[глⷡ҇а м҃и] НАЧА́ЛО СЪ БГ҃ОМЪ СТ҃Ы́МЪ мѣсѧцесло́ва, в҃і мѣ́сѧцєвъ

Послѣ́дованїе цр҃ко́внагѡ ѱалмопѣ́нїѧ же и҆ сочине́нїѧ всегѡ̀ лѣ́та, начина́ющеесѧ ѿ мѣ́сѧца септе́мврїа, до мѣ́сѧца а҆́ѵгꙋста.

а҃. 🕂 +Нача́ло і҆нді́кта, си́рѣчь но́вагѡ лѣ́та.+ И҆ па́мѧть прпⷣбнагѡ ѻ҆тца̀ на́шегѡ +сѷмеѡ́на+ сто́лпника, и҆ а҆рхїмандрі́та: И҆ ма́тере є҆гѡ̀ +ма́рѳы+: И҆ собо́ръ прест҃ы́ѧ бцⷣы, и҆́же въ мїасі́нѣхъ: И҆ ст҃а́гѡ мч҃нка +а҆їѳала̀+: И҆ ст҃ы́хъ мч҃нцъ четы́редесѧти же́нъ: И҆ ст҃а́гѡ +а҆ммꙋ́на+ дїа́кона, и҆ ᲂу҆чи́телѧ и҆́хъ: И҆ ст҃ы́хъ мч҃нкъ, +каллі́сты, є҆ѵо́да и҆ є҆рмоге́на+, самобра́тныхъ: И҆ па́мѧть првⷣнагѡ +і҆и҃сꙋ́са+ сы́на наѵи́на.

Ве́черъ, во свѣти́льничное, стїхологисꙋ́емъ: Бл҃же́нъ мꙋ́жъ, а҃ а҆нтїфѡ́нъ. А҆́ще же въ сꙋббѡ́тꙋ ве́чера, стїхологисꙋ́емъ всю̀ каѳі́смꙋ. На Гдⷭ҇и воззва́хъ, поста́вимъ стїхѡ́въ і҃: И҆ пое́мъ стїхи̑ры і҆нді́кта, г҃: Гла́съ а҃. Подо́бенъ: Нбⷭ҇ныхъ чинѡ́въ: Самосло́внагѡ и҆ бж҃е́ственнагѡ: И҆ прпⷣбнагѡ г҃: Гла́съ є҃. Подо́бенъ: Прпⷣбне ѻ҆́тче: И҆́ны стїхи̑ры самогла̑сны д҃, гла́съ в҃: Ѿ ко́рене бл҃га́гѡ: Сла́ва, гла́съ ѕ҃: Бж҃е́ственнаѧ бл҃года́ть: И҆ ны́нѣ, і҆нді́кта, гла́съ то́йже: И҆́же со дх҃омъ ст҃ы́мъ: И҆ быва́етъ вхо́дъ. Прокі́менъ днѐ. И҆ чтє́нїѧ г҃: а҃-е, Прⷪ҇ро́чества и҆са́їина: Дх҃ъ гдⷭ҇нь на мнѣ̀: в҃, Леѵі̑тъ: Глаго́ла гдⷭ҇ь сынѡ́мъ і҆и҃лєвымъ: г҃, ст҃а́гѡ, Премꙋ́дрости соломѡ́ни: Првⷣникъ а҆́ще пости́гнетъ: Посе́мъ є҆ктенїа̀. Та́же, Сподо́би гдⷭ҇и въ ве́черъ се́й: И҆ па́ки є҆ктенїа̀, И҆спо́лнимъ вече́рнюю мл҃твꙋ: И҆ возгла́съ. Та́же пое́мъ, На стїхо́внѣ, стїхи̑ры і҆нді́кта, гла́съ а҃, самогла́сны: Наста̀ вхо́дъ лѣ́та: съ припѣ́вы. Припѣ́въ а҃, Тебѣ̀ подоба́етъ пѣ́снь, бж҃е, въ сїѡ́нѣ: в҃, И҆спо́лнимсѧ во бл҃ги́хъ: г҃, Бл҃гослови́ши вѣне́цъ лѣ́та: Сла́ва, ст҃а́гѡ, гла́съ є҃: Прпⷣбне ѻ҆́тче: И҆ ны́нѣ, і҆нді́кта, гла́съ то́йже: Ты̀ цр҃ю̀ сы́й: Та́же, Ны́нѣ ѿпꙋща́еши: Трист҃о́е, и҆ Ѻ҆́ч҃е на́шъ.

Тропа́рь і҆нді́кта, гла́съ в҃: Всеѧ̀ тва́ри содѣ́телю, времена̀ и҆ лѣ̑та во свое́й вла́сти положи́вый, бл҃гословѝ вѣне́цъ лѣ́та бл҃гости твоеѧ̀ гдⷭ҇и, сохранѧ́ѧ въ ми́рѣ +і҆мпера́тора+ и҆ гра́дъ тво́й, мл҃твами бцⷣы, и҆ сп҃си́ ны.

Сла́ва, прпⷣбнагѡ, гла́съ а҃: Терпѣ́нїѧ сто́лпъ бы́лъ є҆сѝ, ревнова́вый пра́ѻтцємъ прпⷣбне: і҆́ѡвꙋ во страсте́хъ, і҆ѡ́сифꙋ во и҆скꙋше́нїихъ, и҆ безпло́тныхъ жи́тельствꙋ, сы́й въ тѣлесѝ, сѷмеѡ́не ѻ҆́тче на́шъ, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

И҆ ны́нѣ, бцⷣы, гла́съ то́йже: Ра́дꙋйсѧ ѡ҆бра́дованнаѧ бцⷣе дв҃о, приста́нище и҆ предста́тельство ро́да человѣ́ческагѡ, и҆з̾ тебе́ бо воплоти́сѧ и҆зба́витель мі́ра: є҆ди́на бо є҆сѝ мт҃и и҆ дв҃а, приснобл҃гослове́ннаѧ и҆ препросла́вленнаѧ. молѝ хрⷭ҇та̀ бг҃а, ми́ръ дарова́ти все́й вселе́ннѣй.

Посе́мъ, І҆ере́й, Премꙋ́дрость. Ли́къ, Бл҃гословѝ. І҆ере́й, Сы́й бл҃гослове́нъ: И҆ ли́къ, Оу҆твердѝ бж҃е: И҆ прѡ́чаѧ и҆ ѿпꙋ́стъ. На ᲂу҆́трени, на Бг҃ъ гдⷭ҇ь, Тропа́рь і҆нді́кта, два́жды. Сла́ва, прпⷣбнагѡ: И҆ ны́нѣ, бцⷣы: Ра́дꙋйсѧ ѡ҆бра́дованнаѧ: И҆ ѻ҆бы̑чныѧ каѳі̑смы. По а҃-й каѳі́смѣ, Сѣда́ленъ і҆нді́кта, гла́съ д҃. Подо́бенъ: Оу҆диви́сѧ і҆ѡ́сифъ: Ꙗ҆́кѡ влⷣцѣ всѣ́хъ: Сла́ва, прпⷣбнагѡ, гла́съ и҃. Подо́бенъ: Премꙋ́дрости и҆ сло́ва: Крⷭ҇тъ гдⷭ҇нь взе́мъ мꙋ́дре: И҆ ны́нѣ, і҆нді́кта, Ꙗ҆́кѡ влⷣцѣ всѣ́хъ: И҆ чте́нїе.

[зрѝ] Ѿ дне́сь начина́етсѧ честѝ метафра́стъ логоѳе́та сѷмеѡ́на, и҆ маргарі́тъ златоꙋ́стовъ, и҆ толкова̑нїѧ посла́нїй ст҃а́гѡ а҆пⷭ҇ла па́ѵла.

По в҃-й каѳі́смѣ сѣда́ленъ прпⷣбнагѡ, гла́съ и҃. Подо́бенъ, Премꙋ́дрости: Воздержа́нїемъ и҆ трꙋды̀: Сла́ва, гла́съ д҃, подо́бенъ: Ско́рѡ предварѝ: Вошла̀ є҆сѝ въ по́двигъ мꙋче́нїѧ: И҆ ны́нѣ, бг҃оро́диченъ: Ско́рѡ прїимѝ, влⷣчце, мольбы̑ на́шѧ: И҆ чте́нїе. ѱало́мъ н҃. Та́же пое́мъ канѡ́ны, г҃: І҆нді́кта, гла́съ а҃, со і҆рмосо́мъ на ѕ҃. Кѵ́ръ і҆ѡа́нна, і҆рмо́съ по два́жды: Тропарѝ на д҃, и҆ ст҃ы́хъ же́нъ на д҃, гла́съ д҃: И҆ прпⷣбнагѡ сѷмеѡ́на на д҃, гла́съ и҃. Катава́сїа, Крⷭ҇тъ начерта́въ: [И]҆ до ѿда́нїѧ воздви́женїѧ чⷭ҇тна́гѡ крⷭ҇та̀. По г҃-й пѣ́сни,

Конда́къ і҆нді́кта, гла́съ в҃: Въ вы́шнихъ живы́й хрⷭ҇тѐ цр҃ю̀, всѣ́хъ ви́димыхъ и҆ неви́димыхъ тво́рче и҆ зижди́телю, и҆́же дни̑ и҆ нѡ́щи, времена̀ и҆ лѣ̑та сотвори́вый, бл҃гословѝ ны́нѣ вѣне́цъ лѣ́та, соблюдѝ и҆ сохранѝ въ ми́рѣ правосла́внаго +і҆мпера́тора+ и҆ гра́дъ, и҆ лю́ди твоѧ̑, многомлⷭ҇тиве. Та́же сѣда́ленъ і҆нді́кта, гла́съ и҃. Подо́бенъ, Премꙋ́дрости: И҆́же времена̀ плодонѡ́сна: Дрꙋгі́й сѣда́ленъ прпⷣбнагѡ, гла́съ и҃ подо́бенъ то́йже: Земна̑ѧ всѧ̑ ѡ҆ста́вивъ: Сла́ва, ст҃ы́хъ же́нъ, гла́съ а҃. Подо́бенъ: Гро́бъ тво́й: А҆́гницы словє́сныѧ: И҆ ны́нѣ, бг҃оро́диченъ, Наста́ви ны̀: По ѕ҃-й пѣ́сни,

Конда́къ прпⷣбнагѡ, гла́съ в҃: Вы́шнихъ и҆щѧ́й, вы̑шнимъ совокꙋплѧ́ѧйсѧ, и҆ колесни́цꙋ ѻ҆́гненнꙋю сто́лпъ содѣ́лавый: тѣ́мъ собесѣ́дникъ а҆́гг҃лѡмъ бы́лъ є҆сѝ прпⷣбне, съ ни́ми хрⷭ҇тꙋ̀ бг҃ꙋ молѧ́сѧ непреста́ннѡ ѡ҆ всѣ́хъ на́съ.

И҆ і҆́косъ. И҆ чте́мъ про́логъ. По ѳ҃-й пѣ́сни, Катава́сїа: Та́инъ є҆сѝ бцⷣе ра́й: И҆ дрꙋгі́й, Снѣ́дїю дре́ва: Свѣти́ленъ, і҆нді́кта: Подо́бенъ: Оу҆ч҃нкѡ́мъ: Бж҃е богѡ́въ и҆ гдⷭ҇и: Сла́ва, прпⷣбнагѡ. Подо́бенъ: то́йже: Ꙗ҆́коже свѣти́ло: И҆ ны́нѣ, і҆нді́кта. Подо́бенъ: то́йже, Содѣ́телю и҆ прави́телю: На хвали́техъ стїхи̑ры і҆нді́кта, на д҃, самогла́сны, гла́съ г҃: Превѣ́чное сло́во: Сла́ва, прпⷣбнагѡ, гла́съ в҃: Ѿ ко́рене бл҃га́гѡ: И҆ ны́нѣ, і҆нді́кта, гла́съ и҃: Неизрече́нною мꙋ́дростїю: Славосло́вїе вели́кое. По трист҃о́мъ тропа́рь і҆нді́кта: Сла́ва, ст҃а́гѡ: И҆ ны́нѣ, Ра́дꙋйсѧ ѡ҆бра́дованнаѧ: Є҆ктєнїѝ: И҆ ѿпꙋ́стъ. И҆ ча́съ а҃. На а҃-мъ часѣ̀ тропа́рь і҆нді́кта: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трист҃о́мъ конда́къ і҆нді́кта, и҆ ст҃а́гѡ, глаго́лемъ премѣнѧ́юще: и҆ прѡ́чаѧ, и҆ соверше́нный ѿпꙋ́стъ. На лїтꙋргі́и, бл҃жє́нна ѿ канѡ́на і҆нді́кта, пѣ́снь г҃-ѧ на д҃: И҆ прпⷣбнагѡ, пѣ́снь ѕ҃ на д҃. По вхо́дѣ тропа́рь пре́жде і҆нді́кта: И҆ бцⷣы: Ра́дꙋйсѧ ѡ҆бра́дованнаѧ: И҆ прпⷣбнагѡ: Сла́ва, конда́къ прпⷣбнагѡ: И҆ ны́нѣ, і҆нді́кта. А҆́ще же хра́мъ бцⷣы, И҆ ны́нѣ, хра́ма бцⷣы: і҆нді́кта же конда́къ глаго́ли въ нача́лѣ. Прокі́менъ і҆нді́кта, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. Сті́хъ: Хвали́те гдⷭ҇а, ꙗ҆́кѡ бл҃гъ ѱало́мъ. И҆ прпⷣбнагѡ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. А҆пⷭ҇лъ къ тїмоѳе́ю, зача́ло сп҃в: Ча́до тїмоѳе́е, молю̀ пре́жде: И҆ прпⷣбнагѡ къ колосса́ємъ, зача́ло сн҃и: Бра́тїе, ѡ҆блецы́тесѧ ᲂу҆̀бо: А҆ллилꙋ́їа, гла́съ д҃: Тебѣ̀ по доба́етъ пѣ́снь, бж҃е, въ сїѡ́нѣ. Сті́хъ: Бл҃гослови́ши вѣне́цъ лѣ́та бл҃гости твоеѧ̀ гдⷭ҇и. И҆ прпⷣбнагѡ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Є҆ѵⷢ҇лїе лꙋкѝ, зача́ло г҃і: Во вре́мѧ ѻ҆́но, вни́де і҆и҃съ въ назаре́тъ, и҆дѣ́же бѣ̀ воспита́нъ: И҆ прпⷣбнагѡ: матѳе́а, зача́ло м҃г: Всѧ̑ мнѣ̀ прєдана̀ сꙋ́ть: Прича́стенъ: Бл҃гослови́ши вѣне́цъ лѣ́та бл҃гости твоеѧ̀ гдⷭ҇и. Дрꙋгі́й: Въ па́мѧть вѣ́чнꙋю: [зрѝ] Дневны́й же а҆пⷭ҇лъ и҆ є҆ѵⷢ҇лїе вычита́емъ напредѝ.

🕅 Подоба́етъ вѣ́дати. А҆́ще слꙋчи́тсѧ пе́рвый де́нь мѣ́сѧца септе́мврїа въ недѣ́лю, ѡ҆ставлѧ́етсѧ слꙋ́жба ст҃ы́хъ же́нъ, и҆ пое́тсѧ є҆гда̀ є҆кклисїа́рхъ разсꙋ́дитъ. Пое́тсѧ же воскре́сна слꙋ́жба со возслѣ́дованїемъ і҆нді́кта, и҆ прпⷣбнагѡ сѷмеѡ́на, си́це: На ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю. Тропа́рь воскрⷭ҇нъ: Сла́ва, и҆ ны́нѣ, бг҃оро́диченъ. На вели́цѣй вече́рни пое́мъ, Бл҃же́нъ мꙋ́жъ: каѳі́смꙋ всю̀. На Гдⷭ҇и воззва́хъ, стїхи̑ры воскрⷭ҇ны г҃: и҆ а҆нато́лїевъ є҆ди́нъ, и҆ і҆нді́кта г҃, и҆ ст҃а́гѡ г҃. Сла́ва, і҆нді́кта: И҆ ны́нѣ, бг҃оро́диченъ гла́са. И҆ чтє́нїѧ і҆нді́кта два̀: И҆ ст҃а́гѡ є҆ди́но. На лїті́и стїхи́ра хра́ма, и҆ і҆нді́кта, стїхи̑ры стїхѡ́вныѧ. Сла́ва, ст҃а́гѡ: И҆ ны́нѣ, і҆нді́кта, пи́санъ на хвали́техъ. На стїхо́внѣ стїхи̑ры воскрⷭ҇ны но а҆лфави́тꙋ, съ припѣ́вы и҆́хъ. Сла́ва, ст҃а́гѡ: И҆ ны́нѣ, і҆нді́кта. На бл҃гослове́нїи хлѣ́бѡвъ, Бцⷣе дв҃о ра́дꙋйсѧ, два́жды: и҆ і҆нді́кта, є҆ди́ножды. И҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, ст҃а́гѡ: И҆ ны́нѣ, і҆нді́кта. По каѳі́смѣ сѣда́льны воскрⷭ҇ны съ бг҃оро́дичны и҆́хъ. И҆ чте́нїе въ толкова́нїихъ є҆ѵⷢ҇льскихъ, є҆́же на рѧдꙋ̀. По непоро́чнахъ тропарѝ и҆ ѵ҆пакоѝ: И҆ чте́нїе. Степе́нны. и҆ прокі́менъ гла́са, и҆ Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ, со і҆рмосо́мъ на д҃. Бцⷣы на два̀: і҆нді́кта на д҃, и҆ ст҃а́гѡ на д҃. Катава́сїа: Крⷭ҇тъ начерта́въ: По г҃-й пѣ́сни, конда́къ і҆нді́кта, и҆ ст҃а́гѡ, и҆ сѣда́ленъ ст҃а́гѡ, два́жды. Сла́ва, и҆ ны́нѣ, і҆нді́кта. И҆ чте́нїе житїѧ̀ ст҃а́гѡ сѷмеѡ́на: По ѕ҃-й пѣ́сни, конда́къ воскрⷭ҇нъ и҆ і҆́косъ. И҆ чте́мъ про́логъ. На ѳ҃-й пѣ́сни пое́мъ, Чⷭ҇тнѣ́йшꙋю: Свѣти́ленъ воскрⷭ҇ный. Сла́ва, ст҃а́гѡ: И҆ ны́нѣ, і҆нді́кта. На хвали́техъ стїхи̑ры воскрⷭ҇ны д҃: И҆ і҆нді́кта г҃, гла́съ г҃. Превѣ́чное сло́во: съ припѣ́вомъ і҆нді́кта. Та́же самогла́сенъ ст҃а́гѡ, гла́съ в҃-й, съ припѣ́вомъ: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Ѿ ко́рене бл҃га́гѡ: Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскрⷭ҇нъ то́чїю, є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ ѻ҆бы́чное и҆схожде́нїе: и҆ ча́съ а҃-й въ притво́рѣ: и҆ коне́чный ѿпꙋ́стъ. На часѣ́хъ глаго́лемъ тропа́рь воскрⷭ҇нъ: Сла́ва, і҆нді́кта: И҆ ны́нѣ, бг҃оро́диченъ, часѡ́въ. По Ѻ҆́ч҃е на́шъ, конда́къ і҆нді́кта. На г҃-мъ часѣ̀ тропа́рь воскрⷭ҇нъ: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ ст҃а́гѡ. Та́кожде и҆ на про́чихъ часѣ́хъ конда́къ воскрⷭ҇нъ, и҆ і҆нді́кта, и҆ ст҃а́гѡ, глаго́лемъ премѣнѧ́юще. На лїтꙋргі́и: Бл҃жє́нна воскрⷭ҇на гла́са, на д҃: И҆ ѿ канѡ́на і҆нді́кта пѣ́снь г҃-ѧ на д҃: И҆ ст҃а́гѡ пѣ́снь ѕ҃-ѧ на д҃. По вхо́дѣ тропа́рь воскрⷭ҇нъ, и҆ і҆нді́кта, и҆ ст҃а́гѡ. Конда́къ воскрⷭ҇нъ: Сла́ва, ст҃а́гѡ: И҆ ны́нѣ, і҆нді́кта. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе, пре́жде і҆нді́кта: Воскрⷭ҇но же под̾ зача́ло: Та́же ст҃а́гѡ. Прича́стенъ, і҆нді́кта, пото́мъ ст҃а́гѡ.

в҃. Ст҃а́гѡ мч҃нка +ма́манта+: И҆ прпⷣбнагѡ ѻ҆тца̀ на́шегѡ +і҆ѡа́нна+ по́стника, патрїа́рха царѧ̀ гра́да.

Ве́черъ ѻ҆бы́чнаѧ каѳі́сма: На Гдⷭ҇и воззва́хъ, стїхи̑ры мч҃нка г҃, гла́съ и҃. Подо́бенъ: ѽ пресла́внагѡ чꙋдесѐ! И҆ прпⷣбнагѡ г҃, гла́съ и҆ подо́бенъ то́йже: Сла́ва, мч҃нка, гла́съ в҃, самогла́сенъ: Но́въ са́дъ: И҆ ны́нѣ, бг҃оро́диченъ, въ то́йже гла́съ. А҆́ще среда̀, и҆лѝ пѧто́къ, И҆ ны́нѣ, крⷭ҇тобг҃оро́диченъ. На стїхо́внѣ ѻ҆ктѡ́иха: Сла́ва, мч҃нка: гла́съ д҃, самогла́сенъ: Прїиди́те согла́снѡ вѣ́рнїи: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Тропа́рь мч҃нка, гла́съ д҃: Мч҃нкъ тво́й гдⷭ҇и, ма́мантъ, во страда́нїи свое́мъ вѣне́цъ прїѧ́тъ нетлѣ́нный ѿ тебѐ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́монѡвъ немощны́ѧ де́рзѡсти: тогѡ̀ мл҃твами сп҃сѝ дꙋ́шы на́шѧ.

Сла́ва, тропа́рь прпⷣбнагѡ, гла́съ то́йже:

Пра́вило вѣ́ры и҆ ѡ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́тче і҆ѡа́нне, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, на Бг҃ъ гдⷭ҇ь, тропа́рь мч҃нка, два́жды: Сла́ва, прпⷣбнагѡ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: и҆ ѻ҆бы̑чныѧ каѳі̑смы: и҆ сѣда́льны ѻ҆ктѡ́иха: И҆ чтє́нїѧ. Канѡ́нъ ѻ҆ктѡ́иха є҆ди́нъ со і҆рмосо́мъ на ѕ҃: мч҃нка на д҃, гла́съ и҃, и҆ прпⷣбнагѡ на д҃, гла́съ то́йже. По г҃-й пѣ́сни, сѣда́ленъ мч҃нка: гла́съ и҃. Сла́ва, прпⷣбнагѡ, гла́съ г҃: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. По ѕ҃-й пѣ́сни,

Конда́къ мч҃нка, гла́съ г҃. Подо́бенъ: Дв҃а дне́сь: Жезло́мъ ст҃е ѿ бг҃а тебѣ̀ да́ннымъ лю́ди твоѧ̑ ᲂу҆пасѝ на па́житехъ живоно́сныхъ, ѕвѣ́ри же неви̑димыѧ и҆ неꙋкроти̑мыѧ сокрꙋшѝ под̾ но́ги тѧ̀ пою́щихъ, ꙗ҆́кѡ всѝ и҆̀же въ бѣда́хъ, предста́телѧ тѧ̀ те́пла, ма́манте, и҆́мꙋтъ. И҆ і҆́косъ. и҆ чте́мъ про́логъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, мч҃нка: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: На стїхо́внѣ ѻ҆ктѡ́иха. Припѣ́вы же пое́мъ во всѐ лѣ́то. Припѣ́въ а҃-й: И҆спо́лнихомсѧ заꙋ́тра: ве́сь до конца̀. в҃-й: И҆ бꙋ́ди свѣ́тлость: и҆ прѡ́чаѧ, и҆ ча́съ а҃: и҆ ѿпꙋ́стъ, и҆ ѻ҆бы́чное и҆схожде́нїе въ притво́ръ: И҆ быва́етъ лїті́а ѡ҆ ᲂу҆со́пшихъ. На часѣ́хъ, тропа́рь мч҃нка: Сла́ва, прпⷣбнагѡ: И҆ ны́нѣ, бг҃оро́диченъ часѡ́въ. По трист҃о́мъ, конда́къ ст҃ы́хъ. На лїтꙋргі́и, Бл҃жє́нна ѻ҆ктѡ́иха. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й: А҆пⷭ҇лъ къ ри́млѧнѡмъ, зача́ло ч҃ѳ: Вѣ́мы, ꙗ҆́кѡ лю́бѧщымъ бг҃а: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе і҆ѡа́нна, зача́ло н҃: А҆́зъ є҆́смь лоза̀ и҆́стиннаѧ: Прича́стенъ: Ра́дꙋйтесѧ:

г҃. Ст҃а́гѡ сщ҃енномч҃нка +а҆нѳі́ма+, є҆пⷭ҇кпа нїкомїді́йскагѡ: И҆ прпⷣбнагѡ ѻ҆тца̀ на́шегѡ +ѳеокті́ста+, спо́стника вели́кагѡ є҆ѵѳѵ́мїа.

Ве́черъ ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры ст҃ы́хъ, на ѕ҃: А҆нѳі́ма, г҃: гла́съ а҃. Подо́бенъ: Всехва́льнїи мч҃нцы: И҆ ѳеокті́ста, г҃: гла́съ и҆ подо́бенъ то́йже. Сла́ва, а҆нѳі́ма, гла́съ ѕ҃. Самогла́сенъ: Сщ҃е́нникъ зако́ненъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха: Сла́ва, прпⷣбнагѡ, гла́съ ѕ҃: Прпⷣбне ѻ҆́тче, во всю̀ зе́млю: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Тропа́рь, гла́съ д҃: И҆ нра́вѡмъ прича́стникъ, и҆ прⷭ҇то́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномч҃нче а҆нѳі́ме, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Сла́ва, тропа́рь прпⷣбнагѡ, гла́съ и҃: Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆з̾ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, ѳеокті́сте ѻ҆́тче на́шъ, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, на Бг҃ъ гдⷭ҇ь, тропа́рь а҆нѳі́ма, два́жды: Сла́ва, прпⷣбнагѡ: И҆ ны́нѣ, бг҃оро́диченъ. И҆ ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чтє́нїѧ. Канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: И҆ ст҃ы̑мъ два̀: а҆нѳі́ма, гла́съ и҃: и҆ прпⷣбнагѡ, гла́съ то́йже. По г҃-й пѣ́сни, сѣда́ленъ а҆нѳі́ма, гла́съ а҃: Сла́ва, прпⷣбнагѡ, гла́съ д҃: И҆ ны́нѣ, бг҃оро́диченъ. И҆ чте́нїе. По ѕ҃-й пѣ́сни,

Конда́къ а҆нѳі́мꙋ, гла́съ д҃. Подо́бенъ: Вознесы́йсѧ: Во сщ҃е́нницѣхъ бл҃гоче́стнѡ пожи́въ, и҆ мꙋче́нїѧ пꙋ́ть сконча́въ, і҆́дѡльскаѧ ᲂу҆гаси́лъ є҆сѝ слꙋжє́нїѧ, побо́рникъ бы́въ твоемꙋ̀ ста́дꙋ, бг҃омꙋ́дре. тѣ́мже тѧ̀ и҆ почита́емъ ны́нѣ та́йнѡ вопїю́ще: ѿ бѣ́дъ и҆зба́ви на́съ твои́ми мл҃твами, приснопа́мѧтне а҆нѳі́ме.

И҆ і҆́косъ: И҆ чте́мъ про́логъ. По ѳ҃-й пѣ́сни, Свѣти́ленъ ѻ҆ктѡ́иха. Сла́ва, ст҃а́гѡ. И҆ ны́нѣ, бг҃оро́диченъ. На стїхо́внѣ ѻ҆ктѡ́иха. Сла́ва, самогла́сенъ, гла́съ д҃: Нїкомиді́йскомꙋ великогра́дꙋ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На лїтꙋргі́и, бл҃жє́нна ѻ҆ктѡ́иха на д҃: И҆ а҆нѳі́ма пѣ́снь г҃, на д҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви: А҆пⷭ҇лъ ко є҆вре́ємъ, зача́ло тл҃д: Бра́тїе, помина́йте наста́вники ва́шѧ: А҆ллилꙋ́їа, гла́съ в҃: Сщ҃е́нницы твоѝ: Сті́хъ: Бл҃же́нъ мꙋ́жъ: Є҆ѵⷢ҇лїе і҆ѡа́нна, зача́ло л҃ѕ: Речѐ гдⷭ҇ь: а҆́зъ є҆́смь две́рь: Прича́стенъ: Въ па́мѧть вѣ́чнꙋю:

д҃. Ст҃а́гѡ сщ҃енномч҃нка +вавѵ́лы+. є҆пі́скопа вели́кїѧ а҆нтїохі́и: И҆ ст҃а́гѡ прⷪ҇ро́ка и҆ бг҃ови́дца +мѡѷсе́а+.

На Гдⷭ҇и воззва́хъ, стїхи̑ры на ѕ҃. Вавѵ́лы, г҃: гла́съ ѕ҃. Подо́бенъ: Всю̀ ѿложи́вше: И҆ прⷪ҇ро́ка, г҃: гла́съ д҃. Подо́бенъ: Зва́нный свы́ше: Сла́ва, вавѵ́лы, гла́съ ѕ҃. Самогла́сенъ: Восхо́дный степе́нь: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха: Сла́ва, ст҃а́гѡ, гла́съ ѕ҃: Сꙋди́щꙋ мꙋчи́телевꙋ: И҆ ны́нѣ, бг҃оро́диченъ. Тропа́рь вавѵ́лы, гла́съ д҃: И҆ нра́вѡмъ прича́стникъ: Вчера́шнїй.

Сла́ва, тропа́рь прⷪ҇ро́ка, гла́съ в҃: Прⷪ҇ро́ка твоегѡ̀ мѡѷсе́а па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ, сп҃сѝ дꙋ́шы на́шѧ.

И҆лѝ се́й, гла́съ то́йже: На высотꙋ̀ добродѣ́телей возше́лъ є҆сѝ, прⷪ҇ро́че мѡѷсе́е: и҆ сегѡ̀ ра́ди сподо́билсѧ є҆сѝ ви́дѣти сла́вꙋ бж҃їю. скрижа̑ли бл҃года̑тныѧ зако́на прїѧ́тъ, и҆ начерта́нїй бл҃года́ть въ себѣ̀ носѧ̀, и҆ прⷪ҇ро́кѡвъ бы́лъ є҆сѝ честна́ѧ похвала̀, и҆ бл҃гоче́стїѧ вели́кое та́инство.

На ᲂу҆́трени, на Бг҃ъ гдⷭ҇ь, тропа́рь вавѵ́лы два́жды. Сла́ва, прⷪ҇ро́ка: И҆ ны́нѣ, бг҃оро́диченъ. И҆ ѻ҆бы̑чныѧ каѳі̑смы.: И҆ сѣда́льны ѻ҆ктѡ́иха: И҆ чте́нїе. Канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: И҆ ст҃ы́хъ два̀: Вавѵ́лы, гла́съ ѕ҃: И҆ прⷪ҇ро́ка, гла́съ д҃. По г҃-й пѣ́сни,

Конда́къ прⷪ҇ро́ка, гла́съ в҃: Ли́къ прⷪ҇ро́ческїй съ мѡѷсе́емъ и҆ а҆арѡ́номъ, весе́лїемъ дне́сь весели́тсѧ, ꙗ҆́кѡ коне́цъ прⷪ҇ро́чествїѧ и҆́хъ на на́съ и҆спо́лнисѧ: дне́сь сїѧ́етъ крⷭ҇тъ, и҆́мже на́съ сп҃слъ є҆сѝ. тѣ́хъ мл҃твами хрⷭ҇тѐ бж҃е поми́лꙋй на́съ.

И҆ сѣда́ленъ, вавѵ́лы, гла́съ г҃. Сла́ва, прⷪ҇ро́ка, гла́съ д҃: И҆ ны́нѣ, бг҃оро́диченъ. По ѕ҃-й пѣ́сни,

Конда́къ вавѵ́лы, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ бл҃гоче́стїѧ проповѣ́дника, и҆ страда́льцєвъ ᲂу҆твержде́нїе, цр҃ковь сла́витъ тѧ̀ вавѵ́ло сла́вне, ѡ҆свѣща́ема дне́сь: но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, въ ми́рѣ соверше́ннѣмъ, велича́ющыѧ и҆ восхвалѧ́ющыѧ тѧ̀, сохрани́тихрⷭ҇тꙋ̀ моли́сѧ, ѽ многострада́льне.

И҆ і҆́косъ, и҆ про́логъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, вавѵ́лы: И҆ ны́нѣ, бг҃оро́диченъ: На стїхо́внѣ ѻ҆ктѡ́иха. На лїтꙋргі́и прокі́менъ, гла́съ д҃: Ст҃ы̑мъ и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а: А҆по́столъ къ є҆вре́ємъ, зача́ло т҃л: Ст҃і́и всѝ, вѣ́рою: А҆ллилꙋ́їа, гла́съ д҃: Воззва́ша првⷣнїи: Є҆ѵⷢ҇лїе лꙋкѝ, зача́ло ѯ҃з: Не бо́йсѧ ма́лое ста́до: Прича́стенъ, Ра́дꙋйтесѧ:

є҃. 🕃 Ст҃а́гѡ прⷪ҇ро́ка +заха́рїи+, ѻ҆тца̀ чⷭ҇тна́гѡ і҆ѡа́нна прⷣте́чи: И҆ ст҃ы́ѧ пра́ведныѧ +є҆лїсаве́ты+.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры на ѕ҃, гла́съ д҃. Подо́бенъ: Да́лъ є҆сѝ зна́менїе: Ма́сть и҆мѣ́ѧ: Сла́ва, гла́съ и҃, самогла́сенъ: Сщ҃е́нства зако́ннагѡ: И҆ ны́нѣ, бг҃оро́диченъ и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха: Сла́ва, ст҃а́гѡ, гла́съ в҃: Ꙗ҆́кѡ чи́стъ:

Тропа́рь, гла́съ д҃: Сщ҃е́нства ѻ҆де́ждею ѡ҆бложе́нъ премꙋ́дре, по зако́нꙋ бж҃їю всесожжє́нїѧ прїѧ̑тна сщ҃еннолѣ́пнѡ приноси́лъ є҆сѝ заха́рїе, и҆ бы́лъ є҆сѝ свѣти́льникъ и҆ зри́тель та́йныхъ, зна́мєнїѧ въ тебѣ̀ бл҃года́ти носѧ̀ ꙗ҆́вственнѡ всемꙋ́дре, и҆ мече́мъ ᲂу҆бїе́нъ бы́въ въ хра́мѣ бж҃їи, хрⷭ҇то́въ прⷪ҇ро́че, съ прⷣте́чею молѝ сп҃сти́сѧ дꙋша́мъ на́шымъ.

На ᲂу҆́трени, на Бг҃ъ гдⷭ҇ь, тропа́рь прⷪ҇ро́ка, два́жды. Сла́ва, и҆ ны́нѣ, бг҃оро́диченъ. и҆ ѻ҆бы̑чныѧ каѳі̑смы, и҆ сѣда́льны ѻ҆ктѡ́иха, и҆ чтє́нїѧ. Канѡ́ны ѻ҆ктѡ́иха ѻ҆́ба без̾ мч҃ничнѡвъ: И҆ ст҃а́гѡ на ѕ҃: гла́съ и҃. По г҃-й пѣ́сни, сѣда́ленъ ст҃а́гѡ, гла́съ и҃, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Прⷪ҇ро́къ дне́сь и҆ сщ҃е́нникъ вы́шнѧгѡ, заха́рїа предложѝ предте́чевъ роди́тель трапе́зꙋ своеѧ̀ па́мѧти, вѣ̑рныѧ пита́ѧ: питїе́ бо пра́вды всѣ̑мъ раствори́въ, сегѡ̀ ра́ди скончава́етсѧ, ꙗ҆́кѡ бж҃е́ственный таи́нникъ бж҃їѧ бл҃года́ти.

И҆ і҆́косъ: и҆ про́логъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃а́гѡ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха, Сла́ва, ст҃а́гѡ, гла́съ и҃. Жє́ртвы приносѧ̀: На лїтꙋргі́и, бл҃жє́нна ѻ҆ктѡ́иха, на д҃. И҆ ст҃а́гѡ, пѣ́снь г҃-ѧ на д҃. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши бж҃е гла́съ мо́й. А҆по́столъ ко є҆вре́ємъ, зача́ло тд҃і. А҆враа́мꙋ ѡ҆бѣтова́ѧ бг҃ъ: А҆ллилꙋ́їа, гла́съ з҃: Свѣ́тъ возсїѧ̀ првⷣникꙋ. Є҆ѵⷢ҇лїе матѳе́а, зача́ло ч҃ѕ: Го́ре ва́мъ кни́жницы и҆ фарїсе́є лицемѣ́ри: Прича́стенъ, Въ па́мѧть вѣ́чнꙋю:

ѕ҃. 🕃 Воспомина́нїе бы́вшагѡ чꙋдесѐ въ колосса́ехъ, є҆́же є҆́сть въ хѡ́нѣхъ, ѿ а҆рхїстрати́га мїхаи́ла: И҆ ст҃а́гѡ мч҃нка +є҆ѵдоѯі́а+, и҆ и҆̀же съ ни́мъ: И҆ преподо́бнагѡ ѻ҆тца̀ на́шегѡ +а҆рхі́ппа+.

Ве́черъ, ѻ҆бы́чнаѧ каѳі́сма: На Гдⷭ҇и воззва́хъ, стїхи̑ры а҆рха́гг҃ла, на ѕ҃, гла́съ д҃. Подо́бенъ: Ꙗ҆́кѡ до́блѧ: Трисо́лнечнагѡ бж҃ества̀: Сла́ва, гла́съ ѕ҃, самогла́сенъ: Сра́дꙋйтесѧ на́мъ: И҆ ны́нѣ, бг҃оро́диченъ: Сра́дꙋйтесѧ на́мъ всѧ̀: На стїхо́внѣ ѻ҆ктѡ́иха,

Сла́ва, и҆ ны́нѣ, гла́съ и҃: Ꙗ҆́кѡ чинонача́льникъ:

Тропа́рь, гла́съ д҃: Нбⷭ҇ныхъ во́инствъ а҆рхїстрати́же, мо́лимъ тѧ̀ при́снѡ мы̀ недосто́йнїи, да твои́ми мл҃твами ѡ҆гради́ши на́съ кро́вомъ кри́лъ невеще́ственныѧ твоеѧ̀ сла́вы, сохранѧ́ѧ на́съ припа́дающихъ прилѣ́жнѡ, и҆ вопїю́щихъ: ѿ бѣ́дъ и҆зба́ви на́съ, ꙗ҆́кѡ чинонача́льникъ вы́шнихъ си́лъ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Слꙋ́жба ст҃а́гѡ є҆ѵдоѯі́а пое́тсѧ на повече́рїи.

[зрѝ] На ᲂу҆́трени, на Бг҃ъ гдⷭ҇ь, тропа́рь а҆рха́гг҃ла, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. И҆ ѻ҆бы̑чныѧ каѳі̑смы, и҆ сѣда́льны ѻ҆ктѡ́иха, и҆ чтє́нїѧ. Ѻ҆́ба канѡ́на ѻ҆ктѡ́иха, без̾ мч҃нчнѡвъ: И҆ а҆рха́гг҃ла, на ѕ҃, гла́съ д҃. По г҃-й пѣ́сни сѣда́ленъ, гла́съ и҃. Сла́ва, гла́съ а҃. По ѕ҃-й пѣ́сни,

Конда́къ, гла́съ в҃: А҆рхїстрати́же бж҃їй, слꙋжи́телю бж҃е́ственныѧ сла́вы, а҆́гг҃лѡвъ нача́льниче, и҆ человѣ́кѡвъ наста́вниче, поле́зное на́мъ просѝ, и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́гъ.

И҆ і҆́косъ. По ѳ҃-й пѣ́сни, Свѣти́ленъ ѻ҆ктѡ́иха: Сла́ва, а҆рха́гг҃ла: И҆ ны́нѣ, бг҃оро́диченъ. На хвали́техъ стїхи̑ры а҆рха́гг҃ла, на д҃, гла́съ а҃-й. Подо́бенъ: Нбⷭ҇ныхъ чинѡ́въ: А҆́гг҃льски въ ми́рѣ: Сла́ва, гла́съ то́йже, самогла́сенъ: Чинонача́льникъ вы́шнихъ си́лъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: На стїхо́внѣ, ѻ҆ктѡ́иха: Сла́ва, а҆рха́гг҃ла, гла́съ є҃: И҆дѣ́же ѡ҆сѣнѧ́етъ: И҆ ны́нѣ, бг҃оро́диченъ. На лїтꙋргі́и бл҃жє́нна, а҆рха́гг҃ла, пѣ́снь г҃-ѧ и҆ ѕ҃-ѧ. Прокі́менъ, гла́съ д҃: Творѧ́й а҆́гг҃лы своѧ̑ дх҃и, и҆ слꙋги̑ своѧ̑ пла́мень ѻ҆́гненный. Сті́хъ: Бл҃гословѝ дꙋшѐ моѧ̀ гдⷭ҇а: А҆по́столъ ко є҆вре́ємъ, зача́ло т҃є: Бра́тїе, а҆́ще глаго́ланное а҆́гг҃лы сло́во бы́сть: А҆ллилꙋ́їа, гла́съ є҃: Хвали́те гдⷭ҇а всѝ а҆́гг҃ли є҆гѡ̀, хвали́те є҆го̀ всѧ̑ си̑лы є҆гѡ̀. Сті́хъ: Ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. Є҆ѵⷢ҇лїе лꙋкѝ, зача́ло н҃а: Речѐ гдⷭ҇ь, слꙋ́шаѧй ва́съ: Прича́стенъ, Творѧ́й а҆́гг҃лы своѧ̑ дх҃и:

з҃. 🕃 Предпра́зднство ржⷭ҇тва̀ прест҃ы́ѧ бцⷣы: И҆ ст҃а́гѡ мч҃нка +сѡзо́нта+:

На Гдⷭ҇и воззва́хъ, стїхи̑ры предпра́зднства г҃, гла́съ а҃-й. Подо́бенъ: Нбⷭ҇ныхъ чинѡ́въ: Всемі́рныѧ мі́рꙋ ра́дости: и҆ мч҃нка г҃, гла́съ д҃. Подо́бенъ: Да́лъ є҆сѝ зна́менїе: Сла́ва, и҆ ны́нѣ: предпра́зднства, гла́съ д҃: Всечⷭ҇тно́е твоѐ ржⷭ҇тво̀: А҆́ще же въ пѧто́къ ве́чера, Сла́ва, предпра́зднства: И҆ ны́нѣ, догма́тїкъ гла́са настоѧ́щагѡ. На стїхо́внѣ стїхи̑ры, гла́съ и҃. Подо́бенъ: ѽ пресла́внагѡ чꙋдесѐ! ѽ пресла́внагѡ чꙋдесѐ, ꙗ҆́кѡ ѿ неражда́ющїѧ: съ припѣ́вы, а҃-й, Слы́ши дщѝ: в҃-й, Лицꙋ̀ твоемꙋ̀: Сла́ва, и҆ ны́нѣ, предпра́зднства, гла́съ д҃: Всемі́рнаѧ ра́дость: Тропа́рь мч҃нка, гла́съ д҃: Мч҃нкъ тво́й гдⷭ҇и: пи́санъ сегѡ̀ мѣ́сѧца во в҃ де́нь.

Сла́ва, и҆ ны́нѣ, предпра́зднства, гла́съ то́йже: Ѿ ко́рене і҆ессе́ева, и҆ ѿ чре́слъ дв҃довыхъ бг҃оѻтрокови́ца мр҃їа́мъ ражда́етсѧ дне́сь на́мъ: ра́достїю бо ра́дꙋютсѧ всѧ́чєскаѧ и҆ ѡ҆бновлѧ́ютсѧ. сра́дꙋйтесѧ кꙋ́пнѡ не́бо и҆ землѧ̀, восхвали́те ю҆̀ ѻ҆ч҃єствїѧ ꙗ҆зы́кѡвъ: і҆ѡакі́мъ весели́тсѧ, и҆ а҆́нна торжествꙋ́етъ зовꙋ́щи: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

На ᲂу҆́трени, на бг҃ъ гдⷭ҇ь, тропа́рь предпра́зднства два́жды. Сла́ва, мч҃нка: и҆ ны́нѣ, предпра́зднства. И҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ, гла́съ а҃, подо́бенъ: Ка́мени: Ро́ждшисѧ пресла́внѡ: Сла́ва, и҆ ны́нѣ, то́йже. По в҃-й каѳі́смѣ сѣда́ленъ, гла́съ є҃, подо́бенъ: Собезнача́льное: Нбⷭ҇наѧ всѧ̑: Сла́ва, и҆ ны́нѣ, то́йже: и҆ чте́нїе. Канѡ́нъ предпра́зднства, со і҆рмосо́мъ на и҃, гла́съ д҃: И҆ мч҃нка на д҃, гла́съ то́йже. По г҃-й пѣ́сни.

Конда́къ мч҃нка, гла́съ в҃. Подо́бенъ: Твє́рдыѧ: И҆́стиннаго и҆ бг҃омꙋ́драго мч҃нка, страда́льца бл҃гоче́стїѧ и҆скꙋ́снаго, соше́дшесѧ дне́сь, велегла́снѡ восхва́лимъ, сѡзо́нта таи́нника бл҃года́ти, и҆сцѣле́нїй да́телѧ богатѣ́йшаго: мо́литъ бо хрⷭ҇та̀ бг҃а ѡ҆ всѣ́хъ на́съ.

И҆ і҆́косъ, и҆ сѣда́ленъ, гла́съ д҃. Подо́бенъ: Ско́рѡ предварѝ: Спа́слсѧ вѣ́рою сѡзо́нте: Сла́ва, и҆ ны́нѣ, предпра́зднства, гла́съ и҃: Да ра́дꙋетсѧ не́бо: По ѕ҃-й пѣ́сни,

Конда́къ предпра́зднства, гла́съ г҃. Подо́бенъ: Дв҃а дне́сь: в҃а дне́сь и҆ бцⷣа мр҃і́а, черто́гъ безконе́чный нбⷭ҇нагѡ жениха̀, ражда́етсѧ ѿ непло́дове, бж҃їимъ совѣ́томъ: колесни́ца сло́ва бл҃гоꙋкраша́етсѧ. на сїе́ бо преднарече́сѧ бж҃е́ственнаѧ две́рь, и҆ мт҃и сꙋ́щїѧ жи́зни.

И҆ і҆́косъ. По ѳ҃-й пѣ́сни, свѣти́ленъ мч҃нка: Сла́ва, и҆ ны́нѣ, предпра́зднства. На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Прїиди́те, и҆̀же ѿ а҆да́ма: Сла́ва, и҆ ны́нѣ, гла́съ в҃, самогла́сенъ: Пронарече́ннаѧ всѣ́хъ цр҃и́ца: На лїтꙋргі́и, бл҃жє́нна, предпра́зднства, пѣ́снь г҃, на д҃: И҆ ст҃а́гѡ пѣ́снь ѕ҃, на д҃. Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й: А҆по́столъ къ є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша пра́веднїи: Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе і҆ѡа́нна, зача́ло н҃в: Сѝ заповѣ́даю ва́мъ: Прича́стенъ: Въ па́мѧть вѣ́чнꙋю:

🕃 И҆ па́мѧть и҆́же во ст҃ы́хъ ѻ҆тца̀ на́шегѡ +і҆ѡа́нна+, а҆рхїепⷭ҇кпа новгоро́дскагѡ, чꙋдотво́рца.

Соверша́етсѧ собо́ръ є҆гѡ̀, и҆дѣ́же лежа́тъ мѡ́щи є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ и҃:

Дне́сь свѣ́тлѡ красꙋ́етсѧ сла́внѣйшїй вели́кїй но́въ гра́дъ, и҆мѣ́ѧ мѡ́щи твоѧ̑ въ себѣ̀, ст҃и́телю і҆ѡа́нне, ꙗ҆́кѡ со́лнєчныѧ лꙋчи̑ и҆спꙋща́ющыѧ, и҆ подаю́щыѧ и҆сцѣле́нїѧ притека́ющымъ съ вѣ́рою къ ра́цѣ моще́й твои́хъ. моли́сѧ хрⷭ҇тꙋ̀ бг҃ꙋ, и҆зба́вити гра́дъ се́й невреди́мь ѿ ва́рварскагѡ плѣне́нїѧ, и҆ междоꙋсо́бныѧ бра́ни, и҆ ѻ҆́гненнагѡ запале́нїѧ, ст҃и́телю бг҃омꙋ́дре и҆ чꙋдоно́сче, нбⷭ҇ный человѣ́че, и҆ земны́й а҆́гг҃ле: да соше́дшесѧ любо́вїю въ па́мѧть твою̀, свѣ́тлѡ пра́зднꙋемъ въ пѣ́снехъ и҆ пѣ́нїихъ ра́дꙋющесѧ, и҆ хрⷭ҇та̀ сла́вѧще, тебѣ̀ таковꙋ́ю бл҃года́ть дарова́вшаго и҆сцѣле́нїй, и҆ вели́комꙋ новꙋ̀ гра́дꙋ застꙋпле́нїе и҆ ᲂу҆твержде́нїе.

Конда́къ, гла́съ д҃. Подо́бенъ: Вознесы́йсѧ: Возвесели́сѧ ꙗ҆вле́ннѡ чⷭ҇тна́ѧ цр҃ковь хрⷭ҇то́ва, въ па́мѧть дне́сь приснословꙋ́щагѡ ст҃и́телѧ і҆ѡа́нна, ѿ вели́кагѡ нова̀ гра́да возсїѧ́вшагѡ, и҆ всю̀ странꙋ̀ ᲂу҆диви́вшагѡ пресла́вными чꙋдодѣѧ́нїи, и҆ всѣ́ми добродѣ́тельми ᲂу҆краси́вшагѡсѧ: и҆ по преставле́нїи бо честно́е тѣ́ло є҆гѡ̀ ѡ҆брѣ́тесѧ нетлѣ́нно, и҆стоща́ющее вє́лїѧ чꙋдеса̀. тѣ́мже зове́мъ є҆мꙋ̀: ѽ всебл҃же́нне, молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.

🕅 А҆́ще слꙋчи́тсѧ предпра́зднство ржⷭ҇тва̀ прест҃ы́ѧ бцⷣы, и҆ ст҃а́гѡ мч҃нка сѡзо́нта, въ недѣ́лю. Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю. Тропа́рь воскрⷭ҇нъ: Сла́ва, и҆ ны́нѣ, бг҃оро́диченъ є҆гѡ̀. На вели́цѣй вече́рни, по каѳі́смѣ, на Гдⷭ҇и воззва́хъ, стїхи̑ры воскрⷭ҇ны г҃: и҆ а҆нато́лїевъ є҆ди́нъ. И҆ предпра́зднства, г҃, и҆ мч҃нка г҃: Сла́ва, предпра́зднства: И҆ ны́нѣ, бг҃оро́диченъ настоѧ́щагѡ гла́са. На лїті́и стїхи́ра хра́ма: Та́же стїхи̑ры стїхѡ́вны предпра́зднства вечє́рнїѧ. Сла́ва, и҆ ны́нѣ, предпра́зднства: пи́санъ на ᲂу҆́трени на стїхо́внѣ. На стїхо́внѣ, стїхи̑ры воскрⷭ҇ны. Сла́ва, и҆ ны́нѣ, предпра́зднства. На бл҃гослове́нїи хлѣ́бѡвъ тропа́рь: Бцⷣе дв҃о: два́жды, и҆ предпра́зднства є҆ди́ножды. И҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь: тропа́рь воскрⷭ҇нъ два́жды. Сла́ва, мч҃нка: И҆ ны́нѣ, предпра́зднства. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ: И҆ чте́нїе во є҆ѵⷢ҇лїи толково́мъ: недѣ́лѧ пред̾ воздви́женїемъ. Посе́мъ непоро́чны: И҆ ѵ҆пакоѝ: И҆ чте́нїе, недѣ́лѧ рѧ́дъ. Степє́нны, и҆ прокі́менъ гла́са: Всѧ́кое дыха́нїе: и҆ є҆ѵⷢ҇лїе воскрⷭ҇но: и҆ Воскрⷭ҇нїе хрⷭ҇то́во: Та́же канѡ́нъ воскрⷭ҇нъ, со і҆рмосо́мъ на д҃: и҆ бцⷣы на два̀ и҆ предпра́зднства на д҃: и҆ мч҃нка на д҃. Катава́сїа, Крⷭ҇тъ начерта́въ: По г҃-й пѣ́сни, конда́къ и҆ і҆́косъ предпра́зднства, и҆ мч҃нка. Сла́ва, сѣда́ленъ мч҃нка: И҆ ны́нѣ, предпра́зднства. По ѕ҃-й пѣ́сни, конда́къ и҆ і҆́косъ воскрⷭ҇нъ. И҆ чте́мъ про́логъ. На ѳ҃-й пѣ́сни, пое́мъ Чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, мч҃нка: И҆ ны́нѣ предпра́зднства. На хвали́техъ, стїхи̑ры воскрⷭ҇ны д҃, и҆ а҆нато́лїевъ є҆ди́нъ є҆ди́нъ, и҆ предпра́зднства, подо́бны г҃ стїхо́вныѧ съ припѣ́вы и҆́хъ. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. Тропа́рь воскрⷭ҇нъ то́чїю. Є҆ктєнїѝ: и҆ ѿпꙋ́стъ: и҆ ѡ҆глаше́нїе. И҆ ѻ҆бы́чное и҆схожде́нїе въ притво́ръ: И҆ ча́съ а҃-й. На а҃-мъ часѣ̀ тропа́рь воскрⷭ҇нъ: Сла́ва, предпра́зднства: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ предпра́зднства: И҆ коне́чный ѿпꙋ́стъ. На г҃-мъ часѣ̀ тропа́рь воскрⷭ҇нъ: Сла́ва, мч҃нка: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ. Та́кожде и҆ на про́чихъ часѣ́хъ, глаго́лемъ воскрⷭ҇нъ тропа́рь пре́жде: а҆ предпра́зднства и҆ мч҃нка, премѣнѧ́юще. Кондаки́ же воскрⷭ҇нъ и҆ предпра́зднства, глаго́лемъ премѣнѧ́юще. На лїтꙋргі́и бл҃жє́нна ѻ҆ктѡ́иха на ѕ҃, и҆ съ тро́ичнымъ и҆ предпра́зднства пѣ́снь г҃, на д҃. По вхо́дѣ тропа́рь воскрⷭ҇нъ, и҆ предпра́зднства: та́же хра́ма ст҃а́гѡ, и҆ мч҃нка. Конда́къ воскрⷭ҇нъ, и҆ хра́ма ст҃а́гѡ: Сла́ва, мч҃нка: И҆ ны́нѣ, предпра́зднства. Прокі́менъ, а҆по́столъ, А҆ллилꙋ́їа и҆ є҆ѵⷢ҇лїе, пре́жде недѣ́ли пред̾ воздви́женїемъ: И҆ рѧ́дъ недѣ́ли под̾ зача́ло: та́же ст҃а́гѡ. Прокі́менъ же гла́са ѡ҆ставлѧ́етсѧ. Прича́стенъ: Хвали́те гдⷭ҇а: и҆ мч҃нка. Въ па́мѧть вѣ́чнꙋю:

и҃. 🕀 Ржⷭ҇тво̀ прест҃ы́ѧ влⷣчцы на́шеѧ бцⷣы и҆ приснодв҃ы мр҃і́и.

На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ а҃-й. Подо́бенъ: Нбⷭ҇ныхъ чинѡ́въ: І҆ѡакі́мъ и҆ а҆́нна торжествꙋ́ютъ: Сла́ва, и҆ ны́нѣ, гла́съ д҃: Всечⷭ҇тно́е твоѐ ржⷭ҇тво̀: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Ра́дꙋйсѧ і҆ѡакі́мъ: съ припѣ́вы: а҃-й, Слы́ши дщѝ и҆ ви́ждь: в҃-й, Лицꙋ̀ твоемꙋ̀ помо́лѧтсѧ: Сла́ва, и҆ ны́нѣ, подо́бенъ то́йже: Хра́мъ бж҃їй є҆ди́на бцⷣа:

Тропа́рь, гла́съ д҃: Ржⷭ҇тво̀ твоѐ, бцⷣе дв҃о, ра́дость возвѣстѝ все́й вселе́ннѣй: и҆з̾ тебе́ бо возсїѧ̀ сл҃нце пра́вды хрⷭ҇то́съ бг҃ъ на́шъ, и҆ разрꙋши́въ клѧ́твꙋ, дадѐ бл҃гослове́нїе: и҆ ᲂу҆праздни́въ сме́рть, дарова̀ на́мъ живо́тъ вѣ́чный.

На вели́цѣй вече́рни, но предначина́тельномъ ѱалмѣ̀, пое́мъ: Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃, гла́съ ѕ҃. Самогла́сны: Дне́сь и҆́же на разꙋ́мныхъ престо́лѣхъ: Сла́ва, и҆ ны́нѣ, а҃-ю стїхи́рꙋ: Дне́сь и҆́же на разꙋ́мныхъ: Вхо́дъ. Прокі́менъ днѐ, и҆ чтє́нїѧ г҃: а҃-е, Бытїѧ̀: И҆зы́де і҆а́кѡвъ: в҃-е, Прⷪ҇ро́чества і҆езекі́илева: Та́кѡ глаго́летъ гдⷭ҇ь, бꙋ́детъ ѿ днѐ ѻ҆сма́гѡ: г҃-е, При́тчей: Премꙋ́дрость созда̀ себѣ̀ до́мъ: Є҆ктенїа̀, Рце́мъ всѝ: и҆ Сподо́би гдⷭ҇и въ ве́черъ се́й: и҆ И҆спо́лнимъ вече́рнюю моли́твꙋ на́шꙋ: На лїті́и стїхи̑ры самогла́сны, гла́съ а҃: Нача́ло на́шегѡ сп҃се́нїѧ: Сла́ва, и҆ ны́нѣ, гла́съ и҃: Въ бл҃гознамени́тый де́нь: На стїхо́внѣ стїхи̑ры самогла́сны, гла́съ д҃: Всемі́рнаѧ ра́дость: съ припѣ́вы пра́здника, [пи́саны на ма́лѣй вече́рни]. Сла́ва, и҆ ны́нѣ, гла́съ и҃: Прїиди́те всѝ вѣ́рнїи: Та́же, Ны́нѣ ѿпꙋща́еши: На бл҃гослове́нїи хлѣ́бѡвъ, ѿпꙋсти́тельный тропа́рь, гла́съ д҃: Ржⷭ҇тво̀ твоѐ, бцⷣе дв҃о: три́жды, пи́санъ на ма́лѣй вече́рни. Бꙋ́ди и҆́мѧ гдⷭ҇не: три́жды, съ пѣ́нїемъ: и҆ ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: до Не лиша́тсѧ всѧ́кагѡ бл҃га. И҆ раздаю́тсѧ бл҃гословє́нныѧ хлѣ́бы по ѻ҆бы́чаю. Та́же і҆ере́й глаго́летъ: Бл҃гослове́нїе гдⷭ҇не на ва́съ: и҆ предложи́тсѧ чте́нїе пра́здника: Сло́во а҆ндре́а кри́тскагѡ, є҆мꙋ́же нача́ло: А҆́ще мѣ́рима є҆́сть землѧ̀ пѧ́дїю: А҆ и҆дѣ́же не быва́етъ бдѣ́нїѧ, по Ны́нѣ ѿпꙋща́еши: Тропа́рь, и҆ ѿпꙋ́стъ. Полꙋ́нощницꙋ же пое́мъ по ѻ҆бы́чаю. На не́йже вмѣ́стѡ, Сѐ жени́хъ: глаго́лемъ тропа́рь пра́здника. По в҃-мъ трист҃о́мъ, глаго́лемъ конда́къ, и҆ Гдⷭ҇и поми́лꙋй, в҃і, и҆ ѿпꙋ́стъ. Мл҃твы же Помѧнѝ гдⷭ҇и, не глаго́лемъ.] На ᲂу҆́трени, по шестоѱа́лмїи, на Бг҃ъ гдⷭ҇ь: тропа́рь пра́здника, три́жды. По а҃-й каѳі́смѣ сѣда́ленъ пра́здника, гла́съ д҃. Подо́бенъ: Оу҆диви́сѧ і҆ѡ́сифъ: Возопі́й дв҃де: Сла́ва: и҆ ны́нѣ, то́йже. И҆ чте́нїе пра́здника. По в҃-й каѳі́смѣ сѣда́ленъ, гла́съ и҆ подо́бенъ то́йже. И҆ чте́мъ сло́во ст҃а́гѡ і҆ѡа́нна дамаскина̀, є҆мꙋ́же нача́ло: Прїиди́те всѝ ꙗ҆зы́цы: По чте́нїи же даю́тсѧ свѣщы̀ бра́тїи. Та́же полѷеле́й, и҆ сѣда́ленъ пра́здника, гла́съ и҃. Подо́бенъ: Повелѣ́нное: Да ра́дꙋетсѧ нб҃о: Сла́ва, и҆ ны́нѣ, гла́съ то́йже: Ѡ҆бнови́сѧ а҆да́ме: И҆ чте́мъ сло́во григо́рїа і҆еромона́ха. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ то́йже: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Ѿры́гнꙋ се́рдце моѐ сло́во бл҃го. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀. Є҆ѵⷢ҇лїе лꙋкѝ, зача́ло д҃: Во днѝ ѻ҆́ны, воста́вши мр҃їа́мъ: Та́же ѱало́мъ н҃. Сла́ва, Мл҃твами бцⷣы: И҆ ны́нѣ, то́йже. И҆ посе́мъ, Поми́лꙋй мѧ̀ бж҃е: И҆ стїхи́ра пра́здника, гла́съ ѕ҃: Се́й де́нь: Та́же, Канѡ́на два̀: Є҆ди́нъ кѵ́ръ і҆ѡа́нна, гла́съ в҃: Дрꙋгі́й кѵ́ръ а҆ндре́а, гла́съ и҃: І҆рмосы̀ ѻ҆бою̀ канѡ́нѡвъ по два́жды. Тропари́ же на в҃і. Катава́сїа: Крⷭ҇тъ начерта́въ: По г҃-й пѣ́сни, сѣда́ленъ пра́здника: гла́съ д҃: Дв҃а мр҃і́а: Сла́ва, и҆ ны́нѣ, то́йже. По ѕ҃-й пѣ́сни,

Конда́къ, гла́съ д҃: І҆ѡакі́мъ и҆ а҆́нна поноше́нїѧ безча́дства, и҆ а҆да́мъ и҆ є҆́ѵа ѿ тлѝ сме́ртныѧ свободи́стасѧ, пречⷭ҇таѧ, во ст҃ѣ́мъ ржⷭ҇твѣ̀ твое́мъ: то̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ и҆ пита́тельницꙋ жи́зни на́шеѧ.

И҆ і҆́косъ, и҆ чте́мъ про́логъ. На ѳ҃-й пѣ́сни вжига́ютъ свѣщы̀ бра́тїѧ. Чⷭ҇тнѣ́йшꙋю же не пое́мъ, но пое́мъ припѣ́вы пра́здника: Велича́й дꙋшѐ моѧ̀: И҆ дрꙋгі́й, Велича́й дꙋшѐ моѧ̀: На схо́дѣ, Катава́сїа, Та́инъ є҆сѝ бцⷣе ра́й: И҆ дрꙋгі́й, Снѣ́дїю дре́ва: съ припѣ́вы пра́здника. Є҆ктенїа̀ ма́лаѧ. Свѣти́ленъ пра́здника, Ѿ непло́дныѧ дне́сь: два́жды. Сла́ва, и҆ ны́нѣ: А҆да́ме ѡ҆бнови́сѧ: На хвали́техъ стїхи̑ры на д҃, гла́съ а҃. Подо́бенъ: Ѽ ди́внагѡ чꙋдесѐ: Сла́ва, и҆ ны́нѣ, гла́съ ѕ҃: Се́й де́нь гдⷭ҇нь: Славосло́вїе вели́кое. По трист҃о́мъ тропа́рь пра́здника є҆ди́ножды. Є҆ктєнїѝ, и҆ ѿпꙋ́стъ. Зна́менаютсѧ же бра́тїѧ ѿ і҆ере́а ст҃ы́мъ є҆ле́емъ. И҆ пое́мъ стїхи́рꙋ самогла́снꙋ пра́здника, ю҆́же хо́щетъ є҆кклисїа́рхъ. И҆ мл҃твѣ глаго́лемѣй ѿ і҆ере́а, ꙗ҆́коже ᲂу҆ста́влено є҆́сть, на лїті́и ве́черъ воскрⷭ҇ныѧ слꙋ́жбы: Влⷣко многомлⷭ҇тиве: И҆ ча́съ ли въ притво́рѣ. На а҃-мъ часѣ̀ тропа́рь пра́здника: И҆ ны́нѣ, бг҃оро́диченъ часѡ́въ. По трист҃о́мъ конда́къ пра́здника: И҆ про́чее всѐ до конца̀. И҆ соверше́нный ѿпꙋ́стъ. На лїтꙋргі́и, бл҃жє́нна ѿ канѡ́на гла́са в҃-гѡ, пѣ́снь г҃-ѧ, на д҃: и҆ и҃-гѡ пѣ́снь ѕ҃-ѧ на д҃. По вхо́дѣ, тропа́рь пра́здника: Сла́ва и҆ ны́нѣ, конда́къ. Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а, и҆ возра́довасѧ дх҃ъ мо́й ѡ҆ бз҃ѣ сп҃сѣ мое́мъ. Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆по́столъ къ фїлїпписі́ємъ, зача́ло с҃м: Сїѐ да мꙋ́дрствꙋетсѧ въ ва́съ: А҆ллилꙋ́їа, гла́съ и҃: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: Вмѣ́стѡ досто́йна, пое́мъ і҆рмо́съ: Чꙋ́жде мт҃ремъ: И҆ до ѿда́нїѧ, съ припѣ́вомъ пра́здника. [С]и́це пое́мъ во всѧ̑ пра́здники влⷣчни и҆ бцⷣы. Прича́стенъ: Ча́шꙋ сп҃се́нїѧ прїимꙋ̀: Быва́етъ же на трапе́зѣ ᲂу҆тѣше́нїе бра́тїи, дово́льно же и҆ дꙋхо́вно.

[зрѝ] А҆́ще слꙋчи́тсѧ пра́здникъ се́й въ сꙋббѡ́тꙋ пред̾ воздви́женїемъ: А҆по́столъ, и҆ є҆ѵⷢ҇лїе, сꙋббѡ́ты пред̾ воздви́женїемъ, чтѝ въ г҃і-й де́нь. Прокі́менъ же, А҆ллилꙋ́їа, и҆ прича́стенъ ѡ҆бновле́нїѧ.

Подоба́етъ вѣ́дати. Ꙗ҆́кѡ каѳі́сма не глаго́летсѧ на вече́рни, трꙋда̀ ра́ди бдѣ́ннагѡ.

Си́це ᲂу҆́бѡ твори́мъ и҆ на всѧ́къ пра́здникъ, є҆гда̀ быва́етъ бдѣ́нїе.

По ѻ҆бы́чномъ ѱалмѣ̀, на Гдⷭ҇и воззва́хъ, стїхи̑ры пра́здника: и҆ стїхо́вна пра́здника же. Пра́зднꙋемъ же пра́здникъ се́й є҃ дне́й, за є҆́же бли́зъ бы́ти пра́здникꙋ ст҃а́гѡ воздви́женїѧ чⷭ҇тна́гѡ крⷭ҇та̀.

🕅 А҆́ще ли слꙋчи́тсѧ ржⷭ҇тво̀ бцⷣы въ недѣ́лю.

Въ сꙋббѡ́тꙋ, на ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны гла́са, на д҃: Сла́ва, и҆ ны́нѣ, пра́здника. На стїхо́внѣ стїхи́ра воскрⷭ҇на є҆ди́на: И҆ пра́здника стїхо́вна вели́кїѧ вече́рни, съ припѣ́вы пра́здника: Сла́ва, и҆ ны́нѣ, пра́здника. Тропа́рь воскрⷭ҇нъ. Сла́ва, и҆ ны́нѣ, пра́здника. Є҆ктенїа̀ ма́лаѧ. И҆ ѿпꙋ́стъ. На вели́цѣй вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны г҃: и҆ а҆нато́лїевъ є҆ди́нъ, и҆ пра́здника ѕ҃. Сла́ва, и҆ ны́нѣ пра́здника. Вхо́дъ, Прокі́менъ днѐ: и҆ чтє́нїѧ г҃, пра́здника. На лїті́и стїхи̑ры, и҆ Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва, и҆ ны́нѣ, пра́здника. На бл҃гослове́нїи хлѣ́бѡвъ, тропа́рь пра́здника, три́жды: и҆ чте́нїе въ посла́нїихъ, и҆лѝ пра́здника. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: Сла́ва, и҆ ны́нѣ, пра́здника. По ѻ҆бы́чныхъ каѳі́смахъ сѣда́льны воскрⷭ҇ны съ бг҃оро́дичны и҆́хъ: и҆ чте́нїе во є҆ѵⷢ҇лїи толково́мъ, недѣ́лѧ пред̾ воздви́женїемъ. Та́же полѷеле́й: и҆ тропарѝ, А҆́гг҃льскїй собо́ръ: и҆ ѵ҆пакоѝ гла́са. И҆ сѣда́льны пра́здника ѻ҆́ба по є҆ди́ножды: Сла́ва, сѣда́ленъ, и҆́же по полѷеле́и: И҆ ны́нѣ, дрꙋгі́й: и҆ чте́нїе пра́здника. Степє́нна гла́са: Прокі́менъ и҆ є҆ѵⷢ҇лїе пра́здника. Та́же, Воскрⷭ҇нїе хрⷭ҇то́во: ѱало́мъ н҃. И҆ цѣлова́нїе є҆ѵⷢ҇лїа по ѻ҆бы́чаю. Посе́мъ, Сла́ва, Мл҃твами бцⷣы: И҆ ны́нѣ, то́йже. Стїхи́ра пра́здника. Канѡ́нъ воскрⷭ҇нъ со і҆рмосо́мъ на д҃. И҆ бцⷣы на два̀: И҆ пра́здника ѻ҆́ба канѡ́на, на и҃. Катава́сїа, Крⷭ҇тъ начерта́въ: По г҃-й пѣ́сни, конда́къ и҆ і҆́косъ воскрⷭ҇нъ, и҆ сѣда́ленъ пра́здника, два́жды. По ѕ҃-й пѣ́сни, конда́къ и҆ і҆́косъ пра́здника: и҆ чте́мъ про́логъ. На ѳ҃-й пѣ́сни, припѣ́вы не пое́мъ, но пое́мъ Чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃, и҆ пра́здника д҃, съ припѣ́вы пра́здника. Сла́ва, пра́здника: И҆ ны́нѣ, Пребл҃гослове́нна є҆сѝ: И҆ славосло́вїе вели́кое. и҆ тропа́рь воскрⷭ҇нъ то́чїю. И҆ є҆ктєнїѝ: И҆ ѿпꙋ́стъ. Дае́тсѧ же и҆ є҆ле́й ѿ канди́ла пра́здника. Та́же, Сла́ва, и҆ ны́нѣ, стїхи́ра є҆ѵⷢ҇льскаѧ: ѡ҆глаше́нїе, и҆ ѻ҆бы́чное и҆схожде́нїе: И҆ ча́съ пе́рвый въ притво́рѣ. На а҃-мъ часѣ̀ тропа́рь воскрⷭ҇нъ: Сла́ва, пра́здника: и҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ, и҆ ѿпꙋ́стъ. Та́кожде и҆ на про́чихъ часѣ́хъ, тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. Конда́къ пра́здника, и҆ воскрⷭ҇нъ, глаго́лемъ премѣнѧ́юще. На лїтꙋргі́и, блажє́нна воскрⷭ҇на, гла́са, на ѕ҃: И҆ пра́здника пѣ́снь г҃-ѧ, на д҃. По вхо́дѣ тропа́рь воскрⷭ҇нъ и҆ пра́здника: Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, а҆пⷭ҇лъ, А҆ллилꙋ́їа, и҆ є҆ѵⷢ҇лїе чте́мъ пре́жде недѣ́ли пред̾ воздви́женїемъ: Та́же рѧ́дъ: Посе́мъ бцⷣы, А҆ прокі́менъ гла́са ѡ҆ставлѧ́етсѧ. Прича́стенъ, Хвали́те гдⷭ҇а съ нб҃съ: И҆ пра́здника, Ча́шꙋ сп҃се́нїѧ прїимꙋ̀:

🕅 А҆́ще слꙋчи́тсѧ попра́зднство ржⷭ҇тва̀ прест҃ы́ѧ бцⷣы въ недѣ́лю.

