣꙋ тѧ̀ и҆сповѣ́дꙋемъ:

На хвали́техъ стїхи̑ры воскрⷭ҇ны д҃: и҆ а҆натѡ́лїевы д҃.

Та́же глаго́лемъ припѣ́въ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀: И҆ пое́мъ самогла́сенъ трїѡ́ди, гла́съ а҃: Прїиди́те дѣ́лаимъ:

Сла́ва, па́ки то́йже. И҆ ны́нѣ: Пребл҃гослове́нна є҆сѝ:

Славосло́вїе. вели́кое, и҆ ѿпꙋ́стъ. и҆ и҆схожде́нїе въ притво́ръ,

Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ѡ҆глаше́нїе, и҆ про́чее послѣ́дованїе, ꙗ҆́кѡ ѻ҆бы́чно.

На лїтꙋргі́и, бл҃жє́нна гла́са: Прокі́менъ гла́са, и҆ прпⷣбнагѡ: Восхва́лѧтсѧ прпⷣбнїи во сла́вѣ: А҆по́столъ днѐ, ко є҆вре́ємъ, зача́ло тд҃і: А҆враа́мꙋ ѡ҆бѣтова́ѧ бг҃ъ: И҆ ст҃а́гѡ, ко є҆фесе́ємъ, зача́ло ск҃ѳ: Ꙗ҆́кѡ ча̑да свѣ́та ходи́те: А҆ллилꙋ́їа гла́са, и҆ ст҃а́гѡ.

Сті́хъ: Насажде́ни въ домꙋ̀ гдⷭ҇ни:

Є҆ѵⷢ҇лїе ма́рка, зача́ло м҃: Человѣ́къ нѣ́кїй прїи́де ко і҆и҃сꙋ: И҆ прпⷣбнагѡ, матѳе́а, зача́ло і҃: По і҆и҃сѣ и҆до́ша наро́ди мно́зи:

Прича́стенъ: Хвали́те гдⷭ҇а: Дрꙋгі́й: Въ па́мѧть вѣ́чнꙋю:

На трапе́зѣ ᲂу҆чрежда́емсѧ, ꙗ҆́коже пред̾из̾ѧви́сѧ въ мимоше́дшихъ недѣ́лѧхъ.

Въ тꙋ́южде недѣ́лю ве́чера.

На Гдⷭ҇и воззва́хъ, ста́вимъ стїхѡ́въ і҃: и҆ пое́мъ ѻ҆ктѡ́иха гла́са покаѧ́нны д҃, пи́саны въ недѣ́лю на стїхо́внѣ, два̀, и҆ въ понедѣ́льникъ на ᲂу҆́трени на стїхо́внѣ в҃. и҆ трїѡ́ди подо́бны г҃: и҆ мине́и ст҃а́гѡ г҃. Вхо́дъ, прокі́менъ вели́кїй, гла́съ и҃. Не ѿвратѝ лица̀ твоегѡ̀: со стїхѝ. и҆ про́чаѧ слꙋ́жба, ꙗ҆́коже предписа́сѧ.

Слꙋ́жбꙋ мине́и прилꙋчи́вшагѡсѧ ст҃а́гѡ въ четверто́къ вели́кагѡ канѡ́на пое́мъ во вто́рникъ на повече́рїи.

Оу҆ка́зъ ѡ҆ каѳі́смахъ є҃-ѧ седми́цы вели́кагѡ поста̀, ка́кѡ глаго́лати, предписа́сѧ, ли́стъ л҃в.

Въ сре́дꙋ пѧ́тыѧ седми́цы ве́чера:

Зво́нъ въ кра̑сныѧ: та́кожде и҆ въ четверто́къ ко ᲂу҆́трени и҆ вече́рни.

Въ сре́дꙋ ве́чера,

Стїхосло́вимъ каѳі́смꙋ рѧдовꙋ́ю седмꙋ́ю. На Гдⷭ҇и воззва́хъ стїхи̑ры трїѡ́ди: самогла́сенъ днѐ, два́жды, гла́съ и҃: Мои́ми помышле́нїи: и҆ мч҃нченъ: и҆ подо́бны г҃. И҆ посе́мъ и҆́ны стїхи̑ры по а҆лфави́тꙋ, к҃д, вели́кагѡ канѡ́на: творе́нїе кѵ́ръ а҆ндре́а кри́тскагѡ. И҆ твори́мъ на кі́йждо сті́хъ по г҃ покло́ны, гла́съ д҃. Подо́бенъ: Хотѣ́хъ слеза́ми ѡ҆мы́ти: Начина́емъ же припѣ́вы: ѿ Падꙋ́тъ во мре́жꙋ свою̀: Є҆гда́ же сконча́ютсѧ припѣ́вы: припѣва́емъ къ про́чымъ: Сла́ва тебѣ̀ бж҃е на́шъ, сла́ва тебѣ̀. На послѣ́днемъ же пое́мъ вы́шшимъ гла́сомъ:

Сла́ва: Ѽ неизрече́ннагѡ твоегѡ̀: И҆ ны́нѣ, бг҃оро́диченъ: Ѽ неизрече́ннагѡ снизхожде́нїѧ:

Вхо́дъ. Свѣ́те ти́хїй: прокі́менъ, парємїѝ, и҆ чте́нїе. и҆ па́ки прокі́менъ, и҆ чте́нїе. Да и҆спра́витсѧ мл҃тва моѧ̀: и҆ про́чее послѣ́дованїе преждесщ҃е́нныхъ.

[зрѝ] А҆́ще ли не бꙋ́детъ преждесщ҃е́нныѧ: На Гдⷭ҇и воззва́хъ: пое́мъ трїѡ́ди подо́бны г҃, и҆ стїхи̑ры к҃д, вели́кагѡ канѡ́на: и҆ про́чее. Прокі́менъ, и҆ чтє́нїѧ. На стїхо́внѣ трїѡ́ди, самогла́сенъ днѐ, два́жды, и҆ мч҃нченъ:

Сла́ва, и҆ ны́нѣ, бг҃оро́диченъ.

На трапе́зѣ разрѣша́емъ на є҆ле́й, и҆ вїна̀ причаща́емсѧ трꙋда̀ ра́ди бдѣ́ннагѡ, хотѧ́щагѡ бы́ти: Внима́ющїи же сп҃сти́сѧ, воздержа́нїю прилѣжа́тъ: Мно́жайшїи же постꙋ̀ нелицемѣ́рнꙋ. Повече́рїе же глаго́лемъ ма́лое въ ке́ллїахъ без̾ покло́нѡвъ. По трист҃о́мъ конда́къ а҆ндре́ева канѡ́на. Та́кожде и҆ полꙋ́нощницꙋ.

Въ четверто́къ пѧ́тыѧ недѣ́ли ст҃ы́хъ постѡ́въ.

Кле́плетъ въ д҃-й ча́съ но́щи, и҆ собра́вшымсѧ на́мъ въ цр҃ковь, быва́етъ нача́ло ѿ і҆ере́а, по ѻ҆бы́чаю, и҆ глаго́лемъ: Цр҃ю̀ нбⷭ҇ный: Трист҃о́е, и҆ Ѻ҆́ч҃е на́шъ: Гдⷭ҇и поми́лꙋй, в҃і.

Сла́ва, и҆ ны́нѣ, Прїиди́те поклони́мсѧ, и҆ про́чыѧ два̀ ѱалма̀, ѳ҃і и҆ к҃: и҆ ѻ҆бы̑чныѧ тропарѝ, и҆ є҆ктенїа̀.

и҆ посе́мъ глаго́лемъ шестоѱа́лмїе. И҆ по ѱалмѣ́хъ пое́мъ А҆ллилꙋ́їа, и҆ тро́ичны гла́са, ꙗ҆́кѡ ѻ҆бы́чай. И҆ стїхосло́вимъ каѳі́смꙋ є҆ди́нꙋ ѻ҆смꙋ́ю. И҆ сѣда́льны ѻ҆ктѡ́иха.

Сла́ва, и҆ ны́нѣ, бг҃оро́диченъ. И҆ чте́мъ житїѐ преподо́бныѧ марі́и, на двѣ̀ статїѝ.

Та́же ѱало́мъ н҃. Пѣ́сней не стїхосло́вимъ. И҆ а҆́бїе начина́емъ вели́кїй канѡ́нъ ко́снѡ, и҆ съ сокрꙋше́ннымъ се́рдцемъ и҆ гла́сомъ, творе́нїе ст҃а́гѡ а҆ндре́а кри́тскагѡ, і҆еросолѵ́мскагѡ, гла́съ ѕ҃. і҆рмо́съ: Помо́щникъ и҆ покрови́тель: по два́жды. Пото́мъ тропарѝ, творѧ́ще на кі́йждо мета̑нїѧ г҃ и҆ припѣва́юще: Поми́лꙋй мѧ̀ бж҃е, поми́лꙋй мѧ̀.

[зрѝ] Вѣ́домо же бꙋ́ди: Є҆гда̀ є҆ди́нъ ли́къ пое́тъ, тогда̀ дрꙋгі́й твори́тъ мета̑нїѧ, бл҃гочи́нїѧ ра́ди. Є҆гда́ же прїи́детъ канѡ́нъ прпⷣбныѧ мр҃і́и, и҆ глаго́лемъ къ стїхѡ́мъ тѣ́мъ припѣ́въ: Прпⷣбнаѧ ма́ти мр҃і́е, молѝ бг҃а ѡ҆ на́съ. Къ стїхѡ́мъ же прпⷣбнагѡ а҆ндре́а, припѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ. По г҃-й пѣ́сни, і҆рмо́съ: Оу҆твердѝ гдⷭ҇и на ка́мени: Сѣда́ленъ а҆пⷭ҇лѡвъ, гла́съ и҃. Подо́бенъ: Воскрⷭ҇лъ є҆сѝ ѿ гро́ба:

Сла́ва, дрꙋгі́й, гла́съ то́йже. Подо́бенъ: Повелѣ́нное: И҆ ны́нѣ, бг҃оро́диченъ. И҆ чте́мъ ѡ҆ста́вшее житїѧ̀ прпⷣбныѧ мр҃і́и.

Та́же трипѣ́снецъ глаго́лемъ по ѻ҆бы́чаю, без̾ мета́нїй. і҆рмосѡ́въ же ᲂу҆ трипѣ́снца не пое́мъ: и҆ Сла́ва, и҆ ны́нѣ, не глаго́лемъ. Припѣва́емъ же къ стїхѡ́мъ: Ст҃і́и а҆пⷭ҇ли моли́те бг҃а ѡ҆ на́съ. Та́кожде и҆ на и҃-й пѣ́сни, и҆ ѳ҃-й. Є҆гда́ же трипѣ́снецъ и҆зглаго́летсѧ, тогда̀ пое́мъ і҆рмо́съ вели́кагѡ канѡ́на. И҆ по ѕ҃-й пѣ́сни, покрыва́емъ тѣ́мже і҆рмосо́мъ. Конда́къ, гла́съ ѕ҃: Дꙋшѐ моѧ̀, дꙋшѐ моѧ̀: пи́санъ въ понедѣ́льникъ а҃-ѧ седми́цы на повече́рїи. И҆ і҆́косъ, и҆ чте́мъ сѷнаѯа́рїй. Посе́мъ бл҃жє́нна вели́кагѡ канѡ́на съ мета́нїи: Та́же седма́ѧ пѣ́снь, и҆ прѡ́чаѧ. По и҃-й пѣ́сни, Хва́лимъ бл҃гослови́мъ: и҆ па́ки і҆рмо́съ. Посе́мъ пое́мъ, Чⷭ҇тнѣ́йшꙋю херꙋві̑мъ: По ѳ҃-й пѣ́сни і҆рмо́съ: Безсѣ́меннагѡ зача́тїѧ: Свѣти́ленъ трⷪ҇ченъ гла́са, ꙗ҆́кѡ ѻ҆бы́чно. На стїхо́внѣ самогла́сенъ днѐ два́жды, и҆ мч҃нченъ:

Сла́ва, и҆ ны́нѣ, бг҃оро́диченъ.

Совокꙋплѧ́емъ же и҆ а҃-й ча́съ, без̾ каѳі́смы: Стїхосло́вимъ же тꙋ̀ каѳі́смꙋ въ то́йже четверто́къ, на вече́рни, вмѣ́стѡ: Ко гдⷭ҇ꙋ внегда̀ скорбѣ́ти мѝ: На всѣ́хъ часѣ́хъ по трист҃о́мъ конда́къ: Дꙋшѐ моѧ̀, дꙋшѐ моѧ̀:

Въ сі́й же четверто́къ.

Всю̀ слꙋ́жбꙋ пое́мъ поско́рѡ, трꙋда̀ ра́ди бдѣ́ннагѡ. Соверша́етсѧ же слꙋ́жба преждеѡсщ҃е́нныхъ, въ не́йже прїꙋдосто́ившїисѧ причаща́ютсѧ ст҃ы́хъ хрⷭ҇то́выхъ та́инствъ. На трапе́зѣ же ꙗ҆ди́мъ є҆ле́й, и҆ вїно̀ пїе́мъ, трꙋда̀ ра́ди бы́вшаго. Нѣ́цыи же ᲂу҆ста́вы разрѣша́ти то́чїю на вїно̀ попꙋща́ютъ, на є҆ле́й же не ѡ҆ставлѧ́ютъ. Во ст҃ы́ѧ же горы̀ тѵ́пїцѣ разсꙋжда́етъ: На ст҃ы́хъ мч҃нкъ м҃, На прⷣте́чевы главы̀ ѡ҆брѣ́тенїе, Въ сре́дꙋ крⷭ҇топокло́ннꙋю, На вели́кїй канѡ́нъ, и҆ на несѣда́льное, ꙗ҆́сти два̀ варе́нїѧ со є҆ле́емъ, и҆ и҆спива́ти по двѣ̀ ча́ши вїна̀.

Въ пѧто́къ є҃-ѧ седми́цы ве́чера,

Ѻ҆бы́чнаѧ каѳі́сма: На Гдⷭ҇и воззва́хъ, ста́вимъ стїхѡ́въ і҃: и҆ пое́мъ трїѡ́ди самогла́сенъ днѐ, два́жды, и҆ мч҃нченъ. Та́же пое́мъ стїхи̑ры пра́здника прест҃ы́ѧ бцⷣы, г҃: творѧ́ще ѧ҆̀ з҃, гла́съ ѕ҃. Подо́бенъ: Всю̀ ѿложи́вше: Совѣ́тъ превѣ́чный:

Сла́ва, и҆ ны́нѣ, пра́здника, гла́съ в҃: Є҆́же ѿ вѣ́ка та́инство:

Вхо́дъ. Свѣ́те ти́хїй: прокі́менъ, и҆ чтє́нїѧ днѐ.

А҆́ще ли хра́мъ похвалы̀ бцⷣы: Чте́мъ и҆ пра́здника чтє́нїѧ г҃: пи́саны на ᲂу҆спе́нїе бцⷣы, и҆ про́чее послѣ́дованїе преждеѡсщ҃е́нныхъ.

[зрѝ] А҆́ще ли не соверша́етсѧ преждесщ҃е́ннаѧ: На Гдⷭ҇и воззва́хъ, пое́мъ стїхи̑ры пра́здника бцⷣы на и҃: гла́съ ѕ҃. Подо́бенъ: Всю̀ ѿложи́вше:

Сла́ва, и҆ ны́нѣ, пра́здника.

На стїхо́внѣ, самогла́сенъ днѐ, два́жды. и҆ мч҃нченъ.

Сла́ва, и҆ ны́нѣ, пра́здника, гла́съ д҃:

Ѧ҆зы́ка, є҆гѡ́же не вѣ́дѧше: пи́санъ на хвали́техъ. По трист҃о́мъ тропа́рь: Повелѣ́нное та́йнѡ:

Та́же, є҆ктенїа̀: Поми́лꙋй на́съ бж҃е: и҆ покло́ны г҃. и҆ Всест҃а́ѧ трⷪ҇це: Бꙋ́ди и҆́мѧ гдⷭ҇не: и҆ мета̑нїѧ г҃, и҆ ѱало́мъ: Бл҃гословлю̀ гдⷭ҇а: и҆ ѿпꙋ́стъ.

На трапе́зѣ пїе́мъ вїно̀, трꙋда̀ ра́ди бдѣ́ннагѡ, хотѧ́щагѡ бы́ти. Повече́рїе же ма́лое и҆ полꙋ́нощницꙋ пое́мъ въ ке́ллїахъ. Канѡ́нъ ме́ртвенъ гла́са пое́мъ въ гробни́цѣ.

Въ сꙋббѡ́тꙋ є҃-ѧ седми́цы постѡ́въ.

Ко ᲂу҆́трени зна́менаетъ въ д҃-й ча́съ но́щи, моле́бнагѡ ра́ди послѣ́дованїѧ а҆ка́ѳїста.

и҆ собра́вшымсѧ въ цр҃ковь, бл҃гослови́вшꙋ і҆ере́ю, начина́емъ ᲂу҆́треню, ꙗ҆́коже предписа́сѧ, ли́стъ ул҃г ѡ҆б. і҆ере́й же кади́тъ цр҃ковь всю̀. По шестоѱа́лмїи, Бг҃ъ гдⷭ҇ь, во гла́съ и҃.

и҆ пое́мъ тропарѝ ко́снѡ: Повелѣ́нное та́йнѡ: два́жды.

Сла́ва, и҆ ны́нѣ, то́йже.

Та́же стїхосло́вимъ каѳі́смꙋ ѕ҃і: Речѐ гдⷭ҇ь гдⷭ҇еви моемꙋ̀: и҆ по и҆сполне́нїи сеѧ̀, є҆ктенїа̀ ма́лаѧ. И҆ пое́мъ конда́къ на средѣ̀ со сладкопѣ́нїемъ ко́снѡ, гла́съ и҃: Взбра́нной воево́дѣ побѣди́тєльнаѧ: на не́мже кади́тъ дїа́конъ ст҃ы̑ѧ і҆кѡ́ны, и҆ бра́тїю по чи́нꙋ. На про́чихъ же то́чїю настоѧ́телѧ, и҆ ли́ки, и҆ чте́мъ і҆́косѡвъ и҆ кондакѡ́въ ѕ҃: на чте́нїи стои́мъ. Ті́и же і҆́косы сꙋ́ть по а҆лфави́тꙋ, сі́есть, к҃д, и҆ глаго́лютсѧ ѿ і҆ере́а во ст҃о́мъ ѻ҆лтарѣ̀.

І҆́косъ а҃: А҆́гг҃лъ предста́тель: и҆ про́чее. и҆ па́ки конда́къ: Взбра́нной воево́дѣ: и҆ чте́мъ ѿ сло́ва а҆ка́ѳїста, на даѧ́нїѧ два̀.

Та́же стїхосло́вимъ непоро́чны, и҆ є҆ктенїа̀. И҆ па́ки глаго́лемъ конда́къ: Взбра́нной воево́дѣ: и҆ дрꙋгі̑ѧ і҆́косы, и҆ кондакѝ ѕ҃: І҆́косъ д҃: Слы́шаша па́стырїе: и҆ про́чее.

и҆ па́ки конда́къ: Взбра́нной воево́дѣ: Та́же чте́мъ про́чее сло́ва а҆ка́ѳїста.

ѱало́мъ н҃. И҆ канѡ́ны хра́ма ст҃а́гѡ со і҆рмосо́мъ на ѕ҃: и҆ прест҃ы́ѧ бцⷣы, на ѕ҃, гла́съ д҃: творе́нїе господи́на і҆ѡ́сифа. Катава́сїа: Ѿве́рзꙋ ᲂу҆ста̀ моѧ̑:

А҆́ще ли хра́мъ бцⷣы, пое́мъ канѡ́нъ пра́здника бцⷣы, со і҆рмосо́мъ на в҃і: і҆рмо́съ по два́жды, тропарѝ на і҃.

А҆́ще ли хра́мъ похвалы̀ прест҃ы́ѧ бцⷣы: По ѻ҆бы́чныхъ каѳі́смахъ, и҆ по кондака́хъ, пое́мъ полѷеле́й, и҆ сѣда́ленъ хра́ма бцⷣы.

Сла́ва, и҆ ны́нѣ, то́йже.

и҆ чте́нїе. Степє́нна, а҃-й а҆нтїфѡ́нъ д҃-гѡ гла́са.

Прокі́менъ: Всѧ́кое дыха́нїе:

є҆ѵⷢ҇лїе, и҆ стїхи̑ры хра́ма бцⷣы. Пое́мъ канѡ́нъ хра́ма похвалы̀ бцⷣы, со і҆рмосо́мъ на д҃і: і҆рмо́съ по два́жды, тропарѝ на в҃і.

По г҃-й пѣ́сни, є҆ктенїа̀ ма́лаѧ. и҆ по возгла́сѣ конда́къ: Взбра́нной воево́дѣ: и҆ чте́мъ дрꙋгі̑ѧ ѕ҃ і҆́косѡвъ и҆ кондакѡ́въ. І҆́косъ з҃: Но́вꙋю показа̀ тва́рь: и҆ про́чее.

и҆ па́ки конда́къ: Взбра́нной воево́дѣ: Сѣда́ленъ, гла́съ а҃. Подо́бенъ: Гро́бъ тво́й: Вели́кїй во́инъ:

Сла́ва, и҆ ны́нѣ, то́йже, и҆ па́ки чте́нїе.

На ѕ҃-й пѣ́сни престае́тъ канѡ́нъ хра́ма ст҃а́гѡ: и҆ пое́мъ пра́здника бцⷣы, со і҆рмосо́мъ на ѕ҃: и҆ трїѡ́ди по чи́нꙋ своемꙋ̀. Катава́сїа трїѡ́ди. По ѕ҃-й пѣ́сни, є҆ктенїа̀ ма́лаѧ.

и҆ па́ки пое́мъ конда́къ: Взбра́нной воево́дѣ: и҆ чте́мъ ѡ҆ста́вшыѧсѧ ѕ҃ і҆́косѡвъ и҆ кондакѡ́въ. І҆́косъ і҃: Стѣна̀ є҆сѝ дѣ́вамъ: и҆ про́чее. Конда́къ г҃і: Ѽ всепѣ́таѧ мт҃и: Се́й конда́къ глаго́ли три́жды.

