[глⷡ҇а м҃є] Ѡ҆ стѧжа́нїи чꙋжди́хъ трꙋдѡ́въ

Стѧжа́нїе же чꙋжди́хъ трꙋдѡ́въ вноси́ти каково́любо, ѿню́дъ нѣ́сть на по́льзꙋ на́мъ, и҆ па́че же ꙗ҆́кѡ стра́стнїи, и҆ дꙋше́ю не́мощнїи прїима́ти во ѻ҆би́тели: но ꙗ҆́кѡ ꙗ҆́да смертоно́сна ѿбѣга́ти же и҆ ѿгонѧ́ти, ꙗ҆̀же ѡ҆ таковы́хъ, ѿ бж҃е́ственныхъ писа́нїй сочета́хомъ, по ра́зꙋмꙋ, є҆го́же возлюби́хомъ соглаша́юща и҆ ᲂу҆твержда́юща и҆́же по бз҃ѣ таковы́й ра́зꙋмъ и҆мꙋ́щымъ, во є҆ди́но собра́вшымсѧ ѻ҆бщебра́тство. глави́зны же зако́нны, ѡ҆бде́ржны, а҆ не смотри́тельны, и҆лѝ ѿ ча́сти: ꙗ҆̀же бо ѿ ча́сти, смотри́тельны, нѣ́коегѡ ра́ди сло́ва содѣ̑ѧннаѧ, и҆лѝ глагѡ́ланнаѧ, не досто́итъ воспрїима́ти во ѡ҆бдє́ржнаѧ и҆ закѡ́ннаѧ свидѣ́тєльства. сегѡ̀ ра́ди ꙗ҆̀же ѿ ча́сти, смотри́тєльнаѧ въ си́хъ не сочета́хомъ: но ѡ҆бдє́ржнаѧ же и҆ закѡ́ннаѧ во все́мъ списа́нїи се́мъ сочета́хомъ ѡ҆ гдⷭ҇ѣ, сегѡ̀ ᲂу҆ста́ва цр҃ко́внагѡ ᲂу҆ставле́нїѧ, и҆ чи́на непрело́жнагѡ: въ него́же вника́ющꙋ настоѧ́телю ѻ҆́бщагѡ бра́тства, та́кожде и҆ цр҃кви нача́льникꙋ всеча́стнѣ вника́ющꙋ во ѡ҆бде́ржнꙋю сїю̀ кни́гꙋ: и҆ по настоѧ́щагѡ разсꙋжде́нїю, всегда̀ ᲂу҆чрежда́етсѧ, и҆ ᲂу҆краша́етсѧ цр҃ко́вное и҆сполне́нїе.

Приложи́мъ же и҆ сїѐ къ вѣ́дѣнїю, и҆́бо мїрско́е жи́тельство, за́повѣди гдⷭ҇ни ѡ҆бѣщава́етсѧ: и҆́ноческое же си́хъ вѧ́щше. что́ же є҆́сть сїѐ, є҆́же ᲂу҆мертви́тисѧ мі́рꙋ всемꙋ̀, и҆ распѧ́тое житїѐ воспрїѧ́ти, во вре́мѧ постриже́нїѧ и҆ повинове́нїѧ своегѡ̀, кото́рыйждо мона́хъ бг҃ꙋ ѡ҆бѣщава́етсѧ; ѡ҆бде́ржна бо за́повѣдь и҆ преда́нїе мона́шеское сїѐ є҆́сть. и҆ мы̀ ᲂу҆́бѡ сїѧ̑ и҆сповѣ́дꙋемъ и҆ мꙋ́дрствꙋемъ.