Въ сꙋббѡ́тꙋ, на ма́лѣй вече́рни стїхи̑ры воскрⷭ҇ны, и҆ бцⷣы, по ѻ҆бы́чаю: На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны г҃: и҆ а҆нато́лїевъ є҆ди́нъ: И҆ пра́здника тогѡ̀ днѐ на рѧдꙋ̀, г҃, и҆ мине́и ст҃а́гѡ г҃. А҆́ще ли пое́тсѧ ст҃ы́й на ѕ҃: и҆лѝ є҆мꙋ́же и҆ полѷеле́й, и҆ пое́мъ стїхи̑ры воскрⷭ҇ны г҃: и҆ пра́здника г҃: и҆ ст҃а́гѡ д҃. Сла́ва, ст҃а́гѡ. А҆́ще же нѝ: Сла́ва, пра́здника: И҆ ны́нѣ, бг҃оро́диченъ пе́рвый, гла́са. Вхо́дъ. Прокі́менъ днѐ: и҆ є҆ктенїа̀. На лїті́и стїхи̑ры пра́здника. Стїхо́вна вече́рнѧѧ тогѡ̀ днѐ. и҆ ст҃а́гѡ, а҆́ще полѷеле́й. Сла́ва, и҆ ны́нѣ, пра́здника. А҆́ще ли и҆́мать ст҃ы́й Сла́вꙋ, Сла́ва ст҃а́гѡ: И҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва, ст҃а́гѡ. А҆́ще ли нѝ: Сла́ва, и҆ ны́нѣ, пра́здника. На бл҃гослове́нїи хлѣ́бѡвъ, тропа́рь: Бцⷣе дв҃о ра́дꙋйсѧ: два́жды, и҆ Пра́здника є҆ди́ножды. И҆ чте́нїе во а҆пⷭ҇льскихъ посла́нїихъ. На ᲂу҆́трени, тропа́рь воскрⷭ҇нъ два́жды: Сла́ва ст҃а́гѡ: А҆́ще ли нѝ, Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны, съ бг҃оро́дичны и҆́хъ: и҆ чте́нїе во є҆ѵⷢ҇лїи толково́мъ, недѣ́лѧ пред̾ воздви́женїемъ. Та́же непоро́чны и҆ тропарѝ: А҆́гг҃льскїй собо́ръ, и҆ ѵ҆пакоѝ гла́са, и҆ чте́нїе во є҆ѵⷢ҇лїи толково́мъ, недѣ́лѧ рѧ́дъ. Степє́нна, и҆ прокі́менъ гла́са. Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: и҆ ѱало́мъ н҃, и҆ про́чее воскрⷭ҇но. Канѡ́нъ воскрⷭ҇нъ, со і҆рмосо́мъ на д҃: и҆ бцⷣы на два̀: и҆ пра́здника на д҃: и҆ ст҃а́гѡ на д҃. А҆́ще полѷеле́й: Канѡ́нъ воскрⷭ҇нъ со і҆рмосо́мъ на д҃: и҆ пра́здника на д҃, и҆ ст҃а́гѡ на ѕ҃. Катава́сїа, Крⷭ҇тъ начерта́въ: По г҃-й пѣ́сни, конда́къ пра́здника и҆ і҆́косъ, и҆ ст҃а́гѡ а҆́ще и҆́мать, и҆ сѣда́ленъ є҆гѡ̀. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ воскрⷭ҇нъ. На ѳ҃-й пѣ́сни пое́мъ, Чⷭ҇тнѣ́йшꙋю: Свѣти́ленъ воскрⷭ҇нъ, Сла́ва, ст҃а́гѡ: А҆́ще ли нѝ, Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника д҃, стїхо́вна тогѡ̀ днѐ со Сла́внымъ, съ припѣ́вы пра́здника. А҆́ще и҆́мать ст҃ы́й стїхи̑ры на хвали́техъ: и҆ пое́мъ стїхи̑ры воскрⷭ҇ны д҃, и҆ ст҃а́гѡ со Сла́внымъ д҃, съ припѣ́вы є҆гѡ̀. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: По славосло́вїи, тропа́рь воскрⷭ҇нъ то́чїю, и҆ є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ и҆схожде́нїе въ притво́ръ, и҆ ча́съ а҃-й. На а҃-мъ часѣ̀ тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника, и҆ коне́чный ѿпꙋ́стъ. На г҃-мъ часѣ̀ тропа́рь воскрⷭ҇нъ: Сла́ва, ст҃а́гѡ. А҆́ще ли нѝ, Сла́ва, пра́здника. По трист҃о́мъ, конда́къ пра́здника, и҆ воскрⷭ҇нъ глаго́лемъ премѣнѧ́юще: а҆́ще ли полѷеле́й, и҆ ст҃а́гѡ. На лїтꙋргі́и, бл҃жє́нна гла́са на ѕ҃, и҆ пра́здника ѿ канѡ́на пѣ́снь рѧдова́ѧ, на д҃. А҆́ще ли и҆́мать ст҃ы́й пѣ́снь, и҆ воскрⷭ҇на на д҃: и҆ пра́здника на д҃, и҆ ст҃а́гѡ пѣ́снь ѕ҃-ѧ на д҃. По вхо́дѣ тропа́рь воскрⷭ҇нъ, и҆ пра́здника, и҆ хра́ма ст҃а́гѡ, и҆лѝ ст҃ы́ѧ, и҆ ст҃а́гѡ, а҆́ще є҆́сть. Та́же конда́къ воскрⷭ҇нъ, и҆ хра́ма ст҃а́гѡ, и҆лѝ ст҃ы́ѧ. Сла́ва, ст҃а́гѡ, а҆́ще є҆́сть. А҆́ще ли нѝ. Сла́ва, хра́ма ст҃а́гѡ: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, и҆ є҆ѵⷢ҇лїе, пре́жде недѣ́ли пред̾ воздви́женїемъ: рѧ́дъ же под̾ зача́ло, пото́мъ ст҃а́гѡ. Прича́стенъ: Хвали́те гдⷭ҇а съ нб҃съ: и҆ ст҃а́гѡ, а҆́ще є҆́сть, а҆́ще ли нѝ, пра́здника.

[зрѝ] Сꙋббѡ́та пред̾ воздви́женїемъ. На лїтꙋргі́и, прокі́менъ, гла́съ г҃: По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми: А҆по́столъ къ корі́нѳѧнѡмъ, зача́ло рк҃ѕ: Бра́тїе, премꙋ́дрость глаго́лемъ: А҆ллилꙋ́їа, гла́съ є҃: Млⷭ҇ти твоѧ̑, гдⷭ҇и, во вѣ́къ воспою̀ въ ро́дъ и҆ ро́дъ. Є҆ѵⷢ҇лїе матѳе́а, зача́ло л҃ѳ: Речѐ гдⷭ҇ь: и҆́же лю́битъ ѻ҆тца̀ и҆лѝ ма́терь: А҆по́столъ же и҆ є҆ѵⷢ҇лїе сꙋббѡ́ты рѧ́дъ под̾ зача́ло. Та́же ст҃а́гѡ, а҆́ще и҆́мать. Прича́стенъ днѐ.

Подоба́етъ вѣ́дати: А҆́ще слꙋчи́тсѧ ѿда́нїе ржⷭ҇тва̀ бцⷣы въ сꙋббѡ́тꙋ пред̾ воздви́женїемъ: Прокі́менъ, А҆ллилꙋ́їа, и҆ прича́стенъ пра́здника. А҆по́столъ, и҆ є҆ѵⷢ҇лїе пре́жде сꙋббѡ́ты пред̾ воздви́женїемъ. Та́же пра́здника. А҆ прокі́менъ сꙋббѡ́ты пред̾ воздви́женїемъ ѡ҆ставлѧ́етсѧ.

[зрѝ] Недѣ́лѧ пред̾ воздви́женїемъ. На ᲂу҆́трени чте́мъ въ толкова́нїи є҆ѵⷢ҇лїа ѿ і҆ѡа́нна: и҆ днѐ рѧ́дъ. На лїтꙋргі́и, прокі́менъ, гла́съ ѕ҃: Сп҃сѝ гдⷭ҇и лю́ди твоѧ̑: Сті́хъ: Къ тебѣ̀ гдⷭ҇и воззовꙋ̀: А҆по́столъ къ гала́тѡмъ, зача́ло сє҃і: Бра́тїе, ви́дите коли́цѣми кни́гами: А҆ллилꙋ́їа, гла́съ а҃: Вознесо́хъ и҆збра́ннаго: Є҆ѵⷢ҇лїе і҆ѡа́нна, зача́ло ѳ҃: Речѐ гдⷭ҇ь: никто́же взы́де на нб҃о: Та́же рѧ́дъ. Прича́стенъ днѐ.

ѳ҃. 🕃 Ст҃ы́хъ и҆ пра́ведныхъ бг҃оѻтє́цъ +і҆ѡакі́ма+ и҆ +а҆́нны+: И҆ ст҃а́гѡ мч҃нка +севирїа́на+.

На Гдⷭ҇и воззва́хъ, пое́мъ стїхи̑ры пра́здника г҃, гла́съ а҃, подо́бенъ: Нбⷭ҇ныхъ чинѡ́въ: І҆ѡакі́мъ и҆ а҆́нна: и҆ ст҃ы́хъ г҃, гла́съ д҃, подо́бенъ: Да́лъ є҆сѝ зна́менїе: Прїиди́те ны́нѣ: Сла́ва, и҆ ны́нѣ, гла́съ є҃, самогла́сенъ: ѽ бл҃же́ннаѧ дво́ице: А҆́ще ли слꙋчи́тсѧ въ пѧто́къ ве́чера: Сла́ва, пра́здника: И҆ ны́нѣ, бг҃оро́диченъ пе́рвый настоѧ́щагѡ гла́са. На стїхо́внѣ, стїхи̑ры пра́здника: гла́съ в҃, подо́бенъ: Є҆гда̀ ѿ дре́ва: А҆́нна бг҃омꙋ́дреннаѧ: съ припѣ́вы. Сла́ва, и҆ ны́нѣ, пра́здника, гла́съ и҃, самогла́сенъ: И҆́же и҆з̾ непло́дныхъ ложе́снъ.

Тропа́рь ст҃ы́хъ, гла́съ в҃: Пра́ведныхъ твои́хъ гдⷭ҇и па́мѧть пра́зднꙋюще, тѣ́ми мо́лимъ тѧ̀, сп҃сѝ дꙋ́шы на́шѧ.

И҆лѝ се́й, гла́съ а҃: И҆̀же въ зако́ннѣй бл҃года́ти пра́ведни бы́вше, млⷣнца бг҃ода́ннаго породи́ша на́мъ, і҆ѡакі́мъ и҆ а҆́нна. тѣ́мже дне́сь свѣ́тлѡ торжествꙋ́етъ, ве́селѡ пра́зднꙋющи бж҃е́ственнаѧ цр҃ковь честнꙋ́ю ва́шꙋ па́мѧть, сла́вѧщи бг҃а, воздви́гшаго ро́гъ сп҃се́нїѧ на́мъ въ домꙋ̀ дв҃довѣ.

Сла́ва, и҆ ны́нѣ, пра́здника: Ржⷭ҇тво̀ твоѐ:

Слꙋ́жба ст҃а́гѡ севирїа́на пое́тсѧ на повече́рїи. По досто́йнѣ, и҆ по трист҃о́мъ, конда́къ пра́здника: во всѐ попра́зднство, и҆ до ѿда́нїѧ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды: Сла́ва, бг҃оѻтцє́въ: И҆ ны́нѣ, пра́здника. По каѳі́смахъ сѣда́льны пра́здника. Канѡ́нъ пра́здника в҃-гѡ гла́са со і҆рмосо́мъ на ѕ҃: и҆ ст҃ы́хъ гла́съ то́йже, на ѕ҃. По г҃-й пѣ́сни, конда́къ и҆ і҆́косъ пра́здника. И҆ сѣда́ленъ ст҃ы́хъ, гла́съ є҃: Сла́ва, и҆ ны́нѣ, то́йже. По ѕ҃-й пѣ́сни,

Конда́къ бг҃оѻтцє́въ, гла́съ в҃. Подо́бенъ: Вы́шнихъ и҆щѧ̀: Ра́дꙋетсѧ ны́нѣ а҆́нна, непло́дства разрѣши́вшисѧ соꙋ̑зъ, и҆ пита́етъ пречⷭ҇тꙋю, созыва́ющи всѧ̑ воспѣ́ти, дарова́вшаго ѿ чре́ва є҆ѧ̀ человѣ́кѡмъ є҆ди́нꙋ мт҃рь и҆ неискꙋсомꙋ́жнꙋю.

И҆ і҆́косъ: и҆ про́логъ. По ѳ҃-й пѣ́сни, Свѣти́ленъ: подо́бенъ: Посѣти́лъ ны̀: Ꙗ҆́же є҆́ѵы клѧ́твꙋ: Сла́ва, и҆ ны́нѣ: Ꙗ҆́кѡ ѿ со́лнца сл҃нце: На стїхо́внѣ стїхи̑ры пра́здника, гла́съ ѕ҃. Подо́бенъ: Тридне́венъ: съ припѣ́вы и҆́хъ. Сла́ва, и҆ ны́нѣ, пра́здника, гла́съ в҃: Дне́сь всенепоро́чнаѧ чⷭ҇таѧ: и҆ ѿпꙋ́стъ. На лїтꙋргі́и, бл҃жє́нна пра́здника, пѣ́снь а҃-ѧ в҃-гѡ гла́са, на д҃: и҆ ст҃ы́хъ пѣ́снь ѕ҃-ѧ, на д҃. По вхо́дѣ тропа́рь пра́здника: и҆ хра́ма ст҃а́гѡ: и҆ ст҃ы́хъ: Сла́ва, конда́къ ст҃ы́хъ: И҆ ны́нѣ, пра́здника. А҆́ще хра́мъ хрⷭ҇то́въ, и҆ глаго́лемъ тропа́рь, пре́жде хра́ма хрⷭ҇то́ва: и҆ пра́здника бцⷣы, и҆ хра́ма ст҃а́гѡ: и҆ ст҃ы́хъ. Та́же конда́къ хра́ма хрⷭ҇то́ва, и҆ ст҃а́гѡ. Сла́ва, конда́къ ст҃ы́хъ: И҆ ны́нѣ, пра́здника. [С]и́це по вхо́дѣ тропарѝ и҆ кондакѝ глаго́лемъ и҆ въ про́чыѧ дни̑. Прокі́менъ пра́здника и҆ до ѿда́нїѧ: пото́мъ ст҃ы́хъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те бг҃а гдⷭ҇а: А҆по́столъ къ гала́тѡмъ, зача́ло с҃і, ѿ полꙋ̀: Бра́тїе, а҆враа́мъ два̀ сы̑на и҆мѣ̀: А҆ллилꙋ́їа, гла́съ а҃: Сп҃се́нїе првⷣныхъ ѿ гдⷭ҇а: Є҆ѵⷢ҇лїе лꙋкѝ, зача́ло л҃ѕ: Речѐ гдⷭ҇ь: никто́же ᲂу҆́бѡ свѣти́льника вже́гъ: Прича́стенъ пра́здника, и҆ до ѿда́нїѧ: и҆ ст҃ы́хъ: Ра́дꙋйтесѧ:

🕃 Въ то́йже де́нь прпⷣбнагѡ ѻ҆тца̀ на́шегѡ +і҆ѡ́сифа+ волоцка́гѡ чꙋдотво́рца.

Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ є҃: Ꙗ҆́кѡ по́стникѡвъ ᲂу҆добре́нїе, и҆ ѻ҆тцє́въ красотꙋ̀, млⷭ҇ти пода́телѧ, разсꙋжде́нїѧ свѣти́льника, всѝ вѣ́рнїи соше́дшесѧ восхва́лимъ, кро́тости ᲂу҆чи́телѧ, и҆ є҆ресе́й посрами́телѧ, премꙋ́драго і҆ѡ́сифа: рѡссі́йскꙋю ѕвѣздꙋ̀, молѧ́щасѧ гдⷭ҇ꙋ, поми́ловатисѧ дꙋша́мъ на́шымъ.

Конда́къ, гла́съ и҃. Подо́бенъ: Взбра́нной: Житїѧ̀ треволнє́нїѧ, и҆ мѧте́жъ мїрскі́й, и҆ страстна́ѧ взыгра̑нїѧ въ ничто́же вмѣни́въ, пꙋсты́нный граждани́нъ показа́лсѧ є҆сѝ, мно́гихъ бы́въ наста́вникъ і҆ѡ́сифе прпⷣбне, мона́хѡвъ собра́тель, и҆ моле́бникъ вѣ́ренъ, чистоты̀ рачи́тель, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Въ то́йже де́нь ѡ҆брѣ́тенїе и҆ пренесе́нїе честны́хъ моще́й и҆́же во ст҃ы́хъ ѻ҆тца̀ на́шегѡ +ѳеодо́сїа+ а҆рхїепі́скопа черни́говскагѡ.

Тропа́рь, гла́съ д҃: Преꙋдо́бренъ во а҆рхїере́ехъ, ст҃и́телю ѳеодо́сїе, бы́лъ є҆сѝ свѣти́ло своемꙋ̀ ста́дꙋ, та́же преста́вилсѧ є҆сѝ въ вѣ̑чныѧ ѻ҆би́тєли. ᲂу҆молѝ ᲂу҆ прⷭ҇то́ла цр҃ѧ̀ сла́вы, и҆зба́витисѧ на́мъ ѿ находѧ́щихъ на ны̀ ѕѡ́лъ, и҆ сп҃сти́сѧ дꙋша́мъ на́шымъ, свѧ́те, мл҃твами твои́ми.

Конда́къ, гла́съ то́йже: Па́стырей нача́льникꙋ хрⷭ҇тꙋ̀ трꙋди́лсѧ є҆сѝ, ст҃и́телю ѳеодо́сїе, на па́жити дꙋхо́внѣй пита́ѧ словє́сныѧ твоѧ̑ ѻ҆́вцы, и҆ прїѧ́лъ є҆сѝ ѿ хрⷭ҇та̀ сп҃са цѣле́бный да́ръ, цѣли́ти ѿ не́мощи дꙋше́вныѧ и҆ тѣле́сныѧ, всѧ́каго съ вѣ́рою приходѧ́щаго къ цѣлє́бнымъ твои̑мъ моще́мъ. молѝ, свѧ́те, ѡ҆ призыва́ющихъ и҆́мѧ твоѐ, ѿ навѣ́тѡвъ вра́жїихъ сп҃сти́сѧ дꙋша́мъ на́шымъ.

і҃. Ст҃ы́хъ мꙋ́ченицъ, +минодѡ́ры+, +митродѡ́ры+ и҆ +нѷмфодѡ́ры+.

На Гдⷭ҇и воззва́хъ, стїхи̑ры пра́здника г҃: гла́съ и҃. Подо́бенъ: ѽ пресла́внагѡ чꙋдесѐ! и҆ ст҃ы́хъ г҃, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника, гла́съ в҃: Что̀ шꙋ́мъ пра́зднꙋющихъ: На стїхо́внѣ стїхи̑ры пра́здника, съ припѣ́вы и҆́хъ. Сла́ва, и҆ ны́нѣ, пра́здника гла́съ в҃: Пронарече́ннаѧ всѣ́хъ цр҃и́ца: По Ѻ҆́ч҃е на́шъ: тропа́рь пра́здника. На ᲂу҆́трени, на Бг҃ъ гдⷭ҇ь, тропа́рь пра́здника три́жды, и҆ ѻ҆бы̑чныѧ каѳі̑смы: и҆ сѣда́льны пра́здника. Канѡ́нъ пра́здника, гла́съ и҃, со і҆рмосо́мъ на и҃: и҆ мч҃нцъ, на д҃, гла́съ д҃. По г҃-й пѣ́сни,

Конда́къ мч҃нцъ, гла́съ д҃. Подо́бенъ: Вознесы́йсѧ: За трⷪ҇цꙋ терпѣли́внѡ страда́льчествовавшыѧ, многоко́зненнаго врага̀ побѣди́сте, бра́тски ѡ҆бле́кшесѧ дх҃омъ. тѣ́мже водвори́стесѧ съ пѧтьмѝ дѣ́вами въ нбⷭ҇номъ стрⷭ҇тотє́рпицы черто́зѣ, и҆ со а҆́гг҃лы всецр҃ю̀ въ весе́лїи непреста́ннѡ предстоитѐ.

И҆ сѣда́ленъ мч҃нцъ: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. По ѳ҃-й пѣ́сни, свѣти́ленъ пра́здника. На стїхо́внѣ стїхи̑ры пра́здника: Сла́ва, и҆ ны́нѣ, пра́здника, гла́съ д҃: Всемі́рнаѧ ра́дость: На лїтꙋргі́и бл҃жє́нна пра́здника: пѣ́снь д҃ и҆ є҃-ѧ, на и҃.

а҃і. Прпⷣбныѧ ма́тере на́шеѧ +ѳеодѡ́ры+ а҆леѯандрі́йскїѧ.

[Здѣ́ же пое́тсѧ слꙋ́жба и҆ сщ҃енномч҃нка +а҆ѵтоно́ма+.]

На Гдⷭ҇и воззва́хъ, стїхи̑ры прпⷣбныѧ г҃, гла́съ д҃, подо́бенъ: Ꙗ҆́кѡ до́блѧ: И҆ а҆ѵтоно́ма, г҃, гла́съ и҆ подо́бенъ то́йже: Сла́ва, и҆ ны́нѣ, пра́здника: гла́съ то́йже самогла́сенъ: А҆́гг҃ловымъ прорече́нїемъ. На стїхо́внѣ стїхи̑ры пра́здника: Сла́ва, и҆ ны́нѣ, гла́съ д҃: Непло́ды безча́днаѧ:

Тропа́рь прпⷣбныѧ, гла́съ и҃: Въ тебѣ̀ мт҃и и҆звѣ́стнѡ сп҃се́сѧ є҆́же по ѡ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй: тѣ́мже и҆ со а҆́гг҃лы сра́дꙋетсѧ, прпⷣбнаѧ ѳеодѡ́ро, дꙋ́хъ тво́й.

Сла́ва, и҆ ны́нѣ, пра́здника. На ᲂу҆́трени, на Бг҃ъ гдⷭ҇ь, тропа́рь пра́здника, два́жды: Сла́ва, ст҃ы́ѧ: И҆ ны́нѣ, пра́здника, и҆ ѻ҆бы̑чныѧ каѳі̑смы и҆ сѣда́льны пра́здника. Канѡ́нъ пра́здника, гла́съ в҃, со і҆рмосо́мъ на ѕ҃: И҆ прпⷣбныѧ, гла́съ д҃, на д҃: и҆ а҆ѵтоно́ма, гла́съ и҃, на д҃. По г҃-й пѣ́сни,

Конда́къ ст҃ы́ѧ, гла́съ в҃: Подо́бенъ: Вы́шнихъ и҆щѧ̀: Тѣ́ло твоѐ поста́ми и҆знꙋри́вши, бдѣ́нными мл҃твами творца̀ ᲂу҆моли́ла є҆сѝ ѡ҆ грѣсѣ̀ твое́мъ, ꙗ҆́кѡ да прїи́меши соверше́нное проще́нїе: и҆ прїѧ́ла є҆сѝ ѡ҆ставле́нїе, пꙋ́ть покаѧ́нїѧ показа́вши.

И҆ ст҃а́гѡ, Конда́къ, гла́съ в҃: Подо́бенъ: Вы́шнихъ и҆щѧ̀: Бж҃е́ствєннаѧ премꙋ́дре, непоро́чнѣ тайноводи́лъ є҆сѝ, же́ртва прїѧ́тнаѧ бы́лъ є҆сѝ бг҃обл҃же́нне: хрⷭ҇то́вꙋ бо пи́лъ є҆сѝ ча́шꙋ пресла́вне, свѣти́льниче всемі́рный, молѧ̀ непреста́ннѡ ѡ҆ всѣ́хъ на́съ.

И҆ сѣда́ленъ ст҃ы́ѧ. Сла́ва, мч҃нка. И҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. По ѳ҃-й пѣ́сни, свѣти́ленъ пра́здника. На стїхо́внѣ стїхи̑ры пра́здника. Сла́ва, и҆ ны́нѣ, гла́съ и҃: Въ бл҃гознамени́тый де́нь: На лїтꙋргі́и, бл҃жє́нна пра́здника, пѣ́снь з҃-ѧ и҆ и҃-ѧ, на и҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ бл҃гослови́те бг҃а: А҆по́столъ къ гала́тѡмъ, зача́ло с҃и: Пре́жде прише́ствїѧ вѣ́ры: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ: Є҆ѵⷢ҇лїе і҆ѡа́нна, зача́ло к҃и: Приведо́ша кни́жницы: Прича́стенъ, Въ па́мѧть вѣ́чнꙋю:

в҃і. Ст҃а́гѡ сщ҃енномч҃нка +а҆ѵтоно́ма+: Въ се́й де́нь ѿдае́тсѧ пра́здникъ ржⷭ҇тва̀ прест҃ы́ѧ бцⷣы, и҆ пое́тсѧ всѧ̀ слꙋ́жба пра́здника.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры пра́здника, на ѕ҃: Сла́ва, и҆ ны́нѣ, пра́здника. [А]҆́ще же въ пѧто́къ ве́чера, Сла́ва, пра́здника: И҆ ны́нѣ, догма́тїкъ настоѧ́щагѡ гла́са. Прокі́менъ днѐ, кромѣ̀ вхо́да и҆ паремі́й. и҆ а҆́бїе, Сподо́би гдⷭ҇и: Є҆ктенїа̀, И҆спо́лнимъ вече́рнюю: На стїхо́внѣ стїхи̑ры, и҆ Сла́ва, и҆ ны́нѣ, пра́здника. По Ѻ҆́ч҃е на́шъ, тропа́рь пра́здника, є҆ди́ножды: и҆ є҆ктенїа̀, и҆ ѿпꙋ́стъ. На повече́рїи, конда́къ пра́здника. Полꙋ́нощницꙋ же пое́мъ по ѻ҆бы́чаю, съ каѳі́смою и҆ тропарѝ ѻ҆бы́чными, а҆ не пра́здника. Глаго́лемъ же и҆ мл҃твꙋ, Помѧнѝ гдⷭ҇и въ наде́жди: На ᲂу҆́трени, на Бг҃ъ гдⷭ҇ь, тропа́рь пра́здника, два́жды: Сла́ва, и҆ ны́нѣ, то́йже. По каѳі́смахъ сѣда́льны пра́здника: и҆ чте́нїе, и҆ ѱало́мъ н҃. Канѡ́ны пра́здника: пе́рвый со і҆рмосо́мъ на и҃, дрꙋгі́й со і҆рмосо́мъ на ѕ҃. І҆рмосы́ же пое́мъ ѻ҆бою̀ канѡ́нѡвъ, по два́жды. Катава́сїа, Крⷭ҇тъ начерта́въ: По г҃-й пѣ́сни, сѣда́ленъ пра́здника, два́жды. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни. Чⷭ҇тнѣ́йшꙋю не пое́мъ: Но пое́мъ припѣ́вы пра́здника. На схо́дѣ катава́сїа, Та́инъ є҆сѝ: и҆ дрꙋгі́й, Снѣ́дїю дре́ва: съ припѣ́вы пра́здника. Свѣти́ленъ пра́здника, два́жды. На хвали́техъ, стїхи̑ры пра́здника, на д҃: Сла́ва, и҆ ны́нѣ, пра́здника. Славосло́вїе вели́кое. По трист҃о́мъ, тропа́рь пра́здника, є҆ди́ножды. Є҆ктєнїѝ, и҆ ѿпꙋ́стъ, и҆ и҆схожде́нїе въ притво́ръ, и҆ ча́съ а҃-й. На часѣ́хъ тропа́рь и҆ конда́къ пра́здника. На лїтꙋргі́и, бл҃жє́нна ѻ҆бою̀ канѡ́нѡвъ пѣ́снь ѳ҃-ѧ на и҃. По вхо́дѣ тропа́рь пра́здника: Сла́ва, и҆ ны́нѣ, конда́къ пра́здника. Прокі́менъ, А҆ллилꙋ́їа, и҆ прича́стенъ пра́здника. А҆по́столъ и҆ є҆ѵⷢ҇лїе днѐ, и҆ пра́здника.

🕅 Подоба́етъ вѣ́дати, а҆́ще слꙋчи́тсѧ ѿда́нїе ржⷭ҇тва̀ бцⷣы въ недѣ́лю. Въ сꙋббѡ́тꙋ на ма́лѣй вече́рни стїхи̑ры воскрⷭ҇ны, по ѻ҆бы́чаю. На стїхо́внѣ стїхи́ра воскрⷭ҇на є҆ди́на, и҆ пра́здника стїхо́вна, съ припѣ́вы свои́ми, вели́кїѧ вече́рни: Сла́ва, и҆ ны́нѣ, пра́здника. Тропа́рь воскрⷭ҇нъ: Сла́ва, и҆ ны́нѣ, пра́здника. На вели́цѣй вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ є҆ди́нъ: и҆ пра́здника ѕ҃: поє́мыѧ на са́мый пра́здникъ. Сла́ва, пра́здника: И҆ ны́нѣ, бг҃оро́диченъ пе́рвый гла́са. На лїті́и стїхи̑ры, и҆ Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва, и҆ ны́нѣ, пра́здника. На бл҃гослове́нїи хлѣ́бѡвъ тропа́рь, Бцⷣе дв҃о: два́жды: и҆ пра́здника, є҆ди́ножды. и҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны, съ бг҃оро́дичны и҆́хъ. и҆ чте́нїе въ толково́мъ є҆ѵⷢ҇лїи, недѣ́лѧ пред̾ воздви́женїемъ. Посе́мъ непоро́чны. И҆ ѵ҆пакоѝ гла́са, и҆ чте́нїе, недѣ́лѧ рѧ́дъ. Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. стїхи́ра воскрⷭ҇на, и҆ про́чее по ѻ҆бы́чаю. Канѡ́нъ воскрⷭ҇нъ со і҆рмосо́мъ на д҃, и҆ бцⷣы на в҃, и҆ пра́здника ѻ҆́ба канѡ́на на и҃. Катава́сїа, Крⷭ҇тъ начерта́въ: По г҃-й пѣ́сни, конда́къ и҆ і҆́косъ пра́здника: и҆ сѣда́ленъ пра́здника, два́жды. По ѕ҃-й пѣ́сни, конда́къ и҆ і҆́косъ воскрⷭ҇нъ, и҆ про́логъ. На ѳ҃-й пѣ́сни пое́мъ Чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны на д҃: и҆ пра́здника со сла́внымъ на д҃: припѣ́вы пра́здника. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскрⷭ҇нъ то́чїю. Є҆ктєнїѝ, и҆ ѿпꙋ́стъ, и҆ ѡ҆глаше́нїе стꙋді́тово. И҆ и҆схожде́нїе ѻ҆бы́чное въ притво́ръ, и҆ ча́съ а҃-й, и҆ коне́чный ѿпꙋ́стъ. На часѣ́хъ, тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника, и҆ воскрⷭ҇нъ, глаго́лемъ премѣнѧ́юще. На лїтꙋргі́и, бл҃жє́нна гла́са на ѕ҃: и҆ пра́здника пѣ́снь ѳ҃-ѧ, на д҃. По вхо́дѣ, тропа́рь воскрⷭ҇нъ, и҆ пра́здника. Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, и҆ є҆ѵⷢ҇лїе, недѣ́ли пред̾ воздви́женїемъ, и҆ рѧ́дъ под̾ зача́ло. Та́же бцⷣы. Прича́стенъ, Хвали́те гдⷭ҇а съ нб҃съ: дрꙋгі́й пра́здника, Ча́шꙋ сп҃се́нїѧ.

г҃і. 🕃 Па́мѧть ѡ҆бновле́нїй хра́ма ст҃а́гѡ, хрⷭ҇та̀ и҆ бг҃а на́шегѡ, воскрⷭ҇нїѧ: И҆ предпра́зднство воздви́женїѧ чⷭ҇тна́гѡ и҆ животворѧ́щагѡ крⷭ҇та̀: И҆ ст҃а́гѡ сщ҃енномч҃нка +корни́лїа+ со́тника.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры на ѕ҃: ѡ҆бновле́нїѧ, г҃, гла́съ ѕ҃, самогла́сны: и҆ ст҃а́гѡ, г҃, гла́съ д҃. Подо́бенъ: Да́лъ є҆сѝ зна́менїе: Сла́ва, ѡ҆бновле́нїѧ, гла́съ ѕ҃, самогла́сенъ: Па́мѧть ѡ҆бновле́нїй. И҆ ны́нѣ, предпра́зднства, гла́съ то́йже: Дне́сь дре́во ꙗ҆ви́сѧ: [А]҆́ще ли въ пѧто́къ ве́чера, И҆ ны́нѣ, бг҃оро́диченъ пе́рвый, настоѧ́щагѡ гла́са. Вхо́дъ. Прокі́менъ днѐ, чтє́нїѧ г҃, ѡ҆бновле́нїѧ: а҃-е, Црⷭ҇твъ тре́тїихъ: Ста̀ соломѡ́нъ: в҃-е, При́тчей: Бг҃ъ премꙋ́дростїю: г҃-е, При́тчей: Премꙋ́дрость созда̀ себѣ̀ до́мъ: и҆ є҆ктєнїѝ. На стїхо́внѣ стїхи̑ры крⷭ҇та̀, гла́съ є҃, подо́бенъ: Ра́дꙋйсѧ живоно́сный крⷭ҇те: съ припѣ́вы и҆́хъ. пе́рвый, Возноси́те гдⷭ҇а бг҃а на́шего: вторы́й, Бг҃ъ же цр҃ь на́шъ пре́жде вѣ́ка: Сла́ва, ѡ҆бновле́нїѧ, гла́съ в҃, самогла́сенъ: Ѡ҆бновле́нїе соверша́юще, И҆ ны́нѣ, предпра́зднства, гла́съ то́йже: Бж҃е́ственное сокро́вище: По трист҃о́мъ,

Тропа́рь ѡ҆бновле́нїѧ, гла́съ д҃: Ꙗ҆́коже вы́шнїѧ тве́рди бл҃голѣ́пїе, и҆ ни́жнюю споказа́лъ є҆сѝ красотꙋ̀ ст҃а́гѡ селе́нїѧ сла́вы твоеѧ̀ гдⷭ҇и, ᲂу҆твердѝ сїѐ во вѣ́къ вѣ́ка, и҆ прїимѝ на̑ша въ не́мъ непреста́ннѡ приноси̑маѧ тебѣ̀ молє́нїѧ бцⷣею, всѣ́хъ животѐ и҆ воскрⷭ҇нїе.

Сла́ва, мч҃нка, гла́съ то́йже: И҆ нра́вѡмъ прича́стникъ: пи́санъ сегѡ̀ мѣ́сѧца въ г҃-й де́нь.

И҆ ны́нѣ, предпра́зднства, гла́съ то́йже: Животворѧ́щїй крⷭ҇тъ твоеѧ̀ бл҃гости, є҆го́же дарова́лъ є҆сѝ на́мъ недостѡ́йнымъ гдⷭ҇и, тебѣ̀ прино́симъ въ мл҃твꙋ: сп҃сѝ +і҆мпера́тора+, и҆ гра́дъ тво́й молѧ́щїйсѧ, бцⷣею є҆ди́не чл҃вѣколю́бче.

И҆ ѿпꙋ́стъ. На повече́рїи, по трист҃о́мъ конда́къ ѡ҆бновле́нїѧ. На ᲂу҆́трени, на Бг҃ъ гдⷭ҇ь, тропа́рь ѡ҆бновле́нїѧ, два́жды: Сла́ва, ст҃а́гѡ: И҆ ны́нѣ, предпра́зднства: и҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ ѡ҆бновле́нїѧ, гла́съ д҃, подо́бенъ: Ско́рѡ предварѝ: Всѧ̑ просвѣтѝ: Сла́ва, и҆ ны́нѣ, то́йже: и҆ чте́нїе. По в҃-й каѳі́смѣ сѣда́ленъ, гла́съ и҆ подо́бенъ то́йже: Пра́зднственный дне́сь: Сла́ва, и҆ ны́нѣ, то́йже: и҆ чте́нїе. Канѡ́ны г҃: ѡ҆бновле́нїѧ, гла́съ д҃, со і҆рмо́сомъ на ѕ҃: и҆ предпра́зднства, гла́съ то́йже, на д҃: и҆ ст҃а́гѡ, гла́съ є҃, на д҃. Катава́сїа, Крⷭ҇тъ начерта́въ: По г҃-й пѣ́сни,

Конда́къ ѡ҆бновле́нїѧ, гла́съ д҃. Подо́бенъ: Ꙗ҆ви́лсѧ є҆сѝ: Не́бо многосвѣ́тлое цр҃ковь показа́сѧ, всѧ̑ просвѣща́ющаѧ вѣ̑рныѧ. въ не́йже стоѧ́ще зове́мъ: се́й до́мъ ᲂу҆твердѝ гдⷭ҇и.

И҆ сѣда́ленъ, гла́съ и҃. Сла́ва, ст҃а́гѡ, гла́съ д҃: И҆ ны́нѣ, предпра́зднства, гла́съ то́йже. По ѕ҃-й пѣ́сни,

Конда́къ ѡ҆бновле́нїѧ, гла́съ в҃. Подо́бенъ: Твє́рдыѧ: Ѡ҆бновле́нїѧ дх҃а въ сердца́хъ, и҆ просвѣще́нїе внꙋ́трєннимъ да́рꙋй, вѣ́рою соверша́ющымъ сщ҃є́ннаѧ ѡ҆бновлє́нїѧ хра́ма до́мꙋ твоегѡ̀, є҆мꙋ́же бл҃говоли́лъ є҆сѝ созда́тисѧ въ твоѐ бж҃е́ственное и҆́мѧ, є҆ди́не во ст҃ы́хъ прославлѧ́емый.

И҆ і҆́косъ: и҆ про́логъ. По ѳ҃-й пѣ́сни свѣти́ленъ ѡ҆бновле́нїѧ, подо́бенъ: Дх҃омъ: Ю҆́же пречⷭ҇тою кро́вїю: Сла́ва, и҆ ны́нѣ, Свѣтода́тельными: На хвали́техъ стїхи̑ры ѡ҆бновле́нїѧ на ѕ҃, гла́съ д҃, подо́бенъ: Да́лъ є҆сѝ зна́менїе: Дне́сь бж҃е́ственный и҆ сщ҃е́нный: И҆́ны стїхи̑ры, гла́съ а҃, самогла́сны: Ѡ҆бновлѧ́йсѧ, ѡ҆бновлѧ́йсѧ: Сла́ва, гла́съ г҃, Къ себѣ̀ восходѝ человѣ́че: И҆ ны́нѣ, предпра́зднства, гла́съ то́йже: хрⷭ҇тѐ бж҃е на́шъ: Славосло́вїе вели́кое. По трист҃о́мъ, тропа́рь ѡ҆бновле́нїѧ: Сла́ва, ст҃а́гѡ: И҆ ны́нѣ, крⷭ҇та̀. Є҆ктєнїѝ, и҆ ѿпꙋ́стъ, и҆ ча́съ а҃. На а҃-мъ часѣ̀, тропа́рь ѡ҆бновле́нїѧ: Сла́ва, крⷭ҇та̀: И҆ ны́нѣ, бг҃оро́диченъ часѡ́въ. Кондакѝ на часѣ́хъ премѣнѧ́юще глаго́лемъ. На лїтꙋргі́и, бл҃жє́нна ѿ канѡ́на ѡ҆бновле́нїѧ, пѣ́снь г҃-ѧ и҆ ѕ҃-ѧ. По вхо́дѣ тропа́рь ѡ҆бновле́нїѧ, и҆ крⷭ҇та̀, и҆ ст҃а́гѡ. Сла́ва, и҆ ны́нѣ, конда́къ ѡ҆бновле́нїѧ. Прокі́менъ, гла́съ д҃: До́мꙋ твоемꙋ̀ подоба́етъ ст҃ы́нѧ гдⷭ҇и въ долготꙋ̀ дні́й. Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. А҆по́столъ ко є҆вре́ємъ, зача́ло т҃з: Ст҃а̑ѧ зва̑нїѧ: А҆ллилꙋ́їа, гла́съ в҃: Ѡ҆снова̑нїѧ є҆гѡ̀ на гора́хъ ст҃ы́хъ. Сті́хъ: Пресла̑внаѧ глаго́лашасѧ ѡ҆ тебѣ̀ гра́де бж҃їй. Є҆ѵⷢ҇лїе матѳе́а, зача́ло ѯ҃з: Прїи́де і҆и҃съ во страны̑ кесарі́и фїлі́пповы: Прича́стенъ: Гдⷭ҇и возлюби́хъ бл҃голѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. А҆ллилꙋ́їа, три́жды.

[зрѝ] Вѣ́домѡ же бꙋ́ди и҆ сїѐ: А҆́ще слꙋчи́тсѧ воздви́женїе чⷭ҇тна́гѡ крⷭ҇та̀ въ недѣ́лю: Въ сꙋббѡ́тꙋ же пред̾ воздви́женїемъ, на лїтꙋргі́и: Прокі́менъ, и҆ А҆ллилꙋ́їа ѡ҆бновле́нїѧ. є҆ди́нъ. Сꙋббѡ́ты же прокі́менъ пред̾ воздви́женїемъ ѡ҆ставлѧ́етсѧ. А҆по́столъ, и҆ є҆ѵⷢ҇лїе пре́жде ѡ҆бновле́нїѧ, и҆ пото́мъ сꙋббѡ́ты пред̾ воздви́женїемъ: Прича́стенъ ѡ҆бновле́нїѧ. Рѧдовы́й же а҆по́столъ, и҆ є҆ѵⷢ҇лїе вычита́емъ напредѝ: Недѣ́ли же пред̾ воздви́женїемъ, чте́тсѧ а҆по́столъ, и҆ є҆ѵⷢ҇лїе, въ мимоше́дшꙋю недѣ́лю.

🕅 Подоба́етъ вѣ́дати: Ꙗ҆́кѡ а҆́ще слꙋчи́тсѧ ѡ҆бновле́нїе, г҃і де́нь въ недѣ́лю, ѡ҆ставлѧ́етсѧ слꙋ́жба ст҃а́гѡ корни́лїа, и҆ пое́тсѧ, є҆гда̀ разсꙋ́дитъ є҆кклисїа́рхъ. Пое́тсѧ же воскрⷭ҇на слꙋ́жба со ѡ҆бновле́нїемъ: и҆ съ предпра́зднствомъ чⷭ҇тна́гѡ крⷭ҇та̀. На ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю. Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ. На вели́цѣй вече́рни, Бл҃же́нъ мꙋ́жъ, каѳі́сма всѧ̀. На гдⷭ҇и воззва́хъ, стїхи̑ры воскрⷭ҇ны, г҃: и҆ а҆нато́лїевъ є҆ди́нъ. И҆ ѡ҆бновле́нїѧ, г҃: и҆ крⷭ҇та̀ г҃, гла́съ є҃: Подо́бенъ: Ра́дꙋйсѧ: пи́саны на стїхо́внѣ. Сла́ва, ѡ҆бновле́нїѧ: И҆ ны́нѣ, бг҃оро́диченъ а҃-й гла́са. Вхо́дъ: И҆ чтє́нїѧ г҃, ѡ҆бновле́нїѧ. На лїті́и стїхи́ра хра́ма: И҆ ѡ҆бновле́нїѧ хвали̑тныѧ. гла́съ а҃: Ѡ҆бновлѧ́йсѧ, ѡ҆бновлѧ́йсѧ: И҆ гла́са д҃-гѡ: Ѡ҆бновлѧ́етсѧ дне́сь: Гла́съ то́йже: Посредѝ землѝ возноси́ма: Сла́ва, гла́съ є҃: И҆́же въ нѣ́дрѣхъ: И҆ ны́нѣ, гла́съ ѕ҃: Дне́сь дре́во ꙗ҆ви́сѧ: На стїхо́внѣ стїхи̑ры воскрⷭ҇ны гла́са. Сла́ва, гла́съ в҃: Ѡ҆бновле́нїе соверша́юще: И҆ ны́нѣ, крⷭ҇та̀, гла́съ то́йже: Бж҃е́ственное сокро́вище: На бл҃гослове́нїи хлѣ́бѡвъ тропа́рь: Бцⷣе дв҃о, два́жды. И҆ ѡ҆бновле́нїѧ є҆ди́ножды. И҆ чте́нїе въ посла́ нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, ѡ҆бновле́нїѧ: И҆ ны́нѣ, крⷭ҇та̀. По каѳі́смахъ сѣда́льны воскрⷭ҇ны: Сла́ва, и҆ ны́нѣ, ѡ҆бновле́нїѧ. [Б]г҃оро́дичны же ѡ҆ставлѧ́ютсѧ. И҆ чте́нїе во є҆ѵⷢ҇лїи, недѣ́лѧ пред̾ воздви́женїемъ. По непоро́чныхъ ѵ҆пакоѝ: И҆ чте́мъ во є҆ѵⷢ҇лїи недѣ́лю рѧдовꙋ́ю. Степє́нны, и҆ прокі́менъ гла́са: Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: и҆ ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: бцⷣы на в҃: ѡ҆бновле́нїю на д҃: и҆ крⷭ҇та̀ на д҃. Катава́сїа: Крⷭ҇тъ начерта́въ: По г҃-й пѣ́сни, конда́къ и҆ і҆́косъ ѡ҆бновле́нїѧ: И҆ сѣда́ленъ. Сла́ва, и҆ ны́нѣ, крⷭ҇та̀: И҆ чте́нїе. По ѕ҃-й пѣ́сни, конда́къ воскрⷭ҇нъ: И҆ і҆́косъ. И҆ про́логъ. На ѳ҃-й пѣ́сни, пое́мъ Чⷭ҇тнѣ́йшꙋю. Свѣти́ленъ воскрⷭ҇нъ: Сла́ва, ѡ҆бновле́нїѧ: И҆ ны́нѣ, крⷭ҇та̀. На хвали́техъ стїхи̑ры воскрⷭ҇ны, д҃: И҆ ѡ҆бновле́нїѧ, гла́съ д҃, подо́бенъ: Да́лъ є҆сѝ зна́менїе: двѣ̀. И҆ самогла́сны двѣ̀, гла́съ г҃: Къ себѣ̀ восходѝ человѣ́че: Дрꙋгі́й, Хрⷭ҇тѐ бж҃е на́шъ: Пе́рвый припѣ́въ: До́мꙋ твоемꙋ̀ подоба́етъ ст҃ы́нѧ гдⷭ҇и въ долготꙋ̀ дні́й. Дрꙋгі́й: Гдⷭ҇ь воцр҃и́сѧ, въ лѣ́потꙋ ѡ҆блече́сѧ: Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ бцⷣе дв҃о: Славосло́вїе вели́кое. Тропа́рь воскрⷭ҇нъ: И҆ є҆ктєнїѝ. И҆ ѿпꙋ́стъ: И҆ ѡ҆глаше́нїе. И҆ ѻ҆бы́чное и҆схожде́нїе въ притво́ръ. И҆ ча́съ а҃-й. На часѣ́хъ, тропа́рь воскрⷭ҇нъ. Сла́ва, ѡ҆бновле́нїѧ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ, и҆ ѡ҆бновле́нїѧ, премѣнѧ́юще глаго́лемъ. На лїтꙋргі́и бл҃жє́нна воскрⷭ҇на гла́са, на ѕ҃: И҆ ѡ҆бновле́нїѧ, пѣ́снь г҃-ѧ, на д҃. По вхо́дѣ, тропа́рь воскрⷭ҇нъ, и҆ ѡ҆бновле́нїѧ и҆ крⷭ҇та̀. Конда́къ воскрⷭ҇нъ: Сла́ва, и҆ ны́нѣ, ѡ҆бновле́нїѧ. Прокі́менъ, а҆по́столъ, А҆ллилꙋ́їа, и҆ є҆ѵⷢ҇лїе пре́жде недѣ́ли пред̾ воздви́женїемъ: И҆ рѧ́дъ под̾ зача́ло: та́же ѡ҆бновле́нїѧ. Прича́стенъ, Хвали́те гдⷭ҇а съ нб҃съ: И҆ ѡ҆бновле́нїѧ.

д҃і. 🕀 Всемі́рное воздви́женїе чⷭ҇тна́гѡ и҆ животворѧ́щагѡ крⷭ҇та̀:

И҆ ᲂу҆спе́нїе во ст҃ы́хъ ѻ҆тца̀ на́шегѡ +і҆ѡа́нна+, а҆рхїепⷭ҇кпа кѡнстанті́нѧ гра́да, златоꙋ́стагѡ.

[зрѝ] Вѣ́домо же бꙋ́ди, ꙗ҆́кѡ златоꙋ́стагѡ вослѣ́дованїе въ се́й пресвѣ́тлый де́нь, въ кѡнстанті́нѣ гра́дѣ, и҆ повсю́дꙋ не пое́тсѧ, воздви́женїѧ ра́ди чⷭ҇тна́гѡ крⷭ҇та̀, гдⷭ҇ьскагѡ пра́здника: и҆ преложи́сѧ въ г҃і де́нь ное́мврїа мѣ́сѧца.

Во вре́мѧ же ве́чера, кандиловжига́тель, по бл҃гослове́нїю ᲂу҆дарѧ́етъ въ кампа́нъ. І҆ере́й же вхо́дитъ въ сосꙋдохрани́тельницꙋ, и҆ полага́етъ чⷭ҇тны́й крⷭ҇тъ, со бл҃гово́нными васїлькѝ на же́ртвенникъ, на ми́сѣ, и҆ пое́мъ, На ма́лѣй вече́рни, на Гдⷭ҇и воззва́хъ, стїхи̑ры пра́здника на д҃, гла́съ а҃. Подо́бенъ: Нбⷭ҇ныхъ чинѡ́въ: Крⷭ҇тъ возно́ситсѧ: Сла́ва, и҆ ны́нѣ, гла́съ ѕ҃, самогла́сенъ: Дне́сь са́дъ: Та́же, Свѣ́те ти́хїй: Прокі́менъ днѐ. И҆ Сподо́би гдⷭ҇и: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Съ припѣ́вы и҆́хъ: Водо́ю бг҃отво́рною: Припѣ́вы: а҃-й, Возноси́те гдⷭ҇а бг҃а на́шего: в҃-й, Бг҃ъ же цр҃ь на́шъ пре́жде вѣ́ка: Сла́ва, и҆ ны́нѣ, гла́съ ѕ҃, самогла́сенъ: Дне́сь дре́во ꙗ҆ви́сѧ: Ны́нѣ ѿпꙋща́еши: Трист҃о́е, и҆ по Ѻ҆́ч҃е на́шъ:

Тропа́рь пра́здника, гла́съ а҃: Сп҃сѝ гдⷭ҇и лю́ди твоѧ̑ и҆ бл҃гословѝ достоѧ́нїе твоѐ, побѣ̑ды бл҃говѣ́рномꙋ +і҆мпера́торꙋ+ на́шемꙋ, нїкола́ю а҆леѯа́ндровичꙋ, на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Є҆ктенїа̀ ма́лаѧ: И҆ ѿпꙋ́стъ. По ѿпꙋще́нїи же ма́лыѧ вече́рни, вхо́дитъ є҆кклисїа́рхъ со і҆ере́емъ и҆ дїа́кономъ и҆ параекклисїа́рхомъ въ же́ртвенникъ, со свѣща́ми, и҆ ѡ҆блачи́тсѧ і҆ере́й и҆ дїа́конъ: и҆ кади́въ чⷭ҇тны́й крⷭ҇тъ, глаго́летъ: Бл҃гословѝ влады́ко. І҆ере́й: Бл҃гослове́нъ бг҃ъ на́шъ: Та́же, Трист҃о́е: и҆ по Ѻ҆́ч҃е на́шъ, тропа́рь крⷭ҇та̀: Сп҃сѝ гдⷭ҇и лю́ди твоѧ̑: Сла́ва и҆ ны́нѣ:

Конда́къ, гла́съ д҃: Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй хрⷭ҇тѐ бж҃е: возвеселѝ си́лою твое́ю бл҃говѣ́рнаго +і҆мпера́тора+ на́шего, +нїкола́ѧ а҆леѯа́ндровича+, побѣ̑ды даѧ̀ є҆мꙋ̀ на сꙋпоста́ты, посо́бїе и҆мꙋ́щꙋ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

И҆ взима́етъ і҆ере́й чⷭ҇тны́й крⷭ҇тъ со блю́домъ на главꙋ̀, и҆ вно́ситъ є҆го̀ во ст҃ы́й ѻ҆лта́рь, пред̾идꙋ́щымъ же пред̾ ни́мъ со двѣма̀ лампа́дама: И҆ полага́етъ чⷭ҇тны́й крⷭ҇тъ на ст҃о́й трапе́зѣ на є҆ѵⷢ҇льскомъ мѣ́стѣ: а҆ є҆ѵⷢ҇лїе поставлѧ́етъ на го́рнее мѣ́сто, и҆ вжига́ютъ пред̾ ни́мъ свѣщꙋ̀ на всю̀ но́щь.

[зрѝ] Подоба́етъ вѣ́дати: Ꙗ҆́кѡ а҆́ще слꙋчи́тсѧ пра́здникъ се́й въ недѣ́лю, ничто́же пое́тсѧ воскрⷭ҇но: ни стїхи̑ры воскрⷭ҇ны, нижѐ непоро́чны, ни степє́нна гла́са, ни є҆ѵⷢ҇лїе воскрⷭ҇ное чте́тсѧ: То́чїю, Воскрⷭ҇нїе хрⷭ҇то́во, глаго́лемъ: и҆ Ст҃ъ гдⷭ҇ь бг҃ъ: не пое́тсѧ же, но всю̀ слꙋ́жбꙋ пое́мъ пра́здника. На вели́цѣй вече́рни: А҆́ще въ сꙋббѡ́тꙋ ве́чера пое́мъ, Бл҃же́нъ мꙋ́жъ, каѳі́смꙋ всю̀. А҆́ще же въ недѣ́лю ве́чера, пое́мъ, Бл҃же́нъ мꙋ́жъ, а҃-й а҆нтїфѡ́нъ. А҆́ще же и҆́нъ де́нь, стїхоло́гїа не быва́етъ: но по ѻ҆бы́чномъ ѱалмѣ̀ пое́мъ, Гдⷭ҇и воззва́хъ, на гла́съ ѕ҃. И҆ пое́мъ стїхи̑ры пра́здника, на и҃, гла́съ ѕ҃. Подо́бенъ: Всю̀ ѿложи́вше: Крⷭ҇тъ воздвиза́емь: Сла́ва, и҆ ны́нѣ, гла́съ в҃: Прїиди́те всѝ ꙗ҆зы́цы: Та́же вхо́дъ. Прокі́менъ днѐ, [А]҆́ще слꙋчи́тсѧ пра́здникъ се́й въ сꙋббѡ́тꙋ, въ пѧто́къ ве́чера, прокі́менъ днѐ ѡ҆ставлѧ́етсѧ: и҆ пое́тсѧ прокі́менъ вели́кїй, гла́съ з҃: Бг҃ъ на́шъ на нб҃сѝ и҆ на землѝ: поне́же въ сꙋббѡ́тꙋ ве́чера пое́тсѧ прокі́менъ, Гдⷭ҇ь воцр҃и́сѧ: Чтє́нїѧ г҃: а҃-е И҆схо́да. Поѧ́тъ мѡѷсе́й сы́ны і҆и҃левы: в҃-е, При́тчей: Сы́не не пренебрега́й: г҃-е, Прⷪ҇ро́чества и҆са́їина: Сїѧ̑ глаго́летъ гдⷭ҇ь: ѿве́рзꙋтсѧ врата̀: И҆ посе́мъ є҆ктенїа̀: Рце́мъ всѝ: и҆ Сподо́би гдⷭ҇и: и҆ И҆спо́лнимъ вече́рнюю мл҃твꙋ: На лїті́и стїхи̑ры самогла́сны, гла́съ а҃: Дне́сь ꙗ҆́кѡ вои́стиннꙋ: Сла́ва, и҆ ны́нѣ, гла́съ д҃: Чⷭ҇тна́гѡ крⷭ҇та̀ хрⷭ҇тѐ: И҆ ѻ҆бы̑чныѧ мл҃твы бдѣ́нїѧ. На стїхо́внѣ стїхи̑ры пра́здника, гла́съ є҃. Самоподо́бенъ: Ра́дꙋйсѧ живоно́сный крⷭ҇те: съ припѣ́вы и҆́хъ, пи́саны на ма́лѣй вече́рни. Сла́ва, и҆ ны́нѣ, гла́съ и҃. Є҆го́же дре́вле мѡѷсе́й: Та́же, Ны́нѣ ѿпꙋща́еши: и҆ трист҃о́е. По Ѻ҆́ч҃е на́шъ, тропа́рь крⷭ҇та̀, гла́съ а҃: Сп҃сѝ гдⷭ҇и лю́ди твоѧ̑: три́жды, пи́санъ на ма́лѣй вече́рни. И҆ ѻ҆бы́чное бл҃гослове́нїе хлѣ́бѡвъ, и҆ раздаѧ́нїе и҆́хъ: и҆ Бꙋ́ди и҆́мѧ гдⷭ҇не, три́жды съ пѣ́нїемъ. и҆ ѱало́мъ л҃г: Бл҃гословлю̀ гдⷭ҇а: И҆ чте́мъ сло́во ѡ҆ честно́мъ дре́вѣ. На ᲂу҆́трени, на Бг҃ъ гдⷭ҇ь, тропа́рь пра́здника три́жды: И҆ ѻ҆бы̑чныѧ каѳі̑смы. По каѳі́смахъ сѣда́льны, и҆ чтє́нїѧ пра́здника. По чте́нїи же даю́тсѧ свѣщы̀ бра́тїи. Та́же полѷеле́й: И҆ сѣда́ленъ пра́здника: И҆ чте́нїе пра́здника. Степє́нна, а҃ и҆ а҆нтїфѡ́нъ д҃-гѡ гла́са. Прокі́менъ, гла́съ д҃: Ви́дѣша всѝ концы̀ землѝ сп҃се́нїе бг҃а на́шегѡ. Сті́хъ: Воспо́йте гдⷭ҇еви пѣ́снь но́вꙋ. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀. Є҆ѵⷢ҇лїе і҆ѡа́нна, зача́ло м҃в ѿ полꙋ̀: Речѐ гдⷭ҇ь: ѻ҆́ч҃е, просла́ви и҆́мѧ твоѐ: Та́же Воскрⷭ҇нїе хрⷭ҇то́во: и҆ ѱало́мъ н҃. Сла́ва, Мл҃твами а҆пⷭ҇лѡвъ: И҆ ны́нѣ, Мл҃твами бцⷣы: Посе́мъ стїхи́ра, гла́съ ѕ҃: Крⷭ҇те хрⷭ҇то́въ: И҆ мл҃тва, Сп҃сѝ, бж҃е, лю́ди твоѧ̑: и҆ Гдⷭ҇и поми́лꙋй, в҃і. Та́же і҆ере́й: Млⷭ҇тїю и҆ щедро́тами: Канѡ́нъ, гла́съ и҃: творе́нїе кѵ́ръ космы̀. і҆рмо́съ, Крⷭ҇тъ начерта́въ: по два́жды. Тропарѝ на в҃і: И҆ послѣдѝ і҆рмо́съ, ѻ҆́ба ли̑ка вкꙋ́пѣ: Крⷭ҇тъ начерта́въ: По г҃-й пѣ́сни сѣда́ленъ крⷭ҇та̀, гла́съ д҃: Въ тебѣ̀ требл҃же́нне: Сла́ва, и҆ ны́нѣ, то́йже. И҆ чте́нїе пра́здника. По ѕ҃-й пѣ́сни, конда́къ крⷭ҇та̀, гла́съ д҃: Вознесы́йсѧ на крⷭ҇тъ во́лею: пи́санъ по́слѣ ма́лыѧ вече́рни. И҆ і҆́косъ: И҆ чте́мъ про́логъ. На ѳ҃-й пѣ́сни вжига́ютъ па́ки свѣщы̀ бра́тїѧ. Чⷭ҇тнѣ́йшꙋю не пое́мъ, но пое́мъ припѣ́въ пра́здника: Велича́й дꙋшѐ моѧ̀: Та́же і҆рмо́съ а҃-гѡ канѡ́на: Та́инъ є҆сѝ бцⷣе: И҆ дрꙋгі́й ли́къ подо́бнѣ припѣ́въ, и҆ і҆рмо́съ: и҆ къ про́чымъ стїха́мъ то́йже припѣ́въ пое́мъ. Та́же пое́мъ и҆ вторы́й припѣ́въ: Велича́й дꙋшѐ моѧ̀: И҆ і҆рмо́съ: Снѣ́дїю дре́ва: И҆ дрꙋгі́й ли́къ, подо́бнѣ припѣ́въ, и҆ і҆рмо́съ. Тропарѝ ѻ҆бою̀ канѡ́нѡвъ на в҃і. Катава́сїа: Та́инъ є҆сѝ бцⷣе ра́й: Посе́мъ дрꙋгі́й, Снѣ́дїю дре́ва: съ припѣ́вомъ. И҆ покло́нъ: По ѳ҃-й пѣ́сни свѣти́ленъ пра́здника, подо́бенъ: Оу҆ч҃нкѡ́мъ: Крⷭ҇тъ храни́тель: два́жды. Сла́ва и҆ ны́нѣ, подо́бенъ: Жєны̀ ᲂу҆слы́шите: Крⷭ҇тъ воздвиза́етсѧ: На хвали́техъ стїхи̑ры, на д҃, гла́съ и҃, самоподо́бенъ: ѽ пресла́внагѡ чꙋдесѐ! Сла́ва, и҆ ны́нѣ, гла́съ ѕ҃, самогла́сенъ: Дне́сь происхо́дитъ крⷭ҇тъ гдⷭ҇нь: Та́же, Славосло́вїе вели́кое. Пое́мꙋ же вели́комꙋ славосло́вїю, ѡ҆блачи́тсѧ настоѧ́тель во всю̀ сщ҃е́ннꙋю ѻ҆де́ждꙋ, и҆ прїе́млетъ кади́льницꙋ съ ѳѷмїа́момъ, и҆ прихо́дитъ ко ст҃ѣ́й трапе́зѣ, и҆ кади́тъ чⷭ҇тны́й крⷭ҇тъ крестоѡбра́знѡ, и҆ взима́етъ є҆го̀ на главꙋ̀, и҆ и҆схо́дитъ сѣ́верными две́рьми, пред̾идꙋ́щымъ є҆мꙋ̀ со двѣма̀ лампа́дами да́же до црⷭ҇кихъ вра́тъ, и҆ та́мѡ ста́въ ѡ҆жида́етъ конца̀ славосло́вїѧ и҆ трист҃а́гѡ. Семꙋ́ же сконча́нꙋ, возглаша́етъ настоѧ́тель велегла́снѡ: Премꙋ́дрость, про́сти. Мы́ же начина́емъ тропа́рь: Сп҃сѝ гдⷭ҇и лю́ди твоѧ̑: три́жды. И҆ прихо́дитъ настоѧ́тель, носѧ̀ на главѣ̀ чⷭ҇тны́й крⷭ҇тъ до среды̀ цр҃кве пред̾ ст҃ы̑ѧ црⷭ҇кїѧ двє́ри: та́мѡ ᲂу҆́бѡ ᲂу҆гото́ванꙋ а҆нало́гїю, полага́етъ верхꙋ̀ є҆гѡ̀ чⷭ҇тны́й крⷭ҇тъ, и҆ кади́тъ крестоѡбра́знѡ. Та́же твори́тъ покло́ны трѝ до землѝ, въ ко́йлибо бꙋ́ди де́нь, и҆ взе́мъ чⷭ҇тны́й крⷭ҇тъ со бл҃гово́нными васїлька́ми, на подно́жїи крⷭ҇та̀ ѡ҆бложе́нными, ста́нетъ пред̾ а҆нало́гїемъ зрѧ̀ къ восто́кѡмъ. И҆ дїа́конъ возглаша́етъ велегла́снѡ во ᲂу҆слы́шанїе всѣ́хъ: Поми́лꙋй на́съ, бж҃е, по вели́цѣй млⷭ҇ти твое́й, мо́лимсѧ тебѣ̀, ᲂу҆слы́ши на́съ, гдⷭ҇и, и҆ поми́лꙋй, рце́мъ всѝ. И҆ начина́емъ пе́рвꙋю со́тницꙋ, Гдⷭ҇и поми́лꙋй, н҃: зна́менающꙋ настоѧ́телю въ нача́лѣ чⷭ҇тны́мъ крⷭ҇то́мъ, три́жды. Та́же преклонѧ́етъ главꙋ̀, є҆ли́кѡ пѧ́дїю ѿстоѧ́ти главѣ̀ ѿ землѝ, и҆ пома́лꙋ воздвиза́етсѧ горѣ̀ да́же до сконча́нїѧ втора́гѡ, н҃, Гдⷭ҇и поми́лꙋй. Є҆гда́ же доспѣ́етъ до ч҃з, Гдⷭ҇и поми́лꙋй, возвыша́етъ гла́съ сво́й є҆кклисїа́рхъ, настоѧ́тель же прѧ́мѡ стоѧ̀, и҆ конца̀ со́тницы ѡ҆жида́ѧ, зна́менꙋетъ крⷭ҇то́мъ па́ки три́жды. Та́же ѡ҆браща́етсѧ къ за́паднѣй странѣ̀. И҆ глаго́летъ дїа́конъ: Є҆щѐ мо́лимсѧ ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ, +і҆мпера́торѣ нїкола́ѣ а҆леѯа́ндровичѣ+ всеѧ̀ рѡссі́и, ѡ҆ держа́вѣ, побѣ́дѣ, пребыва́нїи, ми́рѣ, здра́вїи, сп҃се́нїи є҆гѡ̀ и҆ гдⷭ҇ꙋ бг҃ꙋ на́шемꙋ наипа́че поспѣши́ти и҆ пособи́ти є҆мꙋ̀ во все́мъ, и҆ покори́ти под̾ но́зѣ є҆гѡ̀ всѧ́каго врага̀ и҆ сꙋпоста́та. Є҆щѐ мо́лимсѧ ѡ҆ сꙋпрꙋ́гѣ є҆гѡ̀, бл҃гочести́вѣйшей гдⷭ҇рнѣ, +і҆мператрі́цѣ а҆леѯа́ндрѣ ѳео́дѡровнѣ+. Є҆щѐ мо́лимсѧ ѡ҆ ма́тери є҆гѡ̀, бл҃гочести́вѣйшей гдⷭ҇рнѣ, +і҆мператрі́цѣ марі́и ѳео́дѡровнѣ+. Є҆щѐ мо́лимсѧ ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ +а҆леѯі́и нїкола́евичѣ+, и҆ ѡ҆ все́мъ ца́рствꙋющемъ до́мѣ, рце́мъ всѝ. И҆ начина́емъ вторꙋ́ю со́тницꙋ, Гдⷭ҇и поми́лꙋй. И҆ твори́тъ настоѧ́тель второ́е воздви́женїе, ꙗ҆́коже преднаписа́сѧ. Та́же ѡ҆браща́етсѧ къ полꙋ́денной странѣ̀. И҆ глаго́летъ дїа́конъ: Є҆щѐ мо́лимсѧ ѡ҆ ѡ҆ставле́нїи грѣхѡ́въ ст҃ѣ́йшагѡ прави́тельствꙋющагѡ сѷно́да, и҆ всегѡ̀ ѡ҆ хрⷭ҇тѣ̀ бра́тства на́шегѡ, ѡ҆ здра́вїи и҆ ѡ҆ сп҃се́нїи, рце́мъ всѝ. И҆ начина́емъ тре́тїю со́тницꙋ, Гдⷭ҇и поми́лꙋй. Скончава́емѣй же то́й, ѡ҆браща́етсѧ настоѧ́тель къ сѣ́верной странѣ̀. И҆ глаго́летъ дїа́конъ: Є҆щѐ мо́лимсѧ ѡ҆ всѧ́кой дꙋшѝ хрїстїа́нстѣй, скорбѧ́щей же и҆ ѡ҆ѕло́бленнѣй, здра́вїѧ, сп҃се́нїѧ, и҆ ѡ҆ставле́нїѧ грѣхѡ́въ тре́бꙋющей, рце́мъ всѝ. И҆ быва́етъ д҃ воздви́женїе: И҆ ѡ҆браща́етсѧ настоѧ́тель къ восто́кѡмъ. И҆ глаго́летъ дїа́конъ: Є҆щѐ мо́лимсѧ ѡ҆ всѣ́хъ слꙋжа́щихъ и҆ послꙋжи́вшихъ во ст҃ѣ́й ѻ҆би́тели се́й и҆лѝ хра́мѣ се́мъ, ѻ҆тє́цъ и҆ бра́тїй на́шихъ, ѡ҆ здра́вїи и҆ ѡ҆ сп҃се́нїи, и҆ ѡ҆ставле́нїи грѣхѡ́въ и҆́хъ, рце́мъ всѝ. И҆ начина́емъ пѧ́тꙋю со́тницꙋ. По пѧ́томъ же воздви́женїи, пое́мъ: Сла́ва, и҆ ны́нѣ, конда́къ: Вознесы́йсѧ на крⷭ҇тъ во́лею: Пое́мꙋ же семꙋ̀, полага́етъ настоѧ́тель чⷭ҇тно́е дре́во крⷭ҇та̀ на а҆нало́гїи, и҆ пое́тъ тропа́рь се́й во гла́съ ѕ҃: Крⷭ҇тꙋ̀ твоемꙋ̀ покланѧ́емсѧ влⷣко, и҆ ст҃о́е воскрⷭ҇нїе твоѐ сла́вимъ. три́жды. Пою́щымъ же и҆ бра́тїѧмъ то́йже тропа́рь начина́етъ кла́нѧтисѧ настоѧ́тель, и҆ твори́тъ мета̑нїѧ два̀ пред̾ чⷭ҇тны́мъ крⷭ҇то́мъ, та́же цѣлꙋ́етъ є҆го̀. По цѣлова́нїи же твори́тъ па́ки є҆ди́но мета́нїе, та́кожде и҆ на ѻ҆́ба ли̑ка но є҆ди́номꙋ мета́нїю. Посе́мъ прихо́дѧтъ бра́тїѧ всѧ̑ ѿ десны́ѧ и҆ лѣ́выѧ страны̀ два̀ два̀, по чи́нꙋ покланѧ́ютсѧ, и҆ цѣлꙋ́ютъ чⷭ҇тны́й крⷭ҇тъ. Пое́мъ же и҆ стїхи̑ры самогла́сны, до́ндеже соверши́тсѧ цѣлова́нїе. Стїхи̑ры крⷭ҇та̀, гла́съ в҃: Прїиди́те вѣ́рнїи: Гла́съ є҃: Прїиди́те лю́дїе, пресла́вное чꙋ́до ви́дѧще: Гла́съ то́йже, Гла́съ прⷪ҇рѡ́къ твои́хъ: Гла́съ ѕ҃, Четвероконе́чный мі́ръ: Прⷪ҇ро́кѡвъ гла́си: Гла́съ и҃, Гла́съ прⷪ҇ро́ка твоегѡ̀ мѡѷсе́а, бж҃е: Дне́сь влⷣка тва́ри: Сла́ва, и҆ ны́нѣ: Дне́сь неприкоснове́нный сꙋщество́мъ: И҆ по сконча́нїи цѣлова́нїѧ чⷭ҇тна́гѡ крⷭ҇та̀, поставлѧ́етсѧ а҆нало́гїй, съ чⷭ҇тны́мъ крⷭ҇то́мъ, ѡ҆ деснꙋ́ю странꙋ̀ ца́рскихъ двере́й, и҆ та́мѡ стои́тъ, до́ндеже пра́здникъ ѿда́стсѧ. [зрѝ] А҆́ще ли же не въ собо́рныхъ хра́мѣхъ, и҆ воздви́женїе крⷭ҇та̀ не быва́етъ, то́чїю поклоне́нїе крⷭ҇тꙋ̀, ꙗ҆́коже ᲂу҆ка́зано въ недѣ́лю г҃-ю ст҃ы́хъ постѡ́въ. Посе́мъ вхо́дитъ і҆ере́й во ст҃ы́й ѻ҆лта́рь, и҆ дїа́конъ глаго́летъ є҆ктенїю̀: Поми́лꙋй на́съ бж҃е: І҆ере́й возгла́съ: Ꙗ҆́кѡ млⷭ҇тивъ и҆ чл҃вѣколю́бецъ: Та́же дїа́конъ: И҆спо́лнимъ ᲂу҆́треннюю мл҃твꙋ на́шꙋ: І҆ере́й же возгла́съ: Твое́ бо є҆́сть, є҆́же ми́ловати: По а҆ми́нѣ, Премꙋ́дрость. Ли́къ: Бл҃гословѝ. І҆ере́й, Сы́й бл҃гослове́нъ: Ли́къ, Оу҆твердѝ бж҃е: І҆ере́й, Прест҃а́ѧ бцⷣе: Кли́рїцы, Чⷭ҇тнѣ́йшꙋю: И҆ ѿпꙋ́стъ. И҆ ча́съ а҃-й. На а҃-мъ часѣ̀ тропа́рь пра́здника. По Ѻ҆́ч҃е на́шъ: конда́къ пра́здника же: И҆ соверше́нный ѿпꙋ́стъ.

