[глⷡ҇а м҃з] Ѡ҆ зна́менїѧхъ влⷣчнихъ, и҆ бг҃оро́дичныхъ пра́здникѡвъ, и҆ ст҃ы́хъ

Подоба́етъ вѣ́дати, ꙗ҆́кѡ пра́здницы раздѣле́ни сꙋ́ть на вєли́кїѧ, срє́днїѧ же и҆ ма̑лыѧ.

Вели́цыи ᲂу҆́бѡ пра́здницы хрⷭ҇то́вы, и҆ бг҃оро́дичны, и҆ прⷣте́чева два̀: ржⷭ҇тво̀ и҆ ᲂу҆сѣкнове́нїе: и҆ ѻ҆бои́хъ верхо́вныхъ а҆пⷭ҇лѡвъ, петра̀ и҆ па́ѵла, и҆́мꙋтъ зна́мєнїѧ, крⷭ҇тъ ѡ҆крꙋже́нъ 🕀: и҆̀мже бдѣ́нїе и҆ всѧ̀ слꙋ́жба пра́здника соверша́етсѧ по ᲂу҆ста́вꙋ.

Сре́днїи же пра́здницы ст҃ы́хъ и҆́мꙋтъ двѣма̀ ви́ды, крⷭ҇тъ съ полꙋкрꙋ́жїемъ: 🕁 и҆́мже бдѣ́нїе соверша́етсѧ: прилага́етсѧ же и҆ канѡ́нъ бцⷣы на ᲂу҆́трени по ᲂу҆ста́вꙋ:

Дрꙋзі́и же крⷭ҇тъ є҆ди́нъ то́чїю 🕂: и҆́мже бдѣ́нїе не соверша́етсѧ. На вече́рни, Бл҃же́нъ мꙋ́жъ, а҃-й а҆нтїфѡ́нъ: и҆ на Гдⷭ҇и воззва́хъ, стїхи̑ры на ѕ҃: ѿ произво́ла же на и҃: и҆ чте́нїѧ г҃, и҆ на стїхо́внѣ. На ᲂу҆́трени полѷеле́й, и҆ є҆ѵⷢ҇лїе, канѡ́нъ на и҃: и҆ славосло́вїе вели́кое: и҆ про́чаѧ слꙋ́жба по ᲂу҆ста́вꙋ.

Ма́лїи же пра́здницы и҆́мꙋтъ двѣма̀ ви́ды трѝ то́чки несоверше́ннѡ ѡ҆крꙋжены̀. Красе́нъ ᲂу҆́бѡ ви́дъ и҆мꙋ́щымъ 🕃=: На вече́рни каѳі́сма ѻ҆бы́чнаѧ: на Гдⷭ҇и воззва́хъ, стїхи̑ры на ѕ҃. На ᲂу҆́трени канѡ́нъ на ѕ҃, и҆ славосло́вїе вели́кое: и҆ про́чаѧ слꙋ́жба по ᲂу҆ста́вꙋ.

Че́рнъ же ви́дъ и҆мꙋ́щымъ 🕃: то́чїю на Гдⷭ҇и воззва́хъ, стїхи̑ры на ѕ҃: на ᲂу҆́трени канѡ́нъ на ѕ҃. На лїтꙋргі́и по чи́нꙋ ᲂу҆ста́ва. Не и҆мꙋ́щымъ же зна́менїѧ, стїхи̑ры на г҃: канѡ́нъ же на ᲂу҆́трени на д҃.