и҆ па́ки чте́тсѧ а҃-й і҆́косъ: А҆́гг҃лъ предста́тель: и҆ па́ки конда́къ: Взбра́нной воево́дѣ:

и҆ чте́мъ сѷнаѯа́рїй. На ѳ҃-й пѣ́сни пое́мъ, Чⷭ҇тнѣ́йшꙋю. По ѳ҃-й пѣ́сни, свѣти́ленъ пра́здника бцⷣы. Подо́бенъ: Жєны̀ ᲂу҆слы́шите: Є҆́же ѿ вѣ́ка дне́сь: три́жды. На хвали́техъ поста́вимъ стїхѝ д҃, и҆ пое́мъ стїхи̑ры бцⷣы, гла́съ д҃. Подо́бенъ: Ꙗ҆́кѡ до́блѧ: Сокрове́нное та́инство:

Сла́ва, и҆ ны́нѣ, гла́съ то́йже:

Ѧ҆зы́ка, є҆гѡ́же не вѣ́дѧше: Славосло́вїе вели́кое. Тропа́рь пра́здника.

є҆ктєнїѝ, и҆ ѿпꙋ́стъ: и҆ ча́съ а҃-й. На а҃-мъ часѣ̀, тропа́рь и҆ конда́къ пра́здника.

На лїтꙋргі́и, бл҃жє́нна ѿ канѡ́на а҆ка́ѳїста. Пѣ́снь г҃ и҆ ѕ҃.

Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а:

Сті́хъ: Ꙗ҆́кѡ призрѣ̀ на смире́нїе рабы̀ своеѧ̀:

А҆по́столъ днѐ, ко є҆вре́ємъ, зача́ло тк҃в: Не въ рꙋкотворє́ннаѧ ст҃а̑ѧ: и҆ бцⷣы, тогѡ́же посла́нїѧ, зача́ло т҃к: И҆мѣ́ѧше пе́рваѧ ски́нїа: А҆ллилꙋ́їа, гла́съ и҃: Воскрⷭ҇нѝ гдⷭ҇и въ поко́й тво́й:

Сті́хъ: Помѧнѝ гдⷭ҇и дв҃да и҆ всю̀ кро́тость є҆гѡ̀.

Є҆ѵⷢ҇лїе днѐ, ма́рка, зача́ло л҃є: И҆зы́де і҆и҃съ и҆ ᲂу҆ч҃нцы̀ є҆гѡ̀: И҆ бцⷣы, лꙋкѝ, зача́ло н҃д: Вни́де і҆и҃съ въ ве́сь нѣ́кꙋю:

рича́стенъ: Ча́шꙋ сп҃се́нїѧ прїимꙋ̀: На трапе́зѣ ꙗ҆ди́мъ два̀ варе́нїѧ съ є҆ле́емъ, и҆ пїе́мъ вїно̀, бл҃годарѧ́ще всест҃ꙋ́ю влⷣчцꙋ на́шꙋ бцⷣꙋ, ѡ҆ бы́вшемъ ѿ неѧ̀ чꙋдесѝ.

послѣ́дованїе, ꙗ҆́коже и҆ въ про́чихъ недѣ́лѧхъ, въ не́йже пое́мъ и҆ мине́и послѣ́дованїе слꙋчи́вшагѡсѧ ст҃а́гѡ.

И҆ні́и же послѣ́днѣйшїи преда́ша пѣ́ти въ сїю̀ недѣ́лю послѣ́дованїе прпⷣбныѧ мт҃ре на́шеѧ марі́и є҆гѵ́петскїѧ.

Во свѣти́льничномъ по предначина́тельномъ ѱалмѣ̀, и҆ ѻ҆бы́чномъ стїхосло́вїи, на Гдⷭ҇и воззва́хъ, поста́вимъ стїхѡ́въ і҃, и҆ пое́мъ ѻ҆смогла́сника стїхи̑ры воскрⷭ҇ны г҃: и҆ а҆натѡ́лїевы г҃: и҆ прпⷣбныѧ, стїхи̑ры г҃, творѧ́ще ѧ҆̀ на д҃, гла́съ ѕ҃. Подо́бенъ: Всю̀ ѿложи́вше: Тебѣ̀ ᲂу҆́бѡ возбранѧ́ше:

Сла́ва, гла́съ д҃: Ѡ҆чꙋдотворѝ хрⷭ҇тѐ крⷭ҇та̀ твоегѡ̀ си́ла: И҆ ны́нѣ, бг҃оро́диченъ а҃-й гла́са.

На лїті́и стїхи̑ры по ѻ҆бы́чаю. На стїхо́внѣ, стїхи̑ры ѻ҆смогла́сника.

Сла́ва, прпⷣбныѧ, гла́съ в҃: Дꙋшє́внаѧ ловлє́нїѧ: И҆ ны́нѣ, бг҃оро́диченъ: Ѽ чꙋдесѐ но́вагѡ:

По Ны́нѣ ѿпꙋща́еши, тропа́рь воскрⷭ҇нъ:

Сла́ва, прпⷣбныѧ, гла́съ и҃: Въ тебѣ̀ мт҃и: И҆ ны́нѣ, И҆́же на́съ ра́ди:

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды.

Сла́ва, прпⷣбныѧ, гла́съ и҃: Въ тебѣ̀ ма́ти и҆звѣ́стнѡ сп҃се́сѧ є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀ и҆ дѣ́ющи ᲂу҆чи́ла є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. тѣ́мже и҆ со а҆́гг҃лы ра́дꙋетсѧ, прпⷣбнаѧ марі́е, дꙋ́хъ тво́й.

И҆ ны́нѣ, И҆́же на́съ ра́ди: и҆ про́чее послѣ́дованїе ꙗ҆́кѡ ѻ҆бы́чно.

Канѡ́ны г҃: воскрⷭ҇ный съ бг҃оро́дичнымъ на ѕ҃: и҆ трїѡ́ди на д҃, гла́съ и҃: и҆ прпⷣбныѧ на д҃, гла́съ ѕ҃: Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни,

Конда́къ прпⷣбныѧ, гла́съ г҃. Подо́бенъ: Дв҃а дне́сь: Блꙋда́ми пе́рвѣе преиспо́лнена всѧ́ческими, хрⷭ҇то́ва невѣ́ста дне́сь покаѧ́нїемъ ꙗ҆ви́сѧ, а҆́гг҃льское жи́тельство подража́ющи, де́мѡны крⷭ҇та̀ ѻ҆рꙋ́жїемъ погꙋблѧ́етъ: сегѡ̀ ра́ди црⷭ҇твїѧ невѣ́ста ꙗ҆ви́ласѧ є҆сѝ мр҃і́е пресла́внаѧ.

Сѣда́ленъ, гла́съ и҃. Подо́бенъ: Премꙋ́дрость и҆ сло́во: Взыгра̑нїѧ всѧ̑:

Сла́ва, и҆ ны́нѣ: Нбⷭ҇наѧ врата̀ и҆ ковче́гъ:

По ѕ҃-й пѣ́сни конда́къ и҆ і҆́косъ воскрⷭ҇нъ, и҆ чте́мъ про́логъ. По ѳ҃-й пѣ́сни, Свѣти́ленъ воскрⷭ҇нъ:

Сла́ва, прпⷣбныѧ. Подо́бенъ: Нб҃о ѕвѣзда́ми: Ѡ҆́бразъ покаѧ́нїѧ: И҆ ны́нѣ, Сла́досте а҆́гг҃лѡвъ:

На хвали́техъ стїхи̑ры воскрⷭ҇ны д҃, и҆ а҆натѡ́лїевы д҃, та́же глаго́лемъ сті́хъ: Воскрⷭ҇нѝ гдⷭ҇и бж҃е мо́й: и҆ пое́мъ самогла́сенъ, гла́съ а҃: Нѣ́сть црⷭ҇тво бж҃їе ни́ща и҆ питїѐ:

Сла́ва, па́ки то́йже. И҆ ны́нѣ, Пребл҃гослове́нна є҆сѝ:

Славосло́вїе вели́кое. и҆ ѿпꙋ́стъ.

Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ пе́рвый.

На лїтꙋргі́и, бл҃жє́нна, и҆ прокі́менъ гла́са.

Та́же прпⷣбныѧ, прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. А҆по́столъ ко є҆вре́ємъ, зача́ло тк҃а, ѿ полꙋ̀: Хрⷭ҇то́съ прише́дъ, а҆рхїере́й грѧдꙋ́щихъ бла̑гъ: И҆ прпⷣбныѧ, къ гала́тѡмъ, зача́ло с҃и: Пре́жде прише́ствїѧ вѣ́ры: А҆ллилꙋ́їа гла́са. Є҆ѵⷢ҇лїе ма́рка, зача́ло м҃з: Поѧ́тъ і҆и҃съ ѻ҆бана́десѧть: И҆ прпⷣбныѧ, лꙋкѝ, зача́ло л҃г: Молѧ́ше і҆и҃са нѣ́кїй ѿ фарїсє́й:

Прича́стенъ: Хвали́те гдⷭ҇а: Дрꙋгі́й: Въ па́мѧть вѣ́чнꙋю:

На трапе́зѣ же ᲂу҆чрежда́емсѧ, ꙗ҆́коже и҆ въ пре́жднихъ недѣ́лѧхъ.

Въ тꙋ́же недѣ́лю на вече́рни.

По ѻ҆бы́чаю пре́жднихъ недѣ́ль. та́же вхо́дъ, и҆ прокі́менъ вели́кїй, гла́съ и҃: Да́лъ є҆сѝ достоѧ́нїе: со стїхѝ є҆гѡ̀, и҆ прѡ́чаѧ ꙗ҆́кѡ ѻ҆бы́чно.

Въ пѧто́къ ва́їй на ᲂу҆́трени.

А҆ллилꙋ́їа, и҆ трⷪ҇чны гла́са, и҆ ѻ҆бы́чное стїхосло́вїе: и҆ про́чее возслѣ́дованїе, ꙗ҆́коже пред̾ꙋказа́сѧ. На стїхо́внѣ трїѡ́ди самогла́сенъ днѐ, гла́съ а҃: Презрѣ́вши дꙋшѐ моѧ̀: два́жды, и҆ мч҃нченъ.

Сла́ва, гла́съ и҃: Дꙋшеполе́знꙋю соверши́вше четыредесѧ́тницꙋ: И҆ ны́нѣ, па́ки то́йже.

Та́же: Бла́го є҆́сть:

и҆ ча́съ пе́рвый, по ѻ҆бы́чаю, и҆ ѿпꙋ́стъ.

Въ то́йже пѧто́къ ве́чера.

Стїхосло́вимъ каѳі́смꙋ: Ко гдⷭ҇ꙋ внегда̀ скорбѣ́ти мѝ: Гдⷭ҇и воззва́хъ, пое́мъ во гла́съ и҃: поста́вимъ стїхѡ́въ і҃, и҆ пое́мъ самогла́снꙋ стїхи́рꙋ, гла́съ и҃: Дꙋшеполе́знꙋю соверши́вше четыредесѧ́тницꙋ: два́жды, и҆ мч҃нченъ, и҆ ст҃а́гѡ ла́зарѧ самогла́сны є҃, творѧ́ще ѧ҆̀ з҃, гла́съ ѕ҃: Гдⷭ҇и, ла́заревъ хотѧ̀ гро́бъ ви́дѣти:

Сла́ва, гла́съ и҃: Предста́въ гро́бꙋ ла́заревꙋ: И҆ ны́нѣ, гла́съ то́йже:

Дꙋшеполе́знꙋю соверши́вше четыредесѧ́тницꙋ, возопїи́мъ: Вхо́дъ, прокі́менъ, и҆ чте́нїе днѐ.

[зрѝ] А҆ и҆дѣ́же не бы́ти преждесщ҃е́нной: на Гдⷭ҇и воззва́хъ, стїхи̑ры на ѕ҃, гла́съ ѕ҃: Гдⷭ҇и, ла́заревъ хотѧ̀ гро́бъ:

Сла́ва, и҆ ны́нѣ, пра́здника, гла́съ и҃: Дꙋшеполе́знꙋю соверши́вше четыредесѧ́тницꙋ, возопїи́мъ:

Та́же, Свѣ́те ти́хїй: без̾ вхо́да:

Прокі́менъ, и҆ чте́нїе днѐ. На стїхо́внѣ самогла́сенъ: Дꙋшеполе́знꙋю: два́жды, и҆ мч҃нченъ. Припѣ́въ же глаго́лемъ: Къ тебѣ̀ возведо́хъ ѻ҆́чи моѝ:

Сла́ва, и҆ ны́нѣ, гла́съ и҃: Предста́въ гро́бꙋ ла́заревꙋ: пи́санъ на Гдⷭ҇и воззва́хъ. По Ны́нѣ ѿпꙋща́еши, трист҃о́е, и҆ по Ѻ҆́ч҃е на́шъ, тропа́рь пра́здника: Ѻ҆́бщее воскрⷭ҇нїе:

Та́же, є҆ктенїа̀: Поми́лꙋй на́съ бж҃е: и҆ г҃ покло́ны вели̑кїѧ, и҆ мл҃тва: Всест҃а́ѧ трⷪ҇це: и҆ прѡ́чаѧ по ѻ҆бы́чаю, и҆ ѿпꙋ́стъ, и҆ многолѣ́тны.

[зрѝ] Вѣ́домо бꙋ́ди: Ꙗ҆́кѡ ѿ дне́сь, нижѐ мч҃нченъ, нижѐ бг҃оро́диченъ, нижѐ ѻ҆смогла́сникъ пое́тсѧ, да́же до понедѣ́льника ст҃а́гѡ ѳѡмы̀. Въ то́йже пѧто́къ повече́рїе глаго́лемъ вели́кое. По а҃-мъ трист҃о́мъ тропа́рь пра́здника. По в҃-мъ трист҃о́мъ тропарѝ ѻ҆бы̑чныѧ: Поми́лꙋй на́съ гдⷭ҇и, поми́лꙋй на́съ: и҆ пое́мъ канѡ́нъ трїѡ́ди, творе́нїе господи́на а҆ндре́а кри́тскагѡ, гла́съ а҃. По ѳ҃-й пѣ́сни і҆рмо́съ: Сотворѝ держа́вꙋ: ѻ҆́ба ли̑ка вкꙋ́пѣ. По трист҃о́мъ конда́къ пра́здника, и҆ ѿпꙋ́стъ ма́лый.

Въ сꙋббѡ́тꙋ ст҃а́гѡ и҆ првⷣнагѡ ла́зарѧ.

На полꙋ́нощницѣ, по а҃-мъ трист҃о́мъ, и҆ по Ѻ҆́ч҃е на́шъ, глаго́лемъ вмѣ́стѡ, Сѐ жени́хъ: Тропа́рь: Ѻ҆́бщее воскрⷭ҇нїе: По в҃-мъ трист҃о́мъ, и҆ по Ѻ҆́ч҃е на́шъ, глаго́лемъ конда́къ: Всѣ́хъ ра́дость хрⷭ҇то́съ: Гдⷭ҇и поми́лꙋй, в҃і. и҆ ѿпꙋ́стъ. Мл҃твы же, Помѧнѝ гдⷭ҇и, не глаго́лемъ.

На ᲂу҆́трени, на Бг҃ъ гдⷭ҇ь: Тропа́рь, гла́съ а҃: Ѻ҆́бщее воскрⷭ҇нїе пре́жде твоеѧ̀ стрⷭ҇ти ᲂу҆вѣрѧ́ѧ, и҆з̾ ме́ртвыхъ воздви́глъ є҆сѝ ла́зарѧ хрⷭ҇тѐ бж҃е. тѣ́мже и҆ мы̀ ꙗ҆́кѡ ѻ҆́троцы побѣ́ды зна́мєнїѧ носѧ́ще, тебѣ̀ побѣди́телю сме́рти вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не. Три́жды.

И҆ ѻ҆бы̑чныѧ каѳі̑смы двѣ̀. По а҃-й каѳі́смѣ сѣда́ленъ, гла́съ а҃: Оу҆ще́дривъ ма́рѳины и҆ марі́ины сле́зы:

Сла́ва, и҆ ны́нѣ, то́йже.

и҆ чте́нїе въ є҆ѵⷢ҇лїи толково́мъ, є҆́же ѿ і҆ѡа́нна, є҆мꙋ́же нача́ло: Гдⷭ҇ꙋ на́шемꙋ і҆и҃сꙋ хрⷭ҇тꙋ̀: По в҃-й каѳі́смѣ пое́мъ тропарѝ воскрⷭ҇ны: А҆́гг҃льскїй собо́ръ: и҆ по ни́хъ є҆ктенїа̀, и҆ сѣда́ленъ, гла́съ є҃: И҆сто́чникъ премꙋ́дрости:

Сла́ва, и҆ ны́нѣ, то́йже, и҆ чте́нїе тогѡ́же сло́ва.

Та́же глаго́лемъ: Воскрⷭ҇нїе хрⷭ҇то́во: ѱало́мъ н҃. и҆ прѡ́чаѧ по ѻ҆бы́чаю.

Канѡ́ны два̀, до ѕ҃-ѧ пѣ́сни, творе́нїе господи́на ѳеофа́на: ѿѻнꙋ́дꙋже начина́емъ четверопѣ́снецъ. Пе́рвый канѡ́нъ со і҆рмосо́мъ на и҃: дрꙋгі́й на ѕ҃, гла́съ и҃. Пѣ́снь а҃, і҆рмо́съ: Пои́мъ гдⷭ҇еви: Дрꙋгі́й канѡ́нъ, творе́нїе і҆ѡа́нна мона́ха, гла́съ то́йже, і҆рмо́съ: Во́дꙋ проше́дъ: Припѣ́вы пѣ́сней: Пои́мъ гдⷭ҇еви: та́кожде и҆ въ недѣ́лю ва́їй. Катава́сїа: Во́дꙋ проше́дъ: По г҃-й пѣ́сни сѣда́ленъ пра́здника, гла́съ д҃. Подо́бенъ: Оу҆диви́сѧ: Вкꙋ́пѣ предста́стѣ:

Сла́ва, и҆ ны́нѣ, гла́съ и҃.

Подо́бенъ: Премꙋ́дрости: Провѣ́дый всѧ́чєскаѧ: и҆ чте́нїе. Ѿ ѕ҃-ѧ же пѣ́сни пое́мъ четверопѣ́снецъ, творе́нїе господи́на космы̀: і҆рмо́съ по два́жды, тропарѝ на ѕ҃. И҆ кѵ́ръ і҆ѡа́нна, гла́съ то́йже, на ѕ҃. Катава́сїа: Ѡ҆чи́сти мѧ̀ сп҃се: По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Всѣ́хъ ра́дость хрⷭ҇то́съ, и҆́стина, свѣ́тъ, живо́тъ, и҆ мі́ра воскрⷭ҇нїе сꙋ́щымъ на землѝ ꙗ҆ви́сѧ, свое́ю бл҃гостїю, и҆ бы́сть ѡ҆́бразъ воскрⷭ҇нїѧ, всѣ̑мъ подаѧ̀ бж҃е́ственное ѡ҆ставле́нїе.

[зрѝ] И҆ і҆́косъ, и҆ чте́мъ сѷнаѯа́рїй. На ѳ҃-й пѣ́сни, Чⷭ҇тнѣ́йшаѧ не стїхосло́витсѧ, ѿ сегѡ̀ днѐ, и҆ въ про́чыѧ дни̑, и҆ до но́выѧ недѣ́ли: по і҆рмо́съ, и҆ послѣдѝ катава́сїа: Вои́стиннꙋ бцⷣꙋ:

Та́же, на гла́съ а҃: Ст҃ъ гдⷭ҇ь бг҃ъ на́шъ. три́жды. Свѣти́ленъ трїѡ́ди: Сло́вомъ твои́мъ: два́жды.

Сла́ва, и҆ ны́нѣ: Ла́заремъ тѧ̀ хрⷭ҇то́съ:

На хвали́техъ стїхи̑ры на и҃, гла́съ а҃, самогла́сны: Воскрⷭ҇нїе и҆ жи́знь человѣ́кѡмъ: Глаго́лемъ же и҆ припѣ́вы: Воскрⷭ҇нѝ гдⷭ҇и бж҃е мо́й: и҆ И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ:

Сла́ва, гла́съ в҃: Ве́лїе и҆ пресла́вное чꙋ́до: И҆ ны́нѣ: Пребл҃гослове́нна є҆сѝ:

Славосло́вїе вели́кое. По трист҃о́мъ тропа́рь пра́здника. Є҆ктєнїѝ, и҆ ѿпꙋ́стъ, и҆ ча́съ а҃. Тропа́рь и҆ конда́къ пра́здника.

На лїтꙋргі́и бл҃жє́нна, пѣ́снь г҃-ѧ и҆ ѕ҃-ѧ, на и҃. По вхо́дѣ тропа́рь пра́здника:

Сла́ва, и҆ ны́нѣ, конда́къ.

Вмѣ́стѡ же трист҃а́гѡ, пое́мъ: Є҆ли́цы во хрⷭ҇та̀ крⷭ҇ти́тесѧ:

Прокі́менъ, гла́съ г҃: Гдⷭ҇ь просвѣще́нїе моѐ и҆ сп҃си́тель мо́й, когѡ̀ ᲂу҆бою́сѧ;

Сті́хъ: Гдⷭ҇ь защи́титель живота̀ моегѡ̀:

А҆по́столъ ко є҆вре́ємъ, зача́ло тл҃г, ѿ полꙋ̀: Црⷭ҇твїе непоколеби́мо прїе́млюще: А҆ллилꙋ́їа, гла́съ є҃: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.

Сті́хъ: И҆́бо ᲂу҆твердѝ вселе́ннꙋю:

Є҆ѵⷢ҇лїе і҆ѡа́нна, зача́ло л҃ѳ: Бѣ̀ нѣ́кто болѧ̀ ла́зарь ѿ виѳа́нїи:

Прича́стенъ: И҆з̾ ᲂу҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀.

На трапе́зѣ ᲂу҆чрежда́емсѧ варе́нїемъ со є҆ле́емъ. А҆́ще же и҆ и҆крꙋ̀ и҆́мамы, да да́стсѧ коемꙋ́ждо бра́тꙋ по трѝ ѻ҆́нгїи: и҆ вїно̀ пїе́мъ.

[зрѝ] Подоба́етъ вѣ́дати, А҆́ще хра́мъ првⷣнагѡ ла́зарѧ, по ѻ҆бы́чныхъ каѳі́смахъ полѷеле́й. Велича́нїе ст҃и́тельское, и҆ ѱало́мъ: Оу҆слы́шите сїѧ̑ всѝ ꙗ҆зы́цы: Та́же сѣда́льны, ꙗ҆̀же по г҃-й пѣ́сни. и҆ житїѐ ст҃а́гѡ ла́зарѧ, ѿ нїки́фора ѯанѳопꙋ́ла напи́сано. А҆нтїфѡ́нъ а҃-й д҃-гѡ гла́са.