На лїтꙋргі́и а҆нтїфѡ́нъ а҃-й, гла́съ в҃, ѱало́мъ к҃а: Бж҃е бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; Мл҃твами бцⷣы бцⷣы, сп҃се сп҃сѝ на́съ. И҆ па́ки дрꙋгі́й ли́къ, в҃-й сті́хъ: Дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ. Мл҃твами бцⷣы, сп҃се, сп҃сѝ на́съ. И҆ па́ки а҃-й ли́къ, сті́хъ г҃: Бж҃е мо́й, воззовꙋ̀ во днѝ, и҆ не ᲂу҆слы́шиши, и҆ въ нощѝ, и҆ не въ безꙋ́мїе мнѣ̀. Мл҃твами бцⷣы: Та́же в҃-й ли́къ, сті́хъ д҃: Ты́ же во ст҃ѣ́мъ живе́ши, хвало̀ і҆и҃лева. Мл҃твами бцⷣы: Сла́ва, и҆ ны́нѣ: Мл҃твами бцⷣы: А҆нтїфѡ́нъ в҃, гла́съ в҃, ѱало́мъ ѻ҃г: Вскꙋ́ю, бж҃е, ѿри́нꙋлъ ны̀ є҆сѝ до конца̀; Сп҃си́ ны сн҃е бж҃їй, пло́тїю распны́йсѧ, пою́щыѧ тѝ: а҆ллилꙋ́їа. Дрꙋгі́й ли́къ, сті́хъ в҃-й: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сп҃си́ ны сн҃е бж҃їй, пло́тїю распны́йсѧ, пою́щыѧ тѝ: Сті́хъ г҃-й: Гора̀ сїѡ́нъ сїѧ̀, въ не́йже всели́лсѧ є҆сѝ. Сп҃си́ ны сн҃е бж҃їй: Сті́хъ д҃: Бг҃ъ же цр҃ь на́шъ, пре́жде вѣ́ка содѣ́ла сп҃се́нїе посредѣ̀ землѝ. Сп҃си́ ны сн҃е бж҃їй: Сла́ва, и҆ ны́нѣ: Є҆диноро́дный сн҃е: ѻ҆́ба ли̑ка вкꙋ́пѣ. А҆нтїфѡ́нъ г҃-й, гла́съ а҃, ѱало́мъ ч҃и: Гдⷭ҇ь воцр҃и́сѧ, да гнѣ́ваютсѧ лю́дїе. Та́же тропа́рь: Сп҃сѝ гдⷭ҇и лю́ди твоѧ̑: ве́сь до конца̀. Дрꙋгі́й ли́къ, то́йже сті́хъ: Гдⷭ҇ь воцр҃и́сѧ, да гнѣ́ваютсѧ лю́дїе, сѣдѧ́й на херꙋві́мѣхъ, да подви́житсѧ землѧ̀. Тропа́рь: Сп҃сѝ гдⷭ҇и лю́ди твоѧ̑: И҆ па́ки пе́рвый ли́къ, сті́хъ г҃: Гдⷭ҇ь въ сїѡ́нѣ вели́къ и҆ высо́къ є҆́сть над̾ всѣ́ми людьмѝ. Тропа́рь: Сп҃сѝ гдⷭ҇и лю́ди твоѧ̑: Дрꙋгі́й ли́къ, сті́хъ д҃: Поклони́тесѧ гдⷭ҇еви во дворѣ̀ ст҃ѣ́мъ є҆гѡ̀: тропа́рь: сп҃сѝ гдⷭ҇и лю́ди твоѧ̑: Та́же вхо́дъ. Дїа́конъ рече́тъ: Премꙋ́дрость, про́сти. Мы́ же вхо́дное: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть. Та́же тропа́рь: Сп҃сѝ гдⷭ҇и лю́ди твоѧ̑: Сла́ва, и҆ ны́нѣ, конда́къ: Вознесы́йсѧ на крⷭ҇тъ: Вмѣ́стѡ трист҃а́гѡ пое́мъ: Крⷭ҇тꙋ̀ твоемꙋ̀ покланѧ́емсѧ, влⷣко, и҆ ст҃о́е воскрⷭ҇нїе твоѐ сла́вимъ. Прокі́менъ, гла́съ з҃: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть. Сті́хъ: Гдⷭ҇ь воцр҃и́сѧ, да гнѣ́ваютсѧ лю́дїе. А҆по́столъ къ корі́нѳѧнѡмъ, зача́ло рк҃є: Сло́во крⷭ҇тное: Коне́цъ: хрⷭ҇та̀ бж҃їю си́лꙋ, и҆ бж҃їю премꙋ́дрость. А҆ллилꙋ́їа, гла́съ а҃: Помѧнѝ со́нмъ тво́й, є҆го́же стѧжа́лъ є҆сѝ и҆спе́рва. Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ. Є҆ѵⷢ҇лїе ѿ і҆ѡа́нна, зача́ло ѯ҃: Во вре́мѧ ѻ҆́но, совѣ́тъ сотвори́ша а҆рхїере́и: Прича́стенъ: Зна́менасѧ на на́съ свѣ́тъ лица̀ твоегѡ̀ гдⷭ҇и. На трапе́зѣ же быва́етъ ᲂу҆тѣше́нїе бра́тїи, ѡ҆ є҆ле́а и҆ вїна̀, и҆ про́чихъ снѣ́дей ѻ҆во́щныхъ. Сы́ра же и҆ ꙗ҆и́цъ и҆ ры́бы, ника́коже де́рзнемъ коснꙋ́тисѧ.

є҃і. 🕃 Ст҃а́гѡ великомч҃нка +нїки́ты+.

Ве́черъ каѳі́смы не глаго́лемъ, трꙋда̀ ра́ди бдѣ́ннагѡ. На Гдⷭ҇и воззва́хъ, стїхи̑ры пра́здника, г҃, гла́съ є҃: Подо́бенъ: Ра́дꙋйсѧ живоно́сный крⷭ҇те: И҆ ст҃а́гѡ г҃, гла́съ а҃. Подо́бенъ, Нбⷭ҇ныхъ чинѡ́въ: Сла́ва, ст҃а́гѡ, гла́съ ѕ҃: Свѣти́льника мч҃нкѡвъ тѧ̀: И҆ ны́нѣ, пра́здника, гла́съ то́йже: Прⷪ҇ро́кѡвъ гла́си: Вхо́дъ. Прокі́менъ, гла́съ з҃: Бг҃ъ на́шъ на нб҃сѝ и҆ на землѝ, всѧ̑ є҆ли̑ка восхотѣ̀ сотворѝ. Сті́хъ а҃: Во и҆схо́дѣ і҆и҃левѣ ѿ є҆гѵ́пта, до́мꙋ і҆а́кѡвлѧ: Сті́хъ в҃: Мо́ре ви́дѣ и҆ побѣжѐ, і҆ѻрда́нъ возврати́сѧ вспѧ́ть. Сті́хъ г҃: Что́ ти є҆́сть мо́ре, ꙗ҆́кѡ побѣ́гло є҆сѝ, и҆ тебѣ̀ і҆ѻрда́не, ꙗ҆́кѡ возврати́лсѧ є҆сѝ вспѧ́ть; Посе́мъ є҆ктенїа̀: Рце́мъ всѝ: и҆ Сподо́би гдⷭ҇и: И҆ И҆спо́лнимъ вече́рнюю мл҃твꙋ на́шꙋ: [С]и́це подоба́етъ пѣ́ти во всѧ̑ гдⷭ҇скїѧ пра́здники, въ ни́хже быва́етъ вхо́дъ, и҆ вели́кїй прокі́менъ. Та́же на стїхо́внѣ, стїхи̑ры пра́здника, гла́съ ѕ҃. Подо́бенъ: Всю̀ ѿложи́вше: Крⷭ҇тъ воздвиза́емь: съ припѣ́вы и҆́хъ. Сла́ва, ст҃а́гѡ, гла́съ и҃: Побѣ́ды тезоимени́тъ: И҆ ны́нѣ, крⷭ҇та̀, гла́съ то́йже: Гла́съ прⷪ҇ро́ка твоегѡ̀ мѡѷсе́а, бж҃е: Тропа́рь ст҃а́гѡ, гла́съ д҃: Мч҃нкъ тво́й гдⷭ҇и: Сегѡ̀ мѣ́сѧца во вторы́й де́нь.

И҆лѝ се́й, гла́съ то́йже: Крⷭ҇тъ хрⷭ҇то́въ, ꙗ҆́кѡ нѣ́кое ѻ҆рꙋ́жїе, ᲂу҆се́рднѡ воспрїи́мъ, и҆ къ боре́нїю врагѡ́въ прите́клъ є҆сѝ, и҆ за хрⷭ҇та̀ пострада́въ, послѣдѝ ѻ҆гне́мъ сщ҃е́ннꙋю твою̀ дꙋ́шꙋ гдⷭ҇ꙋ пре́далъ є҆сѝ: ѿѻнꙋ́дꙋже и҆ дарѡ́въ и҆сцѣлє́нїѧ ѿ негѡ̀ сподо́билсѧ є҆сѝ прїѧ́ти, великомч҃нче нїки́то, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃а́гѡ: И҆ ны́нѣ, пра́здника. И҆ ѻ҆бы̑чныѧ каѳі̑смы. И҆ сѣда́льны пра́здника. И҆ чте́нїе. Канѡ́нъ пра́здника со і҆рмосо́мъ на ѕ҃: И҆ ст҃а́гѡ на ѕ҃, гла́съ д҃. По г҃-й пѣ́сни конда́къ и҆ і҆́косъ пра́здника: и҆ сѣда́ленъ ст҃а́гѡ, два́жды. Сла́ва, и҆ ны́нѣ, пра́здника. По ѕ҃-й пѣ́сни,

Конда́къ ст҃а́гѡ, гла́съ в҃. Подо́бенъ: Вы́шнихъ и҆щѧ̀: Пре́лести посѣ́къ держа́вꙋ стоѧ́нїемъ твои́мъ, и҆ побѣ́ды прїи́мъ вѣне́цъ во страда́льчествѣхъ твои́хъ, со а҆́гг҃лы сла́вне ра́дꙋешисѧ, нїки́то тезоимени́те, съ ни́ми хрⷭ҇та̀ бг҃а молѧ̀ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ст҃а́гѡ два́жды. [зрѝ] [Си́це глаго́лемъ всѣ̑мъ шестери̑чнымъ ст҃ы̑мъ въ попра́зднствѣ. Сла́ва, и҆ ны́нѣ, пра́здника. На стїхо́внѣ стїхи̑ры пра́здника, гла́съ в҃. Подо́бенъ: До́ме є҆ѵфра́ѳовъ: съ преждепи́санными припѣ́вы. Сла́ва, гла́съ ѕ҃: Дне́сь вселе́ннаѧ: И҆ ны́нѣ, гла́съ то́йже: Дне́сь са́дъ: По трист҃о́мъ, тропа́рь ст҃а́гѡ. Сла́ва, и҆ ны́нѣ, пра́здника. Є҆ктєнїѝ, и҆ ча́съ а҃-й. На часѣ́хъ глаго́лемъ тропа́рь пра́здника. Сла́ва, ст҃а́гѡ, По Ѻ҆́ч҃е на́шъ, конда́къ пра́здника, на всѣ́хъ часѣ́хъ глаго́лемъ. И҆ ѿпꙋ́стъ. На лїтꙋргі́и, Бл҃жє́нна пра́здника, пѣ́снь а҃, на д҃: и҆ ст҃а́гѡ пѣ́снь ѕ҃, на д҃. По вхо́дѣ, Сп҃си́ ны сн҃е бж҃їй, пло́тїю распны́йсѧ, пою́щыѧ тѝ: а҆ллилꙋ́їа. [С]и́це пое́мъ и҆ до ѿда́нїѧ. Тропа́рь пра́здника. Та́же хра́ма бцⷣы, и҆лѝ ст҃а́гѡ и҆лѝ ст҃ы́ѧ. Та́же конда́къ пра́здника, и҆ хра́ма. Сла́ва, конда́къ ст҃а́гѡ: И҆ ны́нѣ, бцⷣы хра́ма. А҆ и҆дѣ́же нѣ́сть хра́ма бцⷣы, И҆ ны́нѣ, пра́здника. [зрѝ] Во хра́мѣ же хрⷭ҇то́вѣ, въ попра́зднствахъ влⷣчнихъ пра́здникѡвъ, и҆ до ѿда́нїѧ, тропа́рь и҆ конда́къ хра́ма, не глаго́летсѧ. А҆́ще ли нѣ́сть ст҃о́мꙋ кондака̀: Сла́ва, хра́ма ст҃а́гѡ, И҆ ны́нѣ, пра́здника. [зрѝ] [По семꙋ́ же ᲂу҆ка́зꙋ глаго́лемъ тропарѝ и҆ кондакѝ, во всѧ̑ дни̑ въ попра́зднствахъ и҆ до ѿда́нїѧ.] Прокі́менъ пра́здника: И҆ ст҃а́гѡ, гла́съ з҃: Возвесели́тсѧ првⷣникъ ѡ҆ гдⷭ҇ѣ: Сті́хъ: Оу҆слы́ши, бж҃е, гла́съ мо́й: А҆по́столъ къ тїмоѳе́ю, зача́ло сч҃в: Ча́до тїмоѳе́е, возмога́й ѡ҆ бл҃года́ти: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе ѿ матѳе́а, зача́ло л҃ѕ: Сѐ а҆́зъ посыла́ю ва́съ: Прича́стенъ пра́здника и҆ до ѿда́нїѧ. И҆ ст҃а́гѡ, Въ па́мѧть вѣ́чнꙋю: Си́це пое́мъ во всѧ̑ влⷣчни попра̑зднства.

[зрѝ] Сꙋббѡ́та по воздви́женїи: А҆по́столъ къ корі́нѳѧнѡмъ, зача́ло рк҃є ѿ полꙋ̀: Ви́дите зва́нїе ва́ше: Є҆ѵⷢ҇лїе ѿ і҆ѡа́нна, зача́ло л҃: а҆́зъ и҆дꙋ̀, и҆ взы́щете менѐ:

[зрѝ] Недѣ́лѧ по воздви́женїи: Прокі́менъ пра́здника. А҆по́столъ къ гала́тѡмъ, зача́ло с҃г: Оу҆вѣ́дѣвше, ꙗ҆́кѡ не ѡ҆правди́тсѧ человѣ́къ: Є҆ѵⷢ҇лїе ѿ ма́рка, зача́ло л҃з: И҆́же хо́щетъ по мнѣ̀ и҆тѝ, да ѿве́ржетсѧ себѐ: Прича́стенъ днѐ, и҆ пра́здника.

[зрѝ] Подоба́етъ вѣ́дати, а҆́ще слꙋчи́тсѧ воздви́женїе чⷭ҇тна́гѡ крⷭ҇та̀ въ сꙋббѡ́тꙋ: Недѣ́лѧ по воздви́женїи, чте́тсѧ а҆по́столъ, и҆ є҆ѵⷢ҇лїе, на ᲂу҆́трїи пра́здника въ недѣ́лю. Въ прїидꙋ́щꙋю же сꙋббѡ́тꙋ, во ѿда́нїи пра́здника: На лїтꙋргі́и, Прокі́менъ, А҆ллилꙋ́їа, и҆ прича́стенъ пра́здника. А҆по́столъ и҆ є҆ѵⷢ҇лїе пре́жде сꙋббѡ́ты по воздви́женїи, и҆ рѧ́дъ.

🕅 Подоба́етъ вѣ́дати, а҆́ще слꙋчи́тсѧ попра́зднство воздви́женїѧ чⷭ҇тна́гѡ крⷭ҇та̀ въ недѣ́лю, а҆ ст҃ы́й пое́тсѧ на д҃, и҆лѝ на ѕ҃: и҆лѝ є҆мꙋ́же и҆ полѷеле́й.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю. Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ є҆гѡ̀. На вели́цѣй вече́рни: по ѻ҆бы́чнѣй каѳі́смѣ, На Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ а҃: и҆ пра́здника г҃, тогѡ̀ днѐ: и҆ ст҃а́гѡ мине́и г҃. [зрѝ] А҆́ще ли пое́тсѧ ст҃ы́й на ѕ҃, и҆лѝ є҆мꙋ́же и҆ полѷеле́й: И҆ пое́мъ стїхи̑ры воскрⷭ҇ны, г҃: и҆ пра́здника г҃: и҆ ст҃а́гѡ д҃, Сла́ва, ст҃а́гѡ: И҆ ны́нѣ, бг҃оро́диченъ пе́рвый, гла́са. На лїті́и стїхи̑ры пра́здника, тогѡ̀ днѐ рѧдовы̑ѧ стїхѡ́вныѧ. Сла́ва, и҆ ны́нѣ, пра́здника: пи́санъ на ᲂу҆́трени на стїхо́внѣ. А҆́ще ли и҆́мать ст҃ы́й Сла́вꙋ, Сла́ва ст҃а́гѡ, И҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва ст҃а́гѡ, а҆́ще є҆́сть. И҆ ны́нѣ, пра́здника. А҆́ще ли нѝ, Сла́ва, и҆ ны́нѣ, пра́здника. На бл҃гослове́нїи хлѣ́бѡвъ, тропа́рь, Бцⷣе дв҃о, два́жды. И҆ пра́здника є҆ди́ножды. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды. Сла́ва, ст҃а́гѡ, а҆́ще є҆́сть. И҆ ны́нѣ, пра́здника. А҆́ще ли нѝ, Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны, съ бг҃оро́дичны и҆́хъ. И҆ чте́нїе во є҆ѵⷢ҇лїи толково́мъ, недѣ́лѧ по воздви́женїи. И҆ непоро́чны съ тропарѝ и҆́хъ. Ѵ҆пакоѝ гла́са. И҆ чте́нїе во є҆ѵⷢ҇лїи толково́мъ, недѣ́лѧ рѧ́дъ. А҆́ще ли ст҃ы́й и҆́мать полѷеле́й, по двꙋ̀ каѳі̑смꙋ, пое́мъ ст҃а́гѡ полѷеле́й, и҆ по полѷеле́и тропарѝ: А҆́гг҃льскїй собо́ръ: и҆ ѵ҆пакоѝ гла́са, и҆ сѣда́льны ст҃а́гѡ всѝ, и҆ чте́нїе. Степє́нна, и҆ прокі́менъ гла́са. И҆ Всѧ́кое дыха́нїе: Є҆ѵⷢ҇лїе воскрⷭ҇но, и҆ стїхи́ра воскрⷭ҇на, и҆ про́чее воскрⷭ҇но. Канѡ́нъ воскрⷭ҇нъ, со і҆рмосо́мъ на д҃: Бцⷣы на два̀: пра́здника на д҃: и҆ ст҃а́гѡ на д҃. Катава́сїа пра́здника. А҆́ще и҆́мать ст҃ы́й полѷеле́й, и҆лѝ славосло́вїе: И҆ пое́мъ канѡ́нъвоскрⷭ҇нъ, со і҆рмосо́мъ на д҃: И҆ пра́здника на д҃: И҆ ст҃а́гѡ на ѕ҃. По г҃-й пѣ́сни, конда́къ и҆ і҆́косъ пра́здника: и҆ ст҃а́гѡ, а҆́ще и҆́мать, и҆ сѣда́ленъ ст҃а́гѡ. Сла́ва, и҆ ны́нѣ, пра́здника: И҆ чте́нїе. По ѕ҃-й пѣ́сни конда́къ и҆ і҆́косъ воскрⷭ҇нъ. И҆ про́логъ. На ѳ҃-й пѣ́сни пое́мъ чⷭ҇тнѣ́йшꙋю: Свѣти́ленъ воскрⷭ҇нъ. Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны, д҃: И҆ ст҃а́гѡ, а҆́ще и҆́мать, подо́бны, г҃. И҆ самогла́сенъ и҆́же на Сла́вꙋ, пое́мъ съ припѣ́вы є҆гѡ̀. А҆́ще ли не и҆́мать ст҃ы́й хвали́тныхъ: И҆ пое́мъ стїхи̑ры воскрⷭ҇ны, д҃, и҆ пра́здника д҃, тогѡ̀ днѐ стїхѡ́вныѧ ᲂу҆́трєннїѧ, съ припѣ́вы пра́здника. Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ: Славосло́вїе вели́кое. И҆ по трист҃о́мъ, тропа́рь воскрⷭ҇нъ то́чїю. Є҆ктєнїѝ, и҆ ѿпꙋ́стъ. И҆ ѡ҆глаше́нїе. И҆ ѻ҆бы́чное и҆схожде́нїе въ притво́ръ. Та́же ча́съ а҃-й. На а҃-мъ часѣ̀ тропа́рь воскрⷭ҇нъ. Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника. Та́кожде и҆ на про́чихъ часѣ́хъ, конда́къ пра́здника и҆ воскрⷭ҇нъ глаго́лемъ премѣнѧ́юще: А҆́ще полѷеле́й, и҆ ст҃а́гѡ. На лїтꙋргі́и, бл҃жє́нна гла́са на ѕ҃, и҆ пра́здника пѣ́снь рѧдова́ѧ на д҃. А҆́ще ли и҆́мать ст҃ы́й пѣ́снь: И҆ бл҃жє́нна воскрⷭ҇на на д҃: И҆ пра́здника пѣ́снь рѧдова́ѧ на д҃: И҆ ст҃а́гѡ пѣ́снь ѕ҃-ѧ, на д҃. По вхо́дѣ тропа́рь воскрⷭ҇нъ, и҆ пра́здника. Та́же хра́ма: и҆ ст҃а́гѡ, а҆́ще и҆́мать. Сла́ва, конда́къ ст҃а́гѡ: И҆ ны́нѣ, пра́здника. А҆́ще ли не и҆́мать ст҃ы́й тропарѧ̀ и҆ кондака̀: И҆ глаго́лемъ конда́къ воскрⷭ҇нъ: Сла́ва, хра́ма: И҆ ны́нѣ, пра́здника. Прокі́менъ, а҆по́столъ, А҆ллилꙋ́їа, и҆ є҆ѵⷢ҇лїе недѣ́ли по воздви́женїи: та́же ст҃а́гѡ, а҆́ще и҆́мать: а҆́ще ли нѝ, рѧ́дъ. А҆ прокі́менъ гла́са ѡ҆ставлѧ́етсѧ. Прича́стенъ: Хвали́те гдⷭ҇а съ нб҃съ: Дрꙋгі́й ст҃а́гѡ, а҆́ще и҆́мать, а҆́ще ли нѝ, пра́здника.

ѕ҃і. 🕃 Ст҃ы́ѧ великомч҃нцы +є҆ѵфи́мїи+ всехва́льныѧ.

На Гдⷭ҇и воззва́хъ, стїхи̑ры пра́здника, г҃: И҆ ст҃ы́ѧ г҃, гла́съ д҃: Подо́бенъ: Ꙗ҆́кѡ до́блѧ: Сла́ва, ст҃ы́ѧ, гла́съ ѕ҃: Процвѣ́тшаѧ добродѣ́тельми: И҆ ны́нѣ, пра́здника, гла́съ то́йже: Четвероконе́чный мі́ръ: На стїхо́внѣ пра́здника, Сла́ва, ст҃ы́ѧ, гла́съ и҃: Всѧ́къ ꙗ҆зы́къ, И҆ ны́нѣ, пра́здника, гла́съ то́йже: Є҆го́же дре́вле мѡѷсе́й:

Тропа́рь ст҃ы́ѧ, гла́съ д҃: А҆́гница твоѧ̀, і҆и҃се, є҆ѵфи́мїа, зове́тъ ве́лїимъ гла́сомъ: тебѐ женишѐ мо́й люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ кр҃ще́нїю твоемꙋ̀, и҆ страждꙋ̀ тебѐ ра́ди, ꙗ҆́кѡ да ца́рствꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю прїими́ мѧ, съ любо́вїю поже́ршꙋюсѧ тебѣ̀. тоѧ̀ мл҃твами, ꙗ҆́кѡ ми́лостивъ сп҃сѝ дꙋ́шы на́шѧ.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃ы́ѧ: И҆ ны́нѣ, пра́здника. И҆ ѻ҆бы̑чныѧ каѳі̑смы. И҆ сѣда́льны пра́здника, и҆ чте́нїе. Канѡ́нъ пра́здника, со і҆рмосо́мъ на ѕ҃, и҆ ст҃ы́ѧ на ѕ҃, гла́съ и҃. По г҃-й пѣ́сни конда́къ и҆ і҆́косъ пра́здника, и҆ сѣда́ленъ ст҃ы́ѧ, гла́съ и҃, два́жды. Сла́ва, и҆ ны́нѣ, пра́здника, гла́съ то́йже. По ѕ҃-й пѣ́сни,

Конда́къ ст҃ы́ѧ, гла́съ д҃. Подо́бенъ: Вознесы́йсѧ: Во страда́льчествѣ твое́мъ до́брѣ подвиза́ласѧ є҆сѝ, и҆ по сме́рти ны̀ ѡ҆свѧща́еши чꙋде́съ точе́ньми, всехва́льнаѧ. тѣ́мже твоѐ ᲂу҆спе́нїе ст҃о́е пое́мъ, вѣ́рою притека́юще въ бж҃е́ственный хра́мъ тво́й, да и҆зба́вимсѧ недꙋ́гѡвъ дꙋше́вныхъ, и҆ чꙋде́съ бл҃года́ть почерпе́мъ.

И҆ і҆́косъ. По ѳ҃-й пѣ́сни свѣти́ленъ ст҃ы́ѧ, два́жды: Сла́ва, и҆ ны́нѣ, пра́здника. На хвали́техъ, стїхи̑ры ст҃ы́ѧ, на д҃: гла́съ г҃, самогла́сны. Сла́ва, гла́съ ѕ҃: Ѡ҆деснꙋ́ю сп҃са: И҆ ны́нѣ, пра́здника, гла́съ то́йже: Дне́сь происхо́дитъ: На стїхо́внѣ, стїхи̑ры пра́здника, съ припѣ́вы и҆́хъ. Сла́ва, ст҃ы́ѧ, гла́съ а҃: Дне́сь ли́цы: И҆ ны́нѣ, пра́здника, гла́съ то́йже: Дне́сь ꙗ҆́кѡ вои́стиннꙋ: По трист҃о́мъ, тропа́рь ст҃ы́ѧ: Сла́ва, и҆ ны́нѣ, пра́здника. Є҆ктенїа̀, и҆ ча́съ а҃-й. И҆ ѿпꙋ́стъ. На лїтꙋргі́и, бл҃жє́нна пра́здника, пѣ́снь г҃-ѧ, на д҃: И҆ ст҃ы́ѧ, пѣ́снь ѕ҃, на д҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ бл҃гослови́те бг҃а гдⷭ҇а: А҆по́столъ къ корі́нѳѧнѡмъ, зача́ло рн҃а: Поспѣ́шствꙋюще мо́лимъ: А҆ллилꙋ́їа, гла́съ ѕ҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе лꙋкѝ, зача́ло л҃г: Молѧ́ше і҆и҃са нѣ́кїй ѿ фарїсє́й: Прича́стенъ: Въ па́мѧть вѣ́чнꙋю:

з҃і. Ст҃ы́ѧ мч҃нцы софі́и, и҆ тре́хъ є҆ѧ̀ дще́рей, +вѣ́ры+, +наде́жды+ и҆ +любвѐ+.

Стїхи̑ры пра́здника, г҃: И҆ ст҃ы́хъ г҃, гла́съ д҃. Подо́бенъ: Да́лъ є҆сѝ зна́менїе: Сла́ва, и҆ ны́нѣ, пра́здника, гла́съ а҃: Насажде́ное въ кра́нїевѣ мѣ́стѣ: На стїхо́внѣ пра́здника. Сла́ва, и҆ ны́нѣ, гла́съ а҃: Проѡбразꙋ́ѧ крⷭ҇тъ: По Ѻ҆́ч҃е на́шъ, тропа́рь пра́здника. На ᲂу҆́трени, на Бг҃ъ гдⷭ҇ь, тропа́рь пра́здника, три́жды. И҆ ѻ҆бы̑чныѧ каѳі̑смы. И҆ сѣда́льны пра́здника. И҆ чте́нїе. Канѡ́нъ пра́здника со і҆рмосо́мъ на и҃: И҆ мч҃нцъ на д҃, гла́съ а҃. По г҃-й пѣ́сни,

Конда́къ мч҃нцъ, гла́съ а҃. Подо́бенъ: Гро́бъ тво́й сп҃се: Софі́и честны́ѧ сщ҃е́ннѣйшыѧ вѣ̑тви, вѣ́ра, и҆ наде́жда, и҆ любо́вь показа́вшесѧ, мꙋ́дрость ѡ҆бꙋи́ша є҆́ллинскꙋю бл҃года́тїю, и҆ пострада́вше, и҆ побѣдоно́сицы ꙗ҆ви́вшесѧ, вѣнце́мъ нетлѣ́ннымъ ѿ всѣ́хъ вѣ́ки хрⷭ҇та̀ ᲂу҆вѧзо́шасѧ.

И҆ сѣда́ленъ: Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ пра́здника. И҆ про́логъ. По ѳ҃- й пѣ́сни, свѣти́ленъ пра́здника: На стїхо́внѣ стїхи̑ры пра́здника: Сла́ва, и҆ ны́нѣ, гла́съ в҃: Прїиди́те всѝ ꙗ҆зы́цы: Тропа́рь пра́здника. И҆ ѿпꙋ́стъ. На лїтꙋргі́и, Бл҃жє́нна пра́здника, пѣ́снь д҃, на ѕ҃.

и҃і. Прпⷣбнагѡ ѻ҆ц҃а̀ на́шегѡ +є҆ѵме́нїа+ є҆пⷭ҇кпа, гортѵ́нскагѡ чꙋдотво́рца.

Стїхи̑ры пра́здника г҃: И҆ ст҃а́гѡ г҃, гла́съ д҃. Подо́бенъ: Ꙗ҆́кѡ до́блѧ: Сла́ва, и҆ ны́нѣ, пра́здника, гла́съ в҃: Бж҃е́ственное сокро́вище: На стїхо́внѣ пра́здника, Сла́ва, и҆ ны́нѣ, гла́съ д҃: Чⷭ҇тна́гѡ крⷭ҇та̀: По трист҃о́мъ тропа́рь пра́здника. И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, три́жды. По каѳі́смахъ, сѣда́льны пра́здника. Канѡ́нъ пра́здника со і҆рмосо́мъ на и҃: И҆ ст҃а́гѡ на д҃, гла́съ в҃. По г҃-й пѣ́сни,

Конда́къ ст҃а́гѡ, гла́съ в҃. Подо́бенъ: Вы́шнихъ и҆щѧ̀: Свѣ́томъ бж҃е́ственнымъ просвѣти́всѧ, всебл҃же́нне, просвѣща́еши ны̀ любо́вїю пою́щыѧ твоѐ честно́е и҆ сла́вное, и҆ ст҃о́е, ѻ҆́тче, преставле́нїе, і҆ера́рше є҆ѵме́нїе, молѧ̀ непреста́ннѡ ѡ҆ всѣ́хъ на́съ.

И҆ сѣда́ленъ, гла́съ є҃. Сла́ва, и҆ ны́нѣ пра́здника. По ѕ҃-й пѣ́сни конда́къ и҆ і҆́косъ пра́здника. По ѳ҃-й пѣ́сни свѣти́ленъ пра́здника. На стїхо́внѣ, стїхи̑ры пра́здника: Сла́ва, и҆ ны́нѣ, гла́съ д҃, самогла́сенъ: Свѣтосїѧ́ненъ: Є҆ктенїа̀. И҆ ча́съ а҃-й. И҆ ѿпꙋ́стъ. На лїтꙋргі́и бл҃жє́нна пра́здника, пѣ́снь є҃-ѧ, и҆ ѕ҃-ѧ, на ѕ҃.

ѳ҃і. Ст҃ы́хъ мꙋ́чєникъ +трофі́ма+, +савва́тїа+ и҆ +дорѷмедо́нта+.

Стїхи̑ры пра́здника, г҃. И҆ ст҃ы́хъ г҃, гла́съ и҃. Подо́бенъ: Мч҃нцы твоѝ гдⷭ҇и: Сла́ва, и҆ ны́нѣ, гла́съ д҃: Воспле́щемъ дне́сь: На стїхо́внѣ стїхи̑ры пра́здника: Сла́ва, и҆ ны́нѣ, гла́съ є҃: Гла́съ прорѡ́къ твои́хъ:

Тропа́рь, гла́съ и҃: Въ трⷪ҇цѣ хвали́мый бг҃ъ, тро́ицꙋ мꙋ́чєникъ просла́ви, трофі́ма и҆ савва́тїа и҆ дорѷмедо́нта: въ того́ бо вѣ́ровавше, врага̀ низложи́ша. тѣ́хъ мл҃твами, хрⷭ҇тѐ бж҃е на́шъ, поми́лꙋй на́съ.

Сла́ва, и҆ ны́нѣ, пра́здника.

На ᲂу҆́трени, канѡ́нъ пра́здника, со і҆рмосо́мъ на и҃: И҆ ст҃ы́хъ на д҃. По г҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ страда́льцєвъ ѡ҆снова́нїе, и҆ бл҃гоче́стїѧ ᲂу҆твержде́нїе, цр҃ковь чти́тъ и҆ сла́витъ твоѐ свѣтоно́сное страда́нїе, приснопѣва́емый бл҃же́нне страда́льче, доблемꙋ́дре сла́вне трофі́ме со страда́вшими съ тобо́ю, ѡ҆чище́нїе пою́щымъ тѧ̀ и҆спросѝ, ꙗ҆́кѡ непобѣди́мь.

И҆ сѣда́ленъ, гла́съ а҃: Сла́ва, и҆ ны́нѣ, пра́здника: По ѕ҃-й пѣ́сни, конда́къ и҆ і҆́косъ пра́здника. По ѳ҃-й пѣ́сни, свѣти́ленъ, и҆ стїхо́вна пра́здника. На лїтꙋргі́и бл҃жє́нна пра́здника, пѣ́снь з҃-ѧ на ѕ҃.

🕃 И҆ преставле́нїе бл҃говѣ́рнагѡ вели́кагѡ кн҃зѧ +ѳео́дѡра+, и҆ ча̑дъ є҆гѡ̀ бл҃говѣ́рныхъ кн҃зе́й, +даві́да+ и҆ +кѡнстанті́на+, смоле́нскихъ и҆ ꙗ҆росла́вскихъ чꙋдотво́рцєвъ.

Соверша́етсѧ собо́ръ и҆́хъ, и҆дѣ́же лежа́тъ мо́щи и҆́хъ, и҆лѝ хра́мъ.

Тропа́рь, гла́съ д҃: Ѿ ю҆́ности ва́шеѧ хрⷭ҇то́вѣ любвѝ прилѣпи́вшесѧ ст҃і́и, ᲂу҆се́рднѡ зако́нъ и҆ ѡ҆правда̑нїѧ тогѡ̀ сохрани́сте: ѿѻнꙋ́дꙋже и҆ чꙋде́сными дарова́ньми ѡ҆богати́вшесѧ, и҆сцѣлє́нїѧ и҆сточа́ете. ѳео́дѡре, даві́де и҆ кѡнстанті́не, ѡ҆ вѣ́рою ва́съ почита́ющихъ, моли́те хрⷭ҇та̀ бг҃а, сп҃сти́сѧ дꙋша́мъ на́шымъ.

На пренесе́нїе моще́й ст҃ы́хъ, тропа́рь, гла́съ и҃: Ꙗ҆́кѡ ѕвѣ́зды многосвѣ̑тлыѧ ѿ ю҆́ности возсїѧ́вше, ѡ҆свѣти́ли є҆стѐ сердца̀ вѣ́рныхъ пренесе́нїемъ чⷭ҇тны́хъ моще́й ва́шихъ: во пло́ти ꙗ҆́кѡ а҆́гг҃ли на землѝ показа́стесѧ, поще́нїемъ насажде́ни бы́сте ꙗ҆́кѡ древа̀ при вода́хъ воздержа́нїѧ, напое́ни стрꙋѧ́ми сле́зъ ва́шихъ, и҆ скве́рнꙋ ѡ҆мы́сте. Сегѡ̀ ра́ди ꙗ҆ви́стесѧ прїѧ́тєлища бж҃їѧ дх҃а, ѳео́дѡре и҆ даві́де, и҆ кѡнстанті́не, моли́те хрⷭ҇та̀ бг҃а, сп҃сти́сѧ дꙋша́мъ на́шымъ.

Конда́къ, гла́съ и҃: Ꙗ҆ви́стесѧ свѣти́льницы всесвѣ́тлїи, во пло́ти ꙗ҆́кѡ а҆́гг҃ли: и҆ ꙗ҆́кѡ жи́зни древеса̀ ра̑йскаѧ, поще́нїемъ, бдѣ́нїемъ, и҆ вѣ́рою возраща́еми, процвѣлѝ є҆стѐ: моли́твами ва́шими нбⷭ҇ныѧ бл҃года́ти прїе́мше вра́чеве крѣ́пцы ꙗ҆́вльшесѧ, и҆сцѣлѧ́ете недꙋ́гꙋющихъ дꙋ́шы, съ вѣ́рою прибѣга́ющихъ къ ра́цѣ моще́й ва́шихъ, чꙋдотво́рцы сла́внїи, ѳео́дѡре, даві́де и҆ кѡнстанті́не: моли́те хрⷭ҇та̀ бг҃а грѣхѡ́въ ѡ҆ставле́нїе дарова́ти, вѣ́рою и҆ любо́вїю чтꙋ́щымъ па́мѧть ва́шꙋ.

к҃. 🕃 Ст҃а́гѡ великомч҃нка +є҆ѵста́ѳїа+, и҆ и҆̀же съ ни́мъ.

На Гдⷭ҇и воззва́хъ, стїхи̑ры пра́здника г҃: И҆ ст҃а́гѡ г҃, гла́съ д҃. Подо́бенъ: Да́лъ є҆сѝ зна́менїе: Сла́ва, ст҃а́гѡ, гла́съ в҃: Вторы́й і҆́ѡвъ є҆ѵста́ѳїй: И҆ ны́нѣ, пра́здника, гла́съ то́йже: Рꙋ́къ премѣне́нїе: На стїхо́внѣ пра́здника: Сла́ва, ст҃а́гѡ, гла́съ ѕ҃: А҆дама́нтъ дꙋше́ю: И҆ ны́нѣ, пра́здника, гла́съ то́йже: Крⷭ҇те хрⷭ҇то́въ:

Тропа́рь, гла́съ д҃: Мч҃нцы твоѝ гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебѐ бг҃а на́шегѡ: и҆мꙋ́ще бо крѣ́пость твою̀ мꙋчи́телей низложи́ша, сокрꙋши́ша и҆ де́мѡнѡвъ немощны̑ѧ де́рзѡсти. тѣ́хъ моли́твами сп҃сѝ дꙋ́шы на́шѧ.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, мч҃нкѡвъ: И҆ ны́нѣ, пра́здника. И҆ ѻ҆бы̑чныѧ каѳі̑смы: и҆ сѣда́льны пра́здника. Канѡ́нъ пра́здника, со і҆рмосо́мъ на ѕ҃: И҆ ст҃а́гѡ на ѕ҃: гла́съ д҃. По г҃-й пѣ́сни, конда́къ и҆ і҆́косъ пра́здника и҆ сѣда́ленъ ст҃а́гѡ, гла́съ и, два́жды. Сла́ва, и҆ ны́нѣ, пра́здника, гла́съ то́йже. По ѕ҃-й пѣ́сни,

Конда́къ ст҃а́гѡ, гла́съ в҃. Подо́бенъ: Вы́шнихъ и҆щѧ̀: Стра́сти хрⷭ҇то́вы ꙗ҆́вѣ подража́въ, и҆ сегѡ̀ и҆спи́въ ᲂу҆се́рднѡ ча́шꙋ, ѻ҆́бщникъ є҆ѵста́ѳїе, и҆ сла́вы снаслѣ́дникъ бы́лъ є҆сѝ, ѿ сама́гѡ всѣ́хъ бг҃а прїе́млѧ съ высоты̀ бж҃е́ственное ѡ҆ставле́нїе.

И҆ і҆́косъ. По ѳ҃-й пѣ́сни, Свѣти́ленъ ст҃а́гѡ два́жды: Сла́ва, и҆ ны́нѣ, пра́здника. На хвали́техъ, стїхи̑ры ст҃а́гѡ, на д҃, самогла́сны: Є҆ди́нъ, гла́съ д҃, два́жды: и҆ гла́съ ѕ҃, и҆ гла́съ и҃. Сла́ва, гла́съ и҃: Воинствонача́лїѧ: И҆ ны́нѣ, пра́здника, гла́съ то́йже: Є҆го́же дре́вле мѡѷсе́й: На стїхо́внѣ, стїхи̑ры пра́здника. Сла́ва, ст҃а́гѡ, гла́съ и҃: Ꙗ҆́коже па́ѵелъ зва́нїе: И҆ ны́нѣ, пра́здника, гла́съ то́йже: Гла́съ прⷪ҇ро́ка твоегѡ̀: На лїтꙋргі́и бл҃жє́нна пра́здника пѣ́снь н҃-ѧ, на д҃: И҆ ст҃а́гѡ, пѣ́снь ѕ҃-ѧ, на д҃. Прокі́менъ, гла́съ д҃: Ст҃ы̑мъ и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе ѿ лꙋкѝ, зача́ло р҃ѕ: Возложа́тъ на вы̀: Прича́стенъ, Ра́дꙋйтесѧ:

🕃=И҆ ст҃ы́хъ мꙋ́чєникъ и҆ и҆сповѣ̑дникъ, вели́кагѡ кн҃зѧ +мїхаи́ла+ и҆ болѧ́рина є҆гѡ̀ +ѳео́дѡра+, черни́говскихъ чꙋдотво́рцєвъ.

Соверша́етсѧ собо́ръ и҆́хъ, и҆дѣ́же лежа́тъ мѡ́щи и҆́хъ.

Тропа́рь, гла́съ д҃: Жи́знь ва́шꙋ мꙋ́ченически соверши́вше, и҆сповѣ́данїѧ вѣнцы̀ ᲂу҆краси́вшесѧ, къ нбⷭ҇нымъ востеко́сте, мїхаи́ле премꙋ́дре, съ до́блимъ ѳео́дѡромъ, моли́те хрⷭ҇та̀ бг҃а сохрани́ти ѻ҆те́чество ва́ше, +і҆мпера́тора+ же и҆ лю́ди, по вели́цѣй є҆гѡ̀ млⷭ҇ти.

Конда́къ, гла́съ и҃. Подо́бенъ: Взбра́нной: Црⷭ҇тво земно́е въ ничто́же вмѣни́въ, сла́вꙋ ꙗ҆́кѡ преходѧ́щꙋю ѡ҆ста́вилъ є҆сѝ, самозва́нъ прише́дъ къ подвигѡ́мъ, трⷪ҇цꙋ проповѣ́далъ є҆сѝ пред̾ нечести́вымъ мꙋчи́телемъ, стрⷭ҇тоте́рпче мїхаи́ле, съ до́блимъ ѳео́дѡромъ: цр҃ю̀ си́лъ предстоѧ́ще, моли́те без̾ вре́да сохрани́ти ѻ҆те́чество ва́ше, +і҆мпера́тора+ же и҆ лю́ди, да ва́съ непреста́ннѡ почита́емъ.

к҃а. Ст҃а́гѡ а҆пⷭ҇ла +кодра́та+, и҆́же въ магнисі́и: Слꙋ́жба є҆гѡ̀ пое́тсѧ въ к҃в де́нь сегѡ̀ мѣ́сѧца.]

Въ се́й де́нь ѿдае́тсѧ пра́здникъ чⷭ҇тна́гѡ крⷭ҇та̀.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры пра́здника на ѕ҃, поє́мыѧ на са́мый пра́здникъ. Сла́ва, и҆ ны́нѣ, пра́здника. А҆́ще сꙋббѡ́та, Сла́ва, пра́здника: И҆ ны́нѣ, догма́тїкъ настоѧ́щагѡ гла́са. На стїхо́внѣ стїхи̑ры пра́здника: Сла́ва, и҆ ны́нѣ, пра́здника. По трист҃о́мъ тропа́рь пра́здника. Є҆ктенїа̀ и҆ ѿпꙋ́стъ. На повече́рїи по трист҃о́мъ, конда́къ пра́здника. Полꙋ́нощницꙋ же пое́мъ, по ѻ҆бы́чаю съ тропарѝ дневны́ми. На ᲂу҆́трени, на Бг҃ъ гдⷭ҇ь, тропа́рь пра́здника, три́жды. По каѳі́смахъ, сѣда́льны пра́здника. Канѡ́нъ пра́здника на в҃і: І҆рмосы̀ по два́жды. Послѣдѝ і҆рмо́съ то́йже ѻ҆́ба ли̑ка вкꙋ́пѣ. По г҃-й пѣ́сни, сѣда́ленъ два́жды. По ѕ҃-й пѣ́сни, конда́къ и҆ і҆́косъ пра́здника. На ѳ҃-й пѣ́сни Чⷭ҇тнѣ́йшꙋю не пое́мъ, но пое́мъ припѣ́вы пра́здника, а҃- гѡ канѡ́на со і҆рмосо́мъ на и҃: в҃-гѡ канѡ́на со і҆рмосо́мъ на ѕ҃: І҆рмосы̀ ѻ҆бою̀ канѡ́нѡвъ ѳ҃-ѧ пѣ́сни по два́жды. Та́же, на схо́дѣ пое́мъ съ припѣ́вомъ і҆рмо́съ: Та́инъ є҆сѝ: И҆ пото́мъ припѣ́въ, и҆ і҆рмо́съ: Снѣ́дїю дре́ва: И҆ покло́нъ. Свѣти́ленъ пра́здника, два́жды. На хвали́техъ стїхи̑ры на д҃: Сла́ва, и҆ ны́нѣ, пра́здника. Славосло́вїе вели́кое. По трист҃о́мъ, тропа́рь пра́здника. Та́же є҆ктєнїѝ, и҆ ѿпꙋ́стъ. На часѣ́хъ, тропа́рь и҆ конда́къ пра́здника. На лїтꙋргі́и, бл҃жє́нна ѿ канѡ́на пѣ́снь ѳ҃- ѧ, на и҃. По вхо́дѣ тропа́рь пра́здника. Сла́ва, и҆ ны́нѣ, конда́къ пра́здника. Та́же трист҃о́е. Прокі́менъ, А҆ллилꙋ́їа и҆ Прича́стенъ пра́здника. А҆по́столъ, и҆ є҆ѵⷢ҇лїе днѐ.

По ѿпꙋще́нїи лїтꙋргі́и: И҆схо́дитъ і҆ере́й съ кади́ломъ, дїа́конъ со свѣще́ю, и҆ кади́тъ чⷭ҇тны́й крⷭ҇тъ: и҆ та́кѡ взима́етъ і҆ере́й чⷭ҇тны́й крⷭ҇тъ съ блю́домъ на главꙋ̀, и҆ вно́ситъ є҆го̀ во ст҃ы́й ѻ҆лта́рь ца́рскими две́рьми, пред̾идꙋ́щꙋ же пред̾ ни́мъ дїа́конꙋ со свѣще́ю, и҆ кади́тъ чⷭ҇тны́й крⷭ҇тъ. Та́же полага́етъ і҆ере́й чⷭ҇тны́й крⷭ҇тъ на ст҃ы́й прⷭ҇то́лъ, и҆ кади́тъ є҆гѡ̀ крⷭ҇тоѡбра́знѡ. И҆ та́кѡ ѿдае́тсѧ пра́здникъ чⷭ҇тна́гѡ крⷭ҇та̀.

🕅 Подоба́етъ вѣ́дати: А҆́ще слꙋчи́тсѧ ѿда́нїе воздви́женїѧ чⷭ҇тна́гѡ крⷭ҇та̀ въ недѣ́лю: Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны. На стїхо́внѣ стїхи́ра воскрⷭ҇на, и҆ пра́здника стїхо́вна, съ припѣ́вы свои́ми вели́кїѧ вече́рни. Сла́ва, и҆ ны́нѣ, пра́здника. Тропа́рь воскрⷭ҇нъ: Сла́ва, и҆ ны́нѣ, пра́здника. На вели́цѣй вече́рни: По ѻ҆бы́чной каѳі́смѣ, На Гдⷭ҇и воззва́хъ стїхи̑ры воскрⷭ҇ны г҃, и҆ а҆нато́лїевъ а҃: и҆ пра́здника, ѕ҃: поє́мыѧ на са́мый пра́здникъ. Сла́ва, пра́здника: И҆ ны́нѣ, бг҃оро́диченъ а҃-й гла́са. На лїті́и стїхи̑ры и҆ Сла́ва, и҆ ны́нѣ, пра́здника. На стїхо́внѣ, стїхи̑ры воскрⷭ҇ны: Сла́ва, и҆ ны́нѣ, пра́здника. На бл҃гослове́нїи хлѣ́бѡвъ, тропа́рь: Бцⷣе дв҃о: два́жды. И҆ пра́здника, є҆ди́ножды. И҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны съ бг҃оро́дичны и҆́хъ. И҆ чте́нїе въ толково́мъ є҆ѵⷢ҇лїи, недѣ́лѧ по воздви́женїи. И҆ непоро́чны: И҆ ѵ҆пакоѝ гла́са. И҆ чте́нїе, недѣ́лѧ рѧ́дъ. Степє́нна, и҆ прокі́менъ гла́са: и҆ Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. Стїхи́ра воскрⷭ҇на, и҆ про́чее по ѻ҆бы́чаю. Канѡ́нъ воскрⷭ҇нъ, со і҆рмосо́мъ на д҃: и҆ бцⷣы на два̀: и҆ пра́здника на и҃. Катава́сїа пра́здника. По г҃-й пѣ́сни, конда́къ и҆ і҆́косъ пра́здника, и҆ сѣда́ленъ два́жды. И҆ чте́нїе пра́здника. По ѕ҃-й пѣ́сни конда́къ и҆ і҆́косъ воскрⷭ҇нъ, и҆ про́логъ. На ѳ҃-й пѣ́сни пое́мъ Чⷭ҇тнѣ́йшꙋю: Свѣти́ленъ воскрⷭ҇нъ. Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃. И҆ пра́здника д҃, со сла́внымъ, съ припѣ́вы пра́здника. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскрⷭ҇нъ. И҆ є҆ктєнїѝ. И҆ ѡ҆глаше́нїе стꙋді́тово. И҆ и҆схожде́нїе ѻ҆бы́чное въ притво́ръ, и҆ ча́съ а҃-й. И҆ коне́чный ѿпꙋ́стъ. На часѣ́хъ, тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ пра́здника, и҆ воскрⷭ҇нъ глаго́лемъ премѣнѧ́юще. На лїтꙋргі́и, бл҃жє́нна гла́са, на ѕ҃: И҆ пра́здника, пѣ́снь ѳ҃, на д҃. По вхо́дѣ, тропа́рь воскрⷭ҇нъ, и҆ пра́здника: Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ днѐ, и҆ пра́здника. А҆по́столъ, и҆ є҆ѵⷢ҇лїе недѣ́ли по воздви́женїи, и҆ днѐ. А҆ллилꙋ́їа, и҆ прича́стенъ пра́здника, и҆ днѐ.

🕂 Въ то́йже де́нь па́мѧть и҆́же во ст҃ы́хъ ѻ҆тца̀ на́шегѡ +дими́трїа+, митрополі́та росто́вскагѡ.

Тропа́рь, гла́съ и҃: Правосла́вїѧ ревни́телю, и҆ раско́ла и҆скорени́телю, рѡссі́йскїй цѣле́бниче, и҆ но́вый къ бг҃ꙋ моли́твенниче, списа́ньми твои́ми бꙋ́ихъ ᲂу҆цѣломꙋ́дрилъ є҆сѝ, цѣвни́це дꙋхо́внаѧ, дими́трїе бл҃же́нне, молѝ хрⷭ҇та̀ бг҃а сп҃сти́сѧ +і҆мпера́торꙋ+ на́шемꙋ +нїкола́ю а҆леѯа́ндровичꙋ+, и҆ всемꙋ̀ наслѣ́дїю и҆ держа́вѣ є҆гѡ̀.

Конда́къ, гла́съ то́йже: Ѕвѣздꙋ̀ рѡссі́йскꙋю ѿ кі́ева возсїѧ́вшꙋю, и҆ чрез̾ но́въградъ сѣ́верскїй въ росто́въ дости́гшꙋю, всю́ же странꙋ̀ сїю̀ ᲂу҆че́ньми и҆ чꙋдесы̀ ѡ҆зари́вшꙋю, ᲂу҆бл҃жи́мъ златослове́снаго ᲂу҆чи́телѧ дими́трїа. то́й бо всѣ̑мъ всѧ̑ написа̀, ꙗ҆̀же къ наставле́нїю, да всѣ́хъ прїѡбрѧ́щетъ ꙗ҆́коже па́ѵелъ хрⷭ҇тꙋ̀, и҆ сп҃се́тъ правовѣ́рїемъ дꙋ́шы на́шѧ.

[зрѝ] Вѣ́домо же бꙋ́ди: Ꙗ҆́кѡ по ѿда́нїи пра́здника чⷭ҇тна́гѡ крⷭ҇та̀, ѿ к҃а-гѡ днѐ септе́мврїа мѣ́сѧца, начина́емъ стїхосло́вити на ᲂу҆́трени по г҃ каѳі́смѣ: твори́мъ же и҆ чтє́нїѧ д҃, кромѣ̀ про́лога. На вече́рни, стїхологисꙋ́емъ каѳі́смꙋ: Ко гдⷭ҇ꙋ внегда̀ скорбѣ́ти мѝ: А҆́ще ли бꙋ́детъ вели́кїй ст҃ы́й, и҆мѣ́ѧй полѷеле́й, стїхосло́вимъ на ᲂу҆́трени двѣ̀ каѳі̑смы: а҆ на вече́рни рѧдовꙋ́ю г҃-ю. Сїѐ ᲂу҆́бѡ вѣ́стно да бꙋ́детъ: ꙗ҆́кѡ ѿ недѣ́ли нача́ло взе́млетъ ѱалти́рь: сїе́ же ѿ понедѣ́льника сотворѧ́етсѧ, г҃ каѳі́смы по всѧ̑ дни̑ до к҃-гѡ днѐ деке́мврїа мѣ́сѧца. Въ недѣ́лѧхъ же на ᲂу҆́трени стїхосло́вимъ по двѣ̀ каѳі̑смы. Прилага́емъ же и҆ полѷеле́й по всѧ̑ недѣ̑ли, до к҃-гѡ деке́мврїа. Ѿ к҃-гѡ же деке́мврїа, не пое́тсѧ полѷеле́й, до д҃і-гѡ і҆аннꙋа́рїа, до́ндеже ѿдае́тсѧ пра́здникъ бг҃оѧвле́нїѧ, кромѣ̀ вели́кагѡ ст҃а́гѡ и҆мꙋ́щагѡ полѷеле́й: а҆ ѿ д҃і- гѡ і҆аннꙋа́рїа пое́мъ полѷеле́й по всѧ̑ недѣ̑ли, да́же до недѣ́ли сыропꙋ́стныѧ. [зрѝ] Катава́сїа ѿ дне́сь пое́тсѧ: Ѿве́рзꙋ ᲂу҆ста̀ моѧ̑: до к҃а-гѡ ное́мврїа.

к҃в. Ст҃а́гѡ сщ҃енномч҃нка +фѡ́ки+, є҆пⷭ҇кпа сїнопі́йскагѡ: И҆ ст҃а́гѡ прⷪ҇ро́ка +і҆ѡ́ны+: И҆ прпⷣбнагѡ +і҆ѡ́ны+ пресвѵ́тера, ѻ҆тца̀ ѳеофа́нова, творца̀ канѡ́нѡвъ, и҆ ѳео́дѡра начерта́ннагѡ.

Стїхи̑ры а҆пⷭ҇ла, г҃: И҆ мч҃нка, г҃: Сла́ва, мч҃нка, гла́съ д҃: И҆змла́да бы́лъ є҆сѝ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха.

Тропа́рь а҆пⷭ҇ла, гла́съ г҃: А҆пⷭ҇ле ст҃ы́й кодра́те, молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

Сла́ва, фѡ́ки, гла́съ д҃: И҆ нра́вѡмъ прича́стникъ: Сегѡ̀ мѣ́сѧца въ г҃-й де́нь.

Слꙋ́жба прⷪ҇ро́ка і҆ѡ́ны, и҆ прпⷣбнагѡ і҆ѡ́ны, пое́тсѧ на повече́рїи.

На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла два́жды: Сла́ва, мч҃нка: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. И҆ ѻ҆бы̑чныѧ каѳі̑смы. И҆ сѣда́льны ѻ҆ктѡ́иха. И҆ чте́нїе. Канѡ́нъ ѻ҆ктѡ́иха є҆ди́нъ: И҆ ст҃ы́хъ два̀, на и҃. А҆пⷭ҇ла, гла́съ в҃: И҆ мч҃нка, гла́съ д҃. По г҃-й пѣ́сни,

Конда́къ мч҃нка, гла́съ ѕ҃. Подо́бенъ: Є҆́же ѡ҆ на́съ: Ꙗ҆́кѡ а҆рхїере́й приносѧ̀, ѻ҆́ч҃е, жє́ртвы, на коне́цъ себѐ прине́слъ є҆сѝ же́ртвꙋ живꙋ́ю, свидѣ́тельствовавъ зако́ннѡ ѡ҆ хрⷭ҇тѣ̀ бз҃ѣ, ѿ а҆́гг҃лъ ᲂу҆крѣплѧ́емь, и҆ сме́рть и҆зволѧ́ѧ, сы́й съ вопїю́щими тебѣ̀: прїидѝ, фѡ́ко, съ на́ми, и҆ никто́же на ны̀.

И҆ і҆́косъ, и҆ сѣда́ленъ а҆пⷭ҇ла: Сла́ва. мч҃нка. По ѕ҃-й пѣ́сни,

Конда́къ а҆пⷭ҇ла, гла́съ и҃. Подо́бенъ: ꙗ҆́кѡ нача́тки: Ꙗ҆́кѡ сщ҃еннонача́льника чⷭ҇тна, и҆ страда́льца твердѣ́йша, вселе́ннаѧ прино́ситъ тебѣ̀, гдⷭ҇и, кодра́та а҆пⷭ҇ла, и҆ пѣ́сньми почита́етъ чⷭ҇тнꙋ́ю є҆гѡ̀ па́мѧть, просѧ́щи всегда̀ прегрѣше́нїй ѡ҆ставле́нїѧ, тѣ́мъ дарова́тисѧ пою́щымъ є҆го̀, бл҃гоꙋтро́бне.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ а҆пⷭ҇ла: Сла́ва, мч҃нка. На стїхо́внѣ ѻ҆ктѡ́иха. По трист҃о́мъ тропа́рь а҆пⷭ҇ла: Сла́ва, мч҃нка. На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇ви: А҆по́столъ ко є҆вре́ємъ, зача́ло та҃і: И҆мꙋ́ще а҆рхїере́а вели́ка: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ: Є҆ѵⷢ҇лїе і҆ѡа́нна, зача́ло л҃ѕ: А҆́зъ є҆́смь две́рь: Прича́стенъ, Въ па́мѧть вѣ́чнꙋю.

к҃г. 🕃 Зача́тїе чⷭ҇тна́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ гдⷭ҇нѧ і҆ѡа́нна.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры на ѕ҃, гла́съ д҃: Подо́бенъ: Зва́нный свы́ше: Сщ҃е́нствꙋѧ бж҃е́ственный заха́рїе: Сла́ва, гла́съ ѕ҃: Ѿ непло́днагѡ дне́сь чре́ва: И҆ ны́нѣ, бг҃оро́диченъ: Кто̀ тебѐ не ᲂу҆бл҃жи́тъ: На стїхо́внѣ стїхи̑ры, гла́съ ѕ҃. Подо́бенъ: Всю̀ ѿложи́вше: И҆дꙋ́щꙋ во ст҃а̑ѧ ст҃ы́хъ: съ припѣ́вы. Сла́ва, гла́съ то́йже, самогла́сенъ: А҆́гг҃лъ и҆з̾ непло́дныхъ ложе́снъ: И҆ ны́нѣ, бг҃оро́диченъ: Никто́же притека́ѧй:

Тропа́рь, гла́съ д҃: Пе́рвѣе неражда́ющаѧ непло́ды возвесели́сѧ: се́ бо зачала̀ є҆сѝ со́лнца свѣти́льника ꙗ҆́вѣ, просвѣща́ти и҆мꙋ́ща всю̀ вселе́ннꙋю, слѣпото́ю недꙋ́гꙋющꙋю. ликꙋ́й заха́рїе, вопїѧ̀ со дерзнове́нїемъ: прⷪ҇ро́къ вы́шнѧгѡ є҆́сть, хотѧ́й роди́тисѧ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное: На повече́рїи, по трист҃о́мъ конда́къ прⷣте́чи. На ᲂу҆́трени, на Бг҃ъ гдⷭ҇ь, тропа́рь два́жды. Сла́ва, и҆ ны́нѣ: Є҆́же ѿ вѣ́ка: По а҃-й каѳі́смѣ, сѣда́ленъ, гла́съ є҃. Подо́бенъ: Собезнача́льное: Є҆лїсаве́тъ непло́дствїѧ: два́жды. Сла́ва, и҆ ны́нѣ, бг҃оро́диченъ. По в҃-й каѳі́смѣ, сѣда́ленъ, гла́съ д҃. Подо́бенъ: Ско́рѡ предварѝ: Го́рлица пꙋстыннолю́бнаѧ: два́жды. Сла́ва, и҆ ны́нѣ, бг҃оро́диченъ. Ѻ҆́ба канѡ́на ѻ҆ктѡ́иха, без̾ мч҃нчнѡвъ: И҆ ст҃а́гѡ на ѕ҃, гла́съ ѕ҃. Катава́сїа, Ѿве́рзꙋ ᲂу҆ста̀ моѧ̑: По г҃-й пѣ́сни сѣда́ленъ, гла́съ д҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ а҃. Подо́бенъ: Ли́къ а҆́гг҃льскїй: Весели́тсѧ свѣ́тлѡ заха́рїа вели́кїй, со всесла́вною є҆лїсаве́тою сопрꙋ́жницею, досто́йнѡ зачина́юще і҆ѡа́нна прⷣте́чꙋ: є҆го́же а҆рха́гг҃лъ бл҃говѣстѝ ра́дꙋѧсѧ, и҆ человѣ́цы достодо́лжнѡ почти́мъ, ꙗ҆́кѡ таи́нника бл҃года́ти.

И҆ і҆́косъ: и҆ про́логъ. По ѳ҃-й пѣ́сни, свѣти́ленъ прⷣте́чи, два́жды: Подо́бенъ, Со ᲂу҆ч҃нкѝ: Прⷣте́чево сла́вное зача́тїе: Сла́ва, и҆ ны́нѣ, бг҃оро́диченъ. На хвали́техъ, стїхи̑ры на д҃: гла́съ а҃. Подо́бенъ: Нбⷭ҇ныхъ чинѡ́въ: Весели́тсѧ тва́рь въ зача́тїи твое́мъ: Сла́ва, и҆ ны́нѣ, гла́съ ѕ҃, самогла́сенъ: Є҆лїсаве́тъ зача́тъ: Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, Є҆́же ѿ вѣ́ка: Є҆ктєнїѝ. И҆ ѿпꙋ́стъ, И҆ ча́съ а҃-й. И҆ коне́чный ѿпꙋ́стъ.

[зрѝ] [Ѡ҆ славосло́вїи же вели́комъ да не почꙋди́шисѧ. Возмо́жно ᲂу҆́бѡ є҆́сть, ꙗ҆́коже ᲂу҆ста́въ и҆з̾ѧвлѧ́етъ, и҆ ѻ҆смогла́сникꙋ пѣва́емꙋ, и҆ Гдⷭ҇ви пои́мъ, глаго́лемꙋ, сотвори́ти и҆ вели́кое славосло́вїе. На лїтꙋргі́и, бл҃жє́нна ѿ канѡ́на пѣ́снь г҃-ѧ, и҆ ѕ҃-ѧ. Прокі́менъ, гла́съ з҃: Возвесели́тсѧ првⷣникъ: Сті́хъ: Оу҆слы́ши, бж҃е, гла́съ мо́й: А҆по́столъ къ гала́тѡмъ, зача́ло с҃і, ѿ полꙋ̀: А҆враа́мъ два̀ сы́на и҆мѣ̀: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Сті́хъ: Насажде́ни въ домꙋ̀ гдⷭ҇ни: Є҆ѵⷢ҇лїе лꙋкѝ, зача́ло в҃: Бы́сть во дни̑ и҆́рѡда царѧ̀ і҆ꙋде́йска: Коне́цъ: Поноше́нїе моѐ въ человѣ́цѣхъ. Прича́стенъ, Въ па́мѧть вѣ́чнꙋю бꙋ́детъ првⷣникъ:

к҃д. 🕃 Ст҃ы́ѧ первомч҃нцы и҆ равноапⷭ҇льныѧ +ѳе́клы+.

На Гдⷭ҇и воззва́хъ, стїхи̑ры на ѕ҃, гла́съ и҃. подо́бенъ: Гдⷭ҇и, а҆́ще и҆ на сꙋди́щи: Сла́ва, гла́съ ѕ҃: Стрⷭ҇тоте́рпческими боре́нїи: На стїхо́внѣ ѻ҆ктѡ́иха: Сла́ва, ст҃ы́ѧ, гла́съ и҃: Львѡ́въ стремле́нїе:

Тропа́рь, гла́съ д҃: Словесє́мъ па́ѵлѡвымъ наꙋчи́вшисѧ, бг҃оневѣ́стнаѧ ѳе́кло, и҆ вѣ́рою ᲂу҆тверди́вшисѧ ѿ петра̀ бг҃озва́ннаѧ, первомч҃нца ꙗ҆ви́ласѧ є҆сѝ и҆ первострада́льница въ жена́хъ: возшла̀ є҆сѝ на пла́мень ꙗ҆́кѡ на мѣ́сто бл҃гоцвѣтꙋ́щее, ѕвѣ́ри и҆ ю҆нцы̀ ᲂу҆страши́шасѧ тебѐ, воѡрꙋжи́сѧ бо крⷭ҇то́мъ: тѣ́мъ молѝ, всехва́льнаѧ, хрⷭ҇та̀ бг҃а, сп҃сти́сѧ дꙋша́мъ на́шымъ.

На ᲂу҆́трени, на Бг҃ъ гдⷭ҇ь, тропа́рь два́жды. И҆ ѻ҆бы̑чныѧ каѳі̑смы: и҆ сѣда́льны ѻ҆ктѡ́иха: и҆ чте́нїе. Ѻ҆́ба канѡ́на ѻ҆ктѡ́иха, без̾ мч҃ничнѡвъ: и҆ ст҃ы́ѧ на ѕ҃, гла́съ и҃. По г҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: Дѣ́вства доброто́ю просїѧ́ла є҆сѝ, и҆ мч҃нчества вѣнце́мъ ᲂу҆краси́ласѧ є҆сѝ, а҆пⷭ҇льствꙋ ввѣрѧ́ешисѧ, дѣ́во, ꙗ҆́кѡ пресла́внаѧ: и҆ ѻ҆гнѧ̀ ᲂу҆́бѡ пла́мень въ ро́сꙋ преложи́ла є҆сѝ, ю҆нца́ же ꙗ҆́рость мл҃твою твое́ю ᲂу҆кроти́ла є҆сѝ, ꙗ҆́кѡ первострада́льнаѧ.

Та́же сѣда́ленъ ст҃ы́ѧ, два́жды: Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Оу҆ѧзви́вши твоѐ се́рдце добродѣ́во, любо́вїю хрⷭ҇то́вою, ѡ҆брꙋ́чника вре́меннаго ꙗ҆́кѡ небрего́ма преѡби́дѣла є҆сѝ, и҆ на ѻ҆́гнь дерзнꙋ́ла є҆сѝ: ѕвѣре́й же ᲂу҆ста̀ загради́ла є҆сѝ, и҆ спа́сшисѧ ѿ ни́хъ прилѣжа́ше па́ѵла и҆́щꙋщи, ѳе́кло первострада́льнаѧ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃ы́ѧ. На хвали́техъ стїхи̑ры самогла́сны, на д҃: Сла́ва, гла́съ а҃: Страда́льческїй по́двигъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха. Сла́ва, гла́съ в҃: Прїиди́те мч҃нколю́бцы: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На лїтꙋргі́и, бл҃жє́нна ѻ҆ктѡ́иха, на д҃: И҆ ст҃ы́ѧ пѣ́снь г҃-ѧ, на д҃. Прокі́менъ гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ бл҃гослови́те бг҃а: А҆по́столъ къ тїмоѳе́ю, зача́ло сч҃ѕ: Ча́до тїмоѳе́е, послѣ́довалъ є҆сѝ моемꙋ̀ ᲂу҆че́нїю: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а: Є҆ѵⷢ҇лїе матѳе́а, зача́ло р҃д: Оу҆подо́бисѧ црⷭ҇твїе нбⷭ҇ное десѧти́мъ дѣ́вамъ: Прича́стенъ: Ра́дꙋйтесѧ првⷣнїи.

к҃є. Прпⷣбныѧ ма́тере на́шеѧ +є҆ѵфросѵ́нїи+.

Стїхи̑ры ѻ҆ктѡ́иха г҃: И҆ ст҃ы́ѧ, г҃, гла́съ є҃. Подо́бенъ: Прпⷣбне ѻ҆́тче: Сла́ва, гла́съ в҃, самогла́сенъ: Чи́стое чистоты̀ твоеѧ̀: На стїхо́внѣ ѻ҆ктѡ́иха. Сла́ва, ст҃ы́ѧ, гла́съ ѕ҃: Прїиди́те любодѣ́вственнїи: Тропа́рь, гла́съ и҃: Въ тебѣ̀ мт҃и: сегѡ̀ мѣ́сѧца въ а҃і де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃ы́ѧ на д҃, гла́съ є҃. По г҃-й пѣ́сни, сѣда́ленъ, ст҃ы́ѧ. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Вы́шнюю жи́знь возжелѣ́вши полꙋчи́ти, до́льнюю сла́дость тща́тельнѡ ѡ҆ста́вила є҆сѝ, и҆ самꙋ́ю себѐ смѣси́ла є҆сѝ посредѣ̀ мꙋже́й краснѣ́йшаѧ: хрⷭ҇та́ бо ра́ди жениха̀ твоегѡ̀ ѡ҆ ѡ҆брꙋ́чницѣ привре́менномъ небрегла̀ є҆сѝ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃ы́ѧ.

🕂 И҆ прпⷣбнагѡ ѻ҆тца̀ на́шегѡ се́ргїа и҆гꙋ́мена, ра́донежскагѡ чꙋдотво́рца.

Соверша́етсѧ собо́ръ є҆гѡ̀ и҆ во ѻ҆би́тели є҆гѡ̀ и҆ во хра́мѣхъ, въ про́чихъ же полѷеле́й.

Тропа́рь, гла́съ д҃: И҆́же добродѣ́телей подви́жникъ, ꙗ҆́кѡ и҆́стинный во́инъ хрⷭ҇та̀ бг҃а, на стра̑сти вельмѝ подвиза́лсѧ є҆сѝ въ жи́зни вре́меннѣй, въ пѣ́нїихъ, бдѣ́нїихъ же и҆ поще́нїихъ ѡ҆́бразъ бы́въ твои̑мъ ᲂу҆ченикѡ́мъ: тѣ́мже и҆ всели́сѧ въ тѧ̀ прест҃ы́й дх҃ъ, є҆гѡ́же дѣ́йствїемъ свѣ́тлѡ ᲂу҆кра́шенъ є҆сѝ. но ꙗ҆́кѡ и҆мѣ́ѧй дерзнове́нїе ко ст҃ѣ́й трⷪ҇цѣ, помина́й ста́до, є҆́же собра́лъ є҆сѝ мꙋ́дре, и҆ не забꙋ́ди ꙗ҆́коже ѡ҆бѣща́лсѧ є҆сѝ, посѣща́ѧ ча́дъ твои́хъ, се́ргїе преподо́бне ѻ҆́тче на́шъ.

Конда́къ, гла́съ и҃. Подо́бенъ: Взбра́нной: Хрⷭ҇то́вою любо́вїю ᲂу҆ѧзви́всѧ, прпⷣбне, и҆ томꙋ̀ невозвра́тнымъ жела́нїемъ послѣ́довавъ, всѧ́кое наслажде́нїе плотско́е возненави́дѣлъ є҆сѝ, и҆ ꙗ҆́кѡ со́лнце ѻ҆те́чествꙋ твоемꙋ̀ возсїѧ́лъ є҆сѝ: тѣ́мъ и҆ хрⷭ҇то́съ да́ромъ чꙋде́съ ѡ҆богати́ тѧ. помина́й на́съ чтꙋ́щихъ пресвѣ́тлꙋю па́мѧть твою̀, да зове́мъ тѝ: ра́дꙋйсѧ, се́ргїе бг҃омꙋ́дре.

к҃ѕ. 🕁 Преставле́нїе ст҃а́гѡ а҆пⷭ҇ла и҆ є҆ѵⷢ҇лі́ста +і҆ѡа́нна+ бг҃осло́ва.

На ма́лѣй вече́рни, стїхи̑ры на д҃, гла́съ в҃. Подо́бенъ: Є҆гда̀ ѿ дре́ва: Сла́ва, гла́съ то́йже, самогла́сенъ: А҆пⷭ҇лѡвъ ве́рхъ: И҆ ны́нѣ, бг҃оро́диченъ. На стїхо́внѣ стїхи̑ры, гла́съ а҃. Подо́бенъ: Всехва́льнїи мч҃нцы: съ припѣ́вы и҆́хъ: а҃-й: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ. в҃- й, Нб҃са̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. Сла́ва, гла́съ в҃: Бг҃осло́ве дѣ́вственниче: И҆ ны́нѣ, бг҃оро́диченъ, гла́съ то́йже: Всѐ ᲂу҆пова́нїе моѐ:

Тропа́рь, гла́съ в҃: А҆пⷭ҇ле хрⷭ҇тꙋ̀ бг҃ꙋ возлю́бленне, ᲂу҆скорѝ и҆зба́вити лю́ди без̾ѿвѣ́тны, прїе́млетъ тѧ̀ припада́юща, и҆́же па́дша на пе́рси прїе́мый: є҆го́же молѝ, бг҃осло́ве, и҆ належа́щꙋю мглꙋ̀ ꙗ҆зы́кѡвъ разгна́ти, просѧ̀ на́мъ ми́ра и҆ ве́лїѧ млⷭ҇ти.