Прокі́менъ: Чⷭ҇тна̀ пред̾ гдⷭ҇емъ сме́рть:

Сті́хъ: Что̀ возда́мъ:

Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло л҃ѕ: А҆́зъ є҆́смь две́рь: ѱало́мъ н҃. Стїхи́ра, гла́съ ѕ҃: Гдⷭ҇и, гла́съ тво́й разрꙋшѝ: Канѡ́ны в҃, на д҃і: Катава́сїа в҃-гѡ канѡ́на. По г҃-й пѣ́сни, сѣда́ленъ пра́здника. По ѕ҃-й пѣ́сни, конда́къ: Всѣ́хъ ра́дость: И҆ і҆́косъ, и҆ про́чее послѣ́дованїе ꙗ҆́коже ᲂу҆каза́сѧ.

Въ сꙋббѡ́тꙋ ва́їй ве́чера.

На ма́лѣй вече́рни, на Гдⷭ҇и воззва́хъ, пое́мъ стїхи̑ры пра́здника, на д҃, гла́съ ѕ҃. Подо́бенъ, Тридне́венъ: Ѿ неѕло́бивыхъ младе́нєцъ хрⷭ҇тѐ:

Сла́ва, и҆ ны́нѣ, подо́бенъ то́йже: На плеща́хъ херꙋві́мскихъ:

На стїхо́внѣ стїхи̑ры пра́здника, гла́съ в҃. Подо́бенъ: До́ме є҆ѵфра́ѳовъ: Свѣтли́сѧ сїѡ́не: съ припѣ́вы пра́здника.

Сла́ва, и҆ ны́нѣ, гла́съ и҆ подо́бенъ то́йже: Пою̀ твоѐ стра́шное:

Тропа́рь, гла́съ а҃: Ѻ҆́бщее воскрⷭ҇нїе:

Сла́ва, и҆ ны́нѣ, гла́съ д҃: Спогре́бшесѧ тебѣ̀ кр҃ще́нїемъ хрⷭ҇тѐ бж҃е на́шъ, безсме́ртныѧ жи́зни сподо́бихомсѧ воскрⷭ҇нїемъ твои́мъ, и҆ воспѣва́юще зове́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.

Є҆ктенїа̀ ма́лаѧ, и҆ ѿпꙋ́стъ.

На вели́цѣй вече́рни, по предначина́тельномъ ѱалмѣ̀: Бл҃же́нъ мꙋ́жъ, каѳі́сма всѧ̀. Гдⷭ҇и воззва́хъ пое́мъ во гла́съ ѕ҃. поста́вимъ стїхѡ́въ і҃: и҆ пое́мъ стїхи̑ры самогла́сны є҃, повторѧ́юще ѧ҆̀, гла́съ ѕ҃: Дне́сь бл҃года́ть ст҃а́гѡ дх҃а:

Сла́ва, стїхи́рꙋ а҃-ю: Дне́сь бл҃года́ть ст҃а́гѡ дх҃а: И҆ ны́нѣ, па́ки тꙋ́южде.

Та́же вхо́дъ: Свѣ́те ти́хїй:

Прокі́менъ: гдⷭ҇ь воцр҃и́сѧ: со стїхѝ.

Та́же, чтє́нїѧ г҃, пра́здника: а҃-е, Бытїѧ̀: Призва̀ і҆а́кѡвъ сн҃ы своѧ̑: в҃-е, Прⷪ҇ро́чества софо́нїева: Та́кѡ глаго́летъ гдⷭ҇ь: ра́дꙋйсѧ ѕѣлѡ̀ дщѝ сїѡ́нова: г҃-е, Прⷪ҇ро́чества заха́рїина: Та́кѡ глаго́летъ гдⷭ҇ь: ра́дꙋйсѧ ѕѣлѡ̀ дщѝ сїѡ́нѧ. На лїті́и самогла́сны стїхи̑ры, гла́съ а҃: Всест҃ы́й дх҃ъ:

Сла́ва, и҆ ны́нѣ, гла́съ г҃: Пре́жде шестѝ дне́й бытїѧ̀ па́схи:

и҆ ѻ҆бы̑чныѧ мл҃твы. На стїхо́внѣ стїхи̑ры самогла́сны, гла́съ и҃: Ра́дꙋйсѧ и҆ весели́сѧ гра́де сїѡ́не: съ припѣ́вы предпи́санными на ма́лѣй вече́рни.

Сла́ва, гла́съ ѕ҃. Дне́сь бл҃года́ть ст҃а́гѡ дх҃а: И҆ ны́нѣ, па́ки то́йже.

На бл҃гослове́нїи хлѣ́бѡвъ тропа́рь пра́здника, гла́съ а҃: Ѻ҆́бщее воскрⷭ҇нїе, два́жды.

и҆ гла́съ д҃: Спогре́бшесѧ тебѣ̀: є҆ди́ножды. И҆ Бꙋ́ди и҆́мѧ гдⷭ҇не, три́жды: и҆ ѱало́мъ: Бл҃гословлю̀ гдⷭ҇а: и҆ предложи́тсѧ чте́нїе, сло́во торже́ственное пра́здника.

На ᲂу҆́трени, на Бг҃ъ гдⷭ҇ь, тропа́рь, гла́съ а҃: Ѻ҆́бщее воскрⷭ҇нїе: два́жды.

Сла́ва, и҆ ны́нѣ, гла́съ д҃: Спогре́бшесѧ тебѣ̀:

и҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ: Съ вѣ́твьми ᲂу҆́мнѡ:

Сла́ва, и҆ ны́нѣ, гла́съ то́йже.

Подо́бенъ: Ꙗ҆ви́лсѧ є҆сѝ: Четверодне́вна ла́зарѧ: и҆ чте́нїе во є҆ѵⷢ҇лїи толково́мъ і҆ѡа́нна златоꙋ́стагѡ. По в҃-й каѳі́смѣ сѣда́ленъ, гла́съ д҃. Подо́бенъ: Оу҆диви́сѧ: Над̾ дрꙋ́гомъ твои́мъ хрⷭ҇тѐ,

Сла́ва, и҆ ны́нѣ, гла́съ а҃.

Подо́бенъ: Ка́мени запеча́танꙋ: Восхвали́те согла́снѡ: и҆ чте́нїе тогѡ́же сло́ва. Та́же полѷеле́и пра́здника, сѣда́ленъ, гла́съ и҃. Подо́бенъ: Повелѣ́нное: На прⷭ҇то́лѣ херꙋві́мстѣмъ:

Сла́ва, и҆ ны́нѣ, то́йже.

и҆ чте́мъ пра́здникꙋ сло́во ст҃а́гѡ кѵ́ръ а҆ндре́а кри́тскагѡ. Степє́нна, а҃ а҆нтїфѡ́нъ д҃-гѡ гла́са. Прокі́менъ пра́здника, гла́съ д҃: И҆з̾ ᲂу҆́стъ младе́нєцъ:

Сті́хъ: Гдⷭ҇и гдⷭ҇ь на́шъ:

Всѧ́кое дыха́нїе:

Є҆ѵⷢ҇лїе матѳе́а, зача́ло п҃г: Є҆гда̀ прибли́жисѧ і҆и҃съ во і҆ерⷭ҇ли́мъ:

Воскрⷭ҇нїе хрⷭ҇то́во, не глаго́лемъ: но а҆́бїе глаго́лемъ ѱало́мъ н҃.

Та́же і҆ере́й взе́мъ кади́ло, кади́тъ крⷭ҇тоѡбра́знѡ, глаго́лѧ мл҃твꙋ на бл҃гослове́нїе ва́їй.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Гдⷭ҇и бж҃е на́шъ, сѣдѧ́й на херꙋві́мѣхъ: Є҆гда́ же цѣлꙋ́ютъ бра́тїѧ ст҃о́е є҆ѵⷢ҇лїе, приходѧ́ще покланѧ́ютсѧ и҆гꙋ́менꙋ, и҆ ѿ рꙋкꙋ̀ є҆гѡ̀ взе́млютъ ва̑їа со свѣща́ми.

Та́же вмѣ́стѡ, Мл҃твами: Сла́ва, гла́съ в҃: Дне́сь хрⷭ҇то́съ: И҆ ны́нѣ, па́ки то́йже.

Поми́лꙋй мѧ̀ бж҃е: Посе́мъ пое́мъ стїхи́рꙋ, гла́съ ѕ҃: Дне́сь бл҃года́ть ст҃а́гѡ дх҃а: И҆ мл҃тва: Сп҃сѝ бж҃е лю́ди твоѧ̑: Гдⷭ҇и поми́лꙋй, в҃і. И҆ по возгла́сѣ,

Канѡ́нъ, гла́съ д҃, творе́нїе кѵ́ръ космы̀. і҆рмо́съ по два́жды: тропарѝ на в҃і. Катава́сїа, і҆рмо́съ тогѡ́же канѡ́на ѻ҆́ба ли̑ка вкꙋ́пѣ. По г҃-й пѣ́сни ѵ҆пакоѝ, гла́съ ѕ҃: Съ вѣ́твьми воспѣ́вше: и҆ чте́нїе пра́здника. По ѕ҃-й пѣ́сни,

Конда́къ, гла́съ ѕ҃: На прⷭ҇то́лѣ на нб҃сѝ, на жребѧ́ти на землѝ носи́мый хрⷭ҇тѐ бж҃е, а҆́гг҃лѡвъ хвале́нїе, и҆ дѣте́й воспѣва́нїе прїѧ́лъ є҆сѝ, зовꙋ́щихъ тѝ: бл҃гослове́нъ є҆сѝ грѧды́й а҆да́ма воззва́ти.

И҆ і҆́косъ, и҆ чте́мъ сѷнаѯа́рїй. На ѳ҃-й пѣ́сни Чⷭ҇тнѣ́йшꙋю не пое́мъ, но і҆рмо́съ: Бг҃ъ гдⷭ҇ь: По ѳ҃-й пѣ́сни свѣти́льна не глаго́лемъ: но а҆́бїе: Ст҃ъ гдⷭ҇ь бг҃ъ на́шъ, три́жды, во гла́съ д҃. На Хвали́техъ поста́вимъ стїхѡ́въ ѕ҃: и҆ пое́мъ стїхи̑ры самогла́сны, д҃: повторѧ́юще двѣ̀, гла́съ д҃: Мно́жество наро́да гдⷭ҇и:

Сла́ва, и҆ ны́нѣ, гла́съ ѕ҃: Пре́жде шестѝ дне́й па́схи:

Славосло́вїе вели́кое. По трист҃о́мъ тропа́рь: Ѻ҆́бщее воскрⷭ҇нїе: Є҆ктєнїѝ, и҆ ѿпꙋ́стъ, и҆ поꙋче́нїе стꙋді́тово, и҆ ча́съ а҃. На а҃-мъ часѣ̀ тропа́рь: Ѻ҆́бщее воскрⷭ҇нїе,

Сла́ва, Спогре́бшесѧ тебѣ̀: И҆ ны́нѣ, бг҃оро́диченъ часѡ́въ:

По трист҃о́мъ конда́къ пра́здника. На прⷭ҇то́лѣ на нб҃сѝ: и҆ прѡ́чаѧ, и҆ соверше́нный ѿпꙋ́стъ. Та́кожде и҆ на про́чихъ часѣ́хъ. и҆ лїті́а быва́етъ внѣ̀ монастырѧ̀.

На лїтꙋргі́и А҆нтїфѡ́нъ а҃, гла́съ в҃, ѱало́мъ рд҃і: Возлюби́хъ ꙗ҆́кѡ ᲂу҆слы́шитъ гдⷭ҇ь гла́съ моле́нїѧ моегѡ̀. Припѣ́въ: Мл҃твами бцⷣы, сп҃се сп҃сѝ на́съ.

Сті́хъ в҃: Ꙗ҆́кѡ приклонѝ ᲂу҆́хо своѐ мнѣ̀: Мл҃твами бцⷣы:

Сті́хъ г҃: Ѡ҆б̾ѧ́ша мѧ̀ болѣ̑зни смє́ртныѧ: Мл҃твами бцⷣы:

Сті́хъ д҃: Ско́рбь и҆ болѣ́знь ѡ҆брѣто́хъ: Мл҃твами бцⷣы:

Сла́ва, и҆ ны́нѣ: Мл҃твами бцⷣы:

А҆нтїфѡ́нъ в҃, ѱало́мъ рє҃і: Вѣ́ровахъ, тѣ́мже возглаго́лахъ, а҆́зъ же смири́хсѧ ѕѣлѡ̀. Сп҃си́ ны сн҃е бж҃їй, возсѣ́дый на жребѧ̀ пою́щыѧ тѝ: а҆ллилꙋ́їа.

Сті́хъ в҃: Что̀ возда́мъ гдⷭ҇еви ѡ҆ всѣ́хъ: Сп҃си́ ны сн҃е бж҃їй:

Сті́хъ г҃: Ча́шꙋ сп҃се́нїѧ прїимꙋ̀: Сп҃си́ ны сн҃е бж҃їй:

Сті́хъ д҃: Мл҃твы моѧ̑ гдⷭ҇еви возда́мъ: Сп҃си́ ны сн҃е бж҃їй:

Сла́ва, и҆ ны́нѣ: Є҆диноро́дный сн҃е:

А҆нтїфѡ́нъ г҃, ѱало́мъ рз҃і: И҆сповѣ́дайтесѧ гдⷭ҇еви, ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀. Тропа́рь: Ѻ҆́бщее воскрⷭ҇нїе:

Сті́хъ в҃: Да рече́тъ ᲂу҆́бѡ до́мъ і҆и҃левъ: Ѻ҆́бщее воскрⷭ҇нїе:

Сті́хъ г҃: Да рече́тъ ᲂу҆́бѡ до́мъ а҆арѡ́нь: Ѻ҆́бщее воскрⷭ҇нїе:

Сті́хъ д҃: Да рекꙋ́тъ ᲂу҆́бѡ всѝ боѧ́щїисѧ гдⷭ҇а: Ѻ҆́бщее воскрⷭ҇нїе:

Вхо́дъ: Бл҃гослове́нъ грѧды́й во и҆́мѧ гдⷭ҇не: бл҃гослови́хомъ вы̀ и҆з̾ до́мꙋ гдⷭ҇нѧ, бг҃ъ гдⷭ҇ь, и҆ ꙗ҆ви́сѧ на́мъ. Тропа́рь: Ѻ҆́бщее воскрⷭ҇нїе:

Сла́ва: Спогре́бшесѧ тебѣ̀ кр҃ще́нїемъ: И҆ ны́нѣ, конда́къ: На прⷭ҇то́лѣ на нб҃сѝ:

Та́же трист҃о́е.

Прокі́менъ а҆пⷭ҇ла, гла́съ д҃: Бл҃гослове́нъ грѧды́й во и҆́мѧ гдⷭ҇не:

Сті́хъ: И҆сповѣ́дайтесѧ гдⷭ҇еви, ꙗ҆́кѡ бл҃гъ:

А҆по́столъ къ фїлїпписі́ємъ, зача́ло см҃з: Ра́дꙋйтесѧ всегда̀ ѡ҆ гдⷭ҇ѣ: А҆ллилꙋ́їа, гла́съ а҃: Воспо́йте гдⷭ҇еви пѣ́снь но́вꙋ:

Сті́хъ: Ви́дѣша всѝ концы̀ землѝ:

Є҆ѵⷢ҇лїе і҆ѡа́нна, зача́ло м҃а: Пре́жде шестѝ дне́й па́схи прїи́де і҆и҃съ въ виѳа́нїю:

Прича́стенъ: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь, и҆ ꙗ҆ви́сѧ на́мъ.

И҆ быва́етъ лїтꙋргі́а златоꙋ́стова. На трапе́зѣ ᲂу҆тѣше́нїе, ꙗ҆ди́мъ ры́бы, и҆ вїно̀ пїе́мъ бл҃годарѧ́ще бг҃а.

Въ недѣ́лю ва́їй ве́чера.

На Гдⷭ҇и воззва́хъ, поста́вимъ стїхѡ́въ ѕ҃: и҆ пое́мъ стїхи̑ры самогла́сны г҃, повторѧ́юще ѧ҆̀, гла́съ и҃: Ра́дꙋйсѧ и҆ весели́сѧ гра́де сїѡ́не:

Сла́ва, гла́съ то́йже: пе́рвꙋю стїхи́рꙋ: Ра́дꙋйсѧ и҆ весели́сѧ: И҆ ны́нѣ, На херꙋві́мѣхъ носи́мый:

Вхо́дъ, прокі́менъ днѐ: Сѐ ны́нѣ бл҃гослови́те гдⷭ҇а:

Та́же, Сподо́би гдⷭ҇и: и҆ мета̑нїѧ г҃.

Є҆ктенїа̀: И҆спо́лнимъ вече́рнюю:

На стїхо́внѣ стїхи̑ры самогла́сны г҃: гла́съ в҃: Ѿ вѣ́твїй и҆ ва́їй: Припѣ́въ: Воспо́йте гдⷭ҇еви пѣ́снь но́вꙋ: гла́съ г҃, Стра́шно є҆́же впа́сти: Припѣ́въ: Ви́дѣша всѝ концы̀ землѝ: гла́съ з҃, Со́нмице лꙋка́ваѧ:

Сла́ва, стїхи́рꙋ а҃-ю, гла́съ в҃: Ѿ вѣ́твїй и҆ ва́їй: И҆ ны́нѣ, гла́съ г҃: Стра́шно є҆́же впа́сти:

По Ны́нѣ ѿпꙋща́еши, и҆ по трист҃о́мъ тропа́рь: Бцⷣе дв҃о ра́дꙋйсѧ, и҆ прѡ́чаѧ съ покло́ны, ꙗ҆́коже и҆ въ прє́жнїѧ недѣ̑ли ᲂу҆каза́сѧ. и҆ ѿпꙋ́стъ.

[зрѝ] Вѣ́стно бꙋ́ди, ꙗ҆́кѡ, Бцⷣе дв҃о, и҆ прѡ́чаѧ, со сладкопѣ́нїемъ пою́тсѧ во всѧ̑ недѣ̑ли ст҃ы́ѧ м҃-цы, та́кожде и҆ въ настоѧ́щꙋю.

[зрѝ] Въ про́чыѧ же дни̑ вели́кїѧ сеѧ̀ седми́цы, поско́рꙋ глаго́лютсѧ. Повече́рїе же глаго́лемъ ма́лое по ѻ҆бы́чаю, ꙗ҆́коже ᲂу҆каза́сѧ пре́жде: то́чїю на повече́рїи пое́мъ трипѣ́снецъ, гла́съ и҃, вели́кагѡ понедѣ́льника, творе́нїе кѵ́ръ а҆ндре́а кри́тскагѡ: і҆рмосы̀ по два́жды, тропарѝ коли́кѡ и҆́хъ є҆́сть, и҆ послѣдѝ і҆рмо́съ, ѻ҆́ба ли̑ка вкꙋ́пѣ. По трист҃о́мъ конда́къ трїѡ́ди, І҆а́кѡвъ рыда́ше: и҆ про́чее пое́мъ всѐ, ꙗ҆́коже ᲂу҆каза́сѧ въ пре́жнихъ недѣ́лѧхъ.

[зрѝ] Вѣ́домо бꙋ́ди, ка́кѡ глаго́лати ѱалти́рь въ сїю̀ ст҃ꙋ́ю вели́кꙋю седми́цꙋ: Предписа́сѧ во главѣ̀ з҃і на рѧдꙋ̀, ли́стъ л҃в ѡ҆б.

По шестоѱа́лмїи пое́мъ А҆ллилꙋ́їа, во гла́съ и҃, со ѻ҆бы́чными стїхѝ.

Тропа́рь, гла́съ то́йже: Сѐ жени́хъ грѧде́тъ въ полꙋ́нощи, и҆ бл҃же́нъ ра́бъ, є҆го́же ѡ҆брѧ́щетъ бдѧ́ща. недосто́инъ же па́ки, є҆го́же ѡ҆брѧ́щетъ ᲂу҆ныва́юща. блюдѝ ᲂу҆̀бо дꙋшѐ моѧ̀, не сно́мъ ѡ҆тѧготи́сѧ, да не сме́рти предана̀ бꙋ́деши, и҆ црⷭ҇твїѧ внѣ̀ затвори́шисѧ. но воспрѧнѝ зовꙋ́щи: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ. Три́жды пое́мъ велегла́снѡ.

Та́же ѻ҆бы̑чныѧ каѳі̑смы, съ мета́нїи. и҆ сѣда́льны трїѡ́ди днѐ, и҆ чтє́нїѧ г҃, въ толкова́нїи златоꙋ́стагѡ, є҆́же ѿ матѳе́а, є҆ѵⷢ҇лїе. Посе́мъ, И҆ ѡ҆ сподо́битисѧ на́мъ: Є҆ѵⷢ҇лїе матѳе́а, зача́ло п҃д: Возвра́щьсѧ і҆и҃съ во гра́дъ, взалка̀: без̾ престꙋ́пки. Коне́цъ, въ зача́лѣ п҃и- мъ: И҆ да́стсѧ ꙗ҆зы́кꙋ творѧ́щемꙋ плоды̀ є҆гѡ̀. Та́же ѱало́мъ н҃. и҆ ѻ҆бы́чнаѧ мл҃тва: Сп҃сѝ бж҃е лю́ди твоѧ̑: и҆ пое́мъ трїѡ́ди трипѣ́снецъ: гла́съ в҃, творе́нїе кѵ́ръ космы̀, і҆рмо́съ по два́жды, тропарѝ на в҃і. Припѣ́въ: Сла́ва тебѣ̀ бж҃е на́шъ, сла́ва тебѣ̀. Во всю̀ сїю̀ седми́цꙋ. послѣдѝ і҆рмо́съ, ѻ҆́ба ли̑ка вкꙋ́пѣ. По а҃-й пѣ́сни є҆ктенїа̀ ма́лаѧ, та́же,

Конда́къ, гла́съ и҃. Подо́бенъ: Ꙗ҆́кѡ нача́тки: І҆а́кѡвъ рыда́ше і҆ѡ́сифа лише́нїѧ, и҆ до́блїй сѣдѧ́ше на колесни́цѣ, ꙗ҆́кѡ ца́рь почита́емь: є҆гѵ́птѧныни бо тогда̀ сластє́мъ не порабо́тавъ, возпрославлѧ́шесѧ ѿ вѣ́дꙋщагѡ человѣ́чєскаѧ сердца̀, и҆ посыла́ющагѡ вѣне́цъ нетлѣ́нный.

И҆ і҆́косъ, и҆ чте́мъ сѷнаѯа́рїй. На ѳ҃-й пѣ́сни, Чⷭ҇тнѣ́йшꙋю не пое́мъ, но і҆рмо́съ, кі́йждо ли́къ. И҆ послѣдѝ то́йже і҆рмо́съ пое́мъ ѻ҆́ба ли̑ка вкꙋ́пѣ: и҆ покло́нъ. Свѣти́ленъ самогла́сенъ, глаго́летсѧ три́жды. Черто́гъ тво́й ви́ждꙋ: Пое́тсѧ же пе́рвѣе посредѣ̀ цр҃кве канѡна́рхомъ є҆ди́ножды.

Та́же: Сла́ва, на кли́росъ: И҆ ны́нѣ, на дрꙋгі́й. и҆ та́кѡ глаго́лемъ во всю̀ седми́цꙋ.

На хвали́техъ, стїхи̑ры самогла́сны днѐ на д҃, гла́съ а҃: Грѧды́й гдⷭ҇ь къ во́льной стрⷭ҇ти:

Сла́ва, и҆ ны́нѣ, гла́съ є҃: Гдⷭ҇и, грѧды́й къ страда́нїю:

На стїхо́внѣ стїхи̑ры, гла́съ є҃: Гдⷭ҇и къ та́инствꙋ неизглаго́ланномꙋ: со ѻ҆бы́чными припѣ́вы:

Сла́ва, и҆ ны́нѣ, гла́съ и҃: Вторꙋ́ю є҆́ѵꙋ:

Глаго́лютъ же сїѧ̑ припѣ́вы, во вто́рникъ, и҆ сре́дꙋ.

Та́же, Бл҃го є҆́сть: и҆ про́чаѧ слꙋ́жба по ѻ҆бы́чаю съ покло́ны, и҆ ча́съ а҃-й, без̾ каѳі́смы: то́чїю ѻ҆бы̑чныѧ г҃ ѱалмы̀, и҆ про́чее съ покло́ны. ча́съ же г҃- й, и҆ ѕ҃-й пое́мъ съ каѳі́смами во своѐ вре́мѧ, ꙗ҆́коже предрече́сѧ. и҆ прѡ́чаѧ.

По томꙋ́ же ѡ҆́бразꙋ быва́етъ слꙋ́жба всѧ̀ во вто́рникъ, и҆ сре́дꙋ. При часѣ̀ г҃-мъ днѐ, ᲂу҆дарѧ́етъ параекклисїа́рхъ въ би́ло, ꙗ҆́коже є҆́сть ѻ҆бы́чай, и҆ собра́вшесѧ въ цр҃ковь, пое́мъ г҃-й ча́съ съ каѳі́смою, и҆ покло́ны.

Та́же тропа́рь: Гдⷭ҇и, и҆́же прест҃а́го твоего̀ дх҃а: со стїхѝ ѻ҆бы́чными.

и҆ Бцⷣе ты̀ є҆сѝ лоза̀:

и҆ а҆́бїе ᲂу҆кра́шенꙋ а҆нало́гїю, полага́етсѧ на не́мъ верхꙋ̀ ст҃о́е тетроєѵⷢ҇лїе, и҆ лампа́дѣ возжже́нѣ, и҆ кади́тъ і҆ере́й ѻ҆́крестъ а҆нало́гїа, и҆ ѻ҆лта́рь, и҆ цр҃ковь всю̀, и҆ бра́тїю по чи́нꙋ.

Та́же, глаго́летъ дїа́конъ: И҆ ѡ҆ сподо́битесѧ на́мъ слы́шанїю: и҆ про́чее ѻ҆бы́чнѡ.

[зрѝ] Сїѧ̑ глаго́лютсѧ то́чїю къ нача́лѡмъ є҆ѵⷢ҇лі́стѡвъ: къ нача́лѡмъ же глаго́летъ то́кмѡ: Премꙋ́дрость, про́сти: и҆ та́кѡ чте́тъ і҆ере́й тетроєѵⷢ҇лїе, ѡ҆болче́нъ въ фелѡ́нь. Что́мꙋ же семꙋ̀, стои́мъ всѝ ѿкрове́нными глава́ми, слꙋ́шающе є҆го̀ со внима́нїемъ. По сконча́нїи же чте́нїй є҆ѵⷢ҇лїа, чте́мъ сло́во во ст҃о́мъ є҆фре́мѣ ѡ҆ і҆ѡ́сифѣ прекра́сномъ, и҆ пото́мъ: Гдⷭ҇ь бг҃ъ бл҃гослове́нъ: и҆ трист҃о́е: По Ѻ҆́ч҃е на́шъ, глаго́лемъ конда́къ трїѡ́ди: І҆а́кѡвъ рыда́ше: Гдⷭ҇и поми́лꙋй, м҃. и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

И҆ покло́ны г҃ вели̑кїѧ съ мл҃твою: Гдⷭ҇и и҆ влⷣко живота̀ моегѡ̀: и҆ про́чихъ в҃і, и҆ послѣдѝ є҆ди́нъ, ꙗ҆́коже мно́гащи и҆з̾ѧви́сѧ.

[зрѝ] Вѣ́домо же бꙋ́ди: Ꙗ҆́кѡ є҆ѵⷢ҇лїе ѿ матѳе́а всѐ чте́тсѧ: подо́бнѣ и҆ ѿ ма́рка, и҆ ѿ лꙋкѝ. Ѿ і҆ѡа́нна же чте́тсѧ до нача́ла ст҃ы́хъ стрⷭ҇те́й, ꙗ҆́вѣ ꙗ҆́кѡ до Ны́нѣ просла́висѧ сн҃ъ чл҃вѣ́ческїй: Чте́тсѧ же та́кѡ въ тре́хъ дне́хъ, си́рѣчь въ понедѣ́льникъ, во вто́рникъ, въ сре́дꙋ, и҆ соверша́етсѧ въ сре́дꙋ на ѳ҃-мъ часѣ̀. Быва́ютъ же ѿ лꙋкѝ чтє́нїѧ г҃: прѡ́чаѧ же по два̀. вкꙋ́пѣ всѣ́хъ чте́нїй де́вѧть, и҆ вѧ́щше ничто́же.

и҆ пое́мъ ча́съ ѕ҃-й: Прїиди́те, поклони́мсѧ: три́жды: и҆ ѻ҆бы̑чныѧ ѱалмы̀ г҃. Каѳі́сма рѧдова́ѧ.

Та́же тропа́рь: И҆́же въ шесты́й де́нь же и҆ ча́съ: со стїхѝ ѻ҆бы́чными.

Та́же тропа́рь, и҆ прокі́менъ паремїѝ, и҆ прⷪ҇ро́чества, и҆ чте́тсѧ тетроєѵⷢ҇лїе.

и҆ чте́нїе во є҆фре́мѣ ѡ҆ і҆ѡ́сифѣ прекра́сномъ. и҆ а҆́бїе, Ско́рѡ да предварѧ́тъ ны̀: Трист҃о́е, по Ѻ҆́ч҃е на́шъ, конда́къ. Гдⷭ҇и поми́лꙋй, м҃. и҆ мл҃тва: И҆́же на всѧ́кое вре́мѧ: и҆ про́чее по ѻ҆бы́чаю, съ покло́ны всѐ, ꙗ҆́коже и҆ пре́жде.

Вкꙋ́пѣ же пое́мъ и҆ ѳ҃-й ча́съ без̾ каѳі́смы. По трїе́хъ ѱалмѣ́хъ глаго́лемъ тропа́рь: И҆́же въ девѧ́тый ча́съ: со стїхѝ ѻ҆бы́чными: и҆ чте́тсѧ тетроєѵⷢ҇лїе. Посе́мъ чтє́нїѧ во є҆фре́мѣ ѡ҆ і҆ѡ́сифѣ прекра́сномъ. Ѡ҆ста́вшее же чте́мъ на трапе́зѣ.

Та́же, Не преда́ждь на́съ до конца̀: Трист҃о́е, и҆ по Ѻ҆́ч҃е на́шъ, конда́къ трїѡ́ди. Гдⷭ҇и поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

и҆ покло́ны г҃ вели̑кїѧ. и҆ глаго́лемъ мл҃твꙋ: Влⷣко гдⷭ҇и і҆и҃се хрⷭ҇тѐ бж҃е на́шъ: и҆ пое́мъ бл҃жє́нны: Во црⷭ҇твїи твое́мъ: по ѻ҆бы́чаю. И҆ Помѧнѝ на́съ гдⷭ҇и: съ покло́ны. Посе́мъ: Ли́къ нбⷭ҇ный: и҆ прѡ́чаѧ.

Сла́ва: Ли́къ ст҃ы́хъ а҆́гг҃лъ: И҆ ны́нѣ: Вѣ́рꙋю во є҆ди́наго бг҃а:

Ѡ҆сла́би, ѡ҆ста́ви: Ѻ҆́ч҃е на́шъ: конда́къ трїѡ́ди є҆ди́нъ. Гдⷭ҇и поми́лꙋй, м҃.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

и҆ покло́ны г҃ вели̑кїѧ, съ мл҃твою: Гдⷭ҇и и҆ влⷣко: и҆ про́чихъ в҃і. Посе́мъ, трист҃о́е, и҆ мета̑нїѧ г҃. По Ѻ҆́ч҃е на́шъ, Гдⷭ҇и поми́лꙋй, в҃і. мл҃тва: Всест҃а́ѧ трⷪ҇це: и҆ ѿпꙋ́стъ по ѻ҆бы́чаю. Присовокꙋплѧ́емъ же и҆ вече́рню.

Во ст҃ы́й и҆ вели́кїй понедѣ́льникъ ве́чера:

По предначина́тельномъ ѱалмѣ̀, Сла́ва, и҆ ны́нѣ, а҆ллилꙋ́їа, три́жды.

Та́же, є҆ктенїа̀, и҆ ѻ҆бы́чнаѧ каѳі́сма: Ко гдⷭ҇ꙋ внегда̀ скорбѣ́ти мѝ: съ мета́нїи.

Гдⷭ҇и воззва́хъ, пое́мъ во гла́съ а҃-й и҆ ста́вимъ стїхѡ́въ і҃. пое́мъ стїхи̑ры самогла́сны днѐ, гла́съ а҃: Грѧды́й гдⷭ҇ь къ во́льной стрⷭ҇ти:

Сла́ва, и҆ ны́нѣ, гла́съ и҃: Вторꙋ́ю є҆́ѵꙋ:

Вхо́дъ съ є҆ѵⷢ҇лїемъ: Свѣ́те ти́хїй: прокі́менъ, парємїѝ, и҆ чте́нїе и҆схо́да.

и҆ па́ки прокі́менъ: и҆ чте́нїе і҆́ѡва.

Та́же, Да и҆спра́витсѧ мл҃тва моѧ̀: и҆ посе́мъ є҆ѵⷢ҇лїе матѳе́а, зача́ло ч҃и: Сѣдѧ́щꙋ і҆и҃сꙋ на горѣ̀ є҆леѡ́нстѣй: и҆ про́чее послѣ́дованїе преждеѡсщ҃е́нныхъ, ꙗ҆́кѡ ѻ҆бы́чно. Та́кѡ до́лженствꙋетъ бы́ти въ вели́кїй вто́рникъ и҆ сре́дꙋ.

[зрѝ] А҆́ще же нѣ́сть преждеѡсщ҃е́нныѧ, пое́мъ на Гдⷭ҇и воззва́хъ, полови́нꙋ ѿ стїхи́ръ на ѕ҃, гла́съ а҃: Грѧды́й гдⷭ҇ь къ во́льной стрⷭ҇ти:

Сла́ва, и҆ ны́нѣ: Гдⷭ҇и, грѧды́й къ страда́нїю:

Вхо́дъ съ є҆ѵⷢ҇лїемъ. Свѣ́те ти́хїй:

Та́же, прокі́менъ, парємїѝ, и҆ чтє́нїѧ днѐ, и҆ є҆ѵⷢ҇лїе.

Посе́мъ: Сподо́би гдⷭ҇и: и҆ є҆ктєнїѝ: И҆спо́лнимъ вече́рнюю: На стїхо́внѣ стїхи̑ры ѿ тѣ́хже полови́нꙋ, гла́съ є҃: Гдⷭ҇и совершє́ннѣйшаѧ мꙋ́дрствовати: со ѻ҆бы́чными припѣ́вы вече́рними.

Сла́ва, и҆ ны́нѣ, гла́съ то́йже: Вторꙋ́ю є҆́ѵꙋ:

Та́же, Ны́нѣ ѿпꙋща́еши: трист҃о́е.

и҆ по Ѻ҆́ч҃е на́шъ: Тропа́рь: Бцⷣе дв҃о ра́дꙋйсѧ: и҆ прѡ́чаѧ по ѻ҆бы́чаю, съ покло́ны. И҆ по коне́чномъ трист҃о́мъ, и҆ по Ѻ҆́ч҃е на́шъ: Гдⷭ҇и поми́лꙋй в҃і.

Та́же, Мл҃тва: Всест҃а́ѧ трⷪ҇це:

и҆ Бꙋ́ди и҆́мѧ гдⷭ҇не: и҆ мета̑нїѧ г҃. ѱало́мъ: Бл҃гословлю̀ гдⷭ҇а: и҆ ѿпꙋ́стъ. Си́це ᲂу҆́бѡ твори́мъ во вто́рникъ ве́чера и҆ въ сре́дꙋ.

[зрѝ] На трапе́зѣ же ꙗ҆ди́мъ сꙋхоѧде́нїе, и҆ си́мъ ᲂу҆довлѧ́емсѧ: И҆ ꙗ҆́коже въ а҃-ю седми́цꙋ ст҃а́гѡ сегѡ̀ поста̀, си́це и҆ въ сїѧ̑ дни̑. Въ вели́кїй понедѣ́льникъ, во вто́рникъ и҆ въ сре́дꙋ, пости́тисѧ подоба́етъ.

[зрѝ] Вѣ́дати бо подоба́етъ: Ꙗ҆́кѡ и҆ ѕ҃-й вели́кїй собо́ръ повелѣ̀ сп҃си́тельныѧ стра́сти дни̑ въ постѣ̀ и҆ мл҃твѣ и҆ ᲂу҆миле́нїи се́рдца сотворѧ́ти вѣ̑рнымъ. Въ полꙋ́нощи же вели́кїѧ сꙋббѡ́ты, ѡ҆ставлѧ́ти по́стъ. Бж҃е́ствєннымъ є҆ѵⷢ҇лі́стѡмъ, матѳе́ю и҆ лꙋцѣ̀, ѻ҆́вомꙋ ᲂу҆́бѡ по́здѣ въ сꙋббѡ́тꙋ глаго́ланїемъ: ѻ҆́вомꙋ же ᲂу҆́тромъ глꙋбо́кимъ ме́длемое на́мъ но́щи написꙋ́ющымъ. Повече́рїе же глаго́лемъ вели́кое по ѻ҆бы́чаю, съ покло́ны, и҆ тропарѝ ѻ҆бы́чными, на не́мже пое́мъ трипѣ́снецъ, гла́съ и҃, творе́нїе кѵ́ръ а҆ндре́а кри́тскагѡ. і҆рмо́съ по два́жды, тропарѝ по предпи́санномꙋ: послѣдѝ і҆рмо́съ ѻ҆́ба ли̑ка вкꙋ́пѣ. По трист҃о́мъ конда́къ трїѡ́ди, и҆ по не́мъ тропа́рь: Гдⷭ҇и си́лъ съ на́ми бꙋ́ди: и҆ про́чее по ѻ҆бы́чаю, съ покло́ны, и҆ ѿпꙋ́стъ: Влⷣко многомлⷭ҇тиве: Си́це же твори́мъ въ вели́кїй понедѣ́льникъ ве́чера, и҆ во вто́рникъ къ средѣ̀.

На ᲂу҆́трени, по шестоѱа́лмїи пое́мъ А҆ллилꙋ́їа, во гла́съ и҃.

и҆ тропа́рь, гла́съ то́йже: Сѐ жени́хъ грѧде́тъ: три́жды, велегла́снѡ и҆ ти́хѡ.

Та́же ѻ҆бы̑чныѧ каѳі̑смы, г҃: и҆ сѣда́льны трїѡ́ди, и҆ чте́нїе въ толкова́нїи златоꙋ́стагѡ, є҆́же ѿ матѳе́а є҆ѵⷢ҇лїа, сло́во днѐ тогѡ̀, и҆ по чте́нїи є҆ѵⷢ҇лїе матѳе́а, зача́ло ч҃: Совѣ́тъ прїе́мше всѝ фарїсе́є на і҆и҃са: без̾ престꙋ́пки. Коне́цъ въ зача́лѣ ч҃ѕ-мъ: Бл҃гослове́нъ грѧды́й во и҆́мѧ гдⷭ҇не.

Та́же ѱало́мъ н҃. и҆ мл҃тва. Сп҃сѝ бж҃е лю́ди твоѧ̑, Гдⷭ҇и поми́лꙋй, в҃і. Посе́мъ є҆ктенїа̀ ма́лаѧ. Та́же,

Конда́къ, гла́съ и҃. Подо́бенъ: Вы́шнихъ и҆щѧ̀: Ча́съ дꙋшѐ конца̀ помы́сливши, и҆ посѣче́нїѧ смоко́вницы ᲂу҆боѧ́вшисѧ, да́нный тебѣ̀ тала́нтъ трꙋдолю́бнѡ дѣ́лай ѻ҆каѧ́ннаѧ, бо́дрствꙋющи и҆ зовꙋ́щи: да не пребꙋ́демъ внѣ̀ черто́га хрⷭ҇то́ва.

И҆ і҆́косъ, и҆ чте́мъ сѷнаѯа́рїй.

Та́же, пое́мъ двоепѣ́снецъ, творе́нїе кѵ́ръ космы̀, гла́съ в҃. і҆рмо́съ по два́жды. тропарѝ на в҃і. Послѣди́ же і҆рмо́съ ѻ҆́ба ли̑ка вкꙋ́пѣ. На ѳ҃-й пѣ́сни, Чⷭ҇тнѣ́йшꙋю не пое́мъ, но а҆́бїе і҆рмо́съ, кі́йждо ли́къ, и҆ послѣдѝ то́йже, ѻ҆́ба ли̑ка вкꙋ́пѣ, и҆ покло́нъ. Свѣти́ленъ, три́жды: Черто́гъ тво́й ви́ждꙋ: На хвали́техъ, стїхи̑ры самогла́сны на д҃, гла́съ а҃: Во свѣ́тлостехъ ст҃ы́хъ твои́хъ:

Сла́ва, и҆ ны́нѣ, гла́съ д҃: Скры́вшагѡ тала́нтъ:

На стїхо́внѣ стїхи̑ры самогла́сны, гла́съ ѕ҃: Прїиди́те вѣ́рнїи: со ѻ҆бы́чными припѣ́вы.

Сла́ва, и҆ ны́нѣ, гла́съ з҃: Сѐ тебѣ̀ тала́нтъ: и҆ про́чее послѣ́дованїе, ꙗ҆́кѡ ѻ҆бы́чай, съ покло́ны, и҆ ча́съ а҃-й без̾ каѳі́смы.

Ча́съ же г҃-й и҆ ѕ҃-й, пое́мъ съ каѳі́смами, во своѐ вре́мѧ, и҆ съ покло́ны. И҆ чте́мъ тетроєѵⷢ҇лїе. и҆ пото́мъ чте́мъ сло́во і҆ѡа́нна златоꙋ́стагѡ, ѡ҆ десѧти́хъ дѣ́вахъ, и҆ ѡ҆ ми́лостыни, и҆ ѡ҆ покаѧ́нїи. Вкꙋ́пѣ же пое́мъ и҆ ѳ҃-й ча́съ без̾ каѳі́смы, и҆ чте́мъ тетроєѵⷢ҇лїе: и҆ про́чее чте́нїе і҆ѡа́нна златоꙋ́стагѡ, тогѡ́же сло́ва. Ѡ҆ста́вшее же чте́мъ на трапе́зѣ, и҆ бл҃жє́нны пое́мъ, и҆ Помѧнѝ на́съ гдⷭ҇и: съ покло́ны, и҆ про́чее всѐ, ꙗ҆́коже въ понедѣ́льникъ ᲂу҆каза́сѧ.

Въ то́йже ст҃ы́й и҆ вели́кїй вто́рникъ ве́чера.

Ѻ҆бы́чнаѧ каѳі́сма съ покло́ны. На Гдⷭ҇и воззва́хъ, ста́вимъ стїхѡ́въ і҃: и҆ пое́мъ стїхи̑ры самогла́сны, гла́съ а҃: Во свѣ́тлостехъ ст҃ы́хъ твои́хъ:

Сла́ва, и҆ ны́нѣ, гла́съ з҃: Сѐ тебѣ̀ тала́нтъ:

Вхо́дъ со є҆ѵⷢ҇лїемъ. Свѣ́те ти́хїй: прокі́менъ, парємїѝ, и҆ чте́нїе днѐ.

и҆ па́ки прокі́менъ, и҆ чте́нїе.

и҆ Да и҆спра́витсѧ мл҃тва моѧ̀: Є҆ѵⷢ҇лїе матѳе́а: зача́ло р҃в: Ѡ҆ днѝ и҆ часѣ̀ прише́ствїѧ сн҃а чл҃вѣ́ческагѡ никто́же вѣ́сть:

Є҆ктенїа̀: Рце́мъ всѝ: и҆ прѡ́чаѧ преждесщ҃е́нныхъ.

[зрѝ] Повече́рїе вели́кое съ покло́ны, на не́мже пое́мъ трипѣ́снецъ кѵ́ръ а҆ндре́а кри́тскагѡ, гла́съ в҃. і҆рмосы̀ по два́жды, ꙗ҆́кѡ предписа́сѧ: послѣдѝ і҆рмо́съ ѻ҆́ба ли̑ка вкꙋ́пѣ. По трист҃о́мъ конда́къ трїѡ́ди, и҆ Гдⷭ҇и си́лъ съ на́мъ бꙋ́ди: и҆ про́чее.

По шестоѱа́лмїи А҆ллилꙋ́їа, во гла́съ и҃. тропа́рь, гла́съ то́йже: Сѐ жени́хъ: три́жды.

Та́же каѳі̑смы г҃: и҆ сѣда́льны трїѡ́ди: и҆ чте́нїе въ толкова́нїи златоꙋ́стагѡ, є҆́же ѿ матѳе́а є҆ѵⷢ҇лїе днѐ тогѡ̀, и҆ сло́во ст҃а́го є҆фре́ма сѵ́рїна, ѡ҆ блꙋдни́цѣ.