Сла́ва, и҆ ны́нѣ: Всѧ̑ па́че смы́сла: Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀, стїхосло́вимъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃, гла́съ а҃, подо́бенъ: Нбⷭ҇ныхъ чинѡ́въ: Зри́тель неизрече́нныхъ ѿкрове́нїй: Сла́ва, гла́съ в҃: Сн҃а гро́мова: И҆ ны́нѣ: Пре́йде сѣ́нь: Вхо́дъ. Прокі́менъ днѐ. И҆ чтє́нїѧ г҃: а҃-е, Собо́рнагѡ посла́нїѧ і҆ѡа́ннова: Возлю́бленнїи, а҆́ще се́рдце на́ше: в҃-е, Возлю́бленнїи, а҆́ще си́це: г҃-е, Возлю́бленнїи, а҆́ще кто̀ рече́тъ, ꙗ҆́кѡ люблю̀ бг҃а: На лїті́и, стїхи́ра хра́ма: Та́же а҆пⷭ҇ла, гла́съ а҃: Рѣ́ки бг҃осло́вїѧ: Сла́ва, гла́съ д҃: Возле́гъ на пе́рси: И҆ ны́нѣ, бг҃оро́диченъ, гла́съ то́йже Со ѻ҆ц҃е́мъ и҆ дх҃омъ: и҆ ѻ҆бы̑чныѧ мл҃твы лїті́и. На стїхо́внѣ стїхи̑ры, гла́съ д҃, подо́бенъ: Зва́нный свы́ше: съ припѣ́вы и҆́хъ. Сла́ва, гла́съ ѕ҃: А҆пⷭ҇ле хрⷭ҇то́въ: И҆ ны́нѣ: Творе́цъ и҆ и҆зба́витель: На бл҃гослове́нїи хлѣ́бѡвъ тропа́рь, гла́съ в҃: А҆пⷭ҇ле хрⷭ҇тꙋ̀ бг҃ꙋ: два́жды, пи́санъ на ма́лѣй вече́рни. И҆ Бцⷣе дв҃о, є҆ди́ножды. И҆ бꙋ́ди и҆́мѧ гдⷭ҇не, съ пѣ́нїемъ, три́жды. Ѱало́мъ л҃г: Бл҃гословлю̀ гдⷭ҇а: Коне́цъ: Не лиша́тсѧ всѧ́кагѡ бл҃га. и҆ чте́нїе. На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла, два́жды: Сла́ва, и҆ ны́нѣ: Всѧ̑ па́че смы́сла: и҆ ѻ҆бы̑чныѧ каѳі̑смы. И҆ сѣда́льны а҆пⷭ҇ла, съ бг҃оро́дичны и҆́хъ: и҆ чтє́нїѧ. По чте́нїи же даю́тсѧ свѣщы̀ бра́тїи. Полѷеле́й, и҆ сѣда́ленъ, гла́съ и҃: Возле́гъ на пе́рси: два́жды. Сла́ва, и҆ ны́нѣ, бг҃оро́диченъ: Нбⷭ҇нꙋю две́рь: и҆ чте́нїе: Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ, воста́въ ѿ ме́ртвыхъ: По н҃-мъ ѱалмѣ̀, Сла́ва, Мл҃твами а҆пⷭ҇ла, млⷭ҇тиве, ѡ҆чи́сти мно́жєства согрѣше́нїй на́шихъ: И҆ ны́нѣ: Мл҃твами бцⷣы: Поми́лꙋй мѧ̀ бж҃е: Та́же, стїхи́ра, гла́съ в҃: Бг҃осло́ве дѣ́вственниче: Канѡ́нъ бцⷣы, со і҆рмосо́мъ на ѕ҃, в҃-гѡ гла́са: и҆ а҆пⷭ҇ла два̀ канѡ́на на и҃: є҆ди́нъ, гла́съ в҃: дрꙋгі́й, гла́съ ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ а҆пⷭ҇ла, гла́съ и҃, два́жды: Сла́ва, и҆ ны́нѣ, бг҃оро́диченъ: и҆ чте́нїе. По ѕ҃-й пѣ́сни,

Конда́къ, гла́съ в҃: Вели̑чїѧ твоѧ̑ дѣ́вственниче кто̀ повѣ́сть; то́чиши бо чꙋдеса̀, и҆ и҆злива́еши и҆сцѣлє́нїѧ, и҆ мо́лишисѧ ѡ҆ дꙋша́хъ на́шихъ, ꙗ҆́кѡ бг҃осло́въ и҆ дрꙋ́гъ хрⷭ҇то́въ.

И҆ і҆́косъ, и҆ про́логъ. На ѳ҃-й пѣ́сни, па́ки вжига́ютъ свѣщы̀ бра́тїѧ. По ѳ҃-й пѣ́сни, свѣти́ленъ а҆пⷭ҇ла: Сла́ва, и҆́нъ: И҆ ны́нѣ, бг҃оро́диченъ. На хвали́техъ стїхи̑ры на д҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ то́йже, самогла́сенъ. Бл҃говѣ́стниче і҆ѡа́нне. И҆ ны́нѣ: Влⷣчце, прїимѝ мл҃твы ра̑бъ твои́хъ: Славосло́вїе вели́кое. По трист҃о́мъ, тропа́рь а҆пⷭ҇ла. Сла́ва, и҆ ны́нѣ, бг҃оро́диченъ: Всѧ̑ па́че смы́сла: Є҆ктєнїѝ, и҆ ѿпꙋ́стъ. И҆ пое́мъ стїхи́рꙋ самогла́снꙋ ст҃а́гѡ, ю҆́же хо́щетъ є҆кклисїа́рхъ. И҆ и҆схо́дитъ і҆ере́й съ кади́ломъ, пред̾идꙋ́щꙋ є҆мꙋ̀ свѣти́льникꙋ, кади́тъ на а҆нало́гїи і҆кѡ́нꙋ ст҃а́гѡ а҆пⷭ҇ла, и҆ ѿда́въ кади́ло стои́тъ ѡ҆ деснꙋ́ю странꙋ̀ а҆нало́гїа: и҆ прихо́дитъ и҆гꙋ́менъ ко а҆нало́гїю, и҆ твори́тъ два̀ покло́ны, и҆ цѣлꙋ́етъ і҆кѡ́нꙋ ст҃а́гѡ а҆пⷭ҇ла. И҆ по цѣлова́нїи є҆ди́нъ покло́нъ: и҆ взе́мъ стрꙋче́цъ на то̀ ᲂу҆стро́енный, помазꙋ́етъ себѐ ѿ канди́ла ст҃ы́мъ є҆ле́емъ крⷭ҇тоѡбра́знѡ, на челѣ̀ свое́мъ: и҆ бра́тїѧ подо́бнѣ цѣлꙋ́етъ і҆кѡ́нꙋ ст҃а́гѡ, и҆гꙋ́менъ же помазꙋ́етъ ст҃ы́мъ є҆ле́емъ і҆ере́а, и҆ про́чꙋю бра́тїю. По пома́занїи же ст҃а́гѡ є҆ле́а, пое́мъ ча́съ пе́рвый. На а҃-мъ часѣ̀, тропа́рь и҆ конда́къ а҆пⷭ҇ла, и҆ быва́етъ коне́чный ѿпꙋ́стъ. [зрѝ] [Си́це пома́занїе быва́етъ всегда̀, и҆ во всѧ̑ пра́здники вели́кихъ ст҃ы́хъ, въ ни́хже быва́ютъ бдѣ̑нїѧ. На лїтꙋргі́и, бл҃жє́нна ѿ канѡ́на в҃-гѡ гла́са, пѣ́снь г҃- ѧ, на д҃: и҆ и҃-гѡ гла́са, пѣ́снь ѕ҃-ѧ, на д҃. По вхо́дѣ, тропа́рь хра́ма хрⷭ҇то́ва, и҆ бцⷣы, и҆ а҆пⷭ҇ла. Хра́мѡвъ же ст҃ы́хъ, тропарѝ и҆ кондакѝ не глаго́лютсѧ. Посе́мъ конда́къ хра́ма хрⷭ҇то́ва. Та́же, Сла́ва, конда́къ а҆пⷭ҇ла: И҆ ны́нѣ, хра́ма бцⷣы. А҆́ще ли нѣ́сть хра́ма бцⷣы: И҆ ны́нѣ, хра́ма хрⷭ҇то́ва. А҆́ще ли нѣ́сть хра́ма хрⷭ҇то́ва и҆ бцⷣы, глаго́лемъ тропарѝ си́це: Тропа́рь а҆пⷭ҇ла: Сла́ва, конда́къ є҆гѡ̀: И҆ ны́нѣ, Предста́тельство хрⷭ҇тїа́нъ: Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ, Собо́рнагѡ посла́нїѧ і҆ѡа́ннова зача́ло ѻ҃г ѿ полꙋ̀: Возлю́бленнїи, бг҃а никто́же ви́дѣ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Сті́хъ: Бг҃ъ прославлѧ́емь въ совѣ́тѣ ст҃ы́хъ. Є҆ѵⷢ҇лїе і҆ѡа́нна, зача́ло ѯ҃а: Стоѧ́хꙋ при крⷭ҇тѣ̀ і҆и҃совѣ: Прича́стенъ, Во всю̀ зе́млю.

к҃з. Ст҃а́гѡ мч҃нка +каллїстра́та+ и҆ дрꙋжи́ны є҆гѡ̀.

Стїхи̑ры ѻ҆ктѡ́иха г҃: И҆ ст҃ы́хъ г҃, гла́съ и҃, подо́бенъ: Ѽ пресла́внагѡ чꙋдесѐ! Сла́ва, гла́съ д҃: Пре́жде чⷭ҇тна́гѡ крⷭ҇та̀: На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: Сегѡ̀ мѣ́сѧца въ к҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃ы́хъ на д҃, гла́съ и҃. По г҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Всѧ́къ трꙋ́дъ дне́сь цр҃ковь ны́нѣ соверша́ющи ст҃і́и, восхвалѧ́етъ та́инственнѡ, ꙗ҆́кѡ за ню̀ страда́льчествовавшыѧ мч҃нцы бж҃е́ственнїи, добропобѣ́днїи, всемꙋ́дрїи.

Та́же сѣда́ленъ, гла́съ є҃. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ на крⷭ҇тъ.

Многоѡбра̑зныѧ ра̑ны претерпѣ́вше, и҆ вѣнцы̀ ѿ бг҃а ꙗ҆́вѣ прїи́мше, ѡ҆ на́съ моли́тесѧ бл҃же́ннїи хрⷭ҇тꙋ̀, па́мѧть всепра́зднственнꙋю ва́шꙋ соверша́ющихъ, велича́йшїй каллїстра́те, со страда́вшими съ тобо́ю, є҆́же ᲂу҆мири́ти па́ствꙋ и҆ лю́ди: то́й бо є҆́сть вѣ́рныхъ ᲂу҆твержде́нїе.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃ы́хъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха.

🕃 И҆ прпⷣбнагѡ ѻ҆тца̀ на́шегѡ савва́тїа солове́цкагѡ чꙋдотво́рца.

Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ г҃: Оу҆дали́всѧ мі́ра и҆ водвори́всѧ въ пꙋсты́ни, до́брымъ по́двигомъ подвиза́лсѧ є҆сѝ, ѕлострада́нїемъ и҆ внима́нїемъ и҆ мл҃твами: ѿѻнꙋ́дꙋже и҆ по сме́рти и҆сточа́еши и҆сцѣлє́нїѧ, савва́тїе ѻ҆́тче на́шъ. молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Конда́къ, гла́съ в҃: Жите́йскїѧ молвы̀ ѿбѣ́гъ, всели́лсѧ є҆сѝ въ морскі́й ѻ҆́стровъ, мꙋ́дре, и҆ крⷭ҇тъ тво́й взе́мъ, хрⷭ҇тꙋ̀ послѣ́довалъ є҆сѝ, въ моли́твахъ и҆ во бдѣ́нїихъ и҆ въ поще́нїихъ, ѕлострада́ньми пло́ть твою̀ и҆знꙋрѧ́ѧ: тѣ́мъ бы́лъ є҆сѝ преподо́бныхъ ᲂу҆добре́нїе: сегѡ̀ ра́ди любо́вїю па́мѧть твою̀ пра́зднꙋемъ, преподо́бне савва́тїе, молѝ хрⷭ҇та̀ бг҃а непреста́ннѡ ѡ҆ всѣ́хъ на́съ.

к҃и. 🕂 Прпⷣбнагѡ ѻ҆тца̀ на́шегѡ и҆ и҆сповѣ́дника +харїтѡ́на+.

Ве́черъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры на ѕ҃, гла́съ д҃. подо́бенъ: Да́лъ є҆сѝ зна́менїе: Сла́ва, гла́съ то́йже, самогла́сенъ: Бг҃оно́се харїтѡ́не: И҆ ны́нѣ, бг҃оро́диченъ: И҆́же тебѐ ра́ди: Вхо́дъ. Прокі́менъ днѐ. И҆ чтє́нїѧ, г҃, и҆ є҆ктєнїѝ. На стїхо́внѣ стїхи̑ры, гла́съ а҃, подо́бенъ: Всехва́льнїи мч҃нцы: съ припѣ́вы и҆́хъ: Чⷭ҇тна̀ пред̾ гдⷭ҇емъ: Сла́ва, гла́съ и҃: Мона́хѡвъ мно́жєства: И҆ ны́нѣ: Безневѣ́стнаѧ дв҃о: По Ѻ҆́ч҃е на́шъ: тропа́рь, гла́съ и҃: Сле́зъ твои́хъ тече́ньми: пи́санъ сегѡ̀ мѣ́сѧца въ г҃-й де́нь. Сла́ва, и҆ ны́нѣ: И҆́же на́съ ра́ди: И҆ ѿпꙋ́стъ. На ᲂу҆́трени, на Бг҃ъ гдⷭ҇ь: тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ. И҆ ѻ҆бы̑чныѧ каѳі̑смы, и҆ сѣда́льны ст҃а́гѡ. И҆ чте́нїе. Степє́нна а҃-й а҆нтїфѡ́нъ д҃-гѡ гла́са. Прокі́менъ, гла́съ то́йже: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви: Всѧ́кое дыха́нїе: Є҆ѵⷢ҇лїе матѳе́а, зача́ло і҃. По і҆и҃сѣ и҆до́ша наро́ди мно́зи: По н҃-мъ ѱалмѣ̀, стїхи́ра, гла́съ ѕ҃: Прпⷣбне ѻ҆́тче, во всю̀ зе́млю: Канѡ́нъ бцⷣы, со і҆рмосо́мъ на ѕ҃, гла́съ в҃: Нетре́нꙋ, неѻбы́чнꙋ: И҆ прпⷣбнагѡ на и҃, гла́съ д҃. Катава́сїа, Ѿве́рзꙋ ᲂу҆ста̀ моѧ̑. По г҃-й пѣ́сни сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ в҃. Подо́бенъ: Въ мл҃твахъ: Наслади́всѧ, бг҃омꙋ́дре, воздержа́нїѧ, и҆ пло́ти твоеѧ̀ вожделѣ́нїѧ ѡ҆бꙋзда́въ, ꙗ҆ви́лсѧ є҆сѝ вѣ́рою возраща́емь: и҆ ꙗ҆́кѡ жи́зни дре́во, посредѣ̀ раѧ̀ процвѣ́лъ є҆сѝ, харїтѡ́не всебл҃же́нне сщ҃е́ннѣйшїй.

И҆ і҆́косъ. По ѳ҃-й пѣ́сни свѣти́ленъ, два́жды. Сла́ва, и҆ ны́нѣ, бг҃оро́диченъ. На хвали́техъ, стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ є҃: Прпⷣбне ѻ҆́тче, гла́съ є҆ѵⷢ҇льскїй: И҆ ны́нѣ, бг҃оро́диченъ: Славосло́вїе вели́кое. По трист҃о́мъ, тропа́рь ст҃а́гѡ. Сла́ва и҆ ны́нѣ, бг҃оро́диченъ: Є҆ктєнїѝ. И҆ ѿпꙋ́стъ. И҆ ча́съ а҃-й, и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на ст҃а́гѡ, пѣ́снь г҃-ѧ, и҆ ѕ҃-ѧ, Прокі́менъ, гла́съ з҃: Восхва́лѧтсѧ прпⷣбнїи во сла́вѣ: Сті́хъ: Воспо́йте гдⷭ҇ви пѣ́снь но́вꙋ: А҆по́столъ къ корі́нѳѧнѡмъ, зача́ло рѻ҃ѕ: Бг҃ъ рекі́й и҆з̾ тьмы̀ свѣ́тꙋ возсїѧ́ти: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Є҆ѵⷢ҇лїе лꙋкѝ, зача́ло н҃д: Ста̀ і҆и҃съ на мѣ́стѣ ра́внѣ: Прича́стенъ: Въ па́мѧть вѣ́чнꙋю бꙋ́детъ првⷣникъ:

к҃ѳ. 🕃 Прпⷣбнагѡ ѻ҆тца̀ на́шегѡ +кѷрїа́ка+ ѿше́льника.

Стїхи̑ры на ѕ҃: гла́съ и҃, подо́бенъ: Что̀ вы̀ нарече́мъ: Сла́ва, гла́съ то́йже, самогла́сенъ: Мона́хѡвъ мно́жєства: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ, ѻ҆ктѡ́иха: Сла́ва гла́съ ѕ҃: Прпⷣбне ѻ҆́тче, во всю̀ зе́млю: По Ѻ҆́ч҃е на́шъ:

Тропа́рь, гла́съ а҃: Пꙋсты́нный жи́тель и҆ въ тѣлесѝ а҆́гг҃лъ. и҆ чꙋдотво́рецъ показа́лсѧ є҆сѝ, бг҃оно́се ѻ҆́тче на́шъ кѷрїа́че, посто́мъ, бдѣ́нїемъ, моли́твою, нбⷭ҇наѧ дарова́нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою притека́ющихъ къ тебѣ̀. сла́ва да́вшемꙋ тебѣ̀ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

На ᲂу҆́трени, ѻ҆́ба канѡ́на ѻ҆ктѡ́иха: и҆ ст҃а́гѡ на ѕ҃, гла́съ и҃. По г҃-й пѣ́сни,

Конда́къ, гла́съ и҃. Подо́бенъ: Возбра́нной: Ꙗ҆́кѡ побо́рника крѣ́пкаго и҆ застꙋ́пника, чтꙋ́щи тѧ̀ сщ҃е́ннаѧ ла́ѵра всегда̀ пра́зднꙋетъ лѣ́тнѣ па́мѧти: но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ врагѡ́въ находѧ́щихъ соблюди́ ны, да зове́мъ: ра́дꙋйсѧ ѻ҆́тче требл҃же́нне.

Та́же сѣда́ленъ, гла́съ є҃, два́жды. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Чистото́ю дꙋше́вною бж҃е́ственнѡ воѡрꙋжи́всѧ, и҆ непреста́ннꙋю мл҃твꙋ ꙗ҆́кѡ копїѐ врꙋчи́въ крѣ́пкѡ, ссѣ́клъ є҆сѝ де́мѡнскаѧ ѡ҆полчє́нїѧ, кѷрїа́че ѻ҆́тче на́шъ, моли́сѧ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃а́гѡ, И҆ ны́нѣ, бг҃оро́диченъ. На стїхо́внѣ ѻ҆ктѡ́иха: Сла́ва, гла́съ є҃: Прпⷣбне ѻ҆́тче: И҆ ны́нѣ, бг҃оро́диченъ и҆лѝ крⷭ҇тобг҃оро́диченъ. По трист҃о́мъ, тропа́рь ст҃а́гѡ, и҆ ѿпꙋ́стъ. На лїтꙋргі́и, бл҃жє́нна ѻ҆ктѡ́иха на д҃: И҆ прпⷣбнагѡ пѣ́снь г҃-ѧ, на д҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ, Что̀ возда́мъ гдⷭ҇ви ѡ҆ всѣ́хъ: А҆по́столъ къ гала́тѡмъ, зача́ло сг҃і. Пло́дъ дх҃о́вный: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а. Є҆ѵⷢ҇лїе лꙋкѝ, зача́ло к҃д: Ста̀ і҆и҃съ на мѣ́стѣ ра́внѣ: Прича́стенъ, Въ па́мѧть вѣ́чнꙋю:

л҃. 🕃 Ст҃а́гѡ сщ҃енномч҃нка +григо́рїа+, вели́кїѧ а҆рме́нїи.

Стїхи̑ры на ѕ҃, гла́съ ѕ҃, подо́бенъ: Всю̀ ѿложи́вше: Сла́ва, гла́съ то́йже, самогла́сенъ: Кто̀ досто́йнѡ: На стїхо́внѣ ѻ҆ктѡ́иха: Сла́ва, гла́съ ѕ҃: Въ незаходѧ́щїй ѻ҆́блакъ: Тропа́рь, гла́съ д҃: И҆ нра́вѡмъ прича́стникъ: сегѡ̀ мѣ́сѧца въ г҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃а́гѡ на ѕ҃, гла́съ д҃. По г҃-й пѣ́сни, сѣда́ленъ ст҃а́гѡ, гла́съ д҃. два́жды. По ѳ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: Бл҃госла́внаго и҆ сщ҃еннонача́льника всѝ ꙗ҆́кѡ страда́льца и҆́стины, дне́сь вѣ́рнїи въ пѣ́снехъ и҆ пѣснопѣ́нїихъ восхва́лимъ, бо́драго па́стырѧ и҆ ᲂу҆чи́телѧ, григо́рїа всемі́рнаго свѣти́льника, и҆ побо́рника: хрⷭ҇тꙋ́ бо мо́литсѧ є҆́же сп҃сти́сѧ на́мъ.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃а́гѡ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха. На лїтꙋргі́и, бл҃жє́нна ѻ҆ктѡ́иха, на д҃: и҆ ст҃а́гѡ, пѣ́снь г҃-ѧ, на д҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇ви ѡ҆ всѣ́хъ: А҆по́столъ къ корі́нѳѧнѡмъ, зача́ло рѯ҃ѕ: Бра́тїе, бо́дрствꙋйте: А҆ллилꙋ́їа, гла́съ в҃: Сщ҃е́нницы твоѝ: Є҆ѵⷢ҇лїе матѳе́а, зача́ло р҃г: Бди́те ᲂу҆́бѡ: Прича́стенъ, Въ па́мѧть вѣ́чнꙋю:

🕃 И҆ прпⷣбнагѡ ѻ҆тца̀ на́шегѡ +григо́рїа+, и҆́же на пе́лшмѣ рѣцѣ̀, во́логодскагѡ чꙋдотво́рца:

Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ во хра́мѣхъ.

Тропа́рь, гла́съ и҃: Любо́вїю хрⷭ҇то́вою, бг҃омꙋ́дре, просвѣти́всѧ, добродѣ́тельми ѡ҆блиста́лъ є҆сѝ, и҆ всѧ́кое наслажде́нїе плотско́е возненави́дѣвъ, и҆ въ пꙋсты́ню всели́всѧ, въ не́йже вельмѝ подвиза́лсѧ є҆сѝ въ жи́зни се́й вре́меннѣй въ пѣ́нїихъ, и҆ во бдѣ́нїихъ, и҆ въ поще́нїихъ: сегѡ̀ ра́ди и҆ хрⷭ҇то́съ да́ромъ чꙋде́съ ѡ҆богати́ тѧ. но помина́й на́съ чтꙋ́щихъ пресвѣ́тлꙋю па́мѧть твою̀, прпⷣбне ѻ҆́тче григо́рїе, и҆ молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Конда́къ, гла́съ и҃: Хрⷭ҇то́вою любо́вїю ᲂу҆ѧзви́всѧ, прпⷣбне, и҆ томꙋ̀ невозвра́тнымъ жела́нїемъ послѣ́довалъ є҆сѝ, всѧ́кое наслажде́нїе плотско́е возненави́дѣвъ, и҆ въ пꙋсты́ню всели́всѧ, въ не́й вельмѝ подвиза́лсѧ є҆сѝ. тѣ́мъ и҆ хрⷭ҇то́съ да́ромъ чꙋде́съ ѡ҆богати́ тѧ, помина́й на́съ чтꙋ́щихъ пресвѣ́тлꙋю па́мѧть твою̀. да зове́мъ тѝ: ра́дꙋйсѧ, прпⷣбне григо́рїе, ѻ҆́тче на́шъ.

И҆ ст҃а́гѡ +мїхаи́ла+, пе́рвагѡ митрополі́та кі́евскагѡ, и҆ всеѧ̀ рѡссі́и чꙋдотво́рца.

а҃. Ст҃а́гѡ а҆пⷭ҇ла +а҆на́нїи+, є҆ди́нагѡ ѿ седми́десѧти: И҆ прпⷣбнагѡ ѻ҆тца̀ +рѡма́на+ сладкопѣ́вца.

Ве́черъ, ѻ҆бы́чнаѧ каѳі́сма: На Гдⷭ҇и воззва́хъ, стїхи̑ры а҆пⷭ҇ла, гла́съ д҃, подо́бенъ: Зва́нный свы́ше: И҆ рѡма́на стїхи̑ры, гла́съ а҃, подо́бенъ: Нбⷭ҇ныхъ чинѡ́въ: Сла́ва, а҆пⷭ҇ла, гла́съ то́йже, самогла́сенъ: Сосꙋ́дъ и҆збра́нный: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Стїхо́вна, ѻ҆ктѡ́иха: И҆ а҆пⷭ҇ла сті́хъ, гла́съ д҃, съ припѣ́вомъ: Во всю̀ зе́млю и҆зы́де вѣща́нїе и҆́хъ: Стрⷭ҇тоте́рпческое прїѧ́телище: Сла́ва, прпⷣбнагѡ, гла́съ ѕ҃: Пе́рвое до́брыхъ нача́ло: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Тропа́рь а҆пⷭ҇ла, гла́съ г҃: А҆пⷭ҇ле ст҃ы́й: септе́мврїа въ к҃в де́нь.

Сла́ва, тропа́рь прпⷣбнагѡ, гла́съ и҃: Въ тебѣ̀, ѻ҆́тче, и҆звѣ́стнѡ сп҃се́сѧ є҆́же по ѡ҆́бразꙋ: прїи́мъ бо крⷭ҇тъ послѣ́довалъ є҆сѝ хрⷭ҇тꙋ̀, и҆ дѣ́ѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо: прилѣжа́ти же ѡ҆ дꙋшѝ, ве́щи безсме́ртнѣй: тѣ́мже и҆ со а҆́гг҃лы сра́дꙋетсѧ, прпⷣбне, рѡма́не дх҃ъ тво́й.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, Канѡ́нъ ѻ҆ктѡ́иха, є҆ди́нъ: и҆ а҆пⷭ҇ла, гла́съ и҃: И҆ прпⷣбнагѡ гла́съ ѕ҃. По г҃-й пѣ́сни,

Конда́къ прпⷣбнагѡ, гла́съ и҃: Бж҃е́ственными добродѣ́тельми дх҃а, и҆змла́да ᲂу҆краси́всѧ, рѡма́не премꙋ́дре, цр҃кви хрⷭ҇то́вѣ пречⷭ҇тно́е ᲂу҆краше́нїе бы́лъ є҆сѝ: пѣ́нїемъ прекра́снымъ ᲂу҆краси́въ ю҆̀ бл҃же́нне. тѣ́мъ мо́лимъ тѧ̀, пода́ждь жела́ющымъ бж҃е́ственнагѡ дарова́нїѧ твоегѡ̀, ꙗ҆́кѡ да вопїе́мъ тѝ. ра́дꙋйсѧ, ѻ҆́тче пребл҃же́нне, красото̀ цр҃ко́внаѧ.

Сѣда́ленъ а҆пⷭ҇ла: Сла́ва прпⷣбнагѡ. По ѕ҃-й пѣ́сни,

Конда́къ а҆пⷭ҇ла, гла́съ в҃. Подо́бенъ: Въ мл҃твахъ: Въ моли́твахъ теплѣ́йшїй застꙋ́пниче, и҆ просѧ́щымъ скорѣ́йшїй послꙋ́шателю, прїимѝ моле́нїе, а҆на́нїе, на́ше, и҆ хрⷭ҇та̀ молѝ, поми́ловати ны̀, є҆ди́наго во ст҃ы́хъ почива́ющаго.

И҆ і҆́косъ: и҆ чте́мъ про́логъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, а҆пⷭ҇ла, И҆ ны́нѣ, бг҃оро́диченъ: На стїхо́внѣ ѻ҆ктѡ́иха. Сла́ва, а҆пⷭ҇ла, гла́съ и҃: Оу҆ч҃нчѐ сп҃совъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На лїтꙋргі́и, бл҃жє́нна гла́съ: на д҃: и҆ а҆по́стола, пѣ́снь г҃, на д҃. Прокі́менъ а҆по́стола, гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ дѣѧ́нїй, зача́ло к҃а, ѿ полꙋ̀: Бѣ̀ нѣ́кто ᲂу҆чени́къ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и: Сті́хъ: Бг҃ъ прославлѧ́емь въ совѣ́тѣ ст҃ы́хъ: Є҆ѵⷢ҇лїе лꙋкѝ, зача́ло н҃а: Слꙋ́шаѧй ва́съ: Прича́стенъ: Во всю̀ зе́млю:

🕀 Въ то́йже де́нь пра́зднꙋемъ +покро́вꙋ+ прест҃ы́ѧ влⷣчцы на́шеѧ бцⷣы и҆ приснодв҃ы мр҃і́и.

А҆́ще ли хра́мъ є҆ѧ̀, и҆лѝ и҆зво́литъ настоѧ́тель соверши́ти всено́щное бдѣ́нїе, и҆ пое́мъ слꙋ́жбꙋ є҆ѧ̀ си́це: На ма́лѣй вече́рни, стїхи̑ры самогла́сны, гла́съ а҃, на д҃. Сла́ва, и҆ ны́нѣ, гла́съ ѕ҃: Прїиди́те празднолю́бныхъ: На стїхо́внѣ стїхи̑ры, гла́съ в҃, подо́бенъ: До́ме є҆ѵфра́ѳовъ: Сла́ва, и҆ ны́нѣ, гла́съ г҃: Прїиди́те всѝ:

Тропа́рь, гла́съ д҃: Дне́сь бл҃говѣ́рнїи лю́дїе свѣ́тлѡ пра́зднꙋемъ, ѡ҆сѣнѧ́еми твои́мъ бг҃ома́ти прише́ствїемъ, и҆ къ твоемꙋ̀ взира́юще пречⷭ҇томꙋ ѡ҆́бразꙋ, ᲂу҆ми́льнѡ глаго́лемъ: покры́й на́съ чⷭ҇тны́мъ твои́мъ покро́вомъ, и҆ и҆зба́ви на́съ ѿ всѧ́кагѡ ѕла̀, молѧ́щи сн҃а твоего̀, хрⷭ҇та̀ бг҃а на́шего: сп҃стѝ дꙋ́шы на́шѧ.

И҆ ѿпꙋ́стъ. На вели́цѣй вече́рни: Бл҃же́нъ мꙋ́жъ, а҃- й а҆нтїфѡ́нъ. На Гдⷭ҇и воззва́хъ стїхи̑ры на и҃, гла́съ а҃, подо́бенъ: Ѽ ди́вное чꙋ́до! И҆́ны стїхи̑ры, гла́съ д҃, подо́бенъ: Ꙗ҆́кѡ до́блѧ: Сла́ва, и҆ ны́нѣ, гла́съ и҃: Сра́дꙋютсѧ съ на́ми: Вхо́дъ, прокі́менъ днѐ, и҆ чтє́нїѧ трѝ: Бытїѧ̀ чте́нїе: И҆зы́де і҆а́кѡвъ: На лїті́и стїхи̑ры, гла́съ г҃. Сла́ва, и҆ ны́нѣ, гла́съ то́йже: Смы́слъ ѡ҆чи́стивше: На стїхо́внѣ стїхи̑ры, гла́съ в҃, съ припѣ́вы: а҃-й, Слы́ши дщѝ, и҆ ви́ждь: в҃-й, Лицꙋ̀ твоемꙋ̀: Сла́ва, и҆ ны́нѣ, гла́съ в҃: Ꙗ҆́кѡ вѣнце́мъ пресвѣ́тлымъ: На бл҃гослове́нїи хлѣ́бѡвъ, Тропа́рь, гла́съ д҃: Дне́сь бл҃говѣ́рнїи лю́дїе: пи́санъ на ма́лѣй вече́рни, и҆ чте́нїе. На ᲂу҆́трени, на Бг҃ъ гдⷭ҇ь, тропа́рь три́жды. По каѳі́смахъ сѣда́льны покро́ва, и҆ чте́нїе. По полѷеле́и сѣда́ленъ, гла́съ д҃, Сла́ва, и҆ ны́нѣ, то́йже. Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ: Сті́хъ: Лицꙋ̀ твоемꙋ̀ помо́лѧтсѧ: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃: Воста́вши мр҃їа́мъ: ѱало́мъ н҃. Сла́ва, Мл҃твами бцⷣы: И҆ ны́нѣ, то́йже. Поми́лꙋй мѧ̀, бж҃е: По н҃-мъ ѱалмѣ̀ стїхи́ра, гла́съ и҃: Сра́дꙋютсѧ съ на́ми: Канѡ́нъ бцⷣы, на в҃і, і҆рмо́съ по два́жды. По г҃-й пѣ́сни сѣда́ленъ, гла́съ є҃. Сла́ва, и҆ ны́нѣ, то́йже. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Дв҃а дне́сь предстои́тъ въ це́ркви, и҆ съ ли́ки ст҃ы́хъ неви́димѡ за ны̀ мо́литсѧ бг҃ꙋ: а҆́гг҃ли со а҆рхїере́и покланѧ́ютсѧ, а҆по́столи же со прⷪ҇ро́ки ликовствꙋ́ютъ: на́съ бо ра́ди мо́литъ бцⷣа превѣ́чнаго бг҃а.

И҆ і҆́косъ. По ѳ҃-й пѣ́сни свѣти́ленъ покро́ва. На хвали́техъ стїхи̑ры на д҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, и҆ ны́нѣ, гла́съ ѕ҃: Ꙗ҆́кѡ ви́дѣ тѧ̀: Славосло́вїе вели́кое. И҆ ѿпꙋ́стъ. На лїтꙋргі́и. бл҃жє́нна ѿ канѡ́на, пѣ́снь г҃-ѧ, и҆ ѕ҃-ѧ. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆по́столъ ко є҆вре́ємъ, зача́ло т҃к: И҆мѣ́ѧше пе́рваѧ ски́нїа: А҆ллилꙋ́їа, гла́съ и҃: Слы́ши дщѝ, и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ: Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: Прича́стенъ: Ча́шꙋ сп҃се́нїѧ прїимꙋ̀:

Вѣ́домо же бꙋ́ди и҆ сїѐ: Ꙗ҆́кѡ а҆́ще слꙋчи́тсѧ пра́здникъ покро́ва прест҃ы́ѧ бцⷣы въ де́нь седми́чный, кромѣ̀ недѣ́ли, и҆ и҆зво́литъ кто̀ пѣ́ти кꙋ́пнѡ съ покро́вомъ а҆пⷭ҇лꙋ а҆на́нїи, и҆ прпⷣбномꙋ рѡма́нꙋ, да пое́тъ си́це: На ма́лѣй вече́рни, стїхи̑ры покро́ва на д҃, гла́съ а҃: самогла́сны. Сла́ва, и҆ ны́нѣ, гла́съ ѕ҃: Прїиди́те празднолю́бныхъ собо́ри: На стїхо́внѣ стїхи̑ры, гла́съ в҃, подо́бенъ: До́ме є҆ѵфра́ѳовъ: Сла́ва, и҆ ны́нѣ, гла́съ г҃: Прїиди́те всѝ празднолю́бцы: Тропа́рь покро́ва пи́санъ въ пе́рвой слꙋ́жбѣ. Та́же є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни пое́мъ, бл҃же́нъ мꙋ́жъ, а҃- й а҆нтїфѡ́нъ. На Гдⷭ҇и воззва́хъ, стїхи̑ры покро́ва, на д҃: И҆ а҆пⷭ҇ла, г҃: И҆ рѡма́на, г҃. Сла́ва, а҆пⷭ҇ла: И҆ ны́нѣ, покро́ва. Вхо́дъ: Прокі́менъ днѐ. Чтє́нїѧ г҃, покро́ва. є҆ктєнїѝ ѻ҆бы̑чныѧ. На лїті́и, стїхи̑ры покро́ва, гла́съ г҃. Сла́ва, а҆пⷭ҇ла: И҆ ны́нѣ, покро́ва. На стїхо́внѣ стїхи̑ры покро́ва, гла́съ в҃, самогла́сны. Сла́ва, прпⷣбнагѡ, И҆ ны́нѣ, покро́ва. На бл҃гослове́нїи хлѣ́бѡвъ тропа́рь покро́ва, гла́съ д҃: Дне́сь бл҃говѣ́рнїи лю́дїе: три́жды. И҆ бꙋ́ди и҆́мѧ гдⷭ҇не, три́жды, съ пѣ́нїемъ: и҆ ѱало́мъ л҃г: Бл҃гословлю̀ гдⷭ҇а: и҆ чте́нїе. На ᲂу҆́трени, на Бг҃ъ гдⷭ҇ь, тропа́рь покро́ва: Та́же а҆пⷭ҇ла: Сла́ва, рѡма́на: И҆ ны́нѣ, покро́ва: и҆ ѻ҆бы̑чныѧ каѳі̑смы: По каѳі́смахъ сѣда́ленъ покро́ва: и҆ чте́нїе. По полѷеле́и сѣда́ленъ покро́ва: и҆ чте́нїе. Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ: Сті́хъ: Лицꙋ̀ твоемꙋ̀ помолѧ́тсѧ: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃: Воста́вши мр҃їа́мъ: ѱало́мъ н҃. Сла́ва, Мл҃твами бцⷣы: И҆ ны́нѣ, то́йже. Поми́лꙋй мѧ̀, бж҃е: По н҃-мъ ѱалмѣ̀ стїхи́ра, гла́съ и҃: Сра́дꙋютсѧ съ на́ми: Канѡ́нъ покро́ва, со і҆рмосо́мъ на ѕ҃: и҆ а҆пⷭ҇ла на д҃, и҆ прпⷣбнагѡ на д҃. Катава́сїа, Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ а҆пⷭ҇ла, и҆ прпⷣбнагѡ: и҆ сѣда́ленъ а҆пⷭ҇ла: Сла́ва, прпⷣбнагѡ: И҆ ны́нѣ, покро́ва, и҆ чте́нїе. По ѕ҃-й пѣ́сни, конда́къ и҆ і҆́косъ покро́ва, пи́санъ въ пе́рвой слꙋ́жбѣ, и҆ про́логъ. По ѳ҃-й пѣ́сни свѣти́ленъ покро́ва: Сла́ва, а҆пⷭ҇ла, И҆ ны́нѣ, покро́ва. На хвали́техъ стїхи̑ры покро́ва, на д҃: Сла́ва, а҆пⷭ҇ла: И҆ ны́нѣ, покро́ва. Славосло́вїе вели́кое. По трист҃о́мъ тропа́рь а҆пⷭ҇ла: Сла́ва, прпⷣбнагѡ: И҆ ны́нѣ, покро́ва. Є҆ктєнїѝ, и҆ ѿпꙋ́стъ, и҆ ча́съ а҃-й. На а҃-мъ часѣ̀, тропа́рь покро́ва: Сла́ва, а҆пⷭ҇ла: И҆ ны́нѣ, бг҃оро́диченъ часѡ́въ. По трист҃о́мъ, конда́къ покро́ва, и҆ соверше́нный ѿпꙋ́стъ. Та́кожде и҆ на про́чихъ часѣ́хъ, въ нача́лѣ глаго́лемъ тропа́рь покро́ва: Ст҃ы́хъ же тропарѝ премѣнѧ́емъ. Конда́къ же на всѣ́хъ часѣ́хъ глаго́лемъ покро́ва. На лїтꙋргі́и, бл҃жє́нна, ѿ канѡ́на покро́ва пѣ́снь г҃, на д҃: и҆ а҆пⷭ҇ла ѕ҃-ѧ, на д҃. По вхо́дѣ, тропа́рь покро́ва, и҆ а҆пⷭ҇ла, и҆ прпⷣбнагѡ. Конда́къ а҆пⷭ҇ла: Сла́ва, прпⷣбнагѡ: И҆ ны́нѣ, покро́ва. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: И҆ а҆пⷭ҇ла: Во всю̀ зе́млю: А҆по́столъ покро́ва, ко є҆вре́ємъ, зача́ло т҃к: И҆мѣ́ѧше пе́рваѧ ски́нїѧ: и҆ а҆пⷭ҇ла, дѣѧ́нїй, зача́ло к҃а, ѿ полꙋ̀: Бѣ̀ нѣ́кто ᲂу҆чени́къ въ дама́сцѣ: А҆ллилꙋ́їа, гла́съ и҃: Слы́ши дщѝ и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ: и҆ а҆пⷭ҇ла, И҆сповѣ́дѧтъ нб҃са̀ чꙋдеса̀ твоѧ̑: Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: и҆ а҆пⷭ҇ла, лꙋкѝ, зача́ло н҃а: Слꙋ́шаѧй ва́съ: Прича́стенъ, Ча́шꙋ сп҃се́нїѧ: Дрꙋгі́й, Во всю̀ зе́млю: Рѧ́дъ, а҆по́столъ, и҆ є҆ѵⷢ҇лїе, вычита́емъ напредѝ.

[зрѝ] Подоба́етъ вѣ́дати, ꙗ҆́кѡ а҆́ще слꙋчи́тсѧ пра́здникъ прест҃ы́ѧ бцⷣы чⷭ҇тна́гѡ є҆ѧ̀ покро́ва, и҆ ст҃а́гѡ а҆пⷭ҇ла а҆на́нїи въ недѣ́лю.

Въ сꙋббѡ́тꙋ, на ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны гла́са, на д҃: Сла́ва, и҆ ны́нѣ, покро́ва. На стїхо́внѣ стїхи́ра воскрⷭ҇на, а҃, и҆ покро́ва стїхо́вна вели́кїѧ вече́рни, съ припѣ́вы и҆́хъ. Сла́ва, и҆ ны́нѣ, покро́ва, ма́лыѧ вече́рни. По трист҃о́мъ, тропа́рь воскрⷭ҇нъ. Сла́ва, и҆ ны́нѣ, покро́ва. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны трѝ, и҆ а҆нато́лїевъ а҃, и҆ покро́ва трѝ, и҆ а҆пⷭ҇ла а҆на́нїи, г҃, Сла́ва, покро́ва: И҆ ны́нѣ, бг҃оро́диченъ гла́са. Чтє́нїѧ покро́ва, трѝ. На лїті́и стїхи̑ры покро́ва: Сла́ва, а҆пⷭ҇ла: И҆ ны́нѣ, покро́ва. На стїхо́внѣ стїхи̑ры воскрⷭ҇ны: Сла́ва а҆пⷭ҇ла: И҆ ны́нѣ, покро́ва. На бл҃гослове́нїи хлѣ́бѡвъ тропа́рь покро́ва, три́жды. А҆́ще ли нѣ́сть бдѣ́нїѧ, глаго́лемъ тропа́рь воскрⷭ҇нъ: Сла́ва, а҆пⷭ҇ла: И҆ ны́нѣ, покро́ва. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, а҆пⷭ҇ла: И҆ ны́нѣ, покро́ва. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ. Та́же полѷеле́й, и҆ тропарѝ, А҆́гг҃льскїй собо́ръ: и҆ ѵ҆пакоѝ гла́са, и҆ сѣда́льны покро́ва всѝ. Степє́нна, и҆ прокі́менъ гла́са. Є҆ѵⷢ҇лїе воскрⷭ҇но, и҆ прѡ́чаѧ. Канѡ́нъ воскрⷭ҇нъ со і҆рмосо́мъ на д҃, и҆ покро́ва на ѕ҃, и҆ а҆пⷭ҇ла на д҃. Катава́сїа, Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ покро́ва, и҆ а҆пⷭ҇ла, и҆ сѣда́ленъ а҆пⷭ҇ла: Сла́ва, и҆ ны́нѣ, покро́ва. По ѕ҃-й пѣ́сни, конда́къ воскрⷭ҇нъ. На ѳ҃-й пѣ́сни пое́мъ Чⷭ҇тнѣ́йшꙋю: Свѣти́ленъ воскрⷭ҇нъ, Сла́ва, а҆пⷭ҇ла: И҆ ны́нѣ, покро́ва. На хвали́техъ стїхи̑ры воскрⷭ҇ны д҃, и҆ покро́ва д҃, со сла́внымъ, съ припѣ́вы вече́рними. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ, тропа́рь воскрⷭ҇нъ, є҆ктєнїѝ, и҆ ѿпꙋ́стъ, и҆ ча́съ а҃-й. На а҃-мъ часѣ̀, тропа́рь воскрⷭ҇нъ: Сла́ва, покро́ва: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ покро́ва. На г҃-мъ часѣ̀, тропа́рь воскрⷭ҇нъ, Сла́ва а҆пⷭ҇ла: И҆ ны́нѣ, и҆ бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ. Та́кожде и҆ на про́чихъ часѣ́хъ глаго́лемъ конда́къ воскрⷭ҇нъ, и҆ покро́ва, премѣнѧ́юще. На лїтꙋргі́и, бл҃жє́нна гла́са, на д҃, и҆ покро́ва пѣ́снь г҃-ѧ, на д҃, и҆ а҆пⷭ҇ла пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ покро́ва, и҆ а҆пⷭ҇ла. Конда́къ воскрⷭ҇нъ: Сла́ва, а҆пⷭ҇ла: И҆ ны́нѣ, покро́ва. Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ, пре́жде воскрⷭ҇нъ, и҆ пото́мъ бцⷣы. [зрѝ] Прпⷣбнагѡ же рѡма́на слꙋ́жба ѡ҆ставлѧ́етсѧ, и҆ пое́тсѧ на повече́рїи.

🕃 Прпⷣбнагѡ ѻ҆тца̀ на́шегѡ +са́ввы+, ви́шерскагѡ чꙋдотво́рца.

Соверша́етсѧ собо́ръ є҆гѡ̀ во ѻ҆би́тели є҆гѡ̀, по свидѣ́тельствꙋ а҆рхїере́а сꙋ́щагѡ та́мѡ.

Тропа́рь, гла́съ д҃: Ѿ ю҆́ности твоеѧ̀ ве́сь бг҃ꙋ порабо́тилсѧ є҆сѝ, бл҃же́нне, и҆ тогѡ̀ ра́ди любвѐ ѻ҆те́чество и҆ ро́дъ ѡ҆ста́вилъ є҆сѝ, въ пꙋсты́ню всели́всѧ, и҆ въ не́й жесто́кое житїѐ показа́въ, чꙋде́съ дарова̑нїѧ ѿ гдⷭ҇а прїѧ́лъ є҆сѝ, са́вво прпⷣбне: молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Конда́къ, гла́съ и҃. Подо́бенъ: Взбра́нной: Ѻ҆те́чества, прпⷣбне, ᲂу҆дали́всѧ, и҆ всели́всѧ въ пꙋсты́ню, и҆ та́мѡ на сто́лпъ вше́дъ, и҆дѣ́же жесто́кое житїѐ показа́лъ є҆сѝ, и҆ мно́гихъ житїе́мъ ᲂу҆диви́въ, ѿню́дꙋже дарова́нїе чꙋде́съ ѿ хрⷭ҇та̀ прїѧ́лъ є҆сѝ. помина́й на́съ чествꙋ́ющихъ па́мѧть твою̀, да зове́мъ тѝ: ра́дꙋйсѧ, са́вво, ѻ҆́тче на́шъ.

в҃. 🕃 Ст҃а́гѡ сщ҃енномч҃нка +кѷпрїа́на+: И҆ ст҃ы́ѧ мч҃нцы +і҆ꙋсті́ны+: И҆ ст҃а́гѡ и҆ бл҃же́ннагѡ +а҆ндре́а+, хрⷭ҇та̀ ра́ди ю҆ро́дивагѡ.

На Гдⷭ҇и воззва́хъ стїхи̑ры на ѕ҃, гла́съ г҃. Подо́бенъ: Ꙗ҆́кѡ до́блѧ: Сла́ва, гла́съ в҃: Оу҆че́нїѧ пре́лесть: На стїхо́внѣ ѻ҆ктѡ́иха. Сла́ва, гла́съ в҃: Свѣти́льника бг҃осїѧ́ннагѡ: Тропа́рь, гла́съ д҃: И҆ нра́вѡмъ прича́стникъ: септе́мврїа въ г҃-й де́нь. На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды: и҆ ѻ҆бы̑чныѧ каѳі̑смы, и҆ чтє́нїѧ. Ѻ҆́ба канѡ́на ѻ҆ктѡ́иха без̾ мч҃ничнѡвъ: и҆ ст҃ы́хъ гла́съ д҃, на ѕ҃. По г҃-й пѣ́сни сѣда́ленъ, два́жды. По ѕ҃-й пѣ́сни,

Конда́къ, гла́съ а҃. Подо́бенъ: Ли́къ а҆́гг҃льскїй: Ѿ хꙋдо́жества волше́бнагѡ ѡ҆брати́всѧ, бг҃омꙋ́дре, къ позна́нїю бж҃е́ственномꙋ: показа́лсѧ є҆сѝ мі́рꙋ вра́чь мꙋдрѣ́йшїй, и҆сцѣлє́нїѧ да́рꙋѧ чествꙋ́ющымъ тѧ̀, кѷпрїа́не со і҆ꙋсті́ною: съ не́юже моли́сѧ чл҃вѣколю́бцꙋ влⷣцѣ, сп҃стѝ дꙋ́шы на́шѧ.

И҆ і҆́косъ, и҆ про́логъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃а́гѡ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха. Сла́ва, гла́съ и҃: И҆́же ѕло́бы: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На лїтꙋргі́и, бл҃жє́нна ѻ҆ктѡ́иха, на д҃: и҆ ст҃ы́хъ пѣ́снь г҃-ѧ, на д҃: Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ: А҆по́столъ къ тїмоѳе́ю, зача́ло с҃п: Бл҃годарю̀ ᲂу҆крѣплѧ́ющаго мѧ̀ хрⷭ҇та̀: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ: Є҆ѵⷢ҇лїе і҆ѡа́нна, зача́ло л҃ѕ: А҆́зъ є҆́смь две́рь: Прича́стенъ, Въ па́мѧть вѣ́чнꙋю:

[зрѝ] Слꙋ́жба ст҃а́гѡ а҆ндре́а ю҆ро́дивагѡ пое́тсѧ на повече́рїи.

Тропа́рь а҆ндре́ю, гла́съ а҃: Гла́съ а҆пⷭ҇ла твоегѡ̀ па́ѵла ᲂу҆слы́шавъ глаго́лющъ: мы̀ ю҆ро́ди хрⷭ҇та̀ ра́ди. ра́бъ тво́й а҆ндре́й ю҆ро́дъ бы́сть на землѝ, тебѐ ра́ди, хрⷭ҇тѐ бж҃е: тѣ́мже ны́нѣ па́мѧть є҆гѡ̀ почита́юще, тебѣ̀ мо́лимсѧ, гдⷭ҇и, сп҃сѝ дꙋ́шы на́шѧ.

Конда́къ, гла́съ д҃. Подо́бенъ: Вознесы́йсѧ: Во ю҆ро́дство претвори́всѧ во́лею, мі́ра сегѡ̀ красоты̑ ѿню́дъ возненави́дѣлъ є҆сѝ, плотска̑ѧ мꙋдрова̑нїѧ ᲂу҆вѧди́лъ є҆сѝ, посто́мъ и҆ жа́ждею, и҆ зно́емъ и҆ стꙋ́денїю мра́за, ѿ дождѧ̀ и҆ снѣ́га, и҆ ѿ про́чїѧ воздꙋ́шныѧ тѧготы̀ никогда́же ᲂу҆клони́всѧ, ѡ҆чи́стилъ є҆сѝ себѐ ꙗ҆́кѡ зла́то въ горни́лѣ, а҆ндре́е бл҃же́нне.

г҃. 🕃 Ст҃а́гѡ сщ҃енномч҃нка +дїонѵ́сїа+ а҆реопагі́та.

На Гдⷭ҇и воззва́хъ, стїхи̑ры на ѕ҃: гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ в҃: Прїиди́те согла́снѡ: На стїхо́внѣ ѻ҆ктѡ́иха. Сла́ва, гла́съ д҃: Нбⷭ҇нагѡ зна́нїѧ.

Тропа́рь, гла́съ д҃: Бл҃гости наꙋчи́всѧ, и҆ трезвѧ́сѧ во всѣ́хъ, бл҃го́ю со́вѣстїю сщ҃еннолѣ́пнѡ ѡ҆бо́лксѧ, поче́рплъ є҆сѝ ѿ сосꙋ́да и҆збра́ннагѡ неизречє́ннаѧ, и҆ вѣ́рꙋ соблю́дъ, ра́вное тече́нїе соверши́лъ є҆сѝ, сщ҃енномꙋ́чениче дїонѵ́сїе. Молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды, и҆ ѻ҆бы̑чныѧ каѳі̑смы: и҆ чтє́нїѧ. Ѻ҆́ба канѡ́на ѻ҆ктѡ́иха. И҆ ст҃а́гѡ на ѕ҃, гла́съ и҃. По г҃-й пѣ́сни сѣда́ленъ, два́жды. По ѕ҃-й пѣ́сни,

Конда́къ, гла́съ и҃. Подо́бенъ: Взбра́нной: Нбⷭ҇наѧ врата̀ проше́дъ дх҃омъ, ꙗ҆́кѡ ᲂу҆чени́къ, до тре́тїѧгѡ нб҃сѐ дости́гшагѡ а҆пⷭ҇ла, дїонѵ́сїе, неизрече́нныхъ ѡ҆богати́лсѧ є҆сѝ всѧ́кимъ ра́зꙋмомъ, и҆ ѡ҆зари́лъ є҆сѝ во тьмѣ̀ невѣ́дѣнїѧ сѣдѧ́щыѧ. тѣ́мже зове́мъ: ра́дꙋйсѧ, ѻ҆́тче всемі́рный.

И҆ і҆́косъ, и҆ про́логъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃а́гѡ, и҆ ны́нѣ, бг҃оро́диченъ. На стїхо́внѣ ѻ҆ктѡ́иха, Сла́ва, ст҃а́гѡ, гла́съ и҃: Во ст҃и́телехъ, и҆ мч҃нцѣхъ: На лїтꙋргі́и, бл҃жє́нна ѻ҆ктѡ́иха, на д҃: И҆ ст҃а́гѡпѣ́снь г҃-ѧ на д҃. Прокі́менъ, гла́съ и҃: Восхва́лѧтсѧ прпⷣбнїи во сла́вѣ: Сті́хъ: Воспо́йте гдⷭ҇еви пѣ́снь но́вꙋ: А҆по́столъ дѣѧ́нїй, зача́ло м҃ ѿ полꙋ̀: Пое́мше па́ѵла ведо́ша на а҆реопа́гъ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ: Є҆ѵⷢ҇лїе матѳе́а, зача́ло н҃є ѿ полꙋ̀: Подо́бно є҆́сть црⷭ҇твїе нбⷭ҇ное человѣ́кꙋ кꙋпцꙋ̀: Прича́стенъ: Въ па́мѧть вѣ́чнꙋю:

д҃. Ст҃а́гѡ сщ҃енномч҃нка +і҆ероѳе́а+, є҆пⷭ҇кпа а҆ѳи́нскагѡ.

Стїхи̑ры ѻ҆ктѡ́иха, г҃: И҆ ст҃а́гѡ г҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ в҃. Самогла́сенъ. Предста́въ ᲂу҆спе́нїю: На стїхо́внѣ ѻ҆ктѡ́иха. Тропа́рь вчера́шнїй. На ᲂу҆́трени, ѻ҆́ба канѡ́на ѻ҆ктѡ́иха: и҆ ст҃а́гѡ на д҃, гла́съ и҃. По г҃-й пѣ́сни,

Конда́къ, гла́съ и҃. Подо́бенъ: Взбра́нной: Сщ҃еннонача́льника а҆ѳи́нскаго восхвалѧ́емъ тѧ̀, ꙗ҆́кѡ тайноꙋчи́вшесѧ тобо́ю стра̑ннымъ и҆ неизречє́ннымъ: ꙗ҆ви́лсѧ бо є҆сѝ бг҃опрїѧ́тный пѣсносло́вецъ. Но молѝ, всебл҃же́нне і҆ероѳе́е: ѿ всѧ́кихъ на́мъ грѣхопаде́нїй и҆зба́витисѧ, да зове́мъ: ра́дꙋйсѧ ѻ҆́тче бг҃омꙋ́дре.

И҆ сѣда́ленъ ст҃а́гѡ. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Ꙗ҆́коже сто́лпъ непоколеби́мь і҆ероѳе́е, преще́нїѧ врагѡ́въ не ᲂу҆страши́лсѧ є҆сѝ: но пре́лести разрꙋши́лъ є҆сѝ тверды́ню, ꙗ҆́кѡ ка́мень че́стенъ валѧ́ѧсѧ ѻ҆́тче. тѣ́мъ влⷣка тѧ̀ хра́брствовавша вѣнча́етъ живонача́льною и҆ бж҃е́ственною десни́цею, є҆го́же ѡ҆ всѣ́хъ на́съ ᲂу҆молѝ.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃а́гѡ. На стїхо́внѣ ѻ҆ктѡ́иха.

🕃 Въ то́йже де́нь ѡ҆брѣ́тенїе чⷭ҇тны́хъ моще́й, и҆̀же во ст҃ы́хъ ѻ҆тє́цъ на́шихъ, +гꙋ́рїа+ пе́рвагѡ а҆рхїепⷭ҇кпа каза́нскагѡ и҆ +варсоно́фїа+ є҆пⷭ҇кпа тверска́гѡ.

Соверша́етсѧ собо́ръ и҆́хъ во гра́дѣ каза́ни, и҆ во хра́мѣ и҆́хъ.

Тропа́рь, гла́съ г҃: Пе́рвїи ᲂу҆чи́телїе пре́жде те́мномꙋ, ны́нѣ же свѣ́тломꙋ и҆ новопросвѣще́нномꙋ гра́дꙋ каза́ни, пе́рвїи возвѣсти́телїе пꙋтѝ сп҃си́тельнагѡ, и҆́стиннїи храни́телїе а҆пⷭ҇льскихъ преда́нїй, столпѝ непоколеби́мїи, бл҃гоче́стїѧ ᲂу҆чи́телїе, и҆ правосла́вїѧ наста̑вницы, гꙋ́рїе и҆ варсоно́фїе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю млⷭ҇ть.

Конда́къ варсоно́фїю, гла́съ ѕ҃: Воздержа́нїемъ тѣ́ло дх҃ꙋ порабо́тивъ, дꙋ́шꙋ же равноа́гг҃льнꙋ сотвори́лъ є҆сѝ: сегѡ̀ ра́ди свѧти́тельства са́номъ поче́тсѧ: чи́стѣ чистѣ́йшемꙋ предстои́ши. молѝ хрⷭ҇та̀ бг҃а, ст҃и́телю, сп҃стѝ +і҆мпера́тора+ на́шего вседержа́внаго, бл҃гоче́стїѧ содержи́телѧ, и҆ лю́ди твоѧ̑, ст҃е, да всѝ вопїе́мъ тѝ: ра́дꙋйсѧ, ѻ҆́тче прпⷣбне варсоно́фїе, гра́дꙋ на́шемꙋ каза́ни похвала̀ и҆ ᲂу҆твержде́нїе.

Конда́къ, гꙋ́рїю, гла́съ д҃: Чꙋ́вствєнныѧ стра̑сти побѣди́въ, чистото́ю ꙗ҆́кѡ со́лнце возсїѧ́лъ є҆сѝ, чи́сто житїѐ до конца̀ сохрани́въ, и҆ ѿ невѣ́рїѧ вѣ́рꙋ мно́гихъ ко хрⷭ҇тꙋ̀ приве́лъ є҆сѝ, и҆ тогѡ̀ ра́ди ѿ бг҃а нетлѣ́нїемъ почте́нъ бы́лъ є҆сѝ, и҆ чꙋдесы̀ ᲂу҆дивлѧ́емь. мо́лимъ тѧ̀, ст҃и́телю гꙋ́рїе, мл҃твами твои́ми ѿ бѣ́дъ и҆зба́ви на́съ да зове́мъ тѝ: ра́дꙋйсѧ, ѻ҆́тче преди́вный, гра́дꙋ каза́ни похвала̀ и҆ ᲂу҆твержде́нїе.

є҃. Ст҃ы́ѧ мч҃нцы +харїті́ны+:

Стїхи̑ры ѻ҆ктѡ́иха, г҃: и҆ ст҃ы́ѧ, г҃, гла́съ д҃. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь, гла́съ д҃: А҆́гница твоѧ̀, і҆и҃се: септе́мврїа въ ѕ҃і-й де́нь. На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́ѧ на д҃: гла́съ д҃. По г҃-й пѣ́сни, сѣда́ленъ. По ѕ҃- й пѣ́сни,

Конда́къ, гла́съ в҃. Подо́бенъ: Вы́шихъ и҆щѧ̀: Крѣ́пкимъ ра́зꙋмомъ, харїті́но, дꙋ́шꙋ ᲂу҆тве́рждши вѣ́рою, бори́телѧ врага̀ ꙗ҆́вѣ посрами́ла є҆сѝ: ᲂу҆ хрⷭ҇та̀ предста̀, всебл҃же́ннаѧ, червлени́цꙋ ѿ крове́й твои́хъ носѧ́щи и҆ при́снѡ со а҆́гг҃лы ра́дꙋющисѧ: молѝ за ны̀ стрⷭ҇тоте́рпице.

На стїхо́внѣ ѻ҆ктѡ́иха.

🕃 Въ то́йже де́нь ст҃ы́хъ ст҃и́телей, +петра̀+, +а҆леѯі́а+, +і҆ѡ́ны+ и҆ +фїлі́ппа+, митрополі́тѡвъ моско́вскихъ, и҆ всеѧ̀ рѡссі́и чꙋдотво́рцєвъ.

Соверша́етсѧ собо́ръ и҆́хъ, и҆дѣ́же лежа́тъ мо́щи и҆́хъ, и҆ и҆дѣ́же хра́мъ и҆́хъ.

Тропа́рь, гла́съ д҃: Первопресто́льницы рѡссі́йстїи, и҆́стиннїи храни́телїе а҆пⷭ҇льскихъ преда́нїй, столпѝ непоколеби́мїи, правосла́вїѧ наста̑вницы, пе́тре, и҆ а҆леѯі́е, і҆ѡ́но и҆ фїлі́ппе, влⷣкꙋ всѣ́хъ моли́те, ми́ръ вселе́ннѣй дарова́ти, и҆ дꙋша́мъ на́шымъ ве́лїю млⷭ҇ть.

Конда́къ, гла́съ г҃. Подо́бенъ: Дв҃а дне́сь: Во ст҃и́телехъ бл҃гоче́стнѡ пожи́сте, и҆ лю́ди къ бг҃оразꙋ́мїю наста́висте, и҆ до́брѣ бг҃ꙋ ᲂу҆годи́сте: сегѡ̀ ра́ди ѿ негѡ̀ нетлѣ́нїемъ и҆ чꙋдесы̀ просла́вистесѧ, ꙗ҆́кѡ ᲂу҆ченицы̀ бж҃їѧ бл҃года́ти.

ѕ҃. 🕂 Ст҃а́гѡ и҆ сла́внагѡ а҆пⷭ҇ла +ѳѡмы̀+.

На вели́цѣй вече́рни, пое́мъ Бл҃же́нъ мꙋ́жъ: а҃-й а҆нтїфѡ́нъ: На Гдⷭ҇и воззва́хъ, стїхи̑ры а҆пⷭ҇ла, на и҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Ꙗ҆́кѡ слꙋга̀ сло́ва:

И҆ ны́нѣ: Кто̀ тебѐ не ᲂу҆бл҃жи́тъ: Вхо́дъ. Прокі́менъ днѐ. и҆ чтє́нїѧ г҃. а҃-е, Собо́рнагѡ посла́нїѧ і҆ѡа́ннова: Є҆́же бѣ̀ и҆спе́рва: в҃-е, І҆а́кѡвлѧ: І҆а́кѡвъ бг҃ꙋ и҆ гдⷭ҇ꙋ і҆и҃сꙋ хрⷭ҇тꙋ̀ ра́бъ: г҃- е, І҆ꙋ́дина: І҆ꙋ́да і҆и҃сꙋ хрⷭ҇тꙋ̀ ра́бъ: На лїті́и стїхи́ра хра́ма и҆ а҆пⷭ҇ла, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ в҃: Ѡ҆ста́вивъ земна̑ѧ: И҆ ны́нѣ: Всѐ ᲂу҆пова́нїе моѐ: На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе: съ припѣ́вы и҆́хъ. Сла́ва. гла́съ ѕ҃: Бж҃е́ствєнныѧ ви́дѧ: И҆ ны́нѣ, Бцⷣе, ты̀ є҆сѝ лоза̀: По трист҃о́мъ тропа́рь, гла́съ г҃: А҆пⷭ҇ле ст҃ы́й: септе́мврїа въ к҃-в де́нь.

И҆лѝ се́й, гла́съ в҃: Оу҆ч҃нкъ хрⷭ҇то́въ бы́въ, бж҃е́ственнагѡ собо́ра а҆пⷭ҇льскагѡ соприча́стникъ, невѣ́рствїемъ бо хрⷭ҇то́во воскрⷭ҇нїе и҆звѣсти́въ, и҆ тогѡ̀ пречⷭ҇тꙋю стрⷭ҇ть ѡ҆сѧза́нїемъ ᲂу҆вѣ́ривъ, ѳѡмо̀ всехва́льне, и҆ ны́нѣ на́мъ просѝ ми́ра и҆ ве́лїю млⷭ҇ть.

Сла́ва, и҆ ны́нѣ, бг҃оро́диченъ: и҆ ѿпꙋ́стъ. На ᲂу҆́трени, на Бг҃ъ гдⷭ҇ь: тропа́рь а҆пⷭ҇ла, два́жды. Сла́ва, и҆ ны́нѣ, бг҃оро́диченъ воскрⷭ҇нъ. По каѳі́смахъ сѣда́льны а҆пⷭ҇ла, съ бг҃оро́дичны и҆́хъ. И҆ чте́нїе. По полѷеле́и сѣда́ленъ гла́съ г҃. два́жды. Сла́ва, и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀ стїхи́ра, гла́съ д҃: Хрⷭ҇то́съ вели́кое сл҃нце: Канѡ́нъ бцⷣы, со і҆рмосо́мъ на ѕ҃: и҆ а҆пⷭ҇ла на и҃, гла́съ д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь: Премꙋ́дрости бл҃года́ти и҆спо́лненъ хрⷭ҇то́въ а҆пⷭ҇лъ, и҆ слꙋжи́тель и҆́стинный, въ покаѧ́нїи вопїѧ́ше тебѣ̀: ты̀ мо́й є҆сѝ бг҃ъ же и҆ гдⷭ҇ь.

И҆ і҆́косъ. И҆ про́логъ. По ѳ҃-й пѣ́сни, свѣти́ленъ а҆пⷭ҇ла. Сла́ва, дрꙋгі́й. И҆ ны́нѣ, бг҃оро́диченъ. На хвали́техъ стїхи̑ры а҆пⷭ҇ла на д҃, самогла́сны, гла́съ а҃: хрⷭ҇тꙋ̀ послѣ́довалъ є҆сѝ: Сла́ва, гла́съ ѕ҃: На колесни́цѣ добродѣ́телей: И҆ ны́нѣ, бг҃оро́диченъ. Славосло́вїе вели́кое. По трист҃о́мъ, тропа́рь а҆пⷭ҇ла: Сла́ва, и҆ ны́нѣ, бг҃оро́диченъ воскрⷭ҇нъ. Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна а҆пⷭ҇ла, ѿ канѡ́на пѣ́снь г҃, и҆ ѕ҃, на и҃. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀. Є҆ѵⷢ҇лїе і҆ѡа́нна, зача́ло ѯ҃є: Сꙋ́щꙋ по́здѣ: Прича́стенъ: Во всю̀ зе́млю:

з҃. 🕃 Ст҃ы́хъ мꙋ́чєникъ, +се́ргїа+ и҆ +ва́кха+.

На Гдⷭ҇и воззва́хъ, стїхи̑ры на ѕ҃, гла́съ ѕ҃. Подо́бенъ: Всю̀ ѿложи́вше: Сла́ва, гла́съ д҃: Се́ргїй и҆ ва́кхъ: На стїхо́внѣ ѻ҆ктѡ́иха. Сла́ва, ст҃ы́хъ, гла́съ и҃: Оу҆крѣпи́сѧ хрⷭ҇то́выхъ мч҃нкъ: Тропа́рь, гла́съ д҃: Мч҃нцы твоѝ, гдⷭ҇и: септе́мврїа въ к҃-й де́нь.

И҆лѝ се́й, гла́съ є҃: Оу҆добре́нїе хрⷭ҇то́выхъ стрⷭ҇тоте́рпєцъ, и҆ ѻ҆́чи хрⷭ҇то́вы це́ркве, ѻ҆́чи просвѣти́те дꙋ́шъ на́шихъ, се́ргїе многострада́льне и҆ ва́кхе пресла́вне, моли́тесѧ ко гдⷭ҇ꙋ, ꙗ҆́кѡ да ᲂу҆бѣжи́мъ тьмы̀ грѣхо́вныѧ: и҆ свѣ́та ꙗ҆ви́мсѧ ѻ҆́бщницы невече́рнѧгѡ мл҃твами ва́шими ст҃і́и.

На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃ы́хъ на ѕ҃, гла́съ а҃. По г҃-й пѣ́сни сѣда́ленъ, гла́съ и҃, два́жды. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Ра́зꙋмъ на врагѝ мꙋ́жески воѡрꙋжи́вше, всю̀ тѣ́хъ ле́сть разрꙋши́сте, и҆ побѣ́дꙋ свы́ше прїи́мше мч҃нцы всехва́льнїи, є҆диномы́сленнѡ вопїю́ще: добро̀ и҆ красно̀ є҆́же бы́ти съ бг҃омъ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́хъ: И҆ ны́нѣ, бг҃оро́диченъ. На хвали́техъ стїхи̑ры, на д҃, самогла́сны: Є҆ди́нъ, гла́съ а҃: И҆ два̀, гла́съ д҃: Сла́ва, гла́съ г҃: Ко́ль добро̀, и҆ ко́ль красно̀: Настїхо́внѣ ѻ҆ктѡ́иха. Сла́ва, ст҃ы́хъ, гла́съ в҃: Ви́дѧщи дре́вле: На лїтꙋргі́и, бл҃жє́нна ѻ҆ктѡ́иха: И҆ ст҃ы́хъ пѣ́снь г҃-ѧ, на д҃. Прокі́менъ, гла́съ д҃. Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆по́столъ ко є҆вре́ємъ, зача́ло т҃а: И҆̀же вѣ́рою побѣди́ша ца̑рствїѧ: А҆ллилꙋ́їа, гла́съ в҃: Сѐ что̀ добро̀: Є҆ѵⷢ҇лїе лꙋкѝ, зача́ло р҃ѕ: Возложа́тъ на вы̀ рꙋкѝ своѧ̑: Прича́стенъ, Ра́дꙋйтесѧ:

и҃. Прпⷣбныѧ ма́тере на́шеѧ +пелагі́и+:

Стїхи̑ры ѻ҆ктѡ́иха, г҃: и҆ ст҃ы́ѧ, г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ д҃: И҆дѣ́же ᲂу҆мно́жисѧ грѣ́хъ: Тропа́рь, гла́съ и҃: Въ тебѣ̀ ма́ти: септе́мврїа въ а҃і-й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ прпⷣбныѧ на д҃, гла́съ д҃: По г҃-й пѣ́сни, сѣда́ленъ ст҃ы́ѧ. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Тѣ́ло твоѐ поста́ми и҆знꙋри́вши, бдѣ́нными мл҃твами творца̀ ᲂу҆моли́ла є҆сѝ ѡ҆ дѣѧ́нїихъ твои́хъ, ꙗ҆́кѡ да прїи́меши соверше́нное ѡ҆ставле́нїе: є҆́же и҆ ѡ҆брѣла̀ є҆сѝ ма́ти ꙗ҆́вѣ, пꙋ́ть покаѧ́нїѧ показа́вши.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха.

ѳ҃. 🕂 Ст҃а́гѡ а҆пⷭ҇ла +і҆а́кѡва+ а҆лфе́ева:

И҆ прпⷣбнагѡ ѻ҆тца̀ на́шегѡ +а҆ндроні́ка+, и҆ жены̀ є҆гѡ̀ а҆ѳана́сїи.

На вели́цѣй вече́рни, пое́мъ, Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры а҆пⷭ҇ла, на и҃: гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ то́йже: Бж҃е́ственнагѡ дх҃а ꙗ҆́вѣ: И҆ ны́нѣ: И҆́же тебѐ ра́ди: Вхо́дъ. Прокі́менъ днѐ, и҆ чтє́нїѧ г҃: и҆ лїті́а: и҆щѝ сегѡ̀ мѣ́сѧца въ ѕ҃-й де́нь. На стїхо́внѣ стїхи̑ры, гла́съ. д҃. Подо́бенъ: Да́лъ є҆сѝ зна́менїе: съ припѣ́вы и҆́хъ. Сла́ва, гла́съ є҃: Вѣ́рнѡ торжествꙋ́емъ: И҆ ны́нѣ: Хра́мъ и҆ две́рь є҆сѝ: По трист҃о́мъ, тропа́рь, гла́съ г҃: А҆пⷭ҇ле ст҃ы́й: септе́мврїа въ к҃в-й де́нь. Сла́ва, и҆ ны́нѣ, бг҃оро́диченъ. И҆ ѿпꙋ́стъ.

Прпⷣбнагѡ а҆ндроні́ка слꙋ́жба пое́тсѧ на повече́рїи.

На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла, два́жды. Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю: По каѳі́смахъ сѣда́ленъ а҆пⷭ҇ла съ бг҃оро́дичны и҆́хъ. И҆ чте́нїе. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ: Степє́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀ стїхи́ра, гла́съ д҃. Подо́бенъ: Жєны̀ ᲂу҆слы́шите: Канѡ́нъ бцⷣы со і҆рмосо́мъ на ѕ҃: и҆ а҆пⷭ҇ла на и҃, гла́съ ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: Тве́рдѡ мꙋ́дрости догма́ты въ дꙋ́шы бл҃гочести́выхъ вложи́вшаго, похвала́ми да ᲂу҆бл҃жи́мъ, ꙗ҆́кѡ бг҃овѣща́телѧ всѝ і҆а́кѡва: престо́лꙋ бо сла́вы влⷣчню предстоѧ̀, и҆ со всѣ́ми а҆́гг҃лы ра́дꙋетсѧ, молѧ̀ непреста́ннѡ ѡ҆ всѣ́хъ на́съ.

И҆ і҆́косъ, и҆ про́логъ. По ѳ҃-й пѣ́сни, свѣти́ленъ а҆пⷭ҇ла, два́жды. Сла́ва, и҆ ны́нѣ, бг҃оро́диченъ. На хвали́техъ стїхи̑ры а҆пⷭ҇ла на д҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ в҃: Ѡ҆ста́вивъ земна̑ѧ: И҆ ны́нѣ, бг҃оро́диченъ: Всѐ ᲂу҆пова́нїе моѐ: Славосло́вїе вели́кое. По трист҃о́мъ, тропа́рь а҆пⷭ҇ла: Сла́ва, и҆ ны́нѣ, бг҃оро́диченъ воскрⷭ҇нъ. Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна а҆пⷭ҇ла, ѿ канѡ́на пѣ́снь г҃-ѧ и҆ ѕ҃-ѧ на и҃. Прокі́менъ гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ в҃: И҆сповѣ́дѧтъ нб҃са̀: Є҆ѵⷢ҇лїе лꙋкѝ зача́лон҃а: Слꙋ́шаѧй ва́съ, менѐ слꙋ́шаетъ: Прича́стенъ: Во всю̀ зе́млю.

і҃. Ст҃ы́хъ мꙋ́чєникъ +є҆ѵла́мпїа+ и҆ +є҆ѵлампі́и+.