Та́же є҆ѵⷢ҇лїе і҆ѡа́нна зача́ло м҃а, близ̾ конца̀ без̾ престꙋ́пки: Свидѣ́тельствоваше наро́дъ сы́й со і҆и҃сомъ: Коне́цъ въ зача́лѣ м҃г-мъ: Ꙗ҆́коже речѐ мнѣ̀ ѻ҆ц҃ъ, та́кѡ глаго́лю.

Та́же ѱало́мъ, н҃, и҆ мл҃тва: Сп҃сѝ бж҃е лю́ди твоѧ̑: И҆ пое́мъ трипѣ́снецъ, гла́съ в҃, творе́нїе кѵ́ръ космы̀.

і҆рмо́съ по два́жды, тропарѝ на в҃і: послѣдѝ і҆рмо́съ ѻ҆́ба ли̑ка вкꙋ́пѣ. По г҃-й пѣ́сни, є҆ктенїа̀ ма́лаѧ. Та́же,

Конда́къ, гла́съ д҃. Подо́бенъ: Вознесы́йсѧ: Па́че блꙋдни́цы бл҃же, беззако́нновавъ, сле́зъ тꙋ̑чи ника́коже тебѣ̀ принесо́хъ: но молча́нїемъ молѧ́сѧ припа́даю тѝ, любо́вїю ѡ҆блобыза́ѧ пречⷭ҇тѣи твоѝ но́зѣ, ꙗ҆́кѡ да ѡ҆ставле́нїе мнѣ̀ ꙗ҆́кѡ влⷣка пода́си долгѡ́въ, зовꙋ́щꙋ тѝ сп҃се: ѿ скве́рныхъ дѣ́лъ мои́хъ и҆зба́ви мѧ̀.

И҆ і҆́косъ и҆ чте́мъ сѷнаѯа́рїй.

Та́же свѣти́ленъ, Черто́гъ тво́й ви́ждꙋ: три́жды. На хвали́техъ стїхи̑ры самогла́сны на д҃, гла́съ а҃: Тебѐ дв҃ыѧ сн҃а:

Сла́ва, гла́съ в҃: Грѣ́шнаѧ течѐ къ мѵ́рꙋ: И҆ ны́нѣ, гла́съ ѕ҃: Погрꙋже́ннаѧ грѣхо́мъ:

На стїхо́внѣ стїхи̑ры самогла́сны, гла́съ ѕ҃: Дне́сь хрⷭ҇то́съ прихо́дитъ въ до́мъ фарїсе́овъ: съ припѣ́вы ѻ҆бы́чными.

Та́же припѣ́въ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ: Ѿча́ѧннаѧ житїѧ̀ ра́ди:

Сла́ва, и҆ ны́нѣ, гла́съ и҃: Гдⷭ҇и, ꙗ҆́же во мнѡ́гїѧ грѣхѝ: и҆ про́чее, и҆ ча́съ а҃-й без̾ каѳі́смы, съ покло́ны, по ѻ҆бы́чаю: и҆ про́чее, и҆ ѿпꙋ́стъ.

При часѣ́ же є҃-мъ днѐ, ᲂу҆дарѧ́етъ параекклисїа́рхъ въ би́ло: и҆ собра́вшесѧ въ цр҃ковь, бл҃гослови́вшꙋ і҆ере́ю, пое́мъ г҃-й ча́съ, и҆ ѕ҃-й съ каѳі́смами, и҆ тропарѝ ѻ҆бы́чными, и҆ покло́ны: и҆ чте́мъ тетроєѵⷢ҇лїе, по ѻ҆бы́чаю.

и҆ пото́мъ чте́мъ сло́во і҆ѡа́нна златоꙋ́стагѡ, ѡ҆ любодѣ́йцѣ и҆ ѡ҆ ма́сти. Вкꙋ́пѣ же пое́мъ и҆ ѳ҃-й ча́съ, без̾ каѳі́смы.

и҆ чте́мъ тетроєѵⷢ҇лїе: и҆ скончава́емъ є҆го̀ здѣ̀.

и҆ пото́мъ чте́нїе тогѡ́же сло́ва і҆ѡа́нна златоꙋ́стагѡ: ѡ҆ста́вшее же чте́мъ на трапе́зѣ.

Та́же, Не преда́ждь на́съ до конца̀: и҆ про́чее съ покло́ны.

Посе́мъ пое́мъ бл҃жє́нны: и҆ Помѧнѝ на́съ гдⷭ҇и: съ покло́ны. Ли́къ нбⷭ҇ный: и҆ прѡ́чаѧ.

Сла́ва, Ли́къ ст҃ы́хъ а҆́гг҃лъ: И҆ ны́нѣ, Вѣ́рꙋю во є҆ди́наго бг҃а:

Ѡ҆сла́би, ѡ҆ста́ви: Ѻ҆́ч҃е на́шъ: Посе́мъ конда́къ трїѡ́ди, и҆ хра́ма ст҃а́гѡ и҆лѝ ст҃ы́ѧ:

Сла́ва, Со ст҃ы́ми ᲂу҆поко́й: И҆ ны́нѣ, хра́ма бцⷣы.

А҆́ще же нѝ, глаго́лемъ: Предста́тельство хрⷭ҇тїа́нъ: Гдⷭ҇и поми́лꙋй, м҃.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

И҆ покло́ны г҃ вели̑кїѧ, съ мл҃твою: Гдⷭ҇и и҆ влⷣко живота̀ моегѡ̀: И҆ про́чихъ в҃і. И҆ послѣдѝ є҆ди́нъ:

Та́же, трист҃о́е, и҆ мета̑нїѧ г҃. Гдⷭ҇и поми́лꙋй, в҃і. И҆ мл҃тва: Всест҃а́ѧ трⷪ҇це:

Та́же, Досто́йно є҆́сть:

Сла́ва, и҆ ны́нѣ:

И҆ вмѣ́стѡ ѿпꙋ́ста глаго́летъ настоѧ́тель мл҃твꙋ: Влⷣко многомлⷭ҇тиве: всю̀ до конца̀. Се́й же глаго́лемѣй, мы̀ ни́цъ па́дше на зе́млю, мо́лимсѧ. И҆ по и҆сполне́нїи тоѧ̀ на́мъ воста́вшымъ, прекланѧ́етсѧ и҆ то́й са́мъ къ бра́тїи, и҆ про́ситъ проще́нїѧ, глаго́лѧ: Бл҃гослови́те ѻ҆тцы̀ ст҃і́и, и҆ прости́те мѝ грѣ́шномꙋ, ꙗ҆̀же согрѣши́хъ во все́й жи́зни мое́й, и҆ во все́й ст҃ѣ́й м҃-цѣ, сло́вомъ, дѣ́ломъ, помышле́нїемъ, и҆ всѣ́ми мои́ми чꙋ́вствы. Бра́тїѧмъ же ѿвѣща́вшымъ: Бг҃ъ да прости́тъ тѝ чⷭ҇тны́й ѻ҆́тче. Та́же прихо́дѧтъ и҆ бра́тїѧ два̀ два̀, про́сѧтъ подо́бнѣ и҆ ті́и проще́нїѧ, глаго́люще: Прости́ мѧ ѻ҆́тче ст҃ы́й, и҆ прѡ́чаѧ ꙗ҆́коже вы́ше писа́сѧ. И҆ прїе́мше проще́нїе, и҆́демъ въ кє́ллїи на́шѧ, и҆ молчи́мъ до часа̀ вече́рнѧгѡ. Въ собо́рныхъ же хра́мѣхъ и҆ прихо́дскихъ, росхо́дъ не быва́етъ, но по проще́нїи трезво́нъ въ дво́и.

Во ст҃ꙋ́ю и҆ вели́кꙋю сре́дꙋ ве́чера:

Стїхологисꙋ́емъ каѳі́смꙋ, Ко гдⷭ҇ꙋ внегда̀ скорбѣ́ти мѝ: без̾ покло́нѡвъ. На Гдⷭ҇и воззва́хъ, ста́вимъ стїхѡ́въ: і҃: И҆ пое́мъ самогла́сны стїхи̑ры, гла́съ а҃: Тебѐ дв҃ыѧ сн҃а:

Сла́ва, и҆ ны́нѣ, гла́съ и҃: Гдⷭ҇и ꙗ҆́же во мнѡ́гїѧ грѣхѝ: творе́нїе кассі́и мона́хини.

Вхо́дъ со є҆ѵⷢ҇лїемъ: Прокі́менъ, парємїѝ, и҆ чтє́нїѧ днѐ. Да и҆спра́витсѧ мл҃тва моѧ̑: и҆ покло́ны г҃.

Та́же є҆ѵⷢ҇лїе матѳе́а, зача́ло р҃и: І҆и҃сꙋ бы́вшꙋ въ виѳа́нїи въ домꙋ̀ сі́мѡна прокаже́ннагѡ: Є҆ктенїа̀: Рце́мъ всѝ: и҆ про́чее послѣ́дованїе преждесщ҃е́нныхъ.

и҆ по пренесе́нїи ст҃ы́хъ дарѡ́въ, покло́ны трѝ. На Бꙋ́ди и҆́мѧ гдⷭ҇не: покло́ны г҃.

и҆ а҆́бїе ᲂу҆пражднѧ́ютсѧ соверше́ннѡ въ цр҃кви быва́ємыѧ покло́ны: Въ ке́ллїахъ же да́же и҆ до вели́кагѡ пѧтка̀ соверша́ютсѧ. Повече́рїе глаго́лемъ ма́лое, и҆ пое́мъ трипѣ́снецъ вели́кагѡ четвертка̀, гла́съ ѕ҃, творе́нїе кѵ́ръ а҆ндре́а кри́тскагѡ.

і҆рмо́съ по два́жды, по предпи́санномꙋ, послѣдѝ і҆рмо́съ ѻ҆́ба ли̑ка вкꙋ́пѣ. По трист҃о́мъ конда́къ: Хлѣ́бъ прїе́мъ: и҆ про́чее повече́рїѧ ма́лагѡ, по ѻ҆бы́чаю: и҆ ѿпꙋ́стъ.

и҆ твори́мъ покло́ны трѝ всѝ ра́внѡ ко́снѡ, и҆ бы́вшей мл҃твѣ ѿ предстоѧ́телѧ, ѿхо́димъ въ кє́ллїи своѧ̑.

[зрѝ] Вѣ́домо же бꙋ́ди: Ꙗ҆́кѡ ѿ сегѡ̀ ст҃а́гѡ днѝ полꙋ́нощница не пое́тсѧ въ цр҃кви до седми́цы ѳѡмины̀. Въ собо́рныхъ же хра́мѣхъ и҆ мїрски́хъ пою́тъ въ цр҃квахъ.

Въ з҃-й ча́съ но́щи кле́плетъ параекклисїа́рхъ, и҆ собра́вшесѧ въ цр҃ковь, и҆ сотво́ршꙋ і҆ере́ю нача́ло: Бл҃гослове́нъ бг҃ъ на́шъ: начина́емъ а҆́бїе по ѻ҆бы́чаю, ꙗ҆́коже писа́сѧ въ четверто́къ є҃-ѧ недѣ́ли.

Та́же шестоѱа́лмїе, и҆ по и҆сполне́нїи є҆ктенїа̀ вели́каѧ.

Та́же пое́мъ А҆ллилꙋ́їа, во гла́съ и҃.

Тропа́рь, гла́съ то́йже: Є҆гда̀ сла́внїи ᲂу҆ч҃нцы̀ на ᲂу҆мове́нїи ве́чери просвѣща́хꙋсѧ, тогда̀ і҆ꙋ́да ѕлочести́вый сребролю́бїемъ недꙋ́говавъ ѡ҆мрача́шесѧ, и҆ беззакѡ́ннымъ сꙋдїѧ́мъ тебѐ првⷣнаго сꙋдїю̀ предае́тъ. ви́ждь и҆мѣ́нїй рачи́телю, си́хъ ра́ди ᲂу҆давле́нїе ᲂу҆потреби́вша: бѣжѝ несы́тыѧ дꙋшѝ ᲂу҆ч҃телю такѡва́ѧ дерзнꙋ́вшїѧ. и҆́же ѡ҆ всѣ́хъ бл҃гі́й, гдⷭ҇и сла́ва тебѣ̀. Три́жды.

Посе́мъ чте́нїе въ толкова́нїи златоꙋ́стагѡ, є҆́же ѿ матѳе́а є҆ѵⷢ҇лїе днѐ тогѡ̀. По чте́нїи же є҆ѵⷢ҇лїе лꙋкѝ, зача́ло р҃и: Приближа́шесѧ пра́здникъ ѻ҆прѣснѡ́къ: без̾ престꙋ́пки. Коне́цъ, въ зача́лѣ р҃ѳ- мъ: По не́мже и҆до́ша ᲂу҆ч҃нцы̀ є҆гѡ̀.

Та́же, ѱало́мъ н҃.

Мл҃твы же, Сп҃сѝ бж҃е лю́ди твоѧ̑: не глаго́лемъ. Пое́мъ канѡ́нъ, гла́съ ѕ҃, творе́нїе кѵ́ръ космы̀: і҆рмо́съ по два́жды, тропарѝ на ѕ҃. послѣдѝ і҆рмо́съ ѻ҆́ба ли̑ка вкꙋ́пѣ. По г҃-й пѣ́сни, сѣда́ленъ трїѡ́ди, гла́съ а҃: Є҆зе́ра и҆ и҆сто́чники:

Сла́ва, гла́съ г҃: Смирѧ́ѧсѧ за бл҃гоꙋтро́бїе: И҆ ны́нѣ, гла́съ д҃: Ꙗ҆ды́й влⷣко со ᲂу҆ч҃нкѝ твои́ми:

И҆ чте́мъ сло́во і҆ѡа́нна златоꙋ́стагѡ ѡ҆ преда́нїи хрⷭ҇то́вѣ, и҆ ѡ҆ па́сцѣ, и҆ ѡ҆ сказа́нїи ст҃ы́хъ та̑инъ. Про́чее же ѿ слове́съ чте́мъ на трапе́зѣ. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Хлѣ́бъ прїе́мъ въ рꙋ́цѣ преда́тель, сокрове́ннѡ ты̑ѧ простира́етъ и҆ прїе́млетъ цѣ́нꙋ созда́вшагѡ свои́ма рꙋка́ма человѣ́ка: и҆ неиспра́вленъ пребы́сть і҆ꙋ́да ра́бъ и҆ льсте́цъ.

И҆ і҆́косъ, и҆ чте́мъ сѷнаѯа́рїй. По ѳ҃-й пѣ́сни, свѣти́ленъ: Черто́гъ тво́й: три́жды. На хвали́техъ стїхи̑ры на д҃, самогла́сны, гла́съ в҃: Стека́етсѧ про́чее,

Сла́ва, и҆ ны́нѣ, гла́съ то́йже: Є҆го́же проповѣ́да а҆́гнца и҆са́їа:

На стїхо́внѣ стїхи̑ры самогла́сны, гла́съ и҃: Дне́сь є҆́же на хрⷭ҇та̀ лꙋка́вое собра́сѧ собо́рище: Припѣ́въ: Ꙗ҆ды́й хлѣ́бы моѧ̑, возвели́чи на мѧ̀ запина́нїе. Дне́сь і҆ꙋ́да нищелю́бїѧ сокрыва́етъ лицѐ: в҃-й припѣ́въ: И҆схожда́ше во́нъ и҆ глаго́лаше вкꙋ́пѣ. г҃-й припѣ́въ: Сло́во законопрестꙋ́пное возложи́ша на мѧ̀.

Сла́ва, гла́съ то́йже: Нра́въ тво́й льстѝ и҆сполнѧ́етсѧ: И҆ ны́нѣ, гла́съ є҃:

Тайново́дствꙋѧ твоѧ̑ гдⷭ҇и ᲂу҆ч҃нкѝ:

Та́же, Бл҃го є҆́сть:

По трист҃о́мъ тропа́рь: Є҆гда̀ сла́внїи ᲂу҆ч҃нцы̀: и҆ є҆ктенїа̀: Присовокꙋплѧ́емъ же и҆ а҃-й ча́съ по ѻ҆бы́чаю, въ не́мже глаго́лемъ тропа́рь: Є҆гда̀ сла́внїи ᲂу҆ч҃нцы̀:

И҆ ны́нѣ, бг҃оро́диченъ часѡ́въ: Что́ тѧ нарече́мъ:

Та́же тропа́рь прⷪ҇ро́чества, гла́съ г҃: Заꙋше́нный за ро́дъ человѣ́ческїй:

Сла́ва, и҆ ны́нѣ, то́йже:

Прокі́менъ, и҆ паремїа̀: Прⷪ҇ро́чества і҆еремі́ина.

Та́же прокі́менъ, и҆ Стѡпы̀ моѧ̑:

и҆ Да и҆спо́лнѧтсѧ ᲂу҆ста̀ моѧ̑: По трист҃о́мъ конда́къ трїѡ́ди: Хлѣ́бъ прїе́мъ: и҆ прѡ́чаѧ, и҆ соверше́нный ѿпꙋ́стъ.

[зрѝ] Подоба́етъ вѣ́дати: Ꙗ҆́кѡ лїті́а за ᲂу҆поко́й въ притво́рѣ не быва́етъ до недѣ́ли ѳѡмины̀. При часѣ́ же г҃-мъ днѐ ᲂу҆дарѧ́етъ параекклисїа́рхъ въ би́ло, и҆ пое́мъ часы̀ вкꙋ́пѣ, г҃-й, ѕ҃-й, и҆ ѳ҃-й, по ѻ҆бы́чаю про́стѡ въ притво́рѣ, на ни́хже глаго́летсѧ тропа́рь: Є҆гда̀ сла́внїи: По трист҃о́мъ конда́къ: Хлѣ́бъ прїе́мъ: И҆ бл҃жє́нны ско́рѡ без̾ пѣ́нїѧ. И҆ Помѧнѝ на́съ гдⷭ҇и: Ли́къ нбⷭ҇ный: Вѣ́рꙋю во є҆ди́наго бг҃а: Ѡ҆сла́би, ѡ҆ста́ви: Ѻ҆́ч҃е на́шъ: Конда́къ є҆ди́нъ: Хлѣ́бъ прїе́мъ: Гдⷭ҇и поми́лꙋй, м҃.

Та́же, мл҃тва: Всест҃а́ѧ трⷪ҇це: и҆ ѿпꙋ́стъ.

Во ст҃ы́й вели́кїй четверто́къ ве́чера.

Во и҃ ча́съ днѐ ᲂу҆дарѧ́етъ параекклисїа́рхъ, и҆ собра́вшесѧ въ цр҃ковь, бл҃гослови́вшꙋ і҆ере́ю, начина́емъ вече́рню без̾ стїхосло́вїѧ: Цр҃ю̀ нбⷭ҇ный: Трист҃о́е: Гдⷭ҇и поми́лꙋй, в҃і. Прїиди́те поклони́мсѧ: три́жды.

и҆ ѱало́мъ: Бл҃гословѝ дꙋшѐ моѧ̑ гдⷭ҇а: и҆ є҆ктенїа̀ вели́каѧ. Гдⷭ҇и воззва́хъ, пое́мъ во гла́съ в҃.

і҆ере́й же и҆лѝ дїа́конъ кади́тъ: и҆ возвра́щьсѧ твори́тъ проскомі́дїю. Ста́вимъ стїхѡ́въ і҃: и҆ пое́мъ стїхи̑ры, самогла́сны днѐ, гла́съ в҃: Стека́етсѧ про́чее: повторѧ́юще сїѧ̑.

Сла́ва, и҆ ны́нѣ, гла́съ ѕ҃: Рожде́нїе є҆хі́дново:

Вхо́дъ съ є҆ѵⷢ҇лїемъ. Свѣ́те ти́хїй: Прокі́менъ, парємїѝ, и҆ чтє́нїѧ днѐ, трѝ.

Та́же є҆ктенїа̀ ма́лаѧ.

Посе́мъ трист҃о́е.

Прокі́менъ а҆пⷭ҇ла, гла́съ з҃: Кнѧ́зи лю́дстїи собра́шасѧ вкꙋ́пѣ, на гдⷭ҇а и҆ на хрⷭ҇та̀ є҆гѡ̀.

Сті́хъ: Вскꙋ́ю шата́шасѧ ꙗ҆зы́цы:

А҆по́столъ къ корі́нѳѧнѡмъ, зача́ло рм҃ѳ: А҆́зъ прїѧ́хъ ѿ гдⷭ҇а: а҆ллилꙋ́їа, гла́съ ѕ҃: Бл҃же́нъ разꙋмѣва́ѧй:

Сті́хъ: Вразѝ моѝ рѣ́ша мѝ ѕла̑ѧ.

Сті́хъ: Ꙗ҆ды́й хлѣ́бы моѧ̑, возвели́чи на мѧ̀ запина́нїе.

Є҆ѵⷢ҇лїе матѳе́а, зача́ло р҃з: Вѣ́сте, ꙗ҆́кѡ по двою̀ дню̑ па́сха бꙋ́детъ:

и҆ по чи́нꙋ бж҃е́ственнаѧ лїтꙋргі́а вели́кагѡ васі́лїа. Вмѣ́стѡ же херꙋві́мскїѧ пѣ́сни, пое́мъ возгла́съ ѕ҃: Ве́чери твоеѧ̀ та́йныѧ: три́жды, ли́ки премѣнѧ́ющесѧ: на коне́чномъ же а҆ллилꙋ́їа, три́жды. Вмѣ́стѡ досто́йно пое́мъ і҆рмо́съ: Стра́нствїѧ влⷣчнѧ: Въ прича́стна же мѣ́сто пое́мъ то́йже тропа́рь: Ве́чери твоеѧ̀ та́йныѧ: И҆ пое́мъ мно́жицею, до́ндеже причаща́ютсѧ бра́тїѧ бж҃е́ственныхъ та̑инъ. и҆ пото́мъ а҆ллилꙋ́їа, три́жды. И҆ вмѣ́стѡ, да и҆спо́лнѧтсѧ, пое́мъ то́йже тропа́рь: и҆ а҆ллилꙋ́їа.

Та́же вхо́димъ въ трапе́зꙋ, и҆ ꙗ҆ди́мъ варе́нїе съ є҆ле́емъ. пїе́мъ же и҆ вїно̀, и҆ и҆́но сꙋхоѧде́нїе, зане́же пое́тсѧ А҆ллилꙋ́їа. Стꙋді́йскїѧ же ѻ҆би́тели тѷпі́къ повелѣва́етъ въ вели́кїй ст҃ы́й четверто́къ ꙗ҆́сти є҆ди́но варе́нїе, и҆ со́чиво, и҆ ѡ҆бваре́нъ бо́бъ: пїе́мъ же и҆ вїно̀. Ст҃ы́ѧ же горы̀ тѷпі́къ повелѣва́етъ во ст҃ы́й вели́кїй четверто́къ, ꙗ҆́сти варе́нїѧ два̀ съ є҆ле́емъ, и҆ вїна̀ по г҃ ча́ши. И҆ сїѧ̑ всѧ̑ ка́кѡ разсꙋ́дитъ настоѧ́тель, зрѧ̀ свою̀ ѡ҆ хрⷭ҇тѣ̀ бра́тїю произволѧ́ющꙋ къ дꙋшесп҃си́тельнѣй по́льзѣ.

Повече́рїе же глаго́лемъ ма́лое: на не́мже трипѣ́снецъ пое́тсѧ, гла́съ и҃, пѣ́снь є҃, і҆рмо́съ: Мра́къ дꙋшѝ моеѧ̀: по два́жды, тропарѝ коли́кѡ и҆́хъ є҆́сть. Послѣдѝ і҆рмо́съ ѻ҆́ба ли̑ка вкꙋ́пѣ, и҆ по трист҃о́мъ конда́къ: На́съ ра́ди распѧ́таго: и҆ про́чее, и҆ ѿпꙋ́стъ. Полꙋ́нощницꙋ же пое́мъ въ ке́ллїахъ.

Во ст҃ы́й и҆ вели́кїй пѧто́къ ᲂу҆́тра:

Во в҃-й ча́съ но́щи кле́плетъ параекклисїа́рхъ. И҆ собра́вшымсѧ на́мъ во хра́мъ, бл҃гослови́вшꙋ і҆ере́ю съ кади́ломъ, глаго́лемъ по ѻ҆бы́чаю, ꙗ҆́коже предписа́сѧ въ четверто́къ є҃ недѣ́ли. И҆ ѻ҆бы́чное шестоѱа́лмїе. По си́хъ, є҆ктенїа̀ вели́каѧ. И҆ по возгла́сѣ пое́мъ А҆ллилꙋ́їа, во гла́съ и҃. Тропа́рь, гла́съ то́йже: Є҆гда̀ сла́внїи ᲂу҆ч҃нцы̀: три́жды, ко́снѡ и҆ со сладкопѣ́нїемъ, пи́санъ въ четверто́къ, на ᲂу҆́трени. Тогда̀ церквонастоѧ́тель раздава́етъ свѣщы̀ бра́тїи, и҆̀хже вжига́ютъ ко всѧ́комꙋ є҆ѵⷢ҇лїю. По тропарѣ́ же вхо́дитъ настоѧ́тель со дїа́кономъ во ст҃ы́й ѻ҆лта́рь, и҆ ѡ҆блача́сѧ во сщ҃є́нныѧ ѻ҆дє́жды, кади́тъ ст҃ꙋ́ю трапе́зꙋ крⷭ҇тоѡбра́знѡ, и҆ ве́сь ст҃ы́й ѻ҆лта́рь, и҆ ли́ки, и҆ бра́тїю по чи́нꙋ.

Та́же є҆ктенїа̀ ма́лаѧ, и҆ про́чее. Сі́и є҆ктєнїѝ глаго́лютсѧ ѿ дїа́кона, и҆лѝ ѿ і҆ере́а пред̾ сѣда́льными до и҃-гѡ є҆ѵⷢ҇лїа.

Посе́мъ, И҆ ѡ҆ сподо́битисѧ на́мъ:

Кли́рїцы же, Гдⷭ҇и поми́лꙋй, три́жды.

Дїа́конъ: Премꙋ́дрость, про́сти:

Настоѧ́тель: Ми́ръ всѣ̑мъ:

Ли́къ: И҆ дꙋ́хови твоемꙋ̀.

И҆ чте́тъ а҃ є҆ѵⷢ҇лїе і҆ѡа́нна, завѣ́та ст҃ы́хъ стрⷭ҇те́й, зача́ло м҃ѕ: Ны́нѣ просла́висѧ сн҃ъ чл҃вѣ́ческїй: Коне́цъ: Во́ньже вни́де са́мъ и҆ ᲂу҆ч҃нцы̀ є҆гѡ̀.

Кли́рїцы же: Сла́ва долготерпѣ́нїю твоемꙋ̀ гдⷭ҇и.

Чте́тъ же сїѐ а҃ є҆ѵⷢ҇лїе настоѧ́тель, про́чыѧ же і҆ере́и, є҆ди́нъ по є҆ди́номꙋ. кі́йждо. По чте́нїи же є҆ѵⷢ҇лїа а҆́бїе пое́мъ а҆нтїфѡ́ны, повторѧ́юще всѧ̑ тропарѝ. А҆нтїфѡ́нъ а҃, гла́съ и҃. По г҃- мъ же а҆нтїфѡ́нѣ, сѣда́ленъ, гла́съ з҃, пое́тсѧ посредѣ̀ цр҃кве ѿ канѡна́рха. Сла́ва, коне́цъ: И҆ ны́нѣ, па́ки ве́сь. На ни́хже не сѣди́мъ, но стоѧ́ще пое́мъ: за є҆́же кади́тъ тогда̀ і҆ере́й и҆лѝ дїа́конъ ст҃ꙋ́ю трапе́зꙋ.

Та́же, глаго́летъ дїа́конъ: И҆ ѡ҆ сподо́битисѧ на́мъ:

Чте́тъ і҆ере́й є҆ѵⷢ҇лїе в҃-е і҆ѡа́нна, зача́ло н҃и: И҆зы́де і҆и҃съ со ᲂу҆ч҃нкѝ свои́ми: Коне́цъ: Но да ꙗ҆дѧ́тъ фа́скꙋ. По є҆ѵⷢ҇лїи же пое́мъ а҆нтїфѡ́нъ д҃, гла́съ є҃.

Та́же сѣда́ленъ, гла́съ з҃, ꙗ҆́кѡ предписа́сѧ.

Є҆ѵⷢ҇лїе г҃-е матѳе́а, зача́ло р҃ѳ: Во́ини є҆́мше і҆и҃са ведо́ша къ каїа́фѣ: Коне́цъ: И҆ и҆зше́дъ во́нъ пла́касѧ го́рькѡ.

Та́же пое́мъ а҆нтїфѡ́нъ з҃, гла́съ и҃, ꙗ҆́коже предписа́сѧ. И҆ сѣда́ленъ, гла́съ и҃.

Є҆ѵⷢ҇лїе д҃-е і҆ѡа́нна, зача́ло н҃ѳ: Ведо́ша і҆и҃са ѿ каїа́фы въ претѡ́ръ: Коне́цъ: Предадѐ є҆го̀ и҆̀мъ, да ра́спнетсѧ.

Та́же пое́мъ а҆нтїфѡ́нъ і҃, гла́съ ѕ҃. И҆ сѣда́ленъ, гла́съ и҃.

Посе́мъ чте́тъ і҆ере́й є҆ѵⷢ҇лїе є҃-е матѳе́а, зача́ло ра҃і: Ви́дѣвъ і҆ꙋ́да преда́вый і҆и҃са: Коне́цъ: Понестѝ крⷭ҇тъ є҆гѡ̀.

Та́же пое́мъ а҆нтїфѡ́нъ г҃і, гла́съ ѕ҃. И҆ сѣда́ленъ, гла́съ д҃.

Є҆ѵⷢ҇лїе ѕ҃-е ма́рка, зача́ло ѯ҃з: Во́ини ведо́ша і҆и҃са: Коне́цъ: Да ви́димъ и҆ вѣ́рꙋ и҆ме́мъ є҆мꙋ̀.

И҆ а҆́бїе пое́мъ бл҃жє́нны, гла́съ д҃: Во црⷭ҇твїи твое́мъ помѧнѝ на́съ гдⷭ҇и: ста́вимъ стїхѡ́въ ѳ҃, ѡ҆ Бл҃же́ни а҆́лчꙋщїи:

Та́же прокі́менъ, гла́съ д҃: Раздѣли́ша ри̑зы моѧ̑ себѣ̀:

Сті́хъ: Бж҃е бж҃е мо́й, вонми́ ми:

Є҆ѵⷢ҇лїе з҃-е матѳе́а, зача́ло рг҃і: Прише́дше во́ини на мѣ́сто: Коне́цъ: Вои́стиннꙋ бж҃їй сн҃ъ бѣ̀ се́й.

Та́же чте́нїе въ толкова́нїи є҆ѵⷢ҇лїа, є҆́же ѿ матѳе́а въ коне́цъ: Сло́во кре́стное: и҆лѝ сло́во прпⷣбнагѡ є҆фре́ма ѡ҆ стрⷭ҇ти сп҃совѣ. Посе́мъ ѱало́мъ н҃.

Ѿ здѣ́ же дїа́конъ престае́тъ кади́ти, и҆ є҆ктєнїѝ сѣда́льнѡвъ не глаго́лютсѧ, то́кмѡ И҆ ѡ҆ сподо́битисѧ на́мъ, глаго́лемъ ко всѣ̑мъ є҆ѵⷢ҇лїємъ.

Та́же є҆ѵⷢ҇лїе и҃-е лꙋкѝ, зача́ло ра҃і: Ведѧ́хꙋ со і҆и҃сомъ и҆ и҆́на два̀ ѕлодѣ́ѧ: Коне́цъ: Ѿ галїле́и, зрѧ́ще си́хъ.

Посе́мъ пое́мъ трипѣ́снецъ. Творе́нїе кѵ́ръ космы̀, гла́съ ѕ҃. Пѣ́снь є҃, І҆рмо́съ по два́жды. Тропарѝ на в҃і. Послѣдѝ і҆рмо́съ ѻ҆́ба ли̑ка вкꙋ́пѣ. є҆ктенїа̀. По є҃-й пѣ́сни,

Конда́къ, гла́съ и҃, самогла́сенъ: На́съ ра́ди распѧ́таго, прїиди́те всѝ воспои́мъ, того́ бо ви́дѣ мр҃і́а на дре́вѣ, и҆ глаго́лаше: а҆́ще и҆ распѧ́тїе терпи́ши, ты̀ є҆сѝ сн҃ъ и҆ бг҃ъ мо́й.

И҆ і҆́косъ, и҆ чте́мъ сѷнаѯа́рїй. По ѳ҃-й пѣ́сни, Свѣти́ленъ, три́жды.

Та́же є҆ѵⷢ҇лїе ѳ҃-е і҆ѡа́нна, зача́ло ѯ҃а. Стоѧ́хꙋ при крⷭ҇тѣ̀ і҆и҃совѣ мт҃и є҆гѡ̀: Коне́цъ: Воззрѧ́тъ на́нь, є҆го́же прободо́ша.

И҆ а҆́бїе, Всѧ́кое дыха́нїе, на гла́съ г҃.

и҆ пое́мъ стїхи̑ры самогла́сны г҃, повторѧ́юще пе́рвꙋю: Два̀ и҆ лꙋка̑внаѧ сотворѝ:

Сла́ва, гла́съ ѕ҃: Совлеко́ша съ менѐ ри̑зы моѧ̑: И҆ ны́нѣ, гла́съ то́йже: Плещѝ моѧ̑ да́хъ на ра̑ны:

Та́же є҆ѵⷢ҇лїе і҃-е ма́рка, зача́ло ѯ҃ѳ: Прїи́де і҆ѡ́сифъ ѿ а҆рїмаѳе́а: Коне́цъ: Зрѧ́стѣ, гдѣ̀ є҆го̀ полага́хꙋ.

Та́же, Сла́ва въ вы́шнихъ бг҃ꙋ:

Посе́мъ і҆ере́й є҆ктенїю̀: И҆спо́лнимъ ᲂу҆́треннюю: И҆ про́чее по ѻ҆бы́чаю. И҆ по возгла́сѣ: Ꙗ҆́кѡ бг҃ъ млⷭ҇тивъ:

А҆́бїе, є҆ѵⷢ҇лїе а҃і, і҆ѡа́нна, зача́ло ѯ҃в: Молѝ пїла́та і҆ѡ́сифъ: Коне́цъ: Положи́ста і҆и҃са.

Та́же на стїхо́внѣ пое́мъ стїхи̑ры самогла́сны: є҆ди́на, гла́съ а҃: Всѧ̀ тва́рь и҆змѣнѧ́шесѧ стра́хомъ: и҆ трѝ, гла́са в҃-гѡ. Припѣ́вы: а҃, Раздѣли́ша ри̑зы моѧ̑ себѣ̀: в҃, Да́ша въ снѣ́дь мою̀ же́лчь: г҃, Бг҃ъ же цр҃ь на́шъ пре́жде вѣ́ка:

Сла́ва, гла́съ и҃: Гдⷭ҇и, восходѧ́щꙋ тѝ на крⷭ҇тъ: И҆ ны́нѣ, гла́съ то́йже: Оу҆жѐ ѡ҆мака́етсѧ тро́сть:

Та́же дїа́конъ кади́тъ, ꙗ҆́коже и҆ въ нача́лѣ, хра́мъ ве́сь. Посе́мъ настоѧ́тель чте́тъ є҆ѵⷢ҇лїе в҃і-е матѳе́а, зача́ло рд҃і: Во ᲂу҆́трїй де́нь, и҆́же є҆́сть по пѧтцѣ̀: Коне́цъ: Зна́менавше ка́мень съ кꙋстѡді́ею.

Та́же, Бла́го є҆́сть: Трист҃о́е.

По Ѻ҆́ч҃е на́шъ: Тропа́рь, гла́съ д҃: И҆скꙋпи́лъ ны̀ є҆сѝ ѿ клѧ́твы зако́нныѧ чⷭ҇тно́ю твое́ю кро́вїю, на крⷭ҇тѣ̀ пригвозди́всѧ, и҆ копїе́мъ пробо́дсѧ, безсме́ртїе и҆сточи́лъ є҆сѝ человѣ́кѡмъ, сп҃се на́шъ сла́ва тебѣ̀.

Посе́мъ є҆ктенїа̀: Поми́лꙋй на́съ бж҃е:

Та́же і҆ере́й: Премꙋ́дрость.

И҆ ѿпꙋ́стъ. Пе́рвый же ча́съ не присовокꙋплѧ́емъ.

творе́нїе кѷрі́лла а҆рхїепⷭ҇кпа а҆леѯандрі́йскагѡ.

При часѣ̀ в҃-мъ днѐ, зво́нъ въ дво́и, є҆ди́нъ до́лгїй. И҆ собра́вшесѧ въ цр҃ковь. Ѡ҆блачи́тсѧ і҆ере́й во сщ҃є́нныѧ ри̑зы, дїа́конъ же въ стїха́рь. Пое́мъ часы̀ вкꙋ́пѣ, ча́съ а҃, г҃, ѕ҃ и҆ ѳ҃. Бл҃гослови́вшꙋ і҆ере́ю, глаго́лемъ: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. Ѻ҆́ч҃е на́шъ: І҆ере́й возгла́съ. Гдⷭ҇и поми́лꙋй, в҃і.

Сла́ва, и҆ ны́нѣ:

Прїиди́те поклони́мсѧ. три́жды. И҆ глаго́лемъ не ѻ҆бы̑чныѧ ѱалмы̀, но ꙗ҆̀же здѣ̀ и҆з̾ѧвлѧ́етъ. а҃-гѡ часа, ѱало́мъ є҃: Глаго́лы моѧ̑ внꙋшѝ гдⷭ҇и: ѱало́мъ в҃: Вскꙋ́ю шата́шасѧ ꙗ҆зы́цы: ѱало́мъ к҃а: Бж҃е бж҃е мо́й, вонми́ ми:

Та́же, Сла́ва, и҆ ны́нѣ, а҆ллилꙋ́їа три́жды. Гдⷭ҇и поми́лꙋй, три́жды.

Сла́ва, тропа́рь, гла́съ а҃: Распе́ншꙋсѧ тебѣ̀ хрⷭ҇тѐ, поги́бе мꙋчи́тельство, попра́на бы́сть си́ла вра́жїѧ: ниже́ бо а҆́гг҃лъ, нижѐ человѣ́къ. но са́мъ гдⷭ҇и, спа́слъ є҆сѝ на́съ, сла́ва тебѣ̀.

И҆ ны́нѣ, бг҃оро́диченъ: Что́ тѧ нарече́мъ:

Та́же пое́мъ тропа́рь, г҃, ѿ в҃і. Кі́йждо тропа́рь, ѿ ѻ҆бою̀ ли̑кꙋ по два́жды. а҃-й тропа́рь, а҃-гѡ часа̀, гла́съ и҃: Дне́сь цр҃ко́внаѧ завѣ́са: два́жды, без̾ припѣ́ва.

Та́же припѣ́въ: Вскꙋ́ю шата́шасѧ ꙗ҆зы́цы:

И҆ пое́мъ дрꙋгі́й тропа́рь, гла́съ и҃: Ꙗ҆́кѡ ѻ҆вча̀ на заколе́нїе веде́нъ бы́лъ є҆сѝ: Дрꙋгі́й припѣ́въ: Предста́ша ца́рїе зе́мстїи: И҆ па́ки пое́мъ то́йже тропа́рь: Ꙗ҆́кѡ ѻ҆вча̀:

Та́же, Сла́ва, тропа́рь: Є҆́мшымъ тѧ̀ беззакѡ́ннымъ: И҆ ны́нѣ, па́ки то́йже.

Посе́мъ пое́мъ прокі́менъ паремїѝ, гла́съ д҃: Се́рдце є҆гѡ̀ собра̀ беззако́нїе себѣ̀.

Сті́хъ: Бл҃же́нъ разꙋмѣва́ѧй:

Та́же паремїа̀: Прⷪ҇ро́чества заха́рїина: Та́кѡ глаго́летъ гдⷭ҇ь: прїимꙋ̀ же́злъ мо́й до́брый: Посе́мъ а҆по́столъ къ гала́тѡмъ, зача́ло сє҃і ѿ полꙋ̀: Мнѣ̀ да не бꙋ́детъ хвали́тисѧ:

Та́же є҆ѵⷢ҇лїе матѳе́а, зача́ло р҃і: Оу҆́трꙋ бы́вшꙋ, совѣ́тъ сотвори́ша всѝ а҆рхїере́є: Коне́цъ: И҆ мт҃и сн҃ꙋ зеведе́ѡвꙋ.

и҆ чте́мъ словеса̀ ѡ҆ стрⷭ҇те́хъ гдⷭ҇нихъ.

Та́же, Стѡпы̀ моѧ̑ напра́ви:

Трист҃о́е: по Ѻ҆́ч҃е на́шъ: конда́къ, гла́съ и҃: На́съ ра́ди распѧ́таго: Гдⷭ҇и поми́лꙋй, м҃.

и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ.

И҆́менемъ гдⷭ҇нимъ:

І҆ере́й: Бж҃е ᲂу҆ще́дри ны̀:

Та́же, мл҃тва: хрⷭ҇тѐ свѣ́те и҆́стинный:

Посе́мъ пое́мъ г҃-й ча́съ, глаго́лемъ: Прїиди́те поклони́мсѧ, три́жды. и҆ дрꙋгі̑ѧ трѝ ѱалмы̀ г҃-гѡ часа̀. ѱало́мъ л҃д: Сꙋдѝ гдⷭ҇и, ѡ҆би́дѧщыѧ мѧ̀: р҃и: Бж҃е, хвалы̀ моеѧ̀ не премолчѝ: н҃: Поми́лꙋй мѧ̀ бж҃е:

Сла́ва, и҆ ны́нѣ, а҆ллилꙋ́їа, три́жды. Гдⷭ҇и поми́лꙋй, три́жды.

Сла́ва, тропа́рь, гла́съ ѕ҃: Гдⷭ҇и, ѡ҆сꙋди́ша тѧ̀ і҆ꙋде́є на сме́рть, жи́знь всѣ́хъ: и҆̀же чермно́е мо́ре жезло́мъ проше́дшїи, на крⷭ҇тѣ́ тѧ пригвозди́ша, и҆ и҆̀же ѿ ка́мене ме́дъ сса́вшїи, же́лчь тебѣ̀ принесо́ша. но во́лею претерпѣ́лъ є҆сѝ, да на́съ свободи́ши ѿ рабо́ты вра́жїѧ, хрⷭ҇тѐ бж҃е сла́ва тебѣ̀.

И҆ ны́нѣ, Бцⷣе ты̀ є҆сѝ лоза̀:

Та́же тропарѝ г҃, гла́съ и҃: Стра́ха ра́ди і҆ꙋде́йскагѡ: два́жды, без̾ припѣ́ва.

Та́же припѣ́въ: Глаго́лы моѧ̑ внꙋшѝ гдⷭ҇и:

Пре́жде чⷭ҇тна́гѡ твоегѡ̀ крⷭ҇та̀: Припѣ́въ: Вонмѝ гла́сꙋ моле́нїѧ моегѡ̀: па́ки то́йже тропа́рь.

Сла́ва, гла́съ є҃: Влеко́мь на крⷭ҇тъ: И҆ ны́нѣ, то́йже.

Посе́мъ прокі́менъ, гла́съ д҃: Ꙗ҆́кѡ а҆́зъ на ра̑ны гото́въ:

Сті́хъ: Гдⷭ҇и, да не ꙗ҆́ростїю твое́ю ѡ҆бличи́ши менѐ:

Та́же, Прⷪ҇ро́чества и҆са́їина:

Паремїа̀: Гдⷭ҇ь дае́тъ мнѣ̀ ѧ҆зы́къ наꙋче́нїе: А҆по́столъ къ ри́млѧнѡмъ, зача́ло п҃и ѿ полꙋ̀: Хрⷭ҇то́съ сꙋ́щымъ на́мъ немощны̑мъ: Є҆ѵⷢ҇лїе ма́рка, зача́ло ѯ҃ѕ: Совѣ́тъ сотвори́ша а҆рхїере́є со ста́рцы: Коне́цъ, Ꙗ҆̀же взыдо́ша съ ни́мъ съ ни́мъ во і҆ерⷭ҇ли́мъ. и҆ чте́нїе.

Та́же, Гдⷭ҇ь бг҃ъ бл҃гослове́нъ.

Трист҃о́е. и҆ по Ѻ҆́ч҃е на́шъ, конда́къ, На́съ ра́ди распѧ́таго: Гдⷭ҇и поми́лꙋй, м҃.

и҆ мл҃тва, И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

І҆ере́й, Бж҃е ᲂу҆ще́дри ны̀:

Та́же мл҃тва: Влⷣко бж҃е ѻ҆́ч҃е вседержи́телю:

и҆ а҆́бїе пое́мъ: ѕ҃ ча́съ.