Стїхи̑ры ѻ҆ктѡ́иха, трѝ: И҆ ст҃ы́хъ, г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ то́йже. Братолю́бїю є҆диноиме́нїе: На стїхо́внѣ ѻ҆ктѡ́иха. Сла́ва, ст҃ы́хъ, гла́съ д҃: Трⷪ҇чнымъ свѣ́томъ: Тропа́рь, гла́съ д҃: Мч҃нцы твоѝ, гдⷭ҇и: септе́мврїа въ к҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃ы́хъ на д҃: По г҃-й пѣ́сни сѣда́ленъ, гла́съ и҃. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Дѡ́блїѧ мч҃нки и҆ бра́тїю по пло́ти, мꙋ́драго є҆ѵла́мпїа и҆ є҆ѵлампі́ю почти́мъ: ті́и бо пребеззако́нныхъ кознодѣ̑йства посрами́ша си́лою распе́ншагѡсѧ. сегѡ̀ ра́ди ꙗ҆ви́шасѧ мч҃нкѡвъ сла́ва, кꙋ́пнѡ и҆ похвала̀.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃ы́хъ.

а҃і. Ст҃а́гѡ а҆пⷭ҇ла +фїлі́ппа+, є҆ди́нагѡ ѿ седмѝ дїа́кѡнъ: И҆ прпⷣбнагѡ ѻ҆тца̀ на́шегѡ +ѳеофа́на+ и҆сповѣ́дника, и҆ творца̀ канѡ́нѡвъ, є҆пⷭ҇кпа нїкі́йскагѡ.

Стїхи̑ры а҆пⷭ҇ла, г҃, гла́съ д҃. Подо́бенъ: Зва́нный свы́ше: И҆ прпⷣбнагѡ г҃, гла́съ ѕ҃. Подо́бенъ: Всю̀ ѿложи́вше: На стїхо́внѣ ѻ҆ктѡ́иха. Тропа́рь а҆пⷭ҇ла, гла́съ г҃: А҆пⷭ҇ле ст҃ы́й: септе́мврїа въ к҃в-й де́нь.

Сла́ва, тропа́рь прпⷣбнагѡ, гла́съ и҃: Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, вселе́нныѧ свѣти́льниче, а҆рхїере́євъ бг҃одꙋхнове́нное ᲂу҆добре́нїе. ѳеофа́не премꙋ́дре, ᲂу҆че́ньми твои́ми всѧ̑ просвѣти́лъ є҆сѝ, цѣвни́це дх҃о́внаѧ, молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла, два́жды. Сла́ва, прпⷣбнагѡ: И҆ ны́нѣ, бг҃оро́диченъ. И҆ ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чтє́нїѧ. Канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: И҆ ст҃ы́хъ два̀, на и҃. А҆пⷭ҇ла, гла́съ ѕ҃: и҆ прпⷣбнагѡ, гла́съ то́йже. По г҃-й пѣ́сни,

Конда́къ ѳеофа́на, гла́съ в҃. Подо́бенъ: Вы́шнихъ и҆щѧ̀: Возгремѣ́въ хрⷭ҇то́во бж҃е́ственное воплоще́нїе, безплѡ́тныѧ врагѝ до конца̀ ѡ҆бличи́лъ є҆сѝ, чꙋ́дне ѳеофа́не: сегѡ̀ ра́ди всѝ вѣ́рнѡ, и҆ бл҃гоче́стнѡ вопїе́мъ тѝ: молѝ непреста́ннѡ ѡ҆ всѣ́хъ на́съ.

И҆ сѣда́ленъ а҆пⷭ҇ла, гла́съ и҃: Сла́ва, ѳеофа́на, гла́съ д҃. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Ꙗ҆зы́кѡвъ лове́цъ пречꙋ́дный, и҆ ᲂу҆ч҃нкѡ́въ хрⷭ҇то́выхъ собесѣ́дникъ, а҆пⷭ҇лѡвъ пред̾избра́нный фїлі́ппъ, дне́сь мі́рꙋ и҆сцѣле́нїй подае́тъ бога́тство, покрыва́етъ ѿ ѡ҆бстоѧ́нїй того̀ хва́лѧщыѧ. тѣ́мъ согла́снѡ зове́мъ є҆мꙋ̀: сп҃са́й всѧ̑ мл҃твами твои́ми, а҆пⷭ҇ле.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: И҆ а҆пⷭ҇ла: Сла́ва, прпⷣбнагѡ: И҆ ны́нѣ, бг҃оро́диченъ: На стїхо́внѣ ѻ҆ктѡ́иха: На лїтꙋргі́и, прокі́менъ: Во всю̀ зе́млю: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ дѣѧ́нїй, зача́ло к҃: Во дни̑ ѻ҆́ны, речѐ а҆́гг҃лъ гдⷭ҇нь къ фїлі́ппꙋ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе лꙋкѝ, зача́ло н҃: Ꙗ҆вѝ гдⷭ҇ь и҆ и҆нѣ́хъ се́дмьдесѧтъ: Прича́стенъ: Во всю̀ зе́млю:

[зрѝ] Подоба́етъ вѣ́дати: ꙗ҆́кѡ по а҃і днѝ сегѡ̀ мѣ́сѧца, въ прїидꙋ́щꙋю недѣ́лю па́мѧть соверша́емъ ст҃ы́хъ ѻ҆тє́цъ, и҆̀же на седьмо́мъ вселе́нскомъ собо́рѣ въ нїке́и собра́вшихсѧ: второ́е ст҃ы́хъ ѻ҆тє́цъ тѯ҃є, на и҆зверже́нїе и҆ потребле́нїе безбо́жныхъ ᲂу҆че́нїй хрⷭ҇тоненави́стныхъ и҆ хрїстїаноѡглаго́льникѡвъ і҆кѡнобо́рцєвъ, копрѡнѵ́ма и҆ съ ни́мъ мꙋ́дрствꙋющихъ ѻ҆каѧ́нныхъ є҆пі́скопѡвъ, и҆ несвѧще́нныхъ а҆рхїере́євъ, и҆ тѣ́хъ безбо́жнагѡ и҆ скве́рнагѡ собо́рища. И҆ а҆́ще слꙋчи́тсѧ а҃і де́нь настоѧ́щїй въ недѣ́лю, пое́тсѧ въ то́йже де́нь слꙋ́жба ст҃ы́хъ ѻ҆тє́цъ седьма́гѡ собо́ра. Рѧдова́гѡ же ст҃а́гѡ слꙋ́жба ѡ҆ставлѧ́етсѧ, и҆ пое́тсѧ, є҆гда̀ разсꙋ́дитъ є҆кклисїа́рхъ.

Въ сꙋббѡ́тꙋ, на ма́лѣй вече́рни, стїхи̑ры воскрⷭ҇ны и҆ бцⷣы, по ѻ҆бы́чаю. На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ є҆ди́нъ: И҆ ст҃ы́хъ ѻ҆тцє́въ на ѕ҃, гла́съ ѕ҃. Подо́бенъ, Ѿча́ѧннаѧ: Честны̑ѧ собо́ры: Сла́ва, гла́съ то́йже: Та́инствєнныѧ дне́сь: И҆ ны́нѣ, бг҃оро́диченъ гла́са. Вхо́дъ. Прокі́менъ днѐ: И҆ чтє́нїѧ г҃, ѻ҆тцє́въ: а҃-е, Бытїѧ̀: Слы́шавъ а҆вра́мъ: в҃-е, Втора́гѡ зако́на: Во дне́хъ ѻ҆́нѣхъ, речѐ мѡѷсе́й къ сынѡ́мъ і҆и҃лєвымъ: ви́дите, сѐ преда́хъ пред̾ ва́ми: г҃-е, Втора́гѡ зако́на: Во дне́хъ ѻ҆́нѣхъ речѐ мѡѷсе́й къ сынѡ́мъ і҆и҃лєвымъ: сѐ гдⷭ҇а бг҃а твоегѡ̀ не́бо: На лїті́и стїхи́ра хра́ма. Сла́ва, ѻ҆тцє́въ, гла́съ г҃: А҆пⷭ҇льскихъ преда́нїй: И҆ ны́нѣ, бг҃оро́диченъ: Без̾ сѣ́мене ѡ҆ бж҃е́ственнагѡ дх҃а: На стїхо́внѣ стїхи̑ры воскрⷭ҇ны гла́са. Сла́ва, ѻ҆тцє́въ, гла́съ д҃: Моле́бнꙋю па́мѧть: И҆ ны́нѣ: При́зри на молє́нїѧ: На бл҃гослове́нїи хлѣ́бѡвъ тропа́рь: Бцⷣе дв҃о: два́жды.

И҆ ѻ҆тцє́въ, гла́съ и҃: Препросла́вленъ є҆сѝ хрⷭ҇тѐ бж҃е на́шъ, свѣти̑ла на землѝ ѻ҆тцы̀ на́ши ѡ҆снова́вый, и҆ тѣ́ми ко и҆́стиннѣй вѣ́рѣ всѧ̑ ны̀ наста́вивый: многобл҃гоꙋтро́бне, сла́ва тебѣ̀. є҆ди́ножды.

И҆ чте́нїе въ посла́нїихъ а҆пⷭ҇льскихъ: На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, ѻ҆тцє́въ: И҆ ны́нѣ, бг҃оро́диченъ тогѡ́же гла́са. По ѻ҆бо́ихъ каѳі́смахъ сѣда́льны воскрⷭ҇ны, съ бг҃оро́дичны и҆́хъ: И҆ чтє́нїѧ въ є҆ѵⷢ҇лїи толково́мъ воскрⷭ҇номъ, рѧ́дъ недѣ́ли. Полѷеле́й, и҆ тропарѝ: А҆́гг҃льскїй собо́ръ: И҆ ѵ҆пакоѝ гла́са: И҆ чте́нїе: И҆ степє́нна. Прокі́менъ гла́са, и҆ Всѧ́кое дыха́нїе: И҆ є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: и҆ ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: крⷭ҇товоскрⷭ҇нъ на в҃: и҆ бцⷣы на в҃: и҆ ѻ҆тцє́въ на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни конда́къ и҆ і҆́косъ воскрⷭ҇нъ: И҆ сѣда́ленъ ѻ҆тцє́въ, гла́съ д҃, два́жды: Сла́ва, и҆ ны́нѣ, бг҃оро́диченъ. И҆ чте́нїе. По ѕ҃-й пѣ́сни,

Конда́къ ѻ҆тцє́въ, гла́съ ѕ҃. Подо́бенъ: рꙋкопи́саннагѡ: И҆́же и҆з̾ ѻ҆ц҃а̀ возсїѧ́въ сн҃ъ неизрече́ннѡ, и҆з̾ жены̀ роди́сѧ сꙋгꙋ́бъ є҆стество́мъ: є҆го́же ви́дѧще, не ѿмета́емсѧ зра́ка и҆з̾ѡбраже́нїѧ, но сїѐ бл҃гоче́стнѡ начерта́юще почита́емъ вѣ́рнѡ. и҆ сегѡ̀ ра́ди и҆́стиннꙋю вѣ́рꙋ цр҃ковь держа́щи, лобыза́етъ і҆кѡ́нꙋ вочл҃вѣ́ченїѧ хрⷭ҇то́ва.

И҆ і҆́косъ, и҆ про́логъ. По ѳ҃-й пѣ́сни, свѣти́ленъ воскрⷭ҇нъ. Сла́ва, ѻ҆тцє́въ: И҆ ны́нѣ, бг҃оро́диченъ. На хвали́техъ стїхи̑ры воскрⷭ҇ны, на д҃: и҆ ѻ҆тцє́въ г҃, на д҃, повторѧ́юще а҃-ю: гла́съ ѕ҃. Подо́бенъ, Всю̀ ѿложи́вше: Всѐ собра́вше: Припѣ́вы же глаго́лемъ сїѧ̑: а҃-й, Бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ: в҃-й, Собери́те є҆мꙋ̀ прпⷣбныѧ є҆гѡ̀: Сла́ва, ѻ҆тцє́въ, гла́съ и҃: Ст҃ы́хъ ѻ҆тцє́въ: ли́къ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ тропа́рь воскрⷭ҇нъ то́чїю. И҆ є҆ктєнїѝ: И҆ ѡ҆глаше́нїе: И҆ ѿпꙋ́стъ. И҆ ѻ҆бы́чное и҆схожде́нїе въ притво́ръ. Сла́ва, и҆ ны́нѣ: Стїхи́ра є҆ѵⷢ҇льскаѧ: И҆ ча́съ а҃: И҆ коне́чный ѿпꙋ́стъ. На часѣ́хъ, тропа́рь воскрⷭ҇нъ. Сла́ва, ѻ҆тцє́въ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ конда́къ воскрⷭ҇нъ, и҆ ѻ҆тцє́въ, глаго́лемъ премѣнѧ́юще. На лїтꙋргі́и, бл҃жє́нна гла́са, на ѕ҃: и҆ ѻ҆тцє́въ пѣ́снь г҃, на д҃. По вхо́дѣ, тропа́рь воскрⷭ҇нъ, и҆ ѻ҆тцє́въ. Та́же конда́къ воскрⷭ҇нъ. Сла́ва, ѻ҆тцє́въ: А҆́ще хра́мъ бцⷣы, И҆ ны́нѣ, конда́къ хра́ма. А҆́ще ли хра́мъ ст҃а́гѡ, и҆лѝ ст҃ы́ѧ, И҆ ны́нѣ, Предста́тельство хрⷭ҇тїа́нъ: Прокі́менъ гла́са: И҆ ѻ҆тцє́въ пѣ́снь, гла́съ д҃: Бл҃гослове́нъ є҆сѝ Гдⷭ҇и, бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки. Сті́хъ: Ꙗ҆́кѡ првⷣнъ є҆сѝ ѡ҆ всѣ́хъ: А҆по́столъ днѐ и҆ ѻ҆тцє́въ, ко є҆вре́ємъ, зача́ло тл҃д: Помина́йте наста́вники ва́шѧ: А҆ллилꙋ́їа гла́са, и҆ ѻ҆тцє́въ. Сті́хъ: а҃-й: Бг҃ъ богѡ́въ гдⷭ҇ь глаго́ла: Сті́хъ в҃-й: Собери́те є҆мꙋ̀ прпⷣбныѧ є҆гѡ̀: Є҆ѵⷢ҇лїе днѐ и҆ ѻ҆тцє́въ, і҆ѡа́нна, зача́ло н҃ѕ: Во вре́мѧ ѻ҆́но, возведѐ і҆и҃съ ѻ҆́чи своѝ на не́бо: Прича́стенъ, Хвали́те гдⷭ҇а съ нб҃съ: Дрꙋгі́й, Ра́дꙋйтесѧ:

в҃і. Ст҃ы́хъ мꙋ́чєникъ, +про́ва+, +тара́ха+ и҆ +а҆ндроні́ка+: И҆ прпⷣбнагѡ ѻ҆тца̀ на́шегѡ +космы̀+ ст҃огра́дца, є҆пⷭ҇кпа маїꙋ́мскагѡ, и҆ творца̀ канѡ́нѡвъ.

Стїхи̑ры мч҃нкѡвъ г҃, гла́съ д҃, подо́бенъ: Да́лъ є҆сѝ зна́менїе: И҆ прпⷣбнагѡ г҃, гла́съ то́йже, подо́бенъ: Ꙗ҆́кѡ до́блѧ: Сла́ва, мч҃нкѡвъ, гла́съ то́йже: Во́инствовавше хрⷭ҇тꙋ̀: На стїхо́внѣ ѻ҆ктѡ́иха. Сла́ва, мч҃нкѡвъ, гла́съ а҃: Трира́сленное собра́нїе:

Тропа́рь, гла́съ є҃: Ст҃ы́хъ мч҃нкъ и҆справле́нїємъ нбⷭ҇ныѧ си̑лы преꙋдиви́шасѧ, ꙗ҆́кѡ въ тѣ́лѣ сме́ртнѣмъ, безтѣле́снаго врага̀ си́лою крⷭ҇та̀, подвиза́вшесѧ до́брѣ, побѣди́ша неви́димѡ: и҆ мо́лѧтсѧ гдⷭ҇ꙋ поми́ловатисѧ дꙋша́мъ на́шымъ.

Сла́ва, прпⷣбнагѡ, гла́съ и҃: Правосла́вїѧ наста́вниче: сегѡ̀ мѣ́сѧца въ а҃і-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ: И҆ ст҃ы́хъ на д҃: И҆ прпⷣбнагѡ на д҃. По г҃-й пѣ́сни,

Конда́къ прпⷣбнагѡ, гла́съ и҃. Подо́бенъ: Взбра́нной: Оу҆кра́шенъ добродѣ́тельми, космо̀ бг҃одꙋхнове́нне, цр҃кве хрⷭ҇то́вы ᲂу҆краше́нїе бы́лъ є҆сѝ: пѣ́сньми бо ᲂу҆краси́лъ є҆сѝ сїю̀, бл҃же́нне. Но моли́сѧ ко гдⷭ҇ꙋ, и҆зба́витисѧ на́мъ ѿ всѧ́кихъ ко́зней ра́тника, тебѣ̀ зовꙋ́щымъ: ра́дꙋйсѧ, ѻ҆́тче требога́те.

И҆ сѣда́ленъ мч҃нкѡвъ, гла́съ и҃. Сла́ва прпⷣбнагѡ, гла́съ то́йже. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Трⷪ҇цы на́мъ сла́вꙋ ꙗ҆ви́ша, до́блїи хрⷭ҇тѡ́вы ѻ҆рꙋ́жницы и҆ мч҃нцы, съ тара́хомъ про́въ же и҆ а҆ндроні́къ: ѡ҆бличи́ша бо всѐ мꙋчи́телей безбо́жїе, вѣ́рою до́блественнѣ страда́льчествовавше.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, мч҃нкѡвъ. И҆ ны́нѣ, бг҃оро́диченъ. На стїхо́внѣ ѻ҆ктѡ́иха. На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша првⷣнїи: Є҆ѵⷢ҇лїе лꙋкѝ, зача́ло р҃ѕ: Возложа́тъ на вы̀ рꙋкѝ своѧ̑: Прича́стенъ: Ра́дꙋйтесѧ пра́веднїи:

🕂 Въ то́йже де́нь пра́зднованїе ст҃о́мꙋ +і҆ѡа́ннꙋ+ крⷭ҇ти́телю гдⷭ҇ню, на па́мѧть пренесе́нїѧ и҆з̾ ма́льты во гра́дъ га́тчинꙋ крⷭ҇та̀, и҆з̾ ча́сти дре́ва животворѧ́щагѡ крⷭ҇та̀ гдⷭ҇нѧ: чꙋдотво́рнагѡ ѡ҆́браза бж҃їѧ мт҃ре, пи́саннагѡ ст҃ы́мъ є҆ѵⷢ҇лі́стомъ лꙋко́ю: и҆ десны́ѧ рꙋкѝ моще́й ст҃а́гѡ і҆ѡа́нна крⷭ҇ти́телѧ.

г҃і. Ст҃ы́хъ мꙋ́чєникъ, +ка́рпа+ и҆ +папѵ́лы+.

Стїхи̑ры, гла́съ д҃, подо́бенъ: Ꙗ҆́кѡ до́блѧ: Сла́ва, гла́съ ѕ҃: Ꙗ҆́кѡ досто́инъ въ бг҃ови́дцѣхъ: На стїхо́внѣ ѻ҆ктѡ́иха. Тропа́рь гла́съ д҃: Мч҃нцы твоѝ, гдⷭ҇и: септе́мврїа въ к҃-й де́нь. На ᲂу҆́трени, на Бг҃ъ гдⷭ҇ь, тропа́рь ст҃ы́хъ, два́жды. И҆ ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чте́нїе. Ѻ҆́ба канѡ́на ѻ҆ктѡ́иха: И҆ мꙋ́ченикѡвъ на д҃, гла́съ а҃. По г҃-й пѣ́сни сѣда́ленъ, гла́съ а҃. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Ꙗ҆́кѡ сокро́вище многоцѣ́нное влⷣка и҆ и҆сто́чникъ и҆сточа́ющъ то́ки и҆сцѣле́нїй, сꙋ́щымъ на землѝ подадѐ мо́щи ва́шѧ, недꙋ́ги ᲂу҆́бѡ ѿе́млющыѧ страсте́й разли̑чныѧ, бл҃года́ть же даю́щыѧ дꙋша́мъ непреста́ннѡ. тѣ́мже согла́снѡ любо́вїю ва́ше, мч҃нцы бж҃е́ственнїи, соверша́емъ торжество̀.

По ѳ҃-й пѣ́сни, свѣти́ленъ, и҆ на стїхо́внѣ ѻ҆ктѡ́иха.

д҃і. Ст҃ы́хъ мꙋ́чєникъ, +наза́рїа+, +герва́сїа+, +прота́сїа+ и҆ +келсі́а+:

Стїхи̑ры, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ и҃: Жє́ртвы словє́сныѧ: На стїхо́внѣ, ѻ҆ктѡ́иха. Тропа́рь, гла́съ д҃: Мч҃нцы твоѝ, гдⷭ҇и: септе́мврїа въ к҃- й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ мч҃нкѡвъ на д҃, гла́съ д҃. По г҃-й пѣ́сни сѣда́ленъ мч҃нкѡвъ, гла́съ и҃. По ѕ҃-й пѣ́сни,

Конда́къ мч҃нкѡвъ, гла́съ в҃. Подо́бенъ: Вы́шнихъ и҆щѧ̀: Свѣти́льницы свѣ́тлїи ꙗ҆́вльшесѧ бж҃е́ственнїи мч҃нцы, тва́рь свѣ́томъ чꙋде́съ ѡ҆зарѧ́ете, недꙋ́гѡвъ разрѣша́юще глꙋбо́кꙋю но́щь всегда̀, и҆ хрⷭ҇тꙋ̀ є҆ди́номꙋ бг҃ꙋ молѧ́щесѧ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, мч҃нка. На стїхо́внѣ ѻ҆ктѡ́иха.

🕃 И҆ прпⷣбныѧ +параске́ѵи+.

Соверша́етсѧ собо́ръ є҆ѧ̀ въ се́рбѣхъ.

Тропа́рь, гла́съ д҃: Пꙋсты́нное и҆ безмо́лвное житїѐ возлюби́вши, и҆ во слѣ́дъ хрⷭ҇та̀ жениха̀ твоегѡ̀ ᲂу҆се́рднѡ поте́кши, и҆ тогѡ̀ бл҃го́е и҆́го во ю҆́ности твое́й взе́мши, крⷭ҇тнымъ зна́менїемъ къ мы́слєннымъ врагѡ́мъ мꙋ́жески воѡрꙋжи́вшисѧ, по́стническими по́двиги, посто́мъ и҆ мл҃твами, и҆ сле́зными ка́плѧми ᲂу҆́глїе страсте́й ᲂу҆гаси́ла є҆сѝ, достосла́внаѧ параске́ѵо: и҆ ны́нѣ въ нбⷭ҇нѣмъ черто́зѣ съ мꙋ́дрыми дѣ́вами предстоѧ́щи хрⷭ҇тꙋ̀, молѝ ѡ҆ на́съ почита́ющихъ честнꙋ́ю па́мѧть твою̀.

Конда́къ, гла́съ ѕ҃: Ст҃ꙋ́ю всѝ застꙋ́пницꙋ сꙋ́щымъ въ бѣда́хъ, бл҃гоче́стнѡ воспои́мъ параске́ѵꙋ всечестнꙋ́ю: та́ бо житїѐ ѡ҆ста́вльши тлѣ́нное, и҆ нетлѣ́емое прїѧ́тъ во вѣ́ки. сегѡ̀ ра́ди сла́вꙋ ѡ҆брѣ́те, чꙋде́съ бл҃года́ть, бж҃їимъ велѣ́нїемъ.

є҃і. Прпⷣбнагѡ ѻ҆тца̀ на́шегѡ +є҆ѵѳѵ́мїа+ но́вагѡ: И҆ ст҃а́гѡ прпⷣбномч҃нка +лꙋкїа́на+, пресвѵ́тера вели́кїѧ а҆нтїохі́и.

Стїхи̑ры прпⷣбнагѡ, г҃, гла́съ д҃. Подо́бенъ: Ꙗ҆́кѡ до́блѧ: И҆ мч҃нка г҃, гла́съ то́йже. Подо́бенъ: Да́лъ є҆сѝ зна́менїе: Сла́ва, прпⷣбнагѡ, гла́съ ѕ҃: Прпⷣбне ѻ҆́тче, во всю̀ зе́млю: На стїхо́внѣ ѻ҆ктѡ́иха. Сла́ва, прпⷣбнагѡ, гла́съ є҃. Прпⷣбне ѻ҆́тче, не да́лъ є҆сѝ сна̀: Тропа́рь прпⷣбнагѡ, гла́съ и҃: Въ тебѣ̀, ѻ҆́тче: сегѡ̀ мѣ́сѧца въ а҃-й де́нь. Сла́ва, мч҃нка, гла́съ д҃. Мч҃нкъ тво́й, гдⷭ҇и: септе́мврїа во в҃-й де́нь. На ᲂу҆́трени, на Бг҃ъ гдⷭ҇ь, тропа́рь прпⷣбнагѡ, два́жды. Сла́ва, мч҃нка. И҆ ѻ҆бы̑чныѧ каѳі̑смы. И҆ сѣда́льны ѻ҆ктѡ́иха: И҆ чте́нїе. Канѡ́нъ ѻ҆ктѡ́иха є҆ди́нъ: и҆ ст҃ы́хъ два̀, на и҃. Прпⷣбнагѡ, гла́съ в҃. И҆ мч҃нка, гла́съ д҃. По г҃-й пѣ́сни,

Конда́къ мч҃нка, гла́съ в҃. Подо́бенъ: Въ мл҃твахъ: Въ поще́нїи пе́рвѣе просїѧ́вшаго, и҆ во страда́нїи второ́е свѣтѧ́ща, всѝ ꙗ҆́кѡ свѣти́ло пресвѣ́тлѣйшее лꙋкїа́на пѣ́сньми сла́внѡ почти́мъ, молѧ́щаго непреста́ннѡ ѡ҆ всѣ́хъ на́съ.

И҆ сѣда́ленъ прпⷣбнагѡ, гла́съ и҃. Сла́ва, мч҃нка, гла́съ то́йже. По ѕ҃-й пѣ́сни,

Конда́къ прпⷣбнагѡ, гла́съ в҃. Подо́бенъ: Вы́шнихъ и҆щѧ̀: Волне́нїй мнѡ́жества невла́жнѡ преходѧ̀, безпло́тныѧ врагѝ стрꙋѧ́ми сле́зъ твои́хъ крѣ́пкѡ погрꙋзи́лъ є҆сѝ, бг҃омꙋ́дре є҆ѵѳѵ́мїе прпⷣбне, и҆ чꙋде́съ да́ръ прїе́мъ, и҆сцѣлѧ́еши стра̑сти всѧ̑кїѧ: молѝ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: И҆ прпⷣбнагѡ. На стїхо́внѣ ѻ҆ктѡ́иха. Сла́ва, прпⷣбнагѡ, гла́съ в҃: Прпⷣбне ѻ҆́тче, и҆з̾ младе́нства:

ѕ҃і. Ст҃а́гѡ мч҃нка +ло́ггїна+ со́тника, и҆́же при крⷭ҇тѣ̀ гдⷭ҇ни.

Стїхи̑ры ѻ҆ктѡ́иха г҃: И҆ ст҃а́гѡ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ ѕ҃: Во стрⷭ҇ти твое́й, хрⷭ҇тѐ: На стїхо́внѣ ѻ҆ктѡ́иха. Сла́ва, гла́съ ѕ҃: При крⷭ҇тѣ̀ предстоѧ̀: Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃ де́нь. На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃, гла́съ д҃. По г҃-й пѣ́сни, сѣда́ленъ гла́съ и҃. По ѕ҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Ве́селѡ возра́довасѧ цр҃ковь, въ па́мѧти дне́сь приснопа́мѧтнагѡ страда́льца ло́ггїна, взыва́ющи: ты̀ моѧ̀ держа́ва, хрⷭ҇тѐ, и҆ ᲂу҆твержде́нїе.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ ст҃а́гѡ: На стїхо́внѣ ѻ҆ктѡ́иха. На лїтꙋргі́и, прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ: А҆по́столъ къ тїмоѳе́ю, зача́ло сч҃в: Ча́до тїмоѳе́е, возмога́й ѡ҆ бл҃года́ти: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе матѳе́а, зача́ло рг҃і: Прише́дше во́ини на мѣ́сто: Прича́стенъ, Въ па́мѧть:

з҃і. Ст҃а́гѡ прⷪ҇ро́ка +ѡ҆сі́и+: И҆ прпⷣбномч҃нка +а҆ндре́а+ кри́тскагѡ.

Стїхи̑ры прⷪ҇ро́ка, г҃, гла́съ а҃. Подо́бенъ: Всехва́льнїи мч҃нцы: И҆ прпⷣбнагѡ г҃, гла́съ д҃. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха.

Тропа́рь прпⷣбнагѡ, гла́съ д҃: По́стнически преподвиза́всѧ на горѣ̀, ᲂу҆́мнаѧ врагѡ́въ ѡ҆полчє́нїѧ всеѻрꙋ́жїемъ крⷭ҇та̀ погꙋби́лъ є҆сѝ, всебл҃же́нне, па́ки же ко страда́льчествꙋ мꙋ́жески ѡ҆бле́клсѧ є҆сѝ, ᲂу҆би́въ копрѡнѵ́ма мече́мъ вѣ́ры: и҆ ѻ҆бои́хъ ра́ди вѣнча́лсѧ є҆сѝ ѿ бг҃а, преподобномч҃нче а҆ндре́е приснопа́мѧтне.

На ᲂу҆́трени, канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: И҆ ст҃ы́хъ два̀. Прⷪ҇ро́ка, гла́съ а҃: Прпⷣбнагѡ, гла́съ в҃. По г҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Пра́зднꙋетъ дне́сь ца́рствꙋющїй гра́дъ пра́здникъ пресвѣ́тлый свѣтоно́сныѧ твоеѧ̀ па́мѧти, всѧ́кїй призыва́ѧ гра́дъ и҆ странꙋ̀: ра́дꙋетсѧ бо, ꙗ҆́кѡ и҆мѣ́ѧ сокро́вище ве́лїе, многострада́льное твоѐ тѣ́ло, а҆ндре́е мч҃нче, правосла́вїѧ свѣти́льниче.

Та́же сѣда́ленъ прⷪ҇ро́ка, гла́съ и҃. Сла́ва, прпⷣбномꙋ, гла́съ д҃. По ѕ҃-й пѣ́сни,

Конда́къ, гла́съ и҃. Подо́бенъ: Взбра́нной: Мꙋ́жества тезоимени́томꙋ бл҃годаре́нїе ꙗ҆́кѡ бл҃гоче́стїѧ тайноглаго́льникꙋ похва̑льнаѧ воззове́мъ, ѿ любвѐ тебѣ̀, бг҃обл҃же́нне. но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ лю́тыхъ ны̀ сп҃сѝ, да пое́мъ: ра́дꙋйсѧ, ѻ҆́тче приснопа́мѧтне.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, прпⷣбномꙋ. На стїхо́внѣ ѻ҆ктѡ́иха.

и҃і. 🕂 Ст҃а́гѡ а҆пⷭ҇ла и҆ є҆ѵⷢ҇лі́ста +лꙋкѝ+.

На вели́цѣй вече́рни, пое́мъ Бл҃же́нъ мꙋ́жъ, а҃-й а҆нтїфѡ́нъ: На Гдⷭ҇и воззва́хъ, стїхи̑ры на и҃, гла́съ и҃. Подо́бенъ: Что̀ ва́съ нарече́мъ: Сла́ва, гла́съ ѕ҃: А҆пⷭ҇ле хрⷭ҇то́въ: И҆ ны́нѣ, бг҃оро́диченъ: Кто̀ тебѐ не ᲂу҆бл҃жи́тъ: Вхо́дъ, прокі́менъ днѐ, и҆ чтє́нїѧ г҃, и҆ лїті́а. и҆щѝ сегѡ̀ мѣ́сѧца въ ѕ҃-й де́нь. На стїхо́внѣ стїхи̑ры а҆пⷭ҇ла, гла́съ є҃. Подо́бенъ: Ра́дꙋйсѧ: съ припѣ́вы и҆́хъ. Сла́ва, гла́съ ѕ҃: Всемꙋ́дрый ло́вче: И҆ ны́нѣ, бг҃оро́диченъ: Творе́цъ и҆ и҆зба́витель: По трист҃о́мъ,

Тропа́рь а҆пⷭ҇лꙋ, гла́съ г҃: А҆пⷭ҇ле ст҃ы́й и҆ є҆ѵⷢ҇лі́сте лꙋко̀, молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

И҆лѝ се́й, гла́съ є҃: А҆пⷭ҇льскихъ дѣѧ́нїй сказа́телѧ, и҆ є҆ѵⷢ҇лїа хрⷭ҇то́ва свѣ́тла списа́телѧ, лꙋкꙋ̀ препѣ́таго, неиспи́санна сꙋ́ща хрⷭ҇то́вѣ цр҃кви, пѣ́сньми сщ҃е́нными ст҃а́го а҆пⷭ҇ла похва́лимъ, ꙗ҆́кѡ врача̀ сꙋ́ща человѣ́ческїѧ не́мощи, є҆стества̀ недꙋ́ги, и҆ ꙗ҆́зи дꙋ́шъ и҆сцѣлѧ́юща, и҆ молѧ́щасѧ непреста́ннѡ за дꙋ́шы на́шѧ.

Сла́ва, и҆ ны́нѣ, бг҃оро́диченъ воскрⷭ҇нъ, и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла два́жды. Сла́ва, и҆ ны́нѣ, бг҃оро́диченъ. По каѳі́смахъ сѣда́льны а҆пⷭ҇ла съ бг҃оро́дичны и҆́хъ, и҆ чте́нїе. По полѷеле́и сѣда́ленъ, гла́съ д҃: Премꙋ́дростїю лови́тельною тро́стїю: два́жды. Сла́ва, и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з. По н҃-мъ ѱалмѣ̀ стїхи́ра, гла́съ г҃: Пꙋтеходи́въ ты̀ по воста́нїи: Канѡ́нъ бцⷣы со і҆рмосо́мъ на ѕ҃, и҆ а҆пⷭ҇ла на и҃, гла́съ и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: И҆́стиннагѡ бл҃гоче́стїѧ проповѣ́дника, и҆ та̑инъ неизрече́нныхъ ри́тора, ѕвѣздꙋ̀ цр҃ко́внꙋю, лꙋкꙋ̀ бж҃е́ственнаго восхва́лимъ: сло́во бо є҆го̀ и҆збра̀ съ па́ѵломъ мꙋ́дрымъ ꙗ҆зы́кѡвъ ᲂу҆чи́телѧ, є҆ди́нъ вѣ́дый сердє́чнаѧ.

И҆ і҆́косъ. И҆ чте́мъ про́логъ. По ѳ҃-й пѣ́сни свѣти́ленъ а҆пⷭ҇ла. Сла́ва, дрꙋгі́й: И҆ ны́нѣ, бг҃оро́диченъ. На хвали́техъ стїхи̑ры а҆пⷭ҇ла на д҃, гла́съ а҃. Подо́бенъ: Ѻ҆́блакъ тѧ̀ свѣ́та: Сла́ва, гла́съ и҃: Дв҃дски соше́дшесѧ: И҆ ны́нѣ, бг҃оро́диченъ: Влⷣчце, прїимѝ: Славосло́вїе вели́кое. По трист҃о́мъ тропа́рь а҆пⷭ҇ла. Сла́ва, и҆ ны́нѣ, бг҃оро́диченъ воскрⷭ҇нъ. Є҆ктєнїѝ и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна а҆пⷭ҇ла, ѿ канѡ́на пѣ́снь г҃-ѧ и҆ ѕ҃-ѧ, на и҃. Прокі́менъ, гла́съ и҃. Во всю̀ зе́млю: Сті́хъ: Нб҃са̀ повѣ́даютъ: А҆по́столъ ко колосса́ємъ, зача́ло с҃ѯ ѿ полꙋ̀. А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе лꙋкѝ зача́ло н҃а. Прича́стенъ: Во всю̀ зе́млю:

ѳ҃і. Ст҃а́гѡ прⷪ҇ро́ка +і҆ѡ́илѧ+: И҆ ст҃а́гѡ мч҃нка +ᲂу҆а́ра+.

Стїхи̑ры прⷪ҇ро́ка г҃, гла́съ и҃. Подо́бенъ: Ѽ пресла́внагѡ чꙋдесѐ! И҆ мч҃нка г҃, гла́съ ѕ҃. Подо́бенъ: Всю̀ ѿложи́вше: На стїхо́внѣ стїхи̑ры ѻ҆ктѡ́иха. Тропа́рь мч҃нка, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, канѡ́нъ є҆ди́нъ ѻ҆ктѡ́иха, на ѕ҃: и҆ ст҃ы́хъ два̀: Прⷪ҇ро́ка, гла́съ в҃. И҆ мч҃нка, гла́съ ѕ҃. По г҃-й пѣ́сни, сѣда́ленъ прⷪ҇ро́ка, гла́съ в҃. Сла́ва, мч҃нка, гла́съ а҃. По ѕ҃-й пѣ́сни,

Конда́къ, гла́съ д҃: Хрⷭ҇тꙋ̀ послѣ́дꙋѧ, мч҃нче ᲂу҆а́ре, тогѡ̀ и҆спи́въ ча́шꙋ, и҆ мꙋче́нїѧ вѣнце́мъ ᲂу҆вѧзе́сѧ, и҆ со а҆́гг҃лы ликовствꙋ́еши: молѝ непреста́ннѡ за дꙋ́шы на́шѧ.

🕃 Въ то́йже де́нь прпⷣбнагѡ ѻ҆тца̀ на́шегѡ +і҆ѡа́нна+ ры́льскагѡ.

Пра́здникъ, и҆дѣ́же лежа́тъ мо́щи є҆гѡ̀.

Тропа́рь, гла́съ а҃: Покаѧ́нїѧ ѡ҆снова́нїе, прописа́нїе ᲂу҆миле́нїѧ, ѡ҆́бразъ ᲂу҆тѣше́нїѧ, дх҃о́внагѡ соверше́нїѧ, ра́вно а҆́гг҃лѡмъ житїѐ твоѐ бы́сть, прпⷣбне. Въ мл҃твахъ ᲂу҆́бѡ и҆ поще́нїихъ, и҆ въ слеза́хъ пребыва́ѧ, ѻ҆́тче і҆ѡа́нне, молѝ хрⷭ҇та̀ бг҃а ѡ҆ дꙋша́хъ на́шихъ.

Конда́къ, гла́съ и҃. Подо́бенъ: Взбра́нной: А҆́гг҃льскомꙋ житїю̀ поревнова́въ, прпⷣбне, всѧ̑ земна̑ѧ ѡ҆ста́вивъ, ко хрⷭ҇тꙋ̀ прите́клъ є҆сѝ: и҆ тогѡ̀ за́повѣдьми ѡ҆гражда́ѧсѧ, ꙗ҆ви́лсѧ є҆сѝ сто́лпъ непоколеби́мь ѿ вра́жїихъ нападе́нїй. тѣ́мъ зове́мъ тѝ: ра́дꙋйсѧ, ѻ҆́тче і҆ѡа́нне, свѣти́ло пресвѣ́тлое.

к҃. 🕃 Ст҃а́гѡ великомч҃нка +а҆рте́мїа+.

На Гдⷭ҇и воззва́хъ: Стїхи̑ры на ѕ҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ в҃: Разꙋ́мнагѡ свѣти́льника: На стїхо́внѣ ѻ҆ктѡ́иха. Сла́ва, гла́съ ѕ҃: За хрⷭ҇та̀ зако́ннѡ пострада́въ: Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, на Бг҃ъ гдⷭ҇ь, тропа́рь мч҃нка, два́жды. И҆ ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чте́нїе. Канѡ́ны ѻ҆́ба ѻ҆ктѡ́иха, без̾ мч҃ничнѡвъ: и҆ ст҃а́гѡ на ѕ҃, гла́съ в҃. По г҃-й пѣ́сни, сѣда́ленъ, гла́съ и҃, два́жды. По ѕ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: Бл҃гочести́ваго и҆ вѣнцено́снаго мч҃нка, на врагѝ побѣ́ды взе́мшаго ѡ҆долѣ́нїе, соше́дшесѧ досто́йнѡ пѣ́сньми восхва́лимъ, а҆рте́мїа превели́каго въ мч҃нцѣхъ, чꙋде́съ же да́телѧ пребога́таго, мо́литсѧ бо гдⷭ҇ꙋ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, мч҃нка. На стїхо́внѣ ѻ҆ктѡ́иха. Сла́ва, мч҃нка, гла́съ ѕ҃: Дне́сь вселе́ннаѧ всѧ̀: На лїтꙋргі́и, бл҃жє́нна ѻ҆ктѡ́иха на д҃: И҆ мч҃нка пѣ́снь г҃, на д҃. Прокі́менъ, гла́съ з҃: Возвесели́тсѧ првⷣникъ: Сті́хъ: Оу҆слы́ши, бж҃е, гла́съ мо́й: А҆по́столъ къ тїмоѳе́ю, зача́ло сч҃в: Возмога́й ѡ҆ бл҃года́ти: А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе і҆ѡа́нна, зача́ло н҃в: Сѝ заповѣ́даю ва́мъ: Прича́стенъ: Въ па́мѧть:

к҃а. 🕃 Прпⷣбнагѡ ѻ҆тца̀ на́шегѡ +і҆ларїѡ́на+ вели́кагѡ.

На Гдⷭ҇и воззва́хъ, стїхи̑ры на ѕ҃, гла́съ д҃, Подо́бенъ: Зва́нный свы́ше: Сла́ва, гла́съ в҃: Ѿ ю҆́ности: На стїхо́внѣ ѻ҆ктѡ́иха. Сла́ва, гла́съ и҃: Дх҃а ст҃а́гѡ и҆спо́лненъ: Тропа́рь, гла́съ и҃: Сле́зъ твои́хъ тече́ньми: септе́мврїа г҃-й де́нь. На ᲂу҆́трени, на Бг҃ъ гдⷭ҇ь, тропа́рь ст҃а́гѡ. И҆ ѻ҆бы̑чныѧ каѳі̑смы. И҆ сѣда́льны ѻ҆ктѡ́иха. И҆ чте́нїе. Ѻ҆́ба канѡ́на ѻ҆ктѡ́иха, без̾ мч҃ничнѡвъ. І҆ларїѡ́на на ѕ҃, гла́съ в҃. По г҃-й пѣ́сни, сѣда́ленъ, гла́съ и҃, два́жды. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Ꙗ҆́кѡ свѣти́льника незаходи́маго, ᲂу҆́мнаго тѧ̀ со́лнца, соше́дшесѧ дне́сь восхвалѧ́емъ въ пѣ́снехъ: возсїѧ́лъ бо є҆сѝ сꙋ́щымъ во тьмѣ̀ невѣ́дѣнїѧ, всѧ̑ возводѧ̀ къ бж҃е́ственнѣй высотѣ̀ і҆ларїѡ́не. тѣ́мже вопїе́мъ: ра́дꙋйсѧ ѻ҆́тче всѣ́хъ по́стникѡвъ ѡ҆снова́нїе.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На стїхо́внѣ ѻ҆ктѡ́иха: Сла́ва, гла́съ в҃: Ти́хое твоѐ ѻ҆́тче: На лїтꙋргі́и, бл҃жє́нна ѻ҆ктѡ́иха на д҃, и҆ ст҃а́гѡ пѣ́снь г҃, на д҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ корі́нѳѧнѡмъ, зача́ло рп҃и: Сѣ́ѧй скꙋ́достїю: А҆ллилꙋ́їа, гла́съ ѕ҃: Бл҃же́нъ мꙋ́жъ, боѧ́йсѧ гдⷭ҇а: Є҆ѵⷢ҇лїе лꙋкѝ, зача́ло к҃д: Ста̀ і҆и҃съ на мѣ́стѣ ра́внѣ: Прича́стенъ: Въ па́мѧть вѣ́чнꙋю:

🕃 Въ то́йже де́нь пренесе́нїе моще́й прпⷣбнагѡ ѻ҆тца̀ на́шегѡ +і҆ларїѡ́на+, є҆пⷭ҇кпа мегли́нскагѡ.

Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ г҃: Чꙋ́до ꙗ҆ви́всѧ и҆звѣще́нїѧ, дѣ́лы возсїѧ́лъ є҆сѝ добродѣ́телей бж҃їихъ. мона́шествꙋющихъ ли́ки ᲂу҆па́слъ є҆сѝ. а҆рхїерє́йскаѧ сѣда̑лища и҆счи́стилъ є҆сѝ. є҆реті́ческагѡ же напа́денїѧ не ᲂу҆сꙋмнѣ́всѧ, цр҃кви хрⷭ҇тѡ́вы воздви́глъ є҆сѝ, прпⷣбне і҆ларїѡ́не. ᲂу҆́меръ ꙗ҆́кѡ спѧ̀: тѣ́ло же твоѐ цѣ́ло и҆ нетлѣ́нно соблюдено̀ бы́сть, и҆ подае́тъ цѣльбы̑ болѧ́щымъ ѿ разли́чныхъ недꙋ̑гъ, и҆ де́мѡны прогонѧ́етъ: сегѡ̀ ра́ди мо́лимъ тѧ̀, молѝ сп҃сти́сѧ дꙋша́мъ на́шымъ.

Конда́къ, гла́съ г҃. Подо́бенъ: Дв҃а дне́сь: Ꙗ҆́кѡ свѣтоно́сна ꙗ҆ви́сѧ а҆рхїере́е па́мѧть твоѧ̀, тьмꙋ̀ разрꙋшѝ ᲂу҆ны́нїѧ, и҆ свѣ́тъ ѡ҆блиста̀ дарѡ́въ нбⷭ҇ныхъ, всѧ̑ созыва́ющи на ра́дость. ѿ бг҃а бо і҆ларїѡ́не бл҃года́ть ѡ҆брѣ́лъ є҆сѝ, и҆ мона́хѡвъ бы́лъ є҆сѝ степе́нь.

к҃в. Ст҃а́гѡ равноапⷭ҇льнагѡ +а҆ве́ркїа+, є҆пⷭ҇кпа і҆ерапо́льскагѡ чꙋдотво́рца. И҆ ст҃ы́хъ +седмѝ+ ѻ҆трокѡ́въ, и҆̀же во є҆фе́сѣ.

Стїхи̑ры ст҃а́гѡ г҃, гла́съ в҃. Подо́бенъ: Є҆гда̀ ѿ дре́ва: и҆ ѻ҆трокѡ́въ г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ г҃: А҆рхїере́е прпⷣбне: На стїхо́внѣ ѻ҆ктѡ́иха. Тропа́рь, гла́съ д҃: Пра́вило вѣ́ры: септе́мврїа во в҃-й де́нь. Сла́ва, Мч҃нцы твоѝ, гдⷭ҇и: септе́мврїа въ к҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ: и҆ ст҃и́телѧ, гла́съ в҃, на д҃. и҆ ѻ҆трокѡ́въ, гла́съ и҃, на д҃. По г҃-й пѣ́сни,

Конда́къ ѻ҆трокѡ́въ, гла́съ д҃. Подо́бенъ: Вознесы́йсѧ: Просла́вивый на землѝ ст҃ы̑ѧ твоѧ̑, пре́жде втора́гѡ и҆ стра́шнагѡ прише́ствїѧ твоегѡ̀, хрⷭ҇тѐ, пресла́внымъ воста́нїемъ ѻ҆трокѡ́въ, показа́лъ є҆сѝ воскрⷭ҇нїе невѣ́дѧщымъ нетлѣ́нна ѡ҆дѣѧ̑нїѧ и҆ тѣлеса̀ ꙗ҆ви́въ, и҆ царѧ̀ ᲂу҆вѣ́рилъ є҆сѝ вопи́ти: вои́стиннꙋ є҆́сть ме́ртвыхъ воста́нїе.

И҆ і҆́косъ, и҆ сѣда́ленъ а҆ве́ркїа, гла́съ и҃: Сла́ва, ѻ҆трокѡ́въ, гла́съ д҃. По ѕ҃-й пѣ́сни,

Конда́къ а҆ве́ркїа, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ сщ҃е́нника превели́каго, и҆ а҆пⷭ҇лѡвъ совсе́льника, цр҃ковь почита́етъ тѧ̀ всѧ̀ вѣ́рныхъ, а҆ве́ркїе: ю҆́же твои́ми мл҃твами соблюда́й, бл҃же́нне, непобѣди́мꙋ и҆ неѡбꙋрева́емꙋ ѿ всѧ́кїѧ є҆́реси, и҆ несве́рнꙋ, ꙗ҆́кѡ приснопа́мѧтный.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ а҆ве́ркїа. Сла́ва, ѻ҆трокѡ́въ. И҆ ны́нѣ, бг҃оро́диченъ. На стїхо́внѣ ѻ҆ктѡ́иха. На лїтꙋргі́и, бл҃жє́нна ѻ҆ктѡ́иха на д҃: и҆ а҆ве́ркїа пѣ́снь г҃, на д҃. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость: Сті́хъ: Оу҆слы́шите сїѧ̑ всѝ ꙗ҆зы́цы: А҆по́столъ ко є҆вре́ємъ, зача́ло ти҃і: Тако́въ на́мъ подоба́ше: А҆ллилꙋ́їа, гла́съ в҃: Оу҆ста̀ првⷣнагѡ поꙋча́тсѧ премꙋ́дрости: Сті́хъ: Зако́нъ бг҃а є҆гѡ̀: Є҆ѵⷢ҇лїе і҆ѡа́нна, зача́ло л҃ѕ: А҆́зъ є҆́смь две́рь: Прича́стенъ: Въ па́мѧть вѣ́чнꙋю:

🕂 Въ то́йже де́нь пра́зднꙋемъ прест҃ѣ́й бцⷣѣ +каза́нской+.

Тропа́рь, гла́съ д҃: Застꙋ́пница ᲂу҆се́рднаѧ, мт҃и гдⷭ҇а вы́шнѧгѡ, за всѣ́хъ мо́лиши сн҃а твоего̀, хрⷭ҇та̀ бг҃а на́шего, и҆ всѣ̑мъ твори́ши сп҃сти́сѧ, въ держа́вный тво́й покро́въ прибѣга́ющымъ. всѣ́хъ на́съ застꙋпѝ, гпⷭ҇жѐ цр҃и́це и҆ влⷣчце, и҆̀же въ напа́стехъ и҆ ско́рбехъ, и҆ въ болѣ́знехъ ѡ҆бремене́нныхъ грѣхѝ мно́гими, предстоѧ́щихъ и҆ молѧ́щихсѧ тебѣ̀ ᲂу҆миле́нною дꙋше́ю, и҆ сокрꙋше́ннымъ се́рдцемъ, пред̾ пречⷭ҇тымъ твои́мъ ѡ҆́бразомъ со слеза́ми, и҆ невозвра́тнѡ наде́ждꙋ и҆мꙋ́щихъ на тѧ̀, и҆збавле́нїе всѣ́хъ ѕѡ́лъ, всѣ̑мъ полє́знаѧ да́рꙋй, и҆ всѧ̑ сп҃сѝ, бцⷣе дв҃о: ты́ бо є҆сѝ бж҃е́ственный покро́въ рабѡ́мъ твои̑мъ.

Конда́къ, гла́съ и҃. Подо́бенъ: Взбра́нной: Притеце́мъ лю́дїе къ ти́хомꙋ семꙋ̀, и҆ до́бромꙋ приста́нищꙋ, ско́рой помо́щницѣ, гото́вомꙋ и҆ те́пломꙋ сп҃се́нїю, покро́вꙋ дв҃ы. ᲂу҆скори́мъ на мл҃твꙋ, и҆ потщи́мсѧ на покаѧ́нїе: и҆сточа́етъ бо на́мъ неѡскꙋ̑дныѧ млⷭ҇ти пречⷭ҇таѧ бцⷣа, предварѧ́етъ на по́мощь, и҆ и҆збавлѧ́етъ ѿ вели́кихъ бѣ́дъ и҆ ѕѡ́лъ, бл҃гонра̑вныѧ и҆ бг҃обоѧ́щыѧсѧ рабы̑ своѧ̑.

к҃г. 🕃 Ст҃а́гѡ а҆пⷭ҇ла +і҆а́кѡва+, бра́та бж҃їѧ.

Ве́черъ, ѻ҆бы́чнаѧ каѳі́сма: На Гдⷭ҇и воззва́хъ, стїхи̑ры на ѕ҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ ѕ҃: Кро́вїю мꙋче́нїѧ: И҆ ны́нѣ: Кто̀ тебѐ не ᲂу҆бл҃жи́тъ: На стїхо́внѣ стїхи̑ры а҆пⷭ҇ла, гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ и҃: Началопа́стырѧ: И҆ ны́нѣ бг҃оро́диченъ: Влⷣчце, прїимѝ:

Тропа́рь, гла́съ в҃: Ꙗ҆́кѡ гдⷭ҇нь ᲂу҆ч҃нкъ, воспрїѧ́лъ є҆сѝ, пра́ведне, є҆ѵⷢ҇лїе: ꙗ҆́кѡ мч҃нкъ и҆́маши, є҆́же неѡпи́санное: дерзнове́нїе, ꙗ҆́кѡ бра́тъ бж҃їй: є҆́же моли́тисѧ, ꙗ҆́кѡ і҆ера́рхъ. молѝ хрⷭ҇та̀ бг҃а, сп҃сти́сѧ дꙋша́мъ на́шымъ.

Сла́ва, и҆ ны́нѣ: Всѧ̑ па́че смы́сла: На ᲂу҆́трени, на Бг҃ъ гдⷭ҇ь, тропа́рь а҆по́стола два́жды: Сла́ва, и҆ ны́нѣ бг҃оро́диченъ. И҆ ѻ҆бы̑чныѧ каѳі̑смы: И҆ сѣда́льны а҆пⷭ҇ла: И҆ бг҃оро́дичны и҆́хъ: И҆ чте́нїе. Ѻ҆́ба канѡ́на ѻ҆ктѡ́иха, без̾ мꙋ́ченичнѡвъ: И҆ а҆пⷭ҇ла на ѕ҃, гла́съ д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃, два́жды. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Ѻ҆́ч҃ее є҆диноро́дное бг҃ъ сло́во, прише́дшее къ на́мъ въ послѣ̑днѧѧ дни̑, і҆а́кѡве бж҃е́ственне, пе́рваго тѧ̀ показа̀ і҆ерⷭ҇ли́млѧнъ па́стырѧ и҆ ᲂу҆чи́телѧ, и҆ вѣ́рнаго строи́телѧ та́инствъ дх҃о́вныхъ. тѣ́мже тѧ̀ всѝ чти́мъ, а҆пⷭ҇ле.

И҆ і҆́косъ. И҆ про́логъ: По ѳ҃-й пѣ́сни, свѣти́ленъ а҆пⷭ҇ла, два́жды. На хвали́техъ стїхи̑ры, на д҃, гла́съ и҃. Подо́бенъ: Гдⷭ҇и, а҆́ще: Сла́ва, гла́съ а҃: Во ѻ҆́гненнѣй зарѝ: И҆ ны́нѣ, бг҃оро́диченъ. Славосло́вїе вели́кое. На лїтꙋргі́и, бл҃жє́нна ѿ канѡ́на а҆пⷭ҇ла, пѣ́снь г҃-ѧ, и҆ ѕ҃-ѧ. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ къ гала́тѡмъ, зача́ло с҃: Сказꙋ́ю ва́мъ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и: Є҆ѵⷢ҇лїе матѳе́а, зача́ло н҃ѕ: Прїи́де і҆и҃съ во ѻ҆ч҃ествїе своѐ: Прича́стенъ: Во всю̀ зе́млю:

🕃 Въ то́йже де́нь пренесе́нїе чⷭ҇тны́хъ моще́й ст҃а́гѡ +і҆а́кѡва+ борови́цкагѡ, новгоро́дскагѡ чꙋдотво́рца.

Соверша́етсѧ собо́ръ є҆гѡ̀, и҆дѣ́же хра́мъ є҆гѡ̀, по разсꙋжде́нїю и҆ бл҃гослове́нїю а҆рхїере́а.

Тропа́рь, гла́съ а҃: Бж҃е́ственною бл҃года́тїю просвѣти́всѧ, и҆ по сме́рти да́рꙋеши и҆сцѣле́нїе притека́ющымъ къ ра́цѣ моще́й твои́хъ, премꙋ́дре і҆а́кѡве: тѣ́мже и҆ мы̀ ны́нѣ чти́мъ честны́хъ моще́й твои́хъ пренесе́нїе, веселѧ́ще вкꙋ́пѣ дꙋ́шы и҆ тѣлеса̀. тѣ́мъ всѝ вопїе́мъ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Конда́къ, гла́съ и҃. Подо́бенъ: Взбра́нной: Вѣ́рою и҆ любо́вїю твоѐ честно́е пренесе́нїе пра́зднꙋющихъ. бл҃же́нне, сохранѝ и҆ соблюдѝ ѿ всѧ́кїѧ ѕло́бы, и҆ собла́зна ѕмїи́на: и҆́маши бо дерзнове́нїе ко влⷣцѣ всѣ́хъ хрⷭ҇тꙋ̀ бг҃ꙋ. є҆го́же молѝ сп҃стѝ +і҆мпера́тора+ правосла́внаго, и҆ лю́ди молѧ́щыѧ тѧ̀, да всѝ вопїе́мъ тѝ: ра́дꙋйсѧ, ѻ҆́тче і҆а́кѡве, всеѧ̀ рѡссі́йскїѧ землѝ ᲂу҆добре́нїе.

к҃д. Ст҃а́гѡ мч҃нка +а҆ре́ѳы+ и҆ и҆̀же съ ни́мъ.

Стїхи̑ры ѻ҆ктѡ́иха г҃: И҆ мч҃нкѡвъ г҃, гла́съ а҃. Подо́бенъ: Всехва́льнїи: Сла́ва, гла́съ д҃: Пѣ́сненнѡ пастыренача́льника: На стїхо́внѣ ѻ҆ктѡ́иха: Сла́ва, гла́съ и҃: Лꙋка́вое и҆ невѣ́рное:

Тропа́рь, гла́съ а҃: Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди, гдⷭ҇и, и҆ всѧ̑ на́шѧ бѡлѣ́зни и҆сцѣлѝ, чл҃вѣколю́бче, мо́лимсѧ.

На ᲂу҆́трени, ѻ҆́ба канѡ́на ѻ҆ктѡ́иха: И҆ мч҃нкѡвъ на д҃, гла́съ и҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Весе́лїѧ хода́тай на́мъ наста̀ свѣтоно́сный дне́сь страстоте́рпєцъ пра́здникъ, є҆го́же соверша́юще сла́вимъ въ вы́шнихъ сꙋ́щаго гдⷭ҇а.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́хъ. На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ, Предзрѣ́хъ гдⷭ҇а: А҆по́столъ ко є҆вре́ємъ, зача́ло т҃л: И҆̀же вѣ́рою побѣди́ша ца̑рствїѧ: А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе матѳе́а, зача́ло л҃и: Всѧ́къ и҆́же и҆сповѣ́сть мѧ̀ пред̾ человѣ́ки: Прича́стенъ, Ра́дꙋйтесѧ:

к҃є. Ст҃ы́хъ мꙋ́чєникъ и҆ нотарі́й, +маркїа́на+ и҆ +мартѵ́рїа+.

Стїхи̑ры ѻ҆ктѡ́иха, г҃: И҆ ст҃ы́хъ г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ а҃: Оу҆ченицы̀ и҆ послѣ́дователїе: На стїхо́внѣ ѻ҆ктѡ́иха: Сла́ва, гла́съ г҃: Разꙋ́мнїи це́ркве: Тропа́рь, гла́съ д҃: Мч҃нцы твоѝ, гдⷭ҇и: септе́мврїа въ к҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: И҆ ст҃ы́хъ, на д҃, гла́съ д҃. По г҃-й пѣ́сни сѣда́ленъ, гла́съ г҃. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Подви́гшесѧ до́брѣ ѿ младе́нства, маркїа́не, съ мꙋ́дрымъ мартѵ́рїемъ, ѿстꙋ́пника а҆́рїа низложи́сте, невре́днꙋ сохра́ньше правосла́внꙋю вѣ́рꙋ, па́ѵлꙋ послѣ́дꙋюще мꙋ́дромꙋ ᲂу҆чи́телю: тѣ́мже съ ни́мъ ѡ҆брѣто́сте живо́тъ, ꙗ҆́кѡ трⷪ҇цы побѡ́рницы и҆зрѧ́днѣйшїи.

И҆ і҆́косъ. По ѳ҃-й пѣ́сни свѣти́ленъ ѻ҆ктѡ́иха: Сла́ва, ст҃ы́хъ. На стїхо́внѣ ѻ҆ктѡ́иха. На лїтꙋргі́и, прокі́менъ, гла́съ д҃: Ди́венъ бг҃ъ во ст҃ы́хъ свои́хъ: А҆по́столъ ко є҆фесе́ємъ, зача́ло ск҃д ѿ полꙋ̀: Є҆ди́номꙋ комꙋ́ждо на́съ: А҆ллилꙋ́їа, гла́съ д҃: Воззва́ша првⷣнїи: Є҆ѵⷢ҇лїе матѳе́а, зача́ло л҃д ѿ полꙋ̀: Призва̀ і҆и҃съ ѻ҆бана́десѧте: Прича́стенъ, Ра́дꙋйтесѧ:

к҃ѕ. 🕂 Ст҃а́гѡ и҆ сла́внагѡ великомч҃нка +дими́трїа+ мѷрото́чца:

И҆ воспомина́нїе вели́кагѡ и҆ стра́шнагѡ трѧсе́нїѧ.

А҆́ще хо́щетъ настоѧ́тель, твори́мъ бдѣ́нїе. На ма́лѣй вече́рни, стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ ѕ҃: Дне́сь вселе́ннаѧ: И҆ ны́нѣ, бг҃оро́диченъ, гла́съ то́йже: Бцⷣе, ты̀ є҆сѝ лоза̀: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: съ припѣ́вы и҆́хъ: а҃-й, Првⷣникъ ꙗ҆́кѡ фі́нїѯъ процвѣте́тъ: в҃, Насажде́ни въ домꙋ̀ гдⷭ҇ни: Сла́ва, и҆ ны́нѣ, бг҃оро́диченъ: Дѣ́ло бг҃олѣ́пно:

Тропа́рь ст҃а́гѡ, гла́съ г҃: Вели́ка ѡ҆брѣ́те въ бѣда́хъ тѧ̀ побо́рника вселе́ннаѧ, стрⷭ҇тоте́рпче, ꙗ҆зы́ки побѣжда́юща: ꙗ҆́коже ᲂу҆́бѡ лѵ́евꙋ низложи́лъ є҆сѝ горды́ню, и҆ на по́двигъ дерзнове́нна сотвори́въ не́стора, та́кѡ, ст҃е, дими́трїе хрⷭ҇тꙋ̀ бг҃ꙋ моли́сѧ, дарова́ти на́мъ ве́лїю млⷭ҇ть.

Сла́ва, и҆ ны́нѣ, трѧсе́нїѧ, гла́съ и҃:

Призира́ѧй на зе́млю, и҆ творѧ́й ю҆̀ трѧсти́сѧ, и҆зба́ви ны̀ стра́шнагѡ трꙋ́са преще́нїѧ, хрⷭ҇тѐ бж҃е на́шъ, и҆ низпослѝ на́мъ бога̑тыѧ млⷭ҇ти твоѧ̑, мл҃твами бцⷣы, и҆ сп҃си́ ны.

Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, пое́мъ Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры, гла́съ в҃, на и҃. Подо́бенъ: Є҆гда̀ ѿ дре́ва: повторѧ́юще а҃-ю. И҆́ны стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ ѕ҃: Дне́сь созыва́етъ на́съ: И҆ ны́нѣ, Кто̀ тебѐ не ᲂу҆бл҃жи́тъ: Вхо́дъ, Прокі́менъ днѐ, И҆ чтє́нїѧ г҃: Прⷪ҇ро́чества и҆са́їина. Ѡ҆брати́сѧ съ нб҃сѐ, гдⷭ҇и: Прⷪ҇ро́чества і҆еремі́ина: Сїѧ̑ глаго́летъ гдⷭ҇ь, помѧнꙋ́хъ млⷭ҇ть: И҆ ст҃а́гѡ, Премꙋ́дрости соломѡ́ни: Пра́ведникъ а҆́ще пости́гнетъ: На лїті́и стїхи́ра хра́ма: И҆ ст҃а́гѡ самогла́сны, гла́съ а҃: Весели́сѧ во гдⷭ҇ѣ: Сла́ва, гла́съ є҃, Стеце́мсѧ вѣ́рою: И҆ ны́нѣ, бг҃оро́диченъ, гла́съ то́йже: Вострꙋ́бимъ трꙋбо́ю: На стїхо́внѣ стїхи̑ры трѧсе́нїѧ, гла́съ в҃, самогла́сны, съ припѣ́вы и҆́хъ: Землѝ смꙋща́емѣ: Припѣ́вы: а҃-й, Призира́ѧй на зе́млю: в҃-й, Стрѧ́слъ є҆сѝ зе́млю: Сла́ва, гла́съ и҃: И҆мѣ́етъ ᲂу҆́бѡ бж҃е́ственнѣйшаѧ: И҆ ны́нѣ, Безневѣ́стнаѧ дв҃о: На бл҃гослове́нїи хлѣ́бѡвъ тропа́рь мч҃нка, два́жды, пи́санъ на ма́лѣй вече́рни: и҆ Бцⷣе дв҃о, є҆ди́ножды. Бꙋ́ди и҆́мѧ гдⷭ҇не: И҆ чте́нїе. На ᲂу҆́трени, на Бг҃ъ гдⷭ҇ь, тропа́рь трѧсе́нїѧ, два́жды. Сла́ва, мч҃нка: И҆ ны́нѣ, трѧсе́нїѧ. и҆ ѻ҆бы̑чныѧ каѳі̑смы: и҆ сѣда́льны мч҃нка, и҆ бг҃оро́дичны и҆́хъ, и҆ чте́нїе во є҆ѵⷢ҇лїи. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. И҆ чте́мъ въ торже́ственномъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ то́йже: Ди́венъ бг҃ъ во ст҃ы́хъ свои́хъ: Сті́хъ, Ст҃ы̑мъ, и҆̀же сꙋ́ть на землѝ є҆гѡ̀: Всѧ́кое дыха́нїе: Є҆ѵⷢ҇лїе матѳе́а, зача́ло л҃ѕ: Сѐ а҆́зъ посыла́ю ва́съ: По н҃-мъ ѱалмѣ̀ стїхи́ра, гла́съ ѕ҃: Дне́сь созыва́етъ на́съ: Канѡ́нъ трѧсе́нїѧ, гла́съ ѕ҃, со і҆рмосо́мъ на ѕ҃. И҆ мч҃нка два̀, на и҃. Є҆ди́нъ, гла́съ д҃: Дрꙋгі́й, гла́съ и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни,

Конда́къ трѧсе́нїѧ, гла́съ ѕ҃. Подо́бенъ: Є҆́же ѡ҆ на́съ: И҆зба́ви трꙋ́са тѧ́жкагѡ всѣ́хъ на́съ, гдⷭ҇и, и҆ ꙗ҆́звы нестерпи́мыѧ, грѣ̑хъ ра́ди на́шихъ. пощадѝ, гдⷭ҇и, правосла́внаго +і҆мпера́тора+ на́шего, и҆ лю́ди твоѧ̑, ꙗ҆̀же стѧжа́лъ є҆сѝ твое́ю кро́вїю, влⷣко, и҆ гра́дъ не преда́ждь въ поги́бель, трꙋ́сомъ стра́шнымъ, и҆но́гѡ бо ра́звѣ тебѐ бг҃а не вѣ́мы, и҆ воззовѝ пою́щымъ: а҆́зъ є҆́смь съ ва́ми, и҆ никто́же на вы̀.

И҆ сѣда́ленъ ст҃а́гѡ, гла́съ д҃, два́жды. Сла́ва, и҆ ны́нѣ, трѧсе́нїѧ, гла́съ то́йже. По ѕ҃-й пѣ́сни,

Конда́къ мч҃нка, гла́съ в҃: Крове́й твои́хъ стрꙋѧ́ми, дими́трїе, цр҃ковь бг҃ъ ѡ҆багрѝ, да́вый тебѣ̀ крѣ́пость непобѣди́мꙋю, и҆ соблюда́ѧ гра́дъ тво́й невреди́мь: тогѡ́ бо є҆сѝ ᲂу҆твержде́нїе.

И҆ і҆́косъ: И҆ чте́мъ про́логъ. По ѳ҃-й пѣ́сни, свѣти́ленъ мч҃нка два́жды: Сла́ва, и҆ ны́нѣ, трѧсе́нїѧ. На хвали́техъ стїхи̑ры мч҃нка, на ѕ҃, гла́съ д҃. Подо́бенъ: Ꙗ҆́кѡ до́блѧ: и҆ гла́съ є҃. Подо́бенъ: Ра́дꙋйсѧ: Сла́ва, гла́съ д҃: Ко́пїѧми наслѣ́довавшагѡ: И҆ ны́нѣ, бг҃оро́диченъ: И҆зба́ви ны̀ ѿ нꙋ́ждъ: Славосло́вїе вели́кое. По трист҃о́мъ тропа́рь мч҃нка. Сла́ва, и҆ ны́нѣ, трѧсе́нїѧ. Є҆ктєнїѝ, и҆ ѿпꙋ́стъ: и҆ дае́тсѧ ст҃ы́й є҆ле́й бра́тїѧмъ ѿ канди́ла ст҃а́гѡ, ꙗ҆́коже пред̾ꙋказа́сѧ: и҆ ча́съ а҃-й, и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на трѧсе́нїѧ, пѣ́снь г҃-ѧ, на д҃. И҆ ст҃а́гѡ, пѣ́снь ѕ҃, на д҃. Прокі́менъ трѧсе́нїѧ, гла́съ ѕ҃: Сп҃сѝ гдⷭ҇и лю́ди твоѧ̑, и҆ бл҃гословѝ достоѧ́нїе твоѐ. Сті́хъ: Къ тебѣ̀ гдⷭ҇и воззовꙋ̀, бж҃е мо́й: И҆ ст҃а́гѡ, гла́съ з҃: Возвесели́тсѧ првⷣникъ ѡ҆ гдⷭ҇ѣ: А҆по́столъ трѧсе́нїѧ, Ко є҆вре́ємъ, зача́ло тл҃а, ѿ полꙋ̀: Є҆го́же лю́битъ гдⷭ҇ь: И҆ ст҃а́гѡ, Къ тїмоѳе́ю, зача́ло сч҃в: Ча́до тїмоѳе́е, возмога́й ѡ҆ бл҃года́ти: А҆ллилꙋ́їа: Бж҃е ѿри́нꙋлъ ны̀ є҆сѝ: Сті́хъ: Стрѧ́слъ є҆сѝ зе́млю, и҆ смꙋти́лъ є҆сѝ ю҆̀. И҆ ст҃а́гѡ: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе трѧсе́нїѧ, матѳе́а, зача́ло к҃з: Влѣ́зшꙋ і҆и҃сꙋ въ кора́бль: И҆ ст҃а́гѡ ѿ і҆ѡа́нна, зача́ло н҃в. Сѝ заповѣ́даю ва́мъ: Прича́стенъ, Хвали́те: Дрꙋгі́й: Въ па́мѧть:

🕅 Подоба́етъ вѣ́дати, а҆́ще слꙋчи́тсѧ великомч҃нка дими́трїа селꙋ́нскагѡ, и҆ трѧсе́нїѧ въ недѣ́лю.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю. На вели́цѣй. вече́рни, по ѻ҆бы́чной каѳі́смѣ, на Гдⷭ҇и воззва́хъ, стїхи̑ры воскрⷭ҇ны г҃: И҆ трѧсе́нїѧ г҃, пи́саны на вели́цѣй вече́рни, на стїхо́внѣ. И҆ дими́трїа д҃: Сла́ва, дими́трїа: И҆ ны́нѣ, бг҃оро́диченъ а҃-й гла́са. Прокі́менъ днѐ. Чтє́нїѧ г҃. На лїті́и стїхи́ра хра́ма: И҆ самогла́сны стїхи̑ры ст҃а́гѡ. Сла́ва, ст҃а́гѡ: И҆ ны́нѣ, бг҃оро́диченъ. На стїхо́внѣ стїхи̑ры воскрⷭ҇ны. Сла́ва, дими́трїа: И҆ ны́нѣ, бг҃оро́диченъ, по гла́сꙋ ст҃а́гѡ. На бл҃гослове́нїи хлѣ́бѡвъ тропа́рь, Бцⷣе дв҃о, два́жды: И҆ дими́трїа, є҆ди́ножды. [зрѝ] [А҆́ще же нѣ́сть бдѣ́нїѧ, по Ѻ҆́ч҃е на́шъ, тропа́рь воскрⷭ҇нъ: Сла́ва, дими́трїа: И҆ ны́нѣ, трѧсе́нїѧ. На повече́рїи по Досто́йнѣ, и҆ по трист҃о́мъ, конда́къ дими́трїа: Сла́ва, и҆ ны́нѣ, трѧсе́нїѧ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ два́жды: Сла́ва, дими́трїа: И҆ ны́нѣ, трѧсе́нїѧ. По каѳі́смахъ сѣда́льны воскрⷭ҇ны, и҆ бг҃оро́дичны и҆́хъ. Та́же полѷеле́й, и҆ тропарѝ: А҆́гг҃льскїй собо́ръ: и҆ ѵ҆пакоѝ гла́са: и҆ сѣда́льны дими́трїа ѻ҆́ба, по є҆ди́ножды, без̾ бг҃оро́дичнѡвъ. Сла́ва, сѣда́ленъ, и҆́же по полѷеле́и: И҆ ны́нѣ, бг҃оро́диченъ є҆гѡ̀. Степє́нна, и҆ прокі́менъ гла́са. Є҆ѵⷢ҇лїе воскрⷭ҇но: Воскрⷭ҇нїе хрⷭ҇то́во: ѱало́мъ н҃, стїхи́ра воскрⷭ҇на. Канѡ́нъ воскрⷭ҇нъ, со і҆рмосо́мъ на д҃: и҆ трѧсе́нїѧ на д҃: и҆ дими́трїа на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ и҆ і҆́косъ дими́трїа, и҆ сѣда́ленъ. По ѕ҃-й пѣ́сни, конда́къ и҆ і҆́косъ воскрⷭ҇нъ. Свѣти́ленъ воскрⷭ҇нъ: Сла́ва, ст҃а́гѡ: И҆ ны́нѣ, трѧсе́нїѧ. На хвали́техъ стїхи̑ры воскрⷭ҇ны д҃: И҆ дими́трїа со сла́внымъ д҃, съ припѣ́вы є҆гѡ̀. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ, тропа́рь воскрⷭ҇нъ то́чїю. Є҆ктєнїѝ, и҆ ѿпꙋ́стъ: и҆ ча́съ а҃-й. На а҃-мъ часѣ̀, тропа́рь воскрⷭ҇нъ. Сла́ва, трѧсе́нїѧ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ трѧсе́нїѧ. На г҃-мъ часѣ̀, тропа́рь воскрⷭ҇нъ: Сла́ва, дими́трїа: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ дими́трїа. Си́це и҆ на про́чихъ часѣ́хъ тропарѝ и҆ кондакѝ премѣнѧ́юще глаго́лемъ: то́чїю воскрⷭ҇нъ тропа́рь непремѣ́ннѡ. На лїтꙋргі́и, бл҃жє́нна гла́са, на д҃: И҆ трѧсе́нїѧ пѣ́снь г҃, на д҃: И҆ дими́трїа пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ трѧсе́нїѧ, и҆ хра́ма бцⷣы, а҆́ще є҆́сть: и҆ дими́трїа. Конда́къ воскрⷭ҇нъ, и҆ трѧсе́нїѧ: Сла́ва, дими́трїа: И҆ ны́нѣ, бцⷣы. А҆́ще же нѣ́сть хра́ма бцⷣы, И҆ ны́нѣ, трѧсе́нїѧ. Прокі́менъ трѧсе́нїѧ и҆ ст҃а́гѡ. А҆по́столъ трѧсе́нїѧ, и҆ дими́трїа. А҆ллилꙋ́їа, гла́съ д҃: Бж҃е ѿри́нꙋлъ ны̀ є҆сѝ: Сті́хъ, Стрѧ́слъ є҆сѝ зе́млю: И҆ ст҃а́гѡ, Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе трѧсе́нїѧ, и҆ дими́трїа. Прича́стенъ, Хвали́те гдⷭ҇а съ нб҃съ: И҆ ст҃а́гѡ, Въ па́мѧть вѣ́чнꙋю: [зрѝ] Рѧ́дъ же, а҆по́столъ и҆ є҆ѵⷢ҇лїе, чте́мъ под̾ зача́ло.