Глаго́лемъ, Прїиди́те поклони́мсѧ: три́жды, и҆ г҃ ѱалмы̀ ѕ҃-гѡ часа̀: ѱало́мъ н҃г: Бж҃е, во и҆́мѧ твоѐсп҃си́ мѧ: рл҃ѳ, И҆зми́ мѧ гдⷭ҇и ѿ человѣ́ка лꙋка́ва: ч҃, Живы́й въ по́мощи вы́шнѧгѡ:

Сла́ва, и҆ ны́нѣ, а҆ллилꙋ́їа, три́жды. Гдⷭ҇и поми́лꙋй, три́жды.

Сла́ва, тропа́рь, гла́съ в҃, Спасе́нїе содѣ́лалъ є҆сѝ: И҆ ны́нѣ, Ꙗ҆́кѡ не и҆́мамы дерзнове́нїѧ:

Та́же тропарѝ трѝ, гла́съ и҃, Сїѧ̑ глаго́летъ гдⷭ҇ь і҆ꙋде́ѡмъ: два́жды, без̾ припѣ́ва.

Та́же припѣ́въ: Да́ша въ снѣ́дь мою̀ же́лчь:

Тропа́рь, Законополѡ́жницы і҆и҃лєвы: Припѣ́въ, Сп҃си́ мѧ бж҃е, ꙗ҆́кѡ внидо́ша во́ды: И҆ па́ки то́йже.

Сла́ва, гла́съ є҃, Прїиди́те хрⷭ҇тоно́снїи лю́дїе: И҆ ны́нѣ, то́йже.

Посе́мъ прокі́менъ, гла́съ д҃: Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ:

Сті́хъ: Ꙗ҆́кѡ взѧ́тсѧ великолѣ́пїе твоѐ:

Паремїа̀: Прⷪ҇ро́чества и҆са́їина: Та́кѡ глаго́летъ гдⷭ҇ь: сѐ разꙋмѣ́етъ ѻ҆́трокъ мо́й: А҆по́столъ ко є҆вре́ємъ, зача́ло т҃ѕ: Ст҃ѧ́й и҆ ѡ҆сщ҃а́емїи ѿ є҆ди́нагѡ всѝ: Є҆ѵⷢ҇лїе лꙋкѝ, зача́ло ра҃і: Ведѧ́хꙋ со і҆и҃сомъ и҆ и҆́на два̀ ѕлодѣ́ѧ: Коне́цъ: Ѿ галїле́и зрѧ́ще си́хъ. И҆ чте́нїе.

Та́же, Ско́рѡ да предварѧ́тъ ны̀:

Посе́мъ трист҃о́е. и҆ Ѻ҆́ч҃е на́шъ: Конда́къ: На́съ ра́ди распѧ́таго: Гдⷭ҇и поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды.

Сла́ва, и҆ ны́нѣ, Чⷭ҇тнѣ́йшꙋю херꙋві̑мъ:

І҆ере́й: Бж҃е ᲂу҆ще́дри ны̀:

Посе́мъ мл҃тва: Бж҃е и҆ гдⷭ҇и си́лъ:

Та́же пое́мъ ѳ҃-й ча́съ: глаго́лемъ:

Прїиди́те поклони́мсѧ: три́жды.

и҆ г҃ ѱалмы̀. ѱало́мъ ѯ҃и: Сп҃си́ мѧ бж҃е, ꙗ҆́кѡ внидо́ша во́ды: ѯ҃ѳ: Бж҃е, въ по́мощь мою̀ вонмѝ: п҃є: Приклонѝ гдⷭ҇и ᲂу҆́хо твоѐ:

Сла́ва, и҆ ны́нѣ, а҆ллилꙋ́їа, три́жды. Гдⷭ҇и поми́лꙋй, три́жды.

Сла́ва, тропа́рь, гла́съ и҃: Ви́дѧ разбо́йникъ нача́льника жи́зни: И҆ ны́нѣ: И҆́же на́съ ра́ди рожде́йсѧ ѿ дв҃ы:

Та́же тропарѝ, гла́съ з҃: Оу҆́жасъ бѣ̀ ви́дѣти: два́жды, без̾ припѣ́ва.

Та́же припѣ́въ: Раздѣли́ша ри̑зы моѧ̑ себѣ̀: Тропа́рь, гла́съ в҃: Є҆гда̀ на крⷭ҇тѣ̀ пригвозди́ша:

Та́же припѣ́въ: Да́ша въ снѣ́дь мою̀ же́лчь: и҆ па́ки то́йже.

Та́же, Сла́ва, гла́съ ѕ҃: Дне́сь ви́ситъ на дре́вѣ: И҆ ны́нѣ, то́йже.

Посе́мъ прокі́менъ, гла́съ ѕ҃: Речѐ безꙋ́менъ въ се́рдцѣ свое́мъ:

Сті́хъ: Нѣ́сть творѧ́й бл҃госты́ню:

Та́же, паремїа̀: Прⷪ҇ро́чества і҆еремі́ина: Гдⷭ҇и, скажи́ ми, и҆ разꙋмѣ́ю: А҆по́столъ ко є҆вре́ємъ, зача́ло тк҃д: И҆мꙋ́ще дерзнове́нїе входи́ти: Є҆ѵⷢ҇лїе і҆ѡа́нна, зача́ло н҃ѳ: Ведо́ша і҆и҃са ѿ каїа́фы въ претѡ́ръ: Коне́цъ: Воззрѧ́тъ на́нь, є҆го́же прободо́ша. И҆ чте́нїе.

Та́же, Не преда́ждь на́съ:

Трист҃о́е, и҆ по Ѻ҆́ч҃е на́шъ: Конда́къ: На́съ ра́ди распѧ́таго: Гдⷭ҇и поми́лꙋй, м҃. И҆ мл҃тва: И҆́же на всѧ́кое вре́мѧ: Гдⷭ҇и, поми́лꙋй, три́жды.

Сла́ва, и҆ ны́нѣ: Чⷭ҇тнѣ́йшꙋю херꙋві̑мъ:

І҆ере́й: Бж҃е ᲂу҆ще́дри ны̀: Посе́мъ мл҃тва: Влⷣко гдⷭ҇и і҆и҃се хрⷭ҇тѐ бж҃е на́шъ, долготерпѣ́вый:

Та́же бл҃жє́нна, ско́рѡ.

И҆ Помѧнѝ на́съ гдⷭ҇и: Ли́къ нбⷭ҇ный:

Сла́ва: Ли́къ ст҃ы́хъ а҆́гг҃лъ: И҆ ны́нѣ: Вѣ́рꙋю во є҆ди́наго бг҃а:

Ѡ҆сла́би, ѡ҆ста́ви: Ѻ҆́ч҃е на́шъ: Конда́къ: На́съ ра́ди распѧ́таго: Гдⷭ҇и поми́лꙋй, м҃. и҆мл҃тва: Всест҃а́ѧ трⷪ҇це:

Та́же, Бꙋ́ди и҆́мѧ гдⷭ҇не: три́жды.

Сла́ва, и҆ ны́нѣ: Бл҃гословлю̀ гдⷭ҇а на всѧ́кое вре́мѧ:

Посе́мъ, досто́йно є҆́сть: и҆ ѿпꙋ́стъ часѡ́въ.

[зрѝ] Подоба́етъ же и҆ сїѐ вѣ́дати: Ꙗ҆́кѡ прїѧ́хомъ въ палесті́нѣ, въ се́й ст҃ы́й де́нь вели́кагѡ пѧтка̀, не твори́ти преждесщ҃е́ннꙋю, нижѐ па́ки соверше́ннꙋю лїтꙋргі́ю, но нижѐ трапе́зꙋ поставлѧ́емъ, нижѐ ꙗ҆ди́мъ въ сі́й де́нь распѧ́тїѧ: а҆́ще же кто̀ бꙋ́детъ многоне́мощенъ, и҆лѝ престарѣ́лсѧ, и҆ не могі́й пребы́ти по́стенъ, дае́тсѧ є҆мꙋ̀ хлѣ́бъ и҆ вода̀, по захожде́нїи со́лнца. Си́це бо прїѧ́хомъ ѿ ст҃ы́хъ за́повѣдей ст҃ы́хъ а҆пⷭ҇лъ, не ꙗ҆́сти въ вели́кїй пѧто́къ. Гдⷭ҇не бо сло́во, є҆́же речѐ къ фарїсе́ѡмъ: Ꙗ҆́кѡ є҆гда̀ ѿи́метсѧ ѿ ни́хъ жени́хъ, тогда̀ постѧ́тсѧ въ ты̑ѧ дни̑: здѣ̀ блаже́ннѣйшїи а҆пⷭ҇ли воспрїѧ́ша. И҆ сїѐ ѡ҆брѧ́щеши во а҆пⷭ҇льскихъ преда́нїихъ, внима́тельнѡ сїѧ̑проходѧ̀. Но и҆ пра́вильное посла́нїе ст҃ѣ́йшагѡ а҆рхїепⷭ҇кпа а҆леѯандрі́йскагѡ дїонѵ́сїа ꙗ҆́вѣ сїѐ предпоставлѧ́етъ.

При часѣ̀ і҃-мъ днѐ кле́плетъ въ вели́кое, и҆ собра́вшесѧ въ цр҃ковь, начина́емъ вече́рню.

Глаго́летъ і҆ере́й: Бл҃гослове́нъ бг҃ъ на́шъ:

Та́же предста́тель глаго́летъ: А҆ми́нь.

Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный: Трист҃о́е. и҆ по Ѻ҆́ч҃е на́шъ: Гдⷭ҇и поми́лꙋй, в҃і.

Сла́ва, и҆ ны́нѣ: Прїиди́те, поклони́мсѧ: три́жды.

Та́же ѱало́мъ: Бл҃гословѝ дꙋшѐ моѧ̑ гдⷭ҇а:

и҆ є҆ктенїа̀ вели́каѧ. Гдⷭ҇и воззва́хъ, пое́мъ во гла́съ а҃. и҆ ста́вимъ стїхѡ́въ ѕ҃. и҆ пое́мъ стїхи̑ры самогла́сны, гла́съ а҃: Всѧ̀ тва́рь и҆змѣнѧ́шесѧ стра́хомъ:

Сла́ва, гла́съ то́йже: Ѽ ка́кѡ беззако́нное со́нмище: И҆ ны́нѣ, гла́съ то́йже: Стра́шное и҆ пресла́вное та́инство:

Вхо́дъ со є҆ѵⷢ҇лїемъ. Свѣ́те ти́хїй:

Прокі́менъ паремїѝ, гла́съ д҃: Раздѣли́ша ри̑зы моѧ̑ себѣ̀:

Сті́хъ: Бж҃е, бж҃е мо́й, вонми́ ми:

Та́же чте́нїе и҆схо́да: Глаго́ла гдⷭ҇ь къ мѡѷсе́ю лице́мъ къ лицꙋ̀:

Посе́мъ прокі́менъ, гла́съ д҃: Сꙋдѝ гдⷭ҇и ѡ҆би́дѧщыѧ мѧ̀, поборѝ борю́щыѧ мѧ̀.

Сті́хъ: Прїимѝ ѻ҆рꙋ́жїе и҆ щи́тъ, и҆ воста́ни въ по́мощь мою̀.

Та́же і҆́ѡва: Бл҃гословѝ гдⷭ҇ь послѣ̑днѧѧ і҆́ѡвлѧ:

Посе́мъ паремїа̀: Пррⷪ҇о́чества и҆са́їина: Та́кѡ глаго́летъ гдⷭ҇ь сѐ разꙋмѣ́етъ ѻ҆́трокъ мо́й:

Та́же прокі́менъ, гла́съ ѕ҃: Положи́ша мѧ̀ въ ро́вѣ преиспо́днемъ, въ те́мныхъ и҆ сѣ́ни сме́ртнѣй.

Сті́хъ: Гдⷭ҇и бж҃е сп҃се́нїѧ моегѡ̀, во днѝ воззва́хъ и҆ въ нощѝ пред̾ тобо́ю.

А҆по́столъ къ корі́нѳѧнѡмъ, зача́ло рк҃є: Сло́во крⷭ҇тное: Коне́цъ: И҆ сего̀ ра́спѧта. А҆ллилꙋ́їа, гла́съ є҃: Сп҃си́ мѧ бж҃е, ꙗ҆́кѡ внидо́ша во́ды:

Сті́хъ: Поноше́нїе ча́ѧше дꙋша̀ моѧ̑ и҆ стра́сть:

Сті́хъ в҃: Да помрача́тсѧ ѻ҆́чи и҆́хъ є҆́же не ви́дѣти:

Є҆ѵⷢ҇лїе матѳе́а, зача́ло р҃і: Совѣ́тъ сотвори́ша всѝ а҆рхїере́є и҆ ста́рцы: Коне́цъ: Сѣдѧ́щѣ прѧ́мѡ гро́ба.

Посе́мъ є҆ктенїа̀: Рце́мъ всѝ:

Та́же: Сподо́би гдⷭ҇и:

И҆ пото́мъ є҆ктенїа̀: И҆спо́лнимъ вече́рнюю мл҃твꙋ:

И҆ возгла́съ.

Та́же на стїхо́внѣ, пое́мъ стїхи̑ры гла́съ в҃. Самоподо́бны: Є҆гда̀ ѿ дре́ва: припѣ́въ же глаго́лемъ: а҃, Гдⷭ҇ь воцр҃и́сѧ: в҃, И҆́бо ᲂу҆твердѝ вселе́ннꙋю: г҃, До́мꙋ твоемꙋ̀ подоба́етъ:

Сла́ва, и҆ ны́нѣ, гла́съ є҃: Тебѐ ѡ҆дѣ́ющагосѧ свѣ́томъ:

Та́же: Ны́нѣ ѿпꙋща́еши:

Трист҃о́е. по Ѻ҆́ч҃е на́шъ. тропа́рь, гла́съ в҃: Бл҃гоѡбра́зный і҆ѡ́сифъ:

Сла́ва, и҆ ны́нѣ: Мѷроно́сицамъ жена́мъ:

І҆ере́й: Премꙋ́дрость.

Ли́къ: Бл҃гословѝ:

и҆ ѿпꙋ́стъ по ѻ҆бы́чаю.

[зрѝ] Повече́рїе пое́мъ ма́лое, на не́мже канѡ́нъ ѡ҆ распѧ́тїи гдⷭ҇ни, и҆ на пла́чь прест҃ы́ѧ бцⷣы. Творе́нїе сѷмеѡ́на логоѳе́та, гла́съ ѕ҃. і҆рмосы̀ по два́жды. Ꙗ҆́кѡ по сꙋ́хꙋ: тропарѝ на д҃. Послѣдѝ і҆рмо́съ ѻ҆́ба ли̑ка вкꙋ́пѣ. По ѳ҃-й пѣ́сни, і҆рмо́съ ѻ҆́ба ли̑ка вкꙋ́пѣ: Бг҃а человѣ́кѡмъ не возмо́жно ви́дѣти: По трист҃о́мъ конда́къ: На́съ ра́ди распѧ́таго:

[зрѝ] Полꙋ́нощницꙋ пое́мъ въ ке́ллїахъ, и҆ глаго́лемъ каѳі́смꙋ ѳ҃-ю. По а҃-мъ трист҃о́мъ тропа́рь: Бл҃гоѡбра́зный і҆ѡ́сифъ: По в҃-мъ конда́къ: Бе́зднꙋ заключи́вый: Гдⷭ҇и поми́лꙋй, в҃і. и҆ ѿпꙋ́стъ.

Въ з҃-й ча́съ но́щи ᲂу҆дарѧ́етъ параекклисїа́рхъ въ тѧ̑жкаѧ и҆ вели̑каѧ: и҆ собра́вшесѧ въ цр҃ковь пое́мъ ᲂу҆́треню по ѻ҆бы́чаю.

Глаго́лемъ: Цр҃ю̀ нбⷭ҇ный: Трист҃о́е. по Ѻ҆́ч҃е на́шъ:

І҆ере́й: возгла́съ. Гдⷭ҇и поми́лꙋй, в҃і.

Сла́ва, и҆ ны́нѣ: Прїиди́те, поклони́мсѧ: три́жды.

И҆ ѻ҆бы̑чныѧ два̀ ѱалма̀.

Та́же і҆ере́й возгла́съ: Сла́ва ст҃ѣ́й:

и҆ а҆́бїе шестоѱа́лмїе, и҆ по си́хъ є҆ктенїа̀ вели́каѧ. На Бг҃ъ гдⷭ҇ь, глаго́лемъ: Тропа́рь, гла́съ в҃: Бл҃гоѡбра́зный і҆ѡ́сифъ, съ дре́ва сне́мъ пречⷭ҇тое тѣ́ло твоѐ, плащани́цею чи́стою ѡ҆бви́въ, и҆ вонѧ́ми во гро́бѣ но́вѣ покры́въ положѝ.

Сла́ва: Є҆гда̀ снизше́лъ є҆сѝ къ сме́рти животѐ безсме́ртный, тогда̀ а҆́дъ ᲂу҆мертви́лъ є҆сѝ блиста́нїемъ бж҃ества̀. є҆гда́ же и҆ ᲂу҆ме́ршыѧ ѿ преиспо́днихъ воскр҃си́лъ є҆сѝ, всѧ̑ си̑лы нбⷭ҇ныѧ взыва́хꙋ: жизнода́вче хрⷭ҇тѐ бж҃е на́шъ, сла́ва тебѣ̀.

И҆ ны́нѣ: Мѷроно́сицамъ жена́мъ, при гро́бѣ предста́въ а҆́гг҃лъ вопїѧ́ше: мѵ́ра мє́ртвымъ сꙋ́ть прили̑чна, хрⷭ҇то́съ же и҆стлѣ́нїѧ ꙗ҆ви́сѧ чꙋ́ждь.

Посе́мъ настоѧ́тель свѣщы̀ раздае́тъ бра́тїи: и҆ начина́емъ пѣ́ти непоро́чны со сладкопѣ́нїемъ. Та́кожде по стїхꙋ̀. И҆ похвалы̑ возглаша́етъ пѣве́цъ, во гла́съ є҃. Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. Бл҃же́ни непоро́чнїи въ пꙋ́ть, ходѧ́щїи въ зако́нѣ гдⷭ҇ни. И҆ похвалы̑, во гла́съ є҃: Жи́знь во гро́бѣ положи́лсѧ є҆сѝ хрⷭ҇тѐ, и҆ а҆́гг҃льскаѧ вѡ́инства ᲂу҆жаса́хꙋсѧ, снизхожде́нїе сла́вѧще твоѐ. И҆ прѡ́чаѧ съ припѣ́вы.

Тогда̀ настоѧ́тель кади́тъ цр҃ковь всю̀, и҆ бра́тїю по чи́нꙋ. По концѣ́ же пое́мъ:

Сла́ва, припѣ́въ. И҆ ны́нѣ, припѣ́въ.

Та́же ѻ҆́ба ли̑ка вкꙋ́пѣ, а҃-й припѣ́въ.

є҆ктенїа̀ ма́лаѧ: И҆ покади́въ начина́етъ ь статїю̀.

Дрꙋгі́й ли́къ пое́тъ припѣ́въ: Досто́йно є҆́сть велича́ти тѧ̀ жизнода́вца, на крⷭ҇тѣ̀ рꙋ́цѣ просте́ршаго, и҆ сокрꙋ́шшаго держа́вꙋ вра́жїю.

Та́же і҆ере́й кади́тъ то́кмѡ і҆кѡ́ны пє́рвыѧ, и҆ ли́ки.

По концѣ́ же пое́мъ: Сла́ва, припѣ́въ. И҆ ны́нѣ, припѣ́въ.

и҆ па́ки а҃-й припѣ́въ, ѻ҆́ба ли̑ка.

и҆ є҆ктенїа̀.

И҆ начина́емъ г҃ статїю̀, кадѧ́щꙋ настоѧ́телю. Ли́къ пое́тъ припѣ́въ во гла́съ г҃: Ро́ди всѝ пѣ́снь погребе́нїю твоемꙋ̀ прино́сѧтъ хрⷭ҇тѐ мо́й.

Сла́ва, и҆ ны́нѣ: ꙗ҆́кѡ предписа́сѧ.

и҆ а҆́бїе пое́мъ тропарѝ воскрⷭ҇ны, гла́съ є҃, Бл҃гослове́нъ є҆сѝ гдⷭ҇и:

Та́же тропарѝ, А҆́гг҃льскїй собо́ръ ᲂу҆диви́сѧ: и҆ про́чее по чи́нꙋ и҆́хъ.

Посе́мъ є҆ктенїа̀ ма́лаѧ.

Та́же, сѣда́ленъ днѐ, гла́съ а҃.

Подо́бенъ: Гро́бъ тво́й сп҃се: Плащани́цею чⷭ҇тою:

Сла́ва, то́йже. И҆ ны́нѣ, дрꙋгі́й, Оу҆жасо́шасѧ ли́цы а҆́гг҃льстїи:

И҆ чте́нїе въ толкова́нїи златоꙋ́стагѡ на є҆ѵⷢ҇лїе матѳе́а, зача́ло рд҃і: Во ᲂу҆́трїй же де́нь, и҆́же є҆́сть по пѧтцѣ̀. Воскрⷭ҇нїе хрⷭ҇то́во, не глаго́лемъ: но а҆́бїе ѱало́мъ н҃.

Та́же канѡ́нъ, гла́съ ѕ҃. Пѣ́снь а҃. і҆рмо́съ: Волно́ю морско́ю, по два́жды: Тропарѝ на в҃і. И҆ па́ки послѣдѝ і҆рмо́съ ѻ҆́ба ли̑ка вкꙋ́пѣ.

Є҆́сть же канѡ́нъ ѿ пе́рвыѧ пѣ́сни до шесты́ѧ, творе́нїе ма́рка мона́ха, є҆пⷭ҇кпа і҆дрꙋ́нтскагѡ: [І]҆рмосы́ же творе́нїе жены̀ нѣ́кїѧ кассі́и и҆менꙋ́емыѧ ѿ ѕ҃-ѧ же пѣ́сни до конца̀, творе́нїе господи́на космы̀. По г҃-й пѣ́сни, сѣда́ленъ, гла́съ а҃, самоподо́бенъ: Гро́бъ то́й сп҃се:

Сла́ва, и҆ ны́нѣ: то́йже.

По ѕ҃-й пѣ́сни,

Конда́къ, гла́съ ѕ҃: Бе́зднꙋ заключи́вый ме́ртвъ зри́тсѧ, и҆ смѵ́рною и҆ плащани́цею ѡ҆бви́всѧ, во гро́бѣ полага́етсѧ, ꙗ҆́кѡ сме́ртный безсме́ртный. жєны́ же прїидо́ша пома́зати є҆го̀ мѵ́ромъ, пла́чꙋщыѧ го́рькѡ и҆ вопїю́щыѧ: сїѧ̀ сꙋббѡ́та є҆́сть пребл҃гослове́ннаѧ, въ не́йже хрⷭ҇то́съ ᲂу҆снꙋ́въ воскрⷭ҇нетъ тридне́венъ.

И҆ і҆́косъ, и҆ чте́мъ сѷнаѯа́рїй. Па́ки свѣщы̀ вжига́ютъ бра́тїѧ. Вмѣ́стѡ свѣти́льна, Ст҃ъ гдⷭ҇ь бг҃ъ на́шъ, пое́мъ три́жды, во гла́съ в҃. На хвали́техъ, ста́вимъ стїхѝ д҃, и҆ пое́мъ стїхи̑ры самогла́сны, гла́съ в҃: Дне́сь соде́ржитъ гро́бъ:

Сла́ва, гла́съ ѕ҃: Дне́шнїй де́нь та́йнѡ. И҆ ны́нѣ, Пребл҃гослове́нна є҆сѝ:

Славосло́вїе вели́кое.

Та́же вхо́дитъ настоѧ́тель во ст҃ы́й ѻ҆лта́рь со і҆ере́и и҆ дїа́коны. и҆ ѡ҆блачи́тсѧ во всѧ̑ сщ҃є́нныѧ ѻ҆дє́жды, і҆ере́и же то́кмѡ въ ри̑зы: и҆схо́дитъ со є҆ѵⷢ҇лїемъ под̾ плащани́цею, наддержа́щымъ сщ҃е́нникѡмъ, дїа́конѡмъ же кадѧ́щымъ. Въ то̀ вре́мѧ зво́нъ во всѧ̑, предходѧ́щымъ є҆мꙋ̀ со свѣща́ми, и҆ со двѣма̀ лампа́дома: и҆ ѻ҆́ба ли̑ка пою́ще трист҃о́е надгро́бное. Прихо́дитъ же и҆гꙋ́менъ пред̾ ст҃ы̑ѧ ца̑рскїѧ двє́ри, и҆ тꙋ̀ стои́тъ ѡ҆жида́ѧ конца̀ трист҃а́гѡ послѣ́днѧгѡ. Семꙋ́ же конча́нꙋ бы́вшꙋ, вхо́дитъ настоѧ́тель со є҆ѵⷢ҇лїемъ въ ца̑рскїѧ двє́ри, и҆ полага́етъ є҆ѵⷢ҇лїе на прⷭ҇то́лѣ. плащани́цꙋ же на ᲂу҆гото́ванѣ столѣ̀, во ѡ҆́бразъ гро́ба.

И҆ глаго́летъ настоѧ́тель: Премꙋ́дрость, про́сти.

и҆ чте́цъ а҆́бїе тропа́рь: Бл҃гоѡбра́зный і҆ѡ́сифъ: є҆ди́ножды.

Та́же тропа́рь паремїѝ, гла́съ в҃, Содержа́й концы̀:

Сла́ва, и҆ ны́нѣ, то́йже.

И҆ а҆́бїе прокі́менъ, гла́съ д҃: Воскрⷭ҇нѝ гдⷭ҇и, помозѝ на́мъ, и҆ и҆зба́ви на́съ и҆́мене твоегѡ̀ ра́ди.

Сті́хъ: Бж҃е ᲂу҆ши́ма на́шима ᲂу҆слы́шахомъ:

Та́же паремїа̀, Пррⷪ҇о́чества і҆езекі́илева, Бы́сть на мнѣ̀ рꙋка̀ гдⷭ҇нѧ:

Посе́мъ прокі́менъ а҆пⷭ҇ла, гла́съ з҃: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀: Сті́хъ: И҆сповѣ́мсѧ тебѣ̀ гдⷭ҇и всѣ́мъ се́рдцемъ мои́мъ:

А҆по́столъ къ корі́нѳѧнѡмъ, зача́ло рл҃г, Ма́лъ ква́съ всѐ смѣше́нїе ква́ситъ: А҆ллилꙋ́їа, гла́съ є҃, Да воскрⷭ҇нетъ бг҃ъ, и҆ расточа́тсѧ вразѝ є҆гѡ̀:

Сті́хъ: Ꙗ҆́кѡ и҆счеза́етъ ды́мъ, да и҆сче́знꙋтъ:

Сті́хъ: Та́кѡ да поги́бнꙋтъ грѣ̑шницы ѿ лица̀ бж҃їѧ:

Є҆ѵⷢ҇лїе матѳе́а, зача́ло рд҃і, Во ᲂу҆́трїй де́нь, и҆́же є҆́сть по пѧтцѣ̀: Коне́цъ, Съ кꙋстѡді́ею.

Та́же є҆ктенїа̀, Рце́мъ всѝ:

И҆ посе́мъ, И҆спо́лнимъ ᲂу҆́треннюю мл҃твꙋ: и҆ ѿпꙋ́стъ.

И҆ быва́етъ цѣлова́нїе во ѻ҆би́телехъ на плащани́цѣ положе́нїѧ во гро́бѣ. А҆ и҆дѣ́же нѣ́сть плащани́цы. цѣлꙋ́ютъ ѡ҆́бразъ. пѣвцы́ же пою́тъ стїхи́рꙋ, гла́съ є҃: Прїиди́те ᲂу҆бл҃жи́мъ: и҆ ча́съ а҃-й. На а҃-мъ часѣ̀, тропа́рь днѐ трїѡ́ди. По трист҃о́мъ конда́къ трїѡ́ди. и҆ соверше́нный ѿпꙋ́стъ.

При часѣ́ же д҃-мъ днѐ, Оу҆дарѧ́етъ параекклисїа́рхъ въ ма́лое би́ло. и҆ собра́вшесѧ пое́мъ ча́съ г҃, ѕ҃, и҆ ѳ҃, вкꙋ́пѣ, про́стѡ, въ притво́рѣ: На ни́хже глаго́лемъ тропа́рь и҆ конда́къ днѐ трїѡ́ди. И҆ бл҃жє́нна, Во црⷭ҇твїи твое́мъ: ско́рѡ без̾ пѣ́нїѧ. и҆ Помѧнѝ на́съ гдⷭ҇и: Ли́къ нбⷭ҇ный: и҆ про́чее.

Сла́ва: Ли́къ ст҃ы́хъ а҆́гг҃лъ: И҆ ны́нѣ: во є҆ди́наго бг҃а: Ѡ҆сла́би, ѡ҆ста́ви:

Ѻ҆́ч҃е на́шъ: Та́же конда́къ днѐ трїѡ́ди, Бе́зднꙋ заключи́вый: Гдⷭ҇и поми́лꙋй, в҃і: и҆ мл҃тва, Всест҃а́ѧ трⷪ҇це: Досто́йно є҆́сть, и҆ ѿпꙋ́стъ.

Во ст҃ꙋ́ю и҆ вели́кꙋю сꙋббѡ́тꙋ ве́чера:

Ѡ҆ часѣ̀ і҃-мъ днѐ кле́плетъ въ вели́кое: И҆ собра́вшесѧ въ цр҃ковь, Ѡ҆блачи́тсѧ і҆ере́й и҆ дїа́конъ. И҆ бл҃гослови́вшꙋ і҆ере́ю, начина́емъ вече́рню, глаго́лемъ: Цр҃ю̀ нбⷭ҇ный: Трист҃о́е, по Ѻ҆́ч҃е на́шъ: Гдⷭ҇и поми́лꙋй в҃і.

Сла́ва, и҆ ны́нѣ: Прїиди́те поклони́мсѧ: три́жды.

ѱало́мъ, Бл҃гословѝ дꙋшѐ моѧ̀ гдⷭ҇а: Посе́мъ є҆ктенїа̀ вели́каѧ. И҆ возгла́съ. Гдⷭ҇и воззва́хъ, пое́мъ во гла́съ а҃.

І҆ере́й же и҆ дїа́конъ ѿше́дше творѧ́тъ проскомі́дїю.

И҆ ста́вимъ стїхѡ́въ и҃, и҆ пое́мъ стїхи̑ры воскрⷭ҇ны д҃, гла́съ а҃: Вечє́рнїѧ на́шѧ мл҃твы:

Въ то́же вре́мѧ кади́тъ дїа́конъ.

И҆ трїѡ́ди самогла́сны і҃, гла́съ и҃, на д҃: Дне́сь а҆́дъ стенѧ̀ вопїе́тъ: два́жды.

Сла́ва, гла́съ ѕ҃: Дне́шнїй де́нь та́йнѡ: И҆ ны́нѣ: бг҃оро́диченъ а҃: Всемі́рнꙋю сла́вꙋ:

Вхо́дъ со є҆ѵⷢ҇лїемъ. Свѣ́те ти́хїй: Прокі́менъ не глаго́летсѧ:

По а҆́бїе і҆ере́й, и҆лѝ дїа́конъ, Премꙋ́дрость.

И҆ начина́етъ чте́цъ чтє́нїѧ днѐ трїѡ́ди по чи́нꙋ и҆́хъ. Всѣ́хъ же чте́нїй, є҃і. По сконча́нїи же чте́нїй, є҆ктенїа̀ ма́лаѧ.

І҆ере́й возгла́съ, Ꙗ҆́кѡ ст҃ъ є҆сѝ бж҃е на́шъ:

Вмѣ́стѡ же трист҃а́гѡ, пое́мъ: Є҆ли́цы во хрⷭ҇та̀ крⷭ҇ти́стесѧ:

Прокі́менъ, гла́съ є҃, Всѧ̀ землѧ̀ да покло́нитсѧ тебѣ̀, и҆ пое́тъ тебѣ̀:

Сті́хъ: Воскли́кните гдⷭ҇еви всѧ̀ землѧ̀, по́йте же и҆́мени є҆гѡ̀:

А҆по́столъ къ ри́млѧнѡмъ, зача́ло ч҃а: Є҆ли́цы во хрⷭ҇та̀ і҆и҃са крⷭ҇ти́хомсѧ: А҆ллилꙋ́їа.

и҆ ѱало́мъ дв҃довъ не глаго́летсѧ, но по є҆́же рещѝ і҆ере́ю, Ми́ръ тѝ: И҆ а҆́бїе чте́цъ глаго́летъ вмѣ́стѡ а҆ллилꙋ́їа, Воскрⷭ҇нѝ бж҃е, сꙋдѝ землѝ, ꙗ҆́кѡ ты̀ наслѣ́диши во всѣ́хъ ꙗ҆зы́цѣхъ. гла́съ з҃: И҆ лю́дїе то́йже. И҆ про́чее со стїхѝ. И҆ па́ки послѣдѝ, Воскрⷭ҇нѝ бж҃е, сꙋдѝ землѝ: Пое́мꙋ же семꙋ̀, и҆звлача́ютсѧ і҆ере́є и҆ дїа́кони ѿ ѻ҆де́ждъ, и҆ ѡ҆блача́ютсѧ въ бѣ̑лыѧ.

Є҆ѵⷢ҇лїе матѳе́а, зача́ло рє҃і, Въ ве́черъ сꙋббѡ́тный: Коне́цъ, до сконча́нїѧ вѣ́ка, а҆ми́нь. И҆ по чи́нꙋ бж҃е́ственнаѧ лїтꙋргі́а вели́кагѡ васі́лїа.

Вмѣ́стѡ же херꙋві́мскїѧ пѣ́сни пое́тсѧ настоѧ́щїй тропа́рь, на гла́съ и҃: Да молчи́тъ всѧ́каѧ пло́ть человѣ́ча, и҆ да стои́тъ со стра́хомъ и҆ тре́петомъ, и҆ ничто́же земно́е въ себѣ̀ да помышлѧ́етъ: цр҃ь бо ца́рствꙋющихъ, и҆ гдⷭ҇ь гдⷭ҇ьствꙋющихъ, прихо́дитъ закла́тисѧ, и҆ да́тисѧ въ снѣ́дь вѣ̑рнымъ. предхо́дѧтъ же семꙋ̀ ли́цы а҆́гг҃льстїи со всѧ́кимъ нача́ломъ и҆ вла́стїю, многоѻчи́тїи херꙋві́ми, и҆ шестокрила́тїи серафі́ми, ли́ца закрыва́юще, и҆ вопїю́ще пѣ́снь: а҆ллилꙋ́їа, Три́жды.

За Досто́йно, Не рыда́й менѐ мт҃и:

Прича́стенъ: Воста̀ ꙗ҆́кѡ спѧ̀ гдⷭ҇ь, и҆ воскр҃се сп҃са́ѧй на́съ. а҆ллилꙋ́їа, три́жды.

И҆ дае́тсѧ а҆нті́дѡръ ѿ і҆ере́а: И҆ ѿпꙋ́стъ.

Пото́мъ быва́етъ ѻ҆бы́чное бл҃гослове́нїе хлѣ́бѡвъ, и҆ вїна̀. Прихо́дитъ і҆ере́й, покади́въ и҆̀хъ, глаго́летъ ѻ҆бы́чнꙋю мл҃твꙋ бл҃гослове́нїѧ: Гдⷭ҇и і҆и҃се хрⷭ҇тѐ бж҃е на́шъ, бл҃гослови́вый пѧ́ть хлѣ́бѡвъ: И҆ ре́кше: А҆ми́нь.

[зрѝ] Подоба́етъ вѣ́дати, А҆́ще ли нѣ́кїѧ нꙋ́жды ра́ди вели́кїѧ нѣ́сть лїтꙋргі́и, Пое́мъ на Гдⷭ҇и воззва́хъ, стїхи̑ры на и҃: Воскрⷭ҇ны г҃, и҆ а҆нато́лїевъ є҆ди́нъ, и҆ трїѡ́ди г҃, на д҃.

Сла́ва, гла́съ ѕ҃, Дне́шнїй де́нь та́йнѡ: И҆ ны́нѣ, бг҃оро́диченъ а҃. Всемі́рнꙋю сла́вꙋ:

Вхо́дъ съ кади́ломъ. Свѣ́те ти́хїй:

Прокі́менъ, Гдⷭ҇ь воцр҃и́сѧ:

И҆ чтє́нїѧ днѐ трїѡ́ди по чи́нꙋ своемꙋ̀. По сконча́нїи же чте́нїй, є҆ктенїа̀, Рце́мъ всѝ:

Та́же, Сподо́би гдⷭ҇и въ ве́черъ се́й: Посе́мъ, И҆спо́лнимъ вече́рнюю мл҃твꙋ: На стїхо́внѣ стїхи̑ры воскрⷭ҇ны, гла́съ а҃: Стрⷭ҇тїю твое́ю хрⷭ҇тѐ: И҆ по а҆лфави́тꙋ г҃, съ припѣ́вы и҆́хъ, Гдⷭ҇ь воцр҃и́сѧ:

Сла́ва, и҆ ны́нѣ, бг҃оро́диченъ: Сѐ и҆спо́лнисѧ и҆са́їино прⷪ҇рече́нїе:

Та́же, Ны́нѣ ѿпꙋща́еши:

По трист҃о́мъ тропа́рь, Бл҃гоѡбра́зный і҆ѡ́сифъ:

Сла́ва, Є҆гда̀ снизше́лъ є҆сѝ къ сме́рти: И҆ ны́нѣ, Мѷроно́сицамъ жена́мъ: и҆ ѿпꙋ́стъ.

[зрѝ] До́лженствꙋетъ же є҆кклисїа́рхъ и҆мѣ́ти ѻ҆па́сство, да є҆гда̀ скончава́етсѧ лїтꙋргі́а, бꙋ́детъ ча́съ в҃-й но́щи.

По ѿпꙋ́стѣ же и҆схо́димъ и҆з̾ цр҃кве въ трапе́зꙋ, и҆ сѧ́демъ кі́йждо на мѣ́стѣ свое́мъ, съ безмо́лвїемъ и҆ со бл҃гоговѣ́инствомъ. И҆ а҆́бїе вхо́дитъ кела́рь, и҆ дае́тъ бра́тїи по є҆ди́номꙋ ᲂу҆крꙋ́хꙋ хлѣ́ба: ꙗ҆́коже бы просфѡры̀ на то̀ ᲂу҆гото́влены, въ по́лъ лі́тры хлѣ́бы, ᲂу҆мѣ́рены равны̀, и҆ по ѕ҃ смо́квей, и҆лѝ фі́нїкѡвъ, и҆ по є҆ди́ной мѣ́рнѣй ча́ши вїна̀. А҆ и҆дѣ́же вїна̀ нѣ́сть, и҆спива́ютъ бра́тїѧ ква́съ ѿ ме́да, и҆лѝ ѿ жи́та. Смѡ́кви же ѡ҆брѣта́ютсѧ на мно́жайшихъ страна́хъ. На́мъ же вкꙋша́ющымъ, предложи́тсѧ чте́нїе вели́кое, въ дѣѧ́нїихъ ст҃ы́хъ а҆пⷭ҇лъ ѿ нача́ла: Глаго́летъ же чте́цъ нача́ло, І҆ере́й же сті́хъ: Мл҃твами ст҃ы́хъ а҆пⷭ҇лъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ. и҆ по а҆ми́нѣ начина́етъ чте́цъ честѝ.

[зрѝ] Вѣ́домо же да є҆́сть, Ꙗ҆́кѡ въ завѣща́нїихъ ст҃ы́хъ а҆пⷭ҇лъ, и҆ и҆́ндѣ па́ки ѻ҆тцы̀, да́же до кꙋроглаше́нїѧ, повелѣва́ютъ ѡ҆говѣва́ти вѣ̑рнымъ. Ст҃ы́й же ѕ҃-й собо́ръ до полꙋ́нощи повелѣва́етъ: Тѵ́пїцы же, стꙋді́йскїй, і҆ерꙋсали́мскїй, и҆ ст҃ы́ѧ горы̀, до конца̀ г҃-гѡ часа̀ но́щи глаго́лютъ соверша́ти слꙋ́жбꙋ, и҆ та́кѡ ꙗ҆́сти, ничто́же и҆́но, но хлѣ́бъ, и҆ ѻ҆во́щїе, и҆ ма́лѡ ві́нъ, ꙗ҆́коже мню̀. Сїѧ̑ ᲂу҆́бѡ всѧ̑ мы̀ сочета́вше, сꙋ́щымъ ᲂу҆ на́съ ѡ҆ хрⷭ҇тѣ̀ бра́тїѧмъ предложи́хомъ, ꙗ҆́коже и҆ предрече́сѧ по ѻ҆те́ческомꙋ ᲂу҆ста́вꙋ, ꙗ҆́кѡ да кꙋ́пнѡ, внегда̀ за́йдетъ со́лнце, клепа́ти, и҆дѣ́же доспѣ́етъ ѿпꙋ́стъ.

[зрѝ] По вкꙋше́нїи же всеѧ̀ бра́тїи, быва́етъ чте́нїе въ тѣ́хже дѣѧ́нїихъ ст҃ы́хъ а҆пⷭ҇лъ, ꙗ҆́коже предрече́сѧ. Сїѐ ѻ҆па́сство да внима́етъ цр҃квонача́льникъ, Да всѧ̑ дѣѧ̑нїѧ прочтꙋ́тсѧ до конца̀. Бра́тїѧмъ же всѣ̑мъ съ прилѣжа́нїемъ послꙋ́шающымъ, и҆ да не бꙋ́детъ лѣ́ть ни є҆ди́номꙋ же на со́нъ преда́ти себѐ, боѧ́щесѧ скве́рны и҆скꙋси́телѧ врага̀: въ таковы́хъ бо временѣ́хъ и҆ мѣ́стѣхъ тщи́тсѧ вра́гъ ѡ҆скверни́ти неради̑выѧ, и҆ многосонли̑выѧ мона́хи. И҆змѣнѧ́ютсѧ же чтецы̀, и҆ чтꙋ́тъ да́же до часа̀ д҃-гѡ но́щи: Посе́мъ же вжига́етъ параекклисїа́рхъ всѧ̑ канди̑ла по мѣ́стѡмъ: И҆ взе́мъ ѿ настоѧ́телѧ бл҃гослове́нїе, и҆ та́кѡ и҆зше́дъ ᲂу҆дарѧ́етъ въ би́ло. И҆ чте́цъ соверша́етъ чте́нїе. И҆ а҆́бїе бл҃гослови́вшꙋ і҆ере́ю, глаго́лемъ трист҃о́е, и҆ по Ѻ҆́ч҃е на́шъ: Гдⷭ҇и поми́лꙋй, в҃і.

Сла́ва, и҆ ны́нѣ: Прїиди́те поклони́мсѧ, три́жды: ѱало́мъ н҃.

Та́же пое́мъ канѡ́нъ вели́кїѧ сꙋббѡ́ты, гла́съ ѕ҃: Волно́ю морско́ю: І҆рмосы̀ по два́жды: тропарѝ на в҃і, со стїха́ми пѣ́сней. Послѣдѝ і҆рмо́съ ѻ҆́ба ли̑ка вкꙋ́пѣ. По г҃-й пѣ́сни, сѣда́ленъ: Гро́бъ тво́й сп҃се:

Сла́ва, и҆ ны́нѣ, то́йже.

И҆ чте́тсѧ сло́во ст҃а́гѡ є҆пїфа́нїа кѵ́прскагѡ, є҆гѡ́же нача́ло: Что̀ сїѐ дне́сь безмо́лвїе мно́го, ꙗ҆́кѡ цр҃ь спи́тъ; По ѕ҃-й пѣ́сни, конда́къ, и҆ і҆́косъ вели́кїѧ сꙋббѡ́ты: Бе́зднꙋ заключи́вый:

И҆ чте́нїе ѿ слове́съ златоꙋ́стагѡ, въ коне́цъ толкова́нїѧ є҆ѵⷢ҇лїа є҆́же ѿ матѳе́а: и҆лѝ ѿ і҆ѡа́нна, сло́во воскрⷭ҇но.

Посе́мъ пѣ́снь з҃, и҆ про́чее. По ѳ҃-й пѣ́сни, послѣдѝ і҆рмо́съ ѻ҆́ба ли̑ка вкꙋ́пѣ.

Та́же трист҃о́е. и҆ по Ѻ҆́ч҃е на́шъ: Тропа́рь, гла́съ в҃: Є҆гда̀ снизше́лъ є҆сѝ къ сме́рти:

Та́же є҆ктенїа̀, Поми́лꙋй на́съ бж҃е: И҆ ѿпꙋ́стъ преждепи́санный.