к҃з. Ст҃а́гѡ мч҃нка +не́стора+.

Стїхи̑ры ѻ҆ктѡ́иха, г҃: И҆ ст҃а́гѡ г҃, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха: и҆ ст҃а́гѡ на д҃, гла́съ д҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Страда́льчествовавъ до́брѣ, безсме́ртнꙋю сла́вꙋ наслѣ́довалъ є҆сѝ ны́нѣ, ꙗ҆́кѡ во́инъ и҆зрѧ́дный влⷣки бы́лъ є҆сѝ мл҃твами дими́трїа мч҃нка: съ ни́мъ ᲂу҆́бѡ, не́сторе мꙋ́дре, молѧ̀, не преста́й ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На стїхо́внѣ ѻ҆ктѡ́иха. На лїтꙋргі́и, слꙋ́жба мч҃нкѡвъ.

к҃и. Ст҃ы́хъ мꙋ́чєникъ, +тере́нтїа+, и҆ +неоні́лы+: И҆ прпⷣбнагѡ ѻ҆тца̀ на́шегѡ +стефа́на+ савваі́та, и҆ творца̀ канѡ́нѡвъ.

Стїхи̑ры мч҃нкѡвъ г҃, гла́съ д҃. Подо́бенъ: Ꙗ҆́кѡ до́блѧ: и҆ прпⷣбнагѡ г҃, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь: И҆ прпⷣбнагѡ: Правосла́вїѧ наста́вниче: сегѡ̀ мѣ́сѧца въ а҃і-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: и҆ ст҃ы́хъ два̀: Мч҃нкѡвъ, гла́съ д҃: Прпⷣбнагѡ, гла́съ и҃. По г҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Насади́лъ є҆сѝ добродѣ́телей ра́й и҆ напои́лъ є҆сѝ то́ками сле́зъ твои́хъ, ꙗ҆́кѡ жи́зни всесла́вне дре́во полꙋчи́въ, спасѝ мл҃твами твои́ми ѿ тлѝ ста́до твоѐ, и҆зба́ви ѿ ѡ҆бстоѧ́нїй те́плѣ чтꙋ́щихъ тѧ̀, стефа́не: тѧ́ бо предста́телѧ велича́йша, мꙋ́дре, всѝ вѣ́рою и҆ любо́вїю стѧжа́хомъ.

И҆ сѣда́ленъ мч҃нка, гла́съ и҃. Сла́ва, прпⷣбнагѡ, гла́съ є҃. По ѕ҃-й пѣ́сни.

Конда́къ, гла́съ д҃. Подо́бенъ: Вознесы́йсѧ: Мч҃нческаѧ чⷭ҇тна́ѧ па́мѧть прїи́де дне́сь, веселѧ́щи всѧ́чєскаѧ, тере́нтїа премꙋ́драгѡ, и҆ подрꙋ́жїѧ є҆гѡ̀. те́плѣ ᲂу҆̀бо стеце́мсѧ, да прїи́мемъ и҆сцѣле́нїе: сі́и бо бл҃года́ть прїе́мше ѿ дх҃а ст҃а́гѡ, и҆сцѣлѧ́ти недꙋ́ги и҆ болѣ̑зни дꙋ́шъ на́шихъ.

По ѳ҃-й пѣ́сни, свѣти́ленъ: и҆ на стїхо́внѣ ѻ҆ктѡ́иха.

🕃 Въ то́йже де́нь и҆́же во ст҃ы́хъ ѻ҆тца̀ на́шегѡ +а҆рсе́нїа+, а҆рхїепⷭ҇кпа се́рбскагѡ.

Соверша́етсѧ собо́ръ є҆гѡ̀, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ и҃: Млⷭ҇ти наста́вниче, и҆ бл҃гоꙋтро́бїѧ сокро́вище: є҆́же всѣ̑мъ ѿве́рзлъ є҆сѝ, правовѣ́рїѧ ᲂу҆чи́телю, и҆ а҆рхїере́євъ бж҃е́ственное ᲂу҆добре́нїе, ѻ҆́тче на́шъ, і҆ера́рше а҆рсе́нїе, ни́щихъ бы́лъ є҆сѝ застꙋ́пникъ. тѣ́мъ молѝ хрⷭ҇та̀ бг҃а, просвѣти́ти дꙋ́шы на́шѧ, да не когда̀ ᲂу҆́снемъ въ сме́рть.

Конда́къ, гла́съ в҃. Подо́бенъ: Вы́шнихъ и҆щѧ̀: Въ пи́щи слове́съ твои́хъ, бг҃оно́се а҆рсе́нїе, разꙋ́мнѡ ча̑да твоѧ̑ пита́ѧ, ѧ҆зы́комъ хвалѧ̀, ᲂу҆стна́ми же пѣ́нїе приносѧ̀, вѣща́нїемъ зовы́й: хрⷭ҇тѐ, ты̀ є҆сѝ свѣ́тъ неизрече́нный.

🕃 И҆ ст҃ы́ѧ мч҃нцы +параске́ѵи+.

И҆дѣ́же хра́мъ, подо́бнѣ пое́тсѧ.

Тропа́рь, гла́съ д҃. Премꙋ́драѧ и҆ всехва́льнаѧ хрⷭ҇то́ва мч҃нца параске́ѵа, мꙋ́жескꙋю крѣ́пость прїе́мши, же́нскꙋю же не́мощь ѿве́ргши, дїа́вола побѣдѝ, и҆ мꙋчи́телѧ посрамѝ, вопїю́щи и҆ глаго́лющи: прїиди́те, тѣ́ло моѐ мече́мъ ссѣцы́те, и҆ ѻ҆гне́мъ сожги́те: а҆́зъ бо ра́дꙋющисѧ и҆дꙋ̀ ко хрⷭ҇тꙋ̀ женихꙋ̀ моемꙋ̀, тоѧ̀ мл҃твами, хрⷭ҇тѐ бж҃е, сп҃сѝ дꙋ́шы на́шѧ.

Конда́къ, гла́съ г҃. Подо́бенъ: Дв҃а дне́сь: Всест҃о́е и҆ непоро́чное мꙋче́нїе прине́сши, ꙗ҆́кѡ вѣ́но пречⷭ҇тно́е безсме́ртномꙋ женихꙋ̀ хрⷭ҇тꙋ̀, а҆́гг҃льское ликостоѧ́нїе возвесели́ла є҆сѝ, и҆ побѣди́ла є҆сѝ де́мѡнскїѧ кѡ́зни: сегѡ̀ ра́ди тѧ̀ че́стнѡ вѣ́рою чти́мъ, мч҃нце параске́ѵо многострада́льнаѧ.

к҃ѳ. Ст҃ы́ѧ прпⷣбномч҃нцы +а҆настасі́и+ ри́млѧныни: И҆ прпⷣбнагѡ ѻ҆тца̀ на́шегѡ +а҆вра́мїа+ затво́рника.

Стїхи̑ры мч҃нцы, г҃, гла́съ и҃. Подо́бенъ: Что̀ вы̀ нарече́мъ: И҆ прпⷣбнагѡ г҃, гла́съ то́йже. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь мч҃нцы, гла́съ д҃: А҆́гница твоѧ̀ і҆и҃се: септе́мврїа въ ѕ҃і-й де́нь. Сла́ва, прпⷣбнагѡ, гла́съ и҃: Въ тебѣ̀ ѻ҆́тче: сегѡ̀ мѣ́сѧца въ а҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ, на ѕ҃: И҆ ст҃ы́хъ два̀: мч҃нцы, гла́съ и҃: И҆ преподо́бнагѡ, гла́съ то́йже. По г҃-й пѣ́сни,

Конда́къ мч҃нцы, гла́съ г҃. Подо́бенъ: Дв҃а дне́сь: Дѣ́вства вода́ми ѡ҆чище́на прпⷣбнаѧ, мꙋ́ченичества кровьмѝ, а҆настасі́е, вѣнча́вшисѧ, подае́ши сꙋ́щымъ въ нꙋ́ждахъ, недꙋ́гѡвъ и҆сцѣле́нїе и҆ сп҃се́нїе, пристꙋпа́ющымъ ѿ се́рдца: крѣ́пость бо тебѣ̀ подае́тъ хрⷭ҇то́съ, и҆сточа́ѧй бл҃года́ть приснотекꙋ́щꙋю,

И҆ сѣда́ленъ, гла́съ и҃. Сла́ва, прпⷣбнагѡ. По ѕ҃-й пѣ́сни.

Конда́къ а҆вра́мїѧ, гла́съ г҃. Подо́бенъ: Дв҃а дне́сь: Во пло́ти ꙗ҆́кѡ а҆́гг҃лъ на землѝ ꙗ҆ви́лсѧ є҆сѝ, и҆ поще́нїемъ бы́лъ є҆сѝ ꙗ҆́кѡ дре́во насажде́нное, водо́ю воздержа́нїѧ до́брѣ возрасти́всѧ, тече́ньми твои́хъ сле́зъ скве́рнꙋ ѡ҆мы́въ: сегѡ̀ ра́ди ꙗ҆ви́лсѧ є҆сѝ прїѧ́телище бж҃е́ственное, а҆вра́мїе, дх҃а.

И҆ і҆́косъ. По ѳ҃-й пѣ́сни, свѣти́ленъ, и҆ на стїхо́внѣ, ѻ҆ктѡ́иха. На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: А҆по́столъ къ гала́тѡмъ, зача́ло сг҃і: Пло́дъ дх҃о́вный: А҆ллилꙋ́їа, гла́съ ѕ҃: Бл҃же́нъ мꙋ́жъ: Сті́хъ: Си́льно на землѝ бꙋ́детъ: Є҆ѵⷢ҇лїе матѳе́а, зача́ло м҃г: Всѧ̑ мнѣ̀ прєдана̀ сꙋ́ть: Прича́стенъ: Въ па́мѧть вѣ́чнꙋю:

🕃 Въ то́йже де́нь преставле́нїе прпⷣбнагѡ ѻ҆тца̀ на́шегѡ +а҆вра́мїа+, а҆рхїмандрі́та бг҃оѧвле́нскагѡ, росто́вскагѡ чꙋдотво́рца.

Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆дѣ́же лежа́тъ мѡ́щи є҆гѡ̀, и҆лѝ хра́мъ є҆гѡ̀.

Тропа́рь, гла́съ а҃: Просвѣти́всѧ бж҃е́ственною бл҃года́тїю, невѣ̑рныѧ лю́ди наста́вилъ є҆сѝ къ свѣ́тꙋ бг҃оразꙋ́мїѧ: и҆ по сме́рти сїѧ́ѧ свѣ́тлостїю житїѧ̀ твоегѡ̀, и҆сточа́еши и҆сцѣлє́нїѧ притека́ющымъ съ вѣ́рою къ ра́цѣ моще́й твои́хъ, а҆вра́мїе ѻ҆́тче на́шъ, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

Конда́къ, гла́съ в҃: И҆́го хрⷭ҇то́во прїе́мъ, а҆вра́мїе, и҆ тогѡ̀ крⷭ҇тъ на ра́мо взе́мъ, послѣ́довалъ є҆сѝ є҆мꙋ̀: насажде́нъ бы́въ въ домꙋ̀ гдⷭ҇ни, и҆ процвѣ́лъ є҆сѝ ꙗ҆́кѡ фі́нїѯъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́жилъ є҆сѝ ча̑да твоѧ̑, мꙋ́жъ жела́нїй дх҃о́вныхъ: ѿ возлю́бленнагѡ же а҆пⷭ҇ла і҆ѡа́нна бг҃осло́ва бл҃года́ть воспрїи́мъ, жезло́мъ сокрꙋши́лъ є҆сѝ і҆́дѡла, и҆ разсы́палъ є҆сѝ є҆го̀ ꙗ҆́кѡ пра́хъ, и҆ чꙋдотво́рецъ ᲂу҆́бѡ ве́лїй ꙗ҆ви́лсѧ є҆сѝ, прпⷣбне. Тѣ́мже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.

л҃. Ст҃ы́хъ мч҃нкъ, +зино́вїа+, и҆ +зинові́и+, сестры̀ є҆гѡ̀.

Стїхи̑ры ѻ҆ктѡ́иха г҃: и҆ ст҃ы́хъ г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Пѣ́сненный ли́къ: На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́хъ на д҃, гла́съ и҃. По г҃-й пѣ́сни, сѣда́ленъ, гла́съ а҃. По ѕ҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: И҆́стины свидѣ́тели, и҆ бл҃гоче́стїѧ проповѣ́дники, дво́ицꙋ досто́йнѡ почти́мъ въ бг҃одꙋхнове́нныхъ пѣ́снехъ, зино́вїа вкꙋ́пѣ съ мꙋ́дрою зинові́ею, кꙋ́пнѡ жи́вшыѧ и҆ ѿше́дшыѧ, и҆ мꙋче́нїемъ прїи́мшыѧ вѣне́цъ нетлѣ́нный.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, мч҃нкѡвъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха.

л҃а. Ст҃ы́хъ а҆пⷭ҇лъ +стахѵ́а+, +а҆мплі́а+, и҆ и҆̀же съ ни́ми: И҆ ст҃а́гѡ мч҃нка +є҆пїма́ха+.

Стїхи̑ры а҆пⷭ҇лѡвъ, гла́съ а҃. Подо́бенъ: Всехва́льнїи: и҆ мч҃нка, гла́съ д҃. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха.

Тропа́рь, гла́съ г҃: А҆пⷭ҇ли ст҃і́и, моли́те млⷭ҇тиваго бг҃а да прегрѣше́нїй ѡ҆ставле́нїе пода́стъ дꙋша́мъ на́шымъ.

Сла́ва, мч҃нка: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: И҆ ст҃ы́хъ два̀. А҆пⷭ҇лѡвъ, гла́съ а҃: и҆ мч҃нка, гла́съ д҃. По г҃-й пѣ́сни, сѣда́ленъ а҆пⷭ҇лѡвъ, гла́съ а҃. Сла́ва, мч҃нка, гла́съ г҃. По ѕ҃-й пѣ́сни,

Конда́къ а҆пⷭ҇лѡвъ, гла́съ и҃. Подо́бенъ: ꙗ҆́кѡ нача́тки: Ꙗ҆́кѡ сщ҃є́ннаѧ сокрѡ́вища всест҃а́гѡ дх҃а, и҆ со́лнца сла́вы сїѧ̑нїѧ по до́лгꙋ воспои́мъ мꙋ̑дрыѧ а҆пⷭ҇лы: а҆пе́ллїа, ᲂу҆рва́на же, и҆ а҆рїстовꙋ́ла, а҆мплі́а. наркі́сса, и҆ стахі́а, ꙗ҆̀же бл҃года́ть собра̀ бг҃а на́шегѡ.

По ѳ҃-й пѣ́сни, Свѣти́ленъ ѻ҆ктѡ́иха: Сла́ва, а҆пⷭ҇лѡвъ: И҆ ны́нѣ, бг҃оро́диченъ. На стїхо́внѣ ѻ҆ктѡ́иха.

а҃. 🕃 Ст҃ы́хъ и҆ чꙋдотво́рцєвъ безсре́бреникѡвъ +космы̀+ и҆ +дамїа́на+, и҆̀же ѿ

а҆сі́и.

Ве́черъ, ѻ҆бы́чнаѧ каѳі́сма. На Гдⷭ҇и воззва́хъ, стїхи̑ры на ѕ҃: гла́съ ѕ҃, самоподо́бенъ: Всю̀ ѿложи́вше: Сла́ва, гла́съ то́йже, самогла́сенъ: Безконе́чна є҆́сть ст҃ы́хъ бл҃года́ть: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, ст҃ы́хъ, гла́съ ѕ҃: Всегда̀ и҆мꙋ́ще хрⷭ҇та̀: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Тропа́рь, гла́съ и҃: Ст҃і́и безсре́брєницы и҆ чꙋдотво́рцы космо̀ и҆ дамїа́не, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, на бг҃ъ гдⷭ҇ь, тропа́рь ст҃ы́хъ, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. И҆ ѻ҆бы̑чныѧ каѳі̑смы: И҆ сѣда́ленъ ѻ҆ктѡ́иха. И҆ чте́нїе. Ѻ҆́ба канѡ́на ѻ҆ктѡ́иха, без̾ мч҃ничнѡвъ: И҆ ст҃ы́хъ на ѕ҃, гла́съ ѕ҃. По г҃-й пѣ́сни, сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. По ѕ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ по сѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.

И҆ і҆́косъ, и҆ чте́мъ про́логъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃ы́хъ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На хвали́техъ стїхи̑ры самогла́сны, на д҃, гла́съ а҃. Сла́ва, гла́съ д҃: И҆сто́чникъ и҆сцѣле́нїй: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. И҆ ст҃ы́хъ стїхи̑ры, съ припѣ́вы, гла́съ ѕ҃: Сѐ что̀ добро̀, и҆лѝ что̀ красно̀: Свѣ́тлаѧ и҆ просвѣще́ннаѧ: Сла́ва, гла́съ и҃: Кто̀ не ᲂу҆диви́тсѧ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На лїтꙋргі́и, бл҃жє́нна ѻ҆ктѡ́иха, на д҃: и҆ ст҃ы́хъ, ѿ канѡ́на пѣ́снь г҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆по́столъ къ корі́нѳѧнѡмъ, зача́ло рн҃г: Вы̀ є҆стѐ тѣ́ло хрⷭ҇то́во: А҆ллилꙋ́їа, гла́съ в҃: Сѐ что̀ добро̀, и҆лѝ что̀ красно̀: Є҆ѵⷢ҇лїе матѳе́а, зача́ло л҃д, ѿ полꙋ̀: Призва̀ і҆и҃съ ѻ҆бана́десѧте: Прича́стенъ, Ра́дꙋйтесѧ:

в҃. Ст҃ы́хъ мч҃нкъ, +а҆кїндѵ́на+, +пига́сїа+, +а҆фѳо́нїа+, +є҆лпїдїфо́ра+ и҆ +а҆немподі́ста+.

Стїхи̑ры ѻ҆ктѡ́иха трѝ, и҆ ст҃ы́хъ, г҃, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Дне́сь пѧтоза́рный: На стїхо́внѣ ѻ҆ктѡ́иха: и҆ ст҃ы́хъ, стїхи́ра съ припѣ́вомъ, гла́съ а҃: Ди́венъ бг҃ъ во ст҃ы́хъ свои́хъ: Лꙋчѝ возсїѧ́ша: Сла́ва, гла́съ в҃: Прїиди́те возра́дꙋемсѧ:

Тропа́рь, гла́съ в҃: Страстоте́рпцы гдⷭ҇ни, бл҃же́нна землѧ̀ напи́вшаѧсѧ кровьмѝ ва́шими, и҆ свѧ̑та селє́нїѧ прїи̑мшаѧ тѣлеса̀ ва̑ша: въ три́знищи бо врага̀ побѣди́сте, и҆ хрⷭ҇та̀ со дерзнове́нїемъ проповѣ́дасте: того̀, ꙗ҆́кѡ бл҃га, моли́те сп҃сти́сѧ, мо́лимсѧ, дꙋша́мъ на́шымъ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, ѻ҆бы̑чныѧ каѳі̑смы, и҆ сѣда́льны ѻ҆ктѡ́иха: и҆ чте́нїе: Ѻ҆́ба канѡ́на ѻ҆ктѡ́иха: и҆ ст҃ы́хъ на д҃, гла́съ д҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,

Конда́къ, гла́съ в҃. Подо́бенъ: Твє́рдыѧ: Бл҃гочести̑выѧ и҆ бг҃онѡ́сныѧ мч҃нки, ꙗ҆́кѡ на землѝ ѡ҆ста́вльшыѧ всѧ̑, прїѧ́лъ є҆сѝ въ наслажде́нїе бл҃ги́хъ твои́хъ и҆ ᲂу҆покое́нїе, а҆кїндѵ́на, пига́сїа, а҆немподі́ста: съ ни́миже а҆фѳо́нїа, и҆ є҆лпїдїфо́ра же, є҆ди́не сы́й пребл҃гі́й.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃ы́хъ: На стїхо́внѣ ѻ҆ктѡ́иха. И҆ ст҃ы́хъ стїхи́ра, съ припѣ́вы, гла́съ в҃: Мнѡ́ги скѡ́рби пра́вєднымъ: Кро́вными то́ки: Сла́ва, гла́съ д҃: Пѧтоза̑рнаѧ страда́лєцъ: На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ: А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша првⷣнїи: Сті́хъ: Мнѡ́ги скѡ́рби првⷣнымъ: Є҆ѵⷢ҇лїе матѳе́а, зача́ло л҃ѕ: Сѐ а҆́зъ посыла́ю ва́съ: Прича́стенъ: Ра́дꙋйтесѧ:

г҃. Ст҃ы́хъ мч҃нкъ, +а҆кеѱі́мы+ є҆пⷭ҇кпа, и҆ +і҆ѡ́сифа+ пресвѵ́тера и҆ +а҆їѳала̀+ дїа́кона: И҆ ѡ҆бновле́нїе хра́ма ст҃а́гѡ великомч҃нка +геѡ́ргїа+, и҆́же въ лѵ́дѣ, и҆дѣ́же положено̀ є҆́сть честно́е тѣ́ло є҆гѡ̀.

Стїхи̑ры мч҃нкѡвъ, гла́съ и҃. Подо́бенъ: Ѽ пресла́внагѡ чꙋдесѐ! И҆ геѡ́ргїа, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Досто́йно и҆́мени: На стїхо́внѣ ѻ҆ктѡ́иха: Сла́ва, мч҃нкѡвъ, гла́съ ѕ҃: Предпꙋ́тїе ѡ҆бра́зно: Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь.

Сла́ва, тропа́рь геѡ́ргїа, гла́съ д҃:

Ꙗ҆́кѡ плѣ́нныхъ свободи́тель и҆ ни́щихъ защи́титель, немощствꙋ́ющихъ вра́чь, царе́й побо́рниче, побѣдоно́сче великомч҃нче геѡ́ргїе, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

На ᲂу҆́трени, ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чте́нїе. Канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: и҆ мч҃нкѡвъ на д҃, гла́съ д҃. И҆ геѡ́ргїа, на д҃, гла́съ то́йже. По г҃-й пѣ́сни,

Конда́къ мч҃нкѡвъ, гла́съ в҃. Подо́бенъ: Вы́шнихъ и҆щѧ̀: Бж҃е́ствєннаѧ, мꙋ́дре, непоро́чнѡ тайноводи́лъ є҆сѝ, же́ртва прїѧ́тна бы́лъ є҆сѝ, бг҃обл҃же́нне: хрⷭ҇то́вꙋ бо пи́лъ є҆сѝ ча́шꙋ сла́внѡ, ст҃е а҆кеѱі́мо, со страда́льцы твои́ми молѧ́сѧ непреста́ннѡ ѡ҆ всѣ́хъ на́съ.

И҆ і҆́косъ. И҆ сѣда́ленъ мꙋ́ченикѡвъ: Сла́ва, геѡ́ргїа. По ѕ҃-й пѣ́сни,

Конда́къ геѡ́ргїа, гла́съ и҃. Подо́бенъ: Взбра́нной: Къ возбра́нномꙋ и҆ ско́ромꙋ застꙋпле́нїю твоемꙋ̀ прибѣ́гше, вѣ́рнїи, мо́лимъ и҆зба́витисѧ, стрⷭ҇тоте́рпче хрⷭ҇то́въ, ѿ собла̑знъ вра́жїихъ воспѣва́ющымъ тѧ̀, и҆ всѧ́кихъ бѣ́дъ и҆ ѡ҆ѕлобле́нїй, да зове́мъ: ра́дꙋйсѧ, мч҃нче геѡ́ргїе.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ мч҃нкѡвъ. Сла́ва, геѡ́ргїа. На стїхо́внѣ ѻ҆ктѡ́иха: И҆ мч҃нкѡвъ стїхи́ра, съ припѣ́вомъ, гла́съ в҃: Ѡ҆ бл҃гоче́стїи ст҃і́и: Сла́ва, геѡ́ргїа, гла́съ д҃. Самогла́сенъ: Разꙋ́мнагѡ а҆дама́нта: На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть: Сті́хъ: Предзрѣ́хъ гдⷭ҇а: А҆по́столъ ко є҆фесе́ємъ: зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби првⷣнымъ: Є҆ѵⷢ҇лїе лꙋкѝ, зача́ло р҃ѕ: Возложа́тъ на вы̀ рꙋ́ки своѧ̑: Прича́стенъ: Ра́дꙋйтесѧ:

д҃. Прпⷣбнагѡ ѻ҆тца̀ на́шегѡ +і҆ѡанні́кїа+ вели́кагѡ: И҆ ст҃а́гѡ мч҃нка +нїка́ндра+, є҆пⷭ҇кпа мѵ́рскагѡ: И҆ +є҆рме́а+ пресвѵ́тера.

Стїхи̑ры прпⷣбнагѡ г҃, гла́съ д҃. Подо́бенъ: Зва́нный свы́ше: И҆ мч҃нка г҃, гла́съ в҃. Подо́бенъ: Є҆гда̀ ѿ дре́ва: Сла́ва, гла́съ ѕ҃: Прпⷣбне ѻ҆́тче: На стїхо́внѣ ѻ҆ктѡ́иха: Сла́ва, гла́съ и҃: Мона́хѡвъ мно́жєства: Тропа́рь, гла́съ и҃: Сле́зъ твои́хъ тече́ньми: септе́мврїа въ г҃-й де́нь. Сла́ва, мч҃нка, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь. На ᲂу҆́трени, на Бг҃ъ гдⷭ҇ь тропа́рь прпⷣбнагѡ, два́жды: Сла́ва, мч҃нка. И҆ ѻ҆бы̑чныѧ каѳі̑смы, и҆ сѣда́льны ѻ҆ктѡ́иха: И҆ чте́нїе. Канѡ́нъ ѻ҆ктѡ́иха, є҆ди́нъ, И҆ прпⷣбнагѡ на д҃, гла́съ д҃: И҆ мч҃нкѡвъ на д҃, гла́съ то́йже. По г҃-й пѣ́сни сѣда́ленъ, гла́съ и҃. Сла́ва, мч҃нкѡвъ, гла́съ д҃. По ѕ҃-й пѣ́сни,

Конда́къ, гла́съ и҃. Подо́бенъ: Взбра́нной: Ѕвѣзда̀ ꙗ҆ви́лсѧ є҆сѝ всесвѣ́тлаѧ, въ мі́рѣ просвѣща́ѧй, и҆ сꙋ́щыѧ во мра́цѣ страсте́й ѡ҆блистава́ѧй: вра́чь же крѣпча́йшїй ꙗ҆ви́лсѧ є҆сѝ, но ꙗ҆́кѡ прїѧ́лъ є҆сѝ бл҃года́ть и҆сцѣле́нїй, просѧ́щымъ тѧ̀ пода́ждь и҆сцѣле́нїе, да зове́мъ: ра́дꙋйсѧ, ѻ҆́тче і҆ѡанні́кїе.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃а́гѡ. На стїхо́внѣ ѻ҆ктѡ́иха. Сла́ва, гла́съ ѕ҃, самогла́сенъ: Є҆́же по ѡ҆́бразꙋ: На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ гала́тѡмъ, зача́ло сг҃і: Пло́дъ дх҃о́вный: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло і҃: По і҆и҃сѣ и҆до́ша наро́ди: Прича́стенъ: Въ па́мѧть вѣ́чнꙋю:

є҃. Ст҃ы́хъ мч҃нкъ +галактїѡ́на+ и҆ +є҆пїсти́мїи+.

Стїхи̑ры ѻ҆ктѡ́иха г҃: И҆ мч҃нкѡвъ г҃, гла́съ и҃. Подо́бенъ: Ѽ пресла́внагѡ чꙋдесѐ! На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. На ᲂу҆́трени, ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чте́нїе. Ѻ҆́ба канѡ́на ѻ҆ктѡ́иха: и҆ мч҃никѡвъ, на д҃, гла́съ и҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Мꙋ́чєникъ хрⷭ҇то́выхъ полкѡ́мъ причто́стесѧ, до́брѣ хра́брствовавшымъ: свѣ́тлѡ подвиза́вшесѧ галактїѡ́не сла́вне съ чⷭ҇тно́ю сꙋпрꙋ́жницею и҆ сострада́вшею тебѣ̀, є҆пїсти́мїею, є҆ди́номꙋ бг҃ꙋ непреста́ннѡ моли́тесѧ ѡ҆ всѣ́хъ на́съ. По ѳ҃-й пѣ́сни свѣти́ленъ: И҆ на стїхо́внѣ ѻ҆ктѡ́иха.

🕃 Въ то́йже де́нь преставле́нїе и҆́же во ст҃ы́хъ ѻ҆тца̀ на́шегѡ +і҆ѡ́ны+ а҆рхїепⷭ҇кпа, новгоро́дскагѡ чꙋдотво́рца.

Соверша́етсѧ собо́ръ є҆гѡ̀, и҆дѣ́же лежа́тъ мѡ́щи є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ д҃: И҆справле́нїе вѣ́ры, и҆ ѡ҆́бразъ кро́тости, и҆ ꙗ҆́коже са́дъ посредѣ̀ раѧ̀, прпⷣбными дѣ́лы твои́ми мі́ръ просвѣща́еши. и҆ сегѡ̀ ра́ди къ честнѣ́й ра́цѣ твое́й любо́вїю прикаса́емсѧ, и҆ вѣ́рнѡ вопїе́мъ: предста́ни въ по́мощь воспѣва́ющымъ па́мѧть твою̀ свѣтоно́снꙋю, ѻ҆́тче і҆ѡ́но, и҆ молѝ сп҃сти́сѧ дꙋша́мъ на́шымъ.

Конда́къ, гла́съ то́йже: Свы́ше прїѧ́лъ є҆сѝ бж҃е́ственнꙋю бл҃года́ть, хода́тайствовати бг҃ꙋ и҆ человѣ́кѡмъ, ꙗ҆́кѡ а҆рхїере́й возноше́нїе возносѧ̀, и҆ ми́ръ лю́демъ твои̑мъ сносѧ̀, и҆ ѻ҆би́лїе плодѡ́въ, і҆ѡ́но бл҃же́нне: ты́ бо є҆сѝ вели́кагѡ нова́града похвала̀, и҆ сꙋ́щихъ ѡ҆ не́мъ ра́дость.

ѕ҃. 🕃 И҆́же во ст҃ы́хъ ѻ҆тца̀ на́шегѡ +па́ѵла+, а҆рхїепⷭ҇кпа кѡнстанті́нѧ гра́да, и҆сповѣ́дника.

На Гдⷭ҇и воззва́хъ, стїхи̑ры на ѕ҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ а҃: А҆рхїере́йскою ѻ҆де́ждею: На стїхо́внѣ ѻ҆ктѡ́иха: и҆ стїхи́ра ст҃и́телѧ, гла́съ а҃, съ припѣ́вомъ: Сщ҃е́нницы твоѝ ѡ҆блекꙋ́тсѧ въ пра́вдꙋ: Прпⷣбне ѻ҆́тче па́ѵле: Сла́ва, гла́съ в҃: По́стнꙋю пꙋчи́нꙋ:

Тропа́рь, гла́съ г҃: Бж҃е́ственныѧ вѣ́ры и҆сповѣ́данїемъ, дрꙋга́го па́ѵла тѧ̀ це́рковь ревни́телѧ во сщ҃е́нницѣхъ показа̀: свозопїе́тъ тѝ и҆ а҆́вель ко гдⷭ҇ꙋ, и҆ заха́рїина кро́вь првⷣнаѧ, ѻ҆́тче прпⷣбне, хрⷭ҇та̀ бг҃а молѝ, дарова́тисѧ на́мъ ве́лїей млⷭ҇ти.

На ᲂу҆́трени, ѻ҆́ба канѡ́на ѻ҆ктѡ́иха, без̾ мч҃ничнѡвъ: И҆ ст҃а́гѡ на ѕ҃, гла́съ д҃. По г҃-й пѣ́сни, сѣда́ленъ, гла́съ г҃. Сла́ва, гла́съ и҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Ѡ҆блиста́вый на землѝ ꙗ҆́кѡ ѕвѣзда̀ нб҃освѣ́тлаѧ, каѳолі́ческꙋю просвѣща́еши це́рковь ны́нѣ, ѡ҆ не́йже и҆ страда́льчествовалъ є҆сѝ, дꙋ́шꙋ твою̀, па́ѵле, предложи́въ: и҆ ꙗ҆́коже заха́рїина и҆ а҆́велева, ꙗ҆́снѡ вопїе́тъ твоѧ̀ кро́вь ко гдⷭ҇ꙋ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃а́гѡ. На стїхо́внѣ ѻ҆ктѡ́иха. Сла́ва, гла́съ з҃: Вни́кнꙋлъ є҆сѝ во глꙋбины̑ дх҃а: На лїтꙋргі́и, бл҃жє́нна ѻ҆ктѡ́иха, на д҃: И҆ ѿ канѡ́на ст҃а́гѡ пѣ́снь г҃, на д҃. Прокі́менъ, гла́съ з҃: Восхва́лѧтсѧ прпⷣбнїи во сла́вѣ: Сті́хъ, Воспо́йте гдⷭ҇еви пѣ́снь но́вꙋ. А҆по́столъ ко є҆вре́ємъ, зача́ло ти҃і, ѿ полꙋ̀: Всѧ́къ первосщ҃е́нникъ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ: Є҆ѵⷢ҇лїе лꙋкѝ, зача́ло ѯ҃д: Всѧ́къ и҆́же и҆сповѣ́сть мѧ̀: Прича́стенъ: Въ па́мѧть вѣ́чнꙋю:

🕃 Въ то́йже де́нь прпⷣбнагѡ ѻ҆тца̀ на́шегѡ +варлаа́ма+ хꙋ́тынскагѡ, новгоро́дскагѡ чꙋдотво́рца.

Соверша́етсѧ собо́ръ є҆гѡ̀, и҆дѣ́же лежа́тъ мѡ́щи є҆гѡ̀: и҆ и҆дѣ́же хра́мъ є҆гѡ̀.

Тропа́рь, гла́съ г҃: И҆́же на землѝ лега́нїемъ, поще́нїемъ же и҆ бдѣ́нїемъ тѣ́ло твоѐ и҆знꙋрѧ́ѧ, прпⷣбне, всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ: и҆ и҆сцѣле́нїй стрꙋѧ̀ незави́стнаѧ ꙗ҆ви́лсѧ є҆сѝ вѣ́рою притека́ющымъ къ ра́цѣ моще́й твои́хъ, варлаа́ме ѻ҆́тче на́шъ: молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Конда́къ, гла́съ и҃. Подо́бенъ: Взбра́нной: Ꙗ҆́коже дрꙋгі́й и҆лїа̀, ѻ҆́тче, до́ждь съ нб҃сѐ све́лъ є҆сѝ: ѻ҆́нъ ᲂу҆́бѡ ѻ҆́гнь сведѐ, и҆ царѧ̀ ᲂу҆дивѝ, ты́ же лю́ди твоѧ̑ возвесели́лъ є҆сѝ, и҆ торжествова́ти ᲂу҆стро́илъ є҆сѝ. вели́кїй бо но́въградъ вельмѝ тобо́ю хва́литсѧ, и҆мѣ́ѧ мѡ́щи твоѧ̑ въ себѣ̀, є҆го́же сохранѧ́й ѿ вра̑гъ непоколеби́ма, да зове́мъ тѝ: ра́дꙋйсѧ, прпⷣбне варлаа́ме, ѻ҆́тче на́шъ.

з҃. Ст҃ы́хъ мч҃нкъ +три́десѧти+ и҆ +тре́хъ+, и҆̀же въ мелиті́нѣ: И҆ прпⷣбнагѡ ѻ҆тца̀ на́шегѡ и҆ чꙋдотво́рца +ла́зарѧ+, въ галїсі́йстѣй горѣ̀ пости́вшагѡсѧ.

Стїхи̑ры мч҃нкѡвъ г҃, гла́съ д҃. Подо́бенъ: Ꙗ҆́кѡ до́блѧ: И҆ прпⷣбнагѡ г҃, гла́съ ѕ҃. Подо́бенъ: Всю̀ ѿложи́вше: Сла́ва, прпⷣбнагѡ, гла́съ є҃: Прпⷣбне ѻ҆́тче, не да́лъ є҆сѝ сна̀: На стїхо́внѣ ѻ҆ктѡ́иха: Сла́ва, прпⷣбнагѡ, гла́съ ѕ҃: Прпⷣбне ѻ҆́тче: во всю̀ зе́млю: Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь.

Сла́ва, тропа́рь прпⷣбнагѡ, гла́съ и҃: Бдѣ́нными мл҃твами, тече́ньми сле́зными сто́лпъ ѡ҆мочи́лъ є҆сѝ, и҆ и҆з̾ глꙋбины̀ воздыха́ньми во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ па́стырь, всѣ̑мъ подаѧ̀ проще́нїе, прпⷣбне ѻ҆́тче на́шъ ла́заре, моли́сѧ хрⷭ҇тꙋ̀ бг҃ꙋ сп҃сти́сѧ дꙋша́мъ на́шымъ.

На ᲂу҆́трени, канѡ́нъ ѻ҆ктѡ́иха є҆ди́нъ, и҆ ст҃ы́хъ два̀: Мч҃нкѡвъ, гла́съ и҃: Прпⷣбнагѡ, гла́съ в҃. По г҃-й пѣ́сни,

Конда́къ прпⷣбнагѡ, гла́съ д҃. Подо́бенъ: Ꙗ҆ви́лсѧ є҆сѝ: Ꙗ҆́кѡ свѣти́льника превели́каго, цр҃ковь хрⷭ҇то́ва сла́витъ тѧ̀ съ весе́лїемъ ѱало́мски: тѣ́мже не преста́й молѧ́сѧ хрⷭ҇тꙋ̀ да́ти всѣ̑мъ прегрѣше́нїй проще́нїе.

И҆ сѣда́ленъ мч҃нкѡвъ, гла́съ и҃. Сла́ва, прпⷣбнагѡ, гла́съ г҃. По ѕ҃-й пѣ́сни,

Конда́къ мч҃нкѡвъ, гла́съ и҃. Подо́бенъ: Ꙗ҆́кѡ нача́тки: Ли́къ мч҃нческїй ꙗ҆́сенъ, по́лкъ свѣтоно́сенъ, соше́дъ къ на́мъ разꙋ́мнѡ, цр҃ковь дне́сь просвѣти́лъ є҆́сть чꙋ́дными зарѧ́ми. тѣ́мже пра́зднꙋюще честнꙋ́ю па́мѧть и҆́хъ, про́симъ ѿ тебѐ сп҃се на́шъ: тѣ́хъ мл҃твами ѿ бѣ́дъ и҆зба́ви на́съ, да пое́мъ тѝ: а҆ллилꙋ́їа.

По ѳ҃-й пѣ́сни, свѣти́ленъ ѻ҆ктѡ́иха, и҆ мч҃нкѡвъ: Сла́ва, прпⷣбнагѡ. На лїтꙋргі́и, прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ, Что̀ возда́мъ гдⷭ҇еви: А҆по́столъ къ гала́тѡмъ, зача́ло сг҃і: Пло́дъ дх҃о́вный: А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а: Сті́хъ, Си́льно на землѝ бꙋ́детъ сѣ́мѧ є҆гѡ̀: Є҆ѵⷢ҇лїе матѳе́а, зача́ло ч҃: По і҆и҃сѣ и҆до́ша наро́ди: Прича́стенъ, Въ па́мѧть:

и҃. 🕂 Собо́ръ а҆рхїстрати́га +мїхаи́ла+, и҆ про́чихъ безпло́тныхъ си́лъ.

А҆́ще хра́мъ собо́ра а҆рхїстрати́га мїхаи́ла, и҆лѝ и҆зво́литъ настоѧ́тель, твори́мъ бдѣ́нїе.

На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ а҃. Подо́бенъ: Всехва́льнїи: Сла́ва, гла́съ д҃: И҆ ны́нѣ, бг҃оро́диченъ. На стїхо́внѣ стїхи̑ры, гла́съ ѕ҃. Подо́бенъ, Тридне́венъ: Сла́ва, и҆ ны́нѣ, бг҃оро́диченъ. Тропа́рь, гла́съ д҃: Нбⷭ҇ныхъ во́инствъ: Сла́ва, и҆ ны́нѣ, бг҃оро́диченъ. На вели́цѣй вече́рни, пое́мъ: Бл҃же́нъ мꙋ́жъ: а҃-й а҆нтїфѡ́нъ, На Гдⷭ҇и воззва́хъ, стїхи̑ры на и҃, гла́съ д҃. Подо́бенъ: Ꙗ҆́кѡ до́блѧ: И҆́ны стїхи̑ры, гла́съ то́йже. Подо́бенъ: Да́лъ є҆сѝ зна́менїе: Сла́ва, гла́съ ѕ҃: Сра́дꙋйтесѧ: И҆ ны́нѣ, бг҃оро́диченъ: Сра́дꙋйтесѧ: Вхо́дъ. Прокі́менъ днѐ. И҆ чтє́нїѧ г҃: а҃-е, І҆исꙋ́са наѵи́на: Бы́сть є҆гда̀ бѧ́ше і҆исꙋ́съ ᲂу҆ і҆ерїхѡ́на: в҃- е, Сꙋде́й і҆и҃левыхъ: Бы́сть во дни̑ ѻ҆́ны ᲂу҆крѣпи́сѧ мадїа́мъ: г҃-е, Прⷪ҇ро́чества и҆са́їина: Та́кѡ глаго́летъ гдⷭ҇ь, всѧ̀ землѧ̀ да вопїе́тъ: На лїті́и стїхи̑ры, гла́съ а҃: Сла́ва, гла́съ д҃: Ѻ҆́гненными ᲂу҆стна́ми: И҆ ны́нѣ, гла́съ то́йже: Дне́сь бг҃овмѣсти́мый хра́мъ бцⷣа: На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: А҆́гг҃льски въ мі́рѣ торжествꙋ́юще: Сла́ва, и҆ ны́нѣ, гла́съ и҃: Ꙗ҆́кѡ чинонача́льникъ:

Тропа́рь, гла́съ д҃: Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи, да ва́шими мл҃твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ прилѣ́жнѡ, и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача́льницы вы́шнихъ си́лъ.

Сла́ва, и҆ ны́нѣ, бг҃оро́диченъ. На ᲂу҆́трени, на Бг҃ъ гдⷭ҇ь, тропа́рь два́жды: Сла́ва, и҆ ны́нѣ, бг҃оро́диченъ: И҆ ѻ҆бы̑чныѧ каѳі̑смы, и҆ сѣда́льны: и҆ чте́мъ сло́во златоꙋ́стагѡ въ маргарі́тѣ ѡ҆ серафі́мѣхъ. Полѷеле́й, и҆ сѣда́ленъ, и҆ чте́нїе. Степє́нна, а҃-й а҆нтїфѡ́нъ д҃-гѡ гла́са. Прокі́менъ: Творѧ́й а҆́гг҃лы своѧ̑ дх҃и: Є҆ѵⷢ҇лїе матѳе́а, зача́ло н҃в. ѱало́мъ н҃. Стїхи́ра, гла́съ ѕ҃: А҆́гг҃ли твоѝ хрⷭ҇тѐ: Канѡ́нъ бцⷣы, гла́съ и҃, со і҆рмосо́мъ на ѕ҃: И҆ безпло́тныхъ два̀ канѡ́на на и҃, гла́съ и҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃, два́жды: Сла́ва, и҆ ны́нѣ, бг҃оро́диченъ: По ѕ҃-й пѣ́сни,

Конда́къ, гла́съ в҃: А҆рхїстрати́зи бж҃їи, слꙋжи́телїе бж҃е́ственныѧ сла́вы, а҆́гг҃лѡвъ нача̑льницы, и҆ человѣ́кѡвъ наста̑вницы, поле́зное на́мъ проси́те и҆ ве́лїю млⷭ҇ть, ꙗ҆́кѡ безпло́тныхъ а҆рхїстрати́зи.

И҆ і҆́косъ: и҆ про́логъ. По ѳ҃-й пѣ́сни свѣти́ленъ: Ѻ҆́гненныхъ а҆рхїстрати́же: Сла́ва, Невеще́ственныхъ: И҆ ны́нѣ, бг҃оро́диченъ. На хвали́техъ стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ є҃: И҆дѣ́же ѡ҆сѣнѧ́етъ: И҆ ны́нѣ, бг҃оро́диченъ: Бл҃жи́мъ тѧ̀: Славосло́вїе вели́кое. По трист҃о́мъ тропа́рь: Сла́ва, и҆ ны́нѣ, бг҃оро́диченъ: Є҆́же ѿ вѣ́ка: Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна, а҃-гѡ канѡ́на пѣ́снь г҃-ѧ, и҆ в҃-гѡ пѣ́снь ѕ҃. Прокі́менъ, гла́съ д҃: Творѧ́й а҆́гг҃лы своѧ̑ дх҃и: Сті́хъ, Бл҃гословѝ дꙋшѐ моѧ̀ гдⷭ҇а: А҆по́столъ ко є҆вре́ємъ, зача́ло т҃є: А҆́ще глаго́ланное а҆́гг҃лы сло́во: А҆ллилꙋ́їа, гла́съ в҃: Хвали́те гдⷭ҇а всѝ а҆́гг҃ли є҆гѡ̀. Сті́хъ: Ꙗ҆́кѡ то́й речѐ, и҆ бы́ша: Є҆ѵⷢ҇лїе лꙋкѝ, зача́ло н҃а: Слꙋ́шаѧйва́съ: Прича́стенъ, Творѧ́й а҆́гг҃лы своѧ̑:

ѳ҃. Ст҃ы́хъ мч҃нкъ, +ѻ҆нїсі́фора+ и҆ +порфѵ́рїа+: И҆ прпⷣбныѧ ма́тере на́шеѧ +матрѡ́ны+: И҆ прпⷣбныѧ +ѳеокті́сты+, ꙗ҆́же ѿ ле́звы.

Стїхи̑ры мч҃нкѡвъ г҃, гла́съ и҃. Подо́бенъ: Ѽ пресла́внагѡ чꙋдесѐ! И҆ прпⷣбныѧ г҃, гла́съ д҃. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. Сла́ва, прпⷣбныѧ, гла́съ и҃: Въ тебѣ̀ ма́ти: септе́мврїа въ а҃і-й де́нь.

[зрѝ] Возслѣ́дованїе же прпⷣбныѧ ѳеокті́сты пое́тсѧ на повече́рїи.

На ᲂу҆́трени, канѡ́нъ ѻ҆ктѡ́иха є҆ди́нъ, и҆ ст҃ы́хъ два̀. Мч҃нкѡвъ гла́съ д҃: Прпⷣбныѧ, гла́съ и҃. По г҃-й пѣ́сни,

Конда́къ прпⷣбныѧ, гла́съ в҃. Подо́бенъ: Бл҃года́ть прїи́мше: За любо́вь гдⷭ҇ню предподо́бнаѧ матрѡ́но, поко́ѧ жела́нїе возненави́дѣла є҆сѝ, поще́нїемъ дх҃ъ тво́й просвѣти́вши. но твои́ми мл҃твами и҆ проти́вныхъ шата̑нїѧ разорѝ: крѣ́пкѡ бо ѕвѣ́ри побѣди́ла є҆сѝ.

И҆ і҆́косъ, и҆ сѣда́ленъ мч҃нкѡвъ, гла́съ а҃: Сла́ва преподо́бныѧ, гла́съ и҃. По ѕ҃-й пѣ́сни,

Конда́къ мч҃нкѡвъ, гла́съ в҃: Подо́бенъ: Вы́шнихъ и҆щѧ̀: Мꙋ́чєникъ дво́ица пострада́вше крѣ́пкѡ, вра́жїю горды́ню на зе́млю низложи́сте, ѡ҆зари́вшесѧ бл҃года́тїю несозда́нныѧ трⷪ҇цы, сла́внїи ѻ҆нїсі́форе и҆ порфѵ́рїе, моли́тесѧ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха и҆ мч҃нченъ. Сла́ва, прпⷣбныѧ. На стїхо́внѣ ѻ҆ктѡ́иха.

і҃. Ст҃ы́хъ а҆пⷭ҇лъ: +є҆ра́ста+, +ѻ҆лѵ́мпа+, +родїѡ́на+, и҆ и҆̀же съ ни́ми.

Стїхи̑ры ѻ҆ктѡ́иха, г҃: и҆ а҆пⷭ҇лѡвъ г҃, гла́съ а҃: Подо́бенъ: Всехва́льнїи мч҃нцы: На стїхо́внѣ ѻ҆ктѡ́иха. Тропа́рь, гла́съ г҃: А҆пⷭ҇ли ст҃і́и: ѻ҆ктѡ́врїа въ л҃а-й де́нь. На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́хъ на д҃, гла́съ а҃: По г҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Ꙗ҆ви́сѧ дне́сь а҆пⷭ҇лъ честно́е торжество̀, подаю́щее ꙗ҆́вѣ всѣ̑мъ прегрѣше́нїй ѡ҆ставле́нїе, соверша́ющымъ и҆́хъ па́мѧть.

Та́же сѣда́ленъ, гла́съ а҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Бж҃е́ственнымъ свѣ́томъ ᲂу҆́мъ ѡ҆зари́вше, виті̑йскаѧ плетє́нїѧ мꙋ́дрѣ розори́сте: и҆ ꙗ҆зы́ки всѧ̑, ᲂу҆лови́вше, а҆пⷭ҇ли сла́внїи, влⷣцѣ приведо́сте, трⷪ҇цꙋ бж҃е́ственнꙋю сла́вити наꙋча́юще.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃ы́хъ. На стїхо́внѣ ѻ҆ктѡ́иха.

а҃і. Ст҃ы́хъ мч҃нкъ +ми́ны+, +ві́ктора+ и҆ +вїке́нтїа+: И҆ ст҃ы́ѧ мч҃нцы +стефані́ды+: И҆ прпⷣбнагѡ ѻ҆тца̀ на́шегѡ и҆ и҆сповѣ́дника +ѳео́дѡра+ стꙋді́та.

Стїхи̑ры мч҃нкѡвъ г҃, гла́съ д҃: Подо́бенъ: Ꙗ҆́кѡ до́блѧ: И҆ прпⷣбнагѡ г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, мч҃нкѡвъ, гла́съ ѕ҃: Па́ки на́мъ лѣ́тнѧѧ па́мѧть: На стїхо́внѣ ѻ҆ктѡ́иха. Та́же, стїхи́ра мч҃нкѡвъ, съ припѣ́вомъ, гла́съ в҃: Мнѡ́ги скѡ́рби првⷣнымъ: Прїиди́те любострада́льцы: Сла́ва, прпⷣбнагѡ, гла́съ ѕ҃: Прпⷣбне ѻ҆́тче: Тропа́рь, гла́съ д҃: Мч҃нцы твоѝ гдⷭ҇и: септе́мврїа въ к҃-й де́нь. Сла́ва, прпⷣбнагѡ, гла́съ и҃. Правосла́вїѧ наста́вниче: ѻ҆ктѡ́врїа въ а҃і-й де́нь. На ᲂу҆́трени, ѻ҆бы̑чныѧ каѳі̑смы: и҆ сѣда́льны ѻ҆ктѡ́иха: и҆ чтє́нїѧ. Канѡ́нъ ѻ҆ктѡ́иха є҆ди́нъ: И҆ мч҃нкѡвъ, гла́съ д҃: И҆ прпⷣбнагѡ, гла́съ и҃. По г҃-й пѣ́сни,

Конда́къ прпⷣбнагѡ, гла́съ в҃. Подо́бенъ: Вы́шнихъ и҆щѧ̀: По́стническое и҆ равноа́гг҃льное житїѐ твоѐ страда́льческими ᲂу҆ѧсни́лъ є҆сѝ по́двиги, и҆ а҆́гг҃лѡмъ совсе́льникъ, бг҃обл҃же́нне, ꙗ҆ви́лсѧ є҆сѝ, ѳео́дѡре: съ ни́ми хрⷭ҇тꙋ̀ бг҃ꙋ молѧ́сѧ не преста́й ѡ҆ всѣ́хъ на́съ.

И҆ і҆́косъ, и҆ сѣда́ленъ мч҃нкѡвъ, гла́съ и҃: Сла́ва, прпⷣбнагѡ, гла́съ г҃. По ѕ҃-й пѣ́сни,

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Во́инства и҆схитѝ привре́меннагѡ, и҆ нетлѣ́ннагѡ показа́ тѧ нбⷭ҇нагѡ ѻ҆́бщника стрⷭ҇тоте́рпче ми́но, хрⷭ҇то́съ бг҃ъ на́шъ, и҆́же мч҃нкѡвъ нетлѣ́нный вѣне́цъ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха, и҆ мч҃нкѡвъ. Сла́ва, прпⷣбнагѡ. На стїхо́внѣ ѻ҆ктѡ́иха. Та́же стїхи́ра мч҃нкѡвъ съ припѣ́вомъ, гла́съ в҃: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Прїиди́те вѣ́рнїи: Сла́ва, прпⷣбнагѡ, гла́съ и҃: Мона́хѡвъ мно́жєства: На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ: Предзрѣ́хъ гдⷭ҇а предо мно́ю вы́нꙋ. А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: И҆ прпⷣбнагѡ, ко є҆вре́ємъ, зача́ло тл҃є: Повинꙋ́йтесѧ наста́вникѡмъ ва́шымъ: А҆ллилꙋ́їа, гла́съ д҃: Воззва́ша првⷣнїи: Сті́хъ: Бл҃же́нъ мꙋ́жъ боѧ́йсѧ гдⷭ҇а: Є҆ѵⷢ҇лїе матѳе́а зача́ло л҃и: Всѧ́къ и҆́же и҆сповѣ́сть мѧ̀: И҆ прпⷣбнагѡ, ѿ матѳе́а, зача́ло і҃: По і҆и҃сѣ и҆до́ша наро́ди: Прича́стенъ, Ра́дꙋйтесѧ првⷣнїи ѡ҆ гдⷭ҇ѣ:

🕃 Въ то́йже де́нь преставле́нїе ст҃а́гѡ и҆ бл҃же́ннагѡ +маѯі́ма+, хрⷭ҇та̀ ра́ди ю҆ро́дивагѡ, моско́вскагѡ чꙋдотво́рца.

Собо́ръ є҆гѡ̀ соверша́етсѧ, и҆дѣ́же лежа́тъ мо́щи є҆гѡ̀, и҆ и҆дѣ́же хра́мъ є҆гѡ̀.

Тропа́рь, гла́съ є҃: Нагото́ю тѣле́сною и҆ терпѣ́нїемъ ѡ҆бнажи́лъ є҆сѝ вра̑жїѧ кова̑рствїѧ, ѡ҆блича́ѧ неподо́бное є҆гѡ̀ дѣѧ́нїе, ѕѣ́льнѣ стражда̀ со́лнечный ва́ръ, и҆ нꙋ̑жныѧ вели̑кїѧ стꙋ́дєни, мра́за, и҆ ѻ҆гнѧ̀ не чꙋ́лъ є҆сѝ, бж҃їею по́мощїю покрыва́емь, маѯі́ме премꙋ́дре: ѡ҆ вѣ́рою творѧ́щихъ па́мѧть твою̀ че́стнѡ и҆ ᲂу҆се́рднѡ, притека́ющихъ къ ра́цѣ моще́й твои́хъ, молѝ и҆зба́витисѧ ѿ бѣ́дъ, и҆ паде́нїѧ и҆збѣжа́ти.

Конда́къ, гла́съ в҃: Вы́шнїѧ красоты̀ жела́ѧ, ни̑жнїѧ сла́дѡсти и҆ тѣлє́снаѧ ѡ҆дѣѧ̑нїѧ въ ничто́же вмѣни́лъ є҆сѝ, и҆ нестѧжа́нїе па́че сꙋ́етнагѡ мі́ра возлюби́лъ є҆сѝ, а҆́гг҃льское житїѐ проходѧ̀ сконча́лсѧ є҆сѝ, бл҃же́нне маѯі́ме, съ ни́миже хрⷭ҇та̀ молѝ непреста́ннѡ ѡ҆ всѣ́хъ на́съ.

в҃і. 🕃 И҆́же во ст҃ы́хъ ѻ҆тца̀ на́шегѡ +і҆ѡа́нна+, патрїа́рха а҆леѯандрі́йскагѡ, ми́лостивагѡ: И҆ прпⷣбнагѡ ѻ҆тца̀ на́шегѡ +ні́ла+.

На Гдⷭ҇и воззва́хъ, стїхи̑ры і҆ѡа́нна, г҃, гла́съ д҃. Подо́бенъ: Да́лъ є҆сѝ зна́менїе: И҆ прпⷣбнагѡ, трѝ, гла́съ и҃. Подо́бенъ: Что̀ вы̀ нарече́мъ: Сла́ва, гла́съ в҃: Млⷭ҇ти и҆сто́чникъ: На стїхо́внѣ ѻ҆ктѡ́иха. Сла́ва, гла́съ и҃: Мона́хѡвъ мно́жєства:

Тропа́рь, гла́съ и҃: Въ терпѣ́нїи твое́мъ стѧжа́лъ є҆сѝ мздꙋ̀ твою̀, ѻ҆́тче преподо́бне, въ мл҃твахъ непреста́ннѡ терпѣ́вый, ни́щыѧ возлюби́вый, и҆ сїѧ̑ ᲂу҆довли́вый: но моли́сѧ хрⷭ҇тꙋ̀ бг҃ꙋ, і҆ѡа́нне млⷭ҇тиве бл҃же́нне, сп҃сти́сѧ дꙋша́мъ на́шымъ.

Сла́ва, гла́съ то́йже: Сле́зъ твои́хъ тече́ньми: септе́мврїа въ г҃-й де́нь. На ᲂу҆́трени, канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: и҆ ст҃ы́хъ два̀, на и҃. І҆ѡа́нна, гла́съ и҃: и҆ прпⷣбнагѡ, гла́съ то́йже. По г҃-й пѣ́сни,

Конда́къ ні́ла, гла́съ и҃. Подо́бенъ: Взбра́нной: Хвра̑стнаѧ страсте́й ꙗ҆̀же ѿ тѣлесѐ воста́нїѧ, сѣчи́тельнѡ, ні́ле бл҃же́нне, во бдѣ́нной твое́й ссѣ́клъ є҆сѝ мл҃твѣ: но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ мѧ̀ бѣ́дъ свободѝ, да зовꙋ́ ти: ра́дꙋйсѧ, ѻ҆́тче всемі́рный.

И҆ і҆́косъ, и҆ сѣда́ленъ, гла́съ то́йже. Сла́ва, прпⷣбнагѡ, гла́съ то́йже. По ѕ҃-й пѣ́сни,

Конда́къ і҆ѡа́нна, гла́съ в҃. Подо́бенъ: Вы́шнихъ и҆щѧ̀: Бога́тство твоѐ расточи́лъ є҆сѝ ᲂу҆бѡ́гимъ, и҆ нбⷭ҇ное бога́тство ны́нѣ воспрїѧ́лъ є҆сѝ, і҆ѡа́нне всемꙋ́дре: сегѡ̀ ра́ди вси́ тѧ почита́емъ, соверша́юще па́мѧть твою̀, ми́лостыни ѽ тезоимени́те!

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: И҆ і҆ѡа́нна: Сла́ва, прпⷣбнагѡ. На стїхо́внѣ ѻ҆ктѡ́иха. Сла́ва, прпⷣбнагѡ, гла́съ ѕ҃: Прпⷣбне ѻ҆́тче: На лїтꙋргі́и, бл҃жє́нна ѻ҆ктѡ́иха: И҆ ст҃и́телѧ пѣ́снь г҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ ко є҆вре́ємъ, зача́ло та҃і: И҆мꙋ́ще ᲂу҆́бѡ а҆рхїере́а вели́ка: А҆ллилꙋ́їа, гла́съ в҃: Оу҆ста̀ првⷣнагѡ поꙋча́тсѧ премꙋ́дрости: Сті́хъ: Зако́нъ бг҃а є҆гѡ̀: Є҆ѵⷢ҇лїе лꙋкѝ, зача́ло к҃д: Ста̀ і҆и҃съ на мѣ́стѣ ра́внѣ: Прича́стенъ, Въ па́мѧть вѣ́чнꙋю:

г҃і. 🕁 И҆́же во ст҃ы́хъ ѻ҆тца̀ на́шегѡ +і҆ѡа́нна+, а҆рхїепⷭ҇кпа кѡнстанті́нѧ гра́да, златоꙋ́стагѡ.

Твори́мъ бдѣ́нїе. На ма́лѣй вече́рни, стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: Крⷭ҇ти́телѧ подража́ѧ: Сла́ва, гла́съ д҃: Бы́лъ є҆сѝ, златоꙋ́сте: И҆ ны́нѣ, И҆зба́ви ны̀: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Трꙋба̀ златови́днаѧ: съ припѣ́вы и҆́хъ. а҃-й, Оу҆ста̀ моѧ̑ возглаго́лютъ премꙋ́дрость: в҃-й, Сщ҃е́нницы твоѝ ѡ҆блекꙋ́тсѧ въ пра́вдꙋ: Сла́ва, Подо́бенъ: то́йже: Трⷪ҇цы чⷭ҇тны́ѧ: И҆ ны́нѣ, Дв҃о и҆з̾ тебѐ ро́ждшагосѧ бг҃а:

Тропа́рь, гла́съ и҃: Оу҆́стъ твои́хъ ꙗ҆́коже свѣ́тлость ѻ҆гнѧ̀ возсїѧ́вши бл҃года́ть, вселе́ннꙋю просвѣтѝ: не сребролю́бїѧ мі́рови сокрѡ́вища сниска̀, высотꙋ̀ на́мъ смиренномꙋ́дрїѧ показа̀. но твои́ми словесы̀ наказꙋ́ѧ, ѻ҆́тче і҆ѡа́нне златоꙋ́сте, молѝ сло́ва, хрⷭ҇та̀ бг҃а, сп҃сти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ. Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, пое́мъ: Бл҃же́нъ мꙋ́жъ, пе́рвый а҆нтїфѡ́нъ. На Гдⷭ҇и воззва́хъ, стїхи̑ры на и҃, гла́съ д҃. Подо́бенъ: Ꙗ҆́кѡ до́блѧ: Златокова́ннꙋю трꙋбꙋ̀: Сла́ва, гла́съ ѕ҃: Прпⷣбне требл҃же́нне: И҆ ны́нѣ, бг҃оро́диченъ: Кто̀ тебѐ не ᲂу҆бл҃жи́тъ: Вхо́дъ, прокі́менъ днѐ. Чтє́нїѧ г҃, ст҃и́тєльскаѧ. На лїті́и стїхи́ра хра́ма, и҆ ст҃а́гѡ самогла́сны, гла́съ а҃: Свѣти́льниче і҆ѡа́нне: Сла́ва, гла́съ д҃, самогла́сенъ: Подоба́ше ца́рствꙋющемꙋ градѡ́въ: И҆ ны́нѣ: Тѧ̀ стѣ́нꙋ стѧжа́хомъ: На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ по́стникѡвъ: Ра́дꙋйсѧ златоза́рный: съ припѣ́вы и҆́хъ. Сла́ва, гла́съ ѕ҃: Трꙋба̀ златогла́снаѧ: И҆ ны́нѣ: Творе́цъ и҆ и҆зба́витель мо́й: На бл҃гослове́нїи хлѣ́бѡвъ, Тропа́рь, гла́съ и҃: Оу҆́стъ твои́хъ: два́жды, пи́санъ на ма́лѣй вече́рни: и҆ Бцⷣе дв҃о: є҆ди́ножды. [зрѝ] А҆ и҆дѣ́же всено́щнагѡ бдѣ́нїѧ не быва́етъ: По тропарѣ̀, Сла́ва, и҆ ны́нѣ, бг҃оро́диченъ: и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ: И҆́же на́съ ра́ди: И҆ ѻ҆бы̑чныѧ каѳі̑смы, и҆ сѣда́льны ст҃а́гѡ съ бг҃оро́дичны и҆́хъ. И҆ чте́мъ ѿ житїѧ̀ златоꙋ́стагѡ. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ: и҆ чте́нїе. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Оу҆ста̀ моѧ̑ возглаго́лютъ премꙋ́дрость: Сті́хъ: Оу҆слы́шите сїѧ̑ всѝ ꙗ҆зы́цы: Всѧ́кое дыха́нїе: Є҆ѵⷢ҇лїе ѿ і҆ѡа́нна, зача́ло л҃є ѿ полꙋ̀: Не входѧ́й две́рьми: Та́же ѱало́мъ н҃. Стїхи́ра, гла́съ ѕ҃: И҆злїѧ́сѧ бл҃года́ть: Канѡ́нъ бцⷣы, со і҆рмосо́мъ на ѕ҃, гла́съ и҃, и҆ ст҃а́гѡ на и҃, гла́съ то́йже. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ ст҃а́гѡ, гла́съ и҃. Сла́ва, гла́съ то́йже: И҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ ѕ҃. Подо́бенъ: Є҆́же ѡ҆ на́съ: Ѿ нб҃съ прїѧ́лъ є҆сѝ бж҃е́ственнꙋю бл҃года́ть, и҆ твои́ми ᲂу҆стна́ми всѧ̑ ᲂу҆чи́ши покланѧ́тисѧ въ трⷪ҇цѣ є҆ди́номꙋ бг҃ꙋ, і҆ѡа́нне златоꙋ́сте, всебл҃же́нне прпⷣбне, досто́йнѡ хва́лимъ тѧ̀: є҆си́ бо наста́вникъ, ꙗ҆́кѡ бж҃е́ствєннаѧ ꙗ҆влѧ́ѧ.

И҆ і҆́косъ. По ѳ҃-й пѣ́сни, свѣти́ленъ. Сла́ва и҆́нъ: И҆ ны́нѣ, бг҃оро́диченъ. На хвали́техъ стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе: Сосꙋ́дъ чⷭ҇тнѣ́йшїй: Сла́ва, гла́съ и҃: Златы́ми словесы̀: И҆ ны́нѣ, бг҃оро́диченъ: Влⷣчце прїимѝ: Славосло́вїе вели́кое. Тропа́рь. Сла́ва, и҆ ны́нѣ, бг҃оро́диченъ: И҆́же на́съ ра́ди: Є҆ктєнїѝ и҆ ѿпꙋ́стъ. И҆ дае́тсѧ є҆ле́й ѿ канди́ла ст҃а́гѡ: и҆ ча́съ пе́рвый: и҆ коне́чный ѿпꙋ́стъ. На лїтꙋргі́и, бл҃жє́нна ѿ канѡ́на ст҃а́гѡ, пѣ́снь г҃-ѧ и҆ ѕ҃-ѧ. По вхо́дѣ тропа́рь хра́ма хрⷭ҇то́ва, и҆ бцⷣы, и҆ ст҃а́гѡ. Сла́ва, конда́къ є҆гѡ̀. И҆ ны́нѣ хра́ма бцⷣы, и҆лѝ, Предста́тельство хрⷭ҇тїа́нъ: Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость: Сті́хъ: Оу҆слы́шите сїѧ̑ всѝ ꙗ҆зы́цы: А҆по́столъ ко є҆вре́ємъ, зача́ло ти҃і: Тако́въ на́мъ подоба́ше а҆рхїере́й: А҆ллилꙋ́їа, гла́съ в҃: Оу҆ста̀ првⷣнагѡ поꙋча́тсѧ премꙋ́дрости: Є҆ѵⷢ҇лїе і҆ѡа́нна, зача́ло л҃ѕ: Речѐ гдⷭ҇ь: а҆́зъ є҆́смь две́рь: Прича́стенъ: Въ па́мѧть вѣ́чнꙋю: На трапе́зѣ быва́етъ бра́тїи вели́кое ᲂу҆тѣше́нїе.

[зрѝ] Вѣ́домо бꙋ́ди, ꙗ҆́кѡ всегда̀ твори́мъ мѧсопꙋ́стъ въ д҃і-й де́нь непремѣ́ннѡ кромѣ̀ двꙋ̀ дне́й, среды̀ и҆ пѧтка̀. А҆́ще ли слꙋчи́тсѧ мѧсопꙋ́стъ въ сре́дꙋ и҆лѝ въ пѧто́къ, въ д҃і-й де́нь, въ па́мѧть ст҃а́гѡ а҆пⷭ҇ла фїлі́ппа: тогда̀ твори́мъ мѧсопꙋ́стъ въ г҃і-й де́нь, на па́мѧть ст҃а́гѡ і҆ѡа́нна златоꙋ́стагѡ, а҆ въ сре́дꙋ и҆лѝ въ пѧто́къ ника́коже де́рзнемъ мѧсопꙋ́стъ твори́ти, возбранено́ бо є҆́сть ст҃ы́ми пра́вилы.

д҃і. 🕂 Ст҃а́гѡ и҆ всехва́льнагѡ а҆пⷭ҇ла +фїлі́ппа+.

На вели́цѣй вече́рни, пое́мъ: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры а҆пⷭ҇ла, на и҃, гла́съ ѕ҃. Подо́бенъ: Всю̀ ѿложи́вше: Сла́ва, гла́съ ѕ҃: Вели́кагѡ, фїлі́ппе, свѣ́та: И҆ ны́нѣ: Кто̀ тебѐ не ᲂу҆бл҃жи́тъ: Вхо́дъ. Прокі́менъ днѐ, и҆ чтє́нїѧ г҃: и҆щѝ сегѡ̀ мѣ́сѧца въ л҃-й де́нь. На лїті́и стїхи́ра хра́ма, и҆ а҆пⷭ҇ла, гла́съ д҃: Подо́бенъ: Ꙗ҆́кѡ до́блѧ: Сла́ва, гла́съ в҃: Ѡ҆ста́вивъ земна̑ѧ. И҆ ны́нѣ: Всѐ ᲂу҆пова́нїе моѐ: На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ: съ припѣ́вы и҆́хъ: Сла́ва, гла́съ в҃: Ча́ша а҆рѡма́тъ въ мі́рѣ: И҆ ны́нѣ: Ѽ чꙋдесѐ но́вагѡ: По трист҃о́мъ, Тропа́рь гла́съ г҃: А҆пⷭ҇ле ст҃ы́й: септе́мврїа въ к҃в-й де́нь.

И҆лѝ се́й, гла́съ то́йже: Бл҃гоꙋкраша́етсѧ вселе́ннаѧ, є҆ѳїо́пїа ликовствꙋ́етъ, ꙗ҆́кѡ вѣнце́мъ красꙋ́ема тобо́ю, просвѣти́вшисѧ свѣ́тлѡ торжествꙋ́етъ па́мѧть твою̀, бг҃оглаго́ливе фїлі́ппе: всѧ̑ бо вѣ́ровати хрⷭ҇тꙋ̀ наꙋчи́лъ є҆сѝ, и҆ тече́нїе соверши́лъ досто́йнѡ є҆ѵⷢ҇лїа. тѣ́мъ дерзнове́ннѡ вари́тъ є҆ѳїо́пскаѧ рꙋка̀ къ бг҃ꙋ, є҆го́же молѝ дарова́ти на́мъ ве́лїю млⷭ҇ть.

Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю: И҆ ѿпꙋ́стъ. На ᲂу҆́трени, на Бг҃ъ гдⷭ҇ь: тропа́рь а҆пⷭ҇ла, два́жды, Сла́ва, и҆ ны́нѣ, бг҃оро́диченъ. По каѳі́смахъ, сѣда́льны а҆пⷭ҇ла, съ бг҃оро́дичны и҆́хъ. И҆ чте́нїе. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃ѕ: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀, стїхи́ра, гла́съ з҃: Премꙋ́дрый ло́вче: Канѡ́нъ бцⷣы со і҆рмосо́мъ на ѕ҃: и҆ а҆пⷭ҇ла на и҃, гла́съ ѕ҃. Катава́сїа, Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃: Сла́ва, и҆́нъ, гла́съ то́йже: И҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: Оу҆ч҃нкъ и҆ дрꙋ́гъ тво́й, и҆ подража́тель стра́сти твоеѧ̀, вселе́ннѣй бг҃а тѧ̀ проповѣ́да, бг҃оглаго́ливый фїлі́ппъ, тогѡ̀ мл҃твами ѿ врагѡ́въ пребеззако́нныхъ цр҃ковь твою̀, и҆ всѧ́къ гра́дъ тво́й, бцⷣею соблюдѝ, многомлⷭ҇тиве.

И҆ і҆́косъ: И҆ про́логъ. По ѳ҃-й пѣ́сни свѣти́ленъ а҆пⷭ҇ла, два́жды. Сла́ва, и҆ ны́нѣ, бг҃оро́диченъ. На хвали́техъ стїхи̑ры а҆пⷭ҇ла на д҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, гла́съ г҃: Ры́бъ лови́твꙋ: И҆ ны́нѣ, бг҃оро́диченъ: Бцⷣе предста́тельнице: Славосло́вїе вели́кое. По трист҃о́мъ тропа́рь а҆пⷭ҇ла: Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю: Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна а҆пⷭ҇ла, ѿ канѡ́на пѣ́снь г҃-ѧ и҆ ѕ҃-ѧ, на и҃. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе і҆ѡа́нна, зача́ло є҃: Восхотѣ̀ і҆и҃съ и҆зы́ти въ галїле́ю: Прича́стенъ, Во всю̀ зе́млю: На трапе́зѣ ᲂу҆тѣше́нїе бра́тїи.

[зрѝ] Подоба́етъ вѣ́дати: Ꙗ҆́кѡ заꙋ́тра начина́емъ по́стъ къ ржⷭ҇твꙋ̀ хрⷭ҇то́вꙋ, ст҃ꙋ́ю м҃-цꙋ. До́лжни є҆смы̀ въ се́й м҃-цѣ сохранѧ́ти въ ко́ейждо седми́цѣ трѝ дни̑, постѧ́щесѧ ѿ є҆ле́а и҆ вїна̀, понедѣ́льникъ, сре́дꙋ и҆ пѧто́къ. То́чїю а҆́ще слꙋчи́тсѧ вели́кїй ст҃ы́й, въ тогѡ́ бо па́мѧть разрѣша́емъ, и҆ твори́мъ за любо́вь ст҃а́гѡ пра́здника є҆гѡ̀ ра́ди, є҆́же є҆́сть сегѡ̀ мѣ́сѧца ѕ҃і, к҃є, л҃. деке́мврїа д҃, є҃, ѕ҃, ѳ҃, з҃і, к҃ де́нь. Въ тѣ́ бо дни̑, а҆́ще во вто́рникъ и҆ въ четверто́къ, ꙗ҆ди́мъ ры́бꙋ. Въ понедѣ́льникъ же, въ сре́дꙋ и҆ въ пѧто́къ, разрѣша́емъ то́чїю на є҆ле́й и҆ вїно̀, ры́бы же не ꙗ҆ди́мъ, кромѣ̀ хра́ма. А҆́ще ли є҆ди́номꙋ ѿ си́хъ во ѻ҆би́тели хра́мъ, разрѣша́емъ на ры́бꙋ и҆ вїно̀. Введе́нїе же бцⷣы въ кі́йлибо де́нь слꙋчи́тсѧ, а҆́ще въ сре́дꙋ, и҆лѝ пѧто́къ разрѣша́емъ и҆ на ры́бы. [зрѝ] Нѣ́цыи же ᲂу҆ста́вы ѿ ѳ҃-гѡ числа̀ деке́мврїа повелѣва́ютъ пости́тисѧ, и҆ на ры̑бы не разрѣша́ти, кромѣ̀ сꙋббѡ́тъ, и҆ недѣ́ль, и҆ хра́ма ст҃а́гѡ. Ѿ к҃-гѡ же числа̀, да́же до к҃є, а҆́ще и҆ сꙋббѡ́та и҆ недѣ́лѧ слꙋчи́тсѧ, не разрѣша́емъ на ры́бы.

[зрѝ] Вѣ́дати подоба́етъ и҆ сїѐ: Ꙗ҆́кѡ а҆́ще слꙋчи́тсѧ нача́ло сегѡ̀ поста̀ въ сꙋббѡ́тꙋ, и҆лѝ недѣ́лю, въ два̀ сїѧ̑ дни̑ глаго́лемъ на Бг҃ъ гдⷭ҇ь, тропа́рь ст҃ы́хъ и҆сповѣ̑дникъ, и҆ по ѕ҃-й пѣ́сни конда́къ и҆́хъ: и҆ самогла́сны стїхи̑ры и҆́хъ, на свое́мъ рѧдꙋ̀. А҆́ще ли слꙋчи́тсѧ во є҆ди́нъ ѿ пѧтѝ дне́й седми́цы, є҆́же є҆́сть ѿ понедѣ́льника до пѧтка̀, не подоба́етъ пѣ́ти и҆̀мъ тропарѧ̀, но А҆ллилꙋ́їа че́сти ра́ди ст҃ы́ѧ м҃- цы, и҆ тоѧ̀ ра́ди нача́ла. Конда́къ же ст҃ы́хъ и҆сповѣ̑дникъ по ѕ҃-й пѣ́сни глаго́лемъ, вмѣ́стѡ мч҃нична. Є҆гда́ же въ ты̑ѧ дни̑ слꙋчи́тсѧ А҆ллилꙋ́їа, твори́мъ є҆ди́ною дне́мъ ꙗ҆́сти: пое́мъ же всѐ возслѣ́дованїе съ покло́ны, ꙗ҆́коже и҆ въ вели́кꙋю четыредесѧ́тницꙋ. Часы́ же пое́мъ съ междоча́сїемъ, без̾ ѱалти́ри и҆ без̾ чте́нїѧ, и҆ всѐ возслѣ́дованїе пое́мъ съ покло́ны, ꙗ҆́коже во ст҃ꙋ́ю м҃-цꙋ: тогда́ же и҆ ꙗ҆ди́мъ є҆ди́ною дне́мъ сꙋхоѧде́нїе.

[зрѝ] Вѣ́дати и҆ сїѐ подоба́етъ: Ꙗ҆́кѡ въ пе́рвый де́нь, въ нача́лѣ вече́рни, тогѡ̀ поще́нїѧ, нижѐ трист҃а́гѡ глаго́лемъ, нижѐ покло́ны твори́мъ, нижѐ А҆ллилꙋ́їа пое́мъ: но прокі́менъ дне́вный. Ѿ Сподо́би гдⷭ҇и, начина́емъ покло́ны, и҆ твори́мъ г҃ покло́ны. И҆ по Ны́нѣ ѿпꙋща́еши: на трист҃о́мъ г҃ покло́ны. По Ѻ҆́ч҃е на́шъ, глаго́лемъ тропарѝ: Бцⷣе дв҃о ра́дꙋйсѧ: съ покло́ны, по ѡ҆́бразꙋ ст҃ы́ѧ четыредесѧ́тницы. Гдⷭ҇и поми́лꙋй, м҃. кро́ткимъ гла́сомъ, и҆ ра́внѡ всѝ. Та́же, Чⷭ҇тнѣ́йшꙋю: І҆ере́й, Сы́й бл҃гослове́нъ: Мы́ же мл҃твꙋ: Нбⷭ҇ный цр҃ю̀: и҆ твори́мъ трѝ вели̑кїѧ покло́ны, съ мл҃твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: Та́же, глаго́летъ і҆ере́й: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀. И҆ ѿпꙋ́стъ. Повече́рїе же пое́мъ ма́лое съ нача́ла без̾ покло́нѡвъ. То́чїю на Сла́ва въ вы́шнихъ, трѝ покло́ны. На трист҃о́мъ трѝ покло́ны. По И҆́же на всѧ́кое вре́мѧ: и҆ по Чⷭ҇тнѣ́йшꙋю, трѝ покло́ны вели̑кїѧ, съ мл҃твою ст҃а́гѡ є҆фре́ма, и҆ про́чыѧ в҃і. и҆ послѣдѝ мл҃твꙋ всю̀ вышепи́саннꙋю: Гдⷭ҇и и҆ влⷣко живота̀ моегѡ̀: И҆ покло́нъ вели́кїй, и҆ наконе́цъ, по трист҃о́мъ, г҃ покло́ны, и҆ ѿпꙋ́стъ. На полꙋ́нощницѣ по ѻ҆бы́чномъ нача́лѣ, чте́цъ: Сла́ва тебѣ̀, бж҃е на́шъ: и҆ Цр҃ю̀ нбⷭ҇ный: и҆ пое́мъ полꙋ́нощницꙋ всю̀ ѿ нача́ла съ покло́ны, ꙗ҆́коже предписа́сѧ во вседне́внѣй слꙋ́жбѣ. По ѿпꙋ́стѣ полꙋ́нощницы, вше́дъ въ цр҃ковь, твори́тъ і҆ере́й нача́ло по ѻ҆бы́чаю: и҆ чте́цъ трист҃о́е без̾ покло́нѡвъ, и҆ про́чее, ꙗ҆́кѡ предписа́сѧ во вседне́внѣй слꙋ́жбѣ. На ᲂу҆́трени, по шестоѱа́лмїи вмѣ́стѡ Бг҃ъ гдⷭ҇ь, пое́мъ А҆ллилꙋ́їа, на гла́съ ѻ҆ктѡ́иха, и҆ тро́ичны гла́са. Та́же каѳі̑смы: и҆ по ко́ейждо Сла́вѣ твори́мъ покло́ны г҃. Сѣда́льны ѻ҆ктѡ́иха, и҆ бг҃оро́дичны, и҆ чтє́нїѧ. Канѡ́нъ ѻ҆ктѡ́иха, а҃-й со і҆рмосо́мъ на ѕ҃: вторы́й же на д҃: И҆ мине́и ст҃а́гѡ, на д҃. По г҃-й пѣ́сни, сѣда́ленъ ст҃а́гѡ, и҆ бг҃оро́диченъ. По ѕ҃-й пѣ́сни, конда́къ ст҃а́гѡ, а҆́ще и҆́мать: а҆́ще же нѝ, глаго́лемъ мч҃нченъ ѻ҆ктѡ́иха. По ѳ҃-й пѣ́сни, свѣти́ленъ гла́са тро́иченъ, три́жды. На Сла́ва въ вы́шнихъ, покло́ны трѝ. На стїхо́внѣ ѻ҆ктѡ́иха. Та́же, Бл҃го є҆́сть: є҆ди́ножды. И҆ трист҃о́е: и҆ покло́ны трѝ. По Ѻ҆́ч҃е на́шъ, тропа́рь: Въ хра́мѣ стоѧ́ще: Гдⷭ҇и поми́лꙋй, м҃. Чⷭ҇тнѣ́йшꙋю: І҆ере́й, Сы́й бл҃гослове́нъ: Та́же, Нбⷭ҇ный цр҃ю̀: и҆ покло́ны г҃ вели̑кїѧ: и҆ про́чихъ в҃і. И҆ послѣдѝ покло́нъ вели́кїй, съ мл҃твою ст҃а́гѡ є҆фре́ма. Та́коже и҆ ча́съ а҃-й, съ покло́ны, ꙗ҆́коже и҆ въ вели́кꙋю ст҃ꙋ́ю м҃-цꙋ: то́чїю без̾ каѳі́смы. Заꙋ́тра же ᲂу҆слы́ши гла́съ мо́й, цр҃ю̀ мо́й и҆ бж҃е мо́й: поско́рꙋ без̾ пѣ́нїѧ. Подо́бнѡ же и҆ про́чыѧ часы̀. [зрѝ] Въ сїю́ же м҃-цꙋ на часѣ́хъ и҆ на повече́рїи, не стїхосло́вимъ съ пѣ́нїемъ, нижѐ тропарѝ пое́мъ со гла́сомъ: но всѧ̑ тропарѝ, и҆ бг҃оро́дичны, и҆ Съ на́ми бг҃ъ, ско́рѡ без̾ пѣ́нїѧ глаго́лемъ. Пое́мъ же и҆ междоча́сїе а҃-гѡ, г҃-гѡ, ѕ҃-гѡ и҆ ѳ҃-гѡ часа̀, По ѿпꙋ́стѣ же, хотѧ́щїи сп҃сти́сѧ, ѿ свои́хъ ке́ллїй да не и҆схо́дѧтъ до клепа́нїѧ цр҃ко́внагѡ: но ѻ҆́ви ᲂу҆́бѡ на пѣ́нїе ᲂу҆крѣплѧ́ютсѧ, ѻ҆́вїи же на чте́нїе со внима́нїемъ, дрꙋзі́и же на рꙋкодѣ́лїе ᲂу҆пражнѧ́ютсѧ: всѧ̑ же такѡва́ѧ творѧ́тъ съ разсꙋжде́нїемъ настоѧ́щагѡ. Слꙋже́бницы же вне́млютъ ѡ҆ слꙋ́жбахъ свои́хъ. Въ ча́съ же тре́тїй кле́плетъ въ ма́лое би́ло, и҆ собра́вшесѧ во хра́мъ, Бл҃гослови́вшꙋ і҆ере́ю: Предстоѧ́тель, и҆лѝ чте́цъ глаго́летъ: Сла́ва тебѣ̀ бж҃е на́шъ: Цр҃ю̀ нбⷭ҇ный: и҆ Трист҃о́е, и҆ покло́ны г҃. По Ѻ҆́ч҃е на́шъ: Гдⷭ҇и поми́лꙋй в҃і. Прїиди́те поклони́мсѧ: три́жды. и҆ покло́ны трѝ: и҆ ѻ҆бы̑чныѧ ѱалмы̀. Сла́ва, и҆ ны́нѣ, а҆ллилꙋ́їа, три́жды, и҆ покло́ны г҃. Та́же тропа́рь, гла́съ ѕ҃, средѝ цр҃кве глаго́летсѧ ѿ сщ҃е́нника, и҆лѝ ѿ канѡна́рха: Гдⷭ҇и, и҆́же прест҃а́го твоего̀ дх҃а: ве́сь до конца̀. То́же глаго́летъ пе́рвый ли́къ, два́жды: Вторы́й, є҆ди́ножды. Глаго́летъ же сщ҃е́нникъ: Сті́хъ, Се́рдце чи́сто сози́жди во мнѣ̀, бж҃е: Сті́хъ: Не ѿве́ржи менѐ ѿ лица̀ твоегѡ̀: Та́же, Сла́ва: Посе́мъ ᲂу҆чине́нный чте́цъ глаго́летъ: И҆ ны́нѣ, Бцⷣе, ты̀ є҆сѝ лоза̀ и҆́стиннаѧ: и҆ Гдⷭ҇ь бг҃ъ бл҃гослове́нъ: Трист҃о́е, и҆ покло́ны г҃. По Ѻ҆́ч҃е на́шъ, тропарѝ, гла́съ и҃: Бл҃гослове́нъ є҆сѝ хрⷭ҇тѐ, бж҃е на́шъ: Сла́ва, Ско́рое и҆ и҆звѣ́стное: И҆ ны́нѣ, Наде́жда и҆ предста́тельство: Гдⷭ҇и поми́лꙋй, м҃. и҆ мл҃тва: И҆́же на всѧ́кое вре́мѧ: Гдⷭ҇и поми́лꙋй, три́жды. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: І҆ере́й, Бж҃е ᲂу҆ще́дри ны̀, и҆ бл҃гослови́ ны: и҆ покло́ны г҃ вели̑кїѧ, съ мл҃твою: Гдⷭ҇и и҆ влⷣко живота̀ моегѡ̀: и҆ про́чихъ в҃і, и҆ послѣдѝ вели́кїй покло́нъ, съ мл҃твою. Та́же мл҃тва: Влⷣко бж҃е, ѻ҆́ч҃е вседержи́телю: и҆ посе́мъ, Прїиди́те, поклони́мсѧ: три́жды: и҆ покло́ны г҃. и҆ глаго́лемъ междоча́сїе г҃-гѡ часа̀, ѱало́мъ к҃ѳ: Вознесꙋ́ тѧ гдⷭ҇и, ꙗ҆́кѡ под̾ѧ́лъ мѧ̀ є҆сѝ: ѱало́мъ л҃а: Бл҃же́ни, и҆́хже ѡ҆ста́вишасѧ беззакѡ́нїѧ: ѱало́мъ ѯ҃: Оу҆слы́ши бж҃е моле́нїе моѐ: Посе́мъ, Сла́ва, и҆ ны́нѣ, трист҃о́е, и҆ покло́ны г҃. По Ѻ҆́ч҃е на́шъ, тропа́рь, гла́съ д҃: Бж҃е ѻ҆тє́цъ на́шихъ: Сла́ва, Мч҃нцы твоѝ гдⷭ҇и: И҆ ны́нѣ, Стѣна̀ неѡбори́маѧ: Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: І҆ере́й, Мл҃твами ст҃ы́хъ ѻ҆тє́цъ на́шихъ: и҆ покло́ны г҃ вели̑кїѧ. И҆ посе́мъ мл҃тва вели́кагѡ васі́лїа: Гдⷭ҇и бж҃е на́шъ, тво́й ми́ръ да́вый ᲂу҆ч҃нкѡ́мъ: Присовокꙋплѧ́емъ же и҆ ча́съ ѕ҃-й, съ покло́ны, ꙗ҆́коже предрече́сѧ. и҆ по ѕ҃і покло́нѣхъ, и҆ по мл҃твѣ: Влⷣко бж҃е ѻ҆́ч҃е вседержи́телю: Прїиди́те, поклони́мсѧ, три́жды: и҆ покло́ны г҃. и҆ глаго́лемъ междоча́сїе ѕ҃-гѡ часа̀, ѱало́мъ н҃є: Поми́лꙋй мѧ̀ бж҃е, ꙗ҆́кѡ попра́ мѧ человѣ́къ: ѱало́мъ н҃ѕ, Поми́лꙋй мѧ̀ бж҃е, поми́лꙋй мѧ̀: ѱало́мъ ѯ҃ѳ: Бж҃е, въ по́мощь мою̀: Сла́ва, и҆ ны́нѣ, трист҃о́е, и҆ покло́ны г҃. тропа́рь, гла́съ а҃: Сп҃сѝ гдⷭ҇и лю́ди твоѧ̑: Сла́ва, Болѣ́зньми ст҃ы́хъ: И҆ ны́нѣ, Мл҃твами гдⷭ҇и всѣ́хъ ст҃ы́хъ: Гдⷭ҇и поми́лꙋй, м҃. Сла́ва, и҆ ны́нѣ, Чⷭ҇тнѣ́йшꙋю херꙋві̑мъ. І҆ере́й, Мл҃твами ст҃ы́хъ ѻ҆тє́цъ на́шихъ: и҆ покло́ны трѝ вели̑кїѧ, съ мл҃твою ст҃а́гѡ є҆фре́ма, и҆ посе́мъ мл҃тва вели́кагѡ васі́лїа: Бж҃е и҆ гдⷭ҇и си́лъ: Присовокꙋплѧ́емъ же ѳ҃-й ча́съ, съ покло́ны, ꙗ҆́коже предрече́сѧ, и҆ по ѕ҃і покло́нѣхъ, и҆ по мл҃твѣ, глаго́лемъ: Прїиди́те поклони́мсѧ, три́жды: и҆ покло́ны г҃. И҆ глаго́лемъ междоча́сїе ѳ҃-гѡ часа̀, ѱало́мъ рв҃і: Хвали́те ѻ҆́троцы гдⷭ҇а: ѱало́мъ рл҃з: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ: ѱало́мъ рл҃ѳ: И҆зми́ мѧ гдⷭ҇и ѿ человѣ́ка лꙋка́ва, ѿ мꙋ́жа непра́ведна и҆зба́ви мѧ̀. Сла́ва, и҆ ны́нѣ, трист҃о́е, и҆ покло́ны г҃. По Ѻ҆́ч҃е на́шъ, тропа́рь, гла́съ и҃: Просвѣти́вый земны̑ѧ крⷭ҇то́мъ: Сла́ва, Ꙗ҆́кѡ разбо́йникъ: И҆ ны́нѣ, На́съ ра́ди распѧ́таго: Гдⷭ҇и поми́лꙋй, м҃. Сла́ва, и҆ ны́нѣ: Чⷭ҇тнѣ́йшꙋю херꙋві̑мъ: І҆ере́й: Мл҃твами ст҃ы́хъ ѻ҆тє́цъ на́шихъ: и҆ вели̑кїѧ г҃ покло́ны. Посе́мъ мл҃тва вели́кагѡ васі́лїа: Влⷣко гдⷭ҇и, і҆и҃се хрⷭ҇тѐ, бж҃е на́шъ: Посе́мъ, Бл҃гословѝ дꙋшѐ моѧ̀ гдⷭ҇а: Сла́ва, Хвалѝ дꙋшѐ моѧ̀ гдⷭ҇а: И҆ ны́нѣ, Є҆диноро́дный сн҃е: И҆ во црⷭ҇твїи твое́мъ: и҆ бл҃жє́нна гла́са. А҆по́столъ и҆ є҆ѵⷢ҇лїе рѧ́дъ. и҆ Помѧнѝ на́съ гдⷭ҇и: про́стѡ без̾ пѣ́нїѧ, и҆ покло́ны г҃. По Ѻ҆́ч҃е на́шъ: конда́къ хра́ма, и҆ днѐ, и҆ ст҃а́гѡ рѧ́дъ. Сла́ва, Со ст҃ы́ми ᲂу҆поко́й: И҆ ны́нѣ, бцⷣы хра́ма, и҆лѝ Предста́тельство хрⷭ҇тїа́нъ: Гдⷭ҇и поми́лꙋй, м҃, Сла́ва, и҆ ны́нѣ, Чⷭ҇тнѣ́йшꙋю херꙋві̑мъ: І҆ере́й: Бж҃е ᲂу҆ще́дри ны̀ и҆ бл҃гослови́ ны: и҆ покло́ны г҃ вели̑кїѧ, и҆ про́чихъ в҃і: и҆ послѣдѝ покло́нъ вели́кїй. Та́же трист҃о́е, и҆ покло́ны г҃: и҆ посе́мъ, Гдⷭ҇и поми́лꙋй, в҃і. и҆ мл҃тва: Всест҃а́ѧ трⷪ҇це: и҆ на Бꙋ́ди и҆́мѧ гдⷭ҇не, покло́ны г҃. Та́же ѱало́мъ л҃г: Бл҃гословлю̀ гдⷭ҇а на всѧ́кое вре́мѧ: И҆ ѿпꙋ́стъ. И҆ вхо́димъ къ трапе́зꙋ, и҆ ꙗ҆ди́мъ сꙋхоѧде́нїе. И҆ ѿхо́димъ кі́йждо въ ке́ллїю свою̀.

[зрѝ] Вѣ́домо бꙋ́ди: Ꙗ҆́кѡ є҆гда̀ пое́мъ А҆ллилꙋ́їа, и҆ часы̀ съ междоча́сїемъ, твори́мъ же и҆ покло́ны, и҆ по́стъ: тогда̀ лїтꙋргі́а не быва́етъ на собо́рѣ, по тѵ́пїкѡмъ: И҆ попра́зднствовавше ма́лѡ, и҆ клепа́нїю бы́вшꙋ, собира́емсѧ во хра́мъ. И҆ а҆́ще ᲂу҆́бѡ бꙋ́детъ Бг҃ъ гдⷭ҇ь: быва́етъ слꙋ́жба ст҃а́гѡ, ꙗ҆́коже ᲂу҆казꙋ́етъ рѧ́дъ. А҆́ще же є҆́сть А҆ллилꙋ́їа, всѧ̀ вече́рнѧ съ покло́ны ѿ нача́ла, та́кожде и҆ повече́рїе вели́кое. Ѿ Внегда̀ призва́ти мѝ: неизмѣ́ннѡ всѧ̑ съ покло́ны. Се́й чи́нъ и҆ пра́вило быва́етъ непремѣ́ннѡ, ꙗ҆́коже въ постѣ̀ хрⷭ҇то́ва ржⷭ҇тва̀: та́кожде и҆ въ по́стъ ст҃ы́хъ а҆пⷭ҇лъ, и҆звѣ́стнѡ ꙗ҆́кѡ є҆гда̀ слꙋчи́тсѧ А҆ллилꙋ́їа.

є҃і. Ст҃ы́хъ мꙋ́чєникъ и҆ и҆сповѣ̑дникъ, +гꙋ́рїа+, +самѡ́на+ и҆ +а҆ві́ва+.

А҆ллилꙋ́їа. На Гдⷭ҇и воззва́хъ, стїхи̑ры бцⷣы г҃, гла́съ д҃. Подо́бенъ, да́лъ є҆сѝ зна́менїе: и҆ мч҃нкѡвъ г҃, гла́съ и҆ подо́бенъ то́йже. Та́кожде и҆ во всѧ̑ дни̑, въ ни́хже пое́мъ А҆ллилꙋ́їа, пре́жде стїхи̑ры пѣ́ти бцⷣы: Та́же ст҃а́гѡ. Си́це бо ѡ҆брѣта́етсѧ въ гре́ческихъ мине́ахъ. Сла́ва, гла́съ в҃: Є҆де́съ весели́тсѧ: И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На стїхо́внѣ ѻ҆ктѡ́иха. Сла́ва, гла́съ в҃: Прїиди́те мч҃нколю́бцы: А҆́ще Бг҃ъ гдⷭ҇ь:

Тропа́рь, гла́съ є҃: Чꙋдеса̀ ст҃ы́хъ твои́хъ мч҃нкъ, стѣ́нꙋ неѡбори́мꙋ на́мъ дарова́вый, хрⷭ҇тѐ бж҃е: тѣ́хъ мл҃твами совѣ́ты ꙗ҆зы́кѡвъ разорѝ, ца́рства ски́птры ᲂу҆крѣпѝ, ꙗ҆́кѡ є҆ди́нъ бл҃гъ и҆ чл҃вѣколю́бецъ.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. На ᲂу҆́трени, на Бг҃ъ гдⷭ҇ь: тропа́рь ст҃ы́хъ, два́жды. И҆ ѻ҆бы̑чныѧ каѳі̑смы. И҆ сѣда́льны ѻ҆ктѡ́иха, и҆ чте́нїе. Ѻ҆́ба канѡ́на ѻ҆ктѡ́иха. И҆ мч҃нкѡвъ на д҃, гла́съ д҃. По г҃-й пѣ́сни, сѣда́ленъ, гла́съ и҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Съ высоты̀ мꙋ́дрїи бл҃года́ть прїе́мше, сꙋ́щымъ во и҆скꙋше́нїихъ предстоитѐ, всехва́льнїи. тѣ́мже ѻ҆трокови́цꙋ ст҃і́и ѿ сме́рти го́рькїѧ и҆зба́висте: вы́ бо вои́стиннꙋ є҆стѐ є҆де́сꙋ сла́ва, и҆ мі́рꙋ ра́дость.

И҆ і҆́косъ. По ѳ҃-й пѣ́сни, свѣти́ленъ трⷪ҇ченъ. А҆́ще же Бг҃ъ гдⷭ҇ь, свѣти́ленъ ѻ҆ктѡ́иха. Сла́ва, ст҃ы́хъ: И҆ ны́нѣ, бг҃оро́диченъ. На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: Сті́хъ, Предзрѣ́хъ гдⷭ҇а: А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ д҃: Воззва́ша првⷣнїи: Сті́хъ, Мнѡ́ги скѡ́рби првⷣнымъ: Є҆ѵⷢ҇лїе лꙋкѝ, зача́ло ѯ҃д: Всѧ́къ и҆́же и҆сповѣ́сть мѧ̀: Прича́стенъ, Ра́дꙋйтесѧ првⷣнїи:

ѕ҃і. 🕀 Ст҃а́гѡ а҆пⷭ҇ла и҆ є҆ѵⷢ҇лі́ста +матѳе́а+.

На вели́цѣй вече́рни, пое́мъ Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, стїхи̑ры а҆пⷭ҇ла, на и҃, гла́съ д҃. Подо́бенъ: Зва́нный свы́ше: Сла́ва, гла́съ то́йже, самогла́сенъ: Зовꙋ́щꙋ хрⷭ҇тꙋ̀: И҆ ны́нѣ, И҆́же тебѐ ра́ди: Вхо́дъ. Прокі́менъ днѐ: и҆ чтє́нїѧ г҃: и҆щѝ сегѡ̀ мѣ́сѧца въ л҃-й де́нь. А҆́ще и҆зво́литъ настоѧ́тель пѣ́ти лїті́ю, сегѡ̀ мѣ́сѧца въ д҃і-й де́нь. На стїхо́внѣ стїхи̑ры, гла́съ д҃. Подо́бенъ: Да́лъ є҆сѝ зна́менїе: съ припѣ́вы и҆́хъ. Сла́ва, гла́съ ѕ҃: И҆з̾ глꙋбины̀ ѕло́бы: И҆ ны́нѣ, Творе́цъ и҆ и҆зба́витель мо́й: По трист҃о́мъ, тропа́рь, гла́съ г҃: А҆пⷭ҇ле ст҃ы́й и҆ є҆ѵⷢ҇лі́сте: ѻ҆ктѡ́врїа во и҃і-й де́нь.

И҆лѝ се́й, гла́съ то́йже: Оу҆се́рднѡ ѿ мы́тницы къ зва́вшемꙋ влⷣцѣ хрⷭ҇тꙋ̀ ꙗ҆́вльшꙋсѧ на землѝ человѣ́кѡмъ за бл҃гость, томꙋ̀ послѣ́довавъ, а҆пⷭ҇лъ и҆збра́нный ꙗ҆ви́лсѧ є҆сѝ, и҆ бл҃говѣ́стникъ є҆ѵⷢ҇лїа вселе́ннѣй велегла́сенъ. сегѡ̀ ра́ди чти́мъ честнꙋ́ю па́мѧть твою̀, матѳе́е бг҃оглаго́ливе: молѝ млⷭ҇тиваго бг҃а, да грѣхѡ́въ ѡ҆ставле́нїе пода́стъ дꙋша́мъ на́шымъ.

Сла́ва, и҆ ны́нѣ, бг҃оро́диченъ: Тѧ̀ хода́тайствовавшꙋю: И҆ ѿпꙋ́стъ. На ᲂу҆́трени, на Бг҃ъ гдⷭ҇ь тропа́рь а҆пⷭ҇ла, два́жды. Сла́ва, и҆ ны́нѣ, бг҃оро́диченъ. По каѳі́смахъ сѣда́льны а҆пⷭ҇ла, съ бг҃оро́дичны и҆́хъ. И҆ чте́нїе. По полѷеле́и сѣда́ленъ, гла́съ и҃, два́жды. Сла́ва, и҆ ны́нѣ, бг҃оро́диченъ. Степє́нна а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю: Сті́хъ: Нб҃са̀ повѣ́даютъ: Всѧ́кое дыха́нїе: Є҆ѵⷢ҇лїе і҆ѡа́нна, зача́ло ѯ҃з: Ꙗ҆ви́сѧ і҆и҃съ ᲂу҆ч҃нкѡ́мъ свои̑мъ: По н҃-мъ ѱалмѣ̀, стїхи́ра, гла́съ ѕ҃: Воспле́щимъ въ пѣ́снехъ: Канѡ́нъ бцⷣы, со і҆рмосо́мъ на ѕ҃, и҆ а҆пⷭ҇ла на и҃, гла́съ д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, сѣда́ленъ, гла́съ и҃. Сла́ва, и҆́нъ, гла́съ то́йже: И҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Мыта́рства и҆́го ѿве́ргъ, пра́вды и҆́гꙋ припрѧ́глсѧ є҆сѝ, и҆ ꙗ҆ви́лсѧ є҆сѝ кꙋпе́цъ всеизрѧ́днѣйшїй, бога́тство прине́съ, ю҆́же съ высоты̀ премꙋ́дрость. ѿѻнꙋ́дꙋже проповѣ́далъ є҆сѝ и҆́стины сло́во, и҆ ᲂу҆ны́лыхъ воздви́глъ є҆сѝ дꙋ́шы, написа́въ ча́съ сꙋ́дный.

И҆ і҆́косъ, и҆ про́логъ. По ѳ҃-й пѣ́сни, свѣти́ленъ а҆пⷭ҇ла: Сла́ва, и҆́нъ: И҆ ны́нѣ, бг҃оро́диченъ. На хвали́техъ, стїхи̑ры а҆пⷭ҇ла, на д҃, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ в҃: И҆́го ѡ҆ста́вивъ непра́вды: И҆ ны́нѣ, Сп҃сѝ ѿ бѣ́дъ: Славосло́вїе вели́кое. По трист҃о́мъ, тропа́рь а҆пⷭ҇ла. Сла́ва, и҆ ны́нѣ, бг҃оро́диченъ воскрⷭ҇нъ. Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна а҆пⷭ҇ла, ѿ канѡ́на пѣ́снь г҃-ѧ, и҆ ѕ҃-ѧ, на и҃. Прокі́менъ, гла́съ и҃: Во всю̀ зе́млю: Сті́хъ: Нб҃са̀ повѣ́даютъ сла́вꙋ: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и: Є҆ѵⷢ҇лїе матѳе́а, зача́ло л҃: Преходѧ̀ і҆и҃съ: Прича́стенъ, Во всю̀ зе́млю:

з҃і. 🕃 И҆́же во ст҃ы́хъ ѻ҆тца̀ на́шегѡ +григо́рїа+ є҆пⷭ҇кпа, неѡкесарі́йскагѡ чꙋдотво́рца.

На Гдⷭ҇и воззва́хъ, стїхи̑ры на ѕ҃, гла́съ и҃. Подо́бенъ: Что̀ вы̀ нарече́мъ: Сла́ва, гла́съ ѕ҃: Во глꙋбинꙋ̀ видѣ́нїѧ: На стїхо́внѣ ѻ҆ктѡ́иха. Сла́ва, гла́съ ѕ҃: Бо́дрость бж҃їѧ даде́сѧ тебѣ̀.

Тропа́рь, гла́съ и҃: Въ мл҃твахъ бо́дрствꙋѧ, чꙋде́съ дѣ́ланми претерпѣва́ѧ, тезоиме́нїе стѧжа́лъ є҆сѝ и҆справле́нїѧ: но моли́сѧ хрⷭ҇тꙋ̀ бг҃ꙋ, ѻ҆́тче григо́рїе, просвѣти́ти дꙋ́шы на́шѧ, да не когда̀ ᲂу҆́снемъ въ сме́рть.

На ᲂу҆́трени, ѻ҆́ба канѡ́на ѻ҆ктѡ́иха. И҆ ст҃а́гѡ на ѕ҃, гла́съ и҃. По г҃-й пѣ́сни, сѣда́ленъ, гла́съ г҃. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Чꙋде́съ мно́гихъ прїе́мъ дѣ́йство, зна́менми ᲂу҆жа́сными де́мѡны ᲂу҆страши́лъ є҆сѝ, и҆ недꙋ́ги ѿгна́лъ є҆сѝ человѣ́чєскїѧ, всемꙋ́дре григо́рїе: чꙋдотво́рецъ же и҆менꙋ́ешисѧ, зва́нїе ѿ дѣ́лъ прїе́мъ.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха: Сла́ва, ст҃а́гѡ. На стїхо́внѣ ѻ҆ктѡ́иха. та́же стїхи́ра ст҃а́гѡ, гла́съ д҃, съ припѣ́вомъ: Сщ҃е́нницы твоѝ ѡ҆блекꙋ́тсѧ въ пра́вдꙋ: Сщ҃е́нства и҆збра́нїе: Сла́ва, гла́съ и҃: Пресловꙋ́щаго въ чꙋдесѣ́хъ: На лїтꙋргі́и, бл҃жє́нна ѻ҆ктѡ́иха: И҆ ст҃а́гѡ: пѣ́снь г҃-ѧ. Прокі́менъ, гла́съ з҃: Чⷭ҇тна̀ пред̾ гдⷭ҇емъ: Сті́хъ: Что̀ возда́мъ гдⷭ҇еви: А҆по́столъ къ корі́нѳѧнѡмъ, зача́ло рн҃а: Комꙋ́ждо дае́тсѧ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ: Є҆ѵⷢ҇лїе матѳе́а, зача́ло л҃д ѿ полꙋ̀: Призва̀ і҆и҃съ ѻ҆бана́десѧте: Прича́стенъ, Въ па́мѧть:

🕃 Въ то́йже де́нь прпⷣбнагѡ ѻ҆тца̀ на́шегѡ +ні́кѡна+ чꙋдотво́рца, ᲂу҆ченика̀ ст҃а́гѡ се́ргїа.

Соверша́етсѧ собо́ръ є҆гѡ̀ во ѻ҆би́тели є҆гѡ̀, и҆ во хра́мѣ: повсю́дꙋ же шестери́къ, во и҆́нъ де́нь.

Тропа́рь, гла́съ а҃: Послꙋша́нїѧ до́брый рачи́тель бы́въ, преподо́бне ні́кѡне приснопа́мѧтне: цр҃ковь бо прекра́снꙋ ст҃ы́ѧ трⷪ҇цы, въ похвалꙋ̀ ѻ҆ц҃ꙋ̀ твоемꙋ̀ воздви́глъ є҆сѝ. тѣ́мже и҆ мы̀ ча̑да твоѧ̑ любо́вїю вопїе́мъ тѝ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ: Дх҃о́вномꙋ твоемꙋ̀ настоѧ́телю, ѻ҆́тче ні́кѡне, всѧ́чески прилѣпи́всѧ, и҆ ѿ негѡ̀ наставлѧ́емь, во все́мъ хрⷭ҇то́ви порабо́тивсѧ, мона́хѡвъ бы́лъ є҆сѝ чинонача́льникъ, и҆ прпⷣбныхъ сожи́тель, съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.

и҃і. Ст҃ы́хъ мч҃нкъ, +платѡ́на+ и҆ +рѡма́на+.

Стїхи̑ры платѡ́на, гла́съ и҃. Подо́бенъ: Ѽ пресла́внагѡ чꙋдесѐ! И҆ рѡма́на, гла́съ д҃. Подо́бенъ: Ꙗ҆́кѡ до́блѧ: Сла́ва, гла́съ ѕ҃: Стра́шныѧ и҆ пресла́вныѧ: На стїхо́внѣ ѻ҆ктѡ́иха. Тропа́рь, гла́съ д҃: Мч҃нцы твоѝ гдⷭ҇и: Септе́мврїа въ к҃-й де́нь. На ᲂу҆́трени, Канѡ́нъ ѻ҆ктѡ́иха є҆ди́нъ, и҆ ст҃ы́хъ два̀. Платѡ́на, гла́съ и҃: Рѡма́на, гла́съ д҃. По г҃-й пѣ́сни, сѣда́ленъ платѡ́на, гла́съ и҃. Сла́ва, сѣда́ленъ рѡма́на, гла́съ д҃. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: Ст҃а́ѧ твоѧ̀ па́мѧть вселе́ннꙋю весели́тъ, созыва́ющи вѣ̑рныѧ всѧ̑ въ пречестны́й хра́мъ тво́й: и҆дѣ́же ны́нѣ ра́достїю совокꙋ́пльшесѧ, пое́мъ въ пѣ́снехъ и҆ свѣ́тлостехъ. сегѡ̀ ра́ди, платѡ́не, вопїе́мъ тѝ: ꙗ҆зы́ческагѡ наше́ствїѧ и҆зба́ви гра́дъ тво́й, ст҃е.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, платѡ́на. На стїхо́внѣ ѻ҆ктѡ́иха.

ѳ҃і. Ст҃а́гѡ прⷪ҇ро́ка +а҆вді́а+: И҆ ст҃а́гѡ мч҃нка +варлаа́ма+.

А҆ллилꙋ́їа, и҆лѝ тропа́рь. Стїхи̑ры прⷪ҇ро́ка, гла́съ а҃. Подо́бенъ: Всехва́льнїи мч҃нцы: и҆ мч҃нка, гла́съ д҃. Подо́бенъ: Ꙗ҆́кѡ до́блѧ: На стїхо́внѣ ѻ҆ктѡ́иха. Тропа́рь мч҃нка: Мч҃нкъ тво́й гдⷭ҇и: Септе́мврїа во в҃-й де́нь. На ᲂу҆́трени, ѻ҆бы̑чныѧ каѳі̑смы, и҆ сѣда́ленъ ѻ҆ктѡ́иха, и҆ чте́нїе. Канѡ́нъ

ѻ҆ктѡ́иха є҆ди́нъ, и҆ ст҃ы́хъ в҃. По г҃-й пѣ́сни, сѣда́ленъ прⷪ҇ро́ка, гла́съ а҃. Сла́ва, мч҃нка, гла́съ д҃. По ѕ҃-й пѣ́сни,

Конда́къ мч҃нка, гла́съ д҃. Подо́бенъ: Ꙗ҆ви́лсѧ є҆сѝ: Ꙗ҆ви́лсѧ є҆сѝ преꙋдивле́нъ крѣ́постїю, всесожже́нїѧ лїва́нъ бл҃гово́ненъ себѐ прине́слъ є҆сѝ же́ртвꙋ хрⷭ҇тꙋ̀ и҆ вѣне́цъ по́чести прїи́мъ, варлаа́ме, при́снѡ молѝ за ны̀ страда́льче.

🕃 Въ то́йже де́нь прпⷣбныхъ ѻ҆тє́цъ на́шихъ, +варлаа́ма+, и҆ +і҆ѡаса́фа+ царе́вича вели́кїѧ і҆нді́и.

Пра́здникъ, и҆дѣ́же хра́мъ.

Тропа́рь, гла́съ д҃: Ѿ дх҃о́внагѡ наста́вника наꙋчи́всѧ, царю̀ і҆ѡаса́фе, бг҃а позна́ти: креще́нїемъ же просвѣти́всѧ, лю́ди къ вѣ́рѣ ѡ҆брати́лъ є҆сѝ, и҆ ѻ҆тцꙋ̀ твоемꙋ̀ ѿ кꙋпѣ́ли прїи́мникъ бы́въ, ца́рство ѡ҆ста́вивъ, пꙋсты́ню дости́глъ є҆сѝ, и҆ въ не́й трꙋдолю́бнѣ подвиза́лсѧ є҆сѝ: молѝ хрⷭ҇та̀ бг҃а со ᲂу҆чи́телемъ твои́мъ варлаа́момъ, сп҃сти́сѧ дꙋша́мъ на́шымъ.

Конда́къ, гла́съ и҃: Вѣ́дый твоѐ и҆з̾ младе́нства бл҃го́е и҆зволе́нїе, і҆ѡаса́фе, є҆ди́нъ сердцевѣ́децъ бг҃ъ, и҆ ѿ ца́рствїѧ земна́гѡ въ мона́шеское пребыва́нїе приведы́й тѧ̀, вели́комꙋ варлаа́мꙋ послѣ́довати сподо́би. съ ни́мже и҆ ны́нѣ го́рнїй і҆ерꙋсали́мъ всесвѣ́тлый ѻ҆те́чество и҆мѣ́ѧ, жела́емыѧ добро́ты краснѡ̀ наслажда́ѧсѧ ст҃ы́ѧ трⷪ҇цы. мо́лимъ тѧ̀ ца́рскаѧ красото̀, помина́й на́съ вѣ́рою чтꙋ́щыѧ тѧ̀.

к҃. Предпра́зднство во хра́мъ вхо́да прест҃ы́ѧ бцⷣы: И҆ прпⷣбнагѡ ѻ҆тца̀ на́шегѡ +григо́рїа+ декаполі́та: И҆ во ст҃ы́хъ ѻ҆тца̀ на́шегѡ +про́кла+, а҆рхїепⷭ҇кпа кѡнстанті́нѧ гра́да.

Стїхи̑ры предпра́зднства г҃, гла́съ а҃. Подо́бенъ: Нбⷭ҇ныхъ чинѡ́въ: Свѣщенѡ́сицы дѣ̑вы: И҆ ст҃а́гѡ григо́рїа г҃, гла́съ и҆ подо́бенъ то́йже. Сла́ва, и҆ ны́нѣ, предпра́зднства, гла́съ д҃: Дне́сь бг҃овмѣсти́мый хра́мъ: А҆́ще въ пѧто́къ ве́чера, Сла́ва, предпра́зднства, И҆ ны́нѣ, догма́тїкъ гла́са. На стїхо́внѣ стїхи̑ры ст҃а́гѡ про́кла, гла́съ д҃. Подо́бенъ: Да́лъ є҆сѝ зна́менїе: съ припѣ́вы є҆гѡ̀. а҃-й, Чⷭ҇тна̀ пред̾ гдⷭ҇емъ: в҃: Сщ҃е́нницы твоѝ ѡ҆блекꙋ́тсѧ въ пра́вдꙋ: Сла́ва, и҆ ны́нѣ, предпра́зднства, гла́съ д҃: Прїиди́те всѝ вѣ́рнїи:

Тропа́рь, гла́съ д҃: Бж҃е ѻ҆тє́цъ на́шихъ, творѧ́й при́снѡ съ на́ми по твое́й кро́тости, не ѡ҆ста́ви млⷭ҇ть твою̀ ѿ на́съ, но мл҃твами и҆́хъ въ ми́рѣ ᲂу҆пра́ви живо́тъ на́шъ.

Сла́ва, и҆ ны́нѣ, предпра́зднства.

Тропа́рь, гла́съ то́йже: Ра́дость пред̾ѡбрꙋча́етъ всѣ̑мъ а҆́нна ны́нѣ, печа́ли сопроти́вный пло́дъ прозѧ́бши є҆ди́нꙋ приснодв҃ꙋ, ю҆́же и҆ приво́дитъ, мл҃твы и҆сполнѧ́ющи, дне́сь веселѧ́щисѧ въ хра́мъ гдⷭ҇е́нь, ꙗ҆́кѡ сꙋ́щїй хра́мъ бг҃а сло́ва, и҆ мт҃рь чи́стꙋю.

На повече́рїи, по трист҃о́мъ конда́къ предпра́зднства є҆ди́нъ. На ᲂу҆́трени, на Бг҃ъ гдⷭ҇ь, тропа́рь предпра́зднства, два́жды. Сла́ва, ст҃ы́хъ: И҆ ны́нѣ, предпра́зднства: И҆ ѻ҆бы̑чныѧ каѳі̑смы. Сѣда́льны предпра́зднства. Канѡ́нъ предпра́зднства, со і҆рмосо́мъ на ѕ҃, гла́съ д҃: и҆ ст҃ы́хъ два̀ канѡ́на. Григо́рїа гла́съ и҃: Про́кла гла́съ а҃. По г҃-й пѣ́сни,

Конда́къ григо́рїа, гла́съ г҃: Свѣ́тлое тѧ̀ со́лнце цр҃ковь познава́етъ, добродѣ́телей красота́ми, и҆ и҆сцѣле́нїй лꙋча́ми, всѣ́хъ просвѣща́ѧ хрⷭ҇то́въ ᲂу҆го́дниче. тѣ́мже пра́зднꙋемъ честнꙋ́ю па́мѧть твою̀, и҆ почита́емъ по́двиги твоѧ̑, всебл҃же́нне ѻ҆́тче, премꙋ́дре григо́рїе.

Конда́къ про́кла, гла́съ д҃: Подо́бенъ: Ꙗ҆ви́лсѧ є҆сѝ: Досто́йнѡ дне́сь торжествꙋ́етъ всѣ́хъ градѡ́въ честнѣ́йшїй вои́стиннꙋ, въ честно́мъ представле́нїи твое́мъ, ѻ҆́тче ѻ҆тцє́въ про́кле мꙋ́дре.

И҆ сѣда́ленъ григо́рїа, гла́съ д҃. Сла́ва, про́кла, гла́съ г҃: И҆ ны́нѣ, предпра́зднства, гла́съ а҃. По ѕ҃-й пѣ́сни,

Конда́къ предпра́зднства, гла́съ д҃. Подо́бенъ: Ꙗ҆ви́лсѧ є҆сѝ: Весе́лїѧ дне́сь вселе́ннаѧ и҆спо́лнисѧ всѧ̀, въ бл҃гознамени́томъ пра́здницѣ бцⷣы зовꙋ́щи: та̀ є҆́сть сѣ́нь нбⷭ҇наѧ.

И҆ і҆́косъ. По ѳ҃-й пѣ́сни, свѣти́ленъ григо́рїа. Сла́ва, и҆ ны́нѣ, предпра́зднства. На стїхо́внѣ стїхи̑ры предпра́зднства, гла́съ а҃: Подо́бенъ: Нбⷭ҇ныхъ чинѡ́въ: Съ припѣ́вы: а҃-й, Приведꙋ́тсѧ цр҃ю̀ дѣ̑вы: в҃-й, Приведꙋ́тсѧ въ весе́лїи и҆ ра́дованїи: Сла́ва, и҆ ны́нѣ: гла́съ то́йже: Да ра́дꙋетсѧ дне́сь нб҃о свы́ше: На лїтꙋргі́и, бл҃жє́нна предпра́зднства, пѣ́снь г҃-ѧ и҆ ѕ҃-ѧ. По вхо́дѣ глаго́лемъ тропа́рь хра́ма хрⷭ҇то́ва, и҆дѣ́же хра́мъ: И҆ тропа́рь предпра́зднства: И҆ хра́ма ст҃а́гѡ: И҆ ст҃ы́хъ ѻ҆́бщїй. Та́же конда́къ хра́ма хрⷭ҇то́ва, и҆дѣ́же є҆́сть, и҆ хра́ма ст҃а́гѡ, и҆ григо́рїа. Сла́ва, про́кла: И҆ ны́нѣ, предпра́зднства. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость: Сті́хъ: Оу҆слы́шите сїѧ̑ всѝ ꙗ҆зы́цы: А҆по́столъ днѐ, и҆ ᲂу҆́трешнїй под̾ зача́ло. Та́же ст҃а́гѡ, ко є҆вре́ємъ, зача́ло ти҃і: Тако́въ на́мъ подоба́ше: А҆ллилꙋ́їа, гла́съ в҃: Оу҆ста̀ првⷣнагѡ: Сті́хъ: Зако́нъ бг҃а є҆гѡ̀: Та́кожде и҆ є҆ѵⷢ҇лїе днѐ, и҆ ᲂу҆́треннее, под̾ зача́ло: И҆ ст҃а́гѡ, ѿ і҆ѡа́нна, зача́ло л҃ѕ: А҆́зъ є҆́смь две́рь: Прича́стенъ: Въ па́мѧть вѣ́чнꙋю:

🕅 Подоба́етъ вѣ́дати: ꙗ҆́кѡ а҆́ще слꙋчи́тсѧ предпра́зднство вхо́да прест҃ы́ѧ бцⷣы въ недѣ́лю.

Въ сꙋббѡ́тꙋ, на ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю. На вели́цѣй вече́рни, по ѻ҆бы́чаю каѳі́сма. На Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ а҃, и҆ предпра́зднства г҃: И҆ прпⷣбнагѡ григо́рїа, г҃. Сла́ва, предпра́зднства: И҆ ны́нѣ, бг҃оро́диченъ а҃, гла́са. На лїті́и, ѻ҆бы́чное. На стїхо́внѣ стїхи̑ры воскрⷭ҇ны. Сла́ва, и҆ ны́нѣ, предпра́зднства. На бл҃гослове́нїи хлѣ́бѡвъ тропа́рь: Бцⷣе дв҃о ра́дꙋйсѧ: три́жды.

[зрѝ] А҆́ще ли нѣ́сть бдѣ́нїѧ, глаго́лемъ тропа́рь воскрⷭ҇нъ.

Сла́ва, тропа́рь григо́рїа, гла́съ г҃: Ѡ҆́бразъ бы́лъ є҆сѝ воздержа́нїѧ бж҃е́ственнымъ дх҃омъ всѧ̑ просвѣти́въ, правовѣ́рїѧ тече́нїе соверши́лъ є҆сѝ, ᲂу҆че́нїемъ мі́ръ просвѣти́лъ є҆сѝ, и҆ ѕловѣ́рныхъ ѡ҆бличи́лъ є҆сѝ смы́слы: ѻ҆́тче прпⷣбне григо́рїе, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

И҆ ны́нѣ, предпра́зднства. На Бг҃ъ гдⷭ҇ь: тропа́рь воскрⷭ҇нъ, два́жды: Сла́ва, григо́рїа. И҆ ны́нѣ, предпра́зднства. По каѳі́смахъ, сѣда́льны воскрⷭ҇ны, и҆ бг҃оро́дичны и҆́хъ. Полѷеле́й, и҆ тропарѝ: А҆́гг҃льскїй собо́ръ: є҆ктенїа̀. Ѵ҆пакоѝ гла́са. Степє́нна. Прокі́менъ, є҆ѵⷢ҇лїе воскрⷭ҇но, и҆ прѡ́чаѧ. Канѡ́нъ воскрⷭ҇нъ со і҆рмосо́мъ на д҃. и҆ бцⷣы на в҃: и҆ предпра́зднства на д҃: и҆ прпⷣбнагѡ григо́рїа на д҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни, конда́къ и҆ і҆́косъ предпра́зднства, и҆ конда́къ григо́рїа. Сла́ва, сѣда́ленъ є҆гѡ̀: И҆ ны́нѣ, предпра́зднства. По ѕ҃-й пѣ́сни, конда́къ воскрⷭ҇нъ, и҆ і҆́косъ. На ѳ҃-й пѣ́сни, пое́мъ Чⷭ҇тнѣ́йшꙋю: Свѣти́ленъ воскрⷭ҇нъ. Сла́ва, григо́рїа: И҆ ны́нѣ, предпра́зднства. На хвали́техъ стїхи̑ры воскрⷭ҇ны д҃: и҆ предпра́зднства, подо́бны трѝ, пи́саны на стїхо́внѣ: И҆ самогла́сенъ и҆́хъ съ припѣ́вы. Сла́ва, стїхи́ра є҆ѵⷢ҇льскаѧ: И҆ ны́нѣ: Пребл҃гослове́нна є҆сѝ: Славосло́вїе вели́кое. По трист҃о́мъ, тропа́рь воскрⷭ҇нъ то́чїю. Є҆ктенїа̀. И҆ ѿпꙋ́стъ. И҆ ча́съ а҃-й. На а҃-мъ часѣ̀, тропа́рь воскрⷭ҇нъ. Сла́ва, предпра́зднства. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ предпра́зднства: На г҃- мъ часѣ̀, тропа́рь воскрⷭ҇нъ. Сла́ва, григо́рїа: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ. Та́кожде и҆ на про́чихъ часѣ́хъ, конда́къ воскрⷭ҇нъ, и҆ предпра́зднства, глаго́лемъ премѣнѧ́юще. На лїтꙋргі́и, бл҃жє́нна гла́са, на ѕ҃: И҆ предпра́зднства, пѣ́снь г҃-ѧ на д҃. По вхо́дѣ тропа́рь воскрⷭ҇нъ, и҆ предпра́зднства: И҆ хра́ма ст҃а́гѡ. Та́же тропа́рь, григо́рїа: Конда́къ воскрⷭ҇нъ, и҆ хра́ма, Сла́ва, григо́рїа: И҆ ны́нѣ, предпра́зднства. Прокі́менъ, а҆по́столъ, а҆ллилꙋ́їа, є҆ѵⷢ҇лїе, и҆ прича́стенъ, пре́жде воскрⷭ҇нъ, и҆ пото́мъ ст҃а́гѡ. Слꙋ́жба прпⷣбническаѧ.

Ст҃а́гѡ же про́кла слꙋ́жба пое́тсѧ, є҆гда̀ разсꙋ́дитъ є҆кклисїа́рхъ.

Тропа́рь про́кла, гла́съ, д҃: И҆́же бж҃е́ственнымъ нача́ломъ премꙋ́дрости, стра́хомъ гдⷭ҇нимъ ᲂу҆тве́рждсѧ, ѿтꙋ́дꙋ сщ҃е́нными восхожде́нїи возше́лъ є҆сѝ во ᲂу҆чени́чество златоꙋ́ста, и҆ а҆рхїере́йскагѡ тогѡ̀ прⷭ҇то́ла досто́инъ бы́въ чистоты̀ добро́тами, а҆пⷭ҇льскимъ пра́вилѡмъ себѐ воѡбрази́въ не себѣ̀ живы́й, но хрⷭ҇тꙋ̀ и҆ ста́дꙋ твоемꙋ̀. тѣ́мъ въ нетлѣ́нный живо́тъ а҆пⷭ҇льски всели́лсѧ є҆сѝ, і҆ера́рше про́кле: молѝ хрⷭ҇та̀ бг҃а сп҃сти́сѧ дꙋша́мъ на́шымъ.

к҃а. 🕀 +Вхо́дъ+ во хра́мъ прест҃ы́ѧ влⷣчцы на́шеѧ бцⷣы и҆ приснодв҃ы мр҃і́и.

Соверша́емъ бдѣ́нїе, ꙗ҆́коже и҆ въ про́чихъ влады́чнихъ пра́здницѣхъ.

На ма́лѣй вече́рни, стїхи̑ры пра́здника, на д҃, гла́съ а҃. Подо́бенъ: Нбⷭ҇ныхъ чинѡ́въ: Ѿ гдⷭ҇а прїи́мше ѡ҆бѣща̑нїѧ: Сла́ва, и҆ ны́нѣ, гла́съ и҃: Дв҃дъ провозглаша́ше: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Двє́ри нбⷭ҇ныѧ: съ припѣ́вы и҆́хъ: а҃-й, Приведꙋ́тсѧ цр҃ю̀ дѣ̑вы: в҃-й, Приведꙋ́тсѧ въ весе́лїи и҆ ра́дованїи: Сла́ва, и҆ ны́нѣ, гла́съ, и҆ подо́бенъ то́йже: Свѣ́тъ тѧ̀ трисїѧ́нный:

Тропа́рь, гла́съ д҃: Дне́сь бл҃говоле́нїѧ бж҃їѧ пред̾ѡбраже́нїе, и҆ человѣ́кѡмъ сп҃се́нїѧ проповѣ́данїе, въ хра́мѣ бж҃їи ꙗ҆́снѡ дв҃а ꙗ҆влѧ́етсѧ, и҆ хрⷭ҇та̀ всѣ̑мъ предвозвѣща́етъ. то́й и҆ мы̀ велегла́снѡ возопїи́мъ: ра́дꙋйсѧ смотре́нїѧ зижди́телева и҆сполне́нїе.

Є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, по ѻ҆бы́чномъ ѱалмѣ̀ пое́мъ: Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃, гла́съ а҃. Подо́бенъ: Ѽ ди́внагѡ чꙋдесѐ! Дне́сь вѣ́рнїи ликовствꙋ́емъ: И҆́ны стїхи̑ры, гла́съ д҃. Подо́бенъ: Ꙗ҆́кѡ до́блѧ: Во ст҃ы́хъ ст҃а́ѧ: Сла́ва, и҆ ны́нѣ, гла́съ и҃: По ржⷭ҇твѣ̀ твое́мъ: Вхо́дъ, прокі́менъ днѐ. И҆ чтє́нїѧ г҃: а҃-е, И҆схо́да: Глаго́ла гдⷭ҇ь къ мѡѷсе́ю: в҃-е, Ца́рствъ тре́тїихъ: Бы́сть ꙗ҆́кѡ совершѝ соломѡ́нъ: г҃, Прⷪ҇ро́чества і҆езекі́илева: Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ: На лїті́и стїхи̑ры, гла́съ а҃, самогла́сны: Да ра́дꙋетсѧ дне́сь нб҃о свы́ше: Сла́ва, и҆ ны́нѣ, гла́съ є҃: Возсїѧ̀ де́нь ра́достенъ: На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ: Ра́дꙋетсѧ нб҃о и҆ землѧ̀: съ припѣ́вы и҆́хъ. Сла́ва, и҆ ны́нѣ, гла́съ ѕ҃: Дне́сь собо́ри вѣ́рныхъ: На бл҃гослове́нїи хлѣ́бѡвъ тропа́рь, гла́съ д҃: Дне́сь бл҃говоле́нїѧ бж҃їѧ: три́жды: пи́санъ на ма́лѣй вече́рни. А҆́ще же нѣ́сть бдѣ́нїѧ, зрѝ полꙋ́нощницы септе́мврїа во и҃-й де́нь. На ᲂу҆́трени, по шестоѱа́лмїи, На Бг҃ъ гдⷭ҇ь: Тропа́рь пра́здника три́жды. И҆ ѻ҆бы̑чныѧ каѳі̑смы, и҆ сѣда́льны пра́здника. и҆ чтє́нїѧ во є҆ѵⷢ҇лїи толково́мъ. Та́же полѷеле́й пра́здника. И҆ даю́тсѧ свѣщы̀ бра́тїи. И҆ сѣда́ленъ, гла́съ и҃. Сла́ва, и҆ ны́нѣ, то́йже: и҆ чте́нїе. Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ пра́здника, гла́съ то́йже: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Сті́хъ: Ѿры́гнꙋ се́рдце моѐ сло́во бл҃го: Всѧ́кое дыха́нїе: Є҆ѵⷢ҇лїе лꙋкѝ, зача́ло д҃: Воста́вши мр҃їа́мъ: По н҃-мъ ѱалмѣ̀: Вмѣ́стѡ Мл҃твами бцⷣы: Сла́ва, гла́съ в҃: Дне́сь хра́мъ ѡ҆дꙋшевле́нный: И҆ ны́нѣ, то́йже. Та́же, Поми́лꙋй мѧ̀ бж҃е: Стїхи́ра, гла́съ д҃: Дне́сь бг҃овмѣсти́мый хра́мъ: и҆ прѡ́чаѧ. Канѡ́на два̀: є҆ди́нъ д҃-гѡ гла́са: дрꙋгі́й а҃-гѡ гла́са: і҆рмосы̀ ѻ҆бою̀ канѡ́нѡвъ по два́жды. Тропарѝ на в҃і, ꙗ҆́коже бы́ти и҆̀мъ со і҆рмосы̀ на ѕ҃і. Катава́сїа: хрⷭ҇то́съ ражда́етсѧ: ѻ҆́ба ли̑ка вкꙋ́пѣ. [зрѝ] [Ѿ сегѡ̀ днѐ катава́сїа сїѧ̀ пое́тсѧ, до а҃-гѡ днѐ і҆аннꙋа́рїа. По г҃-й пѣ́сни, сѣда́ленъ, гла́съ д҃. Подо́бенъ: Оу҆диви́сѧ: Возопі́й дв҃де: Сла́ва, и҆ ны́нѣ: Непоро́чнаѧ а҆́гница: И҆ чте́нїе. По ѕ҃-й пѣ́сни,

Конда́къ, гла́съ д҃. Подо́бенъ: Вознесы́йсѧ: Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, сщ҃е́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, бл҃года́ть совводѧ́щи, ꙗ҆́же въ дс҃ѣ бж҃е́ственномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.

И҆ і҆́косъ. и҆ чте́мъ про́логъ. На ѳ҃-й пѣ́сни вжига́ютъ свѣщы̀ бра́тїѧ: Чⷭ҇тнѣ́йшꙋю же не пое́мъ, но пое́мъ припѣ́въ пра́здника: А҆́гг҃ли вхожде́нїе пречⷭ҇тыѧ: И҆ і҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ: Подо́бнѣ и҆ дрꙋгі́й ли́къ то́йже припѣ́въ, и҆ і҆рмо́съ: и҆ къ тропарє́мъ то́йже припѣ́въ. Посе́мъ припѣ́въ дрꙋга́гѡ канѡ́на: Велича́й дꙋшѐ моѧ̀ приведе́ннꙋю во хра́мъ гдⷭ҇ень: И҆ і҆рмо́съ: Свѣтоно́сный ѻ҆́блакъ: два́жды: И҆ къ про́чымъ тропарє́мъ то́йже припѣ́въ. Та́же на схо́дѣ ѻ҆́ба ли̑ка пою́тъ средѝ цр҃кве пе́рвый припѣ́въ. И҆ катава́сїа: Та́инство стра́нное: И҆ покло́нъ. Свѣти́ленъ пра́здника, три́жды. На хвали́техъ стїхи̑ры, на д҃: гла́съ а҃-й. Подо́бенъ: Нбⷭ҇ныхъ чинѡ́въ: Свѣщенѡ́сицы дѣ̑вы: Сла́ва, и҆ ны́нѣ, гла́съ в҃: Дне́сь во хра́мъ приво́дитсѧ: Славосло́вїе вели́кое. По трист҃о́мъ тропа́рь пра́здника, є҆ктєнїѝ, и҆ ѿпꙋ́стъ. И҆ пое́мъ стїхи́рꙋ самогла́снꙋ, пра́здника. [зрѝ] И҆ дае́тсѧ ст҃ы́й є҆ле́й бра́тїи ѿ канді́ла пра́здника, ꙗ҆́коже ᲂу҆каза́сѧ септе́мврїа въ к҃ѕ-й де́нь, и҆ ча́съ а҃-й. На а҃-мъ часѣ̀, тропа́рь пра́здника. По трист҃о́мъ конда́къ пра́здника, и҆ про́чее, и҆ соверше́нный ѿпꙋ́стъ. На лїтꙋргі́и, бл҃жє́нна, ѿ канѡ́на пѣ́снь г҃-ѧ, д҃-гѡ гла́са: и҆ ѕ҃-ѧ, а҃-гѡ гла́са, на и҃. По вхо́дѣ тропа́рь пра́здника. Сла́ва, и҆ ны́нѣ, конда́къ пра́здника. Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆по́столъ ко є҆вре́ємъ, зача́ло т҃к: И҆мѣ́ѧше пе́рваѧ ски́нїа: А҆ллилꙋ́їа, гла́съ и҃: Слы́ши дщѝ и҆ ви́ждь и҆ приклонѝ ᲂу҆́хо твоѐ. Сті́хъ: Лицꙋ̀ твоемꙋ̀ помолѧ́тсѧ бога́тїи лю́дстїи. Є҆ѵⷢ҇лїе лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: Прича́стенъ: Ча́шꙋ сп҃се́нїѧ: Вѣ́стно бꙋ́ди, Ꙗ҆́кѡ пра́зднꙋетсѧ пра́здникъ се́й, є҃ дне́й..

🕅 Подоба́етъ вѣ́дати, ꙗ҆́кѡ а҆́ще слꙋчи́тсѧ пра́здникъ введе́нїѧ бцⷣы въ недѣ́лю.

Въ сꙋббѡ́тꙋ на ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны, гла́са д҃. Сла́ва, и҆ ны́нѣ, пра́здника, и҆́же на Гдⷭ҇и воззва́хъ, ма́лыѧ вече́рни. На стїхо́внѣ стїхи́ра воскрⷭ҇на є҆ди́на, та́же пра́здника стїхо́вна вели́кїѧ вече́рни, со стїхѝ пра́здничными. Сла́ва, и҆ ны́нѣ, пра́здника. Тропа́рь воскрⷭ҇нъ. Сла́ва, и҆ ны́нѣ, пра́здника. Посе́мъ є҆ктенїа̀ ма́лаѧ, и҆ ѿпꙋ́стъ. На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ а҃: и҆ пра́здника ѕ҃. Сла́ва, и҆ ны́нѣ, пра́здника. Посе́мъ вхо́дъ. Прокі́менъ днѐ, и҆ чтє́нїѧ пра́здника г҃. На лїті́и стїхи̑ры, и҆ Сла́ва, и҆ ны́нѣ, пра́здника: Возсїѧ̀ де́нь: На стїхо́внѣ стїхи̑ры воскрⷭ҇ны. Сла́ва, и҆ ны́нѣ, пра́здника. На бл҃гослове́нїи хлѣ́бѡвъ тропа́рь пра́здника три́жды. и҆ чте́нїе въ посла́нїихъ а҆пⷭ҇льскихъ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, и҆ ны́нѣ, пра́здника. По ѻ҆бы́чныхъ каѳі́смахъ, сѣда́льны воскрⷭ҇ны съ бг҃оро́дичны и҆́хъ. И҆ чте́нїе во є҆ѵⷢ҇лїи толково́мъ. Та́же, полѷеле́й, и҆ тропарѝ: А҆́гг҃льскїй собо́ръ: ѵ҆пакоѝ, гла́са: и҆ сѣда́льны всѝ пра́здника, по є҆ди́ножды. Сла́ва, и҆ ны́нѣ, пра́здника, и҆́же пополѷеле́и сѣда́ленъ, и҆ чте́нїе пра́здника. Степє́нна гла́са. Прокі́менъ, и҆ є҆ѵⷢ҇лїе пра́здника. Та́же, Воскрⷭ҇нїе хрⷭ҇то́во: ѱало́мъ н҃: и҆ цѣлова́нїеє҆ѵⷢ҇лїа по ѻ҆бы́чаю. Та́же, Сла́ва, припѣ́въ: пра́здника. И҆ ны́нѣ, то́йже, и҆ стїхи́ра пра́здника. Канѡ́нъ воскрⷭ҇нъ со і҆рмосо́мъ на д҃: и҆ бцⷣы два̀: и҆ пра́здника ѻ҆́ба канѡ́на на и҃. Катава́сїа, хрⷭ҇то́съ ражда́етсѧ: ѻ҆́ба ли̑ка вкꙋ́пѣ. По г҃-й пѣ́сни, конда́къ и҆ і҆́косъ воскрⷭ҇нъ: и҆ сѣда́ленъ пра́здника, два́жды. и҆ чте́нїе пра́здника. По ѕ҃-й пѣ́сни, конда́къ и҆ і҆́косъ пра́здника. И҆ чте́нїе въ про́лозѣ. На ѳ҃-й пѣ́сни припѣ́вѡвъ не пое́мъ, но Чⷭ҇тнѣ́йшꙋю: Свѣти́ленъ воскрⷭ҇нъ. Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны, д҃: и҆ пра́здника д҃, со стїхѝ пра́здничными. Сла́ва, пра́здника: И҆ ны́нѣ, Пребл҃гослове́нна є҆сѝ бцⷣе дв҃о: Та́же, славосло́вїе вели́кое. По трист҃о́мъ, тропа́рь воскрⷭ҇нъ то́чїю, и҆ є҆ктєнїѝ, и҆ ѿпꙋ́стъ. Та́же стїхи́ра є҆ѵⷢ҇льскаѧ, и҆ ѡ҆глаше́нїе, и҆ ѻ҆бы́чное и҆схожде́нїе, и҆ ча́съ а҃-й, въ притво́рѣ. На часѣ́хъ, тропа́рь воскрⷭ҇нъ: Сла́ва, тропа́рь пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ воскрⷭ҇нъ. Та́кожде и҆ на всѣ́хъ часѣ́хъ кондакѝ премѣнѧ́юще глаго́лемъ. На лїтꙋргі́и, бл҃жє́нна воскрⷭ҇на гла́са на ѕ҃: и҆ пра́здника пѣ́снь г҃, на д҃. По вхо́дѣ тропа́рь воскрⷭ҇нъ, и҆ пра́здника. Сла́ва, конда́къ воскрⷭ҇нъ. И҆ ны́нѣ, пра́здника. Прокі́менъ, а҆по́столъ, а҆ллилꙋ́їа, є҆ѵⷢ҇лїе и҆ прича́стенъ, пре́жде днѐ, и҆ пра́здника.

🕅 Подоба́етъ вѣ́дати, а҆́ще слꙋчи́тсѧ попра́зднство вхо́да бцⷣы въ недѣ́лю, и҆ ст҃ы́й пра́зднꙋетсѧ на д҃, и҆лѝ на ѕ҃.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣѣ, по ѻ҆бы́чаю. На вели́цѣй вече́рни, по стїхосло́вїи, на Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ а҃, и҆ пра́здника г҃, тогѡ̀ днѐ рѧдѡвы́ѧ, и҆ ст҃а́гѡ мине́и г҃. А҆́ще ли пое́тсѧ ст҃ы́й на ѕ҃, и҆лѝ є҆мꙋ́же и҆ полѷеле́й, и҆ пое́мъ стїхи̑ры воскрⷭ҇ны г҃: и҆ пра́здника г҃: и҆ ст҃а́гѡ д҃. Сла́ва, ст҃а́гѡ. А҆́ще же нѝ, Сла́ва, пра́здника, И҆ ны́нѣ, бг҃оро́диченъ а҃-гѡ гла́са. Вхо́дъ. Прокі́менъ днѐ. На лїті́и стїхи̑ры пра́здника, тогѡ̀ днѐ стїхѡ́вныѧ, и҆ ст҃а́гѡ, а҆́ще полѷеле́й. Сла́ва, и҆ ны́нѣ, пра́здника: А҆́ще ли и҆́мать ст҃ы́й Сла́вꙋ, Сла́ва, ст҃а́гѡ, И҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва, ст҃а́гѡ, а҆́ще є҆́сть. А҆́ще ли нѝ, Сла́ва, и҆ ны́нѣ, пра́здника. На бл҃гослове́нїи хлѣ́бѡвъ тропа́рь, Бцⷣе дв҃о: два́жды. и҆ пра́здника є҆ди́ножды. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва ст҃а́гѡ, а҆́ще є҆́сть: а҆́ще ли нѝ, Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны съ бг҃оро́дичны и҆́хъ, и҆ чте́нїе во є҆ѵⷢ҇лїи толково́мъ. Полѷеле́й и҆ тропарѝ: А҆́гг҃льскїй собо́ръ: ѵ҆пакоѝ. Степє́нна, и҆ прокі́менъ гла́са. Є҆ѵⷢ҇лїе воскрⷭ҇но: и҆ стїхи́ра воскрⷭ҇на: и҆ про́чее воскрⷭ҇но. Канѡ́нъ воскрⷭ҇нъ, со і҆рмосо́мъ на д҃: И҆ бцⷣы на в҃: Пра́здника на д҃: и҆ ст҃а́гѡ на д҃. А҆́ще полѷеле́й, канѡ́нъ воскрⷭ҇нъ со і҆рмосо́мъ на д҃: и҆ пра́здника на д҃: ст҃а́гѡ, на ѕ҃. Катава́сїа, Хрⷭ҇то́съ ражда́етсѧ: По г҃-й пѣ́сни, конда́къ пра́здника, и҆ і҆́косъ: и҆ ст҃а́гѡ а҆́ще и҆́мать: и҆ сѣда́ленъ ст҃а́гѡ. Сла́ва, и҆ ны́нѣ, пра́здника: и҆ чте́нїе. По ѕ҃-й пѣ́сни, конда́къ воскрⷭ҇нъ, и҆ і҆́косъ. и҆ чте́мъ про́логъ. На ѳ҃-й пѣ́сни пое́мъ Чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, ст҃а́гѡ, а҆́ще и҆́мать: а҆́ще ли нѝ, Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника со сла́внымъ д҃, стїхѡ́вныѧ ᲂу҆́трєннїѧ, со стїхѝ пра́здника. А҆́ще и҆́мать ст҃ы́й стїхи̑ры на хвали́техъ, и҆ пое́мъ стїхи̑ры воскрⷭ҇ны д҃: и҆ ст҃а́гѡ со сла́внымъ д҃, съ припѣ́вы є҆гѡ̀. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ бцⷣе дв҃о: Славосло́вїе вели́кое. По трист҃о́мъ, тропа́рь воскрⷭ҇нъ то́чїю: И҆ є҆ктєнїѝ. И҆ ѿпꙋ́стъ. И҆ ѡ҆глаше́нїе: И҆ ѻ҆бы́чное и҆схожде́нїе въ притво́ръ. Та́же ча́съ а҃: На а҃-мъ часѣ̀, тропа́рь воскрⷭ҇нъ. Сла́ва, тропа́рь пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника. На г҃-мъ часѣ̀, тропа́рь воскрⷭ҇нъ: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ. Та́кожде и҆ въ про́чыѧ часы̀ глаго́лемъ воскрⷭ҇ный тропа́рь всегда̀ съ пра́здничнымъ, и҆ со ст҃а́гѡ тропаре́мъ премѣнѧ́юще, а҆́ще є҆́сть. А҆ конда́къ воскрⷭ҇нъ и҆ пра́здника, глаго́лемъ премѣнѧ́юще, а҆́ще полѷеле́й, и҆ ст҃а́гѡ. На лїтꙋргі́и, бл҃жє́нна гла́са на ѕ҃: и҆ пра́здника рѧдова́ѧ пѣ́снь, на д҃: А҆́ще ли и҆́мать ст҃ы́й пѣ́снь во ᲂу҆ста́вѣ, и҆ воскрⷭ҇на на д҃: и҆ пра́здника пѣ́снь рѧдова́ѧ на д҃: и҆ ст҃а́гѡ пѣ́снь ѕ҃, на д҃. По вхо́дѣ тропа́рь воскрⷭ҇нъ и҆ пра́здника, и҆ хра́ма ст҃а́гѡ, и҆ ст҃о́мꙋ, а҆́ще и҆́мать. Та́же конда́къ воскрⷭ҇нъ. Сла́ва, ст҃а́гѡ: И҆ ны́нѣ, пра́здника. А҆́ще ли не и҆́мать ст҃ы́й тропарѧ̀ и҆ кондака̀: Сла́ва, конда́къ воскрⷭ҇нъ: И҆ ны́нѣ, конда́къ пра́здника. Прокі́менъ, а҆по́столъ, А҆ллилꙋ́їа, є҆ѵⷢ҇лїе, и҆ прича́стенъ днѐ, и҆ ст҃а́гѡ, а҆́ще и҆́мать: а҆́ще ли нѝ, то̀ рѧ́дъ недѣ́ли є҆ди́нъ.

к҃в. Ст҃а́гѡ а҆пⷭ҇ла +фїлимо́на+, и҆ и҆̀же съ ни́мъ:

На Гдⷭ҇и воззва́хъ, стїхи̑ры пра́здника, гла́съ и҃. Подо́бенъ: Ѽ пресла́внагѡ чꙋдесѐ! И҆ ст҃ы́хъ, гла́съ в҃. Подо́бенъ: Є҆гда̀ ѿ дре́ва: Сла́ва, и҆ ны́нѣ, пра́здника, гла́съ а҃: Да ра́дꙋетсѧ дне́сь нб҃о свы́ше: На стїхо́внѣ стїхи̑ры пра́здника, гла́съ в҃. Подо́бенъ: До́ме є҆ѵфра́ѳовъ: съ припѣ́вы и҆́хъ. Сла́ва, и҆ ны́нѣ, гла́съ то́йже, самогла́сенъ: Дне́сь въ хра́мъ приво́дитсѧ. Тропа́рь а҆пⷭ҇лѡвъ, гла́съ г҃: А҆пⷭ҇ли ст҃і́и: Ѻ҆ктѡ́врїа въ л҃а-й де́нь. Сла́ва, и҆ ны́нѣ, пра́здника, и҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды, Сла́ва, а҆пⷭ҇лѡвъ: И҆ ны́нѣ, пра́здника. И҆ ѻ҆бы̑чныѧ каѳі̑смы: И҆ сѣда́льны пра́здника. Канѡ́нъ пра́здника, гла́съ д҃, со і҆рмосо́мъ на и҃: и҆ ст҃ы́хъ на д҃, гла́съ в҃. По г҃-й пѣ́сни,

Конда́къ а҆пⷭ҇лѡвъ, гла́съ в҃. Подо́бенъ: Вы́шнихъ и҆щѧ̀: Ꙗ҆́кѡ ѕвѣ́зды всесвѣ̑тлыѧ, просвѣща́ющыѧ концы̀, а҆пⷭ҇лы хрⷭ҇тѡ́вы восхва́лимъ: фїлимо́на сла́внаго, и҆ а҆рхі́ппа сщ҃е́ннаго, и҆ ѻ҆ни́сїма, и҆ ма́рка, и҆ а҆поллѡ́са, съ ни́миже и҆ а҆пфі́ю всемꙋ́дрꙋю, вопїю́ще: моли́те непреста́ннѡ ѡ҆ всѣ́хъ на́съ.

И҆ сѣда́ленъ ст҃ы́хъ, гла́съ и҃: Сла́ва, и҆ ны́нѣ, пра́здника. По ѕ҃-й пѣ́сни конда́къ пра́здника. По ѳ҃-й пѣ́сни, свѣти́ленъ пра́здника. Сла́ва, и҆ ны́нѣ, то́йже. На стїхо́внѣ стїхи̑ры пра́здника, гла́съ ѕ҃. Подо́бенъ: Тридне́венъ: Съ припѣ́вы. Сла́ва, и҆ ны́нѣ, гла́съ д҃: Дне́сь бг҃овмѣсти́мый хра́мъ: На лїтꙋргі́и, бл҃жє́нна пра́здника, пѣ́снь а҃-ѧ, на ѕ҃. По вхо́дѣ тропа́рь хра́ма хрⷭ҇то́ва. Та́же пра́здника, и҆ хра́ма ст҃а́гѡ: Посе́мъ ст҃ы́хъ. Та́же, конда́къ хра́ма хрⷭ҇то́ва, и҆лѝ ст҃а́гѡ: Сла́ва, конда́къ а҆пⷭ҇лѡвъ: И҆ ны́нѣ, пра́здника. [С]и́це глаго́лютсѧ тропарѝ и҆ кондакѝ, и҆ до ѿда́нїѧ, кромѣ̀ недѣ́ли. Прокі́менъ, гла́съ и҃: Во всю̀ зе́млю и҆зы́де: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ къ фїлимо́нꙋ посла́нїѧ, послѣдѝ т҃в-гѡ зача́ла: Па́ѵелъ ю҆́зникъ і҆и҃съ хрⷭ҇то́въ, и҆ тїмоѳе́й бра́тъ, фїлимо́нꙋ возлю́бленномꙋ: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑ гдⷭ҇и. Є҆ѵⷢ҇лїе лꙋкѝ, зача́ло и҃: Ꙗ҆вѝ гдⷭ҇ь и҆ и҆нѣ́хъ се́дмьдесѧтъ: Прича́стенъ: Во всю̀ зе́млю:

🕃 Въ то́йже де́нь ᲂу҆бїе́нїе ст҃а́гѡ бл҃говѣ́рнагѡ вели́кагѡ кнѧ́зѧ +мїхаи́ла+ тверска́гѡ. Соверша́етсѧ собо́ръ є҆гѡ̀ во тве́ри, и҆ и҆дѣ́же хра́мъ є҆гѡ̀.

Тропа́рь, гла́съ и҃: Возвы́сивъ ᲂу҆́мъ тво́й къ бг҃ꙋ: и҆ житїѧ̀ со а҆́гг҃лы возжелѣ́лъ є҆сѝ, тлѣ́ннꙋю сла́вꙋ земнꙋ́ю ѡ҆ста́вилъ є҆сѝ, бл҃же́нне, и҆ положи́лъ є҆сѝ дꙋ́шꙋ твою̀ за лю́ди твоѧ̑, воспрїѧ́лъ є҆сѝ вѣне́цъ проти́вꙋ трꙋдѡ́въ твои́хъ, бг҃омꙋ́дре мїхаи́ле: молѝ хрⷭ҇та̀ бг҃а ѡ҆ чтꙋ́щихъ любо́вїю ст҃ꙋ́ю па́мѧть твою̀.

Конда́къ, гла́съ в҃. Подо́бенъ: Вы́шнихъ и҆щѧ̀: Вы́шнихъ и҆щѧ̀ и҆ земнꙋ́ю сла́вꙋ презрѣ́въ, це́рковь бж҃їю ѡ҆багри́лъ є҆сѝ твое́ю кро́вїю, за ню́же и҆ пострада́лъ є҆сѝ, ст҃е мїхаи́ле, заколе́нїе непра́ведное прїе́мъ веселѧ́сѧ: тѣ́мже со а҆́гг҃лы предстоѧ̀ хрⷭ҇тꙋ̀ бг҃ꙋ, молѝ непреста́ннѡ за всѧ̑ ны.

к҃г. И҆̀же во ст҃ы́хъ ѻ҆тє́цъ на́шихъ +а҆мфїло́хїа+, є҆пⷭ҇кпа і҆коні́йскагѡ, и҆ +григо́рїа+, є҆пⷭ҇кпа а҆краганті́йскагѡ.

Стїхи̑ры а҆мфїло́хїа г҃, гла́съ д҃. Подо́бенъ: Да́лъ є҆сѝ зна́менїе: И҆ григо́рїа г҃, гла́съ и҃. Подо́бенъ: Ѽ пресла́внагѡ чꙋдесѐ! Сла́ва, и҆ ны́нѣ, пра́здника, гла́съ д҃: Прїиди́те всѝ вѣ́рнїи: На стїхо́внѣ стїхи̑ры пра́здника, гла́съ а҃. Подо́бенъ: Нбⷭ҇ныхъ чинѡ́въ: Съ припѣ́вы и҆́хъ. Сла́ва, и҆ ны́нѣ, гла́съ є҃: Возсїѧ̀ де́нь ра́достенъ: Тропа́рь, гла́съ д҃: Бж҃е ѻ҆тє́цъ на́шихъ: Сегѡ̀ мѣ́сѧца въ к҃а-й де́нь. Сла́ва, и҆ ны́нѣ, пра́здника. И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃ы́хъ: И҆ ны́нѣ, пра́здника. И҆ ѻ҆бы̑чныѧ каѳі̑смы: и҆ сѣда́льны пра́здника: и҆ чте́нїе. Канѡ́нъ пра́здника со і҆рмосо́мъ на ѕ҃: И҆ ст҃ы́хъ два̀, на и҃: А҆мфїло́хїа, гла́съ д҃: И҆ григо́рїа, гла́съ и҃. По г҃-й пѣ́сни, конда́къ пра́здника, и҆ і҆́косъ.

Та́же конда́къ григо́рїа, гла́съ д҃. Подо́бенъ: Ꙗ҆ви́лсѧ є҆сѝ: Свѣтолꙋ́чными сїѧ́нїи цр҃ковь ст҃а́гѡ дх҃а свѣтово́дитъ свѣ́тлое соверша́ющыѧ твоѐ ᲂу҆спе́нїе, прпⷣбне ѻ҆́тче, всебл҃же́нне григо́рїе.

И҆ сѣда́ленъ а҆мфїло́хїа, гла́съ д҃. Сла́ва, григо́рїа, гла́съ и҃. И҆ ны́нѣ, пра́здника. По ѕ҃-й пѣ́сни,

Конда́къ а҆мфїло́хїа, гла́съ в҃. Подо́бенъ: Вы́шнихъ и҆щѧ̀: Бж҃е́ственный гро́мъ, трꙋба̀ дх҃а, вѣ́ры садодѣ́лателю и҆ сѣ́чиво є҆ресе́й, і҆ера́рше а҆мфїло́хїе, трⷪ҇цы ᲂу҆го́дниче вели́кїй, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ.

И҆ і҆́косъ. По ѳ҃-й пѣ́сни, свѣти́ленъ а҆мфїло́хїа: Сла́ва, григо́рїа: И҆ ны́нѣ, пра́здника. На стїхо́внѣ стїхи̑ры пра́здника, гла́съ в҃. Подо́бенъ: До́ме є҆ѵфра́ѳовъ: Сла́ва, и҆ ны́нѣ, гла́съ ѕ҃: Дне́сь собо́ри вѣ́рныхъ: На лїтꙋргі́и, бл҃жє́нна пра́здника, пѣ́снь д҃-ѧ и҆ є҃-ѧ, на ѕ҃. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: А҆по́столъ ко є҆вре́ємъ, зача́ло тл҃д: Помина́йте наста́вники ва́шѧ: А҆ллилꙋ́їа, гла́съ в҃: Сщ҃е́нницы твоѝ ѡ҆блекꙋ́тсѧ въ пра́вдꙋ: Сті́хъ: Зако́нъ бг҃а є҆гѡ̀ въ се́рдцы є҆гѡ̀. Є҆ѵⷢ҇лїе матѳе́а, зача́ло р҃г: Бди́те ᲂу҆́бѡ, ꙗ҆́кѡ не вѣ́сте: Прича́стенъ: Ра́дꙋйтесѧ првⷣнїи:

🕃 Въ то́йже де́нь преставле́нїе ст҃а́гѡ бл҃говѣ́рнагѡ вели́кагѡ кн҃зѧ +а҆леѯа́ндра+ не́вскагѡ, и҆ всеѧ̀ рѡссі́и чꙋдотво́рца:

Соверша́етсѧ собо́ръ, и҆дѣ́же хра́мъ є҆гѡ̀.

Тропа́рь, гла́съ д҃: Ꙗ҆́кѡ бл҃гочести́вагѡ ко́рене пречестна́ѧ ѿра́сль бы́лъ є҆сѝ, бл҃же́нне а҆леѯа́ндре: ꙗ҆ви́ бо тѧ̀ хрⷭ҇то́съ, ꙗ҆́кѡ нѣ́кое бж҃е́ственное сокро́вище рѡссі́йстѣй землѝ, но́вагѡ чꙋдотво́рца пресла́вна и҆ бг҃опрїѧ́тна. и҆ дне́сь соше́дшесѧ въ па́мѧть твою̀ вѣ́рою и҆ любо́вїю, во ѱалмѣ́хъ и҆ пѣ́нїихъ ра́дꙋющесѧ сла́вимъ гдⷭ҇а, да́вшаго тебѣ̀ бл҃года́ть и҆сцѣле́нїй. є҆го́же молѝ сп҃стѝ гра́дъ се́й, и҆ держа́вѣ срѡ́дникъ твои́хъ бг҃оꙋго́днѣй бы́ти, и҆ сыновѡ́мъ рѡссі̑йскимъ сп҃сти́сѧ.

Конда́къ, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ ѕвѣздꙋ́ тѧ пресвѣ́тлꙋю почита́емъ, ѿ восто́ка возсїѧ́вшꙋю, и҆ на за́падъ прише́дшꙋю: всю́ бо странꙋ̀ сїю̀ чꙋдесы̀ и҆ добро́тою ѡ҆богаща́еши, и҆ просвѣща́еши вѣ́рою чтꙋ́щыѧ па́мѧть твою̀, а҆леѯа́ндре бл҃же́нне. сегѡ̀ ра́ди дне́сь пра́зднꙋемъ твоѐ ᲂу҆спе́нїе, лю́дїе твоѝ сꙋ́щїи, молѝ сп҃стѝ ѻ҆те́чество твоѐ, и҆ держа́вꙋ правосла́внагѡ +і҆мпера́тора+ на́шегѡ, и҆́мⷬ҇къ, и҆ всѧ̑ притека́ющыѧ къ ра́цѣ моще́й твои́хъ, и҆ вѣ́рнѡ вопїю́щыѧ тѝ: ра́дꙋйсѧ гра́дꙋ на́шемꙋ ᲂу҆твержде́нїе.

Въ то́йже де́нь па́мѧть пе́рвагѡ воро́нежскагѡ ст҃и́телѧ +митрофа́на+, въ схимона́сѣхъ мака́рїа:

Соверша́етсѧ собо́ръ, и҆дѣ́же хра́мъ є҆гѡ̀.

Тропа́рь, гла́съ д҃: Пра́вило вѣ́ры, и҆ ѡ҆́бразъ кро́тости, сло́вомъ и҆ житїе́мъ, па́ствѣ твое́й, ѻ҆́тче смиреномꙋ́дре митрофа́не, бы́лъ є҆сѝ. тѣ́мже и҆ во свѣ́тлостехъ ст҃ы́хъ, со́лнца свѣтлѣ́йше возсїѧ́лъ є҆сѝ, вѣнце́мъ нетлѣ́нїѧ и҆ сла́вы ᲂу҆краша́емь, молѝ хрⷭ҇та̀ бг҃а, бл҃гочести́вѣйшемꙋ +і҆мпера́торꙋ+ на́шемꙋ +нїкола́ю а҆леѯа́ндровичꙋ+, все́й держа́вѣ є҆гѡ̀, и҆ гра́дꙋ твоемꙋ̀ въ ми́рѣ сп҃сти́сѧ.

Конда́къ, гла́съ и҃. Воздержа́нїемъ тѣ́ло дꙋ́хꙋ порабо́тивъ, дꙋ́шꙋ же равноа́гг҃льнꙋ сотвори́въ, ст҃и́тельскою ѡ҆дѣ́ѧлсѧ є҆сѝ ѻ҆де́ждою, ꙗ҆́кѡ вѣне́цъ сщ҃е́нства: и҆ ны́нѣ всѣ́хъ влⷣцѣ предстоѧ̀, молѝ, всебл҃же́нне митрофа́не, ᲂу҆мири́ти и҆ сп҃стѝ дꙋ́шы на́шѧ.

к҃д. 🕃 Ст҃ы́ѧ великомч҃нцы +є҆катері́ны+: И҆ ст҃а́гѡ великомч҃нка +меркꙋ́рїа+:

Стїхи̑ры є҆катері́ны г҃, гла́съ а҃. Подо́бенъ: Нбⷭ҇ныхъ чинѡ́въ: И҆ меркꙋ́рїа г҃, гла́съ д҃. Подо́бенъ: Ꙗ҆́кѡ до́блѧ: Сла́ва, є҆катері́ны, гла́съ в҃: Ра́достнѡ къ торжествꙋ̀: И҆ ны́нѣ, пра́здника, гла́съ и҃: По ржⷭ҇твѣ̀ твое́мъ: На стїхо́внѣ стїхи̑ры пра́здника, гла́съ а҃. Подо́бенъ: Нбⷭ҇ныхъ чинѡ́въ: Сла́ва, є҆катері́ны, гла́съ в҃: Житїѐ невеще́ственно: И҆ ны́нѣ, пра́здника, гла́съ и҃: Дв҃дъ провозглаша́ше: Тропа́рь, гла́съ д҃: А҆́гница твоѧ̀, і҆и҃се: септе́мврїа въ ѕ҃і-й де́нь.

И҆лѝ се́й, гла́съ то́йже: Добродѣ́тельми ꙗ҆́кѡ лꙋча́ми со́лнечными просвѣти́ла є҆сѝ невѣ̑рныѧ мꙋдрецы̀, и҆ ꙗ҆́коже пресвѣ́тлаѧ лꙋна̀ ходѧ́щымъ въ нощѝ невѣ́рїѧ тьмꙋ̀ ѿгна́ла є҆сѝ, и҆ цари́цꙋ ᲂу҆вѣ́рила є҆сѝ, вкꙋ́пѣ же и҆ мꙋчи́телѧ ѡ҆бличи́ла є҆сѝ, бг҃озва́ннаѧ невѣ́сто, бл҃же́ннаѧ є҆катері́но. жела́нїемъ востекла̀ є҆сѝ въ нбⷭ҇ный черто́гъ къ прекра́сномꙋ женихꙋ̀ хрⷭ҇тꙋ̀ и҆ ѿ негѡ̀ ца́рскимъ вѣнце́мъ вѣнча́ласѧ є҆сѝ: є҆мꙋ́же со а҆́гг҃лы предстоѧ́щи, за ны̀ моли́сѧ, творѧ́щыѧ пречⷭ҇тнꙋ́ю па́мѧть твою̀.

Сла́ва, меркꙋ́рїа, гла́съ то́йже: Мч҃нкъ тво́й, гдⷭ҇и: септе́мврїа во в҃ де́нь. И҆ ны́нѣ, пра́здника. И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, є҆ди́ножды. И҆ є҆катері́ны є҆ди́ножды. Сла́ва, меркꙋ́рїа: И҆ ны́нѣ, пра́здника. И҆ ѻ҆бы̑чныѧ каѳі̑смы. и҆ сѣда́льны пра́здника. Канѡ́нъ пра́здника со і҆рмосо́мъ на ѕ҃: И҆ ст҃ы́хъ на и҃: Є҆катері́ны, гла́съ и҃: Меркꙋ́рїа, гла́съ то́йже. По г҃-й пѣ́сни, конда́къ и҆ і҆́косъ пра́здника:

Пото́мъ конда́къ меркꙋ́рїа, гла́съ д҃. Подо́бенъ: Ꙗ҆ви́лсѧ є҆сѝ: Во бране́хъ непобѣди́маго во́ина, и҆ въ бѣда́хъ непосты́дна застꙋ́пника, пѣ́сньми меркꙋ́рїа ᲂу҆блажи́мъ, сла́вѧще: пра́зднꙋющыѧ бо па́мѧть є҆гѡ̀ ве́селѡ, ѿ бѣ́дъ и҆збавлѧ́етъ и҆ скорбе́й.

И҆ сѣда́ленъ є҆катері́ны, гла́съ д҃. Сла́ва, меркꙋ́рїа, гла́съ то́йже: И҆ ны́нѣ, пра́здника, гла́съ то́йже. По ѕ҃-й пѣ́сни,

Конда́къ є҆катері́ны, гла́съ в҃. Подо́бенъ: Вы́шнихъ и҆щѧ̀: Ли́къ чⷭ҇тны́й бж҃е́ственнѣ мч҃нколю́бцы воздви́гните ны́нѣ, почита́юще всемꙋ́дрꙋю є҆катері́нꙋ: сїѧ́ бо въ три́знищи хрⷭ҇та̀ проповѣ́да, и҆ ѕмі́ѧ попра̀, ри́торѡвъ ра́зꙋмы ᲂу҆кроти́вши.

И҆ і҆́косъ. По ѳ҃-й пѣ́сни, свѣти́ленъ ст҃ы́хъ. Сла́ва, и҆ ны́нѣ, пра́здника. На хвали́техъ стїхи̑ры, гла́съ д҃. Подо́бенъ: Да́лъ є҆сѝ зна́менїе: Сла́ва, гла́съ в҃: Житїѐ невеще́ственно: И҆ ны́нѣ: Дне́сь собо́ри: На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ: Сла́ва, и҆ ны́нѣ, гла́съ и҆ подо́бенъ то́йже: Двє́ри нбⷭ҇ныѧ: и҆ ѿпꙋ́стъ. На лїтꙋргі́и, бл҃жє́нна пра́здника, пѣ́снь з҃-ѧ и҆ и҃-ѧ, на д҃: И҆ ст҃ы́ѧ, пѣ́снь ѕ҃-ѧ. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ: Сті́хъ: Въ цр҃квахъ бл҃гослови́те бг҃а гдⷭ҇а: А҆по́столъ ко є҆фесе́ємъ, зача́ло сл҃г: Возмога́йте ѡ҆ гдⷭ҇ѣ: А҆ллилꙋ́їа, гла́съ а҃: Воззва́ша првⷣнїи и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе лꙋкѝ, зача́ло р҃ѕ: Возложа́тъ на вы̀ рꙋ́ки своѧ̑: Прича́стенъ: Ра́дꙋйтесѧ првⷣнїи:

🕃 Въ то́йже де́нь ст҃а́гѡ мч҃нка +меркꙋ́рїа+ смоле́нскагѡ.

Соверша́етсѧ собо́ръ є҆гѡ̀ во хра́мѣ є҆гѡ̀.

Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь.

Конда́къ, гла́съ то́йже: Ꙗ҆ви́сѧ во бране́хъ непобѣди́мь во́инъ, ѿ ри́млѧнъ ро́домъ, сыновство̀ и҆мѣ̀ гра́да смоле́нска: ꙗ҆́кѡ бо си́хъ ра́ди нарече́сѧ, ꙗ҆́кѡ ѿ бцⷣы стра́жъ крѣ́покъ посла́сѧ гра́дꙋ, пѣ́сньми меркꙋ́рїа ᲂу҆бл҃жи́мъ, пра́зднꙋюще ве́селѡ па́мѧть є҆гѡ̀, ꙗ҆́кѡ да и҆зба́витъ гра́дъ на́шъ ѿ бѣды̀ ра̑тникъ.

к҃є. И҆́же во ст҃ы́хъ ѻ҆тє́цъ на́шихъ и҆ сщ҃енномч҃нкѡвъ, +кли́мента+ па́пы ри́мскагѡ и҆ +петра̀+ а҆леѯандрі́йскагѡ.

Въ се́й де́нь ѿдае́тсѧ пра́здникъ вхо́да прест҃ы́ѧ бцⷣы.

На Гдⷭ҇и воззва́хъ, стїхи̑ры пра́здника г҃: гла́съ а҃. Подо́бенъ: Ѽ ди́внагѡ чꙋдесѐ! Поє́мыѧ на са́мый пра́здникъ. И҆ кли́мента г҃, гла́съ в҃: Подо́бенъ: Є҆гда̀ ѿ дре́ва: Сла́ва, и҆ ны́нѣ, пра́здника, гла́съ и҃: По ржⷭ҇твѣ̀ твое́мъ: На стїхо́внѣ стїхи̑ры пра́здника, гла́съ є҃. Подо́бенъ: Ра́дꙋйсѧ: Ра́дꙋетсѧ нб҃о и҆ землѧ̀: Съ припѣ́вы и҆́хъ. Сла́ва, и҆ ны́нѣ, пра́здника, гла́съ ѕ҃: Дне́сь собо́ри вѣ́рныхъ: Тропа́рь ст҃ы́хъ, гла́съ д҃: Бж҃е ѻ҆тє́цъ на́шихъ: сегѡ̀ мѣ́сѧца въ к҃-й де́нь. Сла́ва, и҆ ны́нѣ, пра́здника. И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃ы́хъ: И҆ ны́нѣ, пра́здника: И҆ ѻ҆бы̑чныѧ каѳі̑смы. Сѣда́льны пра́здника. И҆ чте́нїе. Канѡ́нъ пра́здника є҆ди́нъ, со і҆рмосо́мъ на ѕ҃: И҆ ст҃ы́хъ два̀, на и҃. Кли́мента, гла́съ и҃. Петра̀, гла́съ то́йже. Катава́сїа: Хрⷭ҇то́съ ражда́етсѧ: По г҃-й пѣ́сни,

Конда́къ кли́мента и҆ петра̀, гла́съ д҃. Подо́бенъ: Ꙗ҆ви́лсѧ є҆сѝ: Цр҃кве недви́жимїи и҆ бж҃е́ственнїи пѵ́ргове, бл҃гоче́стїѧ бж҃е́ственнїи столпѝ, вои́стиннꙋ крѣ́пцыи, кли́менте съ петро́мъ всехва́льнїи, ва́шими мл҃твами соблюди́те всѧ̑.

И҆ сѣда́ленъ кли́мента, гла́съ д҃. Сла́ва, петра̀, гла́съ и҃. И҆ ны́нѣ, пра́здника, гла́съ д҃. По ѕ҃-й пѣ́сни, конда́къ пра́здника, и҆ і҆́косъ. На ѳ҃-й пѣ́сни, Чⷭ҇тнѣ́йшꙋю, не пое́мъ, но пое́мъ припѣ́въ пра́здника, ꙗ҆́кѡ предписа́сѧ. Ст҃ы̑мъ же припѣва́емъ стїхѝ пѣ́сней: въ коне́цъ же ѳ҃-й пѣ́сни, пое́тъ а҃-й ли́къ припѣ́въ пра́здника, та́же катава́сїа пра́здника: Та́инство стра́нное ви́жꙋ: И҆ покло́нъ. Свѣти́ленъ ст҃ы́хъ. Сла́ва, и҆ ны́нѣ, пра́здника. На хвали́техъ стїхи̑ры на ѕ҃, пра́здника г҃, гла́съ а҃. Подо́бенъ: Нбⷭ҇ныхъ чинѡ́въ: Свѣщенѡ́сицы дѣ̑вы: И҆ ст҃а́гѡ петра̀ г҃, гла́съ и҆ подо́бенъ то́йже: Пресꙋ́щныѧ трⷪ҇цы: Сла́ва, гла́съ д҃: Рꙋко́ю бж҃їею: И҆ ны́нѣ, пра́здника, гла́съ в҃: Дне́сь во хра́мъ: Славосло́вїе вели́кое. По трист҃о́мъ, тропа́рь ст҃ы́хъ. Сла́ва, и҆ ны́нѣ, пра́здника. Є҆ктєнїѝ: И҆ ѿпꙋ́стъ. И҆ ча́съ а҃. На пе́рвомъ часѣ̀ тропа́рь пра́здника: Сла́ва, ст҃ы́хъ: И҆ ны́нѣ, бг҃оро́диченъ. По трист҃о́мъ конда́къ пра́здника, непремѣ́ннѡ. На лїтꙋргі́и, бл҃жє́нна пра́здника ѻ҆бою̀ канѡ́нѡвъ, пѣ́снь ѳ҃-ѧ на и҃. По вхо́дѣ тропа́рь пра́здника: И҆ ст҃ы́хъ. Сла́ва, конда́къ ст҃ы́хъ: И҆ ны́нѣ, пра́здника. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: Ст҃ы́хъ прокі́менъ, гла́съ з҃: Чⷭ҇тна̀ пред̾ гдⷭ҇емъ: А҆по́столъ пра́здника, ко є҆вре́ємъ, зача́ло т҃к: И҆мѣ́ѧше пе́рваѧ ски́нїа: И҆ ст҃ы́хъ къ фїлїпписі́ємъ, зача́ло см҃ѕ: На́ше житїѐ на нб҃сѣ́хъ є҆́сть: А҆ллилꙋ́їа, гла́съ и҃: Слы́ши дщѝ и҆ ви́ждь: Є҆ѵⷢ҇лїе пра́здника, лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: И҆ ст҃ы́хъ, матѳе́а, зача́ло а҃і: Вы̀ є҆стѐ свѣ́тъ мі́ра: Прича́стенъ: Ча́шꙋ сп҃се́нїѧ: И҆ ст҃ы́хъ, Въ па́мѧть: И҆ ѿдае́тсѧ пра́здникъ вхо́да прест҃ы́ѧ бцⷣы.

🕅 Подоба́етъ вѣ́дати, ꙗ҆́кѡ а҆́ще слꙋчи́тсѧ ѿда́нїе пра́здника вхо́да прест҃ы́ѧ бцⷣы въ недѣ́лю, ѡ҆ставлѧ́етсѧ возслѣ́дованїе ст҃а́гѡ петра̀, и҆ пое́тсѧ, є҆гда̀ хо́щетъ є҆кклисїа́рхъ.

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны, и҆ бцⷣы по ѻ҆бы́чаю. На вели́цѣй вече́рни, на Гдⷭ҇и воззва́хъ, стїхи̑ры воскрⷭ҇ны г҃: И҆ а҆нато́лїевъ а҃: И҆ пра́здника г҃, гла́съ а҃: Дне́сь вѣ́рнїи: И҆ кли́мента г҃. Сла́ва, пра́здника, гла́съ и҃: По ржⷭ҇твѣ̀ твое́мъ: И҆ ны́нѣ, бг҃оро́диченъ а҃, настоѧ́щагѡ гла́са. Вхо́дъ. Прокі́менъ днѐ. На лїті́и стїхи̑ры пра́здника: Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны гла́са. Сла́ва, и҆ ны́нѣ, пра́здника. На бл҃гослове́нїи хлѣ́бѡвъ, тропа́рь: Бцⷣе дв҃о: три́жды. И҆ чте́нїе въ посла́нїихъ а҆пⷭ҇льскихъ. А҆ и҆дѣ́же всено́щное не быва́етъ, глаго́лемъ тропа́рь воскрⷭ҇нъ.

Сла́ва, тропа́рь кли́мента, гла́съ д҃: И҆́же ѿ бг҃а чꙋдодѣ́йствы пресла́внѡ ᲂу҆дивлѧ́ѧ вселе́нныѧ концы̀ мі́ра, сщ҃е́нный страда́льче: па́че є҆стества̀ мо́рю, соста́вы вода́мъ содѣва́еши раздѣле́нїе, въ чⷭ҇тнѣ́й па́мѧти твое́й, всегда̀ притека́ющымъ ᲂу҆се́рднѡ въ бг҃озда́ннꙋю тѝ цр҃ковь, чꙋдє́снымъ твои̑мъ моще́мъ: и҆ по всенаро́дномъ хожде́нїи, мо́ре во є҆ди́но тече́нїе чꙋдодѣ́тельнѣ твори́ши, кли́менте преди́вный, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

И҆ ны́нѣ, пра́здника. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, кли́мента: И҆ ны́нѣ, пра́здника. По каѳі́смахъ, сѣда́льны воскрⷭ҇ны, съ бг҃оро́дичны и҆́хъ. И҆ чте́нїе. И҆ полѷеле́й. Та́же тропарѝ: А҆́гг҃льскїй собо́ръ: Ѵ҆пакоѝ гла́са. И҆ про́чее воскрⷭ҇но. Канѡ́нъ воскрⷭ҇нъ со і҆рмосо́мъ на д҃: И҆ бцⷣы на два̀: И҆ пра́здника а҃-гѡ гла́са, на д҃: И҆ кли́мента на д҃. Катава́сїа, хрⷭ҇то́съ ражда́етсѧ: По г҃-й пѣ́сни, конда́къ и҆ і҆́косъ пра́здника.

Та́же конда́къ кли́мента, гла́съ в҃. Подо́бенъ: Твє́рдыѧ: Бж҃е́ственнагѡ вїногра́да сщ҃енноѡдѣ́ѧнна всѣ̑мъ лоза̀ ꙗ҆ви́сѧ, ка́плющи сла́дость премꙋ́дрости, мл҃твами твои́ми всече́стне. да тебѣ̀ и҆стка́нꙋ ꙗ҆́кѡ багрѧни́цꙋ, пѣ́снь мы́сленнꙋю принесе́мъ, кли́менте свѧ́те: сп҃сѝ рабы̑ твоѧ̑.

И҆ сѣда́ленъ є҆гѡ̀. Сла́ва, и҆ ны́нѣ, пра́здника. По ѕ҃-й пѣ́сни, конда́къ и҆ і҆́косъ воскрⷭ҇нъ. На ѳ҃-й пѣ́сни пое́мъ, Чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, ст҃а́гѡ: И҆ ны́нѣ, пра́здника. На хвали́техъ стїхи̑ры воскрⷭ҇ны, д҃, И҆ пра́здника со Сла́внымъ, д҃, съ припѣ́вы пра́здничными. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. Тропа́рь воскрⷭ҇нъ то́чїю, є҆ктєнїѝ, и҆ ѿпꙋ́стъ, и҆ ча́съ а҃-й. На часѣ́хъ, тропа́рь воскрⷭ҇нъ, и҆ пра́здника: и҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника, и҆ воскрⷭ҇нъ, глаго́лемъ премѣнѧ́юще. На лїтꙋргі́и, бл҃жє́нна гла́са, на ѕ҃: И҆ пра́здника, пѣ́снь ѳ҃-ѧ, на д҃. По вхо́дѣ тропа́рь воскрⷭ҇нъ, и҆ пра́здника, и҆ ст҃а́гѡ. Конда́къ воскрⷭ҇нъ. Сла́ва, кли́мента: И҆ ны́нѣ, пра́здника. Прокі́менъ гла́са и҆ пра́здника. А҆по́столъ, А҆ллилꙋ́їа, є҆ѵⷢ҇лїе воскрⷭ҇ное, и҆ пра́здника. Прича́стенъ: Хвали́те гдⷭ҇а съ нб҃съ: Дрꙋгі́й, Ча́шꙋ сп҃се́нїѧ:

к҃ѕ. Прпⷣбнагѡ ѻ҆тца̀ на́шегѡ +а҆лѵ́пїа+ сто́лпника:

А҆ллилꙋ́їа, и҆лѝ тропа́рь. Стїхи̑ры ѻ҆ктѡ́иха, и҆лѝ бцⷣы г҃: И҆ ст҃а́гѡ г҃, гла́съ а҃. Подо́бенъ: Всехва́льнїи мч҃нцы: На стїхо́внѣ ѻ҆ктѡ́иха.

Тропа́рь, гла́съ а҃: Терпѣ́нїѧ сто́лпъ бы́лъ є҆сѝ, ревнова́вый пра́ѻтцємъ, прпⷣбне, і҆́ѡвꙋ во страсте́хъ, і҆ѡ́сифꙋ во и҆скꙋше́нїихъ, и҆ безпло́тныхъ жи́тельствꙋ сы́й въ тѣлесѝ, а҆лѵ́пїе ѻ҆́тче на́шъ, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

На ᲂу҆́трени, ѻ҆бы̑чныѧ каѳі̑смы: И҆ сѣда́льны ѻ҆ктѡ́иха: И҆ чтє́нїѧ. Ѻ҆́ба канѡ́на ѻ҆ктѡ́иха: И҆ ст҃а́гѡ на д҃, гла́съ є҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,

Конда́къ, гла́съ и҃. Подо́бенъ: Ꙗ҆́кѡ нача́тки: Ꙗ҆́кѡ добродѣ́телей винꙋ̀, и҆ по́стникѡвъ ᲂу҆добре́нїе, цр҃ковь сла́витъ тѧ̀ дне́сь, и҆ воспѣва́етъ, а҆лѵ́пїе, мл҃твами твои́ми пода́ждь чтꙋ́щымъ любо́вїю до́блєсти твоѧ̑ и҆ борє́нїѧ, лю́тыхъ прегрѣше́нїй и҆збавле́нїе, ꙗ҆́кѡ тезоимени́тый.

И҆ і҆́косъ. По ѳ҃-й пѣ́сни, свѣти́ленъ: и҆ на стїхо́внѣ ѻ҆ктѡ́иха.

Въ то́йже де́нь пра́зднꙋемъ ѡ҆сщ҃е́нїю це́ркви ст҃а́гѡ великомч҃нка +геѡ́ргїа+, ꙗ҆́же въ кі́евѣ ᲂу҆ златы́хъ вра́тъ.

Слꙋ́жба є҆гѡ̀ пое́тсѧ, и҆дѣ́же хра́мъ є҆гѡ̀.

Тропа́рь, гла́съ д҃: Дне́сь бл҃жа́тъ тѧ̀ мі́ра концы̀ бж҃е́ственныхъ чꙋде́съ и҆спо́лншесѧ, и҆ землѧ̀ ра́дꙋетсѧ напи́вшисѧ кро́ве твоеѧ̀: хрⷭ҇тоимени́тїи же лю́дїе гра́да кі́ева, ѡ҆сщ҃е́нїемъ бж҃е́ственнагѡ хра́ма твоегѡ̀, ра́достїю возвесели́шасѧ, стрⷭ҇тоте́рпче геѡ́ргїе, сосꙋ́де и҆збра́нный ст҃а́гѡ дх҃а, ᲂу҆го́дниче хрⷭ҇то́въ. є҆го́же молѝ, съ вѣ́рою и҆ мольбо́ю приходѧ́щымъ во ст҃ы́й тво́й хра́мъ, да́ти ѡ҆чище́нїе грѣхѡ́въ, ᲂу҆мири́ти мі́ръ, и҆ сп҃стѝ дꙋ́шы на́шѧ.

Конда́къ, гла́съ в҃. Подо́бенъ: Твє́рдыѧ: Бж҃е́ственнаго и҆ вѣнцено́снаго великомч҃нка хрⷭ҇то́ва геѡ́ргїа, на врагѝ побѣ́дꙋ взе́мшаго ѡ҆долѣ́нїѧ, соше́дшесѧ вѣ́рою во ѡ҆сщ҃е́нный хра́мъ восхва́лимъ, є҆го́же бл҃говолѝ бг҃ъ созда́ти во и҆́мѧ є҆гѡ̀, є҆ди́нъ во ст҃ы́хъ почива́ѧй.

Въ то́йже де́нь преставле́нїе ст҃и́телѧ +і҆нноке́нтїа+, пе́рвагѡ є҆пⷭ҇кпа і҆ркꙋ́тскагѡ, чꙋдотво́рца.

Соверша́етсѧ собо́ръ, и҆дѣ́же хра́мъ є҆гѡ̀.

Тропа́рь, гла́съ г҃: Свѣти́льниче цр҃кве пресвѣ́тлый, ѡ҆зари́вый лꙋча́ми добро́тъ твои́хъ странꙋ̀ сїю̀, и҆ и҆сцѣле́ньми мно́гими притека́ющихъ къ ра́цѣ твое́й съ вѣ́рою бг҃а просла́вивый, мо́лимъ тѧ̀, ст҃и́телю ѻ҆́тче і҆нноке́нтїе, ѡ҆гражда́й мл҃твами твои́ми гра́дъ се́й ѿ всѣ́хъ бѣ́дъ и҆ печа́ли.

Конда́къ, гла́съ д҃: Непоро́чности соиме́ннаго па́стырѧ, проповѣ́дника вѣ́ры въ ꙗ҆зы́цѣхъ монго́льскихъ, сла́вꙋ и҆ ᲂу҆краше́нїе і҆ркꙋ́тскїѧ па́ствы, любо́вїю восхва́лимъ всѝ вѣ́рнїи: то́й бо є҆́сть храни́тель страны̀ сеѧ̀ и҆ мл҃твенникъ ѡ҆ дꙋша́хъ на́шихъ.

к҃з. 🕃 Ст҃а́гѡ мч҃нка +і҆а́кѡва+ пе́рсѧнина:

И҆ прпⷣбнагѡ ѻ҆тца̀ на́шегѡ +палла́дїа+.

Слꙋ́жба є҆гѡ̀ пое́тсѧ на повече́рїи.

Стїхи̑ры мч҃нка на ѕ҃, гла́съ в҃. Подо́бенъ: Є҆гда̀ ѿ дре́ва: Сла́ва, гла́съ є҃: Оу҆диви́лъ є҆сѝ, ѽ і҆а́кѡве: На стїхо́внѣ ѻ҆ктѡ́иха. Сла́ва, гла́съ и҃: Вѣ́рнѡ соше́дшесѧ: Тропа́рь, гла́съ д҃: Мч҃нкъ тво́й гдⷭ҇и: септе́мврїа во в҃-й де́нь.

И҆лѝ се́й, гла́съ то́йже: Мꙋче́нїи странноꙋжа́сными, и҆ до́блестїю терпѣ́нїѧ всѣ́хъ преꙋдиви́лъ є҆сѝ, многострада́льне: над̾ ко́имждо соста́вомъ ᲂу҆десѝ рѣ́занїѧ, бл҃года́рны мольбы̑ преди́внѣ и҆зре́клъ є҆сѝ гдⷭ҇ꙋ. тѣ́мъ во страда́нїи твое́мъ вѣне́цъ прїе́мъ, къ прⷭ҇то́лꙋ возше́лъ є҆сѝ нбⷭ҇нагѡ цр҃ѧ̀ хрⷭ҇та̀ бг҃а, і҆а́кѡве: того̀ молѝ сп҃стѝ дꙋ́шы на́шѧ.

На ᲂу҆́трени ѻ҆́ба канѡ́на ѻ҆ктѡ́иха: И҆ ст҃а́гѡ на ѕ҃, гла́съ в҃. По г҃-й пѣ́сни, сѣда́ленъ, гла́съ и҃, два́жды. По ѕ҃-й пѣ́сни,

Конда́къ, гла́съ в҃. Подо́бенъ: Вы́шнихъ и҆щѧ̀: Оу҆вѣ́ривсѧ до́брою сꙋпрꙋ́жницею терпѣливодꙋ́шне, и҆ стра́шнагѡ сꙋди́ща ᲂу҆боѧ́всѧ, пе́рсское повелѣ́нїе и҆ стра́хъ, і҆а́кѡве, поплева́лъ є҆сѝ, и҆ ꙗ҆ви́лсѧ є҆сѝ мч҃нкъ честны́й, тѣ́ломъ ꙗ҆́кѡ розга̀ рѣ́жемь.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, мч҃нка. На стїхо́внѣ ѻ҆ктѡ́иха. Сла́ва, мч҃нка, гла́съ в҃: Терпѧ̀ во страда́нїихъ: На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: А҆по́столъ къ є҆фесе́ємъ, зача́ло сл҃г. А҆ллилꙋ́їа: Мнѡ́ги скѡ́рби првⷣнымъ: Є҆ѵⷢ҇лїе і҆ѡа́нна, зача́ло н҃. Прича́стенъ: Въ па́мѧть вѣ́чнꙋю:

🕂 Въ то́йже де́нь +зна́менїе+ прест҃ы́ѧ бцⷣы, бы́вшее въ вели́комъ новѣ̀гра́дѣ.

А҆́ще хра́мъ прест҃ы́ѧ бцⷣы зна́менїѧ, и҆ пое́тсѧ слꙋ́жба зна́менїѧ во все́мъ подо́бнѣ, ꙗ҆́коже септе́мврїа въ и҃-й де́нь. Кромѣ́ же хра́ма пое́тсѧ слꙋ́жба зна́менїѧ, со і҆а́кѡвомъ пе́рсѧниномъ си́це:

На ма́лѣй вече́рни, На Гдⷭ҇и воззва́хъ, стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, и҆ ны́нѣ, гла́съ то́йже. На стїхо́внѣ стїхи̑ры, гла́съ в҃: Подо́бенъ: До́ме є҆ѵфра́ѳовъ: съ припѣ́вы и҆́хъ. Сла́ва, и҆ ны́нѣ: гла́съ а҃, и҆ про́чее ѻ҆бы́чно, и҆ ѿпꙋ́стъ. На вели́цѣй вече́рни, Бл҃же́нъ мꙋ́жъ: а҃-й а҆нтїфѡ́нъ. На Гдⷭ҇и воззва́хъ, стїхи̑ры на и҃: бцⷣы д҃: гла́съ и҃. самогла́сны: Го́рдостїю за́висти: и҆ мч҃нка д҃: гла́съ в҃. Подо́бенъ: Є҆гда̀ ѿ дре́ва: Мі́ра кра̑снаѧ ѡ҆ста́вль: Сла́ва, мч҃нка, гла́съ є҃: Ди́венъ бы́лъ є҆сѝ, і҆а́кѡве: И҆ ны́нѣ, бцⷣы, гла́съ ѕ҃: Весели́тесѧ, лю́дїе: Вхо́дъ. Прокі́менъ днѐ. Чтє́нїѧ бцⷣы г҃. На лїті́и стїхи̑ры, гла́съ ѕ҃: Ро́ги грѣ́шныхъ сотро́шасѧ: Сла́ва, и҆ ны́нѣ, гла́съ то́йже: Се́й де́нь и҆збавле́нїѧ на́шегѡ наста̀: На стїхо́внѣ стїхи̑ры, гла́съ а҃, самогла́сны: Ꙗ҆́коже дре́вле во і҆ерⷭ҇ли́мѣ: съ припѣ́вы и҆́хъ. Сті́хъ а҃: Воскрⷭ҇нѝ гдⷭ҇и въ поко́й тво́й: Сті́хъ в҃: Клѧ́тсѧ гдⷭ҇ь дв҃дꙋ и҆́стиною: Сла́ва, мч҃нка, гла́съ и҃: Вѣ́рнѡ соше́дшесѧ дне́сь: И҆ ны́нѣ, бцⷣы, гла́съ то́йже: Мнѧ́щесѧ непокори́вїи: По Ны́нѣ ѿпꙋща́еши: Тропа́рь мч҃нка, гла́съ д҃.

Сла́ва, и҆ ны́нѣ, тропа́рь бцⷣы, гла́съ то́йже: Ꙗ҆́кѡ неѡбори́мꙋю стѣ́нꙋ, и҆ и҆сто́чникъ чꙋде́съ стѧжа́вше тѧ̀ рабѝ твоѝ, бцⷣе пречⷭ҇таѧ, сопроти́вныхъ ѡ҆полчє́нїѧ низлага́емъ. тѣ́мже мо́лимъ тѧ̀: ми́ръ гра́дꙋ твоемꙋ̀ да́рꙋй, и҆ дꙋша́мъ на́шымъ ве́лїю млⷭ҇ть.

И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь бцⷣы, два́жды. Сла́ва, мч҃нка: И҆ ны́нѣ, бцⷣы. И҆ ѻ҆бы̑чныѧ каѳі̑смы. По а҃-й и҆ по в҃-й каѳі́смѣ, и҆ по полѷеле́и, сѣда́льны бцⷣы, и҆ чте́нїе. Степє́нна а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Сті́хъ: Ѿры́гнꙋ се́рдце моѐ: Є҆ѵⷢ҇лїе лꙋкѝ, зача́ло д҃: Воста́вши мр҃їа́мъ: По н҃-мъ ѱалмѣ̀ стїхи́ра, гла́съ ѕ҃: Весели́тесѧ лю́дїе: пи́сана на Гдⷭ҇и воззва́хъ, Сла́ва. Канѡ́на два̀ бцⷣы, со і҆рмосо́мъ на и҃. Є҆ди́нъ, гла́съ ѕ҃: Дрꙋгі́й, гла́съ и҃: И҆ мч҃нка, на ѕ҃, гла́съ в҃. Катава́сїа: Хрⷭ҇то́съ ражда́етсѧ: По г҃-й пѣ́сни, конда́къ и҆ і҆́косъ мч҃нка. Сѣда́ленъ бцⷣы, гла́съ и҃. Сла́ва, ст҃а́гѡ, гла́съ то́йже: И҆ ны́нѣ, бцⷣы. По ѕ҃-й пѣ́сни,

Конда́къ бцⷣы, гла́съ д҃. Подо́бенъ: Ꙗ҆ви́лсѧ є҆сѝ: Чⷭ҇тна́гѡ ѡ҆́браза твоегѡ̀ зна́менїе пра́зднꙋюще лю́дїе твоѝ, бг҃ороди́тельнице, и҆́мже ди́внꙋю побѣ́дꙋ на сопроти̑вныѧ гра́дꙋ твоемꙋ̀ дарова́ла є҆сѝ. тѣ́мже тебѣ̀ вѣ́рою взыва́емъ. ра́дꙋйсѧ, дв҃о, хрⷭ҇тїа́нъ похвало̀.

И҆ і҆́косъ. и҆ чте́мъ про́логъ. По ѳ҃-й пѣ́сни, свѣти́ленъ бцⷣы. Сла́ва, мч҃нка: И҆ ны́нѣ, бцⷣы. На хвали́техъ стїхи̑ры на д҃: гла́съ ѕ҃, самогла́сны. Сла́ва, мч҃нка, гла́съ в҃: Терпѣ́въ во страда́нїи, мч҃нче: И҆ ны́нѣ, бцⷣы, гла́съ и҃: Мнѧ́щесѧ непокори́вїи: Славосло́вїе вели́кое. По трист҃о́мъ тропа́рь ст҃а́гѡ: Сла́ва, и҆ ны́нѣ, бцⷣы. є҆ктєнїѝ и҆ ѿпꙋ́стъ, и҆ ча́съ а҃. На а҃-мъ часѣ̀, тропа́рь бцⷣы. Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трист҃о́мъ на всѣ́хъ часѣ́хъ конда́къ бцⷣы, непремѣ́ннѡ. И҆ соверше́нный ѿпꙋ́стъ. На лїтꙋргі́и, бл҃жє́нна бцⷣы, а҃-гѡ канѡ́на пѣ́снь г҃-ѧ, на д҃: в҃-гѡ канѡ́на пѣ́снь ѕ҃-ѧ, на д҃. Прокі́менъ, гла́съ г҃. Пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: И҆ мч҃нкꙋ, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀: А҆по́столъ бцⷣы, ко є҆вре́ємъ, зача́ло т҃к: И҆мѣ́ѧше ᲂу҆́бѡ пе́рваѧ ски́нїа: и҆ мч҃нкꙋ а҆по́столъ ко є҆фесе́ємъ, зача́ло сл҃г. Возмога́йте ѡ҆ гдⷭ҇ѣ: А҆ллилꙋ́їа, гла́съ и҃: Слы́ши дщѝ и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи. И҆ мч҃нкꙋ, Сті́хъ: Мнѡ́ги скѡ́рби првⷣнымъ: Є҆ѵⷢ҇лїе бцⷣы, лꙋкѝ, зача́ло н҃д: Вни́де і҆и҃съ въ ве́сь нѣ́кꙋю: мч҃нка, є҆ѵⷢ҇лїе і҆ѡа́нна, зача́ло н҃: А҆́зъ є҆́смь лоза̀ и҆́стиннаѧ: Прича́стенъ бцⷣы: Ча́шꙋ сп҃се́нїѧ: Мч҃нка, Въ па́мѧть вѣ́чнꙋю:

🕅 Потре́бно є҆́сть вѣ́дати и҆ сїѐ, ꙗ҆́кѡ а҆́ще слꙋчи́тсѧ пра́здникъ прест҃ы́ѧ бцⷣы, чⷭ҇тна́гѡ є҆ѧ̀ зна́менїѧ: И҆ ст҃а́гѡ великомч҃нка і҆а́кѡва пе́рсскагѡ, въ недѣ́лю. На ма́лѣй вече́рни, на Гдⷭ҇и воззва́хъ, стїхи̑ры воскрⷭ҇ны гла́са, на д҃: Сла́ва, и҆ ны́нѣ, зна́менїѧ. На стїхо́внѣ стїхи́ра воскрⷭ҇на є҆ди́на: и҆ зна́менїѧ стїхо́вна со стїхѝ є҆ѧ̀. Сла́ва, и҆ ны́нѣ, зна́менїѧ. Та́же, Ны́нѣ ѿпꙋща́еши: и҆ по трист҃о́мъ тропа́рь воскрⷭ҇нъ: Сла́ва, и҆ ны́нѣ, зна́менїѧ. Є҆ктенїа̀ ма́лаѧ: Поми́лꙋй на́съ бж҃е: и҆ ѿпꙋ́стъ. На вели́цѣй вече́рни, по ѻ҆бы́чномъ стїхосло́вїи на Гдⷭ҇и воззва́хъ, стїхи̑ры воскрⷭ҇ны г҃, и҆ а҆нато́лїевъ а҃: и҆ зна́менїѧ г҃: и҆ мч҃нка і҆а́кѡва г҃. Сла́ва, зна́менїѧ. И҆ ны́нѣ, бг҃оро́диченъ а҃-й гла́са. Чтє́нїѧ зна́менїѧ. На лїті́и стїхи̑ры зна́менїѧ: Сла́ва, мч҃нка: И҆ ны́нѣ, зна́менїѧ. На стїхо́внѣ стїхи̑ры воскрⷭ҇ны: Сла́ва, мч҃нка, И҆ ны́нѣ, зна́менїѧ. На бл҃гослове́нїи хлѣ́бѡвъ тропа́рь зна́менїѧ три́жды. А҆́ще нѣ́сть бдѣ́нїѧ, глаго́лемъ тропа́рь воскрⷭ҇нъ. Сла́ва, мч҃нка: И҆ ны́нѣ, зна́менїѧ. На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды. Сла́ва, мч҃нка: И҆ ны́нѣ, зна́менїѧ. По каѳі́смахъ, сѣда́льны воскрⷭ҇ны, съ бг҃оро́дичны и҆́хъ. Та́же полѷеле́й, и҆ велича́нїе пое́мъ: Досто́йно є҆́сть велича́ти тѧ̀ бцⷣе дв҃о, чⷭ҇тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ. И҆лѝ: Пѣ́снь всѧ́кꙋ дх҃о́внꙋю принесе́мъ бцⷣѣ. ѱало́мъ и҆збра́нный: Помѧнѝ гдⷭ҇и дв҃да, и҆ всю̀ кро́тость є҆гѡ̀: И҆ тропарѝ: А҆́гг҃льскїй собо́ръ: и҆ сѣда́льны зна́менїѧ кꙋ́пнѡ всѧ̑ г҃. Степє́нна, и҆ прокі́менъ гла́са: Є҆ѵⷢ҇лїе воскрⷭ҇но: Та́же воскрⷭ҇нїе хрⷭ҇то́во: ѱало́мъ н҃. стїхи́ра воскрⷭ҇на. Канѡ́нъ воскрⷭ҇нъ, со і҆рмосо́мъ на д҃: зна́менїѧ є҆ди́нъ канѡ́нъ на ѕ҃: мч҃нка на д҃. Катава́сїа: Хрⷭ҇то́съ ражда́етсѧ: По г҃-й пѣ́сни, конда́къ зна́менїѧ и҆ мч҃нка, и҆ сѣда́ленъ мч҃нка. Сла́ва, и҆ ны́нѣ, зна́менїѧ. По ѕ҃-й пѣ́сни, конда́къ и҆ і҆́косъ воскрⷭ҇нъ. На ѳ҃-й пѣ́сни, пое́мъ чⷭ҇тнѣ́йшꙋю: Свѣти́ленъ воскрⷭ҇нъ: Сла́ва, мч҃нка: И҆ ны́нѣ, зна́менїѧ. На хвали́техъ стїхи̑ры воскрⷭ҇ны д҃: и҆ зна́менїѧ со Сла́внымъ д҃, гла́съ ѕ҃. самогла́сны со стїхѝ. Стїхи́ же глаго́лемъ: Воскреснѝ гдⷭ҇и въ поко́й тво́й: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое, и҆ по трист҃о́мъ тропа́рь воскрⷭ҇нъ то́чїю. є҆ктєнїѝ и҆ ѿпꙋ́стъ, та́же ча́съ а҃-й. На а҃-мъ часѣ̀, тропа́рь воскрⷭ҇нъ. Сла́ва, зна́менїѧ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ зна́менїѧ: и҆ про́чее вослѣ́дованїе а҃-гѡ часа̀, и҆ ѿпꙋ́стъ. На г҃-мъ часѣ̀, тропа́рь воскрⷭ҇нъ: Сла́ва, мч҃нка: И҆ ны́нѣ, бг҃оро́диченъ часѡ́въ. Та́кожде и҆ на ѕ҃-мъ часѣ̀, и҆ на ѳ҃-мъ, глаго́лемъ тропа́рь зна́менїѧ, и҆ мч҃нка, премѣнѧ́юще: тропа́рь же воскрⷭ҇нъ глаго́лемъ непремѣ́ннѡ. По Ѻ҆́ч҃е на́шъ, конда́къ воскрⷭ҇нъ и҆ зна́менїѧ, глаго́лемъ премѣнѧ́юще. На лїтꙋргі́и, бл҃жє́нна гла́са на ѕ҃: и҆ бцⷣы пѣ́снь г҃-ѧ на д҃. По вхо́дѣ тропа́рь воскрⷭ҇нъ, и҆ зна́менїѧ, и҆ мч҃нка. Конда́къ воскрⷭ҇нъ. Сла́ва, мч҃нка: И҆ ны́нѣ, зна́менїѧ. Прокі́менъ, а҆по́столъ, А҆ллилꙋ́їа, є҆ѵⷢ҇лїе и҆ прича́стенъ, пре́жде воскрⷭ҇нъ, и҆ пото́мъ бцⷣы.

🕃 Въ то́йже де́нь и҆́же во ст҃ы́хъ ѻ҆тца̀ на́шегѡ +і҆а́кѡва+ є҆пⷭ҇кпа, росто́вскагѡ чꙋдотво́рца.

Соверша́етсѧ собо́ръ є҆гѡ̀, и҆дѣ́же лежа́тъ мѡ́щи є҆гѡ̀.

Тропа́рь, гла́съ д҃: И҆збра́нъ ѿ ю҆́ности бг҃ови бы́въ, ст҃и́телю і҆а́кѡве: сегѡ̀ ра́ди а҆рхїере́йства са́номъ почте́нъ, ᲂу҆па́слъ є҆сѝ лю́ди, ꙗ҆̀же тебѣ̀ бг҃омъ врꙋчє́нныѧ. тѣ́мже и҆ по преставле́нїи чꙋде́съ дарова̑нїѧ ѿ бг҃а прїѧ́лъ є҆сѝ, и҆сцѣлѧ́ти разли̑чныѧ недꙋ́ги: молѝ ѡ҆ на́съ соверша́ющихъ честнꙋ́ю па́мѧть твою̀. да тебѐ непреста́ннѡ велича́емъ.

Конда́къ, гла́съ и҃: Ꙗ҆́кѡ а҆рхїере́євъ сопресто́льникъ, и҆ ст҃и́телємъ и҆зрѧ́дный побо́рникъ бы́лъ є҆сѝ, ст҃и́телю і҆а́кѡве, непреста́ннѡ сохранѧ́й ѻ҆те́чество твоѐ, гра́дъ же и҆ лю́ди, тебѐ вѣ́рою почита́ющыѧ, и҆ честны̑мъ моще́мъ твои̑мъ покланѧ́ющыѧсѧ, да велегла́снѡ тебѣ̀ вопїе́мъ: ра́дꙋйсѧ і҆а́кѡве бг҃омꙋ́дре.

к҃и. 🕃 Ст҃а́гѡ прпⷣбномч҃нка +стефа́на+ но́вагѡ:

И҆ ст҃а́гѡ мч҃нка +і҆рина́рха+.

Стїхи̑ры прпⷣбнагѡ на ѕ҃, гла́съ ѕ҃. Подо́бенъ: Всю̀ ѿложи́вше: Сла́ва, гла́съ то́йже, самогла́сенъ: Ѿ младе́нства бг҃ꙋ: На стїхо́внѣ ѻ҆ктѡ́иха. Сла́ва, гла́съ и҃: Є҆́же по ѡ҆́бразꙋ: Тропа́рь, гла́съ д҃: По́стнически предподвиза́всѧ на горѣ̀: ѻ҆ктѡ́врїа въ з҃і де́нь. [зрѝ] Мч҃нка же і҆рина́рха слꙋ́жба пое́тсѧ на повече́рїи. На ᲂу҆́трени, ѻ҆́ба канѡ́на ѻ҆ктѡ́иха, без̾ мч҃нчнѡвъ: и҆ ст҃а́гѡ на ѕ҃, гла́съ ѕ҃. По г҃-й пѣ́сни,

Конда́къ, гла́съ и҃. Подо́бенъ: Взбра́нной: Трⷪ҇цы рачи́телѧ, и҆ бж҃е́ственнаго стефа́на восхва́лимъ вѣ́рнѡ, пѣ́сньми празднолю́бцы ѿ се́рдца, ꙗ҆́кѡ почествова́вша начерта́нїе кра́сное влⷣки, и҆ ма́тере є҆гѡ̀: и҆ согла́снѡ ны́нѣ ѿ любвѐ возопїи́мъ є҆мꙋ̀, ра́дꙋющесѧ: ра́дꙋйсѧ, ѻ҆́тче присносла́вне.

Та́же сѣда́ленъ, гла́съ а҃, два́жды. По ѕ҃-й пѣ́сни,

Конда́къ, гла́съ г҃. Подо́бенъ: Дв҃а дне́сь: И҆з̾ непло́дна, преподо́бне, ко́рене, возрастѐ вѣ́твь, первострада́льцꙋ тезоимени́те, мона́хѡвъ наста́вникъ вели́къ, ѻ҆́тче, ꙗ҆ви́лсѧ є҆сѝ, и҆ ꙗ҆́рости не ᲂу҆боѧ́всѧ царѧ̀, не хотѧ́ща хрⷭ҇то́въ чествова́ти ѡ҆́бразъ: сегѡ̀ ра́ди сконча́всѧ. мꙋ́ченическїй вѣне́цъ прїѧ́лъ є҆сѝ, стефа́не.

И҆ і҆́косъ. По ѳ҃-й пѣ́сни, свѣти́ленъ ѻ҆ктѡ́иха. Сла́ва, ст҃а́гѡ. На стїхо́внѣ ѻ҆ктѡ́иха. На лїтꙋргі́и, блажє́нна ѻ҆ктѡ́иха, на д҃, и҆ ст҃а́гѡ пѣ́снь г҃-ѧ, на д҃. Прокі́менъ, гла́съ и҃: Восхва́лѧтсѧ преподо́бнїи во сла́вѣ: Сті́хъ: Воспо́йте гдⷭ҇еви пѣ́снь но́вꙋ: А҆по́столъ къ тїмоѳе́ю, зача́ло сч҃а: Не постыди́сѧ ᲂу҆́бѡ стрⷭ҇тїю гдⷭ҇а на́шегѡ і҆и҃са хрⷭ҇та̀: А҆ллилꙋ́їа, гла́съ и҃: Блаже́нъ мꙋ́жъ боѧ́йсѧ гдⷭ҇а: Сті́хъ: Си́льно на землѝ бꙋ́детъ: Є҆ѵⷢ҇лїе матѳе́а, зача́ло л҃з: Є҆гда̀ го́нѧтъ вы̀ во гра́дѣ се́мъ: Прича́стенъ: Въ па́мѧть вѣ́чнꙋю бꙋ́детъ пра́ведникъ:

к҃ѳ. Ст҃а́гѡ мꙋ́ченика +парамо́на+: И҆ ст҃а́гѡ мꙋ́ченика +фїлꙋме́на+: И҆ прпⷣбнагѡ +а҆ка́кїа+, и҆́же въ лѣ́ствицѣ свидѣ́тельствованнагѡ.

А҆ллилꙋ́їа, и҆лѝ тропа́рь. Стїхи̑ры ѻ҆ктѡ́иха г҃, и҆ мꙋ́ченика г҃, гла́съ д҃. Подо́бенъ: Зва́нный свы́ше: [зрѝ] Слꙋ́жба преподо́бнагѡ а҆ка́кїа пое́тсѧ на повече́рїи. На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃а́гѡ на д҃, гла́съ д҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни, мꙋ́чениченъ ѻ҆ктѡ́иха. По ѳ҃-й пѣ́сни, свѣти́ленъ, и҆ на стїхо́внѣ ѻ҆ктѡ́иха.

л҃. 🕂 Ст҃а́гѡ и҆ всехва́льнагѡ а҆пⷭ҇ла +а҆ндре́а+ первозва́ннагѡ.

На вели́цѣй вече́рни, пое́мъ: Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и воззва́хъ, пое́мъ стїхи̑ры на и҃, гла́съ д҃. Подо́бенъ: Зва́нный свы́ше: Сла́ва, гла́съ то́йже, самогла́сенъ: Ры́бъ лови́твꙋ: И҆ ны́нѣ, гла́съ то́йже: И҆са́їе ликꙋ́й: Вхо́дъ, прокі́менъ днѐ, и҆ чтє́нїѧ г҃: Втора́гѡ посла́нїѧ петро́ва, зача́ло н҃и, н҃ѳ и҆ ѯ҃а. На лїті́и стїхи́ра хра́ма и҆ а҆пⷭ҇ла, гла́съ а҃. Сла́ва гла́съ и҃: Проповѣ́дника вѣ́ры: И҆ ны́нѣ: Влⷣчце прїимѝ: На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ: съ припѣ́вы. Сла́ва, гла́съ г҃: Скро́вника петро́ва: И҆ ны́нѣ, гла́съ то́йже: І҆ѡ́сифе рцы̀ на́мъ: По трист҃о́мъ,

Тропа́рь, гла́съ д҃: Ꙗ҆́кѡ а҆пⷭ҇лѡвъ первозва́нный, и҆ верхо́внагѡ сꙋ́щїй бра́тъ, влⷣцѣ всѣ́хъ, а҆ндре́е, моли́сѧ, ми́ръ вселе́ннѣй дарова́ти, и҆ дꙋша́мъ на́шымъ ве́лїю млⷭ҇ть.

Сла́ва, и҆ ны́нѣ: Є҆́же ѿ вѣ́ка ᲂу҆тае́ное: И҆ ѿпꙋ́стъ. На ᲂу҆́трени, на Бг҃ъ гдⷭ҇ь, тропа́рь а҆пⷭ҇ла два́жды. Сла́ва, и҆ ны́нѣ, бг҃оро́диченъ. По каѳі́смахъ сѣда́льны а҆пⷭ҇ла, съ бг҃оро́дичны и҆́хъ. И҆ чте́нїе. По полѷеле́и сѣда́ленъ, гла́съ є҃, два́жды. Сла́ва, и҆ ны́нѣ, бг҃оро́диченъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: Всѧ́кое дыха́нїе: Є҆ѵⷢ҇лїе матѳе́а, зача́ло ѳ҃: Ходѧ̀ і҆и҃съ при мо́ри галїле́йстѣмъ: По н҃-мъ ѱалмѣ̀ стїхи́ра, гла́съ и҃: Проповѣ́дника вѣ́ры: пи́сана, Сла́ва, на лїті́и. Та́же, мл҃тва: Спасѝ бж҃е лю́ди твоѧ̑: Канѡ́нъ бцⷣы, со і҆рмосо́мъ на ѕ҃, гла́съ а҃: и҆ а҆по́стола два̀ канѡ́на на и҃, гла́съ а҃. Катава́сїа, хрⷭ҇то́съ ражда́етсѧ: По г҃-й пѣ́сни, сѣда́ленъ, гла́съ и҃. Подо́бенъ: Премꙋ́дрости: Сла́ва, и҆́нъ, гла́съ и҃ подо́бенъ то́йже. И҆ ны́нѣ, бг҃оро́диченъ. По ѕ҃-й пѣ́сни,

Конда́къ, гла́съ в҃: Въ мл҃твахъ: Мꙋ́жества тезоимени́таго бг҃оглаго́льника, и҆ цр҃кве возслѣ́дователѧ верхо́внаго, петро́ва сро́дника восхва́лимъ: занѐ ꙗ҆́коже дре́вле семꙋ̀, и҆ ны́нѣ на́мъ воззва̀, прїиди́те, ѡ҆брѣто́хомъ жела́емаго.

И҆ і҆́косъ. По ѳ҃-й пѣ́сни, свѣти́ленъ а҆пⷭ҇ла. Сла́ва, и҆́нъ: И҆ ны́нѣ, бг҃оро́диченъ. На хвали́техъ стїхи̑ры на д҃, гла́съ а҃. Подо́бенъ: Нбⷭ҇ныхъ чинѡ́въ: Сла́ва, гла́съ и҃, самогла́сенъ: Проповѣ́дника вѣ́ры: И҆ ны́нѣ, гла́съ то́йже: Воспрїимѝ, виѳлее́ме: Славосло́вїе вели́кое, и҆ тропа́рь а҆по́стола. Сла́ва, и҆ ны́нѣ: бг҃оро́диченъ воскре́сенъ. Є҆ктєнїѝ, и҆ ѿпꙋ́стъ, и҆ ча́съ а҃-й. На лїтꙋргі́и, бл҃жє́нна, ѿ канѡ́нѡвъ пѣ́снь г҃-ѧ и҆ ѕ҃-ѧ, на и҃. Прокі́менъ, гла́съ и҃: Во всю̀ зе́млю и҆зы́де вѣща́нїе и҆́хъ: Сті́хъ: Нб҃са̀ повѣ́даютъ сла́вꙋ бж҃їю: А҆по́столъ къ корі́нѳѧнѡмъ, зача́ло рл҃а: Бг҃ъ ны̀ посла́нники: А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и. Є҆ѵⷢ҇лїе і҆ѡа́нна, зача́ло д҃: Стоѧ́ше і҆ѡа́ннъ, и҆ ѿ ᲂу҆чени̑къ є҆гѡ̀ два̀: Прича́стенъ, Во всю̀ зе́млю:

а҃. Ст҃а́гѡ проро́ка +наꙋ́ма+ .

А҆ллилꙋ́їа, и҆лѝ тропа́рь. Стїхи̑ры бг҃оро́дицы, гла́съ г҃. Подо́бенъ: Ве́лїѧ: и҆ ст҃а́гѡ, гла́съ и҆ подо́бенъ то́йже. На стїхо́внѣ ѻ҆ктѡ́иха.

Тропа́рь, гла́съ в҃: Прⷪ҇ро́ка твоегѡ̀ наꙋ́ма па́мѧть, гдⷭ҇и, пра́зднꙋюще, тѣ́мъ тѧ̀ мо́лимъ: сп҃сѝ дꙋ́шы на́шѧ.

На ᲂу҆́трени, А҆ллилꙋ́їа во гла́съ ѻ҆ктѡ́иха, и҆ трⷪ҇чны гла́са, по ѻ҆бы́чаю: и҆лѝ тропа́рь. По каѳі́смахъ, сѣда́льны ѻ҆ктѡ́иха, и҆ чте́нїе. Ѻ҆́ба канѡ́на ѻ҆ктѡ́иха, и҆ прⷪ҇ро́ка на д҃, гла́съ є҃. По г҃-й пѣ́сни, сѣда́ленъ, гла́съ є҃. По ѕ҃-й пѣ́сни, мꙋ́чениченъ ѻ҆ктѡ́иха.

И҆лѝ конда́къ, гла́съ д҃. Подо́бенъ: Ꙗ҆ви́лсѧ є҆сѝ: Просвѣти́вшеесѧ дх҃омъ чи́стое твоѐ се́рдце, прⷪ҇ро́чества бы́сть свѣтлѣ́йшагѡ прїѧ́телище: зри́ши бо ꙗ҆́кѡ настоѧ̑щаѧ дале́че сꙋ̑щаѧ. сегѡ̀ ра́ди тѧ̀ почита́емъ, прⷪ҇ро́че блаже́нне, наꙋ́ме сла́вне.

И҆ чте́мъ про́логъ. По ѳ҃ пѣ́сни, свѣти́ленъ трⷪ҇ченъ. На стїхо́внѣ ѻ҆ктѡ́иха.

в҃. Ст҃а́гѡ прⷪ҇ро́ка +а҆ввакꙋ́ма+ .

Подо́бнѣ, А҆ллилꙋ́їа, и҆лѝ тропа́рь вчера́шнїй. Стїхи̑ры бцⷣы г҃, гла́съ д҃. Подо́бенъ: Ꙗ҆́кѡ до́блѧ: и҆ прⷪ҇ро́ка г҃, гла́съ и҆ подо́бенъ то́йже. На ᲂу҆́трени, ѻ҆́ба канѡ́на ѻ҆ктѡ́иха, и҆ прⷪ҇ро́ка на д҃, гла́съ д҃. По г҃-й пѣ́сни, сѣда́ленъ, гла́съ д҃. По ѕ҃-й пѣ́сни,